رواية نقش بارد الفصل السادس بقلم فدك فاطمه
أنتَ أوَل ضيَم يَچوينِي وَأرِيده
غــنوة
التفت لصوت الباب من انفتح جان دلهم واكف مدنگ ينزع ببوتينة بيدة علاليك لازم السرگي
دخل رفع راسة توسعت عيونة مصدوم يشوفهة متمددة بالهول و راسهة على رجلية ادلك بي
ضل يتلافت بينة طاحت العلاليك من ايدة و تطشر التفاح بالگاع هو مثل التمثال جامد من صدمتة
ركض ابن اختة راح يلم التفاح هي كعدت تعدل بردانهة حجة هو مستغرب:شعدج هنا
ردت عليه تباوعلي :شلون ماتگلي انتة متزوج
دلهم:يمتة اجيتي ليش ماخابرتي گبل لا تجين
ردت عيونهة مغورگة: اجيتك زعلانة
عاف البيدة جهازة و السويج بسرعة اجة كعد يمهة لازم اديهة حجة بقلق:شكو شصاير وياج
أسراء:ام عصام تتهمني اخونة كرار راح للمدرسة و تأخر خفت عليه عصام ماموجود دخلت عليهة تروحلة مارضت لبست عباتي رحت لمدرستة من اجة عصام گالتلة مرتك تطلع لوحدهة هو ماصدك صار اسبوع شاهرتنة بالفرع كل الجيران يحجون بسمعتي من واحد صاحب عصام حاجيلة هو عصب و تعاركنة
حجتهة و دنگت تمسح بدموعهة رفع راسهة بعصبية حجة بحدة:كملييي بعد شكو
أسراء:غلطت على امة و كتلني
دلهم:اسبوووع توج يالله اجيتي لو اعرف شنو هذة العناد العدج شنوووو
ردت برجفة:عبالي تسكت و تعوفة مثل كل مرة انصدمت بيهة تحجي عد الجيران و تشكى مني من اروح للمحل الزلم يباوعولي
شهگت مسحت دموعهة حجت تطگ على رجلهة: اريد اعرف شبيهة ويااي متحملة العيشة عدهم لا اتشكى ولا اتدلل ليش هيج تسوي
دلهم:وعصــام
أسراء:شيسويلهة مايدري صدفة سمع هم عبالة سكتت و نست سالفة طلعتي
گام منهة دخل للغرفة شوية وطلع حجة يعدل بالترواكة من ورة :طگاج
هزت راسهة يباوعلهة بطرف عينة مبين معصب لازم بيدة جهازة حجة اول ماخلاه على أذنة:وينك .. ارجع لبيتك .. لا اسمعك ولاتسمعني امك اذا ماتجي تعتذر من أسراء العب بيكم لعببب.. تعال اذا بيك خير
سداه خلاه بجيبة هي گامت تباوعلة بقلق حجة بجدية عيونة خازرتهة: تطلگين
توسعت عيونهة مشت لازمتة من ايدة:شتحجي دلهم ماريد اتطلگ مشكلتي مو وية عصام وية امة رد اعتباري هاي هي
كمشهة من ايدهة عاطت تدفعة سحبهة ينزل بالردانات شهگت اشوف طبع على اديهة صاير ازرگ
حجة يجر بيهة بعصبية:كافيييي حتى كرامة ماعدج ضلت يدك عليج ليل ونهار سكتت هواي عليه قسما بالله عصام اذا ماطلعتة مكسر منا ماتسمى بأسمي و وحق هو الله الة اكسرة و اعلمة شلون يمد ايدة و يطگج
سكتت تبجي خايفة منة دفعهة من ندك الباب طلع هي ركضت تتعثر مشيت وراهة مستخطيتهة
بعدة رجلهة توة دخل لاگاه دلهم وجه بوجه طگاه كلة براسة رجع ليورة متفاجئ ما خلالة فرصة يحجي
طلعت تركض تريد تحايزهم هو نگلب بعد ما يسكت
نزل عليه دوسة ونص صوت الصياح و الشتم عالي
عاطت تلطم على خدهة من لزمة لوة ايدة ورة ظهرة ابنهة طلع يركض لابوه يدفع برجل دلهم يريدة يبعد
رجلية رجفن گلبي نعصر على شكلهم رديت البردة من دخلو زلم من برة يريدون يزيحونة حسيتة فقد
صار شخص ثاني ماعندة اي مشاعر ولا هزة منظر ابن اختة ولا صوتهة خلاه يوخر لحد ماكسر اصابعة
غمضت عيوني دموعي وحدهة نزلت من صرخ عصام بوجع دفعة دلهم بعيد عنة للباب طيحة
عاط بي حتى يطلگهة ذاك رافض حتى هي ماراضية
شالهة دخلهة للبيت طرد رجلهة حتى ابنهة طردة
نسطرت من اصواتهم العالية همة يتعاركون عيني مشدوهة عليه مصدومة شلون هيج مارف گلبة
على الطفل هو يتوسل بي يلزم بأديه يريدة يعوف ابوه ماهمة كسر الرجال گبال ابنة طردهم ضل برة يتجادل وياه عصام رغم كسر ايدة بعدة واكف
التفت الهة تبجي حجت تلطم على خدهة : سودة بوجهي يمة كرار سودة علية الله لاينطيهة دنيا واخرة شلعت گلبي و دولبتني اخخ منيي انة ليش ما اجي اشكيلة ادري بي مخبل
ماعرف شلون اواسيلهة ولا عندي كلام يخفف عنهة
ضلت تفتر بالمطبخ توصل للباب ماتطلع تخاف منة
رجع لزمت ايدة تتوسل:بس كرار جيبة والله مارجع اضل هنا شتگلي اسوي بس ابني رجعة
دلهم: ابنج يريد ابوه
أسراء:شجاك ماتگلي شعليه الطفل بمشكلتة فرفحت گلبة على عصام وتگلي ليش ماتحجيلي
دفعهة رد بنتر : كااافي شكدج بعد تصيرين شمستفادة منة ماتگليلييي عايشة متحملة ضيم امة المرضتج شبييج ماعندج أهل لو جايبج من الشارع لمرة وحدة خلي عدج شوية كرامة و نجبي وگعدي هنا اذا مارد امة عنج ماترجعين
