رواية بنات الحجي السعيد الفصل الثامن 8 بقلم شمس العراقية

____________ صباح الخير أحبتي قبل القراءه رجاءاً عدم التجاوز والغلط على الشخصيات لأن البعض متوفين فه يمنع التجاوزات بحقهم أقتضى التنويه والبارت مطول جداً يُرجى التحديث في حال عدم نزوله كاملاً وشكراً على صبركم بس جنت زياره يم أهلي ♡

أما الأن قراءه ممتعه أحبتي الأعزاء ♡

بيداء ـ كاعده أقرا وطافره روحي من الوضعيه التعبانه منا السادس وضيمه امنا ألانترنت جداوه مشتركه على بيت عمي وضعيف بس ماكو حل غير الزك بصف الشباك علمود يوصل .

جاي أراسل بمالك وهو المصبرني ومتحمله هالضيم علموده . 

مالك ـ يله حبيبي گافي روحي أقري وعوفي الموبايل هسه وعينج بكتابج يله بنيتي . 

ـ أهو عاد لاتصير نفس أمي وملحتها عليه أقري وأقري

ـ وشبيها أمج غير تريدج تجيبين معدل زين ياعيني ترى لمصلحتج نججي ونأكد عليج ، تلحكين تشبعين مني وغلاتج اضل مكابلج الا تملين مني شتردين بعد . 

ـ ميخالف بس مو كل شوي فوك رأسي ادرسي ادرسي لعبتوهـا لنفسي عصماء وأمي وأنت عفيه شنو هاي . 

ـ ميخالف حبيبي تحملينا 

ـ وين تروح 

ـ معزومين بيت أخويه والحجيه جاي تتحضر أخذها وأروح

ـ الله وياك 

ـ يله أنتبهي لنفسج تمام 

ـ أوك باي راح وشمرت الموبايل بالكاع وأمي صاحت بيه

غنيه ـ شبيج تتنرين لو موبايلج مكسور خلي ساتر عليج لو هاي سوالفج علمود أجيبلج جديد 

بيداء ـ على أساس أيفون هو خلك مستعمل 

ـ ومنين أجيبلج مو تشوفينا نجمعهن وندفعهن الج فلوس دورات خلصي ومنا لوكتها تدللي أجيبلج جديد ميخالف 

ـ ما أريد جديد بس أشتركي أنترنت 

ـ مو عندج 

ـ منيلي جداوه من بيت عمي نايمه بصف الشباك ركبتي انحدبت من كثر ما مادتها علمود يوصل النت ضعيف فدمره أشتركيلي فدوه والله طلع روحي 

ـ ما عندي هسه وعصماء سألت يكلف علينا بهذيج الحسبه ، عوفي ودبري نفسج على بيت عمج واحنه شنسوي بي بس علمودج لا اني ولا ابوج ولا اختج نحتاجه . 

ـ أهووو امرلي الله 

ـ تحمدي ربج يمه وأشكري على العندج غيرج ما محصلات فرصه يكملن دراستهن لو أهلهن محاربيهن وكلمن يرضى بقسمته وعيشته تالي الله يعوضه خير 

ـ أي وطلعت ورجعت أقرا اذا ما أشد حيلي أنام بالسادس وأضل عايشه بهل الفگر على أقل أذا اطلع معدل زين أدخل جامعه زينه وبلكي أتعيين اذا شفت التعيين بعيني ... 

                                            

              

                    

وثاني يوم طلعت لدوره وهو أجه أخذنا وصلنا حتى ولا أكدر أباوعله هذن عيونهن عليه وجه التنگه بكلشي حاشرات نفسهن . 

طلعت ضايجه الدنيا طالعه من عيني والدمعه بطارف عيني صعدت بدون سلام كعدت بالأخير مختنگه گبل راسلني وعيونه تباوعلي 

مالك ـ شبي الحلو ضايج ومعبس وسلام ما يسلم علينا 

بيداء ـ مـا جاوبته 

ـ منو وياج على شنـو مطنگره هذن مو وياج ما بيهن شيء ليش أنتِ وجهج مًا يكصه سيف . 

ـ ما تفك عني مالي خلكك 

ـ نزلي . 

ـ وين أنزل شبيك أنت خبل لو خبل؟ 

ـ يم الأستاذ شوفيلج حجه يعيدلج شرح موضوع صخام براسج لما اوصلهن وأرجع اوصلج . 

ـ وليش يابه بعدين توصلني وصلني هسه وفضني 

رفل ـ يله مالك شوكت نمشي 

ـ نزلي لاتعاندين من أرجع أفهم منج شبيج وهالطبع الخايس إذا ما تبطلينه أطيح حظج.

ـ يله نازله ، نزلت وهنا باوعلي بشك صحت بيهن شگو نازله يشرحلي كلشي ما فهمت راسي طبل من لكفاتجن . 

ـ شكد حقيره وأحنه شگو بيج صوجج أنتِ ما تتنبهين بالج مدري وين ، جايه تدرسين لو تتصفنين 

ـ تردين أصعدلج أجفصج 

ـ نزلي عمي وفكينا من لسانج وشرج أنتِ وحده تموتين على المشاكل 

ـ لا تردين أهلس عطوبج جريتها من شعرها ويفازعن ونزل مالك سحبني منهن بعصبيه صرت بصدره وباوعتله ورجعت باوعتلهن وبجيت كلجن حقيرات ومنافقات الله ياخذجن . 

عفتهن وهما مشوا ومالك ما حجه ولا كلمه ضليت واكفه لوحدي تالي رحت الماركت ضليت أفتر وأباوع أشتريت بردت گلبي وناسيه فلوسي ما يكفن وصلت الدفع وأنصدمت بالحساب الولد ضل صافن بوجهي من صدمتي عادي أرجعهن 

ـ كلهن 

ـ أي بس الحلويات هذن بقيهن جاي احجي ودخل مالك

ـ لاترجع شيء ، شگد حساب . 

ـ دفع وأخذهن وطلعنا ليش دفعتهن 

ـ وليش ما أدفعهن يله أمشي أريد أفهم منج شبيج واليوم شصايرج دمعتج على خدج اللي الأعرفه ما تنزلج دمعه 

ـ هسه شُنـــوْ الواحد ما يبجي 

ـ لا يبجي بس غير أكو سبب ولازم أعرفه ،يله صعدي .  

ـ تلفت ومد أيده مسح دموعي وكرصني من خدي أبتسمت اله أني ليش أحبك لان حنين عليه 

ـ ما عاش اليزعلج وينزلج دمعه وأني موجود 

ـ مالك لاترجعني البيت مخنوگه من گلشي من الدراسه من البنات من البيت من أمي من أبويه من عصماء 

            

              

                    

ـ ومني 

ـ لا ، أنت الوحيد المصبرني 

ـ حبيبتي شعندي غيرج بس لو تبطلين هالطبع 

ـ وشبي طبعي 

ـ خلص عمي سگتنا 

ـ صعدت ليوره بس عيونه تراقبني وشغل ومشينا وأني صافنه عاالشارع على الناس على الحياة الحلوه الما عايشتها مثلهم وحالي من حالهم وكل هذا هو صافن عليه الا أن وكفت السياره يله حسيت باوعت الطريق شبه فارغ مالك ليش وگفت 

ـ نزلي وتعاي يمي أريد أفهم منج شبيج . 

ـ مخنوگه 

ـ تعاي يمي وتروح الخنگه 

ـ نزلت وفتحت الباب وكعدت لزم أيدي وشديت عليها مالك أكره حياتي وكلشي بيها . 

ـ هانت حبيبتي هانت ما ضل شيء صبري 

ـ شصبر طگت روحي وگمت أبجي يعني تصور الانترنت جدواه من بيت عمي يا حياة هاي تستاهل اصبر عليها مالك مـا تسكت لخاطر الله ، گبل سحبني وحضني ولمني على صدره بحنيه ودفو غمرني بعطره وعطفه عليه ضليت متمسكه بي وريحة عطره ترست خشمي وهو يمسح على شعري بحنيه 

ـ مالك أحبك 

ـ مو بكد حبي الج 

ـ رفع رأسي باسني من كصتي بمأساة وحضن من وجهي بكفوف أيديه مليانات حنيه وعيونه بعيوني وتقرب باسني من شفتي وأستمر بحنيه بس أني ما كدرت أقاوم مثل لعبت نفسي لان أول مره وتفأجات بي گبل أبتعدت عنه وهو رجع كمل كلامه . 

ـ وعيونج الاحبهن كلشي يهون بس صبري وطولي خلگج وأهلج زينين عليج تحملي بس تخلصين أتقدملج وياريت توافقين هسه أتقدملج وتكملين دراسه يمي . 

ـ لا مو هسه 

ـ ليش مو هسه 

ـ گلت مو هسه ولا تلح 

ـ بس أريد أعرف شغله ليش التأجيل ورافضه فكرة أخطبج هسه ما أدري . 

ـ التهي بيك وأنشغل وأهمل دراستي هو أنت هسه شالع گلبي وبالي بس يمك 

ـ بكيفج 

ـ شــــنوْ زعلت 

ـ لا 

ًـ لزمت أيده أحبك من تزعل مني يله نتراضى هالمره أني احضنك بس حضنته وتمنيت ما أفارك حضنه شعور حلو تملكني عكس هذيج المره من حضني جان عندي نفور من عنده ورجع هو بعدني عنه هـا بعدك زعلان . 

ـ لا سيارات أجتي ناس تضل تباوعلنا أمشي أوصلج 

ـ على شــــنوْ زعلت 

ـ ما زعلان منج شبيج أنتِ 

ـ بيه أنت أعشقك صفنت عليه وهو مطنگر ونزلت كعدت ليورا ووصلني وهو ساكت واني أرتاحيت نوعاً ما

دخلت شايله الأغراض وفرحانه لكيت بس عصماء موجوده وباوعتلي بشك . 

            

              

                    

عصماء ـ حبيب القلب مشتريهن الج 

بيداء ـ ليش عندج مانع 

ـ لا بس ما گلتي اذا لگيت أمي أو أبويه ويسألوني شجاوبهم لو هاي ما فكرتي بيها 

ـ لا فكرت بيها عصماء لاتخربين فرحتي  

ـ أخرب فرحتج ولج أنتِ شوكت تجرين عدل شوفي لج إذا ما تصيرين أدمي وتعوفين هالمالك لايصيرلج شيء ما يعجبج لا عبالج غافله عن تصرفاتج . 

ـ هسه شمسويه 

ـ لا ما مسويه شيء وكلما أكول صارت ادمي رجعتي

لـ الانكس وأذا تبقين هيج أبلغ أمي هي تتصرف . 

