رواية أرض الخناجر الفصل الثامن والخمسون بقلم ايلول
چذاب أليكلكَ مَن تشح تغلة
حمـــد شـــح ونسّـــوه اهلة
══━━━━✥◈✥━━━━══
رنـــه :: توني فتحت باب الحوش وصرخت وي صوت الطلق طلقتين ثارن احسهن نبتن بگلبي، التفگه بأيد جدي وهاسكي ممدد بالگاع ودمه سال على التراب.
ركضت بكل حيلي احس ما اشوفن شي گدامي ولا اسمع صوتهم، اركض وما اوصل عيوني عليه بس اريد ايديي توصّله وأحميه من طلقة جدّي الثالثة .
طحت على اركبي گدامه ولميت هاسكي بأثنين ايديي شلتهن كلهن دم صرخت متسودنه واحضن بيه حييل، فاتح عيّنه الزرگه الي چن يحاجيني يتنفس بوجع ووي كل نفّس يزير موجوع، ابجي بصريخ واشبگه على گـــلبي
وجدي ما مكتفي غلط ومسبه والوادم الوياه تحاجيه ما راضيه وهوه يصيح
-اكتتتتلج فوگه.
وهمه يصيحون عليه ويكضون بيه واخذوا التفكه من أيده
-صلي على محمد حجي شني السالفة، كومي عمي كومي.
شلت راسي اعاينلهم من بين دموعي ردوا ليوره مبتعدين ما يعاينولي ومرتضى اجه عليّ دنك يجرني من إيدي يغلط واحس بيه اندفع مني حييل وصوت ريـــمه جبر جدي والوياه يردون يلتفتون علينه.
-ووووخر عنهااا.
تدفع بيه وهوه يطكها وانه ماهامني شي غير هاسكي بعده بين ايديي يتنفس ودمه يجري على الگاع مثل الحبر على الورق، النفس يثگل بصدره وصدري اتلمس مچان الطلقات وروحي تنطحن وحده بجتفه ووحده ببطنه، شلت راسي عيوني مغوشه ريـــمه واكفه بيني وبينهم حايط وجدي اخذ الزلم لدوانية شاكر ورد يغلط ويسب جريت ريـــمه من عبايتها ابجي
-ريـــمه، ريـــمه راح يموووت.
كعدت بصفي لمت طرف عبايتها وحطته على مچان الطلقة وتغلط على اهلها ومرتضى يريد يهد يطكها وابوه كاضه وجدي يغلط ويصيح يريد نعوف هاسكي ونطب للبيت
درت راسي للشارع على صوت السيارات اثنين، مسحت عيوني بظهر آيدي بس اريدن الغواش يروح، ورديت ابجي بحرگه من لمحته نزل من السيارة وركض علينه بكلّ حيله ووراه الولد.
شمر روحه كدامي جر هاسكي الحضنه كوه يتنفس
صيحت ابجي وايديي يرجفن كلهن دم
-جدي جدددي كتله
وهوه ما مستوعب يهز هاسكي بين أديه كل ما يغمض عينه، احسه ما يسمعني، هوسه وغلط وصياح الزلم ردوا طلعوا من دوانية بيت شاكر على صوّت وعركة الولد صــيهد وسلطان گطعوا مرتضى، وسليم بس شاف الزلم ردوا طلعوا اجه علينه جر ريـــمه من ايده وريمه جرتني وياها للبيت گوه اشوفن دربي طببنه للحوش ورد عليهم.
كعدت على اركبي مغطيه وجهي بعبايتي وابجي بحرگه صارله فوك العشر سنين عدنا ياكل ويشرب ويانه وعزيز عد كل واحد بينا.
لمتني ريـــمه الصدرها وگمنه اثنينا من سمعنه صياح كهلان ركضت لباب الحوش بخوف يتراجف بحرگه ويهد على جدي بس لو الولد يهدونه، الزلم وكفوا وي شعلان ويصيحون على طــروادة
-علمود چلب تهد على جدك.
نث اديه من بين الولد وردوا كضوه شال ايده بغضب يهدد
طــروادة:: عاااين شعلان لو مات هاسكي حرام بالحرم اذا ما موتك وراه. اذا ما ذبحتك بخنجرك انا مو ابن شاااامل.
وصيهد بساع سد حلكه يدفع بيه للبيت وهمه يغلطون ويحجون عليه وهو يجر بأيد صــيهد ويهدد
-وروح ابوووي اذبحنك وراه شعلان وروح اهلي بخنجرررك اذبحنك.
وصيهد وسلطان جروه للبيت حييل والولد گبلهم جابوا هاسكي وخرنه انه وريمه بساع وسليم صاح
-اشعلي الطباااخ ريـــمه وحطي عليه سجينه.
رگضت ريـــمه للمطبخ وانه كعدت بباب الهول اعاينلهم من بين دموعي طبوا طــروادة وصيهد، وخرهم وكعد كدام هاسكي عيونه حمر وايده ترجف بحرگه وهاسكي غمض عيونه بس يتنفس، اعاين الاصابع طــروادة اليرجفن يمسح على راسه مختنك مايشيل عيونه.
طب وراهم مــيثم مافاهم شي وبس لمّح هاسكي، حط ايده على جتف طــروادة، وسليم وسلطان بتعقيم وسجينة حاميه طلعوا الطلقات منه مسحت عيوني گـــلبي يدكّ حييل هاي هيه راح يعيش هاي هيه هاسكي راح يعيش.
وتلاشت فرحتي كلها من الولد وخروا. على صفحة وطرواده حط هاسكي على گلبه شبگه مغطي حتى وجهه، وصيهد كعد يم باب الحوش والولد وكفوا على صفحة كلهم يعاينوله بقهر گمت من مچاني امسح بعيوني كعدت كدامه مركزه وي هاسكي واقنع روحـــي عدل بعده يتنفس ، شهگت ورديت ليوره ابجي من شفت هاسكي بدون أي نفس، صــيهد يغلط على شعلان وعلى شاكر مسح وجهه وصاح على طــروادة
صــيهد:: گوم لا تقهر روحك هسه اروحن أجيبلك غيره
يحجون وياه وهوه ولا يرد على واحد منهم ولا هاد هاسكي انگلب بيتنا مناحة انه وزهره وحسين نبجي بحرگه ، وعبود من إجه أنصدم مافاهم گبل حط أيده على گلبه.
كمت من مچاني دايخه بس اريدن أطب للبيت روحـــي رايحه وريمه حايره بيني وبين زهره وحسين ساعة تسكتهم ساعة تبجي على بچينه، الولد گوه اخذوا هاسكي من ايد طــروادة وهوه طب للبيت حاني ظهره سد باب الغرفة وراه والولد ضلوا بالحوش كلهم يحجون على جدي وسلطان يگلهم
-مايسكت كهلان وألله مايسكت .
شويه ودكوا باب الهول بس رادوا يحاجونه ماطلعلهم، تانوه بالساعة كاعدين بالحوش، ملّوا وراحوا، وكهلان بغرفته ماطلع لمن چلچل الليل كلوبنه محترگه ودمعتنا مانشفت كل بيتنا يبجي وكل واحد بينا كاعد بزاوية
عاينت لكهلان طلع من الغرفة يمشي بسرعة كمنا انه وريمه نعاين وراه الكهرباء طافيه والمولد محد مشغله أفتر بالحوش ما ادري شأخذ وطلع من الباب الثاني
حاجيت عبود اريده يگوم يشوفه وين راح هز راسه لا عاينلي ميت من القهر
عبود:: لو يحرّك شعلان هم ما اگله لا.
