رواية نقش بارد الفصل التاسع بقلم فدك فاطمه
حَتّى إنتَ كَلبك لَعِب
اللّه يا للعجَب !
سَحَبت روحَك مِثل أيّ
واحد مِن إنسَحَب
ومِن أَجلك أَنا طحت
يَالي عَلَيَّ سَحَگت
يامّا عَلَيك تَعَبت
ما تِستَحِقّ هِلتَّعَب .
غنــوة
عيـني على سگف الغرفة بالمستشفى صار ساعات هنا بالي مشدوه دمعتي على خدي ما نشفت ولا خوفي هدة ، صديت للباب دخلت الممرضة تشوفني
الجرح بخاصرتي شاخطتني الطلقة العرفتة ورة ما خف الرمي و مشو داخلين الجيران و ساعفيني للمستشفى صارلي يوم كامل محد درى عني
ضميت وجهي بين ادية شكد اتصلت بي ماكو اي رد
اجو الشرطة حققو وياي كلشي ماعرف مادري منو
ذولة لهجمو على البيت
ولا اعرف دلهم شعدة من عداوات هواي سألو كل سؤال جوابة مادري نظراتهم غريبة علية حقهم متزوجة واحد ماعرف غير اسمة
ضليت يوم كامل بالمستشفى محتارة وين اروح البيت اخاف ارجعلة هو شباقي بي و اروح هناك
سجلولي خروج من المستشفى ماعندي ادفع الممرضة الي دزم تجي تشوف جرحني الله يرزقها
هي ساعدتني طلعت اجرتلي سيارة نطيتهم عنوان اسراء اعرف المنطقة و الشارع بس بيتهة ماعرفة
خطية الولد ضل يسأل عن عصام لحد ما دلوه بالبيت نزلني كبالهم تشكرت منة خجلانة رحت
دگيت الباب كم مرة لحد ما فتحتة عمتها عكدت حواجبهة الواضح عرفتني باوعتلي مستغربة
:هلة خالة شجابج
عصرت ادية رديت :اريد اسراء
:اسراء راحت لبيت اخوها شني ما اجتكم
رمشت اباوعلهة ما مستوعبة تقربت من الباب لازمتة : يا اخو دلهم
:اي خالة جا عدها غيرة
حجيت و ريگي حف: يمتة راحت
:من الصبح وية طلعة ابنهة للمدرسة مشت گالت مودي عليهة يريدهة
مسحت وجهي بحيرة هزيت راسي گالتلي تفضلي دخلي ما رضيت عفتهة اعدل بعباني معقولة
ماتدري اي شيدريهة بالصار يجوز صدك راحت للبيت فرحت من كالتلي هيج اكدر ارجع هناك وهي تضل يمي يجوز تعرف وين هو ، وكفت على الشارع
أجرت سيارة صعدت خايفة اعصر بعباتي كل شوية اعدلهة نطيتة اسم المنطقة شلون ما علمني دلهم
حفضي عنوان البيت و عنوان اسراء اتذكر ضليت اربع أيام ارددهن ابالي صبح و ليل حتى ما انسى
يمشي و عيني على الشوارع وكفتة بسرعة من راد
يعبر الفرع البي البيت ما رضى يدخل جوة يكول محفر الشارع گتلة يتانيني اجيب كروة ضل يحجي
دمعة صارت بطرف عيني نزلت مستعجلة احس احد يمشي وراي وين مالتلفتت طلع موكف السيارة نازل
ضليت ابالع لحد ما وصلت البيت فتحت الباب اباوع
شلون مگلوب گلاب و الحياطين محفرة و جام مكسر
دخلت جوة صنتة ولا صوت امشي خايفة اسحك على الكزاز دورت مفتاح الغرفة لحد ما لگيتة فتحتهة بهتت اباوع بصدمة فارغة البيبان مفتحة كال الكنتور و الجرارات وكلشي ماموجود بيهن
فتحت الجرار ادور على فلوس ياهو لباوع بي فارغ
اتذكر جانت اوراقة هنا و صور و كلشي هسة ماكو
الهدوم هم عفتهة رحت لغرفة الوشم فتحتهة بأيد ترجف گوة خليت القفل هم مالگيت بيهة شي
ماكو فلوس و الاوراق مشگگة ومشطرة بالگاع الحبر مطشر على الحياطين كعدت رجلية ما شالتني معقولة حرامي بس شلون البيبان مقفلة مال الغرف
المفتاح دوم يخلي فوك الباب لگيتة بمكانة موجود
گلبي صار يوجعني نفسي ضاگ خايفة ماريد الشي
الاخاف منة يتحقق گمت على دكة الباب القوية
لازمة خاصرتي بوجع دخلت لغرفتي على حطتها
فتحت الجرارات ادور بين الهدوم عسى الگة شي
مالگيت ضميت وجهي بين ادية ابجي مصدومة
الباب ندك هواي تفلش بعدين راح الصوت ضربت
راسي بالحايط وراي محتارة بالصار ما استوعبة
ادور على الموبايل جان على الشحن هم ماكو البيت كلشي مابي هدومي و كم قطعة هدوم الة و الباقي
رصاص تارس الگاع كعدت بالهول راسي بين ادية
فكرة تجيبني فكرة توديني شهگت النفس بخنگة ضربت على رجلية روحي ممرودة من القهر و الحيرة
ضليت لليل عسى و لعل اسراء صدك جاية هنا ما لاگيتنة و رايحة لبيتهم بلكي عمتها تگللهة علية اجيت ، أذن و رجلية ماكدر اعين روحي بيهن و اگوم اصلي گوة توضيت لازمة جرحي يوجعني صليت
