رواية نقش بارد الفصل السابع 7 بقلم فدك فاطمه

مِن أحس روحي طَحت تَلزمني قمصانك

غنـــوة

امشي وراه على كيفي فتح الباب مثل ما افتحة طلع باوعت بأستغراب لمكان أسراء فارغ ماكو هية

راح دلهم لباب المطبخ المفتوح قفلة صعد الدرج لحظات قليلة سمعت صوت همس و كلام مافهمتة

رمشت بصدمة من نزل لازم اسراء من شعرهة هي تغطي بروحهة لابسة دشداشة قصيرة كلش و صلوخ

دفعهة من الدرج للگاع ضربهة راشدي صوتة دوة بالهول سمعت صوت رجال رجعت للغرفة اركض

لايشوفني هيج لابسة بعدني ما مستوعبة لصار اول ما خليت رجلي بعتبة الباب ثار صوت طلقة بالبيت

جمدت مثل الخشبة حتى النفس فرغ من صدري گلبي يدك قوي اخترق مسمعي صوت اسراء صرخت

اصتكيت برعب صوتة يتردد بمسمعي هو يصيح بغضب التفتت بخوف شفت رجل اسراء طايح

بالگاع ايدة على صدرة هي لازمتة خايفة تلطم تقرب دلهم شالهة من شعرهة حجة بغضب: ماعندج خجل قدرتج حتى تصير شوية كرامة عدج گبالهم هاي سواية تسوينهة بية اسراء

هي ما منتبهة عينهة شايهة على رجلهة تريد بس تلزمة هو يتلوى بالگاع التفتت لفزة كرار مخطوف لونة يباوع برعب عليهم

سحبتة حضنتة خايفة عليه سديت الباب صوت دلهم يدوي بالبيت لحد ما سمعت اصوات سيارات الشرطة و الباب ندك قوي تفلش

فتحت باب الغرفة اشوف دلهم سحل اسراء اجة شمرهة بغرفتنة رجع البيت الي انترس زلم و ناس

اسراء تلطم على خدهة تدور شي تلبسة اخذت دشادشتي و العباة طلعت تركض وراهم عفت كرار

رحت اباوع من شباك ايدي على گلبي شفتهم خلو الكلبجات بيد دلهم طلعو من البيت دموعي گامت تصب اوصل للباب و ارجع

ضليت وحدي اعصر بأدية و القلق ماكلني قفلت البيبان اروح و ارجع مابيدي شي هذة ابنهم فحط من البجي گوة سكتة رجع نام

مر الوكت مثل السم اعد الساعات حتى ترجع وافهم منهة مارجعت للظهر نمردت روحي لا نوم و لا اكل

راسي انسطر بس ابجي خايفة عليه لگيت روحي بدون وعي اغلط عليهة و أذمهة ليش سوت بي هيج

                                            

              

                    

رحت توضيت صليت گوة دوخة لزمتني غسلت وجهي كعدت بالباب عسى لعل ترجع أسراء لابنهة

خطية الولد راحت روحة گوة خليتة ياكل طمنتة شغلتلة التلفزيون كعد بس عينة وراي كل شوية يسأل عن ابوه و امة

وية حركتي امشي و انظف بالبيت احوم مثل الحمامة گلبي مامرتاح صوتة يتردد بأذني من يگلي ادخل للسجن خايفة ما يرجع

ليش صوبة هو رجلهة مو غريب هسة شنو راح يصير بي رجلية يتخدرن من الخوف كعدت ابجي و ادعي

كون رجلهة مايصير بي شي على الاقل دلهم يطلع منهة وين انطي وجهي اذا نسجن اهلي يلعبون لعب

انتهيت من القلق و راسي نسطر من كد ما بجيت الساعة قريب السبعة صليت المغرب كعدت امسح

على شعر كرار الي تروح روحة من يشوفني أفتر بقلق

گوة نام غطيتة مشيت بسرعة للبردة اسمع الباب يدك فتحت باب المطبخ طلعت للحوش

شفت البرة رجال خفت افتح الباب اني وحدي خاف مثل ذاك الولد نوب يضل يروح و يرجع علية مشيت

سديت البيبان عفتة كعدت بالهول ايدي على خدي

ماعرف يمتة نمت بس فزيت على صوت كرار يگعدني گمت وياه راح لصحيات رجع نام بالظلمة

اشوف ضوة من جوة الدرج استغربت شغلت گلوب الهول رحت اباوع شفتة موبايل مشمور و يدك صاير

بين الحايط و صندوگ الي مجمعين بي الاحذية اخذتة ماعرف اقرة جان موبايل دلهم الجديد خليتة بصفي كم مرة رن و وراهة نسد

ضليت اغفي و اكعد للصبح عيوني ورمت من البجي

سويت ريوك اكلت اسند روحي البيت بي ريحة زفر

من الدم المتكوم فوك الدرج و بصفة مسحتة صعدت اشوف افراش ممدود بالبيتونة و هدوم اسراء عفتهم بگلبي احجي عليهة مغتاضة من الصار

نزلت بسرعة اهرول من سمعت صوت الموبايل يدك اخذتة رحت لكرار قرة الاسم جان صفوان خليتة

يرد عليه تأكدت من صوتة شلت الموبايل احاجي

رد اول ما سمع صوتي: ها خوية شلونج

غنوة: الحمدلله زينة عدك خبر عن دلهم

رد بنبرة مستغربة:ليش وينة هو اجيتة البارحة مالگيتة

حجيت بغصة:بالسجـن

صفوان:شنووو ، ياسجن يمتة هاي شصار ويا

غنوة:مشكلة بالبيت و تعارك وية نسيبة و رمى عليه

صفوان: استغفرالله يمتة صار هيج

غنوة:اولت البارحة مادري شلونة

صفوان : هسة اروح ادورة بيا مركز ، محتاجة شي خوية

غنوة:سلامتك بس طمنة عليه

            

              

                    

سلم و سداه ارتاحيت من گتلة على الاقل واحد يشوفة هاي اسراء حتى على ابنها ما سألت راحت و

الروحة روحة بعد ما شفت وجهة جنت متأملة ترجع الصبح هم ما اجت اني فكرة تأخذني فكرة ترجعني

خلص اليوم لا صفوان اتصل و لا احد رجع منهم مسحت دموعي استغفر رحت صليت المغرب وگفت بالمطبخ اگلي بتيتة

