رواية نعم أحببتك ( كاملة جميع الفصول ) بقلم انين الليل

احب اعرفكم بشخصيات القصه والي انا أكون أحد ا شخاصها

اسمي بثينه وانا مرحله ثانيه ترجمه أسكن بغداد مع والدي الحاج حسين ساهي ووالدتي وفيقه بابا تاجر معروف ابغداد هو 

يملك محلات قطع غيار سيارات وهو يبيع ويشتري في العقارات بابا إنسان ملتزم ومحترم 

اما امي ست الحبايب وفيقه انسانه محبوبه ومثقفه كملت آخر مرحلتين وهي متزوجه من ابوي حصلت على 

بكالوريوس رياضيات وأتوظفت مدرسه لكن بعدين قدمت استقالة على مود تتفرغ للبيت والاولاد احنه 

ورغم هي مدرسه بس ماما كانت انسانه ملتزمه بحجابها وعبايتها ما لت الراس هي وخالاتي 

3 بنات 2 اولاد أختي منال متزوجه من ابن خالي اسمه مظفر منال مدرسة فيزياء ومظفر مدرس أحياء همه 

متعينينن وعدهم طفل سمو حسين وبعدين اجي انا بثينه وانوب اخوي زين العابدين وهو ما كمل دراسه لان يساعد 

والدي بالشغل وبعدين تجي أختي منى وهي طالبة سادس هاي ما تدري بالدنيا حياتها مقتصره على دراسه وأكل ونوم 

لان تريد تطلع معدل وانوب يجي آخر العنقود بهاء وهو صف ثاني متوسط هاي عائلتنا المتواضعه 

والبقيه راح تتعرفون عليهم من خلال القصه 

خلي اوصف نفسي احم احم 

انا بيضه ورشيقه طولي تقريبا 169 عيوني كبار لونهن عسلي وجهي مدور --حلوه مو--😆😆

واحب الازياءبشكل مو طبيعي لذلك ملابسي فد شي وكله ماركات ودائما اسمع كلمات الاعجاب بلبسي 

وهم اسمع هواي حچي عن طريقة لبسي الي ما تعجب بعض الناس لكن انا مطنشتهم 

اما المكياج فانا فنانه بي يعني اعرف ارسم وجهي بحيث يكون احلى 

انا طبيعتي احب الضحك ودائما تشوفوني مبتسمه روحي رياضيه بس ساعات لا ما افوت الكلمه الي تمسني 

اردها بلحظتها بابا واثق بيه البجى ابعد الحدود وانا رغم لبسي ومكياجي بعمري ما فكرت استغل هاي الثقه 

بالعمس كنت محافظه على نفسي ودائما اسمع وصايا امي الي تگلي 

ماما تره البنيه مثل الجامه اي نفس يخلي بصمه واذا انخدشت الجامه فاحسن ان تنكسر وتنذب بالزباله ولا

تبقى بمكانها مشوهه (ست الحبايب كلامها حكم 😜😜😜)

_________________....___________........_________

اليوم الأحد دك المنبه مال النقال على الساعه سته ونص الصبح كعدت اتثاوب لان البارحه حد الساعه تلاثه وانا احجي

 ويه صديقاتي على الفيس الواتساب سوالف وضحك ما حسينه إلا الوقت راح علينه كعدت دخلت للحمام وغسلت 

وطلعت نشفت شعري مو كلش طويل جففته وبدلت وحطيت الشعري شكاله وخليت شال طبعا احنه بنات الحجي

محجبات بس انا شويه لوتيه بالحجاب يعني شال اطلع كذلتي والبس ضيك واحيانا قصير طبعا بابا يحبني فأكثر

من مرة يتشاقه يكلي لو مو محجبة هواي احسن

انا اكله ...اي والله بابا كون انزع الحجاب 

وهو يضحك//باباتي مسويه زحمه على روحج لابسه حجاب لج بابا افتهمي حرام لازم تلبسين وهاي الكذله ضميها 

انا اتقرب علي وابوسه ...هو شعري ناعم ما ينضم شسوي اذا طالعه حلوه واخبل عليك (وارمش بعيوني بسرعه )

