رواية جسر الذكريات ( كاملة جميع الفصول ) بقلم مريم الحيالي

في شتاء بغداد الحبيبه القارص 

بغداد:

طلعت من المحل متجه للبيت الجو بارد حيييل شهر الواحد وغيم مبينة اليوم تمطر امشي بشارع الرشيد 

حتى اوصل للجسر اخذ سيارة وارجع

صعدت لاف قمصلتي عليه من البرد وانفخ بايدي وافركهن انطيت الكروة للولد 

..تسلم خالي 

..يسلمك حبيب

نازل عمي يمك ...

نزلت براس شارعنا منطقتنا الاحبها صح اني منولدت ببغداد بس وعيت وكبرت اهنا اصدقائي شغلي ولد عمي كلنا نلتقي أهنا..

وصلت للبيت دخلت اتلكتني اختي ..

..الله ايساعدك دريد 

دريد:ويساعدج يارب... وين الولد

أنتظار: الصغار ويه امي بالمطبخ... والباقين جوة بالغرفه

دريد: ابويه اجه... اي اجه قبلك

اروح ابدل واغسل واجي اتعشه اذا كدرتي اتسويلي

أنتظار:تتدلل

اني الكبير بين اخواني واني اتحملت مسؤلية رغم صغر سني اعرفكم عن نفسي 

دريد ابراهيم طاقه 

من مواليد 1949

ولادتي نينوى(الموصل) اصلنا مناك وطاقة هو لقبنا لقب العائله

احنه عددنا ١١)٩ اخوة واختين اختي انتظار هي الي متحملة اكثر المسؤليه غصون بعدها صغيرة اني اتخرجت من المعهد 

واشتغل خياط بالمنطقه اخيط قوط رجالية..

حالتنا المادية نص ونص ابويه يشتغل اعمال حرة رجل متعوب وامي كل اهتمامها اتسافر كل فترة تاخذ احد من اخواني الصغار واتسافر البيت يبقى على اختي انتظار هي الي تعتني بينا وبالبيت

اني مسؤليتي هي ايكبرون الولد واحافظ عليهم خصوصا الصغار ...

دخلت للغرفه كاعد اخويه سلمت عليه وبدلت وطلعت لكيت انتظار محظرة العشه..عاشت ايدج

أنتظار: بالعافية

انتظار اختي مريضه عندها حساسية من البنسلين ودائما تتمرض واتصخن اخاف عليها من الادوية وكلش حذر عليها خصوصاً من تتمرض بعدها صغيرة وتتحمل اكثر من طاقتها..

كملت عشه ورحت نمت خليت راسي عالمخدة وتلاشت الذكرى في بالي 

اجه طيفها بمخيلتي الي بكل الوقت اني افكر بيها اليوم مشفتها جنت مشغول ومن طلعت الصبح متأخر ملحكت عليها من راحت للمدرسة

هاي السنة الاخيرة الها دانتظرها اتكمل مقرر اكمل حياتي وياها اني ادري بيها عندها مشاعر اتجاهي من نظراتها ولهفتها من لما نلتقي من بعيد

بس ماريد اخسر ثقه امها بيه ولا اريد اتصير عليها سمعه بالمنطقه اه والف اه على شوقي وحبي لها...

كمت للمسجل وطلعت اغنية العندليب 

اول مرة اتحب يا قلبي.. 

واول يوم اتهنى..

ياما على نار الحب قالولي..

ولقيتها من الجنة..

اول مرة اول مرة..

أنتظار... دريد دريد كوم راح تتأخر على شغلك الساعه ٧

دريد: اي كايم... صباح الخير

أنتظار: صباح النور كوم اتريك ويه ابويه قبل ليطلع سأل عليك

دريد: يلا بس اغسل ... كمت غسلت وبدلت الجو مطر برة اريد الحك لازم اشوفها اليوم ..صباح الخير

أبراهيم: اهلا صباح النور.. البارحة مشفتك من رجعت

دريد: اي رجعت المغرب اتعشيت وفتت نمت تعبان شلونك انت ...

أبراهيم: الحمدلله بس اسأل عليك لأن مشفتك 

دريد: تسأل عليك العافيه.. وانتي يوم شلونج شو ساكتة خيرج ؟

سعاد: دافكر اروح الخالتك بلكت نطلع للشمال على عيد نوروز..

دريد: خير ان شاء الله... باوعت على انتظار وابتسمت وغصون تفتر دايرنة بعدها صغيرونه

طلعت من البيت اتمشيت وصلت النص الفرع وطلعت.. وكفت اباوعلها اندارت عليه وضحكت اختها يمها اتجر بيدها وهي اتكلها اصبري طلعت امها بالباب مشيت اتقدمت وسلمت.. صباح الخير خاله ام غزوان عساج طيبة ان شاء الله

ام غزوان: هلا بالغالي يمة انت شلونك شو صار فترة متمر عليه

دريد: شغل والله لليل يلا ارجع من المحل ما الحك.. اباوع عليها اتباوعلي بخجل عيونها الي اتخلينيي اسرح بغير وادي..

