رواية جسر الذكريات الفصل السادس بقلم مريم الحيالي
اعز من روحي اعزك وانت اعز مني ..
يا حسبة عمر خاويتها من صباي..
بطلت صفنتي.. وما بطلت مني...
للشاعر الكبير: عريان السيد خلف
......................................................
أبراهيم: واني شمدريني مو تدرين من يوم الضربة مال الطوبة نسيت هواي شغلات
.....بلا بشرفك اكو واحد ينسى طفولتة هسه انت موجود يعني ايصير اروح اسأل واحد ثاني تعالوا سولفولي الطفولة مال أبراهيم
أبراهيم: اي شكو بيها ما اتذكر والله سألي هديل
.... ادري هديل صندوق الذكريات كل ما اجيت وكتلي سألي هديل.. بلا سالفة هاي واحد ميتذكر ماضيي
ابراهيم:: روحي يلا دالعب بوبجي
.... ديلا .... رحت الهديل انطتني الموجز كله بس هم كلتلي اريد انام باجر عود اسولفلج الباقي
..... هم ايطردوني لو اني يتوهملي ؟؟ وهاجر اختي الصور القديمة عندها وحظرتها نايمة اريدها اتدزلي
...بس تخلص القصة اهلي انطيهم حظر من حياااااتي شلعوووووووا قلبيييييي
......ذكريات في جوف الماضي......
بعد مرور 4 سنوات
شهر ال12 مبقى شي وتنتهي سنه ال80
اوضاع البلد مو زينة للأسف والحرب الايرانية الي مسببه توتر وقلق ببيوت هواي عراقيين من ضمنهم اخوية عصام بعدة ممخلص العسكرية واخواني الصغار بعدلهم كلمن 3 سنوات وهم لازم يلبسوون اخاف عليهم اني صرت المسؤول عنهم من يوم ابوية اتوفى ... امي اتمرضت و صحتها متدهورة ...اني بعدني ويه ابو محمد مغيرت شغلي ويا رجال والنعم من عندة
...... مرت الايام واليوم عيد رأس السنة راح ندخل سنة ال81 يارب سنة خير علينا
دريد: هاا يابه الله ايساعدهم .. يووم شلونج ان شاء الله زينة اليوم ... بس اتحركلي براسها تعبانه والدوة مديفيد وياها
انتظار: لتخاف عليها اليوم الحمدلله زينة وحتى اتغدت ويانه اكلت شوية
دريد: الحمدلله لا مابيها شي ان شاء الله... طالع اني رايح للمعمل اي شي ايصير وياكم دزي عليه
انتظار: الله وياك
... طلعت واتمشيت للشارع وفتت من يم بيت ام غزوان ..مثل عادتها واكفة بالباب اتنظفه ..سلمت عليها
ام غزوان: هلا بدريد هلا شلونك يووم ليش اتغيب عليه هلكد صارلك شكد مجايني
دريد: حقج علية يابة بس والله الوالدة صحتها مو زينة وجنت حاير بيها
ام غزوان: سلامتها ان شاء الله..امر عليها واشوفها
دريد: ان شاء الله هلا بيج يابة... في امان الله ... سلمت عليها وكملت طريقي للمعمل ..وبديت اشتغل
ونفس الروتين اليومي ماكو جديد ...خلص الدوام وطلعت رحت النزار بعدني واگف يمه واجاني خبر من البيت امي متخربطة وايريدوني
...رحت عالسريع ولگيت الجوارين ملتمه وغصون واخوتي الصغار كاعدين عالدرج فتت ولكيت نسوان يبجن بدون ما اسأل عرفت شنو السبب....
....... في وقت من اوقات الحاضر القريب..........
.... ماما هسه ليش تبجين ترى هديل اتزوجت مو راح ايعدموها
عليه: انتي ليش متنلصمين وتحجين عدل
.... ماما علمودج كافي من اجيتي والهسه تبجين هاي الله يسعدها شنكول .. امي هواي اتحب هديل كلش عرس هديل صار من الصالون لا حفله ولا اي شي امي وخالتي راحو وياها واجوي عيالها اخذوها مناك
خاله سهاد: دكافي ام هديل باجر من الصبح انروحلها.. غير همه مستعجلين منتظرو تطلع السنه شجاهم
علية: شمدريني بسرعه بسرعه صارت شجاني وسكتت وقبلت
...اني وهاجر نسمع وساكتات اذا نحجي علووش اتكوم اتطلع حرگتها بينه غيير
انوب الدنيا باردة ومطر شهر ال١٢ ويوم الاحد عدنا امتحانات شهرية ست نجلة اتضيع فرصه ومتمتحنه مو عييب
................ذكريات في جوف الماضي.................
...رجعت لگيت امي ميته وغصون ومحمد وفارس كاعدين عالدرج ...وخالاتي مسويات بردة هيج مثل الحاجز...
