رواية أرض الخناجر الفصل التاسع والخمسون بقلم ايلول
الشوارع كلها مسكونه
و صفير و صوت ريح
و الناس كل الناس ميته
ووحدي أعثر و اطيح
══━━━━✥◈✥━━━━══
رنـــه :: مبدله اريد اروح للمدرسة كاعده بالهول وزهره كدامي أمشط بشعرها، وطرواده نايم بالهول وريمه تسوي ريوك بدون صوت وكل ما حسين لوّ زهره يحجون بصوت عالي تگلهم
-اشش اشش صوتكم.
عاينتلها وعاينت الطرواده بدون فراش متغطي ببطانية زهره الصغيرة يغطي راسه يطلعن رجليَّه يغطي رجليَّه يطلع راسه، طبت ريـــمه الغرفتهم جابتله بعد بطانية اعاين الاديها مضيگه عيوني تغطيه زين ونصت التلفزون دارت عليَّ تسأل بصوت ناصي
-اكلج رنـــه اشغل الصوبه.
-صلي على محمد هيه وينها البروده؟
-يا خيه والله بارده، احطله بعد بطانيه؟
تحجي وتعاين لطرواده
-اي اي اشويه بعد اشويه، طــروادة. طــروادة .
اريد اكعده وهيه حطّت ايدها على حلكها
-لا لا رنـــه توه نام.
-غير حتى يروح للكليه
مشت للمطبخ تكمل الريوك
ريـــمه:: اكضي الريوك ونكعده
دار وجهه للحايط يلتف بالغطا حيل صاح
طــروادة:: تخلن واحد نايم انتن.
عاينتلي ريـــمه من باب المطبخ تعض بأصابعها وانه اضــحك سكته، توها حطت صينية الريوك وفزينه على الصياح كعد طــروادة على حيله صاح
-شكو.
ووي حچايته بابنه تفلش وصياح اعمامي وصوت الولد ركض طــروادة كلشي ما فاهم وإحنا وراه بس فتح الباب جره عمي شاكر متسودن يبجي ويصيح
شاكر:: ووولك كتلت جددك ولك كتلت جدددك يا چلب.
مافاهمين شي ولا هوه فاهم صريخ ببيت عمي وليد اسمعه، الولد جروا عمي شاكر وطرواده يگل الصيهد
-شصاير؟؟
وهمه خبصه وهوسه وناس تصيح على ناس بس اريد اكضلي راس خيط وأفهمه، بس يتدافعون وغلط وصياح شهگت ايدي على كلبي من صيهد دفع طرواده للحوش وصاح بوجهه
-شعلان مكتول بفراشه.
فاتحه عينيّ بصدمة ما مستوعبه دار علينه طــروادة جرنه للهول دفعنه وسد الباب علينه من بره ركضت ريمه تدك الباب وتصيح عليه وهوه طلع وياهم تسودنه بس نسمع الصريخ والصياح، بساع بساع التم السلف ووراها بشويه صوت سيارة الشرطة والاسعاف اخذ روحـــي مكابلين باب الهول انه وريمه ندك عليه بس نريد طــروادة يرد ويفتحلنه الباب.
انفتح باب الحوش وطب طــروادة مستعجل فتح باب الهول صاحت بوجهه ريـــمه ترجف
-ليشش تقفل الباب.
جراها من أيدها اعصاب ويتراجف دفعها بصفي وشال أيده يحجي بساع
-ماتطلعن لا مناه ولا مناه، وانتِ ريـــمه اهلج ما توصلينهم سمعتي.
تعاينله فاتحه عينها حييل وانه روحـــي انطحنت وگلبي اوجعني جلبت بأيده خايفه
-وين رايح؟
عاينلي بقهر عيونه حمر كضيت بأيده حيل اهز راسي لا
طــروادة:: ديربالج على اخوانج ولا تخلين ريـــمه تروح يم اهلها، رنـــه صيري سباعيه.
-ماا والله وووين رايح وين ياهي مالتك انتَ؟
بجيت اصيح وهوه يحاجيني ويدير وجهه يعاين لباب الحوش، سمع صوتهم هوسه بالباب دار عيونه من عدي لزهره وحسين ورد عاين الريمه بعدها فاتحه عيونها حيل تلمع متروسه دموع وماترمش حتى لا تطيح دمعتها جر ايده من أيدي ما تيهتها كاضتها حيل ابجي
-كلهم مو انه كلهم كلهم مو انه الكتلته طــروادة .
صيحت ارجف ما ادري شسوي روحـــي راحت، والهوسه وصوتهم بباب الحوش شما جاله يعلى طبوا الولد للحوش وهوه بساع طلع وسد باب الحوش وراه كعدت على حيلي اجر نفس بشهگه بس اريدن الهوه يوصل الريتي دموعي احسهن جمر يحرك خدي حسيت كلشي صار بلمح البصر.
ريـــمه:: اعاينله يختفي من گدام عيني انسد وراه باب الحوش يروح ويجي، دكيت على باب الهول بأيد ترجف، اجه سلطان بساع درت عيني الرنه مختنگه
-رنـــه لبسي حجابج.
وهيه بالگاع على اركبها بهدوم المدرسة تجر نفس بشهگه والدموع تمطر على خدها، حسين حط شال على راسها وشبگها يبوس براسها.
فتحلي الباب سلطان يتلفت مستعجل عاين لعيوني ودار عينه الرنه البالگاع رد عاينلي
سلطان:: لا تسونهاا فاتحة علينه تررررى يطلع احنا جنه وياه بالمستشفى والكامرات مصوره كلشي لا تضلن تلطمن تكضي الفاتحه ويطلع.
مسحت عيوني كوه احاجيه
-ياهو الخابر الشرطة عليه؟
عض شفته بقهر يحجيها مختنك
-ابوج، واخذوا جده وعمي وليد هم للتحقيق ريـــمه وروح عمي يطلع ماعليه دليل وصيهد هل راح وراه بس اطنه درب .
هزيت راسي آي صاحوا عليه وطلع الدنيا انخبصت كعدت كدام رنـــه جريتها الحضني بجت بحرگه وانه مدري شلون مصبره روحـــي
-رنـــه اشش كافي.
كامت تبجي للتلفون خابرت عفراء درت وجهي منها أمسح عيوني واضم الغصه الخانگنتني رجعت يمها التلفون يدك وعفراء ماكو طولت مرتين خابرتها فاتحه السماعة وتبجي بأخر دكه يله عــفراء ردت جريت التلفون من رنـــه وسديت حلكها بأيدي من سمعت عفراء هم تبجي
-عفراء
-ريـــمه ريـــمه بتي مو ززينه.
نزلت عيوني الرنه سدت حلگها بأثنين اديها ولمت رجليها الصدرها ساده حلكها وتبجي بخنك.
احس أذني تصفر إسمع بچيها وگلبي ينعصر اريد احاجيها ما اگدر الخنگه ذبحتني
-شبيها؟
-ادعولها فـــدوه ادعولها دخلوها للعنايه بتي مو زينه.
طلعت من يم رنـــه گـــلبي اوجعني وعفراء تبجي روحها رايحه ماجبت طاري اي شي صار ماردت احجيلها اي شي وهيه ماعايزه لمن گالتلي
-كهلان وين خل يجيني.
سكتت مختنگه ما ادري شحجي
-ريـــمه.
-ها
-اهلي بيهم شي؟ ريـــمه كهلان بيه شي؟
-لا كهلان تلفونه انكسر وضال بدون تلفون بس يجي اگله يجيج.
احجي بصوت يرجف ومدري منو حاجاها غيري سدت التلفون من عدي، وحسين مشه يركض لباب الحوش فتحه وطب ســليم. طلعتله لباب الهول
ســليم:: عمتي ايمان تريدج بساع، اطلعي من ذاك الباب راح اوكفلج غاد
طبيت بساع حاجيت رنـــه بعدها تبجي حاجيتها ووصيت حسين وزهره عليها اخذت عبايتي وطلعت سليم واكفلي بالباب يفرني مناه ومناه منين ما يروح هوسه ضل يغلط وينتر بوجهي
-ردني للبيت لنعل ابوهم لا ابو فاتحتهم هم ساجنين رجلي وهم اجي اخدم بفاتحته؟؟؟؟
دار عليَّ بحرگه خازرني وينتر من بين أسنانه
-ياهو السجن رجلج؟ غير ابوج ابو المصاااايب.
جر العبايه على وجهي حيل غطاني وكضني من ايدي امشي وياه كلشي ما اشوف لمن وصلني لباب مطبخ بيت عمي وليد وصوت الصريخ يقشعر البدن مدري ياهنه هذن اليصرخن، عاينت لبناتنا كلمن تركضلها حاجيتهن وطبيت للهول متروس نسوان اعرفهن وما اعرفهن، عفتهن كلهن وطبيت لغرفة عمه ايمان هم يمها نسوان وجويريه كاعده بصفها وهيه تحجي وياها شالت راسها بس شافتني
-تعاي ريـــمه يمه.