ام غزوان: يمة شعندجن واكفات يلا روحن راح تتأخرن على مدرستجن

نبيلة: اي يوم رايحين .. مع السلامة 

دريد: الله وياكم... سلمت على ام غزوان ومشيت وراهن تمشي وتتلفت ... ههههه ابتسمت على برائتها وخجلها 

شفتها فاتت للمدرسة واني كملت طريقي للشارع اخذ سيارة اروح للمحل ... وصلت للمحل ابو غازي كاعد عالكرسي يشرب جاي عمي صباحك خير ان شاء الله

ابو غازي: سيد دريد صباحك نور شلونك وليدي.. مناوي تتزوج واتفرحنه بيك العمر يركض وانت مو صغير

دريد: ان شاء الله يابة خلي اندبر الحال ونتوكل بوقتها

ابوغازي: منتظرها مووو.. ومنو ايكول غزوان ايوافق ينطيها الك هالمتعجرف هذا 

دريد: كلشي بوقته حلو عمي ابو غازي بالصبر كلشي ينحل خلي اتكمل والله كريم 

عمي ابو غازي قريب عليه رجال من اهل الله عندة محل گبالي مال مواد غذائية وميخفه عنه شي يلگفها هي وطايرة على گولة اهلنا هههههه

نزار:صباح الخير ياب

دريد: الحبيب صباح النور وينك البارحة ماكو

نزار: يم عماد بالمعمل ملتهي شوكت تجي تشتغل ويانة احسن من شلاع گلب الخياط

دريد: مرتاح بشغلي لتخاف شوكت ما اتعب اكلك

نزار: اخبار المحبوبة.. ويباوعلي مبتسم ويغمز

دريد: بخير اذا انت بخير.. ضحك ضحكه عاليه 

واني هم ابتسمت على ابتسامته

نزار ابن عمي وصديقي المقرب اقرب الي حتى من اخواني يعرف كلشي عليه وما اضم شي عليه ابد ويشبهني حيل عبالك توأم اني ويا الفرق بيناتنا الطول هو اطول مني 

ابو علاء: دريد القاط كمل لو بعدة

دريد: وعليكم السلام اليوم هداد خيرك 

ابو علاء: لا والله انت منو يكدر ايهد عليك ابو گلب الطيب الخلوق

دريد: ضحكت .. تاكلني بلسانك الحلو دوم ..هاك عمي وهذا قاطك كامل تلبسه بالهنا ان شاء الله

ابو علاء: تسلم اناملك دريد الوردة .. يلا مع السلامة

دريد: الله وياك الحبيب.. كعدت اكمل خياط باقي الشغل العندي حتى بلكت ارجع من وقت وهم اشوفها 

مرت الايام طبيعيه بين الشغل وبين المسؤلية ومرات اشوفها ومرات لا اني شغلي نصه انطي الامي احنه هوايه ويادوب انلحك ابويه شغله اعمال حرة واني اساعدة بالبيت هم يعني الزواج به

طلعت الصبح بقيت واگف بالشارع اعاين على بيتهم مرت عشر دقائق وهي ماكو ..شنو ماعندها امتحان اليوم شو مطلعت احجي ويه روحي عاينت عالساعه صارت بال7 ونص مكدرت انتظر اكثر اتأخرت عالمحل اتمشيت للشارع وصعدت ورحت صافن من الجامة وافكر بيها ليش مراحت للامتحان اليوم شنو الي صاير .. نازل عمي نازل 

نزلت واتمشيت ابو غازي كاعد يشرب جاي نفس العادة صباحك سعيد الحبيب

ابو غازي: بس صباحك مو سعيد جنه دريد!؟

دريد: باوعت عليه اتنهدت تنهيدة من اعماق صدري..سلامتك عمي ماكو شي.. دخلت للمحل كنست القماش الي بالكاع ورتبته وشغلت الراديو على القرأن وكعدت عالمكينة اكمل الشغل الي عليه هسه يجون العالم تاخذ القوط مالتهم

مر الوقت وصارت الساعة ب٣ الظهر مدنك عالمكينة اخيط واسمع صوت مو غريب علية صوت ما انسى لو ايمر عمري كله هي اي هي ارفع راسك دريد هي الي سلمت شبيك..

