رواية نصف عذراء الفصل العاشر بقلم جمانه السعيدي
فهد....كملي بعد شضامه عليه كولي
فاطمه....راح احجيلك كلشي ومراح اضم عليك اي شي لان خلاص اني بعد ما اكدر اتحمل عايشه طول الوقت بقلق
اريد ارتاح
من وصلت صف سادس وشيماء صف ثاني متوسط
بيوم تعاركنا اني وياها عركه قويه علمود دفتر
هاي العركه غيرت قدري وضيعتني
فهد...ليش شصار
فاطمه تعاركنا واختى دفعتي و ضربتني جلاق كلش قوي طبعا احنا متعودين نتعارك بس هلمره العركه جانت غير
حسيت شي قوي اذاني من جوه
احجي ودموعي كامن ينزلن لان هيج موضوع صعب ينحجي
سكتت شويه
فهد...كملي ليش سكتي
كعدت بلكاع وهي مستمره تضربني حسيت شي وكع عليه
دنكت شفت دم واكع عليه بس مو هواي تقريبا مقدار خاشوكه اكل
كمت اصرخ من الخوف وهي عباله اصرخ من الضرب
كمت اصيح ولج كافي وكع عليه دم
عافتني وشافت الدم يله بطلت تضربني
شويه واجت امي تعبانه ومهدود حيلها
جمانه السعيدي
اني لاكيتها وكتلها
فاطمه...يمه الحكيلي شيماء ضربتني جلاق ووكع دم عليه مدري منيين
امي راسا نزعتني ملابسي الداخليه وفحصتني مامجروحه ابد بس حسيته حيل خايفه من الي صار
طبعا اني بهذا العمر ما اعرف شنو غشاء بكاره
كنت اعتقد انجرحت بس تعابير وجه امي جانت تكول غير شي
راسا كالت بدلي ملابسج خل اخذج للمستشفى
واني راح اصيح ام جاسم تروح ويانه
اني بدلت شويه ورجعت امي
جان امبين عليها التعب حتى ماي ماشربت
وصلنا للمستشفى ودخلنا على الدكتوره
وامي حجت الي صار
والدكتوره رجعت سئلتني واني حجيت كلشي صار الها
ماكنت اعرف سبب خوفهم لان اني ماكنت احس بوجع قوي
والدم توقف اني مايوكع عليه دم ابد
الدكتوره صعدتني على السديه وفحصتني على الخفيف
كنت كلش خجلانه
بعدين عافتني وكعدت تشرح الامي على وضعي
الدكتوره....عيني اني لازم اكولج الحقيقه وانتي لازم تتعاملين ويه الموقف بهدوء اعصاب
غشاء البكاره مفتوح بنسبة ٢٠ من ١٠٠ والدم الي واكع منها هذا دم البكاره
بهاي اللحظه امي لطمت على خدودها وكعدت على الكرسي
واني مثل الاطرش بلزفه
لا اعرف شنو غشاء بكاره ولا اعرف امي ليش خايفه
كامت ام جاسم تهدء بيها
بدت الدكتوره تشرح الامي الي صار
اني جنت حيل منتبهه الكلام الدكتوره لان اريد اعرف امي ليش هيج خايفه
جمانه السعيدي
الدكتوره....اني هسه راح افهمج غشاء البكاره انواع اكو نوع قوي ومطاط وهذا بصعوبه يله ينفض
اواكو وسط واكو غشاء رقيق
بنتج من النوع الي غشاءها رقيق
وبما ان غشاء البكاره يبعد ٣سم فقط فالضربه اجت قويه
والهوى الي انحبس داخلها فتح هذاالغشاء
بس فتحه زغيره
امي...زين دكتوره فدوه يرجع يلتحم
الدكتوره....ولله علميا مامار بينه هيج شي ابد
يعني ما اعرف بمرور الزمن راح يرجع يلتحم لو لا
امي...شلون دكتوره منو راح يصدك هذا الكلام عمامها شرانيين واكيد مراح يصدكون بيه
الدكتوره...اني...راح واكتبلج تقرير يثبت براءة بنتج
ونخلي شهود اثنيين عله هذا التقرير
اكثر من هيج شي ما اكدر اسوي
جمانه السعيدي
امي حضنتني وبدت تبجي
ساعته عرفت اني صارت وياي شغله موزينه بس ماكاعد اعرف شني هيه
ام جاسم...استهدي بلرحمن وكولي يالله
الكل يعرف بيج شكد شريفه وبناتج عليج طالعات والدكتوره راح تكتبلج تقرير
امي...شلون ضاعت بتي
ام جاسم...لا ماضاعت الدكتوره راح تكتب تقرير يثبت حالتها لاتخافين كولي يالله
