رواية بنات الحجي السعيد الفصل السابع بقلم شمس العراقية
ليال ـ رفضت الأتصال ونزل الموبايله وباوعلي رجعت قفلته ورجعته بالجنطه ولكيت عمتي نجلاء صافنه خير ان شاء الله بس لا شافته شيخلصني من لسانها مشيت كعدت يم النسوان وأم باهر صافنه عليه وتسولف هي وأمي وجابيين الحلقات وياهم ونسوان أخوانه أثنين ومرت بهاء وأخواته ثلاثه متزوجات
مر وقت كاعدين وجديتي تسولف هي وأم باهر وعماتي وحده تباوع لثانيه وگامن طلعن برى وحسيت صار شي وصاحوا لأمي طلعت وعماتي واكفات يم الباب باوعت لقاء اشرتلها شگو رفعتلي كتوفها ما ادري
أم باهر ـ ام باسل عيني شصاير
هيفاء ـ حجيه هسه أفهم شگو
حليمه ـ وحده منجن تحجي شگو شبيجن .
ليال ـ أمي ما جاوبتهن ما تحملت طلعت برى وأسمع صوت باسل ونائل وليث واصواتهم عاليه
باسل ـ مو على كيفك تنهي الاخت أختي وازوجها لمنو ما يكون محد اله عنده شيء .
نائل ـ لا الظاهر شفت نفسك زايد علينا أمشي اطلع برى والخطبه اتم كلام ثاني ماكو .
سعيد ـ باسل نائل شُنو هالحجي ويه أبن عمكم
ليث ـ لا عمي الظاهر ولدك ضيعوا مالات الأوادم ونسوا أني أبن عمها وهسه أكدر اكبعها واخذها ومحد يفتح حلكه بحرف وياي وجماعة الخير البنيه بنت عمي واني انهي عليها وما تطلع للغريب واني موجود ...
باسل ـ بكيفك تحجي
سعيد ـ باسل نائل أمشوا أطلعوا برى يله
باسل ـ بس حجي
سعيد ـ هاي هي أبن عمها غصباً على خشمومكم يله
ليال ـ خف الصوت وعماتي عوجن حلگهن وأمي باوعتلي ولقاء همست بأذني
لقاء ـ هذا الجنت خايفه منه وحصل انلاصت وعلي .
نجلاء ـ مو گلنا بس محد صدگنا طلعت الأفنديه مطبقه الاثنين باهر وليث عافت ليث راحت على باهر وبعدين اجه ليث سواله مشكله وانكلبت الخطبه مسلسل تركي
لقاء ـ أنتِ شتحجين
نجلاء ـ أحجي الصدك قابل مجذبه أختج ام العلاقات والله گلتها قبل بس محد صدگني سعيد نايم ورجليه بالشمس لعد بس اخطبه زلم وخابصات نفسجن صالون وكوشه وأهل العريس كلهم جايين وجابيين الحلقات أذن منطين الأوك وتسون حفله الا هيج ، وأحنه يا غافلين اخر من يعلم عفيه لكافه ما مصدكات گبل كوشه وصالون بنات أخر وكت ما مربيات .
لقاء ـ والله الا أربيج تربيه على اصولها دتعالي ابرد نار گلبي لسانج شطوله وتطعنين بأمي واخواتي واحنه ساكتين الج لا حبيبي اني كاعدتلجن
ليال ـ جرتها ونامت عليها وتضرب بيها وعماتي يجرن بيها بس هي اخر شيء عضتها من ايدها قوي وطلعوا باسل ونائل وباسل ركض دفعهن لان يضربن بيها واحنه نفازع نريد نخلص لقاء منهن بس عمتي انسام وبلقيس وتماضر وجواهر نامن عليها وكلما نحاول نسحب لقاء نحصل ضربه اجه باسل ودفع عمتي انسام بقوه الا انضربت بالحايط
باسل ـ ولج عوفيها راح تموت
نجلاء ـ لحگولي راح تموتني لحگولي موتتني العرمه
نائل ـ فضاحه وعلي ، عمه أنتِ صغيره مخليه عقلج وياهن لو مزوجه أبنج وبناتج جان أنتِ هسه جده شُنو هالخبال صغار أنتن تردن تفضحنا بين الاوادم .
ليال ـ نائل سحب عمتي نجلاء على صفحه وتماضر بس شافت نائل ابتعدت، وباسل سحب لقاء والدم بلحكها مسحته بطارف أيدها وباوعت الهن كلهن واشرت بأيدها عليهن بتهديد .
لقاء ـ شوفن هاي كدام أخواني التجيب طاري أمي او وحده من اخواتي ادفرها دفره گبل لمكبرة وادي السلام خاف هسه شلعت لحمها مره ثانيه اذبحج من الوريد للوريد
باسل ـ سكتي غضب على رأسج سكتي
انسام ـ واكفين وساكتين وهالساقطه تضرب عمتكم وأنتَ نائل واكف وما تحركت واحنه شايفينك خوش زلمه مو هذا هذاك الخيخه ابو المطلقات واخواته الساقطات أمهات الزلم عفيه عليج هيفاء خوش مربيه بناتج
باسل ـ هييي حدج لهنا أمي خط أحمر خليني محترمج لا أحل عليجن لقاء اخليها تخلص عليجن گافي هواي سكتلتجن لأن عماتي من عمى العماجن .
