رواية قصة وجدان الفصل السادس والخمسون 56 بقلم انين الليل

وكانما صافنه واحد ضربني راشدي او نايمه وانصب عليه سطل ماي ثلج وفززني 

= ششنو مية الف دولار 

رد وهو يبتسم :: اي ياحلوه مية الف دولار الغايب مالتج طلعي العقد واتاكدي 

= شنو يعني ؟

:: يعني اذا تردين تتطلگين تحضريلي مية الف يعني بمصطلح ناسنا عشر دفاتر 

= بس انت ما كتلي 100 الف دولار كتلي مية الف 

:: وانتي ما سالتي والعلملج خليت هذا الغايب مو حتى ما تتطلگين لا اساسا انا بعد ما اريدج وطابت

نفسي منج ولان اعرفج اول وتالي ما تبقيين وياي خليت هذا المبلغ حتى اربح لاتنسيين انا تاجر وكل 

شي عندي ربح وخساره وانتي من يوم الاخذتج خساره

جاوبت بحده = مو من اگول حقير محد يصدگني 

:: انچبي لا اجي اخلي النعال بحلكج وانسيج حليب امج الرضعتي تردين تتطلگين تدفعيلي الغايب

وكل فلس صرفته عليج هذا اتفاقنا تتذكرين مو وغير هذا الكلام ما عندي 

= واني ما عندي ادفعلك وراح اشتكي عليك واكول هذا العقد باطل وانت قشمرتني

:: مثل ما تردين هسه ادزلج رقم داليا المحاميه وخليها تشتكي عليه شوفي ولج لا تفكرين اعبرلج كلمه حجيتيها

بحقي لو غلطه غلطتيها عليه انتي هسه عدوتي ولا يمكن اسامحج تبقيين تنثبرين بالشقه بوكت ما تحضريلي

فلوس الغايب اجي اخذهن وخط طلاكج يوصلج ع النعال

سد التلفون واني ما مصدكه هذا عاصف ما مصدكه كل هاي المده وهو لابس هذا القناع

رحت لا اراديا فتحت الخزنه وطلعت عقد الزواج شفته 

100 الف دولار 

يعني اني شكد غبيه ما باوعتله 

قريته واني بس اسب واشتم بعاصف 

شفت الذهب والعشر ملايين الي لحد هسه انا ما صارفه منهم لو الف دينار وشفت يم علبة الذهب 

مخلي فلوس تقريبا خمس ملايين 

عضيت ايدي = بس ذني شيسوون الله لا يوفقك حطمتني

شسوي محتاره لازم احصل ع الطلاك واساسا اني سمعته هو الي بعد ما يريدني يعني هو 

يريد يطلگني وبنفس الوقت يريد يربح براسي يعني حتى لگمة الاكل الي صارفها عليه حاسبها 

ويريد يطلعها بالمؤخر

صرت ابجي محتاره شسوي احتاجيت امي احتاجيت وحده من خالاتي احتاجيت ابويه 

محتاجتك هشام اريد احد يضمني يطبطب عليه يكلي لا تخافيين اني وياج سند راح اصيرلج

لويش هالشكل عاصف سويت بيه 

مو كنت اشوفك انت ملاكي الحارس انت الي من اصير وراك ما اخاف من اي شي

اتذكرت لمن مهدي يتهدد عليه وصرت ورا بكلمه ما خلا يحجي 

لمن اجه بهاء النذل وحچى عليه شلون خنكه وشلون كسر جهازه 

شلون ما انطه مجال الكل احد يحچي عليه 

شلون عووق غزوان وخلا هو والميت سوا

الاسرار الي كالي عليهن الصبر الي صبره عليه الدلال والصرف واللبس وكل شي 

كل هذا نسيته بلحظه نسيته من اخذت رقيه هسه صرت تكرهني وما ارهملك هسه صرت ما تريدني 

هسه تدور وياي ربح وخساره 

لعد كلامك نظراتك سوالفك وين 

كلها غش كلها خدااع 

يريد يعيش حياته ويكون اسره ويه رقيه

هزيت راسي وحچيت بمراره = اي طبعا حقه وما الومه خصوصا واني مو مثل رقيه بنظر الناس مطلقه

من بهاء وكدامه مغتصبني غزوان ومطلكني بهاء 

بچييت هوااي يمكن ما بقى دمع بعيوني ويمكن بعد ما اعرف على شنو ابچي 

احس خدودي مشكن من كد البچي وعيوني تقريبا ما صرت اشوف بيهن

صار ليل واني على نفس كعدتي ماي ما شربت ولكمه ما خليت بحلگي شريط حياتي كل ساع ينعاد 

عليه من يوم ما وعيت على سعدي وهو يضرب ويشتم ونجاة ضعيفه وسلبيه 

شريط حياتي الي ابتدا وانتهى واني ما فاهمه منه شي بس حزن ودمع 

وكفت على حيلي وصرت احجي

= كافي كومي على حيلج لا تصيرين مثل نجاة لازم اصير قويه واواجه التيار شيريد يصير بيه اغرك مثلا 

اصلا اني غركانه وطافحه

رحت سبحت حسيت نفسي مو نظيفه بعدها اتوضييت وصليت ورغم الصور الي مرن بيه البارحه كل 

شويه يخطفن گدامي وكلامه الي مثل السم 

يرن بااذني لكن كملت صلاتي وقريت قرآن ودعيت انو الله يقويني 

رفعت ايدي بالدعاء واردد. =. اللهم انت ثقتي ورجاىي 

اللهم انت ثقتي ورجاىي 

اللهم انت القوي وانا الضعيفه 

وانت العزيز وانا الذليله 

وانت الغني وانا الفقيره 

ياغياث المستغيثين اغثني 

ياغياث المستغيثين اغثني 

يا غياث المستغيثين اغثني

من كملت صلاتي طلعت للصاله وانا اردد لا حول ولا قوة الا باالله 

حسيت براحه او براد بكلبي رحت للمطبخ سلكت بيضتين وخدرت جاي وهذا الشي لازم اسوي 

حتى اعرف افكر 

اكلت وشربت الجاي واني كل الكلام يرن بااذني

ردت اتصل بي بس قررت اتركه فتره وبهاي الفتره احاول الكى مخرج حتى يطلگني 

صرت اكتب ع الگوكل وابحث عن قضايا الطلاق واحاول الكى قضيه مشابهه القضيتي لكن القانون 

العراقي بما انه اني العايفه والرجل متمسك بيه وما يريد يطلگني فمن حقه ان اتنازل عن كل الحقوق 

اله ومو بس هالشكل من حقه ان ينشزني 

يعني حتى لو طلگني ممكن ينشزني لمدة سبع سنوات ما ممكن ان اتزوج بس ممكن ان ارجع اله

