رواية نعم أحببتك الفصل الثامن 8 بقلم انين الليل

//بثينه//

كعدت الصبح واخذت حمام جففت شعري ولبست تنورة بينسل سوده وبدي اسود وفوكه قميص ابيض قصير 

ولبست الشال الوردي والحذاء الوردي ولبست جنطه سوده وصبغة أظافري وردي وأسود وخليت باودر ومكياج 

خفيف وبخيت عطري المفضل يمكن بخيت العلبه كلها ولبست سوارات والسبحه الي هداها الي ذلك 

الكائن اللطيف 😉😉😉😉😉

وطلعت لكيت امي وابوي كاعدين يتريكون بست بابا واخذت قطعة 

جبن ونص صمونه واكلت لكمتين

وشربت شويه جاي امي كالت 

:دكعدي يا ماما واتريكي مثل البشر 

جاوبتها بابتسامه =جان ابدي وفيقه بس صوجج ما كعدتيني على وكت ملتهيه بحجي حسين وناسيه عندج مسؤوليه

بيت واولاد امهات اخر وكت ياالله الحمد لله على كل حال 

بابا ضحك وامي تكلي /:يممه ياام لسان منو يكدر عليها 

رديت = وداعتج حتى القوه الغاشمه اقصد كريمه انا لها بالمرصاد

امي وابوي صارو يضحكون وانا سويت الهم باي بايدي وطلعت 

ورحت ويه صديقاتي وصلت للكليه ما شفت سعد حضرت المحاضرة

 واصلا مو يم الاستاذ بغير وادي صافنه ما صدكت خلصت وطلعت هدى كلتلي 

:بثينه وين مو هسه دكتوره سبأ تجي 

جاوبتها بانزعاج = هسه ارووح اكللها راسي يوجعني ودايخه

وفعلا طلعت واتلاكيت ويه الدكتوره كتلها ما اكدر احضر المحاضره

 لان دايخه هي سمحتلي وطلعت بوجهي للكافتيريا وانا امشي سمعت

 واحد يمشي وراي ويكول //انا لو بمكان الخاطفين ما اعوفج الا على موتي

انداريت بعصبيه شفته سعد بس ليش هيج يحجي سلم علي 

كتله بتعجب = شنو هاي لو بمكان الخاطفين ،،

،،رد وهو مبتسم وكلي//والله إذا كل اليخطفوها باناقتج وجمالج يستاهل الواحد يموت على مودها،

،وسلم عليه بلطف //مرحبا يا انسه ترة بعدني زعلان بس المشكله تعودت اشوفج

انا من سمعت كلامه احس وجهي صار نار من الخجل دنكت وبعدين كعدنا بالكافتريا هو اصر اله اتريك 

كتله بس اشرب كهوه طلب اثنين كهوه وصار سعد يسولفلي على إعجابه باناقتي وشلون اعرف انسق الالوان 

والبس اللون الي يلوكلي 

انا اتشكرته على اطرائه الجميل باوعلي وكلي 

:شكرا الج يا صديقتي العزيزه لا وحتى لبستي الشال الوردي ما اعرف بشنو اوصفج 

انا حاولت اغير الموضوع صرنه نسولف على ايام الدراسه وسئلته

=انت شمخلص

سعد//اداره واقتصاد قسم محاسبه /

=وشنو تشتغل 

سعد طلع جكاره وصاريدخن وانا اباوع اله وهو جاوبني //اشتغل بالتجاره 

= يعني انت تاجر بشنو تتاجر

سعد باوعلي هز راسه كأنه يستفهم مني 

انا بخجل =امم مو بابا هم عنده محلات ويستورد بضائع عبالي انت مثله او الك معرفه بي

سعد جاوبني //لا ما اعرفه ما متعامل ويا بعدني وع العموم ياانسه 

انا اتاجر بكل شي كل شي حلو تطيح علي عيني اتاجر بي

=زين ولو تدخل حضرتك شلون تجي للكليه 

سعد//بالحقيقه ولد صديقي اخو يداوم اهنا فادخل ويا، ،،

،!،بعدين باوعلي وكلي //بثينه اريد اطلب منج طلب ممكن وانا راح اكوله بدون ما اسمع

 ردج خلي نتغده باجر بمطعم

انا راسا جاوبت واحرك بايدي = لالا ما اكدر شلون أطلع 

سعد بين علي الامتعاض /: مو انا يجوز هذا ابو الاستعلامات بعد ما يقبل يدخلني للكليه 