وهنه كاعدات ايغسلن بأمي ...
موقف مينسي ومؤلم جداً بس لا اعتراض على حكم رب العالمين ... اعاين لاخواني الصغار ايعاينون ويبجون.... وانتظار مريضه خطيه وهم تبجي ..اتحملت مسؤلية بعمر صغير
اجه خالي سعد واخذنه امي ودفناها بمقبرتنا ...وسوينا فاتحه المدة ٣ ايام وكل المنطقة والگرايب اجوي وخالاتي يبجون ... لا اعتراض على حكم رب العالمين وطبعاً عصام وعمران اخوتي بالعسكرية ميدرون
.....خلصت الفاتحه واحس المسؤلية زادت غصون بعدها خامس ابتدائي خالي سعد حجه ويايه وكال راح اخذها يمنه وتبقى بينكم وبينه معترضت كتله خليها اتروح اخذها ويا
بقت بس انتظار هي الي اتحملت المسؤلية الكاملة
بس احنه مو شويه هواية وهي وحدها وكلنه ممتزوجين ....
..... مرت الاشهر والسنوات واحنه ماكو شي جديد بحياتنا غير الشغل ...واختي غصون كل فترة تجينه انشوفها وترجع البيت خالي ...خالي اقترح عليه اتزوج گلي كبرت ولازمكم مرة بالبيت وانتظار متكدر وحدها
...رغم احنه وياها وانساعدها بس كال لازم تتزوج اني رافض هاي الفكرة أساساً ومو ببالي كتلة ان شاء الله الله كريم لان الزواج مسؤلية مو حجي هو.. واني برگبتي ١٠... لا واحد ولا اثنين
..... صرنه بسنه ال٨٢ نهايتها اجاني عصام وگال اني احب امل جوارينه بنت بيت ابو فلان ..كتله بيها الخير ..
عصام : قررت اتزوجها شنو رأيك
دريد : صفنت اني الصراحه ميعجبوني الشاهد لله ماعندي شي عليهم بس بناتهم عندهن خفه لذلك اخذت موقف عليهن... هاي حياته محبيت اتدخل كتله...
...ليش لا اذا همه قابلين وانت وياها متفقين
مابيها شي احجي ويه خالي وانروح نخطبها ان شاء الله.. بس ليش متنتظر الحد متكمل عسكريتك؟
عصام: لا يابة الحرب مطولة ومو مال تأخير اني رايدها وهي رايدتني
دريد: ان شاء الله بيها الخير... حجيت ويه خالي ومعارض راحو خالاتي شافوها واتفقوا ويه أهلها..همه جوارينه يعني ناس تعرف ناس ... خطبناها وصارت قسمتهم
....بداية ال٨٣ صار العرس مال عصام واتزوج واجة سكن ويانه الحمدلله...شويه اتقل المسؤلية على انتظار .. ماعدنا شي بس الولد الصغار الكبار كلهم عسكرية حرب ايران مرحمت العراقيين
نزار: وانت بالخير شوكت ناوي تتزوج لو بعدك عايش عالاطلال..
دريد: عاينتله وضحكت.... انت تحجي صدك لو تتشاقه يا اطلال هاي ... بس انت اتشوف هذا وقت مناسب وبعدين لازم اطلع لأن وين ايكفي بيتنا والولد خطيه يتضايقون ..لتنسى مرت عصام ويانا
نزار: وين المشكلة اجرلك قريب منهم واكعد واتزوج
دريد: عوفك مني اللتهي انت ببيتك وعائلتك ... نزار اتزوج بسنه ال٧٨ اخذ بنت عمي مو غريبة ... والحمدلله عندة ابنيه صار وكل مرة هم يفتح ويايه الموضوع مال الزواج ... بالحجي كلشي سهل..
.... عصام بالعسكرية وزوجتة حامل ... مو دائما ينزل اجازات.. وهيج واتصير الصدفة وايصير عندها ولادة وهو مموجود ... اخذناها للمستشفى وجابت ابنيه (هبه) ان شاء الله تتربى بعز ابوها وامها رجعنه للبيت مر تقريبا اسبوع ونزل عصام اجازة
.......مرت الايام وصار عمر هبه بنت عصام شهرين هو بعدة عسكريه بس هاي الاجازة اتأخر منزل وبالي يمه والله ...
بس للأسف اجانه عصااام شهيد ..
هذا الخبر كسر ظهري واذاني اكثر من وفاة امي وابوية اخويه هذا اخوية متهنى بعرسة ولا شبع من بنتة ... اه والف اه
.... خلصت زوجته العدة واقترحوا خالاتي وخالي بأن قصي اخوية هو يتزوج امل مرت عصام علمود بنته لأن بعدها صغيرة ومحد جان معتني بيها ومسؤليتها صارت على عاتقي هم ومجان عندي اي اعتراض بالعكس ... وافق قصي بس كال ما اكعد اهنا اخذها واطلع ...