مشيت يمها بستها وسلمت على جوري كعدتني بصفها تحجي ويانه همس
-البنات بوحدهن يتعبن والفاتحه ثجيله ضلن وياهن، ومالجن غرض بأحد الفاتحه فاتحتنه مانريد الخايسات والجايفات يحجن علينه بعد امجن.
هزيت راسي اي بس جــويريه صافنه، كمنه سوه وي البنات سدوا باب المطبخ علينه ودكوا برده من بره حتى لو ينفتح صدفه ماننشاف، ندى كاضتها الرجفه وكلساع تتخربط، لان جده موديتها تكعد جدي ولاكيته غرگان بالدم مصدومه والموقف مايروح من راسها كلساع تضل ترجف وتبجي، اشتغل وبالي يمه واقنع بروحي وأطمنها ثاقة بحجاية سلطان هاي هيه گال يطلع وماعليه دليل معناها يطلع.
كل ما تمر ساعة الوادم وكل شوي تجي لمه مال نسوان تصرخ وتلطم النوب يكعدن يحجن على كهلان ومن وحده الوحده يتناقلن الاخبار، اعاين الامي تفتر عليهن الما تحجي هي تحجيها وتكلهن هدده وذبحه، گـــلبي ضل يوجعني من حجيهن، رديت للمطبخ مختنگه، اشتغل ساكته والحجي شما جاله يزيد، صار الظهر وهمه الحد هسه ما مستلمين جثة جدي، ولا رادين جده وعمي وليد.
غسلت وجهي ايديي يرجفن ياهو الكتله وليش وي تهديد كهلان اله، طبت امي للمطبخ تحجي على البنات درت عيوني الها جرت عيونها عني بخزر دارت من عدي مسحت وجهي اعاين للبنات مــاسه كوه تتحرك من بطنها وجويريه صفنه تاخذها وصفنه تجيبها، كضيت رغد من أيدها
-رايحه الأهلي انه اشوفنهم شويه وارد.
رغد:: مو تبطين ريـــمه هسه ترد جده والنسوان تجي ما نلحك.
هزيت راسي اي لبست عبايتي ووگفت بباب المطبخ كاضه البرده بأيدي واطلع بس عيوني اعاين اريدن اشوفلي واحد من ولدنه يردني للبيت ماكو انگطع گـــلبي مناه لمن لمحت حسين طب من باب الحوش ورأساً اجه للمطبخ لكاني بوجهه گال
-تعاي تگول رنـــه.
-صيح السليم خل يجي يطلعني.
مشه بساع جاب سلطان واجه طلعت وياه متلفلفه بالعبايه طب وياي للحوش وخرت العبايه من وجهي وكفت كدامه
-سلطان انه لا ابجي ولا الطم، انه ثاقه بحجايتك كهلان ماعليه شي يطلع؟ لو اكو سالفة گلي ولا تخليني اتأمل.
شال أيده يأشر ويحجي
سلطان:: يابه وروح عمي شامل، ريـــمه وروح عزيز روحـــي، يا كهلان ما ينسجن ترى جدي مكتول من تلاثة الفجر واحنا من الوحده للخمسه الصبح بالمستشفى يم منذر والكامرات مصورتنا وكله الصالحنه شمالج خايفه.
مسحت وجهي بطرف شالي
-لا ما خايفه هاي هيه هاي هيه.
طلع مستعجل طبيت للبيت رنـــه متانيتني بالهول عيونها حمر من البجي والتلفون بأيدها كالت بخوف
-مدري ياهو گايل العفراء طــروادة بالسجن، خابرتني تصرخ.
-ياهو الگاللها عايزززه هيه.
ردت عفراء خابرتنه مفرفحه لا بيها تعوف بتها وتجينه ولا بيها وتضل غاد ماتت من القهر وكوه تحاجيني
-ديربالج عليهم ريـــمه فـــدوه
-لا تخافين ولا يضل بالج وكهلان يطلع سلطان گال ماعليه اي شي .
-عبود وين؟
-جان بالزيارة وهسه رد بالطريق بعده ما واصل.
-ريـــمه عينج عليه فـــدوه لا يسووله شي.
شلت عيوني الرنه بخوف گـــلبي يدك حيل
-لا تخافين انه يمهم.
سديت التلفون منها خايفه ورنه كدامي تطكطك بأصابعها بحيره، سولفتلها شگالي سلطان شوي تطمنت شربت حبايتها مال السكر وكعدت هادئه، نص ساعة وطبوا عبود وسجاد ردت تبجي وتحجيله، كلاص ماي ما شرب بساع اخذ سجاد وراح للمركز يشوف طــروادة.
ساعة ضليت ورديت لبيت عمي وليد للعصر وهمه ماناصبين چادر الفاتحه لان ما مطينهم جثة جدي وابوي كلساع يخابر واحد علمود جده وعمي وليد، بالاربعه العصر يله اجوا وطلعن النسوان للحوش تلكن جده يصرخن ويلطمن اخواتها وبنات اخواتها وحبايبها كلهن محزمات بعبيهن والتمن داير ما دايرها يگولن ويلطمن وهيه تبجي وكوه واكفه على حيلها
طبن للهول ووراها جابوا الجنازة حطوا التابوت بالدوانيه كلنه نبجي على البجي والنواعي وجدّه تخربطت والنسوان يرشن عليها ماي بارد وراها بدقايق طبوا الولد اخذوا التابوت مشيت اعاين من شباج المطبخ البرده سادته كوه اشوفن، شدو التابوت على السيارة ومشوا مــيثم ومرتضى وعمي وليد وزلمه من بين غانم وواحد ماعرفه ووراهم بسيارة اخذوا جده وامي واخوات جده اثنين.
بس طلعن السيارات الولد نصبوا الفاتحة وسووا عشه حتى يحسبون هذا اول يوم للفاتحة، تگطعن رجلينه ما الحك اكعد شويه والهوسه والصريخ يدوي براسي والتفكير نخر عقلي كل الوادم مصدكه كهلان الكتل جدي
وياهي التجي للمطبخ تمسلت طن شبعوني مغثة.
-رغد انه رايحه لو ضليت هناه اتعارك كضه صبري.
عاينلي كلهن وانه ايدي ترجف لبست عبايتي ووگفت بالباب شافني وهـــب اجه بساع وصلني للبيت وراح ومن حرگت گـــلبي حجيت الرنه تسودنت تهد واكضها
رنـــه:: افلش الفاتحه عليهن وبوفاضل انعل والديهن.
-لا تندميني لان احجيلج ررررنه.
جريتها حيل تفتر بالهول بحرگه عاينتلي
-باجر اروحن للفاتحة.
-لااا رنـــه تسودنتي؟؟
تعاينلي بطرف عينها مقهوره لمن اجه عبود ميت من التعب كعد بالهول وهمه ملتمين عليه وانه واكفه بباب المطبخ متانيه يحجي ويكول شفت طــروادة گال
-ماخلوني اشوفنه.
رنـــه:: ليش؟
عبود:: ما يرضون هسه اشوفنه، رحت العفراء طلعوا بتها من العنايه ووضعها شويه احسن.
ريـــمه:: سكتت والقهر ياكل بگلبي رنـــه تعاينلي واقوي روحـــي گوه عليًَّ، ضلّ بالي يم هاجر ماشفتها توقعت ضاله بالبيت يم جهال مرتضى لمن الساعة بهدعش من الليل توني طبيت للغرفه بس اريدن اكعد وحدي وابجي براحتي اندك باب الغرفه وصوت عبود
-خويه سلطان يريدج!
لبست حجابي وطلعت وياه گال
عبود:: اذا گالج تعاي للبيت لا ترحين مو طــروادة موصي ماترحيلهم؟
هزيت راسي اي ومشيت وياه للحوش عاينلي سلطان بخوف
-ريـــمه تعاي شوفي هاجر شو مدري شبيها.
شهگت ايدي على گـــلبي
-شبيها؟؟؟
ومشيت وياه اركض ما اشوفن دربي صعدت فوگ لكيتها بفراشها ترجف مسويلها كمادات والعلاجات يمها جريتها علي اتلمس بوجها
-هاجر شبيج؟؟؟
فتحت عينها الذبلانه بس شافتني يمها جلبت بيه بأديها اليجرفن تدفن روحها بحضني وتبجي بشهگه
-يمه هاجر يا روحـــي هجوره شبيج؟
سلطان:: كومي كومي لبسيها بساع خل نأخذها للمستشفى
جريتها من أيدها اريد اكومها مارضت تهز راسها حيل وتكض بأيدي كل حيلها تبجي بخوف حاجاها سلطان بس راد ناخذها للمستشفى مارضت، روحـــي راحت عليها كعدت يمها أسوي كمادات وسلطان مكابلنه وكاعد بس دموعها تجري، للوحده اجوا الولد ســليم وسجاد ميتين من الجوع، وهاجر شوي تزلت حرارتها ونامت، نزلت جوه اسويلهم اكل كلمن صافن بصفحة بمن سلطان كالهم
-ياهو الكتل شعلان؟
ســليم:: هسه الاقوال شو تحورت جدتك كايلتهم انا من اصلي صلاة الليل انامن بالدوانيه مو يمه
عاينت السليم اصبله چاي واحاجيه
-صدك ســليم اكثر المرات جده تصلي وترد تنام بالدوانيه لو بالهول
-اي هسه كايلتلهم احنه مبيوگين لو كهلان كتله وباكنه لو حرامي طب علينه، وكاضيتها عليهم لو ولو.
