رواية أرض الخناجر الفصل الستون بقلم ايلول
وإذا مَر التعب صَدرك يمر ضلعي گبل ضِلعك
══━━━━✥◈✥━━━━══
رنـــه :: جرتها عفراء على رجليها متسودنه وتطك على خدها، ركضت للمطبخ أيدي ترجف جبت ماي واجيتها اركض غسلت وجها وتطك على خدها بخوف
-ريـــمه ررريمه
وهي وجها اصفر وشفايفها لونهن باهت هزتها عفراء حيل وصرخت، انفتح باب الدوانيه واجه عبود يركض وسجاد من وراه يصيح عليه، وعفراء اديها يرجفن تاخذ ماي من الدولكه وترش عليها فزت عينها بعين عفراء صافنه واحنا نفسنا مگطوع بالخمس دقايق هي بس تعاين بعيون عفراء ممدده ورأسها على رجليها
وعفراء بحجابها مسحت وجها وتلم بيها على صدرها صوتها يرجف
عــفراء:: اسم الله الرحمن اسم الله.
عبود:: شني عفراء كوميها ناخذها للمستشفى.
كلهم يحجون وسجاد من الدوانيه يصيح مافاهم شي ولا يگدر يجي للهول لان ما يدري بينه متغطيات لو لا، أعاين بوجهه ريـــمه بس فاتحه عينها حتى ماترمش وكاضه بأيد عفراء، گـــلبي يدك بقوة خايفه اركز بنظراتها وحاجبها اللي كل شوي ينعگد ويرخي صدرها يصعد وينزل وي جرت نفسها القويه
حركت راسها "لا" وكضيت بأيد عفراء تعاين لوجها عيونها حمر وصوتها مخنوگ
ريـــمه:: شسويت انه؟
لمتها عفراء على صدرها بخوف وتعاين لعبود
-ما مسويه شي ريـــمه كلشي ما مسويه!
وعبود يعاين بشك مافاهم شي وهي تأشرله بأيدها روح
-اخذ سجاد واطلع.
وريمه تنود وتردد بنفس الصوت المخنوك
-شسويت انه، شسويت.
عــفراء:: اخذ سجاد واطلع ماكو شي.
عبود::وهو شنو الاطلع شوفي البنيه شبيهاا؟ ناخذها للمستشفى
سجاد:: خويه بس سوولي درب خل اشوفن اختي رحّمه الاهلج.
عافت ريـــمه وگامت وريمه حطّت اديها على راسها تنود ما مستوعبه وتردد
-شسويت شسويت شسويت.
كعدت يمها اشبگها وهيه ماتوخر اديها من راسها، وعفراء جرت عبود وتحاجيه
-مابيها شي بس اخذ سجاد واطلع، لا تشلعووون گـــلبي.
جرته يمنه وتحاجيه بهمس ما تريد سجاد يسمع
-شربتها ماي مقري عليه ما اريدن سجاد يعَرف اخذه وروح لا تشلع گـــلبي.
سكت ما مقتنع يعاين الريمه وهي حالها يخوف تروح وتجي بحضني ما مستوعبه عيونها مفتوحات حيل حمر ومتروسات دموع، مشه عبود السجاد وهذاك ما يرضى يروح يصيح
-بس خل اشوفنها ريـــمه، ررريمه.
عبود:: امشنا نجيبلها حبوب راسها يوجعها.
-وخر عبود، ريـــمه تعااي بس خل اشوفنج.
وعبود صاح بوجهه
-ترررروح لو اروحن وحدددي؟
دفع عبود وطب للهول ما مهتم جر ريـــمه من أيدي لم وجها بين أديه يحاجيها
سجاد:: شبيج ريـــمه؟ شبيج خويه؟
وهيه بس فاتحه عينها ذبلانه عاينت بوجهه عبالك مو بوعيها شلون ما يحركها تروح، جرتها عفراء من ايده لمتها الصدرها اعاين الايد عــفراء الحاطتها على ظهر ريـــمه اطراف اصابعها يرجفن
-روح سجاد مابيها شي هسه تصير زينه.
وهوه عيونه مافارگت ريـــمه غمضت عيونها مشمره اديها مناه ومناه ورأسها على صدّر عفراء
عبود:: ضل انه رايح بسيارة ســليم.
طلع عبود وسجاد كام بحسره يتلفت الريمه ما مقتنع طلع وره عبود وعفراء بساع صاحت
-اقفلي باب الهول.
ركضت قفلت الباب وهي وخرت ريـــمه من صدرها تعاين لوجها وتحاجيها بخوف
-ريـــمه عاينيلي، كلشي ما مسويه انتِ كلشي ما مسويه.
وهي رايحه روحها تعاين بوجهه عفراء هزت راسها لا
-كتلت امي رباب انه انه كتلت امي رباب.
بجت عفراء وشبگتها حيل
-لااا والله لا.
-شسويت انه شسويت كتلت اهلي انه الموتتهم موتت اكثر ناس احبنهم انه.. انه الموتتهم.. انه.
مسحت عيوني أشرت لحسين وزهره الواكفين بباب الغرفه طبوا جوه يسكتون شمس سديت باب الغرفة وانه وعفراء گابلناها
عــفراء:: والله مو بسببج امي تمرضت والله تمرضت ريـــمه عاينيلي.
تجر وجها تريدها تعاين عليها وريمه تدفع ايدها وتعاين للفراغ عبالك شخص يعيد بذكرياته، جرت روحها من ايد عفراء ووگفت مستنده على الحايط خطوتين وطاحت على اركبها. وبأثنين اديها لطمت على رجليها وشهگت تصرخ بكل صوتها
-وووولج يممممه.
جريت رجلي الصدري اعاينلها وابجي وعفراء بس تريد تكض اديها ملخت روحها تبجي وتصرخ الحد ماطاحت بأيد عفراء گوه تتنفس وبس دموعها تجري
عــفراء:: ماالج ذنب ريـــمه ليش توجعين گـــلبي وولج مالج ذنب.
غمضت عيونها دموعها تجري گومتها عفراء ساندتها اخذتها الغرفتها تمددت بفراشها لامه روحها حييل وغمضت عيونها، وعفراء تمسح على راسها تبجي وتحاجيها
عــفراء:: انه اسولفلج كلشي صار والله احجيلج ريـــمه ما ألج ذنب والله ما الج ذنب.
جرت الغطا عليها مغمضه عيونها حيل ولامه رجليها الصدرها صوتها مبحوح وگوه تحجي
-تذكرت انه موتتها انه.. انه بأيدي شربتها.
عاينتلي عفراء بحيره تمسح بعيونها كعدت يمها باستها براسها
عــفراء:: ريـــمه، امي تعالجت من السحر والله تعالجت وموتها المرض وهمه جانوا يدرون بكلشي وحجولي حتى ما تنظلمين لان يدرون بيج الصار مو بأيدج، لا تلومين روحج ريـــمه فـــدوه اروحنلج لا تلومين روحج، ولا تجيبين طاري السالفة يم كهلان.
دموعها تجرّي ساكته ضلت عفراء مكابلتها وتمسح على راسها بحيره شربتها ماي مقري عليه وضلت تحاجيها لحد ما نامت، طلعنه من يمها شمس ناطه من البجي اخذتها عــفراء تسكتها ومن اجوا عبود وسجاد كالتلهم نامت صارت احسن،سجاد راد يشوفها مارضت عفراء، نص ساعة ومشوا وي الولد يجيبون كهلان.
وانه افتر وره عفراء بخوف وين ما تروح امشي وراها طلعت ترش الحوش كعدت بباب الهول كاضه شمس واحجي وياها
-خاف تحجي الطروادة وتصير مصيبه النوب.
عاينتلي الصونده بأيدها شايله طرف دشداشتها السوده بأيدها ولافه طرف الحجاب على وجها.
-حتى لو حجت ما اخليه يعوفها.
سكتت محتاره وكل شوي اروحن اشوفن ريـــمه نايمه اعاين بوجها خايفه عليها، طلعت من يمها كعدت بالهول امشط شعر زهره وعفراء طبت تسوي الغده وكلساع تخابر منذر لان راح وي الولد يشوفون طــروادة كاعدين على نار وخايفين لا هم يصير شي ومايطلع.
متانينه شلون هلال العيد كلساع نطلع للحوش، زهره وحسين اخذوا شمس ووكفوا بباب الحوش وعفراء بس كضت الغده طبت يم ريـــمه كعدتها رادت مارضت تكلها
-عوفيني نايمه.
عافتها واجت يمي تطكطك بأصابعها تحسرت تعاينلي
عــفراء:: والله خايفه عليها.
-حتى انه واكثر شي خايفه تسولف الطرواده.
سكتت وطلعت للحوش تشوف شمس، مشيت وراها ما طولوا بالتسعه سمعنا صوت السيارات دك گـــلبي حيل باب الحوش مفتوح زهره وشمس يصفگن وحسين واكف گدامهن، طبگن سياراتهم گدام حوشنه واسمع هوسة الولد، عــفراء جرت عبايتها من الحبل لبستها ومشت بساع اعاين وراها شهگت ابجي بس لمحته من دنك على حسين باسه وباس زهره وهيه شبگته تبجي، شال شمس بأيده يبوسها ويضحكها، عاين العفراء اطه شمس الصيهد واجه يمشي بساع العفراء وهيه فاتحتله ايدها بس وصل يمها شبگته حييل تبجي بصوت وهو نزل راسه على جتفها حاني ظهره وشابگها بأثنين اديه
غطيت حلكي بأيدي ابجي على شكله وعفراء وخرت من حضنه تعاين لوجهه وترد تشبگه تشهك حاجاها صــيهد
صــيهد:: شني خويه وين چان بسجن الحوت.
