رواية نعم أحببتك الفصل السابع 7 بقلم انين الليل

كعدنا انا وبنات خالتي نسولف للصبح وكل شويه انا اباوع للنقال خليته ع الميز ما حبيت البنات يشوفن رسايله 

لان اكيد هو هسه مراسلني 

هنه سامعات بهذا الي راد يبوك الجنطه وشلون اكو واحد شبعه كتل صارن كل شويه 

وحده تسألني عن سعد 

وانا صرت اتكلم عن شجاعته وشلون واجهه وفهمتهن انا ما اعرف اسمه وكل وحده منهن رسمت صورة اله 

بخيالها عنه وعن شهامته و رجولته وعن جماله 

بعدين خذتنا السوالف على الموديلات وعه المطربين والاغاني الجديده وهيج لمن ما نمنا بالساعه أربعه الفجر

الصبح كعدنا تقريبا ب 10نزلنا شربنا جاي 

لكيت امي و خالاتي يشون سمج مسكوف بالحديقه لذلك ما اكلنه شي

سوينا السلطه ونظفنا الخضرة وخالتي رجاء خبزت خبز حار بالتنور

يم يم يم 😊😊سهمكم العافيه 

ولكيت امي مسويه تمن وفوكه شعريه بعد ما كملو إجه بابا من صلاةةالجمعه 

واجه زوج خالتي سميرة وابنها ليث وخطيبته وفرشنا بالحديقه لان كان الجو حلو لابارد ولا حار

تقريبا شهر 11

 اشوف عتب بعين خالتي رجاء على خالتي ام ليث وليش ما خطبت تماضر الابنها وهي الوحيده احسن تروح للغريب

 اقلها ابن خالتها تنسند علي بس بنفس الوقت اعرف خاله سميره ابنها ما يمشي بكيفها 

لذلك امي اخذت خاله رجاء على صفحه وحاجتها 

خيه ام تماضر الزواج قسمه ونصيب واحنا اخوات مو تخلين بزرنا يفرقنا 

رجاء/:اعرف وفيقه بس انا حطمت نفسي ورفضت اتزوج اخاف زوجي يعلي صوته على بتي مو دووم تسمعيها 

تكلي اريد توته الليث

امي //رجاء شبيدها ابنها حب البنيه واصر عليها 

رجاء /:وانا شكايله الله يهنيهم جنت اتمنى ليث ياخذ تماضر حتى باجر تلكى سند وانا هم من اوكع الكى الي 

يشيلني منو كال باجر الغريب يلمني   

امي/:كولي يالله رجاء شنو هالحجي وانا وين رحت وزيوني وبهاء وداعتج الج البيت وكلنه نطلع 

رجاء/:ادري بيج وفيقه ما تقصرين 

امي /:رجاء احنا اخوات وسميره مبتعده عنه ملتهيه بزوجها وعيالها مو انتي تعرفين تره صدگي لو ما بناتها 

هي فلا تجي وحسين خابر رجلها وابنها شنو جديده عليج عدها اهل زوجها فوك الكل 

رجاء/:اي والله عبالك متعجبه مو هاي انتي ما شاء الله حجي حسين اسمه معروف وهم عندج حمووين وعيال 

اشو ما عفتينا بالعكس ابو زيوني بكل شي ذاكرنا الله يطول عمره 

امي/:فدوه الج ياروحي تسلمين صيري مثل توته ما شفتيها بالخطبه 

شلون ذبت لحم بالركص هسه ما علينه يالله احبيبه خلي نصب 

طبعا انا جنت بالباب البراني مال المطبخ واتصنط 😜😜😜

+

وكعدنا تغدينا وامي خلت القوري مال الجاي على الفحم وكعدنا نأكل ونضحك ورة الغدا كفينا المواعين وصبت 

امي الجاي بعدها كامت منال تبدل الابنها وتحضر نفسها علمود يرجعون البيتهم لان وراهم دوام 

ا نا وبنات خالتي خلينه المواعين بالمطبخ وكعدنا بالحديقه نسولف ونضحك

وبابا وزوج خالتي وليث وزين ومظفر راحو الغرفة الضيوف وامي لحكتهم بالجاي 

واحنه بالحديقه شفت مظفر راح للغرفه يم منال ورة شويه سمعت منال تصيحلي

بثينه حبيبتي تعالي شويه رايدتج 

انا من سمعتها رحت كتلها = ها منول شنو هسه راح ترحون حتى ما شفناكم   

منال//اي هم يالله نوصل ونرتاح وباجر أحضر شغلي لان الأحد تعرفين عدنا دوام  

= زين منال خلي حسوني يمنا والله اخلي بعيوني 

منال /:ادري بثينه بيج بس المشكله انا ما اكدر اعوفه وانتي دواام وامي ملتهيه بالبيت 