سلطان:: تصفه بس خل يطلع كهلان وما يهم ياهو الكتل شعلان انا أترحم على أهله مناه لمن اموت.
حطيت الصينية بينهم سجاذ خاط استكان الچاي وعاين السلطان مبتسم گاله
سجاد:: ابوك راح يموت كطع روحه من البچي تالي حتى للدفنه ماراح وياهم
وسليم يحجي باستهزاء
ســليم:: لاااا لا يابه شلون يروح جا ياهو يوكف بالفاتحه غير هوه الچبير من بعد ابوه.
سكتهم سلطان اثنينهم عفتهم وصعدت شفت هاجر بعدها نايمه حرت بين اروحن وبين اضل يمها اعزل وارتب بالبيت وانه امشي غسلت مواعين الولد وهمه كاعدين يمي بالمطبخ سجاد كام راح يم عبود وضلوا بس ســليم وسلطان بسولفون بالفاتحه والمسواك مال باجر
-سلطان اخذ هاجر وياي؟
-لا خويه انه اديرن بالي عليها أنام يمها لا يضل بالج.
ســليم:: ضلي هناه ريـــمه.
-لا خويه رنـــه كلساع تتخربط وعفراء بالمستشفى هم كلساع نخابرها مو مال اعرفنهم واجي زحمه.
هز راسه خوش، وگام ويايمسحت ايديي ولبست عبايتي اول ماطلعنه صار بوجهي ابوي يمشي على عكازه
شاكر:: هاي ياهي ريـــمه بويه.
مد ايده عبرته ماسلمت ما الريد احط عيني بعينه جرني من جتفي حيل وسليم يعاين مصدوم درت عيني اله خازرني ونتر
-ووولج.
جريت ايدي منه ووكفت گدامه احاجيه بعتب
-ها يابه؟؟؟
وهوه على نفس الخزره
-شنهي تتعديني؟
-شتريد بويه شتريد اصفگلك من دون خلك الله تهمت رجلي وسجنته! شگلت الروحك؟ انه وانتَ وكل الموجودين بالقرية يدرون كهلان ماله أيد بكتلة جدي، جان بالمستشفى يم اخته واخوتي وياه الله اكبر بيش طالبييينه شتررريد منه يااابه شتريد منه؟؟؟
احجي بحرگه صوتي مختنك وافز على راشدي احس وجهي اشتعل نار حطيت ايدي على خدي فاتحه عيني حييل مصدومة بيه جرني ســليم حطني بظهره وشال ايده بوجهه ابوي
ســليم:: مد ايدك على ريـــمه النوب، اگطعها لو موش ابوي.
وابوي تسودن طكه على وجهه حيل يغلط علينه ويسب جرني ســليم من ايدي بدون ما يرد امي وياه وايدي على خدي، عديت ألأولى الثانية شيعديها.
طبينه للحوش عبود وسجاد فاتحين باب الهوب وكاعدين متانيني، بس طبينه للحوش درت السليم احاجيه بصدمة
-ما حجيت شي غلط حتى يطگني.
عبود:: ياهو الطگج؟ رريمه ياهو الطگج؟
يحجي بحرگه وانه عيني بعين ســليم يعاينلي بقهر مد أيده على زندي مسح عليه
ســليم:: لا تجين ليغاد بعد انا اجيبلج هاجر!
درت وجهي منه الدموع مجلبه بطرف رموشي، واسمع عبود وراي متسودن وسليم وسجاد يحاجونه غسلت وجهي وطبيت للغرفة ابجي بحرگه وگلبي ما يبرد واحجي وي روحي شبيهم فجأة أهلّي كرهوني.
مسحت عيوني وگمت على صوت عبود فتحت الباب عاين لوجهي بقهر
-عليمن طگج؟؟؟
هزيت راسي ماكو شي سكت مقهور مسح وجهه ورد گال
-لا تبچين خويه هاي هيه مابلازم احنا اهلج وماتوصلينهم بعد.
هو يحجي وانه مدنگه دموعي تچوي بخدي راح للدوانيه مسحت عيوني رمشيت للمطبخ اغسل وجهي لمحت عبود وسجاد طلعوا للحوش مشيت وراهم
-ووين رايحين؟
التفتوا اثنينهم
عبود:: للگيعان.
درت عيوني السجاد بخوف
-سجاد مو تعوفه وحده!
ابتسم وحط ايده على جتف عبود
سجاد:: لا توصيني وانا تربات شامل .
مشوا واحد ايده على جنف الثاني كعدت بالحوش ومل ظني وحدي واسمع مناشغ من يم الحديقة، گلوب الحوش طافي شغلته واشوفن رنـــه التخاف من الظلمة خاتله وحدها وتبجي كعدت يمها ساكته جريتها الصدري ضمت روحها الحضني تشهك
-رنـــه ماكافي بچي؟ هاي انتِ القويه كضيتيها بچي؟
-كلهم ريـــمه كل اخواني مو يمي عفراء وبتها ماخذات گـــلبي وطرواده خايفه لا جاي يعذبونه بالسجن هو لو انشگت ايده يصخن خاف يطگونه.
انعصر گـــلبي وي حجايتها وعيوني حرگني ابد ماخليت ببالي يمدون ايدهم عليه ويعذبونه، وخرتها من حضني مسحت عيونها
-رنـــه لا يعذبونه ولا شي يضل بالمركز واظن باجر يطلع لان ماعليه ولا دليل لا تفكرين هيج فـــدوه والله توجعين گـــلبي .
گومتها وطبينه للبيت تمددت بفراشها يم حسين وزهره وانه حطيتلي مخده يمهم مطيتها ظهري ودموعي تجري سكته.
""
مــاسه:: من الخمسه الفجر اجه عليَّ وهـــب كوه گمت طبيت الغرفة بريا كعدتها
-راح اروحن للفاتحة للعشرة للعشرة ونص اجي عليج اخذج خوش؟
كوه فاتحه عينها هزت راسها اي، لبست عبايتي وطلعت الفجر وبيها بروده، وهـــب كاعد على البلوكه بباب الحوش حاط ايده على خده ومغمض عيونه وكفيت يمه سديت باب الحوش فز ووكف مشيت بصفحة احجي وياه
-اجوا الدفانه؟
-لا بعدهم الظهر يله يوصلون گبل شويه دافنين.
سكتت امشي بصفحه وملتفه بالعبايه عاينت للچادر ولد عمي شاكر يعدلون بيه وجايبين خرفان من المرعى طبيت للحوش رغد وندى مشغلات الماطور ويغسلن بالقزانات الكبار تعبانات
-الله يساعدجن.
عاينلي اثنينهن يردن يبجن من التعب ، وهـــب تحزم بدشداشته واخذ منهن الصونده يغسل وياهن طبيت للبيت جوه جــويريه وبدور واكفات على الطباخ كيتليات الچاي الكبار تفور وامي يمهم على العربانه تعلم بيهن
شويه واجت ريمه هم ومن الفجر لهدعش الظهر على فد وكفه وخبصه من اجوا الدفانه وگب الصريخ واللطم وطبن للهول يتلاطمن ومن كضن صار الحجي علينه بفلس شلون ما لطمنه وياهن على جدنه واحنا نبلع ونسكت للعصر وكضينه گلوبنه بادينه على هوسه الولد وصياحهم عركه وماندري ويامن گلوبنه راحت وما انحس الا اجونه شلون الموجه يتدافعون جا طيحونه صرخنه ما فاهمين شي
يدفعون بصيهد للمطبخ وهوه متسودن بس يريد يفلت من اديهم يتراجف بحرگه وهـــب وسلطان وسليم بس يردون يكضونه والنسوان من باب المطبخ الداخلي تصيح
-ياااا ياااا يممممه يمه تكاتلوا يمممه.
چلبنه بصيهد كلنه خايفين عليه اديه كلها دم والولد كاضينه بحيليهم متسودنين بس يردونه يسكت وهوه يصيح
-والله اموووووته يشهد الحسين اكتله.
وهـــب:: سددد حلگك كااافي.
