رواية نقش بارد الفصل الثامن بقلم فدك فاطمه
.
.
"الـهَوى يلتَم عليه منين ماذكروك"
غنـــوة
تقرب غمضت عاصرة جفوني سوة حسيت بشفايفة
حضنت شفتي مثل ايدة گلبي صار يرگع بصدري شلون الطبل بوسني بهدوء و خفة بوسة ورة ثانية
رفعت ايدي مترددة خليتهة على جتفة حضني بثنين اديه صارت لمستة قاسية حسيت شفتي تشگگت
بسنونة ابتعد يلهث خلة گصتة على گصتي ايدة تمسح على خصري وحدة على ظهري بكل هدوء
رجلية لمست برودة الكاشي مدنكة ماعندي الجرأة
اباوع لعيونة البيت كلة سكن ماكو صوت ما اسمع غير دگات گلبي لترن بكل جسمي برهبة من الصار
حضني يقربني عليه مخلي راسي على صدرة يمسح
فوك شعري بهدوء غمضت عيوني كلشي بية سكن
و كلشي هدئ بهدوء لمستة الدافية و حنانة
ابتعدت خطوات عنة خجلانة درت وجهي مشيت للغرفة سديت الباب كعدت وراه مددة مبهوتة
استحي حتى افكر بالصار ضميت وجهي بين ادية
تلمست شفتي بطروف اصابعي حسيت بكل قطرة دم تمشي بشرايني رعشة غريبة صارت بجسمي
گمت قفلت الباب افتر بالغرفة بعد شلون اباوعلة
رجلية تخردلت كعدت على الجرباية احسن شي انام
تغطيت ماكدر انام ما منعسة بس مستحية وميتة اتگلب كل شوية انام على جهة دفرت البطانية كعدت
امسح خدودي كل ما اغمض عيني اتذكرة احس شفتي مشتعلة نار و مورمة يمة راح اموت ياربي
شلت المخدة ضميت وجهي بيهة ضليت كاعدة هيج احجي وية روحي يالله كافي عيارة شصار هسة
منا لباجر ينسى و اني انسى ونرجع مثل گبل خل انساه ، اگوم اوصل للباب و ارجع شعوري ماعرف اوصفة حيل مستحية و گلبي يرجف
لحد الغروب طلعت اتلفت ادور عليه ماكو تنهدت مرتاحة رحت صليت وراهة دخلت للمطبخ اسوي عشة هم اخذت صفنة على الثلاجة محتارة شسوي
طلعت كلشي موجود سويت تبسي خليتة على النار
لميت شعري رفعتة طلعت برة غسلت الحوش جو
كلش حلو الغروب الهوة بي برودة
خليت الكاشي ينشف و طلعت وحدة من المدات فرشتهة و خليت مخدتين كعدت فليت شعري مشطت لميتة على جهة وحدة كاعد اضفر بي
سمعت صوت الدراجة لگفت مشطي ركضت للغرفة
سديت الباب و ألوم بروحي المن شردت بعد شيطلعني ،أنام لا جوعانة شينومني لو يطلع يروح
دلهم:مطولة بأعتكافج
فزيت على صوتة التفت ارفع عيني و انصيهة حجيت متوترة:لا اجيت هنا اشوف الغرفة
دلهم:ها و شلونهة الغرفة
غنوة:زينة
دلهم:دتعاي صبي عشة وراي شغل
عضيت شفتي على فهاوتي مشيت كدامة للمطبخ طفيت النار خليت الطاوة بصينية وياهة خضرة و خبز و لبن توة مشتري
مد ايدة من فوكي شال الصينية اخذهة برة وين ما فرشت المدات ،فتحت الثلاجة طلعت ماي رحت
وراه خليته بصفة درت وجهي اريد ارجع ،لزم ايدي
سحبني كعدني بصفة غمضت عيوني اهدي روحي
حجة ينطيني الخبزة :عدي شغل ما ارجع منا للفجر
التفت فازة:واضل وحدي
دلهم:قفلي البيبان
غنوة:لا اخاف والله وتطفى الكهرباء ماكدر اضل
دلهم:الموبايل يمج ماعليج شي
غنوة:اي مو الموبايل بندقية
دلهم:نجبي لاتصيرين فكاهية
هزيت ايدي لزمهة خازرني دفعتة كعدت اكل همي على بطني لحد ما شبعت هو خلص و گام راح يبدل
واني بعدني اكل گمت اشوف وجهي بالطاوة
مر مني طالع استغربت رايح مشي گالي لاتقفلين الباب كيفت بلكي مايروح ، اخذت الصينية رحت غسلتهن و نظفت الطباخ خليت الجاي على النار
فترة و رجع بيدة علاكة خلاهة على الكاونتر طفيت الطباخ صبيتلة كوب جاي مديتة الة اخذة مرتكي
على حافة السنك مگابلني اني اغسل بمواعين الغدة مالتة ضلن بمكانهن ولازك عليهن التمن يابس
دلهم: خليتي مرطب
رديت بدون ما اباوعلة:اي خليت
دلهم: والله لو تعوفين الجذب احنة بخير
حكيت گصتي بفشلة غسلت ادية من الزاهي توني اريد التفتت صار وراي حشك بلعت ريگي مرتبكة
مد ايدة غمضت بسرعة احس بصابعة يمشيهن
على رگبتي من جوة أذني لحد جتفي لمسة هادئة
حجة ينزل ياخة الفانيلة:الزميهة
مديت ايدي لزمتهة اوخرهة عن مكان الوشم حسيت برودة المرطب فوگهة مسحهة بصابعة على المكان
فتحت عيوني بس ماكدر اباوعلة بس ايدي كدامي سد العصارة خلاهة على جهة مد اديه محاوطني
