رواية نهوة عمامي كامله جميع الفصول بقلم مرج البحر
اني ساره من محافظه واسط مواليد 1989 اني تسلسلي البنت الثالثه عندي خوات ثنين اكبر مني يارا ولارا واخوان ثنين سالم وسليم اصغر مني ابويه يشتغل نجار وامي ربه بيت احنه شيوخ جدي ابو ابوي الشيخ الجبير للعشيره احنه عايشين وي بيت عمي الجبير لان البيت العايشين بي اشتروه بالنص فحنه عايشين سوه عمي الجبير ما عنده خلفه فااهو مرت عمي انطوهم ابنيه وابوي انطاهم اخوي سالم سجله باسمهم وعمي ومره عمي همه الربونه وحتي احنه انصيحلهم ماما وبابا وعمي الجبير هوه يصير الشيخ ورى ما يتوفه جدي وعندي اربعه عمام واربعة عمات
احنه مستوانا المعيشي جيد اهلي كانو مدللينه ما مقصرين علينه ابد الابنيه الجابتها مرت عمي من اخوها اسمها امل هاي اختنه الرابعه والمحنه العدنه احنه الاخوات ماكو مثلها يارا اختي الجبيره مواليد 1983 واختي لارا مواليد 1986وامل بت عمي مواليد 1984 امي وابوي يصيرون ولد خاله اهل امي عايشين بغداد اني
طولي متوسط بشرتي حنطاويه خوالي اخوان امي يشبهوني بالمطربه ديانا حداد حتى من اني زغيره كلهم يصيحولي ديانا اختي يارا دكتوره تحليل هيه الوحيده البينه كملت لارا ثاني متوسط وتركت ما تحب المدرسه واني احب المدرسه وتركت مجبوره هسه راح ابدي بقصتي امل بت عمي سادس علمي وتركت من تزوجت سنة 2003 وبسنة 2004 اختي لارا الوسطانيه تزوجة ابن خال امي اسمه ميثاق ورى سنه اخو ميثاق خطب اختي يارا وجدي وعمامي قبلو وصارت الخطبه وعقدو عقد شيخ ومحكمه وقبل الزواج بشهر عمي حميد وعمي رياض نهو على يارا وهم ما عدهم ولد كبار اكبر واحد من ولد عمي حميد مواليد 1988اسمه ياسين
اني ما عرفتكم اعمامي همه اتلاثه عمي الجبير الحنه عايشين ويا اسمه عزام وعرفتو هوه ما عنده خلفه عرفتو قصته وعمي حاكم عنده ولد اثنين علي ونورس وبنيه وحده اسمها رسل وعمي حميد عنده ولد تلاثه ياسين وسيف وسامر وبنات اربعه شيما وجنان ونجلاء وايات وعمي رياض عنده بنات تلاثه وولد واحد شهد وتبارك ورقيه وفاضل وابوي اسمه فيصل عماتي حميده وماجده ووداد وروشه فعمتمي نهوه على يارا من ورى بيبيتي لان هيه تحب بناتها اكثر من ولدها
اني من جنت بالمتوسطه المدرسات كلهم يحبوني لن شاطره واني احب اسوي تعارف وي المدرسات وجنت اني مراقبت الصف ف جنت اكثر وقت اكضيه يم المدرسات بالاداره يعني جانو يكلفوني اذا عدنه امتحان اني اضبط الوضع مال الصف والغياب والحضور وغير اشياء واني جنت احب اسوي مقالب بالبنات صديقاتي مره بصف الثاني متوسط جان عدنه امتحان اجتماعيات والمدرسه دزت عليه تريد تعرف اذا اكو غياب او لا رحت للاداره ولكيت المدرسه تسولف وي غير مدرسه ف اشرتلي انتضر شويه ومن سائلتني اذا جاهزين للامتحان كلتلها نعم جاهزين وماكو غياب كالت تمام الدرس الاخير يصير الامتحان رجعت للصف البنات كلهم التمو علي يردن يعرفن اذا المدرسه انطتني المهمات بالامتحان اني ما جذبت خبر رئسن كتلهم اي كالت ذني وذني خل البنات يراجعوهن نل جايات منهن وذني تشوفيهن كل وحده ماخذه ركن ويقرن واني ميته ضحك عليهن لحد ما صار الامتحان وذني الكلت عليهن. ولا نقطه اجت منهن والبنات كلهم زعلو عليه بس لا ثاني يوم راضيتهم ومرات اذا عدنه درس رياضه اروح للام لانكليزي واخليها تاخذنه بدل الرياضه وذني البنات يضلن يتعاركن وياي بس احنه جنه شله تخبل اكثر من عشر بنات احنه سوه من الابتدائيه لحد الاعداديه بس اكثر صديقه جانت إلي اسمها هجران