أسراء: انتتة ليش ماتفهمني
دلهم:غبييي مافهم يطگج ويگول ها والله عصبت انعل ابوه لابو منين ماطلع كلب ابن سطعش كلب غاسل دماغج بأعذارة ضالة تدافعين عنة طگج و موتج تفيدني عصبيتة هذة الگ***' ابن الزمال
رجعت حجت بعتب:مو تكسر ايدة و تخلي يلوب بالشارع
حسيتة گوة لازم اعصابة عنهة حجة بصبر:انتيي شتردين المنن اجيتيني ارد اعتبارج مو هذة رد
و بعد اطيج حضة و انعل اهلة لو تردين اطبطب عليج و ارجعج
أسراء:اني بس ردت تحجي وياهم وتجي امة تعتذر ماريد اخرب بيتي و اشتت ابني بينة
دلهم:اي مو هو ابنج عايش بالقصر الابيض ما ماكل نعل وياكم اذا ابوه كل ما راد حطج و كتلج لو هذة روتين عدكم حالة حال الغدة و العشة
أسراء:عصام مامقصر يشتغل و يتعب بس هي تعصبة و توزة علينة
دار وجهة يسمح عليه رد متنرفز:انعل ابوج لابو عصام امشييي من گدامييي غاسل مخهة مسويهة مكفخة ومكيفة شتردييين انتييي فهمينيييي شتردين
ضلت تتجادل وياه اني اباوع مصدومة هاي شبيهة حتى ابنهة نستة و تدافع لرجلهة ماراضية عليه
هزيت ايدي طبيت للغرفة سديت الباب همة صياحهم واصل للشارع خبلتة يجيبهة منا ترجع منا
دفر الباب دخل باوعتلة خايفة گعد مرتكي على الحايط يفرك براسة اعصابة تلفت من وراهة
شوية ورجعت وگفت بالباب وخرت من طريقهة حجت بخوف تباوعلة: دلهم اريد كروري
اشرلهة بأيدة تمشي لزمتهة نترهة حجة متعصب:وخري مني گوة لازم اعصابي عليج روحي گعدي فكري مقتنعة بروحج و بالتحجينة وكتهة نتفاهم امشي من گدامي
باوعتلي بتوسل درت عيوني بأحراج تريد احجي وياه اني خايفة اكثر منهة طلعت دمعتهة على خدهة
حجة هو يطلع :جيبلي هدوم للحمام
رمشت مامستوعبة ياحمام ، رحت للغرفة طلعتلة هدوم فانيلة و تراك اوصل للباب المطبخ و ارجع
اخر شي غلبني الخوف اخذت الخاولي من الحبل
دگيت باب الحمام اسمع صوت الماي يجري
فتح الباب مديتهن الة و فلتت رجعت للمطبخ لگيتهة واكفة تحمي بالاكل شلت العلاليگ من الگاع
خليت المسواك بالثلاجة نكسر خاطري من شفت تفاحة ابنهة لأخذهة عاضهة و طايحة منة بالتراب
كلش ضجت عليه هو لابيهة لاعليهة اجة دلهم حاجتة مارد دخل للغرفة عينهة وراه بضوجة
أسراء:هذة الغدة اخذي الة بلكي ياكل
شلت الصينية رحت وراه متمدد على الجرباية متغطي حتى راسة ما طالع خليت صينية بالگاع
كعدت احجي بأرتباك:اكلك تريد غدة
ما رد علية دار وجهة للجهة ثانية گمت درت حول الجرباية صرت كدامة هم كعدت نفس كعدتي
غنوة: اذا جوعان اكعد اكل ادري ضايج بس اكل حتى لو شوية
حجة يرفع راسة:تمشين منا لا اعمي عينج
حجيت بهمس:مو صوجك لا والله
عاط بعصبية:لاتدردمين
فزيت من مكاني طلعت اخذت الغدة وياي هي تمددت بالهول هم ماخذة ركن و تبجي مافهمت شبيهة شلون تفكر حسيتهة خبلة
كعدت بالمطبخ اكلت غداه و نظفت رجعت احوس اريد ادخل للغرفة خايفة منة فزيت من صاحني
دخلت مستغربة مد ايدة بيهة مفتاح گال:قفلي الغرفة الثاني لأنام بيهة خو ما طبتلهة أسراء
غنوة:لا هي من اجت لهسة بالهول كاعدة
اشرلي مديت ايدي اخذتة رحت قفلت الغرفة هي تباوعلي مستغربة رجعت متجاهلة نظراتهة خليت
المفتاح بصفة يم راسة سحبت المخدة كعدت بالگاع مرتكية على الحايط كدامي ماعون فواكه
موز و تفاح و عنب يگول شكر مو عنب كلش طيب
مديت ايدي جوة الجرباية طلعت الدفتر و القلم
باوعتلة خايفة رجعت نطيتة ظهري خاف يشوفهن بگتهن من الغرفة حتى من سألني گتلة ما ادري بيهن
ضليت اشخبط و ارسم التهي و اگضي وكت لحد ما نعست نمت و القلم بيدي افكر اضمهن بس غفيت
احلامي جانت كلهة خربطة لحد ما گعدت على وجع شعري فزيت اباوع منعسة اشوف ابن اختة مگابلني
عگدت حواجبي يمتة رجع وين اني ، رفعت راسي للشباك ضلمة هو بعدة يجرجر بشعري يسحب بي
اخذتة من ايدة لميتة حجيت مستغربة:يمتة اجيت
كرار:خالو جابني من بيتنة
غنوة:أبوك شلون صارت ايدة نكسرت حيل
حجة بضوجة:خلولة صبة على اصابعة
غنوة:صبة
هز راسة عبست گمت اباوع للساعة بثمانية هواي نايمة طلعت شفتهة بالهول كاعدة ايدهة على خدهة صافنة ما انتبهت الي
عفتهة رحت توضيت و صليت ادور بالبيت عليه مالة حس حركت السرگي مال غرفة الوشم عبالي
مقفولة مفتحت دخلت شفتة كاعد هناك رفع راسة علية عدلت وگفتي اشتت نظراتي على الحياطين
دلهم:شعدج
رديت متوترة:بالغلط دخلت
