رواية منار والبارود الفصل الثامن 8 بقلم مرج البحر

منار:::

حتى بعد كل الي صار بينا بقيت مخليه راسي ع المخدة..وبقينا واحد يباوع بعيون اللاخ..عيونه تضحكلي احس بيها كل سعادة الدنيا..ونسيت هي عيون مصعب الي..جنت اخاف اركز بيهن ..معقوله مصعب هالكد حنين..وهاديء..معقوله الي صار قبل شويه واذا هو هالكد لطيف ليش جان ضام طبعة الحلو..ولابس قناع العصبي..الي ميتفاهم..شنو هالشخصية العجيبة الغريبة..سمعته يكولي:

ها منار شو ساكته..وصافنه:

هااا..لا ماكو..شي..ماكو شي..خلي انزل يم ملوكة..

وين تنزلين ابقي يمي..اني الفجر..طالع!

شنو الفجر طالع..

اي والله راجع للدوام!

ليش يعني صارلك بس يومين ..من نزلت ..

اي صح بس كتاب نقلي جاي واريد اروح حتى اكمله..لان انقلت لاطراف بغداد

صدوك..راح اداوم هنا قريب..علينا..

اي صدوك..

بس انت بعدك مصرت زين انتظر كم يوم الى ان ينشف الجرح...

ههه..تكول انتظر اني مصدكت يجي الكتاب

ماشي ابقه يمك بس انزل اغطي ملوكة وارجعلك..

لاتتأخرين..

نزلت غطيت ملوكة طبيت للحمام اباوع ع نفسي بالمراية يا الله خجلانه حتى من نفسي معقولة الي صار قبل شويه واني شلون اندمجت وياه ورحت بغير دنيا عبالك ممصدكة اسمع منه كلمة طيبة لو نظرة حلوة.. دخلت لبست تراك قصيربعدين صعدت..اول مدخلت رفع البطانيه وفتح اديه..وكال:

تعالي بحضني.

اني هم جيتت بحضنه..حضني حيل ويبوس بشعري..ونمت مدريت بالدنيا..بعد..دك المنبه مال تليفونه الساعة ب3 شفته كعد اني مفتحت عيوني..حسيت بي ديباوع عليه فتحت عيوني باسني بخدي وكال:

اكوم ابدل 

كام لبس ملابسه العسكريه وكلي:

منار..بداعتي ما اريد ابويه يعرف اني متصوب!

ليش!

تعرفين ابويه عنده سكر..ما اريده ينقهر..تره ابويه حيل حساس..وكلبه رهيف وعنده اني..كولشي بحياته ما اريده يتأثر ويضل يفكر..

ماشي اطمئن مراح يعرف..

كمل لبس كتله 

انزل اسويلك فد شي تاكلة:؟؟

ما احب اتريك الفجر..

نزلنا من فوك الساعة 4 هو..دخل لغرفة عمو دنك عليه باسه عمو فز:

ها بابا رايح!.

اي يابه..بس اكمل الكتاب اسبوع زمان ما اتأخر..

راد يكوم كله:

لا يابه بداعتي لتكوم ضل دفيان بفراشك..

وباسه وطلع دخل لغرفة ملوكة هم باسها وهي نايمة

وطلعنا بعدنا واكفين بالباب..

كتله:

راح ترجعلي بسرعة..

اي ارجعلج ..هو اليضوك العسل شلون ميرجعله

دير بالك ع نفسك..الله عليك..

اطمئني اسبوع زمان وراجع..

ادنه راد يبوسني..من عيوني:

لا..لا..كتلك لتبوسني من عيوني!

ليش..والله احب عيونج..!

لا مصعب..بداعتي لتبوس عيوني اضل افكر وروحي تنقبض..وحسبه تاخذني وحسبة تجيبني..

هالله..هالله هالكد تخافين عليه!

اي..والله اخاف عليك!

ماشي..لعد بوسه حلو من الحلك يصير مو!

هزيت راسي وكلت:

يصير!

دنك باسني حيل من شفتي اني هم شبكته وبسته..جانت بوسه متبادله..بعدين حضني وكلي:

منار..صح الاسود يملخ عليج..بس كافي..بعد لتضلين حزينه..من ارجع الكاج ملابسه اسود بعد!

ماشي..من اليوم البس الوان

عفيه عليج..

وشال ايدي باسها وطلع قبل ميمشي خطوتين..كتله:.

