رواية أرض الخناجر الفصل الواحد والستون بقلم ايلول
ترا الوادِم بچَفة
و ضِيمك بچَفة
يَـ تابوت العِزيز
الضَال وَسط البِيت
عليّ ضَلتك كَلفة
و روحِتك كَلفة .
══━━━━✥◈✥━━━━══
رنـــه :: احجي وياها نفسي مگطوع وهيه تعاين لوجهي ساكته عيونها متروسة دموع، طبگت الورقة بين أديها وحجت صوتها مبحوح
عــفراء:: راحت الاهلها ما تريدنه.
اعاينلها مستغربه عاگده حاجبي شالت عينها ومسحت دموعها گوه تحاجيني
عــفراء:: كاتبه خلي كهلان يطلكني ما اگدر اعيشن وياكم واعاين بوجوهكم.
-شبيها هااي مو كنالها مالج غرض انتِ؟
احجي بحرگه خايفه عليها من امها وعفراء مختنگه
عــفراء:: ما تگدر تگول اموتن كل ما اعاين لعيون كهلان، الغبيه كتلها معليج معليج انتِ، تسودنت.
-مشينه انجيبها.
هزت راسها لا ودموعها تمسحهن بظهر ايدها ويردن
-ما ترضى كاتبة لا تجون ما ارد.
-ختولي مو بكيفها ماترد
ووي حچايتي التفتنا على فتحة باب الهول طب طــروادة بأيده علاگه مبتسم گال
-بس كون جده بعدها كاعده؟
-توها نامت.
عاينلنه ضايج يراوينه العلاگه مدها العفراء
-جبتلها كعك عبالي الحك عليها.
اخذتها عفراء من ايده ساكته وهو رأساً راح حماسه عاين لوجها بشك والتفت عاينلي عاگد حاجبه
طــروادة:: شبيچن؟
دنگت عفراء ساكته وهو مضيگ عيونه زفر نفس بحسره ومسح وجهه چن فاهم عليمن مقهورين بساع مشه الغرفته فتح الباب عاين بيها ورد عاين العفراء
طــروادة:: وينها؟
عــفراء:: راحت الاهلها.
حط ايده على عيونه بغضب يحجي بحرگه
-لا حول ولا قوة إلا بالله، انا مو گايل ما تررروح؟
مشه لباب الهول بعصبية يريد يروح يجيبها رگضت عــفراء كضته
-اووكف خلني احاچيك.
شابگته بكل حيلها وما گادرته لمن جرت ايده تبوسها وتتوسل بيه وگف يحاجيها بحرگه
-گايللها ما ترررروح!
-صوتك بس اسمعني هيه تعبانه ما تدري بروحها شتسوي جاي تتذكر سوالف آهلها وشسووا بأهلنه البت تريد تموت من القهر ما تگدر تعاين لوجوهنه.
ضحك مستهزئ
-وهيه ياهي مالتها بصخامها كتلها مالج غرض بأهلج ريـــمه ضلت تلعب، وخري عني خل اجيبنها لا يسودنونها.
دفعها بس يريد يروح ردت جرته تتوسل
عــفراء:: بروح ابوووي اوكف شلعت گـــلبي
فرفحته منين مايلتفت تجره وتچلب بأيده حيل، شاط من القهر ومن ما گدرتله عافته وركضت وكفت بباب الحوش سادته وتحاچيه
-بس تروح هسه تصير مشكله وتكبر، هيه ما ترضى ترد شلون تجرهااا كوه عليها اخوانها يسكتون؟ ما راح يگولون ليش ما تريده؟ خلني احلنها بدون هوسه فـــدوه خويه لا تعل گـــلبي .
رد ليوره بحرگه ما يدري شيسوي اديه على راسه كعد على حافة الحوض يعاين العفراء بغضب، دنك يهز راسه بقهر يحجي
-والله علت گـــلبي بالحسين علت گـــلبي
كعدت عفراء گدامه كضت وجهه بأثنين أديها مختنگه
عــفراء:: خلها للصبح اروحن اجيبها احسن من ما هسه تصير هوسه.
عاين لوجها عيونه حمر
طــروادة:: والله گتلها انا رايدج وشاريج انا عاشگج شلي غرض بأهلج ريـــمه بس ضلي يمي ومالنه غرض بيهم، ادري شمااالها هم هي وي هالدنيا تتفنن بحرگة گـــلبي شترريد شحاچيها اكثر من هييج.
يحجي بحرگه ايده ترجف جرتها عفراء الوجها باستها خايفه عليه
-فـــدوه اروحنلك لا تحرك گلبك مو بأيدها صعبه هيه تعبانه وانتَ بعينك شفتها حرگت بيت اهلها ماتدري بروحها.
دنك حاط أيده على عيونه ساكت، گد ما محترك گلبه مايدري بروحه شيسوي وعفراء تحاجيه بهدوء وتمسح على أيده كلساع تبوسها، جر راسها عليه باسها ووگف ساكت طب للهول جر الچفية من التعلاگه لفها على وجهه وانه وعفراء نعاينله بخوف
عــفراء:: وين رايح؟
تلثم بالچفيه ووگف گدامنه شال أيده حطها على خد عفراء احس من يرمش گوه يرد يفتح عينه گالها متحسر
-للگيعان بس اضل هناه اختنك.
عبر من بيناتنا طلع وعفراء تمشي وراه محتاره وصل لباب الحوش والتفت عاين لهاسكي رد يمه فتح السلسه منه وطلعه وياه، رديت للبيت وعفراء ضلت بالحوش متانيه عبود وسجاد، گوه گدرت انام ودك المنبهه بالخمسة الا ربع فزت وياي عفراء طفيت المنبه اعاينلها گوه فاتحه عينها، غطت شمس عدل
-بيش الساعة؟
- راح تصير بالخمسه، ارد انام وتكعديني بعد نص ساعة؟
عــفراء :: لا گومي صلي واقري على النص ساعة هسه.
ضليت كاعده بفراشي عيوني يحرگني من النعاس بعدني نعسانه واريد أراجع امتحاني، من شافتني بعدني اغفي كفت الغطا منها گالت.
-گومي حتى أنه كعدت.
گمت كوه على روحـــي طلعت من الغرفة، اعاين للهول طــروادة راد ومشغل التلفزون مخليه على قرآن ونايم لاف روحه الف لفة بالبطانية.
مشيت من يمه فتحت باب الهول صارت بوجهي البروده وصوت الطيور الشمس توها تعلى، غمضت عيني وجريت نفس طويل، طلعت للحوش غسلت وفتحت بيوت الدجاجات والبطوط واسمع صوت الولد دك گـــلبي حيل من حسيت روحـــي اسمع صوت بريا ركضت اعاين من فتحات الباب شفتهم مــيثم وسلطان توهم رادين من الگيعان يسولفون ويتشاقون هزيت راسي متحسفه هسه لو هاسكي عدل ما هديته عليهم وضحكتلي شويه.
يضحكون مدري يتعاركون اعاين عليهم ومافاهمه توهم يعبرون من يم بيتنا واسمع مــيثم يگله
-باجر افر عليها شرك مكهرب.
وسلطان يضحك ويگله
سلطان:: والله لو مو تفر عليها شرك هم ابوگن حلوه هاي السالفة تاخذلها ورده تضل طول اليوم تشوف ضحكتها.
مــيثم:: جا تگطع حديقتي علمود تشوف ضحكة مرتك انا ياهي مااالتي.
سلطان:: خااب هيه ورده
ووي الحچايه طك مــيثم على راسه وركض شارد وميثم ركض وراه بساع هزيت ايدي مسودنين.
شغلت الماطور ذبيت الصونده بالخضره وطلعت اتمغط واعاين للشجر ولحيواناتي، فززتني عــفراء
عــفراء:: كضه الوكت جا كاعده تدرسين لو تصفنين؟
توضيت ومشيت اركض للغرفة صليت اخذت كتبي وزوليه وطلعت فرشتها يم السياج جوه الشجرات، آقرأ وعفراء گدامي كسرت سعف يابس حطته بالتنور، صحت عليها
-ترحين تردين ريـــمه اليوم؟
عاينتلي وهيه تشتغل
عــفراء:: اي خيه انه اروحن احسن احاچيها واجيبنها اذا طــروادة يروح تكبر السالفة وراح يضل كلمن يجرله بصفحة.
-اي صدك والله حچيچ خوش حچي
-اقري اقري لا تضلين تدوريلج سالفة.
ضحكت ودنگت اقرأ مشت هيه للبيت وردت بأيدها سله ستيل وسجينه طبت للحديقة وبس فتحت الباب مال الشرك رگضن الدجاجات والبطوط يردن يطبن وياها كضت الباب صاحت
-تعااي وخريهن يموتج طــروادة
ركضت وخرتهن وطبيت وياها حاشت طماطه وبصل وانه اطفر من مچان المچان درت اعاين من اجت جده صوت المفاتيح يچكچك برگبتها لابسه سبحة بيضه وشاده بشراشيبها مفاتيحها، عاينت علينه وعفراء بساع عافت السله وطلعتلها
عــفراء:: ها جده.
كضتها من أيدها وجدّه تگلها
-شماله أخوج نايم بالهول مو يم مرته.