نائل ـ هاي عليمن هالحجي شو أنتن كلما تكبرن ترجعن ليورا مثل بول البعير ، وعليمن ادافع واحجي انتن مخليات عقلجن وياهن واليدك الباب يلكي الجواب يله كلمن تحشم روحها ولطلطه وسوالف الطايح حظها ما اريد يا تحشمن نفسجن وتكعدن بدون مشاكل يا الباب يفوت بعير بحاله ، باسل أمشي وأنتن اذا سمعت الجن صوت اركعجن راس برأس .
ليال ـ وجه كلامه النا وسحب باسل ومشه وأمي سحبت لقاء وأبدا ما حجت ولا شاركت بس مع ذلك ما خلصانه منهن مشينا وجواهر تباوع لـ نائل بحقد ما عجبها كلامه لان دافع النا وسحب باسل ومشه وطلعت جديتي باوعت على عمتي نجلاء لازمه ايدها والدم طالع وكفشتها منثوره ولقاء تمسح الدم بالكلكنس وتتفل ونفسها لعبانه ،وجديتي تقدمت وضربت عمتي بالعوجيه قوي وباوعت الهن
حليمه ـ أخذي أختج وأمشي وخلقتجن ما أريد اشوفها ما وراجن بس المشاكل فضحتنا صوتجن واصل لعندي والمره هي وبناتها وجناينها كاعدات الله ياخذجن يله أمشن جواهر هيفاء امشن كعدن يم المره وأنتن هم امشن كدامي .
ليال ـ دخلنا كعدنا يمهن وام باهر تباوعلي ومبتسمه مبين عليها حيل فرحانه وشويه وأجه نائل اشرله لامه وأمي وكامن طلعن ودخلت جواهر وكالت .
جواهر ـ عمه دزوا عليهن واكفين بالباب ينتظرون
ام باهر ـ ليش شصار
جواهر ـ والله حجيه ما فهمت بس كالوا صيحي النسوان
ليال ـ گامن خطيه ويتحاجن بيهن وباوعلي وطلعن وجديتي وراهن تريد تفهم شگو تقربت يم امي ماما ما فهمتي شگو
هيفاء ـ أبن عمج ليث خربها عليج هاي عود بلغناهم وما عدهم عارض واجو وحضروا اثاري ليث أفندي ضامها النا شافها صارت صدك وراح تروحين من عنده وخربهـا
ليال ـ ضليت بصف أمي ما مستغربه حقارته ودخلوا كلهم جدي وأبويه وعمامي وولدهم كلهم ونائل وباسل واخر شي ليث دخل وباوعلي بنظرات أنتصار!
حليمه ـ شصار أحجولي ليش راحوا
عبد الغني ـ أبن أبنج يريدها ونهى عليها والجماعه سحبوا نفسهم وراحوا .
حليمه ـ ياهو منهم
عبد الغني ـ الواكف الكدامج!
حليمه ـ شو هسه يله تحجي وتنهي عليها وين جنت من حاجيناك اني وجدك وگلت مـا أريدها لو شفتها صارت صدك ولحمك عزيز يطلع الغريب مو عيب من الناس اجو متحضرين حتى حلقات جابوا لان عمك انطاهم الموافقه وما انطاهم الا تأكد منكم كلكم ليش من وصلت السالفه لصدك وفشلتوا كدام العالم
رشيد ـ وشصار عليهم ترى ولد عمها أولى بيها وأني هم ردتها لـ أبني زياد وحفيدج باسل يكولي والله عمي أعذرني ما انطيها لزياد ليش يابه شبي ابني لو بنات سعيد على راسهن ريشه .
حليمه ـ أنت أسكت الحجي مو يمك لاتتدخل خلك بمكانك وأنت جده احاجيك وين جنت هسه يله تنهي
ليث ـ بنت عمي وأريدها وين الغلط بالموضوع وإذا مقهورين على تعبكم وكشختكم والتجهيزات عادي هسه أعقد عليها .
باسل ـ شنو عادي شو بكيفك تحجي وعبالك سهله ترى أختي مو لعبه عندك بس خباثه منك ردت تفشلني وياه وهسه الولد وكف يعاتبني ومقهور لان متحضرين وجايب كل أهله ورئيس الجامعه والعمادة والأستاذه وتالي يطلع منا مطرود وفشلان من الكل والله أبن عمها نهى عليها العفو منك وين جنت نايم هسه تذكرت بنت عمك ما تطلع للغريب .
سليم ـ باسل ترة أبن عمها وغصباً عليك وعليها ينهى ويأخذها ومحد يفتح حلكه بحرف زين لو لا والله خوش وكت ابن العم صار موخوش وتهوبز وتطبل للغريب شنو هالحجي هذا .