ـ لا دخيلج امانة لاتگولين الها وعد بعد ما اسوي أي شيء غلط وأنتبه لدراستي بس أستري عليه  

ـ نشوف يله دخلي الله ياخذج . 

ـ دخلت مقهوره منها منين تتلگاها من السادس من الأهل عيشه لو زقنبوت ، ضليت مكبوره أقرا ومالك ما محاجيته صار فتره لان عيونها عليه ساتره على نفسي وكاعده وساكته 

كملت دراستي وأتصلت عليه رفضني وضل يرفض الأتصال خير يا ساتر هذا شبي ودزيتله رساله شبيك 

مالك ـ ما بيه شيء ارجعي كملي دراستج . 

ـ گملت وأجيت أحجي وياك مشتاقتلك حبيبي 

ـ والله أني هم مشتاقلج بيداء حيل مشتاقلج 

ـ مشتاقه لحضنك الحنون والدافي . 

ـ تردين حضن أدبسزز وافقي وخل اجي أخطبج وأشبعج أحضان وبالحلال لو أنتِ عاجبج تعذبين بيه وما مهتملتي وأصلاً أخر إهتمامج . 

ـ شنو هالحجي موو تشوفني ملتهيه بدراستي وصخامي شسويلك يعني لاتنگلب عليه ما ناقصتك . 

ـ لا كاعدين لا مسولفين اني تعبت أريدج يمي 

ـ تريدني يمك أصبر أخلص السادس . 

ـ أهوو مطوله 

ـ لعد شتريد مالك ، تريدني أصبر عليه قابل بكيفي وخلها بالك محد يوافق على زواجي منك الا بأيدي شهادة السادس وأنت بنفسك جنت تكول أريد وحده دارسه مو هذا كلامك شتغير هسه مو تريدني أريد أكون دارسه ومتعلمه علمود أهلك ما يعارضون شبيك هسه

ـ أنعل أبو أهلي بكيفهم هي اني الأتزوج ما الج شغل 

ـ أوك براحتك 

ـ أكولج شلون أريد أشوفج 

ـ ماكو ما أكدر أخاف من أختي صايره بس تحاسب وأدقق وراي 

ـ وهي شعليها بيج 

ـ شنو شعليها غير أختي الجبيره 

ـ وأنتِ مسؤوله عن نفسج حبيبي لاتخلين أحد يتحكم بيج هاي حياتهم مو حياتي 

ً ـ أي يله لازم اروح بعدين أحجي وياك  

ـ تمام حبيبتي أنتظرج 

            

              

                    

ـ نهيت المحادثه وياه ورجعت اقرأ واخلص من نهيت المحادثه وياه ورجعت اقرأ واخلص من نظرات عصماء عليه ما ناقصني تسويلي مشاكل ويه أمي هي من يوم كشفتني مسممتني بنظراتها مثل لليزر ... 

ضليت أقرا واحجي وياه بس قليل وهواي صاير يلح ما جان هيج وبيوم عندي مراجعه يم الست نادية مدرسه الرياضيات أكثر ماده أكرهه وعقلي قافل ما يشتغل خابرتها كالت تعالي وكمت لبست وخابرته مالك وين أنت 

مالك ـ بالبيت ليش 

ـ تكدر تجي توديني لـبيت ست نادية عندي مراجعه يمها . 

ـ ماشي جايج 

ـ طلعت وشافتني عصماء بالكوه طلعت وعيونها وراي عبالي أخذ رفل بعدين كلت لا اروح وحدي قابل صغيره 

وأجه مالك ومبتسم هلاو 

مالك ـ هلاوات يابه اليوم وحدج! 

بيداء ـ كلشي ناسيه وقافله أخذني عليها تشرحلي وتفهمني عقلي مبنج . 

ـ تدللي بس هم تطولين 

ـ ما أدري حسب ، شغل وطلعنا وصلني بيتها دخلت لكيت كم طالب كعدت أنتظرها وياهم واجه ولد ويانا أسمه مصطفى شافني وأبتسملي 

مصطفى ـ ها بيداء جايه لوحدج البنات وينهن 

بيداء ـ أي وحدي وعقلي قفل لاتحاجيني 

ـ لا يمعوده سهله گولي بالله . 

ـ شــــنوْ البيها سهل والله صعبه 

ـ تحبين أساعدج بيها اني كلش ضابطها 

ـ شلون بالله حضرة البرفسور ، ما تسگت لخاطر الله اني على الخصوصي ما جاي افهم تريدني أفهم عليك

ـ بكيفج بس حبيت أساعدج أحسن ما تجين مناك لهنأ 

ـ هم صدك شكراً مصطفى أبتسملي وضلينا نحجي وانطاني رقمه وحسابه وأجتي سلمت ولقت محاضره تحفيز ورفع معنويات وبعدها بلشت تشرحلنا المهمات وركزت وياها لما خلصنا وطلعنا سوى اني ومصطفى . 

مصطفى ـ ويامن ترجعين 

بيداء ـ هسه أبو الخط يرجعني .

ـ ها اذا تحبين أني أوصلج سيارتي موجوده 

ـ ليش عندك سياره وتسوق؟ 

ـ اي شينراد الها 

ـ ودراستك وشلون تعلمت السسياقه 

ـ اني عايد هاي السنه الثانيه وتعلمت أبويه علمني سهله هاا شتكولين أوصل لبيتكم

ـ لا شسالفه مصطفى هسه درينا عندك سياره وتعرض خدماتك علينا بس مو مال توصلنا هاي واكفه 

ـ شمدريني يله أخذي راحتج وأي شيءتحتاجينه أني بالخدمه 

ـ شكراً راح وأتصلت على مالك حبيبي وين انت 

            

              

                    

مالك ـ أنتظرج خلصتي 

ـ اي عمري تعالي 

ـ أكولج قبل لا اجيج 

ً ـ شنو حبيبي گول 

ـ أمي دائماً تسألني عليج وگلت اخذج تشوفينها بس

ما يصح فرصه لان البنات وياج مـا تكدرين تغيبين عن نظرهن ويضلن يحجن وما اريد تجيج حجايه فه شتكولين أخذج تشوفينها 

ـ وهسه لا عفيه أجلها بعدين وسلملي عليها عود غير مره

ـ لا خطيه گتلها أحتمال أجيبها تشوفينها 

ـ لا بربك 

ـ أي والله بيداء ما اريد أكسر خاطرها وهي حبتج من كثر ما أسولف الها عنج وما تسميج غير جنتي وجنتي حتى لنسوان أخواني تسولف بيج 

ـ عيوني بس ما أكدر لازم ارجع مالك 

ـ أي بعد وكت بس سلمي عليها شدعواج ما تحبين أمي من هسه 

ـ لا شدخل بس ما أريد اتاخر واني أجيت وحدي وتندمت ما جبت رفل وياي

ـ هذا هو براحتج حبيبي يله راح اجي أوصلج 

ـ اوك وضليت أنتظره وأجه وصعدت وطلعنا كاعده ليورت وأباوعله بيتكم هم بعيد منا . 

ـ لا شارعين تقريباً ليش 

ـ أخذني أشوف خاله وأسلم عليها 

ـ هاا الله هداج علينا 

ـ أي مـا يهون عليه أكسر خاطرها وخاطرك هم 

ـ حنينه مو بيدج . 

ـ فر السياره ووصلنا البيت نزلت وفتح الباب ودخل يصيح على أمه واني وراه أمشي وأباوع على البيت صح بناء قديم مثل بيوت البغداديه القديمه بي نكهه جيل الطيبين ضليت أفتر وأمتع نظري . 

ـ يمه ست الحبايب يا حبيبه يا طبيبه أمي وينج جبتلج جنتج وينج يمه يمه

ـ ها حبيبي 

ـ يمكن طالعه رايحه بيت أخويه هي ما تعرف تكعد الا تروح تشوف الجهال . 

ـ خطيه عادي أشوف بيتكم من الداخل 

ـ أي عادي حبيبتي البيت بيتج . 

ً ـ دخلت من باب الأستقبال أفتريت وشفت غرفتها تخبل ودخلت غرفته شفتها حلوة ومرتبه ورجعت المطبخ لكيته يجهزلي عصير قدملي وشربته عاشت ايدك . 

ـ بالعافيه حبيبتي . 

ـ أشرب وصافنه على حركات أيده وشلون يفتر مخبوص بيه جابلي قطعه كيك أكلت وهو فرحان بيه أكعد اكل وياي عالواهس جر الكرسي وكعد مقابيلي وريحة عطره كفخت بخشمي صايره بسرعه أشتم عطره وادوخ بي 

گملنا . 

ـ مبين تتأخر أمشي أوصلج 

ـ هزيت رأسي ومشه من يمي أيده لامست أيدي لزمتني رعشه ورجع صفن بعيوني ورفع إيديه حضني من خدي وبست كفوف أيديه مليانات حنيه وعيونه بعيوني 

تقرب أكثر حضني وتمسكت بي مالك أحبك 

            

              

                    

ـ مو بكد حبي الج بيداء أعشقج متولع بحبج والله متبهذل من وراج 

ـ وجهي صار بوجه حضنته بإيده وضليت صافنه الى أن أخذ شفايفي وأستمرينا وما أعرف شلون وصلت لغرفته ولكيت نفسي بإرادتي وأبوس بي من رقبته الى أن عشنا تفاصيل العلاقه كامله بس بدون ما يأخذني وفزينا أثنينا على صوت ولبس ملابسه وطلع من الغرفه وتداركت نفسي بالغطا وبدون ملابس كمت عالسريع البس بملابسي وأسمع صوت مره يمكن 

أمه رجعت من بيت أبنها بس صوتها عالي وگفت البس عالسريع . 

ام مالك ـ مـنو گلك جيب بنت الناس بيتي تريد تبليني بيها شلون تجيبها للبيت شلون 

مالك ـ يمه شهل الحجي مو تدرين بيه أحبها وأريدها وجبتها عليج حتى تشـوفينها وتتعرفين عليها . 

ـ وأنت ما خفت ربك بيها تفوتها للبيت وهي الأرعنه شلون أمنت ودخلت وياك أثنين وثالثكم الشيطان 

ـ جبتها عليج تشوفينها ودخلت البيت أنتِ طالعه خوما أبقيها بالباب دخلتها لما أنتِ تجين . 

