رواية أرض الخناجر الفصل الرابع والستون بقلم ايلول
أدفع بالبَلم ما ادري بيه غرگان
و المردي انكسر و الروجة خانگت
و بديرة مناجل سنبلة انحطيت
حصدُوني و خضار الطيش ما شفته
══━━━━✥◈✥━━━━══
رنـــه :: فزيت على صوت عبود وهزته الجتفي مخروعه
عبود::گوووومي كومييي بساع
وكفت على حيلي مخروعه وهوه يجر بالعبايه وبأيدي من صوته فزوا حتى حسين وزهره ، طلعني للهول يسحل بيه ويصيح باستعجال
-اسمع ررريمه تصرخ ببيت اهلها اررركضي.
فتحت عيني كلها وهو يسحل بيه ويركض طلعنه من بيتنا ويَ ركضتنا ســليم ووهب جايين يتمشون وفزوا على صريخ ريـــمه،ركضنه انه وسليم نفس الرگضه سبگني طب للبيت يردم بالبيبان وانه اركض ما اشوفن دربي بس اسمع صريخها
توني وصلت باب المطبخ واشوف ســليم ركض على وحده ممدده كدام الدرج بعدني ماشيفه وجها حطها بحضنه وصيح بصوت عالي مضيع صوت صريخ ريـــمه
ســليم::ييييمه.
رجليَّ يرجفن مدري شلون وصلتهم شلت راسي ليفوك هاجر نزلت تركض الامها وريمه طايحه على اركبها بباب الغرفة اديها على آذانها تهتز كلها شلون السعفه وتصررخ بكل صوتها جمدت ما أدري شسوي اتلفتت وايديي يرجفت ما مستوعبه طبوا وهـــب وعبود ورانه، وسليم متسودن يطك بيها على وجها ويگلب براسها ماكو دم
وهـــب ركض للسيارة يشغلها وسليم يريد يگدر يوكف على حيله رجليَّه انتهن انركع باب المطبخ حيل وطب سجاد متخوذل مايشوف گدامه ركض على امه يتراجف جرها من ادين سليم وتعاونوا عليها اثنينهم شالوها يركضون للسيارة وعبود جر عباتي وركض وراهم يغطيها
روحـــي رايحه وصريخ ريـــمه يدك براسي صعدتلها اركض وارجف كعدت كدامها على اركبي اريد اجرها الصدري دفعتني حييل تزحق ليوره عيونها للفراغ ساده اذانها بكل حيلها وتصرخ بصوت مبحوح
-ررريمه
مديت ايدي اجرها مره الثانيه دفعنتني بقوة مبتعده وهاجر من جوه تعاينلها وتبجي بشهكه تمرد الگلب عافتنه وطلعت تركض لباب الحوش
-ررريمه ررريمه بس عاينلي ولج ريـــمه
احجي ودموعي تجري من الخوف وهيه ماحاسه على روحها تدفعني وتصرخ بصوتها المبحوح.
لطمت على رجليَّ ابجي ومحتاره شسوي عفتها ونزلت اركض لكيت هاجر تفتر بالحوش اديها على رگبتها تشهك ودموعها تجري، عبرتها ومشيت اركض لبيتنا اخابر كهلان وعفراء يجوني .
كاضه التلفون بأيدي ارجف وما اشوفن من البجي خابرت على كهلان مختنگه بس گال الو صحت
-تعال للبيت تعاال بساع
-شصاير ولج؟
-ريـــمه راح تتسودن تعااال.
سد التلفون بوجهي توني اخابر عفراء بس ردت علي وكتلها
-عفراه لحگي
-يمممه كهلان بيه شي؟
-ريـــمه طاحت من الدرج لا ميلاد طاحت من الدرج وريمه راح تتسودن.
وبس حجيت فززتني ركضت حسين بأيده خاولي ذبيت التلفون وطلعت اركض وراه بس فتحت باب الحوش شفته يركض وره ريـــمه وهيه هاجه گالبه وجها وتمي بلا وعي تتمايل تروح مناه وتجي مناه بلا حجاب ولا عبايه وحسين بس يريد يلحگها، توني اريد اطلع وراهم وشفت مــيثم وصيهد وانه بلّا عبايه وهدومي ما مستوره ضليت كاضه باب الحوش والطم على رجليَّه اعاينلهم وابجي حسين يجرها يحط الخاولي على راسها وهيه تدفعه تطيح على اركبها وترد تگوم تبجي بصريخ وبس شافوها الولد ركضوا عليها صــيهد يتلفت خاف واحد من بيت غام لو بيت جبر طالع للبساتين ويشوفها.
جر الخاولي من أيد حسين كضها من زندها حييل هزها يصيح بوجها ويحط الخاولي على راسها رگع متسودن وهيه ما تدري بروحها تطيح من بيّن اديهم وحسين يجرها من صــيهد ويصيح بوجهه
-هددددها.
بس صــيهد مايدري شني السالفة ومتسودن شلون طالعة هيج بس يريد يغطيها، التفتت على صوت السيارة بس تعدت الشجر شفتها سيارة سلطان ، طــروادة يسوق وسلطان كاعد بصفه ولمح ريـــمه گبله توه طــروادة يخفف بعده ماطابك ونزل سلطان يركض بكل حيله جرها منهم ولمها الصدره مغطيها ووراه نزل طــروادة يركض جر الخاولي من ايد صــيهد غطاها بيه وهي فقدت تصرخ بكل صوتها، سلطان وطرواده اثنينهم ما گادرينها.
جابوها للبيت كل واحد كاضها من صفحة وصيهد وراهم مدري شيحجي وميثم يسد بحلگه تالي من شاف حسين خازره طكه وحسين هز ايده واجه وره سلطان وطرواده وخرت من باب الحوش الباب الهول وهي صوت بجيها وصريخها يهز الگلب چنها بلا عقل، عافها سلطان بأيد طــروادة طببها للهول تلكيته اكضها وياه عيوني من البجي مغوشه وهوه كلشي مافاهم يريد يوصلها للغرفة ما گدر طاحت بالهول على اركبها لطمت على وجها وصرررخت صرخت صريخ ماصارخته بت بفاتحة اهلها تسودن طــروادة بس يريد يكضها ملخت روحها طب سلطان يركض متسودن حايرين بيها ماسكتت لمن طاحت بأيدهم بس فاتحه عينها وصوت نفسها عالي واديها يرجفن شبگها طــروادة على گلبه يبوس براسها ويحاجيها صوته رايح
-شبيج يابه شبيج يابعد روحـــي ريـــمه عمــري ؟
طبيت للغرفة بساع لبست دشداشة عريضه فوك دشداشتي الضيگه وطلعت يمهم شالها طــروادة للغرفة منتهيه حجيت بساع صوتي يرجف
-طــروادة رايحه انه رايحه اشوفن هاجر.
التفت علي سلطان فاتح عينها كلها
-هاجر شبيها؟
بجيت حتى ما اعرف شلون احجيلهم
-امك طايحه من الدرج اخذوها سليم والولد للمستشفى.
جر تلفونه بساع يريد يخابر وطرواده يحجي يستفسر مصحت عيوني بظهر ايدي احجي
-ما ادري بس لكيتها طايحه گدام الدرج انه.
دار الريمه مصدوم عفتهم ومشيت بساع لبيت شاكر طبيت للحوش ادور وصوتي يرجف
-هاجر!!
اتلفت بالهول وادور طب وراي سلطان ميت من الخوف عليها
سلطان:: هااجر.
يتلفت وصعد يركض لمحتها كاعده جوه الدرج لامه رجليها الصدرها وتبجي ركضتلها وصحت على سلطان ضمت روحها بحضني تبجي جراها سلطان لام وجها بين أديه ويعاين بهدومها المشگگه وخدها المطگع .
وخر من دك تلفونه يحجي وي ســليم جريت هاجر صعدت فوگ اطلعلها هدوم وهيه بس تبجي كعدت على الفراش ، مفتاحها معلك بقفل البوفيه مشيت يمها لفتحها اريد اجيبها دشداشة البسها واخذها البيتنا.
اول مافتحت البوفيه صار بوجهي دفتر رسم مفتوح على رسمه ومشمور بعشوائية جريته مستغربه وگلبي يدكّ حييل بلعت ريك جسمي مكزبر
طفله هدومها بدله بيضه ووجها بدون ملامح گبالها ساحره طويله بعباية سوده واديها ممدودات اتجاه الطفله عباره عن عظام واظافر طوال، اعاين وجسمي يرجف اركز بالرسمه وصوت دگة گـــلبي اسمعه بأذني
درت عليها مدنگه تبجي.
گلبت الورقة لكيت وراها بالورقة الثانية رسم نفس الطفله وجها مابيه ملامح ويمها رجال كاضه بأيده صوتي احس يرجف اركز برسمة الزلمه هذا ابوي والله هذا ابوي
-رررنه.
فزيت على صوت سلطان يصيح علينه من جوه وبنفس اللحظه هاجر جرت دفتر الرسم من ايدي طبگته ووخرتني من گدام بوفيتها ضمته وطلعتلها هدوم وخرت على صفحة بدون ما احجي لبست هدومها وتمسح بعيونها صاح علينه سلطان مره الثانية كضيتها من أيدها ونزلنه امشي وياها على الدرج واتلفت على الغرفة بالي يم الرسم.