مدافع وصياح ورغد تجر بيه من ايدي توخرني عنهم لا يطكوني ببطني بس روحـــي صارت بصيهد خايفه حيل من صياح الزلم البره وهوه متسودن بس يريد يطلع روحه فرفحت والتفت فاز على صوت جــويريه تشهگ فاتحه عينها حيل وتجر مفس بشهگه مچلبه بالسنك بس تريد تتنفس ماكو چن الهوه انگطع عنها جر روحه من ايد وهـــب ومشالها بساع كعدت على حيلها تجر بالهدوم من صدرها وهوه تسودن دار عليهم يصيح
-اطلععع بره اطلععععع
گلبوا وجهم وهـــب والولد طلعوا جر الشال منها أيده كلها دم ورغد ركضت بماي بارد غسلت وجها بس ردنه تتنفس عدل ماكو طاحت بأيده مگلبه عيونها تسودن لفيناها بعبايه بساااع يريد يشيلها مايگدر رجليَّه ما عاننه گوه على روحه شالها ركضت وراه بعبايتي صعدت بالسياره وحطها بصفي وسليم صعد بصفه نخليت روحـــي بهالساعة لمن وصلنه المستشفى حطولها بخاخ يله جرت نفس گالت الدكتور
-مابيها شي بس صايره عدها شلون الحاله النفسيه مكبوته وعليها ضغط .
وبس صحت ردينه للبيت صــيهد وجهه ما يكصه السيف طلع متعارك وي راضي ابن غانم وكاتله بالجادر لان حاجي على كهلان گدام الوادم وكايللهم كهلان الذبح جده
عفت جــويريه بغرفة امي متروسه نسوان كلمن كاضه ابنها وحده ترضع وحده توكل، تمددت بصف امي غطيتها وطلعت صاحت عليَّ جده من بين النسوان صوتها مبحوح عيونها مورمه من البجي وخدودها مزلغه كعدت يمها شاورتني بحرگه
-ليلى وين ما تجي حالها حااالجن المن ضاله غاد النسوان تنشد عليها.
-جده مصخنه
-جيبيهاااا، لا وروح شعلان لو اجيتها اكصبها كصب.
وخرت من يمها هزيت راسي خوش وطلعت للمطبخ يم البنات احجي عليها بحرگه بطني موتتني من الوجع الطفل راح يطلع عده مفاصله توجعه وظهره مسوف گد ما تعبـــت وانه حامل بيه.
رغد واكفه يم باب المطبخ كاضه البرده ومدري ويامن تحجي
-رغد ياهو من الولد هذا؟
دارت عليَّ گالت
-ســليم
توني اريد اگلها خل يتانيني وبدور من يمها گد ما كارهته حجت بدون ما تحس على روحها
بــدور:: ايعع شعده كاض الباب.
خزرناها اثنينه وهوه جنه مسودن شال البرده خازرها
ســليم:: بت الچلاااب عليمن هاي؟؟؟
جرتها ندى تسكتها وهيه خنست بس خازرته وهوه حده لحافة باب المطبخ واكف ويهدد مايعاين لغير بــدور خازرها بغضب ويغلط عليهاا ورغد تحاجيه بس تريده يسكت
ســليم:: نزززلي عينج بت النعااال خازرتمن انتِ؟؟؟
حجت بــدور وبساع ندى سدت حلگها بأيدها تسودن يريد يطبلها للمطبخ واخواني مدري وين راحوا ولا واحد منهن بين دفعته رغد من ايده
رغد:: ســليم الوادممم مناه تخزينه كلساع واحد مسويله عررركه وخرر.
طلعت يمه بساع وارجف
-وديني للبيت.
مشه يغلط متحلف ببدور مشيت بصفه ايدي ترجف خفت لا صــيهد يشوفه وتكبر السالفة شيحلها بعد اخذ الدرب كله متحلف ببدور اشنق واذبح وانه ساكته وصلني لباب البيت بس طبيت للحوش دار وجهه وراح بعدني ما واصله لباب الهول ورد باب الحوش اندك فتحته اله منطيني ظهره
ســليم:: تردين لو تضلين هناه؟
-لا هسه بس اجيبن ليلى وارد.
كعد على البلوكه ساكت طبيت للبيت اغم بروحي المن كتله ارد مخليته رايح ومخابره مــيثم، طبيت للهول لگيت ماريا تلعب وي رضا عگدت حاجبي مستغربه
-هذا شيسوي يمج؟
ابتسمت تبوس بيه
-مــيثم جابو لعندي لانه يبكي وامه مشغوله عنه، يمكن هيك قال هيدا ابن وهـــب خليه عندك
-هههه اي صح وهـــب اخويه.
هزت راسها اي واللوتي رضا مكيف عليها يبوس بيها ويعاينلي بخباثة ابن ندى، كتلها
-جده تريدج بالفاتحه.
-اوووف
گلبت عيونها ضايجه لان امس اخذتها شويه روحها طلعت ضلت تبجي بس تريدني أردها،
-تضل تحجّي والله فـــدوه شويه ونجي ما نبطي.
سكتت ضايجه لا تعرف تلبس دشداشة لا تعرف تلبس حجاب العبايه تكضها مناه تطيح مناه مبهذله بيها، لبست بنطرون وقميص قصير ولبستها فوكهن عبايه وهيه مكابله المرايه تضحك على شكلها ما عاجبها
-كضي العبايه مناه زا تخلينها تنفتح ويشوفنج شلابسه يخزنه هذن، هسه لو لابستلج دشداشة من عدي مو احسلج؟؟
-لا دخيلك تربطلي أجري ما بقدر أمشي فيها خطوة
-استرينه ليلى فـــدوه لوجهج كضي عباتج زين
هزت راسها اي وكضت العبايه من فوك ومن النص بأثنين أديها تضحك على روحها، كضيت رضا من ايده وطلعنه سليم كاعدلنه بالباب رضا راحله كضه من أيده وانه كضيت ماريا مشينه وراه ساكتين.
وكل شويه يأشر بأيده امشن مناه تعالن مناه لان الزلم تفتر، شويه عن بيت اهلي ورضا من اندل الدرب جرّ ايده من ســليم وركض للبيت وماريا بساع صاحت عليه
-أوعى حبيبي بتوقع
وجرت ايدها من ايدي ركضت وره رضا وعبايتها طايره وراها ضليت بس فاتحه حلكي مالحكت أحاجيها وسلم بشبختين وصلها عيونه تنگط شر كضت رضا خايفه عليه يطيح ويتعور
عبايتها مفتوحه وطايحه على اجتافها ضالات بس الردانات بأديها. اريد بس الحك اوصلهم امشي وبطني كدامي وسليم تسودن يريد يلطم على راسه جر العبايه من جتافه حطها على راسها
ســليم:: خرررب ررررحججج حيووااانه.
جريتها بساع اعدل بعبايتها كوه اتنفس فحطت من وراهم كلساع وحده مسويتلها سالفة اعدل بعبايتها واغطي بيها وسليم يغلط ويعاين مناه ومناه يشوف ياهو الشافها وهيه عاكده حاجبها تعاين عليه بأستغراب دارت وكها علي أشرت عليه بأيدها تسإل
ماريا:: شو مالو هيدا؟؟
-اشش اسكتي
همست اسكتها وجريتها من ايدها بس اريدن اوصل للبيت وهو حط ايده بعصبيه على حلكه خازرها
-سددي حلكج بتّ الروسيه اركضي النوب حتى احش رجليج حش
دنكت جريتها امشي بطني كامت حيل توجعني وهيه ضحكت مستهزئه وتأشر عليه
-هههه هيدا مجنــون ولا شو؟
مشيت حيل وهو شال رضا ومشه ورانه واسمعه ينتر
ســليم:: الصااايعه .
مالحك بينه ركض ركضت طبيت للمطبخ كاضه گـــلبي بأيدي وهيه عاينت للبنات ساكته اخذتها الجده وجده تنوعيلها تريد البنيه تبجي وهي بس تعاين بالوجوه كعدت يمها غطيت وجها بالعبايه واهمسلها همس
-سوي روحج تبجين.
وي حجايتي كضتها الضحكه وامد ايدي اكرصها من خاصرتها شهگت وصرخت ووي صرختها النسوان صرخن يتباجن دفعت ايدي تبجي وطلعت للمطبخ تركض والنسوان يصيحن
-يا يمه خطيه سوده عليه ماشبعت من جدهاا.
گمت وراها ذابه العبايه وشايله القميص من بطنها تبجي وتراوي بالكرصه الرغد، سديت باب المطبخ الداخلي عاضه ايدي لا النسوان يشوفنها، ودرت عليها اريد احاجيها وهيه ترطن بالروسي علينه توني احاجيها وطب رضا يركض من طب شال البرده مال باب المطبخ الخارجيّ كلها سليم ووهب اثنينهم واكفين، وهـــب عيونه على رضا وسليم مخنزر يدور بــدور يريد يخزرها صارت بوجهه ماريا مديت ايدي بسااع جريت قميصها انزله على بطنها وهوه دار وجهه نزلت البرده لطمت على خدي
-ووولج مو كتلج لا تذبين العبايه.
ماريا::ليك ليك قرصتني وفوقها عم تبهدلني؟
طكتني رغد على ايدي تقلّد عليها
رغد:: ليش تقرصيها يا عيني؟
بــدور:: حقها قرصت مــاسه بتوجع القلب.
ومن شي تافهه كضتهن الضحكه غير لو يسكتن بعد عيونهن دمعت من الضحك ما ادري عليمن دكن الباب النسوان فتحناه الهن طبن يدون خبز ورغم غطت حلكها وبس الدموع تجري من الضحك وياهي التكضها تكلها
-حقج خيه حقج الجد عزيز.
