رواية أرض الخناجر الفصل الثالث والستون بقلم ايلول
خَردة بأيد چَاهل گلبي مَمرود .
══━━━━✥◈✥━━━━══
ريـــمه :: اصيح وره اخواني ومحد منهم التفت ركضوا للسيارات وضلت وراهم بس الترابه ايدي يرجفن اعاين وراهم واسمع صوت رنـــه متخرذله تحجي روحها رايحه
رنـــه:: يمه اخوااني اخواني اثنينهم بره.
اسمعها وانه عيوني على الترابه الضلت وره سياراتهم عيوني يحرگني وره وراي تلطم ساعة تصيح اخواني ساعة تصيح بريا، مسحت عيوني اعاين لباب السياج من انفتح طلع صــيهد بأيده سلاح يمشي بهدوء الجكاره بحلكه وماد ايده بجيب الدشداشه يدور على السويج بعده ماواصل للسيارة وجرتني رنـــه من الباب صاحت عليه بصوت يرجف
رنـــه:: اخواني بيهم شي؟
عاين علينه مضيك عيونه ماعاجبه فتح السيارة ذب السلاحه بيها ورد عاين علينه حجه وي رنـــه من وره خشمج
-طبي جوووه شني ماكو طلابب غير اخوانج؟
قاتحه عينها كلها وتعاينله بخوف فتح باب السايق يريد يصعد صاحت عليه بصوت يرجف
رنـــه:: برياا، بريا بيه شي.
سد الباب وافتر يدور بالگاع شي يطكها بيه ويحجي بحرگه
صــيهد:: ايا بت الصلف طبي جوه لا انعل ساس اهلج
ريـــمه:: خويه بس كلنه شصاير اخوتي راحوا يتراكضون.
لبسنه ما مهتم صعد بالسيارة ونزل الجامه
صــيهد:: أبوج الخايس مسويه طلابه أبو الفصول.
حجاها وشغل السيارة مشه ورنه طبت جوه ايدها على گلبها وتحجي براحه
رنـــه:: اي الحمدلله راحت روحـــي.
ردت كعدت تدرس وأنه الوب وعيني على الباب وادعي كون ماكو شي وتفض على خير، شويه وسمعنه صوت سيارة اجت، كام حسين بساع طلع يتلگاه نزل المسواك وياه سلم على الرجال وطب للحوش بس عاين لوجوهنا گال
طــروادة:: سلامات؟
ريـــمه:: ماكو شي، الله يساعدك.
احجي وياه وحسين يطلب بعلاليك المسواك للحوش وزهره ركضت جابتله كلاص ماي بس شربه هز راسه
-واحد محاچيچن،
-لا والله بس مدري شصاير ولدنا اخذوا سلاحهم وراحوا صــيهد مال صايره طلابه ومافهمنه شي.
احجي وياه وهوه طلع التلفون من جيبه يسأل ويدور بالأرقام خابر على صــيهد وأشر على العلاليك
-شيلنهن يابه.
اخذانهن انه ورنه نعزل وكلساع نمد راسنا نسمعله وهو يحجي وي صــيهد وكضاها
طــروادة:: اي ، اي، خوش حجي جا شاكر شحاجي؟ الزلام مو حلفوا ابنهم ماله غرض عليمن هالحجي بعد؟ هسه شني؟ يله خوش، لا والله ما اجي طلابه وتخص شاكر مالي غرض بيها.. خل يحجون يابه شني ينگطع الهوه. الله وياك.
بس سد التلفون طلعلتله عاينلي ضم التلفون ودار لحسين گاله
-عدك دراسه؟
حسين بساع طبك الكتاب مكيف
حسين:: كضيت.
-كوم دور المناجل وخل نمشي للگيعان الساگيه صاير بيها زرع والماي ثگيل مايمشي .
ركض بساع يدور وهو مايخلي عيّنه بعيني لمن كتله
-كهلان شصاير؟
مسح وجهه وعاينلي زفر نفس عينه بعيني
طــروادة:: علمود كتلة جدي ابوج تاهم واحد من بيت علوان، ريـــمه ابوج يمشي بكيفه يعني الولد محد منهم يدري اليوم اكو كعده هوه وعمج وليد يتخمون من وحدهم، واحد زعطوط غالط عليهم بالمضيف وصايره گوامه تروح وگوامه تجي.
-يعني ماكو شي خطر لا عركه ولا شي اخواني مابيهم شي.
دار اخذ المنجل من حسين عافه على صفحة وطب للبيت يريد يبدل هدومه وانه امشي وراه لمن طب للغرفه سديت الباب ووگفت سانده ظهري عليه وهوه يدور بالكنتور على هدومه ويسولف
طــروادة:: هيه مال تكضي على خير لا ما تكضي ابوج مگاومهم وعشيرة ثالثة بالنص واسطة خير تريد تحلها تالي الخير وليد داس بنصها ومخرب السالفة يعني ابشرج ابوج مگاوم بيت علوان، واحنا بيت حمد مگاومينا ومناه طلابة صــيهد راح تكضي العطوه، بعد ضلت يم الله .
تحسر يلبس بهدوم الشغل ضايج سد باب الكنتور ووگف كدامي مد ايده يتلمس خدي
-لا تخافين.
رفعت راسي اعاين لوجهه مبتسم ويعاين لوجهي
-شلون ما اخاف واخواني بنص السالفة.
-ماعليهم شي يابه هسه يردون.
هزيت راسي خوش وخر من يمي مشه لوره الكنتور جر التفكه ولبسها بجتفه، بلعت ريك اعاينله بخوف
-ها كهلان؟ جا مو تگول ماكو شي؟
مسح وجهه ولف الچفيه متلثم بيها
-جا انا دوم تفگتي وياي.
سكتت گـــلبي يدك بخوف، طلع وحسين هاد هاسكي لصغير واكف بالباب متانيه، مشوا وسدوا الباب وراهم اقل النص ساعة وردوا اهلي اسمع هوستهم وصياحهم بالساحة كلمن يجرله بصفحة وكل الفهمته عدنا طلابه وي ثلث عشاير، طلابة صــيهد، وطلابة بيت علوان، وطلابة بيت حمد.
شويه وراحوا لديوان جدي من اجتهم وادم يا الله بلكن تنحل.
""
جــويريه:: مات شعلان وگلنه خلصت ماكو مشاكل بعد تالي صارت المشاكل كل ثلاثة سوه وحده ما تكفيهم.
اجت رغد تساعدنا قواري الچاي مايطفن مايكولون كافي نودي صينية وره صينية، اعاينله من باب المطبخ طلع اعصاب وسلطان ووهب يحجون وياه بس يردونه يسكت وهوه يصيح على سلطان
صــيهد:: ولك يريد ينداس علينه؟ لا هو كفو ويعرف يحجي ولا هو ساكت ومخلينه نحجي.
وهـــب:: زحمه من الوادم صــيهد تسودنت؟
يكضونه ويجر روحه منهم يفور غالطين عليهم ومن شاكر راد عليهم كايله هوه انتم بيت شعلان منيلكم زلم وتزامطون، ويا ريت الحاچين كبار كلهم مراهقين ويركضون على السلاح، رجعوا للديوان والسالفة مانحلت عافوها معلگه وي بيت علوان وودوا ناس على بيت حمد ياخذون عطوه، بقت ناس تروح وناس تجي للتسعه بالليل احنا على فد وكفه لحد ما اخر شي. طلعوا من الديوان شيخ حيدر ووياه زلم معگله.
كعدنا بالمطبخ تعبانين ندى حاطه رضا على رجليها وتهزه ينام كالتلها رغد
-كومي ندى غسلي وامشي نوميه خطيه فرفح من البچي اليوم.
ندى:: هاي كل ما تصير هوسه وعدي شغل يچلب الا تشيليني ولك يمه غير اريد اشتغل.
گامت اخذته للغرفة تنومه ورغد وكفت غسلت اديها
-جوري انه راح اروحن فـــدوه بس شوفي امي گبل لا ترحين للمشتمل.
-اصلاً جاي انام يمها.
دارت عليَّ مستغربه
-بعدج؟؟
-اي.
سكتت لبست عبايتها وراحت، كنست المطبخ ووگفت ارجع المواعين المكانهن، طلعت سعاد من غرفتها باوعتلي
-سوي عشه الخالج راح يرد جوعان.
-ما اسوي تعبـــت اني صارلي ساعة اشتغل.
فتحت عينها حيل متخوصره
سعاد:: كون صدك وماتسوين الا اخليه يكسر ظهرج.
غلطت ومشت الغرفتها مسحت السنگ احجي وي روحـــي والله ولا اسوي، هستوني سديت ماي السنك ودخلوا وهـــب وصيهد يسولفون، عبر من يمي رايح الغرفة امه وهو فايت گال
-چاي چاي جوري.
حميت الچاي واخذته الهم للغرفة لكيته لازم كتاب الرياضيات يدرس ببدور وهي وجها صاير اصفر وبس تهز براسها خليت الچاي گدامه وانطيت الوهب وخاله وهـــب يحجيلها على المشاكل الصارت باجر عدهم الكعده مال عمامي تمنيت اعرف ليش عمي ابو ياسر عاف بغداد واجه هناه، درت عيني الوهب اسأل
-هوه ليش اجه لهنا؟
باوعلي وهـــب ساكت ودار عيونه الصيهد سكت مدنك على الكتاب رجع وهـــب باوعلي
وهـــب:: والله خويه ما ندري ياهي مالتنه بيه عسى ما يروح الجهنم بس خل تفض طلابتهم وجعلنه لا شفناهم بعد.
هزيت راسي خوش متحسره دنك باس ادين امه اثنينهن من باطنهن
وهـــب:: تصبحين على خير يابعد رويحتي.
باسته براسه تحاجيه
-تلاگي الخير يمه.
وكف عاين لصيهد وبدور ضحك
وهـــب:: البت راح تموت كرهت حتى الرياضيات عوفها.
شال راسه صيهذ عاين لبدور هادئه وتعصر القلم بأيدها دنك كمل الحل ووهب طلع، حط الدفتر بأيدها وتقرب يم امه مرغ رجليها يسألها على صحتها
ايمان:: نعمه ونحمده ونشكره.
گمت من يمهم جريت فراش رغد فرشته ودرت عيوني اله خازرني ما اهتميت، ابد ما يبرر عادي اكسر الدنيا وارجعلج احجي طبيعي وانتِ تماشي وياي وانسي الفات.
خاله بقت تتحمحم درت عيوني منه خليتلي مخده وتمددت جريت تلفوني اباوع بيه وكل ماتصير عيني لصيهد اشوفه بعده خازرني مسح وجهه وحجه بنتر
-گومي اكوي دشداشتي اريدنها باجر.
