رواية جذبني فمك البني الفصل التاسع 9 بقلم عبير إدريس

مـتت مامِشـتِكي

وعُرفـت اسـراري النـاس ..

شـآمِـت گايـللهُم كاتلـينه.

___________

مرت الايام والاشهر جانت صعبه حيل صبرت وتحملت وبلعت الضيم والقهر ، علاقتي بابن عمي جانت مو حب وانما تعلق تعلقت بيه خوفا من المجهول لان حسيته اماني من بعد ربي ،

با اشهر قليله قوت علاقتنه كلش ، كام شي يشدني اله كمت احب اراقبه من يسولف من يضحك حتى من ساكت اضل اتفرج عليه ، رسمت شخصيه خياليه ابالي عنه على الرغم جانت شخصيته واضحه كلش بس اني ضخمتها سويته البطل الخارق وهو اللي راح ينقذني من الضيم والتعب..

علاقتنه جانت اخويه لا فد يوم تجرأ وحجه حجايه موحلوه ولا حاول يتقرب ويعبر الحدود ، غير الكلام ماكو بينه كأنما اخويه مثل ما اسولف ويه عمه ياسه اسولف وياه...

وبيوم نزلت الصبح اشتغل وعمه بسعاد مخبوصه كل شويه تخابر وتروح للأستقبال تحجي وترجع للهول حتى اسلوبها زين ويايه عكس كل يوم تنتر بالحجي..

كلت بيني وبين نفسي جوز الله هداها علينه او تعبت من المشاكل ، اشتغلت بهدوء مثل كل يوم صارت ساعه وحده كملت كلشي ردت اصعد فوك صعدت اول بايه صاحت وين التفتت عليها..

سيلين : عندج شي اسويه بعد..

بسعاد: اي الغده دنكمله..

سيلين : بس اني ما اعرف اطبخ..

بسعاد : اعلمج شيرادله نزلي نزلي لعد تردين تصيرين جنه وانتي كلشي متعرفين تسوين...

من كالت هيج كلبي طار حسيتها قبلت بزواجنه نزلت طايره للمطبخ احجي بلهفه ..

سيلين : شسوي كليلي..

راحت جرت كرسي وكعدت رجل على رجل ، سوي هيج وخلي هيج واني اسوي اللي تكول عليه بس نضرتها وابتسامتها جانت بيها الف أن ...

كملت وكالت هاهيه روحي نامي عاشت ايدج ..هزيت راسي وصعدت بس شنو الدنيا مسايعتني من الفرحه...

مددت بفراشي واني اتأمل واتخيل لابسه بدله بيضه وزاكروز لابس قاط وطالع يخبل ، احلام مراهقه جانت..

ايفين : شو نايمه وتضحكين شكو؟؟

التفتت عليها وخليت ايدي جوة راسي بحيث انرفع عن المخده ابتسمت براحه غمضت عيني وحجيت..

سيلين : افونه واخيرا راح نرتاح اني وياج..

عكدت حاجبها وكالت..

ايفين : شلون نرتاح بله ههههه شنو المناسبه؟

سيلين : عمه بسعاد اليوم كلش زينه ويايه وحتى كلتلي تعلمي طبخ شلون تردين تصيرين جنتي وانتي طبخ متعرفين تطبخين.

ايفين : عمه بسعاد هيج كالت..

سيلين : اي والله شبيج.

ايفين : ماصدك هاي الحيه تطلع منها كلمه طيبه تسر..

سيلين : كيفج بس الصار حجيته الج..

ايفين : لتفرحين هواي هاي ضامتلج ضمه..

سيلين : شسالفة خليني احلم حرام يعني..

ايفين : هو لان حلم ماريدج تصدكين لان مجرد حلم يعني زواجج من زاكروز ميتحقق..

سيلين : لج يحبني وتره ممجبور يعارك اهله عليه اذا جانت نيته لعب..

ايفين : نمشي وره الكذاب لحد باب الدار ونشوف تاليها ويه ابن عمج...

سيلين : اني متأمله خير..

ايفين : الله كريم الله يسعدج ان شاءالله..

سيلين : افونه معقوله تصيرلي غرفه حالي حال البنات وميز مرايا وكنتور اخلي بيه ملابسي واخلص من الكارتونات ...

ايفين : وانتي تردين تتزوجين علمود كنتور وميز مرايا..

سيلين : لا مو بس هيج يعني زاكروز يحبني واكيد راح يدللني وميقصر لا عليه ولا عليج ، ناكل براحتنه نلبس لبس مال اوادم..

ايفين : كملي كملي مصدكتج..

سيلين : انتي مو وجه نعمه ضلي عايشه بالفكر.

ايفين : اني واقعيه مو مثلج احلم وتالي تنكسر ركبتي..