ورغد تهز راسها اي دموعها تجري من الضحك مدري شمالها بعد ولا بطلت ضحك، ضلينه للعصر ريـــمه تروح وتجي مقهوره حيل على طــروادة رغم كلنه مطمنين لان الولد گالوا تمسلت ماعليه شي يطلع بس متانين القرار يسحبون تسجيل كامرات المستشفى ويطلع سهل موضوعه.
ونهد حيلنه بالفاتحه الحد الختمه متنا من التعب ما صدگنه كضت مشيت لغرفة امي بعد عدنا نسوان بس اهون مو هواي تمددت على رجلين جويريه
-ليمت تردين تداومين؟
جــويريه:: رفعت اكتافي ما ادري هواي امتحانات فاتتني واهسي مكسور بكلشي ما الي خلك، مــاسه شويه ةمشت لبيتها، كمت وي البنات البيت مگلوب گلتب ومديوس اشتغل وياهن گوه على روحـــي لوره العشه يله كضينه شغل مشيت للمشتمل شبحت وكعدت بفراشي افكاري مخربطه، جريت التلفون اخابر صــيهد صوتي رايح
-الو.
-الو ها
-وين انتَ؟
-ليش بيك شي؟
-لا هيج اسأل.
-رايح بشغل شويه وارد اذا اكو شي گلي ارد هسه.
-لا، يله انتظرك
سديت التلفون صافنه على الفراغ آفكر ويقشعر بدني من اتذكر جدي، النوب سووها اذا مو كهلان الكاتبه يعني اكو حرامي طاب البيتنه وكل حچيهم مايقنع الجاهل لو احجي سالفتهم الطفل بالشارع يضحك عليها
مليت وانه انتظر ل١٢ وغفيت وفزيت من دخّل الغرفه كعدت على حيلي اباوعله وجهه تعبان عاينلي گال
-السلام عليكم
-عليكم السلام، الله يساعدك.
شمر اغراضه على الميز واجه يمي دنك باسني من راسي ووخر مد ايده يتلمس خدي ويعاين لعيوني
-شلون صرتي؟
-الحمدلله احسن.
هز راسه خوش ومشه للكنتور اخذله ملابس وراح يسبح گمت للمطبخ سويتله چاي ضليت واكفه يم الطباخ الكوب بايدي منتظره يطلع من الحمام يله اصبله، شويه وطلع المنشفه على اجتافه باوعلي واجه يمي للمطبخ عبالي يريد يحاجيني جرني من أيدي حضني ساكت كلمة ماحجه گـــلبي يدك حيل رخيت راسي على صدره مغمضه عيني والكوب بأيدي كل ما احركها الخاشوكه تخرخش يمسح على ظهري بهدوء مستغربه منه وخرني من صدره لم وجهي بين اديه وباسني برأسي
صــيهد:: متأكده صرتي زينه لو اخذج لدكتور؟
عاينت لعيونه مدري شلون يعاينلي احس اول مره اشوفن هيج نظره بعيونه الي نظرة خوف مدري حنيه
-لا والله مابيه شي زينه، اصبلك چاي؟
هز راسه اي مشه للغرفه صبيتله الچاي ورحت وراه كاعد على الچربايه الجكاره بأيد والتلفون بايد مدري ويامن يحجي انطيته الكوب اشرلي على حلكه مو تحجين هزيت راسي اي كعدت بصفه اسمعله وهوه حاط الكوب گدامه كاضه هوه والجكاره بنفس الايد خاف يهده ويرب الجكاره يتبده على الفراش، اخذت الجكارة من بين أصابعه عاينلي بخزر يحجي وي الولد وگاله
-طفيها.
حطيتها بالنفاضه وهو رد گال للولد
-لا مو وياك، اي هوه بس مجرد ناخذ تسجيل الكامرات سووها علينه معضله هذا الضابط شد وياه لا يخلينه نشوفه لا يحجي شي بيه خير .
ضل بالساعة يحجي وياه تمددت بفراشي اعاينله ساعة يحجي بهدوء ساعة بعصبية، ماجاي يخلون كهلان يطلع خالي شاكر وكم واحد من السلف يشهدون عليه هوه الهدده بالذبح، بس كلامهم ما يكفي ودليل الكامرات وكلشي الصالح كهلان بس مجرد ضابط التحقيق مخبث وياهم وماجاي يمشي كلشي مثل ما يردونه.
خلص مكالمه سد التلفون ورجع خابر سلطان حجه وياه شويه وسده غسل واجه للفراش حضني متحسر ومقهور حيل غفيت بتعب وثاني يوم هو ما داوم راح علمود طــروادة اخذني وهـــب لبيت ابوي دخلت الغصه خانگتني ما اباوع بأتجاه غرفته بسرعه صعدت الغرفتي اخذت اغراضي وطلعت مختنگه وصلني وهـــب للكليه وراح كملت دوامي وقبل لا اطلع اجت بنيه باوعتلي
-مرحبا، انتِ اقارب كهلان وصيهد؟
هزيت راسي اي البنيه حيل حلوه الواحد وده بس يباوع الوجها ابتسمت ومدتلي قلم
-انطيه الصيهد بلا زحمه عليج.
دك گـــلبي حيل واباوع بوجها بتركيز هاي نجمه، اخذت القلم من أيدها دارت وجها ومشت وي صديقاتها واني گـــلبي يدك بقوة البنيه اللي وياي سألتني
-منين تعرفهم؟
دنكت ساكته وشكلها ما يروح من بالي جان بنطري آحلى بنيه رغد، وهسه من شفتها احس محد احلى منها، انعصر گـــلبي اگول كاتل روحه على نجمه حقه، بقيت گوه لازمه دموعي اعصابي رجفت اجه عليَّ مــيثم امشي وراه وبالي مشغول بيها ما انتبهت للسيارة صاح
-هااا هااا خويه
فزيت على هورن السيارة ووخرت گال
-شسالفه خويه عاينــي الدربج لا تندعمين وصيهد يبلينه.
-لا تخاف ما يبليك حتى لو متت عده نجمه ما يهتم.
سكت ومشه السيارته صعدت ليوره محترك گـــلبي سديت الباب حيل حجه ب بصوت ناصي
مــيثم:: نعلعله روحك صــيهد.
مشّه للقريه اباوع من الجامه وأعدد بالصارلي هي جانت عايزه والتمت، بجيت ضامه عيوني بالعبايه، وبس وصلت لگيت البنات فارشات الزوالي على الصبه يغسلن بيهن بدلت واجيت وياهن اشتغل حتى انسى.
"""
ريـــمه:: طالعت حيل وصبري خلص، رنـــه واخوانها گوه وديتهم للمدرسه، وعفراء كل شوي اخابرها اتطمن عليها بتها وضعهع احسن بس بعدهم مايطلعونها لان ذاك اليوم هم تحسن وضعها شويه رادوا يطلعونها من المستشفى متخربطه بالزايد، عبود ما تيهه الگيعان وسجاد وياه هو ونوبات ســليم وسلطان يرحولهم، يعاونونهم، هاجر تحسنت بس حتى وياي مالها خلك من يجيبها سليم يمني بس صافنه وعيونها ذبلانه. تضلها ساعة يمي وتروح، ضليت وحدي بالبيت الخوف ياكل بگلبي ما مرتاحه اكعد بالحديقة مكابله هاسكي الصغير وگاعده مناه لمن ردوا من المدرسة
رنـــه انتهت على فراگ طــروادة اول ما طبت للبيت گالت
-ها ريـــمه ماكو شي جديد؟
-سلطان يگول هاليومين يطلعون تسجيل الكامرات.
هزت راسها خوش وطبت للغرفه تبدل، حسين بس بدل صله ومشه يركض للگيعان وي عبود ما معترف لا بيه ولا برنه، شوي واجوا عبود تعبان حيل حاط ايده على گلبه ورنه تعايلنه گوه كاضه دموعها، كالتله
-لا تروح للگيعان بعد.
عاينلها مبتسم
-واخلي تعب طــروادة يضيع؟
-لا يصير بيك شي!
عبود:: ماجاي اشتغل هواي سجاد وياي وسليم والولد كلساع يجوني لا تخافين.
باسها براسها بحسره صبيتلهم غده هوه وحسين واجاهم سجاد شالوا صينيتهم ومشوا يمه للدوانيه، للعصر ردوا للگيعان وراهم بشويه گب الصياح والهوسه بباب اهلي مشيت بساع فتحت الباب واعاين العركه بين ابوي وعمي وليد
وهـــب وسلطان وميثم بنصهم، ومرتضى صاف وي آبوي اسمعلهم بس اريد افهم شصاير شكو
وليد:: على زينيتك على سباعيتك وكلشي بأسمك شنهي انتَ؟؟
شاكر:: لو شايفك بيك خير جا حط كلشي بأسمك.
وكبت هوسه وصياح ابوي يريد يطك عمي وليد ووهب يكله فنك ومرتضى من يمه ينگز وعمي وليد يتراجف متسودن صاح عليه
وليد:: كلشي بينه يخرب شاكر كلشي يخرب .