التفت لصوت كرار من گال:خالة اريد اروح لهلي

غنوة:ويامن تروح وين تندلهم

كرار:اندلهم اعرف الطريق

غنوة:لا يمعود استر علية و اگعد و اسكت باجر بلكي تجي امك

تنهد بضوجة مالة خلق يريد اهلة صبيت العشة تعشة دك رجل يريد يشتري من المحل باوعتلة بطرف عيني الناس بالناس و الاگرع يهلس براس

هي مال محلات هسة بيا حال احنة رحت للغرفة ادور بلكي الگة حلويات شي كلة فارغة نفضت الفراش رتبت المخاد فزيت على رگعة الباب القوية

طلعت اركض اشوفة ماكو لطمت على خدي بخوف رحت اباوع من الباب هو يركض بالشارع الدنيا لليل وحدة مشة اجيت اشكك هدومي من القهر

رجعت للموبايل ابجي ماعرف اقرة لاعرف حتى شلون افتحة بي رمز بس من يتصل صفوان يطلع

بالشاشة اتصال هو كرار فتح خط عليه و حجة ويا هسة شلون بية ياربي دخيلك مليون فكرة سودة اجت ابالي يندعم لو يضيع ركضت ادور بجنطة

أسراء طلعت عباتهة قفلت باب المطبخ خليت العباة على راسي مشيت اتلفت بالشوارع خايفة

روحي نمردت من القهر و الخوف لا لگيتة ولا ندليت ارجع للبيت ضعت بنص الدرابين امشي اتلفت حولي مرعوبة گلبي يدك مثل الطبل رجلية ماتن

كعدت ابجي امسح على وجهي ادية ترجف رجعت بخطواتي منين ما اجيت بس تيهت من خوفي عليه

ما حفظت طريقي ولا ركزت وين اني منين مشيت

كل ابالي اشوفة قريب و الحكة الزمة مادري بي هلكد مشة واني بزحمة افكار اتلفت بالشوارع و ابجي كعدت كدام الجامع ضامة وجهي بين رجلية

الوم بروحي ليش طلعت ارجع ابرر خوفي عليه عصرت عيوني راسي بين ادية اريد اتذكر منين

مشيت وين رحت ماكدر الخوف سيطر علية عدلت

عباتي المهة على رگبتي قليل ناس تمر من جامع

هواي يباوعلي بستغراب و يرحون درت وجهي اعصر بأدية لحد ما اجة رجال شايب وكف گبالي

حجة مستغرب: بوية شعدج هنا محتازة شي

هزيت راسي بنفي درت عيوني بعيد عنة رجع يسأل مستغرب:گولي يابة لاتخافين تعاي طبي للجامع گلينة شعدج شفتج كاعدة وحيدة صار ساعة

            

              

                    

مسحت دموعي حجيت برجفة:ضعت طلعت من البيت ماندل حتى ارجعلة

:سهلة يابوية تعاي كعدي جوة گليلة ياهو اهلج و نرجعج الهم

غنوة: مـ.. ماعرف اني متزوجة وعايشة وحدي ماعرف المنطقة هنا

:رجلج وينة عنج

رديت بغصة:بالسجن

سكت مبين ما عاجبة گومني دخلت وياه للجامع كعدت على جهة گلبي نمرد من الخوف على كرار

وين راح شلون اذا ضاع و يرجع دلهم لو اسراء شگللهم رفعت راسي لايدة الممدودة اخذت كلاص الماي شربتة ابلل ريگي الناشف من التعب

رجع يسألني واني كلشي ماعرف غير اسم دلهم وصفتلة شكلة گتلة بالسجن اتصل على ولد نطاهم المعلومات لحجيتهن حتى يدورونة بالمراكز

ضليت بالجامع اعصر بأدية كل بالي وية ابنهم شلون 

الگاه وين راح اعرف اسراء تجي بسيارة و ترجع بيهة يعني بيتهم بعيد مو مال يروح مشي لوحدة 

تأخر الوكت عبرت نص الليل على كعدتي خايفة ادير عيوني بحيرة شكد كرهت روحي بهاي اللحظة لان كلشي ماعرف لا اقرة لا احفظ لو بس عندي رقمة

الرجال يريد يروح لبيتة منتظر خبر من الولد لدزاه ما جاي يحصلة بيومهة جان حتى الجو عاكس وياي

عاصفة و ترابة الشارع اصفر ماينشاف 

رجعلي الرجال عرفت اسمة ابو زهرة حجة بصوت هادئ : بوية تجين وياي لبيتي منا لحد ما يحصلونة خبر لو نعرف منين انتي

هزيت راسي رافضة رديت برجفة:لا عمي اضل هنا 

ابو زهرة: لاتخافين يابة هناك بالبيت احسلج تكعدين بين اخياتج السيارة بالباب خل الترابة تخف انة بنفسي ادور بيتكم و ارجعج

مسحت دموعي محتارة گلبي مقبوض بخوف نظرات الناس علية خايفة الرجال يروح بعد مايرجع هنا گمت طلعت وياه جانت سيارة كية واكفة يم رصيف

فتحلي الباب صعدت اعصر بأدية شكد فشلانة عيني على الشارع بلكي ولعل المح شي اعرفة لو حتى المح البيت بس عقلي وگف اريد اتذكر منين اجيت 

ماكدرت قطعة سودة استحلت تفكيري جنت خايفة لا دلهم مايرجعني يعوفني لو هو يضل بالسجن

و ارجع لهلي شيصير بحالي اشبع ضيم اكثر من گبل

وكفت السيارة گبال بيت بسيط بنيانة بلوك الباب ازرگ مدگوگة على الحايط راية سودة بيهة كتابة اول ما وكفت السيارة نفتح الباب طلعن بنات صغار

نزل هو حضنهن يبوسهن رجع فتحلي الباب نزلت مترددة حجة يطني:طبي بوية لاتخافين بس البنيات و امهن هنا 

            

              

                    

وگفت بالباب رجلية وحدة تطك بالثانية اني شسوي هنا شجابني التفتت لشارع اريد ارجع وين ضيعت روحي وعاني من صفنتي صوت مرة تحجي

رجعت عيوني الهة مغوشة من دموع جانت كلش جبيرة متوسطة سمينة لابسة شيلة بيضة لازمة الباب عيونهة علية مبتسمة

:تعاي خالة حبيبتي الترابة خنگتج لاتخافين يمة كعدي هنا الصباح رباح خل يطر الليل مو إمان 

عصرت عباتي لازمتهة من فوك لا تطيح دخلت لبيتهم عبرت الحوش فتحتلي الباب جانت مبين غرفة الخطار مفروشة بسجاد احمر و مخاد مركية 