الباب اسمعة يدك تفلش صوت يصيح بأسم دلهم
اخر شي سمعت الصوت قرب للباب سلمت بالصلاة
گمت لازمة عباتي صار بوجهي عصام واكف بالحوش يباوع من الجام لمكسر بيدة جهازة
حجة يصد ضوة الموبايل علية :الله يساعدج خوية
غنوة:هلة عصام اسراء ما رجعت
حجة عاگد حواجبة:اني اجيت عليهة شصاير هنا
بلعت ريگي حلگي جف تقربت لازمة الشباك حتى ما احس بالكزاز لمطشر هو جوة رجلية من الخوف
غنوة: رحت لبيتكم طلعت امك گالتلي اسراء اجت هنا لحگتهة مالگيتهة
رد بحيرة:اي گالتلي ،جنت بالحراسة اسراء خابرتني كالت جاية تصالح دلهم هسة اتصل عليهة ماترد
كرار ماكو ما رجع گلت يجوز ضالين هنا
غنوة: ماكو لا هي ولا دلهم امس الصبح اجو ناس شايلين اسلاح رمو على البيت جنت بالمستشفى طلعت مالگيت واحد منهم
التفت للبيت بحيرة و قلق طلع مستعجل ماكو لحظات رجع حجة يلزم الباب :تعاي وياي لبيتنة شعدج ضالة هنا و البيبان مفتحة
غنوة:انتظره
عصام:دتعاي يمعودة انزلج يم امي و اروح ادورهم
خفت تروح وياه و حتاريت اضل وحدي قنعني
و طلعت مشيت وراه هو جهازة على أذنة ما مل من الاتصال بس صوت الشبكة يرد عليه
اجر سيارة و نزلني اباب بيتهم مشة مخبوص گال راح ادور اسراء ، امة بالباب دخلتني ما سكتت تحجي عليهة و تتهمهة ساعة تسب ساعة تشتم بيهم
نطتني كلاص ماي اخذتة بأيد ترجف ضليت لازمتة وكاعدة مشدوهة اباوع بصدمة للحياطين عقلي مايستوعب لصار و اگول هسة يجي وين يروح
هو من دخل السجن ما عافني هسة وين يعوفني عيني ما غمضت ولا غفت ظهري من كعدة تصلب
المرة رادت مني امدد اكوم ما اكدر حتى اوكف
لحد الاربعة الفجر الاذان صوتة احسة ببطن البيت من كد ما الجامع قريب عليهم وية صوتة رجع عصام
دخل الوجه اسود و مغضب
طلعت امة من الغرفة حجت تسأل :ها ولك لگيتهة
رد يدك ايد بأيد: ماكو وين الگاهة هي شعدهة بيت اخوهة و بيتنة وين أدورهة
ام عصام:جا وين ولت المفلوكة نوب ماخذة الفرخ وياهة وين ودتة سودة عليك يعصام كتلك هاي المرة ماتجبلك بس الضيم
رد بزهگة خلك:يمة رحمة لأبوج لا تلومين خليني بهمي
دنك يغسل راسة بالمغسلة هي تفتر تدك على رجليهة ، حسيت لجاي يصير اكبر من استيعابي
عيوني مشدوهة بخوف اني اباوع لحيرتة لماتقل عن حيرتي اهتز الكلاص بيدي نزلتة للگاع رجلية
بادن گلبي يخفگ بخوف صوتهن يرن براسي رن
عدت هاي الليلة صار الصبح منتظرة بعد عندي أمل يرجع لو يتصل بعصام ، خاف راح للبيت و مالگاني
من اتذكر الغرف الفارغة گلبي ينعصر عصر
بنص حيرتي و فشلتي كاعدة يم ناس غربة علية انواع الحجي سمعت على دلهم امة كل شوية مطلعة سالفة و تتهم اسراء بشرفهة و تحجي عليه
گمت دخلت للحمام خانگة صوتي ابجي الطم على خدي بخيرة وين اولي هسة شلون بية كلشي ماعندي ضليت بنص حر الحمام من الفشلة ما اطلع
صار الغدة اكلت شوية صبتلي امة عينهة شايهة ورة عصام من بردت عصبيتهة صارت تبجي على حالة
و گلبهة ممرود ، رجع العصر بيدة جنطة ابنة
شمرهة بالهول كعد على الدرج صافن على الگاع اجت مدتلة ماي اخذة لازم دولكة مايشرب عيونة
صارن بنكرة و جهة يشرح حالة
حجت لازمة ايدة: ها يمة شجاك احجي وين الولد
هز ايدة يضحك شمر الدولكة تطشر الماي على الفراش حجة يدك على رجلة:ماكو ماخذة ابنهة امس من المدرسة جنطتة شامرتهة بالحديقة لاگينهة الطلاب هسة رحتلهم گتلهم ابني ماكو گال المدير امة اجت اخذتة ثاني درس
ام عصام: الله يعل گلبهة علت گليبك وين ولت المفلوكة نوب فرخ ياهل ماخذتة گتلك يا يمة عدهة رفگة (يعني صديق )راحتلهة
رد يعارك:يارفگة لاتخبليييني لاتخلينييي أكفر تروح هي و ابنها و اخوهة
ام عصام: هسة شتسوي تخلي ايدك على خدك تناطر وليدك دك شوفها وين اطت ويهة
عصام: عليمن اتصل ماكو احد اعرفة من جهتهم لا گرايب اسألهم لا عمام هو بطرك اختة حتى أهل ماكو
دكت على رجلهة بقهر التفت الي حجت :خالة شني رجلج ما حاجيلج وين راح