عصرت الفنيلة بين ادية واكفة گبالة مدنگة من گد الخجل حسيت بصابعة على حنجي رفع راسي الة
دلهم: الشعر احمر و الشفة حمرة هسة حتى الخدود حَمر غناوي
مديت ايدي ادفع ايدة لزمهة حجة يمد ايدة بجيبة:رفعي راسج كافي خجل
غنوة:مـ ماكدر فدوة وخر عني
دلهم:لو اكدر اوخر جان وخرت من زمان
مسحت رگبتي عرگانة نزيت من حسيت برودة بصبعي رجعت عيوني اباوعلة گلبي رجف من خلة حلقة بيدي لازم اصابعي يمسح عليهن بكل هدوء
دلهم: تگولين على انجلينا معصعصة وانتي قياس مال محبس مايصيرلج
غنوة :هذة الي
رد ببتسامة:اي الج خاتم زواجنة
ضحكت فرحانة سحبت ايدي اباوعلة رفعت راسي بفرحة الة خلة اديه ثنينهن ورة ظهرة دنگ لطولي
حجة ينطيني خدة :بوسة
غنوة:ها
دلهم:يالله اريد اروح وراي شغل
تقربت بوستة بسرعة درت وجهي خلة ايدة على جتفي باسني براسي و اخذ غراضة و طلع گالي اقفل الباب وراه ضليت بمكاني صافنة على ايدي
ضميت وجهي بيهن انگز كل ما اتذكر خشونة لحيتة على شفتي جسمي كلة يقشعر يصير مثل الدود
يدبي فوك جلدي مسحت رگبتي انترست كريم من العصارة غسلت ايدي رجعت خليت كملت المطبخ
قفلت البيبان و وگفت يم الكاونتر مشتريلي حلويات
اخذتهن كعدت بالغرفة على التلفزيون اتابع فلم
جان هندي مدبلج مالگيت غيرة اشوفة توة بادي عدلت المخدة تمددت كل ما تطلع لقطة بيهة ظلمة
يعكس وجهي بالشاشة اشوف روحي شارة الحلگ
و الضحكة من الاذن للأذن استحي من نفسي
اخذ بالي و تفكيري كلة مشاعر جديدة ماعرف اعبر عنهة بس اضحك و اضمضم بوجهي من المراية
من طفت الكهرباء قفلت باب الغرفة تمددت متغطية مرت كم دقيقة سارحة بفكاري العب بالحلقة اطلعهة اوصلهة لنهاية اصبعي و ارجعهة
فزيت على دگة الموبايل اخذتة من الميز نهضت اشوف اسم عگدت حواجبي ضليت اتهجة الفظ
حرف اروح لثاني انسى الاول فصل الاتصال رجع
مرة ثانية هالمرة طول على ماقريتة سنة مرت
حجيت بضحكة ارد عليه:دلهم
دلهم:يا صلاوات قريتي
غنوة: ليش مغيرة مو جان اسمك قلب الحب
دلهم:اسمي قلب الحب ؟
غنوة:هيج انتة خليت قلب احمر حتى اعرفة منة
دلهم:جنتي ماتقريت هسة تعلمتي
غنوة:بس كوة قريت على ما لفظت اخر حرف نسيت الاول راح احفظ شكلة شلون مرسوم
دلهم:عدج حل لكلشي بالحياة
غنوة:جا شسوي ما ينحفظن ينسن
دلهم: اي ينسن خطية لو عدج فضول شوية نفس فضولج لتدخلين بي لغرفة الوشم جان مانسيتي
عبست مرتكية على ايدي راسي فوكهة و الموبايل على أذني :دكدكت علية حتى تعاركني
دلهم: دكدكت عليج حتى اشوف شوضعج
حجاهة بضحكة رديت مستغربة:ليش تضحك
دلهم:ماكو شي ، طفت الكهرباء لو بعدهة
غنوة:صار شكد من رحت توك اتصلت يعني تدري بيهة طافية
دلهم: عقلج صار يشتغل بالجهد العالي هيج
بوستي تسوي
ضميت وجهي بغطة ساكتة اتذكرة غمضت عيوني
اتلمس شفتي سمعتة تنهد حجة بهمس:تذكرين مو
غنوة:لا
دلهم:اي مبين خنستي البزونة
غنوة:جا انتة نسيت
دلهم:امم من ارجع ذكريني عود
رديت اتهرب: راح انام
دلهم:خلي الموبايل بصفج حتى من ارجع تفتحين الباب
غنوة:خوش دك هواي لحد ما اگعد
دلهم: قافلة غرفتج
غنوة:كلشي قفلت طفيت الاضوية و تأكدت من الشباك بس لو تجيب حديد و تلحمهن لشباك الغرفة يخوف هيج
دلهم:ماعليه مسودود
غنوة:ما أمن الة يصير بي حدايد حتى محد
يكدر يمد راسة
دلهم: خلي يشوف ليش حارمتة
غنوة:ياهو شيشوف
رد مغير الموضوع: نامي لاتضلين سهرانة
غنوة:اي اكلك شكراً على الحلويات
دلهم:شكرا على البوسة
غنوة:كافي روح لشغلك الله وياك سدة
دلهم:سدي انتي دوسي الحمرة
رديت اعدل گعدتي:وين صايرة
دلهم: فوك على الحايط
ضجت لان يضحك علية خليت الموبايل جوة الجرباية بدون ما اسدة كبرت مخدتي خليت وحدة
جواهة نمت زعلانة بعد مادري بي للصبح كعدت على صوت العصافير وصوت الناس من الشارع
گمت اغسل دخلت للمطبخ خليت الجاي رحت صليت مامصلية الفجر ، طلعت اطكطك بعضامي
گمزت ذيج الگمزة من شفتة نايم على المدة لخليتهة البارحة بالحوش بس المخدة جواه اكلت اضافري من الخوف نسيتة رحت بصفة مكنبصة