ليث ـ هذا هو عمي مختصر الكلام ليال أني أريدها وما تصير لغيري لا باهر ولا لغير باهر هاي هي سدوا الموضوع .
باسل ـ يا حبيبي .
حليمه ـ قبل لاتحجون وقبل لاتنفش ريشك علينا أطبك على صفحه وليال جده تعالي يمي
ليال ـ باوعت لأمي أشرتلي اروح تقدمت مستحيه ومقهوره ونار بصدري وموقفي صعب أبويه ساكت وما يشارك وباسل دمه محترك وليث بكيفه يقرر ، ها جده
حليمه ـ جده أبن عمج نهى عليج ومنع الخطبه ويريدج اله موافقه عليه لـو لا .
ليال ـ رفعت رأسي وباوعتله لا جده ما موافقه وحتى لو نهى عليه مو معناها أوافق عليه ، كلت كلامي ومشيت بصف أمي وأخواتي .
باسل ـ وأحنه هم ما نوافق على زواج بشروط لأن الأفندي أستاذ ليث يريد أختي بشروط خلاها ولازم تنفذها أولها تترك دراستها وجامعتها وممنوع عليها الطلعات والصديقات لان يريدها أم بيت وحتى لو كملت جامعتها ما يقبلها تتوظف يعني تتخلى عن تعبها واحلامها علموده وهي رفضته ورجع يلح وخرب قسمتها ونهى عليها والله أبن عمها ، أبن عمها على عيني وفوك راسي بس يقدر لان منطي أختي مو منطي لعبه يتحكم بيها واذا هو يرضى هالشيء على أخواته اني ما ارضاه ولا أوافق على هيج زواج بداية شروط نهايته شُــنو!!
ليال ـ الكل سگت وليث باوعلي ورجع باوع لأبويه
ليث ـ ها عمي شو ساكت عاجبك
سعيد ـ لا ما عاجبني وأنت وصلتنا لهل الحال أني بنتي تعبت بدراستها واني تعبت ووصلتها وبالاخير تريد منها تعوف گلشي علمودك ، ليش أبني شگالوك علينا ،لو ما عندك ثقه بنتي وهيج أنتَ عقلك مو نظيف روح دورلك ربة بيت وعوف بنتي تمشي بقسمتها .
ليال ـ باوعلي وصديت وجهي عنه ورجع نزل رأسه ورص قوي على سبحته بأيده ورجع گال
ليث ـ دام هيج صار الحجي هاي هي وأني بعد ما أريدها ولو تضل أخر مره بالعالم ما أباوع بخلقتها واخذ أغاتها اللي تفضل الغريب على أبن عمها خلي يفيدها
ما أريدها بعد وانطوها لـ باهر خل تمشي بقسمتها ومع الأسف والله خبيتوا ظني بيكم .
ليال ـ گال كلامه ونظراته كأنما أخر مره يباوعلي بيها وبعدها مشه وراه عمي كريم وأخوانه وعمي رشيد هم طلع وضل بس أبويه وأخواني .
نائل ـ حجي ننطيها لـ باهر بلغهم بموافقتنا
سعيد ـ لا أبني شنو جاي نلعب روح تعال سدوا الموضوع كافي ، هيفاء أخذي البنات وروحي البيت .
باسل ـ ماشي يله أمشن ويمه أتصلي على البنيه تجي تشيل الكوشه .
هيفاء ـ ماشي هسه أخابرها يله ماما امشن .
ليال ـ طلعنا بالحوش والأصوات عاليه جايه من بيت عمي كريم .
كريم ـ كله منك الصوج بيك مو بعمامك شنو هالشروط المخليها على بنت عمك ولك
ليث ـ يابه شروط مو شروط على أساس هما هسه ماكو هيج قدروني والست الحسن ليال تفضل الغريب على أن عمها بس ماشي خل يفيدهم الدكتور باهر .
كريم ـ تستاهل لعد شتريد منهم يسكتون ويگولون هاي هي موافقين وأبن عمها وأولى بيها وبعدين شو هسه يله تنهي ليش من حجينا وياك أني وامك وأخوك گلت ما أريدها خل تمشي بقسمتها ليش قلبت وبنص الكعده أنكلبت علينا خنزير ، شوف ولك اني ما مستعد اخارب أخويه ولد أخويه من وراك ودامك ما تريدها هاي هي گلشي يرجع مثل الأول وتحاجي عمك وتعتذر منه وبنتك عمك تشيلها من رأسك وخلها تمشي بقسمتها
ليث ـ لا ما أريدهـــــا بعد لو يصبونها بالذهب صب ما تصيرلي مره جزت نفسي منها وصارت حالها حال أختي ياقوت وموضوعها انقفل وإنسد من يمي نهائي ..
ليال ـ لزمت أمي يمه خل نمشي فدوه
هيفاء ـ خل يجي أخوج .
لقاء ـ يمه خل نمشي شگو علينا ما تشوفينها شلون تعبت راح توكع من طولها وباسل تلكينه يحجي هو وابويه وجدي ساعه ما يجينا .
هيفاء ـ ماشي امشن .