امي //اي اي اضحكي علينه ابوساتج وكلامج الحلو حياله 

بابا//لا وفيقه بثينه مو حياله هي تحبنا بس هي شويه هي لوتيه

وصرنا نضحك انا أضم كذلتي بس هي تطلع لان ماكو دبوس يلزم الشال جان أكثر لبسي بنطلون جينز وقميص مو 

كلش طويل او تنورة قصيرة وستريج وبدي انا اروح

  ويه صديقاتي ما مئجرين خط لان تقريبا الكليه مو كلش بعيده فكان لازم نركب سياره 

واذا نأجر خط لازم نطلع من وكت وفره لذلك قررنا احنا البنات التلاثه ناجرتاكسي يوميه الدفع على وحده احنا تلث

 بنات الي بنفس المنطقه انا وهدى وماجده صديقاتي حبابات كلش وابوي يعرف اهلهن 

 كنت انا دائما اصعد بالصدر نزلت الصبح لكيت امي محضرة الريوك عه الطاوله انا سلمت عليها

 وبست خد بابا وكعدت لفيت لفة زغيرة جبن وشربت چاي امي تباوعلي 

:بثينه ماما اكعدي مثل الناس تريكي على كيفج 

=لا ماما متاخره هم يالله الحك ع البنات 

بابا /حاولي تكعدين على وكت 

وانا اسويلهم بيباي بايدي =والله كعدت بس بين مالبست يالله باي رمشن علي

وطلعت لان بيتنا داخل فرع فاا تلاكه مع هدى صديقتي براس الفرع ونمشي انوب نلتقي بماجده 

واحنه الثلاثه نأخذ تكسي يوميه على وحده الدفع وصلنه الكليه ودخلنه محاضراتنا اليوميه 

 من كمل الأستاذ المحاضرة باوع النه

الاستاذ/ (شباب بنات اكو دورة إعلام الي حابب يسجل بيها انتو تناقشوا ابيناتكم او اخذوا راي اهلكم وبعدين 

الي يحب يسجل يروح يم الشؤون ويسجل راح تستفادون منها واحنه بحاجة الى كوادر شبابيه توصل الحقيقه 

وتحاول ايجاد الحلول وتشتغل بكل شفافيه )

طبعا انا فرحت لان اريد أسجل بالدورة كنت احب الاكشن بحياتي ومخيلتي واسعه فمن طلع الأستاذ تجمعنا وظلينه

نتناقش بموضوع الدورة

 قسم كالو نتحاور مع اهلنه ونشوف رايهم وقسم گالوا ما منها فائده بس مضيعه للوقت اما انا فكنت كلش متحمسه 

وصرت اتناقش وياهم وافهمهم وجهة نظري وگتلهم احنا نهرب من الواقع وما نحاول نواجه حقيقة نفسنا 

زميلتي رفاه گالت //شلون بثينه  

يعني احنا نريد كل شي حاضر وبين ادينا ما لازم نتعب حتى نحصل علي 

ولد اسمه سيف گال //لا غلطانه الكلام شي والفعل شي اخر 

باوعتله وسألت =شلون يعني 

سيف //يعني انتي جاي تتكلمين لان انتي تقريبا كل شي عندج فلوس وبيت واذا تردين سياره يجوز ايجيبها ابوج 

فتشوفين احلامنا الي احنه نشوفها مستحيله انتي تشوفيها عاديه وممكنة التحقيق 

=لا غلطان انا من جاي اگول هاي الدوره تفيدنا اقلها نوصل اصواتنا احنا شباب مو متقاعدين او بخريف العمر 

رفاه //يعني شلون 

= يعني انت ياسيف اذا ما لگيت شغل ممكن تشتغل عامل بورشة نجاره او ورشة بناء وانتي يارفاه ممكن تتعلمين 

خياطه لكن شنو احنه بالاصل شنو عدنا ليش انت تبقى عامل ما تطور نفسك تكتب مقال توصل صوتك يعني مثلا

 واحد عنده عربانه يحمل عليها بضاعه وهو ماشي لگى فلوس وشافهن وگعن من شخص امامه طريقين يااما