وخرها طروادها يمسح بعيونها وباسها براسها دار يعاين للولد بباب الحوش شايلين شمس ليفوك وواحد يشمرها للثاني وهيه تضحك بكل صوتها ومنذر يصيح
-هدوووها.
اخذها وهـــب يبوس بيها وزهره تسودنت متخوصرتله وتصيح عليه
-هبهب.
ضحكوا كلهم وهبهب غطه وجهه بالجفيه ويگلها
-العفو العفو ما اشاقي غيرج هاكم شمس.
اخذها ســليم حطها على جتفه ومنذر رايحه روحه كلساع يمد ايده يخاف لا تطيح وهمه يخبثون وياه.
طبيت للهول من طبوا الولد يردون يجون للدوانيه، وكفت اطكطك بأصابعي ودموعي على خدي طبوا الولد للدوانيه اعاين من الشباج، وعفراء وطرواده واكفيلهم بالباب، حاط أيده على جتفها ولامها الحضنه، طبوا كلهم ضل بس منذر اخر واحد دفع ايد طــروادة من جتف عفراء
منذر:: هد مرتي.
طــروادة :: ههههه مو اخذها منذر؟
مد إديه اثنينهن شال ايد طــروادة ردها على جتف عفراء يضحك ويگله
-اشبگها توأمك هاي وچنت مفارگها اشبگها.
جرها طــروادة الحضنه يضحك طب منذر وره الولد وعفراء بساع ردت شبگته تبجي ووخرت تبوس بأديه
طــروادة:: شني السالفة عفره
-ردت اموتن بالحسين ردت اموتن.
باسها براسها
-اسم الله عليج يابعد روحـــي .
حجاها وفتحوا باب الهول صرت بوجهه مسحت عيوني بظهر ايدي شفايفي ترجف وانه عيوني على راسه وين شعره الحلو.
عاينلي مبتسم وخر ايده من عفراء وفتحها الي مشيت الحضنه ابجي شبگني حيل شايلني من الگاع فقدت ابجي بصوت وهو شابگني ويضحك گال
-جا مو زعلانه انتِ؟
نزلت رجليَّ للگاع عيوني مغوشه من البجي وكاضه ايده بأثنين ايديي بستها وحطيتها على كصتي
-يمن اروحنلك فـــدوه والعباس، انه غبية واقهرنك.
ضحك باسني بخدي فوك اثر الجرح وعاينله بقهر يمسح عليه بأبهامه عاينت لعيونه امسح بدموعي
-يروح.
هز راسه متحسر
-باجر اخذج للدكتور.
حجاها وعاين للبيت دار العفراء يسأل
طــروادة:: چا مرتي وين؟
ارتبكت عفراء مشت تنطيه ماي وتحجي
-نايمه.
-نايمه؟ شني ما تدري بيه اطلع اليوم؟
جابتله كلاص ماي اخذه من ايدها عاگد حاجبه ويعاين لوجها
عــفراء:: تدري بس مريضة والليل كله ما نايمه هل نامت هسه.
-شبيها مريضه؟
-مصخنه.
تحجي مرتبكه وماتحط عينها بعينه عاف كلاص الماي بأيدها ومشه لغرفته نعاين وراه بخوف، فتح باب الغرفة وعاينلها
عــفراء::توها نامت لا تگعدها.
هز راسه خوش، وطب للغرفه عايف الباب مفتوح جابله هدوم وطلع سد باب الغرفة يعاين علينه وخرنا اثنينا من گدامه مشينه للمطبخ عاف قميصة على المخده بالهول طب للحمام يسبح وعفراء بساع گالت
-سوي چاي للولد خل اشوفن ريـــمه
ومشت بساع لريمه تحاجيها سويت چاي واسمع صوت الولد يسولفون بصوت عالي وبس طلع طــروادة من الحمام الخاولي على راسه طب للهول يريد يلبس قميصه وبس صار ظهره علي فتحت عيني حيل وشهگت مصدومه التفت فاز يعاينلي مغطيه حلگي بأيدي واعاينله بصدمة ظهره ازرك، لبس القميص دموعي تجري بلا صوت اجه يمي بساع لم وجهي بين أديه باسني بين عيوني
-اششش اسكتي كلشي مابيه.
وخرني يمسح دموعي بأصابعه صاحوا عليه الولد مشه بتعب وانه منظر ظهره ما يروح من بالي طلعت عفراء من يم ريـــمه حجيتلها على ظهر طــروادة ابجي
عــفراء:: شعره يرد وظهره يطيب المهم ردنله بخير وسلامه احمد ربي واشكره ألف مره.
صبت الچاي بصينية وصاحت لحسين اخذه الهم كعدت بباب الدوانيه الداخلي اسمع سوالفهم ناقصهم بس بريا.
يحجون بصوت عالي وكلمن يجرله بصفحه .
"""
وهـــب :: بعد فرغوا صــيهد واستاذ كهلان عدهم استعداد ينبشون گبر شعلان وينشدونه ياهو الكتلك، اعاينلهم ساكت افر بسبحتي وسليم بصفي نسجل بصمات ونودي البريا رغم ماعده نت بس هيج حتى نگله ما نسيناك، شلت راسي على صوت صــيهد
صــيهد :: جا شني احنا خناث؟ ينكتل زلمه من عدنا ببيتنا ونسكت؟ هينه السالفة وعايفينها؟ تحجي تبتلي تسكت تاكل**
-حشاك.. حشاك.
كلهم صاحوا عليه وهوه منفعل وطرواده مدنك ساكت والسالفه منين ما نجيبها ما نلگه حل ومانوصل الراس خيط ، گمنه كلنه من اجه شيخ حيدر وولده تلكيناهم ووراهم بنص ساعة اجه سيد عباس وناسه الدوانيه ماشالت اخذت ســليم ومشينه نتسوك للغده مخبوصين عاينت السليم انشده
-ناخذ لحم غير؟
ســليم:: سلطان راح يذبح الخروف الجابه سيد عباس.
-هنيال بريا مفتك من هاي الجروله
ســليم:: اي بالعباس هسه مال واحد يصورله الهوسه ويگله هاي وادم جايه على حبيبتك ام الصخول.
-انچب وعلي اسولف الطرواده شتحجي على اخته اخليه ينحرك.
ضحك واكفين نشتري سمچ وخابره ابوه يغلط شلون واكفين وي طــروادة افتكينا من شعلان طلع الاتعس
ســليم:: شتريد يابه؟ جاي اتسوك هسه عود بعدين اجي.
سد التلفون من ابوه توني احاجيه وخابرني ابوي ونفس الحجي جنهم متفقين يقهرونه بهالساعة سدينه التلفونات مطفينهن، كضينه مسواك وردينه للقرية مخبوصين نزلنه المسواك اجاني رضا يركض
-ها بويه شتسوي هناه؟
-وي ماما.
-دايحين شو ما إدري بيكم.
رغد::عاينتله مبتسمه واكفه بصف سلطان نغسل اللحم بالحوش مال. بيت عمي شامل وهوه شال رضا يبوسه ويحجي وياه كتله
-اجينا انه وندى وي البنات نساعدهن
طبوا للحوش هوه وسليم عاينوا السلطان كاضلي الصونده يساعدني ضحكوا
ســليم:: ها الخروف تكرب عليك.
وسلطان مغلس ما يرد عليهم مسوي روحه مايشوفهم
سلطان::. كملي حبيبي مالج غرض بيهم چلاب وتنبح.
وهـــب:: اول شي احترم نفسك لا تكلها حبيبتي گدامي هاي اختي ثاني شي انا ماحاچي اخوك الحجه لا تخبط لا اگطع البرجلي على راسك.
ذب الصونده من ايده ووگفلهم خازرهم
سلطان:: شگلت ولك.
مشوا بساع هو وسليم شاردين ويضحكون، حطينله البريمز بالحوش واجت عفراء يمنه طبخنه اللحم مستعجلين صارت بالعشرة ونص ماندري ليمت يستوي كلنه مخبوصات، البنات جوه بالمطبخ ندى ورنه، البنات بالدوام ، وريمه مريضه ضلينه وحدنا نركض
عبود وسجاد لموا حطب خلوه بره الحوش يشوون عليه السمچ، وندى اجت مستحيه من لگت سلطان يمنه سلمت عليه رد عليها وطلع بره يمهم كعدت يم الحوض تغسل السمج
عــفراء:: عود ل١٢ نلحك يكضي الغده؟
ندى:: حتى لو نتأخر للوحده شيصير.
