رواية جذبني فمك البني الفصل الثامن 8 بقلم عبير إدريس

هناك شخص واحد فقط في الحياه يحتل قلبك وكل من يأتي بعده يرحل لذاكره النسيان....

_____

كعدت الصبح مطيت جسمي مكسره تكسر ..

رحت للمطبخ حضرت قهوتي الصباحيه ، صبيتها بالفنجان انرسم طيف ادهم بالبخار ،

مجرد هذيان بسبب تخيلات عقل الباطن ،

اخذت الفنجان ورحت كعدت على الكرسي الهزاز ،

ضوه الشمس يتسلل من التول مال برده ،

ويضرب على جسمي حسيت بدفو وكأنما واحد حاضني ،

علكت اغنيه لفيروز بالموبايل وكعدت اسمع وارتشف قهوتي ،

واسأل نفسي اسأله للغائب الحاضر ،

بعدك تتذكرني

تتذكر سوالفي،

يزورك طيفي بمنامك مثل ما طيفك ميفاركني لحظه من اغمض جفوني.

هم تشتاق لعطري مثل ما اني متخبله على عطرك و اريد استنشقة مثل المدمن ..

هم بيوم مر على شفتك نسيم هوى طيب ولثم شفتك وذكرك بلثمه شفتي متأكده اي لان اللي يبدل علاج بعلاج ثاني حتى بس يجيني هذا اكيد مكدر ينساني ولا لحظه ..

ضليت كاعد واهز بالكرسي وافكر باوعت للساعه ١٢ ونص حيل شكد صارلي كاعده ردت اكوم صارت هويه قويه انركع شباك المطبخ كلت تفلش رحت سديته ، بس شنو اخترعت خرعه من هاي الزينه ،

وكفت شسوي غده حيره ومالي نفس من بعد صفنه على الثلاجه قررت اسوي فطائر شو عاجبني ، طلعت المواد وسويتها بعجينه العشر دقايق ، والحشوه برشت صوصج وجبن معجبني اخلي شي ثاني ، بعدين تذكرت الفلفل الاخضر اموت عليه ويه الفطائر طلعت وحده شيفتها ، لفيت العجينه بالنايلون وغطيتها عفتها نص ساعه واجيت حشيتها ، خليتها بالفرن علكت الجوه وبعدين الفوك ، سويت جاي ، استوت وكعدت تغديت ...

كملت غسلت المواعين ورتبت المطبخ حسيت راسي مسطور ، كلت خلي انام بلكت ارتاح ، نمت توني اغفه حسيت انسحبت من رجلي كمزت فازة باوعت بالغرفه ماكو احد ، خليت ايدي على كلبي وقريت ايات وضليت اردد بسم الله الرحمن الرحيم...

كمت طلعت للهول افتر الخوفه بيه بعدها خابرت نسرين كلت بلكت تلهيني علمود انسى الصار ، توني اتصل حسيت دكه خفيفه على باب الشقه لبست حجاب صحت منو محد يرد فتحت الباب باوعت الممر فارغ مابيه احد ، زاد خوفي اكثر ، اتصلت على نسرين حجيتلها ..

نسرين : ولج خاف من سويتي التخاطر اثر عليج وكمتي تتخيلين ..

سيلين : الخوف اكل كلبي كمت امشي واتلفت حتى بنومي ممرتاحه شجاني وهيج سويت عبالي بوقته ويروح مادري بيه اثار سلبيه تأثر على حياتي..

نسرين : انتي تدرين احتمال تتخبلين واحتمال يتلبسج جن اسم الله ، ومرات الانسان يفقد عقله واحتمال تنامين ومتكعدين بعد..

سيلين : شسالفه يمعوده هيه كم حركه سويتها وكم كلمه نطقتها ..

نسرين : انتي متدرين بهذا الشي كاعد تجذبين الجن لحياتج وهاي افعال شيطانيه اصلا شي مرعب اني قاريه عنه انتي لو سائلتني جان منعتج ..