الدكتوره كتبت التقرير وجابت اثنيين واحد دكتور وواحد معاون شرحتلهم الحاله وشهدو على التقرير
ورجعنا للبيت بس امي جانت حيل مكسوره
مرت الايام وجنت اشوف الحزن والحسره بعين امي كلما تشوفني
وخاصتا اني كلش متفوقه بدراستي
بصف ثاني متوسط زاد حزن امي لان اختي طلعت مريضه
بدت تطلع بجسم اختي اكزمه وامي ماخلت علاج ما اخذته الها بس بدون فايده
سنه كامله تعالج بيها وبدون فايده
اخذته اكثر من دكتور ومفاد
امي كانت تبجي وتدعي هواي
ياربي بناتي اثنيينهن
راح يضيعن من ايدي هاي اكزمه وماكو علاج ماجربته
وذيج ضاعت على سبب تافه
نجحت من الثالث متوسط ودرجاتي كلش عاليه
وشيماء نجحت للسادس اعدادي
ساعته ام جاسم جابت النا عنوان دكتور زين داخل بغداد
امي جمعت كل فلس عدها واخذت شيماء وراحت
الدكتور جان كلش غالي
وحتى علاجه هم غالي بس امي جان همه وحده من عدنا
يصيرله حل مو اثنيينه نضيع منها
بيومها عافتني ابيت ام جاسم وراحت الصبح وكالت ارجع العصر بس يكشف عليها الدكتور واجيب العلاج واجي
بس امي بيومها ما رجعت ابد هذا اليوم كان اخر يوم اشوف بي امي واختي
صار حادث للسياره وكل الركاب بيومها والسايق وامي واختي ماتو
من الصدمه بقيت ساكته حتى صريخ ماصرخت
الصدمه كانت عليه جبيره
اني ضعت بعد ماعندي اهل ولاعندي سند بهاي الحياة
اهلي كلهم ماتو
بقيت طول ايام الفاتحه واني بس اباوع بعيوني لا احجي ولا ابجي
اتعب من الكعده واتمدد بنفس مكاني وانام
حتى الاكل ما اشتهي ابد
جمانه السعيدي
خلصت الفاتحه واخذني عمي ويا البيتهم
ما اخذت بس ملابسي من البيت وكلشي بقه بمكانه
ماكدرت اتعايش وياهم احسهم من عالم ثاني مايشبهني ابد
همج وتصرفاتهم برعونيه على خبال
اصعب ايام حياتي جانت ذيج الايام
لازم انفذ كل الاوامر واني ساكته
اي غلطه اغلطه انضرب ومن دون رحمه
حتى عمي ماكسرت خاطره وكان يضربني
وتعامله وياي خل الكل يستحقرني ويضربني
وبمرور الايام تحولت الى خدامه تشتغل طول النهار وهي ساكته بدون كلام
ولان ماعندي سند ولا احد يدافع عني
كنت اتحمل جميع الاهاين واني ساكته
اني الي جنت مدلله كمت اعجن واخبز كل يوم
كل يوم لازم اعجن معجامه شكبرها واخبزها
واطبخ واغسل ملابس بايدي
بطلوني من المدرسه شكد توسلت بعمي وكتله كل الشغل اخلصه بسلا تحرمني من المدرسه وابد ماقبل
طبعا زوجته كانت تحرضه عليه
عدهم اربع بنات وولد واحد زغير
عشت عدهم سنتين ونص بس عيشت الذل والمهانه
رحت بيهن مرتين البيتنا وبلمرتين ياخذني عمي ويضل واكف على راسي
شكد دوت على التقرير بس ما حصلته ابد
بس لكيت فلوس كلش قليلات لان امي بيومها اخذت كل الفلوس وراحت للطبيب
كلما اكبر اخاف اكثر اخاف يجي اليوم الي يعرفون ومايرحموني ابد
المصيبه الجبيره اجا عمي الثاني يخطبني الابنه
ابنه واحد تافه ومطيرجي ولا شغل ولاعمل
موهنا المصيبه المصيبه
عمامي كعدووو يتساومون عليه
عمي الجبير اتفق ويه عمي الثاني يقسمون الكاع بلنص
بينهم يله يوافق على هاي الزواجه
اثنيينهم طمعانيين بلكاع واني مو مهم مصيري شنووو
قررت اروح اجيب التقرير بلكت الله يهديهم ويقتنعون
تحججت اريد شغلات من بيتنا
اخذني عمي وبقه واكف على راسي
شكد دورت وكلبت البيت وماكوووو
حتى هو شك بيه
شدورين يله بسرعه راح الوكت عليه
رجعت واني انتضر أواجه اسوء مصير
اكيد هذا الارعن راح يذبحني ومراح يصدكني ابد