دنك عفته وطبيت للبيت وريمه تطكطك بأصابعها بخوف
عشر دقايق ورد طب للحوش شغل المولد واجه للبيت بيه ريحة نفط مدري بانزين مشه الغرفته اخوي ما يشيل عينه من الگاع
جريت التلفون امسح بعيوني خابرت عفراء گـــلبي يوجعني وموتتني من گبل لا احجيلها ردت عليه بخنگ تبجي
-رنـــه ادعيلي بتي مو زينه
- يمه
-أريد اموت
-شبيهااا؟
-مو زينه نومونه مستشفى اموتن رنـــه شمس لو صار بيها شي اموتن.
جرت التلفون مني ريـــمه تحاجيها وتفهم منها وانه احس أذني تصفر حطيت ايدي على راسي مسطورة وروحي رايحه، وريمه بس سدت التلفون درنه على فتحة باب غرفة طــروادة طلع وسلاحه بأيده شهگت بخوف وريمه كضته من أيده خايفه وخر ايدها على كيف عيونه دم عاين بوجها ورد عاينلي حجه بهدوء
-لحد تطلع.
ريـــمه:: شتسوي؟
-لا تطلعين!
وخرها وطلع من الهول كمت وراه بساع أعاين عبود بعده كاعد بالحوش صافن على دم هاسكي الضل على الگاع
مسح وجهه ووگف من شاف السلاح بأيده طلعوا من الحوش ركضنه اثنينا وراهم نعاين من يم الباب وگف وعبود بصفه سحب اقسام ووجهه السلاح على مضيف جدي البصف البيت، سدينه اذانه فازين من صوت الطلق العالي جرتني ريـــمه تغطي بيه بأديها ترجف وانه افلت بروحي منها واعاين گبت النار وي صوت الرصاص بالمضيف وبالنخله اليم المضيف.
والولد طلعوا يتراكضون جروا السلاح منه صــيهد يتعارك وياه ماراضي وجدي اجاه متسودن يحلف كل يمين هوه وعمامي يطلعونه من القريه ويطردونه من گيعانه وهوه مايتنازل ويحلف يندمهم على كتلة هاسكي وبس لمّح مرتضى وي الولد جره يطگه بكل حيله، لمن الولد وصلوه يم باب الحوش طبينه للبيت بساع خايفين ردوا طلعوا يركضون يطفون المضيف وضل بس صــيهد يصيح عليه
7
-اطللللع بعد وشوفني لو ما كسرت رجلك.
69
وطرورده غسل اديه ووجهه ساكت مايرد عليه وهذاك بعصبية يفتر كعد طرواده يم باب الهول وصيهد بباب الحوش يعاينله مسح وجهه بحيره گاله
-كهلان كافي
نتر بصياح
-لا مو كااااافي انا مو ابن ابوي لو ما خليته يعض اصابعه من الندم.
صــيهد:: فلا تنرد انتَ .
عافه وطلع رگع الباب وراه حيل السلف التم وهوسه وهوه ضل كاعد بالحوش يم باب الهول. مدنك راسه ميت من آلقهر مشيت متردده فتحت الباب وكعدت گدامه مختنگه مديت ايدي على ايده
شال راسه عاين لعيوني وجرني الصدره يشبگني بچيت مجلبه بيه كل حيلي روحـــي رايحه، وخرت من صدره من اجت ريـــمه عاينلها وگام طب للبيت بس بدل وطلع ماندري بيه وين راح وهوسه الوادم للتسعه ونص بالليل يله فضت
طفه المولد وكعدنه بالحوش ريـــمه فرشت حصيره بس انه وياها والجهال بالبيت كعدنه وهيه تفتر بخوف وكلساع تعاين من باب الحوش ما مرتاحه ردت طبت للبيت جابت بطانيه الزهره من شافتها بردانه
ساعة عدت كلشي هادئ محد اله صوت زهره نامت على رجلي وحسين ساعة يروح يم الحديقة ساعة يوكف يم ريـــمه
ريمه :: ما مرتاحه رغم القرية هادئة وكلها سكتت بس كلبي ما مرتاح كعدت يم باب الحوش بس بيتنا ظلمة وبيت اهلي وبيت جدي مشغلين مولدات، درت عيوني الزهره ملتفه بالبطانيه وغفت
وفزت وي فزتنا على صوت صياح الولد فتحت باب الحوش بساع اعاينلهم يركضون للسيارات كلهم وجدي وابوي وعمي وليد يركضون وراهم، جدي متسودن يتراجف ويصيح بحرگه
-اريدنه تجيبونه الي جنااازة
وانه روحـــي تلوب بس اريدن واحد يحاجيني ويفهمني شصاير بهوستهم لمحني سجاد اشرتله اجه بساع
-شصاااير؟
-طــروادة حرگ المعامل.
شهكت أيدي على گـــلبي ورنه من وراي صاحت عليه
-وعبود وين؟
-همه راحوا سوه وماخلوني اروحن وياهم.
ضل سجاد يفتر گدام بيتنا ماراح وي الولد وانه حرگه تاخذني وحرگه تجيبني شيفضها، جدي بطرك الدشداشة يفتر محترك حرك وابوي وعمي وليد يوزون بيه على كهلان اثنينهم يگلوله اطرده، فتحت الباب حيل وشعلت تلفون رنـــه بأيدي عاينلي ابوي عاينتله عيوني متروسه دموع شمسويلكم حقدكم عليه ليشش ، دار وجهه من عدي مسحت عيوني وطبيت جبت عبايتي اريد اطلع وكف بوجهي حسين
-وين رايحه؟؟؟
-هسه اجي
رنـــه:: ريـــمه وين؟
-هناه عاينولي من الباب بس احاجيهم واجي، وسجاد هذا واكف هناه لا تخافين.
هزت راسها لا ماراضيه اطلع، جرتني من ايدي
رنـــه:: يطگونج وطرواده يتسودن ماعايزين ريـــمه ماعايزين البينه كافينه اكعدي لا تطلعين.
سكتت اعاينلها تحجي بقهر اقل الربع ساعة واجه شيخ حيدر وولده وجدي يحجي ويشكي كهلان وحتى انه حطوني بالسالفة يصيح بصوت عالي
-متعااافي اطيناه گيعان ما استهده اطيناه مره كل يوم طاكها وكاسرها ويوميه طاردها الاهلها ونردها مستقوي بيك مايهاب احد هاد چلبه على الوادم على ساعة يعضله واحد ويسويله طرگاعه ولمن كتلانه عاينله شسوه أبن شامل.
يحرررگ مضيف علمود چلب؟ يحرك معامل علمود چلب يرضيك هالحجي.
وحسين من يمه تسودن انه ورنه ما كاضينه طلع بساع صاح على جدي
-كله جذب اخوي ولا مره طاك مرته وطاردها وهاسكي ما عاض احد انتَ كتلته حتى تحرّك گلبه .
سجاد رد حسين للبيت
-طبن للبيت ريـــمه دام اجت الكهرباء لا تضلن بالحوش.
