رواية اثر الفصل الخامس بقلم اسيل ياسين
محسَوبه من العِمر كُل ليَلة نگضيَها
ومحَسوبه من الدِرب كُل خطوه نمشيَها
ايامنَه الي تمُر رحِله بقَطار العُمر
سَفره بمرابع خِضر شتريد سمَيها
لو نوگف بنص درَب الدنَيا تبقى تِدور .
🌻🌼🌻🌼🌻🌼
كعدت على مرجوحة حسّيت جفوني تثقل وجسمي يرخي فجأة شفت ماما واكفة كبالي إيدها تضرب بخدي:
- لج شنو؟ مامسويه غده بعدج نايمه؟
فتحت عيوني رمشت بسرعه حسّيت لساني ثقيل:
- هااا... ماما... شنو؟
ثاوبت، وكَمت من المرجوحه ظهري ياذيني
معقوله من التعب نمت؟
دخلت للمطبخ شفت نورا لابسة بدي مالتي أبو ركبة، مباشرة عطت:
- ليش تلبسين بدي مالتي؟ مو ألف مرّة أگلج لا تمدين إيدج لملابسي!
نورا بجفاف جاوبت :
- هسه لمونه! هو بدي شبيج؟
فركت عيوني وگلت بهدوء :
- إنتِ ليش ما كعدتيني؟
نورا رفعت حواجبها :
- هااا... مو انقهرت عليج عفتج نايمه
باوعتلها بتعجب... مرت أيام ونورا غريبة يومية تجيبلي عصير لو اكل واني عندي دوخة مستمرة خمول ، صداع ، خصوصًا معدتي واهلي يشوفون بس ما مهتمين .
مرّه جنت كاعدة على المرجوحة بالحديقة نسمة الهوا تلعب بشعري ... دخل ليث ابن عمي اجه كعد يمّي :
- لولو جدي كال مريضة واجيت ركض!
ابتسمت بتعب :
- مابيه شي بس وجع بمعدتي
لزم إيدي بقوة نظراته خايفة :
- وجهج أصفر عمري كومي اخذج للدكتور
هزّيت راسي :
- اخاف والله ليث ...
- تبقين هيج تتوجعين؟ كومي!
- ليث هسه يروح لا تهتم
- خاف جرثومة ولج؟
- لا ما أعتقد عندي لعبان نفس هواي
كرص خدي بحنية:
- مامتعود عليج هيج تعبانة وما تبتسمين
ابتسمت ودنكت راسي ... بس فجأة وجع قوي بمعدتي! حطّيت راسي ع كتف ليث، عصرت إيده بقوة...
هو صاح بخوف:
- كومي إيلنوور هسه اخذج ما أتحمل هيج تبقين
- مابيه حيل اكوم ولله
- أشيلج؟
- لا صيح ماما أو نورا تجيب الي جاكيت ألبسه
ركض واجت ماما تمشي بسرعة عيونها ضيقة:
- لج انتي شبيج؟ شنو هلعياره مالتج؟
- ماما دا أتوجع والله ...
- كلشي مابيج... تتعيقلين كدام بيت عمج هسه شيكلهم محد أخذها طبيب!
- صار أيام أتوجع كدامج حتى كلمه "شبيج" ما گلتي لي...
- اي شبيج؟
كمت وكفت حسّيت راسي يدور لزمت ماما حتى لا اوكع صداع قوي بقيت مغمضة صوتها بعيد
فتحت عيوني ... وبسرعة اتقيئت على جتف ماما!
هيه عاطت ودفعتني قوي ، وكعتني بلكاع صوتها عالي:
- شنو هل قرف؟ ما تنتبهين!
ليث صرخ عليها:
- خااااله شبيج هو هيج!!!
