رواية انتقامي الفصل التاسع بقلم جمانه السعيدي
شاهين.....منى كدرت تكسب هاي القضيه بلواسطات والرشاوي كرايبها المحافظ خال امها مدير المحكمه
كنا كلما نصعد القضيه واحنا متأكدين راح نكسبها
ترجع علينا
لمن نسئل يكولون الواسطه والرشوه ماشيه
حتى رحنا اشتكينا بمحكمه بغداد
ونعادت القضيه وهم ما حصلنا شي
بس مصاريف وفلوس للمحامين
اقسم بلله اكو محامي بلمحكمه يكول انتم قضيتكم عجيبه
بس رئيس الوزراء مااتصل حتى تنسد هاي القضيه
حاربونا من كل الجهات سنه كامله والقضية صاعده نازله
وكلشي ماحصلنا والنوب هذا الاغم صاحبها شالها وحده
جمانه السعيدي
بداية طلاكنا خافت نحجي عليها لو نشهر بيها
بدت علينا هجوم موطبيعي يعني فوك كلشي النوب ما تستحي لا تحجي علينا
كله بسبب تشجيع ابوها الكرن وامها الك...ح..ب..ه
كامت تتمادى
تذكرون قبل تكول اهلك شكد يطبخون وشكد يتسوكون
ياسبحان الله نست هذا الكلام
وتمشي وتكول بخلاء مايجيبون مسواك كاتلني الجوع بيتهم واني من طلكته مطلوب ١٠٠ بس حلويات
واحنا قسما بلله نص المسواك يخرب ونشمره بلشارع
ما نجيب طبقة بيض لو ثنيين لو تلاثه
رجعت تكول امه واكفتلي وكفه تحجي عليه ما تقبل رجلي يتسوكلي وانا وابوي جنا ثنيبنه نتوسك
وامي جانت اطلع من الطبخ اول ما تطبخ وتخلي بجدر
قبل لا تصب من الاكل
علمود حضرتها ترجع من الدوام تعبانه تريد زقنبوت
اخر شي كالت هو ازوجني علمود راتبي
وهي طول سنه ونص زواج جانت اداوم بدون ماتاخذ راتب
مصرفها كله عليه
يعني اجذب الجذبه وتصدكها
شاهين...كنت اسمع وانقهر اموت قهر معقوله بشر كلشي ما يوكف بعينه
لا وجذب وتصدك جذبتها
بس اني نظيف ورب العالمين وياي مايقبل يضلمني
لان بعمري مااذيت احد
يمكن رب العالمين اختارني حتى يوصل رساله للناس
ديرو بالكم من هيج نماذج
كمت اكعد اصلي وادعي رب العالمين ابد مااقل إيماني
ولا نهزيت بسبب تصرفاتها
رغم الصدمات نازله ترف على راسي
وكلها من العيار الثقيل يعني تخيلو وضعي
شاب بسيط ماعنده مشاكل من اي نوع ولا يحب اياذي اي احد ماشي بطريقه
تنزل علي كل هاي المصايب وحده ورا الثانيه
فوك غلط منى اهلها طلعو ماايديها لا وطلع عدها ضهر
ومسنوده
اشتكيت عليها والمحامي اخذ مني كومه فلوس
والاخير هي الي كسبت القضيه
وأخذت كلشي
هذا العراق العظيم تنتصر بي الساقطات على الشرفاء
هذا القانون الأمريكي الي انفرض على العراقيين بلمحاكم
حتلو تدخل وتلكه واحد ويا زوجتك بغرفة النوم مالك حق تحجي وياها
لان راح تنكلب عليك الايه وتصير انت الغلطان
اني اول واحد ادعم القانون الجديد يكون العقد على المذهب الجعفري حتى منى ومثلها ما تفلت من العقاب
جمانه السعيدي
حسيت نفسي ضعيف ومراح اكدر اخذ حقي
انظلمت هواي بهاي الزواجه
بس رب العالمين حب ينصرني لمن شافني احس بلضعف
بعد فتره من الانفصال رجعت تتواصل ويااي
اي مثل مااكلكم حست هي ضيعت واحد ذهب ومراح تلكه
مثله
بلبدايه اكو وحده بلمدرسه اداوم وياها اخوها يصير صديقي
بدت تسئل هاي البنيه عني باعتبار اخوها صديقي
واخوها كان يوصل الحجي
هي تحجي كدام هاي البنيه ومتاكده الحجي راح يوصلي
اول مره بدت بلسوال عني
استغربت فعلا شخصيه غريبه بعد كلشي جاي تسئل عني