وخرت التلفون من وجهي احجي بهدوء
-الصبح اكويها.
-لا هسسسه.
نتر خازرني وامه لزمته من ايده تحاجي بهدوء
-صووتك، تعبـــت من العصر الهسه بالمطبخ الصبح من تكعد تكويها موش عطله باجر؟
-كووومي.
ووي صوته انفتح الباب ودخلت سعاد تبجي وتحجي بحرگه وي خاله ايمان
سعاد::يرضيج هالحجي ايمان يرضيج؟ انه مره مريضه حيل مابيه ونخيتها بس تحط العشه الخالها، خيبه خيه تگلي احطن مرض ترضينها؟ وولا حطت ولا رضت.
بعدني ماحاجيه وخالي وليد دخل يصيح ويغلط عليَّ وعلى صــيهد
وليد::لو بيك خير جا كسرت ظهرها، ولج بت الچلاب تغلطين علينه؟؟؟
يصيح بحرگه وصيهد وكف يباوع لسعاد، ابوه بس يريد يدخّل يضربني
صــيهد:: ما غالطه مرتك تذب حچي عليها اكسر ظهرها لو بيك خير
شال أيده ضربه راشدي حيل شهگت فاتحه عيني كلها بــدور وكفت بخوف وخالتي ايمان تصيح عليه ماقابله يضرب صــيهد وهوه لازمه من ياخته يعتب بيه ويغلط وصيهد مخلي اديه وره ظهره لازم ايد بأيد وعاصرهم بقوة، اجه وهـــب يركض جر ابوه من صــيهد يغلط عليه وعلي وصيهد يفشر ويغلط على سعاد، وجده من وحدها مدت لسانها تسب بيه وبأبوي
دار وهب على صــيهد يسد حلگه دفعه يغلط على سعاد
صــيهد:: انعل والديج بت السگط
وخالي وليد متخبل بس يريد يلزمه ويضربه مسحت وجهي احجي محترك گـــلبي
-والله العظيم ماغلطت بس كتلها تعبانه اني.
وجده من يمها تصيح مفرفحه
-منين تعبتي منيين هوه چاي شمسويات الله اكبر ما تكضي طلاييج يا جــويريه ما تكضي.
صــيهد:: اششش يله مالج غررض.
رجع خالي وليد ضربه يصيح بوجهه
-توكف بوجهنا علمود مررتك يا حيف يا بووويه
صفك أيد بأيد متحسف ويهز براسه وصيهد نار ومشتعله
صــيهد:: حاااجي وياك انا؟ جاي اكلك مرتك جذابه جوري ماتغلط، مررتك الخبث يمشي بدمها وحده جذااابة.
يتعاركون وسعاد تمسح بدموعها خلّته يتخبل هو يحلف اني ما غالطه وابوه يحلف هو يوكف وياي حتى لو اني غلط دار عينه علي يتراجف صاح
-كومي حطي عشه.
يريد يثبّت الابوه ماعنده مشكله إذا اني صبيتله عشا مشكلته وي سعاد لان تجذب، خليت ايدي بالگاع استند عليها اريد اگوم وصارت عيني بعينها تباوعلي ومبتسمه بأنتصار وشماته، رجعت كعدت مسحت دموعي اهز راسي الصيهد "لا"، تخبل خازرني بغضب دنگت لامه رجليَّ الصدري ابجي وهم صوتهم يعلى غلط ومسبه الحد ما خاله تخربطت يله سكتوا وحاروا بيها يقيسولها الضغط ويشربونها علاج گمت للمطبخ واجت وراي ندى عصرنالها ليمون اخذه صــيهد من ايدي بنتر متحلف.
الحد ماصارت زينه مسح وجهه يحاجيها
-اخذلج للمستشفى يمه؟
هزّت راسها لا وبدور فوك راسها دموعها تجري فزيت من لزمته الايدي وكف بسرعة جرني وراه يمشي سريع ضاغط على إيدي بقوة دفعني للمشتمل سد الباب ودار شايل ايده يصيح بحرگه
-انتِ شني من بشررر؟ تعاندينيي؟
درت وجهي جسمي يرجف امي للغرفة وگلبي سابقني بخطوه، احس بيه من اجه وراي بسرعة اول مادخلت للغرفة جرني من زندي بقوة شهگت مجلبه بأيده ورافعه روحـــي على اطراف اصابعي بس اريد اقلت نفسي من ايده يعت بيه ويصيح يغلط
-گتلج گوووومي لو لااا؟
بجيت حاطه اصابعي فوك ايده افتح بأصابعه من ايدي
-تتشمت بيه سعااااد.
دفعني من ايده حييل وافتر بحرگه يسب ويغلط يدور على شي يكسره
-لنعل ابووج لا ابوها، شلج غرض بقنادر انا كتلج كوووومي .
كعدت بالزاويه ضامه روحـــي أبجي بصوت وهو يفتر بخبال يغلط ويسب طلع من الغرفة ورگع الباب حييل مسحت عيوني ادعي على وليد وسعاد الله يحرگ گلبهم مثل ماحرگوا گـــلبي الله يبلاج بمصيبة مالها حل مثل ما تتبلين عليَّ.
صارت بالوحده ونص وهو مارجع گمت غسلت احس عيوني مورمه بدلت وتمددت بمكاني ، بعدني ما غافيه ودخل للغرفة شغّل الضوه باوعلي بأيده علاگة حلويات شمرها على الچربايه يمي يحجي بهدوء
-هاج اكلي حتى تعاندين عدل.
مشه للكنتور يطلعله ملابس شلت العلاكه شمرتها على الميز باوعلي، رجعت راسي للمخده وجريت الغطا علي مغمضه واحس بيه من بدل وطفه الضوه اجه تمدد يتغطى وياي من شافني منطيته ظهري هوه هم سوه مثلي، غفست والصبح كعدني بهدوء يبوس بخدي
-جوري.
رجعت راسي ليوره كوه فاتحه عيني
-گومي سويلي ريوك خل اروحن.
گمت غشلت عفت قوري الچاي على الطباخ ومشيت اصلي يتصرف وياي ولا عبالك صاير شي ولا اكو زعل، ولا جنه صارله اسبوع بالطالعه والنازله يسب امي وابوي الحد ما يمل، سكتت سويتله الريوك الصينية على الكاونتر اجه يمي اكل وهو واكف مستعجل ويحجي وياي
-اكوي دشداشتي العصر عدنا كعده
-تمام.
-ما تتريكين؟
-شبعانه.
هز اسه خوش شرب چاي غسل ومشه للغرفة بقيت بالمطبخ غسلت مواعينه وارتب بيه باوعتله من طلع يلبس بقمصلته الجلد ويباوع لحذائة يگلب بيه مناه ومناه.
لبسها وماعدل ياختها جر تلفونه مدري على منو يخابر يباوع بالتلفون واجه يمي دنك راسه يحجي
-عدليلي الياخه.
مسحت ايديي بملابسي نشفتهن وهو خله التلفون على اذنه يحجي وي طــروادة عدلت ياخته گاله
-يله فضها ترى ابطل وروح طارد وحدك بالمعامله.
نزلت ايدي سدّ التلفون وباوع الوجهي مبتسم جرني برخاوة من نفس الزند اللي امس حسيته انفصخ من لزمته غمضت عيني بوجع باسني براسي ولم وجهي بين أديه
-محتاجه شي اجيبلج وياي؟ مسواك غراض؟
هزيت راسي لا ابتعد يمشي للباب ويحجي
-اذا ماعندج شي لا ترحين ليغاد ضلي هناه.
طلع وسد الباب جريت نفس مدري شبيه اختنك من هاي تصرفاته اني ما احب اعوف شي مكسور وعبره اكمل وما اهتم للصار ما اگدر شكد ما احاول ما اگدر، نظفت البيت وكويت ملابسه طبختله الغده ودخلت للغرفة بدلت اخذت ملازمي وشويه ملابس لبست عبايتي وطلعت من البيت گـــلبي يدك حييل قبل لا اطلع وديت رساله الندى گتلها اني رايحه ابيت خالي شامل خاف يسألون عليَّ.
مشيت بسرعة قبل ما واحد يشوفني دكيت باب بيت خالي شامل فتحلي الباب حسين وبسرعة صاح
حسين:: هلاا بمرت الذيب.
طلعت وراه ريـــمه بس شافتني فتحت ايدها تحجي
-ياهلااا.
دخلت مبتسمه سلمت عليها وعلى رنـــه لا اني حجيت ليش جايتهم ولا هنه سألني
رنـــه خابصه البيت عدها امتحان انگليزي وتخاف من طــروادة خاف تاخذ درجة ناصيه ويگلها بسبب بريا، تدرس بصوت عالي ساعة تخلص الكتاب على وجها وتصرخ لو تضرب الكتاب براسها وتگل الروحها
-احفظي احفظي رااااح امووتج.
وريمه تضحك وتگلي
ريـــمه:: لا تخافين ترى هيه مسودنه بس احنا ضامين هالشي مانحجي بيه خاف تضل على گلوبنه ومحد ياخذها.
ضحكت ورنه تربعت تحجي عليها وتشرح بذمه وضمير
-لج جوري ريـــمه مسويه روحها علينه مرت ابو لج تقفل الثلاجة شوفي خاف اني مجذبه شوفي.
ومشت لباب الثلاجة تراويني الرزه مالتها مخلينها لان الباب ينفتح وحده وريمه بباب المطبخ تضحك، ضحكت وسولفت وياهن للظهر من اجه طــروادة أرتبكت هسه صــيهد هم رجع وماراح يلگاني.
دخل طــروادة وبس شافني حار شلون يرحب
طــروادة:: كل الهلا خوويه كل الهلا بيتج هذا.
-الله يخليك.
بعده ما مبدل واندك باب الحوش بلعت ريك بخوف عاينلي عاگد حاجبه من سمع صوت صــيهد كمت من الهول دخلت الغرفة رنـــه گـــلبي يدك سريع شويه واجت رنـــه تضحك
رنـــه:: طرده.
-هاه؟
-رجلج اجه الطرواده گاله اريدن اهلي وطرواده گاله امشي ولي ما الك مره يمي خله وراح.
تحجي بضحك يش امي مدري شبيه خايفه طلعت رنـــه بسرعة من سمعت صوت عبود طــروادة يكتل بيه بالشقى رگضت تدافعله ضل الباب مفتوح اباوعلهم مبتسمه كلهم التموا على طــروادة طيحوه وزهره نامت على صدره وخانگته من رگبته يضحكون كلهم لزم رنـــه من عضلة رجلها حيل ضلت تصرخ وعبود يفرغ بيها وحسين يعضّ بأيده واحد يدافع للثاني والتموا فوگاه كلمن كاضه من صفحة ويكولون الرنه
عبود:: عضييه تعاي عضيه.