= يا منال حتى عندي تخافين علي شلقصه ما تعرفين بيه شكد احبه الحبيب خالته 

منال /:لا والله بثينه بس تعرفين انا متعلقه بي انتي شدي حيلج واتزوجي وخلي يصير عندج واحد يشبه 

حسوني وبنيه تشبهج 

انا خجلت من مظفر وكتلها = يا اليجي مو مثل حبيب خالته 

منال /؛وج هو خلي يصير بعد ما تعرفين حسوني وين صاير 

= ياالله حبيبتي توصلون بالسلامه بس شنو ردتي مني  

منال//اكلج بثينه اريد احجي وياج انا ومظفر بموضوع ونريدج تفكرين زين وبعدين تبدين رايج

،،،!،،،،انا= ا😃😃😃😃تفضلي وانا اسمعكم

منال//شوفي حبيبتي بثينه اكو ولد يريدج وحجى ويانه ودزانه عليج انا ومظفر ،،،،

،اهنا تدخل مظفر وكال //

والله بثينه هو خوش ولد مؤدب ومعروف وعنده مركز اجتماعي مرموق وهو مستعد الكل شي تامرين بي 

انتي بس وافقي 

منال/ومستعد يخليلج بيت ابحدج لان كلش يحبج ومتمسك بيج

مظفر /:ولو ما ندري بي مشتريج وراح ترتاحين ويا والله ولا نفتح وياج الموضوع 

ولان نعرف من تاخذينه راح ترتاحين هاا وهو ما مستعجل براحتج تكملين كليه وبعدين تتزوجون 

منال //هو يريد بس يضمن موافقتج ويخطب ويلبس الحلقه ومثل نا كال مظفر حاضر الكل شي بس انتي وافقي

انا اسمعلهم بعدين واشوفهم متحمسين رديت = امبين من كلامكم عنه اني اعرفه ،

هزت منال رأسها يعني اي 

صفطت اديه = ومنو بالله هذا الي دازكم واسطه على مود أوافق علي 

منال //شبيج بثينه صرتي اعصاب 

انارديت عليها ولان عرفته جاوبتها بنتر = لا منال بس اريد اعرفه منو هذا الكاتل روحه عليه عبالك الليدي ديانه

منال /:هو يشوفج اجمل واحسن من الف ديانه 

=اي غير افتهم منو هو 

منال // اياد ابن عمي بثينه والله اياد خوش ولد وهاي فرصه لا تضيعيها من ايدج و......

قاطعتها بعصبيه // اوووه هم اياد شنو هذا مايفهم منال تره اياد اني اعتبره مثل اخوي

منال//بس بثينه اياد يريدج وشاريج والله لو تشوفين من حجى ويانه انا ومظفر ما تعرفي مو اياد صاحب الشخصيه 

والمنصب لا والله انسان هادي وكال بصراحه انا احبها ومستعد اسوي كل شي تريده 

انا بقلة صبر =فكينا بالله منال تعرفون رآيي بالموضوع انا ما اشوفه إلا مثل اخوي 

مظفر /بس بثينه دائما البنيه من تأخذ الي يحبها افضل ما تأخذ الي تحبه لان الي يحبها راح يخاف عليها ويسوي

كل شي يرضيها

انا= صحيح كلامك ابو حسين انا وياك لكن المشكله بيه اني وبصراحه وليش الكذب انا ما أريده 

ما احبه هاي البنات ماليات الدنيا ويتمننه ليش يجي بس عليه

منال/بثينه لان اياد بحبج من انتو زغار تتذكرين من جان يجمعنا ويضربنا لان انتي زعلانه وتخبثين علينه يمه

 حبيبتي بثينه فكري بالموضوع اياد مو مال وحده ترفضه

انا جريت نفس = منال الله يخليج ما اطيقه لا يتعب نفسه ويتعبكم انا قافله ما أريده 

منال/اويلي منج يثينه شكد عنوديه 

انا بنتره = ليش منال انتي مو أخذتي مظفر على حب هو يحبج وانتي تحبينه يعني مو حب من طرف واحد وهاي