كعدت يم الباب سدتة تحجي بزهگة على الجو: هي تگب لترابة تندفن بيوتنة دزرعو شجيرات نخيلة ترد عنة التراب العجاجة تگب وتخنگنة لا تبليط لا صخام بويهم

نزلت راسي هي مستمرة تحجي على الحكومة طاحت لهم سب واحد واحد مشت اختفى صوتهة 

شوية رجعت بيدهة كلاص ماي اخذتة ضليت لازمتة بيدي افكار صايرة دوامة تضغط على اعصابي بندم 

رجعت سألتني عن صار سولفتلهة كلشي بس ماحجيت عن اسراء ولا اصل السالفة خاف دلهم يرجع فشلة همة يعرفون لصار ببيتة

جابتلي عشة رفضت اكل اسمع ابوهم يخابر يسأل من حجيتلهم على كرار هم بلغو المركز عليه مفقود

ايدي على گلبي شصار بي بهاي الترابة وين راح اگول نخطف و يبيد حيلي من الرهبة ضليت ادعي بلكي 

يلگونة خل يرجع لهلة سالم بلكي ناس اوادم شايفنة موكفينة يجوز احسن مني يعرف عنوان اهلة ويوصل

فزيت من رجعتلي المرة گالت:يمة لگينة رجلج موقفينة بالمخفر ابنيي اختي سأل عن اسمة

و حاجيلهم عارفة نطانة عنوانكم 

خليت ايدي على گلبي مرتاحة حجيت ما خف قلقي:و كرار الوليد الصغير ما لگوه

ام زهرة: والله ييمة مادري بس گالو لرجلج عليه يشوفونة بلكي راجع لبيتهم 

رديت بهمس:الله يسمع منج بلكي راجع لا يضيع 

ام زهرة: ترتاحين هنا لو ترجعين لبيتج

غنوة:ارجع فدوة خالة وصلوني هسة

هزت راسهة گالتلي راح تلبس طلعت وياهة جان ولد شاب واكف يم سيارة صفرة سلمت عليه صعدت 

صعدت ورة اعصر بأدية خجلانة منهم شكد موقف حقير نحطيت بيه ماندل البيت العايشة بي ولا اكدر ادلي بالضبط وين احنة كلشي جان غريب علية 

كم مرة طلعت وية دلهم للمستشفى اول ماسويت عملية ابد ما اجة ابالي احفظ الشوارع و المكان 

            

              

                    

وگف يم محلات نزل عبر الشارع من بعيد شفت صفوان واكف كدامة هو الولد جان طريق كلة يخابر 

توقعتة يخابر بصفوان يجوز دلهم منطيهم رقمة رجعو ثنينهم جهة السيارة يمشون يسولفون التفتت

للمرية تشكرت منهة على السوه و اعتذرت زاحمتهم بهل الليل هي جانت كلش خوش مرية و ترد بطيبة 

نزلت من للسيارة اسمع صفوان يتشكر من الولد ضليت مدنگة دموعي تراسة عيني اباوع للگاع بقهر

سمعتة صاحني تحركت وياه حجالي عن دلهم و احاوالة مارديت الغصة تحجرت بلعومي ماكدر ارد

صعدت بالسيارة مالتة و صلني للبيت منة عرفت كرار مخابر على جدتة و رايحين ماخذينة حافظ ارقام اهلة و متصل بيهم ، تشكرت من صفوان 

و دخلت للبيت سديت باب الحوش مشيت جوة

فتحت باب المطبخ دخلت رديتة وراي كعدت يم الحايط ملخت روحي من القهر كلشي ماعرف اسوي 

حالي حال الجهال من يضيعون البيت شلون 

مانديلتة ليش طلعت شمستفادة غير الفشلة كرهت 

روحي و كرهت اسراء الي من وراهة تدولبت هيج

ماكدر اوصف شعوري بلحظتهة من واحد يكشف غباءة و قلة حيلتة ابسط شي عنوانة مايعرفة بيومهة

حسيت اعصابي تلفت روحي نسحنت من القهر يجوز البعض يشوفنة موقف عادي و بسيط بس اني

واجهت عجزي بلحظتهة و غبائي هنة كم شارع مشيتهن و تيهت الطريق و مشيت بشوارع ماعرفهة

حضنت رجلية لصدري احترگ گلبي جا شكد جاهلة 

و مادبر روحي طلة من ورة اهلي عيشوني بسجن

مسحت على صدري متضايقة البيت ضلمة و هدوء

الكهرباء طافية بس صوت العاصفة من برة اسمعة

ضليت بمكاني لحد ما أذن الفجر گمت غصباً علية 

توضيت بهاي اللحظة رجعت الكهرباء اشتغلت 

خليت التربة صليت صلاة الفجر و ركعتين شكر لوجه الله ، رجعت غسلت ادية و رجلية زين لميت 

شعري اباوع للمراية لمعلگة بالمطبخ عيوني مشخطة البياض مختلط بي لون احمر و مورمات 

باوعت معبسة كارهة حتى وجهي الوم بروحي شكد مابية خير و غبية ، غسلت رگبتي و ذبيت ماي على صدري متضايقة و مختنگة من الجو 

نمت شوية كعدت على دكة الباب مال الحوش اباوع من الشباك ندك مرتين بعدهة شفت علاليك تخلن 

فوك الحايط ثنين بدون مالمح منو لخلاهن

بس عرفتة صفوان يجوز دلهم موصي انتظرتة يروح 

لان فشلانة منة وين اكو وحدة تطلع من بيتة و تضيع

            

              

                    

حسيت بروحي طلعت بس حتى اضيع لا لگيت كرار لا فدت الوادم بشي سمعت صوت السيارة عرفتة راح طلعت للحوش خليت بلوكة يم الحايط

گوة لحت العلاليك وحدة بيهة صمون حار و ثانية ريوكات رجعت جوة روحي ممرودة من جوع كعدت 

اكلت لمن مليت نظفت المطبخ و البيت بس حتى ما افكر ضليت احوس سحبت المدات للحوش خليتهن

وحدة فوك الثانية علة الكاشي شغلت الماطور غسلتهن ضليت صافنة بقمة غبائي شلون اشرهن

يمة نقهرت على روحي لتتصرف گبل لا تفكر اخر شي لميتهن رحيتهن على الحايط حتى يوشل الماي