سلطان واكف ببداية الدرج وبس وصلناه جر هاجر لام وجها بين اديه باسها بين عيونها يحاجيها
-لا تخافين ماكو شي ابويه انتِ .
وخرت ايده وضمت روحها بحضنه شابگته ودموعها تجري وهو يمسح على راسها ويگلها
-لا تخافين هسه تصير زينه
عاينت لوجهه اسأل
-شگالولك عليها؟
مسح وجهه بحيره رايحه روحه وكوه يحجي
-بعد ما ادري هسه اروحلهم، تعاي هجوره.
مشينا البيتنا ووي طلعتنا طبگت سيارة مازن ونزلت منها عفراء بخوف مستعجله وكف سلطان گدامي مغطيني جيه بلا عبايه، اجت عفراء علينه ومازن بس شال ايده شلم وفر السيارة مشه وهاجر جرت ايدها ومشت بساع العفراء كبل ماتوصلنه ضمت روحها بحضنها تبجي
عفت سلطان يحجي وياها وطبيت جوه طلع طــروادة من الغرفة وسلطان صاح عليه يرحون للمستشفى سلطان مايگدر يسوق رجله توجعه، طبيت يم ريـــمه بخوف اعاينلها مغمضه عيونها حيل وحاضنه روحها ترجف بفراشها.
تدنيت يمها امسح على رأسهآ وأحاجيها
-ريـــمه
وهيه ابد ولا تفتح عيونها تهتز شلون السعفه طبن عفراء وهاجر، ذبت عبايتها على الميز وتحجي وياها
-شني ريـــمه
وبس سمعت صوتها فزت كعدت على حيلها تبجي مفجوعه ومدت اديها بأتجاه عفراء ترجف، كعدت يمها بساع ضمت روحها لصدرها وبجت بصريخ وعفراء لامتها الصدرها حييل تطبطب على ظهرها تسكت بيها بس هي فاقده گـــلبي مردته هاجر ماحملت صريخ ريـــمه سدت اذنها عيونها يجرن دارت وجها وطلعت من الغرفة
عــفراء وخرت ريـــمه من صدرها تمسح بدموعها تريد تفهم شبيها وهي فاقده مجلبه بأيد عفراء ومن بين شهگاتها كلتلها
-انه ااانه موتت عمتي نضال؟ امي تكلي ااامي تكلي ماتت ماتت من وراج انتِ سحرتيها.
شهگت ايدي على حلگي وعفراء بصدمة هزت راسها لااا
عــفراء:: لاا والله لا ياهي مالتج انتِ جذابه تريد تسودنج ررريمه.
وريمه ماحاسه على روحها تحجي بلا وعي وتلطم على وجها تبجي بصريخ
ريـــمه:: كالتلي كاالتلي انتِ الشربتيهاا؟
عــفراء:: وروح امي جذاااابه شتشربينها؟ عمتي ماجانت ترضى بالعسل من ادينه ماتجرع ولا واحد منعدنا تشرب من ايدج؟ جذب وولج والله جذب تضحك عليج تريد تسودنج ريييمه.
عاينت بوهه عــفراء تبجي صوت نفسها يخرش وعاگده حاجبها مسحت عيونها بظهر ايدها صوتها يرجف كالتلها
ريـــمه:: مو انه الموتتها؟
-لااا والله العظيم حچي امج كله جذب.
صفنت ملامحها تمرد الگلب رجعت ترجف وكضت بأيد عفراء تمسح عيونها من الدمع ويردن يجرن گالتها
ريـــمه:: انه صدك انه موتت اخوانج؟ امج امج كل ما تحبل انه اموتهم ببطنها عفره انه موتتهم؟
سكتت عفراء وريمه صافنه بوجها ومن ضلت ساكته جن ريـــمه عرفت جوابها غطت وجها بأثنين اديها وبچا حيل متلوعه جرتها عفراء تحاجيها مختنگه
عــفراء:: مرره وحده والله، امي هيج جانت تحبل بتوم تجيبهم وراهم تحبل بواحد يموت مايضل ببطنها وراها تحبل بتوم، وگبل لا تحبل بحسين وزهره هيه اساساً جانت مريضة وحبلت صار عدها اسقاط مثل ما متعوده كل توم وراهم اسقاط النوب حبلت امج ودتج عليها على اساس مسويتلها أعشاب انتِ شربته من إيدج مكيفه وثاني يوم سقطت وماحبلت الا وره سنة سقطت وراها حبلت بحسين وزهره .
لطمت ريـــمه على وجها تصرخ وتزلغ بوجها تصيح
-تدرررري بيه تدري بيه شيطانه وامي سحاره ليش تشرب من ايديييي ليش تشرب منّ ايدددي
ملخت روحها ووجها تزلغ كضتها عــفراء تبجي شبگتها كاضه بأديها وتگلها
-حرموها منج ما تصدك روحها من تجينها لو تمديلها السم تشربه.
-ياااا ييييمه يااا يمه
صرخت مفجوعة وعفراء تبجي بيها وانه مدري على يا صفحة ابجي على امي الماضل شي ماشافته من ميلاد لو على ريـــمه الماتدري بروحها شمسويه من مصايب
شالت راسها بفزه حطّت ايدها على گلبها بعد ماتحمل وجع اكثر من هذا عاينت لعيون عفراء وحاجتها بصوتها اليرجف
-انه انه القنعت عمي شامل يروح وياهم للصيد؟
دنگت عفراء تبچي كاضتها من أيدها وتحجي
عــفراء:: جان ابوي زعلان من ابوج وعمي وليد مايحجي وياهم اذكر جانت السالفة علمود الگيعان، اجوه جم مره ومارضى يصالحهم النوب من رادوا يرحون للصيد همه وبيت غانم وأخوالي ودوا على ابوي هم مارضى يروح، اجيتي انتِ كتيله روح وياه وتصالحوا حتى يخلوني اجيكم، وراح حتى لايكسر بخاطرج
شهگت تمسح على گلبها ووجها انمرد مرد تشهك بس تريد تتنفس وعفراء تجرّ بأيدها من گلبها بخوف وهيه ماتوخر ايدها تمسح على گلبها حيل صيحت بخوف ابجي من شفتها طاحت ممرود گلبها صاحت عفراء
-ارركضي شوفيلي واحد من الوولد.
طلعت اركض ودموعي تجري عبود وسجاد رادين توهم من المستشفى صيحت عليهم ابجي طبوا يركضون شالها سجاد وعبود طلع بساع صاح الميثم جاب سيارته وعفراء وياهم أخذوها للمستشفى احس وجها صار ازرررك وهاجر ناطه من البچي عليها .
كل ثانيه تعدي تمرد گـــلبي وروحي كوه الوكت يمر وللغروب ياهو الاخابر عليه مايرد ضليت الوبن وحدي ووين يله خابرتني عفراء سألتها مختنگه وهيه صوتها منتهي كوه تحاجيني
عــفراء:: ميلاد عدّها نزيف بالدماغ وأيدها مكسوره ثلث كسور
-ريـــمه ريـــمه شعلي بميلاد انه جعلها بالموووت.
-اشش انجبي هاجر يمج، ريـــمه تضل تحت المراقبة اربعة وعشرين ساعة يله يطلعونها.
-شكالولج شبيها؟
جرت حسره مردت گـــلبي بيها
-ذبحه صدرية
دنگت ابجي والتلفون على اذني گالت
-رنـــه شمس ضاله تبجي راح يجيبها مازن عليكم خلي حسين يطلعله .
-خوش.
سديت التلفون منها اجن يمي رغد وندى وانه بس ابجي اذا انه الحجي مرد گـــلبي الله يعينج يا ريـــمه ، لمن مازن دك هورن طلع حسين جاب شمس منه عيونها مورمه وبأيدها علاگة بيضه چبيره متروسه حلويات غسلتلها وسكتتها خابرتني عفراء تنشد عليها كتلها جابها ومودي وياها علاكه جبيره حلويات مدري المن.
عــفراء:: فـــدوه لعينه حار بيها شلون يسكتها هل ماخذها للدكان ومشتريلها.
-ريـــمه هم صحت حاجتج؟
-لا ماحجت ادعيلها
-وميلاد؟
-ما ادري اخواتها يمها لا رحت ولا وصلت انه، اكلج راح يجيج عبود وديلي بأيده بطانيه وهدوم وخاولي
-خوش.
سديت التلفون منها رغد اخذت هاجر وياها حضرت الغراض لمن اجوا عبود وسجاد اخذوهن ولليل الساعة بالعشرة ونص اجه طــروادة وجهه تعبان ميت من القهر
-الله يساعدك
-هلا بيج.
التفت على شمس وهيه بس شافته مشتله تبجي شالها يبوس بيها ويحاجيها
-ها خالي ها يابعد روحـــي
-بس تبجي مصخنه.
كعد حاطها بحضنه يسولف وياها وزهره ركضت جابتله ماي اعاينله اريد انشده على ريـــمه ومتردده من اشوفن التعب تارس وجهه، حسين كاعد بباب غرفتنه گاله
-شني شلونها ريـــمه؟
عاينله متحسر هز راسه
طــروادة:: بعدها والله گالوا تضلّ اربعة وعشرين ساعة تحتّ المراقبة.
حسين:: الله كريم ان شاءالله مابيها شي گوم انتَ اسبح وصلي وخل البنات يسوولك لگمه جا شني تموت روحك؟
دنك ساكت وحسين يأشرلي احجي انتِ هم، لا ليت ساكته طبيت الغرفتهم طلعتله هدوم خليتهن بأيده
-گوم اسبح بين ما اسويلك لگمه تاكلها.