سيلين : صارلي اسبوع من سويته حياتي انكلبت يوميه احلم كابوس شكل يوميه احس واحد يمي كمت اخبط بين الواقع والحلم ما كمت اميز عقلي الباطن كام يصورلي اشياء مموجوده..

نسرين : واحتمال موجوده بشقتج وانتي متدرين..

سيلين :شلون يعني خوفتيني شسوي هسه عفيه..

نسرين : علكي قران ومسحي بيتج بملح خشن بلكت يطرد الطاقه السلبيه اكيد هسه سيطرت على بيتج..

سيلين : اي والله كمت اخاف من خيالي شلون هيج سويت، زين شكد يرادلي و ارجع طبيعيه ما اخاف ولا احلم بكوابيس

نسرين : ترجعين بس هذا اعتبريه درس الج ..

سيلين : التوبه بعد اسوي هيج شغلات على الشفته والحسيته يكفي بيومها احس روحي تنسحب مني وماكدر اسوي شي ..

نسرين : تنذكر متنعاد..

سيلين : يارب ، اكلج حبي هاي الباب كاعد تندك اكوم اشوف منو..

نسرين : اي روحي الله وياج...

سديت الموبايل ورحت فتحت الباب ام عبد..

ام عبد : شلونح حبيبه..

سيلين : الحمدلله خاله تفضلي..

ام عبد : والله اني شايله بخاطري منج وابو عبد هم لهذا ماريد افوت ..

سيلين : فوتي نحجي جوه مو مال بالباب شسالفه خاله ..

ام عبد : حبيبه من هسه اذا ما تحجين الصراحه عمارتنه تتعذرج ما نكدر نبقيج هنا ، كذبتي علينه كلتي وحيده وطلعت امج عايشه الله يعلم شنو وراج واحنه ناس مسالمين ونخاف على نفسنه ورزقنه لو بيج تحجيلي وتقنعيني لو تشوفيلج مكان ثاني...

صافنه عليها شجاوبها هسه جريت نفس عميق وزفرته..

سيلين : فوتي خاله احجيلج..

فاتت وكعدت على القنفه نزعت عبايتها لفتها بيدها وخلتها بصفها ، اني رحت كعدت كبالها...

ام عبد : احجي اسمعج..

سيلين :اسويلج جاي تشربين ..

ام عبد: لالا ياجاي احجي عفت الرجال يهوس بلبيت ...

سيلين : ماشي بس اذا حجيتلج قصتي توعديني متحجين لاحد وتوكفين ويايه..

ام عبد : شلون وابو عبد منتظرني اردله جواب..

سيلين : ماعرف اذا توعديني احجي متوعديني ما اكدر واروح ادور مكان ثاني...

ام عبد : اسمعج اول الله يستر مبين وراج مصيبه.

سيلين : لتخافين ماعندي شي مجرد انهزمت من البشر وعبالي ارتاح طلعت ماكو راحه بالدنيا...

ام عبد : احجيلي اعتبريني امج ...

سيلين : الله يحفظج سمعي خاله ...

اني بنيه ع

اديه حالي حال ملايين البنات ...

من اصول كرديه والدي كردي و والدتي كذلك..

بابا خريج جامعه بغداد كليه الطب البيطري...

درس هناك وتعين بيوم رجع زيارة لبيت اهله وشاف ماما بالفرع تمشي عجبته جانو نازلين جديد بالمنطقه مشى وراها اندل بيتهم كام بين فتره وفتره ينزل علمودها وصارت علاقه بينهم خطبها بابا ابوها مقبل ينطيها لان بابا راد يستقر بغداد سكنه و وظيفته هناك ، شرط على بابا يترك وظيفته ويرجع يستقر بالشمال بابا وافق للأسف جان قراره خاطئ وتراكمت عليه هواي امور سيئه ..

تزوج ماما ودللها دلال بالبدايه جانت تموت عليه لان جان عنده فلوس ، بدت تخلص فلوسه وهو كعد بلبيت مدور شغل فرحان بيها لهذا كعدو على الحديده لا فتح مشروع ولا سوه شي لنفسه رجع يشتغل من الصفر ماما بدت تمل وبلشت المشاكل بينهم ...