وهنا سالت نفسي = اني ممكن ارجع العاصف 

بجييت صدكوني لان اني كل السويته والي حچيته لان اني ممكن اكون حبيته واغار علي لكن هو قتلني 

بنفس اللحظه الي ردت بيها اعيش ويا

بقيت كاعده ما اجاني نوم لحد صلاة الفجر صليت وحاولت انام لكن ما كدرت يمكن الساعه بالسبعه غفييت 

كعدت واني اسمع جرس الباب يندك كعدت باوعت للكامره 

شفت علاوي ويا مره باوعت الها زين عرفتها بيبي ولو اني لازم اسميها ام ابويه 

باوعت الساعة النقال كانت بالعشره اله ربع رحت فتحت الباب دخل علي وبيبي ورا سلمت عليه 

رديت عليها سلامي ابرود بدون لا احضنها ولا ابوسها فقط گتلها = هلا حجيه 

ولا حتى كلت الها اتفضلي هي ردت //. شني زعلانه عليه 

گعدت مقابيلها =. ليش انتي اشايفه 

علي گال (. ). وجد تره بي...

رفعت ايدي وجاوبته =. انت بالذات تسكت وما تفتح حلگك بكلمه بعدين شغلي وياك

بيبي بعصبيه //. اگلج على كيفج تره محد دره بي من خطب ومن عد وعقد يدخل ويطلع ما يحجي لحد

يوم عرسه درينه وعبالنه يتشاقى 

  انا جايتج اريد اعرف ليش عاصف هيج سوا 

ضحكت باستهزاء=. هههههه تردين اتفهميني انتي ما عندج علم 

بيبي // اي وروح جدج

=. واني ما يهمني كل الاريده يطلكني وانتو اتفكوني 

بيبي باستغراب //. منين انفكج

رديت بعصبيه =. منكم من كل بيت غازي ما اريد لا ابقى وياكم ولا اعرفكم 

بيبي //. هاي جزاتنا جزى الربى والتعب هيج تحچيين

=. ههههه ياربى ياتعب ( اتقربت منها واشر بيدي على نفسي ) اني الي ربيت نفسي وربيت اخويه 

بخدمتي الج وللبيت وبراتب ابويه الي تقبضينه من يوم الي امي ماتت لا تسوون نفسكم كرماء انتو 

مو اصحاب فضل عليه لا انتو مجرد واجهه تبينون نفسكم گدام الناس 

عود شوفونه مربيين الايتام اولاد ابنه

بيبي تهز بيدها // هاي كلها احنه خلف الله عليج طلعنه عايشين براتبج 

=. لا ما كلت عايشين براتبي گلت اني واخويه محد اله فضل علينه عايشين عدكم براتب ابويه الي تقبضينه 

•. خووش وبعد شعدج 

= ما عندي شي الي تردونه من سعدي سويتو وياي يمكن لو علي شويه اكبر هماتين اخذتو ثاركم منه •

بيبي // • ها هيج الحچي صار

بيبي وگفت //. من جابج عاصف انتي واخوج لمن ماتت امج وانا گتله هاي بت سعدي وابن سعدي اول وتالي 

يطلعون مثله. وهو ما قبل يكلي لا يمه ما الهم ذنب ما اذب لحمي بالشارع واتعير وهسه طلع كلامي صدك 

= بلي هو هذا الصح اني بت سعدي الي تكرهينه كلكم تكرهونه وتردون تنتقمون منه حتى وهو ميت

حتى من ابنه كتل اخو ومن مرته ماتت ردتو تنتقمون منه بيه اني وانتقمتو سويتو السويتو واني هسه 

عدله مذبوحه مقتوله

اتقربت منها اكثر = بس ابقى بت ابنج دمج ولحمج واقربلج من عاصف وراح اطلب منج اخر طلب لان بعد

لا اريد تشوفوني ولا اشوفكم ولا تعرفوني ولا اعرفكم اصلا اليسالكم كولو ماتو بس اريد احلفج بروح غازي

وبروح بدر تخليين عاصف يطلگني 

هزت راسها // لا هذا الشي بينج وبين رجلج جان اجيت هسه ردت اعرف منج ليش رجلج اخذله مره

عليج شسويتي 

بس طلعتي تستاهلين مو بس ياخذ عليج مره لا ويطيح حظج. ما متندمه بس شي واحد نسيت سواية ابوج 

وحسبتج مثلج مثل ابن بدر بس انتي ما تستاهلين جلبه مثل ابوج وحل اليصير بيج انا من الشمات

=. ادري بيكم كلكم نفس الشي تدعون الخير والبراءه وانتو ما تخافون من الله 

ردت باستهزاء // اي صدك بهاي صدكتي 

وكفت ومشت صوب باب الشقه دارت عليه //. هاي الما تخاف من الله هي الكالت العاصف على سوار امج 

هي ال اطت ابتها وحجت الصدك ونچلت ابتها الخاطرج بس انتي منين اتطلبينه نكاره ابوج سعدي

ما نظف للموت

راحت طلعت واني بقيت گاعده ورغم اني حاقده على كل بيت غازي لكن كلامها فاجاني

= يعني بيبي هي الكايله العاصف انو سعاد ماخذه السوار

رحت للغرفه اتمددت وبصراحه مرتبكه وخايفه وحتى ما مصدكه كل الصار بيه اسال نفسي

     = معقوله بيبي هي الي خلت بتها سارقه كدام عاصف بس ترجعلي سوار امي 

= هو وينه سوار امي راح ياخذه بس اني كنت قاسيه وياها 

= لا اني مو قاسيه وشنو يعني گالت سعاد ماخذه السوار لكن ما انسى انو هي مكعده رقيه بصفها

بالضبط بنفس مكاني الي كعدت بي بخطبة فرح ولو شنوتطلع مسويه ما اعذرها بلي صار

ويبقى هو السبب اي هو وبيبي السبب لان هو ما يرد الها طلب ف اكيد هي الي مشجعته يتزوج 

واكيد هو حاجيلها على كل شي 

= لا كان ما سكتت من حجييت اقلها تعيرني بلي سويته 

= يعني معقوله ما تعرف 

= لا لا تعرف شنو ما تعرف كاعده بصفها

صرت اتنفس قوي واتساءل = شسوي اشلون اتصرف والكل اتخلى عني 

=. والي سمعته والي صار بيه البارحه من عاصف معقوله 

= اكيد عاصف مو بوعيه 

= شنو مو بوعيه عاصف بوعيه وحجى كل الكلام الي كان ضامه بگلبه

درت على صفحتي واشوفه وهوويبتسم من نلعب بلي 

لو من شالني وغسل رجليه 

لو من اتخبل عليه من اتمرضت 

لو خباله من لبست الفستان

كعدت بجييت واحجي = معقوله كل هذا تزييف معقوله عاصف حاله حال بهاء ما اصدك عاصف كان لابس كل 