هزيت راسي لا هزت ايدهة ماعرف شنو حجت علية ماسمعتهة كعدت يم الباب سحبت الجنطة تباوع بحسرة لكتب كرار و اقلامة
گام عصام گال رايح يبلغ بأختفائهم ، لليل هو برة البيت محتار وين يلگاهم و ينشد عليهم نشر صورة
ابنة و صورة دلهم
نوب مسحهن من تذكر الناس لهجمت على بيتة خاف همة يدورون عليهم رجال گلبة مشلوعةعلى ابنة حيلة نهد من القهر عليه
اني بصدمتي ضالة دلهم شلون عافني و اسراء لكتلت روحهة على رجلهة هيج راحت فص ملح
و ذاب ماخذة ابنها و شاردة
عصام ساعة يسبهة ويشكك بيهة ساعة يبين يبهت وجهة خاف خاطفيهة مال تشرد وية واحد خو ما تاخذ ابنهة
يومين يم عيال اسراء و يومين ورة الحادث صارلي اربع ايام حيلي بايد و الخنگة لازمتني ، غصة بنص صدري دمعتي بعيني ما جفت
استثگلت گعدتي هنا شعدي المن ضالة حجيت وية المرية نطيتهة حلقتي نزعتها و گلبي احترك من قهر
اخذتهة لصايغ همة بيتهم بالسوك قريب عليهم
رجعت بايعتهة تحجي مصدومة الحلقة غالية من الذهب الثگيل مادري يا عيار نطتني لفلوس عينهة عليهن خلصت الليلة حاضنة رجلية لصدري بحيرة
ثاني يوم الصبح حجيت وية عصام گتلة يوديني لهلي
لان گعدتي هنا مو راهمة گالي اجليهة لباجر لان منتظر شيصير على البلاغ لقدمة بيهم هم گلت
اضل حتى افهم شصاير و وين راح و عافني وحدي
شكد جنت متأملة خاب ضني ماكو شي عنهم عصام گام يلطم مطحون طحن من القهر اجذب اذا اگول اني احسن منة بس ماكدر اسوي شي غير البجي
العصر كلش گالي اوديح طلعت وياه اشرحلة وين احنة اسم القرية بس هي اعرفهة مناك من نوصل نسأل ما يضيعون لان هناك ناس تعرف ناس
رجلية ثگيلة من الخوف طلعت وياه عين امة علية
سلمت عليهة تشكرت منهة ردت بثگل طلعت صاعدة بالسيارة اجر واحد من الشارع روحة و رجعة
الطريق كلة يحجون على دلهم و على الصار الولد يخفف عنة و ينطي احتمالات احس راسي صدع منهم كل ما يجيبون اسمة روحي تطلع من القهر
طريق بعيد لحد ما وصلنة القرية سألنة دلونة عرفت الشوارع و الگاع لجنت اباوعلهة من ورة الحايط گاع
مال بيت جدي و الساگية من نعبرهة هناك بيتنة
وصلنة ورة اذان العشة خليتهم يوكفون بعيد حتى ما اتفشل كدامهم لو انطگ نزلت نطيت الكروة لعصام
اخذهن بدون ما يگول شي حركو السيارة مشو
وكفت على الشارع الكاع تهتز جواي مثل لماشي لحبل الإعدام چني اخطي فوك گاع ملغومة على ساعة تنفجر بية دموعي تصب على خدي
كسرة بروحي ماعرف شلون اوصفهة كسرة خاطر
و گلب ، مشيت طارة الزرع كل خطوة الف فكرة تصير ابالي مرعوبة منهم شنو احجي شگول
عاصرة الفلوس بأيدي و شادتهن بطرف الشال عبرت الساگية الگاع توهة مسگية و الماي يطب بالنعال و طين ترس رجلية شفت من بعيد ثنين من ولد عمي يمشون سوة غطيت وجهي بالعباة مدنكة اسمعهم يسولفون واحد يسأل الثاني عني منو
وصلت لباب بيتنة وگفت رجلية وحدة تطك بالثانية
دكيت الباب خانكتني العبرة تعبت ايدي همة ما فاتحينة كعدت مهدود حيلي بس لا همة هم عافوني
دكيت مرة ثانية حسيت بصوت وراي التفتت صار كدامي ولد عمي حسين و جسام بلعت ريگي وكفت عيونهم علية مصدومين من شوفتي و حالي
حجة حسين مستغرب: شسويين هنا شجابج
رديت برجفة: اجيت لهلي وينهم
حسين:خوانج ردو لبيتنة الجبير كاعدين ويانة
گلبي غاص بنص صدري تلمست الحايط وراي اسمع جسام يسأل مستغرب:شني جاية زعلانة اخابرلج علوان
حجيت شفتي ترجف بخوف:خابر سالم خل يجيتي
ارتبك متوتر وجهة بهت باوعتلة مستغربة هو عينة على حسين ما ارتاحيت گلبي نخمش رجلية بادن
غنوة: شبيكم صاير بهلي شي شعدكم
حسين:ماكو شي خوية تعاي ويانة روحي للبيت هناك اهلج
غنوة:جا ليش لونكم نخطف
جسام: تعاي يابة نوصلج بطريقنة يالله لاتضلين يم الباب الدنيا ليل
مشيت وياهم اتلفت وراي لبيتنة ايدي على گلبي مغص ببطني مامرتاحة احس شي راح يصير مدري من كد ما مرعوبة من علوان و سالم روحي باهتة
وصلنة لبيت جدي دخلت وياهم ابالع اللون منسحب من وجهي ، اجدادي كاعدين برة بالحوش فارشين بسط جدي يصيلي و جدتي بصفة تسبح