ورنه شالت الردانات متحضره تريد تعض اجتهم ريـــمه تركض المس بأيده كتلتهم تصيح عليهم
-وخروا من رجلي.
وهوه يضحك ويعيب عليهم محتمي بريمه، ورنه تگله
-راح اعوفنك هالمره الخاطر مرتك.
عبود:: ريـــمه جا انتِ المفروض تصفّين ويانه شمالج خويه؟
واكف گدامه وطرواده بظهرها كاعد مستند على الحايط يشرب ماي ويضحك وهي شالت المس بوجهه عبود تگله
ريـــمه:: امشيي اصف ويآه هوه؟ خاله شلون ناس أكلوه اكلوه.
ضحكتهم تارسه البيت وتخبل طفرت زهره الحضنه لزم اديها وبقى يدغدغ بيها وهي تصرخ بكل صوتها، فزعلها حسين فرغها وطرواده يگلهم
-اخابر عــفراء تجي تفزعلي.
دارت عليه ريـــمه شايله المس بوجهه ومتخوصره
ريـــمه:: انه مو بعيييينك؟
عبود:: حيييييل
رنـــه:: حل حل حل حتى النوب توكفين ويانه مو وياه.
طــروادة:: يابعد روحـــي انتِ مو بعيني بنص گـــلبي يرحولج فـــدوه عبود ورنه وسجاد وياهم.
دارت العبود تسويله حريگه وهوه يگل الطرواده
عبود:: لا لا هسه رنـــه ختولي ميخالف بس سجاد لااا لااا.
ضربته رنـــه على راسه ركض وراها وهي شردت تصرخ اضــحك الضحكتهم من كل گـــلبي، صاحت علي ريـــمه كمت وياها للمطبخ صبينه الغده ومدوا سفرة أكلت شويه مستحيه، للعصر طــروادة راح وياهم للكعده مال عمامي راسلت عفراء گتلها اني يم اهلج سكتت لا گالت تصرفج صح ولا گالت لا غلط، رجّعوا الغروب طــروادة مستعجل يريد يروح للگيعان واني بس اريد يحجي ويكول شصار سألته ريـــمه گالها
-فضت ماكو شي دفعنه فلوس علاجه وهاي هيه ماكو شي.
ارتاح گـــلبي بس بقيت خايفه منه ومستغربة شلون عافني الهسه هنا، بالليل من رجع طــروادة حاجه ريـــمه يريد يحجي وياي مشيت وياها للحوش كاعد على گن الدجاجات مال رنـــه سأل يستفسر
-شبيكم خويه عليمن متزاعلين؟
دنگت ساكته ما ادري احجي لو ما احجي ريـــمه عافتنه ومشت گال
-سولفي خويه حتى اعرف شلون احاجيه.
زفرت نفس مختنگه احجي والغصه خانگتني
-هو ما مقصر وياي وحتى يوكف ضد اهله علمودي بس تعبـــت ما يتفاهم كلشي عنده عصبية وصياح بعمره ما سألني على شي بهدوء.
يقهرني يبجيني وثاني يوم يعدي الموضوع عادي ولا كأنما مسوي شي ويريدني وياه آنسى، شلون انسى شي قهرني غير نتفاهم نلكه حل للمشكلة الصارت حتى ماتتكرر لا هو حتى مايناقش بيها هاي هيه صارت وراحت بعد ما تنفتح اضحكي بوجهي واضحك بوجهج ونعيش طبيعي الحد مانتعارك مره الثانية.
كتله من تسب آهلي تقهرني بقى كل مانتعارك ويريد يقهرني يحير شلون يسبهم يابه عالم ميتين يمك گربك ليش تغلط عليهم؟
وعصبيته ماينعاش وياها مدخلني إنذار اربعه وعشرين ساعه والله العظيم ما ماخذه راحتي وياه حتى بالكلام حذرة
حجيتها غاصه من البجي
طــروادة:: گولي يا الله خويه شسالفة هسه عليمن تبچين والله مايصير خاطرج الا طيب .
درت وجهي أمسح بدموعي أيدي ترجف گال
-روحـــي خويه طبي جوه.
مشيت للبيت گـــلبي يوجعني رنـــه كاعده يم الصوبه تدرس كعدت يمها فتحت ملازمي بس اباوع بيهن شويه واجت يمنه ريـــمه جايبه صحن فواكه يضحكن ويسولفن وساي يحاولن ينسني الموضوع،قصص وروايات عراقية كرار صلاح شويه وطرواده صاح عليها طلعت شويه ورجعت گالت
-جــويريه كهلان يريد يحاجيج .
لفيت حجابي عدل ونزلت ردن دشداشتي السوده طلعت وياها واكف بباب الهول وحجه ويانه بصوت ناصي
طــروادة:: رجلج يريد يحجي وياج احجي كلشي بگلبج لا تخافين على مشاعره خيولي كليله شني اليقهرج منه خل يعدل روحه ولا تخافين انا موجود ما يگدر ياخذج اذا انتِ ماراضيه.
دك گـــلبي حيل. اباوع بينه وبين ريـــمه أشرلي على باب الدوانيه جريت نفس مرتبكه مشيت بخطوات متردده فتحت باب الدوانيه لمحته كاعد مخلي مخده على رجليَّه ويدخن شال راسه بس باوعلي ورجع دنك جعص كطف الجكارة بالنفاضه وشال المخده من حضنه خلاها بصف طك عليها بأيده يحجي
-تعاي اكعدي.
سديت الباب امشي وخطوتي ترجف احس نسيت شنو اريد احاجيه كعدت على اركبي ثانيه رجليَّ مدنگه مد ايده اخذ. النفاضه مال الجكاير حطها يم الحايط اباوع الايده يفر السبحه حيل ويعصر خرزها بين اصابعه عبالك يويد يطحنه.
شلت راسي باوعت لوجهه مضيك عيونه وجهه مايكصه السيف، بقيت اباوع بعيونه هذا مو شكل احد ندمان وجاي يصحح موقف، دنگت ساكته اعصر باصابعي زفر نفس متحسر وحجه بهدوء
-شبيه انا وتتشكيني الكهلان؟
باوعت بعينه كوه احجي
-ما شكيتلك الغريب مو انتَ كتلي يوم الازعلج عندج اخو عندج كهلان روحيله.
هز راسه اي وجر نفس طويل يباوع لعيوني
-شني البيه ماعاجبج بله؟ أحجي كلشي لا اصير اعصاب ولا همّه يحزنون بس سولفي.
هزيت راسي خوي عيوني ذبلانه وهو عيونه متروسه غضب بس كاتمه ويحاول يحاجيني بهدوء
-صــيهد باوع احنا اذا بقينا هيج صعبه نبقى سوه والافضل نتطلك، عندي استعداد اعيش وي جده ولا اعيش بحرب نفسيه بسبب تصرفاتك .
هز راسه اي ومد ايده يرتب حجابي على شعري ويتلمس خدي
صــيهد:: هسه كلنه نحجي ونتفاهم طاري الطلاك لا تجيبينه حتى اضل اعرف شلون احاجيج خوش؟ نسولف كلشي ونلكه حل انتِ تدرين وانا ادري لو تموتين ما اطلك.
اباوع بوجهه ساكته عدل الشال على وجهب ورتب الدشداشة من على اجتافي جريت نفس طويل وخرت ايده احجي
-ما اگدر اعيش وي عصبيتك تعبـــت شكد اقنع نفسي واگول ميخالف هذا طبعه وي الكل هيج بس ما اگدر بالقرآن ما اگدر گـــلبي يضلّ يوجعني.
مسحت دموعي بظهر ايدي مختنگه احجي بشهگه
-حتى بالوكت العادي واحنا كاعدين نسولف والله العظيم اراجع كلامي بعقلي يله احجيه اخاف لا احجي شي يعصبك ما ماخذه راحتي حتى بسوالفنا العادية وحتى وقت نسولف ونضحك ابقى منتظرة شوكت تصير عصبي وتصيح وتغلط .
تكلي ما اضربج ولا مره ضاربج بس انتَ لو لزمت ايدي وعتيتني اسبوع الوجع مايفارگني
ماعندك شي اسمه هدوء تعاي جوري سولفي شكو شصاير اليوم
والله العظيم والقرآن احجيلك كلشي احجي واسولفلك كلشي.
احجي بحرگه ومدري عليمن ابجي وهو يباوع لوجهي ساكت مسح وجهه يگلي
-يله هاي هيه ما اعصب بعد
-مو بالحچي هيه صــيهد، چم مره كتلي هاي هيه بعد ما اسب اهلج وانتَ صارلك بالاسبوع مشبعهم مسبه ليش؟ بس كلش شتستفاد غير قهري والله تموتني من آلقهر.
-هسه خوش لا تردين عصبية ولا أسبن اهلج هذن خوش متفقين كومي يله جيبي غراضج خل نرد لبيتنا.
اباوع لوجهه وهدوئه بحيره مد ايده يمسح دموعي بأبهامه ويحجي
-يله كومي.
زفرت نفس متحسره هزيت راسي لا باوعلي بغضب شال ايده بوجهي يصيح
-انتِ شتررردين؟ خرب روحج شتررردين موتيني؟
صيح بحرگه احس بروحي جان عدي ذرة امل وخسرتها غطيت وجهي بأثنين ايديي بچيت من كل گـــلبي شلون بيه لا اگدر اتعود ولا اگدر اعوفه ورطت روحـــي بمكان لا يناسبني ولا أناسبه
سحبني من راسي الصدره حاضني بأثنين اديه باس راسي يحجي بصوت متردد ويرجف
صــيهد:: والله انا احبنج.
يحجي ويبوس راسي ويلمني على گلبه حيل واني من بين شهگتتي ودموعي ارد
-وينه وين الحب التحجي عنه لو تحبني مو كل همك تقرهني تكابلني وتشيل ايدك تسب امي وأبويه، وعلى كلشي غالط ومصيح بوجهي على اليسوه والمايسوه تعبتني بالقرآن تعبتني اني اختنك من كلشي حجايه تغث تخنگني ابقى ما اعرف شلون اتنفس وانتَ تزيدها عليَّ.
وخرني من صدره يمسح دموعي بأثنين اديه ويباوع لعيوني
صــيهد:: ما اغلط حتى اقهرج بس هوه هذا طبعي ما ادري ليش اغلط والله مو بأيدي.
-باوع انتَ شتسوي ؟ تكسر وتعبر ماتصلح الكسرته ما تلتفتله تتجاهل وتكمل اني مو مثلك ما اگدر اعدي يبقى وجع هالكسر ياكل بروحي ما اگدر اصير مثلك انام زعلانه واكعد اضــحك بوجهك ولا كأنُ صاير شي .