ـ جنت بيت أخوك شمدريني بسوالفك أنت وياها من ورى ظهري وگلنا خل تخلص دراستها بعيني أروحلها للبيت أهلها أشوفها ليش ما أندل الدرب لو ما أعرف بالأصول وبنات الناس يندك بابهم مو بالختلات وبدون علم أمها وأبوها والبيت فارغ من طاح حظك يمه على هالسالفه الناقصه . 

ـ يمه فدوه اروحلج صوتج مو وگته هالحجي لاتسمعج 

ـ خل تسمعني قابل مستحيه منها ولا بارك الله بيك وبيها وجنت ناويه أخطبها الك بس من بعد ما جتي وياك من دون علم أهلها وخانت الثقه والتربيه ما تلزمني بعد لان باجر عكبه هم تخونك وتطلع ويه غيرك 

ـ أهوو يمه گافي عاد

ـ وجعو التنام بگلبك شجنت تسوي بالغرفه أنت وياها يا ساقط 

ـ ما سويتلها شيء بس كافي 

ـ دام ما مسوي الها شيء أمشي وصلها لبيت أهلها لاتصخم وجهها أمشي لا بارك الله بيك من ولد شو أخوانك ما سوا هالعمل هذا وبيت ابوك تريد تجيب علينا سمعه وتفضحنـا بالمنطقة . 

بيداء ـ سگتت وانفتح الباب دخل مالك حجه بدون ما يباوع لوجهي 

مالك ـ يله أمشي أوصلج تأخرتي 

بيداء ـ دفعته من الباب وطلعت صارت كبالي لابسه اسود وحجيه متروسه تباوعلي بنظرات مشيت سريع وصاحت وراي 

ام مالك ـ أستري نفسج يمه وديري بالج على روحج 

مالك ـ كافي يمه رحمه لأأبوي كافي . 

ام مالك ـ أنتَ انجب وامشي وصلها وارجعلي . 

بيداء ـ طلعت ونسوان كبار بالعمر كاعدات بالباب باوعلي صعدت معصبه واجه شغل وطلعنا وأثنينا ساكتين واني أغلي من الداخل وهو أنبلع لسانه حتى ما دافعلي امه اكلتني وشربتني بلسانها .. 

            

              

                    

وصلنا وشافتني أمي ونزلت وعيونها على مالك تقربت عليه سحبتني من أيدي قوي ودخلتني البيت وبهذاك اليوم أكلت كتله تسوى عمري العشته .. 

ضليت أيام عازله نفسي ومحاربه من قبل أمي وعصماء ومالك من هذاك اليوم أختفى وكرهته هو وأمه هو أخذ اليريده وأبتعد وامه تدافع لابنها الشريف وتحجي عليه وناسيه السكط أبنها هو أخذني البيت والله أمي تريد تشوفج نذل وكواد وكل هذا وگلبي منعول الصفحه أشتاقله الحقير . 

راسلته ليش هيج أبتعدت 

مالك ـ ما مبتعد بس أنتبهي لدراستج هسه وعوفي الحب وخرابيطه ما تفيدج مستقبلج أهم من هالسوالف . 

ـ أهاا خرابيط!! يعني العشناه خرابيط 

ـ لا حبيبي بس عندج أمتحانات هسه 

ـ بس أني مشتاقتلك وأنتَ صاير متحبني 

ـ لا أحبج بس ما أريد أثر على دراستج وأنتٓ تعبتي حرامات تضيعيين تعبج وتعب أمج وأختج وياج خطيه 

ـ أهوو هسه عوفنا من أمي وأختي ما مشتاقلي 

ـ لا مشتاقلج 

ـ مو بگدي أني مشتاقه لحضنك وعطرك أفيش .

ـ وبعد 

ـ وهذاك اليوم جان شگد حلو وأبداً ما متندمه على كل ثانيه عشتها وياك.  

ـ مثل شنــــــوْ 

ـ گلشي! شنو ناسي 

ـ لا ما ناسي 

ـ حبيبي 

ـ ها 

ـ خل نتشاوف والله مشتاقتلك وصايره أفتقدك وأنت مبتعد عني مو مثل قبل حتى أحسك متغيير عني 

ـ لا ماكو هاي أخر مره وممنوع تكرر بعد لاحضن ولا شيء ثاني أنتبهي لدراستج وخلص

ـ ليش صاير مكروه فوك ما مشتاقتلك والله يالله روح بعد ما أحبك  

ـ شو هيج صايره! 

ـ ليش شبيه عيني 

ـ مو مثل قبل تستحين وما تحجين بهاي المواضيع شغيرج؟ 

ـ مالك شبيك ترة أني حبيبتك وأنت تحبني واني من ضيم أهلي ودراستي والدنيا اجي يمك أفضض وأحجي وتجي أنت تزودتها عليه وگول لنفسك أنت شغيرك .. 

ـ أني ما متغير ولاتنسين أني رجال وأنتِ مره أكو هواي فرق بينا . 

ـ وشـنو الفرق بله؟ 

ـ بيداء أني رجال ما أخاف من شيء ، أنتِ بنيه شرفج ليش هيج رخيص عندج! شلون تنزعين گبل وسلمتيني نفسج والأول والتالي وما تحسبين حساب لشرفج وأهلج ما خفتي أني أكدر بلحظة ضعف أنهي گلشي 

ـ ها هيج صاير الحجي گول من الأول أنتِ بعد ما تلزميني أبن امك عليمن تطلع تبيعون شريفات برأسي . 

            

              

                    

ـ أمي لاتجيبين طاريها وأذا حجت فه حجت من صالحج وحقها كل أم بموقفها هيج تحجي . 

ـ ولو نفرض بنتها نفس الموقف هم هيج تحجي وتطعن بيها وبشرفها . 

ـ انجبي عاد شدخل كمتي تخبطين بسوالفج 

ـ لا ما أخبط بس هاي الحقيقه تخافون أحد يواجهكم بيها وعلى نفسكم ما ترضون بس على غيركم لا عادي ولاتنسى روحك أنت اخذتني البيت وجنت أعتقد أمك بالبيت وبلحظة ضعف مني ومنك صار بينا اللي صار. ويله باي . 

ـ وين 

ـ أكمل دراستي لان أهم من سوالف الحب وخرابيطه 

ـ بعدين نحجي تمام 

ـ ما جاوبته وتجاهلته وكرهته ونزل من عيني هو وحبه سايق الماما خل تفيدك أمك وأنعل يوم الحبيتك بي

تجاهلته ورجعت أقرا وأمتحن بس أكو فراغ بداخلي وگلبي يحن مو بإيده وهو هم أبتعد وكاعده وصافنه وأجتي عصماء كعدت يمي صديت وجهي عنها حسيت عدها كلام بس متردده تحجي اذا عندج شيء أحجي وفضيني 

عصماء ـ لا ما عندي شيء بس اسألج سؤال وجاوبيني 

بيداء ـ خير شنو سؤالج 

ـ بعدج تحجين ويه مالك لو نهيتي گلشي من گتلت أمي الج

ـ متشمته 

ـ لا والله بس ما يفيدج أنتِ وراج مستقبل ينتظرج وهو لو يحبج صدك جان اجه تقدملج من أول ساعه أعترفلج بحبه 

ـ هو يريد يجي يتقدملي بس أني أمنعه وما أخلي 

ـ ليش 

ـ لان أريد أكمل دراستي وأطلع وأشوف الدنيا شبيها ما بيها والناس شلون عايشه مو أبالي الزواج تعاي من هسه انربطي برجال ومسؤوليه وأطفال وبيت وسوالف العمه والجنه ولعبان نفس . 

ـ دام هيج ليش حبيتي وعلقتي بيج 

ـ هو حبني شسويله واليحب يصبر وينتظر گتله اخلص دراستي وتعال 

ـ الحياة مو لعبه نلعبها وبكيفنا نقرر ، الحياة أستقرار وسمعه وأهل وبيت وعائله ومستقبل يريد واحد يتعبله ماكو شيء يجي بالساهل واذا أنتِ تخبطين بحياتج وتصرفاتج الطايشه عبالج هذا الشيء صح وتعيشين مثل ما تردين لا غلطانه لان مو لعبه عندج الحياة هي تلعب بيج أذا ما مشيتي صح مو أنتِ تلعبين بيها .  

ـ أي فهمنا ست عصماء . 

ـ الله يهديج 

ـ ويهدي الجميع وياريت كلمن يحير بروحه وما اله شغل بغيره خليج بنفسج وما عليج بيه اوك ما جاوبتني ونمت والصبح جان عندي أمتحان كعدت وبدلت ورحت بدون ما أراجع أي شيء وشفت مالك باوعلي بس نظراته طافيه أو فسرت من كيفي لان ما باوعلي بلهفه مثل ما عودني عليه ..

يالله شگد مشتاقتله عكسه هو ما مبين عليه مشتاقلي أفتقد حنيته وعطفه وخوفه وحرصه وقلقه وأسئلته التافهه وبروده من اكون عصبيه يعرف شلون يمتص غضبي يعرف شلون يحتويني من شتاتي وضياعي أحس عوض الله دزه اليه على رغم أخطائي بس مالك حبه بگلبي محفور حتى لو هو عافني ما ممكن أنساه واحب غيره هو صارلي أب بوقت ابويه ملتهي بروحه وناسي عنده بنات وصارلي أم اللي بس تفكر توفر فلوس وتعيشنا ما عرفت تتحتويني ياريت كلهم مثل حب وحنية مالك عليه .. 

            

              

                    

نزلن قبلي وأني رايحة بعالمي عايشه بي لوحدي وفز گلبي لحظة سمعت صوته وهو ينطق أسمي . 

مالك ـ بيداء بيداء 

بيداء ـ هـا مالك 

ـ نزلي تأخرتي 

ـ أي نزلت وأني كلما انزل أنضرب بحافة الباب حتى بهاي حافظني قبل لا انضرب خله أيده وصفنت عليه شكراً 

ً ـ العفو ، قاريه زين 

ـ أي لايضل بالك عليه تربيتك أني 

ً ـ الله يسهل عليج يله روحي 

ـ مشيت وأتلفت وراي وأباوعله وهو ضل وأكف يباوعلي بالجامه أعرف بي مشتاقلي بس يكابر أو عافني لان يمكن نزلت من عينه خاصة بعد أخر كلام صار بينا ما أنساها اله من گالي شلون تنزعين گبل وشرفج رخيص عندج وأنت حبيبي وأمنت وثقت بيك وسلمتك نفسي وبالأخير هيج تجازيني بكلام ضل مثل السجاجين بروحي 

أباوع الاسئله وأعرف الجواب بس من أكتبه نصه انساه واضل اعصر بمخي المهم جاوبت الحمدلله وطلعت أول وحده لكيته ينتظرنا باوعتله صافن ونظراته بعيده فتحت الباب وصعدت ليورا بالكشن الأخير ضلينا ساكتين وبروحي گومة عتب وسوالف وشوك يجوي بگلبي هيج كون اشم عطره ونرجع نسولف مثل قبل . 