ليث ركض يمي استندت عليه همست بصوت مبحوح:
- ليث عوفني هسه أصير زينة
كعدني على المرجوحة ركض للمطبخ... سمعت ماما تهمس بصوت خافت :
- ولج خاف حامل انتي؟؟
رفعت راسي بسرعة هزّيت ايدي
- إي من الحايط
اجه ليث انطاني مي كومني بحنية وبسرعة وداني للسيارة
رحنه للدكتورة سويت تحاليل عامة گلبي يدك .. دخلنا للدكتور عيونه عالتحاليل
رفع راسه حجه بنبرة هادئة بس جادة :
- عندج فقر دم بسيط ، ضغطج نازل ، ونسبة انزيمات الكبد شوية مرتفعة ...
هزيت راسي بخوف:
- يعني شنو دكتور؟
- هاي النتائج تبين انه جسمج مرهق من فتره وكأن جسمج يستقبل ماده احتمال مهدئة ، انتي تاخذين أدوية نوم او شي؟
اتسعت عيوني:
- لا والله دكتور! ما آخد شي!
التفت لليث، وليث سأل بقلق:
- يعني شنو السبب؟
الدكتور:
- أحيانا يكون بسبب تناول أدوية اكتئاب او منومة أو بسبب كثرة الأدوية
دنكت ليث حجه بهمس وصك على أسنانه
- رجعتي على حبوب الاكتئاب إيلنوور؟؟
- لا ولله لا ما ماخذه اي شي
الدكتور كمل:
- حتى نعرف اكثر، لازم نسوي تحليل سموم خاص بالدم والبول يكشف إذا عدج مادة منومة أو مهدئات ، حتى نحدد شنو بالضبط
ليث هز راسه بسرعة :
- اي دكتور نسويها اليوم
الدكتور:
- تمام روحو للمختبر هسه .
كمت أول ما طلعنه، ليث مشى بخطوات سريعه وجهه متعصب وصوته عالي شويه:
- إيلنور خاف تجذبين عليّه!
باوعتله بدموع بعيني:
- ليث شبيك! والله ما ماخذه شي
وكف كبالي، صوته منخفض لكن حاد:
- إيلنور اني احبج لا تجذبين عليه ماحب الجذب اذا انتي ما اخذه شي لازم تكولين
- اصلا ما اخاف منك ترى اكدر اكولك "اي اخذت" ... بس والله العظيم ما اخذت!
شوية خف صوته، نفس عميق لزم ايدي :
- زين حبيبتي... يلا نسوي التحليل ونشوف...
اني ليث دائما اعتبره مثل أخوية هو كلامه دائما حبيبتي ، عمري متعوده عليه ..
رحنا للمختبر سحبو مني دم وگالوا لازم نسوي هم تحليل بول
واني گلبي يدك
طلعت من المختبر وجه ليث شاحب بس نظراتها بيها حنية :
- لاتخافين حتى لو طلع شي نعرف شنو ونعالجه
هزيت راسي ودموعي بعيني:
- ليث والله خايـ خايـ فة
- لا تخافين اني يمج
انتظرنا برا ليث يباوع بيه واني ضامّه ايدي على بطني من الألم ...
جنت افكر شنو اذا طلع شي فعلاً؟ شلون؟ وليش؟ أني ما أخذ حبوب
رجعنا للدكتور بعد ساعات
رفع عيونه علينا تنهد :
- إيلنور...
سكت شويه...
- التحليل بيّن وجود نسبة قليلة جداً من مادة منومة مستمرّة من فترة مو مرّه وحده يعني جسمج ديستقبل هاي المادة بشكل متكرر .
ليث طلع صوته مبحوح:
- يعني متأكد ؟
الدكتور يومأ براسه:
- غالباً احتمال احد ينطيها أو هي دا تاخذ بدون علم بس حسب كلامها الأغلب أحد ينطيها بشي تشربه أو تاكله
- دكتور زين ليش تأذيني معدتي يبقه الالم ؟
- اذا تبقى مستمره اي يأثر على الكبد والجهاز العصبي... لازم تتوقف فوراً .
كتبلي أدوية وطلعنا اول ما صعدت بلسيارة بجيت
- لولو انتي بس سكتتي منو ينطيج خاف امج؟
- ماما اصلا مستفادة مني على شنو تنطيني ؟
ماعرف ليث ماعرف
صفن راد يحجي ودار وجهه مباشرة عطت
- انتَ ما صدك بيييه مووو
أكلك ما أخذ حبوب ما أخذ ليش ما تصدكني ؟
- ماعرف حرت إيلنور
درت وجهي للجامة همست ياريت لو اموت واخلص حتى تصدكوني ولو مره ..