 انتي تسوين كل شي يرضي وبالمقابل هو هم يسوي الي تردي 

منال//بس اياد لو شنو تردين يسويلج هو كال ما اخلي شي بنفسها قبل لا تكوله اكللها تم بس كون تقبل 

هزيت راسي = ما اريده هذا ابن امه لوونسيتي شجانت تسوي بينا من احنا زغار 

منال /:وهسه كبرنا وافتهمنا وكتلج اياد يكول شتريدتعتبره صار 

= ما اريد منه شي بس يعتقني ولا كل ساع يدز ناس احبها اموت عليها اسويلها والله ياالله شكد لزكه هذا وما 

عنده احساس

منال /عيب بثينه هذا ابن عمنا 

= لعد فهموا خلي ابن عم وبس،خلي يسد الموضوع ولا كل يوم فاتحين هذا الموضوع انا كلت رايي ولو شيصير 

ما اتراجع عنه ،

منال /:حتى لو اكلج امي وابوي موافقين بس بابا يستحرم مايريد يجبرج 

= منال حبيبتي انا اياد ما اريده ولو يبقى اخر رجل بالعالم ما اخذه رجاءا ابو حسين

(درت على مظفر) تفهمه الابن عم مرتك انا مو من نصيبه خلي يدور على بنيه تحبه وترضى بي 

مظفر /:مي خالف بثينه فكري ما تخسرين شي ادرسي الموضوع من كل جوانبه حكمي عقلج قبل عاطفتج 

ولا تباعين شيكول كلبح 

منال /:لو بس ادري انتي ليش ما تردينه الاياد 

ابتسمت وگلت = منول حبيبتي تره كلشي بالغصب بس الزواج بالاتفاق وهذا امه كريمه تجينه وبيتنا وبس تتناگر وياي 

اتصور مظفر ابيتنا گاعده ويمها سم اقصد چاي او عصير وهي تغم بيه لو تعوج بحلگها او واگفتلي ع الكلمه 

بربكم من اخذ ابنها هاي شتسوي بيه 

منال //مو الولد گال اخليلها بيت ابحدها وما عليج بامه 

رديت باستهزاء= ايخليلي بيت هي اذا وگفت هو يوگفلها استعداد ويباوع لعيونها شتحچي انوب يخليلي بيت وين باالله بالقمر منال //انتي بثينه طول عمرج عنيده 

هزيت راسي =لا مو عنيده انا واقعيه ياالله من رخصتكم 

وطلعت من الغرفه وانا صايره نار وكعدت بالصاله احس عبالك طابوكه على كلبي هاي من اسمع اسمه اضوج 

خالاتي گاعدات بغرفة ماما وبنات خالتي بالحديقه رفعت البرده وأشرت الهن من الشباك اجن كعدنا بالصاله 

وصرنا نباوع ع التلفزيون ورة شويه طلعت منال ومظفر شايل حسوني ومنال بيدها جنطتها وجنطه ثانيه بيها

 ملابسهم وسلمت علينه و طلعنه وراها راحت للديوانيه سلمت على بابا وزيوني وعمو وليث

ابوي طلع وراهم وخله فلوس كللها هذا مصرف الحسوني اخذتهن منال وسلمت وراحوا 

********&&&&**********&&&&*****&&

ليث همانين اخذ خطيبته وراح يوديها الاهلها وانا والبنات كمنه على البيت والمطبخ غسلنا وغسلنه المواعين 

والعصر راحو بنات خالتي وخالاتي انا ردت تماضر تبقى بس كالت عدها امتحان غير مره 

وانا صعدت الغرفتي لكيت أكثر من مية رساله جايتني من سعد ومكالمات كومه ولكيت رساله من رقم غريب يكلي

(هله بت عمي منور الواتساب )عرفته اياد واكيد ماخذ رقمي من زين العابدين 

ما اهتميت الرسالته رحت قريت رسائل سعد من البارحه وهو يدز 

هاي وين صرتي

الو 

ليش ما تردين

خو ما صاير شي ظل بالي

بعدين اليوم العصر كاتب،،،،،

الي يخليله تلفون اوبي واتساب لازم يرد ينطي رفض مو يخلينه متعلكين آسف إذا كنت ضايقتج، ،