مالك ـ جاوبتي 

بيداء ـ الحمدلله وبعدها سگتنا أريد احجي وأكوله ليش هيج تسوي بيا ليش أبتعدت والبعد كان منك لو من أمك جبرتك تتبعد عن وحده سلمتك نفسها قبل الزواج بإسم الحب وخرابيطه ... 

طلعنا للبيت ولاحظت التغيير حتى على أهلي! مو بس على مالك ، رجعت محد سألني جاوبتي لو لا شلون أسئله أمي ولهفتها وسؤاله المتكرر وتكعد تخبصني جاوبتي لو لا شگد تجبيبن وترجع تسأل عصماء الي جانت تسألني وخايفه وياي وأدقق الأجوبه هذن كلهن افتقدتهن وتغيروا عليه وصاروا حالهم حال مالك ... 

عشت فترة صعبه أنازع فراق الأحبه لوحدي ، أبويه فقط بالأسم أب وأمي تركض منا ومنا وأحس أبالها سالفه شاغلتها جكايرها وصفناتها وكعداتها لوحدها 

وأختي مكتفيه بدائرة حياتها الصغيره ما بيها بس علي نجم والمحل مالتها ونسوان وملحتهن وبساطتها وطيبة قلبها وموبايلها الصرصور بعيده كل البعد عن عالم الأنترنت وهوس التطبيقات والحسابات والاصدقاء مسالمه بگلشي أشوفها مثل الحمامه ... 

گملت دراسه وكعدت أتصفح وصلتني رساله باوعت الحساب والصوره مصطفى! 

مصطفى ـ اليوم جاوبتي . 

بيداء ـ مصطفى 

ـ أي مصطفى شلونج 

ـ زينه وأنت أخبارك 

ـ تمام أفتفدتج ومن امتحنت تذكرتج أنتِ تنسين بسرعه 

ـ أي والله شمدريك بيه أنسى 

            

              

                    

ـ أخر مره التقينا تذكرين وهواي حجينا 

ـ أي تذكرت أنت خوش ولد 

ـ وأنتِ خوش بنيه وحبابه ولطيفه وحلوه وصح عصبيه وأنفعاليه بس تنحبين 

ـ شكراً مصطفى 

ـ ولو تدللين محتاجه شيء 

ـ لا سلامتك 

ـ شتسوين 

ـ اتصفح والله 

ـ عادي اضل احجي وياج ارتاح من اسولف وياج 

ًـ اي عادي بس الأنترنت ضعيف ما بيه أضل كاعده 

ـ ليش وين كاعده 

ً ـ يم الشباك مكنكه على بيت عمي 

ـ ليش ما عدكم راوتر بالبيت 

ـ لا والله مـا شادين وبس أني أستخدم أنترنت 

ـ ها تمام أدزلج رصيد أشتركي 

ـ لا لا شكراً ما يحتاج 

ـ أوك براحتج لعد روحي نامي خاف تعبانه 

ـ اوك باي نهيت المحادثه وياه نوعاً ما أرتاحيت من سولفت لان بالعاده من أسولف ويه مالك والوقت يخلص وياه أرتاح ويهون عليه تعب الدراسه وگلشي ..

قبل لا انام وصلتني رساله منه 

مالك ـ بعدج كاعده 

بيداء ـ لا راح أنام 

ـ كملتي

ـ أي وفصل الأنترنت دخلت على الشبكه غيروا الرمز الكواويد هسه وکتكم أتصل ورفضته وين أجاوبك خرب بحظ الكواد رصيد هم ماكو بس ترميشه فگر رجع دزلي

ـ فصلتي الانترنت ورفضتي أتصالي هاي هي براحتج

ـ خرب هذا شگوله ما يدري روحي طاگه عليه ومشتاقتله

گمت ادور على موبايل عصماء هاي نايمه بسابع نومه وين مخليته أكيد جوه رأسها مديت أيدي وسحبته ودزيتله رساله حبيبي بيت عمي غيروا الرمز ورفضتك ما أكدر أجاوبك وما عندي رصيد وهذا رقم أختي لاتتصل عليه رحع دزلي رساله على موبايلي .. 

ـ روحي نامي لعد 

ـ مو تريد نحجي 

ـ لا وين نحجي مو مغيرين الرمز بيت عمج يله نامي ومسحي رسائلج من موبايل أختج لاتخلصين رصيدها 

ـ خايف على الرصيد وشيصير لو دزلي كارت وأشترك ونحجي 

ـ أدزلج بس هسه بالبيت والوقت تأخر عوفي النت ونامي بعدين نحجي . 

ـ مو صوجك صوجي أني طلبت منك رصيد

ـ أي هذا هو باي . 

ـ عفت موبايلها ورجعت نمت مقهوره من تصرفاته وحقارته وياي عود يكابر بس ميخالف مالك ميخالف يصير خير قابل أموت وراك .. 

            

              

                    

نمت وكعدت الصبح على صوت عصماء شگو شبيج 

عصماء ـ شلون تراسيلنه من موبايلي 

بيداء ـ ما عندي رصيد وراسلته شگو ﻧگلبت الدنيا 

ـ يعني رقمي صار يمه 

ـ أي هو رقم 

ـ أنتِ شبيج ما تحسبين حساب لگلشي تضلين بهذا غبائج تردين تكسرين ركبتي وياج 

ـ أهوو فضينًا عاد هو مو بحالج ولا بحال رقمج 

ـ شوفي هاي أخر مره لا والله أروح أكول لأمي 

ـ فضينا عاد من صباحيات الله 

ـ الله ياخذج ويخلصني من سوالفج الخايسه يا عار

ـ عصبت منها وشمرت المخده وگمت غسلت ولكيت أمي كاعده بالطرمه يمه أريد الرمز من بيت عمي غيروا 

غنيه ـ وشتسوين بي 

ـ شنو شسوي بي غير أقرا 

ـ الأ على المهجوم اقري على الملازم لعد على شنو لازمه الج مدرسين خصوصي . 

ـ أي بس 

ـ ماكو رمز 

ـ شلون ماكو رمز 

ـ كافي تلغين فوك راسي كلت ماكو يعني ماكو امشي انكبري بغرفتج وعينج بكتابج عوفيلي هالمهجوم عاد راح تشرمينها بهل الدراسه . 

ـ عفتها ورجعت مقهوره منها ولكيت مصطفى متصل عليه يمكن راسلني وشافني ما موجوده رجع أتصل جاوبته هلاو 

مصطفى ـ وينج أنتِ 

بيداء ـ ما عندي أنترنت مغيرين الرمز 

ـ وتبقين هيج 

ـ أي شسوي 

ـ أوكفي أدزلج رصيد 

ـ لا مصطفى هسه اروح بيت عمي شكراً 

ـ لا راح ادزلج وأشتركي أوك 

ـ قطع الأتصال وشوي وصلني رصيد وأشتركت وكعدت احجي وياه ونسولف ويحجيلي عن حياته وأرتاحيت وياه 

وطول هالأيام هو وياي وساعدني ويشتركلي أنترنت .. 

ـ بيداء أريد أعترفلج بشيء 

ـ شنو صوفي 

ـ أني أحبج . 

ـ نصدمت وجاوبته بعد وگت على الحب ممكن نضل أصدقاء 

ـ براحتج اني الج گلشي تريدينه . 

ـ شكراً صوفي دزيتله سمايل يضحك 

ـ فدوه لضحكتج . 

ـ مـا جاوبته وتجاهلته وكرهته من أعترفلي بحبه بس ضليت أتواصل وياه ويدزلي رصيد اشتركت وخلصت الأمتحانات الحمدلله جاوبت بيها وبعد النتائج الله يستر 

واخر يوم طلعت من الأمتحان وشفت لهفته عليه بس تجاهلته وكبل دزلي 

مالك ـ اليوم أريد أحجي وياج حبيبي . 

            

              

                    

بيداء ـ ما جاوبته تجاهلته حاله حال مصطفى كلكم كذابين وتركضون ورا مصالحكم ، وصلت البيت وفرحانه بروحي وأمي صافنه حتى ما سألتني تجاهلتهن ما ناقصه هم فوك همي وطول فترة الكعدت بيها بالبيت ضليت اسوي ماسكات واكعد ويه عصماء بالمحل بس مع ذلك ملل ومالك يراسل بس رسائله معقله ومصطفى يلح اجاوبه جواب عادي وأعبرهم الا بيوم وأني اتصفح بالفيسبوك علقت تعليق ولفتني أعجاب شخص لتعليقي ودخلت حسابه يجنن وشخصيه أنعجب بشكله! ، ولكيته دازلي طلب ووافقت ودخلي خاص وحجينا وسلام وطال الحديث بينا وصار جزء من حياتي وكل وقتي أسولف وياه وحبيته وتعلقت بي وهو صار يدزلي رصيد ويشتركلي وعلاقتنا تطورت وصور وأتصال لان حبيته حبيته بشكل مو طبيعي نساني مالك وأهل مالك والساعة الحبيت بيها مالك ... 

مهيب ـ دلوعتي وينج مشتاقلج  

بيداء ـ موجوده حبيبي بس تعرف من بعد تعب السادس ما جاي أشبع نوم 

ـ نامي حبيبي نوم العوافي ، صدك شوكت تطلع النتائج 

ـ كم يوم أن شاء الله ، تدري مهيب ما حسيت بالوقت وبسرعه بس لان أنتَ بحياتي 

ـ حبيبي والله ، أنتِ محليه حياتي والله ، أكول حبي 

ـ ها حبي

ـ من تطلع النتائج أقدملج على أهليه شتردين أنتِ 

ـ لا وين تقدملي أنت! وأهلي شـنو نسيتهم 

ـ شمعرفهم دبريها حبيبي أدخلج احسن جامعه بالعراق

بس وافقي وما عليج أنتِ بس أمري ومهيب ينفذلج

ـ حبيبي أريدك سالم ويخليك اليه وما يحرمني من حنيتك عليه بس وجودك بحياتي كافي . 

ـ عسىٰ ما أنحرم منج يا اجمل أنسانه شفتها بحياتي 

ـ أحجي وفرحانه وناسيه الدنيا كلها وياه ومرت الأيام وأني وياه على علاقة حب وطلعت النتائج والحمدلله معدلي زين وأهلي فرحوا بالأخص أمي طارت من الفرحه 

وأختي خطيه شفت الحب والفرح بعيونهم ومهيب شاركت فرحتي وياه ..