باوعلي بسخرية دنگ يمسح على ايدة من شفتة ماطردني التفت سديت الباب تمشيت مترددة وگفت گبالة اباوعلة بفضول
بيدة بطل بلل الشاش و مسح ايدة المكان الي جوة الرسخ فوك من الشرايين عدلت وگفتي مدنكة
خلة يمة علب صغار بيهن حبر اسود و الوان جاب ورقة لزگهة ضل يمسح عليهة فترة و شلعهة صار
رسم على ايدة احرف ماعرف شنو مافهمتهن شغل المكينة صار ينقش فوك الرسم و يمسح بالشاش
رفع عيونة الي حجة :اخذي الشاش و مسحي الحبر من اگلج
مديت ايدي اخذتة منة كل شوية يصيح حبر على ايدة مسحتة مرة يطلع دم كشت روحي منة مديت
ايدي امسحة اباوع مركزة وية حركتة لحد ما خلص
خلة مدري شنو ابيض فوك الرسم مسح ايدة بي
گام طالع من الغرفة طلعت وراه واكفة بصفة يغسل
مديت ايدي بدون وعي اتلمس الوشم لسواه بيدة
انتبهت لروحي سحبت ايدي ادردم و اسب بروحي رحت للمطبخ غسلت ادية صبيت عشة من الموجود
كعدت اكل بشهية مفتوحة كملت غسلت المواعين
حجة واكف وراي:سوي جاي
هزيت راسي ساكتة ضل واكف يمي توترت حتى حركتي صارت مدري شلونهة بفهاوة كل شوية اعثر
خليت القوري التفت اروح صارت عيني عليه لابس فانيلة تعلاكة باوعت لعبانة روحي من منظر وشومة
هزيت ايدي مشيت للغرفة ولا حلو ماحبيتة ابد وجهة زين بس هو اديه منگرشة كلة حبر و اصباغ
صبيتلة جاي نطيتة الة اخذة حجة يروح لغرفتي:تعاي
رحت وراه من طبيت للغرفة لگينة يباوع للميز وين الدفتر و القلم بلعت ريگي فشلانة نزلت عيوني عنة
دلهم:انتي بيج سولة مال جذب
هزيت راسي بـ لا اخذة يگلب بي حجة:وين الاوراق المكتوب بيهن
غنوة:شگيتهن خليتهن بالكومدية بغرفتك هناك
دلهم:امشي جيبيهن
مديت ايدي الة حجة مستغرب:شنو
غنوة:المفتاح
فتح الجرار طلعة خلاه بيدي اخذتة رحت للغرفة طلعتهن رجعت نطيتهن الة كعد ينقل الموجود
بالاوراق بالدفتر وراهة اخذهن حرگهن و اخذ الدفتر
ضماه بغرفتة قفلهة ضليت احوس اريدة دفتري
ورة ساعة هيج اجة رجل اختة وياه مرة جبيرة بالعمر عجوز بس تمشي بطولهة عدهة حدبة
بظهرهة دخلو للهول كعدو عيونهة على اسراء تخازر بيهة اني اباوع من طرف الباب قليل اشوف منهم
ضلو يحجون عن الصار و اسلوب دلهم كلش صلف
ولا احترمهة اباوع لأسراء تگرص بيدة ما اهتم
رزلهة و حجة هواي على رجلهة نكتهم نكت اعتذرت من اختة هي اسراءگبل ضحكت تباوع لرجلهة لمدنگ مارفع عينة مبين مهموم كل شوية يتنهد
دلهم مارضى ترجع وياهم شرط لو بيت لوحدهة لو ماكو رجلهة تخبل يگلة شلون اطلع اني وحيد امي
رد عليه برود: مشكلتك طلگ اني مامستثكل اختي الحمدلله اعيشهة احسن من عيشتك
أسراء:دلهم
التفت خزرهة حجة بجدية:هذة الموجود اختي البيت و الشارع لنطعن بشرفهة بي ماترجعلة
عصام: حقك دلهم وعاذرك شما تسوي بس اتفهمني لا عدي امكانية أعزل ولا اكدر اعوف امي
دلهم: امك مو خوش أدمية
رد بزهگة:حدك هنا سكتتلك هواي
دلهم: مامتوقع غير السكتة منك ليسكت من يطعنون بشرف مرتة و يرجع الوم عليهة لان مايكدر يرد لعدة اكيد راح يسكت من تنهان امة
احتقن وجهة يباوع لدلهم متغاض و امة رجعت تدردم زعلو طلعو من البيت هي تخبلت شنو يهينة
اباوعلة متكتف يهز برجلة مامتحمل حجيهة كوة صابر لهسة مامقتنعة هاي المرة ليش مستعرة
علمود واحد لايدافع عنها لا محترمهة بس تگول خطية و يشتغل مكسور ظهرة و شبيدة و شعدة
سمع سمع لحد ما تعبت عافهة طلع برة افترت بالهول تطگ على رجلهة تلوم بروحهة ليش اجت
حجيت متوترة:على كيفج وياه هو يريد مصلحتج
أسراء:مصلحتي يهدم بيتي بس صوجي اني ادري من تطلع السالفة راح تكبر اخخ من لساني
غنوة: لازم تفرحين عدج واحد يدافعلج ليش ضايجة اكيد رجلج اذا يريدج ما يطلگج
أسراء: ادري بي مايطلگني بس حجي دلهم ثگيل هواي هانة و حجة عليه هسة ينقهر
رديت ما فاهمة: دلهم ينقهر
أسراء:عصام
حجتهة تخوصرت بيد و الايد ثانية تعض بيهة عيونهة حمر و عينهة شايهة تفتر ماتوگف بمكان واحد حتى خفت منهة شبيهة
نجر ثوبي دنگت لابنهة حجة خجلان :اريد فراش انام
غنوة:تدلل هسة اخليلك
رحت للغرفة مبتسمة على شكلة طلعت دوشگ خليتة هو بس هذة عدنة فرشتة الة بالهول خليت الغطة و مخدة اجة گبل مدد نام
فترة و رجع دلهم بيدة علاگة حلويات يمكن مشتري لابن اختة لگاه نايم خلاهن بالثلاجة يباوعلهة بطرف
عينة كاعدة على الدرج عيونهة حمر تعصر بأديهة
حجت متوترة:دلهم ما اتطلگ