تحسر باس شمس وكام يسبح طبيت اسويله عشه طلع گوه اكل لگمه ومشه للگيعان، نومت شمس وزهره وخابرت عفراء محتاره باجر عدي امتحان مو مال اغيبن گالت گبل لا ترحين ودي شمس يم مــاسه
-خيه مــاسه باجر تداوم.
-عوفيها يم ماريا، وانه للعشره اجي رغد تجي يم ريـــمه .
-خوش.
-رنـــه تدري ريـــمه الدافعه ميلاد من الدرج؟
-صددك؟
-وعلي بس لا تحجين محد يدري بس سلطان وطرواده.
-خاف ميلاد تحجي؟ والنوب الولد يكرهون ريـــمه.
-لا ماتحجي هم يگلولها ليش دفعتج، انه فهمت سلطان وطرواده على اساس لكتها تكتل بهاجر ورادت تفرغها منها دفعتها بالغلط وسلطان كال لا تحجين ما اريدن أبوي يدري.
-كرهت ميلاد كلساع أدعي تموت
-خيبه عمي شاكر يبجي عليها گلب المستشفى من البجي عليها
-عليمن على صخام وجهه يبجي عليها؟
-اكلج فـــدوه غطي شمس زين وبوسيها وعليج العباس مو تشلع گلبج وتطكينها.
-شو مدري شلونج انتِ عفره انه ليمت طاكتها؟
-غير اوصج ووجع
-يله عمي يله خل انامن .
سديت التلفون منها غطيت شمس عدل ولفيت راسي نمت
وكلساع افز علمود شمس لا تتكشف أغطيها، للخمسه كعدت وهيه كعدت وياي درست شويه وكمت على البيت طــروادة اجه من الگيعان بدل شرب چاي وراح كال امر للمستشفى ومناك اروحن امتحن.
طلع بساع كعدت عبود يودينه للمدرسه وهوه مغمض ويصيح
-من تكضون كلشي يله تكعديني.
-كضينه كوم تريك
-ما اريد اكضوا وكعدوني.
طكيته على راسه محترك گـــلبي منه رديت للهول حطيت الريوك لحسين وزهره، شمس ردت نامت لبستها وهيه نايمه دفيتها وراسلت مــاسه كالت جيبيها ماريا تدير بالها عليهن هيه وحور.
لبست عبايتي وشلتها امشي بيها البيت عمي خليل وهيه نايمه بس طكتها البروده صارن خدودها حمررر غطيتها بالعبايه لمن وصلتهم باب الحوش مفتوح طبيت وماريا فتحتلي باب الهول تضحك
-ادري انتِ ما يجيسج برد مصلخه؟
ضحكت تگلي
ماريا::مافي برد
-متعوده على روسيا بت الروسيه.
احجي وهيه تضحك طبيت وياها للهول اسأل
-مويسه وين؟
-فاتت تتحمم.
وخرت العبايه من شمس واحاجيها
-ديربالج عليها ماريا فـــدوه مناه للعشرة تجيها عفراء.
مبتسمه تهز راسها اي گالت وتأشر على غرفة بريا
-خديها عالاوضة لأعملي فطور وارجع اقعد حدا
مشت للمطبخ باوعت الحةر تتنحس باسله مخلياتها مسافة عن الهيتر.
-هسه ارد ابوسج واشلع خدودج شمهوده.
مشيت الغرفة بريا فتحت الباب وطبيت حطيت شمس على الجربايه غطيتها زين ودنكت أبوسها واجر نفس حييل ريحتها ترد الروح
-يابعد روحـــي خاله نامي.
طبطبت عليها ردت غمضت ترضع بالملهي، غطيتها عدل ودرت اريد اروح فززيت وشهگت گـــلبي راد يوكف كن شفت بريا واكف وره الباب ويعاينلي مبتسم
ايدي على گـــلبي وفاتحه عيني حييل گـــلبي يدك بقوة
-مووتني من الخوف
احجي وامسح بوجهي دايره عيوني منه كد ما انخرعت ارتبكت وماعرفت شسوي
درت عيوني عليه من سمعت صوت قفل الباب عاينتله بخزر
-خيرر؟
شال المفتاح مبتسم وفتح إديه اثنينهن
بريا:: مشتاگلج.
بلعت ريك مرتبكه واحس روحـــي بنص هالبرد عرگت
-عمي وخر احنا هسه بيا حال الوادم تريد تموت بريا.
-كلمن يموت بيومه تعاي.
-وعلي ولا اجي توخر لو اطكك وعلي .
ضحك وانه مدري شمالني احجي بنتر وأريد اتعارك
بريا:: بس اشبگج.
-على يا اساس تشبگني شبيك تسودنت؟
راحت إبتسامته يحجي بجديه عيونه ذبلانه كوه يعاينلي
بريا:: مرتي رنـــه! انتِ شسالفتج؟ ملگه وحده مشتاگه الخطيبها هذا؟
اعاينله مرتبكه مسحت وجهيّ أأشر على الباب
-انتَ قفلت الباب مايصير ترى.
خله المفتاح بالقفل وفتحه ضايج ويحجي
-اجيها بلهفه تتلگاني تشمر بالحجي .
سكتت اتذكر حچي عفراء من سولفتلها عليه وكتلها يدور هيج وهيج سوالف ضلت تضحك تكلي اي ميخالف خطيبج جا وعلمتني اليا حد ارضى، تقربت خطوتين يمه مرتبكه مديت ايدي اكض ايده وكوه احجي
-مو انتَ گبل قفلت الباب... الحمدلله على سلامتك.
عاين بوجهي لحيته صايره عاليه واحس عيونها لونهن صاير غامق لان الغرفة كلوبها طافي وشايلين البرده من الشباج يطبلها ضوه خافت لان الدنيا مغيمه، حرك ايده بأيده دنك يعاينلها مدها يكض ايدي من معصمي وجرني بقوة الصدره شهگت بصدمة وهو بأثنين اديه شابگني على صدره وضم وجهه برگبتي جوه العبايه گـــلبي يدددك حيل وجسمي مقشعر
فاتحه عيوني حيل مصتگه وايديي مفتوحات ماشابگته مثل ماهو شابگني غمضت عيوني حييل من حسيت انفاسه الحاره توصل لرگبتي من فوگ الحجاب وايده تمسح على ظهري وتقربني الصدره أكثر واكثر عصرني بحضنه يحجي بأذني
-اشبگيني رناتي
يلعت ريكي گـــلبي احس راح يوكف وماگدرت اشبگنه ضالات ايديي مفتوحات مناه ومناه حرك وجهه برگبتي يريد يوخر الحجاب رجفت وحطيت ايديي بصدره ادفعه بساع عافني درت وجهي ارجف وما احط عيني بعينه احس وجهي يريد ينفجر
-اريدن اروح.
-بوسيني مثل مابستي شمس.
عاينتله خازرته وهو عيونه ذبلانه مستند على الباب حاط اديه وره ظهره
-بريا لا تضوجني.
-والله ما اضوجج بس حيل مشتاگلج
-اريدن اروح للمدرسة
-أبوسن خدج وترحين؟
اعاينله واحس يسمع صوت دگة گـــلبي العالي مسحت وجهي عرگانه هزيت راسي لا گال
-جا انتِ بوسيني
هم هزيت راسي لا
بريا:: اختاري وحده منهن رنـــه لا تشلعين گـــلبي لو تبوسيني مثل ما بستي شمس لو تخليني انا الابوسنج.
درت وجهي اتلفت ادور شي اطكه بيه وأخلي دمه بطوله وهو يضحك اندك الباب حيييل وصوت مــاسه صاحت
-هد البببت بريا ولحسين اسوووي فلك.
ضحك ودار المفتاح بالقفل طبت خازرته وماريا تضحك وتمسح على أيدها تشكي البريا شلون مــاسه كارصتها جنت عبالي هسه مخططه وياهم طلعت حتى ماتدري وعبالها بريا نايم.
رديت للبيت وبساع كعدت عبود ودانه لمدارسنه شبعت قهر وبجي ما دارسه زين وماجاوبت عدل لمن كضه الدوام وردينه لكيت عفراء بالبيت تطبخ شوربه تاخذها الريمه بدلت واجيت يمها اسأل گالت
-مايطلعونها اليوم يجوز لباجر لو عگبه.
-هم حجت وياكم؟
-شويه، كاضيها بجي.
-سوده بوجهي كون.
للعصر راحت هيه وطرواده للمستشفى باتت هيه يم ريـــمه ورغد ردت، القرية هدوء محد يدري ريـــمه الطيحت ميلاد من الدرج وحتى هيه من محاجينها ساكته ما گايله .
بريا بعد ولا شفته لحد ما ريـــمه طلعت من المستشفى ذبلانه وحجي گوه تحجي وجها اصفر والكانونه بأيدها طــروادة رايحه روّحه وياها ما يدري شيسوي وإخوتها يرحون ويجون عليها بس مرتضى مايتراوه، للعصر أجتها فرح ضلت يمها ساعه وراحت والنوب البنات هم كلساع وحده تجيها.
