رواية أرض الخناجر الفصل الثاني والستون بقلم ايلول
انتِ اول راحه
احسها
من بعد تعب
السنين اني
فعلاً جاي اشوفچ
عوض رب العالمين .
══━━━━✥◈✥━━━━══
بريا:: رناتي بدويتي مرتي.
رنـــه:: شايله راسي اعاين لوجهه وگلبي يريد يطلع من مچانه يمسح على خدي بچف ايده يعاين لوجهي مبتسم ومتحسر صافنه بعينه وصافن بعيني احس بروحي بعدني ما مستوعبة، فززتنا دگة باب الدوانيه الداخلي وصوت ســليم ووهب يصيحون عليه من الوادم طلعت
وهـــب:: بريا وولك اشرد راح يردولك وعلي.
انه وعفراء اثنينا نعاين لباب الدوانيه وشهگت مصدومة من دنك باسني بخدي يضحك وخر يعاين لوجهي وانه فاتحه عيني وحلكي وحاطه ايدي على خدي وعفراء صاحت عليه
-ووولك.
مد ايده كرص خدي الثاني ومشه يريد يطلع گبل لا يرد طــروادة وانه على نفس الوكفه اعاين وراه واركز بصوت خرز السبحه اللي بأيده، وصل يم باب الدوانيه الداخلي حط ايده على اليده والتفت يعاينلي بعدها ايدي على خدي واحس بوجهي مشتعل نار ابتسم عاف الباب ورد وكف يمي راد يجر ايدي من خدي يكضها وانه ما اعوفن خدي ضحك وكض إيدي الثانيه عاين العفراء ورد عاين لباب الهول جر نفس طويل يحجي
بريا:: اخذتها بعد عليمن اشرد خل يطگ اذا گلبه يبرد.
يعصر ايدي بأيده وعيونه على باب الهول وانه ايدي على خدي واعاينله متبسمره وصوت دگة گـــلبي يرن بأذني ياخة الدشداشه محتضنه رگبته ومن جواها تتحرك تفاحة ادم تصعد وتنزل، شلت راسي لوجهه رموشه لجوزيات مطوقات بؤبؤ عينه الفيروزي ويرمشن بثگل، نزلت عيوني الأيده عاصر اصابعي بين اصابعه ويمسح على ظهر ايدي بأبهامه.
درت عيوني للباب من انفتح وطب طــروادة اعصاب ووراه مــيثم يحجي وبساع كضه من ايده وبس لمحت طــروادة جريت ايدي من ايد بريا بخوف، دار علي عاگد حاجبه ويعاين الايده الضلت فارغة، رجعت ليوره يم عفراء اعاين لطرواده بخوف
وهوه بساع مشه على بريا بعصبية ماد أيدة بحرگه توه يوصله وجره مــيثم يحاجيه مايريده يطكه وسليم ووهب من الدوانيه يدكون على الباب الداخلي يضحكون ويصيحون
-اشرد وولك اشرد.
وطرواده يصيح بحرگة وميثم كاضه
طــروادة:: شگتلك اناااا انتَ شني تعاندنييي؟ اخر حيووان
بريا:: ما اعاندك بس اريدنها وانتَ شلعت گـــلبي جبرتني احرجك واودي شيخ حيدر.
يحجي بهدوء وطرواده نار صيح بحرگه يفور واديه تتراجف
-انچب انچببب انعل ابوك لا ابو الوداك عليَّ، كتلك تكضي دراسة يله لو لااااا .
چلبت بظهر عفراء متغطيه وصيهد وهو بالحوش صاح عليه
صــيهد:: يله لا تخبصنه يطبه مرض هو الجابها الروحه هي اختك تتعاشر؟
تسودن عاف بريا ودار يدفع بميثم يريد يطلع للحوش يتعارك وي صــيهد كضه مــيثم وما گدرله طلع وميثم دار على بريا بساع صاح عليه
-اطلع بساااع.
وسليم ووهب فتحوا باب الدوانيه صوت ضحكهم عالي ويصيحون عليه بس تعال، مشه يمهم بساع وعينه عليَّ، وصيهد وطرواده يتعاركون بالحوش ومن لمحوا الولد طلعوا يركضون صفوا ثنينهم عليهم صياح وغلط دفعتني عفراء للغرفة صاحت
-اركضي بدلي واكعدي ادرسي.
ركضت بخوف مرتبكه بدلت لبست دشداشه ومديتلي فراش والكتاب بأيدي زهره تعاينلي وتضحك وبس رديت سمعت صوت طــروادة طب للبيت شمرت الكتاب وغطيت راسي گـــلبي يدك بقوة وهوه يحجي بحرگه ويصيح
طــروادة:: وكلام الله لو اجه يوم يتشكى اكضه واكتله من الاول كتلهم اختي لسانها طووويل اختي زعطوطه عوفوها بحالها عوفها من الله لا شافكم چلب ابن الزمال چلب ولج انا يجيب عليَّ شيخ حيدر اناااا يحرجني؟؟؟
وعفراء تحاجيه بهدوء وتگله
-كاافي مو زين عليك تحرگ بگلبك هسه عليمن ما تگلي؟ اول وتالي يعقدون.
نتر بصياح
-زعطووطه بعدها ومريضه وهذا ارعن ويحرك الگلب لو حرگ گلبها وصار بيها شي شني اعاين بوجهه؟ وبوفاضل بساعتها اكتله وانعل ساس اهله.
يحجي يحجي وانه دافنه روحـــي دفن بالفراش النوب من سمعته صاح بأسمي يدور علي كتلني الخوف وكطعت حتى النفس وهو يدور ويصيح
-وينهاا هاي ام خنيس ووينها.
وعفراء وريمه اثنينهن حجن بنفس الوكت
عــفراء:: تدرس
ريـــمه :: نايمه .
فتح باب الغرفه وانه غمضت كل حيلي واحس بگلبي يربد بضلوعي صاح
-گووووومي.
طفرت على حيلي وكفت مدنگه وكاضه الغطا بأيده
طــروادة:: عاينــي وروح آبوي كل اسبوع اجي المدرستج اذا لكيتج هامله دراستج لو درجاتج نازله وبوفاضل بالبنكه اعلگج.
عاينتله بخوف اهز راسي اي واحجي صوتي يرجف
-ادرس زين والله.
وعفراء وريمه مادات روسهن من الباب يردن يچلبن بيه ضل خازرني بغضب هز راسه خوش وطلع كعدت على حيلي وايدي على گـــلبي وريمه مشت تعاين وراه لمن شافته طلع من البيت ردت يمنه تضحك وتحجي
ريـــمه:: ارتاحن ارتاحن راحت الرعيده.
ضحكن واجن كعدن يمي وانه تمددت ايدي على راسي حلكي ناشف
عــفراء :: النوب انه الشابعه حچي وملامه ريـــمه كضي رجلج عني .
ريـــمه :: خيه والله لو ينكض جا كضيته.
يحجن بضحك وجرن ايدي يعاينن بالحلقة چبيره على اصبعي يفرن بيها بأيدي كالت ريـــمه
-كون نبدلها چبيرة.
عــفراء:: لا رنه انتِ اسمني بعد شوية احبن الحلقة التنشري اول مره يگولون مايصير تتغير.
يحجن يحجن وانه مدري شصار بيه روحـــي راحت وين يله انتبهن وركضت ريـــمه جابت جهاز السكر قاسته الي ومشت الغرفتها تركض جابت جكليته أكلتها عيوني مدمعه احس بروحي تعبـــت حسره اخاف حسره يحترك گـــلبي اتخربط، مرات ياخذله ايام زين حتى من اكل حلويات بالسكته ما يصعد ومستقر ومرات فجأة وبدون سبب ينزل لو يرتفع.
مدت أيدها عفراء على عيوني تمسحهن وتحجي
-ياا شبيج؟
هزيت راسي ماكو شي شفايفي يرجفن وبمجرد سألتني شبيج دموعي جرن
-يااا ولج شبيج؟
عاينت لعيونها ابجي
-هسه انه شني ذنبي كلساع السكر مارد روحـــي ؟
ريـــمه:: اسم الله على روحج شسالفة رنـــه عوفي السكر على صفحة هسه تصيرين زين، افرحي وفكريّ ببريا عيوني المخطوبه.
تحجي وردت الحلقة الاصبعي شالت ايدي كدامي عيني تراويني الحلقة مبتسمه مسحت دموعي وعيوني على اصابعي ابتسمت ورديت حطيت ايدي على خدي عاينت لوجهه ريـــمه عيوني غرگانه دموع وانه اكلها
-باسني الخايس.
عبود::شنوووو؟
عاينه كلنه لباب الغرفة وعفراء بساعغ ركضتله تريد بس تسد حلكه ضل يرعد ويحلف بريا ما يشوفني وحدي ريـــمه مدت لسانها شبر حاطه اديها على خاصرتها وتكله بضحك
-هذا لو سجاد خاطب ربايس خطيبته جا هلهلت من يمك مكيف بس هذا إبن الروسيه وحدد.
وعفراء بس تريد تلوح حلك عبود وتسده ما تگدرله صاير اطول من الباب تشيل ايدها ويدفعها ويصيح
عبود:: خل يوصل النوب الا اكسر رجله ليمت خطب ليمت باسس؟
ريـــمه :: عمي شباس الله اكبر باس ايدها ايدهااا.
دار على ريـــمه بحرگه يگلها
عبود:: بداعت عااافيتج أخوي باسج بخطبتكم حتى تكليلي عاادي يبوسها؟
-استحي انه اسأل اخوك.
فتح عينه مصدوم ومتفشل من ريمه دار وجهه وعفراء جرته حيل تصيح
-دنگلي خلني اطكك شلعت گـــلبي .
وهو يحجي يدردم
-ام خنيس الخايسه الزعطوطه.
وانه مدري شمالني لاول مره يطيحون حظي بالرزايل وما احجي ولا حجايه بس أعاين بعيوني عضته عفراء بأيده عاينلها وهز ايده
عبود:: كضيتي؟
وخرت ايده من حلكها كالته
-اااي
-يله وخري روحـــي الاختج علميها ماتنطي مجال.
ريـــمه:: سجاد وين وله وتيهك علينه.
عبود:: ها خويه النوب حتى انتِ؟
ضحكت ريـــمه مدري شمالها اليوم ياهو التكضه تضحك عليه كالتله
ريـــمه:: خويه حالي حال العرب.
