رواية جسر الذكريات الفصل الثامن 8 بقلم مريم الحيالي

..... في وقت من اوقات الحاضر القريب......

..... اروح وياكم اني هم ماما 

علية: واتروحين ببنطرونج ميفوتوج عيني خاتون

.... لا اللبس والله حتى شال وما اللبس بنطرون 

راح اللبس تنورة وبدي.. واهناك ائجر عباية

هديل: اي حتى اتشيلين اساور وياية ايديه توجعني 

.... اي لا هاهيه اخذي عربانتها عيني ما شيل بنتج شسمنها اتعبني

علية: ادبسز طايحة الحظ ... منيلها ولج سمينة 

بلا هسه اذا اكوم مو اگرمعج 

.... الحفيدة الغالية وحجينه عليها شحيخلصنا... ماما ليش اتطردين عيووون ... الادبسز هي اتباوع عليه وتضحك

هديل: عوفيها اني اشيلها خليتي عينج عليها 

..... ياية دكوومو عمي اشيلها شيخلصني... بدلت وهديل وامي لبسن عبايات عادية وطلعنه للكاظم 

امي هواي تاخذنة للأمام ..هديل جانت خطار يمنه

وبنتها عمرها ٨ اشهر بس مدبدبة وامي اتموووت عليها متطلع المكان اذا متشتريلها 

واني كل عقلي اغاااار منها لأن جنت مدللة... اي والله شلون اصارحكم جنت اضوج لأن كل ما نشتري وكالت هاي الاساور يولات حلوو وتشتري

رحنه للأمام الكاظم زرنة واتعشينة ورجعنه ... انكسر ضهري من ورى تووري افندي شسمنها...

.......ذكريات في جوف الماضي.......

كريمة: يا عيني سودة علية خيية ... 

دريد: الحمدلله... انا لله وانا اليه راجعون 

والام شلونها ان شاء الله زينه

الدكتورة: الام وضعها الصحي وسط لأن الضغط كلش مرتفع لازم تبقى شكم يوم يمنه.. ولازم واحد منكم ايبلغها ... وحتى اتباشرون بأجراءات الطفلة

دريد: رحت شلت الطفلة وشفتها ... ناعمة وملامحها ممبينة.. الحمدلله على كل شي يجي من الله سبحانه وتعالى 

.... سميت الطفلة سارة

دريد: ها يابة الحمدلله على سلامتج .. شلونج هسه 

علية: گوة احجي تعبانة اتأخرت بالولادة ومجانت سهلة .. الله ايسلمك بس شو مسمعت الطفلة تبجي 

وكل ما اسأل وينها ايكولون هسه ايجيبوها الج

دريد: علية انتي مؤمنة يابة والكاتبة الله لازم انشوفه ... والحمدلله على كل حال

علية: دريد شنو هاي شدتحجي ... الطفلة وين شصار

اباوع على كريمة تبجي.. كريمة احجي شصاير

دريد: الضغط مرتفع عندج وبعدج بشهر الثامن .. الطفلة اجتي ميته علية ..الله ايعوضنه ان شاء الله

علية: صدك تحجي .. كمت ابجي بصوت انقهرت اول حمل الي وفرحانة بي وتعبت حييل تعبت بالولادة

كريمة: كولي ياالله علية بعدج صغيرة .. ان شاء الله الله ايعوضج .. مو زين عليج اسكتي الضغط صاعد عندج كوة دينزلوا

علية: ابجي اني ابجي انقهرت هواي... بس شگول الحمدلله على كل حال

دريد: كريمة دير بالج عليها اني اروح اخلص اوراق الطفلة.. واخذها ادفنها

علية: دريد مقهوور ووجها تعبان بس ميبين دومة هيج ... ايكابر .. خلي اشوفها دريد وين ماخذها

دريد: لتشوفيها يابة بعدها صغيرة.. ممبين منها شي وانتي مريضة مو زين عليج... عفتها وطلعت

علية: راح دريد ايكمل الاجرائات .. كريمة وامي معافوني يمي .. يومين وطلعت من المستشفى بس طلعت وحدي خالي حضني .. ولا كأنوا مخلفة وتعبانه 

... الحمدلله على كل حال

اجوي اهل دريد وخالاته اتحمدولي بالسلامة.. والولد خطية ويايه معافوني علما كمت على حيلي 

رجعت .. نفس الروتين صح مقهورة بس شسوي 

مابيدي شي

دريد: شنو رأيج الجمعة يجن خالاتي وتجي غصون هم وياهم وبيت نزار ونطلع كلنا لمة للزوراء ..وهم اتغيرين جوو

علية: اي والله ليش لا انروح هلا بيهم 

... والله ولفيت دولمة ..وسويت كبة جريش وسلكتها 

والدولمة طبختها ..وخبزت وحظرت الغراض 

وخالاته هم كل وحدة مسوية شي .. ورحنه للزوراء 

لمة اهل وسوالف وضحك ..