دغيت جتفة بصبعي خاف يكعد ماگعد عفتة شاردة
تريگت لان ادري راح اترزل و ما اكل زين ، عدلت
الهول كنستة خليت المكناسة جوة الدرج رفعت راسي صار گبالي يباوعلي مخنزر طب لغرفتة
رجعت للمطبخ حضرتلة الريوك سويتلة شلون طاوة بيض و طماطمة تشهي شلت الصينية خليتهة
بالهول رحت اباوعلة من الباب متمدد بالغرفة ايدة على عيونة مغطي وجهة بيهة رحت كعدت بصفة
حجيت متوترة:الموبايل خليتة بصفي وطاح جوة الجرباية مادري بي مالگيتة الة الصبح
دلهم: امشي منا
غنوة:سويتلك ريوك اسفة والله نسيت
مسح وجهة التفت الي بس عيونة طالعة باوعتلة اعتذر منة فك العگدة بين حواجبة گام غسل اجة يتريك اخذت هدومة النازعهن برة كلهن رمل
استغربت رحت غسلتهن و شريتهن لميت المدة البرة عدلت الحوش الجيران عدهم نبگة و تطيح ورگ علينة يومية الگاه متروس ترس غير التراب
خلص اليوم نفس الروتين و الهدوء دلهم ضل النهار كلة نايم متقيدة ماكدر اتحرك هو على اقل صوت
يفز منقصة التلفزيون على الاخير و اتابع كاعدة جوة
بالگاع كل سوية التفت الة نايم بمكاني كاتلتني
الغيرة اريد اتمدد هناك رجعت عيوني اتابع مندمجة حتى ما تعشيت منتظرة يكعد نتعشة سوة
جريت الغطة منة اكعد بي كتلني الجوع گوة گام راح يصلي رجع كعد بنفس مكانة اخذ الريمونت مني
طلعت للمطبخ صبيت العشة شوربة خليت كاستين
گليت طماطمة هم ,خليت دولكة ماي وديتهن يمة
تعشينة ضل يفتر وراي وين ما اروح يصير بوجهي
گلبي ما ارتاحلة حتى غسل مواعين العشة و الجدرية
ونظف السنك بس سويت جاي صبيتلة اخذة يباوعلي مقلص عيونة جنت اصب شكر بالكوب الي
دلهم:روحي لبسي حتى نطلع
غنوة:وين
دلهم:نتمشى
كيفت على الطلعة عفت الجاي رحت للغرفة بدلت الدشاشة لبست الشال و عباتي طلعت منتظرتة
اجة جر شالي على گصتي حجة:المن مطعلتهن تراوينهن
رفعتة دخلت الشعر بالشال رديت:هو يزاگ
دلهم: عدلي ياشعرة اشوفهة طالعة اهلسهة
عبست اضم بالطالع من شعري عدلت العباة طلعت
يمشي كدامي اديه بجيوبة مسافة و التفت وراه مد
ايدة لزم ايدي رجعهة لجيبة دنكت مبتسمة صارت
عيني على الحلقة شكد فرحانة بيهة عجبتني هواي
عصر اصابعي حجة بهمس:كافي تتبوسمين
غنوة:بالغلط
دلهم:مصدگج
غنوة:ما اكدر الة اضحك
رد يخزرني: الزلم تباوع عليج كافي
تحمحمت اعدل روحي مشينة كل ضني ماخذني للمحل بس وكف على الشارع اجر سيارة صعدنة
ماكدرت اسألة وين رايحين خفت لايرجعني لهلي ضليت خايفة و اهز رجلي متوترة لا اكدر أسألة لان كاعد ليكدام بصف السايق
التفتت للجامة لعبانة روحي من ريحة البانزين اذا اصعد بسيارة تگلب معدتي مرت فترة و وكفنة
دفع كروة اجة فتحلي الباب نزلت مستغربة اباوع للمكان جان حدايق و اكو محلات جبيرة ليكدام اكو جام اشوف الداخل كلة هدوم انواع و اشكال
دخلنة سوة اني عيني على الهدوم كلش حلوة اول مرة اطب هيج محلات بس هو جان يتلفتت على كلشي حسيتة يدور بعيونة ما مركز وياي ولا منتبه
دفعني بخفة من جتفي دخلنة لمحل وكفت مستحية اباوع للهدوم حاول وياي اختار كلشي يگلي عليه ارد بكيفك
نزل عيونة ما عاجبة جنة واكفين بنهاية المحل ايدى على جتفي منطين الباب ظهرنة نگلب بالهدوم المعروضة
حجة بهمس يمي : اذا ما اختاريتي اشتري بمزاجي و تتورطين اخذي حجايتي وصيري خوش مرة
غنوة: ماعرف شنو اريد عادي اي شي البس
دلهم:ترة حذرتج
غنوة:لا لا هسة راح اختار
دلهم:سقط حقج اشتري بكيفي مثل ما تگولين
عضيت شفتي متورطة هو يشتري بس اللون يخيرني بي الباقي كلة على ذوقة انواع و اشكال للطلعة
و للبيت خلاني اتندم من شفت القطع لشتراهن
وكفت يم باب المحل گتلة تعبت خل نرجع دفع فلوس خلاني انتظر گالي راح يجيب عصير و يجي
بيدي علاكة وحدة لازمتهة اتلفتت صافنة على الناس و على البنات كل وحدة وية امها لو اهلهة
حسدتهن تمنيت امي موجودة شكد بنفسي اعيش وياهة اشوف شنو حنان الام و شلون راح تحبني
بعدني على صفنتي سمعت صوت حاد لثنين زلم يتعاركون التفتت لجهة الاجة منها الصوت اكو ناس