ما رد عليهة راح لغرفتة فتحهة طلع فراش هي وراه تحجي تتوسل تريدة يقتنع بس تصل فترة و ترجع على گولتهة جرة أذن لعصام
رحت للغرفة عايفتهم تمددت بمكاني متغطية فزيت من سمعت صوت شي طاح بالگاع رفعت راسي لنة واكف فوك مني شمر علاگة يم الحايط
وكف يشكل بالشاحنة على النقطة حجة بدون مايلتفت:بعد لاتاخذين اي شي من الغرفة ديري بالج يطلع منهة شي مفهووم
هزيت راسي كمل يأشر بالگاع : هاي دفاتر الج وياهن اقلام
ضحكت بفرحة نزلت اخذت العلاگة فتحتهة بيهة دفتر طويل اوراقة بيض واحد ثاني بس بي رسوم
وياهن اقلام ملونة ماكدرت اخفي فرحتي اگلب بالاوراق و اشوف الصور مال حيوانات و ورد و بنات
حسيت بأيدة تمسح على شعري رفعت راسي الة مبتسمة فرحانة بيهن ضلت عيني عليه كعد بصفي
حجة ايدة بشعري: تردينهن لو تردين الدفتر
غنوة:لا ماريدة ذني احلة
توترت من نظراتة نزلت عيوني اتلمس طروف الدفتر وخر مني ردلي النفس زفرت براحة شفتة طلع برة
فتحت الاقلام اختاريت صورة كعدت ألون بيهة مستمتعة همزين لگيت شي التهي بي و اسوي
اخذني الوقت لحد ما رجع طفة الضوة سد الباب خبطت معدتي رفعت راسي اباوعلة بتوجس و خوف
حجة ينزع تشيرتة : ماكو فراش انام عليه الفوك الجرباية طلعتة لأسراء
حجيت أشر علية:واني وين انام
دلهم:ضلي كاعدة عدج هاي سوالف المزعطة
التهي بيهن
غنوة: شنو اضل سهرانة
ما رد علية تمدد الجرباية صغيرة فتح رجليه كل وحدة شطولهة فاتح اديه ماكو مكان اخذاه كلة بضخامتة و للمخاد وراه ثنينهن
گمت كعدت يم الباب على الضوة اصبغ بالصورة
لحظات سمعت صوت موسيقى رفعت راسي الة
مرتكي على تاج الجرباية بيدة موبايلة مطفي الاضوية بس ضوة الشاشة عليه بيدة جكارة يدخن
دنكت اركز بالعدي طاحت ايدي من التلوين مدري اني تململت من سمعت صوت الفلم هزيت راسي
اجبر روحي اغلس عنة ماكو دقيقة گمت رحت للجرار اسوي روحي اطلع الدفتر بطرف عيني اباوع
حجيت كاشة نفسي:اهوو هم هاي لمعصعصة
التفت الي رافع حاجبة انتبهت لحجايتي رجعت ادور بالجرار و بطرف عيني اباوع للفلم ثنين يتعاركون واحد يضرب بالثاني هي تطفر جنهة قرد
بدون ماحس كعدت مشدوهة عاجبني شلون تطگ الولد هو هم كل شوية كافخهة هي تگوم تكتلة
شوية شوية سكتو گامو يحجون بهدوء لميت رجلية بردانة رفع ايدة غطاني وياه ارتكيت بعكس ايدي
فوك المخدة كاضة القلم مخليتة بحلگي صافنة مندمجة حجيت بدون ما اباوعلة:شنو هذة الفلم
رد بأختصار:متزوجين يتعاركون
غنوة:ليش
دلهم:كل واحد عدة قضية تختلف
غنوة:جا ليش تزوجو
رد ياخذ القوطية من العلاگة :اكو واحد تصحلة مرة مثل انجلينا و يرفضهة
غنوة:ييييع
دلهم:بحلگج ام العطوب الحمر
رديت افرد شعري فوك راسة: يخبلن
مد ايدة وخرهن حجة: كلهن حنة
شهگت اباوعلة : والله مامخلية هذة لونهن لطبيعي
باوعلي مامصدگ رافع حاجبة:لاتجذبين
غنوة:وروح ابوي ما مجذبة
رفع ايدة يمسح على لحيتة هز راسة رجعت اباوع معبسة اشم بشعري ولا مرة بحياتي مخلية حنة وين شم الريحة بية شكد جذاب
رفع القوطية لشفتي بلعت ريگي اخذتهة شربت متوترة رجعتهة الة مد ايدة الثانية بيهة كرزات
حجة بضحكة:اكليهن گبل لاتشردين
اخذتهن مستغربة:ليش اشرد شكو
ماحجة رجع يتابع ماكو دقايق شفت ذولة لبفلم صارو مايستحون وخرت عيني نزلت رجلية بهدوء
لگفت الموبايل من ايدة و شردت بي ادوس بالشاشة لحد ما وخرو نهض كاعد اشرلي اجيبة خازرني
ضميتة وراي حجيت ضايجة:مااا تذكر البارحة شصار من شفتهم حتى مو نفس الولد هاي المعصعصة ماتستحي يومية مصاحبة واحد
ضحك اهتزت امتونة حجة ينزل رجلي:جيبي الموبايل لا اگوملج
غنوة:الة اگل لاختك عليك
تحركت للباب توني فتحت القفل ماحس غير بأيدة على خصري شالني من الگاع شيل صرخت ادفع بي
سد حلگي حجة بهمس:ششش نايمين اسكتي
حركت راسي اريدة يوخر ماكدرلة اخذ الموبايل دفعني للجرباية شلت شمرتهة عليه لزمهة بيدة
دلهم: محد عاتب عليج اتابعين
غنوة:شكد حرام عليك
دلهم:علية مو عليج
غنوة:وخر عن فراشي
رفعت الغطة انام تمدد بصفي حجة بخبث:فراش مرتي
گمت متخوفة منة عافني احوس بالغرفة رجع يتابع ولا مهتم هالمرة مارجعت و شفت شنو النهاية
فزيت من شمر علية النستلة اخذتهة اكل اخوزر بي حجة يطفي جهازة:كافي لا اطفي عينج
درت وجهي مامهتمة فتحت الباب بسرعة وخر الغطة مالحگ يحجي شردت رحت للمطبخ شربت