ليال ـ طلعنا بعدنا باب الحوش وأسمع صوت عمتي سلوى
سلوى ـ يمه ليث يمه فدوه لعينك وين رايح
ليث ـ رايح لجنهم تأخذني وتخلصني .
ليال ـ فتح الباب بقوه وصار بوجهنا عيونه دم صفن بوجهي ، صديت عنه ومشينا وهو صعدت بسيارته وعبر من يمنا وصلنا بيتنا وكبل دخلت غرقتي مقهوره قهر بس الله يعلم بي ...
__________________
عصماء ـ أمي من كلامها واضح تعرف شيء باوعت
لـ بيداء وبعدها طلعت أمي بيداء أمي شتقصد أنتِ حاجيه الها شيء .
بيداء ـ لا ليش أني أعرف علمود أحجي ، صُدك الدوله منين .
ـ بيداء
ـ شبيج نسأل عليه أي عاد حليوه لا شنو يشتغل شگد عمره حبابه أحجيلي عنا مو اني أختج وماكو أسرار بين أخوات شدعوه تضمين عني سوالف الحب وأمور الدوله
ـ حجيت ألها وهي مبتسمه
ـ الله الله حبگم شكد حلو عفيه أبقوا هيج
ـ هو احنه هيج ليش شنصير مثلاً!
ـ ها لا هيج ، أي يعني ينتظر أخلص أمتحانات ويجي يتقدملج
ـ اي أن شاء الله بس شدي حيلج ولاتفكرين بينا المهم أنتِ بيضي وجه أمي ولاتضيعين الها تعب ترة أمي خطيه والله .
ـ لا أن شاء الله يله روحي شوفي أمي وراكم روحه لبغداد وأفهمي منها شتقصد بكلامها يجوز بس شأكه بيج ما متأكده وأنتِو حبكم نظيف وحلو الله يجمعكم
ـ أن شاء الله ، لحگت أمي وصاحت بيه
ـ شوكت تتحضرين نريد نولي
ـ اي هسه بس عبالي أحجي وياج
ـ بعدين مو وگته يله روحي بدلي
ـ دخلت بدلت ولبست عبايتي وشلت جنطتي وطلعت لكيت أبويه جاي وكاعد بالطرمه وشافني وصاح بيه
أسكندر ـ وين موليه رجعي ماكو روحه
عصماء ـ رجعت المطبخ وأجتي أمي من يم الدجاجات وابويه گال إلها
أسكندر ـ ماكو روحه
غنيه ـ ليش ماكو روحه
ـ شهله بطلت ما تروح لاهلها أبراهيم عنده شغل غير وكت يوديها
ـ أي ميخالف أروح أني وبنتي
ـ أنتِ وبنتج ولوحدجن
ـ أي شنو الجديد شو صارلنا عمر اني بنتي نروح لوحدنا شو هسه تذكرت لوحدنا
ـ غنيه صوتج ما يعلى وكلمتي ما تنكسر كلت ماكو روحه يعني ماكو روحه لغوه زايده ما اريد گافي انكبري من وجهي .
ـ لا شو الا اروح ترضى ما ترضى
ـ غنيه اكسري الشر ولي من وجهي
ـ حسبي الله عليك من رجال شلعت گلبي من يوم أخذتك هسه لو باقي سجاد جان صبرت على مرك وتحملتك وتحملت هالعيشه الزقنبوت الوياك بس شسوي كاسرات ظهري هالبنات أدرسهن وازوجهن واكعد يمهن وانت أبقى بهذا البيت لان لا غنيه ولا بناتها دايمات الك .
أمشي غيري هدومج ما نولي .
عصماء ـ دخلت غيرت ملابسي وضليت بالغرفه ما طلعت وشويه وصاحت عليه
غنيه ـ أمشي فتحي المحل
ـ أبويه ما موجود اخاف ما يقبل
ـ عساه لا يقبل بكيفه ما يقبل لعد بيش نعيش على الفلاحه مالته كرة عيني عليها معيشني بالقصر الجمهوري هو بيت وخرابه امشي لا احطج أنتِ وابوج وافرغ قهر سجاد بيكم وادج روحي بسجين والحكه لا الله خله على راسي واسند گلبي بي أجتك المنيه يا يمه وخذتك وخليتني معلعله وراك .
ـ كعدت باب المطبخ تبجي وابويه لف شماخه وطلع
ـ شال رأسه ابو الفاتيل سواله مشكله بس لان سمع غنيه تسوي ذهب عباله اتطنطش واتكشخ بي بين النسوان ما يدري اشتري بيهن كسرة ذهب للوگت وراي بنته فاكه حلگها عليه بالدورات والدورس الخصوصي عاد كون يطلع براسها خير ما تضيعلي تعب عاد شتطلع حظي واعرفه مثل جعب الجدر اهمداني اي والله .
ـ عفتها كاعده وتحجي من ضيم گلبها فتحت المحل وأشتغلت الحمدلله وأتصل باوعت ماكو أحد جاوبته بصوت ناصي الو
علي نجم ـ وينج حبيبتي مختفيه عليه ضل بالي يمج
عصماء ـ موجوده بعدين احجي وياك حبيبي .