ووي حچايتها سمعنا صوت سجاد صاح من بره الحوش
سجاد:: عبود.. عبد حبيبي.
وعبود جر أيده من إيد عفراء يريد يمشي واثنينهن ضحكن وريمه تگله
ريـــمه:: تعال وين رايح ولك اختك بايسها بريا تعاال.
دارت عليها عفراء خازرتها وكوه كاضه ضحكتها وهوه يهز بأيده عافهن وطلع السجاد دارت عليَّ عــفراء تضحك وتحجي
عــفراء:: هاي ياهي الله هاديها واليوم ساكته وحسها ما ينسمع يا نعمتك يا ربي .
ريـــمه:: هاي الحلقة هدتها.
عــفراء :: لو ندري هيج من زمان عاقديلهم.
مسحت وجهي اهز راسي لا وتمددت بفراشي اعاين عليهن واحجي
-اريد احجي بس ممرود گـــلبي خل اصيرن زينه وافرغلكم.
ضحكن واجن يمي للغرفة يسولفن ويضحكن وانه متمدده وحاطه ايدي على خدي كلساع اتذكر شاربه ودفو شفايفه من انطبع على خدي وتتخربط دكات گـــلبي لو اعاين الأيدي واتذكر من لم اصابعي بين اصابعه وعصرهم.
نسيت حتى وجود البنات ضحكت بصوت مخليه ايديي على وجهي لمن نزلت ايدي لكيت البنات صافنات بوجهي مصدومات وانه بساع كعدت عدل اضيع السالفة وما تضيع
ريـــمه :: عليمن تضحكين ولج؟ سودنج بريا؟
وعفراء صفگت ايد بأيد وتكلها
- يا خيه اختي لطشتتت.
تحمحمت مبتسمه
-لا شبيجن تذكريت مره بريا اجاني جنه مسودن جنت اخبز وهوه جرولني ويكضكض بيه وانه ايديي متروسات طحين واخفگنه براشدي ابو الونه خليت وجهه ينكث طحين شلون الحلقوم الوردي.
ضحكت عفراء تطك بأيدها على رجلين ريـــمه وريمه تكض بأيدها وتكلها
-رجليَّ خيبه اريدنهن.
ضحكت مكيفه بيهن بالاخص ريـــمه بس تسولف وتضحك عفراء شويه وراحت لبيتها وهي توصي وريمه تگلها
-لا تخافين يمي شحدها غير افصم ظهرها فصم
بمجرد عفراء راحت اجه ابن مرتضى على ريـــمه گالها امج تريدج عاينتلي بحيره.
ريـــمه :: اريد اروح اريد احسسها انه نفسي ريـــمه الغشيمة حتى لا تأيس من عدي وترد على هاجر ،رنـــه ما رضت گالت
-غير طــروادة يگلب الدنيا ارگدي.
-هسه اخابرنه واشوف
سكتت ما مقتنعه اخذت تلفونها وطبيت للغرفة اخابر علبه مايرد لمن لحيت يله رد بزعل گتله
-انه ريـــمه .
-ها شكو رنـــه بيها شي؟
-لا والله مابيها شي انه ردت أحاجيك.
جر نفس طويل مبين شكد تعبان ومگطوع نفسه احسه كعدربمچان ارتاح يله گالي
-سولفي
-راح اروحن البيت اهلي
-لا.
-امي ودت علي.
-هسه لو ابوي يودي عليج هم ما ترحين.
-وآلله اروحن ركض.
-عدي شغل لا تشلعين گـــلبي
-كهلان لازم اروحن
سكت متحسر
-ريـــمه
-ها عيوني.
رد سكت وانهربس اريدنه يقتنع ما اريد اروح وهوه ما راضي
طــروادة:: عوفي عيــونج على صفحة ما ترحين واذا عبرتي اكسر رجلج.
-خل احاجيك اوكف
-هاااه؟
-اذا مارحت هيه تجي وانه ما اريدنها تطب لبيتنا لا تشبع گـــلبي ما اريدن اررح رانتٍ ما راضي.
-اخوانج بالبيت؟
-ســليم موجود.
-خوش روحـــي بس ذمة برگبتج اذا اكلتي وشربتي يمهم لو تأخرتي الج نص ساعة
تستمر القصة أدناه
-اي والله.
-روحـــي.
-رايحه.
سديت التلفون مبتسمه وكل ما تخطر ببالي ذكرئ قديمة رأساً ابرر النفسي مثل ما علمني الدكتور انتِ ضحيه مو مجرمة، مرات اقتنع بكلامه ومرات اضعف وارد الافكاري السود.
لبست عبايتي وطلعت، حسين يفتر يم الخضره مساحة ببطن الحوش مسيجها طــروادة بشرك زارع بيها خضره وطماطه وبصل، شال راسه شافني صاح
حسين:: ها ريـــمه !
-هاه؟
-تاني خل اوصلنج وين رايحه؟
يحجي وطلع من الحديقة بأيده حشيش مشلعه من بين الشتلات ذبهن يم صخلة رنـــه وهيه تدلع اذا مايعجبها شي ماتاكله لو تموت من الجوع جنها رنـــه .
غسل اديه واجه علي ضحكت بس شفته مشه اصابعه بين خصل شعره طلعت سالفتهم وراثة لان انتبهت حتى عبود هيج.
فتح باب الحوش ومشيت وراه وصلني لباب حوش اهلي يله رد الاهله طبيت للحوش واشوفن هاجر ترش بيه ضحكت بس لمحتني شمرت الصونده من ايدها واجتنب بساع شبگتها ابوسن بيها بخوف احس بروحي ما مأمنه عليها بس ضحكتها تطمني.
-شلونج خوماتعبانه؟ هاي انتِ كانسه الحوش؟
ضحكت تهز راسها لا وتشرحلي بأيدها
-سلطان؟
هزت راسها لا ومدت أيدها شايله اربع اصابعه وأشرت على گبل الإصبع الاخير
-ها ســليم؟؟؟
هزت راسها آي وتسويلي بأيدها ساعة عود امشيته سلون الساعة ضحكت ورديت ابوسنها بخدودها
-فـــدوه اروحنلج .
التفتت لباب المطبخ من طلع ســليم الخاولي على راسه عاينت للحوش ورديت اعاينله
-طلعت خوش تكنس.
شال أيده يسب بهاجر وهيه حاطه ايدها على حلكها گالها
ســليم:: جا مو اتفقنا ما تگولين.
-اكلك تزوج حتى مرتك تساعد امي بشغل البيت وانه اخذ هاجر يمي.
گلب وجهه يصيح
-كفيني شرچ وشر الزواج شني تسودنت.
هاجر ركضت طفت الماطور وهوه اجه يمنه كعدنه بالحوش نسولف
-لا شر ولا هم يحزنون هسه اخذلك بعد سنتين تصيح دورولي مره.
ســليم:: انچبي لج انا اخلي الضحكت عليهم يضحكون عليَّ؟ لج غير مسوي وهـــب وبريا نكته اضــحك براسهم.
-اكلك هذا ياهو الگال البريا يروح الشيخ حيدر عليك الله سلطان علمه.
سلطان:: شعلمته؟
التفتنا على صوت سلطان طب للبيت يهز براسه
-ها لجج شعلمته؟
اضــحك وسليم يگله
ســليم:: صارلها ساعة تحجي عليك ماخلت شي ما گالته وانا ادافعلك النوب تاهمتك تگول سلطان علم بريا على شيخ حيدر لان سلطان عده سوابق بهاي السوالف.
-يااا يااا ماحجيت هيج وعلي.
اجه يمنه سلطان يفر بالسبحة شال ايده طكني على راسي يضحك
-تحجين عليَّ وولج؟
-والعباس ســليم جذاب.
جر راسي عليه باسني وسليم وكف يسوي روحه اعصاب ويحجي السلطان يتشكى
ســليم::النوب تگول عليَّ جذاب انا جذااب سلطان انا جذاب.
سلطان:: اي والله.
مد ايده سليم على زندي يكرصني ويجرول بيه يعضني صرخت افرفح هو يتشاقى بس شقاه يوجع وهاجر چلبت بشعره تجره من عدي
سلطان:: كااافي نعلعله والديك زوركت ايدها هيج هيه خاب؟
ســليم:: الله صارلي شكد ماعاضج.
وانه انكث بأيدي اشتعلت نار اسنانه مطبعات من يم اصبعي الصغير بالمچان الترف
-بجاه الحسين بجاه فاطمة الزهراء يا ســليم تطيحلك بمره تنومك بعضه وتكعدك بعضه .
سد حلكي سلطان وسليم ميت من الضحك وهاجر جرت ايده تريد تعضه تاخذ ثاري حطت ايده بين سنونها وهوه يضحك وعايفها بكيفها ما گدرت تعضه شبگت ايده الصدرها رافعه اجتافها عود ما اگدر جرها اله يبوسها حييل ويعصر بوجها گطعها تگطع ندمها لان ماعضته جرها سلطان منه ونزع الشحاطه من رجله كتله بيها
سلطان:: موتتهن طايح الحظ.
وسليم ميت من الضحك ويصيح
-فوگ ما احبنهن؟؟؟
تطبعت شحاطة ســلطان بقميص ســليم الاسود وكلنه راحت ضحكتنا من طلعت امي بمجرد المح عيونها گـــلبي تتخربط دگته واختنك، وگفت بخوف سلمت عليها وهيه تباوسني وتحجي وي سلطان بنتر
ميلاد:: ما تجيب مرتك وتجي هناه؟ هاي تاليها اربي واتعب والنسوان على الحاضر تاخذ مرتضى طلع وانتَ متسودن من عدنا مكفوخ وشارد.
وخرت على صفحة أعاين بسلطان واكف بهدوء يعاينلها لمن كضت يله گالها
سلطان:: انا مرتاح غاد ما ودج ابنج مرتاح؟
شالت الشيله من صدرها وجرت الدشداشة بحرگه رافعه راسها للسما ودعت بنشغة
ميلاد:: يكووون ما تشوفون الراحة دام عالين گـــلبي وتركضون وره هالچلاب.
جريت ايدها متسودنه
-ييييمه لا تدعييين.