تجمعت و مبين ثنين تعاركو و اصواتهم عالية
ماكو دقائق و صارت عركة جبيرة و كلهة تتدافع اكو زلم يردون يدخلون بنص تجمع الناس حتى يفاككون
فزيت على ايد دلهم نخلت فوك جتفي حجة بهدوء:يالله امشي
رديت مستغربة:شكو شصاير
دلهم: ثنين تعاركو خلينة نروح
هزيت راسي التفتت ليورة مستغربة الزحمة لصارت
العركة ما تهدئ بيهة ما تكبر كل ما يردون يفكونهم
اشوف ثنبن يتمالخون من الجهة الثانية طلعنة بعد
ماشفت شنو الصار اجر سيارة رجعنة للبيت دخل
عينة بموبايلة مشيت وراه مستغربة سكوتة الطريق
كلة جابة ساكت و الموبايل بيدة حتى ابو التكسي من حجة وياه اتجاهلة مارد عليه بس يأشرلة وين البيت
خلت الاغراض بالهول نزعت شالي و العباة رحت غسلت وجهي شربت ماي عطشانة تذكرت العصير گالي اجيبلج و رجع ايدة فارغة گبل طلعنة مناك
رحت اريد احاجي عتيت السرگي مال الباب مقفول
حتى من حركتة ما رد علية بس اسمع صوتة يخابر
عفتة رحت للغرفة مالتي اشوف الهدوم فرحانة بيهن قستهن كلهن حلوات اول مرة البس هيج
كلشي رجعتة لعلاگتة خليتهن بوحدة من الجرارات
بس اخذت بجامة وردية بيهة رسوم صغيرة وياهة فانيلة بيضة نص ردن شلعت الورقة مالتة گمت
رحت للحمام كل هاي الهوسة بس حتى اجرب الشامبو لشتراه و الليفة سبحت غسلت شعري
لفيتة بالخاولي غسلت هدومي شريتهن طلعت
كعدت بالهول امشط عيني للغرفة بعدهة مسدودة
كملت شعري لفيتة خليت كتر ، طلعت المرطب من ثلاجة خليت لجتفي هم ادية رجعت للغرفة منعسة
تفاجئت بي موجود مطفي التلفزيون و الاضوية بس الحاسبة مخليهة على بطنة متمدد و ايدة ورة راسة
رفع عيونة الي شوية و نزلهن وكفت متوترة سحبت المخدة اريد انام بالگاع خليتهة و خليت الغطة جوة
دلهم: تعاي شوفي هذة الفلم حلو
غنوة:منعسة اريد انام
دلهم:من تنامين انزلج جوة
باوعتلة بشك مقلصة عيوني:تنزلني
دلهم :امم وروح ابوي
عفت الغطة رجعت مخدتي كعدت على حافة الجرباية هي صغيرة ماتكفي نفرين عدل نومتة خلالي مكان بصفة بس ما تحركت ضليت على گعدتي اباوع للشاشة هو يشرحلي قصة الفلم شنو
حجة يوگف الشاشة:تعاي اقري الترجمة
غنوة:ما تريد تضحك علية
دلهم: لا ما اضحك اريدج تتعلمين يالله تعاي حتى تتقوين بالقراءة
غنوة:اذا نضل على قرايتي للصبح ماتخلص الفلم
دلهم:ياهو لگالج اريد اخلصة
باوعتلة مترددة عاوجة شفتي افكر عينة عليهة اشرلي اتقرب يم الشاشة صعدت رجلية تدنيت كعدت بصفة رگبة رجلي طخت بخاصرتة ابتعدت
ضليت مرتبكة مدنگة على الشاشة اتهجة هو يساعد
بس مايريد يقرالي و احفظ بالسمع يريد اني اقرة
حجة بضحكة: يالله عندي حرف اللام اقري الوراه و ندمجهن
غنوة:لام شنو غير هاي "ل" بس لا اكو حرف ثاني يشبهة
دلهم:لا هي نفسها باللفظ نقراهة " ل " عوفي ذاك الاسم ركزيلي على اللفظ و كملي الكلمة
غنوة: هسة انتة عدك "ل" وهاي "ي" بعد
دلهم:ضل الحرف الاخير شنو
رديت اتذكرة:هذة يشبه ذيج الفوگهة نقاط ءء شسمة هذة "س"
دلهم:عفية هسة دمجيهن
مديت اصبعي اتلمس الشاشة احجي ببطئ الفظ كل حرف لوحدة لحد ما حفظتهن رجعت اجمعهن سوة
غنوة:ليس
دلهم:شاطرة اقري الوراه
رديت بضوجة: تعبت خيولن مو عرفت اسمك وين البيت بعد هاي هي
رد يأشر بجدية:اقري جا انتي بس اول هدة وتسكتين يالله لاتخليني اسويلج امتحان
عبست رجعت اقرة كلمة كلمة لحد ما خلصت السطر بس اسم الممثل هو لفظة ماعرفت اقراه
شغل الشاشة تغير الكلام وكفة خلاني اقرة واحد ورة الثاني ما وعيت لحد ما صارت ايدة على خصري
انتبهت لروحي كاعدة بصفة حشك مددة رجلية رافعة باقي جسمي مرتكية بأيدي على المخدة بصف راسة و الايد الثانية اتلمس بالشاشة و اقرة
نزلت عيوني اشوفة مرر ايدة من جوة ايدي لافهة على خصري جفة و اصابعة لامستني يمسح بصبعة
فوك التشيرت بكل هدوء گمت ابالع و ارتبكت
دلهم: كملي اقريهن
غنوة:اريد انام تعبت
دلهم:اقريهة روحي نامي
نزلت عيوني على الشاشة كشيت بوجهي اشوف صاحبتة طالعة لابسة فانيلة تعلاكة بيضة نص من جسمها طالع و بطنهة شعرهة طاير بالهوة اصفر