سيلين : وليش هيج تتفاولين ..

ايفين : لان ببساطه عمج ميحبج ولا مرت عمج والولد الله يستر منهم شفتي ذاك اليوم شنو سوه بينه اسامه وزاكروز شخصيته ضعيفه بصوت من ابوه يعوف البيت ويطلع..

سيلين : شلون شخصيته ضعيفه وحار شسوه علمودنه وكف بوجهم وجابنه غصب هنا وخلاني اكمل مدرسه..

ايفين : صح بس لتنسين عمي لو خال باله وياج من صدك جان بطلج بس هو سكت ليش الله اعلم يعني مو خوف من ابنه ..

سيلين : الله كريم نصبر ونشوف الايام تبين كلشي..

ايفين : وهذا رأيي..

العصر سمعت صوت زاكروز يحجي طلعت من الغرفه وكفت يم الدرج انتضره يصعد ، انتضرت ربع ساعه ومصعد رجعت لغرفتي عفت الباب مفتوح كلت هسه يصعد واروحله مرت ساعه وثنين و٣ ومصعد ايست منه كلت اتصل ، اتصلت ينطيني مشغول دزيت رساله..

( وينك صار كم يوم اسمع صوتك بس ما شوفك وبعدين ليش ترفض اتصالاتي ترة راح ازعل)

طلعلي تم التسليم ومجاوبني كلبي كام يفور ليش هيج يتصرف ويايه شنو زعلان مني ...

ثاني يوم عمه صعدت جنه نايمين فتحت الباب وصاحت ..

بسعاد : يابنات كعدن ..

سيلين : ها عمه صباح الخير..

بسعاد : باعي انتي واختج ممنوع تنزلون جوه اهلي جايين وماريد احد يشوفكم ..

استغربت تصرفها بس عذرتها كلت احتمال تستنكف من عدنه او متريد احد يعرف احنه عايشين يمهم ..

سيلين : اي عمه مننزل..

بسعاد : الاكل اني اصعده الكم فوك والحمام يمكم ميحتاج تنزلون..

سيلين : فهمت ..

طلعت وسدت الباب اني رجعت نمت كيفت اليوم انام براحتي ما اشتغل ولا اتعب ، غفيت محسيت اله الباب انفتح باوعت ع

مه جايبه صينيه بيها اكل اول تالي ، شلون الانسان يتغير غفل تعجبت ، كمت اخذتها منها خليتها بالكاع و وكفت ..

سيلين : شكرا عمه تعبتج.

باوعت ونزلت محجت شي ، للعصر الهوسه زادت نسمع صوت نسوان وزلم ، سوالف وضحك اخر شي صوت هلاهل ...

ايفين : هذا منو تزوج.

سيلين : شمدريني ..

رفعت حاجبها وسوت حركه بحلكها معاجبها..

سيلين : ههههه شكلج يضحك..

ايفين : ان شاءالله مو البالي.

سيلين : شنو ابالج..

ايفين : هيج

سيلين : احجي لج..

ايفين : ماكو يمعوده..

سكتت ورة شويه البيت صار هدوء نزلنه اني وايفين الهول عباره عن نفاضات وجكاير المطبخ متروس مواعين مكلوب الطرمه كلها طين مبين جهال طابين للحديقه ولايصين الدنيا ..

سيلين : هاي شصاير هنا انقلاب..

ايفين : خاف انتي راح تنظفيه..

سيلين : والله مابيه حيل وين اكدر امشي نصعد ونغلس نسوي روحنه مندري..

ايفين : اي عفيه واذا كالت نكللها انتي كلتي لتنزلون.

سيلين : خوش فكره فدوة لاختي ..

كرصتها من خدها وصعدنه فوك ضلينه نسولف ونضحك صارت ساعه ثمانيه دك تليفوني باوعت عمه بسعاد..

سيلين : الو ها عمه..

بسعاد : سيلين نضفتو البيت تره جايين بالطريق..

رأسن باوعت لايفين الصافنه عليه عيوني دمعت ..

بسعاد: وينج مو وياج..

سيلين : عمه البيت مكلوب ما اكدر وحدي واختي تدرين بيها مريضه..

بسعاد : بلشي بالمطبخ على ما اجي واساعدج...

سيلين : ماشي ..

جريت نفس سدته وراحت..

ايفين : الله يجازيها لامج كلشي ماكول..

سيلين : بعدج تتذكريها اني نسيتها اصلا ما اتذكر بس نذالتها واحقد عليها..

ايفين : كله بسببها هيج صار بينه اتمنى يجي يوم واشوفها شلون مذلوله..

سيلين : عوفج منها لتضوجيني فوك ضوجتي ، باعي راح انزل ابلش بالمطبخ على كيفي علمود تجي تساعدني وانتي نامي ارتاحي..