ثاني يوم كعدت الصبح مكتئبة كعدت نورا جابتلي حليب " اشربي زين للمعدة "
صفنت عليها معقولة هاي هي شو من شربت العصير هيج صار ويايه ذبيت الحليب بلسنك وسويت روحي شربتهه
صعدت لغرفتي تمددت صارت الساعة عشرة تقريبا سمعا صوت ضحك رجال
بس محد بيتنا لو اني متوهمه!
نزلت باوعت من الدرج أكو صوت من غرفة ماما وبابا بس مو صوت بابا !
نزلت على كيف ااااااء دخلت بصدمةة
باوعت من طرف الباب جان مفتوح شويه منه
نورا بحضن رجال غريب ايدي رجفت
وفتحت الباب وعطت بس مباشرة وكعت
الدنيا ظلمت
كعدت اني على جرباية ومحد يمي
اول ما رجعت ذاكرتي عطت نوراااااا
طلعت من الغرفة شفت ماما كاعدة رجل على رجل اتقربت منها كتلها
" هاي بنتج البربوك ما تشوفيها اليوم بحضن رجال شفتها "
هي صفنت وطكتها ضحكة
- وخري عن وجهي بلا سخافات
بقيت ارمش من صدمة صعدت للغرفة نورا لزمتها من شعرها وبقيت اضرب بيها
- لج ليش هيج تسوين ولله اله افضحج كدام الكل شلون هيج
- إيلنور شمسويه شبيج؟
- شفتج ويه رجااال شنو شمسويه
عاطت - مامااااا لحكيني مامااا ، لا إيلنور تخبلتي انتي
بقيت اضرب بيها واجوي وهب وماما يوخروني منها ماما دفرتني قوي على بطني خليت إيدي
صحت اااه ماما ..
- لج شلون تضربين اختج وتتهميها انتي يمكن دواج شماعية
كمت وكفت وعطت بوجهه ماما
- شكد اكرهكم
صحيت من ذاكرتي ..
مسحت دموعي وكمت نزلت جوه شفت نورا
وجهه مورم من البجي كتلها
- تردين كلينس تمسحين بيها خيبتج؟
سكتت ونزلت جوه نزلت وراها شفت رامي رجلها كاعد رحت كعدت مقابليه
- إي نسيبنا شلونك ؟
- الحمدلله وانتي ليش ماكو
- تعرفني ملتهيه بلدوام ، نورا شلونه وياك
- حبابه
هيه دخلت ابتسمت
-ديربالك لا تصير دبابة
هي خزرتني وكلتله بعصبية
- يله نروح
-هااااي شنو بعدني ما شفتكممم
نورا .. رامي يله
هو خزرها همس الها " اكعدي شويه "
نورا بقت واكفه ومجتفه رامي كال بضوجه
- بعد اختج عاندت
- حقك ما تنراد بالعناد مزعجة
هو ضحك .. صعدت فوك خليت كريم لوجهي من امده الي يفكر بنورا لزمت موبايلي عززه عززه هذا بكر دازلي فولوو وقابل على الطلب !
قبلت الطلب ودخلت لحسابه 70 بوست منزل !!! شنو شعندك فوكاها حسابه خاص
بقيت اكلب بي مممم شو هواي يعلقون اله
بس حلو بلصور الله شفت صورة لابس دشداشة سودة وكافها يطبخ جدر ...
ناشر ستوري ترددت ادخل لولا
اجاني فضول ودخلت ناشر اغنية
" نظراتك تحرجني و انسة
وين توديني ليا مرسى
ضايع عمري القبلك عشتة
كل عمري ضايع انه عشتة "
ممم مبين يحب وحده ، بس هو شويه جامد بس حلو ولطيف .. لكيت بنيه تعلق اله حبيبي فديت كل تعاليقها حبيبي شسالفة
دخلت لحسابها خاص اسمها ليال
يمكن هيه ، آني شعليه طفيت موبايل ونمت ..