غنوة:بدلهة ماريد اقرة لتحجي
داهم: شعليج بيهة نص الفلم هذة اقري
غنوة:مااا
دلهم:شگد تعاندين
حجاهة رفع روحة يعدل نومتة ارتفعت ايدة لازمني بيهة ضليت ساكتة ما اقرة هو مايرضى يبدل اللقطة
مدبت ايدي اتذكر هو وين يدوس و يشتغل الفلم وخرت اصبعة و ضغطت اشتغل باوعتلة اضحك رجعت وكفت الشاشة على حضي هم وگفت عليهة
شغلتهة لحد ما وكفت على اللقطة الاريدهة الولد يحجي مو هي تقربت اتهجة المكتوب من اجمع
الكلمة احجيهة الة بصوت عالي حتى يسمع لان سادة الشاشة عليه ضليت اقرة هو مالة اي صوت
كملتهة شغلت الشاشة حجيت اشر عليهة ؛شوف وجهة كلة تجاعيد جنهة جدة شاكرية هم عدهة خطوط مثل ذني بخدودهة
التفت حتى يشوف صار وجهي بوجهة عينة علية سحب الحاسبة منة سداهة نزلهة بالگاع اجيت اروح
لزم ايدي قربتهة لشفتة بوس داخل ايدي بهدوء عيوني عليه مغمض و ايدي مغطية شفتة وايدة فوگهة لازمهة حتى ما اسحبهة رجع بوسني مرة ثانية
فتح عيونة درت وجهي ماخلي عيني بعينة ، ايدة نمدت تمسح على خدي يوخر شعري يخلي ورة أذني يتلمسح رگبتي بصابعة غمضت عيوني خجلانة
زاد خجلي و گلبي صار يدك حيل من حسيت بأنفاسة على رگبتي يبوسني بهدوء لحد ما وصل لشفتي خلة
ايدة على رگبتي نص حاضن بيهة خدي و اصابعة بشعري من ورة احس بلمستة باردة قصص وروايات عراقية كرار صلاح واني مشتعلة نار من المستحة عاصرة ادية على الهدوم لامتهن
حبست انفاسي رفعت ايدي عسى اكدر اوخرة بس رخت طاحت بحضني من خلة شفتة فوك شفتي
يبوسني بهدوء حسيت دموعي بللت رموشي كلشي
جان اكبر من طاقتي ماكدر افسرة ومشاعري متضاربة جسمي كلة يتشنج و احس بي يخمل
ابتعد خلة اصبعة فوك شفتي يمسح عليهة اني كل حركة منة تخطف انفاسي و تزيد من ارتباكي صرت احس بالعرگ و قطراتة على گصتي حيل مستحية
سحبني بحضنة بدون ما افتح عيوني ضليت متشنجة راسي على زندة و ايدة تمسح على جتفي
حجة بهدوء: غناوي أهدي رخي روحج اتنفسي
زفرت انفاسي اعصر بصابعي و سادة عيوني حيل طابگة جفن على جفن عگدت حواجي من مسح
عليهن ضل يهدي بية ساعة ايدة تصير على خدي
ساعة على جتفي لحد ما استرخيت و تنفست عدل
تقرب مخلي راسي بوسط صدرة مغطيني وياه ايدي
تلامس خصرة رافعتهة حتى ما اطخة و ثانية بحضني
نمت افكاري متشتتة كل شوية احضن روحي عن لا المسة يرجع يهديني لو يسولف وياي يشتتني عن افكاري لحد ما غفيت صار صوتة بعيد ماسمعة
كعدت على ضوة الشمس بعيني درت وجهي بضوجة للحايط حسيت بأديه على خصري حاضني
من حركتي هم تحرك تقرب علية جمدت اصحصح
تمنيت ضالة نايمة ولا احس بي يمي هيج مو كره بس خايفة و متقيدة غمضت عيوني قوي اغطي
راسي جبرت روحي انام و أشغل تفكيري بغير شي
ما لگيت غير الريوك ضليت اتخيل ريحة الجاي
ريحة الصمون الحار من اخلي بنصة گيمر و اكلة
تنهدت احجي بهمس:شكد طيبة
سمعتة يسألني:شني الطيبة
غنوة:الصمونة عليهة گيمر
رد يدك على جتفي :نامي نامي ماكو فلوس للريوك
غنوة:صدك
دلهم:امم وروح ابوي
فزيت من مكاني التفت الة متذكرة:گتلي وروح ابوي انزلج جوة اذا غفيتي ليش تگول جذب
دلهم: روح ابوي واني حر بيهة
غنوة:ترة مو حلوة تحلف هيج
ما رد علية غطة راسة سحبني بحضنة دفعتة اريد اگوم حجة بتهديد :بس ترحين الحگج و ابوسج
باوعتلة بضوجة يبتسم بخبث نزلت رجلية وخرت الغطة نزيت من خلة ايدة على ظهري طالع من الفنيلة دفعت ايدة يباوعلي يضحك متونس
ما تراجعت عن كلمتي ولا خفت گمت شامرة البطانية عليه نهض مالحگت حتى اشرد جراني من
شعري عطت لازمة ايدة گمت ابجي سحلني وصلني يمة دفعتة بضوجة زعلانة معش شعري كلة بيدة
دلهم: مادري يوجعج رفعي ايدج خل اشوفة
غنوة:غير شعري شلون ما يوجعني من امعش شعرك هم ما يوجعك
حجيتهة جريت شعرة حيل دفع ايدي متوجع لميت شعري اباوعلة بشماتة هددني بس اروح يندمني
رجعت نمت على هدوء الغرفة طگيتهة نومة للظهر
كعدت گبلة رحت صليت الفاتني رجعت گعدتة