ارجعلي بسرعة..

التفت..ابتسملي:

صار..فوتي جوه باردة..عليج..

فتت..احس روحي راحت ويا..يا الله شديصير بيه احبه لهالخبل..احبه والله نسيت كل عذابي وياه..بليلة وحدة مجرد كلمة ونظرة دافية نستني كولشي..فدوة لعيونه..الحلوة الي..تسولف..سوالف محد يفهمها غيري..

مكدرت انام..لان ذكريات الليلة كولها كبال عيني بقيت كاعدة سويت ريوك وتريكت..جانت جمعة..بس احلى جمعة..احس..كولشي كبالي وردي ويضحك..صعدت رتبت غرفته ونزلت نظفت وكلبي يرفرف..ومرت 6ايام ..اكول لنفسي باجر يجي حبيبي..واجه باجر..حرت شلون استقبلة حتى للدوام مرحت..لان عمو كال مصعب خابر والعصر..يجي..سويت غدة ..وكاعدين نتغدة اندكت الباب كمت فتحتها..شفت بنيه يمكن عمرة بالثلاثين بس حلوة ومعتنيه بنفسها وملابسها نازكه:

خالي ابو مصعب موجود؟؟

اي موجود تفضلي..

هي دخلت عبالك تعرف البيت:

وصلت للمطبخ عمو شافها:

سوسن..خير خالو شعندج جايه؟امج بيها شي!

لا خالو مبيها شي..بس اني بعد ما اكدر اصبر..اريد مصعب يرجعني..!

باوعت حسيت كلبي انعصر..تكول اريد مصعب يرجعني..يعني هذه زوجته..بس جبيرة تقريبا بعمر مصعب..وسمعت عمو يكولها:

خالو سوسن اكثر من مرة توسلتي بيه يرجعج..ومقبل..مو معناها اذا مخلينا يطلكج تضلين تتوسلين بيه بنيتي ..والله ..مبيدي شي..مصعب..قافل وميريدج ترجعين!

بس خالو اني مرته..صح طلكني مرتين بس رجعني..صح صارت مشاكل..بس..خلي ينطيني فرصة اخيره!

بنيتي..هو جان خالي ومرجعج..هسه هو متزوج:

خالو اني راضية والله اصير خدامة جوه رجليه وجوه رجلين مرته بس خلي يرجعتي ويلتم شملي بيه وابنتي

صح كلبي يتعصر..واحس الهوه ضاع عليه بس انكسر خاطري عليها من شفتها تتوسل بعمو..خطيه مبين عليها هوايه تحبه لمصعب..والدليل ممهتمة لكرامتها وجايه تتوسل..التفتت عليه:

انتي زوجته مو..

هااا..اي اني زوجته..

اشو هاي شبكتني وتتوسل بيه:

احلفج بشبابج وبكل عزيز عندج تقبلين يرجعتي..

وشفتها بجت ..وشالت ايدي تريد تبوسها..سحبت ايدي:

استغفر اختي ام ملاك..لتسوين هيج..اني شعليه خلي يرجعج..اكعدي ارتاحي..لتبجين..ونطيتها كلاص مي..عمو كال:

بنيتي سوسن ارجعي لاهلج واني احجي ويه مصعب هو العصر يجي

لا خالو اني..ما اروح..ابقه الى ان يجي ..واحجي وياه..

بس خالو

خالو بروح عمتي انطوني بس فرصة وحده 

بكيفج..ابقي اني رايح للسوك..

طلع عمو..وخلاها يمي..واني افكر..اكول ليش ياربي ليش اجت بهالتوقيت لوجايه قبل..ميصير بيني وبين مصعب الي صار..قبل ما اعترف لنفسي انه اني احبه..كلبي احسه ممرود ..بس رغم هذا هي تكسر خاطري واحاول اخلي نفسي بمكانها خطيه هي زوجته وام بنته وبينهم عشره عمر..كعدت يمي ورجعت تبجي..كتلها:

عيني ليش تبجين اذا الله قاسملج يرجعج راح يرجعج!

انتي..مبينه بت اوادم وحبابه وحدة غيرج جان طردتني..الحمد لله ..طلعتي خوش بنيه..انتي..شنو اسمج

منار

منار انتي متعرفين شنو مصعب بالنسبة الي!

لا واضح انتي هوايه تحبيه..