كلهة مستغربة من شوفتي سلمت عليهم يردون عادي محد سأل وين جنت و شصارلي لحد ما شفت غفران اجتني الوجه مخطوف تباوعلي بصدمة
رجفت رجليهة طاحت من طولهة للگاع مغمي عليهة كلهة فزعت تشوفهة ضليت مصتكة بمكاني
اتلفت بينهم طببوهة جوة للبيت مشيت ببطئ
شفتهة خلنهة البنات بالهول مرت عمي تطگ على وجهة رشگت ماي عليهة فزت لازمة بأديهن خايفة
وخرتهن تباوعلي الوجه اصفر گامت لزمت ادية تتلمس وجهي و ادية دفعتني لوحدة من الغرف قفلت الباب التفتت علية
غفران:دخيلك ياعلي هاي انتي لو اتخيل
غنوة:شبيج ليش هيج فزعتي
ردت تدك على رجليهة:سالم گال ذبحج
هزيت راسي دموعي نزلت:لا ما موتني باعني
جحضت عيونهة التفتت للباب رجعت تباوعلي:شني باعج عليمن شتحجين ولج
حجيتلهة لصار من ساعة لشفت بيها دلهم و عقدنة روحتي للمستشفى و المرض الجان البية لحد هسة
لزمت ايدي تعصر بيهن : علوان لو سمع بردتج يكتلج
غنوة: ليشش شبية وتردوني اموت والله مامسوية الحرام لا جبت العار الكم بيش احلف وتصدگوني جنت مريضة
غفران: بعد مادري انتي تفاهمي وية اخوج لو رد
غنوة: وين صفية و الباقي
عصرت اديهة سوة حجت بحزن: سالم توفة
ضليت صافنة بوجهة استوعب لگالتة حجيت برجفة:شـ..شنو
غفران: توهة طلعت اربعينة صفية راحت لهلهة
غنوة: شلون ماتتت شتحجين انتييي
غفران: تمرض بساع بساع صار بي جلطة و مات گلت من قهرة عليج توفة
غنوة:ياقهررر هذة هوو باعنييي برخص التراب خلاني بيد واحد مايعرفة شتحجييين انتييي ما ذبحني جذب عليكمم شمرنيي و مشة شلوون يموت ما عاتبتة شذنبييي تسون بية هيج
ضميت وجهي بين ادية نار اشتعلت بگلبي وجه سالم صار كدام عيني حسيت روحي جاي تطلع لطمت على وجهي بقهر شما يسوي يضل اخوي مات مادري بي وين جنت وين صرت شلون تغير حالي بليلة وحدة ، بجيت لحد ما حسيت بلاعيمي طگت
ضمت راسي بحضنهة تخنگ صوتي بجيت على كلشي ندم و ضياع ، قهر على موتت سالم الما جنت
متوقعتهة اني صار ليلتين بس ايدة و السجين تتراوالي خوفي منعني اجيهم اتجسهد بهيئتة
مادري شوكت سكتت يمتة غفيت فتحت عيوني على ظلمة الغرفة صوت الكنتور هو ينفتح احس بواحد واكف فوك مني ماكدر افتح عيوني مورمة
و يحرگني وجهي يابسة عليه الدموع كل نفس اخذة
احس بجفاف حلگي و بلاعيمي توكعني و مورمة
خنگت وجهي بالمخدة خانگة عبرتي اريد اصرخ من
كد القهر و الحزن ضليت نايمة متغطية بس دموعي تنزل على المخدة اسمع صوتهم من برة يحجون
لحد ما صار هدوء نفتح الباب ضوة عكس علية ما حسيت غير بدفرة على خاصرتي خلت روحي تشوغ
تكورت لازمة بطني بألم صار كدامي وجه علوان
عيونة متروسة غل و غضب جر راسي ايدة ملفوفة على شعري حجة بهمس:تمشين وراي ما اسمعلج حس گومييي
سحلني بيدة خلاني اتعثر ماحجيت لا بررت بعدني مصدومة بموتت سالم بعدهة رجلية بايدة من الخبر
طلعني من البيت اتدفع امشي و الحصو يزرف برجلية ضربني على راسي يدليني الدرب بين الزرع
و الچول وكفنة ببيت مهجور ضال بس حياطين
حجة لازم راسي بثنين اديه:شــــرجعج گلت متي و افتكيت من عارررج المن رديتي عليييية شجابجج گوة سترت شرفنة گطعت اخبارج عن عمومتنة المن رادة
ماكدرت حتى افك حلگي و احجي وخر يدك على راسة : يگلييي ذبحتهة طلع بايعج و رادتلي بعين گوية شلون استرهة هسة شلووون
حجيت سن يطك بسن من الخوف : مـ..ماسويت شي جنت مريضـ..ـة والله علوان مريضة مو عايبة مو حامل و روح ابوي جان ورم مو حمل رحت للدكتورة سوتلي عملية هاي ببطني ضال جرحهة
رد وجهة مطعون دم من الغيض:عملييية خوش حجة جايبة منيين اجاج المرض وانتي بتت بيت تبررين فعلتج تردين اصدگ سگطتي ابن الحرام جايتنييي ترددين منين ما جيتيي وينة العار لفج ببيتة رديلة و فكيني من كسرة الوجه كبال اهلنة
عطت بقهر روحي ممرودة :وييين اروح ماكو محد عندي كافي سالم باعنييي هسة هم انتة اختك اني ما وصلت الحرام ابوس ايدك علوان صدگني والله العظيم ما غلطت حراام علييكم خليي الله بين عيونك