دفعتني تغلط عليهم اثنينهم وهوه يهز راسه خوش ودار وجهه بهدوء طلع من البيت بس ســليم ضل كاعد ومضيك عيونه هذا صبره قليل ويخوف سكتت منه وطبت للبيت مشيت وراها هادئة وخايفه من احاجيها احس صوتي يرجف
-ليش تدعين عليهم؟
دارت عليَّ بحرگه خازرتني وشايله اصبعها بوجهي
-اسكتييي حالج حالهم مابيكم واحد بيه خير چلاب.
رديت ليوره ساكته طب ســليم نازع قميصه خلاه بمعجنه ووگف يم السنك يغسله امي خازرته تمشي وتدردم وهو ساكت عصر القميص وگال الهاجر
-انكثيه وشريه .
هزت راسها خوش اخذته من ايده وطلعت وهو مشه للهول شغل التلفزون وكعد يعاين للطوبه زفرت نفس براحة من ضل بالبيت.
وامي لمن ملت من الحجي واجت للمطبخ يمي تريد تسوي عشه كعدت تكشر بتيته كعدت على صفحة اعاينلها مناه لمن ردت تحجي بهدوء وتسأل
-شني شعجب رضى يزوج رنـــه لبريا؟
-انحرج اجه شيخ حيدر خطبها.
أحجي بخوف مرتبكه وهيه هزت راسها اي تكصص وتحجي بحرگه
ميلاد:: الچلب يزوج اخواته الياهو الچان وگبل من مرتضى راد عفراء تسودن المحرم.
هزيت راسي اي ساكته كامت يم السنك تغسل درت عيوني الهاجر كعدت بباب آلمطبخ تعاينلي وتعاين الامي وهي تشتغل وتحجي
ميلاد:: هم يرحون للزيارة؟
-ما ادري اظن بس عبود وسجاد يرحون بعد يومين يمشون من النجف الكربلاء، وكهلان ياخذنه گبل الزيارة بيومين نزور ونرد ما نروح للحسينيه.
-انتِ لا ترحين وياهم ضلي ويانه.
-اي انه همّ گلت
دنكت كوه آرد عليها، وگفت يم الطباخ تگلي، عافته وراحت الغرفتها زفرت نفس متحسره ايدي على گـــلبي احس بروحي حتى عرگانه بعز البرودة كد ما ضاغطه على روحـــي ومتحمله حجيها.
منتبهه وي صوتها وين تروح وتجي طلعت من غرفتها فتحت الثلاجة جوه الدرج مچانها، وردت اجت للمطبخ بأيذها كلاص عصير بلعت ريك بخوف وهيه مدته الي وعيونها الهاجر تحجي وياها
-شريتي هدوم ابوج هاجر؟
اخذت الكلاص من أيدها ايدي احسها ترجف حطيته يمي وهي ردت يم الطباخ وتسولف درت عيوني الهاجر خازرتني حركت راسي على كيف اي فاهمتج وما اريدن اشرب .
اندك باب الحوش وصوت خالتي سعاد، دارت امي على هاجر
ميلاد:: امشي افتحي الباب الخالتج!
وهاجر كامت من يمي باب المطبخ اجت يمي وجها كاش وتأشر بأيدها لا، مشت امي بعصبية مدت أيدها تريد تطك هاجر وهيه ابتعدت غلطت عليها ومشت تفتح الباب وهاجر تعاين وراها بس عبرت باب المطبخ جرت كلاص العصير من ايدي بساع بدته بالسنك وخلت بيه ربع ردته الايدي وانه من الهبطه ماعرفت اتصرف بس فاتحه عيني ردت الكلاص كدامي.
درت عيوني لباب المطبخ من طبت خالتي سعاد وامي مشت هاجر بساع مبتسمه سلمت على خالتي سعاد صارت عيني بعين امي عاينت للكلاص وردت عاينت لوجهي وكفت بساع مرتبكه سلمت على خالتي وامي دنگت شالت الكلاص يدت الضال منه بالسنك وغسلته تحجي وي خالتي وتگلها
ميلاد:: عمتي زينه؟
-زينه خيه اليوم وليد اخذها للدكتور.
حجتها ودارت عليَّ متخوصرت
سعاد:: ولج ريـــمه شلون تطردين جدتج؟
درت عيوني الامي احاجيها
-يمه غير طلعت جذابه متفقه وي عمي وليد عليكم وعلينا مدري شيردون.
طكتني خاله سعاد على ايدي تغلط
-انجبي عليمن متفقه وياه؟ هيه لوحدها زعلت واجتكم.
وامي مضيگه عيونها تعاينلي بشك گتلها
-لا يمه والله عدها شي اول مره اجت ليكم ومن ابوي گالها لا ردي لبيت ابوي عافتكم واجت علينه شوف شعدها يجوز ضاجت لان كلشي بأسم ابوي ورادت تجي تقنعه يحط شي بأسم عمي وليد.
احجي مرتبكه بس اريد امي تقتنع أنه يصفها وخالتي سعاد متسودنه ما راضيه وتحجي بحرگه كالتلها امي
-جا عليمن تصيحين على ريـــمه ياهي مالتها هيه ترى طــروادة هوه الطرد عمتي.
سعاد:: ياا لا خيه غير هيه سولفت تگول ريـــمه يمه يمه تنكز ضلت وتطردني وحجت حجّي عليها.
-خل تحجي انه بت ميلاد ما اخافن من حجي احد.
عيني بعين امي ابتسمت مكيفه وخالتي تخزر بيه متسودنه طبن للهول وضلينه انه وهاجر يم الطباخ نكضي العشا، واسمع سعاد شلون تعاتب سليم لان من يروح لبيت عمي وليد بس يگلها شلونج وعلى عمتي ايمان يسولف هواي وينشد على صحتها، گالها.
ســليم:: عمتي ايمان مره مريضه، انتِ چنج الشمر تجولين وتصولين عرج ما يطگج.
تسودنت تغلط وتعاتب بأمي كام من يمهن لعبانه روحه طب الغرفته اخذله قميص وطلع هبطت بس راح انه هم ردت اروحن مديت راسي للهول كاعدت يسولفن سكته محد يسمعهن كتلها
-يمه إنه رايحه.
-اوكفيلي.
حاجت سعاد واجتني تحجي
-ماتضلين هناه؟
-لا اريد اروح اكضي العشه.
هزت راسها خوش طلعت وياي للحوش وگبل لا نوصل للباب جرتني من ايدي تلفتت تعاين مناه ومناه وردت عاينتلي تحجي بهمس
-لو اريدن منج شغله تسوينها؟
بلعت ريك اعاين لعيونها هزيت راسي اي وهيه مركزه بعيني حطت أيدها على زندي
-عفيه عبالي غيروج عليَّ.
-لا كليلي شتردين واسوي.
-مو آليوم غيّر مره.
سكتت احس بگلبي يدك حيل وصلتني يم الباب وتحجي
-هم واحد حچه على ابوج لان اخذ ايجار على الحسينية؟
-لا ما سمعت.
-چلاب تعاركوا وياه جا بويه ياهي مالتكم حسينية آبوكم؟ بكيفنه نبيعها نأجرها شلكم غرض.
-اي .
فتحت الباب حتى اطلع وهيه تگول
-اذا واحد جاب طاري الحسينية وحجه على ابوج تعاي كليلي خوش؟
-اي، يله خل اروحن سلميلي على ابوي.
حجيتها ودرت وجهي امشي لبيت عمي شامل كل خطوه اخطيها بأتجاهم احس بروحي اطلع من جحيم كل ما اقترب منهم احس هاي هيه راح أأمن على روحـــي وتتعدل دكات گـــلبي .
طبيت للحوش وسديت الباب وراي جريت نفس براحة غسلت وجهي وطبيت للبيت رنـــه كاعده بالهول تكتب وكاضه حسين وزهره تدرس بيهم وياها عفتهم وطبيت للغرفة تمددت بس اريد الرجفه تروح من جسمي .
طولت يله كمت للمطبخ اسوي العشا گبل لا يردون الولد
ورنه تقرأ بصوت عالي كل ما افكر تخربط افكاري
دنگت بحيره اكو شي غلط شرادت اسويلها واكو شي مخوفها
مسحت وجهي وي الاذان طفت الكهرباء طلعنه للحوش بارده، رنـــه فرشت حصيرة وحسين مشه يلم حطب يسويله جمريه كعدت على صفحة جاره رجليَّ الصدري وأفكر بيها شني الرادتني اسويه
درت عيوني عليهم علگوا الجمريه ورنه خايفه عليهم لا يحتركون لمن كضه الأذان كالتلهم
-يله تعالوا توضوا.
مشوا بساع وهيه دارت وجها عليَّ
-ريـــمه گومي صلي والله صايره مهمله اشوفنج يوم تصلين وعشره لا.
گمت ساكته توضيت واعاين الزهره فرشت مصلايات على الحصيرة بالحوش، ماكو ضوه غير ضوه الحطب الشعله حسين، جر مصلايته خلاها گدامنه وزهره متسودنه تريد بصفه وهوه مايرضى بجت تكله
-يصيرر إحنا توم.
-لااا ما يصير خاب شني رنـــه حاجيها شلعت گـــلبي ..
جابتها رنـــه يمنه وكفت تصلي ودموعها تجري محترك گلبها من حسين لمن كضت صلاة حسين مدنك يسجد مدت روحها وطكته على ظهره حييل وتسوي
-اححح.
وهوه ضل بس يصيح الله اكبر.. الله اكبر، ويقوس بظهره موجوع، ورنه كاضتها الضحكه، كلهم كضوا صلاة الا انه ماودي اكوم من السجادة گد ما احس بروحي مقصرة، فاتحه ايديي مخليتهن على رجليَّ ادعي بس بلا ما احجي احس ماكو كلام اگدر اوصف بيه الاريدنه بس فاتحه ايدي وربي يعلم بالبداخلي، مغمضة عيني وفزيت من حسيت ايد على راسي فتحت عيوني مرتبكه جر راسي عليه باسني وابتعد
طــروادة:: تقبل الله.
درت عيوني منه لرنه مدنگه مبتسمه وحسين كوه لام ضحكته وزهره الضحكه شاگه حلكها، كمت بساع لميت السجاده وهوه مشه يغسل، لمن اجه عبود جايب بانزين بدبه خلوه بالمولد وشغلوه طبينه جوه بين ماصله وصبينه العشه اعاينله ياكل وعيونه على ايد رنـــه والحلقة ماعاجبه بس شال راسه رفعتله حاجبي حتى لا يحجي دار عيونه ضايج.
