رواية بنات سهر الفصل التاسع بقلم فراقد حسن علي
نخفِي حُزناً ووَجعاً وَدُموعاً أحيَاناً
خَلفَ عبارة (أنَا بخَير) ........
تباً لعزة النفس .......
وسحقاً لواقع لا يوجد به احتواء صادق....
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
سوار/ألمر علية مو سهل
ومستحيل أكو بنيه بمثل عمري
تكدر تتحمل الصار بيها
بين ليله ويوم طلعت من بيتنا
وودعت كل ذكرياتي هناك بلمح البصر
وأنطوت صفحة أسمها بيتنا
وعائلتنا الخاصه
بين ليلة ويوم طلع عدنا عشيره أهل
من بعد ما جنا ما نعرف ولا بشر منهم
ليش وشنو السبب ما نعرف....
بين ليلة ويوم لكينا نفسنا لازم
نعيش ويه ناس غربه
وهذوله الناس يردون أذيتنا
وياهو الجاي منهم يكفخ بينا ويذلنا
ويارت نعرف شنو الذنب الجنيناه
حتى هيج يعاملونه
بين ليلة ويوم أسمع اشكال الوان العبارات
المو حلوة تنكال بحق ماما وبابا
وبس يشتمون ويسبون بيهم
وليش وعلى شنو ما نعرف
بين ليلة ويوم نودع الحنان والطيبه من حظن ماما
ونسمع عنها كلمات تخدش مسامع البشر
ان هي مو خوش مراه
بين ليله ويوم نودع الدلال ونعرف
الذل والإهانة على أصولهم
بين ليلة ويوم
بعد ما شفت أكو شخص غريب حاجز أمان ألنا ،
بعد ما دافعلنا من هجمت بت أخوة علينا،
وصد أخته عنا لان لعبت بينا طوبه
وجان أبد ما عنده اعتراض على كعدتنا بيتهم
-
مالكيته غير نهش مني الروح والجسد
خلاني مكسورة بالكامل وخاطري جريح
ما أكدر أتحمل شي ولا حتى نسمة ريح
زرع بداخلي دَمعة وجرح
وصرخة مَكتومة
وزرع ألم غافي
وبكلمة يصحى من نومه
ترى هدوئي الظاهر خداع
أني إنسانة مصدومة
بهاي سوايته البشعة ويايه
خلاني أشتاق لأيام أمان بابا
وركضتي عليه من يجي من شغله
ومعاركي ويه حمودي هي
راحة البال أليه ومن أعظم كنوزي
وهاي أني اليوم هنا أدور على جرعة أوكسجين
تدخل الصدري وما لكيتها رغم اتّساع الدنيا
أقدملة ألف تحية وشكر وتقدير
لان كرمني بوجع نفسي وجسدي
يكفيني سبعين عام وعام .. (وعن أي كرم أتحدث )
لا وفوك هذا الكرم لازم أوافق وأكون زوجته
وانتم بعد ألكم حرية التخيل
بحجم المعاناة والالم والخوف المريت بي والراح أمر بي ،،،،،،،
وفوك كل هذا
مااعرف نهايتي وين راح توصل وياه
ومن رفضت الزواج
زوجة عمنا حاتم شاورتني كالت /
حبابة أنا المصلحتج أنتي وخواتج أكلج وافقي
أذا ما وافقتي ترى يذبحوجن بسجينه عميه
ويدفنوجن بالصحراء نفس ما دفنوا عمتج !!!
(بعدين اسولفلكم قصة هاي البنيه )
هنا من الصدمة والخوف وصار بيها ذبح
والصراحه خفت لان صدك أحسهم ناس شرانيين
وخفت على روحي وخواتي من الذبح
وافقت بس مااعرف شلون نطقت كلمة أني موافقه
والله أحس حتى الدم جمد بعروكي من الخوف
مااعرف اكدر أوصللكم هذا الشعور لو لا
المارين بحاله من الخوف القوي يعرفون شقصد
من يوكف العقل وبعد ما يعرف شلون يفكر ويشتغل
وتصير جميع حركاتنا وتصرفاتنا لا أراديه
يعني نروح ونمشي ونتحرك
بس ما نحس على نفسنا شنو جاي نسوي ،
كانما فاقدين الوعي
وباقي ناس هم يحركونا مثل اللعبه
أني بهذيج الفترة مااكدر لا أفكر ولا ابد
شنو يكولولي الناس أسوي
من صدك فصلت عن الشعور بالدنيا
بس شعور الوجع النفسي والجسدي
وكسره الخاطر أحس بيها
مسرة/الناس مخبوصين
وهذا يكول ،، وهذاك يحجي
وهذا يقرر ،، وهذاك ينفذ
واني وخواتي كاعدات نتفرج
وعساس الفرح هو ألنا...