احجي واشهك جر باكيت الجكاير يدخن ويهز راسه اي بحرگه
-لا تتفلسفين شكاسر؟
باوعتله بعجز بعد ماعندي حجي وياه يجر نفس من الجكاره يزفره ويرجع يجر الثاني بسرعة يحجي
صــيهد:: يعني شتردين شسوي؟ اعتذر منج ؟ الله خلقني هيج شسوي؟
هزيت راسي خوش ساكته خله باكيت الجكاير بجيبه وكام بعصبيه طلع ورگع الباب وراه طلعت يم البنات رنـــه فارشتلي بصفها تمددت تغطيت وجوه الغطا ابجي شلون راح تكمل ما ادري، للصبح صادفت مطر، ودوام بدلت ما ادري شلون ووي منو راح اروح، شويه وصاحلي كهلان طلعت وياه صــيهد واكف بالسيارة يم الباب صعدت ساكته زعلتيش هايه واني رايحه وياه للجامعه، انتبهت حتى كهلان مايحجي وياه.
النوب هوه ذلنه جاب الروحه چاي من الطريق وما اشتره لا الي ولا الكهلان ويسوق على كيف متقصد
طــروادة:: لا حول ولا قوة الا بالله، يابه شلون ننرل ناخذلنه تكسي؟؟
وهوه مايرد نزع النظارات عافهن بصفه ويشرب چاي بهدوء روحـــي طلعت الحد ماوصلنه للكليه همه يمشون واحد بصف الثاني واني شويه وره كهلان فتحت عيني بخزر من شفت البنيه ام قلم جايه باتجاهنا وكفت وي وكفتهم من هي صارت كدامهم وكالت
-صباح الخير.
اباوع بوجهم منو منهم راح يباوع لوجها، نظراتهم بالفراغ بعيد عن وجها ردوا عليها وهيه تتبسم بأيدها ملازم وجنطتها گالت الصيهد
-عفيه محاضرة الماليه مستنسخها؟
صــيهد:: شني هاي الماليه هاي عدنا؟
-ياااا؟
صيحت وضحكت وانه الوب من الحرگة ودي ارگع راسها براسه وانعل ابوه على ابوها، يشرد عيونها منها لكل مچان مايخليهن بوجها بس هيه لطشت وطرواده يعاينله رافع حاجبه گالتله
-صــيهد صدك تحجي؟
-اي جا جذب عفتي الوادم كلها اجيتي عليَّ تسألين على المحاضرات هوه انا اداوم بالشهر مره اسماء المواد ماحافظهن صدك جذب خويه.
عبالك حجالها نكته ماتت من الضحك على كيفج عيني كلبج لا يوكف، تلفتت تباوع وتگله
-منين اجيبها عدنا كوز اليوم.
صــيهد:: ما ادي روحـــي شوفي الشاطرين.
-يله صح، اكلك اذا لكيت احد يشرحلي تجي وياي يفهمونك ؟
-لا كهلان هسه يشرحلي.
-صدك خل يشرحلنه هوه.
باوعوا واحد بوجهه الثاني واني فاتحه عيني كلها مصدومه مدري البنيه على نيتها وهيه طبعها هيج مدريّ متقصده كح كهلان گاله
-عدي محاضره ما الحك.
-يبووي اروح اشوفلي احد يشرحلي اذا ابقى وره صــيهد نرسب.
ضحكت ومشت دار يباوعلي مبتسم بطرف شفته ابتسمت مثل ابتسامته امثل واني النار تاكل بگلبي عفتهم اثنينهم ومشت لكليتي ومن خلصت محاضرات لگيته منتظرني بباب القسم مشيت وياه ساكته نزلنه بباب بيت خالي شامل لگيت عفراء عدهم كيفت بيها وطرواده طاير بشمس يمووت من تگله خالو ماعافها الحد مابجاها من گد ماباس بيها.
للعصر جانت عدهم كعده وي بيتّ حمد اجت وادم عليهم هواي اخذوهم وراحوا، ريـــمه بس تدعي تخلص على خير تخاف على اخوانها كالتلها عفراء
-ترد علينه كلنه لو ماكضت .
بقينا للغروب يله اجوا طــروادة يسولفلنا كال خلصت بوس عمك بوس خالك وفضت راحت، ماس بارد نزل على گلبنه بقت بس مشكلة بيت علوان لان لا اجو ولا اعتذروا ولا دزوا احد يصلّح الامور.
سولفت العفراء كلشي گالت
-غبيه والله العبي عليه ابقي يمه بس زعلانه خليه يتحرگن وبس تشوفينه هادئ ويسألج ايش زعلانه سولفيله شنو الزعلج منه من يگب ويعارك بعصبية انتِ احجي بهدوء ، شبيك حبيبي وشبيك گـــلبي على كيفك بدون عصبيه حياتي، وعلي غير يصير وياج مثل الماي.
-مو اني بسرعة يحترك گـــلبي ابقى بس اعاند
-يطبج وجع لو تموتين مايتغير بهذا اسلوبج.
-بسّ يشوفني اسكت عنه يزيد.
-هاه؟ جربي كل الطرف تعاملي وي عصبيته جنها شي عادي لا تخافين ولا مدري شني هوه يحجي بعصبية انتِ ردي بهدوء وابتسامه.
ضحكت
-غير يتخبل اذا هو اعصاب واني اضــحك
غمتني بحرگه تحجي
-سديتيهاا بوجهي
-هههههه لا والله بس غير اكلج.
سكتت من عدّي للعشرة اجه عليها منذر اخذها، كالت غير مره ابات اجيت علمودج اشوفج واروج، يقينا كاعدت ل١٢ ريـــمه راحت الغرفتها ورنه حضرت كتبها وكتب اخوانها لفت راسها ونامت.
بس اني بقيت كاعده اركز وي صوت قطرات المطر وافكر بيه وين الخطأ ووين الصح حجّي عفراء حقيقي ليش اعاند ليش ما احاول بأكثر من طريقة اغيره، مصحت وجهي من دك تلفوني سحبته اباوعله اسمه بقيت لازمه التلفون متردده جريت نفس طويل يله جاوبته
-الو.
-شلونج؟
-الحمدلله.
-اريد احجي وياج هيج بالتلفون
-كول.
-يعني انتِ ضايجه بس من العصبية ولان اغلط على اهلج؟
-اممم، ومن تقهرني وثاني يوم تعدي الموضوع ولا جنه صاير شي
-انتِ هم لا تعانديني لا تشلعين گـــلبي لا تجذبين ولا تضمين عليَّ .
-والله مامعانده ولا ضامه عليك.
-تعاندين جوري وتخليني بموقف خايس مثل من كتلج كومي صبي اريد اكسر عينهم عاندتيني گدامهم.
-مو هيه سعاد تباوعلي وتضحك متشمته قهرتني.
-معليج بيها انتِ ضلي وراي والله ما اخلي تحد يتطاول عليج اكسرلج خشومهم بس اسمعي حجايتي.
سكتت استمعله رجع كال
-جوري
-همم.
-هسه اتفقنا؟
-ماتحجي وياي بعصبية وماتغلط وتحاول تسمعني بهدوء
-اي بس ما احلف لان اخاف لا ما اگدر.
-ميخالف بس تحاول
-اي
-تمام.
ضحك يحجي
-الخايسه بت الخايسه لعبتي بحالي اريد انامن ما اگدر.
-ها صــيهد؟
-ها؟
-شكلنه؟
-سالمين شكو؟
حسيته صدك ما منتبهه الروحه من حجاها سكتت سدينه الاتصال شويه وراسلني كاتب
-لج هاي ام قلم راسلتني.
كعدت على حيلي كتبتله
-شتريد منين جابت رقمك.
ماشافها اتصلت عليه يرفضني تخبلت اكتبله ومايرد
-صــيهد احاجيك بالقرآن اموتك والحسين اخنگك جاي تحجي وياها؟
ولا فتح الرسايل ولا شافهن فرفحت مقهوره گمت بسرعة جريت عبايتي لبستها وطلعت بنص المطر والبروده امشي وأتلفت خايفه لا تجيني البومه، فتحت باب الحوش ومشيت للمشتمل بسرعة عوزي اركض توني وصلت باب المشتمل وصاح علي
-جوري!
التفتت عليه المطر فوگ راسي واكف بظهر الديوان جوه ضوه البلوجكتر الاصفر بلبسه الأسود مبلل من المطر واني كوه اجر النفس ايدي على يدة باب المشتمل واباوعله
صــيهد:: جذب محد مراسلني ردتج تجين.
فتح اديه اثنينهن الي ويحجي بضحكه
-كتلني البرد تجين لو ابطل.
يحجي واني بعدني صافنه استوعب شلت راسي ليفوك اباوع للضوه الفوگه والقطرات المطر اللي شما جالها تقوه، واديه المفتوحات ومنتظراتني.
مشيت بسرعة ملابسي كلها مبلله والعبايه احسها صارت ثگيله عليَّ شمرت روحـــي بين اديه رفعني حاضني حيل يضحك ويضمني الصدره بقوة وبدل الغزل غلط
-امووتج اذا تمرضنا اطيح حظج وحظ احلامج.
نزلني للگاع ارجف وسن يطك بسن من البرد شايله راسي اباوه لوجهه مبتسمه وهو مدنك ولازم وجهي من حنجي الضحكه تارسه وجهه رجعت راسي على صدره حاضنته واحجي
-احبك هووواي.
عصرني بحضنه قوي يضحك ويحجي مستحي
-انا هم احبنج.
صوت قطرات المطر وصوت الرعد الخفيف يكسّر هدوئنا كل ماسكتنا واستمعنا النبض بعضنا اضم وجهي بصدره الدافي حييل گـــلبي يدك بطريقة غريبة وابتسامتي ماگدرت أخفيها اديه تمسح على طول ظهري
لحظة نسينا بيها احنا جوه المطر نسينا بيها البروده اللي تضرب بالعظم .
وفزينا على صوت تحمحم بسرعة دفعني ووكف كدامي مغطيني بظهره مديت راسي اباوع سلطان من وره السياج بس راسه مبين لابس قمصله نايلون ام الكبوس تحميه من المطر صــيهد غلط عليه يصيح
صــيهد:: شعدك تفتر ماتنخمد؟
سلطان:: جنت بالصخام بوجهك بالگيعان وشفت خيال عبالي الكتل شعلان رد هل عاينت.