بعدنا تونه كمنه من العشه واجوا الولد جايبين بريا يصالح طــروادة رنـــه بساع ركضت تسوي روحها نايمه وكفت بالمطبخ اسويلهم چاي وهمه صوتهم عالي وسوالفهم تسطر، مــيثم ووهب وسلطان وسليم كلهم يبررون البريا ويردون طــروادة يصالحه الا صــيهد كل ما طــروادة سكت يگله
صــيهد:: طاحظك غصباً عليك عقد على اختك.
2
يخلي طــروادة ينشعل وينطفي مره مرتين بالثالثة مــيثم صاح على صــيهد
مــيثم:: گووم اطلع بره گوم انتَ جايبينك عون لو فرعون؟
صــيهد:: اي اطلع ليش لا اروحن اخذ اخواتي.
صاح سلطان عليه
سلطان:: والله الكعده بدونك ما تسوه يعني هسه اذا انتَ تگوم اگومن وياك
وميثم بساع گلب گاله
مــيثم:: اريدن مره تحجيلك حچايه غلط ماكو صيهدنا انتَ حچيك كله درر، يعني من تطلع شني احنا نضل كاعدين غير نلحكك.
وصوت ضحكتهم العالي يخليني من وحدي اضــحك، وديت الچاي بأيد حسين وطبيت للغرفة بس اريد عقلي يصفى وافكر شني الرادته امي ووين تريد توصل، تعبـــت التفكير آكل عقلي متمدده بغراشي عيني للشباج فاتحتها على كيف وتدخل عليَّ نسمات بارده مثل الثلج
وافكاري متشتته ماجاي اگدر أفكّر بموضوع واحد حتى اوصل الحل كل الافكار تهاجم عقلي سوه
غمضت عيوني واحجي وي روحـــي بصوت ناصي، رادت شي متأكده وحسيتها خايفه من شي، فتحت عيوني وگلبي يدك حيل، اكو شي ثاني بأسم عمي شامل وخايفين ندري؟ لا لو اكو جا لگيت الاوراق مالته، خاف الاوراق عد جده، شلون طــروادة نغش بجده وهيه الحلال البالمرعى اكثريته الها مستحيل يطردونها ويفلسون منه، ليش اجت وليش امي كالت اذا اريدن منج شي تسوينه؟
درت عيوني على فتحة الباب طب للغرفة عاينلي ودار مشه للكنتور من يطب للغرفة يتذكر هوه زعلان من عدي يگلب وجهه، بدل هدومه وحط تلفونه على الشحن عاين للشباج بردان مشه سداها وهدل البرده افتر تمدد بمچانه حاط أيده على عيونه
مديت ايدي شغلت الباجوره البصفي ورديت أعاين بوجهه وخر ايده من عيونه عاينلي ودار وجهه منطيني ظهره ويجر بالغطا من عندي.
درت من عده وجريت الغطا علي ادفن بيه جواي وهوه يجر بيه نتره حيل وانه كاضته بطرف اصابعي صيحت موجوعه وتيهت الغطا دار علي بخوف
-الله الله .
جر ايدي يريد يشوفها نترتها منه
-وخرر، هااك اخذ غطاك ما اريدنه، والله اروحن انام يم رنـــه .
مديت رجلي اريد انزل من الچربايه جراني يضحك
-وخر كهلان وخرر والله وخر.
احجي محترك گـــلبي وهوه يضمني بصدره حيل خانگني ويضحك
-كافيي اشش.
شال راسه يعاين لوجهي مبتسم دك گـــلبي حيل وانه أعاين بوجهه دغني بخاصرتي دفعت ايده
-وين تنامين؟
-يم رنـــه.
-حتى ادفنج.
يحجي ومد ايده يتلمس جوه شفتي يمسح على حنچي بأبهامه
-مو ما تريدني؟
-انا؟
-اي جا خالتك تجر بالغطا من عندي وتگلب وجهك عليَّ.
ضحك ايده دافيه تلمس بيها خدي ونزلها من خدي الرگبتي غمضت عيني مقشعر بدني ورديت فتحت تلمس شفتي بطرف اصبعه وعيونه عليهن
-مو ما رايدج بس داكه بگلبي شلون تكليلي احبنك وتالي تعوفيني وتولين الاهلج؟
سكتت صوت نفسي عالي وكلبي احس يدك بأذني ما ادري شنو ابرر وشنو احجي واذا لح علي شويه اسولفله الاكو والماكو غمضت عيوني روحـــي رايحه وي لمسة أيده دفعتها من زندي موجوعة
-لا تكضني منااه.
وخر من عندي يسأل
-شبيج؟
مسحت على زندي حيل يوجعني وخرت الردن اريدن اشوف شبيه وهوه شغل ضوه تلفونه يعاين وياي واشوفنه صاير ازرك
-ياهو طاگجج؟
نتر بصياح وانه بساع تذكرت
-ياا هاي مساع ســليم تشاقه وياي كرصني وغضني عاين.
مديتله ايدي اراويه كض اصابعي ويعاين لمچان العضه
-طاحظه الخايس.
-يتشاقى وياي.
-جا هيج؟
-آخوي ترى
حجيتها مبتسمه أعاين بوجهه دفع ايدي طفه تلفونه شمره يمه ورد تمدد يحجي
-لو انا العاضج جا خابرتي عفراء تتشكين.
-هههههه.
دار وجهه عليَّ جرني من ايدي الحضنه لمني على صدره شابگني حيييل ضميت وجهي بقدره اضــحك
-والله تخاف من عفراء انتَ.
-غير جنها ابوي.
-مساع تريد تكتل عبود تگله دنگلي خلني اطكك.
اهتز صدّره يضحك، غمضت عيوني راسي على صدره وخر شعري من وجهي وقرب شفايفه يبوسني بكصتي وبطرف عيوني.
لمسات ايده وهي تنساب على جسمي برخاوه كفيله تنسيني روحـــي، اسمي وهو يهمسه بأذني يبريني من كل اتهام وجهته النفسي نفسه الدافي وهو يمشي من خدوي لرگبتي الاذني يضاعف دگات گـــلبي من يهمس
-ريمي.
وبوسات دافيه تتوزع بين وجهي ورگبتي، وغصب عني يجر ملابسي من جتفي بس حتى يبوس أثر الحرك ويتلمس بأصابعه مچان الغمازات بجتافي
أنفاسه الدافيه تنسدل على جلدي گبل شفايفه بلحظات تنبهني وتخليني ارجف واترقب بوسته الجديدة وهي تنزل على رگبتي.
تلاشت المسافات بينا، بين حب وتحدي منو يحب الثاني اكثر ومنو اللي مشتاگ ولهفان على الثاني اكثر
انفاسنا المختلطة اشبهه بنغمة نهاية حرب.
وأصابعه التطوف على جسمي عبرت حدود اللمسه العادية صرت احسه كأنما ينقش على زجاج بحب وبحذر ولهفه للحظة اللي يكمل بيها لوحته.
لمني بين أديه على صدره وايده غاصت بين خصل شعري غمضت عيوني أنفاسي متعاليه ما اريد من هالدنيا غيره انه حتى ذكر اسمه يرجف گـــلبي وعجيب شلون جنت اكولن اكرهه.
يطبع بوسات عشوائيه على راسي وكصتي ويردد
-اموتن عليج ريـــمه ما مصدك رديت المج على صدري.
اسمع الكلامه وكل ذرة بحسمي فرحانه ما ارد عليه بكلام ارد بحضنه ببوسه خفيفه على رگبته، وبمجرد مرت نص ساعة رجع عقلي انشغل بنفس الافكار امي حتى ليلي ماخلتني اعرف أنامه حتى وانه بين ادين كهلان وبنص الامان ما گدرت أغفى وانامن، شلت راسي من صدره مبتعده من شفته غافي تمددت بمچاني افكر
اكو شي العمي شامل يمهم وهذا المخوفوهم دك گـــلبي بخوف لا يسوولي شي وهم انه الاغدر هالمره. مسحت وجهي بحسره والافكار تاكل براسي اكل فتحت عيني حيل عبالك جنت بدوامه وفجأة اندليت الباب.
-الحسينة اي اي والله هيه لحت على الحسينية وتسأل ياهو الحجه عليها وياهو ماحجه.
درت بساع الكهلان مرتبكه هزيته من صدره
-كهلان... كهلان.
كوه فتحه عيونه عاينلي وجر الغطا بأيد وانه بأيد ضمني وياه يغطيني ويشبگني.
-كهلان خل احاجيك بس اكعد شويه.
احجي وافرغ بروحي من عده ما گدرتلي دفني جوه الغطا اختنگت ادفر بس اريد اطلع راسي طلعت اجر نفس واحجي بحرگه
-مو جاي اكلك اكعد خلني احااجيك.
وهوه ولا مهتم رد نام هزيته من زنده واطك بيه حييل فتح عيّنه بوجهي گتله
-اظن الحسينية بأسم ابوك.
گال بصوت ثگيل طافي
طــروادة::الاربعينيه؟ لا لاا بعدها.
فتحت عيني حييل هذا شجاي يحجي جر الغطا عليه مره ثانيه ورد غمض ياا يا أربعينية يمه اسم الله شبيه الولد
-كهلاااان.
فز كعد على حيله وخرت ليوره بخوف فاتح عينه حيل وكوه يحجي
-هاه؟
-اصحى شويه اريدن أحاجيك بسالفة.
مسح وجهه وغمض عينه ميت من التعب بس يريد يغفى كام غسل ورد للغرفة شغل الضوه عيونه حمر دم عاينلي كاعده متربعه على الجربايه اجه يمي يسأل
-بيج شي؟
-لا.
مد ايده تلمس خدي وكصتي عباله مصخنه جريت ايده نزلتها الخضني وكاضتها بأثنين ايديي
-راح اكلك شي بس ما متأكده منه.
هز راسه خوش
-أحم اظن اكو شي غير الگيعان بأسم عمي شامل
عگد حاجبه وبساع هز راسه لا
-لا يابه شسالفة.
-اسأل كهلان والله احس الحسينية بأسمه امي اليوم لحت عليها وكلساع تنشد ياهو حجه على ابوي لان اجرها وهواي حجي والله اكو غلط بالسالفة اذا مو الحسينية بأسمه اكو شي ثاني بأسمه متأكده.