وميلاد الثاني يوم يله طلعوها من المستشفى سعاد مداريتها، عدن جم يوم العطوه كضت وي بيت علوان وجددوها عشرة ايام بس يردون يلكون حل بس هذولام مايرضون إلا دم ويكتلون بمچان ابنهم مو وآحد اثنين وفصل يكسر الظهر مارضت عشيرتنا وبس جددوا العطوه.
""""
مــاسه:: رديت اداوم واعوفن حور يمها ومحتاره المن اسولف خايفه احجي لإخوانها ويتسودنون اعاينلها بحيره البنيه فقيره بس تريد تحس بأخوانها يحبونها بس تريد تحس روحها بين اهلها، وحتى وياي تحتار شلون تهتم بس حتى ما اضوجن منها.
بس كل ما احاجيها عدل واذكر الهويه وجواز السفر اضوج واديرت وجهي منها احاجيها بضوجه وتحس تنقهر وتمي من يمي بساع اتندم،
ردت احجي الصيهد وخفت يسحلها يحط الخنجر على رگبتها حتى تحجيله الصدك وتموت البت من الخوف.
والنوب مناه احنا سالفتنه صايرة بالضيم وبريا نزل يريد با يوم عطلة نصف السنة يسوي خطبه گاله مــيثم
-خل تكضي هالهوسه وسهله الخطبه
بريا:: ليمت وره ما التحق؟ لا خويه انا نزلت علموذ الخطبه، الطلايب ماتكضي ضلوا اخذوا عطوات.
مــيثم كاعد بالهول بصفي الف كبه وحور گدامه بفراشها، وماريا كاعده على القنفه تعاينلهم بريا واكف بباب غرفته گالتلهم
ماريا:: شو يعني عطوه؟
بريا عاينلها ساكت وميثم گالها
-هدنه بين طرفين
سكتت وهو دار وجهه البريا يحاجيه بهدوء
-ميخالف على نزولك اليجي تخطب
ضحك بريا يهز راسه لا
-لا خويه لا نزولي اليجي ولا هم يحزنون اول يوم عطله لو ثاني يوم اخطب.
مــيثم:: هسه انتَ غير عاقد شكو بعد خبصتنه؟
بريا:: لا اريدن الوادم كلها تكضي بالأخصّ أخوالها.
دار وجهه مــيثم بحيره يحجي
مــيثم:: لا اله إلا الله.
سكت بريا واجوا عليه سليم ووهب آخذوه وطلعوا وميثم مشه يحاجي طــروادة، گمت للمطبخ وأسمع ماريا تلعب وي حور افكر بيها اصارحها واكلها شسالفة هالجواز اكيد تنكر وتحجي غير سالفه ساعتها انجبر اسكت، أفكّر بحيره واجت يمي مبتسمه بأيدها حور شالتها حطتها بصف وجها وتحجي
ماريا:: شوفي عيون بنتك راح يصيروا نسخه عن عيوني، ليكي شوفي كيف طالعه على عمتها.
عاينتلها بدون ابتسامه وعاينت لعيون حور بعدهن رصاصي غامق ما ادري اذا راح يصل هيج لو يتغير رديت عاينت لوجهه ماريا گتلها
-على عيون أبوها.
عاينت لوجهي الدمعه تلمّع بعيونها دنگت وطلعت من المطبخ عافت حور بالهول وطبت للغرفة عضيت ايدي متندمه غسلت ومشيت وراها فتحت الباب بدون ما أدكه مسحت عيونها بساع كعدت گبالها
-اعتذر ما قصدي اقهرج.
عاينتلي ودموعها تجري كوه تحاجيني
ماريا:: حكيك معي كتير قاسي بحسك فجأه كرهتيني شو عملتلك انا؟
-ماكرهتج والله العظيم بس عاينــي ماريا صارحيني ولا تچذبين عليَّ شني سالفة هويتج الثانيه اللي باسم رنده جورجيت؟
فتحت عينها حييل مصدومة والتفتنا اثنينا على فتحة باب الغرفة طب بريا عاگد حاجبه بصدمة وهي بساع زحفت من مچانها تلبد وره ظهري عيونه عليها مصدوم
بريا:: يا هويه؟
وكفت على حيلي وهيه وياي مچلبه بظهري خايفه
-بس على كيفك بريا.
-يا هوووووويه؟
صيح بنتر فززنه انه وياها وحور من الهول بچت من صياحه وطب مــيثم من باب الهول صاح عليه
مــيثم:: لللك صوووك
وبريا ما مهتم عيونه ماشالهن من ماريا مد أيده عليها يجرها من وره ظهري صرخت بخوف. وانه بس اريد افلتها منه اجه مثيم يركض جره ودفعه مافاهم شي يريد يطكه ويصيح بوجهه
-شمااالك وياهااا؟
بريا:: يا هوووويه لللج يا هووويه؟؟
يصيحون وهي ترجف مچلبه بيه حييل وانه الندم اكل گـــلبي شلون حجيت وخليتهم يسمعون التفت عليَّ مــيثم مصدوم وبريا يأشر وبحجي بنتر وصياح
-رنده اسمها وهسه تطلع حتى مو اختتتك
وهي من وره ظهري تبجي وتحجي
ماريا:: اختك وحياة الله اختك
مــيثم:: شني السالفة مــاسه؟
عاينت لوجهه بخوف وهيه وره ظهري حتى وجها ماتطلعه كاضه بيه حييل عاينت لميثم محتاره وصوتي يرجف
-عدها هويه وجواز بغير اسم بس على كيفكم بس خلوها تحجي.
ضحك بريا محترك گلبه وميثم مصدوم كالها
مــيثم:: أحجي؟
اريد أوخر من گدامها ماتهدني تشهگ بالبجي مد أيده مــيثم جرها من وراي كعدها على الچربايه خايفه ولامه روحها مد أيده مسح عيونها خازرها رجع ليوره بصفنه وهي من بين دموعها شالت راسها تعاين عليه والخوف تارس وجها دار مــيثم علي يسأل
-وين الهويه؟
سكتت عيني بعينها شلون اكلها والله مو قصدي يسمعون ومو قصدي اخليج بهالموقف ولا اخلي روحـــي، مالت براسها تتوسل روحـــي انطحنت طحن درت وجهي اله كوه احجي
-ما ادري مرّه شفتهن.
مــيثم:: جيبيهن ماريا
عاينتله تبجي ومن شافته شلون خازرها كامت واديها يتراجفن عفتهم وطلعت الحور بس حطيتبها الملهي ورديت يمهم خايفه عليها، طلعت الهويه والجواز من الجنطه مدتهم الميثم حط ايده بجتفها ودفعها يكعدها بمچانها فتحوا الجواز يعاينون بيه سوه مصدومين سدوه يعاينولها وهيه موتت روحها من البجي
مــيثم:: احجي الصدك
وهي تبجي وتحجي بصوت يرجف
-مالي غيركن لا ترموني برا.
غلط عليها بريا بالروسي دار مــيثم طگه على حلگه وهو شايط بس يريدها يحجي ورد عاينلها يحاجيها
مــيثم:: لميناج من امج ذبتج وانتِ شسويتي مچذبه علينه، اقلها هسه احجي الصدك.
مسحت عيونها تشهگ وتعاين الايده
ماريا:: هولي اللي بأيدك مزورين مش معلوماتي الحقيقيه سافرت فين لهون لاني ما فيي سافر بأسمي الحقيقي ماريا خليل.
هز راسه موافق وبريا يتحركن يريدها تحجي بساع
مــيثم:: خوش وياج، ليش ماتگدرين تسافرين بأسمج الحقيقي شبيه؟
بچت حيل خايفه وعيونها تتوسل
-لا تتركوني مالي غيركن والله بموت.
بريا:: غيرر تحجي يا علي غير تحجي لج بابا احجيي شمصخمة شملطمه انتِ وامج احجيي؟
مــيثم:: سولفي الصدك ماريا.
مسحت عيونها اديها يرجفن تعاين للگاع عگدت حاجبي أراقب ملامحها عبالك وحذه تدور سالفة تقنع رجعت عاينت لميثم گالتله
ماريا:: كانت عندي رفيقه اهلا أغنياء كتير والهن سلطة، صارت بيني وبينها مشكل صغير انا دفشتها وعلى اثر دفشتي وقعت وصار معها ارتجاج بالدماغ وفقدت بصرها وامها وبيها حلفوا يرموني بالحبس ويلبسوني تهم كتيره تهم بتوصلني لحبل المشنقة، امي قالت نحنا مانا قدهن، وبدل ماتهربني معها عروسيا قررت ترميني هون وتخلص حالها مني.
شالت رجليها من الگاع لمتهن الصدرها حاضنه روحها وتبجي بقهر تتوسل
-لا تتكروني والله مالي غيركن.
بريا:: وياهو يگول الحجيتيه صدك؟ هاه ياهو يگول ماجاي تجذبين.
ود مــيثم فتح الجواز وشاف الختم اتأكد هيه داخله للعراق بأسم رنده عاينلها گالها
مــيثم:: صــيهد عده صديق بالبنان راح اخليه يسأل على معلوماتج غاد اذا طلعتي هم مجذبه والله اردج لحضن روزا.
بلعت ريگها بخوف وهزت راسها اي
ماريا:: اسأل وتأكد واذا بدك اعطيك اسم مدرستي وشوف بأي اسم أنا درست وكبرت.