مسحت للحوش واكفة باب المطبخ نفتح الباب البرة من الخيط لمشكل بي دخلت اسراء شمرت

الماسحة فتت للبيت قفلت باب المطبخ من جوة شبابيك مسدودة حلفت ما دام ماكدر اكتلهة الة ماخليهة تطب البيت على سوايتهة الخايسة

حجت تدك بالشباك:ولج شجاج قافلة البيبان اريد جنطتي و غراضي

غنوة: والله لو تموتين و تعفنين هنا ما افتحلج الباب كلة من وراج لصار بدلهم

اسراء:يمعودة تعوذي من الشيطان خليني اخذ غراضي ارد للبيت دلهم يرجع بس يدفعون كفالتة 

غنوة: جان استخطيتي اخوج ليدافع عنج كبالهم ما فشلتي امشي منا لو تتوسلين لباجر ما اطببج

اسراء:استغفر الله نطيني غراضي خل امشي

استفزتني كلش موتتني من القهر كل ما اتذكر تيهتي من وراهة من ورة ابنهة يحترگ گلبي لو ما مسوية

السوتة جان اني كاعدة مستورة بالبيت ولا هاي البهذلة لتبهذلتهة ولا دلهم نسجن وضليت حايرة 

رحت للغرفة لميت هدومهة وكفت جوة الدرج اخذت البطل مال البانزين يخليهن دلهم لدراجتة

فرغتة ببطن الجنطة كلة طلعت اسحل بيهة گتلهة تانيتي الم هدوم ابنهة لبغرفتي وكفت ماعاجبهة 

لان قافلة الباب دخلت لغرفتي فتحت الشباك شمرت الجنطة منة و شعلت واحد من الشالات وهو ببطنهة هنة ناگعات بانزين بسرعة وجت النار بيهن

رجعت احاجيهة من شباك الهول :جنطتج ورة روحي شوفيهة 

عگدت حواجبهة مشت رحت اباوعلهة من الجامة 

و اضحك عليهة حتى موبايلهة و الشاحنة وياهن

كتلت روحهة تريد تطفيهن و تطلعهة سديت البردة 

كعدت مغلسة عنهة اسمعهة تصيح تغلط علية ما 

            

              

                    

رديت ولا رجعت اباوعلهة لحد ما رگعت باب الحوش 

وطلعت مولية مدري وين صفگت ادية و غميتهة

مسحت الگاع من البانزين لطاح يم الدرج رجعت للغرفة طاعدة على التلفزيون اگضي وكت شوية

خلص اليوم الغروب خابر صفوان سألتة عرفت دلهم باجر يطلع الجلب رجل اسراء مايريد يتنازل عنة

يلمون بي لان راميه بدون داعي عود الداخل مو غريب هي مرتة و صاحتة مامستاهلة يرفع سلاحة 

بس دلهم مخبل گالهة ماترجعين هي بعين وكحة تجيب رجلهة لنص البيت بالله ابنهة شافهم لو اني طلعت و صادفني حتى هنا ماماخذة راحتي

اشمأزيت اكثر من غسلت هدوم دلهم شفت وياهن قطع مو الة جا شكم مرة جايبتة لو ما هو تفطنلهة

جان ضلت كاعدة مريحة بالهة و رجلهة يجيهة

دكيت رجلية بالگاع من القهر محترك دمي من الصار

سويت حملة على كل البيت نزلت الفراش الفوك 

مكشمة لعبانة روحي شمرتة ورة البيت كلهن حتى المخدة رجعت نظفت البيتونة مسحت البيت كلة

حضرت هدوم دلهم و سويت غدة زين ضليت احوس منتظرتة يرجع اعصر بأدية كل شوية اباوع للمراية

طخيت راس رحت بدلت الدشداشة لابستهة من گالتلي اسراء تسحل وراج بعد ما ارتاحيت بيهة 

مشطت شعري خليتة محلل دخلت للغرفة الثانية 

هو گالي لا تاخذين شي منهة فتحت الجرارات 

ادور على عطر استغربت من الاوراق شكد كل جرار بي ضبة كعدت كبال واحد منهن بي صـور كومـة 

رجال معگل و شكلة مرتب بس هواي صور الة لوحدة او وياه ناس صور كاعد بسيارة لو بشارع

رجعتهن ما فاهمة رجعت ادور لگيت العطر واحد

بي شوية و واحد جديد خليت منة ريحتة قوية كلش

طلعت فرحانة اسمع صوتة يحجي بالحوش رديت البردة اباوعلة يسولف وية صفوان بالباب من شكلة

مبين يريدة يدخل وياه اسمعة يعزمة هو تعذر تشكر منة حجو يشوية يتشـاقون ماركزت عــيوني عليه 

سد باب الحوش بوجهة للحمام عبست بضوجة رحت اخذت الهدوم طلعت وكفت يم الباب اسمع

صوت الماي يجري 

دكيت الباب حجيت : ذني هدومك 

ما رد علية شوية فتح الباب بس راسة طالع مديتهن الة دايرة عيوني بعيد حسيت بأيدة فوك ايدي 

مسح عليهة بجفة من جوة لحد جف ايدي و اخذهن

رجعت للمطبخ جلدي كاش من لمستة گلبي يرفرف

            

              

                    

حميت الغدة حضرت المواعين حسيت بي من دخل 

سمعة طبگة باب المطبخ من نسد لزمت السجينة قوي اثرم بالخيار و الفلفل

حجة يسألني: هم رجعت هنا بعد الصار

رديت بصوت ناصي:اجت بس ماخليتهة تطب للبيت

دلهم: خو ما واحد من جهتهم اجاج 

هزيت راسي بنفي عفت الي بيدي التفت الة عيوني مغورگة خلة الخاولي على الباب تقرب مني حضني

بجيت شادة فانيتلة بأدية مخلية راسي على صدرة 

حسيت بأيدة فوك شعري يمسح عليه حاضني قوي

هسة يالله ارتاحيت و تطمنت غمضت عيوني دموعي تصب على خدي بوستي راسي ضل هيج 

حجيت برجفة:ضـ..ضعت وانتة ماكو

رد يلف ايدة على ظهري: شش ماتنعاد ماعوفج لوحدج محتارة 

غنوة:بعد لا تروح 

بوستي براسي بدون رد رفع وجهي الة يمسح دموعي 

حسيت على دمي توترت بس رغم الخجل ماكدرت اخفي فرحتي بطلعتة باوعتلة مبتسمة ابتسم 

يمسح على خدي بصبعة غمضت عيوني تنهدت ادية بعدهن كامشات التشيرت عاصرتة بين اصابعي

فلتت درت وجهي گلبي يرجف طفيت الطباخ امسح بأدية اعدل بروحي غمضت عيوني برجفة من صار