ووصلني مسج من مالك!! أخر الناس .

مالك ـ شدعوه هلكد بذاته لو حبي وحناني ما غزرن بيج بسرعه نكرتي وأبتعدتي ما صدكتي أعوفج . 

بيداء ـ أنتَ گلتها أعوفج يعني عفتني وأني أعوف ما أنعاف وتعرفني زين . 

ـ بس أني عفتج علمود تقرين براحتج ما أشغلج والهيج عن دراستج لان مستقبلج أهم مني وأنتِ تعبتي وأهلج تعبوا عليج أني مو هيج نذل أخلي تعبج يروح بسببي بسوالف ورسائل نلحك بعدين نعوضها . 

ـ نعوضها! أظن بعد وگت على هالكلام ولاتنسى نفسك أنت ما بررت ولا گتلي وهاي أعذار جايني بيها وأني مو غبيه ترى أعرف بيك أبتعدت من بعد اللي صار بينا ونزلت من عينك وعين الماما أكيد هي طلبت منك تتبعد عني لان ما ارهملك . 

            

              

                    

ـ عوفج من أمي واللي صار بينا أعتبري ما صار وجوه رجليج وگلشي عشناه الحضن والبوس اعتبربي لحظه ضعف وإشتياق وحب وأمنتي وترجمتي إحساسج بإشتياقج الي بهل الشي عاذرج وأني أحبج ومـا أريد أخسرج والغلط مني مو بس منج لهذا خلينا نرجع مثل قبل وإذا على أمي خليها عليه أني أحجي وياها وأفهمها وأصلح گل غلط غلطته . 

ـ صعب 

ـ يابه أني أعتذر منج وأعتذر نيابة عن أمي وقساوتها بالكلام وياج بس مهم تنسين ونطوي هالصفحه ونرجع حُبنا القديم وأوفي بوعدي الج وأتقدملج ونتزوج وأحقق كل أحلامح وأحلامنا سويه .. 

ـ أعذرني حبيبي طوفت ورحت وبعد مـا تفيدني سادس وخلصت ومعدل الحمدلله طلعت وأروح اشوفلي واحد من مستواي يفهمي ويفهم حُبي اله مو يركضلي ورة كلام الماما وأنتَ روح خل أمك ادورلك وحده على كدك تعيش بالخرابه مالتكم أني نسيتك من زمان من ساعة الأبتعدت بيها وكرهتني باليوم الحبيتك وثقتي النطيتها الك وهالبعد يكلفك هواي تروح بكيفك بس ترجع مو بكيفك ، بكيفي أني مع السلامه والله يوفقك ويه غيري .. 

ـ وين بيداء شـنو هالكلام واعيه أنتِ 

ـ مع الأسف بقمة وعي 

ـ وحُبنا نسيتي بهل السهوله 

ـ حُبنا وگلشي عشناه أنساه وأعتبره فشل وأتعلم منه علمود تعرف قيمة بنات الناس وحبهم وثقتهم بيك وبالأخير تبتعد بحجه والله بسرعه رخصتي نفسج وشرفح ونزعتي!! مشكور ورحمة الله والديك فتحت عيني على أشياء جنت غافله عنها . 

ما جاوبني تجاهلته ولكيت مهيب گومة مراسلني 

مهيب ـ وينج حبيبي 

بيداء ـ موجوده حبيبي اي وين وصلنا 

ـ وين وصلنا حبيبي . 

ـ وين أنت 

ـ بالبيت والله 

ـ شوكت تروح لشغلك 

ـ باجر اليوم أحتفل وياج بعيد ميلادي . 

ـ فدوه دزلي صور العيد ميلاد أهله مسويله وصوره يخبل ويمه أطفال! دزيتله منو هذول 

ـ أخواني الصغار ليش غرتي منهم 

ـ لا ليش أغار بس هيج سألت 

ـ لاتسألين حبيبي أني الج 

ـ أي حبيبي ضلينا نحجي بعدها عاف الحفله وطلع برة ومهيب من طبقه المخمليه والطاگه گلش وتواعدنا من

أقدم جامعه نلتقي ونتشاوف

وبيوم المديره دزت على البنات تكرم الأوائل وأجتمعنا أني والبنات نروح المدرسه بس ما توقعت هو يجي يأخذنا لان اتفقنا نأخذ تكسي بس طلعت وحده من البنات مبلغته وأجه وصعدنا سلمن عليه البنات وبارك الهن وعيونه تباوعلي بس أني تجاهلته واحجي ويه مهيب وأصورله الشارع وكل التفاصيل وناسيه عيون مالك تراقبني بكل ثانيه 

            

              

                    

وصلنا ونزلن البنات قبلي وأني أخر وحده ونزل وهو وگف منعني وين أريد أروح تأخرت . 

مالك ـ أريد أحجي وياج وبعدين روحي 

بيداء ـ مالك گلشي أنتهى بينا على شنو نحجي بعد مشيت ولزمني من أيدي وشد عليها . 

ـ من يمتى تتجاهلين مالك ونظرات مالك من يمتى

ـ من زمان مو هذا التريده وأنتَ وصلتنا لهل الحال 

ًـ أني لو أنتِ مـا مصدكه بنفسج أعوفج علمود تأخذين راحتج بغياب مالك؟ 

ـ أحترم نفسك لا شفت نفسك شوفه عليه شو دوخر مشيت مسافه وفتحت موبايلي شفت رسالة مهيب 

مهيب ـ من تطلعين راسليني لان راح اشتاقلج 

بيداء ـ أوك حبيبي وأنسحب موبايلي بلمح البصر مالك شتسوي جيب موبايلي 

ـ شبيج خفتي كمتي تموتين! شبي هالمهجوم يخليج تبلعين بريگج . 

ـ ما بي شيء عوفه تأخرت وطالبات يباعن 

ـ من أنعل أبوج لا أبو الطاالبات . 

ـ سحبه وگف بصف السياره ويدخن جگارته ويگلب بي وينزل بالمحادثات وأني افرك بأيدي وطلعت رفل صاحتني . 

رفل ـ يله وين صرتي تعاي 

بيداء ـ هسه أجي مالك أريد موبايلي رفع عينه وخلاها بعيني گبل نزلت رأسي خجلانه منه نزلت دموعه وعيونه صارن دم وأيديه وشفايفه يرجفون وأني افرك بأيديه تقرب فتح أيدي وخله الموبايل وكال بصوت مكسور 

مالك ـ لكيتي اليترس فراغي بالخير عليه الأخذ مكاني 

بيداء ـ مشه وصحت وراه مالك خل أفهمك مالك ما جاوبني وشغل سيارته وراح ودخلت المدرسه وشاركت صديقاتي فرحتهن بمعدلاتهن بس داخلي غصه وشكله گبالي وطلعنا ومالك ما موجود وحده من البنات خابرته تعذر بشغل وتالي أخذنا تكسي ورجعنا لبيوتنا بس مو ويه مالك ... 

وصلت البيت دخلت الغرفه ولكيت مهيب مراسلني تجاهلته وكبل وصلتني رساله مطوله من مالك كاتب بيها .. 

مالك ـ ديري بالج على نفسج مو كلهم نفس مالك مالك ما يتكرر بحياتج بعد ، وصح أني غلطت وياج بس اعترفلج بغلطي وتعهدت الج أصلحه والتريدنه يجرالج وجوه رجليج 

ومن يوم أعترفلتج بحبي الج ردت أتقدملج من أول ساعه گتلج بيها أحبج لان شفتج أنسانه تستاهلين أحبها واكظي العمر وياها وتكون شريكة حياتي بس ياريتني ما شفتج ولا شيء ياريت ... 

قريتها وضليت صافنه عليها وأيام اني عايشه بعالم الموازي حتى موبايلي عفته عشت كل ذكرياتي الحلوه وياه رغم غلطنا بس حب مالك محفور بگلبي وصار هالحب جرح وذكرى ماتت بالقلب والروح ... 

_______________

عصماء ـ الأيام تمر من عمارنا بس مو حاسبين الها حساب ولا فكرين بيا ساعه نغلط وبيا ساعه نفترك وبيا ساعه نموت! أختي خربطت بحياتها وأشوف خربطتها وأنصح بيها ما يفيد بس من شفت علاقتها أنتهت بمالك أرتاحيت وأستبشرت خير ويارب تلتفت على دراستها وأمي من تشوفها كل هما دراستها تشيل فكرة الزواج من رأسها لان بعدها مو مال زواج واكبر خطأ تعاقبها وتخلص من همها بزواج لان ما معلوم العواقب راح نواجهه بعد الزواج وانوب زواج أقارب . 

            

              

                    

طلعت خوش معدل وأنصدمنا بيها وأمي فرحت بيها ونوعاً مـا بعد ما جابت طاري الزواج إذا مًا غيرت رأيها 

وأختلف الاراء على شنو نقدملها واذا أهلي يكلف علينا ومو هلكد نعرف شنو أحسن قسم إلها واشوف الفرحه بعيون أمي وهي جانت كاعده بس صافنه أمي كبل حضنتنها وتبوس بيها . 

غنيه ـ الحمدلله ما ضيعتي تعبي بيج فدوه لطولج 

بس أروح أشتريلج سوار ذهب هدية مني الج لو أسويلجن كلايد بإسمائجن عصماء وبيداء شتگولن 

بيداء ـ بكيفج يمه لاتكلفين على نفسج . 

غنيه ـ لا شلون تستاهلن الف الحمدلله والشكر يبقى بس التقديم سهله أن شاء الله .. 

عصماء ـ تحجي وفرحانه ولليل كاعدين ومسوين كعده أحنه وعمتي شهله وعمتي هاله وعيونها على بيداء ما شالت عينها عنها . 

شهلاء ـ غنيه مـا تروحين وياي لبغداد باجر أروح 

غنيه ـ أي والله يرادلي روحه لشورجه وأتسوك مناك اهنا المسواك صاير جنهم شتكولين يمه عصماء نروح وهم أسويلجن كلايد . 

عصماء ـ بكيفج يمه . 

غنيه ـ هذا هو باجر نروح عود حاجي أبراهيم يحاجي أسكندر أخاف ما يقبل نروح وياج 

ـ سهله أني أكوله . 

عصماء ـ وأتفقنا باجر نروح البغداد وخلصت التلعلوله وبيداء گبل نامت وأمي طلعت فلوسها مجمعتهن وتحسب بيها وباوعت على بيداء نايمه . 

