رواية اشتغالة الفصل الاول بقلم ليل ادم
الأم: ( دخله بتصوت ) يالهووووي قوم يا مدهول كتك البلا في خلفتك العار
زين : (مخضوض) اي ياما في حد يصحي حد كده
الأم: خالك محروس مات قوم روح شغلك هتتأخر
زين : (نظره مطوله بيحاول يفهم هيا عايزه يروح الشغل ولا يروح العزاء )
الأم: قوم يابن الموكوسه خليني الحق الخشبه
زين : خشبه اي ياما هو مسرح
الأم: خشبه خالك محروس يا ابن الجزمه
زين : لحظه بس مين خالي محروس اللي ظهر فجأة ده هو انتي مش وحيده معندكيش اخوات
الأم: ياض خالك محروس ابو منال اللي على أول الشارع
زين : عليه النعمه الرهاب الاجتماعي يخاف منك وسعي وقعتي قلبي يا شيخه
الأم: والله ما انت نافع ابقى تف على وشي
زين : ياست الكل روحي الحقي الخشبه ملكيش دعوه بيا بقا بعدين هيا الساعه كام
الأم: عشره وربع
زين : ينهار اسود هو أنا مش قولت معادي في الشغل تسعه
الأم: اعملك اي عمك محروس بيفرفر من الساعه سبعه ونص
زين : وعهد الله ما حد هيفرفر غيري وسعي خليني اقلع
الأم: مكسوف مني يا لوح ياض دا انا
زين : (قطع كلام الأم) عارف عارف كنتي بتحميني و كنت بعملها على رجلك وياما كنتي بتديني البتاعه خلاص بقا
الأم: بتاعه مكسوف تقول اللبوسه يابن المنكوبه
زين: طب اي الخشبه مش هتلحقي كده تصوتي لحد ما تشبعي ياله بقا
الأم: يالهوي صحيح سلام اشوفك بليل يا ابن الهبله يالهووووووووووووي
زين : عليها حنجره بسم الله ماشاء الله يعني لو موت مش هشيل هم حاجه هتصوت عليا صوت هطلع ترند والله (ونزل زين على شغله )
زين : صباح الفل يا ابو جوده يا حلو
جوده : ياعم مكنتش جيت دا البريك فاضل عليه نص ساعة
زين : ياعم يخربيتك قفلت اليوم اللي يشوفك وانت بتقولي مكنتش جيت يقول انها شركه ابوك مش مجرد كلب ذليل عويل في الشركه
جوده : الله يسامحك ياعم مش هرد عليك علشان صايم
زين : لا طالما صائم يبقا حقك عليا راسك أبوسها
جوده : حبيبي خلاص والله مسامحك
زين : اكيد
جوده : اكيد
عم محمد بتاع البوفيه : النسكافيه بتاعك يا استاذ جوده
زين : انت صايم لحد الضهر ولا بتخترع دين جديد
اسماء: سيبك منه يا زين هو كل يوم يقولك أنا صايم و علي الضهر يفطر
زين : اه والله عندك حق يا سمسومه إلا صحيح الورق اللي أديتهولك امبارح فنشتيه مش كده
اسماء: خد اهو بس بالله عليك بقا بلاش تعملها تاني أنا سهرت للصبح شغاله عليه
زين : أشوفك اكبر محاسبه في المكتب
عم محمد: زين مدام كاميليا كانت عايزاك في مكتبها
زين : في مكتبها كده يبقا هتمسح بيا الأرض بعد اذنكم
في جانب آخر
كاميليا: ادخل
زين : صباح الورد
كاميليا: لسه جاي صح
زين : أنا لا طبعاً أنا هنا من النجمه
كاميليا: خف كدب يا زين جوده كان هنا وقالي انت لسه موصلتش أنا عايزه افهم هتلتزم امتا أنا صاحبه الشركة بكون على مكتبي الساعه تسعه انت بتوصل من عشره الي مالا نهايه اعمل معاك اي خصم وكده كده كل اخر شهر مبيكنش ليك مرتب اعمل فيك اي تاني
زين : أنا مكنتش عايز اتكلم بس طالما جوده قال إني لسه موصلتش وطلع قليل الأصل ف وربنا ل أقول كل حاجه
كاميليا: قول
زين: جوده معموله عمل وطلب مني اروح ل شيخ كبير عندنا مشهور يشوف الموضوع ده
كاميليا: ايوه الكلام ده اي علاقته انك تيجي متأخر
زين : هقولك منا جاي في الكلام معاكي اهو
كاميليا: قول
زين : وصلنا لفين
كاميليا: الشيخ الكبير اللي عندك