خالتي فاطمة ما رضت نعقد بثوب الحزن والسواد
كالت / فال مو زين
وأحنا ما رضينا ننزع الاسود
ماما ما صارلها عشره أيام من توفت
أحنا بيا حال وهم يدورون وكت فرح وعرس
بس ماكو وأحد يحس بمشاعرنا ويقدرها
عاد صفينا على أتفاق وهو
نلبس شال ملون جوه عباية الراس
على كد وكت عقد الشيخ
خطية لمى تجاملنا وتواسينا وتعتذر من عدنا
بنفس الوكت
تكول / هذا الأمر مكتوب على الكل،
ولازم نخضعله ونفذه
أني وحدة من ألناس مستعجله على ألعقد
حتى سوار تصير بذمة طارق
هذا ابو النسوان نخاف لا يقلب ويغير رايه
ترى منتصر حاصره ونايم بخوانيكة
والله حتى سلاح سحب عليه وراد يكتله
من وره فعلته الجايفة
وأمي نايمة بالفراش من وراه
عمامي وولدهم غسلوا شراعة على هاي فعلته
وهو هل ساكت وكاعد على أعصابة
عمره ما مفكر يزوج ويرتبط بمرأة
بس الصار خلاه يخضع للزواج والارتباط
والله كلام لمى لا قدم عدنا شي ولا أخر
شو كلهم مجموعين علمود العقد
قبلنا لو رفضنا عدهم كله نفس الاحساب
بعد قرروا ولازم علينا التنفيذ
مرت عمنا جابتلنا شالات ملونه
بدلنا الحجاب بغرفة عمنا حاتم والنسوان كاعدات يمنا
نزعنا الربطة السودة
واني لبست شال بيجي فاتح لفيته لفه عاديه
وبقيت لابسه جواريبي والعباية الإسلامية
وعليهن عباية الراس،،
لا خليت مكياج ولا أبد
وخواتي نفس ترتيبي لبسهن
بس سوار لبست شال وردي
وأساور شال وردي مشجر بوردة ناعمة
أجى عمنا حاتم أخذ سوار أول وحده
وهي أنصكت ما قبلت تروح وياه تخاف
عاد خالتي فاطمة وبيداء زوجته راحن وياها
يعقدولها هي وطارق
أني هنا بقت فكره تاخذني وفكرة تجيبني
والله خايفه ومااعرف شضام زمن اليه والخواتي،،
أحس أصبحنا لعابات وهم يحركون بينا
فزيت من صفنتي مااعرف شكد مر من الوكت
ورجعت سوار تبجي وخالتي تبجي وياها
بيداء كالت / سودة عليه أنصكت من الخوف
من شافت طارق،،
وما قبلت تنطق وتوكل عمها يكون وكيل عليها
علمود السيد يعقدلها ، أخرست من الخوف
والسيد ما عقدلها أفتهم هي مغصوبة
وكال زواج يصبح باطل ناقصة ركن موافقة البنيه
شنو هنا دخل علينا عمنا حاتم يرعد من الاعصاب
سلك سوار راشدي فر راسها
كاللها / اعقد الخواتج
واعقدلج وراهن
واذا سألج السيد كوليله أتذكرت امي متوفيه
وردتها تحضر ويايه وبعد مااكدرت أحجي
واني موافقه على العريس ومحد جابرني
واذا كلتي غير هذا الحجي
اعدمج أفتهمتي لو لا
بقى يصيح على مرته والنسوان الكاعدات
يقنعن سوار لان طارق كايله /
اذا هل مره ما وافقت بعد مااريدها
وعمنا تخبل يكول / منو ياخذها وهي مصخمة الوجه
خالتي فاطمة كالت / عوفوها اني أحجي وياها
اخذتها وطلعت للمطبخ
اني عمي أشارلي تعاي ويايه
رحت أمشي وراه لكيت كرسي بصف باب الصاله
كعدت وهو بقى واكف بصفي
ومرته بيداء ومراه ثانية هم واكفات يمي
هو صاح / أبو حسين أهلك جاهزين ،،تفضل سيدنا
حسيت صوت رياجيل وره الباب بالاستقبال
هنا منتصر فتح الباب ودخل علينا
كال / أبو جواد أنا ما ارضى بالغصب
اذا البنيه ما راضيه أترك الموضوع
