رواية جسر الذكريات الفصل التاسع بقلم مريم الحيالي
ولادة هديل: 1986/2/17
دريد: الحمدلله الف الحمدلله والشكر.... بشريني الام شلونها خوما الضغط صاعد
الدكتورة: تعبانه بس زينه ان شاء الله.. والضغط مو كلش صاعد راح اخذ الطفلة للخدج بس سويلها البيان
كريمة: يا عيني يمه شكد ناعمة.. شلتها وبستها لافيها بالحضينة ورحت وية الدكتورة للخدج اخاف عليها... المستشفيات اتبدل بالجهال ماكو امان
..... خليناها بالخدج ورجعت العلية لگيتها تبجي امي يمها ومبدلتلها... متصدگ عبالها انكذب عليها والطفلة هم بيها شي
علية: شفت كريمة اجتي هالمرة وجهها يضحك غير عن كل مرة ... بروح حسين كريمة الطفلة مابيها شي
كريمة: يا خية والنبي محمد مابيها شي... الحمدلله على سلامتج كومي على حيلج وعلى بنيتج بعدها ناعمة خليناها بالخدج
علية: الحمدلله يارب ...المهم عايشة
وين دريد لعد ما اجاني؟
كريمة: فرحان لو شايفته شلون فرح من طلعتها الدكتورة.. بس راح ايسوي البيان ويجي
علية: كريمة اتسولف وياية ودخل دريد مبينه عليه الفرحة ... دريد جبير وتعب هواي يستاهل ايصير عندة جهال
دريد: ها يابة ام هديل الحمدلله على سلامتج
علية: الله ايسلمك ... ها سميتها هديل
غير تاخذ رأيي
دريد: اي معناه (صوت الحمام) اسم مميز وان شاء الله
تملي حياتنا فرح .. يلا اذا ببالج اسم ماعندي اعتراض كولي
علية: لا هاهية حلوو المهم هي بخير ... شتسميها سميها... لليل واجتني گريمة جايبتها صغيرة وناعمة اباوعلها ودموعي تنزل ممصدگه هالمرة تعبي مضاع
وبيضه حلووة
حجية سهام: رضعيها يمه خطية وحتى الابو صفار ميصعد عندها
علية: هاا بيها شوو وجهها ممبين عليه
كريمة: بدايته هسه الدكتور مال الخدج گال ... رضعوها طبيعي حتى ميصعد
حجية سهام: لا ٧ ايام وايروح مال ولادة... طار شرها ان شاء الله مابيها شي ... لج اسكتي بيبي مبينه هاي عرمة
علية: ضحكت بحضني وهي خبصتنا تبجي جوعانه... رضعتها واباوعلها شلون صغيرونه
ثاني يوم طلعنه للبيت ... شايلة بنتي واول فرحتي بيدي الحمدلله كملت على خير... اجوي خالات دريد وولد عمه مكيفين صاير عندة طفل
STORY CONTINUES BELOW
واخوانة فرحانين بيها الطفله الوحيدة الي بالبيت... لأن بنت عصام امها متجيبها مرات دريد ايروحلهم يسأل عليهم وايشوفها هي لا تجي ولا توصل ... حتى عمامها مشايفيها
2
كريمة وامي يمي وخواتي الباقيات هم اجني ... معافوني الحد مكمت على حيلي وطبت
خلصت الاجازة مال دريد وحظرت جنطته حتى ايروح
دريد: ديري بالج على نفسج وعلى هدولة ... ان شاء الله اني كل ما اتصيرلي فرصه اتصل لو ادزلكم رسالة
والراتب من استلمة ادزة هم
علية: المهم انت سالم كلشي منريد... انت دير بالك على نفسك شوكت تخلص مادري
دريد: الله كريم يلا في امان الله
... راح دريد وبقيت وحدي تقريباً راح تطلع الاربعين مال هديل مضل شي... ام عيون مفتحه واتباوعلي
والليل كله كاعدة مرمرتني
كعدت الصبح اجاني البريد بيدة رسالة وفلوس دازهن دريد ... سودة علية اخذتهن وكعدت اقرأ بالرسالة...
