رواية زواج إجباري عشق السيد الفصل السابع بقلم جمانه السعيدي
اماني...بس سمعت ذني الكلمتين من امي ضاك النفس عليه
وكمت اشوف الدنيا سوده
ردت امشي راسا رجليه التفت كدامي ووكعت
ومااكدر اعدل نفسي
امي...كامت تعيط وتريد تكومني ماكووو
زوجت جاسم اجت تركض بس اني مثل الجثه الهامده
مااكدر اتحرك ابد
امي....يمه بنيتي يمه ماتت ماتت اماني
زينب زوجت جاسم......اسم الله شبيه يابسه مثل العصه
امي... يمه بنتي
بهذا الوقت لا ابوي ولااخواني موجودين بعد شويه ويوصلون
امي حارت شتسوي ووين تروح
زوجت جاسم جابت مي تغسل بوجهي وتسمي عليه
وامي ركضت لبست عباته وطلعت تركض البيت سيد هادي
ادك بلباب الداخلي مسدود
رجعت من باب الزلم دخلت وهي تصيح
امي....فدوه سيد الحكلي اماني ماتت اماني ماتتحرك
صوت امي جان عالي بحيث كل الي بلبيت سمعه
اجت زوجت السيد على صوت العياط
امي....فدوه سيد ابوها موهنا راح تروح مني البنيه فدوه الحكلي..
السيد عاف النسوان الي يمه وطفر يلبس بشحاطته
زوجت السيد...وووين ووين تضحك عليك هاي لعبه تريد تورطك
روحي بابا انتي مره شكبرج ماتستحين
عوفي هاي السوالف
السيد...امشي ام جاسم معليج بيه
زوجت السيد...معليج بيه شلون ماتطلع وهاي المره حياله هي وبته نسوان أدبر كلشي
ماتطلع يعني ماتطلع
امي...فدوه ساعدوني بنتي راح تموت
زوجت السيد...تموت الجهنم الحمره شنو احنا ابتلينا بيه
نسوان لا تستحي ولا تخاف
جمانه السعيدي
السيد طلع يركض وأم جاسم ورااا
السيد جان يعتبر هذا الموقف انساني ابنيه تخربطت وماكو اي احد يمه وتحتاج مساعده
وصل لكاها ممده بلكاع ولا حس ولا نفس
وزوجت اخوها حاضنته
السيد...غطيه بويه
امي كعدت خلتني بحضنه وغطتني بعباته بس وجهي وشعري طالع بذيج اللحظه امي فقدت ماتعرف شلون تتصرف
زوجت جاسم راحت لبست عبايه واجت تساعد امي عليه
السيد قرب وخله ايدا على نبضي
السيد...عايشه لا تخافين لبسيه ناخذه للمستشفى احسن
بهاي الأثناء اجت زوجت السيد وكامت تكسر بابنا
ونزلت غلط ومسبه بلشارع
من صوت ضربه للباب الجوارين كله طلعت
زوجت السيد....نسوان لا تستحي ولا تخاف نسوان حياله
خالات عينهن على السيد
كل شويه مطلعات شغله وجايات بيتنا
البنيه جنه حصان حيله احسن من حيلي ومسويه نفسه مريضه
واخر المتمه متفقات على السيد يدخلنا بيتهن وماكو رجال بلبيت
بهاي الاثناء وصل ابوي واخواني
طلع السيد من بيتنا لاكهم وجه بوجه وزوجته تعد وتصف علينا بلشارع والجوارين كله واكفه تتفرج
جمانه السعيدي
ابوي....شكووو شصار
زوجت السيد....يدفع بيه زوجه وهي السانه ماينكدر
ترد على ابوي
توك اجيت يلهيبه تعال شوف نسوانك شيسون
أخذن السيد البيتهن خوش تعرف تحكم بيتك
ابوي....اس ولا كلمه مااسمحلج سيد شعندك بيتنا
السيد...راد يحجي وزوجته طفرت
زوجت السيد. اسئل زوجتك وبتك هنا اجن علي للبيت
بتك مسويه نفسه ميته
راسا السيد بعد ماتحمل ضربه راشدي ووكعت بلكاع
كامت وزادت اكثر واكثر حجي وفشاير وكلام ماينكال
سحبه السيد ودخله للبيت
السيد....اني افهمك ابو جاسم معليك بحجي العلويه
ابوي.. شلون معليه بحجيه زوجتك خلتنا علج بحلوك الناس وفرجت علينا امة محمد
السيد....هسه بتك صحته موزينه خل ننقله للمستشفى ويصير خير
ابوي.. ...بتي اني مسؤل عنه اني اخذها للطبيب انت مالك شغل بيه
انت كوماني وكلام مرتك مو قليل جيب عمامك ونكعد
ويصير خير
السيد دخل البيتهم ونزل على زوجته ضربه ضرب
مو طبيعي وخلاها بلسياره ودزه البيت اهله
لان جابتله مصيبه الله اعلم شنو حله
هم شهرت بلبنيه وهم شهرت بسمعة السيد
دخل ابوي لكه امي خالتني وتبجي
ابوي شبيه اماني
امي... تحجي وهي تبجي......بتي ماتت وماتتحرك خفت