انا بخجل = الله كريم خليها ع الجايات 

سعد /:يعني يمته 

انا بابتسامه خجله = يعني خليها للظروف

سلمت علي واستاذنته اروح للمحاضرة //مع السلامه وفرصه سعيده وشكرا ع الكهوه 

هو وكف وكلي /:بثينه اعتبر انتي قبلتي دعوتي وانتي الي تقررين الزمان والمكان يمته ما تقررين انا جاهز 

انا بتردد = اي ان شالله فد خمس سنوات القادمه 

سعد بضحك /:شنو دعوه على الغداء لو خطه خمسيه 

انا ضحكت ورحت كملت محاضراتي طبعا وهدى وماجده ما بطلن اسئله وانا مسويه روحي غبيه

رجعت للبيت والروتين العادي اتغديت وغسلت مواعين ونظفت المطبخ وصعدت الغرفتي وبوجهي للنقال هو 

ما كتبلي عه الواتساب بالليل خلصت قراءة ونمت كعدت فتحت النقال لكيت صورة بيها صباح الخير ودعاء ورة

 شويه دزالي اياد صورة صباحيه انا ما رجعت عليهم ولبست ورحت للكليه سعد ما إجه رجعت للبيت وانا ضايجه  

واتغديت وغسلت المواعين ونظفت المطبخ وصعدت اتمددت عه السرير وغفيت شويه كعدت لكيته كاتب لي

سعد// المفروض انا زعلان وعلى اساس ما احجي وياج بس كلبي فقير ما يكدر على فراكج

انا جاوبته بفرح = ههههههه

سعد /:دووم الضحكه 

= امم شكرا بس كلي لويش زعلان 

سعد /:ها ما تعرفين ليش 

= مو كتلك خليها للظروف ياصديقي 

بقه متصل ما كتبلي الا وره فتره كلي //شوفي ما طول كلتي ياصديقي اذن انا ما اريد اضم على صديقتي شي

انا جاوبت بسرعه =خير يا صديقي شضام علي 

سعد//بثينه كل إنسان وعنده ظروفه الخاصه وعنده أسراريتمنى يتكلم بيها للآخرين واكيد الآخرين هم عدهم اشياء

 خاصه بيهم يحبون يفضفضون الناس يعتبروهم مهمين بحياتهم مو ياصديقتي العزيزه 

كتبتله =شكرا الهذا الاطراء الجميل والثقه يا صديقي اتكلم اسمعك 

 إذا بقت هاي الاسرار حبيسة بداخل الإنسان راح يتاذى احجي كلي اذان صاغيه 

سعد/:بثينه محتاج اشوفج على مود احجيلج كل الي بكلبي 

=احجي أسمعك اووو قصدي اكتب لي 

سعد//بثينه انا صار وضعي محرج بالكليه يعني الي يشوفني 

راح يتساءل شسوي يوميه جاي اكيد الطلاب راح تاخذ عني 

فكرة مو حلوة اتمنى تخلينه نلتقي

=وأنا كتلك خليها للظروف 

سعد//شنو بثينه انا مو مراهق ولا زعطوط تخافين مني شنو احنا مواصدقاء ليش عدم الثقه هاي 

انا حسيت بي يكتب وهو عصبي =على كيفك سعد ليش احس بيك صرت عصبي 

هو جاوبني /:طبعا اصير عصبي ودي اكسر اي شي اشوفه كدامي جاي اكلج الخميس اطلعي لاتداومين 

بس تطلعين من بيتكم انا اجي ونروح نفتر بالسياره شويه وبعدها نتغده

وعد يابثينه الساعه بالوحده ترجعين للبيت والقرار الج ،الخميس انتظرج برأس الفرع الصبح بثمانية ونص

،،،، سد التلفون والشبكه ما حجى وياي ثاني يوم رحت للكليه ما شفته والأربعاء هم ما شفته كملت محاضراتي

 ورجعت للبيت بالليل افكرواحجي ويه نفسي = هو ما اجه يتقصد حتى يجبرني اطلع اقابله اروح لو لا 

أخاف يأخذ علي فكرة مو حلوة

=زين بس انا ما أدري شبيه وما اعرف هو شيريد مني بس الي اعرفه انا احب اشوفه وأسمع صوته

،،،،،،،وقررت أغيب من الكليه واروح اشوفه،،،،،،،

،،،،!،،وكتبت الصديقاتي لا تنتظرني ما حابه اداوم، ،،،،،

الصبح كعدت سبحت وبدلت لبست فستان نيلي طويل ضيق وشال نيلي بي ورده بيضه ناعمه وحذاء ابيض الجنطه 