شلت السله وطلعت وراهن عفراء تضحك تمشي وياها وتگلها
-مرته يم آهلها مسيره
اخذتها غسلت وكعدتها بالحوش يم كتبي، ذبيت السله بالمطبخ ورديت يم جده كعدت اقرأ وهيه تعاين العفراء شعلت النار بالتنور تريد تخبز مشت للمطبخ جابت العجين ومتانيه النار تهفت گالتلها جده
-انتِ دوم هناه ما ترگدين ببيت زلمتج؟
ضحكت عفراء، شالت ماي بأيدها طشته بالتنور وشالت المخبازه حطتها يمها بدت تخبز وتحاجيها
عــفراء:: رجليَّ راضي جده.
-جا خوش كونه راضي.
سكتت عفراء تضحك حطت قوري الچاي بالتنور لمن كضت خبز، ودته واجت الجده طببتها للبيت ردت يمي بساع لافه العبايه بأيدها گالت
-رايحه الريمه، انه.
هزيت راسي خوش لبست عبايتها وطلعت دنكت اقرأ وما گدرت اخافن من تروح على بيت شاكر، گمت بساع عاينت من باب الحوش تلاكه وياها ســليم سلمت عليه مدنك حاط ايده على صدره ويگلها
ســليم:: شلونج خويه شلون صحتج، شمسنا شلونها؟ الله يخليج الله يحفظج.
ومشه گدامها فتحلها باب الحوش بعد بنوه ببلوك مثل حوشنه، ارتاح گـــلبي شويه من شفت واحد من الولد بالبيت بعدني اعاين وشفت صــيهد جاي علينه دك الباب وخرت رديت ليوره وگلت
-خيرر؟
-وسم حتى سم.
غميته احجي بصوت ناصي " يسمك ان شاءلله " اسكت منه الخاطر جــويريه احترمه علمودها ميخالف، وكفت يم الباب
-ياهو؟
-خلاسج وخلاس اخوج السگط.
-خاب تروحله فـــدوه .
دفر الباب وي حجايتي رگعه بوجهي صيحت راده ليوره ايدي على وجهي رد الباب انسد بوجهه وطرواده اجاني يركض يصيح
-الله الله.
جر ايدي من وجهي وهذاك من وره الباب يحجي مستهزئ
-اخت الخايس.
-انت الخا...
سد حلگي طــروادة وانه اجر بأيده محترك گـــلبي اريد ادفره واروك ببطنه واشوفن ياهو اليحترمه بعد الخاطر مرته.
طــروادة:: طبي جوه.
جريت ايده من حلكي اصيح
-طگاااني محترمته وطگااني.
-انا هسه اطگه.
صــيهد:: تعاال فنك.
دفعني طــروادة لباب الهول وفتح باب الحوش الصيهد واكف يفرّ بسبحته صيحت عليه
-خاب عاين ترى وحگ الحسين انه محترمتك علمود مرتك لان احبنها بس بعد يكون احترمك.
دار عليَّ طــروادة خازرني طبيت للهول ورگعت الباب حيل امسح بوجهي واعاين من الشباج اريدن اشوفه يطگه وياخذ حگي لو لا طبوا للحوش اثنينهم گاله
- شمالك مسودن؟
صــيهد::ما طاكها الباب طكاها.
طــروادة:: هسه اموتنك وعلي تعيلون بيها وصحتوا ما تحترم.
طك طــروادة بالسبحه على اصابعه عود يشاقيه وهوه ضل ينكث بأيده ميت من الوجع وهذاك يفتر وراه ويگله
صــيهد::شبيك كهلان صدك جذب صاير چنك وحده ناعمه حسره اسويلك بز صحّت كسرتني شني السالفة صوبتك هيه سبحة؟
مد ايده طــروادة يعاين الاصابعه وتلفت يدور جر الصونده مال الماي طبگها وطك صــيهد على زنده
طــروادة:: بس انتَ تعَرف تطك؟
جراها منه صــيهد يضحك ويگله
-اشاقيك والله كاافي طكيتني حييل.
-شتريد من الصباحيات.
-اشوفن جده.
درت على جده تعاين على التلفزون مشغلين دعاء الصباح وجاي تسمع صوتهم بس مغلسه مسويه روحها ما تدري طبيت للمطبخ وهمه طبوا للهول دنگ صــيهد باسها براسها وسلم عليها
صــيهد:: گومي جده نرد للبيت
طــروادة:: لا يابه
واشيه:: ما اردن لو ما اجه وليد ليجاي، يصيح علي ابوك ترضاها ؟
صــيهد:: مسودن طالع عليكم مالج غرض بيه گومي هسه غير انا جاي عليج.
حجه راد ولا رضت تروح وطرواده هم مچلب بيها طلع صــيهد ورد طــروادة للبيت عاين للمطبخ ينشد
-عفراء وين؟
-هسه تجي.
عاينلي بشك وجده حاجته مشه كعد يمها گليت الطماطه وكلساع امد راسي اسمعها شتسولف وياه توصي بيه وتبرر الجدي تگله يحبكم بس أنت تعانده مثل ابوك
وهو يسمع ساكت، شويه واجت عفراء وحدها عاينلها وگام طب للغرفة اجت يمي للمطبخ اعصاب حجيت بهمس
-هاه؟
عــفراء:: هاي الچنت خايفه منه
-شصار؟
-ما شفتها بس سليم صعد حاجاها كايلتله ما ارد حتى بدون ما تفتحله باب الغرفة، وميلاد تضحك متشمته تگلي اليوم يروح ابوها يرفع دعوة طلاك، وسليم رد يگلي شصاير عباله كهلان محاجيها.
- ياا جا وهسه شلون؟
عاينتلي بحيره محترگ گلبها
-احتاريت بالعباس احتاريت شسوي هسه؟ احجي الطرواده السالفة واكله ليش راحت اخافن لا يتسودن ويمشي بحجيهم يطلگها اسولف المن ويحلها الي.
دارت وجها مقهوره، عفتها ومشيت كعدت زهره وطرواده كعد الولد، وهوه هم بدل حطينه الريوك شرب بس چاي وطلع حتى ماحاجه عــفراء، ودانه عبود للمدرسة بالي ضل يم ريـــمه .
"""
رغد:: مرات تحسب نفسك طلعت من المعركة منتصر بس بمرور الايام تكتشف انتَ ما انتصرت ولا المعركة انتهت .
صافنه بوجهه لام نفسه ومحتضنها
حواجبه ينعگدن ويرخن مديت ايدي على زنده احركه اهمس صوتي رايح
-سلطان، سلطان.
شهگ وفز مخروع يتلفت لمن صارت عينه بعيني
-اسم الله.
دنك گوه يجر النفس مسح وجهه ونزل من الچرباية بدون مايحجي حرف طب يسبح، تحسرت وگمت محتارة اكثر من مره تصير وياه نوبات توه نايم ويفز يمشي يكعد على الشط يدخن ساعة ساعتين يله يرد للبيت.
طلع من الحمام واجه يمي للمطبخ حطيتله الريوك گدامه اعاينله عيونه ذبلانه
-ما تتريگين؟
-لا تريگت من الصبح.
هز راسه خوش اكل ساكت وبس كضه گام للغرفة غسلت المواعين انظف وافكر بيه، التفتت على صوته واكف بباب المطبخ گال
-رايح لبيت اهلي شويه واروحن للگيعان.
هزيت راسي خوش ضل يعاينلي بحيره اجه يمي جرني من ايدي الصدره يشبگني حييل ويحجي بصوت يرجف
-لا تملين مني نمرشه.
عبرت ايدي اشبگه بنفس القوة
-ليش تحجي هيج روحـــي انتَ سلطان.
وخرني من حضنه لام وجهي بين أديه عيونه تفتر بين عيوني باسني براسي متحسر
-اضيعن بدونج.
عاينت لوجهه مبتسمه باسني وطلع لبيت اهله، كضيت شغل البيت گلت اطبخ الغده واروحن اشوف امي، ورد سلطان اعصاب رگع الباب حيل وكفت بخوف
-ها سلامات؟
صيح بحرگه
-البسي عباتج وتعاي لعفراء حاجيها عليييمن بله طاك ريـــمه .
-ياهو طاكها شصاير؟
يفتر بحرگه يفور وانه ما فاهمه شي نتر
-طــروادة طاكها الخايس السگط آمنت بيه مكيف مزوج اختي الخوش زلمه من طاحظة بالحسين يرد لو ما يرد اذا ماكسرت اديه.
يحجي وانه البس بعبايتي وبس اريدن اعرف شصاير
-وين هيه ريـــمه ؟
-عد اهلي
-هيه كالتلك طاكني؟ ما سولفتلك عليمن؟
-نايمه هيه امي حجت.
-امشينا الاهلك خل اشوفنها، النوب اروحن العفراء.
طلعنه سوه محترك گلبه كتله
-هوه يعشگها شلون يطگها ما اصدك.
عاينلي بعصبية
-والله حب طفولته هاي عفّره كالتلي .
سكت يمشي ويخزر بالگاع طبينه البيت اهله جهال مرتضى يمهم يلعبون بالحوش وميلاد تطبخ بالغده بس شافتنا طبينه للحوش ذبت البأيدها على الطباخ ودارت علينه
-هلاا زين من لفيتي ولا چنه عيالج.
-شلونج عمه.
باوستها وهيه حجيها يدك بالعظم، وخرت اعاينلها گالها سلطان
-ريـــمه ما گعدت؟
ميلاد:: لا بعدها نايمه.