غنيه ـ أختج شبيها نايمه مو عادتها تنام من وگت والسهر على هل الموبايل المن تعوفه گومي شوفيها خاف مصخنه مريضه بيداء يمه بيداء مو احاجيج . 

عصماء ـ تقربت عليها نايمه بس گلبها يدك سريع نايمه 

ـ عوفيها نايمه تعبت خطيه الحمدلله ما ضيع الها تعب 

ـ يمه عوفي سالفة الذهب ورانا بيداء تريد من عدنا اخاف ما يكفن 

ـ لا ما عليج هذن هديه مني الجن وتعبج بالمحل گلشي ما حصلتي لا درستي سوده عليه . 

ـ لا يمه لاهيج تكولين مهم أختي درست ماكو فرق بس اني علمودها خطيه هم تريد مصاريف خاف نحتاج 

ـ عود أبيع هالعندي لاتخافين على أمج تدبر وهذا تعبج ما أريد أظلم وحده منجن ولو اني ظلمتج من ما كملتي دراستج . 

ـ لا هيج تكولين وتقهريني تقربت حضنتها وتبوس بيه 

ـ الله يرضى عليجن يله گومي نامي ورانا روحه البغداد 

ـ يمه خل أبيع تراجي مالتي وأخذ بيها كلاده والفلوس العندج اخذي بيهن كلادة لبيداء وباقيات عوفيهن الها 

ًـ گومي نامي هسه ورانا فراره علمود أخذج نتسوك مناك اذا كفن فلوسنا لان رخيص مو مثل منا جنهم 

            

              

                    

ـ أن شاء الله طلعت وكمت طلعت التراجي مالتي وحضرتهن وراسلت علي وبلغته بس صدمني من كال 

ـ ما يصير ما تروحين بغداد 

ـ ليش مـا أروح حبيبي 

ـ لاتروحين وخلص وأمج وزوجة عمج رايحات شعندج رايحه ماله داعي روحتج وياهن 

ـ ترى رايحه ويه أمي مو لوحدي 

ـ حتى لو مـا أقبل ، الصبح بلغي أمج دوريلج حجه 

ً ـ علي شبيك . 

ـ مـا تروحين وخلص وهالأسبوع أني اجي أتقدملج ممكن تسمعين كلمتي . 

ـ هالأسبوع شو هسه يله تحجي 

ـ خربتي أم المفاجأه ضوجتيني غير وحجيت 

ـ على شـنو تضوج ياعيني ورايحه بشغل ما رايحه أتونس 

ـ حتى لو ما أقبل 

ـ الصبح أشوف أمي واردلك خبر 

ـ أنتظرج 

ً ـ عرفته ضاج عفت الموبايل ونمت ومن الصبح حاجيت أمي وما قبلت 

غنيه ـ وليش ما تروحين وياي جديده هاي ست عصماء

عصماء ـ يمه غير مره وعمتي شهلاء وياج ما تقصر 

ـ عليوي گالج لاتروحين مو 

ـ نزلت رأسي مستحيه وجاوبتها أي وگالي هالأسبوع أجي اتقدم وسمعي كلمتي أبتسمت وحضنتني 

ـ مُبــارك يمه مُبــارك ، خل يجي وگتها بي خير ويتدلل علينا بس هسه أنتِ يمي ما اله أوامر عندي يله گومي لبسي وخل نمشي تأخرنا ومن نرجع نحجي بموضوع عليوي الخوش زلمه البصراوي أبو شوراب . 

ـ تضحك وضحكت وياها ورحت لبست جبة سوده وعباية رأس أيرانيه ضبطبتها وجواريب وحذاء أسود وشلت جنطتي ولكيته دازلي رساله 

علي نجم ـ ها بشري 

عصماء ـ طلبك مرفوض ما قبلت الحجيه ومن أصير على ذمتك تدلل 

علي نجم ـ عن قريب حبيبتي عن قريب وأذا أخلي الطير الطاير يلمح طولج بس علي نجم يباوعلج يله من ترجعين خابريني مشتاق لصوتج طگ گلبي عليج . 

عصماء ـ أن شاء الله ، طلعت وكعدت بيداء راحت ويانا لبيت جدي دخلت جوه وأحنا صعدنا ويه عمي أبراهيم وتوجهنا لبغداد ... 

دخلنا بغداد وأول مره أشوف شوراعها وضليت أمتع نظري بيها بس مجرد ذكر أسمها تنشرح الروح مو عاد تفتر بشوراعها وأسواقها ، وصلنا بيت أهل عمتي شهلاء نزلت الصوغه والمخضر وسلمت عليهم وأجتي ويانا لسوك گالت تتسوك وبعدين ترجعلهم علمودنا خطيه حيل تحب أمي وصديقات هي وياها من عمر 

وصلنا السوك ونمشي واحنه يباعن ويتلفن يمه شكو واكفات على هالحجي للمغرب ما نخلص . 

شهلاء ـ اظن مو بهذا السوك 

            

              

                    

غنيه ـ مو أجيتي هذيج المره ما تذكرين 

ـ لا خيه منين أجيت ليش زلمنا يخلون علينا فلس واني ما أشتري ذهب ألا أنتِ وياي واذا اشتريت من سوك بعقوبه أنكشف لان أبراهيم مخلي بيه خيط احمر واني جامعتلي كم فلس أريد اخذلي بيهن كسرة ذهب مو حرامات هم زينه وهم ذخيره . 

ـ أي والله يخيتي الفلس ما ينجمع أذا مو بالذهب وأريد افرح بنياتي ، أمشي خل نسأل لازم نندله 

ً ـ شجاج ناسيه مو جنتي قبل تجين عليه  

ـ وين ضال عندي بالي ومية الف شارع تبدل من زمان ما جايه من اسكندر منعني اجي وكمت اتسوك كله مناك . 

ـ حرام أني ولا ضاله عندي ذاكره ولج خيه عبالك هذا الشارع ما ماشين بي قبل جن جديد علينا شتكولين 

ـ شمدريني جن تيهنا اوكفي خل نسأل هذا الولد أكول يمه نريد نسألك 

ـ هلا خاله سألي 

ـ الحاج سعيد أبو الذهب وين صاير محله 

ـ ماكو أهنا خاله ، تروحين منا بعد بعد تمشين وسألي ويدلونج صاير مقابل صياغة أبو ليث مكتوب قطعة صياغة الحاج سعيد عبد الغني . 

ـ أي يمه الف رحمه على والديك أي سعيد عبد الغني 

ـ ووالديج تدللي خاله .

عصماء ـ رجعنا والحمدلله بس دخلنا الفرع أمي اندلته رجعت الها ذاكرتها ووصلنا المحل راقي بشكل لزمت أمي يمه صدك تحجين ندخل للمحل! 

غنيه ـ أي وليش ما ندخل وخري خل نفوت هذول كرابتي 

شهلاء ـ كرابتها شيحاجيها بعد عيني ، ولج ليش كمتي تطيرين فياله علينا قصص وروايات عراقية كرار صلاح شجابهم كرابتج سويتهم كرابتج ، عود كرابة أهلج من بعيد يجوز حتى ما يعرفونج لاتنفخين علينا لا اجضعج هسه . 

عصماء ـ عمه گوليلها هالحجي باعي المحل هذا مبين حتى أحذيتهم من ذهب مخابيل بروسنا عقل ندخل نشتري منهم ذهب أمشي خل نرجع . 

غنيه ـ شو دوخرن وأمشن وراي وما الجن شغل وهسه تشوفن شلونهم كرابتي . 

عصماء ـ دخلت ودخلنا وراها بس ولد شاب كاعد ونسوان ثلاثه كدامنا جاي يبيع الهن سلمنا رد السلام بدون ما يرفع رأسه . 

غنيه ـ الله يساعدك يمه . 

باسل ـ هلا بيج خاله أتفضلوا أستريحوا . 

غنيه ـ زاد فضلك أبني  

عصماء ـ دخلنا والمكان من كثر ما راقي بشكل وريحته طيبه تجنن عطر بحياتي ما شامته كعدت بصف أمي 

وعمتي شهلاء تباوع والولد يشتغل . 

ياسل ـ أي خاله لا هاي الحلقه نفس ما طلبتي تدللي عليكم بالف عافيه . 

عصماء ـ طلعن النسوان والمحل فرغ وباوع على امي 

            

              

                    

باسل ـ خاله أمريني 

غنيه ـ ما يأمر عليك عدو بس أبوك وينه أني اخذ منه 

ـ والله الحجي هسه طلع بس گوليلي شنو تردين وأعرضلج . 

ـ لا الأ ابوك أحنه نأخذ منا 

ـ حاضر هسه أخابره . 

ـ رفع موبايله وأتصل وباوعلي گبل نزلت رأسي 

ـ ها حجي وين أنت هاا أكو جماعه جايين عليك ما أعرف والله ما سألتهم ها أنت اهنا ماشي يابه ، عيني خاله جاي الحجي موجود كاعد يم عمي هسه ثواني ويجي 

عصماء ـ شويه ودخل علينا وشاف أمي وضحك وسلام حار هو وياها والولد يباوع لأبوه بنظرات غريبه! . 

الحاج سعيد ـ غنيه يا هلا ومرحبا شنو هالزياره الحلوه يالكاطعه من زمان ما شفناج شلونج صحتج شلونها 

غنيه ـ بالمهلي والله يخيي ملتهين بهل الدنيا شنسوي الحمدلله دارجه أنت شلونك عيالك شلونهم نسوانك وبنياتك كل منكم . 

سعيد ـ بخير الله بخير يا هلا بأم سجاد أتفضلي اتفضلي باسل أبني ضيفتهم 

باسل ـ هسه وصيت سجاد يجيني . 

سعيد ـ أي شلونكم أبو سجاد شلونه بعده عصبي 

غنيه ـ زوين اي نفسه شغيره . 

عصماء ـ يحجون وأني ساكته ورجع الحجي باوعلي وصفن بوجهي . 

سعيد ـ هاي البنيه وياكم 

شهلاء ـ أي ويانا هاي بنت غنيه 

سعيد ـ أم سجاد عندج بنات 

غنيه ـ أي عندي بنيات أثنين هاي الجبيره عصماء 

سعيد ـ ما شاء الله تبارك الرحمن الله يحفظها ويفرجج بشبابها وما تگولين المن ضامتهن أبويه . 

غنيه ـ الله يسلمك . 

عصماء ـ تحجي أمي وهو صافن عليه ما شال عينه عني وعمتي شهلاء غمزتلي ما فهمت عليها ورجع صاح على الولد 

سعيد ـ وين صارت الضيافه أبني 

باسل ـ أجتي . 