-زحمه خيه
تحجي وتطكطك بأصابعها محتاره كضينه كلشي ضل بس اللحم وشوي السمچ طبينه للمطبخ رنـــه تنظف بالخضره كالتلها ندى
-تسوين زلاطه انتِ؟
رنـــه:: هزيت راسي لا تعبـــت كعدت يمي هيه ثرمتها شويه وسمعنه هوسه عاينه من الشباج
عــفراء:: ياهو الاجه؟
مديت راسي وي عفراء أعاين شفته خاليّ جعفر ووياه مرته وابنه سلموا عليهم الولد وعفراء طلعت تتلكه مرته، ضليت أعاين توه طــروادة طلعلهم سلم على خالي جعفر وابنه وجمد فاتح عينه بخزر من لمح خالي سهيل بباب الحوش يسلم على الولد.
عاين الخالي جعفر بعتب وهوه يمسح على جتفه ويگله
-اجه يسلم عليك.
وكف خالي سهيل گدام طــروادة ماد ايده وطرواده شايل راسه ويعاينله بطرف عينه مايمدله أيده
سهيل:: الحمدلله على سلامتك خالي.
نعاين بخوف الولد يأشروله ويخزرونه، صــيهد وميثم يردونه يسلم بس هوه يعاينله مضيك عيونه وخالي ضال مادّ أيده، عبود حط ايده بأيد سهيل وسلم عليه
عبود::هلا بيك خالي تفضل تفضل.
اخذهم للدوانيه وصيهد جر طــروادة يتعارك وياه
-دايس بساطك انتَ صدك تحجي؟؟؟
-ما احط ايدي بأيده للموت.
وصيهد بحرگه شال ايده ينعل ويغلط ومشوا للدوانيه بهوستهم طلعت للهول سلمت على مرة خالي ورديت للمطبخ اجت عــفراء خايفه لا تصير مشكله ماكو عشر دقايق واجوا اعمامي وليد وشاكر وهي كضت گلبها بأيدها
-دخيلك يا علي، وين الحسين وينه وتكضي على خير.
جريت روحـــي من يمهم وطلعت وره اتختل كعدت يم شباج الدوانيه اتصنت وما افهم شي كلها تحجي وهوسه وكل حجيهم يكتلة جدي گبلها بيومين جانت عدهم كعده بمضيف وهو شعلان طارد واحد من المضيف وهذاك مهدده هسه گلبوا السالفة يكولون هوه الطب بيتنا وكتله عمي شاكر يصيح نگاومهم احنا مايمشي يمنه سجن
وكلمن يجرله بصفحة شويه وگال بصوت عالي
شاكر:: كهلان بويه هاي گدام هالوجوه الخيره گيعان ابوك ابوي اطاني اوراقهن وصدقتهن گبل لا يموت كضينه سالفتهن حطيناهن بأسم ابوك ومانريد منك فلس.
طــروادة ساكت والوادم يگلوله
-والنعم منك.
ورد عمي وليد گالهم
وليد:: بس بويه كون تبطل تحجي علينه جدام ياهو الچان، وين مانروح الوادم ماكله وجوهنه والله انتم ماكلين حگ ابن اخوكم، لو شتكول يابه أبو خالد
شيخ حيدر:: كهلان سبع ما يحجي على احد، يمي ماحاجي عليكم، الوادم شافت بعينها وهل حچت.
وحجوا بساع وسوه يغيرون السالفة وردوا گالوله
شاكر:: انا يشهد علي الله ربع دينار ما اريدن منه وحاله حال ولدي.
طــروادة:: رحم الله والديك، بس عمي خل اذكرك ترى ابوي دافع حگ الگيعان الجدي من زمان .
شاكر:: بويه انتَ چنت جاهل شدراك بالگيعان؟ وين ابو خالد عمي وروح آبوي مادفع درهم، خو تدري بيه انتَ شامل چان رفيجي ووين مانروح سوه، ابوي اطاه الگيعان بس ما اخذ منه درهم واحد.
سيد عباس:: يرحم اهلكم هسه هاي السالفة مو وكتها خلونه فرحانين بسلامة كهلان لو شتگول شيخ؟
ضحك شيخ حيدر وهوه يگله
-والله ما حچيت الا حگ، بس انا هم ادري بالگيعان شامل دافع حگهن وشامل مشه وياي ورافگني مو وياك ابو مرتضى.
گمت بساع من صارت عيني بعين عفراء يم البريمز تعضلي أيدها سكته مشيت مدنگه واكفين يمها سلطان ومنذر وهيه محزمه بالعبايه وفاتحه جدر اللحم گالها سلطان
-هسه يستوي خويه.
-يكفي عود؟
منذر:: اي شني السالفة يكفي ويزود.
امشي بصف الحايط طبيت للبيت ذبيت العبايه وطلعت للمطبخ يم البنات الولد طلعوا شووا السمج واحنا كضينه العلينه وحضرنه المواعين للصب، وانه وعفراء كلساع نروح نشوف ريـــمه غاطه بالنوم ومصخنه، كعدتها عــفراء بس شربتها علاج وردت نامت، طلعنه من يمها والولد خابصينه وين السجادات وين الترب وين الخاوليات، صابونه مدري شني كلساع صايحين على شي نركض وما ملحكين.
كضوا صلاة واجونه صــيهد وطرواده يله ويله وتأخرنا وزحمه خرذلونه احنا نصب واسمع ســليم يدور على وهـــب عباله طفر، اشتغل واعاينلهم من شباج المطبخ گاله سلطان
-راح للكليه يجيب نجمة السلف.
خزره صــيهد يغلط وهمّه يضحكون، نگلوا الغده للدوانيه تعبنه حيل ووره الغده بساعتين يله الوادم راحت ضلوا بس اخوالي وعمامي، وطرواده رد لعبانه روحه لا يريد هذول ولا يريد هذول گوه على روحه ساكت، مشّوا أعمامي والولد هم طلعوا ضلوا بس صــيهد وميثم وي طــروادة البنات بس كضن المواعين ويانه راحن
عفراء تحجي وي مرة خالي وانه كعدت يم باب الدوانيه اسمع سوالفهم خالي جعفر يگله
جعفر:: كهلان بويه ترى الدنيا كصيره وهاي صارلك ثمن سنين مدري تسعه انتَ معادي خالك وچم مره بمره يجيك وتردّه، ترى خالي ماصايره هاي ابتلى على عمره يوم الراح وياهم للصيد هم گللنه؟
سهيل::لو ابوك مكتول چا انا الماسكتت بس وروح امك ابوك أنتل وحده عفناه ورحنه يوم الردينه لگيناه بالشط وواير النتل يمه يجدح.
طــروادة :: يجي يوم ويطلع الحگ ساعتها لو انتَ على فراش الموت هم اكتلنك.
حجه خالي جعفر ماراضي وطرواده يسكت لان بس هالخال زين ويانه، رد گاله
جعفر:: يابه حتى نطيّب النفوس انا اريد اخطب اختك رنـــه لمؤمل ابن خالك سهيل.
دك گـــلبي حيل اعاين العفراء صوتهم عالي هيه هم سمعتهم ضحك طــروادة يگله
-انا ما اريدن النفوس تطيب خالي رحم الله والديك.
سهيل:: شنهي التريده كهلان؟ ضل عوزي احبن ايدك.
-لا تحب ايدي ولا احبن ايدك، ماعدي نسوان للزواج، وهاي گدام خالي جعفر اليوم سكتت النوبه لو لفيت ووصلتني اطردك گدام الوادم.
انتفض خالي سهيل زعلان وخالي جعفر يحجي على طــروادة طلعوا من عدنا زعلانين، شويه ورد طــروادة طب للبيت بعصبية يغلط عليهم طب للهول عاينلي وشال ايده ينتر
-انتِ تردين بريا ووولج؟
عاينت العفراء بخوف بلعت ريك ورديت اعاينله هزيت راسي ااي دار من عدي يسب بخالي سهيل ودار العفراء شايل ايده ويصيح
-انااا وجهه ما اريدن اشوفه وخالج جايبه الي يريدني اناسبه، والله لو يمووت لو يمووت ما اناسب سهيل ولا احط أيدي بأيده.
عــفراء:: على كيفك اعصابك هاي هيه خيولون، ارتاح هسه انتَ وينك وين هالسالفة مو تعبان.
مشه يغسل وجهه گالتله
-اكلك جا وين وديت عبود.
غسل واجه للهول
-وي باقر وجعفر ولد سيد عباس، يفترون لان ابوهم راح بكعده وهمه مايردون يرحون وياه.
هزت راسها خوش عاين مناه ومناه ورد عاينلها
-شني ريـــمه ماكعدت؟
دارت وجها منه تهز راسها لا مشه للغرفه بخوف وعفراء تدعي كون ريـــمه كلشي ما تحجي .
ريـــمه :: ما ردت شي بس اغمض عيني رما اكعد الوجع البگلبي ما ينوصف، ما اتذكر كلشي واغمض عيني اجبر نفسي انام بلكن حلم، بلكن من اكعد متذكره كلشي، وكل التذكرته دموعي من ابجي بحضنها وانه اكلها امي هيج تسوي،وايدها التمسح دموعي بحنيه وصوتها وهي تبوس راسي وتگلي ميخالف يمه ميخالف.
وينج يمه انه الموتج يمه انه الشربتج سم السحر بأيدي، گـــلبي شلون يبرد، اغمض عيوني حييل ما اتمنى اگعد اغفى واحس بأيد تمسج على راسي وشفايف دافيه تبوسني بگصتي
-ريـــمه .