وراي دنك خلة بوسة فوك جتفي من ورة الفانيلة لابستهة ضليت ارجف احس بدفو انفاسة قريبة علية 

حجة بهمس يم أذني : فاتحة الغرفة البزونة 

ابتسمت الف طروف الفانيلة على اصابعي هزيت راسي رديت بصوت ناصي:بالغلط جنت ادور 

دلهم:شتدورين

غنوة:عطر منك

حجيتهة روحي راحت من خلة خشمة على رگبتي يشمني من بداية ياخة الفانيلة لحد ورة أذنـي

لم گذتلي بأيدة خلاهة ورة أذني صحيت على روحي دفعت ايدة ارجف:وـ..وخر خل اكمل الغدة

رد يقرب وجهة علية : مادري بعطري هيج طيب

حجيت ابعدة:مو طيب قوي ماعجبني

بلعت ريگي من رجع يشم رگبتي يحجي بصوت هادئ:دشمي يطب للراس و يصفي

ضحكت ادفع جتفة گرص خدي عافني راح للهول 

مسحت رگبتي مستحرة و احوالي تخربطت احس

برجلية مو على الگاع خدرن هزيت راسي اصحصح

حضرت الغدة مبتسمة بدون وعي كل ما اريد اخفي سعادتي ماكدر متحمسة صبيتلة الغدة شلت 

الصينية خليتهة كدامة گعدت بصفة اعدل تعابير وجهي اريد اضم الضحكة و ارجع مثل ما جنت

اباوع لايدة عاف الموبايل شال المركة و التمن غير مكانهن اخذ الخاشوكة خلة فوك التمن مركة شالة

            

              

                    

رفع ايدة قربهة علية حجة : من بعدج غناوي

يمة متت من الخجل گوة فكيت حلگي و اكلت من ايدة مسحت وجهي اتلفت بالهول حتى ما اباوعلة

اخذت الخاشوكة اكل من ماعونة عايفة ماعوني برد

نوب انتبهت على روحي دنيتة علية رجعت اكل 

حجيت اباوعلة بخوف:دلهم حركت هدوم اسراء

رد ما فاهم: شسويتي

غنوة:مو اجت تريد تاخذ اغراضهة جمعتهن حركتهن حتى موبايلهة احترك 

ابتسم تك خد حجة ينزل الماي بالگاع:عاشت ايدج

غنوة:ما تتعصب مو موبابهة خرب

دلهم:فدوة الج 

دنكت مرتاحة گلت هسة يحجي علية كملت غدة شلتهن نظفت المواعين من رجعت لگيتة نايم 

كعدت هادئة ماطلع صوت حتى العشة ماسويتة لان نام بالهول خاف يفز من اصوات المواعين لو جداري 

لحد الغروب يالله كعد وحدة فز رحت سويت عشة 

واكفة بالمطبخ مترددة اسألة لو اسد السالفة غلبني 

فضولي مديت راسي من الباب مرتكية عليه

حجيت مترددة:شنو راح تسوي بعدين

رفع عينة الي رجع نزلهة رد: شسوي 

غنوة:علمود الصار

دلهم: خل تجي اكتلهة و ابرد گلبي بعدين افكر شسوي 

رحت كعدت يمة حجيت بخوف:لا تكتلهة خاف يلزمونهة عليك هم تنسجن

دلهم:جؤؤ اسراء ما افوتلهة لسوتة الة اطحن عظامهة 

غنوة:حباب عوفهم هي تريد رجلهة و بيتهة خل تروحلة

دلهم: يصير خير منا لباجر

غنوة: بس حباب لا تنسجن 

رد يشعل الجكارة :كلشي ما هامج غير السجن 

غنوة:اي جا وين اروح هنة ذني الايام و ضعت

و تمرمرت و تبهذلت

دلهم: المرة بدون زلمتهة ماتسوة

باوعتلة ما عاجبني هزيت ايدي : بدون تعليم و فهم الزلمة يروح ويجي غيرة

رفع حاجبة نزل الجكارة نفضهة بالكوب ثبتهة عليه حسيت راح يسويلي شي گمت بسرعة لزمني رجعني

بصفة حجة يعصر فكي بصابعة:ياهو ليروح و يجي

رديت كوة احجي : الزلمة

دلهم:و تعيدينهة بعين وكحة 

غنوة:جا ليش تحجي على النسوان 

دلهم: ام شعفة الحمرة مخلينج محامية شني

غنوة: المرة مو مرة اذا ما دافعت عن المرة لمثلهة

رد يعوف وجهي:دمشي لا امرمرج تمرمر

مسحت خدودي مكان لزمتة گمت معبسة لان حجة هيج كملت العشة هو مر مني يريد يطلع لزمتة

            

              

                    

غنوة:لاتروحلهم فدوة 

رد مستغرب:رايح للمحل 

غنوة:ها خوش روح الله وياك

هز ايدة يباوعلي بطرف عينة طلع عيني وراه من نسد باب المطبخ التفت مبتسم رجع نظراتة ليكدام مايدريي بية اباوعلة من الجامة 

انتظرتة رجع تعشينة رجعت تعبانة من الشغل كل شوية مسويتلي شي ياهو لعاتب علية هسة اني بية طفكة على التنظيف مخلية روحي بكلشي

دخلت للغرفة اباوعلة بطرف عيني صافن على السكف كعدت بصفة انتبه علية مسح وجهة متنهد

حجيت بخجل : لاتنقهر هي ما قدرت لسويتة انتة ماقصرت بس اختك عاجبهة وضعهة 

رد بعدة على صفنتة:قصص وروايات عراقية كرار صلاح ما حارگ دمي غير شماتتة عصام اخخ لو الزمة مرة ثانية الة اطلع روحة العتب عليهة طايحة الحظ مدخلتة لنص بيتي بدون مستحة و خوف 

غنوة:يجي يوم تعرف غلطهة و سوتة خطأ متأكدة ترجعلك زعلانة بعدين 

دلهم:شي اكيد متعود على دروبهة ليمد ايدة مرة مو صعبة يكررهة بس انة اعلمهة تصبرلي لو لا

غنوة: الله يهديهة و تصحى على روحهة و تساعدهة

هز راسة بدون رد عدل المخدة وراه يباوعلي درت عيوني عنة رجعت نظراتي لحضني من لمس طروف 