سويت غدة على ماخلص تغدة هو واكف اخذ بكاسة تمن و فوگاه مركة طلع عدة شغل وناسي ماعرف
شنو شغلة هاي الايام لان من يرجع ماشم بي ريحة بانزين يعني مو بالبانزينخانة ويرجع الظهر و يضل لليل هم يطلع و يرجع الفجرتاهت علية شغلتة
اليوم مر كلة لوحدي خابرني مرتين وراهة گطع مارجع تعشيت و ضليت سهرانة منتظرتة لحد
الوحدة سمعت صوت الدراجة طلعت اباوع من شباك گام يخلي المفتاح بالفتحات مال الحايط
شغل ضوة موبايلة يدور ماشوف منة شي لان عاكس
بوجهي طلعة و فتح الباب جنت بالهول ضوة جهازة
الممر فات بدون مايشوفني وكف على المغسلة
مدنك وجهة جواهة اسمعة يكح و يغسل استغربت
شغلت الضوة التفت الي شهگت اركضلة وجهة ينگط منة دم و مختلط دم و ماي و المغسلة متروسة
حجيت بخوف الزم جتفة:شبيك منو ضاربك شصاير
رد برود يدفع ايدي: ماكو شي روحي لغرفتج
غنوة:شلون ماكو شي وجهك كلة دم
نزيت من عاط بعصبية:گتتتلج امشييي منا
سحبت ايدي مصدومة من صوتة و عصبيتة درت وجهي عفتة رحت للغرفة قفلت الباب علية كعدت
امسح دموعي ماريد ابجي لان زمخ علية مو صوجة غطيت راسي متحسفة الليل المر سهرانة منتظرة
ضليت للصبح الغصة مجلبة بية هم خايفة عليه بس ماطلعت لحد التسعة گمت رتبت الغرفة مشيت
للمغسلة جزت نفسي من شفت بيهة دم ضال
بطروفهة غسلت وجهي ما نظفتهة رحت سويت ريوك اكو سطل فافون صغير فرغتة من الماي البي سويت حليب على كد كلاص شربتة و رجعت لمكاني
قفلت الغرفة كعدت على التلفزيون للظهر هم نفس الشي ماشفتة بس ادري بي موجود بالغرفة الثانية
مر اليوم لا غدة ولا عشة ماطالع مرتين باوعتلة نايم
وجهة ازرگ كلة كدمات و لاف شاش على گصتة
ما سألتة مرة ثانية ولا بينت روحي مهتمة بالليل كلش جنت كاعدة اخيط بترواكتة من شفتة طلع
ضميتهة جواي سحبت المخدة عود اخيط بيهة
الابرة طرف خيطها مشكلة بالترواكة و الباقي بالمخدة ضليت بس لازمتهة اباوعلة بطرف عيني
راح لامطبخ فتح الثلاجة طلع الصمون جنت كاعدة كبال الباب ، خلة القوري على النار جاي مال البارحة
حماه و لف جبن بيهة و اكلهة هو واكف غسل اديه
عرفتة يريد طلع گمت للغرفة كملت الفتك الي بترواكة بسرعة گطعت الخيط رجعتة للبكرة
گمت هي بيدي فتحت الباب صار بوجهي جاي للغرفة بعدة توة فك حلگة يسأل عنهة شمرتهة
عليه سديت الباب ضايجة لان راح يعرف بية خيطته
سمعت صوت الدراجة من اشتغلت عرفتة مشة
نص الليل اتصل يطمن مارديت عليه ضل يلح هواي
فتحت خط مخليتة على أذني كلش مقهورة منة
حجة بهدوء: ليش ماتردين
ـ احجي وياج قفلتي البيبان وراي
ـ غناوي .. ردي لا اجي اطيح حظج
ـ اكو ريوك لو اجيب بطريقي من ارجع
سكتت ولا حرف حجيت ضل يسأل و يستفسر طگت روحة سداه شمرت الموبايل فتحت الجرار طلعت
حب كرزات كعدت اتابع بالتلفزيون طالع مسلسل مال باب الحارة من نص الحلقة بديت بي كملتة
ثاني يوم من شفتة يريد يحاجيني زدت بسكوتي الحايط يرد واني ما ارد متعودة اترزل و اسكت هسة شكد ما يحجي اضل ساكتة عندي خلگ طويل
لاغدة و لاعشة حتى البيت ما انظفة اكل على كدي و اروح انام لو اكعد على التلفزيون بس هدومة
اغسلهن لان يطلع لشغل عيب الناس تشوفهن وصخات هم يگولون شمالهة مرتة ما تشوفة هدومة
اخر شي كلش طكت مرارتة مني سكت سوة نفسي منتظر اني احجي و اسبوعين احنة ولا واحد متنازل
كلمة وحدة ما محاجيتة رغم هو مرات يسهة و يسألني من اباوعلة بطرف عيني يتشنج من العصبية
اختنگت من الهدوء و عنادي يزيد من اشوفة حتى مسواك بطل يشتري و ثلاجة فارعة اخر يومين كلشي
مابيهة ينوكل و الصمون من امس ماكو
حتى القارورة مخلصة عفتهة بالباب اجة بالليل دور على ماي مالگة اخذهة ترسهة و اشترة بطريقة شكم شغلة ريوكات و جاب لفات اكل بالهول خلة الباقي
بالثلاجة ، ميتة من جوع حلفت ما اتنازل الة هو يجي يگلي ذني الج تعاي كليهن نمت ايدي على بطني توجعني نار بيهة من كد ما جوعانة ماكدر اغفى لفيت البطانية عليهة غمضت عيوني
الحمدلله رب العالمين رأف بحالي و هداه اجاني حسيت بي من كعد بصفي ايدة فوك جتفي مخليهة