وابوي بساع گاله
شاكر:: انا ماكاض الحلال عليك شلون جنه عايشين گبل انعيش هسه وجن كله بأسم ابوي ما نخرب انا وياك.
وعمي وليد خازره بغضب اجه بصفه ابوي جره من ايده ومشوا للدوانيه والولد ضلوا واحد يعاين بوجهه الثاني درت الرنه تضحك مستهزئه
رنـــه::لا ربحنه اذا كل الگيعان صارت بأسم ابوج كل ما يفر راسه يطردنه.
-مو بكيفه عمي شامل اله بالگيعان مثل ما همه الهم وغصباً عليهم البيت والگاع النه.
عاينتلي ساكته وانه گـــلبي معصور عصر، شبيهم اهلي الفلوس والطمع عمى عيونهم، ما چانوا هيج مدري همه هيج وانه الماچنت اشوفن.
طبينه للبيت انه ادري بزهره ورنه گوه تدرس بالها مو ين الدراسه اعاينلها بس تفكر ردت اشاقيها گتلها
-تفكرين ببريا؟
عاينتلي هزت راسها لا عيونها تلمع
-بس اريدن طــروادة يرد تدرين ريـــمه وعلي احس روحـــي گوه عايشه بدونهم هوّه وعفراء
-ماضل شي مساع عفراء تگول شمس بخير وهاليومين اذا تطمنوا عليها يطلعونها، وكهلان هم يطلع والله لا تخافين.
هزت راسها خوش متحسره الغروب كمنه هيه تضم دجاجاتها وبطوطها، وزهره تلعب وي هاسكي الصغير، شغلت الماطور واعاين من باب الحوش بالي يم عبود وحسين اريدهم يردون حتى ادرس حسين،قصص وروايات عراقية كرار صلاح ماكضله كتاب اليوم، توهم ردوا عاينلي عبود الكرك على جتفه ضحكوا هوه وسجاد لان متانيتهم بالباب، حسين عافهم واجه يركض ، توهم وصلوا الباب وطلع ابوي من بيتنا صاح عليه
-عبود.
وكف عبود ودار عليه ساكت اجه يتمشى النه فتحت الباب كله واكفه واعاينله لمن وصل يم عبود گاله
-عمي بعد لا توصل لگيعانه فلوس البذور والسگي شوفوهن شكد يصيرن ادفعهن الكم وكفونه شركم.
عبود:: ههههه ياهو واصل گيعانك؟
مد ايده ابوي يضحك يريد يحطها على جتف عبود دفعها سحاد ووكف بينه وبين عبود مبتسم بهدوء وابوي عيونه على عبود گاله
شاكر:: الگيعان كلها بأسمي وانا مو ابوي حتى اعوفنكم بگيعاني.
عبود:: لا صدك؟ اي خوش يله هسه نحمل ونطلع.
خزره أبوي بغضب وشال ايده يريد يطكه بنفس اللحظة ايدي وايد سجاد بصدره دفعنه ارجف
-الگيعان العمي شامل مثل ما الكم اله ومحد يطلعنه مناه.
نزل عيونه خازوني وهز راسه متحلف
شاكر:: متبري منج ليوم الدين لا بتي ولا اريدددنج.
-مو جديده عليكم ذبيوتني عمــري يوم ما تتبرون مني هسه؟؟؟
احجي بحرگه بدون اي تفكير شفته عدو مو ابو تسودن شال ايده طكني حيل، رديت ليوره وعثرت طحت كضني عبود من ايدي، وسجاد. هد على ابوي رغم هو الوحيد حيل يحبونه وبالوكت نفسه هو الوحيد من بين اخواني ما يحترمهم كض ابوي من صدر دشداشته وهزه حيل متخبل يغلط ويسب. اريد بس اكوم على حيلي ايدي اوجعتني، عافني عبود وركضله يجر بيه من ابوي كومتني رنـــه كاضه بأيدي احسها انفسخت، وبس لمحت امي اجت تركض وتصيح
ميلاد:: يمممه سجااااد يمه
هدتني رنـــه جرت صونده خضره من الگاع ومشت تركض بلّا عبايه امي بعدها ما واصلتهم ورنـــه تلكتها بالصونده تطكها حيل، مشيت بساع وي عيود اجر بسجاد طيح آبوي بالگاع وابوي كاض ظهره ويصيح
-كسرني بووويه كسرني.
وانه وعبود مچلبين بسجاد مصدومه منه ســليم شكد عصبي وامي وابوي يطكونه ما شال ايده عليهم ابوي على عيونه يطكه ويمشي ساكت وعبود متسودن
سجاد:: ولحسين اكتللللك خاف عبالك ابوي، انتَ تتبرأ من ريـــمه انا متبري منكم دنياااا واخره لا اهلي ولا اريدنكم.
دفعته حيل بأيد عبود وركضت الرنه امي قويه تطگها ادري بيها، جريت رنـــه لوره ظهري
ميلاد:: رررررنه تطكني يمه رنـــه تطكني يااااا يااا خايبه ووولج رنـــه گلابج انه تطكيني عمي علي ذااك الحسين احس من جلدجج لحم وووولج بت رباب تشيلين ايدددج عليَّ
رنـــه :: تعاااي ام السحوره خل ادوس ببطنج وببطن اهلج ووولج حيوانه ام المصايببب تفترين على النسوان وتكليلهن كهلان ذابح جددده عبالج اعديهااا الج
وامي من وراي تمد ايدها تريد تطك رنـــه وعبود عاف سجاد واجه بساع جر رنـــه وهي مشت تركض السجاد مشيت الابوي بعده گـــلبي يحن اله، مديت ايدي اكضه اريد اكومه دفعني حييل يغلط وخرت اعاينله گـــلبي موجعني صاح عبود
-ريـــمه تعاااي طبي جوه.
درت عيوني الامي تبجي وتجر بسجاد
ميلاد:: وولك يمه يردون يسودنونك علينه ولك خلوك تطك ابوك يييمه.
وهوه يجر بأيده منها خازر ابوي وكف على حيله ايده على ظهره وشالها يهدد
-اوصلوا الگيعان وعاينولي لو ما ذبيتكم بالسجن.
صــيهد:: تذبمن بالسجن؟
التفتنا عليه اجه يتمشى مضيك عيونه هوه وميثم اشر عبود براسه طبي جوه مشيت بساع للحوش رنـــه تفور. تفتر بحرگه وتعض بأيده وكفت يم الباب اعاينلهم گـــلبي نار وكف گدام ابوي شايل راسه ويعاينله بطرف عينه
صــيهد:: تطردمن؟
شاكر:: انتَ مالك غررض لا تحط روحك بسالفة مالك بيها اطردك وياهم وروح ابوووي.
ضحك صــيهد يهزّ بأيده
- ترى كاضني عنك بس الولد من زمان حاطلي چيله بنص راسك.
دارت عليه امي تلعلع بصوت عالي تغلط وتسب وحطت جــويريه وشرفها بالنص وصيهد متسودن خازر سجاد يريده يسكتها جرها سجاد وسد حلگها بأيده واخذها يمشي بيها للبيت مسكتها، دار صــيهد العبود گاله
-يله عبود روح ارتاح حتى باجر نرش دوه لگيعانكم.
عبود:: اي ان شاءالله سلطان وسليم وسجودي ويانه هم.
هز راسه ابوي خوش متحلف ودار وجهه يمشي للبيت ايده على ظهره
مــيثم:: عبود لا ترد شيحجون وياك غلس چنك ما تسمع.
صــيهد:: لا رررد رد وخل اشوفن يا زلمه وطالع من ظهر ابوه يحاجيك الا احرك القريه على روسهم يشهد الحسين.
عبود:: صــيهد يرحم اهلك الكه حل وطلع كهلان اخواتي راح يتسودنن هذيج بالمستشفى كاضيتها بواچي وهاي كلساع متخربطه عليَّ.
هز راسه اي
صــيهد:: هذا الصابط حدي وياه هالاسبوع لو ضل مچلوب علينه الا احطلي چيله بكصته.
دار عليه مــيثم خازوه ما راضي، وهوه وجهه ما يكصه السيف طب عبود يمنه وهمه مشوا، غسل وجهه وراح الغرفة اهله كعد وحده وهالمره مو انه الاصبر رنـــه هي التصبرني موتني حجيهم كل ما اعيده بعقلي ابجي هذول اهلي الچنت احرك الخاطرهم الأخضر واليابس هذا ابوي الاتقاسم وياه النفس كلساع يطكني ويصيح متبري منج .
ابجي بحرگه ورنه شابگتني على گلبها تبوس براسي وتحجي
رنـــه:: خيولون ريـــمه خيولون احنآ اهلج .
-ولج يگلي متبررري منج عافوني گبل وعادوها هسه شمسويتلهم رنـــه شمسويه ووولج والله والله ما يوم عليت صوتي بوجهم ما قصرت وياهم .
-ريـــمه فـــدوه كافي خيولون لا يردونج بعد احسن السحارين الچلاب خيولون.