-شني السااالفه؟ امشي رغد شوفيها.
بعدني ماصاعده وطب ســليم يحجي
-شني خاب صوتك.
عفتهم يحجون وصعدت فوك صارت بوجهي هاجر بأيدها سطل ووصلة مسح نفسها مگطوع
-ها هجوره شلونج؟
حركت راسها تأشر
-ريـــمه وين؟
أشرت على الغرفة وآخذت السطل نزلت جوه، فتحت باب الغرفة وطبيت اعاينلها متغطيه ببطانيتين خدودها حمر وخرت الغطا منها ومديت ايدي اتلمس وجها مصخنه
-ريـــمه..ريـــمه.
فتحت عينها بالگوه عاينتلي وردت غمضت
-ياا ولج ريـــمه.
-همم.
-اكعدي شبيج؟ مصخنه وخانگه روحج خنگ بالغطا هيج هيه؟
جريتها من ايدها كعدتها على حيلها تنود كاضتها من ايدها واحس بروحي لمحت زراك جوه الردن شلت ردنها وأعاين الايدها كلها طگج زرگ جرتها من ايدي نزلت الردن عليها سندت ظهرها على الحايط وتمسح بوجها مدنگه وانه اعاينلها بشگ
-هذا طــروادة هيج طاگج؟
بلعت ريگها مدنگه وتهز راسها لا حيرتني تلفتت للباب ورديت اعاينلها وهيه تلم بالبطانيه عليها وتنزّل بالردن على اديها
-ريـــمه فهميني ياهو طاگج امج كالت السلطان طــروادة طاكها ومتسودن متانيه يرد من الكليه حتى يتعارك وياه.
عاينتلي عيونها متروسه دموع وصوتها مخنوگ من الغصه
ريـــمه:: لا ما طاگني والله وين سلطان صيحيله خل احاجيه.
-عوفي سلطان هسه حاجيني انه شبيج ياهو وياج ريـــمه؟
صفنت بوجهي شفايفها يرجفن وعيونها اذا ترمش يطيح دمعهن تقاوم فاتحه عينها حيل بس حتى ما يجرن على خدها مديت ايدي على أيدها
-ريـــمه.
شهگت تبجي مغطيه حلگها بأيدها جريتها الصدري بخوف شابگتها وامسح على ظهرها
-ريـــمه شبيج يابعد روحـــي ياهو وياج؟
بچت بحرگه ووجع تبچي وكاتمه صوتها بأيدها وخرتها من صدري امسح عيونها وهي تناشغ مفرفحة روحها
-بس كليلي ياهو وياج ريـــمه.
-امييي.
ترجف وتخنگ بصوتها گـــلبي يدك بخوف
-عليمن طگتج؟ وليش اجيتي حاجيني عدل ريـــمه فهميني.
-ما اگدر رغد ما اگدر اضل يم بيت عمي شامل هم خير وانه شر هم ابيض وانه اسود هم نور وانه ظلام، ما اگدر اعيش بينهم واعاين لوجهم وانه شايله كل هالذنوب رغد تيتموا والسبب انه كل ذرة عذاب عاشوها انه سببها والله أنه سببها.
حجيها يدك بگلبي وخنگتها مردت روحـــي أعاين لوجها ساكته تبجي بحرگه
-مو حچي هذا ريـــمه شعليج انتِ؟ الرجال يحبج واخواته يموتن عليج بعد على شنو ما تعيشين وياهم؟ تردين يم امج كل ماحلالها تطگچ؟
مسحت عيونها تهز راسها لا
-گومي گومي ردي وبلا هالحچي ريـــمه.
-لا.
-تسودنتي؟ چا گولي للولد على امج كليلهم تطگني.
فتحت عينها حيل تعاينلي بخوف
ريـــمه:: لا ديربالج تحجين الولد ما يسكتون لو عرفوا يتعاركون وياهم وخاف تسويلهم شي.
-شتسوي خل تسوي.
-لاا والله تسحرهم تمرض اخواني اسكتي فـــدوه اسكتي.
وبساع مسحت عيونها من سمعت صوت الولد صعدوا كعدت عدل مغطيه اديها دگوا الباب وفتحوا اثنينهم طبوا للغرفة يعاينولها مستغربين سلطان گالها
-شصاير؟ عليمن متعاركين.
ســليم:: شني طاااگج؟
حجت بحرگه
ريـــمه:: لااا، والله العظيم لااا
ســليم نتر بوجها
-صوووتج.
وسلطان يعاينلها مستغرب
ســليم:: شبيه وياااج غير نفهم؟
ريـــمه:: مابيه شي ومحد منهم محاچيني انه وحدي اجيت ما اريد اضل غاد.
دار وجهه ســليم بعصبيه يصيح
-هااي شتحجي وياها هسه؟ شني مسودنه ووحدج غير اكو سبب احجي سولفي كليلنه هاي وهاي السالفة.
ريـــمه:: والله ماكو شي محد محاچيني، بس انه احس روحـــي غريبة يمهم وما مرتاحه.
دار عليها بعصبية جراه سلطان يسكته وگالها
سلطان:: امي گالت كهلان طاگج؟
-لا وروح عمي شامل ما ماد ايده علي ولا محاچيني امي فاهمه غلط.
سلطان:: خوش ميخالف ارتاحي هاليومين وراها تردين ألبيت رجلج.
دنگت ساكته روحها رايحه من الصخونه وسليم يعاين عليها بخزر ومن ضلت ساكته مسح وجهه يحاجيها بهدوء
ســليم:: زحمه ريـــمه الصبح اجت عليج ام شمس ومارديتي وگبل شويه هم اجت وامج ضلت تتمنطق براسها، هسه لو بيهم صوچ نگول حقج بس انتِ بلسانج تگولين ما مسويلي شي بعد هالحچي شلج بيه ما مرتاحه وغريبة ، هوه غير نص اعمارنا كضيناها يمهم منين بعد صرتي غريبة؟
ولا نطقت حرف مدنگه ساكته الولد طلعوا وانه ضليت شويه يمها غمضت عيونها وغطت راسها ما تريد احد عفتها على راحتها ونزلت جوه احس عيون ميلاد تعاين بشماته ما ارتاحيت مشيت البيت آهلي وهمّ لگيتها هوسه
امي توها بدت تحرك رجلها ومن واحد يساعدها توكف عليها، جــويريه وندى يوميه يسولها تمارين، وسعاد تصيح وتتعارك
سعاد:: كلشي مابيها تمشي وتگدر بس مفتكه من الشغل مسويه روحها مگرمه، ومخليه الغرض كله علينه
ندى:: يا يمه فـــدوه على اساس انتِ النهار كله تفترين بالبيت ومخليته يلمع ما تسكتيين؟
تسودنت من حاجتها ندى وصارت وي طبت ابوي للبيت غلط عليها يسب بيها وبرضا
وليد:: النوب لو حطيتي روحج بالنص اطردج انتِ وهالنغل ابنج.
طبت ندى للمطبخ ساكته ماترد على ابوي وسعاد تتمسكن، گـــلبي صار هلگده من القهر حاجيت ندى ورديت البيتي للعصر گال سلطان
-اريدن اروح اعتذر من عفراء عبالي كهلان طاك ريـــمه ومن اجت تردها خشنت خاطرها بحچايه.
اعاينله ساكته اريد احجي واكله امك التطكها واخاف لا صدك تسحرهم، سكتت محتاره وهو طلع يعتذر من عفراء ويروح الاهله يشوف ريـــمه.
رنـــه :: منذر خابر عفراء يريد يجي ياخذها وهيه محتاره بين طــروادة وبين ريـــمه ماتدري شتسوي شاكر اجه البيتنا گالها گلي الاخوج، خل يفرغ روحه على يوم ويجي يطلك ريـــمه " سدت الباب بوجهه ساكته، من اجه سلطان اعتذر منها ردتها بس تحاچيه مارضت كالت يروح يتعارك وي ابوه.
للغروب جده تفتر بحوشنه وحسين وزهره يفترون وياها مكيفين وطب طــروادة للبيت بعصبية عاين العفراء وگالها
-امشيي نجيب ريـــمه .
-شكو؟
ما اهتم طب للبيت وانه وياها نفتر وراه جر عبايتها حطها على راسها المح بأيده ورقه صغيرة هوه يفور مستعجل بس يريد يروح وهيه تحاجيه تريد تفهم جرت الورقة من أيده اول ماعاينتلها عرفته خط هاجر كاتبتله
"تعال اخذ ريـــمه هيه مو زينه"
ذب الورقة وجر عفراء حيل طلعت وياه ركضت وراهم لباب الحوش بخوف ســليم وشاكر ومرتضى توهم يطلعون من البيت صاروا بوجهم ســليم رحب بيهم وطرواده بساع گاله
-صيحلي مرتي.
شاكر :: مالك مره يمنه البت ما تريدك واليوم گبل باجر تطلك.
ســليم:: ياااابه
صيح بوجهه ابوه يريده يسكت وابوه طكه بظهر ايده على حلكه ودفعه حيل وهوه ما مهتم، كاضه گـــلبي بأيده من صارت هوسه مرتضى مدري شغلط على طــروادة وجراه واحد يطك الثاني واعاين العبود وسجاد اجوهم يركضون وصوت طــروادة من بين كل اصواتهم يصيح
-والله ما اطلك مررتي اريدنها واخذها غصباً على اكبر شارب.