هذا الوكت قناع 

= زين ليش اني شسويتله 

= شسويتله ليش مو ابوي سعدي الي يكرهه ومن هو زغير راوا الويل ف اكيد يطلع حيفه بيه اني 

= بس ليش صبر كل هذا الوكت

رفعت كتافي = شعنده ما يهمه لكى الوقت المناسب وانتقم مني 

مسحت دموعي = ما ممكن اغفر لك لو بلحظه 

بقيت بالغرفه ما طلعت صليت الظهر وما طلعت من الغرفه التفكير راح يموتني الي صار لي من اتوفى ابويه 

عبالك حلم لكن الي شفته من عاصف كان كابوس ولحد هسه م صاحيه منه

افكر شسوي 

= منين اجيب ؟

= شلون اعيش ؟

= واذا ما دبرت الفلوس شراح يسوي 

= اكيد ما ادبرهن منين اجيبهن 

= لعب لعبته الحقير طبخها على نار هاديه ومن تمت فاجاني بيها

دموعي نزلن بحركه عرفت بنفسي اني لا حول ولا قوه حرفيا متحطمه متدمره ما الي منفذ حتى انقذ نفسي

وما اعرف شنو خطوته الجايه 

لو فرصا انهزمت وين اروح عد منو واني مو بحدي وياي علي اخوي زين شلون نعيش وبيش

باوعت للموبايل شفت الساعه كان دنيا ليل واني ولا منتبهه كمت اتوضييت وفرشت السجاده وصرت اصلي

بعدها كعدت على السجاده واني ابجي واشكي ال الله على عاصف والي سوا بيه لكن من اريد اوصل 

ادعي علي بعدم التوفيق ما اكدر 

كل دعائي = يارب اهدي وخلي يطلكني بهدوء

صرت ابجي واستذكر كل حياتي الي كانت عباره عن ابوي وعربدته وامي وضعفها واخوتي الي راحو وعاصف 

عاصف الي ما تركني والي كان ساكت بس هو يعمل بصمت الي ما خلاني احتاج اي شي وبنفس الوقت

يطالبني حك كل لكمه وكلها الي وكل لبسه لبسنياها ايطالبني بشي ما املكه ولا راح املكه وهسه

اني معلكه لا اني بسما ولا اني بكاع 

شسوي واني محد الي بس انت ياربي 

انهاريت وبچيت بحركه وحسيت بعلي وهو يحضني ويكلي

(. ). لا تبجيين 

رفعت راسي واني اشوف اخويه عيونه مليانات دموع وكاعد يمي ويطبطب على ظهري 

جاوبته بانكسار = علي تدري شنو صار بيه 

بقى بس شفايفه يرجفن ودموعه تنزل رديت 

= عاصف عاصف يريد مني هواي فلوس بس حتى يطلكني عاصف حسب 

حتى اللكمه الي اكلناها يريد فلوسها واني محتاره

انتبهت العلي واسمع دگات گلبه نسيت اي توتر مو زين اله 

مسحت دموعي = ياالله گووم حبيبي غسل خلي نروح للصاله 

هو وكف واني شلت المصلايه واحجي =. لازم استشير محامي 

صفنت = بلي لازم اشوف محامي بس مو داليا لان اعرف بي راح يراقبني لازم اتصرف عادي

طلعت للصاله شفت علي گاعد اتذكرت انو اني ما ماكله اي شي وعلاوي لحد هسه بدون غدا 

ردت اكله خلي نطلع نتعشى لكن ما الي قابليه ولا عندي خلك 

رحت للنطبخ گليت بيض وسويت چاي وحميت صمون واخذته اله بالصاله 

صرنا ناكل وبعيونه دموع خذلان وقهر

علي كال (. ) هوايه قسيتي على بيبي 

=. كلهم ظلموني واذوني 

(. ) بيبي ما تعرف بالسوا عاصف 

رفعت وجهي =. هههه ضحكت عليك اتگلك ما اعرف 

(. ) وجد هي هاي الحقيقه صدگي محد يعرف هو جاب عمال شالو كل الاثاث الي بالطابق الثاني 

وبعدها جاب غرفة نوم خلاها بغرفة بهاء القديمه ومن بيبي تساله يسكت ما يحجي

= هالشكل خوش مدرسينك 

رد بعصبيه ( ) اني مو زعطوط حتى يدرسوني جاي اگلج يدخل ويطلع ما يحجي ويه احد بس السلام

عليكم لحد يوم العرس الصبح اني وبيبي گاعدين نتريك اجه وكللها هو كان بره اجه وكللها 

:: يمه اليوم عرسي 

بيبي استغربت سالته // شني 

:: اي مثل ما سمعتي انا خطبت وعديت واليوم عرسي 

كام ىبيبي وگفت //. انت شتكول عاصف؟

:: ما اكول شي رجال ردتلي مره مشيت على اهلها وخطبتها واليوم اتزوج 

بيبي ابتسمت // ياا عاصف يمه تحجي صدك لو تتشاقى 

:: ما اتشافى حجيه ما سويت جريمه كله بشرع الله 

راح يمشي بيبي وكفته // اوكف فهمتي وين رايح 

:: يم الطبابيخ اشوفهم وخاف ناس تجينه

علي يستعطفني () صدگي وجدان هذا الصار واني موجود وبيبي لحكته ولزمته وهي تكله

- فهمني شصاير ياعرس هذا 

ما حجه وكللها :: العصر اتحضري ترحين للزفه تجيبين العروس 

هي حلفت //. ولا اروح ولا اوصل من رحت خطبتها ما شرتني ما گلت امشي وياي 

اسمع كلام علي واني متفاجئه =معقوله راح خطب بدون ما ياخذ بيبي

(. ) اي راح خاطب ومحد يدري بي لان من طلع اجه مهدي وكعد وسال بيبي اگلج هذا السمعته صدك 

• شسمعت ؟

• عاصف اليوم يعرس 

-مدري 

مهدي // شني يمه ما تدرين 

بيبي بعصبيه // منين ادري مو ه لتشوفني گاعده لا طالعه ولا ماشيه 

مهدي // عوود صدك 

- •. جا اجذب عليك توه ها اها اجه وگلي اليوم عرسي

مهدي // مو عده مره وصار سنتين يمها ما يجي ولا نشوفه مو عاركنه واريد اعزل وعاف كل شي على