نيلي وخليت مكياج

 خفيف وعطر فرنسي وطلعت ماما باوعتلي //ها ماما شعجب متأخرة 

=لا بس الأستاذة ما تجي ع المحاضرة الأولى بابا طلع 

امي /:ابوج من الصبح طلع عنده شغل واخذ زيوني ويا 

انا اخذت قطعة كيك وشربت جاي بالحليب وسلمت على امي

طلعت من البيت تقريبا الساعه 8 وربع ورحت امشي بالفرع الي

 يوصل على الشارع العام طبعا الهث عبالك اركض مو امشي وصلت 

قريب الشارع شفت سعد كاعد بالسيارة رحت من الجانب الآخر وصعدت

هو حرك السيارة وباوعلي وكالي بابتسامه //صباح الخير 

جاوبته = صباح النور،،،اتكلمت وانا الهث

سعد بتعجب//شنو هاي شبيج جنتي تركضين

= خفت أحد يشوفني 

سعد//ليش انتي شمسويه ما مسويه شي غلط ،،

،،انا سكتت هو فتح اغنيه اسمها روحي انت هو ظل يدندن وعينه ع الطريق وانا كاعده اباوعله ومبهورة باناقته 

وجماله و رجولته

 ناهيك عن العطر الي خاله بقيت ساكته والسيارة تمشي بعدين فترها شويه وكفها ابفد منطقه هادئه ما شايفتها قبل 

ودار وجهه علي وكلي 

سعد//شكرا بثينه لان اجيتي ما تدرين لو ما جايه شنو صاير بيه يمكن بعد ما تشوفيني 

انا باستغراب = وليش

سعد بعتب //لأن احس انو انا مو غالي عندج ،،،

،،ظل يباوعلي وانا احس بأنفاسه وعيونه شلون تباوعلي من كل مكان بعدين كلي

انتي اكيد طالعه بدون ريوك امشي خل تتريك اعرف مطعم يقدم اطباق تجنن

ابتسمت وهزيت راسي = لا انا متريكه وبعدين مو ورانا غدا

سعد بابتسامه ومنتبه ع الشارع // نتريك و نتغده شنو المشكله

ضحكت وهو دار السيارة ورحنه دخلنه للمطعم تقريبا الساعه بالعشره كان مطعم راقي واجوائه هادئه وبي ناس 

مبين عليهم رجال اعمال وشخصيات اجه النادل باوعلي سعد 

:شتحبين تاخذين

= كهوة

سعد/انتي مو ما متريكه ليش تطلبين كهوه 

انا باوعتله وابتسمت هو طلب اثنين كهوة حلوة جاب النادل الطلب وهنا كلي سعد احجيلي عن حياتج

جاوبته =المفروض انت تحجي شضام علي يا صديقي مو انا اتكلم عن حياتي 

هو أصر علي ان اتكلم انا حجيت عن اهلي واخواني صديقاتي

 بس ابد ما جبت طارئ اياد اشوفه يسمع لي انتبهت وانا مسترسله بالكلام الصراحهراحس بنفسي مثل البليده 

باوعلي سعد بهدووء //بثينه والحب

انا من سمعت هذا الكلام ما ينوصف شعوري حسيت برجفه وخجل وجهي صار نار وكلبي يدك بيني وبين نفسي 

عاتبت روحي ان وافقت اقابله يمكن اتصورله انا مو خوش انسانه

اهنا سعد قطع كل هاي الملابسات وهو يگلي //بثينه انا اقصد الارتباط بشخص معين يجوز يحبج ويعترف 

بحبه الج،،،

انا رأسا جاوبتته او بالحرى حبيت اغير الموضوع = انت سولف عن نفسك شنو بس انا كل شي حجيتلك 

(وضحكت حتى اداري خجلي )

هو كلي// ولو غيرتي الموضوع بس مي خالف انا إنسان يتيم امي وابوي متوفين 

عندي أخت وحده متزوجه واخوي قاطع علاقتي بي بسبب خلاف على

 مود الورث انا مو زغير عمري تلاثين سنه وكنت،،

قطع الحديث نقالي رن طلعته من الجنطه باوعتله شفت المتصل اياد يا ستار شعنده باوعت السعد يعني اسكت 

ورديت وانا متوتره

=الو

:هلو بثينه اشلونج 

=اهلا اياد انا الحمد لله انت شلونك 

اياد::شبيج بثينه ليش مرتبكه 

=لا ما بيه شي اياد 

:: طيب الحمد لله اكلج انا اليوم طلعت من الدوام من وكت شويه وأوصل للكليه راح انتظرج علمود نروح سووا ،