علي نجم ـ اليوم حبيبي فدوه أروحلج يله منتظرج
غنيه ـ عصماء ولج عصماء ووجع وين نمتي
عصماء ـ أجيت يمه يله باي أمي تصيحيني قطعت الاتصال وضميت الموبايل بصدري ها يمه لكيتها كاعده وتباوعلي .
غنيه ـ منو هذا تحاجينه ولج
عصماء ـ محد تقربت ضربتني كف شالت خدي ضليت مصدومه ودمعتي بطارف عيني ليش يمه .
ـ تردين تعرفين ليش أني أگولج ليش ولج معصومه وأني مأمنه بيج وأكول بنتي عاقله وما تخربط بعمرها وسانده گلبي عليج ومسلمتج البيت والعيال والمحل ليش تخونين ثقتي بيج ليش ولج يمه .
ـ نزلت دمعتي بس
ـ بدون بس سمعتج تحجين وياه بس أنتظرج تخلصين لان ما ردت أفشلج كدامه هذا الجزه ولج معصومه
ـ كعدت يم رجليها والله يمه مو بيدي گلبي هو خربطني ما أعرف شلون صار هيج، أبوس أيدج لاتزعلين مني وشتردين أني حاضره وهسه أعوفه بس لاتبجين ويشيل خاطرج عليه أني كلشي ولا زعلج ودمعتج تنزل بسببي .
ـ منين الولد
ـ نزلت رأسي أنتِ تعرفينه
ـ أبو نجم
ـ أي هو
ـ شگد صارلكم
ـ كم شهر بس والله ما خنت ثقتج بيه وهو يريد يجي يتقدملي بس اني گتله مو هسه الأ أختي تخلص أمتحانات أساساً أني ما أريد نحجي بالموبايل ودام نيته زواج ويتقدم .
ـ لاتحجين وياه وحكمي على گلبج وصبري لما تخلص أمتحانات وگوليله خل يدك الباب ما عدنا بنات يحجن على الموبايلات وما ناقصه وجع رأس كافي عليه أبوج وقهر أخوج يدك بگلبي لاتزيدينها عليه عصماء .
ـ أن شاء الله يمه اللي تريدينه يصير
ـ ولج عصماء يمه لاتكسريني ترة أمج واكفه على شعره وما ضل عندي حيل ولسان ادافعلجن نفس أول أريد اسلي همجن وازوججن وأرتاح واطلع من خطيتجن
ـ حضنتها وكامت تبجي بحضني وبجيت وياها مسحت دموعها مستحيل بيوم أكسرج يمه تروحلج فدوه وعشيرتها ولاتنزلج دمعه بسسببي .
ـ الله يرضى عليج بنيتي ويوفقج ويستر عليح ويه التحبينه وگلبج معلك بهواه ، لا عبالج ما اعرف الحب أني الأعرفه بس ما ضل بگلب حب نفس الأول أني وأبوج حبينا بعض بس طلع الحب نفس الراسمينه بعقولنا فارس وخيال وسوالف حب وغزل وأحبك وتحبني طلع الحب وهم وصوره جذبيه أنضحك بيها على عقلي جنت مثلج الدنيا اليه وطايره بيها وأحب وأنحب ومر بيه العمر وشفت هموم وعازه وقهر وتحملت بمسؤوليه أكبر من عمري وگتها گلت أنعل الحب وساعته الخلاني عايشه طول عمري مهمومه وأطحن بگلبي قهر سنين فاتت من عمري ضحكت بيها على نفسي بإسم الحب
ـ تحجي وتبجي ومسحت دموعها ورفعت رأسها صارت عينها على صورة سجاد هذاك الشاب الحلو رجعت باوعتلي وباوعت لـ بيداء كاعده باب الغرفه بأيدها كتابها
ـ الله يقدرني أوصلجن وأسعدجن ، يله يمه گومي على محلج وأنتبهي على نفسج وأسمعي كلمة أمج .
ـ أن شاء الله يمه ، گمت من يمها وكعدت بالمحل أجني نسواوين يشترن واني بالي مو يمهن بالي يم أمي وأختي اذا تزوجت أمي شلون تكدر تدبر العيشه وهي گلبها خلصان من القهر
ـ ولج معصومه خاله صار ساعه أحاجيج هذا دهن الشعر بيش شكد فلوسه
ـ ها خاله هذا الأصلي بعشره
ـ شدعوه خاله متشوفينه شكد صغير بيعي اليه على ثمانيه فدواتج
ـ والله خاله هو الأصلي وربحي بي قليل أعذريني
ـ يله اخذه وسجلي بالدين .