فتحت عيوني بتعب عاينتله كاعد بصفي على طرف الچرباية وايده تمسح على راسي ركزت بوجهه وشلت عيني الشعره مزينينه
-گومي اخذج للمستشفى .
هزيت راسي لا أعاين بوجهه جراني من ايدي كعدني على حيلي يعاينلي عاگد حاجبه وانه احس لو حطيت عيني بعينه مسويه ذنب شلون اعاينله وانه السبب بموت كل اهله تدنى يمي يشبگني يمسح على ظهري
-الهالدرجة الصخونه متعبتج حتى الحمدلله على السلامه ما تگليلي.
وخرني من صدره مبتسم شلت ايديي امسح عيوني اريد احجي احس صوتي مايطلع
-الحمدلله على سلامتك.
ماد ايده يمسح على خدي ويعاين لوجهي مبتسم
-الله يسلمج عيوني انتِ.
درت وجهي منه للمخده جريتها وفتحتها طلعت الاوراق منهن خليتهن بأيده عگد حاجبه مافاهم وانه حتى حچي مابيه احجي گـــلبي يوجعني.
فتحهن يعاين بيهن دنگت عيوني مغوشات
-لكيتهن عد ابوي.
وبس قرأ التاريخ نزل من الچربايه مصدوم يغلط ويسب صيح بحرگه يغلط عليهم دنگت ابجي انه ما گدرت احط عيني بعينه يا فشلة اخواني گدامه بسبب ابوي.
دكت الباب عــفراء من عله صوته طلع يمها يحجي بحرگه وما گدرتله هد عليهم، ضميت روحـــي بالغطا متمدده والضياع البروحي مثل الجمر يحفر بصدري، وين اروحن وشلون اعيش وي هالذنب شلون وانه سبب موت أعز اثنين عدي، الناس الشالوني بينّ اديهم تسببت بموتهم اثنينهم.
ومنو السبب أمي وابوي غمضت حييل ابجي والله لو اشرب من دمهم مايبرد گـــلبي .
النفس احسه يخنگني اسمع الهوسه وأسد أذني
رنه :: نعاين من يم الشياج خايفين على طرواده وهوه روحه محترگه حرگ يغلط ويصيح ويهد على شاكر وهذاك يغلط عليه وعلى ابوي نص ساعة همه هوستهم تشل الحال لمن الولد اخذوا طــروادة ومشوا للگيعان مشت عفراء الريمه جرت الغطا من راسه عيونها من البچي مورمه ووجها احمر، مسحت عيونها وگالتلها
عــفراء:: كومي غسلي واكلي شي.
وهي گوه تحجي صوتها رايح
-كهلان وين؟
عــفراء:: عوفي رجلج هسه سواها هوسه راد يكتل ابوج وابوج يصيح انا ما الي غرض الاوراق جانن يم ابوي وواحد يشمرها على واحد، اخذوه الولد وراحوا للگيعان، ريـــمه عاينــي كافي هسه عرفتي الحگ وين وعرفتي اهلج شني من بشر وتذكريتي اللازم تتذكرينه هاي هيه بعد شيلي السالفة من راسج وكافي لا تضلين تفكرين بيها ولا تجيبين طاريها يم كهلان.
كعدت ريـــمه على حيلها مدنگه عيونها ودموعها تطيح شلون قطرات المطر بحضنها تهمس بصوت مخنوگ
-ما ينسي عفره الوجع البگلبي يذبح .
-ميخالف الخاطر كهلان ريـــمه فـــدوه عاينــي انه البگلي زلم ما تحمله وسكتت وتحملت كلشي الخاطركم انتِ واخواني.
شالت راسها عيونها ممروده مر حطت ايدها على گلبها تشهگ وتگلها
-جاي تستوعبين انه شمسويه؟ عفره انه بايگه گراب خنجر عمي ومشربه سحر الامج، لو ما انه محد منهم يموووت شلون ترديني اعيش ولج النفس احسه ذنب عليّ اريد اموووت والله اريد امووت.
-اشش صوتج تفهميني انتِ؟ جاهل واهلج يمشونج بالسحر، شاكر وميلاد همه الباگوا الگراب وهمه السحروا امي، انتِ مالج غرض بكلشي صار.
تهز راسها لا وتبچي بخنگ احسها الهالساعة ما مستوعبة ومصدومة، كلساع تمسح على گلبها گومتها عفراء گوه عليها طببتها للحمام تسبح وانه حميتلها الغده، خايفين عليها خايفين من تضل صافنه وفجأة تفتح عينها حيل وتبجي، طلعت من الحمام مستنده على الحايط إديها يرجفن وگوه عليها عفراء وكلتها وماخلتها تردّ للغرفة ضلت يمنه بالهول مشطت شعرها وشمس كلساع تبوسها وهي بس صافنه ودموعها تجري باستها عفراء بخدها
-ريـــمه فـــدوه كافي خيبه مردتي گـــلبي، كون امي عايشه وتشوفج تبچين جا تسودنت شجاج؟
مسحت عيونها بأثنين اديها وكعدت عدل مگابله عفراء صوتها يرجف وتعيد الحجايه مرتين
ريـــمه:: كليلي.. كليلي شگالت عليَّ من. من درت بيه انه السحرتها.
بجت غاصه بالحچايه مچلبه بأيد عفراء
-شگالت عليَّ كرهتني؟ كرهتني حاجيني انه اتذكرت من حجيتلها مسحت على راسي مازعلت من عدي.
أشرت الزهره تاخذ شمس وتطلع وهيه تعاين بشك تريد تفهم، ومن اشرتلها اخذت شمس وراحت للحديقة، عفراء كضت وجهه ريـــمه بين اديها تبجي
عــفراء:: ما زعلت عليج، ومن طابت من السحر ضلت تكض الباب بلكن تطلعين وتشوفج امي تموت عليج ريـــمه جانت تگول اعز من بزري بس ريـــمه، ما زعلت عليج وألله مازعلت.
شبگتها تبجي بحرگه بس ردناها تسكت، اخوانها اجوا عليها لان بالغده من ماشافوها نشدوا عليها وعفراء كالتلهم مصخنه ونايمه، كوه قنعتها عفراء غسلت وجها وطلعت للحوش سلمت عليهم سلطان وسليم يعاينون لوجها مستغربين رادوا يأخذونها للمستشفى مارضت سلطان كالها رايح اجيبلج علاج.
طلعوا وهي ردت تتجه على الحايط طبت الغرفتها وعفراء تعاين وراها بقهر محتارة، مشيت وياها للحوش احجي
-ليمت تكضي هالسالفة والله تعبـــت انه يوميه سالفة شني؟
عاينتلي تهز بأيدها
عــفراء:: شاكر ووليد ورانه أيّسي نرتاح.
-كون يلحكون شعلان.
تلفتت بخوف وغمتني
-دهر صابج لا يسمعج احد رنـــه استري علينه مالنه خلك مصيبة جديدة.
رفعت اكتافي معليه بأحد ومشيت للسياج اعاين ليبره بطوطي مطلعتهن ياكلن اشو ولا وحده
-يمه بطوطي ماهنه.
فتحت الباب ومديت راسي كله اجت زهره تركض طلعت تفتر تدور عليهن وكلساع وصاحت علي
-ماهنه.
درت عيوني الهاسكي الصغير يلعب داير ماداير شمس وهيه تضحك.
-خاف هذا شردهن؟
عــفراء:: ياهي مالته كويعد وساكت المن طلعتيهن انتِ؟
اعاين مقهوره وخابرت. عبود اجوني هوه وسجاد
-عبود اخذني للشط ادور بطوطي.
-يا طلابة السوده.
-شماالك؟
هز ايده وسجاد يضحك عليه گاله
-روح وياها ومن تجي خابرني اجيك.
مشه سجاد وانه طلعت وي عبود لابسه عبايتي واتلفت وين راحن مشينه للشط والكاهن بجرفنا الجلبات يردن يشردن
-تعالن بط بط تعالن
وعبود مگابلني ماله خلكي طكيته على ايده
-اركض اركض جيبلي حنطه.
-خاب انجبي.
-خاب لا يشردن شماالك راح يصير الغروب وبس يضلن ياكلهن الواوي.
جر قميصه بقهر خازرني ونتر
-اكعدي هناه لا تتحركين.
مشه مسافه وصل يم الحنطه مال بيت جدي ضاميلهم باريه صاح عليَّ
-رنـــه ابوگ مناه؟
هزيت راسي اي وهوه كعد يمها سواله فتحه بين الكصب مالها جابلي حنطه بچف ايده واجاني يضحك.
اخذته منه ذبيته الهن نزلن للجرف وافتر عبود صار وراهن مشيناهن اغلط عليهن، مرينه من يم بيت عمي خليل وماسه من وره السياج صاحت
-تعااي رنـــه.
عبود:: اوووه اريدن اروح انه رنـــه سجاد متانيني.
-ودي بطوطي ضمهن وروح شويه وخل حسين يجيني ارد للبيت
-حسين وي طــروادة بالگيعان.
كضيت ايده اتوسل
-حباب اريدن اشوف ماريا.
-بت الروسية؟
ضحكت اهز راسي اي ضحك وهو يطكني على راسي
-روحـــي واذا طــروادة ضل يحجي مالي غرض انا.