ياخذهن او يرجعهن 

من يرجعهن يااما الشخص ايكافئه او يتشكره وبمل الاحوال هو سووا شي يفتخر بي 

واذا كافئه ليش يبقى بالعربانه يحاول يطور نفسه 

انا من احچي مو لان ابوي عنده وتاجر من احچي اگول فرصه انو احنه انجدد نفسنا لان هاي الدوره تاخذ جهد

 او وقت لكن ما تحملنه تعب لان بنفس المكان واكيد هي مو اجباريه لذلك الي يحب يسجل يسجل 

رفاه بضحك //وانتي اكيد راح تسجلين 

هزيت راسي وگتلها =اكييد طبعا 

سيف //عود من تصيرين مراسله احچي معاناتنا 

=ليش احچي معاناتك انت احچيها انا احچي معاناة الناس التعبانه

بعدها انا وبعض الزملاء والزميلات رحنا سجلنه وبعدين رحنه للكافتيريا

 صرنا نأكل و نسولف ومرات نعيب إذا شفنا وحده او واحد ما يعجبنا من خلص الدوام رجعنه لبيوتنا وصلت 

لكيت ماما محضرة الغدا بس الي لان منى مجرد ما تجي تتغده وتصعد للغرفه حتى ما يخرب برنامج

دراستها غرفتها انا مسميتها القلعه لان محد يوصلها وبهاء همينه متغدي ويه منى فاجيت لكيت

 بابا وزيوني توهم جايين وماما صابه انا سلمت وخليت كتبي بالصاله وغسلت اديه وكعدت وياهم ع الغدا بابا سئلني

بابا/ شلون جان دوامج  

هزيت راسي =ماشي تمام الحمد لله 

بابا /:الحمد لله المهم انتي مرتاحه بي 

زين العابدين /:والله عمي حظوظ ابويه يسال بثينه ويكلها المهم مرتاحه وانا محد بحالي 

انا مديت الساني وكتله = حبيبي زيوني شحارك كلبك ليش تغار ابوي ويحبني انت شكو 

بابا باوع الاخوي بعتب /: ها زين انا ما احبك انت دووم اكبال عيني بس هاي لان تداوم احب اطمن عليها 

ماما /:عاد ابوكم ما يفرق ابيناتكم الكل متساويين الله يخلي خيمه فوك راسنا 

انا بقيت اباوع للسكف ابوي وهو يبتسم كلي /:بثينه بابا كملي غداج وكافي تباعيين لان عرفت فقصدح 

--بابا قرا افكاري خيمه وفوك راسنا شيشيلها --😯😯😯 عاد انا من الفشله خليت راسي بالصحن

وكملنه الغدا لميت السفرة وصبيت جاي الأمي وابوي واخذته الهم للصاله وكعدت مقابيلهم 

حمحمت امي گالت //حسين استلم لازم عدها فد شي 

ابوي //شبيج وفيقه خلي نسمع شعدها ما تشوفينها شلون مفقره روحها 

امي //اكيد فد طلب فلوس فد شي الله يستر 

باوعت الامي وانا مبرطمه ==ماما ليش دووم ظالمتني چنج الي ابالي 

امي //گولي احبيبه انسمعچ

=احح اليوم بالكليه فتحو دورة إعلام والاستاذ كال تفيدكم سجلو بيها واني سجلت 

ابوي سكت وامي كالت/: شلج بالدورة هسه انتي ملحكه على دراستج يالله دوره شنو عوزج تعب

بابا رد عليها //وفيقه مو تكول تفيدها خليها تسجل ما دام بنفس الكليه وما ياثر على دوامها 

ماما//يمعود هي من دخلت ترجمه شكد حجو عمامها وحتى خالها محسن ما قبل لو نسيت

كلهم كالو ليش ترجمه وخلي تروح تربيه تطلع مدرسه احسن 

بابا/ /وهسه هي داومت ترجمه وخلص محد اله شغل بيها 

باوعت الامي =وهمه عمامي وخالي محسن شلهم شغل بس يتدخلون اشو احنا ولا فد يوم اتدخلنه بيهم 

 بس ناس عدها حب استطلاع ولازم تترك بصمه عبالك مسؤولين عنا (وهزيت ايدي )والله يا الله 