ماي بس سديت الثلاجة لگيتة گبالي حجة بهمس:وين مولية
غنوة:هنا اشرب ماي
ارتكة على اطار الباب شربت رجعت الدولكة اخذت عنب اكل بي هو كبالي منتظر اخلص العنگود غصصني منتظرة يحجي يگول شيريد
كملت غسلت جبت مخدة و غطة خليتهن بالهول تمددت باوعلي بطرف عينة مر دافر المخدة برجلة
طاح راسي بالگاع خليتة طب غميتة امدك اي والله نطر راسي بالكاشي شكد خبيث زعطوط ولا جنة زلمة مشورب
نمت مافزيت الة على صوت اسراءتحجي بضوجة:شسالفة دلهم تراگع بالبيبان من الفجر
مارد عليهة رجعت تحجي بتذمر:عود هاي ليش الأحذية طشرتهن و الهدوم شجاك لمهن شبيك
غطيت راسي ارجع انام مغلسة عنهم كعدت متأخرة هي منظفة و مسوية غدة بس صليت الفجر قضاء و تريگت ضليت كاعدة اتملعب لو اسولف وياهة
للظهر يالله اجة شردت لغرفتي قفلت الباب حتى ما يجي هنا بالليل وية الصلاة طلعت سويت العشة تبسي و صليت ضليت منتظرة تكمل اسراء صلاة
وگفت يمهة كملت تسليم حجيت مستغربة:دلهم وين
أسراء:گال عدة شغل و طلع
هزيت راسي بفهم صبيتلنة عشة تونست بكعدتي وياهة هواي تسولف و تشاقة بس مبين حزينة ما فتحت الموضوع وياهة ولا سألت عن رجلهة
تمددت نامت بالهول واني بصفهة اباوع بالموبايل مالتهة تگلب مقاطع لو تقرة نكت شبعت ضحك
لحد ما اجة دلهم مر منة ساكت شمر غراضة بالگاع شمر الموبايل بصفي نزع الترواكة هم شمرهة
دلهم:خلي على الشحن , طلعيلي هدوم
گمت اخذت الموبايل خليتة على الشحن و اخذت هدومة مشرورات على الدرج وديتهن وراه بالحمام
رجعت سويتلة الغدة حميتة و صبيت على ماطلع نزلت الصينية بالگاع اجة كعد خلة الخاولي على رگبتة كعدت بصفة اشيف بالرگي
رفع راسة الي باوعتلة مستغربة نظراتة رجع ياكل متجاهلني خليت الماعون كدامة بي شياف رگي و بطيخ نزلتة ماي بالصينية خليتة
كل نيتي اروح للغرفة و اقفلهة بس لزمتني اسراء تسولف وياي تسألني عنة هم شايف عصام محاجي
عبالهة اني وياه نسولف هو واحد مايباوع بوجه الثاني گتلهة ماعرف ماحجالي ضلت تلح علية اسألة
استخطيتهة گمت امشي وراه احجي مايرد فر البيت كل شوية طاب و طالع من وحدة من الغرف لحد ما دخل لغرفتي
وكفت گبالة بضوجة:اوكف بس احاجيك
دلهم:شتردين
غنوة:اختك تسأل عن رجلهة
دلهم: شدراني عنة سارح بي
ضحكت التفت للباب هو ابتسم رجعت عيوني الة احجي بهمس:لا هي تگون شفتة هم حجيتو
تقرب خطوة رجعت ليورة صار ضهري على الحايط مد ايدة سد الباب و ارتكة بيهة عليه محاوطني
دلهم: اي بعد شتگول
رديت متوترة:هي گالت بس هيج خطية خايفة
دلهم: خليهة بلكي تصحة على زمانهة
غنوة:يعني مافهمت
تقرب يحجي بصوت ناصي :شنو المافهمتي
غنوة:هي شبيهة زعلانة عليك و رجلهة كاتلهة انتة شعليك
احجي بهمس كل ضني مايريدهة تسمعنة هو هم تقرب كلش ملابسة احتكت بملابسي رجعت للحايط
دلهم: مريضة اسراء متعلقة بي ماتريد تعوفة
غنوة:ليش
رد بصوت مهتز: محترگة هي تگول بس هو راضي بية عدهة عقدة مال تعلق و خوف
غنوة:بس بس هو ضربهة دلهم .. بس ايدك وخر شوية
عرگت ادفع بيدة بطلت حتى اختة معلية بيهة اريد بس اولي عنة تقرب مخلي وجهة برگبتي بطني صارت تغلي و مغصتني من التوتر
حجة بهمس:اني تعبان
بلعت ريگي مرتبكة و خايفة حجيت اعتعت:ليش شبيك من الشغل
دلهم:من كلشي
غنوة:من ورة افلامك مال المعصعصة
ضحك وخر عني باوعتلة بضوجة مبين تعبان مديت ايدي مترددة لزمت ايدة مستخطيتة جان يريد يطلع من لمستة وگف يباوعلي
حجيت اعصر بصابعي: اذا اكو شي متعبك صَلي
دنگت خجلانة ماعرف اواسي اي واحد بس ماكدر اتجاهلة حسيت بأيدة على رگبتي بوسني براسي
استحريت و مشاعري كلهة تخربطت
حجة بهمس : فد گ**" اني
ضحكت قصص وروايات عراقية كرار صلاح ادفع بايدة خربط شعري طلع رحت وراه مبتسمة هي تباوعلي واني ولا يمهة مشغولة
حجيت ادخل وراه لغرفة الوشم :تريد جاي
دلهم:تسوين فضل
غنوة:تدلل
رفع راسة حسيت وجهي طك من الفشلة لان هيج رديت طلعت للمطبخ سويت جاي صبيت ثنين
حجيت شوية لأسراء لان منتظرة رجعت وديتلة جاية جبت دفاتري كعدت يمة هو ينظف بالمكينة و الابر
حجيت افتح الدفتر: الزيت خلص من تروح باجر اشتري
همهم بدون رد رجعت اعددلة:والملح ماكو و جاي بس شوية و جيب وياك خبز الصبح من تكعد
دلهم:خوش بس اسكتي خليني مركز
غنوة:هم راح ترسم على ايدك
دلهم:اسكتي غنوة