خالة دريد: علية عاشت ايدج الدولمة اتخبل 

علية: الف عافية .. عزلت النضال بدون شجر ادري مياكلة بالدولمة 

خالة دريد : اي نضال ميحب الشجر مياكلة... دريد بس لا راح تلبس وية العسكرية الاحتياط

دريد: والله خالتي الضاهر هيج بعد داشوف شنو قرارات حكومتنا.. وبيها الخير ان شاء الله

علية: دريد انت مو مخلص عسكريتك ليش بعد هاي الاحتياط

دريد: علمود الحرب يابة الدنيا عالكة ... هواي جنود خسرنة.. والله الحافظ

نزار: دريد لو جايب الطاولي جان غلبتك شوية 

دريد: ضحكت وكتلة ... انت تغلبني قصدك كل مرة اطلعك خسران 

نزار: اجيكم وانشوف منو اليغلب .. سهله 

علية: گضيناها ضحك وسوالف عادية .. مرت الاشهر وصرنة بال٨٥ ... من حملي الاول بعد مصار عندي شي .. ودريد جبير مو صغير وحقة ايصير عندة طفل

بس خطية ابد ميكول ولا يحجي... الحمدلله صارلي اكثر من سنة ويا مفد يوم سمعني كلمة لو غثني

والبيت كله اني شايلتة... واخوانة ايحبوني وكلش اتعلمو علية 

اجوي علية اهلي خطار امي واختي كريمة واختي عيودة..

هلا بيكم شنو وين صارلكم فترة ماكو

الحجية سهام: شلونج انتي اجيت اشوفج.. ومتجينه ابوج هم يسأل عليج واخوانج

علية: يوم مو تدرين ملتهيه مالحك والله .. ودريد خطية للعصر يلا يرجع من الشغل وهاي الحرب 

الي مسببتلنا قلق يمكن دريد يلبس عسكرية احتياط

كريمة: هاي شلون حجي هذا... مو مخلص عسكرية هو 

علية: هاي بعد غير هيج قرارات الحكومة... سويت غدة واتغدينة... امي حزينة الحد هسه على حسين اخويه اجانه شهيد وبعدة شاب ممتزوج ..الحد هسه لابسين اسود علية

امي مريضة اتوهوس هوااي ومو الكل تلزمهم لو اتبوسهم.. ومتستنظف غير مني ومن خواتي بس 

وخصوصاً اني هواي متعلمة علية ..

دريد: هلا بيهم عمتي يمنه اليوم... شلونكم ان شاء الله زينين

الحجية سهام: هلا بيك عيني ... الحمدلله زينة والله اجيت اشوفكم ليش متجيب علية وتجي..عمك يسأل عليك

دريد: شغل والله واتأخر يلا ارجع.. بس نجي ان شاء الله وسلمي هواي على ابو كريم .. امرله اني للمحل

علية: راحت امي هي والبنات.. وصبيت الدريد اكل وكتلة...

دريد باجر اتفقت وية كريمة تجيني واروح للدكتورة

دريد: خير خوما بيج شي شعندج رايحة؟

علية: لا ماكو شي بس اشوف ليش اتأخرت صار ٧ اشهر على ولادتي والهسه ماكو حمل

دريد: علية اصبري بيد الله ..ليش اتروحين وتحاليل وادوية وانتي مابيج شي بس اتقلقين واتعبين نفسيتج

علية: هسه شخسرانة خلي اروح واشوف شتكلي..

دريد: هاهية روحي براحتج ..والله كريم

عليه: اجتني كريمة والله ورحنة للمستوصف .. وسويت تحاليل ..وكعدنة ننتظر

كريمة: مابيج شي والله ليش هذا القلق يمعودة كولي ياالله ..