ايفين : لا انزل وياج منعسانه ..

سيلين : كيفج تعالي ..

نزلنه شلهت ردني وبلشت انظف نسولف واشتغل محسيت بالوقت ، انفتح باب الشارع وفاتت سياره عمي ، نزلو عمي ومرت عمي وزاكروز ...

ايفين : شبيج وين صفنتي؟؟

كامت وكفت واجتي يمي وتباوع وين اباوع ، عيوني جمدت عليهم ، اريد اكذب احساسي ماريد اصدك اللي ابالي هو عيونه صارت بعيني ودار وجها على الجهة الثانيه دخلت عمه تهلهل هو صاح من يمه..

زاكروز : يمه مو هيج احنه شتفقنه ...

ايدي كامت ترجف عيوني صارت نار كامت تعكس الحركه البصدري ...

جرتني ايفين من ايدي تريدني اصعد واني تبسمرت بمكاني فصلت عن الدنيا كلها وعيني مركزتها على ابن عمي اللي سنه كامله موهمني ومعشمني بشي طلع مو كده...

صاحت بيه ايفين.

ايفين : امشي كتلج عوفي البيدج لو يحترك بيتهم معليج كافي فهاوة ...

جاوبتها بسعاد.

بسعاد : تشتغل بنومتها وبلكمتها قابل ملفيتجن بلاش..

ايفين : منشتغل لا اني ولا هيه وشتسوين سوي تطرديني عادي الشارع ارحم من عيشتج..

بسعاد : والله وطلعلج لسان ام تك كلى..

سمعتها من هيج كالت لاختي نهضمت حيل اريد احجي ماكدر عبالك حلكي تخيط بس اباوع لاختي شلون دنكت راسها مقهوره هنا يلا حسيت على نفسي وعيت على الدنيا جريت اختي وصعدنه فوك كعدت بالكاع وهيه راحت مددت وغطت راسها سمعتها تشهك تبجي واني على شهكتها بجيت وحضنت نفسي ..

ماعرف شكد مر وقت واني واختي وحده تشكي للثانيه بالبجي ...

اندك الباب صحت منو اجاي صوته..

زاكروز : اني سيلين تعاي اريد احجي وياج..

كمت مسحت عيوني بيدي وهفيت بيدي على عيوني ما اريد يبين عليه باجيه ولا اريده ينقهر عليه ولا احسسه كسرني ..

فتحت الباب وكتفت ايدي ..

سيلين : نعم اسمعك..

زاكروز : تعاي وياي عندي حجي وياج..

سيلين : واني ماعندي حجي وياك.

ردت اسد الباب دفعها بيده..

زاكروز : مو مثل ما متخيله تعاي افهمج..

سيلين : شتفهمني تره واضحه السالفه ومبروك عليك وشايف كل الخير..

بؤبؤ عينه يتوزع على وجهي وحسيت عيونه تريد تبجي..

زاكروز : بروح ابوج تعاي احاجيج والله ضميري كاعد يحركني حرك..

سيلين : على شنو يحركك ماكو داعي غيرك وغيرك كسروني وكسرو اختي امي اللي جابتني للدنيا مانقهرت عليه وطردتني انت حي الله ابن عمي وذاك اليوم يلا قوت علاقتي بيك تجي تنقهر عليه خلف الله عليك وكفتلنه وحميتنه جان هسه احنه بالشوارع والله يعلم شصار بحالنه...

زاكروز : ميخالف بس احجي وياج عليج الله تعاي ..

سيلين : وين نحجي؟

زاكروز : نطلع بره البيت هنا ما اخذ راحتي بالحجي.

سيلين : ماشي جيت...

سديت الباب على اختي وطلعت نزل ونزلت وراه بوقتها جنت ممحجبه لان ماما ماعدها وقت تنصح وتعلم لهذا عبالي الحجاب بكيف الواحد مجنت اعرف فرض وحرام ولازم بوقت معين البنيه تلبسه...

طلعنه صعد بسياره عمي اشرلي اصعد بالصدر صعدت شغل السياره ونزل فتح باب الشارع ورجع صعد طلع السياره وكفها بالباب ونزل سد باب البيت ورجع صعد مشينه وماعرف وين رايحين السكوت جان سيد الموقف وصلنه لمكان يبعد عن البيت بربع ساعه وكف السيارة و التفت عليه جر نفس قوي وكال ..

زاكروز : حقج بشنو تحجين وبشنو تفك

رين تكولين نذل مو كد كلمته مو رجال كلهن حقج بس والله السويته علمودج.