طزز عيونة علية بعصبية ماحسيت غير بكفخة على عيني عطت لازمتهة ومحبسة طگني على جفني
صارت تحرگني يحجي و يطگ بية بغضب
علوان:تراددينييي طالع حسج بت ال***" ياريتة ذبحج ولا لفيتي علييية ياريتتتج متييي ولا رديتي
تكسرين وجهي كبال عربنة .. لوون طشت السالفة شگللهم .. شلون تردين علية ..ويييينة العار لفاج بدارة ويييينة طلگج
هزيت راسي دموعي تصب حجيت برجفة : مادري راح عافني
هجم علية محترگ گلبة يطگني على راسي مايوصل وجهي يحجي ايدة على ظهرة:اخخ من كسرتك ياخوية رحت من القهر عليهة گلت عليك مات من قهرهة و ذبحهة تااالي العايبة تردلي وانتة تطمك الترابة ياسااالم ياخويية ياكسرة ظهري بيك اكلاك الهم و موتك
صوتة ينخر براسي غير الضرب صرت ماحس من الوجع تخدرت تمنيتة يطگني بكل مكان غير صفحتي و راسي مغمضة عيوني أون بوجع و كسرة على اخوي و كسرة دلهم من جهة گلبي موجرة نار بي
حجة يرفعني من راسي عيونة دم حمر :عينج حسج اسمع حاجية شي كل ايسألج گليلهم رجلي عسكري راح التحق گولي سافر و يردلي بلكي يرد وافتك من همج لهدم بيتنة بت ال***"
سكتت من الوجع و كسرة الخاطر ماكدر افك عيني غوشن و الدموع تنزل على خدي رجعني للبيت نمت
بمكاني و جسمي اشتعلت بي نار صرت اللهث من الصخونة يا مكان اللزمة يوجعني يصل علية
كعدت الصبح ياريتني ماكعدت فكيت عيوني وحدة منهن طافية لا ضوة ولا دمع يطيح منهة الجفن مورم و حمرة الجفن نازل و وجع قوي يضرب الجهة اليمهة من العين لنهاية الراس صداع قوي موتني
ضليت فترة الظهر كاعدة بنفس الغرفة عرفتهة غرفة الجهال كل واحد جهالة يكبرون ينامون هنا
اسمع صوتهم من برة ناس تتريك ناس تتصايح الولد ليدرسون راحو لمدارسهم بيت جدي بي اكثر من عائلة ، عايشين بي ثنين من اعمامي و ولدهم كبار
كل واحد متزوج عدة جهال
دخلت غفران تعصر بأديهة تتلفت حجت تكعد يمي :علوان شگالج
غنوة: اضل هنا
غفراء:هاا شعجب جا لأخذج وينة
غنوة:لحد ما يرجع اروح منا
هزت راسهة بفهم گامت ساعدتني اروح للحمام اغسل طلعت اتلفت بالوجوه رغم اعمامي بس صار
هواي ما شايفتهم ما جنت اطلع من البيت حتى بمناسبات ما اجي هنا اعرف بس النسوان لكبار
كعدت يمهة جدتي النظرات علية غريبة كلهة تتهامس ماكدرت اكل رجعت للغرفة متغطية بعباتي
حتى هنا احس روحي بغربة و گلبي يوجعني امسح
دموعي اعصر بأدية خوف و وحشة ماعرف اوصفهة
مر يومين علوان حجة وية جدي يرجعون لذاك البيت مارضى ، هم صاحني حجة علية ضليت مدنكة و متفشلة العرك و المصايح بفلس لان تزوجت هيج
عمي زعلان بعدة حاجزيني لهلال و اخواني زوجوني
بدون ما يگولون لواحد و بسرعة ضل علوان يسمع و ساكت حجة عليه جدي و سباه گبالهم هو يطحن بسكتة يعصر اديه بغضب گلبي وصل لبلعومي
دار وجهة جدي ورة حجي و لوم عدل مخدتة كعد اشرلي علوان اگوم رجلية رجفن باوعتلة بخوف
خزرني يأشر بحواجبة اطلع گمت من مكاني ايدي ترجف طلعت هو وراي يدفع بية لحد ما صعدت
دخلني لغرفتهم يعض بأديه من العصبية مغتاض لان رزلوه كبال بقية ولد عمي دخلت غفران تحجي وياه هو يفتر فوك مني دنكت خايفة منزلة راسي
كل ما انزلة احس فص عيني راح يطلع من مكانة موتتني عيني اليسرى مغوشة حيل الصبح جانت احسن هسة طفت ماكدر اشوف بيهة
صحاني من صفنتي دمغة على راسي عطت بصوت عالي متوجعة خنگني بأيدة ساد حلگي خاف يسمعون نطيت من البجي دموعي طيح بالگاع انگز
دفعني للحايط يحجي بعصبية: فشلتيني انة الحجي يغلط علية فشلتيينة نريد نستر فضيحتج ماتنستر كلهة تلوم بية عبببااالج من اتزوجتيي نحلت جايتني بعارج عبااالج نحلت كلهة تگول ليش نطيتوهة بالدس لو لاعبة من وراكم لو مكسور بختهة ولجج غنيووة شسويتي بينة كسرتي عيني
حشگت روحي يم الحايط ارجف كل مايوصلني اضم روحي اكثر خاف يطك راسي يوجعني الم مو طبيعي