كومت لبنات ولمينه الحصيره بساع خاف شيخ حيدر يطبّ للدوانيه وردينه انه ورنه للحوش نعاين من الفاحات المسويتهن رنـــه شيخ حيدر ماراضي على جدي وكاله انتم معادينه كل همكم تذلونه وعله صوتهم صياح وولد شيخ حيدر كلساع يحاجونه يهدون بيه، وسكتوا من ردوا الولد وجدي بس شاف كهلان نزل مشه يريد يطكه وشيخ حيدر كضه وهوه متسودن بس يريد يكضه ويطكه وهوه يحجي ببرود
طــروادة:: بعدك ماشايف شي شعلان؟
شيخ حيدر:: كهلاان، امشي البيتك.
جريت ريـــمه وطبينه للهول نركض اخاف لا يكضونه نتصنت عليهم ويحجون، شويه وطبوا للدوانيه الولد وشيخ حيدر وماحجه عليه لمن خله الولد يطلعون حتى ولده وضل بس هوه وكهلان بالدوانيه سوه بيه فلك شلون تحرك المضيف والمعامل وكهلان ساكت مايرد عليه گاله
-على چلب كهلان على چلب؟ حتى زحمه واحد يحجي بيها، هسه جدك مسودن انتَ شمالك؟
طــروادة:: هم مسودن.
-سدّ حلگك شو صاير مادري شلونك گبل تحسب حساب حتى لحچايتك وشايل اسم ابوك وسمعته مثل المسچ تفوح بكل مضيف من تالي تريد تخربها؟ من تالي تريد الوادم تحجي بتربية ابوووك؟
طــروادة :: تعبـــت منهم محد عاش وياهم وشاف ضيمهم وروح ابوي العدو ما يسوي سوايتهم لو مايخافون من الوادم تاكل وجهم جا رشوا نفط وحركوني انا وأهل بيتي، اليحجي ماشايف الأنا شايفه ولا عايش وي چلاب مثلهم.
حجه وسكت شيخ حيدر ماعرف شيجاوبه ضلوا فترة ساكتين لمن اجه صــيهد وحجه وياهم طولوا يسولفون وهوه يوصي بكهلان من راد يطلع گاله
-كهلان بعد ما اوصيك هاي هيه؟
-اي.
-بعد ابوك، صــيهد هم حاجيه انتَ.
-هوه يتحاجه ابن شامل ؟
وطلعوا وياه للباب مشينه وراهم الباب الهول بلكن نسمع شي مافهمنه بس شغلة وحده شيخ حيدر كايل الجدي المضيف انه ارد اعمره وجدي مايرضى ويصيح هاني والسلف كلها درت هوه الحركه هم اخذولهم بالنص ساعة بره الحوش يحجون وراها كلمن طشله وهوه طب بسرعة للبيت يريد يلحك يروح لشغلة، رنـــه مشت للغرفه يم زهره وحسين وانه ضليت بالهول محتاره اذا طبيت للغرفة شلون اواسيه شحجي.
توني اريد افتح الباب وفتحه هوه هدومه بأيده عاين لوجهي تعبان والقهر تارس عيونه حجه بصوت مبحوح
-ريـــمه بس سويلي چاي.
-صار.
مشه للحمام، وكفت يم الطباخ اسويله الچاي وحچي ابوي ما يروح من بالي لا هو ولا عمي وليد شهالكره شهالحقد التارس كلبهم
فززني من طلع من الحمام وانه بعدني ماحاطه چاي بالقوري ضال بس الماي يفور، حطيت بساع وحضرت كوب، لبس واجه يمي للمطبخ يعاين للطباخ مستعجل طفيت وصبيتله شربه على السريع مشه يريد يطلع مشيت وراه الباب الحوش لف الچفيه على وجهه ضلن بس عيونه طالعات
-بارد الجو لو لابس شي يدفيك؟
التفت عليَّ كوه يحجي
-ماعليَّ شي، يله سدي الباب وطبي نامي.
دار وجهه يريد يطلع مديت ايدي اكض ايده
-كهلان!
عاين لعيوني ساكت دنگت خجلانه من كره ابوي اله رديت شلت راسي اعاين لوجهه
-لا تنقهر فـــدوه وديربالك على روحك!
سكت صافن بعيوني متحسر هز راسه اي حط ايده وراه راسي ودناني الصدره باسني براسي ووخر طلع من الحوش كضيت الباب اعاينله
-سدي الباب وطبي نامي.
-مايصير اليوم ما تروح؟
مد أيده يجر الباب من عدي حتى يسده وراه وگوه صوته يبين مناه مبحوح ومناه لاف الچفيه على وجهه
-لا، لا يضل بالج مابيه شي حبيبتي روحـــي شوفي رنـــه ونامي.
حجاها وسد الباب مشه وانه بكل لحظة دكات گـــلبي تزيد حجايته ترن بأذني وگد ما شغلت بالي لكيت روحـــي متمدده بصف رنـــه واحضن بيها وهيه ضامه روحها تبجي دفعتني تمسح بعيونها ودارت عليَّ تسأل
-شبيج؟
-احم مابيه شي كهلان راح واجيت انامن يمكم خفت اضل بالغرفه وحدي.
-عبود وسجاد اجوا؟
هزيت راسي اي سكتت وانه من فشلتي ضليت متمدده يمها بعد ما گمت
""
ماريا:: كل شي غريب، دمك غريب عنك كل الأماكن ترفضك مجبور تسكت لان مالك غير حل وغير طريق
طوّل الايام يتردد سؤال واحد بذهني هل يا يترى كل الآمهات مثلها
لفتت على الباب وهو ينخبط
-تفضل!
فتح الباب بريا دخل مايرفع عينه تجاهي خطى لخزانة تيابه اطلع على ايده اصابعه مجبره اخذ شنطه من الخزانه تركها على الارض ويزت تيابه عليها، وقفت متردده خطيت لجنبه وقفت بدون اي كلام طالعني بغضب
-بدك ساعدك بشي؟
همست وأنا متيقنه ومتأكده من الرفض، بس اللي شجّعني سكوته لفّ عني يطالع الخزانة، جلست جنب الشنطه رتب تيابه داخلها قطعة بعد قطعة وكأني بكل قطعة الف جزء مني كلام ما أنقال كلام كتمتوا جوه قلبي.
حاسه عيونه تلحقني ولما اطلع عليه يلف عني متجاهلني
آخد الشنطه تركها على السرير سكر سحابها ولفلي يطالعني بنظرات عجزت افهمها وكل يلي تمنيته كلمه تحسسني انا بين اخواتي،قطع سكوته صوت مــيثم من بره الاوضه وهوه يناديه
مــيثم:: بريا.
ترك الشنطه وراح لعندو، لحقته متردده، فتحت الباب واقفين يحكوا بحده وعصبيه
مــيثم:: ما تلتحق لمن تعتذر منه
بريا :: طك رنـــه ما اعتذر منه.
-ووولك اخته اخته ياهي مالتك انتَ تريد تسودني؟ شعليك؟
كل كلمة يحكيها مــيثم بغضب وبريا يقابلو ببرود وهدوء
بريا:: خوش الصبح گبل لا اروحن اعتذر منه
سكت مــيثم لوقت طويل حيران ولما لف ليروح على اوضته لمحني ترك بريا وقرب لعندي متردد متلي ويمكن اكتر، اطلع فيي
مــيثم:: بيج شي ليش سهرانه؟
سكتت ضايعه مش عارفه شو بدي احكي لأحكي اطلع بعيونو وبدياه يفهمني يحكي شي يطمني، يلي صار عندن اليوم هيدا عادي؟ صوت الرصاص والنار يلي صرنه نشوفها من شبابيك البيت عادي؟ ويمرق هيك بسهوله همست
-خايفه.