-لا ما يحجي مالك غرض.
هز راسه خوش ومشه وره البطوط مشيت أركض للباب والتفتت على صوت رغد من باب مشتملها صاحت
-جبح.
-ههههه تعااي.
-جايتجن.
فتحتلي الباب مــاسه تضحك سلمت عليها كرصتني تغلط
-ليش ما مداومه اليوم؟
-اخوي طلع من السجن يا دوام يا دنيا.
ضحكت وخرت منها ماريا واكفه يم الورد مبتسمه سلمت عليها بعدنا ما كاضين سلام وطبت رغد تضحك
رغد:: راح يصير بيه توحد من الكعده وحدي.
مــاسه:: انهجم بيتج الصبح كله كضيتيه ببيت عمي شامل ومساع يم اهلي توج اجيتي البيتج.
ضحكنا وطبينه للهول كعدنا وماسه كعدت وأشرت على المطبخ
-التريد ماي چاي هيه تروح تجيب انه مره حامل كلشي مابيه حيل اسوي، وحماتي بنيه ماتعرف.
ماريا:: كذابه اساساً تاركتني انا اعمل كل شغل البيت وهي قاعده هيك متل الملكه.
وماسه شهگت فاتحه عينها حيل وماريا مبتسمه تشكيلنا
مــاسه:: يمه شلون جذاااابه ووولج.
رغد:: خطيه اكلج انتِ ليمت تتعلمين تحجين مثلنه؟
ماريا:: لا تصيري متل أختك كل الوقت تبرم وراي وتحكي، كل شوي تحكيلي احشي متلنه يله أحشي متلنه يا اخي حلي عني مابدي احشي متلكن
رنـــه:: ضحكنه مختنگين وهيه تشكي بذمه وضمير ووگفت تمشي وتقلد على مــاسه شلون حاطه ايدها على خاصرتها وتمشي
رغد:: ولج احجي مو احشي
ضحكت ورجعت كعدت يمنه نسولف وياها ونعلمها تحجي مثلنه، گامت مــاسه للمطبخ شويه وصاحت عليَّ مشيت وراها تسوي چاي وتعاينلي مبتسمه
مــاسه:: يسلّم عليج .
دك گـــلبي حيل ودنكت ساكته اجت يمي تضحك
-رنـــه انتِ وبريا غلطانين لا تزعلين من اخوج، بريا بنفسه يگول انا غلطان.
هزيت راسي لا عاينت لوجها
-ما زعلانه منه والله بساعتها جان محترك گـــلبي والنوب من بردت گلت حگه، مــاسه هوه ماله غرض عادي عده يزوجني البريا، بس يريد اكضي دراستي يخاف عليَّ، النوب اليوم اجوا اخوالي وخالي سهيل خطبني وهوه كاله ماعدي بنات للزواج ومن رد للبيت اعصاب صاح بوجهي تردين بريا كتلني الخوف هزيت راسي اي.
-حتى بريا يكتل اخوالج من جبيرهم لصغيرهم
-مو تكليله.
-لا شسالفه.
-اصابعه صارن زينات
-اي اول مارايح ماراضين لان اصابعه مكسرات رايدين ينزلونه ماراضي.
-خليه احسن حتى لا اشوفنه ويشوفني ونحرك گلب كهلان بس المصيبة هم اخافن لايصير بيه شي وعلي كل يوم گبل لا انامن اقره الفاتحه آلام البنين وادعي كون الله يحفظة ومايصير شي بيه.
ضحكت تتلفت قلقتني عاينت للشباج حسيته راد للبيت وخاتل
-عليج العباس بريا هناه؟
مــاسه:: لا وداعت صــيهد بعده وره الاربعين يله ينزل.
-خفت شفتج تتلفتين.
ضحكت ومشت للطباخ طفت القوري وتحجي
-ماتوقعتج تحبينه.
ابتسمت مدنگه خجلانه وگلبي يدك بطريقة غريبه رغم سرعة دگاته شعوري حلو حتى الخوف الاخافه من الموضوع متعلق بيه احسه يختلف. دارت علي تضحك
-خدودج راح ينفجرن هههه ترى انه مــاسه مو بريا.
-هههههه
-تحبنيه وولج.
-ما ادري مرات احس اي ومرات لا بس من اكبر ما اريدن اتزوج غيره.
احجي واحس وجهي يبخ حراره شلت راسي اعاينلها عيونها مو علي عاينت وياها عيونها على الكاونتر وتلفونها مفتوح اتصال راحت ضحكتي بساع فتحت عيني حيل گـــلبي دكّ بقوة
-هذا بريا؟؟
هزت راسها اي مرتبكه. انسد الاتصال ورد خابر عليها طلعت من يمها مقهوره ليش سوت هيج ليش ماكالتلي، كعدت يم رغد ضايجة وهيه شويه واجت يمنه تعاينلي خجلانه تمنيت بس يجي واحد من الولد ويردني للبيت.
رغد شويه وراحت البيتها وحدها، وماريا طبت للغرفة كالت مــاسه
-اسفه رنـــه والله كسّر خاطري .
-لا تسوين هيج وياي مــاسه هسه لو حاچيه شي مو زين لو حاچيه على اخواني وهوه سامع يضل يعيرني طول عمــري .
-لا ما تحجين ادري بيج ماتحجين على اخوانج والله كسر خاطري البارحه يحجي وياي يگلي طاك گـــلبي عليها من اجيتي كيفت وهل خابرته.
سكتت ضايجه، شويه واجه علي حسين رديت وياه للبيت طــروادة بعده ماجاي وماسه ما ارتاحت ساعة وخابرتني تعتذر
-مازعلانه لا تضلين تفكرين بيه.
-ما اعيدنها.
-عفيه.
حجيت وياها شويه وسديت التلفون وره العشه بشويه اجونه وادم من السلف يسلمون على طــروادة وهوه بالگيعان خابرناه اجه ضايج، رايح علمود شغل الحراسة ماراضين يرجعونه وهوه مداوم شهر الا شويه مارضوا يطونه فلوس الايام الداومهن حيل انقهر، ضل وي الوادم بالدوانيه وعفراء تسوي چاي وترد ليوره وانه كاضه كتابي وأفتر عليها ملينه مناه لمن الوادم راحت طب طــروادة تعبان كعد يمنه شويه بالهول سأل على ريـــمه كالتله عفراء لا زينه اكلت وردت نامت، سكت راحتله شمس تحطّ ايدها على راسه ضحك
-بعد ماكو شعر تجرينه خالي.
عــفراء:: بله طول شعرك بتي تريد تجره
ضحك جر شمس الحضنه يبوس بيها وهيه تصرخ يحط وجّهه برگبتها يبوسها ويدغدغها تگلب الدنيا بالصريخ، وبس يوخرها تمد اديها اثنينهن وترطن تلعلع بس حجيها ماينفهم.
لعب وياها شويه وعاين لحسين يسحل بفراشه يروح للدوانيه گاله
-هاه؟
عــفراء:: يگول صرت زلمه زحمه انام يمجن بعد.
-ولك انا ذاك اليوم نايم يمهن.
ركصتله حواجبي
-من ريـــمه نامت بفراشك.
ضحك يمسح برگبته وحسين ما مهتم اخذ فراشه للدوانيه گام طــروادة خابر عبود وضل واكفلهم بالحوش لمن ردوا للبيت هوه وسجاد وطبوا للدوانيه يله هوه مشه الغرفته.
گالت عفراء
-افرشي خل انامن ميته من التعب اليوم.
مديت فراشاتنا تمددت بفراشها وانه هسه يله تذكرت عدي واجب كعدت اكتب گالت
-اضن اليوم تمطر مغيمه
-انتِ وريمه تركصن للشتا وهوه بعده ماجاي شني السالفة منيلها مغيمه.
گلبت عيونها لفت راسها ونامت عافت زهره وشمس عليَّ شلعن گـــلبي.
""
ريـــمه :: مسحت عيوني ملتفته عليه سد باب الغرفه وشغل الضوه يعاينلي شافني كاعده ركّز بعيوني وهو واكف بالباب وايده على دگم الگلوبات
- ها ريـــمه شلون صرتي؟
-زينه.
احجي واتحمحم اريد صوتي يرجع طبيعي ماكو، طفه الضوه أحس ظلمة حيل ما اشوفنه مدري انه الدايخه وعيوني مغوشه، التفتت عليه من حسيته واكف يم الچربايه بجهته، ذب قميصه ووخر الغطا تمدد ومد ايده على زندي
-تعاي.
جراني الصدره ضميت روحـــي حييل وودي اشرد من كل شعور وكل هالدنيا لضلوعه شبگني على صدّره بأثنين اديه غمضت عيوني يحرگني أشم برگبته وگلبي ينعصر عصر، لو تدري لو تدري ريـــمه الميت عليها شمسويه، ماعاينت لوجها .
شال راسي من رگبته يعاين لوجهي وخر شعري لوره اذني وتدنى يبوسني بخدوي
-بعدج مصخنه.
شلت أيدي ساكته اتلمس شعره جراها لشفايفه
-راح.
-عذبوك؟
حجيتها مختنگه واتلمس خده بجف ايدي گـــلبي يدك حييل سكت فتره يمسح بأيده على ظهري شال ايده الثانيه تلمس خدي ونزلها جوه شفتي
-امم بس هسه جاي أتعذب اكثر.
