رواية مليكه الفصل العاشر بقلم جمانه السعيدي
مليكه ...ذني اليومين ابد ماشفت سند مشغول بلتدريب
ويجهز نفسه للبطوله
يطلع من الصبح ومايرجع اله ١٢ بليل
مرات اشوفه ومرات لا
كنت ادعيله من كل كلبي الله يسعده وينصره
اذا فاز بهذا الدوري
يتئهل يمثل العراق بلدوري العربي
يستاهل كل خير
يوم الاحد كان الموعد نروح للتسجيل العقاري
كعدنا الصبح اني وهاجر ونورهان وحمودي كوه كعد
تريكنا وبدلنا وبقينا ننتضر مكالمه من ضياء
الساعه بلتسعه اتصل على هاجر وكال تعالو للتسجيل العقاري
اخذتنا هاجر بسيارته
كانت ساكته وابد ماعلقت على اي شي
اني هم ساكته مااحتك بيه
اني مااطيقه وهي ماطايقني
المهم...ضياء يروح منا ويرجع منا بعدين كال تعالو هنا
دخلنا بغرفه بيه موضف
كال كلكم موجودين علمود التوقيع
ضياء ...من رخصتك اخذ الأوراق منه ورتبهن
اول ورقه عليه اسم هاجر
ضياء...هاي الورقه هاجر توقع عليه
تقدمت هاجر ووقعت رتب الورق وطلع الورقه الي بعدها
الورقه الثانيه عليه اسم محمد
ضياء...يله محمد تعال تقدم محمد ووقع هم رجع يرتب بلاوراق
ضياء...هاي الورقه باسم مليكه يله مليكه
مليكه...ثنيينهم ووقع كدامي بدون مايقرون مو معقوله اني اكلهم اكوفو خل اقرا
قريت اول سطرين كانن كتابه عاديه
المواطنه مليكه مصطفى شمران العمر ١٩ اسم الام
يعني كتابه عاديه ماحسيت شي يخوف
اخذها مني ضياء وخلاها فوك باقي الاوراق ووقعت
بعدين نورهان ووقعت
ضياء..هاي هي ارجعو للبيت منا لمن نحتاجكم مره ثانيه
رجعنا للبيت مر هذا اليوم جدا عادي
خابرت جدي وبيبي حجيت وياهم ولكيت نرجس متصله
عليه
رجعت اتصلت وبقينا نحجي اني وياها
ورجعت طلبت رقم سند
مليكه...اني كلت السند وماقبل يكول ممنوع
طبعا اجذب عليه حتى تبطل تطلب الرقم مني
لليل اجا سند
شكد افرح من اشوفه يدخل للبيت
جمانه السعيدي
كعدنا نتعشى
سند...باجر نطلع الاربيل اروح وياا النادي نطلع الساعه
بلسته الصبح
كل وحده تكول شتريد اجيبله وياي
نورهان...اني اريد كرزات وعسل طبيعي اخلي الوجهي
حتى يصير حلووو
هاجر...بكيفك كون شغله حلوووه
سند..مثل شنووو
هاجر...يعني فد جنطه حلوه شوز حلووو
سند...وانتي مليكه
مليكه...اني اريد ترجع سالم وماخذ البطوله وماتتاخر علينا
سند...لا اختاري هديه
مليكه هي هاي هديتي وبس كلشي مامحتاجه
هاجر ...انت ليش تعب نفسك هي هاي وين تعرف اربيل
ووين تعرف الاشياء الراقيه
هواي عليه كاعده ويانا على هذا الميز
الله يسامح ابو محمد ماعرف يتبرأ منه قبل لا يموت عافلنا عله
سند...ليش تحجين عليه ترا مامئذيتج
هاجر...كل هذا وما مئذيتني بعد شسوي
مليكه...مراح ارد عليج احتراما السند
اصلا انتي الحجي وياج ماله معنى
هاجر...بعد احسن لان من اسمع صوتج اتنرفز
مليكه...الحمد لله على نعمة العقل شبعت كمت
واسمع سند يحجي عليه
عاف الاكل وكام وراي
بقيت بغرفتي مانزلت
للساعه ١٢ بليل نزلت باب غرفة سند مفتوح
وجاي يحضر بملابسه
مليكه...دكيت الباب
سند...هلو ملوكه
مليكه...اساعدك
سند...لا خلصت
مليكه ....كعدت على الجربايه وكمت ارتب بملابسه
واخلي بلجنطه
بعدين هو جاب العطور الي راح ياخذهن و فرجة الاسنان
وجواريبه
كمت ارتب بيهن
مليكه...تعرف انت الي مصبرني على الكعده بلبيت
سند...ليش
مليكه...امك ماتقبل تعوفني بحالي
سند...هسه تكمل المعامله وتخلصين
مليكه...انشاء الله
سند...ولو اني تعودت عليج منو يحضرلي الريوك
منو يكليلي طماطه
منو يروح وياي للنادي نركض
مليكه...شويه وراح تنساني
سند...مستحيل انساج ابد اذا رجعت من البطوله ولكيتج راجعه للنعمانيه ازعل عليج
تبقين لمن ارجع حتى نحتفل سويااا
مليكه...ماأتصور امك تقبل ابقى متحملتني على اعصابه
بس تخلص المعامله تضربني مليون جلاق وتشمرني بلشارع
جمانه السعيدي
سند...اني راح اتصل اطمن عليج يوميه
مليكه...اي فدوه اني مااتصل خاف مشغول انت بس يصير مجال اتصل بيه