-يله يييله امشي ولي
يحجي بعصبيه احسه متفشل مدري شبيه نزل على سلطان دوسه ونص وسلطان يضحك گاله
سلطان:: النوب اذا لكيتني وي اختك يم الساگيه وفكيت حلگكك اشكه فهمت؟
دنك صــيهد للگاع جر طابوكه وسلطان بسرعة شرد يضحك دار علي يحجي
-امشي عمي امشي كتلني البرد.
مشينه بسرعة للبيت عبالك سابحين بالشط ملابسنا مبلله وكفت بباب الحمام ارجف اريد احجي ما اگدر سن يطك بسن
-اذااا رررحت لل للغرفه تتبلل الفرشه.
باوعلي وضحك نزع قمصلته وبطرونه، ومشه هوه يجيبلنه ملابس دخلت للحمام وسديت الباب منتظرته لحد ما انطاني ملابس سبحت بماي حار اريد بس ادفى دكت البروده بعظامي لبست اباوع النفس شجايبلي دشداشه قصيره وردنها ربع وكركش سوده غير بردانين وكت كركش هسه طلعت للغرفة اركض لكيته مشغلي الصوبه كعدت حاضنتها بين ماهو سبح واجه جر البطانيه من الچربايه لفها فوگه وكعد وراي غطاني وياه لامني الصدره واني ماده ايديي على سيم الصوبه ادفيهم مبتسمه كل ما اتذكر موقفة مسح على زندي وخر البطانيه وشال الكركش مال الردن يباوع للزراك فتح عينه كلها
-لا تجذبين ماطاكج انا.
-بس تلزمي بقوة ماشايف ايدك انتَ والله عبالك چلابتين.
بقى يباوع للزراك ضايج يمسح عليه بأبهامه ولا كتله يله وميخالف بقيت اباوعله بضوجه حتى المره الثانيه يحس ومايلزمني هيج دنك يبوسه قشعر بدني من نغزات شاربه باس الاثر وابتعد يباوعله مسحه بابهامه ورجع باسها ويبتعد يا يمكن منتظر بوساته يروحن الزراك
-البوسه ماتروحه والله راح يبقى ازرك اسبوع.
-اصلاً اخضر مو ازرك.
حجاها ومد ايده على بطني جراني الحضنه حييل يصم وجّهه برگبتي لزمت بأيده مبتسمه ووميله رگبتي مقشعر بدني يبوسني ويحلف يغير بروحه علمودي.
بقينا لتلاثة كاعدين الحد ما عيوني ضلن يحركني جراني ينومني على ايده يحضني بخنك واني الارخي ايده واكله هيج احضن هيج حتى ما اختنك يضحك ويعاند يخنگني اكثر، الحد ماغفيت احس ماطولت غير دقايق .
وفزيت مخروعة على صوت الطلق سديت اذني اصرخ وهو جرني من ايدي بسرعة نزلني من الچربايه ضمني بصف الكنتور ساده اذاناتي اثنينهن مخروعة وهو بسرعة فتح الكنتور طلع السلاح وصندوق الطلق وتلفونه يدك ركض للتلفون يحجي وياهم ويخلي المخازن بالتفگه
الرمي على بيوتنا مثل المطر باوعلي يلبس بهدومه ويحجي بسرعة
-لا تخافين ولا توخرين ضلي كاعده هناه.
بجيت ارجف يا ما اخاف يعوفني ويطلع غير اموووت، دگوا الباب مال المشتمل الولد فلشوه، جلبت بأيده ارجف جرّ دشداشة شمرها علي يصيح
-البسي بساع.
لبست فوك دشداشتي لفيت حجابي وطلعت لازمه بأيده بخوف بس طلعنه من باب المشتمل ركضت بكل حيلي مالحك يحجي وياي كلمه دخبت الخاله ايمان اركض .
رنـــه:: حضنت زهره أسكت بيها خاتلين بغرفة بيت طــروادة والولد كلهم التموا بحوشنه من حوشنه ويرمون وهذولاك بيت علوان يم الگيعان ويمهم ساتر خاتلين بيه ويرمون على بيوتنا، گـــلبي يدك حييل خايفه على ولدنا اكرهه كل عركه بيها سلاح اكرهه الطلابه الماتنحل بسرعة وتضل دم يجر دم هوه احنا عدنا ثارات قديمة لليوم محد حلها مرت سنين عليها وضالات معلگات هسه زودوها بهاي الطلابه.ساعة عدل عدت والطلق ما وكف
بيت غانم افتروا عليهم لوره الساتر مصوبين منهم اثنين وواحد مات آخذوا سلاحهم وخابروا اهلهم يجون ياخذونهم، بجيت بجي مگطعه روحـــي دام بيها واحد انكتل بعد ماتنحل وماتبرد الا دم بدم.
للصبح الهوسه ووادم تارسه الساحة من عشريتنا واجوا شيوخ وعشاير ثانية يردون يحلونها ماترهم هذولاك يصيحون دم ولدنه ناخذه يابه ولدكم العالوا ابد مارضوا وعشريتنا ما انطتهم السلاح، والشرطه التجي مكافات شر ومحد يفك حلكه ويتدخل حتى لا يلزكونه بفصل.
بيومها محد من عدنا داوم وكاضين گلوبنه بادينه ابد ماكفت هوستهم وكلساع تصير هوسه وصياح تالي بس اخذوا عطوه منهم عشرة ايام، وبمجرد الوادم العدنا راحت گبت الهوسه والصياح واحنا مافاهمين شي بس اسمع صوت طــروادة وعبود يصيحون بحرگه وعمي شاكر ووليذ يغلطون عليهم ووياهم بيت ولد بيت غانم طلعت للحوش بخوف اسمعهم روحه شايطه يصيح بحرگه
طــروادة:: وكلام الله لو النوبه عدتها وحطيت ابوي بنص سالفتك افشلك بنص المضيف ، انتَ چبيرنه؟؟ امده هيج كباررريه.
جروه ولد عمي شاكر يتعاركون وياه ماراضين يحجي هيج على ابوهم گدام بيت غانم، محترك گلبه شلون بكل سالفة يحط اسم ابوي ويحلف بروحه چذب كل ما يحجي وگالهم وروح اخوي وروح شامل، طــروادة اتخبل جره ســليم يصيح بوجهه
-كاااافي سد حلكك بو تستحي ماتغلط گدام ياهو الچان.
دفع سليم طرده وهذاك غلط عليه وانه وريمه بس نعاين عليه بخوف يتراجف من الحرگه سكتنا محد من عدنا حجت وياه اخذ سلاحه ومشه للگيعان وعبود وسجاد طلعوا سوه ولا چنها توها صايره العركة عده اليوم واليوم الثاني بهدوء ماندري وره العطوه راح تنحل لو لا، بالليل راسلتني مــاسه تسأل
-هم تحجين وي بريا؟
-لا ليش؟
-ماكو شي
-يمه گـــلبي مــاسه عليج العباس صاير شي؟
-لا والله بس اظن تلفونه كاضي شحن من امس نخابر عليه وماكو.
-يمه .
-لا تخافين هوه نوبات مايكدر يشحن التلفون هسه هسه يرد.
بعد اريد احاجيها ما اگدر متت من الخوف بس سديته منها رحت الرقمه وخرته من الحضر واتصلت عليه مغلق اكرهه كل فكرة تجي الراسي واقنع روحـــي لا ماكو شي هسه يرد هسه يشحن تلفونه بس ماكو الوكت يمر بثگل وانه اتگلب بفراشي متزوهره صارت ب١٢ كلها نامت وبقيت وحدي وي افكاري التاكل بعقلي ضميت وكهي بالمخده بجيت گـــلبي يوجعني،
انه بلا ما احبنه جانت فكرة غيابه تبجيني شلون هسه وگلبي عاشگه.
ماگدرت اغمض عينيّ واغفى والخنگه ذبحتني كتبت رسالة العفراء على الرصيد بلكن كاعده وتحاجيني تفهمني وتطمني تگدر تقنعني بكلامها، ماردت الا وره نص ساعة اتصلت عليَّ جاوبتها ابجي
-عليمن تبجين غير اعرف؟
-خاف بيه شي خاف تصوي شلون ذيج المره!
-لا كولي يا الله ولا تفاولين عليه يجوز مثل ماكالت مــاسه تلفونه طافي شحن شسالفة رنـــه ؟
-عفره.
-ها يگلبي
-عاينــي والله لو صار عليه شي انه انجلط
-اسم الله ولج رنـــه ولج لا تموتيني من الخوف عليج هسه يخابرج وعلي كلشي مابيه وشوفي كولي اختي كالت بس گولي يا الله وادعيله لا تفاولين عليه، امسحي دموعج.
مسحت عيوني الخنگه ذابحتني ضلت تحجي وياي لمن كضه رصيدها عفت التلفون وتمددت اعاين للحايط وافكر بيه بلكن صدك تلفونه كاضي شحن بلكن هوه متقصد يطفيه، ومن بين افكاري فزيت على صوت الاتصال جريت التلفون وشهگت بس قريت اسمه نسيت شلون اجاوب اريد افتح خط ماكو، بس فتحته خليته على اذني صوتي يرجف
-الو.
بريا:: اذا مو احلى الو بهالدنيا انا كلشي ما آفتهم .
غمضت عيوني ابجي مدري على شنو جر نفس ظويل يحجي بهمس
-رنـــه يا روحـــي شبيج؟
-وين جنت ليش تلفونك مغلق؟
-مطفيه انا.
سكتت امسح بعيوني وگلبي بعده يدكّ حييل
-رناتي.
-ها
-شبيج حبيبي ليش البجي؟
-خفت من كالوا تلفونك مغلق وخابرتك ماترد راحت روحـــي.
-اووف يابعد روحـــي.
-بريا ليش ما تبطل؟ والله دوامك مخوفني كل ماتروح الخوف ياكل گـــلبي.
ضحك بفرح
-لا تخافين مچاني مابيه خطر اصلاً بعدوني من تصوبت
-صدك؟؟
-اي
-ابد ابد يعني ماكو اي خطر لا تعارك ولا شي؟
-اي ابد بس نلزم واجبات بالسيطرة وهاي هيه.
زفرت نفس براحه رجعت تمددت وجريت الغطا عليَّ
-شكاعد تسوين؟
-أتغطى .
-تتغطين وانا كاتلني البرد هناه
-جا غير انتَ كاتل روحك على الجيش
ضحك خليت التلفون جوه اذني ونمت صفح متغطيه زين
-هسه غير تستقر
-غير أتغطى عدل لا رجليَّ يبردن.
-انا حاط گدامي تنكه وشاعل بيها جمريه ولابس لفروة فوگ هدومي كلساع اشم عطرج بيها.
دك گـــلبي بقوة ساكته مسحت وجهي وحجيت اضيع السالفة
-ليش اخذتها كتلي اردها الج
-ما گدرت
-بذمتك.