حبلت وجابت بنيه ورة سنتين هم جابت بنيه وراها اجيت اني واخر شي ايفين اختي ..

اخواتي الثنين الكبار صار بيهم مرض وراثي ، تعلعلت صحتهم اني وايفين الحمدلله زينين بس ايفين صار بيها بس ابسط من حاله اخواتي وتعالجت يعني قاومت المرض،

بابا تعب كام شنو يشتغل يذبه على الاطباء ومحد ساعده الكل يتفرج عليه شلون يتكطع ويتصره على الفلس ،

ماما مترحم تريد تصرف وتريد تشتري وتريد طلعات و ونسه ،

اذا اجه عيد نوروز لازم زي جديد تشتري ،

وتطلع ويه اهلها وهاي الطلعه تحتاج مصاريف،

لهذا بابا يجمع الها قبل هذا الوقت وينطيها فلوس بيدها تروح وهو يضل يمنه ،

جانت ماما هواي تسير على الجوارين وهواي تروح لأهلها جان بابا متكفل بينه يرجع من الشغل ونلتم داير مدايره ناكل سوه يلعب ويانه من نام هو يكعدنه لسه اتذكر كلماته يلا باباتي حبيباتي كومو كافي نوم اضوج وحدي اتريك...

ونكعد وياه ونلتم على سفره وحده مجنه نحس ببشاعه ماما وتقصيرها ويانه لان هو ساد بمكانها ، جان يسولف النه قصص وسوالف تخلينه نشبع ضحك ونكركر ،

مره جابلنه لعابات نايلون ونوعيتها رديئه على كد فلوسه بس طرنه بيها لان هاي اول مره تصير عدنه لعبه كمنه نفصل ونخيط ملابس ونلبس اللعابات ، كبرت عمه ياسه وانضمت للفريق البناتي صارت بنيه من بنات وضاح ..

تلعب ويانه وتاكل ويانه ، بوقتها جان عمرها مقارب لاختي هاجر الله يرحمها يعني فرق سنتين بينهن ، واكبر مني بسبع سنوات بس عبالك بكدي من احجي وياها وتتفهم شنو اريد...

مرت الايام والسنين وصارت عيشه ماما ما تطاق ، المرض استفحل على خواتي وغابت ضحكه بابا عن وجها ،

مرينه بهواي ظروف انتهت بوفاه اخواتي الاثنين وهاجرنه لمحافظه ثانيه ،

كعدنه بيت تجاوز ومنطقه تعبانه حيل ، بيوت عباره عن طين وجينكو وناس متدري بناس جار ميعرف جاره شنو عنده ماعنده حرامي ارهابي زين شين محد يعرف ،

احنه كأي طفل نطلع نلعب بالشارع مره من المرات دنلعب صارت دنيا غروب وماما لو ندخل ساعه وحده بليل متفكدنه بس عمه ياسه كل شويه ماده راسها تشوفنه نلعب وتفوت ،

بابا بالشغل يتأخر يلا يرجع واحنه مأمنين ماكو شي ، ليش ما اني مدنكه العب بالطين التفت اختي ماكو..

ادور عليها واصيح ماكو صوتها متجاوب البيوت ظلمه وموحشه تخوف كأنما فلم رعب ...

اجه بابا بليل واني الخوف ماكل كلبي شلون راح افوت واكللهم اختي ضيعتها اخاف ماما تجويني بابا فات للبيت وطلع يركض سريع ويصيح سيلين افونه وينكم بابا ...

طلعت من وره التيل جنت خاتله رحت يمه شافني اجه يركض عليه لزمني من جتفي وصاح وين اختج ، علامات القلق مسيطره على وجها ..

متمتت بكلمات متقطعه..

سيلين : ممممما عرف جنت العب وهيه اختفت ..

وضاح : ولج وين اختفت لتخبليني اختج وين ..