عليه وانتم ماكو ركضت جبت السيد يشوفه هو احسن مني ويفتهم اني مااعرف اصرف بهيج مواقف
السيد بس شافه كال خل ناخذه للمستشفى بسيارتي
وزوجته هجمت علينا تكسر بلباب وتسب وتفشر
ابوي....حقه شلون ادخلين زلمه غريب للبيت
امي...افهمني يارجال بتك موزينه خل ناخذه للمستشفى
وبعدين نحجي
جاسم....هذا السيد لازم يدفع ثمن غلطته وهاي السالفه ماتعدي على خير ابد
طلع جاسم اجر سياره واخذوني للمستشفى ضربوني ابره
وخلولي محلول وبي ابره ثانيه
ساعه وانتبهت النفسي لكيت امي فوك راسي وتبجي
ابوي....يله صارت زينه كوميه خل نروح للبيت
كومتني امي ومشينا
ابوي جان حيل زعلان من الموقف الي صار لان هذا الموقف ياثر على سمعت العائله كله
بس وصلنا للبيت اجتمعو ابوي وخواني ثنيبنهم وابوي دز على عمامي هم اجووو
بدا ابوي يحجي الموقف الي صار بلتفصيل
ابوي....لازم نرد كرامتنا وسمعتنا الي انشهرت بين الناس
جاسم...ماله حل غير السيد يزوج اماني هذا الحل الوحيد
اختي تلطخت سمعته وبعد مستحيل اي احد يتقدمله
واذا سكتنا مراح نكدر نعيش بلولايه بعد
ولا نكدر نرفع عينه بعين الناس
الناس ماتصدك تسمع خبر موزين راسا تنشره
والحجي الي حجته العلويه مو قليل ابد
عمامي وابوي اتفقوا ان هذا الحل الامثل وماكو اي حل غيره
وهذا القرار..راح يكون هو الرد الامثل على السيد من يجي
(...بنات قسما بلله هاي القصه حقيقيه )
اماني.... من سمعت قرار اهلي كمت ابجي عبالك زايده عليهم
ويردون بس يخلصون مني واذا حجت زوجت السيد
قابل هم مايعرفون اخلاقي
بس اني وامي مالنا اي رائي بهذا الموضوع وخصوصا
ابوي زعلان علينا ثنيبنه اني وامي لان خلينا بهيج موقف صعب
كل شويه وكال لو ميته اماني ولا هاي الفضيحه
الله لا يوفقجن ثنيينجن على هاي الدكه الناقصه
طول النهار عصبي وبس يدخن
وحتى ماطلع من البيت ذني اليومين
حتى جاسم هم تعارك وياا زوجته ورزله رغم هي المسكينه ماله دخل بلموضوع ابد
بس هم حصلت حجي وغلط حاله من حالنا
البيت تكهرب بسبب هاي المشكله
بعد يومين السيد جاب مشيه واجا واحنا كنا منتضرينهم وعدنا خبر بوصولهم
اول مادخل السيد بأس راس ابوي واخواني وعتذر منهم
على دوسة البيت
لان هو دخل وهم ماموجودين بلبيت
السيد....اني جدا اعتذر بس ولله اني دخلت البيت لعامل انساني منضر ام جاسم وهي تحشمني وتطلب مني المساعده كانت خايفه وتبجي
عفت النسوان الي جاياتني وطلعت اركض
هسه اذا بيتكم يحترك مااطفي واساعد عيالكم اذا انتم ماموجودين
اعتبرو البيت جان يحترك واني طفيته وانتم ماموجودين
وغلطت ام يوسف امسحوها
بلحيتي هاي رعنه وماتعرف تتصرف ابد
ولله سمعتكم ذهب ومحد يكدر يندك بيكم لو بسمعتكم
وبتكم مثل بتي
واني حاضر الكل طلباتكم
اعتبروها غلطه وهاي صدك غلطت الشاطر بالف
بس انتم اذا ماتقبلون اعتذاري يعني تكطعون سبيل المعروف
يعني بعد محد يساعد المحتاج اذا وكع باازمه
اني زوجتي طردته البيت اهله
واذا ماتنحل هاي السالفه مراح ارجعه على ذمتي ابد
لان غلطته جبيره وماتنغفر ابد
اني هسه خلصت كلامي ومستعد اسمع كلامك وذوله
عمامي وكبار الساده جايين وياي ياخذون من خاطركم
ابوي... الي صار مو قليل وماينحل بااعتذار وانت واهلك
وكل عمامك على راسي من فوك
بس الموضوع يخص سمعتنا الي زوجتك داسته
منو راح يصدك انت دخلت بيتنا علمود شغله انسانيه
لو نحجي العمر كله محد راح يصدك
هاي المشكله ماله غير حل واحد
يرجع كرامتنا وسمعتنا
السيد....شنو الحل اني كدامكم
ابوي....تمشي علينا وتخطب اماني وتكون زوجتك على سنة الله ورسوله وماكو غير هذا الحل
هاي المشكله ماله غير هذا الحل
لان الي انكسر مراح يتصلح ابد بعتذار لو كلمة
شكرا لزيارتكم عالم روايات سكيرهوم