ضحك وآنه مبتسمه مكيفه بضحكته وصايره خفيفه كلمه منه تهز گـــلبي جر نفس طويل وهمس
-بدويتي.
بقيت ساكته عاضه شفتيّ ومستحيه
-رناتي.
-هممم.
-شو ما گتيلي احبنك گطعتي گـــلبي .
طلعت وجهي من البطانيه اهفي عليه والساني انبلع ماكو مدري وين راح ، وهو چلب ويحجي بصوت يرجف
-يله رنـــه
-شنو؟
-كليلي احبنك.
عصرت التلفون بأيدي ساكته ما اگدر احجي هيه الحچايه ماترضى تطلع گال
-بس گوليها شبيج؟
-استحي
همست روحـــي رايحه امداني هاي اني رنـــه اللي محد سالم من لساني استحي والله وكت خايس خله بريا يسكتني ويخليني ما اعرف شلون احجي
-غزالي رنـــه.
-ها.
-أحجي موتيني ليش ساكته.
-أحمّ شحجي؟
-گولي احبنك وبوسيني
فتحت عيني كلها صوتي يرجف
-انچب بريا شسالفه؟
ضحك وانه احس بروحي صخنت
-ياهو الينچب لج رنـــه تغلطين عليَّ؟
-لا تحجي وياي سخيف ترى اسولف الطرواده وعبود يموتونك من الكتل.
-كليلهم مرتي لا حرام ولا عيب
-والله حرام
-شني الحرام
-هذا حجيك السخيف وبوس ومدري شلون
-ولج مرتي غير عقدنا شني الحرام.
-ادري بس مايصير تحاجيني هيج زحمه
احجي وهوه ميت من الضحك رد گال
-اول مره الزم واجب وماودي يكضي
-شو ما يمك صوت شنو وحدك؟
-لا وياي هواي بس انا على صفحة واكف.
-ليمت تجي
-اذا اجي شحصل حضنه بوسه حچايه حلوه؟
-برررريا.
-يابه يروحلج فـــدوه بريا ها يابعد اهلنه.
-لا تحجي هيج والله اضوج لان ما اعرف اجاوبك وانقهر من ما اعرف احجي اني ام لسان طويل اسكت والله تقهر السآلفة.
ضحك ضحكه طويله
بريا:: احجي ليش تسكتين كليلي تعال وسهله عساك على بوسه وحضن وحچايه حلوه مو رجلج انا؟
-يمه شلون يشلع الگلب .
-يله رنـــه گولي احبنك حتى اروحن الشغلي
-مااا ما أحجي عود من نسوي حفله ونوقع عقد اكلك.
-لا رنـــه هسه راح اموتن احجي
-يله روح للشغل.
-لا تشلعين گـــلبي بس احجي ماتخافين اروح واستشهد وانتِ مخليتني بحسرة الحچاية آلحلوه.
-جا موتگول ما يمي خطر؟
-كلساع يودولنه سيارة مفخخة
-يمممه.
-گولي احبنك.
-تعال ارجع لا تموت.
-بس كولي احبنك وخلّ اموتن.
-بس اسكت كافي شمالك تقهر بيه انتَ؟
-ههههههه حبيبي احجي والله بهذلتيني ما اعوفنج اذا ماتگولين.
-استحي.
مسحت وجهي عرگانه وگلبي يدك بقوة
-غمضي عيــونج واحجي
سكتت اريد احجي وما ادري شبيه مادري شلون احجيها ماتطلع الحجايه على طرف لساني بس ماتطلع
-يله رنـــه. موتيني احجي.
-راح انامن
-غيررر اموتنج تنامين وتعوفيني هم كاتلني البرد وهم كاتلني القهر احجي كولي احبنك خل ادفه.
-صوبه صوبه هيه مو حچايه
-هسه احجي خرب روحك كهلان شبيييج؟
-شو تصيح؟
-شلعتي گـــلبي، يله حبيبي اخذي راحتج تصبحين على خير .
بلعت ريك اعض بشفتي احجي من امداج احجي
-بريا.
-همم.
غمضت عيني وكاضه بالتلفون كل حيلي والحچايه بطرف لساني زفرت نفس جنت كاتمته صوتي انتهى گوه ينسمع
-أحبنك.
-دخييل علي.
دفنت روحـــي دفن بالغطا وگلبي احس الدنيا كلها سمعت صوت دگته وهوه وصوته الذبلان مادري شيحجي لحد ماركزت وياه احس بأذاني مشتعلات نار مدري شعليهن بالسالفة
بريا:: اموتن عليج يا عشگ روحـــي بدويتي.
أبتسمت ساكته
-يله حبيبي نامي
-انتَ راح تنام؟
-لا بعد فد ساعتين ويكضي واجبي
-خوش ديربالك على روحك حبوبي ولا تطفي تلفونك هواي.
-صار حبيبي صارو
-الله وياك.
-رنـــه
-ها
-تدرين شتمنى هسه؟
-شنو؟
سكت شويه وانه كل ظني يگلي اتمنى لفة من ايدج لفة شكر لفة طماطة بس هوه الساقط ساقط مايتعدل جر نفس متحسر ويحجي بهمس
بريا:: اتمنى هسه غطاج يلمني وياج والله احطنج بنصّ ضلوعي.
فتحت عيني حييل جريت التلفون سديت الاتصال والطم على وجهييي جريت المخده من جوه راسي حطيتها على حلكي اصررررخ وفزيت على فتحة الباب شغل الضوه يعاينلي عاگد حاجبه
طــروادة::شبيج؟
مسحت وجهي مرتبكع وارتب بشعري
-احم مابيه شي
دنگت ميته من الفشله ماعبالي صوت صرختي انسمع جا غير خانگته بالمخده خرب.
طــروادة:: ماتنامين؟
-آي نعسانه هم اني كلت هسه راح آنام
كاض الباب ويحجي وياي ومن جوه ايده فاتت ريـــمه ولان تدري بعبود نايم اجت بملابسها مآل الغرفه دشداشه قصيرة وشعرها مفتوح تخبل طالعه هستوها تريد تحجي وطرواده بسرعه تحمحم ومد أيده غطه رگبته هاكدها ايده خنك البنيه ويخزر بيها وهيه عينها علي وتحجي وتضحك
-رنـــه جوعانين تاكلين ويانه؟
طــروادة:: احمممم احمممم.
داررت عليه تگله
-شبيك اختك وجوعانه، شوفي اخوج مايريدج تاكلين ويانه.
تحجي ومكشره بوجهه وهوه يخزر بيها حاط أيده على رگبتها ويأشر عليها بعيونه عكدت حاجبها مافاهمه ووراها فتحت عيونها بصدمه وركضت شارده وحتى مايكول اختي ماعدها تربيه وفهمت قصدنا كتله
-شبيها؟
دار عيونه مناه ومناه يحك رگبته ويتحمحم وانه چلبت حتى يگول هوش ربيتها تربيه مالكفتها وهيه طايره
-شني شبيها ريـــمه؟
-احم مابيها شي شسمه اكلج جوعانه؟
-اي
-تعاي اكلي.
طلعت وياهم هو كعد بالهول يعاين للتلفزون وانه مشيت للمطبخ لمن اجت ريـــمه لافه على رگبتها شال، ركصتلها حواجبي اغمزز كرصتني من ايدي ومدّت راسها تعاينله لمن تأكده منه كاعد جرتني تحجي واثنينا خانگين الضحكه
ريـــمه:: ولج يگلي مو تحجين هاي السوالف يم رنـــه ، كتله يا سوالف يكلي يعني البوسه وهاي كتله ترى رنـــه تعلمني وتعلم عشرة مثلي.
طكيتها خازرتها وهيه ساده حلكها بأيدها
-والله فقيره كلشي ما أعرف انه
-انهجم بيتج.
-شبيج انه بس أعرف البوسه
-ههههههه اخوج يريذ ينجلط يگلي ما اگدر اشوفن رنـــه صارت موه بعدني اشوفنها بگد زهره
-والله لوتي من اسوي مصيبه شكدها شكبرها يگلي شكدج بعد تصيرين وهسه يصيح اشوفنها بگد رنـــه.
صاح علينه من مل اخذنا الصينية مگلين طماطه ومحمين الچاي كعدنا ناكل يعاين للتلفزون مخلينه على كربلاء گال
- والله مال زيارة هسه
ريـــمه :: شفنه زيارة احنا كضيتها علينه اخذجن اخذجن وكلشي ماكو ليمت تاخذنه خويه؟
فتح عينها كلها وضحك
طــروادة:: خويه؟
-خويه خالي كلشي الچان ليمت تاخذنه؟
-خل اشوفن اذا صــيهد مايحتاج سيارته اخذها اچيكها وباجر الفجر نطلع.
ريـــمه :: ضحكت مكيفه ورنه تتغامز كبل مانكضي كامت تركض غسلت تحجي
-اليضل بالاخير هوه يغسل المواعين.
وهو يضحك عليها وصاح وراها
-امشي صلي ونامي لا اموتنج.
توضت ورگضت الغرفتها، شلت الصينية للمطبخ اجه وراي سند ظهره على الحايط يعاينلي مبتسم بشر
-وخري الشال هل أعاين.
-شتعاين؟
-الحلالي.
درت عليه رافعه حاجبي ومبتسمه سد باب المطبخ واجه يحضني منّ ظهري
-شلون بله مانغسل مواعين.
-اغسلي هسه يمج حذاج انا؟
-يااا
ضحك مدنك يضم وجهه برگبتي باسني ووخر يسولف
-اكلج هيه أربعينيه شعلان بعد يومين انا اريد نروح للزيارة نزور النجف ونمشي الكربلاء وكون مانتلاگه وياهم.
-هوه ياهو اليروح؟
-كلها تروح زياره وبلاش يأجرولهم كوستر.
سكتت اهز راسي خوش عيونه ضلت يوجعنه من النعاس يفرك بيهن
-روح نام!
-والمكاين ياهو يروح يشوفهن خالتج؟
-لا خالتك.
ضحك شمايماي ولبس قمصلته سد السحاب وتلثم بالچفيه مشيت وراه الباب الحوش
-ماتاخذ هاسكي؟
-لا خطيه ماي ويتبلل.
-ليمت ترد؟
-ساعتين.
هزيت راسي خوش حط اديه بجيوبه بس عيونه طالعه تدنى يمي باس راسي وراه، ركضت لفراشي ميته من البرد لفيت روحـــي حييل وفكري بيه شلون هسه هم بارده عليه، غفيت وما آدري بيه من رد للبيت كعدت الصبح مستعجله اسوي الريوك واكعدهم وآحد واحد واخر شي هوه گوه يگوم من الفراش تريك وطلع لباب الحوش متاني جــويريه وصيهد بس شفتها ضحكت وحلفت أرسلها اكلها طــروادة يگول عليج دگاتها ناقصه وخل تتزاعل وي صــيهد بس صالحته صارت جبهة حرب يمنه.