كام يضرب على راسه فات للبيت دور ماهيه بوقتها كتل ماما زوعها العافيه يضرب ويصيح وين متيهة بناتج بشنو ملتهيه طبعا اني مو كل التفاصيل اتذكرها بس عمه ياسه كبيره وتتذكر هيه حجتلي من كبرت وصرت افتهم اني اتذكر بس ذاكره طفل ما اركز على الكلام والتفاصيل ،

بيومها بابا طلع بالشارع يضرب على راسه ويصيح بنتي وين راحت ياناس محد شاف بنتي..

الناس التمت علينه بس محد يتدخل مر اسوبع كامل على هالحال بابا ساكن الشارع عيونه مغمظت لحظه وحده ،

وبيوم اجتي مره علينه لابسه بوشي جان بابا كاعد بالكاع ومرجي راسه على الحايط وشايل جبال مال هم اجتي تقربت منه سلمت وطلبت تفوت جوه تحجي ويه بابا ، كام ورحب بيها عبالك روحه تعلكت بهاي المره وراد بس خيط يوصله لبنته ...

دخلو جوه وطلب من ماما وعمه ياسه يدخلون جوه ويعوفوهم وحدهم ..

حجت المره ..

_ عيني اني جارتكم من زمان ساكنه هنا والله يشهد عليه ما الي شغله بأي عبد بشر عايشه لحالي ولأطفالي اليتامه اربيهم ، بس الصارلك خلاني ما انام ليلي خصوصا منظرك من تلطم وتبجي على بنيتك ، وضميري كام يأنبني ازيد من اشوفك تتأذه واني اعرف بنتك وين..

كمز بابا وكف فوك راسها حجه بصوت يرجف

وضاح : رحمه لأهلج وينها دليني بيها مو راح اموت من قهري فقدت بنات ثنين وماعندي حيل افقد الثالثه.

_ اكو هنا عصابه مال تجاره اعضاء بشريه ت

بعد سبع بيوت عنكم ، روح جيب شرطه هسه تلكه بنتك يمهم احتمال تلكاها عايشه واحتمال بقيه بحياتك..

بابا سمع هيج كام يدك على راسه ويصيح.

وضاح : لتكوليها رحمه لاهلج لتحجين هيج بس دليني اروحلهم هسه انعل ابهاتهم..

_ متكدر وحدك ذوله عصابات جبيره وناس لازمه ظهر ناس اذا تريد تواجه لو تشتكي عليهم انصحك تطلع من البيت اول علمود يضيع اثركم ..

وفعلا ثاني يوم طلعنه من البيت ورحنه محافظه ثانيه بابا دور على بيت شلون مجان ولكينه بيت مبني بلوك وملبوخ بطين ، امنه بلبيت وراح يومين بابا مختفي عن البيت وره يومين اندكت الباب فتحناها بابا جاي وجايب اختي وياه ..

بس اختي مابيها غير بقايا بشر وجها شاحب ومليانه وصخ وايدها ورجلها بيهن اثار مال حبال مبين جانو شاديها حتى حلكها بيه اثر،

اخذها بابا ودخلها للحمام سبحها وهنا جانت الصدمه طلع يدك على راسه اختي بطنها مفتوحه ومخيطيها يعني خياط عمليه جديد .

اخذها وركض بيها للطبيب من بعد فحوصات تأكدلنه اختي ماحذين منها كلى ومنا بده القهر والضيم اختي صار عدها مضاعفات كلش قويه وصحتها بالنازل وبابا حالته الماديه موذاك الشي...

بوقتها اجتي جوراينه اللي همه عيال عمتي قبل لا ياخذون عمتي جنه منعرفهم ،

اجتي جابتلنه غده علمود نازلين جدد هناك عدهم هيج عادات الجار الينزل جديد يقيمون بواجبه لحد ما يكمل كلشي ويستقر..،

سمعو بقصه اختي لان ماما ماعدها تحفظ سر ولا تفرق بين الغريب والقريب تحجي اللي بطنها كله ..