اني من زغيره كلش محبوبه كرايبنا كلهم يحبوني لن شكلي محبوب يعني اليطلع لازم اني وياه ابوي ياخذني وياه للمحل خوالي اذا يجون علينا لازم اطلع وياهم وحتي اروح وياهم للبغداد وحدي من دون اهلي اهل امي كلش حنينين علينا وجنت من اروح لبيت جدي اهل امي كاظم ابن خالي يكلي انتي ناخذج لاخوي امير هو يحبج اني جنت زغير هما اقبل هيج يحجي وياي اكل لبيبي ام امي عليه وتكوم تصيح بس بعدين كمت احس امير صحيح يحبني طبعن امير ابن خالي شهاب اني وياه نفس العمر كمت من العب وي اطفال خوالي البقيه ما يقبل لو يزعل من عندي ف كمت هم احبه بس حب طفولي ما اعرف شنو بس من يزعل لو اشوفه يروح يشتري لوحده من بنات خوالي البقيه اكوم اغار ومرات اكوم ابجي ف بالعطلعه مال المدارس كام اذا احنه ما نروح للبغداد هوه يجي يمنه يخلص العطله يالله يروح بس اكثر ايامنه اني وياه نكضيها عرك وبعدين من وصلت رابع اعدادي صارت خطبة يارا وهيثم وصارت مشاكل مالها حد يوميه واحد من عمامي هاد علينا وذاك الصياح فد يوم كاعدين اهلي واني اقره بالغرفه مالتنه احنه البنات وما اسمع بس العرك والصياح من عمي حميد احنه ليش ما تنطونه نسوان مو بعينكم والله ما اخليها يارا تعرس الا اكتلها ولدي شبيهم مو زلم بس تنطون لعبد الحسين طبعن عبد الحسين يصير خال امي ابو ميثاق وهيثم وابوي وعمي عزام يدافعون بي ابوي يكله اطلع شتريد تسوي ولدك بعدهم زغار وينهن وين العرس واني بناتي تعبان عليهن وموصلهن انطيهن لولدك لا قرايه ولا كتابه ولا عمل ولا شغل ف عمي حميد كال انتم منهيين ويارا ما تمشي لو على كص ركبتي وخله وطلع بيبيتي ام ابوي هيه الخلت عمامي ينهون على مود بنات بتها ال هيه عمتي حميده تريد هيثم ياخذ وحده معدهن وهيه كايله لعبد الحسين اخوها اخذ من بنات حميده وعوف بنات فيصل وهمه قبل لا يخطبون اختي لارا خاطبينهن وما قابلات احنه عائلتنه ما تجبر البنيه لان اهلنه كلهم يصلون ويصومون فعدهم مخافت الله ال بيت عمي حميد لا صلاة ولاصوم عائله منحطه اهلي كانو مقاطعينهم حتى ما نحجي وياهم وني بالنسبه اليه جنت حتى ما اعرفهم اذا اشوفهم بالشارع ما اعرفهم البنات وولولد ف عبد الحسين كال لبيبتي بنات حميده ما قبلن بس هيه تكله لا انتم ما تردون من عدهن من شافت اخوها ما اخذ بكلامها وزت عمامي على سالفت النهوه....
سارة: وبعدين من عمي حميد وعمي رياض نهو على يارا بقت المشاكل يوميه والله بقت المشاكل اكثر من شهرين شفنه المرار بيهن وصارت الامتحانات مال اخر السنه صف رابع اعدادي واحنه المشاكل مستمره والله كمت اروح للامتحان كلشي ما قاريه اجاوب شلون ما جان واطلع واني ميت قهر على حال اختي لان شافت المرار من ورى الخطبه واستلمت النتيجه النهائيه وطلعت
واكعه بخمس دروس وشبعت بجي لان اني شاطره بس الضروف حكمت وبعدين عمام امي تدخلو بالمشاكل على اساس حتى تنحل واحد من عمام امي كال لاهلي انتم مو عدكم بعد بنيه زغيره انطوها لبيت حميد حتى يارا تتزوج وبعد مناقشات طوليه وناس تروح وناس تجي اهلي وافقو بان ينطوني لبيت عمي حميد و يارا تتزوج واني لخاطر اختي وافقت لان شبعت ضيم وقهر ومنا راح تبدي معاناتي