غفران: فدوة لعينك كافي راح يسمعون خليهم عود من يجي رجلهة نسد السالفة بجيتة عوفهة مدفونة فدوة لعينك علواان عدنة بنيات لاتجيب العيبة الهن
رد يدك على حلگي و حجة بحرگة:ساككت ماتشوفينييي ساكت وبالعهة انة اترزززل گبال المزعطة و انزل راسييي اخخخ
اباوعلهم بعين الرعب و الكسرة ضميت راسي منة طگني على ايدي طلع سدت الباب غفران كعدت بصفي تدك على رجلهة
غفران:راح ينجلط الرجال من الحرگة ولج غنوة شسويتي بيهم ليش ياحبيبتي ليش
غنوة:عـ..عليمن تلوميني انة شسويت ماتفهمون والله جيبي القرءان احلف عليه الله ياخذ روحي اذا جذبت مو حامل و روح ابوي و روح الحُسين جان مرض انة لو محصلة اوراقي جبتهن العملية هنا والله هو اخذني گصو و ذبوه
غفران: ولج شني تكيس يصير بس المتزوجة تصاب بي تتداوة و تحبل جا هاي السوالف مو غريبة علينة
انتي بطنج كبرت لو مابيهة فرخ ليش تصير هيج
لطمت على وجهي بقهر روحي احترگت بجيت شكد
ما بطلت نوح , جلجل الليل طلعت برة اصرخ من ضيمي و كسرة گلبي وين رحت و عفتني ضحكت علية تاخذ اسراء و تعوفني تدري بية اموت عدهم
أنتــة الوعدت و الحنيت عليةخليتني اشوف الدنيا بعيونك ياما گتلك اموت يكتلوني ما صدكت اخخ مني انة جبتهة لروحي اني نطيتك كلشي بية و تأملك بيك بيا ذنب ضيعتني هيج حجيت و وعدت وتالي
ضميت وجهي بين ادية اريد اشلع جلدي اكطع روحي على الحرگة الي بگلبي كل ماتذكر منظر البيت فارغ ماخذ كلشي وياه و عايفني اموت انجن من
الحرگة فوگهة كلشي صار گبل لليلة مشاعري بوكتهة شلون أمنتة و سلمتة روحي و كلشي بية
لا والله مو صوجك مني الخلل اهلي ضيعوني ماعندي بشر يفهمني لا ثقة ولا محنة
تمر الايام باهتة بوجع و قهر و الالم ياكل جسمي گبل روحي كل يوم ما يرجع بي دلهم يحد علوان سنونة علية كاره گعدتي ما دام صرت متزوجة من اطول اجيب الحجاية لروحي من الگرايب
صرت كلشي اسوي بس اريد اخلص نفسي من القهر
اشتغل اطبخ اسمع و اسكت ابلعهن نطيت الفلوس
مال الحلقة لعلوان بس حتى ما يطگني ويطلع حرگة الشغل بية كلشي نطيتة اريد بس استر روحي
تمددت ورة يوم حتى النفس مختنگة بي حاضنة بطني متدثرة دموعي تصب توهة اجتني يابة الفرحة الحسيتهة بوقتهة مامصدگة غفران خوفتني من أيام
هي مگطوعة عنها و طلعت حامل سمعت هيج ضليت اللوب من الخوف اذا حامل وين اودي وين انطي وجهي الحمدلله راح خوفي من تمرضت
غمضت عيوني خانگة صوتي بالمخدة ايدي على گلبي ما مرت ليلة ولا يوم ماعاتبتة بيهة و لمتة ضحك علية كلشي جان جذب و حجي فارغ ترس عقلي بي و تيه افكار الحقيقة الصار هسة
وعيت على صوت غفران كعدتني گمت نازلة وياهة
لفيت شالي عدل حتى ما اسمع حجاية صديت عيني للشمس دموعي جرت بقهر عيني طفت كلشي مغوش توسلت بعلوان يوديني للمستشفى مارضى
استغفرت غسلت ساعدتهة هي تشنگ و اني اخبز
نار التنور تلهب وجهي تخلي عيني تلسعني تبزني بوجع گوة امد ايدي و اطلع الگرصة كملت شلتة
غفران عليهة وكت خبز و عليها العشة و نوبة تنظيف
شغلهة اخذتة لان حامل دوم ايدهة على ظهرهة اني
ما احب گعتي احس بروحي ثگل عليهم
كعدت بالحديقة تلاعب بأبنهة عمرة سنة ونص واني واكفة اعصر بالهدوم و اشر فوك الحبل ورة البيت عيني اصد بيهة للشارع اتأمل
حجت تباوعلي: باجر هلال يرد خافنة يعارگج
غنوة:عليمن يعاركني
غفران:جا غير جنتي محيرة الة و عفتي
غنوة: ماعفتة انتم بعتوني
التفتت مرتبكة تأشرلي اسكت دنكت اخذت الثوب عصرتة وين ما رفعت راسي لمعت بعيني كلادتهة
غنوة:بالعافية
رمشت مستغربة شافتني وين اباوع ابتسمت تتلمسهة عيونهة ماتصد الي الفرح واضح بعينهة
حجت تحفر الگاع بالعود البيدهة : هاي من گلت بعد ما اخلف تعبت منهم نوب هسة طلعت حبلة زعلت و نقهرت جابها الي هدية
حجيت گلبي محترك :ذهب
غفران:اي هذة العراقي الرخيص تدرين هسة نازل جمع جم فلس و اشترة
غنوة: امس سجيد بجة لومن مل على ربع علوان يحلف و يتكفر ماعندة جيوبة فارغة و شغل واكف