هز راسه خوش
مــيثم:: ليش جذبتي علينه؟
دنگت ساكته دموعها تجري بريا راد يحجي ماخلاه مــيثم دفعه بره طلعوا من الغرفه وضليت بس انه اعاينلها تمددت وجرت الغطا عليها تبجي متت من القهر اعض ايدي ندم ، طلعت من يمها بريا يفوّر بحرگه شلون جذبت وميثم يسكت بيه وحتى يسد حلگه گاله
مــيثم:: طــروادة ما رضى بسالفة الخطبة هسه سكتني ماخلاني حتى احجي.
بريا:: هوه بكيفه؟
مــيثم:: لا جا بكيفك.
طلع بريا شايط من القهر ويحلف ماله غرض ويسوي الخطبه يعنّي يسويها.
خلوا مــيثم حرگه تجيبه وحرگه تاخذه، وماريا ضلّت معزوله بالغرفه اعتذرت منها خجلانه كالت
-ما خصك انتِ ماكان بدك يسمعوا صارت صدفه.
-اي وعلي ما ادري بيريا رد للبيت.
هزت راسها اي ساكته وميثم وبريا اثنينهم ابتعدوا عنها محد يحجي وياها ولا مهتمين جنها غريبة تفلش گـــلبي من تكضيها بجي.
"""
رغد:: انجبرت امشي لبيت عمي شاكر چم يوم الخاطر سلطان لمن امه تصير زينه، اشتغل وهيه ودها تگوم تخنگني حتى من افتح الثلاجة اريد اطبخ ماعاجبها لمن ملت مني صاحت على عمي شاكر
-صيحلي فرح تجي هناه وخل بت ايمان توخر عني.
ومدري شعجب طلعت من عمي حجايه زينه گالها
-ناشده عليج هسه هيه فرح هودي عمي هودي وخلي البت ساتره علينه.
گلبت وجها ماراضيه اخواتها ونسوان اخواتها كلساع يجنها جاي وماي ويرحن، صاح عمي على هاجر اجت يمه كضها من أيدها يحاجيها
-شمالج بويه؟ مريضة اخذنج للدكتور؟
جرت ايدها من ايده تهز راسها لا باسها براسها وحط عباته جوه باطه وعوجيته بأيده مشه اخذ ابوي وراحوا يدورون فصول، يفترون من عشيره العشيره يردون يحلونها وي بيت علوان.
طبيت للمطبخ واجت هاجر يمي تعاينلي مبتسمه سألتها
-هم شفتي ريـــمه اليوم؟
هزت راسها اي مبتسمه وتحط اصبع بصف أصبع
-كهلان يمها؟
هزت راسها اي ابتسمت اطبخ الامها شوربه وطب ســليم
-السلام عليكم
-عليكم السلام.
عاين الهاجر مبتسم دنگ باسها بخدها يحاجيها
-شلونها الملكه
وهيه تدلع عليه وتجلب برگبته يضل مدنك مايرضى يشيلها اضــحك على سوالفهم لمن صاحت عليه امه وخر من هاجر وطب للهول كعد يمها اسمع حجيها شلون تغلط عليهم هوه وسلطان .
ســليم:: عبالي من طحتي من الدرج الله هداج .
طكته راشدي تغلط
-ابن لجلاب مابيك خير ياخايس
-شتردين؟
ميلاد:: جيبولي ريـــمه خل يطلگهاا بتي اريدنهااا؟
ســليم:: المن تردينها تدگين عليها؟
ردت طگته راشدي حييل كام من يمها ساكت طلع من البيت وهيه تتحسب عليهم وتدعي وكامت من فراشها طبت الغرفتها ماتهود بمچان واحد.
كضيت الشوربه حطيت بصحن رتبت صينية ومشيت ماخذتها الها بعدني مافاتحه الباب واسمعها تحجي بهمس ما ادري ويامن تحجي وتگلها
-ريـــمه بت ميلاد، وهوه كهلان ابن رباب، بتي هيه ريـــمه نفسها
كزبر جسمي دكيت الباب مرتبكه فتحته ساده التلفون وشامرته بصفها حطيت الصينية بالگاع
-أكلي عمه وراج علاج
تعاينلي بخزر طلعت من يمها بساع طبيت الغرفة ســليم غراضي بيها ماخذينها انه وسلطان جريت تلفوني وبساع كتبت العفراء رسايل احجيلها السمعته ودتلي
-خل تسوي تحلم تسحر كهلان.
-خفت على ريـــمه.
-شتسوي خل تسوي ما تگدر.
-شلونها هيه ريـــمه؟
-شلونها بس صافنه واخوي يريد يموت عليها حاير شيسوي شلون يردها تضحك وطبيعيه.
-سوده عليَّ.
مسحت محادثتي وياها وگمت للبيت الولد لان يستحون مني يجون بنفس الوكت حتى اسوي عشه مره وحده صبيتلهم تعشوا ومشوا وي ابوهم للديوان عدهم خطار
وهيه بعد ماطلعت من غرفتها هاجر ضلت يمي بغرفة سليم نلعب مغطيه القلب واكتب رقم وتأشرلي بأيدها يارقم كتبت فازت علي مرتين گتلها
-ما العب بطلت.
ضحكت واشرتلي بايدها اكعدي ارسمج ضليت كاعده بالنصّ ساعة وحتى من ارمش ماترضى تخزرني وتضحك وانه متانيه الرسمه متت بس اريده اشوفنها، مناه لمن طب سلطان وهيه بساع حطت الدفتر على بطنها ضامته وتضحك اجه يمها يريد يجره منها ماتطيه ميته من الضحك دفعته منها
-وخرر جاي ترسمني.
سلطان:: لج تضحك عليج مدري شراسمه.
-يااا.
واكضها وياه وهيه تمددت كاضه دفترها بكل حيلها وتضحك حط رجله فوگ. رجليها يثبتها وانه آفتح بأديها من الدفتر جريناه منها نضحك. وهيه دمعن حتى عيونها كد ماضحكت دار الرسمه علي راسمه شمس وحاطلتها عيون وحلك وخطوط عود تضحك مدري شلون مسويتها كاتبه عليها رغد وبصفها گمر وحاطتله شوارب وهم مبتسم كاتبه عليه سلطان
-الله حلوه صح هسه انه شمس بس اخوج منيله گمر؟
اثنينهم رفعوا حواجبهم بنفس الحركه كعدت على حيله جرته عليها تبوس خدوده وتأشر بأيدها عود يخبل وانه اشلع بگلبها كلساع وكتلها
-منيله؟
سلطان:: شفتيها هاجر؟
جرت الدفتر تكتب وسلطان يعاين وياها ضحك من كل گلبه شالت الدفتر تراويني كاتبه
-لو ما حلو جا ماكضيتيها وياه يم شجرة آلتين.
-سلطان انتَ مخلي علينه شاهد قوي هسه تهددنه توصلها الصيهد حتى لو متزوجين يكتلنه.
ضحك وهيه تأشر براسها اااي وبأيدها تأشر فلوس گالها
-كليله ما اخافن منه بعد اخذتها
ضحكت لمت اوراقها تريد تروح جلبت بأيدها متونسه على سوالفها
-وين رايحه بعد وكت.
حطت ايدها جوه خدها وغمضت تريد تروح تنام باستني وباست سلطان طلعت وسدت الباب وراها، عاينلي مبتسم وتدنى كدامي على الفراش مد ايده يتلمس خدي
-خوما تعبانه؟
-لا ماعدي شي بس سلطان فـــدوه مو يگلولك ضلوا هناه وترضى بس تصير امك زينه نردّ لبيتنا.
هز راسه اي وايده على خدي قرب وجهه توه يريد يبوسني وانفتح الباب بدون مايندك شهگت ادور على حجابي وهوه طلع فشلان. ويحجي
سجاد:: والله عبالي ســليم .
سلطان يضحك وانه من فشلتي طكيته على حلگه ميته بدمي كام قفل الباب واجه تمددت بفراشي بدل واجه يمي جرني من ايدي الصدره شابگني ويحجي
-سجاد راح يضل اسبوع مايحط عينه بعينج.
-سجاد خجول وفد يحترم مو مثل ســليم.
-شبيه ســليم؟
-صلف.
-الا اكله تحجي عليك.
شلت راسي من صدره احجي
-لا سلطان عيب
يضحك حاط ايده جوه راسه وبأيده الثانية يتلمس زندي
-بوسيني وما احجي.
دنگت ابوسنه واحلف بيه مايحجي رجعني لفراشي يبوسني وفز من دگة الباب ضحكت اعاينله وهو يسب بيهم كام من الفراش ينتر
-ياهو؟
ســليم:: وهرش حتى هرش اريدن شاحنتي والتشريت الزيتوني وبجامه وخاولي وغراض .
غطيت حتى راسي بالبطانيه وسلطان فتحله الباب وهوه يحجي علينه
ســليم:: هاي ام خنيس مرتك ماخذه الغرفة فلاحه ملاچة عاد اطوني هدومي.
سلطان:: خاب توها تحجي عليك.
عضيت ايدي متحللفه بيه انه اعلمنك يا خبيث النوب يييمه شلون زود بالحجي ويگله
سلطان:: تكلي خايس غرفته خايسه وواحد سرسري وساقط وأبد مايحترم
ســليم:: غرفتي خايسه؟ خيبه اغسلها بتيزاب بت ووليد.
سلطان:: وتگول كون ياخذله مره ملسنه تربيه لان هوه ما مربه.