ً ـ رأس الشهر تنطيني مو
ً ـ أي أنطيج بس نص ها لان هم مطلوبه
ـ أنتِ تفكينهم كلهم وأني بالاخير
ـ أنت تصبرين علينا وشعدنا غيرج يا معصومه
ـ أي اصبغي أصبغي مشيتهن بيهن انطني بيهن دين المغرب جاي أعزل وأتصل ورفضته ورجع أتصل جاوبته شلون تتصل گبل
علي نجم ـ أشتاقيتلج والله وينج طولتي عليه
ـ عندي شغل ما أكدر بعدين أحجي وياك وأفهمك
ـ كاعد أني وأمي وحبوبتي وأحجيلهن عليج تصوري حبوج بدون لايشوفج يعني حبوج على حبي الج
ـ فدوه سلملي عليهن يله لازم اروح
ـ عصماء
ـ ها عيونها
ـ أحبج هايم بيج أنه
ـ يبعد الأنه واني هم يله باي
ـ لاتطولين عليه
ـ ماشي قطعت الأتصال وكملت تعزيل وطلعت بس أمي كاعده تسوي العشه يمه بيداء وين
ـ راحت على صديقتها تجيب منها ملازم وتجي
ـ شو هسه تذكرت اذا هسه أجه ابويه وسأل عنها
ـ راحت على صديقتها أني احاجي دخلي عزلي الغرفه خااست من ورة أختج تاكل وتعوف وراها والفراش نفظي وغيري الوجوه وغسليهن شوكت يخلص هالسادس صار ويه عمارنا .
ـ ماشي دخلت نظفت وأباوع الساعه تأخرت وأمي عينها على الباب وين وليتي .
ـ أذا ما اجتي أكوم اللبس عباتي وأشوفها ليش تأخرت
ـ أي دخلت وأتصلت عليها مغلق ليا حيوانه أشويه ودخلت علينا وين جنتي
غنيه ـ لكيتي الملازم لو أشتريلج
بيداء ـ لا يمه لگيت ما يحتاج تشتريلي مشكوره .
غنيه ـ يمه كعدي درسي لما أشوف عمتج شهله
عصماء ـ أمي طلعت وصحت بيها أحاجيج وين جنتي
ـ يم صديقتي
ـ ياهي منهن
ـ أهو أكعد احجيلي عوفيني عندي دراسه
ـ لزمتها من شعرها وين جنتي احجيلي أشتميت بيها ريحه دخان شُــنو هاي يمصخمه!!
ـ شُنو
ـ ما تعرفين شنو سحبتها من شعرها أخذج هسه لأمي
لو تحجيلي شُنو ريحة الجكاير بيج تشربين جكاير مو
ـ لا والله ما أشرب شبيج مخبله أشرب جگاير
ـ لعد شنو هالريحه البيج لا احسن شيءأخذج لأمي وهي تعرف شغلها وياج لان واضح عليج تشربين جكاير
ـ لا دخيلج عصماء الله يستر عليج ستري عليه .
ـ أحجيلي يله كعدت تحجيلي بصوت ناصي وضربتها راشدي وجريتها من شعرها دازينج تدرسين لو تتمعشكين يا دماغ زز ، شجاي تخربطين بعمرج .
ـ والله ما سوالي شيء
ـ أحجيلي يمصخمه مسويلج شيء المغضوب
ـ لا والله وروح الأبويه ما لمسني بس حضني
ـ بس حضنج مو
ـ أي و
ـ وجعوا التنام بگلبج وتخلصني منج
ـ وأني أحبه والله أحبه وأنتِ تحبين وتعرفين الحب
ـ وأحد گالج الحب بهاي الخرابيط الحب حلقه زواج مو لعبان نفس وطيحان حظ يا عار والله من يومج أنتِ عار واني عار من تركت دراستي والله معدلي موشي وتأملت خير بيج وكعدت اشتغل وأتعب علمود اوصلج لان أمي ما بيها توصلنا اثنينا وبالأخير بشنو تجازيننا بهاي سوالفج يا خزي .
ـ التوبه والله التوبه هاي أخر مره
ـ أي طبعاً أخر مره لا عوزج تعيدينها شوفي ولج عينج بكتابج والعار التحبينه تركعينه وتركعين گلبج بميه نعال على هالسقوطيه هاي المسوينها لا واضح هواي يحبج تف على خلقتج الزفره ، يله رجعي درسي خا تخلص أمتحانان على خير حتى بالقرية ما نضل وين ما تطلع جامعتج نلحكج فاهمه
ـ فاهمه والله فاهمه بس أمانه لاتكولين لأمي والله ما أعيدها بس ستري عليه وعيونج التوبه التوبه أصلاً اني هم تندمت .
ـ شوفي ولج سكط عيني عليج لما تخلص أمتحاناتج وگتها يصير خير فاهمه
ـ اي فهمت والله
ـ يله أمشي كملي دراستج لا بارك الله بيح من بنيه وكومي سبحي لان ريحة جكاير بكل ملابسج عـار
ًـ لأتكولين عليه عــار أني مو عـــار
ـ لا عَـار لعد تحضن برجال غريب شُنو شريفه شيء أكيد عــار وتضلين بهذا صخامج وحبج تجيبين النا العـًار وتسودين وجهونا يا عـــار .
ـ گتلج لأتكولين عــار
ـ امشي غيري ملابسج باوعتلي بحقد وكامت تبجي
ـ أي ماشيه بس سكتي .