مصعب كل حياتي واني كل حياته:

لعد ليش اطلكتو مرتين..

شوفي احنا تزوجنا عن حب بس ام مصعب الله يرحمها مجانت رايدتني جانت تريد تزوجه بنت اختها..وتعرفين العمه اذا مارايده الجنه وشدت وياها!

هااا..يعني..المشاكل جانت بسبب ام مصعب!

اي الله يرحمها ويغفر الها بسببها اطلكت مرتين منه.

زين ليش..زعلتي من.رجعج اخر مرة

لا والله مزعلت..بس هيه تمرضت وتتحست اكثر وكامت تحشي براسه تكوله اذا متت..لتخليها ابيتي..ومن ماتت..هو طردني..

ها من هيج ميقبل يرجعج!

اي والله بس هو يحبني واني احبه..

فهمت..

تره اني مجايه انغص عليج حياتج اعرف بعدج عروس وفرحانه..بس خلي نفسج بمكاني شوفين رجلج حبيبج تزوج وانتي بصفحة وهو وبنتج بصفحة....والله اذا رجعني اصير خدامه جوه رجليج..واني راضية مو اجازته سبع ايام خلي يوم واحد الي و6ايام خلي يبقه يمج..

الله كريم خلي يجي ويصير خير..

كمت اريد اغسل اماعين الغده

كامت..

اني اغسلهن خلي اساعدج..

واخذت الاماعين من ايدي..

خطية تريد بس فرصة كسرت كلبي بحجيها صار العصر عمو اجه من السوك..منتظرين جيه مصعب..وفعلا بالخمسه ونص شفته يدخل من الباب..ركضت وملوكة هم ركضت اول مدخل عمو شبكة وسلم عليه اشرلي ركضت وحضنته..بس دخل جوه سوسن طلعت من المطبخ..شافها حسيت اتفاجأ..وضاج:

هاي شتسوي هنا!!!!

هي ركضت دنكت ع حذاءه تبوسها ..   

مصعب بس اسمعني انطيني فرصة..

هو لزم ايدها ودفعها

لج طلعي من بيتي روحي لاهلج 

عمو كله:

مصعب وليدي اخذ نفس هسه خلينا نكعد نتفاهم

ماكو تفاهم بيني وبينها..

مصعب بابا لخاطر شيباتي انطيها فرصة اخيرة

يابه شنو فرصة..من جنت خالي مرجعتها هسه من تزوجت ارجعها واخرب حياتي..

فهي بجت:

لا والله متخرب حياتك ما اريد منك شي..خليني..عدكم خدامة الك ولمرتك..

لج طلعي من هالسوالف شنو ارجعج شنسه منج شنو طابت كرعتي!

مصعب بروح امك..رجعني لخاطر بنتي..تعبت راح اموت وهي بعيده عني..والله افكر انتحر اذا مترجعني..

ههه..لج مو تدرين تزوجت شنو هالعين الوكحة وجاية ارجعج امنت بالله وفكرت ارجعج لخاطر ابويه شمفكرة مرتي راح تتقبل الموضوع!

اني رحت يمه كتله:

مصعب رجعها..اني راضية خليها ترجع يعني بيناتكم طفلة مهما يكون .

التفت عليه:

لج منار تحجين صدوك ترديني ارجعها..ليش تعرفين انتي هاي شنو من بشر..

اي راضية ترجعها..نعيش مثل الاخوات..ومراح تصير مشاكل!

متأكدة:

اي متأكدة!

ماشي..طبج مرض..انتي جبتيها لنفسج..خليها مكابلتج..وشمر جنطته وصعد 

اني راح انام تعبان لحد يكعدني حته عشه ما اريد..

بس صعد كامت تبوس بيه وتكولي:

الله يخليج الله يحرسج لشبابج....ما اعرف شلون اجازيج..

بس اني مسويت شي هذا الصح..

حبيتي منورة ولو ثكلت عليج بس عندي طلب زغير..

كولي..

انتي تعرفين يعني اريدج تنطيني بس هالليلة فرصة احاول اصعد يم مصعب..اصلح الامور بينا..

يعني شنو مفهمت..!

يعني بس الليلة اريدها منج وباقي الاسبوع كله الج..

ماشي..

دخلت لغرفة ملاك اتصلت بماما كتلها خلي احمد يجي ياخذني الهم..استغربت كتلها ماكو شي بس حابه ابات عدكم ..فدزتلي احمد اخذني..اول مدخلت كالت:.