ثاني يوم كعدت من وكت عندي حماس مادري ليش لبست بدي أبيض نص ردن وبنطرون جينز وظفرت شعري كعدت ارسم ميكاب ..
وصلت للمستشفى شفت سما اجتني تركض
- ولج عليج الله تعالي لحكي على فضيحة
- شكوو ؟
-ولج تعالي شوفييي منار شلابسههه
رحت وياها اني اباوع وضحكت ضحكة بصوت عالي لابسة فستان لون اصفر كركمممم
ونفس وشال اصفر !!!
احجي واضحك
- لج هاي منو ضاحك عليهاا!!!
- طالعها جنها بطل زيت .
-هههههههه ولله امنحوتب ولا تكعد راحهه لج
الحذاء اصفر وين لكتهه
- هسه تلكين حتى ملابسها الجوه صفرة
-اششش صوتج فضحتينة
بقينا نسولف ونضحك اني وسما دخلنا الممر ومامهتمين لضجة الكادر والمرضى ..
صار هدوء قاتل وأصوات المرضى والمراجعين اليوم حيل لود !
اجه مريض بعمري تقريبا جنت أشتغل وهادئة
امه لابسة عباية وسبحه بيدها وتباوعلي صفح
- خالة انتي ما مزوجة ؟
جاوبتها بــ ابتسامة
- لا
- شمالج شو جبيرة ليش ما مزوجة ؟
ضحكت
- مادري
- شني ماتدرين خالة ؟
- يعني هو بعدني ما مزوجة
- يا خالة اذا انتي مطلعة شعفتج للوادم حقه محد يزوجج
صفنت عليها
- خالة شنو شعفتج ؟
- شعرج مو شعرج مكفش
- خالة كيرلي هذا
- شمدريني انه شسمه هذا
بقيت أشتغل ونظراتها تراقبني
- زين خالة اذا خطبتج لــ ابني شني رئيج؟
ابنها ابتسم وباوعلي كال
- الحجية يا هيه حلوه تشوفها تحسها مناسبة وتخطبها
ضحكت والتفت
- خالة ما افكر بالزواج حاليا
هي هزت ايدها
- ولله وكت وما تفكرن بالزواج وبعدين تخلصنها نذورة وعروسات القاسم
- شنو عروسات القاسم ؟
- من نسوي ملاية الي ما مزوجة تصير عروسة القاسم
مافهمت عليها شتحجي بس سكتت سوالفها ضحكني ..كملت وطلعت رحت اشرب چاي
اجه واحد لابس سكراب شاب طويل واسمر طوخ رموشه طوال
- سلام عليكم خويه
- وعليكم السلام
- اكلج خوية انه جديد ومكاعد اندل الدرب وعلي تهت انه من البصرة اجيت نقل لهنا .
- اهلا وسهلا هسه تتعلم بس بلداية دوخ
تفضل اكعد اشرب جاي
هو ما كال لا وكعد فعلا ابتسمت ورحت جبتله جاي اني انقهر على محافظات خطية يعوف اهله ويجي
- خوية ليش عذبتي روحج جان كتيلي وانه اروح اجيب
ابتسمت
- لا عادي
-انه اسمي مهند جميل وانتي؟
ابتسمت كوه حصرت الضحكة
هو اسمه ابد مو يمه شجابها على مهند
- عاشت الاسامي اني إيلنور .
هو بقه مدنك
اجه واحد من بعيد هم اسمر يشبهه سبحان الله رفع راسه ابتسم مهند
- هذاك جيرانة اسمه سفيان بس ديربالج تكليله سفيان
ابتسمت
- شعجب اسمه سفيان ؟
- ترى هو سيد بس ابو سما سفيان
حتى يصير سفيان عبد الحسين
ضحكت
- احب السادة
- احنه نسمي عباس سفيان مايقبل أحد يصيح اله سفيان
اجه سفيان بتجاهنا
- لك اخوي شمالك شكد ادور ادور تعبتني وعلي صدك تحجي ؟
باوعلي ونزل عيونه
- لك شني تخون اختي
مهند .. يمعود عباس اجيت اسالها جنه مطايه ونفتر كلشي ما نندل دخت
سفيان .. اعذرينا خوية خاف دوخناج
بس وعلي بغداد اتيهه .