ســليم:: اربيها واربي عشرة وياها بببت وليد ام التين، بيج خير وخير ما جان سلطان كاضج يم الساگيه.
طگه سلطان يضحك وانه ميته بدمي ومتحلفه أموت سلطان گاله
سلطان:: انچب ولك حدك لهناه
ســليم:: جيب هدومي وخل اروحن زعلان البيت عمي شامل.
-صدك راح تبات يمهم؟
ســليم:: اي والله هذا مرتضى متعارك وي مرته واجه نام بالدوانيه ما انامن يمه لو اشوف اضل كاعد للصبح رايح يم عبود وسجاد بدوانية بيت عمي شامل.
طب سلطان اخذله هدومه ويشلع بگلبه يگله التشيرت النيلي يراويه قميص اسود
ســليم:: دست ببطني راح اسبنك هذااا هذا گبالك الزيتوني
سلطان:: هاااه هذا؟
وسليم لطم لطططم يصيح
ســليم:: قميصصص هذا قميصصص
-ها هاا هذا
ســليم:: وردي هذااا وردي.
سلطان:: منيلك هذا؟ ماشايفه عدك تشيرت وردي
ســليم:: قديم جبته وخفت من كهلان وصيهد مالبسته.
ضحك وانطاه اغراضه بس راح ســليم وقفل الباب وكفتله والمخده بأيدي
-ليششش تجذب؟؟
-ما مجذب انتِ حجيتي عليه
-سلطاااان
صيحت افور اريد اطگه ويشرد يضحك يفتر من صفحةه الصفحة من فوگ جرباية ســليم ماخلاني اطگه كعدت بالگاع زعلانه
وهوه راح مد التشيرت الورد على الچربايه صوره وداه بگروبهم وودالهم قصص وروايات عراقية كرار صلاح صوتيه يضحك ويگلهم
-صــيهد، كهلان هذا تشيرت ســليم توه جايبه يريد يلبسه بالكعده مال بيت علوان.
عاينتله احجي
-ليش تتبلى على الولد.
-حتى يكتلونه ويتوب من هاي الالوان وردي حتى انتِ مالابسته.
درت عيوني منه متحلفه بيه ومتفشله من سليم، بس طلع يجيب ماي ركضت قفلت الباب رد دك الباب
-ما افتحه.
-نمرشتي.
-اللواته عوفها على صفحه انه تفشلني گدام ســليم؟؟
-يروحلج فـــدوه شني هوه ســليم؟
-روح.
-نمرشتي رغدي
-روح نام يم مرتضى.
-بداعت امج ما اعيدنها بعد
-ابدد
-فـــدوه الوجهج الاحبنه يهون عليج طردت ســليم تالي انا هم انطرد
-كلش يهون يله راح انام مو تدك الباب وتگمزني.
تمددت بفراشي لافه راسي دك الباب لمن مل وراح .
رنـــه :: احنا بيا حال وهذول يفترون علينه دردمت من گالي عبود سوي چاي عاينلي رافع حاجبه
-بريا وياهم خاف الج نيه تدعين عليهم.
عضيت شفتي ما اريدن ابتسم گدامه كتله
-اسويلهم نومي بصره
-لااا الا چاي شمعنى من گتلج مصخم وياهم كلتي نومي بصره.
-غير زين للمعده.
-انجبي انجبي امشي.
ضحكت طبيت للمطبخ سويتلهم چاي واجت عفراء من غرفة طــروادة بأيدها صينية كتلها
-شلونها؟
-لا زينه احسن ينراد كلساع نحجي وياها ونقنعها انتِ ما الج طنب كل الصار صوج اهلج.
هزيت راسي اي طب طــروادة التعب ماكل وجهه غسل واجه يمنه للمطبخ يسأل ياهو من الولد هناه كالتله عفراء
-وليداتنا سجاد وعبو، وولد عمامي ســليم ووهب وبريا.
ابتسم يعاين بوجهه تحسر يسأل
-ريـــمه شلون صارت
-احسن روح شوفها.
عافنه ومشه يمها للغرفة سويت چاي وصبيت خليت الصينية بأيد حسين وداها الهم وطرواده طلع من الغرفة كاض ريـــمه من جتافها طلعها وياه كوه توكف على رجليها كعدها يمنه بالهول ودنه الصوبه گدامها يحاجيها جنها طفله گدامه
-هناه اكعدي يم اخواتج، حابسه روحج بالغرفة ومختنگه عليمن؟
يحجي وياها وهيه ماتحط عينها بعينه يعدل بالشال على راسها ودنك باسها بكصتها متحسر ابتعد يعاينلها شالت عيونها الذبلانه اله بحيره ساكته مشه يم الولد وآنه وعفراء نحجي وياها ونقنع بيها هزت راسها اي وشمس مشت كعدت بحضنها ابتسمت وباستها بخدها كتلها
-ريـــمه صيري زينه گبل لا عفراء تروح لبيتها حتى ما اضل انه الاشتغل.
ابتسمت تسمح بعيونها وعفراء تگلها
-چلبه هاي تهمها مصلحتها.
ريـــمه:: حقها هيه تعبانه يا دوب تلحك على دراستها.
-ويگلولي ليش تحبينها مرت اخوي الذيبه انتِ.
عفتها تحجي وي عفراء وگمت كعدت يم باب الدوانيه اريدن اسمع سوالفهم جانوا يضحكون لمن اجوهم كهلان وصيهد وميثم گلبوا من الضحك يحجون ببيت علوان وبسالفتهم ولدهم يردون ينفون العطوه واهلهم مايرضون وصايره ملاطم ماتنعرف وراها بشويه ضحكوا حييل ســليم يگلهم
-سلطان انطرد.
وراها بشويه اندك باب الخوش وطب سلطان لكاهم كلهم كاعدين وسليم قاريلهم الرساله الوداها اله تسودن يريد يكتله وهمه يضحكون عليه
طــروادة:: ما الفي احد انه واليبات هناه يدفع عشرة.
عبود:: الدوانيه النه انا وسجاد الفلوس حگنه يعني اسكت انتَ كهلان.
يحجون يحجون وانه ادور على صوته ليمت يحجي هوه لمن سكتوا كلهن كاله
-كهلان، شتگول ليمت نسوي خطبه رسميه اول يوم عطله لو ثاني يوم؟
سكت وانه گـــلبي يدك حييل فترة ضلوا ساكتين النوب گاله
طــروادة:: خل هاي الهوسه تكضي ويصير خير.
بريا:: لا خويه انا نازل وناوي ما اريدن تتأجل
صــيهد:: يعني وكتها هسه ماتشوف على يا ساعة نتكاتل؟ وانتَ عاقد. بعد عليمن لو الا هوسه ،
بريا:: اي الا هوسه، انا اريدن اجي اشوفن مرتي اريد اخذها زياره اريدن امشي وياها بمچان ياهو اليدري بيه خاطبها، يعني صــيهد هسه انتَ ترضاها على روحك تجي الوادم تتخطب مرتك لان محد يدري بيك عاقد عليها؟
عله صوتهم محد راضي عليه شردت للغرفة هسه اخواني يردون عليَّ، ضلوا للوحده كاعدين ويحجون تالي هددهم يخابر شيخ حيدر وتسودنوا طردوه مشه زعلان بس رضوا بحجيه كالوا ثالث يوم العطله يسوّون الخطبة.
وبس سمعت صوت طــروادة لفيت راسي ونمت حتى لا يحاجيني.
""
ريـــمه:: احاول اعيش بس اهلي المايخلوني كل ما اتنفس يخنگوني.
سولفت السلطان كتله امي تطك هاجر كال ما اعوفنها يمها بعد بس تصير زينه اخذها يمنه انا ورغد، سكتت احس ماكو حل وياهم، ابوي مره وحده اجه شافني وسأل شلون صرتي ومن جيته حسيته مايدري بسوالف امي ولا يدري بكلشي صار.
فززتني من افكاري ايد عفراء درت عليها كالت
- كافي ريـــمه كهلان راح يتمرض من القهر عليج والله يگلي من اشوفن وجها ذابل الدنيا تضيگ بعيوني ودي اسوي كلشي بس ترد تضحك.
-استاهل؟ تشوفيني استاهل ينقهر علمودي وانخ القاهرته بموت اهله؟
مدت أيدها تسدّ حلكي وتحجي
-اي لان ما الج اي ذنب بكلشي صار نيتج تصلحين بين ابوج وابوي وحظنه المصخم اننتل بهاليوم، وهي لو صدفه لو ولد غانم النتلوه وابوج وعمي وليد يغطّون عليهم، لان جانوا معادينه بوكتها، واذا على امي شعليج؟ انتِ جنتي جسد بلا روح تمشين شلون ماتريد امج واذا على عمتي نضال والعباس جذب امج تريد تسودنج.
درت عليها متحسره
-كارهتهم عفراء ما اگدر اعاين بوجهم اتمنى ما اشوفنهم لا امي ولا ابوي.
-ميخالف مابلادم تشوفينهم لا ترحيلهم ولا يجونج هاي هيه لا تنقهرين.
سكتت متحسره شمس نامت على رجليَّ أخذتها عفراء ودتها للفراش گمت من الهول طلعت للحوش اريد اتنفس كعدت بالظلمة على گن الدجاج ضوه قليل يوصلني، الولد طشوت ضلوا بس اخواني بالدوانيه.