مسحت عيوني الغصه تصعد وتنزل ببلعومي على دگة الباب كام عبود فتحه صــيهد ووياه جوري وبدور طبن يمنه وهوه راح وكفنه انسلم عليهن مستغربين شعجب جايات طبينه الغرفة رنـــه وكنالهن شعجب اجيتن
جــويريه:: ما ادري هوه اجه گال تعالن يم بنات عمي شامل اجينه
-زين تسوون
رنـــه:: خل اسويلجن چاي، ريـــمه كافي
هزيتلها راسي اي امسح دموعي ويردن ينزلن كامت وياها بــدور وادري بيها راحت وي رنه بس حتى تحجي على ســليم لان مغثوثة منه،درت لجويريه اسولفلها على ابوي
جــويريه:: ميخالف ريـــمه لا تبجين ، لا يردونج عدج بيت خالي شامل .
-ولج يردون يطردونه من الگيعان والقريه ابوي الهالدرجة يكره عمي شامل يريد يطرد ولده.
تحسرت ساكته ماتدري شتحجي وانه القهر داكني دك اجن بــدور ورنه يمنه شربنه الچاي كوه نسولف محد بالها يم الثانية، لمن رنـــه وبدور طلعن وحجينه انه وجويريه بجت دايره وجها وشفايفها يرجفن
-ياا ولج شبيجن عليمن تبجين.
جريتها من ايدها بس اريد تحاجيني دنكت تمسح بعيونها وتحجي بخنك
-يحب وحده صــيهد.
-ياا؟
-والله ويانه بالكليه نجمه اسمها.
عاينت لعيونها ساكته واعض بشفتي همزين ماحجيت كله من سلطان مره گالي نجمة اليحبها سلطان نفسها مرته جان علكتها فوك ماهي عالمه بينهم كتلها
-خيبه لا يا يحب هوه هذا هم يعرف شني يعني حب؟
-لا ريـــمه يحبها اليوم هي اجتني واني الثوله ماكتلها اني مرته الصيهد بقيت مثل الزماله صافنه بوجهاااا .
-احجي وياه كليله انه مره ما ارضى تاخذ عليَّ تحب غيري طلكني وروّح أخذها.
تبجي وتهز براسها اي
جــويريه:: اتطلك واجي هناه لان ماعدي احد
-تعاي وعلي نحطج بعيونه.
كوه سكتت حيل مقهوره، تعشن يمنه وراحن، وراهن بشويه اجوا اخواني سجاد مسولفلهم، ميتين من آلقهر هز ايده ســليم يعاين السلطان
ســليم:: يعني هسه الله هم يحاسبني من اكضه واذبحه، البارحه طكهااااا واليوم طكها ادري شيريد منهاااا؟
جرني سلطان من ايدي گدامه يعاين لوجهي بقهر وسليم يلوب جريت ايدي منهم
-مالكم غرض انتم لا تحاجونه يقهركم أنه متعلمه.
سكتوا مقهورين ومشوا ميتين من آلقهر، بس سجاد ضل متاني عبود اخذه وراح للگيعان مشغلين المكاين مال الماي، طلعوا وانه مدري شبيه خفت عليهم من ابوي گـــلبي ما ارتاح صارت ب١٢ رنـــه بعدها كاعده
-بله خابري عبود كليله ليمت تردون.
خابرته مغلق كعدت عدل خايفه ردت تخابر عليه ماكو وللوحده لا هو ولا عبود كعدنه بالحوس نلوب، طبيت للبيت جريت عبايتي ولايت
-رنـــه رايحه اشوفنهم.
-لااا اخافن عليج.
-مايصير شي لا تخافين، ما اريدن اروح الاهلي جا كلت للولد يشوفونهم.
رنـــه:: اوكفي اروحن وياج ماخليج وحدج.
سكتت گـــلبي يدك حيل جابت عبايتها والمفتاح قفلنه باب الهول على حسين وزهره من بره وطلعنه وحده مجلبه بالثانية بس عبرنه الشارع شغله الايت نضوب على البستان ونمشي نشوف ضوه بالگيعان يم مكاين الماي بس بعده بعيد عنه.
رنـــه:: ريـــمه خاف تطلع علينه الگرطه.
-بس اسكتي رنـــه انه ما اخافن لا تخوفيني گوه.
چلبت بأيدي حيل تتلفت وكلساع وصاحت
-يمه شني هذااك.
-شبيج رنـــه راح توكفين گـــلبي عاينــي گبل واسكتي.
مشينه عبرنه الگنطره واسمع صوت سجاد ضويت عليهم داروا علينه بعدنه مسافه عنهم
سجاد:: ياهو هذاا؟
-انه انه ريـــمه
-وانه رنـــه .
ضووا علينه واجونه يردون يلطمون طفوا الايتات يصيحون بحرگه
-شجابچن؟؟؟
ريـــمه :: نخابر عليكم مغلق خفنه.
طلع تلفونه من جيبه مغلق صاح سجاد.
-امشن.
مشينه گدامهم وعبود ورانه يدعي
-اللهي افرج عن كهلان بأقرب وكت اللهي هاي النسوان محد يحملهن غيره.
وانه ورنه نمشي ساكتين لمن وصلنه للبيت ضلوا يحجون اثنينهم سكتنه منهم عفناهم ومشينه لفراشنا، الثاني يوم بس راحوا للمدرسة، اجوا على عبود اخواني اخذوه ومشوا يرشون دوه للگيعان.
نضفت ووكفت ارش الحوش، سمعت صوت امي تحجي وي مرتضى عاينت من فتحات الباب صعدت بالسيارة وياه ما ادري وين رايحه، رديت أرشّ بالحوش شويه واجتني هاجر بستها اسألها
-امي وين راحت؟
أشّرت الاهلها .
-ليش ما اخذتج وياها، ياهو ضل بالبيت؟
تأشرلي بأيدها وتشرح، بيت مرتضى مشوا البيتهم بعد گدام بيتنه، وابوي وحده بالبيت وهوه الگايللها روحـــي يم ريـــمه ضايجه، سويتلها ريوك كوه اكلت واحجي وياها ادور الگاها صافنه
-هاجر.
التفتت عليَّ عينها ذبلانه
-شبيج يابعد روحـــي صارلچ چم يوم مدري شلونج.
هزت راسها ماكو شي اعاينلها بحيره، عفتها كاعده بالهول وطبيت للحمام اسبح طلعت مالكيتها تلفتت بخوف وين راحت ماسمعت باب الحوش اندك.
لفيت شعري لبست حجابي وعبايتي ومشيت الاهلي رجليَّ يرجفن وگلبي يدك حيل ما مرتاحه، طبيت للحوش محد موجود ولا صوت طبيت للمطبخ اتلفت ما احجي امشي ساكته خايفه عليها اريد اشوفنها ليش ردت وشبيها، توني اوصل غرفة اهلي اريد افتح الباب وسمعت صوت ابوي بالغرفه يحجي بالتلفون
-اي رحم الله على والديك
شردت بساع بصف الدرج حتى لو طلع اضم روحـــي جواه ما يشوفني، يحجي بالتلفون اخذله مده يله رد گاله
-شگد ما تريد انا حاضر وادفعلك من المليون للخمسه بس تحولهن.
حطيت ايدي على حلكي هاي جذب جدي ماحاط شي بأسمه هوه يريد يحوّلهن، اسمع ما مصدگه ابوي اليامرحله واصل، سلم وسد التلفون ضميت روحـــي جوه الدرج زين شويه وطلع من الغرفه سد الباب وطلع من البيت، طلعت من الدرج بساع صعدت فوگ اتأكد من هاجر فتحت باب الغرفه شهگت فازه وبساع سدت دفتر الرسم وكامت للبوفيه ضمته وقفلتها عاينتلها بشك
-هاجر ليش اجيتي بدون ما تكليلي ضليت ادور عليج!
اشرتلي على راسها تريد تنام ومشت تمددت بفراشها مغمضه عيونها سكتت ونزلت جوه بساع گـــلبي يدك حيل طبيت الغرفه اهلي اتلفت مشيت لكنتور ابوي اريد افتحه مقفول، اندل مفاتيحه بساع جريتهن الخوف يدبي بجسمي كضيت المفتاح بأيدي اسمع الدگت گـــلبي اريد اعرف افتح الكنتور ماكو كل جسمي رجف.