ها يوم..رجلج ما اجه من الدوام..

اي يوم اجه قبل شويه..

ياااا..وليش اجيتي..

يوم مصعب رجع زوجته..

شنو ...!!هسه اخلي ابوج يتعارك وياه..

لا يوم هو رجعها برضاتي.

يوم شنو برضاتج شبيج تخبلتي..شلون ترضين يرجعها..

يوم مرته تحبه ومتزوجين عن حب..وعدهم طفله يعني حرام احرمها من بنتها وزوجها..

امداج..امداج ..شنو هالعقل ولج اني اروح العب بيهم طوبه..

يوم لخاطر الله كتلج رجعها برضاتي..

وهسه انتي ليش جايه ..وعايفته شنو..تنطيها مجال تنفرد بيه..

يوم بس الله يخليج البيه مكفيني اذا متقبلين ابقة يمج اروح ابات يم بيت خالتي!

طبج مرض..فوتي جوه شلون عقل مال مخابيل ترجع ضرتها وتعوف رجلها وتجي..

دخلت ..وحتى من صار وكت العشه ما الي خلك اتعشه...

بالعشرة دك تليفوني رقم مصعب:

منار..ليش رحتي لاهلج!

مصعب ماما متخربطة واجه احمد اخذني لاهلي..

ها متخربطة وين هسه بالمستشفى!.

لا طلعناها..

لعد راح اجي اشوفها..

هسه هيه نايمة..

اجي اخذج

لا..ابات يمها الصبح اجي..

ماشي

سد التليفون..شبعت بجي اليوم انت مو الي رجعت زوجتك..راح تتهنه بيك..راح تشبع شوف من عيونك..ومن ابتسامتك الحلوة..افكر ودموعي يحرن ما اتحمل ..ولا استوعب فكرة..مصعب تلمسه اي وحدة بس مبيدي شي..هيه متزوجته قبلي وبينهم حب وعشرة..ما اكدر ابني سعادتي على حساب سعادتها                                 

.صار الصبح كلت خلي ارجع رجعت ساعة بثمانيه لكيت عمو..بالمطبخ..وهي دتسوي..ريوك..لابسه بدي احمر..وبرمودة قصيرة وتغني بالمطبخ..حسيت روحي طلعت مبينين تصالحو وامورهم تمام.وملوكه هم تفتر بالمطبخ وتلعب..حسيت نفسي دخيلة عليهم وبعد ما الي مكان بهالبيت هي شافتني ركضت..شبكتني

هله بمنوره..وجرتني من ايدي للصالة:

ما اعرف شلون اشكرج..لو ما انتي مجان رجعتي مصعب..

ومجان تصالحنا..

ها..يعني تصالحتو.!

اي بس مو تضوجين حبيبة والله ما اخذه منج..صح كضينا ليلة حلوة بس هو باقي الاسبوع الج..

كالت هالحجايتين وراحت..

دخلت لغرفة ملاك..ما اريدها تحس اني اغار..بجيت..انتبهت شو جنطتها هنا..بغرفة ملاك...فكرت يمكن ناسيتها هنا..

كلت لنفسي لازم احجي ويه مصعب مادام حياته رجعت طبيعية ويه زوجته لازم ننفصل باقرب وقت اني مو من النوع اليتحمل هالعذاب ما اتحمل اشوفه ويه غيري يمكن تحملت هالليلة لان بتت عند اهلي ومشفت شي ..بس..ما اكدر اشوفه بعيوني يمها وتنسد عليهم باب..خلي الها مادام سعيد ومادام الله جمعه ابمرته وبنته..وتذكرت كولشي حلو بينه....صعبه عليه اعوفة بس اعرف نفسي اموت ع البطيء اذا بقيت يمهم بنفس البيت..

سمعت صوت مصعب بالصالة..فتحت الباب.شافني:

ها منار..جيتي..شلونها امج!؟

صارت زينه..مصعب ممكن احجي وياك.؟؟.

اني الي اريد احجي وياج..

دخلنه لغرفة ملاك وسدينا الباب..وبس كعدنا راد يحجي كتله:

بس..اسمعني بالاول مصعب..اريدك اطلكني باقرب وقت!

شنو...شكلتي؟؟

الفصل التاسع من هنا