بريا:: منين خايفه.
لفيت عيوني لوره اطالعه قرب لعدنا أنا وميثم نظراتهن استغراب خلتني حس خوفي غريب ويلي صار مابيستحق خاف، اطلع مــيثم ببريا قالوا
مــيثم:: من العركه.
بريا:: ههههه ماشايفه شي هاي بابا احنا نتغده عركه ونتعشه عركه انتِ بقرية لفحة مو بداربين روسيا.
65
اطلع فيه مــيثم بعصبية وهو يضحك لف لعندي مــيثم مد ايده لألي مسح على راسي ونظراتوا على الحيط قال
-لا تخافين ماكو شي روحـــي نامي.
سكتت ورحت على الاوضة
بريا:: ليلى
لفيت لعندو
-أسمي ماريا!
ابتسم
بريا:: ليلى.
مــيثم:: زعاطيط انتم؟ شني برياا؟
بريا:: اريد جنطتي ليلى!
يطلع فيي مبتسم ويحكي باستفزاز.
-عنجد؟ خدها انتَ اذا بدك ياها!
فتت على الاوضه بدون ما انطر ردوا سمعت ضحكته وميثم يحكي بعصبيه
مــيثم:: شبيييك وياها؟
بريا:: ما بيه شي شكتلها مو انتم كتولي اسمها ليلى ؟
مــيثم:: لا تخليني اطيح حظك جاهل ترى وماعدها غيرنه تنقهر وين تروح؟
بريا:: والله ماجاي اقهرها هيج حجيت ماقصدي شي.
بعدت عن الباب قعدت عالتخت الشباك مفتوح والهوه يتلاعب بالبرادي بنسمات بارده كأنها عم تواسيني وتخبرني لا تملي هدول أخواتك وبيجي نهار يتقبلوا وجودك ويحبوك متل ما انتِ حبيتيهن
فتح الباب اطلعت فيه قرب وهو مبتسم مسك الشنطه يلي على التخت وتطلع فيي قرّب لعندي ومد ايده يلمس خدي
-لا تضوجين...
تطلعت بعيونوا ابتسم وكمل جملته
-ليلى.
زتيت ايده عن وجهي
-اسمي ماريا.
-شكد تعاندين چنچ بت شامل.
حكاها وطلع من الاوضه، خبيت حالي بين الاغطيه اغرق بالبكي على مين بدي احط اللوم وعلى مين احكي، على امي يللي حرمتني من اخواتي ولا على بيي يللي حكالي عنن من لما كنت صغيرة جبرني حبن واحلم بقربي منن بس كل يلي صار شفت حالي غريبة بعيونن.
الشخص الوحيد يلي حن عليَّ ووقف جنبي مــاسه، عم تحاول تقرب بيني وبين اخواتي تواسيني وتصبرني بصوتها الهادئ وبعيونها الحنونه تزرع بقلبي امل جديد .
مر الوقت وانا غارقة بأفكاري وهديك البقعه السوده من الماضي يلي مابدي حتى تخطر عبالي بحاول اتخبى منها وادفن حالي بين الأغطية اهرب وبتلاحقني لحتى تخنقني وتحاربني بالنفس يلي عم اتنفسوا.
طلعت من الاوضه علجنينه ريحة الورد ونسمات الهواء البارده تلتف وتحاوطني بس ما كانت كافيه تخليني انسى الخنقة يلي جوه قلبي
درت لورا لما سمعت خطوات، شفت بريا فتح باب الصالون بإيده جاكيت ، قرّب مني وحط الجاكيت عكتافي، قعد حدي يطل عالجنينة وبدون ما يطلع فيني قال
-لا تطلعين للحوش بهيج لبس الولد يمرون مناه.
ضليت ساكته وعيوني عالورد وهو كمان ساكت لحظات مرقت مافي بينا غير صوت حركت أوراق الاشجار وهي تتخبط بالهوا، الطبيعة حكت أكتر مننا
اطلعت فيه كلي حيره
-بريا
لف لعندي نظراتو بارده او يمكن تحكي شي انا ما قدرت افهمه كل يلي بيهمني احكي عني لان قلبي تعب وماقادره اصبر اكتر
-بريا ليك تطلع فيي، يمكن انت ما بتحبني لان ما كنت تعرف بوجودي بس انا كنت اعرف عنكن وحبيتكن من لما كنت صغيرة وبكل مرّه يتركوني فيها لحالي تمنيت وجودكن..
بس هلق تعبـــت آطلع فيي وخبرني انا شو عملت لحتى اتحمل ذنب مالي فيه شو عملت لحتى تكرهووني؟
بكيت مختنقة وتعبانه من كل كلمة انقالتلي بالفترة الاخيرة كلشي كان واقف على رقبتي ويخنقني.
حسيت بأيده تضم كتفي وبلحظة سحبني لعنده لوسط حضنه ضميت حالي اله أبكي بحرقة بدون ما احكي شي بس ابكي وادفش حالي لحضنه مسح على كتفي بأديه بحنيه خلتني حس حالي طفلة ما بدها شي غير حدا يقلها لا تخافي انا هون أنا وراك وماحد يقدر يعملك شي انتِ مانك لحالك نحنا هون.
ضلّ ضاممني بين إيديه ساكت ما قال شي، بس حضنه لحاله كان كافي لألي كافي ليحسسني بالأمان.
لحد ما أنا سكتت، إيده بعدها عكتفي تمسح بهدوء كأنه يواسيني
ضميت حالي لحضنه اكتر أتنفّس ريحته
أتنفّس أمان ما عرفته قبل،ورجعت أبكي من جديد بصوت مخنوق ليش؟ ليش انحرمت من هالحضن؟ من هالشعور، من حنيّة الأخ، من وجوده حدّي وقت كنت بأمسّ الحاجة إلو؟ليش كبرت بلاه؟
بريا:: ماريا.
بعدني شوي عن صدره مسح دموعي عن خدي وطلع فيي ابتسم شوي وهو يتطلع بعينيي
-ما اكلج ليلى بعد اذا هلكد تنقهرين.
-ما همني الاسم بريا، الشي اللي بيهمّني رفضكن إلي انتو ما بتحبوني ما متقبليني عم حس حالي دخيله على حياتكن ، حس حالي ضيفه تقيله
خايفه ترجع تزتني برا البيت متل هداك النهار
هز راسه وعيونه ما تطالعني
-هذا بيتج مثل ما هوه بيتنا مو ضيفه عد احد انتِ.
سكت شوي اتطلع فيي ليكمل كلامه
-گومي نامي.
تركته ومشيت بدون ما احكي شي
""
رغد:: بعده الجو متكهرب ببيتنا جدي ما يعديها على خير وضغطه كلساع يصعد حيل محترك گلبه من طــروادة ومن الصباحيات كعدنه على هوسه وصياح وي صــيهد يكله تاخذ الولد وتروح وي العمال وصيهد ما يرضى طبيت للمطبخ يم ندى تريك برضا گالت
ندى:: راح يموت جدج شلون يخسره كم فلس.
رغد:: والله خايفه على بيت عمي شامل منه مايسكت.