عبست اباوع لايدة يرسم خط عدل ولا ينعوج تقربت مرتكية على ايد الكرسي عيوني على الورقة
كمل يرسم برصاص كل شوية يرسم بعدها رجع يمسح و يعدل بعدين اخذ موبايلة گص صورة الهة
غنوة:هم يجونك بعد زلم
دلهم:لا
غنوة:فكة
حجيتهة رجعت الون وحدي حسيت بي تقرب حجة بهمس:عجبنج
رديت ببتسامة:اي احسن ما اضل اتصفن بالحياطين
دلهم:مال مزعطة
غنوة:احسن من الماكو أمل حيل وحدي
دلهم: اخليلج تلفزيون بالغرفة
رفعت راسي الة متحمسة:اييي خلي حباب
دلهم:بشرط
غنوة: موافقـــة
دلهم:هسة اجيبة
حجاهة گام للجرار طلع فلوس باوعتلة مستغربة اخذ السويج و طلع مرت فترة طويلة يالله اجة
حتى اسراء و ابنها نامو دخل على كيف بيدة كارتونة فتحهة طلع تلفزيون اسود صغير خلاه على الميز
دلهم:باجر اسوي هسة فات الوكت وراي كعدة
غنوة:صدك اشتريت
دلهم:امم مانشوفين
ابتسمت مكيفة بي خلة الكارتونة بالكاع راح غسل رجع سد الباب التفت الة اباوعلة مقلصة عيوني
حجة يتمدد عيونة علية بخبث:يالله تعاي
غنوة:وين
دلهم:هنا يمي مو شرطت عليج و وافقتي
رحت وكفت بمسافة عنة اسمع الشرط شنو كل ابالي يريد لو اطبخلة لو اغسل هدومة او يتأمر علية
سحبني من ايدي بسرعة نترنة خزرني مد ايدة كعدني بصفة حجة بهمس :اليوم مو گتلج تعبان
رديت متوترة:ءء اي گلت
حجة يشاورني:خليني انام بحضنج
غنوة:بس اجيب اقلامي و الاوراق برة ضلن خاف كرار يشخبط على رسمتي
حجة ببتسامة:روحي
هزيت راسي مشيت للباب سحبت المفتاح فز مالحگ قفلتة عليه من برة مايكدر يحجي اسراء نايمة قريبة من الحايط خاف تفز
خليت الشال مثل المخدة تغطيت وية كرار نمت بعدني توني بديت اغفة حسيت بأيد على حلگي
فتحت عيوني متوسعة التفت مرعوبة اشوفة كدامي
يباوعلي بعصبية حجة بهمس:اذا انتي لوتية اني الوت منج
بلعت ريگي ماكدر احجي من الخوف رفع راسي گومني دخلت للغرفة اشوف البردة مفتوحة نسيت الشباك خرب حضي الفگر
بلعت الفشلة من غبائي تمددت الدمعة بطرف عيني هو يمي تغطة وياي صرت ماكدر اتنفس من الخجل
شال راسي خلاه على زندة حضني من ورة حجة :ولا ادري بيج هيج ملعبة تقفلين الباب علية شبسرعة فكرتي بيهة
رديت متوترة:اني
دلهم:جا ابوي
غنوة:مـ..مو عيب اختك هنا
دلهم:اي مو اني ناهبج
عضيت شفتي ساكتة خلة وجهة برگبتي من ورة احس بنفاسة على جلدي ايدي حاضنتني متت بدمي
ضليت متشنجة لحد ما گال بهدوء: محتاجة شي الج اجيبة باجر بطريقي
جنت هواي محتاجة من خجل ما حجيت صليت ساكتة حجة يمسح على جفي:گولي لاتستحين مني
غنوة:مـ..مو عيب مال بنات هيج
دلهم:ميخالف گولي
رديت ابالع مدري شلون گتلة اريد ملابس داخلية تمنيت ارجع لبطن امي ولا اصير بهذة الموقف الخايس اطلب من رجال يشتريلي
رد بهدوء:غيرة شتردين
بلعت ريگي ابتسمت اخفي احراجي : ءء جيب شي يعني لرجلية خشنات لان امشي على الكاشي اريد جواريب هم اختك گالتلي رجلية مو حلوات
غمضت عيوني شهگت بخفة من حسيت برودة رجلي فوك رجلية من جوة الغطة جسمي كلة رجف
دلهم:صار تدللين
ابتسمت عدلت راسي وخر شعري حتى ما ينسحب واني نايمة حسيت بأصابعة يمشيهة على خدي
حجة بهمس:حيل حلوة
غمضت عيوني ارعش و گلبي يدك رجع حجة يمشط شعري بصابعة:كلشي بيج غريب مو منا
غنوة:شـ..شلون يعني
دلهم: شعرج ليش هيج لونة منين وارثتة
غنوة:من امي
دلهم: حتى رموشج حمر دخيل الله
غنوة:موحلوات
دلهم: حلوات غنوة لايگاتلج حتى اسمج لايگلج
غنوة: بس اني ماحبة اريد غير اسم صفية تصيحلي غنيبة عود تدلعني هي تضحك علية
ضحك اهتزت متونة التفت عليه معبسة اباوعلة من ورة جتفي متمدد يضحك رجع عيونة الي صافن
حجة ببتسامة:غناوي، غناي ، غناتي
التفت گابة من المستحة و جسمي عرك حجيت اخفي ارتباكي:كلهن مو حلوات
دلهم:ام عطوب وين لاگية واحد يدلعج
غنوة: محد جابرك
دلهم:مو صوجج
غنوة:اي صوجك لمنگرش
حجة يدغ جتفي:عود شني هاي
غنوة:جسمك كلة حبر منگرش متروس ترس
سحبني عليه حجة رافع حاجبة:وين شفتي جسمي
غنوة:ها
دلهم:ها وين شفتي
غنوة: ايدك شوف هاي ايدك
حجيتهة مخلية ايدي فوك زندة سكت رمش بثگل يباوع عليهة نزلتهة بهدوء من زندة لطول ذراعة
غمض عيونة عاض شفتة فكيت حلگي على شكلة
درت وجهي تغطيت حتى راسي غطيتة صار مسربت مثل ذولة ليشوفهم نفس الحركات
تمدد بصفي بس هالمرة كلشي ما سوة فترة مرت نام بهدوء رفعت راسي من حسيتة غفة نوب الجكارة بيدة