علية: ياالله لا ماكو شي شبيج .. طلعت التحاليل 

شو هذا گال مبروك حامل .. بقيت صافنة هاي شنو شديحجي

كريمة:: اي اي صلوات ... ياا الحمدلله والشكر 

علية: اخذنة التحاليل وكتلها... هذا يحجي صدك هو غير اجيت اراجع اني

كريمة: غير طلع بالتحليل حامل شبيج .. امشي انشوف الدكتورة 

علية: فتنه عالدكتورة والله وجان اتكولي ...

الدكتورة: مبروك ماما حامل... بس دير بالج انتي عندج ضغط حمل هالمرة حافظي على نفسج وعالطفل ليش هم ايضيع تعبج

علية: لا ان شاء الله دكتورة الله ايسهلها.. زين ايصير اشرب حبوب ضغط اني ورة شهر الرابع يبدي يصعد عندي

الدكتورة: اي دوة هسه ممنوع ماما ميصير.. فقط فيتامينات .. الله ايگومج بالسلامة

علية: طلعت واني فرحانه الحمدلله صارلي مدة طويلة على حملي الاول .. الحمدلله والشكر عود اجيت اشوف ليش ماكو حمل ..

اني من اتزوجت بنت اختي اسراء جبتها ويايه تبقى يمي اني ربيتها من جنت يم بيت اهلي متعلقة بيها احبها من صغيرة فجبتها وياية دريد ايحبها ومعترض على هالشي الحمدلله.. هم ملتهيه وياها عمرها ٤ سنوات ...

وصلنا للبيت وكتلة الدريد فرح واتفاجئ ... كال الحمدلله الله ايتممه على خير ان شاء الله..

مرت الايام ودريد ترك الشغل بالمعمل وراح لبس عسكري احتياط .. بس الحمدلله مخصصين راتب للعسكريين لأن احنه البيت كلنا معتمدين عليه هو شايلنا 

بس انقهرت وضجت الوضع ممتحمل واني حامل 

ضليت بقلق عليه لبس وودعنا وراح 

وبقيت بس اني واخوانه بالبيت.....

...... في وقت من اوقات الحاضر القريب......

بتاريخ...3/9/2023

كعدت الصبح .. الجهال بعدهم نايمين خليت الفاصوليه عالنار حتى تنسلك للغدة... كعدت الجهال وابوهم وسويت ريوك واتريگنة

بين مكمل الغدة صبيت ورحت داجيب مي ولگيت ابو الجهال ايسولف بالموبايل...

خالد: هلو حبيبتي شلونج سنفور شلونه

.... اني بسرعة عرفتها هاي حماتي

خالد: ليش خيرج شبيج ... وليش متخابريني من تتخربطين .. تعالي اهنا يمنة گضيلج شكم يوم 

..... داسمع بس كلامة ومداسمع شنو ردها بس بعدين اتفقوا كلها راح اكولها ال...... ( اتحفظ على اسمي الاحد ما انولد) حتى اتحظر نفسها وراح تنتظرج اتطلعون للكاظم زوروا واتعشوا وتعالوا 

... اني كيفت خلصت الغدة وكمت غسلت مواعين وسبحت الجهال وبدلنا ... انتظر حماتي تجي علينا حتى نطلع للزيارة 

اجتي.. اتصل عليه خالد گلي انزلي ام غدير واكفتلج بالركن ... قفلت الباب ونزلت طلعتلها للركن سلمت وبوستها وصعدت انطلقنا للزيارة... وصلنا ازدحام وكلها ايرانيين وصايرة ملحمه .. 

اتمشينا ما اخذوا من عدنا امانات لأن زيارة وزحمة كالو عادي دخلوا الموبايلات والغراض اني جنطتي لابستها جوة العباية .. للأحتياط يعني 

ويانة عربانه مال طفل كالو سلموها هاي متدخل ..كلتلها الحماتي جيبي اني اوديها انطيتها موبايلي جان بيدي كتلها خلي يمج .. ورحت سلمت العربانة ورجعت..

كملنا تفتيش وفتنا حماتي ابنها صغير كالت فوتي زوري انتي وجهالج اني انتظرج اهنا.. ابني بقى يمها اخذت بنتي ودخلت بس ازدحام بنتي كلتلي ماما مادخل راح اروح العمه كلتلها روحي .. فتت وحدي كوة من الازدخام زرت ودامشي وصلت للباب من نطلع من الامام اتفقدت جنطتي لگيتها مفتوحة .. والجزداان ماكوووو مبيوووك....