اصابعي بيدة يمسح عليهن سحبت ادية مستحية گمت فزيت عليه يصوفر التفت مستغربة اباوعلة

يضحك يأشر بحواجبة عگدت حواجبي امسح على هدومي من ورة طلعت الفانيلة مجلبة بالبجامة و 

مرفوعة سحبتهة بسرعة طلعت عايفتة اعض بصابعي صارت بية سولة كل شوية اجرهة ليجوة

كعدت بالهول اباوع للتلفزيون من الباب منتظرتة يگوم لغرفتة حتى ،انام مدد ماخذ راحتة للاخير

حجيت بضوجة:اريد انام

دلهم:ماتنامين ياهو لازمج

غنوة:يمتة تروح لغرفتك 

دلهم:هو اني بغرفتي 

عبست بضوجة نزع تشيرتة عدل مخدتة مدد ايدة جوة راسة وحدة لازم بيهة الريمونت يگلب بالقنوات

غنوة:اريد التلفزيون 

رد يمد الريمونت الي: هاج لازمة عنج

غنوة: اريد جربايتي و غطاي و مخدتي

دلهم:اريد عطري لازگ على رگبتج رجعي و ارجعهن

غنوة:ها

دلهم: ها عطلتي ما تستوعبين 

غنوة: شنو هذة الحجي ياعطر راح طار بالهوة

دلهم:اصلي مايطير 

غنوة:هسة اسبح اخلي يروح 

دلهم: تعاي اشوفة بعدة لو راح ليش تتعبين روحج و تسبحين على الخالي بلاش

رفعت تشيرت اشم بي بعدة العطر لاطش من كد ما قوي تندمت المن رشيت منة و ترست روحي بي

            

              

                    

غنوة:ماكو راح ضلت بس ريحة هدومي

دلهم:تعاي اخذي الريمونت

غنوة:اشمرة من يمك

دلهم: ينكسر

گمت متأففة ابتسم بخبث بسرعة ضم ضحكتة غيرت طريقي رحت لزاوية الغرفة مسفطة فراش

و مخدة دنكت شلتهن اباوعلة بطرف عيني

غنوة :نعست راح انام تصبح على خير

رد ضايج: امشي اسبحي ماريد عطري يضل عليج

غنوة: عطر رجلي

شفتة نهض شمرت المخدة شردت اركض طلعت للحوش گبل للحمام مالحگني سديت الباب علية

حجة يدكة:باتي هنا بس تطلعين اعلمج على هاي اللواتة مالتج

غنوة: مو صوجك صوجي سويتلك عشة

دلهم:ام عطوب

غنوة :دلهم لمنگرش

ضليت بالحمام مختنكة غسلت وجهي وكفت احوس 

افتر وين يالله طلعت اتمشى على طروف اصابعي 

دخلت للبيت اتلفت عيني على المفتاح مال الغرفة

فوك الثلاجة رحت لحتة و دخلت لغرفتة الثانية نمت بيهة ما مرتاحة احوس اتگلب

سمعت صوتة يصيح بأسمي رديت عليه من ورة الباب عبالة بعدني بالحمام ماشافني من دخلت 

غطيت راسي نمت للصبح خوش نومة كعدت على دكة الباب مال الغرفة فتحتة الة منعسة دخل بيدة

فانيلتة شمرهة بالباب شلتهة نزع الترك درت وجهي 

مستحية لحد ما لبس غيرة و هم شمرة وراه اخذتة

من الكاع يمشي و يشمر خبص البيت و الغرفة ولا جني موجودة كدامة و الملم بالهدوم ليطشرهة

باوعت للمطبخ بضوجة حتى البهار مطلعة

غنوة: والله بعد ما اسوي اكل اذا تسوي هيج

دلهم:مانة علية حضرة حنابج

غنوة:جا ليش توصخ وراك مابية حيل انظف

دلهم: مشكلتج 

خليت الهدوم على الدرج رحت نظفت الكاونتر

ارجع كلشي لمكانة وهو واكف وراي يمشط بشعرة

و يعدل بي 

غنوة: وين رايح

دلهم:شعليج

غنوة:شبيك تحاجيني من ورة خشمك نونة هو عطر كتلت روحك عليه بعظ ماخلي التوبة

دلهم: بعد ماتنامين بذيج الغرفة لو تجين يمي لو ضلي سهرانة بالحوش 

فكيت حلكي مصدومة التفتت عليه عبالي يتشاقة 

خلة المشط فوك الثلاجة اخذ السويج طلع عايفني

خلاني احوس وراه شنو انام يمة ولا اكدر غير اموت حتى من افكر بيني و بين روحي انط من الخجل 

تريكت مر اليوم حجايتة مثل الجبل على صدري من تفكير تخبلت رجعت البس ثيابي المسحولة و 

شعري كفشتة اخلي بس الكماشة و ريحة التكلاه تعط مني گلبت وجهي مية گلبة من الضوجة 

            

              

                    

رجع العصر خليتة الغدة على الكاونتر رحت للغرفة الخبيث طلع ضام المفتاح ادور نفشت الغراض كلهن مالگيتة رجعتلة اباوعلة بضوجة معبسة

حجة گالب خلقتة:شبيج ميت عربيد براسج الكفشة واصلة لسمة

غنوة: اريد المفتاح

دلهم: عوفي الباب مفتوح اريد ادك بسامير الفيبرة مال الميز مشلوعة

غنوة: شدهة على ما اغسل الحوش

طلعت مستغلة جية الكهرباء و الماي القوي شغلت الماطور حتى ما اضل احوس گبالة لميت الغراض مال الدراجة كل ما يفتحلة شي يخليهن مطشرات

غسلت الحوش حتى انام براحة للعشة يالله اكعد لميت الصوندة على جهة غسلت رجلية و وجهي

دخلت اشوفة متمدد بالهول يگلب بجهازة مخلي رجل فوك رجل بصفة نفاضة و جكارة بيدة يدخن