واترك عمي جابر عليه أنا أقنعة ،
اول شي حرام ،، العقد باطل
وثاني شي مااريد أتفشل ويه السيد
لان عرف البنيه مغصوبة وبقى يلوم بالحاضرين
وكلهم حلفوله صغيرة وأمها هالايام متوفيه
ومصدومه على فراكها وما تحجي
اني عمي أشارلي تعاي ويايه
رحت أمشي وراه لكيت كرسي بصف باب الصاله
كعدت وهو بقى واكف بصفي
ومرته بيداء ومراه ثانية هم واكفات يمي
هو صاح / أبو حسين أهلك جاهزين ،،
تفضل سيدنا
حسيت صوت رياجيل وره الباب بالاستقبال
هنا منتصر فتح الباب ودخل علينا
كال / أبو جواد أنا ما ارضى بالغصب
اذا البنيه ما راضيه أترك الموضوع
واترك عمي جابر عليه أنا أقنعة ،
اول شي حرام ،، العقد باطل
وثاني شي مااريد أتفشل ويه السيد
لان عرف البنيه مغصوبة وبقى يلوم بالحاضرين
وكلهم حلفوله صغيرة وأمها هالايام متوفيه
ومصدومه على فراكها وما تحجي
عمنا حاتم كاله / هاي البنيه كدامك أسألها بنفسك
أني هنا لا شعور ولا مشاعر
جسد خالي من كلشي لا دم ولا لحم مجرد جسد فارغ ويصعد وينزل بي الهواء
بس كلت / أني موافقه
هو منتصر كال / على بركة الله
ورجع للاستقبال
أول ما بدء السيد حاجاني عود يعلمني كالي /
بويه مهرج المقدم ٣ مليون
والمؤخر ٣ مليون
وعقدج يتم بموافقتج ووكاله عمج حاتم
وبشهادة عمج جابر ،، وعمج شامل
أذا موافقة كولي نعم قبلت الزواج وهو وكيلي
أقصدلج على قبولج بالزواج بتوكيل عمج
جاوبيني بعد ٣ مرات من سؤالي ألج
جاوبته بسرعه / بلي شيخنا موافقة
هو ضحك وكال / بوية بعدنا ما بدينا شمالج مستعجله والصدك حقج أبو حسين ذهب صافي
الله يسعدج تحت عباته ....
يالله فد فشلت كتلني الخجل
ماافتهمت شنو كالي وبسرعه وافقت
هسه شيكولون عليه الناس أرمله وما صدكت
تحصللها على رجال
بقيت مدنكة وأجعص بصابع أيدة من الخجل
بدة السيد يحجي ويخطب
ويكول أيات قرآنية،
وأحاديث نبوية الشريفه التخص الزواج
وذكر احاديث عن ال بيت النبي
وذكر صيغة العقد كال / يا مسره بت عدنان
هل تقبلين بتوكيل عمك حاتم محمد
وكيل عنك بتزوجيك من منتصر كاظم
وبموافقتك على الزواج بمهراً مقدار مقدمة ٣ مليون دينار
ومقدار مؤخرة ٣ مليون دينار باقية بذمة
الى حين الميسرة والطلب
على دين الله
وسنه رسول الله
وعلى مذهب جعفر بن محمد الصادق عليه السلام
فااذا قبلتي التزويج والتوكيل
قولي نعم قبلت الزواج وهو وكيلي
أني والله دايخة ومسطوره
وكتلني الخجل والمستحة
ماانتظرت السيد يعيد عليه بعد صيغة العقد
بسرعة جاوبته من أول مره سألني /
نعم قبلت الزواج وهو وكيلي
أسمعة رجع ضحك وكال / بيها الخير بويه
الله ينور حياتج ويسعدج
وأسمعة رد يحجي ويه منتصر
أستغربت كلامه بصيغة القعد
مره كال المنتصر /أنكحتك مسره بت عدنان
موكلة حاتم محمد بمهراً مقدار مقدمة ٣ مليون
ومقدار مؤخره ٣ مليون
وعلى دين الله
وعلى سنه رسول الله
وعلى مذهب جعفر بن محمد الصادق عليه السلام
اذا قبلت النكاح فقول نعم قبلت النكاح
جاوبه منتصر/ نعم قبلت النكاح
💚