وشاكر متسودن يغلط ويسب ويحلف ريـــمه ما ترد وعفراء تريد تطب للبيت اعاينلها ميلاد من باب الحوش تدفعها، مطاحن صارت وانه روحـــي رايحه على اخواني جده طلعت تعاينلهم سدت علي الباب مديت ايدي أوخرها
-شويه جده خل اشوفن.
وخرت على صفحة تغلط على الكل، دفعهم طــروادة جر روحه من بينهم ودفع باب الحوش حيل وميلاد تصرخ، طب للبيت وسليم ركض وراه ومرتضى يريد يجيب سلاحه وسجاد كاضه يتعارك وياه هوه وعبود طك سجاد يغلط ويسب لمن اجوا سلطان وصيهد ووي جيتهم طلع ســليم يركض للسيارة ووراه طلع طــروادة شهگت ايدي على گـــلبي وانه اشوفن ريـــمه بأيده اديها مشمرات مناه ومناه والدم يجري منهن على اصابعها ويقطرن على الگاع احس وشة صارت باذني صوت صياحهم وصوت صريخ ميلاد وصوت عفراء مالحگت تصعد وياهن للسيارة بس صعد طــروادة ســليم فرها بسااع يمشي طاير، وسلطان كض مرتضى بحرگت گلب يطگه حييل.
اجت عفراء لبيتنا تركض وتبجي جرت عباية لريمه وفلوس وطلعت تركض وي سلطان راحت كعدت على حيلي بنص الحوش متسودنه ابجي بصريخ على هاي شوفتها ووجها الاصفر كلت هاي هيه ماتت.
طب عبود يركض وجده تصيح علي لطمت على رجليَّ الا ريـــمه اموتن
عبود:: اششش اش لا تتخربطين رنـــه كومي يابعد روحـــي
-يمممه ريـــمه يمه
جراني الصدره روحـــي مفرفحه أيدي يرجفن كام من عدي لباب الحوش صاح على سجاد
-اوووكف اوووكف خل نجي ويااك.
جرني من ايدي كومني دربي ما اشوفنه حط العبايه على راسي ودار الزهره يوصيها هي وحسين على شمس وجده من يمها گالت
-ارگدوا المن رايحين وراهم؟
ما اهتم جرني من أيدي طلعنه وهـــب يددك هورن وسجاد بصفة صعدت بالسيارة حلكي ناشف وعيوني على قطرات الدم البالگاع توهم فروا السيارة وطلعت هاجر تبجي بباب الحوش صاح عليها سجاد واجت تركض صعدت يمي مدري اصبرها مدري تصبرني
طبينه للمستشفى الولد لگيناهم بالباب سلطان وطرواده عاينتله ابجي وصوتي رايح وكف بس شافني واجه بساع عدل العبايه على راسي صوته رايح
-اشش رنـــه لا تخافين هسه هسه تصير زينه.
طبينه جوه يم عفراء انه وهاجر وهيه حايره بيني وبينها ما تدري تسكت ياهي من عدنا، اعاين لسليم يروح ويجي وما ارتاح لمن سواله عرگه بچيت من شفت خوفه ورجفته على ريـــمه طلعوه من المستشفى وحتى احنا طلعنه بره يم الولد ضلت بس عفراء جوه كعدنا بالحديقة لامه ادين هاجر بين ايديي طــروادة كاعد بصفنه مدنك وبس اجه مــيثم گاله خابر مرتك خلها تروح يم أهلنه وحدهم ضالين.
ساعتين عدن ماندري بيهن شنو وضعها، وراها بنص ساعة اجت عفراء وبأيدها ورقة اطتها السلطان طلع يجيب علاج وانه وهاجر طبينه وياها نمشي وراها رجلينه تخط طبينه للغرفة ممدوده على السديه اديها مضمدات والمغذي معلگ، هاجر كعدت كبالها تبجي بحرگه كومتها عفراء مسحت عيونها وباستها كوه تحاجيها
-هسه تگعد كلشي مابيها لا تخافين.
عافتنا عفراء يمها وطلعت للولد مديت ايدي على وجها مسحته دموعي تجري ليش هيج تسوين بروحج شحصلتي هسه غير الوجع وأثار الخياط
-ريـــمه عمــري.
حاجيتها ابجي بس ردت تفتح عيّنها وماكو.
شويه واجت عفراء وياها سلطان وطرواده، طب سلطان متحسر دنك باسها براسها صوت حسرته يكسر الگلب وطرواده يعاينلها من الباب احس كل ملامحه تصيح تعبان زفر نفس ودار وجهه يمسحه ورد عاين علينه اجت الدكتورة وحجت من شافتنا هواي يمها سلطان طلع وعفراء كالتلها
-شويه ونطلع والله.
-حبيبتي والله مايصير خلوها ترتاح ساعتين تلاثة وتاخذونها.
هزت راسها عــفراء خوش وهيه حطتلها ابرة بالمغذي وحاجتها
-ريـــمه، ريم الحلوه يله اكعدي.
فتحت عيونها على كيف وردت غمضت، طلعت الدكتورة من يمنه.
وطرواده اجه يمها حط ايده على حافة السديه سند روحه وايده الثانية مدها على وجها ضم شعره جوه الشال وتلمس خدها اخوي صوته رايح يريد يحاجيها ما يگدر گوه همس
-ريـــمه...عيوني.
دنك باسها براسها متحسر وعفراء حطّت ايدها على ظهره تصبره وهوه يعاين بوجهه ريـــمه وگوه يحجي
طــروادة:: تردين تموتيني انتِ ؟
فتحت عيونها عاينت بوجهه ودموعها جرن على خدها
-عاجبج يوميه تموتيني؟ تتفننين بشلعان گـــلبي انتِ.
يحاجيها وهيه بس تبجي دار وجهه منها اعصاب ماضلينه يمها طلعنه انه وهاجر وي عبود وسجاد ردينه للقرية لكيت مــاسه وماريا ببيتنا، معشياتهم ومنومات زهره وشمس وبس طمنتهن على ريـــمه راحن. گالت جده
-همّ تتعاير ريـــمه كل يوم مگطعه اديها.
عاينتلها ضايجة مديت فراشها بغرفة اهلي
-تعاي جده نامي مو زين عليج السهر.
گامت لفراشها تدردم على بيت شاكر، بس تمددت طلعت من الغرفة وسديت الباب عليها خلي تنام گبل لا يردون وتذبلها حچايه تخلي الوجوه تتراكع.
طلعت يم حسين بالحوش منصي الصوت وخاتل بالزاوية يلعب بتلفوني مديت راسي اعاين وياه وبس لكيتها لعبه جريته منه
-انه مو گايلتلك لا تنزل اللعاب تنترس الذاكره؟
حسين:: وين اروحن ضايج ترى شنّي السآلفة منيتي عليَّ بتلفونج.
گام زعلان جريته انطيته اله
-يله هاك
كعد بصفي حطيت ايدي على خدي واعاين للباب متانيه يردون اجه عبود يمنه اخذ التلفون من حسين يلعب. سطروني سطر، عصفور بمصياده وكل شوي يشمرونه يفلشون بيه وعلوا الصوت سكتت سكتت لمن طكت روحـــي جريت التلفون منهم
-وخروا عنيي.
حسين:: اجنها السوادين مال بيت شعلان.
عبود:: اي وعلي.
درت وجهي منهم وهمه گاموا يضحكون طلعوا بره الحوش جريت التلفون من حضني بعده ينوص. لگيت العصفور ضال بالمصيادة شمرته وطلعت من اللعبة طفيتها وفتحت النت بساع وصلني رسايل من مــاسه كاتبه
-من تجي ريـــمه كليلي.
اكلج رنـــه بريا گالي سلميلي على رنـــه گتله لا ما اگللها وما اتدخل بينكم بعد
وكتله يكف عنج
زفرت نفس متحسره كتبتلها
-شلونه ليمت ينزل؟
-زينّ أضن وره الزيارة ينزل .
سكتت مارديت عليها ل١٢ يله اجوا جابوا ريـــمه عفراء ساندتها وامها وابوها طلعوا من بيتهم يردونها تروح يمهم والولد سووا فلك سكتوهم جابوها البيتنا طببتها عفراء للغرفة عدلت المخاد وره ظهرها
عــفراء:: تنامين لو تضلين كاعده بين ما اسويلج عشا.
تحجي وياها بزعل ماتعاين لوجها وريمه صوتها مبحوح گالتلها
ريـــمه :: لا تزعلين مني.
دارت وجها عفراء ما تحاجيها مدت أيدها تريد تكضها وصاحت موجوعه ردت عليها عفراء بساع خايفه كضت ايدها
عــفراء:: شبيج؟؟
-لا تزعلين والله تعبت كارهه روحي بس اريدن اموت وارتاح، عفراء حتى انتِ ما تدرين انه شمسويه بعد.
عاينه عليها بخوف عفراء عاگده حاجبها مافاهمه وريمه
شفايفها يرجفن، دنگت عيونها دموعها يطيحن بحضنها وحجت بصوت مخنوك
ريـــمه:: لو أحجي افعالي الباجر ما اكضي عــفراء وجهي يمكم اسود، حتى اوراق الگيعان مال ابوج وره وفاته انه الماخذتهن الاهلي.