👇🏼👇🏼
أم هديل المحترمة..
ارجوا من الله عز وجل ان تكوني بأتم صحة وعافية
عزيزتي:
لم استطع الأتصال بكم وذلك لصعوبة الجو..
وأنقطاع خطوط التليفون عندنا..هذا وتقبلي
فائق شكري وتقديري...وقبلاتي لهديل
ولكي حبي الأبدي...وسلامي للجميع فرداً فرداً
حبيبتي:
ارجوا ان تقبلي مني هذا المبلغ البسيط لحين مجيئي
ولكِ مني اخلص التحايا والحب ... الخالص الخالد
المخلص ...أبو هديل
اقرأ ودموعي تنزل صارلة هواي حتى بالاجازة منشوفه هواي لأن ينتظروا ولد عمه واصدقاءة ويومية واحد عازمة... اهناك وايفكر بينه وبمصرفنه
....اندك الباب ... ذبيت هديل من حضني ورحت فتحته ... والگا خالتي نبيها وجنتها نداء وامي
هلا بيكم اتفضلوا اتفضلوا... بوستهم وفاتوا
نبيها: شلونج علية مشتاقيلج شنو شو ما اجيتي بعد
علية: والله خالة ملتهيه مو تدرين .. وهديل متعبتني متنام .. ودريد ماكو ماكدر اطلع انتو شلونكم...
نداء شلونج
نداء: الحمدلله انتي شلونج عمتي كلتلي رايحين البيت خالتي سهام وانمر على علية گبل اجيت كتلها اروح وياج اشوفها
علية: ضحكت... هلا بيج والله وحدي على طول تعالوا... طبعاً اني ضرة نداء سابقاً اييي هسه راح اگوللكم شلون
بسنه ال٨٠ خالتي نبيها خطبتني الابنها عدنان خوش ولد وحباب وامي اتحب خالتي ومتعلمين عليها وهي رادتني ومن خطبت ابويه وافق والولد اخوتي هم قبلوا لان اصدقاء هو وياهم
.... گطعنه مهر وحددنا موعد العرس بس مصار والسبب.. بدلة العرس
علية: خالة اني اريد البدلة اخذها من الاورزدي من رحت اجهز النيشان شفناهن اني وامي ايخبلن
نبيها: لا غالية مناك اني اجيبلج وحدة حلوة وعلى قياسج شنو الا مناك
حجية سهام: شنو ام عدنان غير هي تختارها شلون انتي اتجيبيها... ونلگه وحدة بسعر مناسب والبدلات اهناك حلوة ونظيفة
نبيها: لا خلي انشوف غير مكان ... السوگ مليان وكتله العدنان كال انتي جيبيها
علية: خاله غير اني راح اللبسها بلكت جبتيها ومعجبتني شلون هم اترجعيها... يوم اني اريد من الاورزدي مو گتلج وكلتي ميخالف
نبيها: غير اني اجيبها شلون متعجبج... سهام متحجين ويه بنتج شو ساكته
حجية سهام: اي غير هي العروس قابل اني راح اللبسها .. ليش يعني واذا نشتري البدلة مال العرس مناك شحتخسرين
..... صار صياح بين امي وخالتي ... وخالتي طلعت زعلانه ... واني وين ايصرفلي شنو من هسه هيج من اتزوج شلون..انداريت على امي وگلتلها
علية: يوم اذا البدلة مو مناك ما اتزوج يلا من هسه داكلج شو اختج من هسه حادة علينه... بقت امي تحجي عليه وانتي الا مناك وكومة بدلات ومن هالحجي .... وتالي متفقنه وهو عدنان هم اجه على اخوتي وكلهم امي اتجيب البدلة... ابن خالتي فقير والجبير ميحب يكسر بخاطرها اعرفة
علية: اجاني كريم اخويه وكلي.. وضل يحجي ليش معاندة الا مناك... كتله مو معاندة بس ليش هي خالتك من عرفت اريد اشتري البدلة مناك مقبلت
المهم اني ماريد هالزواج هذا ورجعوا النيشان... والله وصدك امي اتلم النيشان والذهب واتدزة الهم واجه عدنان وفسخنا الخطوبة ... وامي وخالتي اتزاعلن من ورة هالزواج هذا
... وخالتي خلال فترة خطبت العدنان وزوجته
مرحنا ولا وصلنا متزاعلين ... بس من اجانة حسين اخوية شهيد... اجتنا خالتي هي وجنتها وولدها لأن يعني موت مو مال زعل .. عاد بوكتها يلا اتصالحن خالتي وامي
وصرنه اني ونداء مرت عدنان صديقات خوش ابنيه ..وحتى ابن خالتي سلمت عليه عادي قسمه ومصارت... وهي هم سولفولها وتدري جنت خطيبته
هاي قصتي ويه ام سامر ... لأن بعرسي اجتي جانت حامل وهسه عندها سامر وابنيه ويا.. وحتى دريد هم اتعرف على عدنان واكثر من مرة اروح البيت خالتي اني ويا الحمدلله دريد متفهم ابد مو متسرع كلشي ياخذه بهدوء...