ـ وجعي التوجعج يابه اذا رجعتي تحجين وياه الا أموتج هو هذا المطيح حظج أدري بي عبالج ما أعرفه مالك الساقط ولج هذا من يومه ساقط ركض وراه لما شبع طن نعل على حلكه السرسري ما حبيتي الا هو من أمداج وأمده حبج وياج .
ـ عصماء گافي عاد
ـ لا والله ويحقلج دمشي أدرسي لا أسحلج من شعرج گبل لأمي ما يحتاج أگولج شيصير بيج بعد .
ـ لا دخليج عصماء فدوه لگلبج والله وعدتج وما أخلف بوعدي خلص هاي هي أعوفه وبعد أبداً ما أحجي وياه
ـ ماشي يصير خير ، راحت سبحت وكعدت تقرأ وتبجي وتذكرته النذل الله ياخذك لا منا وهيج خل أمي تروح وياها لو أني هذا مو راحه خاف يسويلنا سالفه يصخم وجهونا بيها عزه العزاج بيداء على الصركاهه الجبيتها النا ...
مرت فترة واني كظيتها كله شغل بالبيت وبالمحل والأمتحانات بلشت ودايخه بإختي ما جاي تعجبني تصرفاتها وخايفه من مالك وأريد احجي لأمي وخايفه عليها لايصيرلها شيء هي بدون شيماء أربع وعشرين ساعه مخليه جکارتها وتدخن وتطحن قهر وشايله همنا لا ما يصير شيء أن شاء الله ..
كاعده أشنك بالعجين وأمي راحت تعاون أبويه بالفلاحه وبيداء بالامتحان وبالي يمها ، شلت الطبك وطلعت برى أخبز على التنور الطين لبست ثلام وتلثمت زين ورشيت ماي على الجمر هفتت النار وبلشت أخبز وخبزت شجار وضل شجار الثاني كعدت اخذ نفس وشنكت الصينيه الثانيه وبلشت اخبز وشفت بيداء نزلت من السياره واجتي عليه هاا بشري جاوبتي .
بيداء ـ أي الحمدلله الاسئله زينه
عصماء ـ وگفت يم راسي ونشوف الاجابات سوى جاوبج غلط غير تركزين على السؤال بالج وين يالثوله
بيداء ـ والله صح شبيج شوفي
عصماء ـ غلط ركزي زين لو بالج يم مالك.
ـ أهوو ما نخلص احنه ، كملتي لو أعاونج .
ـ شتعرفين بس شيلي الخبز هسه أجي راحت وكملن ولحكتها ذبيت الثلام وغسلت وبلشت بالغده وگملت الغده تبسي بذنجان وتمن عنبر ونظفت خضروات رشاد وريحان وسويت دولكه لبن وشلت انجانه غسلتها بيداء فايته اسبح اذا اجو صبي الهم الغده .
بيداء ـ ماشي
عصماء ـ سبحت وطلعت لكيتهم جايين كعدنا تغدينا وللعصر نمتلي ساعه كعدت فتحت المحل وبيداء طلعت وين موليه .
بيداء ـ يم رفل ندرس
ـ لاتطولين رجعي من وگت، وترى اسأل رفل
ـ سأليها ترة بيتها قريب تعالي وياي اذا متصدگيني
ـ لا مصدكتج روحي درسي راحت وأبويه هم شغل مكينته وطلع وأمي طلعت ها يمه طالعه
غنيه ـ افضي خلكي يم ام سعد
عصماء ـ ماشي راحت وفتحت موبايلي وأتصلت عليه رفضني وهو أتصل الو
علي ـ ها يابه شلونج يبعد هلي كلهم والله
عصماء ـ الحمدلله زينه وأنتَ .
ـ بخير دام أسمع هالصوت شريد من ربي بعد
ـ خجلتني هيج تحب صوتي
ـ أي بعلي ولو يتخزن بعقلي جان خزنته ولج أحبنج
ـ لا عاد مو لهل الدرجه
ـ لا والله وأكثر سامعه صوتج شكثر الحلو وتطرب الروح على صوتج حتى من تحجين بثكل وحياء ، گلشي بيج عابر الزمان يله هانت ما ضل شيء كل أيام وأجي
ـ وين تجي ليش تريد لديالى
ـ أي بس ما أجي هيج أجي وأجيب أهلي وكل عشيرتي شرط اسد شارع قريتكم علمود أبوج بسرعه ينطيح ما يعل گلبي عليج
ـ صفنت وجريت حسره ما أدري علي أخاف يرفض
ـ مو بس أنتِ خايفه اني هم خايف وحبوبتي ما طمنتني
ـ شگالت
ـ گالتلي تاليتك ترجع وگلبك مكسور الله لا يگولها
ـ لا أسم الله ، أمي وياي وأن شاء الله يوافق لاتفكر واشيل هم.
ـ شلون ما أشيل هم وبالي بس يمج وأني أشوف كلشي بركبتج ومتعوبه بحياتح ، عهد عليه بس تجين يمي أشيلج على كفوف الراحه والعباس ابو فاضل بس أشري ليبك گلبي بين أيديج أمري وتدللي على علي نجم .