براحتك وين متحب ... اتزوج قصي امل مرت عصام
واخذها وراحوا سكنوا بغير بيت
...... انتظار مريضة خطيه ومصخنه هوايه بليله ويوم اتخربطت اخذناها للمستشفى الدكتور كال بيها سحايا صاير ... ضربها ابرة واخذنا دوة ورجعنا للبيت
.... بس هل هو قدرها ويومها لو الخطئ من الطبيب الي ضربها ابرة من المفروض مينطيها الها سوت عندها مضاعفات واختي الحنونه فارقت الحياة
انتظار بعدها صغيرة بريعان شبابها اتحملت مسؤليتنا رغم صغر سنها ... الحمدلله يارب لا اعتراض على حكمك وكتبتك
مرت اشهر وبقة البيت فارغ محد بي بس اني والولد وغصون يم بيت خالي اتروح وتجي كل فترة بعدها بالمتوسطه ... اجاني خالي وجان حازم بقرارة
سعد: دريد تتزوج يعني تتزوج كبرت انت متشوف محد بالبيت منو الكم
دريد: رضيت بالأمر الواقع.. وكتله
.... هاهيه خالي الي اتشوفه سوي ماعندي مانع
سعد: وزواجك كله عليه ... درهم متدفع ...راح اوصي خالاتك ايدورولك
دريد: ان شاء الله خير.... مرت الايام واجتني خالتي سلمى وكالت لكيتلك مرة والناس تعرفهم بيت حجي رحومي
..... رحومي الطعمه مو غيرة ... بس ادري بناته الكبار متزوجات والصغار ايدرسن ... كلتلي لا علية بنتهم حبابه وحلوة شفتها اجتي خطار الاختها وعجبتني
هاهيه انروح وانشوفها ... ابو كريم رجال خير والنعم من عندة ويعرفني وايحبني اني اروح وافاتحه بالموضوع
رحت حجيت ويا ومردني لأن يعرفني وقبل وكلي كبع واخذ وين الگه مثلك دريد ... بس جان ابنهم حسين استوه ميت هم شهيد اجاهم بحرب ايران
.... مرت الايام وصار العرس ونزار مكيف عبالك عرسة اله
نزار: الفرحة مسايعتني وأخيراً غير شلعت گلبي
دريد: والله فرحتك مال واحد هم على گلبة وانزاح...
نزار: ايييي بالله
..... ضحكت عليه ومسويت عرس لان همه حزنانين على ابنهم... بس عيال اختها جيران بيت خالتي كاعدين بالنهضة فمناك راح اروح واخذها... عليه حلوة وصغيرة خوش ابنيه شفتها وعجبتني
دريد: رحنه الزفة وصار العرس واخذتها ورحت طلعت للفندق ... بشيراتون... والحمدلله على كل حال ...
................................
علية
اعرفكم عن نفسي علية زوجه دريد
مواليدي ١٩٦٢ ابوية ايحبه الدريد هواية
ومن خطبني بسرعة وافق ومعترض رغم فارق السن البيني وبينه هوايه بس محب يكسر بخاطرة
دريد والنعم من عندة انسان حباب ومشفت من عندة الا كل خير
رجعنه من الفندق وفتت البيتهم بيت مال عزابيه يختلف مبين .. لازم يحتاجون مرة بالبيت ... رجعنه خالاته موجودات حبابات واخوانه هم خوش ولد وجانو بعدهم صغار واخته غصون مموجودة يم بيت خالها ..
كال كل فترة تجي علينه..
علية: ليش مترجع اختك اهنا بعد خليها تجي
خطية
دريد: مو مدرستها شلون بس هي كل فترة تجي ..يابة ليضل بالج ...
علية: هلا بيها.. مر يومين على زواجنا وعزمتنا بنت عمته الدريد للموصل وسافرنة ... لمتهم حلوة وسوالف وضحك دريد اقترح علية اقتراح كال..
دريد: شنو رأيج منرجع البغداد منا نطلع لدهوك قريبة انگضي شكم يوم ونرجع
علية: ليش لا والله بعد احسن والجوو حلو هم ..
دريد: هاهيه لعد حسبي حسابج ان شاء الله طالعين لدهوك
علية: بقينه يومين بالموصل... بس طلعنه رحنه الغابات الموصل وللسوق الكبير بنت عمته حبابه ومجاملة واني طبعي بسرعة اخذ ميانه ما اتحسس من احد
....ودعناهم وسلمنا عليهم ...وطلعنه لدهوك وجانت من احلى الايام كلش اتونست دريد شخصيته واسلوبة ايخبل ...وكلش حباب ويايه
علية: رجعنا البغداد وقررت اغير من البيت وارتبة.. واكو غراض هواي ناقصة كتله الدريد وكلي براحتج شتسوين سوي
شكرا لزيارتكم عالم روايات سكيرهوم