حجة بهدوء:اسف جنت معصب و بالي مشغول طلعت العصبية بيج
هو بس كمل كلمتة نفظت الغطة نزلت من الجرباية باوعلي متفاجئ مدنكة ادور على الكماشة الم شعري مداها الي اخذتهة رفعتة كلة سويتة كور
و خليتهة عيونة علية مستغرب
دلهم:شبيج
رديت واني اطلع:ميتة من الجوع الله عليك
عفتلي وياك
حجيت بس ماسمعتة شگال فتحت ثلاجة همزين عليفلي لفة اجة وراي يهز بيدة كعدت العلاگة كبالي
دلهم: مايطيح شوية من عنادج اذا اكلتي
حجيت اللگمة بحلكي:اني لو انتة ماتتسوك
دلهم:المن متسوك اذا لاغدة ولاعشة
غنوة: خو ماتريد اطبخلك واني زعلانة
مد كلاص الماي الي حجة:شربي لاتغصين
غنوة:اريد بعد روح جيبلي خلي عليهة صاص
دلهم:وكرامتج وين راحت
غنوة:مو اعتذرت
رفع ايدة فوك الثلاجة اخذ المحفظة راح يشتريلي
استغليت هاي الطلعة حتى انظف مدري شلون
متحمل البيت اني اكعد بالغرفة بس حنى ما اشوفة وصخ كلش اضوج احس حتى اني وصخة مامرتاحة
كنست الهول و الغرف رجعت مسحتهن رتبت المطبخ و جلفت المغسلة كل ماتذكر شلون صاح علية هنا اريد ازعل من جديد بس بعد راحت
بهاي الاثناء هو رجع خلة العلاكة على الكاونتر فات للغرفة ، كملت رحت اخذ هدوم لگيتة نايم على
بطنة فوك الجرباية وجهة بالمخدة مخلي فتحت الجرارات اخذت هدومي طلعت للحمام سبحت
بعدهة اكلت حسيت براحة مو طبيعية تمشيت لغرفتة خليت تلث مخدات يم الباب صعدت اتلمس
لحد ما لگيت المفتاح نزلت فتحتة اخذت العطر رشيت منة حتى مايضل بية ريحة اكل لو فلافل
ادور بالجرار طلعت علج اكل و ادنفس اگلب بالصور و الاوراق خطة ما مفهوم ماعرفت اتهجة و اقراه رجعتهن لا يشوفني نوب يعصب و يرجع يزمخ
طلعت قفلت الباب رجعت المفتاح فوك مشيت لغرفتي ضايت مترددة بين افكاري انزل المخدة لو انام بصفة ما دام هو ما گالي تعاي أحسن انام جوة
جريتهة وية الغطة نكت كبال التلفزيون مطفية الضوة و سادة الباب منقصة صوت للاخير اتابع
أفلام كارتون ذولة الولد لعدهم تنانين كبار كلش حلوة شفت حلقتين حفظت وقتهة حتى اتابعها
بعدني على صفنتي هو اجة وكف فوك مني دنك شالني بدون اي كلام لزمتة متفاجئة خلاني على
الجرباية تمدد بصفي رجع لنومتة نفسهة درت
وجهي اكمل الحلقة كل شوية التفت وراي اشوف
حجة هو مغمض: يمتة توبين من طبة الغرفة
غنوة:اخذت عطر
دلهم:ادري ماخذة عطر تارسة روحج متوعدة بالحلم شني مو وكت نوم
غنوة: سبحت وخليت
فتح عيونة تلاگن نظراتنة تقرب اني منطيتة ظهري جنت بس دايرة وجهي عليه دنك خلة وجهة بين راسي و جتفي رجع مغمض عيونة ضل هيج ساكن
بلعت ريگي التفتت احس بشعرة فوك خدي ايدة نمدت تحضن خصري عفت الريمونت بطني مغصتني من صار يبوسني بهدوء بوسات صغيرة
غمضت عيوني احس بنفسي مو غنوة انسى روحي
كل ما يتقرب مني مشاعري تتخربط و حرارة تصير ببطني و خدودي ، تقرب يبوسني بخدي و عيوني
نهض صار نص جسمة فوك مني ايدة على شعري و ثانية مرتكي عليهة عصرت جفوني سوة بوسني بگصتي برقة ، رفع ايدي يخليني اتحسس خدة
كش جسمي من خلة شفتة على رگبتي يبوسني بقسوة زفرت انفاسي و جسمي تشنج كل ما اتفس يصعد صدري و يلامس جسمة خدر احس بكل روحي صار يدب برجلية و گلبي ماكدر اتحرك
عصر خصري رفعني الة ايدة صارت ترسم تفاصيلي
دخلني لدنيا ما جنت ادري بيهة شنو و اجرب مشاعر مختلفة ما حاسة بنفسهة خلاني افقد كل ارادتي
همساتة بأذني حرورة انفاسة على جلدي يبوسني و يحضني اتوتر و ارتبك يرجع بصوتة الهادئ يهديني
صرت ماي من الخجل ما فتحت عيني ولا شفتة
بس مشاعري و كل احاسيسي تتبع حركة اديه علية
ساعة يوكف يسولف وياي لساني يثگل ما ارد بس ارعش من المستحة يريدني افتح رفضت عاصرة جفوني سوة ساعة يغيب بالي بعدين اصحى وياه
حسيتة تمدد بصفي لمني لحضنة ظهري على صدرة
حرورة جلدة تلامس جلدي تخلي قشعريرة تمر بكل جسمي لميت الغطة فوگي عيوني متروسة دموع
رموشي مبلل و منعسة گلبي يرجف كل جسمي مثلة
غمضت عيوني متشنجة من حسيت بوسة على جتفي يوخر بشعري يسرح بي بأصابعة و ايدة