حجتها وغصت بالبجي وانه وعفراء اثنينا مصدومات سكتت عفراء جرتها باستها بين عيونها
عــفراء:: كلشي صار گبل مالنه غرض بيه ورب العالمين خلاج انتِ تردين اوراق الگيعان مثل ما اخذتيهن، بعد عليمن حارگه گلبج ريـــمه قابل الصار انتِ. متقصدته قابل بأيدج ؟
تحاجيها وهيه مدنگه وبس تبجي مسحت دموعها گالتلها رايحه اسويلج عشا، طلعت عفراء وريمه عاينتلي شلت ايدي اهدد
-لا تحجين وياي زعلانه
-حتى انتِ رنـــه؟
-اي كلنه مانحاچيچ مو كنالج احنا اهلج بعد ليش تصيرين أم خنيس وتلعبين بكيفج؟
ابتسمت تمسح بدموعها نزلت من الچرباية لمن دخل طــروادة گالي
-ضلي.
-لا نعست رايحه انامن.
عفتهم وطلعت يم عفراء بالمطبخ.
ريـــمه :: دنگت عيوني الحچي احسه متكدس ببلعومي كعد بصفي ومد ايده يرفع وجهي. عاينت بوجهه صافن بعيوني بلع ريگه كوه يحاجيني
-باجر عدج مراجعه؟
-لشنو؟
-حجزتلج عد دكتور نفسي
عاينت بوجهه ساكته گـــلبي يدك حيل هزيت راسي لا
-مابيه شي
-اشش حرف ما اسمع.
حط ايده على حلگه خازرني گام من يمي اخذ هدومه من الكنتور وطلع، تمنيت عندي القوة واگدر احجيله كلشي بس خايفه من نظرته الي خايفه من فكرة يكرهني، ردت اجت عفراء يمي. توكلني وتحجي وياي وانه الخنگه تذبحني
-عفراء احجي الكهلان.
دارت وجها عاينت للباب وردت عاينتلي
-اشش لا مالها داعي شي راح ومشه ليش نسوي مشاكل عليمن؟ شني النستفاده من نحجي؟
-احس روحـــي خادعته
-انچبي وكافي مسلته ترى شلعتي گـــلبي مالج غرض انتِ بس اسكتي واسمعي حچاية رجلج احنا بخير.
دنگت ساكته تريد تهونها على گـــلبي بس هي مو هينه
حايره بيه ومهتمه بكلشي، وگبل لا تروح تنام ردت تنشدني اذا محتاجة شي
-لا والله، تعبتج عفراء .
-يا بعد روحـــي تعبج راحة.
طلعت وسدت الباب وراها وهو شويه يله اجه عاينلي يسأل من وره خشمة
-شربتي علاجج؟
-اي.
هز راسه خوش، طفه الضوه وتمدد بمچانه منطيني ظهره
غمضت عيني افكر برده اذا يعرف مناه لمن غفيت ثاني يوم جده طبت يمي حجت الحد ما ملت وانه مدنكه ساكته.
العصر اخذني للدكتور ومن اخواني سألوه شبيها ريـــمه گالهم هيج طالعين سكتوا ماخله احد يعرف لان يدري ناسنه وبالاخص سلفنه حاسبين اليروح دكتور نفسي مخبل.
ياخذني ويرجعني ويدير باله علي من بعيد لبعيد مايحاجيني بالليل اجوا اهلي طلعت گوه على روحـــي اسمع حچيهم الكله چذب واسكت، اسكت بس من خوفي على هاجر اجاريهم واسوي روحـــي ما كارهتهم حتى لا يعيشون هاجر نفس العشته، جرني ابوي الصدره يبوس راسي ويحجي همس
-ترحين ويانه بويه؟
مدنگه اهز راسي لا
-اطلگج من هذا الچلب؟
-لا.
سكت يمسح على زندي بأيده كاعدين بالدوانيه اخواني وامي وهاجر وكهلان گبالي يحجي وي سلطان وكل شوي يعاينلي ملت براسي تعبانه ما اگدر اسمع حجيهم اكثر من هيج ، تدنت يمي امي عاينت لعيونها ودنگت جرتني عليها تشاورني
-وين جاي ياخذج هذا؟
قربت حلكي اشاورها
-اخذني للسوگ لان مريضه.
هزت راسها خوش وردت تشاورني
-النوب لو رحتي وياه خل يشريلج ذهب ابن الفگور
هزيت راسي اي ردت گالت
-عفراء ليمت تولّي الاهلها؟
تدنيت الاذنها اشاورها
-ما ادري چلبت يمنه.
ردت راسها ليوره وابتسمت بأنتصار دنگت گـــلبي يدك حيل واحجي وي روحـــي اي أي اقتنعي اقتنعي بعدني ريـــمه الغشيمه التشرب السم من إيدج.
من شلت راسي صارت عيني بعين كهلان خازرني درت وجهي من عده السلطان نظراتي تتوسل ياخذهم ويروح طفه الجكاره وهو يگول
-يله يابه خل نروح ريـــمه تعبانه مو مال تضل كاعده هلگد.
گاموا كلهم وابوي يعاين الكهلان مضيك عيونه ويحجي من وره خشمه
شاكر:: امي وين؟
طــروادة:: ببيت ابنها.
شاكر:: عود هم اذبحها.
ووي حچايته صاحوا ســليم وسلطان
-يااابه.
وكهلان يعاينله مبتسم باستهزاء والولد اخذوا ابوي وطلعوا جريت هاجر ابوسنها واشاورها
-ديربالج على روحج
وهيه تأشرلي بأيدها لا تخافين انه قويه هزيت راسي اي بست اديها اثننينهن مشت بصف امي سجاد وعبود بعدهم كاعدين وهيه تحاجي سجاد
ميلاد:: ما تجي؟
سجاد:: لا.
ميلاد :: ما متعشي انتَ تعال اسويلك عشه ونام للصبح رد الصخومي.
شال عيّنه خازرها وعبود ضحك باس سجاد براسه
عبود:: روح آمك مشتاقتلك.
ميلاد:: بعد ما سودنته علينه تگله روح.
كام سجاد يستغفر حط تلفونه بجيبه وطلع گدامها وهيه وهاجر مشن وراه، طلعت من الدوانيه للهول جده كاعده وعفراء بصفها تلعب وي شمس كعدت يمهن شويه وگمت لفراشي.
عــفراء ثاني يوم راحت وهيه توصي على جده كون مانحاجيها ونضوجها وشتحجي نسكت عنها،وتوصي رنـــه علي وتحلفني ما اعوفنهم واروحن الاهلي كتلها خوش، وطول هالايام هو مايحاجيني ولا انه الحاولت أصلح الامور احس شما اقترب اهدم اكثر ضليت بعيده وساكته. ايديي فتحوا خياطهن وجلسات الدكتور نروحلهن سكته ومحد يدري بسّ سليم شك لان نروح بسيارته، الدكتور مره كتبلي علاج وكهلان مارضى وطب هوه حاجاه مايريد أي علاجات
ما چنت مقتنعه ومن اجي بس لان كهلان يريد بس بمرور الايام حسيت نفسيتي بدت تتحسن أتقبل الموضوع واقنع نفسي بيه.
طلعت من الدكتور كهلان متانيني حاط ايده ع تچوه الكرسي وغافي العيادة هدوء بيها بس شخصين وساكتين وكفت گدامه كعدته فز يفرك بعيونه
-يله نروح؟
وكف على حيله ومد ايده على ظهري يمشيني وياه اول مانزلنا من الدرج صار بوجهنا ســليم لاحگنا بسيارة وهـــب
ســليم:: تف عليك عبالي بيها شي خطر وجاي تراجع بيها بدون ما تگول موتتني.
طــروادة:: واحد طالع وي مرته ياهي مالتك وتلحگه؟
ضحك متفشل گاله
ســليم:: لحگت سيارتي مالحكتك.
ابتسمتله كهلان وردينه للبيت بس نزلني وراح لگيت جده شاده راسها من عركة حسين ورنه هوه يصيح ام الگمل وهيه تصيح حسنه حسونيه أختنا الرابعه، وتخليه يدك روحه ويصرخ بكل صوته
ركض للحوش واجه بيده طابوگه
حسين:: بالحسين انگدج اخلي دمج بطولج.
وهيه لابده وره ظهري وتصيح عليه
رنـــه:: فنكك الطكيتني كونك زلمه طكني وشوف لو ماخليت عبود يكصص اديك.
وهوه شايل ايده وعاض السانه يروح مناه ويجي مناه يريد يلوحها وجده حاطه ايدها على راسها صاحت
-الله أكبررر موتوووني نعلعله ابو طويهركم چلاب تانوني.
وحطت اديها بالگاع كامت على حيلها كاضه بأيدها واير الشاحنه شرد حسين للحوش ورنه طفرت للغرفة تضحك وتصيح
-على كيفج مرت المرحوم.
ضحكت وهيه ردت كعدت تغلط مخنزره كعدت يمها زهره تعصر رجليها مبتسمه من جوه ليجوه
،،
مــاسه::حيل افرح من اشوفن مــيثم متقبل اخته بس هيه تقهرني تختنك تريد تطلع تريد تمشي صدمتني من گالت
ماريا:: عادي اطلع شوي اليوم؟
-وين؟
-مابعرف هيك بدي اتمشى لحالي شوي حاسه بخنقة.
-بس ماريا احنا عدنا البنيه مايصير تطلع وحدها لازم وياها واحد من اخوانها، انتِ وين تردين ترحين گليلي وانه احجي الميثم حتى ياخذج.