مودها هسه هنوب خطبله وحده ومحد يدري بي 

بيبي // حالي من حالك

راح مهدي اني ويه بيبي كاعدين بالغرفه ومحد اجه ولا مر ولا سال بس غازي جاب صينية غدا البيبي 

= وشصار 

(. ) العصر هو بدل بغرفته الجوه وطلع اجه يم بيبي وگللها :: يمه امشي وياي گدام الناس 

بيبي ما ردت هو دنك عليها وباس راسها هي دفعته بايدها راح للباب ورد عليها وهماتين حچيى وياها 

:: يمه امشي الخاطري 

بيبي ردت // وروح غازي ما امشي ولا اخطي

(. ) راح ابحده ويا راح عمي مهدي ورجاء وفرح ونهاد وبناتها وجابر وسميره 

= وعماتي امل وانصاف 

( ) ما اجن او يجوز ما يردن 

( ) وجابها واجه دخلها للصاله وطلع يم الزلم 

حك خده (. ) ها اي وبيبي ما انطتهن وجه 

= شمدريك

( ) لان اني بقيت بالمضيف وشفت عاصف دخل للبيت وتالي طلع بسرعه شغل سيارته وما ادري وين راح

اجيت انام يم بيبي دخلت للغرفه لگيت ام غياث وبتها

( ) اني رجعت استحييت رحت گعدت بالصاله وسمعت بيبي تعاتب بيها اتكللها

ليش قبلتي ياخذ بت اخوج مو عده مره وزغيره وحلوه وما مقصره ويا ما تخافن من الله

ام غياث // عمه هو اجه وخطبها وگلي امشي وياي واحنه نعرفه العاصف طلع رايد البنيه والبنيه تريده

وهالرضت على شرج وتكعد ويا اهنا بالعشاير 

بيبي // ها چا ما شرطت وكالت اريد بيت بالولايه اذا ما عاجبتها العشاير وهذا القصر 

ام غياث // عمه اول وتالي ياخذها ما يخليها 

بيبي // خوش تارسات ايدجن منه 

ام غياث // عمه شني انتي ما راضيه

بيبي // انا ما دريت اله اليوم من اشترى الغرفه لدالي المرته هناك من يجون ما ادري بي الولد خاطب وعاقد

بس انا متعجبه اخوج شلون اطا ومحد اجه ويا 

ام غياث // شني عمه اخوي ما يعرف عاصف بس فك حلكه گله اخذها بعباتها 

• ها وانتي ويا 

• - اي اجه واخذني انا ورحيم واحنه استحينه نرده رحنه ويا

بيبي بعتب // وما كلتي خطيه البنيه يتيمه ومكسورة خاطر اشلون اقبل اروح ويا واخطبله بت اخوي 

ام غياث مبتسمه // يا عمه شني البنيه قابل شرطنه يطلكها شو هو گال مرتي ابغداد ورقيه اريدها يم امي 

بيبي // روحي عمه روحي اصعدي يم حبايبج 

- - عود گلت انام يمج 

- - لا وليد ابني ينام يمي روحي 

- - عمه چا گولي زعلانه

بيبي // اي ليش الچذب زعلانه كلش زعلانه على ابن حماي الجابله شريجه على بت اخو 

ام غياث // عمه تره عاصف گال الرحيم اذا ما اخذ رقيه اخذ غيرها 

بيبي // ومخلي ياخذ غيرها ولا هو هيج سوا تنطونه البت واحنه ما ندري طبختيها انتي 

ومرت اخوج وبته ياحيف يا وسفه ثاري جياتكم النه مو لله عدجن لعبه لعبتنها

هي طلعت من الغرفه وانا اجيت انام شفت بيبيتي تبجي ومن شافتني زادت بالبجي بعدها سالتني 

— وين عاصف راح 

( ) شفته ركب سيارته 

- - وياهو راح ويا 

( ) محد ابحده

وثاني يوم الضحى عاصف رجع اتلكيته وهو حضني وكلي بعتب :: انت هم زعلان عليه 

انا ما جاوبته بقيت بالمضيف وهو دخل غاب ساعه ورجع اجه للمضيف 

انا ما دخلت للبيت لمن ما بيبي الصبح كالت // امشي خلي نروح الاختك 

= منو جابكم 

( ) عمي جابر 

= يعني بيبي من اجت مو عاصف جايبكم ؟

سكت ما جاوبني سالته =علاوي ليش سكتت ؟

( ) هو عمي عاصف جابنه وبيبي الطريق كله ما تحجي ويا ومن نزلنه للمطعم ما نزلت ويانه

وحتى جايبه وياها علاكة ملابس وعلاجها تريد تبقى اهنا يمج بس انتي وجد انتي فشلتيها

وصرتي تحجيين وتغلطيين

اتنفست بعمق. = شوف علي كل بيت غازي لا كل بيت چاسب بعد ما اريد لا اعرفهم ولا يعرفونه 

( ) بس هذ...

قاطعته =. علي عاصف كسرني وهمه كلهم يكرهوني وحتى بيبي الي تكول عنها جايه وزعلانه وجايه ع اساس 

تكعد يمي لا هي جايه تريد اتكلي عاصف ما سوا شي غلط اتزوج والشرع محلل اربعه ما سمعتها لمن حاجيتها 

وطلبت منها اتكله يطلكني شگالت كالت ما اتدخل ما عليه 

=. علاوي ذوله يكرهونه ويكرهون ابونه منو علينه باللكمه الي انطوها النه اللكمه الي مغمسه بنظرات الكره 

من رجاء ونهاد ومهدي وفرح اللكمه الي اكلناها بخدمتي وبراتب ابويه

نزلن دموعي اجه يمي حضني (. ) لا تبچيين وجد انا وياج انا اخوج 

كلامه خلاني ابجي اكثر اتذكرت هشام واتذكرت رامي ياريتهم بقو وعشنا سوا اقلها الگى من يحاميلي 

من يكون لي سند حقيقي حسيت بدكات كلب علي ما منتظمه يعني اتوتر اتنفست بعمق واضطريت

اباوع له وابتسم رغم حزني گتله 

= بلي انت اخويه وسندي وما دام انت وياي اني ما اخاف من اي شي ولا اهتم الاي شي 

ياالله حبيبي. افتح البلي خلي نلعب

هو هز راسه بالنفي لكن اني حاچيته = شبيك علووش خلي نلعب وننسى ما دامك انت يمي اني باامان 

رحت شغلت البلي واني احسد نفسي على الشي الي دا اسوي وصرنا نلعب اني وعلاوي واثنينه نعرف 