ـ تسلم عيني متقصر الله كريم ضلينا نحجي واجن النسوان والخط ضل مفتوح بس بجيبي وكملن وفتحته لحد الان موجود
ـ أي ما أعوفج گملتي شغلج
ـ أي بعد ساعه وأعزل
ـ تعبانه حبيبتي
ـ لا عادي متعوده
ـ سباعيه حبيبتي .
ـ أي يله لازم أروح اترخص منك
ـ ديري بالج على نفسج
ـ أن شاء الله
ـ أحبج
ـ وأني هم باي رجعت رتبت المحل صارت وقت التعزيله وبيداء ما بينت وحطيت أيدي على گلبي وخفت عليها جريت عبايتي وطلعت رحت على رفل وانصدمت من گالتلي
رفل ـ ما أجتنا ليش وين رايحه
عصماء ـ لا يمكن توهمت يمكن گالتلي تروح على ثريا بنت ام سعد تجيبلي فلوس الدين يله عيني مشيت وأيدي على گلبي وأباوع الشارع وعيوني أدورها وين رحتي يمصخمه والله گلبي جان خايف منج وما مرتاحه
رجعت وانضربت بالطوبه براسي جهال جاي يلعبون وصارت امي بوجهي
غنيه ـ وين جنتي شمطلعج من البيت
عصماء ـ طلعت أدور على بيداء
ـ ليش وينها
ـ كالت رايحه تدرس يم رفل و
ـ و شنو وين أختج
ـ ما أدري يمه رحت لرفل گالت ما أجتني .
ـ أمشي بالبيت أمشي يصخام الوجه وين ولت البنيه
ـ دخلت البيت وأمي راحت ضليت أفتر وحاطة أيدي على گلبي لا يجي أبويه وأنفتح الحمدلله أمي وتجر بيداء سحبتها من شعرها دخلتها الغرفه وتضرب بيها .
بيداء ـ يمه فدواتج بس خل أحجيلج بس أنطيني مجال
غنيه ـ شتحجيلي ولج وأنتَ توج نازله من سيارة ابو الخط وين جنتي شمطلعج من القريه مو عود رايحه تدرسين وين جنتي مگبوره ليش تردين تكسرين عيني وتفضحيني بالقريه بين خلك الله .
ـ شفضح منكم ليش وين موليه قابل ترى رايحه لأستاذ يشرحلي الماده لان عقلي قفل وابو الخط وصلني ورجعني .
ـ وصلج ورجعج لوحدج ماكو ولا طالبه وياج بطرك روحج يمعزايه شتكول العالم بنت أسكندر وحيدها تفتر بسيارة ابو الخط ولج العالم ما ترحم بس يردون جسم مكشف يضحكون عليه .
عصماء ـ ضربتها وجرتها من شعرها دخلتها الغرفه
غنيه ـ شوفي ولج تنكبرين وعينج بكتابج لا والله أحرمج من طلعة البيت وما أخليج تكملين السادس أويلي نص عمري راح جوه الكاع من المستحى وأني اشوف السكط أختج وحدها بالسياره تريد تجلطني بنت أسكندر تريد تموتني .
عصماء ـ كعدت تعبانه ومسحت وجهه وطلعت الجكاره تدخن واني رحت على بيداء هي شافتني صاحت بيه
بيداء ـ ولي أمشي أطلعي برة الله ياخذج من أخت كله من وراج أنت فتنتني ما تكدرين تضمين سر ما تردين الله يستر عليج شنو بس اني أحب أنتِ هم تحبين شو مـا تحجي عليج لو عليج حلال وغفور الرحيم وعليه حرام وشديد العقاب .
ـ وين جنتي؟
ـ وأنتِ شعليج لو عايشه دور الأخت الجبيره وتحاسبيني حاسبي نفسج بالأول مو بس نادره عليه وأظن اني مو طفله كلمة والثانيه تسألين وين رايحه ومنين جايه الله يخلصني من هيج عيشه زقنبوت فوك الفكر والعازه انوب سوي هيج ولا تسوين هيج .
ـ دفعتني من الباب ودخلت الحمام وأجه أبويه يبو هسه وكتج دخلتي ركضت اخذت ملابسه بيداء طلعي وجع ابويه اجه يريد يسبح طلعت وعيونها مورمه هي عادتها تبجي ىالحمام عبرتني ودخلت الغرفه حتى عشه ما تعشت وضلت بس تدرس وملتهيه بكتابها ما تحجي ويانا يعني عزلت نفسها عن الكل !
وأمي طول هالفتره مراقبه بيداء وبس صافنه حتى لمسواك ما راحت حسيت أبالها حسبه ودايخه بيها وبيوم أجتني من بيت جدي وكعدت بالطرمه تشرب جكاير وكعدت يمها يمه شبيج .
غنيه ـ كل الخير ، أختج راح أزوجها !!
شكرا لزيارتكم عالم روايات سكيرهوم