عصماء ـ قدم النا كاسات ماي وبعدها علبة حلويات وعصير وأمي كامت تباوع الذهب هي وياه واني كاعده بمكاني وصاحني بأسمي . 

سعيد ـ بنتي عصماء تعاي أنتِ أختاري؟ 

عصماء ـ عدلت عبايتي وگفت بصف أمي واباوع الذهب يخبل ويدوخ 

سعيد ـ جيب من يمك 

باسل ـ اي حجي 

غنيه ـ اريد كلايد بإسماء بناتي بيداء وعصماء 

سعيد ـ تدللي أنتِ وبناتج صدك جذب أم سجاد المحل محلج وأني أخوج ،أبني باسل شوف طلبهن . 

            

              

                    

باسل ـ حجي أسم بيداء متوفر عدنا بس أسم عصماء لازم نجهزه . 

سعيد ـ أي ميخالف جهزه أنتَ . 

باسل ـ بس خاف مستعجلين 

غنيه ـ يعني ما يجهز هسه 

باسل ـ لا حجيه يتأخر 

غنيه ـ يله لعد خلينا أسم بيداء وعصماء ما ناخذه شتگولين أخذلج محبس 

عصماء ـ كيفج يمه 

سعيد ـ شنو هالأسم الحلو منين لاكيه الها هالاسم 

غنيه ـ أبوها سماها وأحنه نصيح الها معصومه 

سعيد ـ عاشت الأسامي 

عصماء ـ أريد محابس ناعمه 

باسل ـ أي هسه هاي المحابس نفس طلبج وهذا أحلى شيء . 

عصماء ـ أخذته كلش عجبني وأخذت محبس بمكان القلادة ووگت الدفع وحسيت القلادة مو سعرها الاصلي لاتعاندوا هو وأمي والولد صافن على أبوه!! وانطينا الفلوس وعمتي شهلاء هم أخذت وكملنا وطلعنا ومن طلعنا أجه ولد شاب طويل وصاحب عضلات وجسم دخل المحل مستعجل . 

ليث ـ باسل جهزلي الكلادة گتلك عليها بسرعه النسوان ينتظرني هسه الحجي يخبصني . 

باسل ـ أصبر شبيك مستعجل لاتخبصني مثل عمك . 

عصماء ـ طلعنا وأمي فرحانه وعمتي شهلاء گالت 

شهلاء ـ أكلج هالسعيد هذا أگلج وشربج بالسلام واني ولا عبرني بس أنتِ وبنتج طار بيجن حتى من السعر ما نزلي شجاه شو دبك عليج خاف جان يريدج گبل . 

غنيه ـ من طاح حظ تفكيرج هو من يومه أبو نائل هيج ورده مالت الله يهلي ويرحب بالرايح والجاي بس حرامات أسم عصماء ما صار 

شهلاء ـ يله مو أخذتيلها محبس مهم طلعتي من خطيتها وتعبها بهل المحل المسكينه . 

غنيه ـ أي سوده عليه 

عصماء ـ أفترينا بالسوك وتسوگنا للبيت والوكت يركض ركض وعمتي خابرت عمي أبراهيم أجانا وصلنا عمتي شهلاء البيت أهلها وأحنه لبيتنا وصلنا تعبانين وأمي لبست القلادة لبيداء وفرحت بيها وحضنت أمي وتشكررت من عدها 

غنيه ـ هاي هدية نجاحج والله يقدرني ما أقصر وياجن

بيداء ـ الله يخليج النا وأنتِ عصماء وين قلادتج؟ 

غنيه ـ ما أخذتلها أسمها غريب لازم يجهزونه وما عدنا وگت عاد أخذتلها محبس بمكانه الله يرضى عليه حجي سعيد هواي ساعدنا وتساهل ويانا بالسعر

بيداء ـ أي بالعافيه أنتِ خوش مره الله يوجهلج الناس الطيبه . 

غنيه ـ الحمدلله والشكر يله صبن غده فايته الحمام اكب ماي على جسمي وأصلي . 

            

              

                    

عصماء ـ دخلت الحمام وأني غيرت ملابسي وأباوع المحبس كلش حلو وتغدينا وللعصر أمي راحت بيت جدي وبيداء تباوع مسلسل تركي مهوسه بالمسلسلات التركيه هالفتره وأني رحت فتحت المحل وصلتني رساله

علي نجم ـ بغداد خذتج مني وين مختفيه عليه حبيبتي 

عصماء ـ باوعت ماكو أحد وأتصلت عليه وجاوبني أني محد يأخذني منك بس هسه رجعنا وما كدرت أبلغك لان أمي وعمي وياي ويله تغدينا وهسه صحلي مجال 

ً ـ أي شأخذتي وحلوة بغداد 

ـ أي تجننن أمي أخذتلي محبس يخبل علي كلش حلو ونازك . 

ـ ذوقج بعد 

ـ لا والله ذوق أبو المحل لان ذهبهم كلش حلو كلشي تريده وأبالك موجود هسه من نتزوج ناخذ منهم لان كرابة أمي من بعيد 

ـ ها خير أن شاء الله ، لعد ذوق أبو المحل گلتي! 

ـ لا أقصد ردت نوعيه نازكه وناعمه هو گالي هاي أحلى شيء يعني ذوقي عادي 

ـ أي فهمت هم أفتريتوا 

ـ لا ما لحگنا بس تسوكنا ورجعنا 

ـ خوش عصماء صوريلي أيدج وأنتِ لابسه المحبس! 

ـ شنــو لا مستحيل 

ـ من موبايل أختج هسه أنطيج حسابي وبحثي عنه والله بس أشوفه على أيدج ومسحيها مستحيل أحتفظ بيها

ـ لا أبداً 

ـ عصماء شبيج بابا شـنو ما عندج ثقه بيه 

ـ لا عندي بس ماكو صور وهالأمور ممنوعه شتغير هسه تجي تخطبني وتشوف أيدي وخلص . 

ً ـ أعرف يگلبي أنتِ أعرف بس فضول لا أكثر أشوف المحبس وذوق أبو المحل أختاره الج وأني كاعد أحمس بروحي من القهر ومنعتج ورحتي . 

ـ ليش تخليني ازعل منك 

ـ خلص لاتدزينه ما أريد 

ً ـ زعلت 

ـ لا 

ـ شـنو أسم حسابك 

ـ أسمي وصورتي بحثي وشوفي 

ـ أوك باي 

ـ باي 

ـ أدري بي زعل رحت على بيداء أخذت موبايلها وبحثت اني أعرفله دائماً أكلب بموبايلها علمتني عليه ما ينراد اله شيء سهل بس ما أحبه متعلمه على موبايلي وبحثت وطلعلي دزيتله لايك وأتصل ورحت الغرفه فتحت خط 

علي نجم ًـ ها حبيبي . 

عصماء ـ شوف ما أدزلك 

ـ لعد عليمن مراسلتني من حساب أختج أمشي رجعي حاجيني من موبايلج وأنسي الصوره 

ـ بس خاف تزعل 

ـ لا هاي هي ما زعلان 

ـ قطع الخط وحسيته حيل ضايج أني شبيه گتله ذوق ابو المحل وتخبل عليه أكيد يغار گمت صورت كف أيدي ودزيتها شافها گبل وحذفتها . 

            

              

                    

ـ حذفي المحادثه وتعاي من موبايلج ما متعود عليج منا ، نبقى على البساطه التعلمت عليها . 

ـ حذفت المحادثه ورجعت موبايل بيداء شافتني أبتسمت بس ما حجت رجعت حجيت وياه أتصال وصدمني من گال 

علي نجم ـ حضري نفسج باجر أجيب أهلي وأجي أخطبج! ... 

___________

ليال ـ من هذاك اليوم وأني طفيت والطفاني الأنسان الأحبه وبإخر رساله وصلتني منه وبعدها ما جمعنا حتى السلام ... 

ليث ـ أحلامي وياج حتى السحر ما يجمعنا سويه .. 

ليال ـ ما جاوبته وبقيت رساله علمود كلما أقرأها أتشافى منه من الأذيه الشفتها منه ... 

مرت هالفتره وأحاول أتخطاها وأعيش حياتي طبيعي رغم كل اللي صار بس لازم تعدي يا ليال لازم ، مرت هالأيام الصعبه ومـا شفته نهائي وكلما نطلع لدوام يطلعون قبلنا وبرجعه كذلك أو هو متعمد ما يريد ينجمع بيه وتلتقي عيويننا ونرجع لنقطة الصفر وأساساً ما تجمعنا بعد لا نقطة ولا حتى حرف .. 

لاحظت رجع گلشي طبيعي الأهل رجعوا تحابوا والأخوان تراضوا وأمي وعمتي سلوى رجعن أخوات وصديقات وحتى ليث ويه أخواني كلشي رجع مثل قبل بس أحنا مـا موجودين صفحة وانحركت مو أنطوت .. 

وعطلنا وكل وقتي صار بالبيت أنشغلت بالرسم وتطورت موهبتي گلشي أعاني منه رسمته وفرغت طاقتي بي وتخلصت منه وأخواتي جنات يم بيت جدي ما مرتاحه الها أشك بيها داخله علاقه ! ولقاء بعيده كل البعد عن الحب وسوالفه مكتفيه بحب عائلتها وبقربها من عدنا كلنا وقريبه من أمي وصديقة باسل المقربه . 

وبيوم نمنا بغرفتنا هنا نامن قبلي أني ضليت كاعده أرسم ونومتي أصلاً متخربطه وتعودت على السهر أرسم وكل بالي يم الرسمه وسمعت صوت الا القلم زل عن أيدي باوعت ماكو شيء وأخواتي نايمات رجعت أكمل رسم وجنت منطية ظهري لشباك ولاحظت خيال غطه الشباك ظهري تجمد وبلعت ريك! أستغفر الله 

تخشبت والقلم وگع من أيدي وأختفى الضل! وبعدها سمعت صوت خطوات واحد يصعد الدرج ركضت وعثرت كعدت لقاء ولج لقاء . 

لقاء ـ شگو شبيج 

ليال ـ صوتج نصي سمعي أكو أحد بالبيت! فزت وباوعنا الباب وشفنا رجلين من جوه الباب ما كدرت أباوع گبل حضنت لقاء وغمضت وأرجف ويحاول يفتح الباب بس أحنه قافلينه وبعدها اختفى الصوت! 