المرة انقهرت علينه وتعاطفت ويانه ومنا بلشو يساعدونه واللي دبر شغل لبابا هو ادهم زوج عمه ياسه ..

وكام يروح ويه بابا للطبيب ياخذون اختي والتكاليف كلها عليه لان بابا ماعده ومجبور يقبل لان اختي بين الحياه والموت ، صارت زينه وضعها تحسن ومن هدأ الوضع سألنه بابا شلون لكيتها ومنو ساعدك كال ..

وضاح: اول ماعفتكم رحت بوجهي قدمت بلاغ ضحكو وما هتمو للوضع عبالهم كذب او كاعد اتبله عليهم لان حسب الي فهمته بهاي المنطقه ناس تكيد لناس وتلفيق تهم باطله لهذا الشرطه كامت متصدك ، بس من شافو حالتي شلون منهار طلعت ويايه مفرزه وداهمو للبيت لكيناها مشمورة بالمخزن اخذت بنتي وطلعت اركض ومادري شصار ورايه...

بوقتها جان بابا يحجي ومتألم ، من يومها زاد حرصه علينه اكثر وشدد على ماما حتى طلعاتها للجوراين منعها كمنه من كلشي نخاف حتى اللي يريد يساعدنه ونيته صدك مساعده خفنه منه لان حسينه عايشين بنص غابه مليانه ذياب..

بعد فتره تقدم ادهم لخطبه عمه ياسه وتقابل بالرفض من اهله حاربوه هواي ..

وبيوم اجه وحده مشى على اختي بابا كله جيب اهلك واخذها بهدومها بس اذا وحدك وبدون رضاتهم اعذرني

استمر الحال اشهر يلا صارت القسمه وعمتي حيل ارتاحت ويه عمو لان يموت عليها ودللها ..

مرت الايام بابا توفى ورجعنه لبيت جدي عشنه فتره قاسيه حيل عانينه كلش خصوصا اني ، وراها اخذنه ورثنه واشرينه بيت يم خالي بسليمانيه ماما مكعدت راحه حبتلها واحد اصغر منها بعشر سنين تزوجته وجابته فوك راسنه يتأمر وهو صار ابو البيت ب افعاله وبعد فتره صار ابو البيت فعليا لان ماما سجلته بأسمه ، وبالتالي خيرها بينه وبين بناتها وللأسف ماما اختارته اله ،

وبهيج صفينه اني واختي المريضه بالشارع ، خابرنه على بيت جدي محد يريدنه اللي انقذنه ابن عمي الجبير هو اجه علينه ولمنه من الشارع ورجعنه وياه..

الطريق كله خايفه من المجهول شنو راح نقابل وشلون راح يتعاملون ويانه وصلنه لبيت جدي اول ما دخلنه الوجوه مكلبه ، زوجه عمي فرات صاحتنه ونطتنه غرفه كالت هاي الج ولأختج كعدن بيها ...

جانت نظيفه ومفروشه زوالي بس مديت فراش ونيمت اختي غطيتها و دفيتها ..

مددت بصفها من التعب والبجي نمت ، ماحسيت غير الباب تندك كمت فتحته زاكروز..

ابستم وكال..

زاكروز : افوت لو غير مرحب بيه..

قابله بأبتسامه متعبه..

سيلين : فوت هله بيك...

فات وبيده صينيه خلاها بالكاع كعد وكام يفتح بالجيس المسلفن بيه الاكل طلع خواشيك وقدملي وحده..

زاكروز : هاج اكلي..

سيلين : ما الي نفس..

زاكروز : تاكلين لو ازعل تره عايف شغلي والدنيا كلها ومرابط باب غرفتج منتضرج تكعدين علمود اروح اجيبلج الاكل وتالي تكليلي ماريد..

سيلين : انت ليش متعب نفسك وتساعدنه ..

ميل راسه وباوعلي بنظره عطف..