ابتسمت وكمت حبيتهم
رحت للدرهات افتر شفت سما كعدت يمها ضربتني بعكسها رفعت راسي لگيت دكتور بكر بدخل
كبل وكفت ماشفته اليوم
دخل للقسم بس يتقدم بإتجاهي!!
شكو؟ ليش جاي عليه؟
وصل يمي وبإيده فايل تقارير كال:
- يلا تجين تشتغلين ؟؟
- اي وين ؟
- تعالي ورايه
تفاجئت شعجب اجه عليه التفت لسما تغمزلي خزرتها ومشيت ورا جنت مدنكة وامشي رفعت راسي عزه هذا وينه !
التفت يمين يسار شو مالكيته شنو دكتور تلعب ختيلان وين اختفيت !قصص وروايات عراقية كرار صلاح
بقيت اكول دكتوور بكر وينك
ياا فعلا اختفى !
دخلت على الإدارة جانت مزدحمة أدور عليه بعيوني ماكو يربي وين راح؟ هسه وگت يصير شبح ويختفي ؟!
هسه مال أجيب مصباح علاء الدين وأفركه حتى أطلعه منه
بقيت أباوع واگفة بمكاني لمحته من بعيد جان واكف بزاوية جانبية ويباوعلي بخفة ... شافني وخزرني بنظرة طويلة رفع حاجبه كأنه يگول "تعالي"، بس أني مافهمت شيريد بالضبط .
هزيت بإيدي يعني: "شنو؟"
عقد حواجبه وأشرلي بإيده : "روحي."
بس وين أروح؟هسه اروح لو اجي
بقيت بمكاني ما تحركت شفت ملامحه تتغير ضغط على أسنانه ورفع راسه بنفاذ صبر بعدها إجه مشى بخطوات سريعة ناحيتي
وصل كبالي خزرني وحجه بصوت منخفض بس حاد:
"شبيج؟ مو أشرلج تعالي؟"
- دكتور مو انت تاشر روحي وبعدين تأشر تعالي
- ولله يا إيلنور أتصور كتلج تعالي وراية ؟؟؟
- اااي غير اختفيت
اجتي دكتورة منار
- هلوو دكتور ماشفتك اليوم
هو ضحك مادري ليش احسه ضحك على لبسها
- اهلا منار ملتهي ، المهم أكو حالة خاصة اليوم راح تجي امشي إيلنور
مشيت ويا
- حالة خاصة؟
- إي مريض جديد وصل حالته نادرة وأحتاج أحد واحس انتِ شاطرة
- إي بس آني بعدني جديدة مو كولش زينة
-عادي وهاي فرصة تتعلمين يلا تعالي
دخلنه غرفة صغيرة بجانب الإدارة جانت فارغة بس بيها السدية وجهاز
باوعت عليه باستغراب:
"دكتور، المريض وين؟"
كعدت على كرسي وطلع أوراق
گال:
- راح يوصل بس قبلها أشرحلج الوضع
كعدت بعيده عنه گال :
"تعرفين شلون تتعاملين ويا الحالات المزمنة اللي بيها ألم وهمي ؟"
- أكو شي اسمه ألم وهمي؟
- إي مريض يحس بألم بدون ما يكون أكو سبب عضوي .
بقه يشرحلي واني اهز راسي
دخلت مرة تدفع بعربانة رجال
هاي شنو؟!! شنو هالخلق الرباني؟
طالع جنّه كرم بورسين !
خرب شكد احب الحلوين بقيت مبتسمةة
بكر ساعدة وكعد على السدية خطيه عنده تك رجل والرجل الثانية كاصيها يحس بألم بيها
على رغم هيه ماكو!