شو رجع مره ثانيه وكال المنتصر
متعتك مسرة بت عدنان وهم نفس الكليشه
وجاوبه منتصر نعم قبلت التمتع
ومره ثالثة كال زوجتك .... وهم نفس الكليشه
وهم جاوبه منتصر قبلت الزواج
مره رابعة كال / أنكحتك ومتعتك وزوجتك
مسرة بت عدنان... وبنفس الكليشه
وهم جاوبه منتصر/ قبلت النكاح وألتمتع والزواج
وهو السيد ختم كلامة ثلاث مرات كأنما يأكد
زوجتك مسرة بت عدنان
على دين الله
وسنه رسول الله
وصاح وراها بصوت عالي سمعونا حلاوة
الصلاة على محمد وال محمد
وكل الرياجيل صلوا بصوت عالي رج البيت
والله أني صفنت بعقدي الاول من المرحوم
شو بس كالي الشيخ اذا موافقة على زواج
قولي نعم قبلت وأنت وكيلي
وحتى اني والمرحوم كاعدين سويه على نفس المده
ماكو لا هاي الهوسه ولا هاي الإجراءات
هنا الحزت بكلبي النسوان كامن يهلهن
دمعت عيوني حزن وغصة على ماما
محتاجتها بهيج موقف
وهم محد راعه حزنه عليها
وكلساع وحدة من النسوان تهلهل
أني كمت بعد ما باوسني النسوان وباركلي
بس ما رجعت للغرفة
رحت كعدت بالمطبخ يم خالتي وسوار
لكيتها تسولف وياها وتقنع بيها
وره مده أجتي أساور هم عقدولها هي ومازن
وكالت الخالتي / عمو حاتم يكول خل تجي سوار
السيد منتظرها
سوار كالتلي / تعاي ويايه أخاف أروح وحدي
عاد والله رحنا وياها أني وأساور وخالتي
عمنا حذرها يكتلها أذا ما تحجي وتقبل بالزواج
كعدناها على نفس الكرسي الوره باب الصاله
شو السيد وياه منتصر وعمنا جابر وطارق
دخلوا علينا
والسيد كال جيبلولي كرسي
كابل سوار وكعد كدامها
وبقى يسولف وياها وهي بس تبجي
حتى ما رفعت راسها تخاف تباوع على طارق
وهو يكلها / بويه أحد جابرج
غصبوج اهلج على الزواج من الزلمة
هي بس تحرك راسها يعني لا
كاللها / جا ليش ما تحجين
هي بقت ساكته
عاد أساور كالتله / عمو ماما صارلها أسبوع من توفت
وعمو حاتم خطبها لطارق
وهي زعلانه لان مصار فتره طويله مرت على وفاتها
لان تعرف هذا فرح وأحنا بعدنا حزانا على ماما
عاد هو كاللها / بويه الموت حق
ومايدوم بس وجه الله الكريم
وأهلج ما مسوين حفله وعرس بس ملجه
أنتي موافقة على الزواج من الزلمة طارق
ومحد جابرج لو غاصبج عليه ؟؟
هو كال/ على بركة الله
وعقدلهم بنفس المكان لا راح بالاستقبال ولا أبد
وبس كمل صيغة العقد ويه طارق
خالتي كامت تهلهل
والرياجيل كاموا يصلون على النبي بصوت عالي
وره ما خفت ألهوسه والتبريكات
وناس تبارك الناس
وأحنا واكفات على صفحة
نباوع عليهم والله بالنسبه النا ناس غربه
أجتي مراه شكلها هادئ وملامحها تبث هدوء وألفه
وجدأ محتشمه بلبسها
لابسة ربطة بيجيه جواها حجاب الأميره الصغير
ضامها كصتها بي ،،وجبه سودة
ومعاصم منزلتها على جف ايدها لحد أصابعها
وعطرها مسك ،،وبيدها سبحة
تطلع أكبر من عمر ماما
يمكن عمرها بنص الخمسين
تقدمت علينه وباوستنا ودعتلنا بالصبر
على فراك ماما ، وبالتوفيق بحياتنه الجايه
يعني وجهه فد بشوش ورحماني
كلش تختلف عن نسوان هاي المله
مبينه متواضعه وخيره ووقوره ....