رحت للغرفة حسيت راسي نطر من الصدمة اباوعلة 

ما مصدكة شالع باب الغرفة من كاعدة مدري وين مودي لازمة الاطار اتلمسة ما مستوعبة

التفت الة أشر :وين الباب 

دلهم: فوك بالبيتونة بي المفتاح اذا تردينة 

رجع يتلمس الكاع نوب طلعة من جوة المدة شمرة علية گال:لا هذة هاج 

غنوة: شلون تشلع الباب شلون 

دلهم:تردين اعلمج 

حجيت متنرفزة:لااا

دلهم: بكيفج انتي الخسرانة

ادخل للغرفة و اطلع مامرتاحة لان ماكو باب متنرفزة كعدت على التلفزيون حتى ما احاجي 

و يخبث علية بالزايد لو يسويلة شي بالبيت

سوة العشة وحدة صاحني مارديت اجة وكف وراي مدالي لفة اخذتهة بيهة بتيتة و خضرة خلة قوطية الببسي بصفي مشة اكلتهن شمرتهة بالسلة

وراهة طلع اشترة حلويات هم خلاهن گبالي راح مدد على الجرباية ماخذ راحتة مرتكي على المخدة 

حجة بيدة موبايلة:تعاي هنا

غنوة:ما 

دلهم:اعلمج على الموبايل 

گمت بسرعة اريد اعرف حتى ما اضل محتارة كعدت بصفة يعلمني شلون اتصل شلون اطلع الارقام على الصور ذني الصغار حفظتهن گالي ايقونات

اخذت الموبايل دخلت على الارقام غير اسمة خلة قلب الحب احمر حتى اميزة عن البقية نطاني اياه 

اتصلت على موبايلة الثاني رفعت راسي مبتسمة 

رفض الاتصال رجع هو اتصل علمني شلون افتح خط

حجة يخلي بيدي: هذة الج خلي دوم يمج 

غنوة: بس ماعرف شبي خاف اسويلي شغلة 

دلهم:كلشي مابي بس رقمي 

            

              

                    

اخذتة فرحانة اگلب بي هو دنك اخذ الريمونت من الگاع كعد يتابع يباوعلي بطرف عينة غلست عنة

حتى ما سألتة عن الفلم شنو بدلة مرتين ما اندمجت وياه شمر الريمونت بضوجة حجة :طفي اريد انام

گمت طفيتة طلعت زهكانة من ريحة الطبخ الازكة بية مشيت للحمام سبحت و غلست الهدوم شريتهن

رجعت للغرفة اباوع لمكان الباب بضوجة حجيت ماعاجبني:اذا انام هنا اليوم ترجع الباب

فتح عينة يباوعلي بشك:وين تنامين

غنوة:هنا

دلهم: هنا على الجرباية لو بالغرفة

عبست لان كشفني كعدت قريبة على الطرف:هنا يالله بس رجع الباب

دلهم: نشوف للصبح اذا ضليتي عد كلمتج ارجعة

حجيت اعصر ادية:استحي والله 

دلهم:نامي مرة بعد ماتستحين

غنوة:اخاف

ابتسم جر ايدي خلاني امدد بصفة خليت راسي على المخدة گبالة ايدة فوك خدي يمسح عليه بهدوء

دلهم: منين تخافين

غنوة:اذا عفتني 

تغيرت تعابيرة بينت الضوجة عليه فلتت ايدي منة اريد اگوم ما خلاني سحبني بصفة غطاني نمت كوة علية ما انكر الضيقة الصارت بگلبي

بيومهة ما ارتاحيت لا هو نام عدل كل مرة يضل يضحك علية لو يسولف بس هالمرة ساكت ايدة 

فوك جتفي مخلي وجهة برگبتي بدون اي كلام 

للصبح من كعدت لكيتة ماكو طالع للشغل مرت ايام برود ثنينة واحد يتجنب الثاني حسيتة مايريد بعد يحاجيني لو يتقرب و يضحك وياي كلش نقهرت

كل مايفرغ بالليل يعلمني الحروف و الكتابة شوية شوية لحد ما بديت اتهجة ورة اسابيع و شلعان گلب

بطيئة كوة احفظ تحملني لحد ما حفظتهن جابلي قراءة مال صف اول و ثاني التهيت بيهن اقرة 

شوية شوية رجعنة لروتينة القديم حدد ايام بالاسبوع يشتغل بيهن و يدك وشم للناس الي تجي 

و الايام البقية يكعد يعلمني هواي استفاديت عرفت اقرة حفظت عنوانة حفظت ارقامة حتى ما ضيع أضيع مثل الصار وياي جنت حيل فرحانة بالعرفتة 

جنت واكفة امسح بالكاونتر هو دخل خلة المسواك بالگاع راح للغرفة نزلت رتبتهن بالثلاجة طلعت 

تفاح صغار غسلتة اكل بي و اسفط بالمواعين لحد ما أذن صليت و سويت العشة صحتة كعد كبالي 

كلش ضايجة من برودة اكلت بدون شهية كمت للغرفة لحد ما خلص رجعت سويت جاي خليتة بصفة كعدت اريد شوية ينتبه و يحاجيني 

            

              

                    

تقريت يمة بينة مسافة اعصر بأصابعي مرتبكة باوعلي بطرف عينة رجع يشرب جاي و يدخن 

 حجيت اتقرب:دلـهم

رد يشبك اديه سوة:نـعم

غنوة:اريد .. ءء اريد تو.. توشملي

حجيتهة غمضت عيوني خايفة منة اتخيل يضربني لو يزمخ علية متقلصة على نفسي زفرت انفاسي برجفة من حسيت بلمسة ايدة على خدي حضن فكي بين اصابعة رفع راسي الة 

دلهم:شتردين

هزيت راسي بنفي:مـ..ماريد شي 

مسح بأصبعة بلطف فوك خدي حجة بهدوء:گولي لاتخافين 

غنوة:تـ..توشملي

دلهم:فتحي عيونج

فتحت قابلني وجهة مبتسم اني خايفة گلبي يدك بقوة بعد الكوب تقرب متربع گدامي ما مبين على وجهة العصبية أو الانزعاج حتى البرود اختفى

دلهم:تردين توشمين

حجيت خجلانة :ءء اي شفت على ايدك عجبني انتة مو توشم لهواي ردت اجة بنفسي اجرب

دلهم:ماتتحملينة يوجع

غنوة:ء أجرب 

دلهم: اذا بديت ادك الوشم ما اوگف انتي تتحملين 

غنوة: اي 

نزل ايدة من وجهي اخذ أيدي گام سحبني وراه حجيت اوگفة:بس خل اشيل الصينية و انظـ..