فتحته وتلفتت للباب خايفه صار بوجهي فايلات تلاثة ومتروسات اوراق جريتهن تلاثتهن ومن گد كا خايفه طاحن مني تطشرن بالگاع كعدت يمهن بخوف اگلب بيهم واقرأ كلهن بأسم ابوي دوانم زراعيه وكلهن بأسم ابوي عفت الفايل وگلبت الفايل الثاني جريت الاوراق بأيدي اگلب بيهن مابيهن اي غلط المعامل والگيعان كلهن منطيهن الابوي جا شيريد يحول بعد؟
اگلب بالاوراق كلهن جانن مفتوحات على طولهن بس تلاثة مطبوكات ومحطوطات بنص الفايل شلتهن وذبيت الفايل فتحته مكتوب
"عقد بيع أرض زراعية "
وجوه مكتوب التاريخ قديم گبل وفاة عمي شامل، انزل عيني سطر سطر گـــلبي احس يدك ببلعومي اقرأ كلمة كلمة
السيد: شعلان........ (الطرف البائع)
السيد:شامل شعلان(الطرف المشتري)
فتحت عينيّ كلها مصدومة وگلبت للورقة الثانية ارض ثانية والورقة الثالثة هم ارض، رديت اقرأ بيهن احس نار تطلع من وجهي واتفحصهن كلمة كلمة، درت بساع ملتفته احس سمعت صوت سيارة طبگت الاوراق ثلاثتهن حطيتهن بصدري وكمت بساع ارجف شلت الفايلات بخربطه شمرتهن بالكنتور قفلته وطلعت من الغرفه لباب المطبخ صارت بوجهي امي توها طابعه للمطبخ عاينتلي وذبت عبايتها فاتحه اديها
-هله بريمه هلللله.
بلعت ريك بخوف ارفع عيني العينها وارد انزلها بساع رجعت ليوره خايفه وجسمي يرجف وصلت يمي ومدت ايدها على راسي جرت شعري ليوره حيل وكضتني من فكي تحجي من بين اسنانها
-احنااا ولج احنا توكفين وي بيت شامل علينه؟؟؟؟
مچلبه بأيدها حيل اهز راسي لا
-تطولين لسانج علينه ررررريمه.
-لا
-لاااا تحجين لا تحجين امووووتج.
هزيت راسي اي واحس بأيدها كطعت شعرري كله شالت ايدها طكتني راشدي حسيته بنص گـــلبي مو على خدي، دفعتني على الدرج حيل خازرتني
-اصعدي فوك هسه اجيج.
هزيت راسي ايي صعدت على بايات الدرج رجلي يرجفن وهي طبت الغرفتها.
بس سدت باب الغرفه نزلت اركض ودموعي على خدي طلعت من البيت ابجي طبيت البيت عمي شامل كل ذرة بجسمي ترجف، سديت باب الحوش وطبيت قفلت باب الهول عليَّ سديت حلكي بأيدي ابجي بصرريخ كاتمه صوتي .
دقايق واندفر باب الحوش نز جسمي فازه دگت باب الهول واسمع صوتها تصيح
-وووولج ريـــمه شگتلج انه ررررريمه.
كمت اركض طبيت للغرفه وقفلت الباب عليَّ كعذت بالزاويه لامه رجليَّ الصدري كل ذرة بجسمي ترجف طلعت الاوراق من صدري بساع وتلفتت ادور وين اضمهن جريت مخدة طــروادة فتحتها وحطيتهن بسها سديت المخده ورديتها المچانها ضلت تدك على الباب بالربع ساعة يله صوتها راح طلعت من الغرفه ومشيت اعاين من شباج المطبخ رايحه بس روحـــي خايفه منها مافتحت باب الهول لمن ردوا من المُدرسة عاينتلي رنـــه بشك وسألت بخوف كتلها ماكو شي .
للعصر وكب صياحهم وهوستهم صــيهد هاد على اهلي وكفت بباب الحوش انه ورنه نسمع دام السالفة بسها كهلان تهمنه، شهگت فازه من سمعته يصيح
صــيهد:: شترررريد منه موصيهم يعذبووونه ليش ليششش؟ شاكر وروح عمي اكتلك هذا انتَ التدمغ عليهم بالفلوس انتَ يا نگسس.
ايدي على گـــلبي ما مستوعبه يعذبونه بيا ذنب.
مسحت عيوني بظهر ايدي ورنه متسودنه تلطم على رجليها وتصيح
-كتلج كتلج يعذبووونه.
وانه كل تركيزي وي حجيهم ابوي اليخرب طلعته ابوي الواكفه عظم بالبلعوم ليش ليش تريد تسجنه بيا ذنب؟
مشوا الولد وي صــيهد علمود كهلان جريت عبايتي ورنه مجلبه بيه
-كلشي ما يصير بيه رنـــه هسه اجي.
-ماترررحين.
جريت روحـــي منها گوه عليها ومشيت الاهلي ارجف لكيته بالحوش يريد يغسل اديه بالحوض عاينلي بطرف عينه مشيت يمه وگفت گدامه
-ليش ماتريده يطلع من السجن؟
ضحك يعاين لوجهي
-يخيس بالسجن واخوته باجر عگبه اطردهم تردين يمنه ريـــمه بويه؟
ضحكت وعيوني احسهن نار
-لو يرحون للموت اروحن وياهم، بس هلي اكلك شغله باجر كهلان اذا ما طلع عقود الگيعان مال عمي شامل يوصلن الصيهد.
فتح عينه حيييل ما مستوعب وبسا مد ايده يريد يجرني رجعت ليوره اكثر من خطوه
-ديربالك توصلني لو مارديت البيت عمي شامل بربع ساعة الاوراق يوصلن الصيهد، وخاف عبالك عايفتهن يم رنـــه لا اطمن مو يم رنـــه يم اهل صــيهد نفسه.
احجي وخايفه ارجف ليوره الحد باب الحوش شلت ايدي
-باجر يابه كهلان باجر لو ما طلع كلشي اسلمه الهم.
-اموووتنج.
خزرني يغضب شايل ايده ويهدد
-يطلع كهلان واردهن الك
مسح وجهه بأيده البيها السبحه ترجف
-ووولج انا ابوج ريـــمه تعادينه عليهم؟
هزيت راسي لا
-انه ابوي شامل، انتَ بكيفك طلع كهلان اردلك الاوراق وتحلفلي ما تطردهم، ما تطلعه اسلم الاوراق الصيهد.
هز راسه خوش ويمسح بوجهه يتراجف
-روحـــي جيبيهن.
-طلع كهلان بالاول
-ما اصدگج بويه ما اصدگج تردينهن.
-وروح عمي شامل اردهن.
سكت يعاينلي بغضب دار وجهه مشه بساع للبيت وانه درت وجهي ومشيت اركض لبيت عمي شامل رنـــه واكفتلي بالباب طبيت ارجف وجريتها من ايدها
-رنـــه اذا صارلي اي اي شي خرف انسى لواتمرض اي شي ترى الگيعان بأسم عمي شامل كل گيعانكم بأسمه خوش.
احجي وارجف وهيه مافاهمه شي، ولا سألت على شي، ضلينه متانين الولد بگلبي نار، شيّخ حيدر هو وسيد عباس گلبوا الدنيا على الجانوا يأخرون طلعت كهلان وبدون ما ابوي يسوي شي گالوا باجر كهلان يطلع.
ماي بارد ونزلت على گـــلبي رنـــه تضحك ودموعها تجري.
لوره العشا واجت عفراء تلكيناها جن صار سنه ماشايفينها منتهيه من التعب اخذنه شمس من ايدها گـــلبي اوجعني عليها، كعدت رنـــه تحجيلها وتشكي كل الصار ويانه وانه صافنه لمنّ كالتلي
-شبيج؟
بلعت ريّك بخوف
-عفراء الگيعان مال طرواده كلهن بأسم عمي شامل
فتحت عينها مصدومة سولفتلها ابجي فرفحت من القهر
محترك گلبها منهم، كمت من يمهن طبست للغرفة بس أريد اشرد للنوم.
رنـــه :: تمنيت روحـــي اغمض عيني وافتحها كون الصبح جاي، عفراء حالها يمرد گـــلبي وشمس ذبلانه
تمددت أبوس بأديها، الحد ماغفيت وفزيت وي الصبح لكيت عفراء كاعده گبلي گالت
-ماگدرت انامن متانيه يرد
-فزيت عبالي صاير الصبح.
گمت صليت وبعد ما گدرنه ننام لا انه ولا هيه ساعه ساعه نحسب وبس نريدها تكضي.
عــفراء:: ريـــمه من تروح يم اهلها تبطي؟
-لا خيه بساع تجي ولج والله متت بجي عليها شلون وكفت ويانه وماخلته يطك عبود كالها تبريت منج الچلب شكوري.
-خيولون جعلهم تبروا على زينيتهم هسه همه خل يطلع كهلان بخير وسلامه الا اخليه يدللها ينسيها هذول الچلاب اهلها.
- تدرين عفره انه شكد أنقهرت من عرفت ريـــمه هيه السحرت امي وگلت هيه الموتتها بس من شفتها شلون تدافع علينه وترجف وتوصيني على الگيعان خاف هيه تنسى كلش خفت عليها، وخفت يجي يوم وتذذكر امي ماتت بسببها.
تحسرت عفراء بحسره تهز راسها اي
عــفراء:: هاي السالفة الوحيده مخوفتني ودي ريـــمه تذكر كلشي بس ما تذكر سوايتها بأمي تتسودن.
فزينه اثنينا على صوت طبه قوية كمنه بساع بس فتحنه الباب شهگت مصدومه وانه اشوفن ريـــمه طايحة بباب غرفتنا
شكرا لزيارتكم عالم روايات سكيرهوم