لان اعرف اليوم خميس وطلعتكم من وكت

،اهنا خفت وأحس ريكي يبس رأسا كتله بتوتر = لا اياد مو انا هسه توني طلعت من الكليه ورحت للبيت

اياد بتعحب ::ليش بثينه شلي صاير

= احح ما صاير شي بس اني دخت ومعدتي كلبت خذوني للطبابه وكال الطبيب لازم أرتاح 

اياد كلي ::زين لعد انا جاييكم للبيت

،سديت التلفون وباوعت السعد الي اشوفه صافن على كلامي = سعد عفيه شوف لي تكسي بسرعه لان ابن عمي 

راح يجي للبيت

سعد ضاج وجاوبني // على كيفج بثينه اهدي انا اوصلج

انابخوف = لا لا تكسي احسن 

سعد /:وليش انا اوصلج وتنزلين بالفرع 

= شنو انزل بالفرع مو سمعتني كتله اجرت تكسي لان تعبانه انت هذا ما تعرفه يدقق على كل شي 

سعد وكف وكلي /:اوكي هسه ااجر ياالله 

طلعت بسرعه وسعد اجرلي تكسي ودفع الحساب صعدت كل شويه اكل لأبو التكسي 

= عمو بلكي تستعجل 

خفت لا اياد واصل قبلي وبعدين يسال ابو التكسي منين ركبت ويا  

وصلت للبيت ما شفت سيارة اياد اهنا جريت نفس دخلت شافتني امي 

ماما//ها بثينه اشو راجعه من وكت خير

جاوبتها = ماما دخت وطلعت 

امي باوعتلي بخوف //سلامتج اشوف وجهج أصفر 

=هو انا وجهي أصفر من المرض وجهي أصفر من هذا الغضب اياد

(طبعا احجي ويه نفسي)

اندك الباب امي فتحتهواجه اياد وهو يحجي ويباوعلي ::السلام عليكم ها بثينه شخيرج 

= تعبانه شويه هسه أصير زينه 

اياد وهو واكف ::امشي خلي اخذج للطبيب 

هزيت راسي = لا لا ماكو داعي إذا ما صرت زينه انا العصر اروح 

اياد::هو شنو ماكو داعي بثينه هسه اخذج للمستشفى والعصر هم اخذج ،،،

،،اهنا امي تدخلت /شنو يمه اياد منين عرفت ابثينه ما الها خلك 

اياد:عمه خابرتها ردت انتظرها واجيبها للبيت لان طالع من وكت وهي كلتلي تعبانه وجايه للبيت 

امي باوعتلي /:ماما بثينه روحي وي ابن عمج خلينه نطمن ،،،

،هو ما أنتظر راح كدامي للسيارة انا بس ذبيت الملازم والكتب

 ولبست جنطتي ورحت صعدت بالسيارة مجرد ما صعدت باوعلي وكلي 

::بثينه عدلي شالج ألبسي عدل ترة اليشوفج ما يكول مريضه

عدلته وانا اتافف😤😤😤

وصلنه للمستشفى واحنا ساكتين نزلنا كص باص وهو يمشي قبلي بخطوة باوعت شلون احس انو هيبه وشخصيه

 وهو جسمه رياضي وشخصيه لكن من يصير عصبي شكد اصير اضوج منه واكرهه

 وصلنه الغرفه مكتوب عليها المديرسلم على العامل الواكف بالباب وحجى ويا الرجال دخل شويه وطلع كله

اتفضل أستاذ

دخل اتلاكه مدير المستشفى ويا سلم علي وباوسه وسلم عليه الدكتوركعدنا والدكتور وصى العامل على جاي او 

وجه كلامه الاياد //اكلك انت وين محد يشوفك 

اياد ::وعلى اساس انت كلش خطيه مكطع الطريق اشو ملتهي من المستشفى للعياده 

الدكتور =وانت بشنو لاهي عنه 

اياد ::والله منتصر واجبات ما الحك اشوف احد اهلي بالبوكات اشوفهم 

الدكتور =والله صحيح الله يساعدك خير اياد

،اياد:: بت عمي --وباوع عليه --بت عمي داخت بالكليه ولعبت نفسها

الدكتوربتساؤل ==مدام يجوز حامل ،

،،،انا باوعت الاياد جاوب

اياد ::لا يامعود مو حامل 

الدكتور اتقرب ولزم ايدي وشاف النبضات وفتح عيوني بعدين كتب ورقه كله

= خلي يسوولها تحليل دم لان اتوقع عدها فقر دم 

،،أخذ اياد الورقه وفتح باب الغرفه طلعت وطلع ورأي وصلنه المختبر سحبو دم من الوريد انا تاذيت كلت