غفران:اي والله نهد حيلة ماكو يشتعل يومية يگلولة على باجر ننطيكم يجي باجر كلشي مايحصل
حجيت عيني بعينهة: فلوس حرام
ردت مستغربة:يييا شجاج علوان يشتغل و مكسور ظهرة يجي تعبان ما يطبب لجيبة فلوس حرام
غنوة:الگلادة من الفلوس لنطيتهن الة بعت حلقتي و هي غالية دلهم جان يشتغل قصص وروايات عراقية كرار صلاح بالبانزينخانة هم راتبة قليل منين جابهة الي اذا مو بفلوس حرام تدرين حرام يكثر و يعشعش بالجيب
ضلت صافنة شلت الطشت گمت رايحة للبيت والله العظيم يگول بالعتلي جمرة نار محترگة بيهة ماتطفة رجعت لنفس الضيم و الحسرة
خليتة بالحمام صاحتني جدتي انضد غراضهة صعدت سويتهن نزلت طلعتلي هدوم اغسلهن اجت غفران مرتبكة اخذتهن راحت تغسل بيهن عفتهة
لليل صاحني علوان رحتلة بغرفتة حجت بنتر: ماكو خبر عنة
رديت اهز براسي :لا ماكو مادري
علوان:دگي عليه
غنوة:ماعندي موبايل
طلع موبايلة اردلة بالرقم و دموعي تنزل على خدي راسي رجعتلة ذيج اللحظات من كعدني گبالة يجبرني احفظة كل ما انسى يضحك علية و يصنف
فزيت على ندسة غفران الي اخذت الموبايل يدك
تأملت و تعلگت نبضات گلبي بهاي الرنة و الصوت
ماتت امالي من طلع مغلق حاول مرتين ماكو رد
شمرة يفرك بأديه اشرلي اطلع گمت مشيت للهول الفوك بنات عمي و بنات جابر ابنة ينامن هنا واني يمهن اسمعهن يسولفن و يضحكن و بتشاورن
غطيت راسي كلهة منتظرة جية هلال مخبوصين
مثل لياكل شي مو طيب و يتذكرة و يتذكر شكلة
و ريحتة تگلب معدتة حتى يتقيء شعوري هيج
من اتذكر كل لحظة وياه اشمأز من روحي ماتفارك
خيالي ذيج اللحظات لفرحت بيهة و ضحكت
الصبح كعدوني بأصواتهم فزيت كلهة كاعدة عنت روحي و گمت لميت الفراشات الي بالهول كلهن
خليتهن على البوفية الفوك لبست شالي عدل
نزلت صبحت عليهم صبيت ريوك تريگت بسرعة
كملت اعاون البنات من كد ما البيت بي هواي الطبخ شلون طبخ العزايم كل شغلة يتعاونن عليهة ثنين
گبل الغدة اجو الجهال يركضون من صياحهم عرفنة هلال جاي ما اهتميت ولا فكرت بي همي دلهم و لسواه بية لعب بحالي لعب محتارة ازعل عليه لو اخاف ، بيومهة لو ما رايحة و شايفة الغرف فارغة
لو ما ادري بأسراء ماكو جان ضليت موجرة خوف عليه بس هو مشة مبين مايريدلهة ثنين يفكرون بيهة بس ليش سوة بية هيج شلون سهلة عدة كسرة گلبي و خاطري
نشفت ادية بالثوب من طب علوان خزرني حتى اصعد عفتهم رحت فوك يومين حاجزني بغرفتة
حتى ما ينام بيهة و يلح على جدي يريد يرجع لبيتنة
جدي رافض لان مواعد واحد من ربعة يأجرلة البيت ذاك الرجال بايع بيتة متطمن بيتنة موجود يكعد بي
بلعهة علوان گالي نزلي على كد الشغل و الاكل حتى اني ما عاجبني الكعدة هنا ، وين ما أكعد يتشاورن علية محد مقتنع بزواجي بس محد يتجرأ و يحجي
بلليل اخذت موبايل علوان دكيت على رقم اسراء رد علية عصام حاجيتة سألتة عنهم ما لاگيهة جنت لابدة بالحمام اريد بس اسأل و اسدة هو ضل يحجي
يشتكيلي من غيابهم و كسرتة على أبنة لما لكاه صرت صفرة من الخوف بس كمل حجايتة رديت عليه كم كلمة وسديتة ضميت الموبايل بصدري
فتحت الباب صار هلال كدامي شايل هدومة نزلت
عيني وخرت من كدامة حتى يطب وكفني صوتة
حجة يباوعلي بطرف عينة :ليطب للحمام كل هلوكت ما يطلع يابس
بلعت ريگي درت وجهي ما رديت حجاهة كدامهم صرت هلكدوتني من الفشلة همة كاعدين بالهول
وين كا خليت رجلي على الدرج دك الموبايل بصدري روحي راحت و بهتت رجلية غاصن بالگاع اريد ارفع رجلي و اصعد ماكدر
حجت مرت عمي تسأل: ياهو ليدگون عليه ولجن خاف موبايل ابوجن ونايم امشن لا يفز
اجت غفران بصفي باوعتلهة بتوسل درات عيونهة حجت : علوان يدور على موبايلة دك من موبايل حسين شو دورنة وين جوة المخاد جهال ماخذينة
صعدت فوك طلعتة اباوع رقم اسراء گمت الطم رديت برجفة:ءء الو
حجة بعتب:شسالفة خوية ماتردين
غنوة:شـ..شكو صار شي