نزل ايده لفكي يقرب وجهي الوجهه باسني متردد خاف ارفضه، عفت روحـــي بحضنه اريد اعيش لأخر مره اريد انسى روحـــي بين أديه وانسى كل افعالي آريد آنسى انه ريـــمه بت ميلاد.
رجعني لفراشي متفاجأ كض وجهي بين أديه يحجي نفسه مگطوع
-انتِ مصخنه ولعبتي بحالي، عاينيلي ريمي اوخر عنج؟
ساكته بس صوت نفسي عالي راسي على المخده وهوه رافع روحه يعاين لوجهي شلت ايديي ساكته عبرتهن على رگبته اشبگه دنگلي شبگته حيل بسته برگبته عصر زنديّ حييل
-تعذبيني.
حجاها ورجع يبوسني بشوگ بوسة اعتذار وندم من خدي لاذني يهمس
-اسف ريمي ياريت تنسين اعتبرنيي اول مره المج بحضني.
بسته بخده وايدي على رگبته
-اي، نسيت.
-افرشلج ضلوعي والمج طول العمر بين ايديي ما اتعب ولا املن.
يحجي بهمس صوته يرجف چنت متمنيه للحظة آنسى كلشي عايشته اندمج واعيش بس اله ما افكر بأي شي غير لمسة أيده آنسى روحي لفترة قصيرة وحس بيه من خوفي وحضنتي اله، حسسنه بيه شي وكل ما يسأل ما احجي بس اشبگه،
طافت ايده على جسمي تمسح آثار الوجع البروحي، تطبطب على كل كسر بگلبي، الحد ما حسيت روحـــي أتلاشى بين أديه متجاهله كلشي وكل العايشته بهاللحظة انسانه نظيفة ماعدها ولا ذنب بين ادين الشخص اللي مرسوم بروحها وگلبها طوقني بين أديه يضمني الحضنه حييل.
همست بأذنه صوتي مخنوك
-أحبنك كهلان.
جمد شال راسه يعاين بوجهي گوه يتنفس ضحك ودنك يبوسني يردد
-اعشگنج يا روحـــي .
لمني على صدره حيل ضامني بأثنين اديه غمضت عيني لحظة وانتهت هاي انه ريـــمه الخلوها اهلها مجرمة.
جريت نفس بقوة ايده تمسح على زندي وشفايفه كل شوي تنطبع على كصتي
-ريمي.
-هم.
-شبيج ضايجة؟ على الاوراق مال الگيعان ؟ ترى انتِ مالج غرض ولا عبالج من ابوج يسوي سالفة ارد عليج، انتِ مني وبيه معلينه منهم لو شما يسوون.
يحجي وانه ساكته مغمضه عيوني حيل والله لو تدري ماتعاين بوجهي من ضليت ساكته راد بسّ يضحكني
-تدرين من زينوا شعري فكرت بيج كلت كله منها حاطه عينها عليه.
شلت راسي اعاين لوجهه مبتسمه گوه على روحي تلمس خدي يحرك ابهامه عليه
-يابعد روحـــي اضحكي وخليني اشوفن دربي
درت وجهي منطيته ظهري ونايمه على ايده شبگني يسولف
-باجر اريدن اشوفج بالبيت لا تحرميني من طولج الجنه غصن سيسبان.
-ان شاءالله
احجي وبگلبي غير حجي لساني، جر هدومي من جتفي قشعر بدني من حسيت شفايفه تبوس أثرّ الحرگ
-ريـــمه صدگتي انا ماچنت ادري بيج بالبيج؟
-اي، وادري انتَ الطلعتني من النار
- ابوج هم ماعافج واحد يحچي حگ الله احترگت رجله وما طلع.
-اي لان لو احترگت بعد منيله ريـــمه .
لمني الصدره حيل
-هي ريـــمه وحده غصن سيسبان.
حجاها ضام وجهه برگبتي غمضت عيوني ساكته الحد ماحسيت نفسه ثگل وغفه غفيت بأيده وياريت ماغفيت
ارض كلها غبار أشبهه بالصحراء افتر بيها بخوف واتلفت ابجي وصوت مثل الصدى اسمعه
-ريـــمه ريـــمه .
اركض وره الصوت وما اوصل الشي وفجأة شفت شجرة يابسه ومتهالكه ركضتلها وانه اسمع الصوت يجي من يمها، واول ما وصلتها امي رباب بلبسها الابيض جوه الشجرة ينزل من حلكها دم تقيئت دم وتعاينلي
-ليش ريـــمه .
شبگتها اصرخ ماتت بين ايديي.
فزيت بشهگه گوه اجر النفس ايدي على گـــلبي وبس اريد انزل من الچربايه عشت الوجع مرتين والحلم چن عشته حقيقه بكل تفاصيله، طلعت من البيت للحوش گـــلبي يوجعني حييل بس اريدن اتنفس .
"""
رنـــه:: الهوه عالي واول ما هب طفت الكهرباء بدت ترعد ضميت روحـــي يم زهره حيل وحاطتها هيه من يم الشباچ لان اخافن فزت عفراء گالت
-رنـــه، خاب رنـــه، گومي غطي الماطور وحطي القمريه مال صخلتج.
-ماا والله اخافن
-كوومي.
كمت على حيلي ادردم،بعده الشته ما اجه شعدها ترعد، فتحت باب الهول رعدت رعده قوية رجفت كلبي رديت ليوره اخاف اعاين للسماء وهي تلمض، واخافن ارد للبيت تكتلني عفراء شجعت روحي ومشيت توني اريد اطلع من باب الهول شهگت فاتحة حيل مصدومه وانه اشوفن النار واجه بسياج الحوش مال بيت عمي شاكر ومفترة داير ماداير بيتهم
اعاين بصدمة رجليَّ رجفن والتفتت فازه على صوت طــروادة من فتح باب غرفته
-ريـــمه .
وبس شاف النار دفعني وطلع يركض ركضت وراه الباب الحوش واعاين گدام النار واكفه ريـــمه شهگت حييل وطرواده جرها بكل قوته ذبها بحضني ورد يركض عليهم ويصيح طلعت عفراء تركض وراها سجاد وعبود ركضوا وريـــمه بأيدي ترجف وتجر نفس بشهگه، وعفراء بس شافت النار صرخت وركضت على بيتهم بخوف وطرواده يدفر بباب الحوش ويصيح عليهم.
شالت راسها ريـــمه الوجهي تحجي بصوت يرجف
ريـــمه:: هاجر.. هاااجر.
جرت روحها من عدي وطلعت تركض وتصرخ ما گدرت اكضها، ركضت وراها ميته من الخوف، واسمع صريخ ميلاد گلب الدنيا وطرواده طب الحوشهم والولد التموا طاحت ريـــمه على وجها وانه اركض وراها كضيتها حيييل وهي بس تريد تفلت من ايدي تصرخ بكل صوتها
-هااااجر.
ضميت وجها بصدري اسد بحلگها خايفه والولد يتراكضون سياج الحوش لان سعف گب كله وانه اسحل بريمه بس اريد أردها للبيت، ملخت روحها متسودنه والولد يتراكضون بالماي يطفون ويردون ليوره، طلعوا هاجر تبجي اجت تركض لريمه شبگتها حيييل وهيه تبوس بيها وتلمها على صدرها، اجه كهلان بساع خازرنه جر ريـــمه من زندهاا حيل شالها من الگاع وهيه مچلبه بهاجر،
تستمر القصة أدناه
-اخذيهاااا للبيت بساااع.
دفعها ببطن الحوش حييل طبيت وياها كعدت بالگاع لامه هاجر على گلبها وتبوس بيها عبالك مو بوعيها
رديت اعاين من باب الحوش بخوف هوسه وصياح وميلاد تصرخ وطلعت گدام الحوش تلطم، وعفراء الفطيره كاضتها حتى بدون عبايه، لمن الولد طفوا الحوش وضل بس الدخان گبت هوسه وصياح فاتحه عيني حيل اركز واشوفنهم ملتمين على طــروادة يصيحون انتَ الحرگته لان داير ماداير الحوش كله نفط ومرتضى يصيح عليه
-انتَ بعد متعلم مو اول مره تسويهاا.
هوه وعمي شاكر ووليد يصيحون والولد مو كلهم موجودين لا سليم ولا مــيثم، صيح عليهم صــيهد يدفع بيهم وسلطان گاعد على حيله تعبان ايده على راسه
طــروادة:: لو انا الحارگه جا ما اجيت اطفي ولا صيحت حتى تگعدون
شال ايده عمي شاكر يريد يطكه دفعها صــيهد يصيح بوجهه
صــيهد:: مثل ما ابووك انذبح بفراشه حوشكم انحرك سدها مثل ما سديت كتلة شعلااان.
هوسه وصياح عفراء من ميلاد ضلت تغلط جرت ايدها واجت علينه بساع بس وصلت يمي كضيتها ارجف واهمس
-ريـــمه الحرگتهم.