ملاحظة( وحدة من خواتي حالياً زوجة سامر ..القريبين لتحجون ...والبعيدين انتو احزروا☺️)
كمت سويت جاي وطلعت كيك مال بيت اني مسويته وقدمتلهم... وبقينه سوالف وضحك شويه غيرت جو وياهم
لأن امي انتبهت عليه عرفت بيه باجيه وكلتلها على دريد دزلي رسالة .. وانقهرت
( ابوية كل ما ايروح جان ايدز رسالة الامي ومصرف ....هنه خمس رسايل احنه محتفظين بيهن..اني نزلت اثنين منهم لأن مو مال كولهن انزلهن ..بسبب الاحداث المكررة وحياة روتينيه عادية)
...........................................
سنة 1988/2/17
اليوم عيد ميلاد هديل... صار عمرها سنتين مالية علينه البيت وعمامها ايحبوها متنزل من الايد
ودريد فرحان بيها هواي ... واني حامل بشهر الرابع الحمدلله الله رزقني بحمل ثاني ...
هاي هديل ...
سويت حلاوة وكيكة مال بيت .... ودريد كال العصر هم اجيب كيكة جاهزة .. وعزم خالاته وغصون اخته هم.. وامي لحد هسه حزينة على حسين اخوية الله يرحمة مقبلت تجي ولا خلت البنات يجن بس كريمة خطية اجتي لأن عيالها قريبين علينه
..... واحنه شلنه صار سنه ونص من غيرنه بيتنا... بس دريد هم معاجبة كال جيبي ان شاء الله واندور على بيت ... كملت التحظيرات ...وصار العصر اللتمو كلهم وسوينة عيد ميلاد... هدولة
اتونسنا ..وكلهم جابولها انواع الهدايا.. ونسيت اكلكم دريد اتسرح من العسكرية .. الحمدلله واتعين بشرگة اللحوم ..بوزارة الصناعة
مرت الاشهر ...وصار عندي ولادة ...ونفس الشي طلوگة اصطناعية واجاني ولد هالمرة
ابني جبيري إبراهيم.....
بتاريخ:1988/7/7
.............في وقت من اوقات الحاضر القريب .......
...... يمممة بطني متتت ضحك..... ولج اني عندي صور الي والج والله من جنة صغار
هاجر: والله ادور اريد صور الي اني وياج طاكين ويانا ماكووو ...بس همه وابراهيم وم.........؟
...... اني عندي صور شبيج ...الي والج من جنه صغار
هسه من تجين للدنيا انزل صورة الج
....... يمة متت ضحك كل عقلها ضايجة لأن ماعدنا صور من احنه صغار.. بس هديل والولد... هو صدك مادري ليش مماخذين ويانه
يعني صور قليله وكبار مو كلش صغار.... دزتلي الصور العندها ... حتى اشوفكم ابراهيم بكل الصور يبجي
هههههههههههه
جان مجلب بأمي حتى من اينام اذا امي اتگوم ...يكعد وايروح وراها ميعوفها
صارت عرگة بين هاجر وهديل على صورة... وحدة اتكول هاي اني والثانية اتكول اني ...ههههههههههه
ولكم حموووووووت
هاجر: امدانة اي والله
....... ههههههههههه ...هاجر كل عقلها ضايجة ليش ماعندنا صور ....