انو احنه جاي نضحك على نفسنا علاوي گلي ( ) اريد انام تصبحين على خير 

=. وانت من اهله تريد تنام بغرفتك لو يمي بالغرفه 

( ) لا بغرفتي

راح الغرفته واني بقيت گاعده اباوع للكامرات واحجي = ادري بيك تراقبني لان اني الي اعرفك بس ما اهتم ومن

باچر راح ابدي اول خطوه وياك 

تقريبا الساعه بهدعش كمت رحت اتاكدت من الغاز ورجعت اتاكدت من الباب انو مسركيته من داخل 

فتحت الضوه على علاوي واخذت ملابس عاصف اخذتهن الغرفتي وهناك ردت اشگكهن وبس يجي اشمرهن 

بوجهه بعدها نزلت جنطه كانت فووك الكنتور وخليتهن بيها بدون ما اسويلهن اي شي بالعكس صفطتهن 

  ورحت جبت المشط والعطور والخاولي وحتى ( العفو ) شحاطته مالت الحمامه

  اخذت قاطه اللابسه من اجه البارحه وخليته بالجنطه ماردت احرگهن او اشگكهن حتى لا يكول مقهوره 

اتمددت على فراشي واحجي ويه نفسي = لازم اشوف محامي واطلب استشارته 

ما اكلكم ما فكرت بمنار لكن اتذكرت امها والي سوته فقررت اني اعتمد على نفسي واحاول الكى حل 

   الكل اموري

خلي اكللكم على شي ( النوم ) النوم بالليل ما صرت اعرفه اغفى شويه واكعد على حيلي افكر واسال نفسي 

هسه هو نايم بصفها حاضنها وشيسولف عليها هم نفسه يطخ بخدها هم يشاورها 

تلقاىيا ابجي واطلع للصاله اباوع للكامرا اشوفها يجوز هو موجود او جاي

ومرات بمجرد ما اغفى يمر خياله والي سوا بيه قبل يومين 

كعدت صليت الفجر ورجعت اتمددت وبدت سلسلة الافكار صرت ما اعرف يمته اغفى وشكد غفييت 

  گعدت بثمانيه اتريكت ورحت العلاوي شفته نايم ندهته

= علاوي اشو اگعد 

فتح عيونه حاجيته = صباح الخير يااالله اگعد اتريك 

() خليني نايم 

= لا اكعد اريد اروح اني وياك 

استعدل بفراشه //. وين ؟

= للسوك ياالله يالله

رحت قبله للمطبخ خليتله جبن وصمون وجاي. حاجيته =. ياالله حبيبي اتريك وخلي نروح نتسوك 

رفع راسه //. وجد انت شنو تردين اني اروح اجيبه الج ان...

قاطعته = علاوي اني اروح اتسوك وارجع حتى لو انت ما تقبل تروح وياي سوالف عاصف انساهن 

اني اهنا مسووله عنك وعن نفسي

فتت ابدل وادري بعلاوي ما قابل على كلامي ويجوز يخاف يجي عاصف وما يلگانه ويزعل 

لان علي فعلا يحبه العاصف وحتى متعلق بي 

لكن اني خلص اتخذت قرار انو بعد عاصف واهله ما يهموني 

ولازم اخلي يفهم انو هو ما يهمني ولا باي حال من الاحوال 

ردت البس عبايه اسلاميه لكن لبست فستان طويل 

هو مو تحدي بس اني من لبست الفستان لان شفته ما بي شي مستور ومحتشم واني هذا لبسي 

بس قبل كنت اخذ الاوامر منه هسه اختلف الوضع صرت اخذ الاوامر من نفسي

طلعت شفت علي لابس تراك ومنتظرني بالصاله 

سالته = شعجب اشو تراك 

( ) اي هياته السوك 

طلعنه اخذنا تكسي رغم السوك قريب نزلنه ورحت على محل انشاىيه اخذت منه كيلون وطلبت منه احد يجي 

يغيرلي الكيلون وانطي تعبه والرجال دز وياي عامل وصلنه للبيت والعامل ويانه شافني الحارس ابو يوسف

سالني //. سلامات عمو خو ماكو شي 

ابتسمت بوجهه = لا ما كو شي شغله بسيطه 

• • كان گلتيلي واني برسم الخدمه 

= اشكرك عمو اني احب اجيب شغلاتي بنفسي ،

- - براحتج

اعرف راح يتصل بعاصف لكن بعد ما يهمني ولا اخاف منه دخلت وعلي والولد دخلو وصار يشتغل ما اخذ

ويا حتى ربع ساعه انطاني المفاتيح وانطيته تعبه وراح جربته للباب قفل وياي وصلت يم علي

= ها حبيبي شنو تريد تتغدا 

( ) بكيفج 

= امم شنو رايك نتغدا سمج انت تحبه 

() اي 

= لعد امشي خلي نروح

() وين 

= اهنا واحد يشوي سمج نروح ونخلي يشويلنه سمجه 

() انا اروح 

= لا انت ما تعرف نروح اني وياك

طلعنه ورحنه نتمشى وصلنه واسنتگيت سمجه وطلبت يشويها وكانت اكو اسواق رحنه اشترينه شغلات 

بسيطه واخذت خبز من المخبز ورجعنه حاسبنه ابو السمج وجبناها واجينه 

دخلنه للشقه صليت ولكيت علي محضر السفره علي الي اعرف بي هو شگد حزين ومقهور

اتغدينه واحنه ساكتين من كملنه سويت جاي علووش ما قبل يشرب وراح الغرفته كال ينام 

واني رتبت المطبخ وصبيت كوب جاي واجيت اشربه بالصاله النقال بايدي اجتني رساله عرفتها منه 

واعرف شنو بيها 

قريتها

:: صايره اتطلعيين ابحدج ومغيره الكيلون 

:: براحتج ب اقل من راحتج بس لا تنسيين انتي بعدج على ذمتي ولازم تاخذين الاذن مني حتى تطلعيين 

:: هالمره اعذرج واسكت واغلس لان ماخذ بنظر الاعتبار حالتج النفسيه وانتي مقهوره بس مره ثانيه

رجليج اكسرهن اذا تطلعين

بعدين كاتب كلمه بعيده هوااي بين قوسين خلت گلبي يرجف ( مشتاقلج )

صار گدامي اهانته وحقارته والسوا بيه كتبتله كلمتين ( طلكني اكرهك ) 

رد عليه ::: هههههههههههه

اتمددت ع القنفه بالصاله على امل انو شويه اغفى واني كلساع اقرا كتابته واوكف يم كلمة مشتاقلج