نبيله: مرحبا

دريد: اعاين عليها معقولة لو داتخيل.. م م م مراحب اتفضلي

نبيلة: لا بس اجيت اني واختي للسوك القريب عليكم وكلت امر اسلم .. شلونك 

دريد: الحمدلله انتي شلونج مرحتي للامتحان اليوم.. اقصد من طلعت مصادفتكم

نبيله: بلي رحت امتحاني ب٨ طلعت قبل الوقت بربع ساعه المدرسة قريبة تعرف الحك اوصل

دريد: موفقه يارب شلونج بالامتحانات ان شاء الله ناجحه هالسنه؟؟

نبيله: ان شاء الله.. امي تسأل عليك عود مرلنه اني ارجع هسه ماريد اتأخر على اختي

دريد: سلمي على ام غزوان امرلكم عن قريب.. زيارة بيها كل الخير بقيت اعاينلها وهي اتعاينلي بعيونها التاخذني الغير عالم 

نبيله: مع السلامه..

دريد: بأمان الله ومن ثم قلبي.. راحت واني اعاين الطولها ومشيتها طلعت وكفت بالباب اعاينلها .. انداريت اشوف ابو غازي صافن عليه ويبتسم

ابو غازي: جنه القلب هود موو؟؟

دريد: ضحكت وكتلة.. مو بس القلب حتى الروح سكنت 

ابو غازي: الله يجمعكم ان شاء الله

دريد: طلعت من المحل واني الابتسامة مفارقت وجهي اليوم الي اشوفها بي هو اسعد ايامي بس لازم اسوي حل لازم الكة شغل ثابت وايخليني افتح بيت حتى اخطبها

رجعت للبيت.. فتت بس غصون ومحد بالهول اجتني غصون تركض شلتها بستها ومحمد كاعد يلعب بالعمل هوايته يجمع عمل حديدية ويلعب بيهن 

كتلة انتظار وين 

محمد: بالمطبخ اتسوي عشه 

دريد: رحتلها للمطبخ... السلام عليكم 

انتظار: وعليكم السلام همزين اجيت حتى نتعشه كلنا سوة ابويه يتأخر اليوم والولد راحو للمقهى كالو ساعه ويجون

دريد: حسيتها مو على بعضها تحجي وتشتغل متعاين عليه .. سألتها كلتلها خيرج صاير شي لعد امي وين 

انتظار: راحت هي وخالتي سلمى الشارع النهر وكالت ابقى عندهم ما اجي اليوم 

دريد: خير ان شاء الله ... الوضع نفسه ماكو داعي اعلق عليه امي اتحبنه بس ممتحملة مسؤليتنه الكاملة وابويه ملتهي بشغله كلمن ايربي نفسه بنفسه فتت بدلت وطلعت .. كعدنة نتعشه كملنه كتلها راح افوت انام تعبان 

انتظار: اخذ راحتك

صار الصبح ..رحت للمحل سويت نفس كل يومية واللتهيت بشغلي بس بالي شارد مو يمي افكر بحياتي وشلون ارتبها ويه وضع بيتنا واخواني لازم الكالي سكن لأن احنا يادوب مكفين بالبيت وشغلي هذا نصه ايروح للبيت 

وارجع واكول لها مدبر...

نزار: السلام عليكم ياب

دريد: الحبيب اليوم ماكو ولك 

نزار: هسه يلا طلعت من الشغل اذا كملت خلي نتمشي لسويسرا

دريد: ضحكت وكتله شوكت راح اتكول اسمها عدل 

نزار: اكو كهوة ايسموها هيج دسموها كهوة جبار كهوة قدوري 

دريد: مقهى السويسرية احلى المقاهي بشارع الرشيد يلا امشي بس عليك الجايات اني ما ادفع 

نزار: دمشي حتى اعشيك هم مو بس جايات

دريد: سديت المحل واتمشينة الشارع الرشيد انروح المقهى السويسرية كعدة حلوة وشياب وسوالف شحجه النظام وشكالت السياسه واوضاع البلد الى اين ... هيج امور اني ما اناقش بيها بالشارع ابداً ولا ادخل نفسي بهيج معمعه على گولة اهلنا كعدنة ونزار طلب الجايات المسجل عالي ناظم الغزالي ايغني ايا جارتا وسرحت ويا ... الحمامتي

اقول وقد ناحت بقربي حمامةً..

ايا جارتا هل تشعرين بحالي..

معاذ الهوى ما ذقت طارقة النوى..

ولا خطرت منكِ الهموم ببالي..

اتحمل محزون الفؤادِ..

على غصن نائي المسافة عالي..

ايا جارتا ما انصف الدهر بيننا..

تعالي اقاسمكِ الهموم..تعالي..