عاينلي بحيره مسح وجهه وگال
-لا تحجين يم احد مناه لمن اتأكد.
هزيت راسي اي، وهوه بعد ولا گدر ينام كل ما افز الگاه كاعد، للصبح گبل لا يروح للكليه طلع تلفون من الكنتور بعده بالباكيت فتحها شغله وعافه يمي بالغرفه گال
-جبته الج من جنه عاقدين بس امج غثتني بحچايه وعفته، شيصير وياج خابريني وامج لو اجت واحنا مو هناه لا تفتحين البيبان سوي روحج نايمه
هزيت راسي خوش، بدلوا وطلعوا سوه، رنـــه تضحك للهوه وبدت يومها بضحكه مكيفه، اخذهم عبود يوديهم لمدارسهم، وكهلان واكف بباب الحوش متاني صــيهد وجويريه لمن اجوه عاينتلي جوري من الجامه وشالت أيدها تأشرلي شلونج ابتسمت أأشرلها
جــويريه :: اعاينلها مبتسمه وطرواده بس صعد بالسيارة أشرلها ادخلي جوه دخلت وسدت الباب أسمعهم يحجون وضايجين واحد يگل للثاني ماجاي الكه شي واني كلشي مافاهمه الحد ما وصلنه للكليه مشه صــيهد وياي يوصلني القسمي ويروح لامه روحـــي بالعبايه حيل بردانه وهو يحجي علي
-گتلج البسي شي دافي تتكهربين وماتسمعين حچايتي بت نضال.
درت عليه ومديت ايدي اخذ ملازمي من ايده
-بالأفلام من يشوفون حبيبتهم بردانه ينطونها سترتهم حتى تدفه مو يرزلونها.
وهو يباوعلي بطرف عينه ماعاجبه تلفتت يتأكد محد يمنه ويسمع گال
-حبيبتهم، انتِ حبيبتي؟
شلت راسي اباوع بوجهه يدوس بالبطن بعدني مارايحه القسمي وسمعتهم يگولون المحاضرة الاولى نلغت، بارعت الصيهد مد ايده اخذ الملازم من جديد طبكهن ويَّ ملازمي گال
-امشينا نتريك
-ومحاضرتك؟
-فـــدوه الج.
ابتسمت اباوع لوجهه خزرني
-لمي حلكج شنّي السآلفة.
مشيت وياه وكل شوي اضــحك واحرك گلبه جاب اكل وطلعنه بره بمكان معزول كعدنا ناكل ونسولف
-شبيه كهلان اليوم؟
يشرب چاي ويباوع بطرف عينه هز راسه يسأل
-شبيه؟
-سمعتكم تسولفون على مدري شنو وضايجين.
هز راسه ياكل لگمتين خلّص اللفه واني اكل على كيف لان احس بروحي اتدمر من اكل هواي اخذها من ايدي لفها الي عدل رجعها الايدي وجر كلاص الچاي يخوطه ويحجي
-سالفة مو يمج تدوخ مالج غرض بيها.
-احجيلي صير حباب وياي وسولفلي من اسأل على شغلة.
باوع الوجهي رافع حاجبه عيونه تخبل من تصد بيهن الشمس ولحيته مرتبه واحسها تلمع هز راسه خوش
-بس اذا حجيتي يم احد اموتنج، نحس اكو بعد شي بأسم عمي شامل غير الگيعان.
هزيت راسي خوش اكل ورديت رفعت راسي عاگده حاجبي
-مره سمعت جدي گال الجده انطيني سندات شامل.
-ليمت؟
-گبل هواي .
-جا ليشش ماحجيتي؟؟
حجه بعصبية خازرني بهتت خايفه
-ما ادري والله ماعبالي شي مهم.
دار وجهه بعصبية واني بعد حتى اكل ماعرفت اكل غصيت
-صــيهد والله ما ادري شي مهم.
هز راسه خوش
-هاي هيه يله اكضي ريوگج حتى اروحن.
-ما اريد بعد شبعت.
باوعلي ضايج ويحاول يحجي بهدوء
-اكلي لا تقهريني غيّر جوعانه شلج بهالتنعثل بعد؟
درت وجهي من عنده گوه اكلت شويه وگمنه وكفت انكث بعبايتي وهوه شال العلاكه وكاسات الچاي مشه يريد يذبهن بالحاويه مرت من يمه بنيه حلوه باوعتله ومشت واني بقت تاكل بگلبي ليش باوعتله اكيد هو بادلها النظره شمرهن واجه يمي اخذ الملازم ومشينه نرجع للقسم كالبه خلقتني احسه جذاب يباوع للبنات
وصلني للقسم شفت محد وراه گتله
-الله باوع
التفتت ليوره ورجع باوعلي
-ها عبالك بنيه ما صدگت گبل التفتت.
خله الملازم بأيدي رگع وحجه من بين اسنانه
-دوسي ببطني وصيحي لا تنعل بأهلي الرعينه.
دار وجهه ومشه زعلان واني مدري على شنو ضجت اخذت المحاضرة الثانية وطلعت دازين عليّ يم مدير القسم مشيت بخوف احس وجهي صوفر شمسويه وليش يدزون علي هستوني وصلت ولكيت عمي بالباب وكفت مرتبكه وگلبي يدك حييل اباوعله بصدمه وهوه اجه عليَّ بسرعة بادن رجليَّ
-الله يساعدج عمي شلونج؟
اباوع لوجهه وما احجي ولا حرف والطلاب والدكاتره تفوت من يمنه وهوه يتلفتت من يمر احد يسكت ومن يرحون يحجي، شلون دخل وعلى اي اساس يصيحولي ما ادري.
-تجين يمنه عمي؟
رجعت خطوه ليوره درت وجهي ومشيت بساع ارجف وامشي متذكره كل خوف عشته بسببه وبسبب ابنه، امشي وما ادري رجليَّ وين ماخذاتني الحد ما سمعت صوت وراي
طــروادة:: على كيفج على كيفج لا تعثرين.
التفتت عليه ارجف اجاني بساع حجيت بصوت مخنوك
-صــيهد وين؟
-سلامات ياهو وياج؟
دنكت اعز راسي ماكو شي وامسح بعيوني مشيت وياه لقسمهم كعدت على صفحة وهوه واكف گدامي وكلساع مخابر صــيهد ربع ساعة واجه بس لمحته نزلن دموعي
-اريد اروح للبيت؟
فتح عينه حيل
صــيهد:: ياهو وياج؟
-محد محد بس وديني للبيت.
طــروادة:: اخذها وروح، بعدين تسأل مو هسه.
-گومي.
گمت وياه الخنگه ذابحتني شيردون من عندي شكو لاحكيني لو يموتون ما اصدك بيهم حنيه وجاييني بخير مو شر، ماحجه طول الطريق وبس وصلنه للقرية دخبت البيت اهله ندى بالمطبخ تسوي بالغده سألت بخوف
-يمه شبيج.
هزيت راسي ماكو شي ومشيت الغرفة خاله أيمان ذبيت اغراضي وضميت روحـــي بحضنها حييل
-اسم الله الرحمن اسم الله جــويريه يمه شبيج؟
بعدني ما ناطقة حرف واحس يأيدي انهيتت جرني بعصبية وامه مجلبه بيه وتكله
-يااا ياا صــيهد هدها.
-تعاي مشينا غاااد.
يمجي ويجر بيه حيل عاصر زنديّ بقوة واني حتى صوتي مايطلع يجر بيه حييل للمشتمل دفعني بقوة وسد الباب رگع ركفت عدل كوه اتنفس اباوعله وامسح بأيدي اعصاب وينتر بحرگه
-ياهووو وياج؟
درت عيني على ايديَ موجوعه امسح عليها وفززني صياحة وكضته لزنودي بنفس القوة يهزني بين اديه ويصيح بحرگه
-عليييييمن بچيتي ياهو الحاچااااچ.
صرخت بس اريد افلت نفسي من عنده واحجي صوتي رايح
-وخرر محد، عمو ابو ياسر جاي علي للقسم، ايدددي عوووفني.
فتح عينه حيل ودفعني من ايده ما مهتم طلع من المشتمل رگع الباب وراه حيل،كعدت بالگاع ابجي ماتتغير لو اموت ، شويه واجن يمي رغد وندى سولفتلهن محترك گـــلبي من اسلوب صــيهد اكثر من خوفي بسبب عمي.
رغد:: ما اگدر ابرر الصيهد واكلج حقه واعذريه، بس جوري صارلج شكد وياه ماتعلمتي عليه هوه هيج من يحترك گلبه مايشوف گدامه.
ندى:: بله رغد اسكتي وعلي اخوانج ولا ينجرعون عذا الثاني شلون كاويه القميص وحاركه منه شويه گلب وجهه خايب روح انتَ وقميص
رغد:: خيه والله ما ابررلهم همه الزلم ماينجرعون وعلي بس شنسوي جا؟
مسحت عيوني اباوعلهن هذن يواسن يزيدن همي رضا يفتر بينهم وخبيث من يبوس رغد يسوي اححح مشيت وياهن علمود خاله ايمان، الحد صلاة الظهر واجه وهـــب يركض فززتني صرخة ندى من شافته جر السلاح وطلع يركض للسيارة مارضى يحجي شكو.
روحـــي انسلبت بس اباوع بخوف وامه تتصل عليه ورغد تتصل على سلطان متت بمكاني وعضيت اصبعي ندم ليش حجيت ليش ما انطميت وسكتت شلون بيه اذا صار شي من وراي.
دخلت جدّه للغرفة من فهمت السالفة هاده تريد تضربني ورغد وندى لازماتها رغم محد منهن حجت بس سعاد سمعتنا وبسرعة نقلتها الها غلطت وسبت بس تريد تلزمني
اباوعلها ومن بين دموعي ادعي مايصير شي وتعدي على خير والبنات يفترن بخوف يخابرن عليهم ومحد يرد ساعة عدت روحـــي راحت بيها
واجه خالي وليد بس دخل للبيت صيح بصوت عالي
-وينهااا اليوم اذبحها بت الچلااااب.
خاله ايمان بفراشها وفتحت ايدها تأشر تعاي يمي ركضت بساع اضم روحـــي بحضنها ابجي بخنك واسمع صوته وهو يصيح
-والله اذبحها بت الچلااااب يوميه جايبتلنه مصيبة يوميه طلااابه ما تكضي طلايب بت نضال ما تكضيي.