تلقاىيا اتذكر كلامه الي يمكن غفييت سمعت الجرس يندك كعدت كان عندي امل انو هو يجي 

واساسا ما اعرف لويش اريده يجي

باوعت للكامرات شفت مره ما ميزتها رحت وره الباب سالت = منو 

جاوبت // اني خاله ام كرار افتحي 

رحت فتحت الها الباب بس شفتها 

  بلحظه اتذكرت هي اكيد هماتين رايحه العرسه ميلت عنها بزعل سالتني

• • شلونج خاله 

رديت ابرود = الحمد لله 

• • هاي شبيج وجدان 

مشيت گدامها = ما بيه شي 

كعدت وسالتني // زعلانه علينه ؟

= لا على شنو زعلانه

- - بيش تردين احلف لج ما عرفنه بلي صار اله بنفس اليوم الي اتزوج بي 

هزيت راسي. = اكيد ما عرفتو اله من رحتو من بغداد للناصريه 

ردت باستغراب // منو راح ؟

= انتي وكريم 

ردت بعتب // صار كريم صرتي تستنكفيين اتسمينه عمج

= اني ما عندي لا عم ولا خال ولا اي شي اني انسانه مقطوعه من شجره 

- - - والله من سولفتلي بيبيتج ما صدكت معقوله انتي هالشكل 

رديت بنتر = ليش اني شسويت شتردون اتشوفوني اخدم بعاصف ومرته الجديده 

بسرعه كالت // اتخسا منو هاي الي تخدميها بس لازم اتعرفين عاصف بزواجه اتصرف ابحده ما شار احد 

= يعني تردين اتفهميني انتو ...

قاطعتني // مو افهمج هاي الحقيقه احنه ما عرفنا بعاصف اتزوج اله بنفس يوم زواجه بالصدفه كريم خابر 

كان يتصل على رحيم وما يجاوبه فخابر غياث وگله عاصف اليوم زواجه وابوي ابيت خالي 

وكريم راسا سدا واجى متخبل وكلي وبعدها خابر عاصف واتحاجى ويا وانتي تعرفينه العمج 

كريم شكد عصبي ولعلمج كريم زعل على عاصف وعلى رحيم

= يعني انتو متدرون بي ولا رحتو اله 

- - لا ما عدنا علم وصدكي عمج كريم متخبل على عاصف ويكول الزم رحيم اله اطيح حظه 

بقيت ساكته ما جاوبت ام كرار كالت 

- - - شوفي وجد الزواج لا عيب ولا حرام بس السوا رحيم ومرته عيب لذلك عمج كريم من عرف خابر عاصف 

وصار يحجي علي ويعيط وهو رد كله جيب ام كرار وتعال انت معزووم لكن كريم صار يحجي على عاصف 

هواي كلام واني جايه هسه اريد اعرف منج لويش عاصف هالشكل سوا وياج

رديت. بحنق = لان نذل وحقير 

نزلن دموعي واني دا احاول امنعهن لكن خانني ونزلن ام كرار حضنتني 

- - اني الي اعرفه العاصف شگد يحبج بس الي ما عرفنا ليش هالشكل سوا 

باوعت الها هي ردت //. حتى كريم مستغرب الشي الصار اتصدگيين كلي قبل لا تتزوجون هو محاجي 

العاصف وگايله لويش ما تتزوج رقيه وعاصف راد گايله وحده الساكنه گلبي لو اتزوجها لو ابقى بدون زواج 

طول عمري ومن لاح علي كريم كايله وجدان بس هي متربعه بگلبي

باوعت الها هي سلهمت عيونها //. اي مثل ما اگلج كريم من لمن انتي مريضه وعزمونه بيت رحيم بالحديقه 

وشفناها الرقيه وشلون اهتمت بعاصف وبعدها من اتوفت عمتي وتصرفاتها عمج حجى ويه عاصف حتى 

يتزوج ورشحله رقيه لكن عاصف رفض وكله ابد لا تحجيها هسه مستغربين شلون عاصف يتزوج عليج

ويتزوج منو رقيه ومنو الواسطه والمدني رحيم ومرته الحيه 

رديت عليها =. ما عاد يهمني اريده يطلكني

بقت ساكته ما عقبت شالت علاكه جايبتها وياها واني ما منتبهه خلتها ع الطبله وكالت

- - هذني الج انتي واخوج 

اتغيرت ملامح وجهي سالتها = شنو ذني 

- - افتحيهن 

= انتي گليلي شنو ذني 

- - - بيبيتج ودتهن بايدي

= يعني بيبي عدكم ما راحت 

- - اي اجتنه بعد ما طردتيها 

= اني ما طردتها 

- - - لو طاردتها احسن ولا مسمعتها الكلام الي حجيتي وياها 

= الي حجيته هو الصدك اني ما كذبت بشي 

- - اي لعد لويش اكلج افتحيها للعلاكه

كانت علاكه بيضه ما معگوده طلعت منها علاكه سوده معكوده فتحتها علاگه ثانيه هم فتحتها شفت بيها فلوس 

باوعت الام كرار بتساول وردت // وهذني الوصولات 

بلعت ريكي = وصولات شنو ؟

ام كرار اتاشر ع الفلوس = هذني رواتبج انتي واخوج من يوم ما اجيتو لهنا ولحد الشهر الفات 

= شنو ؟

- - اي مثل ما سمعتي بيبيتج تجي كل شهر تقبض الراتب وتروح تخلي بالبنك وتنطيني الوصل اضمه

اتفاجات من الي شفته وهي اتكلي// هذني خمسه واربعين مليون الج والاخوج اما راتبها من ابوج 

فكدامي كانت تنطي صدقه عن روحه 

اخذتهن واني مستغربه من هاي العاىله الي كلها تناقض

عاصف يحبني يروح يتزوج عليه 

بيبي تكره ابوي تروح تنطي صدقه عنه 

حتى علي اخوي اعرف بي شكد ما يحبني بس هم يحب عاصف وشكد ما مقهور عليه لان عاصف 

اتزوج بس ما يكدر يكرهه 

ام كرار // اني اجيت جبتلج الفلوس لان بيبيتج امنتني اوصلهن الج وما قبلت تروح ويه عاصف

انتظرت اجه جاير اخذها

- - - بيبيتج تحبج وحتى من حجيتي منطيتج العذر ياالله اني اروح 

= لا خاله ابقي وين رايحه 

- - ما اكدر كرار منتظرني بره 

= دقيقه خاله

رحت جبت جنطة ملابس عاصف = ياريت توصلينهن اله 

- - شنو هذن ؟

= ملابسه بعد ما الهن لزوم يمي 

ابتسمت // لا خاله اعذريني من يجي لهنا انطيهن اله ياالله مع السلامه واي شي 

تحتاجينه خابريني 

هزيت راسي هي كالت // صيري قويه واكيد كل شده الها وكت تزول

من طلعت ام كرار باوعت للجنطه كتبتله 

= ملابسك راح اخليهن عد الحارس 

رد بسرعه. :: اموتج غير خليهن ومن اجي اخذهن عود خلي علاوي يجيبهن الي تره ما ميت عليج 