بس ما مشتعلة توة مطلعهة اكو ثنين طافيات بالكوب بصفة اخذتها من ايدة رجعتهة للباكيت
غطيتة من البرد رجعت درت وجهي عمة نمت للصبح كعدت المشكلة اكعد فاقدة الذاكرة كلش
مر اليوم طبيعي عداه مايباوع لوجهي رجع لسوالفة يتجاهلني بس العصر اشترة كلشي وصيتة عليه خلاهن يم الباب
اسراء طلعت تغسل الحوش هو رجع طلع الكومديات الي بغرفتة فرغ الغراض البيهن خلاهن
بغرفتي كلش ارتاحيت من جابهن سفطت بيهن هدومي و افتكيت من الكارتونة شكلهة مو حلو
اباوعلة بطرف عيني يسوي بالبلازمة على گولتة كملهة رحت اني اسوي عشة ابن اختة استلمهة من العصر لحد التسعة هو يتابع بالغرفة
صاحتة اسراء انطتة الموبايل كاعدين بالهول نشرب جاي هي عيونهة متوترة تنتقل بين اديهة لتعصر بيهن و بين دلهم لمتمدد يگلب بجهازة
حجت متوترة:دلهم شصار على عصام
رد برود: شدراني عايش وياه
اسراء:مارجع حجة وياك
دلهم: همم اجة مرة وطردتة
اسراء:وتالي
دلهم:تنجبين و تكعدين هنا لحد ما يحترمج و يقدرج و يعرف اكو واحد يطلع يفرك حلگة بالنعال اذا يقهرج وكتهة يصير خير
حجت تقاطعة تلتفت لابنهة :بس صوتك فدوة لاتحجي كدام الطفل هيج
دلهم:خالو گوم روح للغرفة
رفع راسة اخذ مخدتة دخل لغرفتي حجت بهمس:باجر كرار يدوام شلون
دلهم:اخذة بطريقي و ارجعة
اسراء: و شغلك
دلهم: مو مشكلة ادبرهة مايستوجب تهمين لهدرجة
اسراء:عمتي مو اعتذرت واني بس ردتهة تعتذر
حجة ينفخ الدخان من حلگة: ماعجبني اعتذارهة مو ذاك الگد
اسراء: دلهم شجاك
نهض بزهكة خلق:هاي مرتييي اطلعي شوهي سمعتهة يم الجيران و تعاي اعتذري هنا يمي الجيران سمعو تنظفت سيرتهة لو ضلو يباوعلهة بعين الصغيرة انتيييي شبيج مغسول دماغج بعظمة لسانج گلتي من اطلع عيونهم وراي شايفتني مگرن ارجعج هيج
ردت خايفة:بس
دلهم:لا بس ولا هم يحزنون عمتج تطلع السم لدستة بحلوك الناس عنج وخل هو يصير رجال و يدافع و يرد امة المن متزوجتة انتييي هااا شنو البي خطية والله يشتغل ماكو واحد هنا مايشتغل هاي مسؤليتة بيتة واجبة مو فضل منة غصباً ماعلية يسوي و حجاية ثانية منج تدافعين بيهة عن عصام ما تشوفين شي خير مني
هزت راسهى تبجي هو مل من ملحتهة حتى ما سكتهة دخل لغرفتي راح تمدد ضليت يمهة اسمع
لحجيهة تشتكي من عمتهة تسولفلي على مواقف رجلهة احسهة عادية بس هي تشوفهة شي جبير
تمددت بالهول غفيت نص حجيهة ماسمعتة فزيت على صوتة يحجي بهمس: گومي منا غنوة
رفعت راسي شفتة بيدة كرار غافي وخرت عن مكانة نوماه تدنيت نمت بالجهة ثانية غفيت للصبح
مرت يومين نفس الروتين بس اسراء مغيرة علية شوية رجعت تضحك و تتبوسم بطلت بجي
اگضي يومي وياهة تسولفلي و اسولفلهة تعودت عليهة كعدتني بصفهة حفت وجهي بي شعر ناعم
الة بالشمس يالله يبين تسولفلي عن العناية مدري شني كلشي ما افتهم بس ابتسم و اهز راسي وياهة
رحت للغرفة دهنت رجلية لبست الجواريب مكيفة بيهن يومية اغسلهن حتى يضلن نظيفات بس مكرهني شي واحد هي تعيب
مادري مو نبرة جلفة بس هواي تعترض اني ماحب واحد يسوي وياي هيج احب البس الي ارتاح بي
كعدت على التلفزيون بالليل دلهم اجة متأخر جابتلة عشة خو يباوعلهة مقلص عيونة بشك
خلاهة طلعت حة بهمس:اسراء شنو تسولفلج
غنوة:هواي تسولف
دلهم:على عصام هم تحجي
صفنت اتذكر هزيت راسي بنفي: لا حتى ما تجيب اسمة بس مرات اشوفهة ضايجة يجوز نستة
هز راسة رجعت مامهتمة اتابع اگلب بالقنوات هو باليلتهة مانام بالغرفة ولا حاجاني راح بالهول
ضل ايام هناك ينام بالليل رجعت اسراء متضايقة فترات ساعة تصير حبابة ساعة تصير عصبية
جنت كاعدة الگط بالتمن حجت تنشف بشعرهة كاعدة گبالي : غنوة ماعدج غير ذني الثياب لو الازرق لو لمشجر شسالفة
رديت منحرجة:عدي بس ذني مرتاحة بيهن
اسراء:دغيري شجاج حتى لونهن راح و يسحلن مبهذلة روحج بيهن بهذال
هزيت راسي بدون ما ارد الغصة وصلت لحلگي عيوني غورگن كملت الغدة صبيت تغدت هي و ابنهة اني ما اشتهيت رجعت لغرفتي مقهورة
العصر شفتهة متكشخة لابسة دشداشة ماروني و مسوية شعرهة حلو لابسة گلادة اجت سوت العشة
هي ماتأذيني ولا تخبث لو تغلط حتى دلهم من يجي تمدحني گبالة كل شوية تگلي انتي تخبلين و حلوة
بس تقلد يمكن هذة اسلوبهة مثل غفران تذكرني بيهة بس صفية جانت تعيب بطريقة مو حلوة