ماما/:ولج شنو هالحجي مو عيب 

رديت =عليمن عيب اشو بناتهم بكيفهم ولا فد يوم اتدخلنه باحد بس حد الواجب لكن ابوي الله يسلمه منطيهم

اكثر من اهميتهم 

الأم //اسكتي بثينه كافي مو سجلتي وأبوج وافق هذا هوبلا كلام زايد 

بابا بهدوء /:تره انا من اسمح الاحد يبدي وجهة نظره مو معناتها راح اخذ بيها وهاي انتو شفتو 

من قدمت بثينه وظلو يحجون انا راسا بايدي اخذتها وقدمت الكليه الي تريدها يعني

 بين قوسين انا المسؤول عن عائلتي ومن اسمع راي شخص بكيفي اريد اخذ بي او ارفضه وتدرون بيه ما 

احب افشل الواحد خصوصا اذا بيتي 

انا صرت اصفك واكول =هيي يعيش بابا يعيش بابا يعيش يعيش يعيش 

زيوني جان بالحديقه يمكن يخابر شافني كلي /:هاي شبيج بثينه تعيطين عبالك كاليميرو ومن يصيح يعيش بابا

وصرنا نضحك صعدت الغرفتي بعد أن غسلت المواعين وانا ادردم على امي لان رفضت ابوي يجيب الها وحده

 تساعدها بالبيت تگله ما عندي شي فانا عليه اغسل مواعين الغدا وارتب المطبخ واساعد بالعشا وماما عليها الباقي 

نظفت المطبخ نمت وكعدت قريب المغرب لكيت امي كاعده تسوي قالب كيك 

سلمت عليها وطلعت تفاحه من الثلاجه واكلتها هنا امي باوعتلي وحچت 

:شوفي ماما بثينه اخاف اليوم يجونه بيت عمج ابو محمد لا تكولين سجلت دورة إعلام 

انتي تعرفين مرت عمج كريمه تظل تقلد وتحجي وهي بالأساس السانها طويل وشلون تحبنا

عمي اسمه صابر وهو صدك صابر عمي عنده اربع اولاد وبنيه محمد ابنه الجبير متزوج بت عمي عباس اسمها رغد

هي حبابه كلش وهمه أساسا تزوجوا على حب لذلك هي متحمله كل شي الخاطره

مرت عمي اسمها كريمه انا اسميها القوه الغاشمه لان هي المسيطرة على عمي وهي( شرير بيت عمي )

وبعدين يجي ابن عمي الثاني إياد وهو نقيب بوزارة الداخليه اكبر مني تقريبا بسبع سنوات وهذا 

يسمونه السبع على اساس ما يخاف من اكبر واحد همه يكولوني شمدريني اني لان بصراحه انا مسثقله دمه ماخذ الامور 

بجديه اكثر من اللازم ودائما يدخن ومن يگعد رجله دائما يضربها بالگاع عمي خطبني اله بس انا رافضه التفكير

 بموضوع الزواج وانوب عمي ما لگى اله اياد الي ما اطيقه وما اشوفه ع الصراط المستقيم رغم اي شي ما مسويلي

 بالعكس دائما يسالني اذا محتاجه شي او اريد شغله على اساس يجيبها الي 

وانوب يجي يوسف متزوج بنيه غريبة ماتحملت مرت عمي عزل بيها وهو يشتغل ويه بابا 

والرابع رياض طالب كليه مرحله ثالثه قانون ويريد يخطب بنيه ويا بالكليه وهذا يمته ما تجونه

 يتشاقى ويضحك ويحشش

وانوب ساهرة معلمه وما تداوم لان ماكو وظايف ساهره اكبر من رياض يعني تجي وره يوسف هي حبابه 

ومؤدبه انا احس مرت عمي مسيطره عليها كل ما يجونه بيت عمي لازم تنتهي جيتهم بزعل لان

 مرت عمي ما تحب امي وانوب ابنها خطبني ورفضت فام محمد (القوه الغاشمه )عافت امي وكرهه 