تحسرت مقهوره اجت مــاسه كوه تمشي جنطة الكتب بجتفها وكفت بباب المطبخ مالها خلك روحها صباح الخير ماكالتنه
مــاسه:: شني الحجي بعده ماجاي؟
مضيگه عيونها ولاويه خشمها نفسيه صايره كتلها لا طبت للمطبخ وبس سمعت هوسة جدي والحجي ردت طلعت وكفت بباب المطبخ
-ايععع.
ندى :: هاي تعلمت على الهدوء ببيت ولد الروسيه بعد ما تتحمل هوستنا.
ووي حجايتها طب وهـــب سمعها وضحك ما مهتم دنك يبوسها براسها
وهـــب:: ابووووسج بوس، بعد روحـــي التحجي مثلي بعد رووووحي.
ويلوي بوجهه ويبوس بخدودها حيل وهيه لو ماتستحي تصرخ ضحكت مــاسه تگله
مــاسه:: مستهتر ولا عرفتك.
صفن بوجهه متفاجأ حط ايده على صدره يگلها
تستمر القصة أدناه
-انا مستهتر؟
وكفت مــاسه عدل تگله
-انه كتلك مستهتر؟
وهـــب:: اي وعلي.
-ليمت؟
-ولج هسه شني
-لا ما گلت.
ندى:: أعذرها حبيبي هيه هاي الحامل مثل المخبل ماعليها عتب.
ضحكنه كلنه طلع وهـــب يريد لبيت عمي شامل لان بريا غاد يريد يلحكه گبل لا يلتحق، ورضا بجه وراه يريد يروح وياه گالت مــاسه
-جــويريه شلون صارت؟
-بعدها بس تبجي والبارحه مصخنه النوب صــيهد ملتهي لا جاي يمها لا شايفها امي ضلت تحجي عليه البارحه وهوه يفتر وره طــروادة البارحه مگابل مچان شغله مال الحراسه طــروادة يحرس المچان وصيهد يحرس طــروادة .
مــاسه:: حقه حتى مــيثم البارحه يگلي خايفين من طــروادة لا يسوي شي.
ندى:: وهـــب يگول لا دام شيخ حيدر گاله كافي اسكت هاي هيه بعد ما يسوي شي.
رغد:: سكتت وهمه هم شويه نصه صوتهم اجه الحجي وطلعت بــدور مشت بساع شبگت مــاسه تسألها
-زعلانه من عدي؟
-اي
-ماتنعاد
-أكبر جذابه
-والله.
ابتسمتلها ماسه ومشن للسيارة سوه، سوينالهم ريوگ أنه وندى ميتين من القهر كوه اكلوا ومشوا همه وجدي يشوفون المعامل وسعاد ولت الاختها وجده تفتر على جــويريه. شلون ضاله يم امي بالغرفه لمن طكت حوصلة امي وضلت تصيح متسودنه
ايمان:: مااالج غرض بيها احسبيها بت غريبه چنتي وانا المسؤولة عنها مو انتِ .
وجده تسودنت تحجي وامي تردها اول مره ما تسكت وكلساع تهدد تخابر صــيهد لمن جده سكتت طبيت يمهن كعدت جــويريه حالها حال عيونها مورمه ووجها اصفر كالتلها امي
-لو الحزن يرد الميت جا مالكيتي واحد يضحك يمه هيه هاي الدنيا وكلنا على هالدرب كومي على حيلج وراج امتحانات جوري يمه .
وهيه بس ساكته غسلتها، ووي امي تريكت شويه وردت تمددت بفراشها تعاين للفراغ ودموعها تجري حاجتها امي واجت حطت راسها على رجل امي هزت رجلها وتمسح على شعرها كمت من يمهن أساعد ندى بالغده گبل لا يردون ويضلون يحجون علينه
صاحت امي عليَّ تلفوني يمها يدك شايلته الي مبتسمه گالت
-هاچ سلطانج،
ابتسمت گـــلبي دك حيل اخذت التلفون ومشيت الغرفة بيت وهـــب بعدني ارجف كل ما احاجيه وبعدها حجايه منها تترسني فرح فتحت الخط ساكته
-نمرشتي.
-عيونها.
3
-ابوسنهن رمش رمش وارد النوب ابوسنهن.
سكتت الضحكه شاگه حلكي
-شلونج گـــلبي ؟
-الحمدلله انتَ شلونك شلون صرت؟
-اذا اشوفنج أصير بخير.
ماحجيت جنت متانيه هو يگلي يله خل نردّ لبيتنا، من ضليت ساكته گال.
-تسوگت ومتاني تردّين لبيتنا
-بالبيت انتَ؟
-لا تسوكت وطلعت وديت عبود وسجاد للكراج مشوا للزيارة، وهسه راح امشي للگيعان اشوفن طــروادة حتى للكليه ماراح اليوم.
-حتى صــيهد ما راح اليوم علموده
-خيولي اخوج يسوي روحه احن مني على كهلان.
-تغار؟
-بس على اثنين، انتِ وهوه.
ضحكت وهوه يضحك الضحكتي گال
-هسه شني رغدي؟
-ها گـــلبي .
-اووف يا بعد روحـــي، ترحين للبيت؟ اريد ارد الكاج گدامي.
-هسه اخابر صــيهد واروح.
-صــيهد وين ما اولي لاحكني.
-ها سلطان هاااه ما ارضى ترى.
- تدرين اموتن على صــيهد يصعد وينزل وي النفس يجري بدمي
-ههههههههههه
سديت التلفون منه وخابرت صــيهد خجلانه رد بنتر
-الووو.
-الو صــيهد شلونك.
-هلا بيك ها گول؟
-احم انا رغد.
-اي اعرفنك رعد حبيبي گول
-رغد رغد اختك.
-ادرررري بيك صخاااام كول.
-بنيه بنيه رغد انه رغد اختك.
سده بوجهي وودالي رساله
-شتردين؟
-انه رغد
-خاااب ادري.
-راح اروحن لبيتي سلطان گال!
-خوش بس هم كلساع تعاي يم اهلنه شوفي مرتي وامي.
-ان شاءالله
كمت حاجيت امي ولان ادري بروحي ما الحك اطبخ بگت من الغده مال اهلي ورحت للبيت عايف علاليك المسواك يم الثلاجة حطيت الاكل بجدر وشعلت الطباخ عليه خاف يشوفني بايكه طبخ من اهلي وزحمه، نظفت البيت على السريع وركضت للحمام اريد اكضي كلشي گبل لا يجي سبحت وبدلت طلعت للحوش رشيته وفتخت الباب ارش الگدمه گبالي حوش بيت عمي خليل والمح ماريا كاعده بالحديقة باب الحوش مفتوح يروح ويجي و وهيه لابسه تشريت ربع ردن وقصير وشعرها مفتوح يلعب بيه الهوا.
أشرتلها بأيدي وهيه صافنه اريدنها بس تنتبهلي ماكو والتفتت على صوت الولد لمحت سلطان وسليم جايين علينه يسولفون وداروا أثنينهم ملتفتين لبيت عمي خليل على صوت رگعت الباب من الهوه انرگع ورد نفتح سلطان بساع دار وجهه من لمحها وسليم نتر يصيح
-لججج هييي.