فتحت عينها مصدومة وتعاين الريمه بعدها كاعده بالگاع وتبوس بهاجر بخوف، صــيهد جر طــروادة من ايده وهوه يصيح على شاكر
-بله اذا انا حارگه شتسوي، تكص رجليَّ ؟ يله دام هيج اعتبرني انا الحرگته
وخرنه من باب الحوش وكفنه گدام ريـــمه اثنينا، وصيهد دفع كهلان على باب الحوش يغلط عليه
-ليشش تمسلت؟
-يييله لا تصيح يعني لو انا الحارگه المن اصيح واكعدهم؟
صــيهد:: خيوووولي لا ترد عليه البسه شكو تگله انا الحارگه.
نعاينلهم بخوف واحد يريد ياكل الثاني، طب طــروادة للبيت وسد باب الحوش برگع طبوا وراه عبود وسجاد، وهوه ما مهتم دنگ على ريمه شالها من زندها وجراها للبيت متسودن، وعفراء تركض وراه، ضلت هاجر بأيد سجاد وهوه يعاين ورانه مستغرب.
تستمر القصة أدناه
دفع ريـــمه الغرفتنا وعفراء رگضت وكفت بينه وبينها وتحاجيه بخوف
-صوووتك صوووتك.
طــروادة:: ووولج تسودنتي؟ ووولج رررريمه.
وهي وره عفراء تعاينله ولامه روحها حيل محتضنه نفسها ترجف وتردد
-نسيت هاجر نسيت هاجر.
وطرواده متسودن شال إديه ليفوك يصيح
-يااا علي يا أبو الحسن.
ورد عاين الريمه يفور
-صاحيه انتِ صااااحيه؟ شني تردين تصيريلي شعلاااان؟
22
شبگته عفراء تتوسل
-اخوتها لا يسمعون فـــدوه اروحنلك صووتك صوتك كهلان صوتك فـــدوه.
ميت من القهر ويفتر بحرگه طلع من يمنه ورگع باب الغرفه حييل دارت عفراء على ريـــمه تعاتبها وريمه تبجي وتگلها
-نسيت هاجر بالبيت نسيت هاااجر.
-ريـــمه اااهلج هذول اهلج واحد يحرگ اهله؟
ومن بين دموعها هزت راسها اي
-أحركهم احركهم واحررك روحـــي وياهم محد من عدنا يستاهل يعيش وعمي شامل وامي رباب ميتين.
مدت ايدها عليها سدت حلگها حييل
عــفراء :: سددي حلگج وكااافي عليتي گـــلبي .
بجت لامه رجليها الصدرها، گامت عفراء من يمها اخذت هاجر من سجاد غسلتلها وجابتها يم ريـــمه بالغرفه تمددت لامتها الگلبها، سجاد مشه يم اهله ساكت، وطرواده اعاينله كاعد بالحوش يدخن مقهور، طلعت يمه عفراء ما اسمعهم شيسولفون، طبيت للغرفة اعاين الريمه شابگه هاجر حيل الحد ماغفت.
شويه واجت عفراء ضايجه گالت
- شلون بله اگل الميلاد تعاي اسحريلي ريـــمه وخل تنسى سالفة امي.
تمددت بفراشي ساكته اعاينلها ميته من القهر وتعاين الريمه بحسره
-شيسكتها ريـــمه بعد.
غمضت عيوني احس روحـــي تعبـــت من التفكير بس أريد اغفى.
""
جــويريه :: كل شويه خرعه وفزه دخل للمشتمل يرگع بالبيبان باوعتله اسأل
-ها؟
مشه يغسل ويحجي بنتر
-ماكو شي .
-طفيتوهم؟
-اي.
تستمر القصة أدناه
سكتت مشيت للغرفة تمددت منطيته ظهري تمدد هوه هم يحجي ويغلط
-تريدلك واحد بهالقرية صاحي ماكو كلها مچلوبه.
يحجي ويحجي واني ساكته الحد ما جر الغطا من عندي حييل ينتر
-انتِ شبيييج گالبه خلقتج صارلج چم يوم؟
-مابيه شي أنطيني الغطا.
جريته عليًَّ تغطيت زين گام طفه الضوه وفتح الشباك
-لاااا صيهد.
وهوه اجه للچربايه تمدد وماد ايده فاتحها
-تعااي.
-شسااالفه؟
-تجين لو اطببها للغرفه وعلي!
حطيت راسي على ايدها حييل صيح موجوع وجر ايده يفرّك بيها خفت بسرعه كعدت على حيلي جريتها أمسح عليها
-ما ادري بيك والله
مسحت على زنده جراني حييل الحضنه
-خنگتني مو هيج.
رخت ايده ضايج
-عليمن مطنگره؟
-ماكو شي
-لا اكو سولفي.
درت وجهي عليه مرتبكه وخايفه احجي خايفه من رده گتله
- باوع انتَ من هسه لو ناوي تتزوج نجمة گـــلي ليش بعدين تصدمني واسوي مشكله الها اول ما الها اخر.
-ايبااه شتسوين بله سولفيلي.
-مالك شغل شنو اسوي بس جاي نحجي صدك هسه احنا انتَ تحبها.
-مو گتلج ماكو نجمة؟
-اني وانت ندري اكو نجمة لا تجذب علي ولا اجذب عليك اني حتى شفتها.
-وين شفتيها؟
-بالكليه يعني خاف عبالك بعدني ما ادري، والصراحة صارلي يومين افكر وقررت اتطلك واروح اعيش وي بيت خالي شامل.
وخرني من ايده ويحجي بنتر وصياح
-لا اله الا الله، يشهد علي الحسين اذا صفگتج راشدي افرن وجهج فررر جيبي الطلاك على السانچ وعاتبيني لو ما كص
كعدت على حيلي احجي وشوي شوي ارجع ليوره خايفه
-شنو تريد تتزوج علي وابقى ساكته والله العظيم مستحيل اسكت وبسرعة تطلگني
-خررررب روحج خرررررب.
گام بسرعة التفتت للشباك خايفه شغل الضوه واجه علي شلت ايدي احمي روحـــي خفت من عصبيته جرني من زندي بقوة واني اصيح
-عووفني إني اروح من وحدي عوفني.
وگفني گدام المرآيا لازمني من رنودي اثنينهن وواگف وراي اعصاب صاح
-عااايني بالمرايا شجاي تشوفين.
باوعت للمرايا خازرني صرت سباعيه گتله مرتبكه
-آشوف انسانه قوية مستحيل تسكت عن حقها.
لزم زنودي بقوة صيحت موجوعة وهوه يحجي من بين اسنانه
-راح اموووتنج.
-اايدي.
رخت ايده ويباوعلي بالمرايا نتر
-شتشوفين؟
-وخر عورتني والله وخرر
جريت روحـــي من عنده ابجي مختنگه مسح وجهه واني لگيتها فرصه ابجي كعدت بالگاع وهوه كعد على طرف الچربايه يعاينلي ويدخن، من شفته بقى ساكت بقيت احجي بصوت ناصي. وادردم
-علي صوتج عليه خليني اسمعنج.
-والله يا الله
حجيتها بصوت واضح والباقي بصوت ناصي طفه الجكاره واجه يمي مد ايده على وجهي اباوعله خازرته
-جاي تلعبين بأعصابي لا تعاينيلي هيج.
-باوع شسويت بأيدي.
شلت الردن اراويه مد ايده مسح عليها ودنك يبوسها
-راح الوجع؟
هزيت راسي لا عله شاربه مبتسم، سحبني من ايدي گومني من الگاع ومشه گدام المرايا وكفني ووگف وراي مد أيده يحضن خصري اباوع لوجهه بالمرايا گـــلبي يدك حيل
وخر شعري من رگبتي ودنك يبوسني غمضت عيني مايله بأيده
-فتحي عيني عاينــي للمرايا
فتحت عيوني اباوع للمرايا وخر شعري من يم اذني باسني بطرفها وهمس
-هاي نجمتي الاقصدها هاي نجمة السلف الاحجي عنها.
تستمر القصة أدناه
همست بخفوت
-وينها؟
شال راسه من رگبتي يباوع وياي للمرايا مشاني گدامه يقربني على المرايا اكثر
-هاي الگدامج، انتِ نجمة بولاريس الچنت أقصدها محد غيرج.
گـــلبي يدك بقوة واباوع ما مستوعبه ما مصدگه ضحك
-وداعت امي العزيزة انتِ النجمة الچنت أقصدها لا تشلعين گـــلبي ترى كضه صبري.
سكتت وهو من حسني ما مصدگته عافني وراح للفراش مطنگر، تمددت اني هم صافنه وكل شوي جسمي يقشعر ساعة ابتسم ساعة اگول يجذب علي واتذكر البنيه اللي بالكليه، الحد ما نمت.
للصبح لگيته كاعد قبلي ومبدل قرر يداوم، بدلت ومشيت للبيت قبله، لگيت ندى وجها ما يكصه السيف
-شبيج؟
باوعتلي بحرگه وشايله ايدها تهدد
ندى:: والعباس ما ابقى وياااه لو يموت بس يفكر يتزوج مناه اتطلك مناه.
-ياا شصاير.
دارت بقهر تشتغل واني ما فاهمه شي وكف صيهد بس شرب چاي صاح يله، طلعت وياه اخذنه كهلان ورحنا، طول الطريق يحجون بحرگة حوش بيت شاكر، وصلوني لكليتي وراحوا داومت وبالي يمه كل شوي اتخيل البنيه كاعده وياه بنفس الستيج لو كاعدين بالكافتيريا يسولفون انطحن طحن خلصت محاضرتي ورحت لكليتهم.