ودارت علي جنت أشوف الحقد بعيونها ودها تفترسني لان هي بالأساس ما تريدني لكن

 على أعصابها همه يجون يشوفون ابوي وبصراحه دائما أشوف ابوي يدخل للديوانيه 

او غرفة الضيوف شتسمونها سموها واشوفه يطلع العمي فلوس بدون محد يدري ويحطهن

 بجيب عمي بعد هذني مساعده من ابوي إلاخو الله اعلم وهمه بيت عمي ما عايزين 

،،انا من سمعت حتى لوني تغير لان ما احبهم يجونه ما احب مرت عمي كريمه ثكيله ع المعده 

ولا أحب ضيمي إياد مجرد اسمع باسمه تنكلب معدتي مع العلم هو مؤدب وياي وما يتجاوز 

بس ما أحبه مو بيدي احسه ما ينهضم 

انا بين علي التوتر حجيت = اووف هسه ذول كل يومين وجاييينه شعدهم

ماما //بثينه عيب شنو هالحجي انتي تعرفين علاقة ابوج ويه اخوانه شلونها كل شي يتقبل من عدنا بس يشوفنا

 نضوج من يجون اهله هاي ما يقبلها 

= اي انا الاعرف ابوي يموت على اخوانه لو يطلبون واحد من ولده ما يبخل عليهم 

ماما /:اذا تعرفين شنو هالحجي الماضخ 

= ماما ياماصخ ما تشوفين عمه كريمه شكد تكرهنا ومن تجي عبالك مانه علينه لو احنا مودين عليها 

ماما //خليها تكرهنا تأخذ ذنوبنا بعدين هي ساعه يجوون ويرحون

=همه من يجون تكولين مو ساعه لا دكولي سنه 

ماما/:بس لو ادري ليش ما تحبيهم نسيتي لمن هذا الي اشترا من ابوج بضاعه ومن طالبه بالفلوس اتعارك ويا 

شفتي يوسف شنو سووا لومحمد ضربه للرجال جنزه ومن هدوا علينه وسمع اياد شفتي شنو سووا راح الهم ابحده 

للبيت ولعب بيهم جوله وحتى ما لبس ملابسه مال الشرطه راح الهم مدني وحتى ضربوا بايده بسچين 

= ماما عمي صابر اموت علي طيب وهادي وحتى ولده وساهره تخبل بس هاي القوه الغاشمه الحيه السايبه 

محراك الشر بالعالم المدعوه كريمه 

ماما تضحك /:وج لا تسمعج تدرين شتسوي 

= شتسوي خلي تسوي ما تشوفين يوسف شرد بليله سوده من تصرفاتها ويه مرته 

ماما /:لا بثينه لا تخلين ابختج هي مرت يوسف متكبره وشايفه روحها وعرفت بي يحبها واستغلته 

 =ليش ماما هو الي يطلع ويستقل بحياته تسمونه مرته مستغلته الله عليج هي كرمرم تنحمل تجرع زرنيخ 

ماما/:الي يريد يستقل بحياته لازم مامن مستقبله بربج لو ما ابوج مشغل عده يوسف ما تكليلي منين يجيب اجار 

ولبس واكل وعيني هي شلون فيكه ودلوعه ليش من قبلت تاخذ يوسف ما شرطت اريد بيت بس هي شافته يحبها

واستغلته وطلبات ودلاعه وهو وراها شتگول صار 

=بس المهم افتكت من كريمه وكسرت شوكتها وبعدين منو ما يخاف من مرته ما تشوفين عمي صابر شلوناته ما يفك 

حلگه وياها لا هو ولا ولدها خو اياد همبله ع الفاضي 

ماما /:منو هاي الي انكسرت شوكتها كريمه ولا عشره مثل مرت يوسف يكسرنها وانتي گلتيها مسيطره ع الچبير گبل الزغير 

= لعد من اكول محراك الشر بالعالم ما تقبلين 

ماما/:اويلي منج ولج اكلج عوفيها ليش ما تاخذين الحجي 

= ماما انتي ما شايفتها كل ما تجي تبدي هجومها عاد انا اباغتها بهجوم مفاجئ اخلي وجهه فالت 

ماما /:وبعدين يبدي ابوج لو يحجي عليج لو يحجي عليه انا حمالة اسيه 

= شسويلج ما تخليني احجي بس لو تنطيني مجال اويلي انسيها عيد ميلادها 

وصرنا نضحك انا وامي