كضيت تنظيف البيت وطبخت الغده توني طفيتهن وخابرتني مــاسه
-هاي لان ماتداومين كلساع تخابرين؟
مــاسه:: ضحكت أهز حور بحضني گتلها
-اكلج ريـــمه اريذ انشدج شيماء بت راضس ابن غانم مو چانت وياج بالمدرسة گبل
-اي ليش؟
-امس رغد مشت للمستوصف ولاكياته غاد وحاجيات بيه من درت جبت كايلات الرغد نريد نجي نسلم عليها بس انه اكرهن وهسه بس اتصفن شلون لو اجن احنا متعاركين وياهن گبل بالمدرسة
-خيبه شيماء ورده مالج غرض باخواتها وبنات عما زعاطيط .
-ما اريدددهن بلكن من يجن تجين انتِ يمهم لان شيماء درّست وياج
-تحسسيني انه اكبر منج بعشرين سنة
-لا يعني اقصد بطلتن سوه امداج.
-مــاسه روحـــي عني انه وين اگدر اطلع واجيج وحدي رجلي كهلان وأخوي سليم وعدج لحساب.
-سديتيها
ضحكت حجيت وياها شويه وسديت التلفون عاينت الحور عفتها بكاروكها وگمت كعدت ماريا كايمه تخلصها افلام ومسلسلات تضل للفجر كاعده وميثم يحجي عليها ما يرضى ومن اكله حا وين تروح تضوج يكلي لا جا السهر مو زين اسكت واسكته.
كامت كوه فاتحه عينها سويتلها ريوك وكعدت يمها تخجل ارجع افتح موضوع لبسها اخوها ماراضي عليه وحجيت وياها مره كالت انه هيج وهذا لبسي، سكتت بعد اذا يريد هوّه يحاجيها.
اجه الظهر واكفه ارش بالحديقة طب للحوش مبتسم احب طبته عليه الظهر موظف بالجامعة والعصر فلاح بالگيعان ومهتم بينه كلنه يلگه وقت للكل، باوع لباب الهول مسدود وتقرب يمي جر ايدي يبوسها مثل كل يوم ضحكت وجريت ايده انه هم بستها
-الله يساعدك ابو حور.
مــيثم:: اروحن فـــدوه الحور وامها.
اباوع لوجهه والضحكه شاگه حلكي التفت لباب الهول من طلعت ماريا وبأيدها حور عافني وراحلهم اباوعله مبتسمه همست ماريا مثلي تعلمت
ماريا:: الله يساعدك.
ضحك يحج بحاجيه باسها براسها ودنك الحور البين أديها
مــيثم:: بابا روحـــي عمــري باباتي.
راد يبوسها وخرتها منه ماريا ما ترضى يبوسها الا يغسل ضحك كرصها من خشمها گالها
-طبي جوه بارده عليكم.
اخذت حور وطبت للبيت طفيت الماطور ورحت وراهم مشيت للغرفة وبس طبيت حجه بهدوء
-سمسم مو كتلج حاچيها على لبسها هذا اللبس ماتطلع بيه للحوش.
-استحي احاجيها والله والبنيه منهد العركه الصارت نفسيتها مدري شلونها لا نلح وياها تختنك شويه شويه تتعلم
تحسر ساكت صله وكعدنا نتغده بس نام شويه وخابره أبويّ يحجي من يمي انحرك گـــلبي من يگله
-كاضيها شارد من الشغل شني انا اروحن للگيعان؟ جا بس بالحصاد تدورن حصص بس بالرواتب تعرفون المعامل.
-توني رديت من الدوام عمي هسه ابدل واروحن وي وهـــب.
-يييله لا بالحسين حتى من الگيعان اطردك انتَ وهذاك الخايس اخوك.
سد التلفون ساكت وكف يبدل گـــلبي ينطحن مايحجي عليهم لان اهلي بس اعاين لبعومه محتقن لبس هدوم الشغل ومشه للگيعان بس طلع خابرت صــيهد محترك گـــلبي
-صــيهد ترضى بهالحجي؟
-بس احجي بدون ماتبحين خل افهم وانعلج والديهم بالحسين.
-ابوي خابره سوه بيه فلك يا يوم مــيثم مارايح للگيعان يا اسبوع مر مــيثم ما ماشي للمعامل؟ يگله بس بالحصاد تجون تدورون حصص وبالرواتب تعرفون المعامل امشي للگيعان لا أطردكم يرضيك يحاجيه هيج ويقهره؟
-لا ما ارضى هسه احاجيه
-ترى والله العظيم يوميه يقهرونه من جان جدي عدل يخابره يحير شيسوي بيه وهسه مستلمينه لو عمي شاكر لو ابوي جا لا محترمهم مايغلط ويشتغل من كل گلبه؟؟
-هسه هذا البچي كله على مــيثم؟
سكتت إمسح بعيوني والله من يمي گـــلبي فار من القهر سد التلفون عشر دقايق ودكّ الباب مشيت فتحته اله طب للحوش مارضى يطب للبيت علمود ماريا وكفنه يم الباب نسولف احجيله عليهم والغصه خانگتني
-هسه عليمن تبجين
-يقهرونه وهوه يسكت والله مايحجي شي
-هسّه احاجيهم انا
دنگت امسح عيوني حسيت ايده على راسي
-لا تقهرين روحج مو زين عليج.
هزيت راسي اي والتفتنا اثنينا على باب الهول صــيهد بساع دار وجهه شايط وهي ماده بس راسها بخوف تحجي
ماريا:: تعي، حور عم تبكي.
خزرها أأشر بأيدي تطب جوه شيخلص مــيثم من صــيهد بعد رجعت بساع طبت للبيت وصيهد فتح باب الحوش ورد دار علي يحجي بنتر
-هاي تطلع يم ولدنه كلهم هيج بلا حجاب؟
-لا لا
-خل تاكل تبن وتستر روحها صخونه التصخنهم المگرنين مابيهن واحد عرف يگلها البسي صخااام.
يحجي بحرگه وعاينلي مد ايده ينتر
-ماتعلمينها انتِ؟؟؟
-علمتها.
عكد حاجبه ولوه خشمه بعد مايفيد الحجي مشه وركع الباب وراه حيل طبيت للبيت ادورها أريد اعضها خلتنه بحلك صــيهد احلف عليه راح يروح الميثم يغلط عليه لكيتها بغرفتها حاطه حور على رجليها وتهزها
-وولج شلون تطلعين هيج.
تعاينلي مستغربه
ماريا:: لبست جاكيت ومابان شي من جسمي
-وشعرررج يلفضيحه غير تحطين حجاب على راسج.
دنگت ضايجة عافت حور ومشت للحمام تسبح شويه وصاحت عليَّّ تريد هدوم والشامبو مالها طبيت الغرفة بريا ادور بغراضها طلعت هدوم وادور على الشامبو بجنطتها تلمست بطل وفتحتها عبالي هوه طلع عطر جاي اسدها ولمحت جواز وفوكه هويه بيها صورتها كضيتها بأيدي مستغربه
فوك مكتوب الجمهورية اللبنانية
الاسم رنده
اسم الام جورجيت
اسم الاب عساف
محل الولاده طرابلس.
وتاريخ ميلادها متغير مو نفسه فقط الصوره صورتها
گـــلبي يدك حسل مافاهمه شي جريت جواز السفر والجواز الثاني الجواه واحد بأسم رنده ونفس المعلومات والثاني بأسم ماريا ومعلومات امها وابوها طاحت من الجواز هويتها الحقيقيه اسمها ومعلوماتها الحقيقيه.
اعاينلهن مستغربه واحس اطرافي بردت شضامه علينه؟ رنده هيه؟ وين الحقيقي تاريخ الإصدار تقريباً نفس السنة بس اللي الهويه المكتوب بسها رنده تبين اجدد.
فززتني من ردت صاحت علي اخذتلها هدومها اطيتهن الها ركضت لباب الحوش من اجن بنات غانم سلمت عليهن ارحب بيهن بس بالي مشغول بالشفته، طبت رغد وياي جبتلهن حور وصدك حجي ريـــمه، شيماء عاقله ورزنه وامها من تحجي شي مو حلو تدغها وتغير الموضوع وكبل لا يرحن خلت عشره بگماط حور گالت
-خيه مالجن غرض ببنات عمي علي هاي امهن تدفعهن وهل يدورن طلايب.
-لا ربيناهن ونكتلن خوش كتله بعد مايحطن رواحهن ويانه
-طاكات حتى اختي وولجن.
ابتسمت وامه تعاتب هيه عركه راح يصيرلها سنه مدري سنتين انسوها كافي، طلعن من يمنه راحت يسلمن على امي، درت عيوني من طلعت ماريا من الحمام حسيت فجأة خفتّ منها سكتت مشطت شعرها واجت يمنه للهول حسل تحبَّ حوري ودها ماتعوفها مدنگه تناغيها گتلها
-احس متندمه على اسم حور.
-كتير حلو.
-ما ادري هواي اسماء غيره حلوه
احجي وهيه مدنكه تناغيها وتضحك عيني عليها احجي واحس گـــلبي يدك بقوة
-يعني شتگولين لو مسميتها مريم ريم رنده فاطمه.
سكتت بس جيت طاري اسم رنده بلعت ريگها ووخرت تتحمحم
-لا اسمها كتير حلو.
كامت طبت للغرفة مسحت وجهي بحيره وخابرتني رنـــه
-شكو شبيج؟
رنـــه :: عضيت ايدي متحلفه
-ولج مصاحبه بنات غاااانم؟
-يا لا بس شيماء اجتني للبيت
-ووولج اميسه وعلي اموتنج لو صاحبتيهن
-هذا ياهو كالج صاحبتهن؟
-ريـــمه الحاروگه.
رنـــه:: ضحكت سديت التلفون منها وكمت وي ريـــمه نحضر اكل ناخذه ويانه للزيارة، وطردنه عبود ماناخذه ويانه لان راح مرتين وهوه يحرك بگلبنه
عبود:: اذا ماتخلوني وياكم اروحن بالاربعين مال شعلان
ريـــمه:: روح والله جا جدك خطيه والله انه وحده من الناس ضايجة عليه.
رنـــه:: ولعباس حتى طــروادة ذاك اليوم يگلي بيعيلي بطه اذبحها بثواب شعلان كتله لو يكلولي يرد للحياة هم ما تذبح من بطوطي
نحجي عليه وطب جايب دجاجات اثنين ذابحهن گال الريمه
-هذن ثواب على روح جدي شوفي تسوينهن هسه تضمينهن المهم من تاكلونهن اقرله الفاتحة.