واسمه صوت جده تصيح عليه تريد تفهم شصار وهو يحجي بحرگه يگلها
-سودنت صــيهد حرگته حرك وخلت الولد يروح على عنها بنص بيته يطكه، السايبه أمّ الطلايب.
دفر باب الغرفة يصيح وجده وسعاد مسويات ارواحهن يلزمنه وهوه شايل بأيده خنجر ويهدد
-عاينــي ووولج يكونج مانعدلتي وروح ابوي اذبحج واذبج لچلاب بت الحيوان سودنتي الوولد.
واني اضم روحـــي بحضنها حييل غطت عيوني وصاحت عليه بحرگه
ايمان:: اخو أخيته وسبع چا يسكت على العيله، عمها شعده لاحكها للكليه مايكفونه شرهم.
غلط عليها يسب بأهلها وجده عافت ايده تكله
-طكها على حلكها وكسر سنونها.
وهوه خازرها بغصب ويغلط طلع من اجوا الولد غمضت عيوني ابجي وگلبي يوجعني واسمع صوت صياحهم وهوستهم وكل الفهمته صــيهد ضارب عمي ابو ياسر بباب بيته، وهذولاك ودوا گوامه العشيرتنه وعشريتنا دزت وادم ياخذون عطوه منهم البعد زيارة الأربعين.
بالساعتين هم بس صياح وغلط وهو من بينهم اسمع صوته يصيح
-اطكك واكسر خشوم جا المن رايد العشيرة.
وخالي شاكر يصيح عليه
شاكر:: ونضل احنه يوميه دافعين فصل من وراك.
صــيهد:: تدفع وانتَ الممنون بحلالنه مو منّ جيبك.
رجع صوتهم عله يتعاركون ولد خالي شاكر بس يردون يسكتون ابوهم اخذوه ورواحوا ماراضين على كلامه ووهب اخذ صــيهد وطلع، بقيت على رجلين خاله عيوني من البجي يحرگني ساعة الوم روحـــي لان حجيت ساعة اگول جان لازم احجي، غفيت بين دموعي للعصر يله كعدتني گالت
ايمان:: كوني غسلي وتغدي.
كمت من يمها، جده وسعاد كاعدات بالهول واثنينهن يباوعلي بخزر مشيت للمشتمل مختنگه هسه هاي غريبه امنا بالله انتِ شبيج مو من دمج ولحمج شبيج كارهتني.
رتبت الغرفة مختنگة طلعت للمطبخ الدنيا ترعد بقيت وحدي للغروب وشكد اني اخاف بس گد ما مختنگه ما اهتميت، فتحت شباك المطبخ چبير وناصي صار مقابيلي شجر وساگيه وكفت يمه اتأمل الدنيا ترعد وبدن قطرات المطر ينزلن ببطئ وحده وحده ويتوزعن مره على الزرع ووي ماي الساگيه وصوت كل قطره احس افرزنه واسمعه الي يطيح على ورقة الشجر واللي يطيح بالماي واللي على التراب. سندت راسي على حافة الشباك حاضنه نفسي بنفسي
واستمع الصوت المطر اللي شوي شوي يزيد ويقوه يغسل كل ورقة شجر يمر عليها، بقيت اباوع واسحب نفس طويل احس اطراف ايديي جمدن وخشمي برد حيل.
اباوع للمطر اللي بدأ يتجمع على حافة الشباك ويبلل حتى داخل المطبخ غمضت عيوني حييل مركزه بس باصوات المطر
وفزيت من حسيت أيد مشت على بطني وصدر دافي جر ظهري عليه بقيت مغمضه عيني بمجرد شمست ريحته ضم وجهه برگبتي نفسه دافي واني جامده، خليت ايدي فوگ ايده اللي على بطني يجرني الصدره اكثر وخرت ايده من بطني التفتت عليه باوعت لوجهه ودرت منطيته ظهري واباوع من الشباك احس الكلام وياه ضايع
حسيت بخطواته من مشه مبتعد عني بقيت بمكاني محتضنه نفسي ومركزه وي المطر، لحظة وحسيته وراي لفني وياه بالفروه مالته رجعني الصدره اكثر زفرت نفس طويل ما ادري شحجي وياه، جسمه الدافي حاوطني ولحيته على خدي حجه بهدوء
-هاي اول مره يجون؟
-اي.
-همم.
سكتت مابيه لا اعاتب ولا ابرر ولا ل حاضني ساكت فترة طويله الحد ما تعبـــت سد الشباك وجرني من إيدي للغرفة دخلت يباوعلي بهدوء هز راسه يسأل
-شني زعلانه؟
-بكيفك شتكول انتَ؟
-وعليمن بله واذا طكيته فد مندله هسه هوه؟ لو هم تردين تشدين ظهرج بيهم وترحين؟؟
ضحكت اهز بأيدي وهو تخبل صيح بحرگه وضرب ايده بالميز خازرني وماد ايده
-شني تهززززين ايدج مسودن گدااامج؟
رجعت ليوره واباوع الايده هي عايزه تمد ايدك علي حتى تكمل وياي صيح وغلط يسب بيهم
-ما دافعتلهم اني ولا رايده اروحلهم.
-سددي حلگج سددي حلگج.
-شويه خلي عندك اسلوب.
فتح عينه حييل خازرني ووگف بحرگه وصياح يسبهم واحد واحد وانه اهز راسي اي كنل كمل هوه هذا انتَ شيغيرك هيج هيج من امج وهيج هيج من ابوج ومن عمامج.
-رحم الله والديك.
يحجي بحرگه وطلع من البيت يرگع بالبيان خابرت عفراء ابجي واشكيلها محد يفهمني غيرها
-قبل كم يوم اسلوبه صار شحلاته من أبوي عايش وهسه من مابقالي احد رجع النفس الاسلوب يسب ويغلط ويعصب على اشياء ماتسوه وبس يريد يطلعني غلط.
عــفراء:: شبيه شسالفه عود گلنه يا الله
-والله العظيم تعبني حتى من احجي وياه سالفة عاديه خايفه ومتحذره لا اغلط بشي ويتعصب متقيده بكلشي وياه حتى بتصرفاتي ما مرتاحه.
-سوده بوجهي كون انه اله وعلي اشوفنه لو لا، لا تبجين جــويريه خاب عليمن هسه رايحات عيــونج، خيه صــيهد يعشگج بس هاي شمرته لا يعرف يعبر لا يتصرف بدون عصبية، بس وعلي فد حنين ويحب من كل گلبه اخيي واعرفنه.
-عشگ السود ومصخم ما اريد هيج عشگ.
-اجيج تجين يم اهلي؟
-لا ما اريد
-جا لا تبجين مردتي گـــلبي .
مسحت عيوني وهيه ملت من عندي كد ما حجت ونصحت والمثل صــيهد ما يجي وياه لا العناد ولا النتر بنفس الأسلوب لازم تحاجينه بوقت الهدوء وتفهمينه شكد تصرفاته تقهرج وازعلي وخليه يفكر شسوه وزعلج ولا ترحين من يمه المكان ابقي گدامه وزعلانه.
بس اني شيقنعني بهالكلام غير الخنگه ذبحتني، سديت التلفون منها بقيت للعشرة ونص وحدي وهو بهدعش يجي قبل لا يرجع بدقايق لبست عبايتي ورحت يم خالتي ايمان البيت هدوء بس اسمع ندى ووهب يتناگرون هو بارد يضحك وهي نار ومشتعله.
دخلت للغرفة فزت بــدور نايمه يمها مصخنه
-خاله عادي انام يمج؟
-تعاي يمه تعاي هذا فراش رغد مديه ونامي.
جريت فراش رغد فرشته وتمددت بالزاويه بصف الحايط وهي سكتت ماحاجتني ساعة مرت ردت بسّ أغفى ما گدرت شويه وسمعت صوت الباب انفتح على كيف وصوته يهمس
-يمه.
-ها يمه؟
-اهلي يمج؟
-اي هاي هل نايمه شمالك وياها خايب صــيهد.
غمضت عيوني حيل وعلى الصوت اتخيل حركته، دخل للغرفه وصوت الباب انسد وراه سمعت صوته من باس امه گالها
-ما مسويلها شي.
-تعلمني بيك؟ انه امك اعرف البير وغطاه لحد يا وكت تضل هيج على ساعة تطكك جلطه من وره هالحرگه عليمن على ابوي؟
- خوما تردوني اسكت؟ جا شني فالتوه هيه اليوم اجاها للكليه باجر يضحك عليها بحجايه حجايتين ياخذها وياه وبساعتها اكتلها واكتل روحـــي .
واسمع صوت ضربه وامه تحجي بغصب
-سدد حلكك عليت گـــلبي ولك هود ولك يمه بسك من هالحچي هذا يرد عليك، لو احترك گلبك من سالفة شورلك واحد اخذ راي احد، هم تروح منك الحرگه وهم تعرف تتصرف صح.
-جا انا زوج اتاني الحرگه تروح غير حار بحار گبل ما ابرد.
رجعت امه ضربته وهو يگلها
-كاافي ايدج ثگيله.
-والحسين يكون تزعل البت بعد اخذها منك.
-ما مسويلها شي ترى.
-اي صدگتك كوم عني گوم.
-اريد انامن يم مرتي.
سكتت خاله واني گـــلبي احس راح يطلع من ضلوعي ما اريده يجي اريد ابقى وحدي موكلشي يحبه بحضن كل ماعصب وخرب الدنيا تعاي احضنج وهاي هيه انسي.
حسيت بيه وخر الغطا وتمدد وراي يشم شعري ويغلط
-الخبيثة الحقيرة.
ايمان:: راح اطردك.
سكت خانس وانه حتى من يحركني يجرني اروح بأيده ما أريد يعرفني كاعده، حرك شواربه على رگبتي وجتفي باسني على النجمة ومد ايده على خصري حضني ورفعها من خصري الگلبي بلعت ريك وهوه ضحك خنگ كاشفني كاعده.
دفعت ايده من كلبي رجعها الخصري يكرصني ويضحك دفعته حييل وبعكسي ضربته ببطنه صاح موجوع
-ااااخ.
ايمان:: يمهه ابني.