فزت ونزلت من البايتين تركض سدت باب الحوش، واجوا ســليم يغلط ويحجي وخرت من باب الحوش كاضه گـــلبي بأيدي من ضل يصيح
- صايره مو قريه لفحة لمه مال مستهترات
سلطان:: لا تضل تمسلت البنيه متربيه بغير دوله وإخوتها موجودين عود همه يحاجونها وشوي شوي يعلمونها على عيشتنا مالك غرض انتَ.
طبوا للبيت سلموا اتثنينهم ســليم ضل واكف بالهول وسلطان طب للغرفة جاب قميص اسود شمره على ســليم
سلطان:: هاك بعد لا تلبي مني ولا البس منك.
ســليم:: الله يبشرك بالخير
ضحكوا اثنينهم سليم ترخص ومشه وهوه راح وراه سد باب الحوش وطب للهول عاينلي مبتسم بس سد الباب فتح أيده الي مبتسم ووميل راسه على صفحة مشيت بهدوء الحضنه شبگني حييل يضمني لصدره ويضم وجهه برگبتي
-يابعد روحـــي نمرشتي.
وخرت من حضنه رافعه روحـــي على اطراف اصابعي وكاضه وجهه بأثنين ايديي بسته بخدوده وفوك لحيته الدمعه تتراوح بعيني، رديت الحضنه وهوه يضحك
-ابجي ابجي خل اردج الاهلج،
وخرت منه اضــحك
-احنا من نتزاعل كلمن يروح الاهله والبيت يضل وحده.
ضحك حط ايده على جوفي ومشينا سوا جر نفس يشم وعاين للجدوره على الطباخ جدر طافي وجدر مخليته على نار هاديه
-الريحه سطرتني شطابخه؟
-تمن عمبر وبانيه.
راح فتح الجدوره عاين بيهن ودار يعاين للبيت كلشي نظيف وانه واكفه مبتسمه
-عبالي ما تلحكين تطبخين وفوكها منظفه.
-لا شسالفهما الحك نمونه.
حجيتها ودرت وجهي لا اضــحك گال
-صبي انا هيج ميت من الجوع مو النوب اكل من ايدج.
-صلي بين نا اصب.
هز راسه خوش طبيت للمطبخ نضفت الخضره وسويت زلاطه دك تلفوني وانه اصب بالتمن حطيته يمي على الطباخ فاتحه السماعه اشتغل واحجي
-ها ندى.
وهيه تحجي بحرگه
ندى:: لجججج رغد انتم نفرين بايگه نص جدر التمن ليششش؟ هسه شأنطيهم حووو؟
-شبيج همه يحبون التشريب سويلهم تشريب هسه انه شماخذه؟
-شماخذه؟ ماخذه نص جدر التمن وماخذ اللحم البالمرگه كله، اذا لفيتي بعد يمنا الا اكسر رجلج امشييي، تعال رضا ماما تعال اتفل على عمه رغد
ورضا اسمعه اجاها يركض صاح
-عمه
ردت احاجيه حلو حتى مايتفل كتله
-ها عمه ها حبيبي
-تففف.
-طاحظك وحظ امك
ندى:: عفيه ماما عفيه اليجيب حگ امه.
-وولي ندى خلي اتغده شلون مرگه شلون تمن وشلون وجهه يگاباني يرد الروح.
-امداني وانه مكابله سعاد.
-ههههه خاب ولي سطرتيني خلي اكنل صب الزلمة راح يكضي صلاة وانه بعدني امطمط.
-رغد وذرات اللحم الكبار امهات العظام بنفسي شلون تاخذينهن.
-هسه راح أحطهن على التمن واكلهن .
-امدددداج.
سدته بوجهي وانه ميته من الضحك.
سلطان :: النمرشة البيضاء كاذبة ماهره
شهكت فازه ملتفته عليه المس بأيدي واكفلي بباب المطبخ يضحك
-ها نمرشه.
-ها سلطان.
-الجذابة
-ما مجذبه صدك انه الطابخته بس ببيت اهلي.
ضحك واجه يمي كملنه الصينية سوا اخذها للهول كعدنا ناكل وبسرعة گام من الاكل حتى لا معدته تأذيه غسل وسوه چاي ومن المطبخ يصيح عليَّ
-مو تتعلمين عليَّ ترى مو دوم اسوي چاي.
-اي وانتَ هم مو تتعلم عليَّ دوم ابوك اكل من اهلي يعني عادي نوبات ما ابوگ ونضل بدون غده.
ابتسم يهز راسه ويأشرلي بأيده ما اگدرلج، وكفت بمه بالمطبخ غسلت المواعين وكلساع اعاينله نظراته حرجتني احسهن وراي وين ما اروح، لمن كضيت المواعين يله صب چاي بكوبين ضلينه واكفين بالمطبخ مدنك يشرب بباله شي شوي وعاينلي گال
-تتحمليني رغد؟
سكتت أعاين بوجهه حط الكوب على السنگ وورثله جكاره جر منها نفس وعاينلي متحسر
سلطان:: ماردت ارد يمج الا تصير صحتي زينه بس الوكت يمر وحالتي تتحسن بصعوبه وانا ما اريدن اضيع ولا ساعة من عمري بعيد عنج تعبـــت .
يحجي بقهر وانه عيوني وي الجكارة كل ما يجر منها نفس تقل، تدنيت يمه وكفت كدامه حط ايده البيها جكارة على السنك ويعاين لوجهي متاني شني الاريد اسويه، مديت ايدي على ايده جريت الجكارة من بين أصابعه ماهدها
-عوفيها.
جريتها هدها ذبيتها بالسنك وشلت راسي اعاين لعيونه مسح وجهه
-اذا انتَ ما تريد تضيع من عمرك ساعة بعيد عني، انه ما اريد ثانية تمر بدونك.
عله شاربه من ابتسم ومد ايده على خصري جرني الحضنه شبگته مبتسمه وتلفونه دك وخرت بساع مشه للهول يرد ضحكت من عرفته صــيهد ومن ضحك سلطان عرفته محترك گلبه
سلطان:: شتريد؟ يابه يا گيعان يا شغل ما اجي، والله لو تودي عليَّ شيخ حيدر هم ما اجي، عوفوني اعتقوني اعتبروني ملتحق وي بريا.
يحجي ببرود ويضحك، عفته يحجي وياه ومشيت للغرفة اسفط الهدوم الضالت هوسه، فتح باب الغرفة التلفون بأيده
-راح اروحن اشوف اخوج ذبحني
-هههه روح، انه هم بس اكضي الهدوم اروح اشوف امي والبنات.
-وعلي راح اقفل الباب وراي
وما اطاني مجال احاجيه طلع بساع كمت وراه مالحكت بيه قفل الباب من بره، رديت للبيت مبتسمه كضيت الهدوم وتمددت اعاين بالتلفون راسلتني مــاسه كاتبه
-خايبه شمس بت عفراء نايمين بيها مستشفى
-يمممه شبيها؟
-اليوم رنـــه بالمدرسه كالتلي تگول تصخن حيل تشمر من الصخونه وتختنك ما فهمت شني البيها صارلها يومين نايمه مستشفى.
تستمر القصة أدناه
-سوده بوجهي اسم الله عليها
طلعت من محادثتها خابرت عفراء جاوبتني صوتها رايح
-شلونها شمس.
-الحمدلله خيه اليوم احسن
-والله العظيم انه ما ادري هسه مــاسه گالتلي
- اسكتي رغد ردت اموت امس وصلت الموت تسودنت
-سوده بوجهي وهسه زينه؟ عــفراء عليج العباس هسه زينه؟
-اي والله زينه احسن بلكن لباجر يطلعونه من المستشفى، مساع الولد هناه اخوانج وكهلان وميثم، وسليم.