صفنت بوجهي ضايجة هزت راسها لا
ماريا::خلاص انسي ماعاد بدي.
سكتت محتاره گمت بطنيّ توجعني شغلت البلي وصحتلها لعبنه شوية كلساع اخسرها النوب غلبتني طب مــيثم عاين علينه ابتسم عفت اليده بساع وگمت گتله
-تعال اغلبها.
عاينلي تعبان خزرته أأشر بحواجي لا تگول لا ابتسم وكف گدامي جر راسي عليه مثل كل مره من يطب للبيت يبوسني بين عيوني ويمد ايده يتلمس بطني مبتسم، مشه كعد يمها وهي مدنكه ساكته گالها
-إذا غلبتيني اقطفلك ورده من الجنينة
ضحكت وهو يحجي مثلها ابتسمتله بخجل تلعب وياه طبيت للمطبخ سويتلهم عصير ورجعت كعدت يمهم صورتهم بدون ما يدرون واشجع بماريا، وديت الصور البريا وهو وين يله يفتح نت مرات كل اسبوع نوبات كل اسبوعين.
غلبته ماريا صفگتلها وهوه گام طلع للحديقة جابلها ورده واجه اخذتها منّه مبتسمه وكل شوي تشمها والضحكة شاگه حلگها رغم الورد يمها واكثر يومها تكضيه بالحديقة بس من هو جابها الها عبالك من ذهب گد ما فرحانه بيها حطتها بكلاص بيه ماي وعافتها يمها بغرفة بريا.
كمت طبيت يم مــيثم للغرفة حسيت بيه شي واكف يطلعله هدوم وعاينلي يحجي
-تدرين شاكر شمسوي؟
-شمسوي؟
-طارد الوادم اليخدمون بالحسينية مالتنه الخايس ورادين عليه كايليه تعلمنه عليها وصار سنين احنا بيها، مأجرلها الهم الخايس
وصــيهد تعارك وياه گلب الدنيا عليه
-ياااا
-والله العظيم وعلى هالفشله بعد هالسنة حتى مانروح نخدم بيها.
يحجي وميت من آلقهر بدل وراح وي الولد خابرت رنـــه احجي وياها على شاكر وهي تكضيها ااي لا ااي علمود ريـــمه لا تسمع وتنقهر گمنه نخاف عليها ما نحجي على آهلها گدامها گالت رنـــه
-اكلج ترى ابوج هم مچلوب نفس هذا.
-انچبي ولج ررنه.
-وعلي كلهم مچاليب.
-طاحظج.
-اكلج مــاسه ليمت تجيبين تعبـــت .
-عليمن تعبتي ياهي مالتج انه شايلته لو انتِ؟
-غير من اشوفن بطنج من يمي بطني توجعني، اكلج اكلج عود ليش ما ترضين تگولين بيج ولد لو بنيه
-حتى محد يحجي لميثم اريد اشوفن ردة فعله من اجيب
-يعني بيج بنيه؟
-لا
-يعني ولد؟
-لا.
-جا شني حامل بچلب دوختينه ما تحجين؟
-ههههه وجعه كون بس عليج العباس لا تحجين ما اريد مــيثم يدري مناه لمن اجيب، بيه بنيه.
-سميها شمهوده.
-وجعه يا رنـــه شمالج من هسه كارهه بتي؟
-لا والله متانيه تجي اشبعها كتل.
ضحكت وياها شويه وگالت مستحيه وتهمس همس
-مــاسه هم مخابره بريا.
-اول امس
-شلونه؟
-زين
سكتت وانه ماردت احجي زايد ماردت اتدخل بينهم اكثر من هيج سديت التلفون منها، درست امتحاني وثاني يوم من رحنا للمدرسة تونه وصلنه مدرسة بــدور ولمحنه سيارة ســليم طابگه على صفحة تسودنت ترعد ضلت
بــدور:: هذا بعده؟ والله الا احاجيه.
-لااا بــدور.
مالحگت بيهه لبست جنطتها ونزلت من سيارة الخط رايحه السيارة ســليم مشيت وراها بساع ايدي على بطني فتحت باب سيارته الوره تريد تبچي وهو ذب النظارات ودار عينه علينه شالت ايدها تأشر وتحجي بحرگه
بــدور:: ليش بعدك لاحگني؟؟
شايل حاجبه ومضيگ عينه ماعاجبه شي جريتها من ايدها اريد اسكتها السايق مالتنه دگ هورن مل عافني وراح.
ســليم:: اشش صوتج امشي المدرستج
بــدور:: مالك غرض بيه لا تضل واكفلي بباب المدرسة!!
حجتها بحرگه وتمسح بعيونها سكت داير وجهه منها يدك باصابعه على الستيرن ردت گالتله بصوت مخنوگ
بــدور:: غلطت وتعلمت من غلطتي والله العظيم ما اعيدنها.
هز راسه خوش
ســليم:: هاي هيه خويه انا شرايد منج؟ غير عرضي واخافن عليجن
مسحت عيونها تحجي بهدوء
بــدور:: خويه والله ما اعيدها حلفت الوهب ما اعيدنها بس لا تضل مراقبني .
-هاي هيه عفيه حطي صــيهد بين عيــونج وحطينه كلنه گدامج الحچايه التطلع عليج تخلي روسنا بالگاع خوش؟
مسحت عيونها تهز راسها خوش گال
-اصعدي مــاسه خويه خل اوصلج لمدرستج.
صعدت بالسيارة كاضني مغص من الهبطه وبدور گبل لا اسد الباب گالتله
-مشكور خويه.
-هلاا.
سدت الباب ومشه ساكته خانسه وصلني الباب المدرسة گال
ســليم:: آعذريني ما قصدي اتدخل بيجن ولو ادري بوهب سامع بالسالفة جا ما اجيت.
-لا خويه ماصار شي هاي هيه مشكور
نزلت وسديت باب السيارة اسب ببدور وبس امتحنت طلعت ميته من الوجع خابرت من الادارة على مــيثم لان ما مداوم اليوم اجه اخذني وجهه اصفر ويسأل بخوف
-عدج ولاده؟
-لا لا مدري شعدي؟
وصلني لبيت اهلي اريد اصرخ تلكني البنات كلها عبالها عدي ولاده من الوجع تمددت يم امي بالساعة انه الوب من الوجع لمن شوي خف يله رحت البيتي لگيته هوه وماريا حاطين الجنطة على القنفة محضرينها
وضل مــيثم طول اليوم يمي وحتى ثاني يوم صادف جمعة ماطلع لا مناه ولا مناه مگابلني وكاعد وانه افتر بالبيت ايديي على ظهري للغروب بعد ما گدرت روحـــي فرفحت من الوجع ماريا شردت وهوه يصيح بحيره شسووي خلوني الطم من الحرگه.
لمن اجتني رغد راحت ويانه للمستشفى ثاني اصعب ليلة مرت علي من بعد ليلة زواجي، بچيت بس سمعت صوتها تبچي روحـــي رايحه ومن حطوها بحضني احس نسيت كل ذرة وجع وتعب بيها.
وامي كلساع تخابر على رغد تبجي شلون مريضة وما تگدر تجي وياي حاجيته صوتي رايح
-يمه.
-ها يمه مــاسه يابعد حيلي شلونج؟
-زينه يابعد روحـــي.. هسه شويه ونجي.
رغد اخذت التلفون تحاجيها غمضت عيوني تعبانه حييل، طلعونه من المستشفى الساعة بالوحده الدنيا توها تمطر لگيت مــيثم متانينا بالباب صعدنه بالسيارة رغد ملفلفه البنيه وحاطتها جوه العبايه بس حرك السيارة مــيثم گال
مــيثم:: هذا صــيهد؟
التفتت رغد ليوره تعاين للسيارة الورانه، وميثم جر تلفونه خابره گاله
-جا وين جنت.. يله يله الحمدلله والشكر .
سد التلفون يحجي
مــيثم:: ضال بالركن طبعاً مستحي يجي الخايس.
192
ضحكت رغد وانه غمضت عيني تعبانه بس اريد اوصل للبيت واتمدد، صف السيارة بالباب رغد رادت تخلي الطفله بأيده ما رضى يخاف گالها
-انتِ اخذيها وانه انزل مرتي
نزلت رغد تمشي بساع من المطر طبت للبيت وميثم مدلي ايده يساعدني انزل
-الحمدلله على سلامتج سمسم.
-يا سمسم يا دنيا صرت عدس
باسني بكصتي ونزلني من السيارة ساندني گوه امشي، لگيتهن حاطات فراش بالهول تمددت موجوعه وأسمع ماريا تحاجي الطفلة
ماريا:: مامي يا عمــري قديش حلوه.
مكيفه بيها مگابله السله مالتها تروح مناه وتجي مناه والطفله حتى عيونها ما فاتحتهن بعدها، رغد ضلت يمي كضيتها عليها بجي للصبح گالت رايحه البيتي بس اشوفن رجلي واسبح واجي، وره ماطلعت بشويه اجوا أخواني ونسوانهم وامي، وهـــب اول ماطب صاح
وهـــب:: عمي احنا خطابه.