سيلين : جان حجيت وكلت يابه راح اخطب وانتي انتهت سالفتج مو تفاجأني وتخليني انظف واخدم خطارك المعزومين على مهرك جان جيت وكلت بت عمي لتتأملين اني ما اكدر اوفي بوعدي، انت شسويت انسحبت لا ترد على اتصالاتي تتحاشاني وين ما تشوفني تكوم خو احجي عليمن تتهرب مثل المسوي مكسورة ..

زاكروز : اي اني سويت مكسورة وتهربت منج مالي عين اخليها بعينج..

سيلين : من شوكت؟

التفت عليه وهمس.

زاكروز : شنو من شوكت..

سيلين : من شوكت انت خاطب و عندك علم بالسالفه يعني تحبها لو جبروك عليها..

دنك محجه..

سيلين : ليش متجاوبني ؟

زاكروز : اني كتلهم عليها..

اختنكت كلش جنت اتمنى يكلي ابويه جبرني امي اختارتها وانجبرت عليها..

سيلين : رجعني للبيت عفيه.

زاكروز : باعي لو ماخذج امي تسمم عيشتج وتقاولت وياها اذا تزوجت متأذيج بعد ولا تدوسلج على طرف وقبلت.

سيلين : ليش املتني بشي انت مو كده هيج عدكم كسر الخواطر سهل ، يعني انت هسه السويته سهل عندك وعادي راح ترجع تخابر خطيبتك وتسولف وبعدين تخلي راسك على المخده وتنام وبت عمك تكضي الليل بين الونه والحسرة...

زاكروز : اعتذر واعترف اني جبان مكدرت اوفي بكلمتي سامحيني والله حبيتج وردتج بس اهلي ماكدر اكسرلهم كلمه..

عيوني تتسابق بالبجي امسح بيها ودموعي تنزل...

سيلين : انت البادرت وانت خليت الفكره ابالي وانت الجبتني وخليتني بيتكم وعشمتني بشي انت مو كده لهذا بعد معليك بيه ولا توصل يمي انت انتهيت بالنسبه اليه والحمدلله والشكر عرفتك هسه ولا اتورط بزواجه واطفال وتاليتي انكسر وللشارع.

زاكروز : ليش هيج تحجين تره اني مو بهذا السوء..

سيلين : عفيه رجعني راسي راح ينفجر..

زاكروز : سامحيني يلا ارجعج والله ضميري يوجعني..

سيلين : ماكدر اسامحك ابد انت استغفلتني وضحكت عليه اكذب عليك اذا اكلك متأثرت ولا انقهرت وراح انسى الصار صعب ...

جر نفس وذبه شغل السيارة ورجعنه اول ما نزل يفتح الباب اني نزلت اركض ما اكدر اضل دقيقه وياه بنفس المكان صعدت للغرفه لكيت ايفين بعدها نايمه اني هم مددت وضليت ابجي لحد ما نمت ثاني يوم خابرت عمه ياسه سولفتلها ..

سيلين : عمه وهذا كل الصار اني بعد ما اتحمل اضل هنا اكثر..

ياسة : لتبجين حبيبتي و صبري بس هالشهر على ما ارتب اموري واشيل لبغداد اني هم حيل تأذيت عيالي دمروني وخابرت ادهم كال اني احلها خابر على اخوه وصاه يشتري بيت زين بغداد ويكعد ويايه على ما يرجع ادهم من سفرته.

سيلين : شوكت يرجع طول تره..

ياسة : بعد سنتين هو هم ضاج كلش وكلبه مفرفح على مريومه يكول اجتي للدنيا وكبرت واني مشايلها هاي بس صور ادزله مرات نفتح كام ويشوفها ...

سيلين : خطيه الله يسهل وتنجمعون..

ياسة : ضايعه بدونه يوميه ابجي تتبلل مخدتي يلا انام ...

سيلين : ليش ما اخذج وياه..

ياسه : كلي بس اني بوكتها جنت حايره بيكم وبأبوج مكدرت اروح وهسه هم خابر كال ادز عليكم تجون يمي ضجت وحدي بس ماكدر اكو شغله صارت بعدين احجيلج عنها اذا رحت وعرف اخرب عليه الاول والتالي.

سيلين : شنو الشغله عمه خليتي بالي ..

ياسة : من تجين احجيلج عنها ..

سيلين : ماشي بس طمنيني خوما شغله تخوف..

ياسة : لا لتخلين بالج هيج شغله بسيطه ..

سيلين : حبيبتي عمه الله يوفقج ويسهل كل امورج مثل ما وكفتي ويانه وجنتي بمقام امي تنصحين وتعلمين بينه لو ما انتي جان اني واختي ضعنه من زمان..

ياسة : اني اختكم قبل لا اكون عمتكم وانتو بنات وضاح العزيز الله يرحمه ...