...... ذكريات في جوف الماضي......

مرت الايام ودريد بعدة بالعسكرية منازل ... واني على نفس الروتين وية شغل البيت ... واسراء بنت اختي يمي هم مسليتني متعلقة بيه بحيث متريد امها لأن من صغيرة جبتها يمي اختي عندها ولد اصغار اثنين فوكا فوكا اتجيب ومجانت تگدر فكلتلها خليها يمنه ...

دريد ايدزلي الراتب مال العسكرية مصرف الي وللبيت ... كل ما يستلم ايدزلنيا ... مرت الاشهر الحمدلله حملي زين بس هم الضغط يصعد حتى الدوة ميفيد .. دريد نزل شكم مرة اجازة وراح 

وصلت الشهر الثامن ... وهم صار عندي ولادة وطلوگة اختي كريمة معايفتني ابد وعلى طول يمي

كريمة: شنو سالفتج خيه .. كولي ياالله اوجاع عادية هاي تعالي ارتاحي شوية بلا تعالي اتمددي

علية: كريمة وجع قوي شنو مادري بنفسي انيي ... يممممه راح اموت ولج شلون بية

كريمة: كولي ياالله.. سور سليمان ان شاء الله شو گومي خلي انروح للمستشفى

علية: دزي على دريد راح ايشوف نزار عود گلي ما اتأخر .. اكيد بشارع الرشيد دزي علية اي واحد من الولد... اخذنه جنطة بيها ملابس وتجهيزات طفل جانت كلها خياط ايد وحظاين امي اتسويلياهن ..

ورحنه للمستشفى

هم كالتلي الضغط صاعد ولازم اتجيبين ... انقهرت وشبعت قهر ليش الحمل اتعب بي وما اوصل للنهاية 

دخلت الصالة الولادة وهم طلوگه اصطناعي .. واجتي الطفلة خانسة بسرعة عرفت بس تعبانة بهتت روحي حتى مسألت

كريمه: ها عيني اي اي اي صلوات جابت 

الدكتورة: للأسف العمر الكم .. الطفلة اجتي ميتة يعني مو بالولادة ببطن الام ميته

دريد: الحمدلله لا اله الا الله .. لا اعتراض على حكمه الله .. بس ليش يعني هاي صار ثاني حمل 

الدكتورة: بسبب الضغط هو الي ديكت ل الطفل.. لتحمل بعد خلي اتعالجه يلا ليش هيج ديضيع تعبها... الله ايعوضكم

كريمة: اخذت الطفلة وراحت... ياا عيني عليج خيه هيج ماعندج حظ شجاج عيني تعبج راح .. ابجي عليها... عليه طيبه متستاهل 

دريد: كولي ياالله ..هذا جزع حرام.. هاي كتبة الله 

مابيدنا شي .. فوتي العلية بين ماروح اكمل الاجراءات....

علية: اجتني كريمة اباوعلها تبجي عرفت ..ماكو داعي اسأل... وين راح دريد خلي اشوفها هم مثل ذيج مخلاني اشوفها

كريمة: لحمة حمرة شعندج شايفتها ... الحمدلله على سلامتج.. الله ايعوضج ان شاء الله ارتاحي علية عالجي نفسج بعد لتحملين

علية: انقهرت حييل قلبي وجعني..ليش اتعب بالحمل وميكمل .. الحمدلله ياربي الف الحمدلله.. اجاني دريد

... ها دريد وينها ليش متخليني اشوفهن .. يعني من ماشوفهن ما انقهر شنو .. داطلك واتعب واجيب ..وتالي تعبي للتراب... دموعي تنزل مقهورة

دريد: شنو يابة كولي ياالله .. عدنا اثنين ايدخلونه الجنة ان شاء الله طيور صغار الحمدلله على عطايا ربج بيها صالح ...