بعدها تعمدت توصلي رساله عن طريق صديقي
منى....اني ندمانه زوجي كان زين وياي ومدللني وعمره
مارفضلي طلب
حتى جان يقدمني على خواته وامه
اني غبيه ضيعت ابو بنتي من ايدي لو اموت مراح الكه مثله مااعرف ليش هيج اتصرفت
قشمرني الشيطان ولعب بعقلي اني ندمانه
لو يرجع الزمن اخلي هو وأهله بعيوني اني قصرت ويااا
اني احبه
هذا الحيوان قشمرني وضحك عليه
راد يدمر حياتي لمن عرف اني شكد سعيده ويا زوجي
وهو ما مامرتاح وياا زوجته
دخل حياتي وخربها
جاي تقنع نفسها هي مضلومه رغم هي كانت صاحبت هاي الفكره من البدايه والولد دخل للسجن بسببها وسمعته ضاعت
نرجسيه تغلط وتعيش دور الضحيه
شاهين...من وصلتني هاي الرساله استغربت
هاي شنو نوعها معقوله بعد كلشي صار جايه ندمانه
لا وجاي تمهدلي خل نرجع
اني غشيم ادخل وحده مثل هاي بيتي شنو اخذها اكود عليها
المهم مابطلت توصلي رسايل اعتذار وندم
اني ماحجيت الاهلي سكتت
لان بس يعرف ابوي بعد كلشي صار ويانه ضغطه يصعد
واني اخاف علي هواي تعذب وياي
قررت ارجع حقي واستغل تقربها مني
ماكو غير هاي الطريقه مثل ما ضحكت عليه ودمرت حياتي اني راح اضحك عليها وادمر حياتها
واللعب الي لعبته وياي ارجعه عليها
هي متاكده اني خوش انسان وابد مااذي اي احد
وعمري ماكلت كلام ورجعت بي
راح تأمن بيه وتصدكني وهيج راح اخذ حقي منها
مربع منها ومن اهلها
سمعت من الناس اهلها عارضين بيتهم للبيع يردون يشيلون
بعد الفضيحه الي صارت بلمنطقه
لان صارو علج بحلوك العالم
كلها تحجي بيهم وبعرضهم
بيتهم جبير وبناء حديث يسوه مبلغ محترم
رجع صديقي يكول اختي تكول منى كاصه شعرها كصه جديده ومسويه فلر وبتوكس
عود شوفوني اني ما مهتمه لان انفصلت
بس هي بلحقيقه كل شويه تخلق مشكله ويا وحده من المدرسات وتبقى تعيط عليها
ونص البنات طلبن نقل من هاي المدرسه بسببها
ما تنجرع دمرت الطالبات دمار
اطلع كل عقدها بيهن جمانه السعيدي
قررت العب وياها بس بثكل
ماكنت ارد على صديقي واسوي نفسي متجاهل الموضوع
لان اي كلام ارد بي راح يوصلها
بعدين هي وبكل وكاحه دزتلي رساله على تليفوني
اول شي دزت صورة بنتي كبرانه وصايره تخبل
اجيت أضعف لان بنتي عزيزه عليه
منى....اسفه اكولها من كلبي محد صبر وتحملني وتحمل
تصرفاتي غيرك ضحك عليه الشيطان
انت احسن انسان التقيت بي
لو اكلك اني احبك اتصدك اني احبك واموت عليك
من ابتعدنا واني القهر ياكل بكلبي اكل
اعرف غلطي جبير بس ماكنت بوعي
اني من جنت زغيره اعاني أمراض نفسيه احب ااذي التاس القريبين مني
اهلي بمكان ما يعالحوني كانو يدافعون عني ويشجعوني على الأشياء الي اسويها هذا الشي خلاني اتمرد
واستمر ااذي الناس القريبه مني
تكدر اتسامحني
يمكن جاي اطلب منك طلب صعب
بس اني اعرف انت انسان كلبك جبير وراح تسامح وحده
متسرعه ومقهوره مثلي
وواوعدك اني مراح اعيد هذا الشي مره ثانيه
شاهين...قريت بس مارديت
لا حضرته ولا رديت عليها
هنا هي حست اني بيه مجال
مادام قريت رسالتها وسكتت يعني اكو امل ولو ضعيف
نرجع اني وياها
اني ردت ازرع هذا الشي بنفسها
ثاني يوم دزتلي فديو البنتي
منى...تقبل هاي الملاك تعيش بدون اب من اشوف جهال اخوي انقهر عليها لان كلهم عدهم اب وهي لا
لا تخلي الحقد ياكل كلبك علمود غلطه زغيره