وكفت على حيلي اريد ارجع للمتشمل واقفله علي توني مشيت خطوه وجرني من رجلي جبحني على وجهي فوك بــدور وخاله صاحت
-ييييمه ماتت بتي يمه.
وبدور كمزت على حيلها لازمه البطانيه بأيدها وتصيح
بــدور:: يييمه اجاااني ييييمه.
-يمه اسم الله الزهره يمه.
شعلت الضوه باوعتلي عيونها حمررر شمرت البطانيه ايدها على گلبها وتحجي بحرگة
-شمالجن؟
باوعن وراي لكت صــيهد عاگد حاجبه وبسرعة هز راسه يسأل
-ياهو الاجاج؟
تمددت بحضن خاله تگله
-القرين؟
-يا صخام؟
ايمان:: تعاين افلام رعب وهل تخاف.
شالت راسها خاله باوعتلي يمها عكازه مرات نحاول نخليها توكف بس عليها شالتها تحجي
-ردي لفراشج.
باوعتله بخزر ومارحت يمه جريت بطانية بــدور وتمددت يمهن توني غفيت وحسيت بيه اجه يريد يسحلني وخاله تگله
-اكسر اديك بس تسحلها دولبتها خل البت تناام
-اشيلها يمه هسه شبيج رحمه الابوججج شبيج قفلتي عليَّ اليوم؟
-وهرش آخذها يله ظهرك صحى هسه بيك حيل تشيلها.
واحس بيه حط ايد جوه راسي وايد جوه رجليَّ شالني لفراشي وتمدد بصفي بقيت ساكته وبسرعة رجعت نمت للصبح مالكيته گالت خاله راحوا بشغله، صادفت عطلة الزيارة، خالي وليد وخالي شاكر ومرتضى راحوا للحسينية وولدنا ولا واحد راح هالمره.
للظهر واجوا وهـــب وصيهد مستعجلين آخذوا فلوس ويحجون وي امهم رايحين لكربلاء للحسينية كالتلهم
-ياهو وياكم؟
-كلنه بس بريا وميثم راح يضلون هناه.
مشيت للمطبخ وهـــب يتسول بندى ماتزعل منه ويحلف يحرك گلبها لان يحبها تعصب صاح عليه صــيهد وهوه دنك باس رضا وطلع يركض.
""
وهـــب:: بهالساعة عرفت احنا ولد العم عادي عدنا نصير سوه ضد اهلنه، من كشفنه للحسينية بأسم عمي شامل خططوا نروح للحسينية وغاد نفشل عمي شاكر، اسوق متحمس لشكل شكوري، وصيهد جايبني تدمغ لان أمشي سريع كرهني بالسياقة كلها، روحـــي طلعها لمن وصلنه العصر عمي شاكر بس شافنه گال للزلمه
-هاي ولدنه هل اجوا يعاونونكم.
نفس حچاية جدي بكلّ سنة، سلمنه على الرجال وولده وهمه حتى ملگاهم هالمره اختلف صاير بخاطرهم من عدنا لان شكوري خلاهم يدفعون ايجار
وبس غسلنه وارتاحينا گمنه وياهم نوزع على الزوار و وطرواده وصيهد كضوا الچاي يوزعون مكيفين هذا اخوي ببيتنا الاستكان مايعرف يخوطه وهنه يجلف جلف
صورتهم لبريا وهمه يوزعون ويتهامسون يخططون شلون يجلطون شاكر، واحد من ولد ابو الموكب يعرف طــروادة يحب قصيدة عملة كربله شغلها بالمسجل التفت عليه طــروادة مبتسم حط ايده على صدره وهوه راح الغير عالم يقرأ وياها مندمج
كضينه التوزيع مال العشا ومشينه وياهم للدوانيه الرجال بأيده يجيب عشانه ويرحب ويهلي بينه كضه طــروادة من ايده
-اكعد عمي عدي حچايه وياك.
-تعشا يبوي والحجي لاحكين عليه.
-ابد والله خلني احاجيك هسه .
كعد الرجال يمه، وعمي شاكر يفر بسبحته خازر طــروادة ومترهي .
طــروادة:: عمي الحسينية الكم صدقة جاريه على روح ابوي لا اريدن منكم ايجار ولا غيره كل الاريدنه بكلّ اربعين تخلينه نخدم زوار الحسين وياكم.
اعاين لوجهه ابوي وعمي تگلبت ذار عينه عليهم مبتسم وحط ايده على ايد الرجال گاله
طــروادة:: الحسينية الابوي ومحد يگدر يطلعك منها دام انا اشمن الهوه.
جره الرجال باسه براسه وواضح فهم السالفة عاين الشاكر الوجهه صار ما يكصه السيف گاله
-بويه كهلان انا ما متعاجز من ايجارها ادفعه لو شما يصير فـــدوه للحسين.
طــروادة:: ربع دينار ماتدفع عمي بس كون تخلينه كل سنة نخدم وياك.
كيف الرجال محتار بينه وابوي وعمي تگلبت وجوهم عفناهم بحيرتهم محد منهم فك حلگه وحجه، وگمنه للموكب ردينه نوزع وهمه ردوا ويانه مثل گبل بصحبتهم الحلوه.
""
مــاسه:: كلها بصفحة وجيت النسوان علي بصفحه امي مامخليه وحده مارايحه عليها خلت النسوان من الصبح لليل تجر علينه وانه ماعرف اسولف وي غريبه اخلصها بس اوزع ابتسامات وياهن وماريا توزع چاي عليهن لحد ما مبت گامت ماتسوي جاي جديد تخليه نفسه وتحميه الهن، السباعيه بينا رغد تعرفهن كلهن هاي بت فلان وهاي مرت فلان وترحب بيهن.
وماريا تفتر على حور كل ما تطلع مره من يمنه تجي تدور فلوس وتكلها
-يخرب بيتك شو تقيله.
-تف تف عين الحسوود بيهاا عوووود.
ماريا:: ليكي شو رأيك نتقاسم المصاري انا وياها؟
تحجي وتضحك مديت ايدي على حور
-شوفي عمتك يمه حطت عينها على فليساتج.
ضحكت ودنگت تبوسها حييل، دخل علينه ابو حلقة كعدت ماريا عدل تعاينله مدري شماله رد عبالك غريبه عليه كعد على القنفه يريد يلعب بلي گتله
-ماريا فد قوية
عاينلها وهي رافعه عينها متردده حتى تعاينله ابتسملها وأشر براسه تعاي ضحكت رمشت بساع كعدت يمه لعبت وياه ناگدرته غلبها وضوجها كالتله
ماريا:: كرمال رنـــه اتركلي هالمره لأربح ياااه قديشك غليظ بتنرفز.
ضحك ضحكه طويله وعاين الايده البيها حلقة مبتسم وماريا بساع گولت عليه وصرخت مكيفه فززت خور وهوه يگلها
-صوووتج صوتج يابه وصل لبيت غانم.
تركصله حواجبها مكيفه كالها
-اوديج يم رنـــه؟
-لا.
-مو صوجج.
تضحك عليه كام من يمنه وهيه خابرت رنـــه من تلفوني تحجيلها على بريا وهذيج بس تضحك.
رنـــه :: غير گمت اخافن اشوفه لو ما عاقدين احسن جنت ولا اخافن من شي، ضلينه بس إحنا بالبيت طــروادة گال وره الاربعين يله اخذكم للزيارة سكتنا وهوه والولد راحوا.
مشيت يم السياج الغروب گـــلبي يدك حيل صعدت على الدرام عاينت على بيتهم وفززني صوته بصف الحايط
بريا:: هذا انا
شهگت فازه واكف بصف الحايط ابتسم وصار گبالي
-شلونج؟
-زينه انتَ شلونك؟
ضحك مدنك مسح على شواربه ورد عاينلي مبتسم
بريا:: يصير اشوفنج من الباب؟
هزيت راسي لا واحجي بخجل مدري شمالني
-طــروادة مو هناه ومايرضى.
هز راسه خوش وجر نفس طويل يعاين بعيوني
بريا:: رنـــه
عاينت لوجهه ساكته
-سودنتيني والله العظيم اريد اموتن من وراج نوم ما إعرف انامن .
عگدت حاجبي واحس گـــلبي يدك حيل مديت ايدي احجي
-شني السالفة شمسويتلك؟
-ما مسويه صوتج جاي نسولف احجي على كيف واعرفي ليمت الواحد يحجي بعصبية وليمت يحجي بهدوء.
-ما مسويتلك شي انه ليش تموت من وراي؟
حجيت بهدوء واعاين لعيونه كلساع يتحسر
بريا:: ما مسويه شي، انا جنت افكر خاف لا يحلالج غيري وترضين بيه.
دنگت اهز راسي لا ورديت اعاين لوجهه وابتسامته عيونه حتى من ماكو شمس گوه فاتحهن
-هسه مو عقدنا بعد لا تفكر هيج.
-لا هاي هيه الحمدلله رناتي البدوية صارتلي.
-بريا راح انزل انه استحي وعلي.
حجيتها وبساع نزلت من الدرام اطكطك وهوه يصيح
-لاا لاا والله ما احجي بعد تعاي نتعارك والله نتعارك.
-ما اعرف اعاركك بعد.
-هسه انا الگالج سبب يسوه العركه، تذكرين من ذبحت الطلي مالتج؟
راحت ابتسامتي بساع وصعدت على الدرام ماده ايدي واحجي
-جا عبالك ناسيتهن الك اصلاً رضيت أتزوجك حتى بالليل وانتَ نايم اذبحنك مثل ماذبحته.
-وتتذكرين الديج ؟
-جاي تحرك گـــلبي ترى شوي بعد واجرلي بلوكه افشخك بيها.
ضحك مخلي اديه بجيوب القمصله مالته. ابتسمت اعاين بوجهه گال
-رنـــه وين الفروه مالتي؟
-ضامتها.
-هم لبستيها؟
هزيت راسي اي اخس اطراف رجليَّ يطكطن وگلبي يدك حييل ووجهي يبخ حراره ابتسامته تخمس گـــلبي گال
-اريدنها وگبل لا ألتحق اردها الج.
-ليمت تلتحق؟
-وره الزيارة بيومين.
هزيت راسي خوش ونزلت مشيت اجيبله الفروه طبيت للغرفة اخذتها جم مره عبود يبوگها مني وارد ابوكها منه، خليتها ومشيت الريمه واكفه بالمطبخ تسوي عشه
-احم ريـــمه.