مــيثم:: والله ما انطي امشييي
صــيهد:: خايس جا ما طردناك احنا من اجيتنا؟
ضحك مــيثم ردت اوكف على حيلي صيحوا ما راضين ساعدوا امي ونزلوها كعدوها بالگاع يمي شبگتني حييل تبوسني واخواني دنگوا يسلمون عليَّ جــويريه كعدت بصف امي تعاين لوجهه الطفله وتحجي بحماس تريد تاكلها
جــويريه:: يمممه يمممه فـــدوه فـــدوه صــيهد باوووع.
كح صــيهد ووهب يمسح على شاربه يضم ضحكته وهيه ابد ولا يمها اخذتها من. ايد أمي متحمسه ماتدري شتسوي. حركتها بين أديها
-يمممه عمرري تخبل صــيهد باوع فـــدوه عبالك لعابه.
وصيهد يدور بوجهه لبعيد يتحمحم كعدت ندى يم جــويريه كرصتها وخزرت وهـــب حتى يسكت بس شيسكته گالها
وهـــب:: خويه خلفي هيج لعابه حتى اذا همه ما ينطوها الابني اخطب منكم.
صــيهد :: خاب گمممم امشي هاي العايزه انااا ازوج بتي الحفيد شعلان؟
مــيثم غص بالماي وهمه مدري شمالهم يجفصون وهـــب سكت خاف ندئ تتحسس بس هيه فهمت صــيهد ما قصده شي گالتله
ندى:: خويه نخطبها الرضا رضا مو من احفاد شعلان.
صــيهد:: انتِ تگبعين وتاخذين خويه بس وهـــب الچلب لا من يجي اطرده.
ضحكوا وآنه طايره بيهم من الفرح الدنيا ماسايعتني اخذها مــيثم حطها بأيد صــيهد يگله
مــيثم:: اخليها تاخذ خاوه على القريه.
ضحك صــيهد يعاين بوجها مبتسم ووهب تدنى يمه يعاينولها صاح وهـــب
-الله، لج عيونها ملوونه.
-صدك؟
صــيهد:: رصاصيات.
اعاينلهم مبتسمه وراحت ابتسامتي من اتسعن عيون مــيثم يعاين ورانه وبساع طفر التفتت واشوفن ماريا جايبه صينية چاي لابسه تراك بيت وشعرها طالع غطاها بجسمه هي والصينيه وردها للمطبخ، الولد عافوا الطفله بحضن امي باسوني برأسي وطلعوا.
وميثم شويه ولحگهم اجت ماريا يمنه وكضتها امي تسولف وياها وتعلم بيها وهيه بس تهز براسها اي، رغد مسميه بنتي حوراء بس مــيثم يريدها حور گال من اروحن للبيان اعدل الاسم
اهلي ضلوا يمي للظهر يله راحوا ودك تلفوني جاوبته مبتسمه
-ها عم حور.
بريا:: الحمدلله على السلامة خويه.
-الله يسلمك شلونك؟
-جااي انا.
-صدك؟
-اي وعلي ساعتين واوصلكم من البارحة طلعت بس گالي مــيثم.
-ههههه هلا بيك راح ابجي ههههه
-ليش؟
-والله ما آدري راح تجي علمود بنتي.
-اجي اجي وانا الممنون.
مسحت عيوني مكيفه سديت التلفون منه ورغد ابد ماعافتني نص ساعة واجن ريـــمه ورنه جايبهن عبود، حطت حور بحضنها تضحك وتگلها
-من اليوم اسمج شمهوده.
ريـــمه:: محد شمهوده غيرج.
-جده شعجب ما اجت وياجن؟
ريـــمه:: والله ما ادري گنالها مارضت.
هزيت راسي ساكته نسولف ونضحك درت الرنه مرتبكه گتلها
-رنـــه ترى بريا راح يجي خاف طــروادة عباله متفقين تجين بهالوكت .
بهتت تعاين لوجهي دارت الريمه گالتلها يله. لبسن عبيهن وراحن.
وي الغده يله طب بريا وجهه تارسه التعب ومسومر من الشمس اول ما طب للهول عاين لحور وضحك وكفّ گدامنه
-الحمدلله على السلامه
-الحمدلله على سلامتك انتَ، شلونك؟
احجي وياه وهوه عيونها بس عليها والضحكه شاگه حلكه طب وراه مــيثم شايل الجنطه واسمع صوت وهـــب وسليم من بره يصيحون عليه
-تعاال خل نشبگك يا روحنا تعال الخايس .
مــيثم:: بريا اموتنك امشي اسبح يله تكضها.
حرك رگبته يطكطكها طلعت ماريا من الغرفة حجت على كيف
-الحمدلله عسلامتك؟
هز راسه الها عبالك رجع يستغرب منها مشه سبح وبس طلع گعد يمنه ماد رجله يسأل
بريا:: شلون اكضها.
اجته رغد شالتها حطتها بحضنه ضحك
بريا:: يا بعد روحـــي عمي حور .
ضل بالنص ساعة كاضها ويسولف وي مــيثم على التحاقة والتعب، وبس مــيثم طلع دار علي يسأل.
بريا:: رناتي چانت هنا؟
هزيت راسي اي مستغربه
-شدراك؟
-ســليم گالي.
دنك ساكت رجع حور لسلتها عاينت لرجليه متروسات فرگاسات رد عاينلي يحجي
بريا:: اخوالها هم ردوا عليها؟
-لا والله هيه مره وحده وطرواده مارضى.
زفر نفس متحسر وهز راسه خوش خفت
-بريا لا تسوي مثل كل مره وتخرب كلشي
-لا والله لا تخافين.
سكتت بس ما مرتاحة حسيته راح يروح الاخوالها يتعارك وياهم خفت وماگدرت احجي الميثم خاف يگلي منين سمع شحجي عضيت اصبعي ندم وعرفت شكد غلطانه بتصرفي.
رنـــه :: گد ما فرحانه برجعته گد ما گـــلبي معصور اتمنى اشوفنه واحاجيه بس ما اريدن حتى لا ارد اقهر طــرواده صافنه بكتبي وفززني صوت ريـــمه ذبيت الكتاب وطلعت اركض اشوفنها تدفع بجده وتطرد بيها وجده طگتها على وجها صرت بينهن مصدومه بريمه
ريـــمه :: اطلعيييي بررره.
وجده دنگت على الشحاطه متسودنه طب طــروادة بساع يصيح شصاير وريمه ترجف أشرت على جده تصيح
ريـــمه:: جذب جذب محد طاردها عمي وليد مدري ليش موديها هنااه سمعتها والله سمعتها تحجي وياه بالتلفون تگله مليت منهم ومن هوستهم تحجي علينه وتدعي.
وخرت من جده مصدومة وهيه شمرت الشحاطة على ريـــمه طكتها تغلط وتسب وتصيح
-بيوت ولدي وين ما اكعد اكعد بكيفي كله حلالي.
وطرواده يعاينلها بقهر
طــروادة:: كضيتوا عمركم تعضون ايد التنمدلكم .
شالت أيدها بغضب طكته راشدي شهگت مصدومة مسح خده بهدوء گالها
-اطلعي بره، هالمره طلعت طردتج لعبه بس يجي يوم يطردونج صدك ، ساعتها اكص ايدي اذا فتحتلج الباب.
غلطت وسبت بعلو صوتها واكثر الغلط على امي وعلى هوستنا اجوا الولد طلعت من بيتنا ترطن وهمه مافاهمين شي طــروادة گال الصيهد
طــروادة:: لهنا وصلت خل اهلكم يكفون عني لا وروح ابوي من صدك انا الاذبحهم وعود خل انسجن ميخالف.
تسودنوا ومحد منهم عرف غايتها وليش اجت وشتريد، عاينت الريمه بعدها ترجف من الحرگه وتصيح
ريـــمه:: تغلط علينه تغلط وتدعييي، مدارينها وملتمين عليها هاي جزاتنااا؟
كلنه عدينه الموضوع الا طــروادة دك بگلبه حيل انقهر جان مكيف بيها من نكعد على الصينية يحط الاكل گدامها اذا سمج يفلس بأيده ويحطلها واذا دجاج يصيح علينه خلنه سلك الجده لا تگلنه مو زين عليها ومداريها حييل انصدم بيها.
ثاني يوم من رجعنه من المدرسة لمحت سيارة مــيثم تمشي ورانا التفتت عاينتله گـــلبي حسني هوه بالسيارة مو مــيثم وبمجرد لمحت وجهه درت مدنگه وعاضه باطن شفتي حتى ما اضــحك، طبيت للبيت بحماس فرحانه وريمه تگلي
-شعدها اليوم؟
-ناجحه بالامتحان.
ضحكت كاشفتني وره الغده درست بحماس وتمددت بفراشي توني غفيت وكعدت على صوت طــروادة يحجي بحرگه فزيت كاضه گـــلبي بأيدي طبت ريـــمه تاخذ استكاين من البوفيه
-شكو؟
عاينت بوجهي مرتبكه
-شيخ حيدر عدنا.
-اي واذا؟
مشت للمطبخ ساكته گمت وياها طبيت للمطبخ وكفت سانده ظهري على الحايط. واجه طــروادة يحاجيها من باب الهول مايدري بيه انه يم باب المطبخ يحجي بحرگه
طــروادة:: اكص ايدي اذا ماطلع جايني على رنـــه الواحد من ولده شگله هسه شحچي؟ يگلي انا جايك واذا تردني تنتهي وياك. شسووي هسه؟
-شسالفة كله مخطوبه الابن عمها وفضت.