قاطعني يدخلني للغرفة :عوفي التنظيف ما طاير

سد الباب شغل الگلوبات حجة يوگف گبال الميز :تعاي هنا 

تحركت وگفت بصفة سحب ورقة خلاهة گبالة التفت الي فجأة شالني من خصري بيد وحدة گعدني على الميز 

ضليت مدنگة اعصر بصابعي هو كل شوية يتحرك و رجلة تطخ برجلي لو بجسمي رفعت راسي مرتبكة من مد ايدة ارتكة عليهة محاوطني بجسمة

مخلي الورقة كدامة لازم القلم عيونة علية من فوك ليجوة رفعت ايدي متوترة اضم شعري لو اعدل ملابسي احس نار تطلع من وجهي

دلهم:فتحي السحابة مال ثوبج بالله

توسعت عيوني ضميت ادية لصدري:شـ..شنو 

دلهم:اريد اشوف وين ادك الوشم

حسيت العرك يصب مني افتح ملابسي كدامة ماكدر تحركت اريد انزل احجي برجفة:بـ..بطلت ماريد

بعد ايدة ساعدني انزل رد بدون اهتمام :بكيفج

مريت منة عيوني على لصور بالحايط اكو اشكال تخوف اكو حلوة وصلت للباب رجعتلة وگفت گبالة 

غنوة:اريد بس حباب لا ما يعني لا تگلي نزعي هيج ملابسي استحي سوي هنا هنا بيدي مثل ايدك

دلهم: اذا اخلي بيدج و الناس تشوفة ياخذون عليج نظرة مو حلوة 

غنوة: جوة ردان ثوبي هنا ماتبين

دلهم:تبين 

غنوة:طفي الضوة

دلهم:شلون اشوف 

خلة القلم فوك الورقة تقرب رجعت ليورة تقدم يحاصرني بينة و بين الرف مد ايدة من فوگي طلع

اوارق رجع سحبني وراه 

نثرهن على الميز صور هواي اشكال و رسوم رجع شالني كعدني بنفس المكان خلة الصور كدامي

دلهم:يالله اختاري

            

              

                    

باوعتلهن هواي اشكال اكو بيهن يخوفن اكو بيهن حيل صعبات ماينفهمن حكيت حاجبي محتارة 

دلهم: خيولن نختار شي على كداج فكري 

شتردين الوشم راح يضل وياج عمر 

طكطكت اصابعي افكر ماعجبني شي التفت الة عيونة علية القلم بيدة يطكطك بي على الميز منتظر

غنوة:انتة انتة اختارلي

دلهم:مايعجبج

غنوة:انتة هواي تعرف اذا تشوف شي حلو سوي

هز راسة انتبه للورقة كدامة يفكر تغيرت ملامحة لجدية بدة يرسم شفت الشكل بس ما فهمتة شنو

حجة يشرحلي :برقعة الشطرنج اكو هواي قطع منهم الملك و الملكة هذة رسم الملكة 

رمشت ما فاهمة فتح قميصة غمضت عيوني دنگت استحي منة حجة يرفع وجهي :فتحي

ترددت هواي يالله فتحت عيني حجة يأشر على صدرة هواي اكو وشوم منهن واحد يشبه لرسمة

دلهم:هذة الملـك 

غنوة: حـ..حـلو

دلهم:تردين الملكة 

هزيت راسي گلبي يدك حيل اني راح اصير مثلة نفس الشي عقلي تاه بهاي الفكرة ما فزيت بس على ايدة من فتح السحابة 

نزلهة من جتفي غمضت عيوني اخجل اباوعلة على الاقل ما اشوفة حسيتة صار گدامي عطرة صرت اشمة بية من كد ما قريب

شهكت مغمضة من حسيت بخشونة شاربة على جلدي دفو شافية من بوسني بكتفي بقة هيج فترة 

صدري يعلة و ينصى گلبي يرجف

غنوة:دـ..دلهم

رد يكرر بوستة : مخدر 

عضيت شفني حسيتة ابتعد برودة لمست جلدي حجة صوتة قريب: معقم 

هزيت راسي رجفت من بدة يمسح المكان فتحت عيوني بخوف لازمة ايدة :اوكف

دلهم:بطلتي

غنوة:لا بس .. خايفة 

هدئت انفاسي اشرتلة يبلش اول نغزة فزيت و رجفت من بوسني بخدي حسيت عقلي ماع من قربة

كل ما احس بوغزة الابرة يبوسني يخلني اضيع

لحد ما خلص فتحت عيوني مغوشات متروسة دموع رجفت من صارت برودة على جتفي مسحة بأيدة

حجة ينزل عيونة الي : مرطب بارد خلي لا تلمسينة عوفي جتفتج هيج لاتغطينة

هزيت راسي مأخوذة بقربة ابتسم مسح على خدي رد بصراحة: أول بنيـة اوشملهة حسيت بشعوري القديم بأول وشم ادگة وترتيني بجلدج الناعم 

ملت بوجهي على ايدة مغمضة و ارعش بخجل حجة بهمس : أخر ملكة تلمس أبرتي جلدهة لاگبلج لا بعدج

هزيت راسي برضى ابتعد يخلف فراغ و برود وراه نظف الهوسة التفت الي نزلني مشة كدامي يغسل 

أديه من الحبر 

رجع فك المكينة اخذ الابرة خلاهة بكلينس ضماهة بالرف بين اغراضة طلعت كدامة طفة الضوة سد الباب صرت گبالة رفع ايدة يبعد الفانيلة عني 

دنگ حسيت بدفو شفايفة على رگبتي بوسني غمضت عيوني ارجف لف ايدة على خصري شالني 

تعلگت برگبتة روحي ممرودة من الخجل ارجف 

رفع راسة صارت عيني بعينة اباوعلة نار تطلع من وجهي هو لامني بيدة واكف يم باب الغرفة

تقرب غمضت عاصرة جفوني سوة حسيت بشفايفة 

حضنت سفتي مثل ايدة گلبي صار يرگع بصدري مثل الطبل بوسني بهدوء و خفة بوسة ورة ثانية

رفعت ايدي مترددة خليتهة على جتفة حضني بثنين اديه صارت لمستة قاسية حسيت شفتي تشگگت 

بسنونة ايتعد يلهث خلة گصتة على گصتي ايدة تمسح على خصري وحدة على ظهري بكل هدوء 

بينهما مسافة تتآكل بهدوء،لا يقف عليها منطق، ولا يشرحها عقل، كأنّ كل ما مضى، صار يمهّد لهذه 

اللحظة وحدها بعض المشاعر لا تُولد بصخب بل تنبت خفية، في ظلّ يدٍ كانت تخنق، وصارت الآن تحمي

الفصل الثامن من هنا 

شكرا لزيارتكم عالم روايات سكيرهوم