التفتت علي تثرم بالزلاطمه
-عاينــي كلشي آعرف وادري حرام زلمه يشم عطري بس هسه انه وبريا عقدنا وهادي اذا يشم عطري مو؟
ضحكت رافعه حاجبها
-ها وولج؟
-ريـــمه احجييي.
-اي عادي جاي تحجين وياه؟
-اي.
غمزت غطيت وجهي وطلعت من يمها رشيت على الفروه عطر وطلعت اتختل لا يشوفني حسين وينگلب عليَّ طــروادة، صعدت على الدرام مديتها اله بس اخذها لبسها ويشم بيها
-اللله.
-بريااا
-روحه ودنيته كلها.
ارتبكت مدري وين اودي وجهي وهوه كلساع يشمها ويصيح الله يخليني اررجف ومن شافني صدك مرتبكه غير الموضوع گال
-رنـــه شتتمنين؟ هم مره تمنيتي شي وماصار؟
-لا كلشي اريده واتمناه طــروادة وعبود يسوونه.
هز راسه خوش كتله
-بس شغله وحده لا
-شنهيه؟
-ماخلوني اروحن للمرعى اسرح بالنعجات گبل اذكر جنت اروحن وي ابوي واشتاقيت.
يعاينلي يضحك
-هاي امنيتج تسرحين بالنعجات؟
رفعت اجتافي ما ادري
-حلو المچان
-ولج جدي جان من يعاقبنه يطردنه للمرعى.
-هنيالكن ونسه هاي مو عقوبه.
ضحك من كل گلبه صفن شويه وگال
-الصبح الساعة بالسته انا اخذج للمرعى.
-لا يمه طــروادة يذبحني ياجر يرد هوه.
-مالج غرض بيه انا اخابره واتفق وياه مايحجي بعد حطيبتي انتِ.
سكتت وميثم صاح عليه گال
-روحـــي يله بالسته اجيج.
-بس گول الطرواده.
-اي.
نزلت مشيت للبيت مكيفه واسولف الريمه وماصدگت صار الليل نمت ووقتت تلفوني بالخمسة ونص كعدت صليت وبدلت بالستة ضبط اجه ريـــمه كاعده وياي كالتله
-حاجيت كهلان؟
-اي خويه.
-لا تبطي فـــدوه وديربالك عليها.
دارت علي تحجي همس
-احلبي الهوايش وياج
-صدك اجيبلج حليب منهن؟
-امشي عمي امشيي.
طلعت اضــحك صعدت يمه الجو بارد ثلج وبعدها الشمس ما مبينه، مشغل دعاء ويسوق مبتسم كتله
-هم اكو زلم بالمرعى.
-فرغته كتلهم انه اضلن هناه وانتم لثمانيه ردوا.
-عفيه عفيه .
احجي وهوه تكضه الضحكه. وبس وصلنه للمرعى كله خضار نزلت افتر بحماس وهو مشه هد النعجات آجن الزرع يركضن وانه اركض وراهن اضــحك بصوت مكيفه وافتر وياهن من مچان المچان، وهوه يمشي بالطرف يبرالي يضحك الضحكتي.
وطليان النعجات الصغار يفترن وراي وعايفات امهاتهن
ركضت وعبايتي طايره وراي والطليان يركضن وياي يلعبن، تونست وضحكت من كل گـــلبي واحس بيه من يصورني افتر يمي هو واكف وانه كاعده الحشيش بيه رطوبة ندى حطيت ايدي جوه وجهيّ مبتسمه كصلي صورة وباس شاشة التلفون.
درت وجهي مصخنه كطعت حشيش بأيدي ومديته للطلي احجي وياه
-اكل حبيبي اكل.
بريا:: انا حبيبج رنـــه ركزي.
واريد ألطف الجو واكله اي انه احبك بس بدون ما احجيها كتله
-اي انه كل الحيوانات حبيباتي.
حجيتها والضحكه شاكه الحلك وهو تلاشت ضحكته وهز راسه بأسف مشه مسافه عني يحجي
بريا:: احمدك واشكرك ربي، مضحيّ بنومتي العزيزه بلكن اسمع حچاية حلوه هاي تاليها الحمدلله والشكر.
وكف مسافه عني يدخن كمت من الحشيش انكث بعبايتي امشي مناه ومناه والطليان يمشن وراي درت عليه
-بريا عادي ابوگلي واحد؟
-لا بس تبوكين اذبحنه.
-غدييي، تعالن روحن الامجن ارضعن.
مشيت يم النعجات داسن على الزرع فد دوسه
عاينتله مدنك ضايج ويدخن صحت عليه
-بربر.
شال راسه ابتسم وذب الجكاره اجه يمي اديه وره ظهره
-ها گـــلبي .
-نبوك حليب من الهوايش؟
-وين نعرف نحلب اكعدي ولج.
-شينراد نمونه إنه اعرف خطيه هاي مرة طــروادة اشتهت حليب أظن تتنسى.
حك شعره محتار عفنه النعجات ومشينا يم البيت طب جاب سطل ستيل مال حلب، كتله
-حط بيه ماي حتى ننظفها قبل لا نحلب.
-ولج منين تعرفين.
-موكتلك جنت اجي وي ابوي واشوفن .
خله ماي شويه رمشينا للهوايش خطيه حاطيلهن علف ياكلن وانه افتر عليهن وبريا يكض بأيدي يكلي
-لا يزگطنج ويكسرن رجلج.
-لا لا حبابات مبينات انتِ كضها من اذنها العب وياها وآنه احلبها.
هز راسه خوش اختارينه واحد من جهالهن هديناه حتى نندل وين امه مشه بساع الامه يرضع مشيت وراه من صارت صدك خفت بريا كضله عصا ووكف يمي يحككلها ويتلوگلها حتى لا تنطحنه.
دنگت خايفه اريد احلب وابنها يتسابق وياي ياهو الامضه ياخذه من عندي، غسلتهن ولدمت اثنين
-وخررر والله هذن الي وهذنيج الك.
بريا:: تحجين وياااي؟
-لا لا وي ابنها.
ومدري شلون ما نطحتني اعصر وماكو حليب ويريا يگلي
-ماتعرفين اظن مو هيج.
-بس اسكت انتَ بس اسكت.
واحلب واغير بالطريقه الحد ماعرفت
-عررفت عرفت.
-عفيه يله ريحتنا صارت تمتل فضيها.
-الله صاررر هواي.
-وينهن مابيهن استكان .
واحلب احلب حطيت السطل بالگاع واحلب بأثنين ايديي ليش ما الهايشه بت الهوش. رفست السطل برجلها وجعصته حرگت گـــلبي . وضيعت تعبي
بريا:: عوفيهن امشينا هسه اشتريلج حليب
-ابد والله الا انه اخلب تعال نجرب غيرها.
مشه حاب سطل ثاني وهدينه عجل صغير جديد راح يركض الامه هالمره ضليت كاضه السطل بأيدي ماتيهته حلبت شويه گال
-كافي هاي بيهن كلاصين.
كمت مكيفه وكاضه السطل بأثنين ايديي عبيناه ببطل والتفتنا على صوت سياره سلين نزل طــروادة وبس شافني عض ايده واجه يمشي باتجاهنا بس وصلنه گتله
-غير مرتك رادت حليب.
طــروادة:: انا مو كتلك لاااا؟
صيح على بريا وهو يضحك گاله
-قريتها اي خوش روحوا.
دار عليَّ طــروادة بخزر
-امشي للسيارة بساع.
مشيت وكاضه بطل الحليب بأيدي درت وجهي على بريا واكف گدام طــروادة مبتسم وطرواده يرزل بيه، حطيت ايدي على شفايفي بستهن وشمرتها اله لان ما اگدر اكله شكراً لان جبتني هناه، ضحك حييل وميت بساع للسيارة اجه وراي طــروادة صعد ورگع الباب حييل راد يحجي وسكت مت شافني مبتسمه ومكيفه احجي بحماس وارويه بالحليب
-والله انه الحلبت والقران شفت كتلك جيبلي هايشه تستفادون ماجبتلي.
وهوه يسوق ساكت لمن وصلنه للقرية نزلت ريـــمه تطكطك بأصابعها بالحوش راويتها الخليب اضــحك
-حلبت وجبتلج
ريـــمه :: حطيت ايدي على گـــلبي وغميتها غير روحـــي راحت من فجأة طب للبيت صدمني توهم رادين من الزيارة وعبالي صدك بريا كايله گبل لا ياخذ رنـــه .
اخذت الحليب منها فرحانه عبالك مسويه انجاز سويت ريوك وهيه جلبت الا يشرب من الحليب خبصته سطرته سطر جبرته يضحك گد ما فرحانه وتصيح
-هسه اسويلكم منه روبه ولبن.
-خيبه هنه صارن كلاصين يا روبه يا لبن.
ضحك يهز بأيده غسل وطب للغرفه ينام ، كضيت غرض البيت واعاين الامي طلعت بساع لبست عبايتي ومشيت اشوفن هاجر لان مصخنه، طبيت للبيت هادئ ســليم نايم، صعدت فوك فتحت باب الغرفة شفتها نايمه ودفتر الرسم ضال يمها مفتوح على رسمه.
جريتها اعاين بيها مستغربه بومه على واكفه على حافة شباچ واحس بروحي هالشباج شايفته اعرفنه گلبت بالدفتر مابيه اي رسمه جديد وبس هاي الرسمه بيه.
عفته على صفحة وكعدتها ماحاجيتها شي سويتلها ريوك وضليت يمها ساعة گبل لا ترد امي رديت لبيتنا.
ردوا ابوي وعمي من الزيارة وابد ماحجوا بسالفة الحسينية ولا واحد جاب طاريها،وره يومين بريا التحق ورنه كالبه وجها ضايجه
كاعدين بالحوش انه وياها هي تدرس وانه انظف خضره العصر ومتانين طــروادة يرد من السوك،
فجأه فزينا على صياح الولد بادن رجليَّ وكمت اركض لباب الحوش فتحته اسمع صياحهم وركضتهم ومافاهمه شي طلعوا من البيت بسلاحهم يركضون للسيارات صيحت ارجف وايدي على گـــلبي .
شكرا لزيارتكم عالم روايات سكيرهوم