لقاء ـ ما تبطل سوالفها الخايسه الا اذبحها بنت الگلب

ليال ـ أتصلت على باسل وأمي وبلغتهم وأجه باسل وفتحنا الباب مرعوبين وحضنت أمي أرجف وخايفه 

باسل ـ شگو يمعودات يوميه مطلعات النا سالفه هاي هم الفوك وين نوديجن بعد 

لقاء ـ أنت شبيك ما تصدك بينا 

            

              

                    

باسل ـ لان ماكو شيء هاي أنتن توهسن لو تشوفن أفلام رعب قبل لاتنامن لو متلبسجن جني . 

لقاء ـ لو شايف اللي أحنه نشوفه جان طلعت مصلخ ورحت ذبحت جواهر أم السحوره بدون ما يرفلك جفن 

ـ أي وجواهر شعليها بابا بطلن هالخرافات وشيلنها من رأسجن هي صح خبيثه ومكروه وتحقر بينا بس مو مال تسوي النا سحوره وعلى شنو تسوي شو أبويه وبس يمها كل أسبوع يجي كم يوم وباقي الأسبوع الها سحر على الماليه شو أبنها محل السجاد والمفروشات هو صاحبه والبيت القصر الجبير هي كاعده بي بعد على شنو تسوي سحوره بطلن هالخرافات والتفاهه 

ـ بس السحر مو تفاهه ولا خرافات ومذكور بالقرأن وأحنه جاي نشوف اشياء تابعه الها بس محد منكم يصدگنا لان ما مشمولين وهاي لعبتها علمود محد يصدگ بينا يمه أحجيلج كلمه خل أبنج يصدك بينا . 

باسل ـ أني رايح أكمل نومتي وراي شغل ويمه ضلي يمهن لا كل شوي متصلات عليه ومكعداتني من نومي عندي شغل ما فارغ لهل التفاهات ... 

ليال ـ طلع وأمي باوعت لـ جنات نايمه! 

هيفاء ـ ما كعدت من نومها مو 

لقاء ـ لا ليش تكعد أكيد ما مشموله بالسحر واضحه بس أني وأنتِ وليال المسكينه . 

هيفاء ـ أمشن وياي 

ليال ـ ماما وين طلعت ومشينا وراها أفترينا بالبيت ماكو شيء فتحنا باب الخارجي وأفترينا بالحديقه ولقاء اشترلنا وشفنا بيض مكسر!! 

هيفاء ـ هذا سحر علمود تهججنا من البيت لو تهدم البيت عوفي لاتتقربين عليه فتحي فلاشج شوفي مكتوب عليه شيء . 

لقاء ـ لا ما مكتوب شيء 

هيفاء ـ عوفي لاتلزمينه أمشي غسلي زين وتوضن وصلن وحسبي الله عليها شنگول أكثر من هيج سحرها يرجع عليها ويكسر رگبتها ان شاء الله .. 

ليال ـ دخلنا البيت ولقاء دخلت واكفه تغسل وأني أنتظرها وأمي دخلت المغاسل ولقاء تخشبت شكو 

لقاء ـ تعاي شوفي 

ليال ـ تقربت وشفت دم صافي بالمغسله مثل الواحد متيقئ شـنـنو هذا يمه گلبي راح يوكف واكفين ومرعوبين وطلعت أمي من المرافق الصحيه لازمه صدرها يمه تعاي شوفي باوعت وفتحت الماي صافي ما بي شيء . 

هيفاء ـ حسبي الله ونعم الوكيل بيج يا جواهر تاليتج تخبلين بناتي لان ما ماره عليهن سوالفج الخايسه . 

لقاء ـ يمه وتالي نضل هيج أني ما أسگت الها باجر أروحلها البيت أخنكها وادزها لنجف وشيصير خل يصير

هيفاء ـ وتنحسب عليج مره وجريمه سگتي الحياطين الها أذان ، يصبح الصباح ويصير خير . 

ليال ـ ما عرفنا أمي على شنو ناويه توضينا وصلينا وأمي نامت يمنا والصبح أحنا كاعدين وباسل طلع لشغل وأمي لبست عبايتها وطلعت وضلينا خايفين وجنات نايمه بسابع نومه . 

            

              

                    

لقاء ـ هسه تطلع جنات جنيه مجنده تشتغل لصالح جواهر وهي تفتر بالبيت ومسويه بينا أفلام رعب 

ليال ـ لا مو لهل الدرجه عاد لاتخبليني أمشي كعديها كعدتها بالكوه كعدت ولازمه رأسها 

حنات ـ أخ راسي صاير طبل الساعه بيش 

لقاء ـ بالعشرة 

ـ بويا شكد نايمه تريكتوا 

ـ لا بعد گومي غسلي علمود نتريك سوه 

ـ أوك 

ليال ـ طلعت ولقاء نفضت فراشها نفض والمخاد نفشتهن وملابسها حتى كفر موبايلها ها 

لقاء ـ گلشي ماكو ولج راح اتخبل ليش من نشوف أشياء هي ما تكعد وتضل بس نايمه!  

ـ هسه تجي أمي ونفهم منها ، ضلينا بالبيت ودخل علينا أبويه وسأل على أمي 

سعيد ـ أمجن وين 

لقاء ـ خالتي هيام أجتي أخذتها راحن لسوك 

ـ خير أن شاء الله ليال بابا سويلي أستكان جاي 

ليال ـ أي بابا سويتله وأجتي أمي سلمت ودخلت غرفتنا لحگتها لكيتها ترش وتقرأ أيات قرأنيه وشغلت المبخره 

هيفاء ـ سحرج عليه وعلى بناتي باطل بإذن الله باطل باطل . 

ليال ـ گملت ودخلت الحمام سبحت وطبخت النا غده وأبويه طلع ومرت أيام اني عايشه برعب عكس لقاء ولا تخاف وأمي مأمنه بالله وملتزمه وتصلي وتقرأ قرأن بس اني خايفه وأقل لمسه من أحد أفز وأعيط . 

هيفاء ـ الله وأعلم العرفته أنتِ مرشوش عليج سحر وهو خرب قسمتج وعطلتها والخوفه البيج من الصخام الرشته عليج المتخاف الله . 

لقاء ـ وتالي يمه نضل هيج . 

هيفاء ـ لا يمه ماكو شيء يضل على حاله وأني وراها شنسوي محد يصدگنا والله ينطيها خالتج تساعدني 

لقاء ـ حسبي الله ونعم الوكيل بيها والله لو تخلوني الا أبتلي بيها والفلفها . 

ليال ـ يعني ماما ماكو شيء يضرني 

هيفاء ـ لا حبيبتي أني أمج وتخافين تعاي بنيتي 

ليال ـ أخذتني بحضنها ولقاء تضحك عليه 

لقاء ـ شبيج أم دميعه ومعوزه حنان . 

هيفاء ـ هي فقيره مثلي طالعه عليه أما أنتِ طالعه على عماتج وكحه وشرسه . 

لقاء ـ عوذه وسبع عوذات أتشبه بالحيايا مو بالحيف أني لقاء بنت الحاج سعيد عبد الغني بس فخامه الأسم تكفي . 

والله حلوة مال أنشرها حالة على الواتساب وأخليهن وحده تطحن الثانيه نجلاء ثور وأنسام هم ثور بس لابسه وصله حمراء اللون . 

ليال ـ ضحكنا على سوالفها واجتي جنات دفعتني وأحتلت حضن أمي وبس نامت بحضن أمي . 

هيفاء ـ لاتنامين على صدري نفسي ضاك عليه 

لقاء ـ وين نمتي على صدرها رأسج بكد رأس الثور 

جنات ـ عابت بكد رأسج اسفه ماما مو قصدي 

هيفاء ـ لا حبيبتي بس أني هالفترة صدري مأذيني ينرادلي أروح الطبيب أسوي فحوصات . 

لقاء ـ بس يجي باسل أكوله والعصر نوديج وبدون أهمال.، هذا ابن حلال اجه باسل 

باسل ـ خير جنتوا تغتابوني . 

هيفاء ـ لا يمه مو بالحيف يله گومن صبن الغده هسه أخوجن جوعان . 

باسل ـ أي والله ميت جوع بس ننتظر الحجي گال هسه الحكك ويمه صدك ديري بالج عليه لايتزوج الثالثه 

هيفاء ـ ليش خير شسمعان عليه . 

باسل ـ اليوم بالمحل أجتي حجيه حلوة ولزمته سوالف وهو يهلي ويرحب بيها عبالك معاشرها من عمر سألته منو هاي يگولي وأنتَ شعليك . 

هيفاء ـ ها لازم ما عرفت من هي؟ شـنو أسمها 

ـ بلي أسمها غنى يمكن بس يكولون الها أم سجاد 

ـ ما سمعانه بهل الأسم يجوز من معاميله يمه أبوك ما عنده سوالف مكسره لا بشبابه ولا هسه هل السوالف بس عندك . 

ً ـ يم أبو العُلا 

ـ مفتخر بعد عيني 

ـ الحب مو عيب ولا حرام يمه بس شسويلكم ما تعترفون بالحب ، وهذا الحجي أجه . 

ليال ـ سلم وكعد وكمنا صبينا الغده وكعدنا نتغدى وكملنا وباسل انطوى على نفسه يگلب بموبايله واني صبيت الهم الجاي وقدمته لأبويه 

هيفاء ـ منو هاي غنى تهلي وترحب بيها! 

سعيد ـ يا غنى يمعوده 

ً ـ والله اسأل نفسك أنت أعرف منو غنى أني ما خلصت من جواهر تطلعي غنى! ناقصة قهر يا سعيد 

ً ـ أستغفر الله شبيج يا مره منو حاجيلج ومخبلج عليه

ً ـ أم سجاد أجتك المحل اليوم 

ـ أهاا دگولي هيج لك البلبل الفتان أنت ما تبطل هالعاده توصل لأمك وتخبلها عليه . 

باسل ـ والله حجي أنت أملاك أمي وأني وصي عليها 

سعيد ـ من عابت هيج وصي وهيج فتنه من غنيه غنى گلبت أسم المره 

ـ البركه بيج حجي حافظ أسمها على ظهر الغيب 

ـ لك هاي المره خوش مره ومن كرابتنا ومتعبتها الدنيا وجانت قبل تجي علينا . 

ـ ها هيج الحجي شمدريني عبالي صاحبتك 

ـ أدبسزز 

ليال ـ ضحكنا وباسل ضحك وشال كوب الجاي وراح الغرفته ولقاء تگلب بموبايلها وسمعت أبويه يححي ويه أمي 

سعيد ـ لكيت بنت الحلال ومره لأبنج! 

شكرا لزيارتكم عالم روايات سكيرهوم