صافنة على الحايط كلـشي بية اختلف مشـاعري
و روحي گلبـي دگاتة صارت غير ضـعت بين اديـه
حجة يمسح على خدي بظهر ايدة:ردي علية غناوي ليش تبجين
عضيت شفتي كاتمة صوتي بدون وعي شهگت نهض
دارني عليه يباوعلي بقلق يمسح دموعي من خدي
دلهم:شبيج عليمن البجي فتحي عينج
هزيت راسي ارفض افتح مسح على خدي يحجي بهمس: گولي لاتخجلين شبيج متوجعة
حسيت نار صارت بوجهي گام يطلع حرارة تمنيت ارجع لبطن امي گوة رديت بهمس:لـ..لا
حجة متوتر: جا شبيج لا تخوفيني رفعي راسج اعتذر ضغطت عليج ماترديني
حجيت البية بصراحة: عيب ماعرف خايفة
دلهم:منين خايفة
غنوة: مادري گلبي مقبوض و يدك حيل
دلهم:ايي
غنوة:اي ماعرف ارجف
ضحك حضني ضميت روحي بصدرة ميتة بدمي من الخجل بوسني براسي يغطيني ايدة فوك شعري
دلهم: كلشي بالبداية غريب لاتخافين هدي روحج
ماكو شي انتي زوجتي هاي سنة الحياة لشرعهة رب العالمين النة
غنوة: جا گلبي ليش هيج يسوي
اخذ ايدي خلاهة على صدرة دنك
حجة ببتسامة: حتى گلبي
دنگت مبوخة من الخجل سكتت ماحجيت شي بعد
اديه ملتفة علية لمساتة هادئة على ظهري كلشي
بالغرفة ساكن بس ضوة التليفزيون يعكس على الحايط غمضت زفرت انفاسي اريح جسمي من ضغط و شد الاعصاب هو كل شوية يبوسني براسي
ماعرف شوكت غفيت بس كعدت الظهر كلش الساعة بتلاثة جنت وحدي بالغرفة خليت راسي
بالمخدة استحي اتذكر لصار لبارحة جسمي كلة يرجف من غرابة المشاعرلتستحلني بلحضتهة
گمت لامة البطانية علية لبست هدومي طلعت برة
مدنكة ما اباوع بالمراية غسلت وجهي اخذت هدومي من محجر الدرج رحت للحمام سديت الباب
شغلت الماي يصب فوك راسي استرخيت جواه
تأخرت يالله طلعت انشف بشعري لفيت الخاولي عليه وكفت اشر بالهدوم على الحبل خليت القرصات فوكهن حتى ما يطيرن من الهوة على
وگفتي شغلت الماطور سحبت الصوندة رشيت الحوش تذكرت هدوم دلهم بالغرفة رحت شلتهن حتى اغسلهن كلهن سوة و اطببهن بالليل جوة
على السريع غسلتهن شريتهن مستغربة وينة ماكو
فتت للمطبخ طلعت بتيتة خليتهة بجدرية تستلك
دورت بثلاجة ماكو لا خبز ولا صمون رحت للغرفة
نظفتهة واخذت الموبايل اتصل عليه مايجاوب
خليتة بيدي رحت قطعت طماطمة لفيتهة بالصمون لضل من اللفة البارحة اكل و كل بالي وياه ما مرتاحة
خاف هم يطلع مثل ذاك اليوم لمن رجع متعارك رفعت الجهاز اتصل مرتين تلاثة كلة يطلع مغلق
تأففت بضوجة افتر بالبيت رايحة رادة وينة ليش ماكو عفت الموبايل على الشحن رحت اطفي الطباخ
سمعت صوتة يتصل التفت اريد اتحرك لحظة كلشي سكن بالبيت حسيت الوقت مر بطيء بسكون تام
غلف الصمت اصوات عالية و سيارات صوت توايرهة هو يحتك بالگاع من توگف التفت لشباك اشوف باب
الحوش نفتح طلاگتين اثر دفرة دخل رجال متلثم
كلة ماطالع منة شي غير عيونة لابس دشادشة سودة
بيدة رشاشة مالحگت استوعب شي لا فهمت منو هو
دخلو وراه ثنين رفعو اديهم تلمست الكاونتر برهبة
جانت الخانة مفتوحة واني واكفة بصفهة وية ما التفتت تكسر الجام و الصون طر أذني صوت الرصاص هو يتطاير بالجو و يطگ بالحياطين و البيت
غمضت عيوني قطرة دم ماضلت بية كلشي بجسمي
صار ينبض بخوف و رعب صرخة فرغت بيها كل احاسيسي عطت بكل صوتي ضامة راسي بين ادية
ماكو غير صدى الرصاص اشتعل الجو بالطلق صوت الزلم ايد على أذني ايد ببطن للكومدية شهگت
برعب من طگت طلقة بالثلاجة تبعنهة ثنين زرقن الباب سكت الصوت بس الرعب الي بداخلي ما راح
گمت رجلية متخرذلة مالحگت امشي خطوة الة الرصاص رجع يدك بالجو جسمي كلة نشل و عقلي
وگفت حسيت بروحي تنسحب مني وجع صار
بجسمي زلگت ايدي من الكاونتر اخر شي حسيتة بس الوجع لطر راسي من طگ بالگاع عيني شابحة
حلگي يبس ماكدر احرك اي شي مني الطلق بس صوتة يتردد بمسامعي انتهيت جسمي كلة نشل
اسمة تردظ ابالي صوتة و وجودة عطرة لبعدة بهدومي وين راح شنو الصار اسألة وحدة ورة ثانية تتولد براسي غاب وعي بدون جواب
شكرا لزيارتكم عالم روايات سكيرهوم