ادور واتلفت
-لا تتلفتين چم مره گتلج.
التفتت على صوته لبّس النظارات ووگف گدامي
-اكلتي شربتي؟
-لا ما اريد شي خلصت محاضرات وانتم؟
-كهلان بعده بالمحاضره بس خل يكضي، اطيني ملازمج.
اخذهن من ايدي اباوعله وهوه يرتب بيهن وي ملازمه باوعت وراه شفت البنيه نجمة بلعت ريگي بخوف وگتله
-باوع صــيهد هذيج نجمة وراك.
باوع الوجهي بدون ما يلتفت
-شبييج؟
-باوعلها شبيك هذيج البنيه الاكلك عليها نجمة.
-امشيي
-بس باوعلهاا.
-امشي لا تخليني اغلط گدام الوادم.
تستمر القصة أدناه
يحجي بحرگه من بين اسنانه ما مشيت من شفّت البنيه اجت علينه وكفت گبالنه
-مرحبا.
باوعتلها ساكته وهوه يباوع گبل مدت قلّم الصيهد گالتله
-شكراً على القلم.
اخذته من أيدها اني باوعتلي صــيهد گالها
-اخذيه خويه سعره ربع نمونه.
-لا والله مايحتاج شكراً هاي ثاني مره انسى اقلامي.
هز راسه خوش گتلها
-ترى اني مرته.
باوعتلي مبتسمه گالت
-اي والمطلوب؟ اهلهل؟
حجتها وراحت خلتني افور من القهرررر وهوه يهز ايده ويحجي
-الحمدلله والشكر.
-صاااحبتك.
-انچبييي.
مشيت وياه ادردم ميته من القهر لان فشلتني صعدنا بالسيارة وخابر كهلان گاله منتظرينك
-سبحان الله محد غيرك عنده قلم زايد بالقاعة مووو؟
-تسكتين لو شلون؟
-ما اسكت والعباس النوب لو تنطيها قلم اكتلها بنص الكليه.
احجي بحرگه وهو ضحك ضحگه طويله من كل گلبه ويباوعلي بالمرايا
-تغارين؟
-ما أحب احد يخلي عينه على شي الي.
-شي الج شني مشتريتني؟
-والله مشتريتك ما مشتريتك بعد انتَ زوجي وهذا حقي انتَ ماتقبل احد يحجي وياي اني هم ما اقبل.
يدخن مبتسم بطرف شفته واني كل شوي مقهوره، لحد ما اجه كهلان ورجعنا للقرية بس بدلت ومشيت لبيت اهله ندى تصب غده وبعدها ما تتحاجه
-شسالفة ندى شبيج؟
ندى:: هزيت راسي ماكو شي ودرت على باب المطبخ دخلت رغد مبتسمه گالت
-اريد خبزتين.
-ما انطييي
باوعتلي فازه مسحت وجهي
-اتشاقه اخذي.
تستمر القصة أدناه
رغد:: شبيج ؟ وهـــب شمسوي وهيج گابه.
-ماكو شي اخذي خبز وروحي البيتج لا اخليج فوگ اخوك واحرگج انتِ وياه.
خلت خبزتين سوه اخذتهن وطلعت شارده وجويريه تضحك، اجت يمنه بــدور ساعدتنا بالغده صبيتلهم وفتت الغرفتي روحـــي طالعه كل كعده وابوه گاله
-اخطبلك ازوجك
وهو يبقى ساكت موتني من القهر.
وره الغدا دخل للغرفة لازم رضا من ايده مغسله وجابه
-بدليله تبللن هدومه.
نزلت من الچربايه جريته من ايده بنتر بدلتله گال
- ماما اطلع يم عمه بــدور؟
- روح يم بيبي ايمان.
-ابوسهاا،
-بوسها.
ضحك وطلع بسرعة ووهب يباوع وراه بس طلع سدّ الباب ودار مبتسم خزرته ودرت عيوني منه
وهـــب:: زعلانه البطه.
درت اباوعله متخوصره
-اني بطه وان شاءالله راح تتزوج دجاجة؟
ضحك يمشي بأتجاهي وكفت عدل مد ايده يريد يجرني من خصري الحضنه دفعته حيل
-وخررر روح تزوج.
-لا تدفعيني لللج.
حجاها ودفعني للچربايه حيل مالحگت اگوم تمدد لازم ايديي اثنينهن ويضحك
-وخررر وهـــب والقران اصيح روح عني .
-وين اروحن؟
-روح روح اتزوج عبالك ابقى يمك والله العظيم متلگاني اخذ ابني واروح.
عضني بجتفي حيل دفرته برجلي صيح ووخر لام رجليَّه موجوع كعدت على حيلي
-اگطع نسلك والله وما اخليك تتزوج عليَّ
وهوه لام رجليَّه ومدنك حاني ظهره
وهـــب:: اجيب اهله واسمط جد جده اليتزوج شبيييج؟ اكو مره تطك رجلها هيج.
-اي اني.
-اصبريلي اليوم اذا ما كسرتج تكسر اطلع چلب ابن چلب.
تستمر القصة أدناه
بقيتت واكفت بمكاني وهو يحجي بحرگه لحد ما الوجع خف شويه خله ايده على الحايط ووگف بقيت واكفه بمكاني شايله راسي واحلف بداخلي والله بس يضربني اروح زعلانه البيت شامل.
اجه يمشي علي ويلف بالردن وصل يمي ومد ايده على رگبتي جر راسي حييل عليه وحط كصته على كصتي
-ووولج
-تتزوج؟؟؟؟
-متوازي هوه انتِ واحسج ورطه.
-ورطه هااه؟
ضحك وجرني الصدره
-كون كل ورطه هيج چنها بطه جا العالم بخير.
-عوفني وهـــب عوفني حرگت گـــلبي بالقران تريد تتزوج روح ما الزمك بس طلكني.
-شبيج صدج تحجين يا زواج؟
-كل ما اهلك يحجون تبقى ساكت مكيف.
-اسكت لان من تعاندهم بسالفة يلحون اغلس منهم احسن، بس وعلي لو اموتن ما اخذ عليج لو اضل طول عمــري بدون جهال، هاي ولد عمامي شكد كل واحد يطينه فرخ من فروخهم يصير عدّنا درزن .
سكتت راسي على صدره ادعي ربي يرزقني طفل يفرح گـــلبي وگلبه بيه، طلعنه سوه كعدنه يم خالتي ايمان رضا يلعب وياها لو يعصر رجليها لو يلعب بسبحتها يضحكها.
شويه وابوه صاح عليه وعلى صــيهد يرحون للمعامل مشوا مطنگرين اثنينهم وحتى ولد شاكر وميثم راحوا وياهم لان ترميم عدهم ولازم يوكفون وي العمال.
للغروب جاي انظف وكب الصياح من غرفة الحجيه مشيت بسرعة اباوع وليد يتعارك وياها ويغلط شلون خله كلشي بأسم شاكر وماكو شي بأسمه صيح وهي تصيح ولبست عبايتها. تغلط
-ما اضل عدك بعد
يعاينلها بغضب طلعت من بيتنا رايحه البيت شاكر.
رنـــه :: تونه رادين من الدكتور اخذني طــروادة على وجهي، راد ياخذ حتى ريـــمه لان ردت مصخنه بس هي مارضت ضلت بس نايمه وهاجر من الصبح اجوا اهلها اخذوها، نزلت من السيارة اعاين لبيت شاكر السياج طايح ومنزلين بلوك يردون يبنونه صف طــروادة ببابهم لان سيارة ســليم اعاين الجده تمشي على عكازة وصلت لبابهم وصار بوجهه شاكر
نزلنه من السيارة انه وطرواده نعاين عليهم مدري شكالتله وگالها
-ذاك بيت ابووي شلون تطلعين منه؟ ردي ردي.
-يااا ولكم واحد يذبني على وواحد.
تسودنت تبجي طــروادة جرني من ايدي نمشي لبيتنا ونسمع صوتها ورانه تبجي وتعاتب دار عليها متحسر گالها
طــروادة:: تعاي جده.
عافني ومشالها كضها من ايدها يمشيها جايبها البيتنا وهيه تبجي التمينا عليها كلنه وعفراء تگلها
-لا تنقهرين جده هذا هم بيت ابنج.
واحنا ماعبالك ضايجة ملتمين عليها مكيفين حتى طــروادة اعاينله مبتسم وبأيده شال الچاي حطّه گدامها مكيف بيها، أشر العفراء طلعت وراه سألها على ريـــمه وراح للگيعان.
بالليل اجوا الولد من المعامل متعاركين وي اهلهم رادوا ياخذونها مارضت رادت تضل عدنا فرشنالها بغرفة اهلي.
مشيت الغرفة ريـــمه اريد اشوفها شلون صارت مالكيتها طلعت للحوش ادور ماكو دك گـــلبي بخوف وطبيت للبيت اركض دورت الغرف وحده وحده صارت بوجهي عفراء عيونها حمر وبأيدها ورقة حجيت نفسي مگطوع
-ريـــمه ماكو.
شكرا لزيارتكم عالم روايات سكيرهوم