حتى اجي وابات يمج

ومر اكثر من اسبوع هو لا اجه ولا سال واهنا اني بديت اتحضر للدوام لان مدرسه اهليه عطلتنا بس عشر تيام 

اخذت نسخه من المفتاح عندي ونسخه عد علي ونسخه ضميتها وكتله 

= علي هاي نسخة مفتاح تجي ايهنا اذا توصل قبلي وهاي كامرا يندك الباب تباوع بالكامرا اذا 

عاصف او مهدي لا تفتح الباب الى ان اني اجي 

( ) ومن يشوفوني 

= عرد گلهم اجيت ونمت ما سمعت الجرس

وداومنه و محد خابرني حتى ام كرار ورجعت داومت واني احاول اكون طبيعيه

وبااول يوم دوام اجيت ومن دخلت لكيت وراي بخمس دقايق اندك الباب رحت اشوف منو شفتها عمه 

امل عمه فتحت الها الباب وبمجرد ما شفتها حضنتها ولا اراديا صرت ابجي

هي ظلت تطبطب على ظهري وتكول 

- - اااه ياعمه حظج مثل حظ امج ليش هيج عاصف سوا

لزمتني من اديناتي وتسالي // سولفيلي وجدان عاصف شجاا 

بقيت ساكته // شني متعاركين شني عاصف لگاج تخابرين ب ا حد. انتي غالطه علي 

باوعت الها. = لا هو من يوم خطبة فرح اني شفتها الرقيه وهي تحاول تتقرب منه 

امل // حتى انا شفتها وحتى حبوبتج بس هو ما انطاها وجه شني عاصف زغير او وحده مثل رقيه 

تاخذه بهاي السهوله منج

بقيت ساكته امل اتكلي //. لا تسكتيين كليلي عاصف ليش هيج سوا 

=. لان ظالم ومحد بعينه. 

امل //. لا عاصف مو ظالم ابد عاصف طيب بس هو شو شبي 

=. لا عمه متوهمه كلكم متوهمين عاصف ظالم واخذني بس حتى يذلني 

امل //. ولج انتي شتكولين عاصف يحبج يحب التراب التمشيين علي

استغربت كلامها هي ردت //ذاك اليوم اجه عليه يشوف ابو غانم وكتله جيبلنه مرتك نشوفها 

تظل يومين تلاثه ايكلي ما افارگها 

تشدته تحبها عاصف 

يرد عليه اكو واحد ما يحب روحه 

سالتها بدون تفكير وگلبي برجف= يمته هاي

عمتي بمراره // ولج ما صار اسبوعين وظل يحجي ويكلي تعبانه من الدراسه بس اريدها تكمل السادس 

حتى تحصل الها شهاده تفيدها 

كتله بجالك ما تحتاج الشهاده يردلي لا ميخالف انا چبير والوكت ما ينحزر ولج يسولف عنج جنه طفل 

جاهل يسولف على حبيبته شجا الولد حتى ما گالي ولا دريت البارحه غانم مخابر مهدي وهو كايله

استغربت كلام عمتي يعني ما زعلان عليه سالتها = انتي انتي عمه ما تدرين بي متزوج 

- - منين ادري اكلج عاصف ما كال الاحد حتى لا خابرته ولا خابرت امي اجيتج اريد اعرف شبيكم 

= مو تكولين قبل اسبوعين يمج ويكلج احبها واني نفس الشي ايهنا ما ادري بكل شي حالي من حالج

- يعني ولا متعاركين 

= عمه نتعارك عادي حالنه حال الناس ما هايفني اجه واشترالي ملابس للدوام واخذ علووش يمه للبستان 

امل // ها جا مو خالي الولد بي شي 

اتحسرت = بعد صار الصار وهو لازم يطلگني 

امل اتحرك بيدها // شتكولين

= يطلگني عمه هذا اخر كلام عندي 

خلت ايدها على حلكها // اسس لا تحجيين هذا الكلام شني يطلكج مسودنه عاقله 

= لا عاقله واعرف شحجي اذا ما يطلكني من ذاته اشتكي بالمحكمه ما ابقى ويا 

- - كافي لا تحجيين هالشكل عاصف انتي التدرين بي ولازم صاير شي چبير وهلتزوج

= مثليش عمه احنه بيوم خطبة فرح صار بيناتنا زعل سوء تفاهم 

تهز بيدها // ياخطبة فرح الصار الها فوك التلث تشهر اكلج صار اسبوعين واحنه نسولف بيج 

شني بخطبة فرح 

رفعت اكتافي = ما ادري انتي من تشوفين اخوج قنعي يطلكني لان اني حجييت ويا وطالبني بالموخر 

تدرين شلون قشمرني من عقد عليه كلي خليت الموخر 100 الف حتى من تردين تعوفيني سهل عليج 

ومن اعوفح بلحظه انطيهن الح تالي طلع كاتب الموخر مية الف دولار ويريدهن مني حتى يطلكني

امل // اسكتي وسمي بالرحمن لاتطيبن عاصف الرقيه 

= هو الباعني وما دام باعني ما ابقى عنده لو يموتني 

- - وتعوفينه الرقيه وحبايبها 

= اي اعوفه اصلا حتى كيلون الباب غيرته بس حتى ما يجي 

امل //. وج عمه ليش تعاندين

= عاصف انتهى من حياتي شلته من بالي ولو شيصير ما ارجع اله ولا اعيش ويا ولو ادري اكدي 

الموخر هم اسويها واجيبه 

- - عاصف يحبج وتصيرين اكبر مسودنه اذا تعوفينه الهن هسه انتي مقهوره وحكج محد 

يلومج بس بعد جم يووم راح انتي تلومين روحج جيفن طلبتي تتطلكين

بقت عمتي للعصر وراحت حتى ما قبلت تتغدا لكن اني بسرعه سويت الها غدا كعدنا اكلنه واشوف بعيون عمتي 

حنيه ودموع سويت الها جاي گالت 

- - - لو شاده حيلج وحبلانه هسه تشوفينه بس شسويلج الدراسه يا طلابة الدراسه 

سكتت ردت //. هسه فال رقيه وحبايبها وانتي ظاله اهنا لا انتي سجينه لا انتي حره

بقيت ساكته لان كلامها الي من ايكللها احبها ومثل روحي اكيد اكو شي صاير شي كبير وعاصف ما يكوله 