علية: شسميتها ؟

دريد: تيسير!! ... ان شاءالله منها وتتيسر امورنا 

علية: طلعت من المستشفى اجتني امي ابد متعوفني 

وبقت اتداري بيه... بس مقهورة وتحجي علية يا متكعدين وتشتغلين واتخبزين ... عذرتها لأن صار ثاني حمل الية ميتم .. بس شنو بيدي الله مرايد

راح دريد خلصت اجازتة ... ومرت الايام طبيعية مابيها جديد

كمت الصبح عجنت ونظفت البيت ... وحظرت الغدة 

كاعدة اشتغل وما اسمع بس واحد كال

دريد: السلام عليكم ... الغالية

علية: دريييييد.. فرحت بشوفته وجيته ممتوقعة يرجع بهيج مدة قصيرة .... سلمت علية وسأل عالولد 

وعلى احوالنا ومن هالكلام..

دريد: شلونج عيني .. ان شاء الله زينة 

علية: الحمدلله.. والله مشتاقيلك شوكت ان شاء الله

اتكمل هاي العسكرية ..

دريد: الله كريم خلصت ان شاء الله انشوف هالحرب هاي شوكت تتوقف .. وايرحمون بحالنا

علية: ان شاء الله... روح نام شوية علما اكمل الغدة ويجون الولد ونتغدة ان شاء الله... راح دريد يرتاح بين ما احظر الاكل ...تعبان هواي ومبين علية بس هذا حال الدنيا منكدر انسوي شي

.... مرت الايام وكتلة الدريد شنو رأيك انروح الديالى احنه وبيت كريمة ...

دريد: ليش لا اني هم صارلي مدة مشايفهم ... شوفي شوكت عيني وحظري ونطلع

علية: خلي تجي كريمة واتفق وياها وانروح حتى هي رجلها هم ايروح ويانا ... يسأل عليك هوايه والله 

دريد: تسأل علية العافية ... اني هم صارلي هواي مكاعد وياهم والله شسوي ... اجي تعبان مالي واهس بكلشي.. وهناك الحرب محترگة على روسنة

علية: الله كريم تخلص ان شاء الله... والله اجتني كريمة وكلتلها واتفقنه الجمعه الصبح نطلع انروح الاختي سميرة ... بديالى الي هي ام اسراء هم اخذها ويايه اتشوف امها

.... وصلنا للديالى واستقبلونا ذاك الاستقبال زوج سميرة دليمي والنعم من عندة يعني صاحب كرم معروفين بعد .. وايحب دريد الحمدلله ماكو واحد ميحبه اخواني ابوية ...كلهم ايحبووا حتى جماعته دريد كريم وسخي وايساعد كل الناس حتى لو ماعندة ايدة مو الا ..وكلهم متعودين عليه

قاسم: ياهلا بدريد ...شلونك يعيني احوالك وين هالغيبة يابة مشفناك بعد

دريد: بالله على بالي بس وين الوقت يا ابو قادر... والحرب هاي كدامك ممنطيتنا فرصة

قاسم: اي والله مو حرب انتقام صارلها ٥ سنيين اخذت من عندنا كوومة شهداء 

دريد: هاي شنكول غير الحمدلله ما باليد حيلة 

قاسم: اي والله ... وانتي علية ...شلونج يابة بنيتنا عافتنه واتعودت عليج عيني حتى متقبل تجينا

علية: الحمدلله ابو قادر الله ايسلمك... اي لعد الام التربي عيني مو التجيب وهي من صغيرة انطيتونياها ... مانطيها بعد يمي

.... كلهم كامو ايضحكون.. حظروا الغدة واتغدينة ولمة وسوالف ... ورجعنا البغداد 

مرت الايام والاشهر ... وطلعت حامل 

رحت حللت وفتت للدكتورة ما قبلت وكلتلي انتي عندج تجربتين مو سهلة ليش اتجازفين على الاقل لو ماخذتلج فد سنتين 

بس ارادة الله يعني مو بيدي ...واني اريد الصراحة والحمدلله بلكت هالمرة الله يكتبها الي..دريد بالعسكرية من ينزل ان شاء الله ابلغة...