زين : الله يفتح عليكي يا فندم المهم الشيخ ده بيكون متواجد الساعه تسعه ونص الصبح أنا روحت قعدت معاه اتكلمت عن جوده طلع الواد يعيني مأذي جدا جدا
كاميليا: والله
زين : تخيلي المتخلف بيرمي مياه سخنه في الحمام
كاميليا: بتتكلم بجد
زين : هيا دي فيها هزار أبعتي هاتي جوده قصادي لو راجل ينكر كلامي
كاميليا: لالالا بخاف أنا من الحاجات دي
زين : منا عارف أتفضلي ورق المناقصه اللي طلبتيه مني امبارح
كاميليا: اي ده خلصته امتا برافو عليك والله
زين : سهران عليه لحد الصبح شغل موت حقيقي يابختكم بيا
كاميليا: برافو عليك لجل الورق ده مفيش خصومات النهارده اي خدمه
زين : ربنا يعمر بيتكم والله بعد اذن حضرتك
كاميليا: اتفضل
زين : (بعد الخروج من مكتب كاميليا تليفونه رن )
زين : ست الكل اللي دفنت نص المنطقه عامله اي
الأم: والله ليله زاي العسل النعش كان طاير تقولش مات في البقيع
زين : ياما دا المنطقة كلها بتقول أنه مات بيشرب
الأم: يخربيتك قلبك جاحد الراجل مات ياللي اشوفك متسلسل
زين : هو أنا قرد ياما اي متسلسل دي
الأم: عندي ليك خبر حلو
زين : انتي ياما عندك خبر حلو ليه كفا الله الشر القيامة هتقوم بكره ولا اي
الأم: مش بقولك محدش عرف يربيك
زين : قولي ياما الخبر الحلو
الأم: ابوك راجع من السعوديه وجاب ليك هديه حلوه اوي
زين : يبقا ايفون اكيد ايوه بقا هيا دي الأخبار ولا بلاش
الأم: ربنا يخليه لينا والله لو مجبش حاجه كفايه جه بخير
زين : طبعاً ياست الكل طبعاً
كامل بيه : زين تعالي اقولك
زين : معلش يا ست الكل سلام الوقتي
الأم: ماشي بس وانت جاي هات معاك فينو وهات كابوتشه
زين : اي البكوتشه
الأم: بكوتشه اي يابن الهبله بقولك كبوتشه الخسايه المدوره دي اللي شبه دماغك
زين : اه عرفتها شكلك مروقه علينا النهارده
الأم: هبسطك ياض
زين : طب سلام علشان الراجل عايزني
الأم: سلام
كامل بيه : ادخل
زين : مساء الورد يا مدير
كامل بيه: من الصبح عمال اسأل عليك هو انت مينفعش تيجي بدري
زين : يا كامل بيه أنا مقدرش ابيع جوده
كامل بيه : ياريتك نص جوده بقاله سبع سنين معانا مفيش يوم عنده تأخير دقيقه واحده
زين : يابيه بقولك مأذي جامد علشان كده مش عارف يعيش في بيته و النهارده كنت عند الشيخ بحل معاه
كامل بيه : والله
زين : وروح هات المصحف زاي ما بقولك كده والحمد لله ايام بسيطة و يبقا زاي الفل
كامل بيه: ماشي يا اخويا خود بقا الورق ده روح عند الدكتورة فاطمة علشان تراجع معاها أيداعات السنه اللي فاتت
زين : ما بلاش دكتوره فاطمه والنبي يا كامل بيه دي مجنونه بطلع عيني
كامل : ياله يا حبيبي مش هنختار الشغل
زين : لا طبعاً يا مدير الشغل شغل بعد اذنك
كامل : اتفضل
بعد خروج زين من مكتب كامل بيه راح مكتب المحاسبة
زين: جوده حبيبي انت لازم تشوف حل علشان الشركه كلها بتتكلم عنك
جوده : ليه انا عملت اي بس
زين : كاميليا هانم و كامل بيه سألوني أن كان جوده اتجنن ولا اي
جوده : (بقلق )ليه هو أنا عملت حاجه
زين : علشان كل يوم تصوم لحد الضهر بس أنا قولتلهم أن الشيخ نصحك تعمل كده علشان انت مش مرتاح
جوده : يعني اي مش مرتاح يا زين
زين : يعني البيت عندك مش كويس يا حبيبي
جوده : اه جدع ماشي
زين : لو حد سألك بقا انت مالك يا جوده هتقول اي
جوده: هقول مش مرتاح
زين : جدع اوعى تقول صايم
جوده: لا ياعم هو أنا مجنون
زين : جدع سلام أنا بقا
جوده: رايح فين