زاكروز : اذا اني ما اوكف وياج وغيري ميوكف منو يوكفلج تالي تصفين بالشوراع انتي واختج..

سيلين : بس اللي اتذكره انت مجنت تحبنه وهواي تتعارك ويانه ودائما تضربنه شعجب هسه تغييرت...

زاكروز : عمي جنت صغير ما افتهم وانتن حلوات واني اجلح اغار منكم وهم جنتو متلعبوني جنت انقهر واريد بس أأذيكم بس والله مجنت اكرهكم ابد..

سيلين : وهسه ؟

ابستم نص ابتسامه..

زاكروز : انتي شتشوفين ؟..

سيلين : احس بيك تعطف علينه او مقهور هيج شي..

زاكروز : باعي مال مقهور عليكم اي صح و صله الدم هيه الي دكت براسي وحركت غيرتي عليكم وجيت اركض بس ضيفي عليها شي ثاني اني احبكم ثنينكم ..

سيلين : تتذكر من ج

نه نلعب وتباوع علينه من شباك الاستقبال وتروح تجيب طاسه مي تخبط بيها طين وتشمرها على شعرنه..

زاكروز : ههههه ولج بعدج تتذكرين عوفي الفضايح وانسيها والله تغيرت وصرت خوش ولد وحباب ..

سيلين : ههههه شنسالك ضلت عداوتنه للمتوسطه ..

زاكروز : تتذكرين من تعاركت ويه ولد علمودج لان جان يمشي وراج ويصجمج...

سيلين : اتذكر وبوكتها كبرت بعيني بس كل يوم تهدد بيه اذا متصخرت الك تفتن عليه...

زاكروز : ولليوم محد يدري جنت احب اخوفج واشوف الخوف بعيونج..

سيلين : وهسه هم بعدك هيج ..

زاكروز : لا هسه اريد احسسكم بالامان واشوف نضرات الاستقرار بعيونج وعيون اختج.

سيلين : هسه اني شسوي ضايعه وتيهت الطريق يعني راح اضل اخدم بنسوان عمامي ومستقبلي يضيع..

زاكروز : تريدين تكملين مدرسه..

سيلين : ياريت امنيتي والله اني شاطره وكلشي افتهم بس الظروف عكست ويايه..

زاكروز : باعي ضلي فتره هنا بين ما ارتب اموري بيت اهلي واخليهم يتقبلون الوضع واروح اجيب اوراقج وانقلج مدرسه يمنه واخذج لبيتنه كملي واني وياج وياج بكل خطوه..

سيلين : زاكروز خاف امك تأذيني ومنا عمي متخبل مني وكارهنه اني واختي هلمره اكعد يمهم واضل طابه طالعه للمدرسه..

زاكروز : نطلع سوه الصبح وانتي ترجعين قبلي بساعتين تحملي شلون مجان بعدها اني راح اكابلج واكعد منو يكدر يفك حلكه وياج.

سيلين : ممنونه منك ابن عمي الغالي..

زاكروز : والله وكت صرت غالي ههههه..

سيلين : وكفتك متنسي..

زاكروز : ما مسوي شي ، يلا كعدي اختج واكلو راح اروح للبيت تأخرت وباجر من الصبح امر عليكم ..

سيلين : ماشي ...

وفعلا كام يوميه يجي علينه يشوف شنو نحتاج اشترالنه ملابس بيت والي ملابس مدرسه وراح جاب اوراقي ونقلني ورتب اموره بلبيت مالتهم،

ضليت اسبوع بيت جدي بس هذا الاسبوع كان اشبه بالجحيم عليه ،

كراب وشغل من الصبح لليل انام مهدوده هد عدا اللي تريد تروح للسوك شمرت عليه جهالها وغيرها وغيرها هواي سوالف وضيم ..

اجه زاكروز واخذنه لبيت اهله اول مادخلنه جان عمي صلاح كاعد رجل على رجل ونافخ نفسه سلمت ، رد السلام بخشم يابس...