سيلين : امين عمه شيخلص الشهر وشلون راح اصبر..

ياسة : ضلي بغرفتج عسما يحترك بيتهم لتنزلين ..

سيلين : اي هو هم هيج ما اسوي شي قابل شتكدر تسوي.

ياسة : اي عفيه الله يكفيكم شرها..

سيلين : امين يلا عمه اروح اني انتي هم اكيد عندج شغل..

ياسة : اروح اسبح مريومه واغديها بلكت الحك انام ساعه ..

سيلين : الله يساعدج ..

ياسة : حبيبتي يلا مع السلامه..

سيلين : الله وياج..

سديته وكمت رتبت الغرفه ونزلت صبيت غده الي ولايفين وسمعت اشكال حجي وغلط وتبسمر على هاللكمه ...

بسعاد : شلون ناسبنه ناس اصل وفصل امها مدرسه والاب موظف والبنيه خريجه تلوك لابني ..

اعرف تسمعني لان بس اني موجوده تسوي روحها تحجي بالتليفون..

سكتت اخذت الاكل وصعدت ، خليته كدام اختي وتكترت على صفحه.

ايفين : متاكلين.

سيلين : ما اشتهي..

ايفين : اني هم ما اريد شيليه..

سيلين : انتي شعليج بيه اكلي لتضوجيني..

ايفين : كتلج اكلي اكل متاكلين اني هم ماريد..

سيلين : هففف يعني شعليج بيه لخاطر الله..

باوعتلي بطرف عينها ودنكت تاكل اني هم كعدت اكلت وياها شويه وكمت اخذت ملابس ودخلت سبحت ، لبست تراكسودي ولفيت شعري زين وطلعت صار بوجهي اسامه ، باوعلي كصني كص عبالك يباوع لوحده بالشارع عفته وفتت لغرفتنه منقرفه منه ومن نضراته..

ايفين : شبيج ؟

سيلين : مابيه سلامتج..

مشت الايام واحنه محبوسات بهاي الغرفه البارده ابرد

من مشاعرنه واني كل يوم حقدي يزيد عليهم وحسيت روحي صرت عدائيه ، وبيوم صاحنه عمي صلاح نزلنه جوة ..

صلاح : كعدو بابا عندي موضوع وياكم..

كعدنه وحده بصف الثانيه وعيونه عليه ننتظر شراح يحجي..

صلاح : يمكن متدرون بياسة شالت لبغداد..

سيلين : اعرف عندي خبر..

صلاح : كلش زين بس تعرفين بيها مريضه ؟

انتفضت من مكاني وصحت..

سيلين : شبيها عفيه ، عمه مريضه ليش وشوكت ومنو كلك..

صلاح : على كيفج البارحه يلا دريت حماها خابرني تعبانه بتعزيل البيت ومتخربطه شايلها للمستشفى من بعد تحاليل وفحوصات وسونر شاكين بيها ذاك المرض واخذو عينه من الرحم ومنتضرين الزرع بلكت الله يطلع حميد ومابيهة شي..

لطمت على وجهي بقهر..

سيلين : يعني عمه هم راح تموت شنو من حظ علينه ياربي عمتي الوحيده الحنينه علينه هم حتعوفنه..

صلاح : اسم الله ان شاءالله مابيهة شي ،بس اللي اريده منكم انتي واختج تجون ويايه اوديكم يمها تداروها وعينكم على بتها خطيه تبهذلت الطفله..

نغتني ايفين وهمست.

ايفين : هذا عمج منين اجته الحنيه واللطافه صار يحب الاطفال وكلبه على عمه ياسه خاف يريد يزحلكنه..

سيلين : سكتي انتي بلعي لسانج..

ايفين : سكتت سكتت هو اليحجي الحق مينراد..

سيلين : اي سكتي ماريد اسمع لا حق ولا باطل خلينه بمصيبه عمه..

صلاح : ها كملتو نقاشات سمعونه..

سيلين : ماكو شي بس تكول شوكت نروح..

صلاح : بكيفكم تردون باجر .

سيلين : علواه ..

صلاح : يلا باجر حضرو نفسكم نطلع من الفجر حتى الحك ارجع من وقت..

سيلين : ماشي..

كمنه اني واختي صعدنه فوك والهم تربع بنص كلبي شلون اذا مرضها خطير شلون اذا ماتت شنو مصير بنتها هم راح تعاني مثلي ومثل اختي اخ اخ بس لا عدها اب حنين اكيد ميفرط بيها ،

وهيج عقلي يودي ويجيب والليل كله مكدرت انام دقيقه ، صارت ساعه ٣ كمت غسلت وبدلت وكعدت ايفين هم بدلت وشلنه ملابسنه خليناهن بجيس اسود ونزلنه جوه مودعين الغرفه وحياطينها البارده ودموعنه وقهرنه وخذلانه وذلتنه بهذا البيت ...