زين : مفيش يا سيدي كامل بيه مثر اخد النهارده اجازه اريح فيها اعصابي
اسماء: اشمعنا احنا أن شاء الله
زين : هتربطي حمارتك جمب حماره ابن العمده
اسماء: يعني هيا كده
زين : انتي زعلتي خلاص والله لو عايزه تخديها مكاني معنديش مانع بس تعدي على الجيزه في سكتك تدي الورق ده ل بوب العماره اللي هقولك عليها وروحي بقا كملي اليوم في البيت
اسماء: بجد يا زين
زين : طبعاً ياست البنات دا انتي اختي يا عبيطه
اسماء: وانت اجدع و احن أخ
زين : ياله بقا على كامل بيه قوليلوا الكلام اللي هقولك عليه بالحرف اوعي تزودي حاجه
اسماء: لا طبعاً هو أنا هبله
زين : لا منا عارف
اسماء: اقوله اي
زين : قوليله بعد اذنك يا مستر كامل أنا خدت الورق من زين علشان أنا عندي شغل في الجيزه كده كده
اسماء: خلاص ماشي بس استنا ممكن يسألني عند مين في الجيزه
زين : ياستي قولي اي إسم
اسماء: لالا مينفعش لازم نجيب اسم عميل من الجيزه دا مش بيسكت انت عارفه
زين : ايوه افتكرت قوليلوا عندي شغل في الجيزه عند الدكتورة فاطمة
اسماء: هيا الدكتورة فاطمة في الجيزه
زين : اه منا افتكرت علشان روحت هناك قبل كده
اسماء: بس المشكلة اني عندي شغل كتير اوي
زين : و أخوكي زين راح فين روحي يا قلب اخوكي أنا هعمل كل حاجه انتي أنبسطي أعتبري نفسك في الصيف صايد
اسماء: هعيط وربنا
زين : لا مش وقته بقا عيطي لما تروحي البيت بالسلامة
اسماء: أول ما اوصل الجيزه هتصل بيك اخد العنوان
زين : لا وريني كده الملف اللي معاكي
اسماء: اهو
زين : ( حط ايده في مكتبه وكأنه بيطلع حاجه مهما وحطها جوه الملف ) الورقه دي فيها اسم الدكتورة فاطمة والعنوان وكل حاجه اي خدمه
اسماء: بجد وكتاب الله انت إنسان
زين : وانتي بنت حلال في رعايه الله
اسماء: سلام
جوده : بقا حد ياخد اجازه ويسيبها دا انت غبي
زين : كل ده علشان حنين أبقا عبيط يارب أجعلني عبيط على طول في عيون الناس
جوده : ياعم خلاص متزعلش حقك عليا
زين : ياض أنا مش زعلان أنا أصلي المفروض النهارده كانت رايح عند الدكتور ربك يسترها شكلي عندي مشكله كبيره علشان كده كنت هاخد الاجازه
جوده: ينهار ابيض يا زين يعني بدال ما تروح للدكتور تقوم تدي الاجازه ل اسماء
زين : اعمل اي يا جوده قلبي بيوجعني عليكم اكنكم أخوتي
جوده: ربنا يخلينا لبعض يارب يا حبيبي
زين : ( عمل نفسه بيقع وساند على المكتب )
جوده : زين انت كويس
زين : لولا الشغل اللي خدته من اسماء كنت مشيت والله يا جوده يا اخويا
جوده : ياعم والله معنديش حاجة أعملها هات الشغل عنك يا حبيبي
زين : لالالا أنا كده تقلت عليك اوي يا حبيب اخوك انت برضوه اكيد عندك ارتبطت
جوده : طب وعهد الله ما حد عامل الشغل ده غيري عيب عليك يا زين
زين: ياااااااااه بتحلف ليه بس يا جوده حرام عليك يا اخي أمسك ياعم جوده زعلتني جدا جدا
جوده : ياعم والله انت اخويا
زين : بجد مش عارف اقولك اي الساعه معاك كام
جوده : ١٢ وربع
زين : ياه ميعاد الدكتور
جوده : روح يا باشا واي حد هيسأل عنك هعمله اي حوار
زين : بجد يا جوده
جوده: طبعاً بجد
زين : ربنا يخليك ليا يا اخويا مش عارف اقولك اي في رعايه الله
جوده : طمني عليك يا زين بالله عليك
زين : حاضر يا حبيبي مع السلامه
جوده: سلام
زين بعد ما نزل من الشركه : الهي تولع بيكم شويه نصابين محدش فيكم يعرف ربنا اروح اجيب الفينو والحق ارجع أدلع الكرش