............ذكريات في جوف الماضي.......
اجاني دريد وگال لكيت شقة بمنطقة السيدية... ارضية وحلوة واتكفينه كلنا...
علية: ليش منبقى بهذا بيتنا والله مابي شي
دريد: لا قديم صار والولد كبروا اخاف عليهم من المشاكل ... حتى ترجع غصون يمنا اتكمل مدرسة واهناك المنطقة راقية.. وقريبة على دوامي هم
علية: معارضته ... لأن دريد الي ببالة ايسوي .. شدشدت الغراض والولد ساعدوني ..وشلنا
رحنه لكيت اكو عمارات بعدها مكاملة ديشتغلون بيها المهندسيين... اتذكر جانوا يابنيين يمكن ... بس حلوة المنطقه والله والشقة جبيرة وحديقة ومرتبة... المنطقة هادئة
رتبت الغراض ...وعزلت البيت ابراهيم صغير يبجي ... وهديل اتگمز تعبوني ... ووحدي تعبت حييل ... بس خطية الولد هم ويايه..كعدنة واستقرينا واجتي ببالي فكرة لأن الحديقة جبيرة وحلوة..
علية: اكول دريد خلي انسيج الحديقة واريد ازرع بيها ورد... وشجرة برتقال وهي بيها نبگه تترتب اتصير احلى
1
دريد: اي يابة براحتج رتبيها بس ارتاحي شويه ..
علية: ودريد عليك الله اريد اجيب بيها دجاجات ووز .. احب هيج شغلات
دريد: ضحك وگلي... هاي شنو ياعيني شتسوين بيهن يرادلهن وقت وابراهيم بعدة صغير..
علية: مو هوايه شكم وحدة واني اكدرلهن شعندي.. اللتهي بيهن
دريد: شعلية يابة الي ايريحج سوي...
علية: ابد مافد يوم كلتله شي وگلي لا ...الحمدلله والشكر الله رزقني بدريد انسان شايل طيبة گلب ميملكها شخص... طبعاً بنت اختي اسراء من اجتني هديل اخذتها امي مني كالت عيب من رجلج بعد وهي كبرت وعندج ابنيه وبيتج كله ولد ... هي متعلقة بيه هوايه خطيه كوة اخذوها وهسه يم اختي حسنه هي اتربي بيها متقبل اتروح الامها اتعودت علينه
1
والله ورحت جبتلي وزات اثنين نثيه وفحل... ودجاجات اثنين وديج وسويتلهن مكان بالحديقة وقفص جبير وخليتهن... ويومية من الصبح اكعد اطلعهن بالحديقة ...واذبلهن اكل وانظف بالحديقة
وغيرت اثاث البيت كله شكو شي قديم ذبيته ... اتخبل من الزعابيل والوصخ .. حتى البردات غيرتهن
حياتنا هادئه وطبيعيه الحمدلله ملتهيه ببيتي وجهالي... مرت فترة اشهر ... وجان انصدم واطلع
حامل.....
1
...........في وقت من اوقات الحاضر القريب............
...... يووووووووم ماااااماااااا....