كعدنه بالهول ننتظر عمي يكعد ماعدنه جرئه ندك الباب ونكعده صارت اربعه ونص هو كعد من وحده شافنه كاعدات عاف وراح للحمام غسل وتوضه اجه وكف يصلي ،

من اباوع شلون يصلي ويجود بالايات ويطول بالسجود اكول شكد يعرف الله ويخاف منه ، اذا هيج صلاتك لعد متعرف رب العالمين شنو وصه باليتيم مقريت بكتاب مسمعت سكتت وجريت حسره شكبرها وهم ما الومه يبقه عم لا ابويه ولا امي حتى يحن علينه ..

كمل وكال يلا ، طلعنه صعدنه ليورة ومشت بينه السيارة بين الازدحامات والسيطرات وصلنه لبغداد وره سبع ساعات تكسرنه تكسر خابر على واحد اعتقد حماها لعمه وطلب يوصفله المكان بالضبط ،

يسوق ويحجي بالموبايل لحد ما وكفنه كدام بيت يخبل يفتح النفس ، نزلنه طلع الولد بدون مندك الباب بيده الموبايل وراح لعمي سلم عليه وتباوسو وصاح فوتو جوه ام مريم منتضرتكم...

دخلنه نتسابق اني واختي ، اللي لفت نظرنه الطرمه حيل كبيرة وحديقه على صفحه كلها ورد وياس تخبل تفتح النفس عمه تستاهل تكعد بهيج بيت دخلنه جوه نمشي ونكول ماشاءالله متعجبين اني واختي..

بس اللي خوفنه عمه ليش متلكتنه بالباب معقوله هيج المرض دك بيها..

دخلنه ندور عليها بيت جبير بس طابق واحد وبيه غرف جوه هواي ، سمعت صوتها تصيح يابنات تعالو اني هنا ، بس صوتها ضعيف وكوه تحجي مشينه متبعين الصوت ودخلنه للغرفه مالتها ، جانت نايمه وبيدها كانونه ومعلكين مغذي وجها اصفر ، شافتنه ضحكت وفتحت ايدها صاحت تعالو بنات ..

رحنه يمها وحضناها على كيف خاف نأذيها ، كمت ابجي وهيه هم بجت ..

خفت اسألها عن مرضها خاف احرجها لو اذكرها وهيه ناسيه سكتت واشرت لايفين اللي مبين تريد تحجي من عينها يعني سكتي ..

ياسة : كومن ماما سبحن وسون ريوك ايمن توه جاب صمون حار وهسه هو يدليكم على غراض المطبخ..

سيلين : عمه فدوة نستحي منه شلون راح نعيش كلنه سوه

ياسة : لازم ويانه رجال بلبيت منكدر وحدنه منو يجيب متطلبات البيت ، ومرضي اللي اجاني صفح منو يركض بيه ..

سيلين : اي صح ..

ياسة : هو حباب وخوش ولد وانتن هم حبابات ، معليكم بيه شقه زايد ماريد كعدات يمه ماريد على كد الكعده بالاكل وبس فدوه اني عندي ثقه بيكم وبيه هم بس ماطول راح نعيش سوه راح تنكسر الحواجز ونصير عائله وحده بس هو يضل غريب ومحرم عليكم..

سيلين : لتشيلين هم عمه احنه ولد عمي صلاح سنه يمهم ومحجينه وياهم كلمه وحده لو ما زاكروز يجي ويتخشخش ويقوي العلاقه وتالي كسرني هم جان محجينه وياه ...

ياسه : اني لو عندي خبر هو رايدج ولا اقبل ولا اخليج تفكرين بيه ليش بسعاد قليله شر وتصيرين جنتها وين تخليج وحتى اذا قبلت شهر شهرين وتكسرج وابن عمج شخصيته ضعيفه صح يصيح ويهوبز ساعه الساعه بس خلي عمج يعيط بيه صوت يخرس ويسكت..

سيلين : والله عمه اجتي ايام ما انام من قهرتي هو اللي بادر وهو اللي عشمني مو سهله يخطب ويسوي حفله ومغلس على الوضع ماحجه ولا كال .

ياسة : ولد اخويه واعرف رسهم مابيهم واحد بيه

حظ اني اكلج وكفته حلوة جانت وخلف الله عليه وخلاج تداومين ساعدج بالدراسه هواي بس فعلته الاخيره مسحت زيناته كلها ..

سيلين : عوفج مني هسه انتي زينه لتخلين بالي يمج..

ياسة : زينه والله شبيج يلا كومو تريكو لو تسبحون اول..