نزار: شلون بهذا الحب وين راح ايوصلك لا انت المبادر ولا هي.. دريد .. درييييد 

دريد: شبيك يمعود شكو اتعيط 

نزار: صار ساعه الغي ويه روحي وين رحت ارجع يمنه ناظم بعدة ايغني .. دريد اخطبها ام غزوان اتحبك شتنتظر بعد كبرت انت الى متى تبقى متحمل هذا العبئ

دريد: واخواني نزار ابويه وين ايلحك عالبيت وانت تدري بكلشي .. وهي بعدها صغيرة بس خلي اتكمل ولكل حادث حديث

غازي: سلااااام شباااب

نزار: هلاااااا بالساقط وين ما وين ولك ابو البنات مقضيها بالبتاوين والفضل ادري بيك 

غازي: ضحك ضحكه عاليه وگال.. نزار ليش متكعد راحه واتعوفني طلعت عليه سمعه واني لا بيها ولا عليها

نزار: امشي لك كلاوجي ابوك خطيه وحدة بالمحل لا تجي عليه ولا توصله 

غازي: عوفنة اليوم المزاج عاااالي .. ها دريد الحلوو وغمزتلة وين صافن

دريد: صافن بسوالفك المابيهن حظ ... ضحكت وشمرت عليه خاشوكة الجاي ... كلاوجي ليش متجي على ابوك اليوم يشكيلي منك شوكت اتجر عدل ولك 

غازي: عوفونة بداعت الغوالي وطلبولي جاي خلي اكعد امخمخ ويااكم ... جااااااااي 

نزار: جريته من خوانيكة وخنكته ولك الساقط وين گاعد بالسووك هيج اليطلب جاي .. ودريد خربان ضحك علينه

غازي: نزار دهدني واشوفك شلون هيج تلزمني مثل النعجه غدددار غدرتني 

نزار: غدار لو انت كول مابيك حظ الفارغ

دريد: غيرت جو ويه نزار وغازي.. غازي اكبر من عندي بس هو صاحب مزاج وكيف ابوه رجال وردة وهمه خير من الله وابوه شكد راد ايصير بي خير ورجال ماكو مفاد كل فلوسة ايذبهن عالموزينات الي ايروحلهن يومية ويه وحدة بس هو معليه بأحد ايروح ويجي بطريقه مرات يجي للمقهى ويلتقي بينا

رجعت للبيت متأخر اليوم ومو دائما هيج اتأخر والبيت ايعرفون بيه من ما اجي بالوقت يعني طالع ويه نزار.. فتت لكيت انتظار نايمة عالكرويت

خطيه كعدتها..

دريد: انتظار..انتظار.. فزت اسم الله ابويه ليش نايمه اهنا

انتظار: انتظرتك كلت خاف تجي ممتعشي 

دريد: لا يابة اكلت مو تدرين اذا ما اجي يعني ويه ابن عمج طالع.. كومي فوتي نامي جوة تصبحين على خير 

انتظار: وانت بخير

دريد: كعدت الصبح وطلعت اتمشى بالشارع احجي ويه نفسي كلت خلي امر لأم غزوان مشايفها صار فترة مشيت ولكيتها اترش بالباب .. صباحج خير حجيه

ام غزوان: هلا بدريد وين هالغيبة داده شو ماكو متمر علينه 

دريد: ابتسمت وكلتلها.. موجود بس الشغل ماخذ وقتي شلونج بناتج شلونهم ان شاء الله بخير

ام غزوان: الحمدلله زينين والله نبيلة جانت امتحانات ومنتظرة شهادتها اريدها تنجح موتتني

دريد: تنجح تنجح كولي ياالله نبيلة شاطرة .. جان اتطل عليه مثل طله الشمس بالفجرية

نبيلة: هلا دريد شلونك

دريد: زين انتي شلونج.. بشري شلونها الامتحانات

نبيلة: لا زينة ان شاء الله

دريد: ان شاء الله.. يلا اني اترخص منكم اشوفكم بخير 

ام غزوان: الله وياك وليدي سلملي على امك 

دريد: يوصل .. في امان الله .. اتمشيت صعدت بالسيارة وانطلقت الشغلي

مرت الايام عادية ومابيها شي يذكر بس يوم من الأيام كاعد بالمحل واجاني الولد الي يفتر علينه يومية الصبح الي ايجيب الجاي اجاني يركض .. كتله هاا ولك خيرر منو لاحك وراك .. كلي هاك هاي الورقه دزتها الك ابنيه واكفه عالشارع كالت ضروري اتوديها الدريد الخياط!!!

دريد: كمت من مكاني مذعور كلت يا ساتر خفت عبالي انتظار بيها شي لو متخربطه ودازيين عليه مو ببالي المحبوبة ابد.. فتحتها الورقه وجان اقرأ المكتوب بيها وبقيت صافن حتى استوعب منها لو لا بس خط ايدها اني اعرفه...

نبيلة: دريد منتظرتك بالركن مال الشارع ضروري تجي حتى احجي وياك..!!!!