مشه للگيعان يريد يكضي السگي گبل لا نروح مشه عبود وياه. ريـــمه ضلت تسوي دوله وكالت تبلي وحده من الدجاجات نشويها وناخذها ويانه للغده، التهينا من عصر ل١٢ بالليل كال بثلاثة نطلع ما گدرنه ننام لملمنه بيتنا نطفناه خاف نموت بالدرب اليجي لبيتنا مايعيب عليه.
راسلت بريا بس كتله راح نروح للزيارة كتبلي
-توصلين بالسلامة حبيبتي أدعيلي وياج
-شدعي
-ادعي يصبرني عليج.
-راح ادعي يبطلونك من شغلك.
ضحك عفت المراسله وكمت بدلت الزهره وبدلت انه همه الجو بارد ثلج وهدوء دكيت باب الدوانيه على عبود كوه كعد اجه للهول جريت ايده اتوسل
-ديربالك على حيواناتي
-ميخالف
-اجيبلك وياي دهينه
ضحك جرني عليه باس راسي وضل كاعد ويانه تلفلفنه بردانين طــروادة كال جيبلجن بطانيه لحسين وزهره خاف ينامون، طلعنه للسيارة وعبود واكفلنه بباب الحوش شال أيده سلم علينه بعدها ظلمه وبارده والدرب ببداية قريتنا كله زرع الجو يخبل وطرواده مشغل دعاء الصباح يموت عليه ويقرأ وياه.
لميت حسين وزهره وياي بالبطانيه ونمت ماكعدت الا لمن طبك بالمحطه نزلنه للحمامات ريـــمه جنها عفراء اصير وياها مثل حسين وزهره من شفتها عدلت هدومهم انه هم كتلها عدليلي عبايتي ضحكت وعدلتها الي
اكلنه الدوله بالسيارة بعد من كعدنا كضيناها بس اكل لمن وصلنه للنجف ونزلنه زرنه ردت ارواحنا، گال طــروادة نتغده ونرتاح ونروح نزور المگبره ونطلع للنجف، وبس جاب طاري المگبره ريـــمه وجها صوفر وحتى هوه انتبهه عليها عيونها انترست دموع اخذتها ورحته للحمامات غسلنه احجي وياها بجت مختنگه
-ريـــمه لا تسوين هيج والله جا كتله مانروح للمگبره بس اهلي اريدن ازورهم.
مسحت عيونها تحجي بخنك
-اخاف رنـــه اخاف بيا عين رايحه ادور گبورهم.
مسحت عيونها لامه وحها بأثنين ايديي
-كالتلج عفراء انتِ مالج غرض لا تخلين طــروادة يشك وتصير مشكله هناه فـــدوه
هزت راسها اي عيونها حمر وصوتها مخنوك ردينه يمهم جاب غراضنا حطينه الغده وكعدنا ناكل ريـــمه كوه اكلت وهوه عينها عليها ضاج، ساعة ومشينا للمگبره بعده يمشي بين الفتحات وهيه دموعها تجري اشتره ماي ورد ونزلنه نمشي وراه بجيت بس شفته واكف يم كبورهم وشهگت ريـــمه الوراي زرفت گـــلبي
كابلانهم نبجي وحسين وزهره الماشافوا منهم شي. فرفحوا عليهم من البجي، طــروادة واكف ورانه مسافه مختنگ الدمعه تلوب بعيونه، مسحت دموعي وشلت ايدي الترجف اقرالهم الفاتحه، كمت على حيلي اخذت ماي الورد رشيته على الگبر وغسلت صورة ابوي درت عيوني الريمه كاعده كبال گبر امي
شابگه الگبر بأثنين أديها وشهگتها وبچيها يمرد الگلب مسحت عيوني وكعدت يمها جريتها الصدري مارضت تهد الگبر لطمت على رجليها. وتهز اديها گدام آلصورة من البجي حچايه منها ماطلعت مختنگه ماكو حچايه تبرّد گلبها تدني روحها تبوس الصوره وتشهگ بشوغة
درت وجهي لطرواده أأشرله عليها مختنگه عيوني احس ما اشوفن بيهن بعد.
مسح وجهه كوه كاض دموعه كعد يمها جرها الصدره چلبت بيه باثنين اديها تبجي بصريخ
-ووولج يييمه.
صرخت بكل صوتها وهوه لامها الصدره يصبرها طكت اديها بالتراب تصرخ
-ييييمه.
باسها براسها يسكتها
-كافي ريـــمه، حسين وزهره مناه كوموا يله خل نمشي.
فقدت تبجي بحرگه ماحاسه بروحها وانه نسيت حتى البجي گـــلبي يدك حيل خايفه منها لا تحجي شي .
ريـــمه:: تمنيت روحـــي يمهم وحدي اريذ احجي وياهم كل الحجي البگلبي يمه انه المووتكم يابه انه الضحكوا علي وخلوني أتسبب بموتكم.
جرتني ونه مكومتني مشيت وياها اتلفت وحسين ورهره يناشغون، وكفنه يم گبر عمتي نضال وجدي شعلان قرينالهم الفاتحه وطرواده وكف صافن بگبر جدي مايحجي صفنته حجت كلشي.
طلعنه من المگبره راسي يريد ينفجر كد مابجيت، رحنا الكربلاء وهو حاير بينه وين مانريد ياخذنه زرنا وصلينه وبالليل اخذنه لشط العلگمي، رنـــه واخوانها ينگعون صمون ويشمرونه للبطوط وانه وياه كعدنا على الصبات نعاين للماي ساكتين شويه وگال
-ماتوقعت هيج يصير بيج جا ما احذيتج للمگبره.
-من زمان متمنيه اجي.
زفر تفس ساكت، شويه ورجعنه للحضره، ضلينه بيها للصبح مشه جابلنه ريوك وبس تريكنا كال امشونا للسوك افترينا اهم شي وأول واحد ذكره شمس بت عــفراء عازل على صفحة خمسه وعشرين اخذلها تراك وحلاوة شعريه وحجاب، ورد اشتره لصيهد يگول هذا يفضحني ماخذ سيارته وكلشي ما اشتريله.
افترينا هواي بالسوك الحد الليل يله كال نمشي رنـــه رادت نضل بعد مارضى كالها گيعانه مناك، طلعنه الاهلنه ووصلنه الفجر عبالك ماشايفين نوم بس نريد نوصل لفراشاتنا.
ماكعدت الا الساعة بالعشرة كمت للبست كوه فاتحه عيني أعاين بعدهم نايمين بس هوه رايح للگاع، عزلت غراضنا شامرينهن بالهول، واندك باب الحوش لفيت حجابي وطلعت اول ما فتحته صارت بوجهي امي دك گـــلبي بخوف وهيه عبالك خايفه وتحجي بصوت يرجف
-تعاي شوووفي هاجر مدري شمالها.
فتحت عيني كلها
-شبيهااا؟
وهيه تطكطك بأصابعها ركضت للبيت جريت عبايتي ومشيت وياها اركض حسيت جسمي كله يرجف صعدت فوك ركض فتحت باب الغرفه فزت هاجر شعرها مملخ ووجها احمر الدشداشه العليها مشكوكه من صدرها.
فاتحه عيني كلها مصدومة ركضتلها الم وجها بين ايديي ارجف
-هاااجر هااجر ياهو وياج؟
شالت أيدها تأشر وراب التفتت عليها واكفه بباب الغرفة وجها متروس شر نزلت ايديي من وجهه هاجر التفتت عليها بجسمي كله شالت ردنها وجرت خيررانه من وره الباب
ميلاد:: تلعبين عليَّ؟
بلعت ريكي اخز راسي لا اطرافي ترجف وكفت على حيلي مغطيه هاجر بظهري
ميلاد:: ياهو الاخد اوراق الگيعان؟
ووي حجايتها طكتني على رجليَّ شهگت من نص گـــلبي موجوع
ميلاد:: تلعبييين عليَّ ووووولج.
طحت على ركبي وهي تطكني بكلّ حيلها وهاجر تمد أديها علي تويد تحميني وتطيح الطكه بايدها تشوغ روحها جريت الخيررانه من ايدها شمرتها حييل اصرخ بوجها
-ااااااي العب عليج واتذكر كلشي اتذكر شلون خليتوني ابوكن گراب عمي وشلون خليتيني اشرب عمتي سحووتج عبالج اضل ريـــمه المدمغة ؟؟
دنگت تجرني من شعري تطكني على وجهي حييل تغلط وتسب
ميلاد:: جااا خوش من كونج دريتي اسمعيني رباب كل ما تحبل انتِ جنتِ تشربينها وتطرح اربع مرات طرحت وانتِ الچنتي تشربينهااا.
اسمع حجيها مثل الصده والله ما اوجعني طكاتها الوجها مثل ما اوجعني حجيها شعري الگطعته بأيدها ماهمني بس مركزه بحجيها كضتني من فجي عاصرته حييل وتحجي بغضب وحقد
ميلاد:: ونضاااال انتِ الشربتيهاااا وماتت
شهگت عيوني مغوووشة اطيح وترجع تشيلني من شعري وهاجر تركض وراها بس تريد تجرني من ايدها كمت احس بروحي ما اشوفن وما افهم شتحجي طكه وره طكه وماهامتني بس اريدن افهم الحجته دفعتني على الحايط ترگع راسي حييل خنگتني تحجي بغضب من بين أسنانها
ميلاد:: ياهو القنع شامل يروح للصيد وي ابووووج تدرين ياااهو القنعه؟؟؟ انتِ انتِ رررريمه كلهن انتِ.
طحت علع ارگبي املخ برگبتي واجر النفس بشهگه بس اريدن اتنفس ماكو هوه ماكو، جرتني حييل وكفتني تطك على وجهي
-مو تكولين اعرف كلشيييي جا اعرفي عدل رباب انتِ الموتيها نضال انتِ الموتيها شامل انتِ الخليتيه يروح للصيد وينتل.
-لاااااا لاااا
صرخت وبأثنين ايديي اطك بيها دفعتني برّه الغرفه حيل ولحكتني. كاضتني من شعري تعته وتصيح
-انتِ القنعتيه انتِ الكتيله روح ويااااهم.
-لااااا لااااا.
بأثنين ايديي طكيتها على صدرها فاقده وبكل حيلي دفعتها صرخت وصرخت وياها ماده ايدي اريد اكضها مالحكت تدحرجت على الدرج من اول بايه للأخيره طاحت بالگاع فاقده.
شكرا لزيارتكم عالم روايات سكيرهوم