سيلين : لا ناكل جوعانين وايفين عدها علاج وانتي تاكلين ويانه اي شي لو اكلج خاص..

ياسة : اريد بس حليب دافي ونص صمونه ..

سيلين : بعيني تدللي..

كمت واشرت لايفين تطلع ويايه لان اعرفها تجفص بالحجي طلعنه وسديت الباب ، لزمتني من جتفي..

ايفين : لج هذا الصاك ابو لحيه اليجنن راح يعيش ويانه..

سيلين : ها سالمين شبيج بابه ثكلي ولتخزينه كدام عمتج ورجلها والله ايفين اطيح حضج..

ايفين : شمسويه قابل شبيج كبيتي عليه..

سيلين : باعي سوالفج الجنتي تسويهة بيت عمي واشيلها عنج بطليهن لان هناك جانو ميهموني اذا اخذو عني نضره زينه او شينه لان هيج هيج كارهيني بس اذا فشلتيني ويه عمه لو ويه اخو زوجها وتوصل لزوجها والله العظيم افضح سوالفج كلها كدامهم ..

ايفين : جنت صغيره وكبرت هسه وتعلمت.

سيلين : اي جبيره صغيره ابو طبع ميجوز من طبعه ..

ايفين : راح اضوج والله..

سيلين : لعد لتجفصين بالكلام حتى ما اضوجج بالرد.

عفتها ورحت للمطبخ ضليت ادور على الطاوة والمواعين والقوري افتر راسي مبين عمه شلون مجان مرتبه البيت خطيه مبينه تعبانه ..

سيلين : باعي يوميه نسوي مكان ونرتبه خطيه عمه مبين مكادره ترتب البيت هيج شامره الغراض.

ايفين : اي شكو بيها.

تحجي وتتلفت عينها على الباب

عطت بيها من بين اسناني..

سيلين : ايفين جوزي شوصيتج اني..

ايفين : شلون يعني ما اباوع على البيت..

سيلين : اعرف بيج راح تعبيني وتخجليني بس ساعتها انسي عندج اخت..

سكتت مجاوبتني بلشت اسوي ريوك طلعت بيض ولكيت صمون على الميز ، مطبخ عمه كلش حلو يسوي واهس واحد يشتغل بيه وحسيته صحي لان كله ضوه مال شمس رغم صاير خلفي بس اكو شباك جبير فتحت البرده يطل على حديقه خلفيه بس ممرتبه مثل الكدام...

كملت الريوك وسويت حليب لعمه وللولد سويتله صينيه وحده...

رحت وديته للغرفه وكعدنه يم عمه على الجربايه ..

ياسة : سويتي اكل لايمن..

سيلين : اي وخليته على الميز بالمطبخ..

ياسة : عمه حبيبتي صيحيه خلي يجي ياكل وبدربج شوفي مريومه كعدت لو لا فدوه ...

سيلين : بعيني عمه تدللي..

كمت رحت للهول شفته كاعد من شافني كمز عدل كعدته..

سيلين : بس الريوك بالمطبخ..

ايمن : ليش تعبتي روحج..

سيلين : ماكو تعب ويانه سويت ..

ايمن : عاشت ايدج..

سيلين : بالعافيه..

انداريت ردت افوت صاح..

ايمن : شسمج؟

التفتت وجاوبته بابتسامه.

سيلين : سيلين ..

ايمن : انتو بنات عمو وضاح..

حجاها مستغرب و مندهش..

سيلين : اي بناته ..

ايمن : ياااا صار شكد مشايفكم هاي شنو كبرانين هواي ..

سيلين : محد يضل نفس عمره الدنيا تركض..

ايمن : صح والله ، اخذي راحتج واعتبروني اخوكم الجبير..

سيلين : والنعم يلا من رخصتك وكوم تريك لان جايك برد..

ايمن : اي كمت كمت..

حجاها والدهشه على وجها بعدها..

رحت ادور على مريم بالغرف هو فات جان يكول

ايمن : ذيج غرفتها بصف غرفه عمتج..

سيلين : عاشت ايدك ..

ايمن : مسويت شي..

رفع كتفه وحجاها راح للمطبخ واني رحت للغرفه لكيتها نايمه وفاتحه ايدها بيضه ثلج على بياض عمه والشعر اصفر ذهب جمالها كردي وملامحها على ابوها متشبه عمه ماخذه بس البياض ولون الشعر بستها وطلعت سديت الباب ورحت لغرفه عمه..

ياسة : ها نايمه مريومه..

سيلين : اي نايمه وايمن راح يتريك..

ياسة : عاشت ايدج يلا تعاي اكلي.

كعدت اكل ..

سيلين : عمه بيتكم جانو ناس ساكنين بيه قبل ..