-ماصارت رنـــه هاي زليخه يوميه جايني عليها واحد.
مديت راسي بساع گـــلبي يدك حيل
-والحسين ولا ارضى لو مو شيخ حيدر لو يجيك سيد عباس هم ما ارضى
خزرني بغضب اخذ الچاي وطب للدوانيه وانه اريد اگلبها مناحه الوب وميته من القهر كضيت باب الدوانيه ودموعي تجري مختنگه هسه يگلي زحمه وشيخ حيدر وما گدرت اگله لا والله غير اسوي فلك بالعباس ما ارضى.
ابجي واسمع سوالفهم صــيهد وسلطان وميثم كاعدين وياهم شويه وگالهم شيخ حيدر
-كهلان هاي گدام أخوتك انتَ مرتين تردني هالمره لو رديتني بعد منها وتنتهي.
طــروادة:: گول يا الله يابه تأمر انتَ.
يحجي واعرفه من صوته ميت من القهر والولد هم يگلوله تدلل ضحك گاله
شيخ حيدر:: عدي ولد اسمه بريا، رايد يناسبك على سنة الله ورسوله عقد شيخ والعرس ليمت ما كريمتك كضت دراستها.
فتحت عيني مصدومة اعاين الريمه واسمع الولد بس يكحون گالهم
شيخ حيدر:: هاه نقرأ الفاتحة وباجر نعقد؟
كهلان:: والله ما ادري شگلك بس هسه زياره وهم جدي بعده ماطالع الأربعين.
شيخ حيدر:: اي مابيها شي خلنه هسه نعقد لان الولد ماعده اجازه طويله يريد يلتحق ومناه لفرحة الزهره تسوي خطبه رسميه، كهلان لا تشلع گـــلبي .
-والله جيتك على عيني وراسي بس...
-اهاااه صارت بيها بس گول لا ما ارضى وفضها، من رخصتكم يابه.
واسمعهم چلبوا بيه كلهم ويحجون وياه بس سمعت طــروادة رضى شردت للغرفة كعدت بالزاوية وحطيت كتابي على رجلي گـــلبي احسه يدك بيلعومي واطراف اصابعي احسهن صارن ثلج، ريع ساعة وطب طــروادة للبيت اسمع صوته يصيح
-والحسين الا اكتله اكضه بريا لو ما اكضه.
شمرت الكتاب وتمددت مغطيه راسي ارجف فتح باب الغرفة واسمع ريـــمه تگله
-ياهي مالتها؟؟ هاه نايمه نايمه.
طلع من الغرفه يغلط متحلف ببريا، وانه ضليت لافه روحـــي بالفراش ما مديت حتى راسي مناه لمن اجتني ريـــمه هم خايفه بس كاضتها الضحكه طلعت راسي اسأل
-شصار؟
ريـــمه :: يدور على بريا ماهوه شارد ســليم يگلي وعلي حتى احنا ماندري بيه وين وده شيخ حيدر وطفر.
-اكلج انه راح اموتن من الخوف.
ضحكت تهز بأيدها، ابد ما طلعت من الغرفه وبس اسمع صوت طــروادة الف راسي واسوي روحـــي نايمه
""
وهـــب :: هسه طــروادة متحلف بيه احنا ياهي مالتنا شارد حتى من عدنا ليش؟ نفتر انا وسليم ندور وماكو مشينا للمعامل مالكيناه وطرواده توثيه بأيده ويفتر بس يريد يلكفه
ســليم:: خاف رأح للمرعى .
-خرب هاي فاتتني امشنا.
اخذته ومشينا لكيناه حاطله زوليه ونايم جوه النخلات وكفنه كل واحد من صفحة انا وسليم هزيناه حيل نصيح
-اجااااك طــروادة اجااااك.
كمز وراساً وكف على حيله ضحكنا وهوه يتفل علينه السگط
بريا:: بعده يدور عليَّ؟
ســليم:: اي وعلي بأيده توثيه كعد يحقق ويانه خاف نندلك.
بريا:: المن اجيتوا هسه يندلني.
وهـــب:: بعدنا نحجي وسمعنه صوت السيارة درنه نعاين سيارة صــيهد وطرواده كاعد بصفه مطلع التوثية من الجامه جرينه بريا دفعناه يشرد
-اررركض اررركض ولك ارررركض راح يكضك.
وهوه صعد بسيارة مــيثم وفرها ضلت بس الترابه وراه نزلوا اثلاثتهم حتى مــيثم وياهم بعدنا ماضاحكين عليهم وشفناهم شو هذول هادين علينه جا احنا ياهي مالتنا صاح ســليم
ســليم:: خاب هذول شو جايين يكتلونه.
-اندري چنهم اوووع بويه صــيهد بأيده صونده اشردلنه.
ركضنه السيارة ســليم وهوه يصيح ورانه
صــيهد:: تعاااال اوكف لا تشرد اموتنك اذا شردت.
جا هوه انتَ بكل الاحوال تموتني اشرد احسن، شردنه وهمه الله هداهم مالحكونه مشينا للمدينه للبيت الاشتراه سيد عباس وعاف مفاتيحه يمنه، كعدنه وجبنه اكل لبريا نداريه
ســليم:: والله زحمه تنكتل علمود هاي ام الصخول؟
وهوه ياكل بأثنين اديه طالع من مجاعه وكوه يحجي
بريا:: انتَ وعشيرتك ترحولها فـــدوه .
ســليم:: تزقنب تزقنب جعله حريشي.
وهـــب:: طفينه التلفونات وضلينه الثاني يوم بريا خابر على شيخ حيدر اتفق وياه مشينه جبناله هدوم ناصبين عليه
-تخطب بأسود مسودن صاحي انتَ؟
بريا:: مسودن.
حجاها متحسر سكتنا اثنينا.
رنـــه ::داومت گوه طــروادة بس يخزر بيه ومن رديت للبيت لكيت عفراء جايه علمودي مخابرها هوه متعارك وياها وهيه تضحك تصيح
-بله انه ياهي مالتي موديه على شيخ حيدر
ريـــمه:: ميخالف محترك گلبه من بريا تحملنه.
درت عليها أأشر واحجي
-يعني شني هسه انه راح انخطب هيّج بالأسود مو مثل البنات؟
-بس عقد النوب لفرحة الزهره تسوين حفله، اسكتي لا يگلب كهلان .
سكتت گـــلبي يدك حييل بالاربعة اجوا، بدلت وعفراء وياي تضحك
-شبيج ترجفينن؟
-ما ادري شو تخوف.
-ههههه كولي يا الله.
سكتت ميته من الخوف مدري شبيه مصدومة لان كلشي صار بسرعة وهيه بساع ودت عبود جاب كراسي من بيت عمي وليد حطتهن بالهول
-تعاي اكعدي هناه
-ليش؟
-بس اكعدي لا تعلين گـــلبي .
كعدت واعاين وراها جابت تول ابيض خفيف مال فستان ريـــمه خلته عليَّ مثل العبايه
-ارگدي بمچانج لمن يجون يعقدولج.
-ضلي يمي اخافن ترى اعوفنهم واشرد للغرفه.
احجي وهيه تضحك علي شويه واجه طــروادة گال الشيخ راح يجي ومارضى اضل هيج غطّتني عفراء بالعبايه حطتها على اجتافي والتول فوكها، دنگت ارجف من سمعت صوت الشيخ كعد على الكرسي وكعد بريا بصفي وطرواده بصفه گـــلبي راد يوگف من الرجفه صوت الشيخ خشن وعالي قرأ ايات وحجه عن الزواج وانه احس بروحي راح ادوخ واتخربط مديت أيدها عفراء عل ايدي عصرتها وضلت واكفه يمي وتحجي وياي همس هيج گولي وهيج گولي
شلت راسي اعاينله من گال
-على بركة الله
وسلم عليهم أثنينهم وگام يمشي للدوانيه وهمه وياه درت العفراء اگلها
-هاي هيه؟
-اي
-ما وقعت شي؟
-وولج مو هسه اسكتي.
التفتت على فتحة باب الدوانيه وبساع مدت أيدها نزلت التول على وجهي وهي تگله
-هلا بيك خويه.
بريا:: البسها حلقة واروح.
دنگت ماشلت راسي بعد مو هذا الچنت امد الساني عليه نتر شبيه هسه شبيه ما اگدر احط عيني بعينه، كعد بصفي وطلع علبه حمره آخذ منها حلقة زفر نفس ومد ايده على ايدي گـــلبي احس البالدوانيه يسمعون صوت دگته لبسني الحلقة وعصر اصابعي بين اصابعه ايده دافيه وايديني حيل باردات جرتني عفراء وكفتني وهي تگله
-شوف وجهه خاف النوب تگول ماركزت بيها ماخليتوني اشوفنها.
ضحك وكف گدامي شال التول من وجهي رجعه ليوره ركّزت بوجهه وهوه حاط عينه بعيني مبتسم لابس دشداشة سوده وعطره حسيته ترس ريتي گد ماقريب علي
مد ايده لوره راسي جرني عليه غمضت عيوووني حييل كل ذرة بجسمي رجفت من طبع شفايفه على كصتي باسني وابتعد عاين لوجهي مبتسم يحجي بهمس وعيونه تفتر بين عيوني
بريا:: رناتي بدويتي مرتي.
شكرا لزيارتكم عالم روايات سكيرهوم