سند...هاي هي اوكفي خل انطيج شي
مليكه...فتح الخانه وطلع زنجبيل فضي بي سورة الكرسي
هيج مربع زغير وعلي الايه مكتوبه
سند ...هاي اللج تبقى بركبتج اني مجربه راح تحميج
من كل اذيه
البسيه وابد لا تنزعيه
مليكه...شكد فرحت بيه اخذته من ايدا وكبل لبسته
شكرااا
سند...لا تشكريني ابد انتي تستاهلين
مليكه...شكرا لانك غيرت هواي اشياء بحياتي
سند...بس اريد اطلب منج طلب لا تخلين هدفج الفلوس
الي راح تحصلينه
خلي هدفج اكبر
ادرسي وانجحي وصيري قويه
مليكه...انت متاكد ابن هاجر عود سوي فحص
راسا فتح عيونه حيل
مليكه.... اسفه احجي هيج من ضيمي انشاء الله ترجع بلسلامه
سند...ديري بالج على نفسج
مليكه..تصبح على خير
سند..انتي من اهل الخير
مليكه...صعدت الغرفتي وماكدرت انام بقيت اتكلب
مااجاني نوم ابد
ضايجه لان سند راح يروح ويعوفني وحدي
الساعه بلسته اله ربع نزلت لكيته مبدل
مليكه..خل احضرلك اخر ريوك حتى تذكرني وماتنساني
سند..مااريد اتعبج
مليكه..تعبك راحه
دخلت للمطبخ وحضرت الريوك
كعد ياكل واني كاعده كدامه بس اباوع علي
خلص وغسل
طبعا هاجر ماكعدت تودعه ابد مااعرف شنو من كلب عدها
اجت سياره كوستر حديثه وكفت بلباب
عليه شعار النادي
سند...مع السلامه
مليكه..الله وياك باسني براسي وطلع
شمرت ورا ماي ودعيلته يرجع بلسلامه
بقيت واكفه منا لمن السياره وصلت الراس الشارع
راسا رن عليه
سند...ادخلي اخاف عليج
مليكه...الله وياك
اني سديت الباب وانفجرت بلبجي علي
ابجي عبالك بعد مااشوف ابد
صعدت فوك وكعدت وكمت ابجي شلون لو خلص كلشي
شلون راح اتحمل البعد
يارب اذا اليه بي خير لا تبعدي عني ابد
يارب اني احبه خلي يحبني مثل مااحبه واكثر
هذا اليوم تكئبت ومازلت ابد كلش ضايجه
الساعه بلوحده الضهر صعدت نورهان
جمانه السعيدي
نورهان...شكو اليوم معتكفه
مليكه...اي ولله ضايجه
نورهان ...تعاي ننزل جوا امي طلعت واني وحدي بلبيت
سحبتني نورهان ونزلتني بلكوه
اشتغل بدون واهس تحجي نورهان مااسمعه
تكلي طلعي الطماطمه من الثلاجه
فتحت الثلاجه وبقيت صافنه
نورهان...شبيج طلعي الطماطه
طلعت الطماطه وأخذته اخليه على الطباخ
نورهان...استغفر الله ووين مخليته
مليكه..انطتني بتيته كالت كشريه جرحت اصبعي
نورهان...لا انتي اليوم بيج شي
اكعدي اني اشتغل
مليكه...نورهان سند متعود يغيب عن البيت
نورهان...اذا عندا بطوله طبعا يغيب عن البيت
مليكه...يتأخر
نورهان...يعني حسب البطوله كم يوم
مليكه...زين منو يهتم بي هناك
نورهان...قصدج الاكل اكلهم على النادي وملابسهم
اكو غساله بكل جناح ينزلون بي وهمه يغسلون مالابسهم
مو عبالج بس بطوله يفترون ويتونسون
ويأخذون صور ونسه مابعدها ونسه
انتي ليش اتسئلين
مليكه...مو اريد اتعلم ملاكمه غير ضايجه على سند
نورهان...انتي ضايجه وهو اخر ونسه
عليمن اضوجين هسه كم يوم ويرجع
اني عندي كلش عادي متعوده على غيابه
مليكه.بقيت كاعده ومالي واهس ابد
حتى الاكل اكلت لكمتين وكمت
على فكره هاجر مااجت للغدا
صعدت الغرفتي ونمت عبالك صار سنيين مانايمه
نزلت المغرب
بس نزلت سمعت هاجر تخابر وتكوول
انشاء الله اليله يخلص كلشي
مليكه...مااهتميت الكلامه واصلا مالي شغل بيه
ومااريد احجي وياها ابد
ولو تخلص المعامله باجر جان رجعت البيتنا البيت مو حلو بدون سند
ماكنت اعرف هي تقصدني بهاي المكالمه
ومحضرتلي مصيبه معدله
وهاي اخر ليله اليه بهذا البيت
تعشيت وياهم واني ساكته ماحجيت اي كلمه
وهاجر هم ساكته مو من عوايده خلصت عشى
وصعدت الغرفتي
لكيت سند دازلي صوره نازل من السياره الي راح بيه الصبح
واكف يم بابه وماخذ صوره
وكاتبلي وصلنا ولله الحمد
مليكه...الحمد لله على سلامتك الك وحشه يبو ضحكت الحلوه على كولة كاظم الساهر
بقيت كاعده اباوع على الصوره ومنتضره يراسلني
بس مادز اي شي
الحد ماتعبت ونمت