حجيت وياها شويه وسديته راسلت مــاسه طمنتها شويه وعفراء ودتلي صور شمس نايمه على السديه والكانونه بأيدها گـــلبي اوجعني عليها كاتبه
-الحمدلله على كل حال ولا يضل بالكم صارت احسن والله.
-يا الله ماتشوف شر بجاه الحسين.
-بعد گـــلبي .
طلعت من محادثتها خابرت امي كتلها تسودنت عبالها اجذب من اكلها صارت زينه
-وعلي زينه بس انتِ هم خابري عفراء حاجيها لان من حاجيتها انه صوتها منتهي من البوجي انتِ من تحاجينها تطمن.
-هسّه اخابرها.
سدّيت التلفون وسلطان طول ما اجه لا هوه راد ولا خلاني اروحن الاهلي تمددت بفراشي اغفي توني نمت وحسيت بأيد دافيه تمسح على خدي فتحت عيوني متمدد بصفي ورافع راسه مستند على ايده يعاين لوجهي مبتسم جريت ايده احضنها ورديت غمضت كوه احجي
-بطيت.
دنك يبوسني بكصتي وبشعري
-غير اخوج هذا شلع گـــلبي
غمضت عيني نعسانه الغرفة بارده والفراش دافي ظلمة بس ضوه خفيف يدخللها من الشباج تجبر الواحذ يغرگ بالنوم وهو يلوب يوخر بشعري من وجهي ويبوس خدي
-راح تنامين رغدي نمرشه؟
-امم نعسانه.
-جا اذا نمتي هسه بالليل ماتكدرين تنامين.
تستمر القصة أدناه
ماحاجيته توني ارد اغفه ودفني يكعدني
-رغد
-هاااه؟
جر ايده من خدي
-شبيج انگلبتي صــيهد؟
فتحت عيوني كوه أعاين بوجهه فتحت ايدي اله
-تعال.
هوه هم فتح ايده
-تعاي انتِ
تدنيت حطيت راسي على صدره وغمضت عيوني لمني بين أديه وجر الغطا علينا أثنينا صحيت وفهمته من حسرته بس مدري شبيه أرجف خجلانه
عافني على صدره ايد يمسح بيها على زندي وايد يمسد على شعري
دفو صدره اشبهه بلحظة انتصار من بعد تعب سنين، يضمني بين أديه واحسه ما مصدك هاي هي كل حربنه انتهت ورغم كل الخسرانه صمدنا، نزل دفو شفايفه على كصتي باسني وتنهد يتلمس وجهي بأصابعه
رفع وجهي عيني بعينه ذبلانه حييل وبالكوه يعاينلي
حرك ابهامه على طرّف شفايفي ونزل راسي إله يبوسني بشوگ وتعب سنين لم وجهي بأثنين اديه
-رغده.
فتحت عيني بوجهه اتنفس بسرعة
-والله لو يرد بيه الزمن ما اخليج تمرين بكل العشتيه انا اسف ألف مره واعتذر على اذيه عشتيها والسبب انا.
حجاها ورجعني لفراشي تقرب يعاين لعيوني انفاسه بوجهي ايده تلمست وجهي بدفو وحنيه قرب شفايفه يبوسني وقربني الصدره بهدوء عاشق حسيت روحـــي مراية بأيده تصدعت وهو يرممها بلمساته الدافيه الكلها حنيه، لهفته وخوفه وهمس عشقه وهيامه بأذني أديه مو مجرد تمشي على جسد هي تمسح خراب سنين.
ما خفت ما ترددت اني بين ادين تداويني ما تجرحين بين ادين انسان يخاف علي اكثر من انه اخاف على نفسي
سكوتي وحضنتي اله كفيله بكل كلمة راد يسمعها .
جرّ الغطاء ولمني على صدره حيييل يبوسني وراسي يصعذ وينزل وين جرت نفسه
-نمرشتي احبنج.
ابتسمت مغمضة عيني.
"""
ريـــمه :: شينسيه كل ماطلع من البيت يعاين لمچان هاسكي ولسلسله مالته، خليته يطلع وشلتها ضميتها، رنـــه ماتطلع للحوش حتى ماتشوف مچان هاسكي فارغ وعبود اخذ سجاد وراح للزيارة مختنك احير بمنو منهم ،
اجت هاجر يمي تأشر وتشرح
"البارحه من كهلان حرك المعامل امي دعت عليه"
-خل تدعي كضت عمرها تدعي على الوادم.
عگدت حاكبه يمكن مستغربه ردي، سكتت اخذتها وطبينه جوه يم رنـــه جرتها هاجر من ايدها طلعتها للحوش بم الطيور. طلعت يمهم اعاينلهن كدرت هاجر تضحكها،
للغروب اجه كهلان واسمعلهم هوسه يم الحوش وكفنه نسمع مافاهمين شي بس اسمعه يغلط ويسب بشعلان محترك گلبه والولد واكفين وياه ورنه بصفي ايدها على گلبها
-الله يحرك گلبهم مثل ما يوميه حارگين گلبه.
شلت راسي بفزه من سمعته يصيح
طــروادة:: وروح الحسين يا شاكر بالقندره اكتلك واذا انتَ ااابن ابوك تدنى الگيعاني.
وخرت من رنـــه وكفت بجهه الباب اعاين الابوي أريد اعرف شيريد منه، يغلط عليه ويصيح هوه وجدي
شعلان:: شبر بعد ما الك بالگيعان احسبهن فلوس المعامل الراح نصرفها.
صــيهد:: يللللله شو كلمن يحجي بكيفه شني هيته هيييه غير گيعانه ترى لعبتوا رووواحنه كضه عمركم يا هلكيعان تركضون وراهن ما مليتوا؟
طــروادة:: وخررر صــيهد، عاين شعلان ماتاخذ منهن شبررر ادفنك بيهن وما اطي منهن ترااابه.
صوته وصوت الولد وهوستهم وصياحهم وابوي كب يصيح
طبينه للهول من طبوا الولد للحوش وجهه احمر غسل بالحوض والولد يحجون وياه بهدوء ويحلفوله محد يوصل كيعانه وهوه كوه يتنفس
ساعه صافنه يله فهمت جدي جايب وادم على گــيعان كهلان يريد يبيعهن وكهلان غالط عليه كدامهم أذبحك و
على الگنطره لو وصلت كيعاني.
اختنگت ومشيت اركض للماي النطته الي عــفراء شربت منه كارهه كلشي بهالقرية من شر وحقد.
من عشت وياهم عرفت ياهو الظالم وياهو المظلوم.
مسحت وجهي وطلعت للهول الولد طلعوا وهوه اليوم ماعده شغل طب عاين لرنه الدموع بعيونها خايفه عليه تدنئ يمها حط أيده على راسها تعبان كوه يحاجيها،
-شبيج؟
-خل نطلع من القريه لا يصير بيك شي؟
بجت تغص بالحجايه هز راسه لا مبتسم عل شي اعصابه باسها براسها
-گــيعان اهلنه اكو واحد يعوف گاعه؟
عافها واجه طب للغرفة ضليت يم رنـــه نعلت شعلان وعاينتلي ضليت ساكته نعلت ابوي وتعاين بطرف عينها تفحص احجي لو لا من ضليت ساكته هدت تغلط عليهم كلهم وتدعي وانه واكفه اسوي بالعشا
-لا تدعين ترد الدعوه علينه.