شويه وطلع كهلان يدور عليَّ لمحني واجه كعد بصفي مد أيده ولمني جوه جتفه يحاجيني
-مو بارده عليج ليش هناه؟
-مختنگه.
-ليش ريـــمه شو عاينلي سودنتيني وعلي ما تگليلي شمالج؟
عاينت بوجهه يمسح على خدي ويعاين لعيوني فز على صوت تحمحم التفت طلع سلطان من الدوانيه صاح عليه كهلان
-تعال المطرود.
ضحك سلطان واجه يمنه وكف بصفي دفع ايد كهلان من جتفي وكهلان دفعه ورد جرني الصدره حييل ضحك يگله
سلطان:: والله چلب انتَ
-انچب بيك خير ماطردوك.
-ياهو طردك؟
طــروادة:: مرته طردته الخايس، هسه انا مرتي تطردني من غرفتي واسكتتت؟ غيّر ارميها.
شلت راسي اعاين لعيونه ضحك وعاين السلطان
-ياما نمنا بالهول مطرودين
سلطان:: اي هذا الحچي سولف واسيني بعد كون صــيهد وميثم ينطردون ياابه الا اطش چكليت.
ضحك كهلان يگله
-أيس صــيهد ماينطرد وميثم هذا عايش بغير عالم هم ماينطرد الطردات بس النه چيه خوش زلم.
دنگت مبتسمه ضلينه شويه بره حجيت وياهم نسولف حسيت روحـــي احسن وكف سلطان يريد يروح ينام بالدوانيه ويجر بكهلان وياه ينام يمهم وهوه مچلب بأيدي ويگله
كهلان:: اعوفن حضن اختك شمالني مسودن؟
خنگه سلطان يسكت بيه وهو يضحك عليه ويگله
-يله امشي تغطه وانخمد مطرووود.
مشه سلطان يضحك طب للدوانيا واحنه كمنه طبينه للبيت لكه عفراء بعدها كاعده وكف يحجي وياها على خطبة رنـــه حاجته تكله حقه وتقنع بيه، عفتهم وطبيت للغرفة شويه واجه يمي يجرني من فراشي الصدره حاير بيا طريقة يواسيني وهو ما يدري عليمن بالضبط ذبلانه وتبجي عيني.
-تدرين ينهد حيلي من اشوفنج مالج خلك؟ وعلي شغل ماعرف اشتغل دراسه ماجاي ادرس باجر امتحاني ماشايف الملزمة شني شكلها كل فكري بيج، نرد للدكتور؟
حركت راسي على صدره لاا وقربت روحـــي ابوسنه برگبته
-مابيه شي بس ضل وياي لا توخرني من يمك
شبگني على صدره بأثنين اديه
-يمي تضلين العمر كله.. بأيدي يشيب شعرج الاحبه.
زفرت نفس براحة وشلت راسي من صدره بسته بشفته ووجهه مد ايده يكض راسي وخرت
-گوم ادرس.
-بعدين
جراني عليه وخرت
-گوم ادرس ما اريدن ترسب .
رد راسه للمخده وحط ايده فوگ عيونه دنگت بسته احجي
-فـــدوه اروحلك گوم
وخر ايده من عيونه
-كل ما اقرأ صفحة تبوسيني؟
-اي .
ضحك جرني عليه باسني وگام طلع ملازمه شغل الهيتر والضوه وكعد بالگاع كدام الجرباية نزلت كعدت گدامه اعاينله يخطط جداول ويكتب والحاسبة گدامه كلساع يضرب رقم برقم كمت للمطبخ سويتله اكل واحجي وي روحـــي دام عانوا والسبب انه حتى لو ماجان بقصدي عوضيهم ولو بشي بسيط لا تزيدين قهرهم.
اخذت الصينية وكعدت كبالهم مبتسم مكيف وكلساع يجر راسي يبوس خدي
-اي اضحكي هيج خلّيني اشوفن الدنيا بضحكتج .
دنك ياكل وانه اسويله لفات جبن واوكله يضحك اكثر من مايدرس الموضوع يقراه مره وحده ويعبره
-هسه هذا فهمته؟
-اي والله
-احس بس جاي تقرأ ماتفهم.
-افااا
عاينتله مبتسمه ضل للاربعة ونص يقرأ جريت الغطخ من الچرباية وتمددت حاطه راسي على رجله ومقربه رجليَّ للهيتر ادفيهن حرك رجّله يهزها وانه اصلاً نعسانه بساع غفيت وفزيت من شالني للچربايه .
ومالحك يشبع نوم بالسته ونص كعدته يروح للدوام عفراء ضلت يوميه رايحه للسوگ علمود خطبة رنـــه ورنه خانسه حتى بالتلفون ماتحجي وي بريا تخاف من طــروادة .
اهلي وخرت عنهم ومن اريدن هاجر اخابر ســليم يجيبها يمي اسألها اخافن لا امي تطكها تگلي لا متونسه وي رغد، التهينه وي رنـــه وصدك من اول يوم عطله رحنا اختارينه بدله تدلع وتتزعل وعفراء تريد تكتلها بس ماعجبها شي صاحت
-بطلت بطلت ما اريدن.
عــفراء:: يا يمه رأح أموتها
رنـــه:: شوفيهن يلعبن الروح،بس الاحمر حلو وانه ما اريدن احمرر اريده للحنه.
وكفت يم فستان زيتوني ودرت عليها احاجيها
-الزيتوني هذا حلو؟
طبت هيه وعفراء لبسته ماعجبها فرتنه فر للغروب يله اقتنعت واختارت فستان فضي على رصاصي فاتح مكشوف من الصدر الاكتاف قماش عريض جهه مطرزه الحد حزام الخصر والجهه الثانيه ساده وينزل بنفشه موكلش قويه لبسته وكعد قالب عليها تعاين لروحها بالمراية فرحانه عاجبها كالتلها عفراء
-والله يسوه فرتنا وتعبنه يخبل.
-اقتنعت.
هلهلت عفراء مكيفه، أجرناه ومشينه للسوك المحلات تريد تعزل وعفراء تجر بينا وتختارلنه هدوم للخطبه، ردينه للبيت ميتين من التعب وطرواده يحجي لان شس ناطه من البجي
ركضنه نعزل الغراض ورنه مادري شمالها تشوف الولد مناه تشرد مناه لمن بريا خابر على طــروادة وهوه بالحمام اخذتله التلفون فتحت خط ومديته اله الصلف يگله
- اريدن اختك اخابر عليها ترفضني
-شو تاكل تبن انتَ شني تريد اختي؟
كاضه التلفون وكاضه ضحكتي كاله
-اريدن اخذ رأيها بهدوم الخطبه
-امشي البس دشداشة
-بكيفها هيه شتريد البس.
-سددي بوجهه ريـــمه سددي
-لا خطيه رايحه اوديه الرنه.
اعاينله جان خاتل وره الباب بساع مد روحه يريد يجرني انه والتلفون مشيت من يمه وبريا يگله
-هاي وين جاي تحجي وياي بالحمام؟
اخذت التلفون الرنه والكاها تتعارك وي حسين على المصقول الحامض اخذ منها هواي وهيه متسودنه
-بريا رررنه بريا.
اخذت التلفون من ايدي شلت اصبعي اهدد ما تسد الخط اريد اسمع نعمت صوتها كالتله
-الو.
-ليش اخابرج ماتردين؟؟
-استحي
-نشوف لحد يا وكت تضلين تستحين
-لا تصيح
-ما اصيح حبيبتي
رجعت راسها ليوره سايحه رفعتلها حاجبي الضحكه من الأذن للأذن كالها
-البس دشداشة وبشت لو بدله
-قاط ورباط، الدشداشة والبشت بالحنه.
-تأمرين.
-يله بربر روح استحي وعلي.
-ااااوخ ابوس حلگج اليگول بربر.
سدته بوجهه ميته من المستحه وجها يريد ينفجر وانه كضيتها عليها كلساع اغمزلها خليتها ماتعرف وين تودي وجها اخيراً لكيت موضوع يخجلها، للأربعة ضلينه كاعدين كهلان قفل لا هلهوله ولا صفگه ولا اغنيه دورت السنة مال جدي بعدها ماصايره.
راحت وياها عفراء للصالون وعفراء شايله هم تفتر وتصيح
-رنـــه ما تنگدر كون وحده منعدنا رايحه وياها.
-هسه اكضي شغل واروحن وراها.
خابرت سليم جابلي هاجر راويتها الهدوم الجبتهن الها ووصيتها تضل يم عفراء لبست وودوني لرنه بالصالون لگيت رغد تريد تكتلها وام الصالون تويد تشد گرون من وراها تدقق بكلشي وماتقتنه بسرعه بس تدقيقها يجيب نتيجة لمن كضت مكياج وتسريحه اعاينلها وعيوني مدري شمالها مدمعه حيل حيل حلوه وكلشي لايگلها. غطيناها واجه علينه عبود طبينه للبيت وعفراء عبالك رنـــه معرسه مو مخطوبه عيونها تجري والبنات يضحكن عليها
بــدور وماسه يصورن بيها لمن اجن نسوان وبنات اخوالها يله كعدت عاقله مشت عــفراء تسلم عليهن كلهن يحاجنها بزعل ضايجات شلون خطبوا رنـــه وطرواده مارضى، شويه واجوا الزلم طبوا للدوانيه وجابوا نفس الشيخ العقدلهم المره الفاتت كومنه رنـــه لغرفة اهلها واجه الشيخ وطرواده وبريا ببدلته السوده گد ما فرحام كلساع يبتسم ويجر نفس طووويل.