= ااخ اووف 

اجه اياد يمي وبقى يباوعلي ورة شويه أنطوني النتيجه ورحنا للدكتور شافها

الدكتور //اي مثل ما اتوقعت فقر دم وهبوط بالضغط شنو أستاذ اياد اعرفك كريم مو بخيل شنو ما توكلها

، ،انا بسرعه رديت = دكتور انا مسويه دايت ،،!،

الدكتور باوعلي //اهاا مي خالف بس هذاالشي مئذيج رلازم تاكلين واكثر شي اكلي فواكه واشربي عصائر طبيعيه 

هذا ما ياثر ع الرجيم بللعكس ينطيج طاقه وبنفس الوقت نظاره يعني يحافظ على شبابج

،،،بعدين باوع الاياد بخبث وكله //وانت هم على كيفك وياهه مو تطلع اخبالاتك عليها 

اياد ضحك كله ::ايبااخ على اساس انت مو مخبل لعد شلون صرت دكتور اصلا انا كل شي ما مسويلها اسئلها

الدكتور =قصدك انا جنت مخبل سابقا بس هسه عباره عن حمل وديع خلتني ام رامي

اياد بضحك ::قصدك طلي 

الدكتور //لا مو الهلدرجه بس انت صاحبي واعرفك إذا إجت عصبيتك ما تنجرع مخبل بابا نبقى نعلم بيكم  

ديرو بالكم على نسوانكم صيروا مثلي 

اياد ::يعني قصدك نصير طلي مثلك 

الدكتور = انا اعترف ومكيود من اذاني بس انت عمي لازلت محافظ على قوتك مو مثلنا انت منو يكدر لك المهم

دير بالك عليها 

اياد باوعلي وضحك :: كللها هي تدير بالها علي بعدين تعال اشو جمعت منو جايك من الشله 

الدكتور ضحك =علي الذيب اجه وجاب مرته جانت حامل انا من شفته

 رحبت بيهم كتلها متعبج كليلي انا مثل اخوج اشو هي بعدهي ما مجاوبه علي كال 

شمتعبها بس هي مره ولازم تكوم بواجب زوجها وبيتها لعد المن ناخذ نسوان 

انا كتله عفيه من يوم يومك ذيب 

هو كلي واشوفه يباوع المرته اي طبعا انت تدري بيه اشوفها خزرته هو راسا بدل تدري بيه منتصر شكد احب

 مرتي انوب باوع الها ويكلها //حبيبتي اسالي المنتصر انا شكد احبج بعد هو صاحبي ويدري بيه ......

عاد انا ما خليته يكمل انا خبثت كتله من يمته علاوي وصاحباتك ياخي اذني كل شويه تجي وحده من الي 

تجيبهن وياك للمستشفى ابتليت من صار صاحبك المدير (باوعت المرته وگتلها )

خويه شويه اضبطي ما يصير يوميه يجيبله وحده مصادقهن لا وما يكلهن متزوج مره بت خالك الثانيه بت 

خالتك خو بنات عمك ما ينعدن 

طبعا علي خطيه انتهى بس انا كمت اضحك ومرته عرفت انا اتشاقى

(وجه كلامه الي )هسه مدام تره اياد الصدك الصدك انسمي المعقد 

اياد ::اكيد المو مثلكم والماخذ الامور بجديه معقد بس اليي يخاف من مرته شتسمي ابو رامي 

الطبيب بضحك //طلي 

وضحكو وانا ابتسمت والطبيب سجل علاج

اياد سلم ع الدكتور وأخذ الورقه مال العلاج وطلب من الصيدلي أن يا شر على العلاج وصعدنا بالسيارة ورجعنه 

للبيت اياد كان هادئ مو عوايده حتى ما جابلي طارئ المخابره مال قبل كم يوم كانت عيونه تلمع وكل

شويه يباوعلي ويبتسم گلي ::راح انزل اجيبلج عصير فرش 

جاوبته بدون نفس =لا ما اريد 

::مو الطبيب گال لازم تشربين عصائر طبيعيه 

= عود ماما تسويلي 

اياد ::براحتج المهم اهتمي بنفسج 

انا ولا يمه بيني وبين نفسي مقهورة على سعد الي عفته وراح عليه الغدا كله من وره هذا الخابص نفسه 

مو تكولون اتفكر بس ابطنها ترة ازعل اصلا انا مسويه رجيم

الفصل التاسع من هنا 

شكرا لزيارتكم عالم روايات سكيرهوم