اشرلي زاكروز بحواجبه يعني صعدو فوك بالطريق اتفقنه اول ما نفوت نصعد فوك ودلاني بالغرفه مالتنه ، اخذت اختي وصعدنه وهو صعد الملابس مالتنه..

بلش الدوام كمت اقفل الباب على اختي واروح لان اخاف عليها ولد عمامي خمسه عدا زاكروز وكلهم علاقتنه موزينه بيهم بس زاكروز اعرفه وهم مو ذيج المعرفه يعني الظاهر النه هو زين بس خبايا ما معروفه...

كمت اروح للمدرسه ارجع ساعه ١٢ ونص تتلكاني زوجه عمي بسعاد عياط واهاين وسب ، ساعه تسب بابا ساعه تسب ماما وتعيرني بيها ، خلت عليه تنظيف البيت وبيتهم جبير وبيه ست غرف وكلها شبابيه ، بالغرفه الوحده اطول نص ساعه تنظيف ..

الملم ملابس المطشره ماعرف اكنس الكطوف مال جكاير لو اشيل الملازم ...

اكمل حيلي ينهد ، زاكروز هواي ساعدني بدراستي بس بسبب الشغل والتعب اذب روحي وانام مهدوده هد مابيه اشيل راسي وهيج تراجع مستوايه الدراسي تساويت ويه اكسل طالبه بالصف ...

وبيوم قبل امتحاناتي بشهر ، اجه زاكروز كعد يمي..

زاكروز : سيلين عندي موضوع وياج..

طبكت الكتاب ورفعت راسي استمع ...همست..

سيلين : شنو كول ؟

زاكروز : باعي اني اعرفج من احنه وصغار من جنتي تلبسين نعالج تك وتك وملابسج سبع اشكال..

ضحكت على الوصف ..

سيلين : شكرا ههههه..

زاكروز : اي قابل اكذب عليج ، عدا شعرج من جان يصير بيج كمل وعمه تغط راسج برميل النفط..

سيلين : يااا هاي شبيك جاي متحمل عليه ،هاي السوالف راحت بوكتها وجنت العب بالشارع طبيعي انعدي من البنات وبعدين شجاك اليوم تتذكر شكو شي تعيس مريت بيه..

زاكروز : ههههه مو اريد اعترف بشي وحتى اتقوه تذكرت سوالف زمان .

سيلين : بشنو تعترف بله ..

زاكروز : باعي من الاخير انتي بنت عمي وعاجبتني واني اريدج زوجه اليه وشنو تريدين اقبل تكملين دراستج موافق عاجبج تتوظفين ماعندي مانع ها شكلتي ..

سيلين : الصراحه فاجأتني مجنت متوقعتك تحبني لدرجه تطلبني زواج..

زاكروز : احبج ومو هسه من جنه صغار جنتي عاجبتني وهذا الاعجاب كبر وتحول حب واهتمام هسه شنو رأيج علمود احضر نفسي واحجي ويه اهلي..

سيلين : زاكروز انت تعرف كلش زين الحل والربط بيد امك وابوك يعني اني موافقتي من عدمها مو مهمه بكد موافقتهم همه..

زاكروز : معليج منهم اللي فهمته من كلامج انتي هاويتني..

دنكت راسي وابتسمت مجاوبته هو ضحك وطلع فهم اني عندي شي بداخلي اله ..

مرت الايام واشتدت المشاكل يوميه مشكله بين زاكروز وعمي ومرته علمود موضوع زواجنه ، عدا يوميه تصعد تهدد وتتوعد تأذيني اذا وافقت ...

اجتي الامتحانات وامتحنت مدري شلون قريت وماعرف شنو جاوبت اخر امتحان جان عدنه فيزياء تأخرت بيه اجتي الاسئله صعبه ،

رجعت للبيت ماكو احد هدوء بديت اصعد الدرجات واسمع صوت انين مخنوك ،

تذكرت اختي وحدها اخر فتره كمت ما اقفل الباب خفت اتأخر وتحتاج حمام وين تروح ،

صعدت ارك

ض وكل ما اقترب من غرفتها يرتفع الصوت ويأكدلي اختي بخطر دفعت الباب واشوف ابن عمي الوسطاني اسامه صاير فوك اختي ويبوس بيها بشراهة وهيه ماعدها قوه تدافع عن نفسها ،

ركضت عليه جريته من بلوزه انشك بيدي التفت عليه كام و ضربني راشدي ضليت اتماعط وياه ماعرف منين اجتني القوه ..