ياسة : اي ليش؟

سيلين : الحديقه مبين جانو معتنين بيها..

ياسة : اي جان ابو البيت يجيب فلاح كل اسبوع يهتم بيها ونطانه رقمه كال حرامات تتلف خابروه يجي ينظفها ويرتبها الكم وشكد ما تنطوه ميحجي.

سيلين : عاشت ايده والله حلوة تفتح النفس..

ياسة : البيت كله حلو ومرتب ايدهم بيه..

سيلين : شعجب طابق واحد من فتت ناصي حتى سطح مابيه..

ياسة : همه عائله صغيره ومصار سنتين من بنوه وكال منحتاج طابق فوك هم حار بالصيف وهم يرادله تنظيف اختصرها وسوو الغرف جوه.

سيلين : زين يسوي عمه هسه نكمل وارتب البيت كله بس منين ابلش..

ياسة : عوفيه يوم بيج حيل ارتاحي كم يوم واني صحتي ترجعلي ونتعاون سوه..

سيلين : عمه تره اضوج اضل كاعده فدوة ماحب اتختخ.

ايفين : عوفيها عمه مو وجه خير هاي انطيها كراب وتعب.

سيلين : معليج انتي سكتي..

ياسة : جبتي اوراقج ..

سيلين : مال شنو.

ياسة : حتى تقدمين على كليه تداومين خوما تضلين هيج..

سيلين : عمه اول شي معدلي مو ذاك الشي وثاني شي صيري زينه وعود اسأل شنو يقبلني واقدم...

ياسة : معليج مني تداومين هذا مستقبلج.

سيلين : عمه اذا ماصرتي زينه ورجعت عافيتج انسي اداوم..

ياسة : بعدج نفس الراس اليابس.

سيلين : اي بعدني وما اتغير يلا شربي حليبج صارلج ساعه وما كملتي..

ياسه : والله وكبرتي وصارت الكلمه الج هههه..

سيلين : شعبالج هسه القياده الي صيري زينه وتاخذين مكاني..

ضحكنه اندك الباب صاحت عمه تعال..فتح الباب مد راسه وكال..

ايمن : اسف قاطعتكم بس ادهم يريد يفتح كام وياج ويريد يشوف مريومه.

ياسه : شلون خاف يشوفني بهيج حال فدوة جان كتله بالسوك بالحمام ليش كتله موجوده..

ايمن : ولشوكت نكذب عليه البارحه كتله نايمه تكعد وتحاجيك اليوم شنو اكله احجيله كلشي وارتاحي..

ياسة : ابد دير بالك تكله هذا مستقبله حرامات تعبه يروح اعرف بيه يعوف كلشي ويهد مستقبله ويرجع..

سيلين : انتي اهم من دراسته واذا عاف كلشي لازم يعرف ويرجع.

غمضت عينها وحجت بنفاذ صبر.

ياسة : معليكم هذا قراري وما اريد احد يتدخل وهذا مستقبله وتعب ايام يسهر ويقره عيونه دخلت بحفره واجي اني اخرب كلشي عليه وبعدين اذا رجع شنو راح يطيبني شيسوي غير يكابلني ويكعد مثلكم..

سكتنه شفنه حجيها صحيح..

اجه ايمن وكف فوك راسها..

ايمن : هسه شنو اسوي اشيل المغذي وبعدين ارجعه وانتي من تحجين وياه ايدج لتخليها تبين..

ياسة : اي هو هم هيج والله كاعد اعذبك ويايه.

ايمن : ماكو اي عذاب تدللي ياسه انتي اختي ياما وياما وكفتيلي ...

ياسه : اخوتي انتو الله يشهد احبكم مثل حبي لوضاح الله يرحمه..

ايمن : اصيله والله...

شال المغذي وداه على صفحه وطلع...

ياسة : عمه فدوه من يمج جيبي الحمره والكحله واكو مرايا صغيره هم جيبيها ، هذا اذا شاف وجهي هيج ينهبط..

صفنت بوجها ..

ياسه : شبيج سيلين كومي حبابه راح يتصل.

سيلين : عمه شكد تحبيه انتي ..

ياسه : متتصورين شكد يمكن اكثر من روحي احبه ..

حجتها وعيونها دمعت متت قهر عليها رحت جبت الها اللي رادته وخليتهن يمها ساعدتها لان تك ايد مكدرت وحدها ورحت جبت مريومه اول شي بجت استغربت من شافتني بس من شافت عمها شمرت روحها عليه شالها وسكتت راح جاب الحاسبه فتحها وخلاها كدام عمه واني وايفين طلعنه بره همه اتصلو بيه وحجو وياه...

الفصل العاشر من هنا 

شكرا لزيارتكم عالم روايات سكيرهوم