-الچلاب ولد الچلاب.
تستمر القصة أدناه
-يله اسكتي خيولون وين راحن زهره وهاجر؟
-بالغرفه تعلمها الرسم.
هزيت راسي خوش جابت التلفون واجت يمي خابرنه عــفراء نطمن على شمس كالت زينه ويجوز باجر تطلع ردنه نروحلها مارضى ياخذنه، سدينه التلفون وكفت رنـــه تسوي زلاطه دارت عليَّ متوتره
-ريـــمه !
درت عليها اغسل ايدي بالسنك واحاجيها
-ها؟
-احم بعدج ماتذكرين فاتحة امي؟
دك گـــلبي حيل عاينتلها هزيت راسي لا
-لا ليش؟
دارت وجها تحضر الصينيه
-هيج اكولن عبالي تذكرتي.
سكتت كملنه العشا أخذناه الهول وصحنه الطرواده مارضى يجي ياكل وديناله زهره حلف مايشتهي، اكلنه وحدنه هاجر شويه وراحت الاهلها، ورنه طبت وي حسين وزهره للغرفة تدرسهم وينامون
نظفت المطبخ وطبيت للغرفة مطفي الاضويه ومتمدد بمچاني على الچربايه، تقربت يمه كعدت على الحافه بالجهه النايم بيها حاط أيده على عيونه ومبين مانايم
-ليش ما تعشيت؟
وخر أيده ومدها الي تدنى يسويلي مچان بحضنه تمددت منطيته ظهري أيده جو راسي وحاضني من خصرني شابك أصابعه بأصابعي ساكت عدت بالنص ساعة حرف ماحجه
-كهلان.
-همم.
- لا تهتم الحجيهم محد يگدر ياخذ الكيعان منك.
زفر نفس متحسر احس نفسه برگبتي عصر اصابعي بين اصابعه
-عبالهم من يوميه يقهروني اعوفن كيعاني واطلع.
-لو بأيدي اكلك خل نعوف كلشي ونروح لبعيد
-ترحين ويانه لو رحنه؟
سكتت صوّت دگة گـــلبي مبين تحركت ودت ادور عليه ماخلاني احس وجهه بشعري جر نفس
-احجي!
-اي وياك رين ما تروح بس اخذ هاجر وياي.
حضني اقوه حسيته ضحك
-ريـــمه .
حجاها وسكت وانه بس احر بعيوني حسيته وخر شعري من رگبتي غمضت عيوني مقشعر بدني من حسيت شفايفه على رگبتي وشاربه دغدغ جلدي باسني الحد اذني خله شفايفه عليها بدون مايتحرك گـــلبي يدك بقوة واحس وجهي صخن همست بصوت يرجف
تستمر القصة أدناه
-كهلان.
-احبنج ريمة كهلان
غمضت عيني حييل وهو يدفن وجهه برگبتي قوي يحجي
-اعشگنج حتى لو جنتِ بت شاكر وميلاد مايهمني انا ما اشوفنج غير ريـــمه بت أمي وابويه، ريمتي .
وخرت ارجف من دك تلفونه كعد على حيله جاوب صــيهد گاله
-ها وين؟ شعدك؟ شتريد صــيهد؟
سد التلفون وجر قميصه يلبسه عاينتله بقلق
-وين رايح؟
-صــيهد بالباب.
مشيت وراه وكفت يم باب الهول اعاينله فتح باب الحوش صــيهد وسلطان وميثم وبنصهم چلب صغير نوع هاسكي وهو بس شافه گالهم
-مايطب البيتي ابدد
صــيهد:: لا تصير خايس يومين ويصير عزيز.
طــروادة:: لو تموتون مايخد مچان هاسكي ردوه ياهو الكالكم تشترون.
مــيثم:: وين نرده صارلنه يومين ندور .
وسلطان دفعه وطبب الجلب للحوش كاضه من الحبل مالته ربطه يضحك
-باجر شعلان وابوي ينجلطون.
صــيهد :: عليك الحسين باجر الصبح اطلع للگيعان وهوه وياك.
طــروادة:: ما اريدنه لا تلحون صــيهد اخذه.
-انچب يله انچب.
ضلوا يمه شويه وكالهم
-يله روحوا انا اريدن اروح للمستشفى اشوف اختي
صــيهد::وين اكو زيارة هسه نص ليل؟
طــروادة:: منذر ضال غاد بالحديقة اروحن يمه بس اشوفنها.
سلطان:: كوم يله نروح وياك .
سكت هوه رادهم بس يمشون حتى يطلع وحده بس همه مايردون يهدونه، طب للبيت اخذ غراضه
-نامي لا تتانيني!
هزيت راسي خوش، طلعت وراهم سديت الباب ورديت لفراشي
"""
جــويريه :: ملتفه بغطاي يم خاله ايمان الغرفة ظلمة ظلمة حيل تشبهه الجاي اعيشه، عيوني على الضوه اليدخل من جوه الباب، غمضت مركزه بحجيهم بدعاوي جده على بيت شامل وجدي يتوعد ويحلف يندمهم واخوالي وياه ويشجعونه، كعدت على حيلي مديت ايدي ادور حجابي
ايمان:: ها يمه جوري.
-خاله، رايحه هناك انام.
سكتت وانه بس اريد اطلع من يمهم اريد مكان هادئ مابيه اي صوت، مشيت للمشتمل بسرعة ضميت روحـــي بالفراش مغمضه عيني وللفجر كاعده وحدي كمت صليت ورديت لفراشي توني غفيت وفززتني ايده التمسح على راسي درت عيوني اله
-شلون صرتي؟
-وين جنت؟
-بالمستشفى وي كهلان هسه رديته واجيتج، شلون صرتي؟
درت وجهي منه منطيته ظهري ماعدي جواب ما اعرف شلون صرت شلون لازم اصير، تمدد وجرني من ايدي الصدره
-انا يمج.
-تيتمت.
احجي والغصه خانگتني شكد بعد لازم ابجي ويبرد گـــلبي ما ادري
-انا أهلج جوري.
غمضت عيوني ابجي
-بعد محد الي بعد ما تخاف اعوفك ماعدي مكان اروحله لو قهرتني.
- وروح عمي ما اقهرج ولو قهرتج وحسيتي بروحج تردين توخرين عني عدج عدج اخو يسد عين الشمس عدج كهلان ترحيله.
شهكت ابجي
-ماشبعت منه والله بعدني صغيره أريد آهلي.
ابجي واحجي بحرگه گـــلبي يوجعني تعبـــت حيل وهو يمسد على راسي ساكت الحد ما غفيت
فزيت مخروعة على فزته نزل من الجرباية متخرذل بس يريد يلحك يلبس القميص واني عبالي الصريخ براسي نزلت بسرعة وخوف اسمع صرررريخ نسوان هز البيت هز
ركض وركضت وراه البيت اهله الصريخ من غرفة جدي طب يركض وندى تصرررخ مخروعه وجده تصرخ بكلّ صوتها طبيت من بينهم بس اريد المح شصاير شهكت فاتحه عيني على وسعها وواني اشوف جدي غرگان بالدم هو والفراش وعيونه مفتوحه .
شكرا لزيارتكم عالم روايات سكيرهوم