هو يضرب واني اضرب رفعت اصبعي بوجها مهدده وحجيت بصوت يرجف..

سيلين : اذا ما فضحتك كدام الكل بسيطه يا اسامه اني الك...

ضحك ومسح حلكه بطرف اصبعه..

اسامه : روحي احجي منو يصدكج ..

سيلين : زاكروز يصدكني بس اكله يجي يطيح حضك..

اسامه : جربي وشوفي شنو اسوي اول شي افضحج واكول انتي اللي تتحارشين بيه وتطبيلي للغرفه ، واني لان منطيتج عين تبليتي عليه.

سيلين : يعرفني كلش زين اني شنو متسحيل يصدك بيك..

اسامه : جربي وشوفي بس قبلها شوفيلي هاي الصور يلا ترحين..

طلع موبايله ويكلب كدامي تخبلت مصور جسم اختي بطريقه ابد محلوة ، ردت اخذ الموبايل حتى اكسره بس جان اسرع مني اخذه وضمه بجيبه..

اسامه : هاا بعدج تردين تحجين..

سيلين : مبين مو بأرادتها بس الغبي يصدك..

اسامه : بس جانت متجاوبه ويايه ليش مركزتي زين بالصور ، بكيفج تنزلين اني افر الصور على الكل تسكتين ابقه اتفرج عليهن وحدي واذا ردتج بأي وقت تجيني وانتي الممنونه...

سيلين : هذا اسمه ابتزاز وانت كاعد تبتزني بأختي يا نذل واني بنت عمك يعني شرفك وباجر عكبه اصير زوجه اخوك..

ضحك ضحكه بنذاله وكعد على الكرسي وثنه رجله..

اسامه : باعي عاجبني اليوم بليل تجيني واذا ماجيتي با اقرب فرصه اصورج نفس هاي الصور واشوفها لحبيب الكلب...

سيلين : متكدر جرب وشوف ولو تموت ماسوي اللي تريده...

تجادلنه اني وياه وصار تراشق بالكلام البذيئ ...

اخر شي طلع وسديت الباب اختي كامت تبجي ...

سيلين : شلون هيج صار احجيلي شلون صورج ليش خليتيه ...

ايفين : مكدرتله اقوه مني وهددني لو يصور واسكت لو يسوي بيه غير شغلات مجرد ذكرها الي اشمئزت روحي منها..

سيلين : حسبي الله ونعم الوكيل بيهم وبأمج اللي شمرتنه هالشمره..

مرت الايام وزاد حرصي على اختي اضعاف ، اكتفيت بشهاده السادس وكعدت مقدمت خوفا على اختي شلون اعوفها وحدها والوقت طويل..

عمه بسعاد ارتاحت براسي الشغل كله صار عليه وضلت تطب وتطلع يوميه مدري وين تروح ، عدا صخر ولدها وزاكروز يتكرضم مابيده شي يسويه لان تعب وانهارت اعصابه من المشاكل..

اني روحي صارت بيه مو احبه حب وانما حسيته اماني

بهاي الدنيا اني واختي ..

اذا يتإخر اتخبل اخابره اشوفه وين ، تعلمت يوميه نسولف اني وياه مرات نضل للصبح هو بغرفته واني بغرفتي ونتخابر يأذن الفجر يلا نام ، مرت الايام وموضوع الزواج انسد مفتحه ابد ، وحتى معاملته الي كدام اهله تغيرت كله رسميات ، شويه شويه كام يقلل ويبتعد الى ان اجه اليوم اللي صدمني بيه ..

الفصل التاسع من هنا