غصون: علية شوكت يجي دريد مو أتأخر هالمرة

علية: اي والله صارلة فوك الشهر.. شيسوي غير واجب البلد هذا ..يجي تعبان قابل صغير هو غير عسكريته مكملها .. شمدريني منين طلعت هالاحتياط انوب

غصون: اي والله مشتاقتلة وبعد مدارس ماكدر اجي ...ردت اشوفة

علية: لا ان شاء الله اتكدرين بس يجي اخلي يجي عليج وايجيبج... وانتي كملي مدرستج وان شاء الله رجعي يمنه شعندج بعد

غصون: اتعودت على بيت خالي ... بس هم اجيكم

علية: هلا بيج عيني شوكت متجين ... اجتني كريمة وامي ... وكلتلهن اني حامل محجيت بالبداية لأن امي شتسوي بية.. وفعلاً نفس متوقعت

الحجية سهام: انتي اتريدين اتموتين غير تاخذين حذرج.. ليش اتشعوطيني يمه

علية: شنو يوم شمسوية الحمدلله الله اكرمنا .. وبعدين صار ٥ اشهر على ولادتي يعني مدة مو قليلة

الحجية سهام: ولج يمة الضغط ايكتلج شتحجين ...شايفة نفسج توصلين للموت والله يشگفها منج

كريمة: شنية يمة دكولي ياالله بلكت هالمرة .. والله كاتبها الها وان شاء الله ميضيع تعبها..الخاطر هالرجال الي بالجبهه وايفرحه ان شاء الله

الحجية سهام: ضلن هيج لتاخذن الحجي..ليش اني ماريدها ايصير عندها طفل بس غير مريضة هي مو زين عليها

علية: ادعيلي انتي يوم وكلشي ماكو ان شاء الله ليش خايفة متكوليلي... هو اني اريد واحد ايطمني لو ايخوفني

الحجية سهام: الله ايسهلها عليج بجاه علي ابو الحسن... شحجي بعد وحدة اتدادي للخ... ضحكنه اني وكريمة 

امي اتخاف خطية بس بقت بيد الله بعد شسوي 

.... اجة دريد من العسكرية وكتلة ... وهم بقى يحجي..

دريد: علية انتي مريضة لو ماخذة حذرج يابة... شلون هيج ومصارلج هواي من ولدتي

عليه: ليضل بالك رحت للدكتورة وكلتلها هالمرة انطيني الدوة قبل شهر الرابع حتى اكدر اسيطر عالضغط هو بس بالحمل يصعد عندي.. بلكت ماكو شي

دريد: هي عالماكو شي .. انتي اتطلعين من الموت 

وكل مرة انخسرة ...خسارتين مو هينة ... جان الحد ملكينة حل... الحمدلله على كل حال دير بالج على نفسج يابة والله ايگومج بالسلامة

.... بهاي اجازة دريد قررنة انروح للموصل سفرة 

جنت حامل ٥ اشهر.. الحمدلله وضعي الحد هسه تمام

الضغط يصعد بس اهون مو مثل حملي السابق يبقى

صاعد على طول 

..... رحنه للموصل جان الجو بارد بداية شتاء 

نهاية شهر العاشر... اتونسنة اهناك يم بيت بنت عمته

وابن عمه كلهم انروحلهم ...وانسوي جمعات ونطلع 

انروح الغابات الموصل ... 

.... رجعنا البغداد ودريد راح ... دريد أثناء لبسته للأحتياط واجب من الواجبات الراحلهن .. اتصوب بأيدة باصبعة بمنطقة المحمرة الي عالحدود الايرانية والعراقية ... اصبعة خطية اتعوق ... الحمدلله بأيدة اسم الله ولا صاير بي شي 

مرت الاشهر والحمدلله دخلت شهر التاسع ومتفائلة هالمرة كلش بلكت ايعدي على خير رحت للدكتورة وكلتلي

الدكتورة: ماما يومين وتعاليلي حتى احولج للمستشفى واتجيبين لأن انتي وضعج ميسمح اتكملين شهرج عندج تجربتين مو هينه 

علية: ان شاء الله دكتورة بس وضعي زين ماكو شي مووو؟

الدكتورة: لا الحمدلله الحد اهنا ماكو شي .. بس ان شاء الله نجتاز الولادة يارب .. الله ايسهل عليج

علية: تسلمين عيني ... رجعنه اني وكريمة للبيت 

وكتلة الدريد همزين موجود نازل اجازة.. والله وحظرت واجتني امي وكريمة واخوية كريم 

ورحنه للمستشفى...بس هم طلوگة اصطناعية 

الحمدلله... 

الدكتورة: الف مبروك ابنية تتربى بعزكم ان شاء الله...

الفصل التاسع من هنا