بعد ما بيداء ضيفت الكل كيك وعصاير
وراح السيد وصله واحد من ولد حجي شامل
طارق كال / العليه سويته وأتوقع هسه الكل راضي
وهاي عقدت على البنيه
بس كدام الكل أبو جواد
بنت أخوك عقدت عليها الخاطرك
صح صارت بذمتي بالشرع
بس مالي دخل بيها
تروح ، تجي ، تموت ، تعدل
تبقى بوصاية منتصر وألحجية
شو مازن هم حجى كال / أبو جواد
ترى أنا هسه مااعرس لا تضغط عليه
اريد أبني واستقل بسكن وحدي يلا
أكمل باقي امور الزواج
عمنا حاتم كاله / وتجيك مليونين
هديه البناء والزواج
براحتك ابني وأسس بيتك
بس لا تجر بروحك وتطول سنه
كل ما تخف ايدك افضل
مااريد مشاكل وطلايب
منتصر بقى يتلفت باوع على جهتنا أحنا البنات
كاعدات بدايه باب الصاله كال / وينج بويه يلا
جمعي غريضاتج وجيبي خواتج
وامشي هناك للبيت الحجية تعبت
مالها خلك
أني مالكفت السالفه عبالي يقصد
على لمى وخواته ، الا خالتي فاطمة
كالت/ كومي يمه مو هل رجلج يحجي وياج
كتلها / منو ؟؟!!
قصده عليه لو على لمى ؟!
وحيدر صاح / لمى رجلج يصيح عليج
ما الله يهديج ترحين وياه للبيت
ترى جدة حسن طلعوه من تراب كربله
هي لمى حركت جتفها وكالت /
تؤ مااروح
هو عاط / منتصر تحل الموضوع لو شلون
منتصر كاله / انت ومرتك مالنا دخل بيكم أثنينكم سواديين
عاد بده الكل يسلم ويطلع يروح البيته
منتصر أنتظرنا بين ما جمعت كل هدومنا
اني وخواتي من الحبل
ولميت غراضاتنا
وبيداء الله شاهد جلبت بينه نبقى يمهم
بس خالتي ولمى ما قبلن كالن/ مو بعيدات
هسه تملين منهن يروحن ويجن عليج
بس خل يروحن ويانه يتعلمن على بيتهن
طلعنا مشي أني وخواتي ويايه خالتي ولمى
وسهى ونهى ، وجهال سهى يكمزون كدامنا
وصلنا للبيت أتلكنا همام وباركلنا
وطلع يركض اكو ولد صديقة واكف بالباب
حسين مو تكولون طفل وصغير
لا والله سوالفه مال كبار
بس طبينه كام يهوس وجهال يهوسون وياه
جبناها الحلوه محنايه
وبقى يصفك ويهوس
كعدنا بالصالة ورجعنا لدرب الغربه
وحشت المكان.....