بقيت صافنة سمعت دكتور بكر بنبرة هادئة
- يله إيلنور
بديت أشتغل أقيس النبض أسأل أسئلة عن الألم، كلشي نظامي... بس المريض ماحبيت نظراته احسه كلساع يلزمني ويسوي نفسه بدون قصد ..
همسلي المريض :
- انتِ مسيحية ؟
- نعم .
انتبهت نظراته لصدري لأن لابسة كلادة
مباشرة رفعت البدي ورحت البس كفوف
اجه بكر يمي همس "سدي لابكوت طبكي"
طبكته ورحت المريض كال
- حضرتج بعدج متدربة لو متخرجة؟
- متخرجة
-اذاا هيج ليش أحسج مرتبكة؟
سمعت صوت بكر وراية بعصبية
-إيلنور شو وخري
بكر كعد يشتغل بدالي ومعصب كمل والتفت الي :
-روحي اخذي ملف لغرفتي
دخلت لمكتبة خليت الملف وجذبني ورقة يرسم الله مبين رسام حلو اخذني فضول
هو صح رسم بس رسم احس بي قصص ..
لزمت ورقة راسم غربال وشكد ناس هيه رسمة حلوه وملفته للنظر
وشويه واجه كبل رجعت الرسم معصب
- تدرين شنو أغرب شي شفته اليوم؟
- شنو ؟
- المريض ما مهتم لعلاجه مهتم بمعالجته!
- هاااا؟
-أنصحج تتجنبي الابتسامات الزايده بالمستقبل لأن مو كل مريض نيتة زينة
- دكتور آني جنت رسمية
- إي كلللش رسمية ودليل حتى عرف انتي مسيحية صح هو شلون عرف؟
دنكت طلعت كلادة من البدي
- لأن لابسة صليب
هو عيونه على صليب حسيته متفاجئ ومباشرة دنك
- إذا كملتي سدي الباب وراج
هذاا شبي !!! وثول هو هيج يطرد كبل
رحت أكمل شغل ولله شغل الصحة متعببب
چنت بنهاية الشفت تعبانة دماغي طافي ومخنوكة من الحر والمراجعين اجتي سما
وكالت:
- إينلور المريض اللي بالغرفة .. ماكو أحد يمه الدكتورة مروة مگدرت تجي گالت أروح اني وانتِ نسوّيله الجلسة .
سحبت ملفه وأنا واكفة، قريته بسرعة:
مريض ما بعد عملية كسر بالورك ممنوع تحفيز كهربائي بالجهة اليسرى
غمغمت بصوت تعبان:
- يمعودة هذوله الدكاترة يخرعون ولله كلشي ذابين براسنه
- إينلور نخلصها بسرعه هي اخر جلسة .
دخلنا عليه كلت
- السلام عليكم
چنت مشغولة أهيئ الجهاز ، سما جانت تثبّت الأقطاب
كلت إلها:
- سما خليه عالجهة اليمنى فقط ، اليسرى خطرة عليه
- حاضر حاضر، بس وين المفتاح مال الجهاز؟
انشغلت اشوف موبايلي عثمان دا يتصل رحت أجاوبه كال "ماكدر اجيج اليوم "
دقيقتين ورجعت ولمن رجعت شفت الجهاز شغّال !
صوت المريض تغير إيده ترتجف ويگول:
- گلبي گلبي ياابه ...
سما تجمدت، وأنا ركضت عليه:
- سما شمسوية؟؟ عاليسرى؟؟
- لا لا لاااا ماتدري يمكن اني دخت خبطت الجهه!
ضرب الجهاز برجله قبل ما يغمى عليه
انصدمت ركضت أگطع الجهاز اطفي
لحظة وعاطت سما
دخل د. بكر ركض وراها الدكاترة
المريض منهار الجهاز موصول خطأ الأقطاب على الجهه اليسرى
صاح بصوت أول مرة أسمعه:
- منو مسوّي هالشي؟؟ منووووووووو؟؟
سكتت
سما گالت بصوت متقطع:
- إينلور جانت مسؤوله .
شكرا لزيارتكم عالم روايات سكيرهوم