علية: راح اجي اكص اللسانج ... لج ليش اتصيحين
....... جوعانه ماما شنية ميته جووع وتعب ... بستها واكفة عالطباخ اتگلي بيتنجان... هاي شنو ماما الغدة مكامل شمسوية
علية: مقلوبة هسه بس يتهدر التمن... روحي غسلي وبدلي امشي وشبي شعرج هيج شكبرج اتصيرين
..... شنو يوم.. هوى عالي برة شسويله مسويته ضفيرة وعطوبي تطلع.... يوم فرحي اخذت ٥١ بالرياضيات
علية: طاح حضج على هاي الدرجة على شنو افرح... امشي روحي ... واختج وين شو ما اجتي
1
..... عفتها ويه سارة ومينا اني اجيت ويه الو وامنه
شو اباوع على امي لون البياض مالتها اصفر كركم على خضار... شنو يوم عيونج خضرة لو اني احوليت
علية: اي من الصبح انتبهت عليهن.. العصر اروح للدكتورة واشوف ... الدوة مفادني
.... ان شاء الله يووم ماكو شي... ضل بالي وخفت امي صارلها فترة مريضه واتراجع بس كلمن ايگولها شكل والدوة مديفيد... رحت بدلت وبين مكملت امي واكلنا
...... شنو يوم شكو ليش تبجين ...متحجين هديل شبيها امي ... هاجر صافنه واني صافنه
علية: شنو ماما ..حولتني الدكتورة ...على دكتور جراح واسوي دوبلار الكبد متضرر والابو صفار صاعد
واحتمال بي ورم...........
1
...............ذكريات في جوف الماضي...........
.... كعدت الصبح ... بدلت الهديل ولابراهيم وطلعت الدجاجاتي ... لكيت الدجاجه مبيضه... احجي ويه نفسي واضحك يا يا يا فدوة مبيضة... بيضتين شلتهن ورتبت مكانهن وفتحت القفص طلعتهن بالحديقة
وفتت طكيت البيض نتريك بي... مال عرب ايخبل طعمة...طلعت اغسل العمارة ونزلت من فوك مرة حلوة ... طبعاً من كعدنة الهسه ماعرف احد
ام استبرق: شلونج عيني هلا بيكم ... انتو الجدد مووو
علية: وبيج اكثر حبيبتي اي احنه
ام استبرق: مكدرت انزل عليكم والله كلت عيب بعدكم استقروا شوية وان شاء الله اشوفج.. بس هسه سمعتج اتغسلين وكلت هاي فرصة انزل
علية: هلا بيج عيني لا عادي... ام منو حضرتج.. اني ام هديل
ام استبرق: هلا بيج حبيبي ام هديل... اني ام استبرق عندي ٣ ولد... خلي اغسل الطابق وانزلة
حتى سوة نمسح المي
علية:يلا بعد احسن اني هم مكدرت اصعد فوك كلت خاف الي كاعدين ميقبلون واتخبل من الوصخ اني وشفت العمارة مو نظيفة فغسلتها
ام استبرق: اي صح صارلي فترة والله مغاسلتها.. مرات ام حيدر هم تغسلها ويايه الشقة الفوكاكم
علية: اي خير ان شاء الله... مبينه حبابة ام استبرق همزين اتعرفت على أحد... وحدي من كعدنه والي هسه.. والحمل متعبني ومو وكته ابد
1
...ودريد مكيف وفرحان ايگولي رزق هذا ليش اتضوجين... مرت الايام نفس الروتين وابني أبراهيم كبر بس مجلب بية موتني مو مثل اخته وبس يبجي
.... شبيك ماما متگلي ...
دريد: ها يابة شبيج ويا...
علية: اريد ابدله راح يجون اهلك واني بعدني ... شوكت اتجيب الكيكة
دريد: العصر ان شاء الله... هاي جبتلج صندوك ببسي وصندوك سفن حتى ارجع البطالة البوش للدكان.. ديربالج الجهال لتكسرهن
علية: اي عيني ... لا اني اصبلهم بگلاصات عود... حضرنة وزينت الهول اليوم عيد ميلاد إبراهيم ابني
واني صارلي اسبوع من دخلت شهري... تعبانه هواي والله بس لأن اول سنه سويتله ... اجتني كريمة واهل دريد وسوينة العيد ميلاد ....
على غفلة وحسيت بوجع قوي مگدرت بعد... ولج الحكيلي كرييييمة راح اجيب
كريمة: شنو علية بعدلج كوومة هذا وجع مال تعب يمكن لتخافين..
علية: يا تعب اكلها راح اجيب ضهري موتني ...ولج يووووم... كلها حارت بيه ودريد خطية معرف شيسوي... بس متحملت ... واني الا طلوگة اصطناعي ما اجيب هيج
اباوع الهدومي اتنكعت هاهيه عرفت بعد مابيها مجاااااال........