راحت عمتي وهي اتكلي// سمعيني وجدان عاصف رجلج لاتعوفينه الوحده مثل رقيه 

= لا عمه عاصف باعني واني ما راح ابقى عد واحد شايفني ما اسوا 

- - ولج صاير شي بيناتكم كليلي

= لو شما صاير عاصف ما اريده ولو شيسوي بعد ما اتراهم اني ويا 

اتحسرت وهي تكول //. ااخ يايابه هسه هذا الكلام مو وكته ابقي اهنا ودرسي كلهن تلث تشهر وتالي 

عود شوف شتسويين 

  = من اتشوفينه الاخوج فهمي ايطلگني بالحسنى لا اشتكي علي 

- - استغفر الله اعلم ابو فجه ابو فجتين اكعدي اهنا واي شي يصير خابريني

راحت عمتي وعرفت راحتله تعاتبه وهماتين راح اتگله على طلبي الطلاك منه ومثل ما اتوقعت كتبلي 

:: راح اجي والمره المحترمه تحترم نفسها ومن ادك الباب تفتحينه 

= ما افتحه ما اريد اشوفك 

:: ولا انا ميت عليج والدليل حتى صوتج اكرهه بس جاي اتفاهم وياج 

   = تمام

  اجه وره الظهر دك الباب وعلي فتحه وهو يبوسه :: اشلونك يابطل 

( ) الحمد لله 

:: شنو ما تريدنه شو لا تسال ولا تگول 

( ) ما عندي نقال حتى اخابزك 

:: اي بهاي صدگت

كعد بالصاله وعلي جابله بطل ماي اخذه :: علاوي كل الاختك تسويلي چاي ومن رخصتك تطلع يم ابو يوسف 

رايدها بحجايه ابيناتنا 

طلعت وكتله = ما بيناتنا اي حچي علي يبقى اهنا 

اتقرب مني علاوي () ميخالف وجد اصلا اريد اروح اجيبلي قلم لان ما عندي

طلع علي بقيت واكفه وهو طلع جكاره وما يباوع بوجهي 

:: امل اجت وسولفت وياي وكالت تردين اطلگج لو تشتكيين 

= اي مثل ما سمعت اريد اتطلك 

:: وانتي تعرفين ردي انا ما عدي مانع بس الحق حق 

= انت قشمرتني 

:: لا ما قشمرتج سالتيني ليش ميه گتلج احسن واضمن

= اضمن الك مااعرف دولار عبالي مية الف دينار 

:: هذا الحجي ما منه فايده تحضرين الفلوس وتدللين 

= بس انت تعرف اني ما املك هذا المبلغ اوكي عندي الرواتب ال. منراكمه مالت ابويه بس ميكفن 

رد باستهزاء :: الرواتب مال ابويه

اتقرب عليه وكف بس ما يباوع بوجهي :: اسمعي تحضريلي الغايب والحاضر والذهب وتطلعيين منا

بالدشداشه الاجيتي بيها ماكو تحلمين اطلكج وشتگدرين تسوين سوي 

= انت ما عندك كرامه اني اكرهك 

غمض عيونه. واتنفس :: لو عندي كرامه ما اخذتج 

اذتني كلمته حييل رحت للمطبخ جبت دولكه بيها نفط فرغته من الجلگان اجيت يمه 

= اني اكرهك واموت وما ابقى وياكطلكني لو ماكو هسه احرك روحي وكدامك وخطيتي بركبتك

خليت النفط على جسمي والجداحه بايدي واريد اشعلها اتقرب مني :: التردينه يجرالج 

صرت ابجي = اليوم اني وياك نروح للشيخ ايطلكني 

:: اي هسه نروح

اتقرب اخذ الجداحه :: فوتي غسلي والبسي وياج جيبيلي جنطة هدومي 

=. بلي وحتى كل الفلوس العندي هم اجيبهن 

:: اي كلشي لا تخليين حتى سوار امج ومسدس ابوج وانا راح اخذ هدومي العدج والج منا الى ان تكمليين

السادس اطلعين من الشقه

= اي اي تمام حتى لو هسه تريدنه نطلع هم نطلع 

:: جيبيلي حنطة ملابسي خلي ابدل صرت كلي ريحة نفط وانتي فوتي للحمام

رحت جبتله ملابسه وهو رد عليه :: اهنا راح البس وانتي استعجلي ومن تطلعيين مو تنسيين هويتج 

اتجيبينها هاج اخذي نقالج وياج وانا راح اخابر الشيخ 

هزيت راسي واني احس بروحي دايخه فتت سبحت وطلعت بدلت 

واجيت اطلع الفلوس وجنسيتي وصلني اشعار فتحته

:: مو انا التلويني مره ومو مره فرخه زعطوطه بت الكلب اخليج معلكه وما اطلكج الى ان تكمليلي

العشر دفاتر 

راح اروح وانتي طبج الف مرض بس مستغرب اخويه واخويه واخاف علي من التوتر تالي تردينه يبقى 

وتحركين روحج

:: ونصيحه خليها ابالج من تردين تنتحرين اكتلي اخوج وياج لان اذا بقى راح يعاني مثل ما انتي عانيتي وازيد 

:: شوفي ولج تنثبرين اهنا وبوكت ما تكمليلي الغايب اطلكج وانا الممنون لان انا اكرهج واحتقرج ولو تصوغيلي 

روحج ذهب ما اشوفج مره

ما جاوبته لان ادري بي اذا قفل اعرفه وهو يريد مني الموخر واني ما املكه فلازم اخلي هو يمل ويطلكني 

بدل ما اني امل وارجع اله وقررت اعيش حياتي ادرس وانجح واتصرف ولا كان هو موجود 

  من يومها لا اتصل ولا كتبلي مسج

اداوم وارجع ادرس ما اگول اتخطييت لكن جاي احاول وهو لا اجه ولا حتى دزلي رساله 

وبس عمتي امل خابرتني وام كرار مرتين اتصلت عليه وسالتني اذا محتاجه شي 

كنت بالخط راجعه وكف حتى تنزل طالبه من اتحركت السياره بطني وجعتني وحسيت السياره تفتر بيه 

بقيت ساكته الى ان وصلت للبيت وبس دخلت كبل للمغسله اتقيأت شافني علي سالني شبيج وجد

لزمت گصتي = دايخه يمكن فلاونزا 

كعدت ع القنفه واسال نفسي شبيه 

ضميت شفايفي واتنفس بعمق هاي الدوره شكد صار ما اجتني معقوله اكون حامل 

العصر رحت حللت ومن رجعت للبيت اتصلت بعمتي امل ردت 

الو هلا عمه اشلونج 

جاوبتها واني ابچي بحركه = عمه اني حامل 

الفصل السابع والخمسون من هنا 

شكرا لزيارتكم عالم روايات سكيرهوم