،، يبوي هذا زعل (شيخلصج ياطلابه) على كولت نبأ صديقتي 

سديت الشبكه علمود توصله الرسائل جرة وحده

انا//

=السلام عليكم

=اسفه 

=والله التهيت ويه الخطار

=البارحه طلعنه للحديقه ورجعنا متأخرين 

=وصعدن البنات وياي بالغرفه ما كدرت اطلع التلفون واراسلك

=وهسه توهم ياالله راحو 

=لاتزعل ارجووك وانت ابد ما ضايقتني اتا الي اسفه لان خليتك تنتظر ،،،

،،فتحت الشبكه ودزيتهن وصلن ما قراهن رغم شفته متصل انتظرت شويه ماكو عفت النقال على الميز ودخلت 

خذيت حمام من طلعت شفت جايتني رساله فتحتها لكيتها من اياد

(هلو بزونه انا اياد )

سويت حركه بوجهي وانا اگول = اووو شكد غثيث وقديم هسه وكت بزونه هذا من جنا بنفس البيت وجنا نلعب 

جان يسميني بزونه لان ما جان يكدر يلفظ اسمي 

ضحكت وانا اتذكر شلون ابوي يكله كول بثينه 

هو يكول بسينه بعدين يكول بشينه 

لمن ما كلوله شبيك سميها الي يعجبك 

كال راح اسميها بزونتي 

اتذكر امه كالت عليمن مسميها بزونه شنو من لون عيونها

نفخت وانا ضايجه كلت ويه نفسي = خلي اتصل علي لا كل ساع يكتبلي مالي خلكه 

اتصلت ويه اول رنه شاله 

:: هله به الصوت 

= هلو اياد منين جبت رقمي 

اياد غير نبرة صوته وحچى بعصبيه ::من الاستعلامات يعني منين لو من زين لو عمي لو ساهره شنو كيميا

،انا جاوبته بنتر = اوگف اوگف على كيفك هاي اشبيك شنو انت الي يحجي وياك لو يسالك بس تتعارك ويا

ما عندك غيرها 

اياد = مو انتي فد وحده ما تعرف إذا ما تنرفزيني ما ترتاحين 

انا رديت علي بعصبيه = على كيفك خاف عبالك انا شرطي وياك لو مجرم هاي شبيك احجي وياي بهدوء 

اياد جرنفس قوي بعدين رد علي بهدوء ::انا بعدني ولا حاجي وانتي ولا عاجبج 

اهنا اياد احسه جر حسره وسئلني ::بثينه ليش تضوجين مني انا شمسويلج

حجيت ويه روحي = هسه شيخلصني من قيس ابن كريمه خليني أنهي الاتصال 

انا جاوبته بهدوء = انا ما اضوج منك قابل انت شمسويلي

ماخليته يجاوب 

=ياالله اياد اعذرني انا عندي دراسه وشكرا ع السؤال 

اياد ::العفو انا كتبتلح على مود تحجزين الرقم يمج اخاف تحتاجين شي 

 شكرا ما تقصر سلم على الاهل

نهيت الاتصال شمرت النقال وانا احس نار تطلع من كلبي 

/////////////////////////////////////////////

اياد 

سد التلفون وصار يحجي ويه نفسه 

اشو من سئلتها ليش تضوجين مني كالت ما اضوج بدون نفس وما صدكت يمته تنهي الاتصال 

يعني اكيد هي تضوج مني بس انا احبها اوووف استغفر الله ياربي ما اتصور حياتي بدونها 

ولازم اخليها تحس بيه يعني خلي أشوف هي شنو الي يضوجها مني وانا أحاول اغيره

بس انا اتنرفز من لبسها اويلي مدمرني أستغفر الله كل محاسنها بارزة وهي ما عايزة 

ومن تطلع حتى الطفل التوه صاير هم يباوع الجمالها وانا اتشعوط من القهر ودي اكسر 

كل شي كدامي ما اكول إلا الله يصبرني

والمصيبه اذا اجو عليها ناس والله ما اخليها تفووت 

شنو تاخذها غصبن عليها 

اي اخذها انا ما قاصرني شي يعني التاخذه مو احسن متي

______________________________________________

بثينه

 احنه اصلنه وسكن جدي ابو والدي محافظة واسط بس امي بغداديه لذلك انا ماخذه اللهجة من بغداد ومن واسط 

لا تتعجبون من الفاظي، وبيه ميزه بس اقلد اللهجات بمجرد ما اسمعها احفظها 

بيومها شمرت النقال وانا ضايجه لان شفته السعد قاري رسايلي بس ما جاوب عليهن اتمددت عن الجربايه 