سولف وياهم شويه وطلع ردوا للديوان بس بريا ضل يمنه كعدوا بالهول وماسه جابتله الذهب رد لبسها الحلقة اعاينلها ترجف وانه تكضني الضحكه، تخبل طالعه.
رنـــه:: رجفة الخطبه تشبهه رجفة اول يوم امتحان وزاري، يلبسني گلاده ويتلمس بظهري من وره وخرت خازته وعفراء من باب المطبخ تعضّ بأيدها كض ايدي يمسح عليها دنگت مبتسمه وگلبي يدك حييل جنت احس مستحيل انه اخذ بريا وهسه الفرحة البگلبي ماتنوصف وانه اعاين لحلقته بأيدي.
مــاسه حايره بالتصوير تصور بينه وهوه عرگ كلساع يمسح كصته لان الهول كله نسوان وماسه تخلينه نسوي حركات، التفت من سمع نسوان كاعدن بصف التلفزون من جهته ويدرن صوتهن عالي ويحجن ما مهتمات يعاينن لماريا ويحجن بيها واكفه بصف الحايط بعيده وتعاين علينه التفت عليها
بريا:: تعاي ماري.
عاينتله مرتبگه واجت بخطوات بطيئه جرها وكفها بصفه حط ايده فوك جتفها حاضنها وضحك للصوره بس صورتنه مــاسه كتله
-خل اصور وياها بس انه.
ضحك ومشه يرد للديوان، ضلينه نصور انه وياهن ومن مرت خالي جعفر رادت تصورني مارضن لا رغد ولا عفراء وهيه زعلت حطت عبايتها على راسها اخذت بناتها وطلعت .
سكتنا ما مهتمين شويه والناس بدت تروح ضلن بس بناتنا بالهول وكفت اسولف وياهن وبساع مشيت من سمعت الولد يهوسن لبريا ســليم ووهب گلبوا الدنيا بالهوسات خلوا طــروادة وصيهد يدخنون.
للغروب يله البنات راحن وانه ما ارضى لا انزل الفستان ولا اغسل وجهي متانيه يجون اخواني اصور وياهم كالت ريـــمه
-جا مو تستحين منهم.
-بعد انخطبت ما استحي.
عــفراء:: راح تسودني عوفيها عوفيها مو صاحيه.
ضحكت لمن طب طــروادة اعصاب ومن عاينلي مبتسمخ والم بالبدله على صدري مسح وجهه يعاينلي ومد أيده بأتجاهي يسلم حطيت ايدي بأيده
-الف مبروك، بس خلي ببالج ماكو عرس مناه لمن تكضين سادس خوش خويه؟
-اي
ابتسم حط ايده على خدي كالتله ريـــمه
-تريد تصور وياكم وين حسين وعبود.
طلع صاحلهم واجه وكفت بينه وبين عبود ضايعه بنصهم، وحسين وزهره كعدت بالگاع گدامنه صورته ريـــمه وعبود جر وجهي عليه باس خدي لمن ريـــمه اخذت صوّره ثانيه التفت طــروادة للمطبخ صاح على عفراء
-تعاي للج شمس وين؟
ضحكت شمس كاعده بالگاع تاكل ومتلفه روحها غسلتلها وجابتها اجت تركض وكفنه سوه صورنه والنوب طردنه عبود واجت ريـــمه يمنه صورنه هوواي الحذ ماطلعت فلوس المكياج وفلوس الفستان
بدلت وصليت وكلساع اضــحك لحد الساعة بهدعش البنات نامن تعبانات وراسلني
-رنـــه
-ها
-الفجر التحق
-جذب؟
-وعلي
-ليش جا موكلت بعد؟
-مساع خابروني لازم الفجر اروحن.
سكتت مقهوره وايدي على گـــلبي مختنگه
-اريدن اشوفج گبل لا اروحن.
بقيت صافنه بالتلفون ومختنگه كعدت عفراء من نومها احجيلها والخنگه ذابحتني اكرهه يروح الدوامه الخوف ياكل گـــلبي كالت
-كومي شوفيه انه اوكفلج بالحوش.
-وين اشوفنه
-اندري بسوالف بريا شگالج؟
-گال اطلعي واكف يم النبگه البينا وبينهم.
وكفت على حيلها لبست حجابها وتحجي عليه راسلت ريـــمه سألتها على كهلان كالتلها نام لان بتلاثه يروح للگاع.
جرتني من ايدي للكنتور
-حطي حمره وعطر
-ظلمه شيشوف.
-يشوفون حتى بالظلمة يشوفون.
حطيت وگلبي يريد يطلع من مچانه طلعت بس بالدشداشة والشال وهيه ضلت واكفتلي بالحوش امشي واتلفت ظلمة الحد ما شغل ضوه تلفونه واكف جوه النبگه مشيت بخطوات سريع وقريب عنه ركضت بسااااع الحضنه شبگني حييل رافعني من الگاع تعلگت برگبته اشهگ
-لا تررررروح.
-اششش يابعد روحـــي شلون ما اروحن غير دوامي.
نزلني من حضنه مسح وجهي بين أديه
-رناتي
-انه شذنبي اضل كاتلني الخوف عليك؟
ضحك يحرك ايده على خدي متحسر
-اروحنلج فـــدوه شاريد من الدنيا اذا انتِ تخافين عليَّ؟
دنگت ساكته غصه بگلبي وما ادري عليمن جرني الحضنه حتط راسي على گلبه قميصه مفتوح وجسمه طح بخدي صدره دافي عكس جسمي اليرجف من البروده عافني بحضنه ساكت فترة شويه ووحرني حاضن وجهي بأيده كتله
-عفراء كالت لا تبطين.
-حقها بس خليني اشبع منج شويه وروحي خليني احفظ ريحتج ودفو ايدج
-بارده
-انه احسها دافيه هيه ورگبتج.
دنگت ابلع ريگي مرتبكه احس انفاسه بوجهي تلمس حنجي يرفع وجهي زفر نفس متحسر
-ترضين ابوسنج؟
رجف جسمي كله احرك راسي لا
-حتى لو بخدج؟
سكتت مدنگه وجهي يبخ حرارة واحس بيه قرب وجهه الوجهي ودنك باسني بطرف شفتي دغدني شواربه وبدون مايوخر بس بعد شفايفه همسه
-اموتن عليج رنـــه گـــلبي انتِ.
حجاها وجرني من ايدي يردّني لبيتنه يضحك
-راح تموتين وين لسانج وين الترد الغلطه بعشره ردي البوسه بعشره شمالج؟
وانه حرف مايطلع مني خطيه عفراء واكفتله بالباب كاتلها البرد سلم عليها وانه طبيت للبيت اركض دفنت روحـــي بالفراش وايدي على خدي وبس اجت عفراء حجيتلها ضحكت
-ولج لا تخلينه انتم خطبتكم تطول لا يتمادى
-بعد ما اخليه
-عفيه.
ضحكت ونمت وانه ادعيله الصبح راسلت مــاسه كالت اي التحق، للعشرة كاعدين عفراء تلم بغراضها تريد تروح راح يجي عليها منذر
وطب طــروادة گال
-رنـــه راح الم الخس وشگد ورد يمه تجين؟
-ترررضى؟؟
ضحك وهز راسه اي يدري بيه اموتن على الورد اليخضر بگعانه من وحده كالتله عفراء
-هسه يله راح يحوش الخس ماحاشهن وانه هنا خاف اخذ منهن.
-وعلي ما ادري بيج اليوم ترحين تعاي تمشين ويانه؟
-لا رجلي راح يوصل.
عفتهم يتعاركون وركضت لبست. عبايتي، وهيه تتناگر وياه كضها جرها الحضنه عصر وجها وباس خدودها گطعهن وهيه تصرخ على ريـــمه حتى تفرغها وريمه تكلها
-شوفيه شطوله خيه يكتلني وياج ما اگدله.
ضحكت عفراء. شالت شمس وطرواده شال جنطها طلعنه سوه منذر واكف بالباب ضحك مت شاف تفكة طــروادة بجتفه كاله
-ها اهل الطلايب.
-شنسوي حظنه هههه.
سلم عليه وعفراء تكله
-جا بطيت شويه حتى اروحن وياهم للــبستان البستان الفشختك بيه تذذكرررر.
ضحخكوا أثنينهم گالها
-يله امشينا وياهم ناخذ خس ونروح.
صعدنا وياهم بالسيارة بعد عن بيوتنا عشر دقايق البستان نزلنه منذر شايل شمس على رگبته ويگلها
-هناه امج فشختني
وشمس كلشي مافاهمه وتضحك، طــروادة تجه سلاحه على السياج ومشه يشلع خس العفراء ومنذر طب شمس عليها يگلها
-كضي خليني انا الم هذا يشلع الموزين النه.
ضحكت عفراء وانه كاعده الم ورد جابتها يمي تحجي
-روحـــي الخالتج خل انه اختار خس زين.
حطيت شمس يمي اضــحك واعاينلهم يتعاركون ويضحكون وانه مكابله شمس هيه تصفك وانه اسويلها طووك نفس السواه الي بريا
شلت راسي فازه على صرخت عفراء الهزززتني هزز
عــفراء:: كهلاااااااان
شكرا لزيارتكم عالم روايات سكيرهوم