سكت شوية بعدها حجة : والله انة خجلان منج مادري شگول تدرين بالحال شلونهة لا الاهل يعينون ولا معارفنة محتاج فد خمسمية والله ياخوية مطلوب و الديان واكف بالباب اذا عدج تنطينة واني اردهن يمتة ما صار جواي
هو يحجي واني اجالع بروحي عيني على علوان لاجة
على صوت موبايلة شافة بيدي لازمتة وارجف بخوف
عصام:وياي تسمعيني الوو
سديتة ضامة وجهي بين ادية اخذة علوان اتصل على الرقم اول ما فتح خط حجة :ياهوو انتة شعدك متصل
سكت ما رد گال علوان بنتر:ماتحجي ياهو انتة
رد وصوتة متوتر:عصام من گرابة رجل بتكم
علوان:وينة هذا غاط ندك عليه ماكو
عصام: والله علمي علمكم مادري عنة
علوان:وشعدك متصل
عصام: هو اتصلت اسأل مرتة عليه
حجة وياه يبرر سداه ايدة بشعري يعت بية و يرزل اخذ الموبايل و مشة غفران نزلت تمشي وياه
كعدت بالغرفة رجعت راسي ليورة اهدي رجفتي صدك تحسفت على ذاك اليوم لو ميتة ولا ضالة
لو كاتلتني سالم ولا عايشة بهل الذلة و القهر
استغفرت امسح بوجهي غلطت على عصام يطلب مني فلوس واني ربع ماعندي ضلت عيونهم على فلوس الحلقة عبالة ضامتهن زفرت انفاسي بضوجة
ضليت كاعدة بالغرفة كل ما انزل يسألوني رجلج وين شكد راح تضلين ما ارد ماعندي مبرر الهم صرت اسمع و اسكت ما بية بعد اناقش
ثاني يوم الظهر أجو جهال سالم الله يرحمة جابهم علوان فرحت بشوفتهم حضنتهم شكد مشتاقة الهم
همة يبوسون بية و يحضنوني ابجي على حالهم و لهفتهم واحد يبوس خدي و واحد يمسح دموعي
ضلو الليل كلة يمي و جهال علوان كلهة تريد تنام بحضني هاي الليلة الوحيدة الما بجيت بيهة و نقهرت لمتهم حولي رجعتلي روحي لحسيتهة منبوذة بعيشتي هنا
كعدت الصبح متكسرة من نومتهم على ادية فزو اول ما گمت نزلت وياهم همة كل شوية واحد يبوسني صار هواي ما شايفيني طايرين من الفرحة
سوينة ريوك كعدت اوكلهم مبتسمة مسحت على شعر ابن سالم سودة علية تيتم بأول عمرة اشاف من الدنيا لا شبع من ابوه و لا عاش وياه
بوستة مقهورة على حالة حضنتة لصدري اوكلة حجة يمسح دموعي:عمة ليش تبجين على ابوي
هزيت راسي رديت بغصة: اي ما شفتة و عاتبتة
باقر: زعلانة عليه هو هم مات زعلان و يبجي
غنوة: ضيعني شمرني بنص ناس مايخافون الله
حضنتة بوستة براسة ماريد احجي على سالم يمهم
اليوم جمعة كلهة كاعدة بالبيت كل الجهال تلعب
بالحوش عدهم طوبة مسوين اهداف
جنت واكفة اسگي بالحديقة و رباب بت عمي تحوي من الخضرة تخلي بسلتهة التفتت لفتحة الباب دخلت صفية باوعتلهة خايفة لابسة اسود شادة عصابتهة على راسهة تمشي بهمة للبيت
شمرت الصوندة من سمعتهة تصيح بأسم جدي روحي راحت انتهيت من الرعب و الرجفة لزمتني
دخلت وراهة غفران واكفة يمهة تتوسل بهمس حتى تحاجيهة و تگللهة شتريد منة هي تباوعلي بعين الغضب كلها غل و كره
طلعت جدتي مستغربة: شجاج ولج تفزعين وليداتج يم عمهم بيت اهلهم عليمن شادة حزامج و جاية
ردت غفران متوترة:هي عليهم عبالهة طالعين گتلهة يلعبون هنا تعاي صفية خية تعاي لغرفتي كعدي ارتاحي
دفعت ايدها ردت بغضب:ما جاية ادور الولد اجيت على الحجي وينة
رداعة: ذاك كاعد بديوانة شرايدة منة
مشت لزمت ايدهة اتوسل دفعتني وكفت بالباب :الله يساعدك حجي
رفع ايدة من عيونة جان متمدد حجة ينهض:هلة ام حسين طبي جدي شمحتازة
صفية: خيركم سابگم حجي محتاجة بس تسمعني
سعيد: گولي اسمعنج
صفية:هاي غنيوة ربيتهة من هي بالگماط صارت بتي و اخيتي بس يشهد الله انة ماعرفت اربي البت مكسورة و كسرت عين اخوانهة حبلت بالحرام و شردت سالم مات و نجلط من قهرهة و ضيمهة و علوان خايف على بناتة لا السمعة النجسة تلحگهن هل طمطموهة بزواج غفلة هي لا متزوجة لا مستورة البت عايبة كونك تجذبني اسأل القابلة علية
غمضت عيوني هاي هي انتهيت اذا همة اخواني الربوني حلفتلهم ما صدگو بية هسة حتى لو ياخذوني للمستشفى مايفارق شي دلهم ماكو وتم زواجنة لا عقد عندي ولا سالم يشهد على زواجي
گايللهم ميتة و ذبحتهة ما گال تزوجت
شكرا لزيارتكم عالم روايات سكيرهوم