وتخلي هاي الطفله تعيش بدون اب
فكر بيها لا تفكر بيا اني مومهم
حتلو ترجعني مربيه البنتك
شاهين...قريت ومارديت عليها اكيد لازم ابيع ثكل
حتى من اخذ حقي منها تكون مخدره وتمشي وراي
وهم مو معقول بس تحجي وياي اتواصل وياها
لان هي تعرف شخصيتي زين
بعدها بفتره اكو سيد رجال جبير معروف
اجا علينا كعدنا كلنا نسولف علي لان سوالفه حلوات
السيد...اني جاي عليكم ابو منى دزني عليكم
ترجعون بته ترا السبب مايسوه طلكونها علموده
شاهين...ابوي فتح عيونه
ابوي شلون مايسوه
طبعا السيد مافاهم السالفه
السيد...اي ولله ابوها يكول طلكوها لان يكولون باكت منا ٥٠٠ الف ويكول بتي متربيه على الخير
يجوز ايجوز هي ما ماخذتهن
ابوها يكول هي موظفه وتقبظ خير من الله راتب
شلون تبوكهم
ابوي كاله احنا ابد ماكلنا بايكتنا بس القصه هي جانت تخون زوحها ومصحابه واحد براسه
والنوب تكله ابتز عمي تقبل سيد
السيد...شلون صدك تحجي هاي المصايب كلها
شلون ابوها يكول متهمينه بايكه ٥٠٠ الف
ابوي.. ماكو هيج حجي وهاي لو تبقى اخر وحده
بلدنيا ماارجعها هاي تهجم بيوت
سيد جيتك على عيني وراسي بس هاي السالفه ماتصير
طلعنا اوراق القضيه للسيد وتخبل
كال هذا ابوها مايستحي شلون يجذب عليه
لمن طلع السيد كعدنا نفكر
ليش ابوها يكول متهميها بايكتنا وليش ٥٠٠ الف بلذات
رغم احنا الصراحه اتهمناها بلابتزاز والخيانه
بس ماكلنا باكتنا
شاهين كعدت افكر بيني وبين نفسي
ليش ابوها هيج يكووول شنو يريد يضم فضيحة بته
جمعت الفلوس الي ضاعن بيتنا خلال فترة زواجنا
الي دامت سنه و نص
لكيتهن ٥٠٠ بلضبط مثل ماكال ابوها
نزلت الابوي
شاهين...يابه الفلوس الي راحن بيتنا عدها
ابوي ...شلون
شاهين...فلوس الدوره المدرسيه وفلوس التراجي والورقة الي ضاعت منك يصيرن ٥٠٠
ابوي...اي ولله لا ياملعونه والنوب ابوها يريد يرجعها ببتنا
شاهين....كاعد يكشفون نفسهم ابدال ما يصلحون الموقف
جاي يخربون كلشي
رجع بعد كم يوم واحد ثاني اجانا استاذ هما دازينه
ابوها يكول اني مستعد اخليهم بيت وحدهم اني ادفع الإيجار بس خل يرجعها علمود بنته
ترا حتى بيتنا عرضنا للبيع
على الاقل اذا رجعها ترجعلنا كرامتنا وسمعتنا كدام الناس
ابوي كاله لا لو مو يااجر بيت
لو يبني بيت من ذهب مانرجعها شنو تندمت
فعلا ماتشوف خيري اله اجرب غيري
شنو تندمون علينا كل شويه دازين ناس خل يرجع منى
احنا اشفنا منها من يوم دخلت علينا والمصايب والمشاكل
نازله علينا مثل المطر
ابوي...روح كله احنا ماعايزين البيته عدنا خير من الله
وبته مو مال بيت وحده دايحه بلا شرف
شاهين...كل شويه دازين ناس علينا خل شاهين يرجع منى
ولله أتعجب عليهم بعد الحرب الي شنوها علينا
واخذو كلشي جايين رجعوها
كان مهم بلنسبه الهم منى ترجع حتلو يقدمون تنازلات
حتى شويه يرفعون الحرج عنهم
لان سمعتهم صارت زفت
الناس كلها تحجي بيهم وبمناطقنا هذا الكلام راح يبقى متوارث اجيال والسمعه الطيبه اذا راحت بعد ماترجع
بعد ما ايست هي وأهلها وبعد اكثر من عشر محاولات
فشلن وهم يحاولون ترجع
قررت تعيد المحاوله وياي بلكت اقتنع وارجعها
وهيج تنتصر على اهلي
لمن اني ارجعها غصبا ما عليهم
شكرا لزيارتكم عالم روايات سكيرهوم