وفتحت اللابتوب وكمت اقرأ موضوع بالترجمة مهم ولازم اترجم بعض الكلمات واعرف معناهن 

انا أقرأ بس كل شي ما ا فتهمت وانا بس انفخ واحرك برجلي بقيت متوترة واسال نفسي 

=ليش ما رد عليه شنو هذا دا يلعب باعصابي خلي يولي اذا ما رد عليه باجر احضره 

=والكلاده بثينه 

=الكلاده ارجعها اله يجي للكليه واشوفه وانطيها اله 

نزلت حضرت عشا ما اشتهيت اكل امي سالتني 

:شبيج ماما ليشءما تتعشين 

رديت بدون نفس = ما اشتهي 

امي //شبيج مو على بعضج 

= ما بيه شي تعبانه وباجر عدنا كوز صعب 

: اصعدي ومن تجوعين نزلي اكلي

صعدت وانا فعلا ضايجه فتحت النقال اجاني الرد كاتبلي 

سعد//كلت ما ارد بس ما انطاني كلبي 

:ترة للعلم بعدني زعلان 

:لأن حسيت بيج انا ما اعنيلج شي

رأسا انا رديت كتله = لا انت صديقي ولازم تعذرني 

سعد //اي بس انتي لازم تصالحنيني 

= مستعده 

سعد/تقبلين عزيمتي عه الغدا باجر 

انا احس الدم صعد الراسي او وجهي صار احمر =اوكي بس خليها للظروف 

سعد//اعتبره وعد 

= ان شالله بس لاتزعل ياصديقي

سعد//راح اسامح بشرط باجر من تجين للكليه ألبسي الشال الوردي والحذاء الوردي 

انا اتعجبت من طلبه وجراته بنفس الوقت جاوبته بسؤال = شمعنى الشال والحذاء

سعد/:الحقيقه من تلبسيهن اشوفج مختلفه عن الكل يعني الصراحه تصيرين عبالك اميره من اميرات دزني 

انا من سمعت هذا الشي فرحت جاوبته = ما طول الشغله بيها اميره ومن دزني خلص الف طلب من هالطلب

بصراحه انا متعجبه على روحي اشو اكتب له بميانه وماخذه راحتي بالكتابه وياه كلها أمس من بدينا

نحجي قصدي نكتب رسائل بس انا اكو شي بداخلي من أتذكر صورته واناقته وشلون ضرب هذوله

الي رادو يخطفوني انبهر أي مبهوره عبالك ولا شايفه رجال ولا جني من اطلع العيون كلها علي 

وانا ولا اعبرهم

بس هذا شي ثاني 

من طلب مني سعد ألبس الشال الوردي والحذاء تفاجئت بطلبه 

وبنفس الوقت انا فرحت طرت من الفرح لان حسيت بي هو مراقب 

كل شي بيه الكلاده واللبس 

 اريد بس يصير الصبح حضرت ملابسي والشال الوردي الفاتح وحذاء

 بلونه لان احنه بالكليه ملتزمين بالزي من تلث او اربع ألوان ماعدا 

الشال والحذاء والجنطه فأنا دائما انسقهن سووا

من سمعت سعد شنو كلي انا صرت بغير عالم حسيت نفسي انسانه محبوبه ومرغوبه 

لذلك ردت بس يجي الدوام والبس الي راده مني سعد سعد الي ما اعرف شنو يصير بيه من اشوفه يكتب عبالك 

كاعد يباوع الي واحس وهو يكتب احس بي يبتسم 

ظليت صافنه على نفسي بعدين صرت احجي 

=هاي شبيج بثينه تخربطت امورج بمجرد كلمات دزاهن الج حتى

ما كالج انا معجب بيج او احبج 

=شبيج بثينه اثكلي شويه لا تصيرين خفيفه نسيتي اياد شنو كل المنال ومظفر 

=اهوو هذا الشنكه شجابه بالوسطه شكد اكرهه واضوج منه جبحه

=حتى نفسي تلعب من اتذكر اسمه 

=عيب بثينه شبيج تره اياد خوش ولد 

= اي وانا شكايله اياد خوش ولد بس انا ما احبه ولا اطيقه 

=لعد بثينه تحبين منو سعد مو ؟

انا ظليت صافنه على روحي واسال 

=سعد شنو بالنسبه الي ؟وليش تتخربط اموري من اتذكر اسمه وكلبي بسءيخفك من اقرا كلماته 

لكن اكو شي مخوفني ما اعرف شنو بس احساس بالخوف 

/////////

شكرا لزيارتكم عالم روايات سكيرهوم