أجى طارق مستعجل صاح من الباب
لمى جنطتي حاتم منتظرني
خالتي هي حجت ويه طارق /
أكلك يمه البنيه رحايتها سلتها من الوجع
صارلها فوك الاسبوع، ولا تكدر تاكل ولا تشرب
اخذها العصر للطبيب؟
هو جاوبها / واني شعليه بيها
منتصر هو متكفل بيها
اخذ جنطتة من ايد لمى وباس خالتي على راسها
وصاح أودعناكم وطلع مستعجل
منتصر كال / ماكو فايدة
العصر منتصر وخالتي اخذوا سوار
لطبيب الاسنان ولمى راحت وياها
وهي صدك بعدها متأذيه بالكوة تمشي
وانوب ما تكدر تاكل وتشرب رحايتها توجعها
حتى قوة مابيها تدفع روحها وتمشي
رجعوا بليل الحمدلله الطبيب شاطر شلعلها الها
لان منتهيه مابيها مجال تصلح
وكاتبلها هم خوش مسكنات وعلاج مال التهابات
أني وأساور لزمتنا سهى ونهى
عود يعلمن بينا شلون نتصرف ويه رجولتنا
وشلون نتعامل وياهم
وشلون نكسبهم
وبقن يضغطن علينا نغير من لبسنا
بس أحنا كلنالهن خلي تطلع الأربعين مال ماما
وبذاك الوكت الله كريم
أستقرينا بغرفة خالتي أنام يمها ،
وفرغتلنا لمى خانه من كنتورها
سفطنه بيه هدومنا وغراضاتنا
والله حتى كنتورهم صفنت عليه
ماكو كنتور ظاهر منصوب بداخل الحايط
بس الأبواب تنفتح للخارج
ثاني يوم الصبح راحن البنات سهى ونهى
والله جهال سهى هوستهم حلوة
ونسونا شويه من الضوجة والكابة
وحسين وياهم يكمز
بس تبارك ابد ما شفناها
كالت لمى رايحة يم أمها زعلانه
كاتلها أبوها ليش وعلى شنو ما سولفت .....
عاد وصدك على كلام طارق
ماله دخل بسوار راحت لو أجت
خالتي ومنتصر هم أتكفلوا بينا
من كلشي طبيب ، هدوم ، غراض
روحة لمكان ، اي شي نحتاجه على خالتي
أحنا كتلكم ما نعرف ناكل أكل جاهز
ولا خبز لو صمون من بره
خالتي كالت المنتصر
خطية جابلنا هذا التنور الكهربائي الأرضي
كلكم يمكن شايفينه وتعرفونا
صح يشلع القلب ويطول
لان يخبز بس خبزة وحدة
بس ميخالف نعمة
أني وأساور كمنه نعجن ونخبز
ونطبخ الغدة والعشا
الاكل النسوي بيت خالتي كلهم ياكلون ويانه
وخالتي ابد ما قيدتنا بشي
بالعكس تشجعنا
وكلش مكيفه على نظافة الاكل والخبز
وحتى مرة بالشقة كالت اللمى / هاي النعمه
الترد الروح مو حميستج التلجع مصاريني
من الفلفل والبهارات
ولمى تكلها / اي عمي حقج لازم تمدحين الجناين
حتى يدارن ولدج
وخالتي تضحك تكلها / لا والله بس واحد لازم يحجي الحك
أحنا بدينا نتعلم شويه شويه
على سكن بيت خالتي
بس سوار أبد عزلت روحها
ابد ما تطلع من غرفة خالتي
واغلب يومها تكضي نايمه
وبليل تبقي سهرانه على التلفزيون
واذا ضاجت وملت تكعد تقره قران
وأنوب اكلها طول اليوم
يمكن وجبه وحده مايصير
وفرد نوب ضعفت .....
أحنا بدينا نتعلم شويه شويه
على سكن بيت خالتي
بس سوار أبد عزلت روحها
ابد ما تطلع من غرفة خالتي
واغلب يومها تكضي نايمه
وبليل تبقي سهرانه على التلفزيون
واذا ضاجت وملت تكعد تقره قران
وأنوب اكلها طول اليوم
يمكن وجبه وحده مايصير
وفرد نوب ضعفت .....
سوار / يضيقُ قلبي عندما أتلفت حولي يا أمي
ولا (أجدك) وأحتاجك ولا (أبصرُك)
وأموت آلاف المرات عندما أرى طيفك ولا (أراك)،
وبَكت عيوني لآلام الفراق ..
فردّدَ قلبي الحزين باحتراق ..
كيف للقلب أن ينساك؟
يا من في الفؤاد سُكناك،
فكتبت لك حبّي على صفحات عيني ..
ليقرأها كل من يراني ..
وليعرف بها كل من التقى بي ..
ورسمت صورتك في قلبي ..
كي لا تلمحها عيون الآخرين.
شكرا لزيارتكم عالم روايات سكيرهوم