ورة مانظفت البيت اخذت ملابس رحت للحمام سبحت لبست هالمرة التراك بعدة جديد و حلو
جان لونة ابيض و الفانيلة هم بيهة تور وردي لبستهن مشطت شعري بالغرفة گلت اتعشة و انام
هي تصب عشة لدلهم اذا رجع طلعت جامعة خصل من شعري بالكماشة و الباقي محلل اسحب بردان گصيرة نص ما مرتاحة
حجت تضحك من شافتني: صدك جذب يمعودة وين ضامتهن يلجن خرب بليسج تخبلين صلوات عين الله تحرسج
يمة متت من الخجل ضليت ماعرف ارد بس امتمت ضحكت على شكلي مسحت فوك راسي بوستني
صبينة عشة كعدت اتعشة فرحانة هي هم تضحك
كروري يمنة يسولف عن المدرسة مندمجين وياه
رفعت راسي لدلهم من دخل ضليت صافنة جنت منتظرة اسمع صوت الدراجة و افلت ما سمعتة
سلمت عليهة رد بهدوء راح خلة غراضة بالغرفة رجع اخذ هدوم مشة للحمام يسبح التفت لابنهة
حجت تندس رجلي:عفية غنوة گومي حمي العشة
غنوة:راح انام
اسراء:شبيج بس كملي
گمت حميت المركة شغلت الطباخ جواهة رجعت حضرت المواعين الة و طلعت خيارة اثرب بيهة
بس اريد اكمل و ارجع للغرفة ماريدة يشوفني هيج اسحب بالتراك اريد يمط بصير عريض شوية بدون
مانتبه من عجلتي نجرحت بالسجينة تأففت رحت غسلت نفضت ايدي رجعت اشوف الاكل مبعدة
اصبعي عن الجفجير فزيت على نگاط الماي فوك ايدي رفعت راسي الة بلعت ريگي مرتبكة جان وراي
مد ايدة رفع اصبعي حجة : منين تعورتي
غنوة:من من السجينة منهة
شغت و تخربطت احوالي من خلة اصبعي بحلگة الگاع نهزت جواي غمضت عيوني رجلية خملن ماتن
رفعة مد ايدة للكومدينة طلع جيس الشاش هواي عدة يمسح بيهن الحبر و الوشوم لف وحدة على صبعي و عگدهة جانت مربع صغير
تنفست برهبة من خلة ايدة على ظهري حجة بهمس يم أذني : الابيض يخايل غناوي من تصيرين كدامي اوكفي گبال الضوة
زاغت عيوني التفت الة ضحك يخربط شعري مشة مسحت وجهي عرگانة عفت الغدة ركضت للغرفة
لفيت روحي بالبطانية ضامة وجهي الطم من الفشلة
ضليت هيج لحد ما سمعتة صاحلي غلست مارديت
مرالوقت حسيت صار هدوء هو جان يسولف وية اسراء بعدين لاعب ابنهة وراهة اجة طفة الضوة
ضل بس التلفزيون مشتغل اسمع اصوات طلق و حركة تمدد بصفي ماكو شاف اقل من دقايق طفاه
سحب باكيتة يشرب جكاير گمت اريد اطلع سحبني حة بحدة:ضلي هنا
غنوة:اريد اروح هناك
خزرني نظراتة جانت مو مال شقة خفت منة سكتت تمدد عدل طفة الجكارة رفع الغطة حضني تأففت
دلهم: غناوي
رديت بضوجة:ها
دلهم:ليش ماتردين ترجعين لهلج
التفت خايفة عيوني نترسن دموع حجة يمسحهن:بس سؤال جاوبي على كدة
غنوة:اهلي اخاف منهم
دلهم: عدج اعمام
هزيت راسي رديت: هواي بس اخواني منعزلين عنهم يعني مانعيش يم اجدادي بنفس البيت
دلهم:ليش
غنوة:جدتي الثانية مرت جدي ماتحب صفية و يتعاركن و طردونة
هز راسة بفهم سحبني بهدوء خلة راسي على صدرة حجة بنبرة غريية:خاف ادخل للسجن وين ترحين
توسعت عيوني سد حلگي يأشرلي اسكت بعدت ايدة نهضت لازمة جتفة:لـ..ليش تنسجن
دلهم:لان اني خبل عدي كلمتي ماتصير ثنين ينرفزني ليكسرهة
غنوة:مـ..ما افتهمت
دلهم: تفهمين بعدين غناوي
غنوة: اني شلون بية
ابتسم عيوني عليه بخوف رفع راسة الي غمضت عيوني برجفة من بوسني برگبتي يهمهم و يمشي شفتة على طولهة ياخذ روحي وياه
حجة بهمس: شطالعة اليوم الجميلة
رديت برجفة:ما طالعة بس
دلهم:احجي لا ترجفين
غنوة: لبست
ابتسم رفع راسة درت وجهي خجلانة حجة يقرب أذني : تعبين عيوني وياج اني واحد گ**"
دفعت جتفة اموت بدمي من يگول هيج شكد عيب اذني تصوفر من تستحي اضل اتبوسم هو عبالة عاجبني هيج يحجي وياي
گبل لا ارد وخر الغطة حجة بهمس: لاتحجين حرف واحد ماريد
باوعتلة مستغربة گام على طروف اصابعة فتح الجرار مدري شنو اخذ ماشفت من الضلمة گمت
امشي وراه على كيفي فتح الباب مثل ما افتحة طلع باوعت بأستغراب لمكان أسراء فارغ ماكو هية
راح دلهم لباب المطبخ المفتوح قفلة صعد الدرج لحظات قليلة سمعت صوت همس و كلام مافهمتة
رمشت بصدمة من نزل لازم اسراء من شعرهة هي تغطي بروحهة لابسة دشداشة قصيرة كلش و صلوخ
دفعهة من الدرج للگاع ضربهة راشدي صوتة دوة بالهول سمعت صوت رجال رجعت للغرفة اركض
لايشوفني هيج لابسة بعدني ما مستوعبة لصار اول ما خليت رجلي بعتبة الباب ثار صوت طلقة بالبيت
جمدت مثل الخشبة حتى النفس فرغ من صدري گلبي يدك قوي اخترق مسمعي صوت اسراء صرخت
شكرا لزيارتكم عالم روايات سكيرهوم
