رواية معالج الروح الفصل العاشر بقلم جمانه السعيدي
معين...رجعته للغرفه ورجعت البيتنا
ثاني يوم كان الراتب مال بيبي
معين...تردين اخذج تستلمين الراتب
بيبي...لا عليمن معطلتك على دوامك اني اخذ تكسي واروح ومن استلم هم ااجر تكسي وارجع
هم اريد اروح للسوك اشتري كم حاجه
معين...خاف تعبين خل اروح وياج
بيبي...لا مااتعب روح انت مالك شغل بيه
معين.رحت للدوام وكان يوم كلش متعب رجعت للبيت
تقريبا الساعه ٣ لان ازدحام وكوه وصلت للبيت
لكيت بيبي كلش ضايجه وحتى ماطابخه غده
معين...سلامات خوما كو شي
بيبي...سالفه ماتنحجي ابد
معين...ياستار شكووو خوفتيني
بيبي...من طلعت من البيت شفت امير واكف بابهم سئلني وين رايحه كتله اجيب الراتب
كال اروح وياج خاف وحدج ماتكدربن
اني اخاف منه خاف ياخذ الراتب كتله لا اروح وحدي
معين...وبعدين
من رجعت شفته واكف بابهم اني نزلت هو اجا عليه كال اشيل العلاليك وياج
دخلهن جوا وسئلني هاا استلمتي كتله اي استلمت
هو طلع من البيت واني خليت المسواك بلمطبخ
ورحت ضميت الراتب بلكنتور قفلت الكنتور بس خليت المفتاح برا باب الكنتور
وأخذت دشداشتي ودخلت اسبح لان حسيت نفسي
حريت
من فتحت باب الحمام وطلعت شفته طلع من بيتنا يركض
صحت علي بس مارد عليه
كبل رحت للكنتور لكيت الفلوس ماكو ماخذ الراتب كله
معين...وسكتي
معين...يايمه شسوي امه ذاك اليوم السانه شطوله عليه
تكول واذا اخذ منج فلوس شنو يعني الفلوس بس المعين
معين...الشغله ابد ماينسكت عليه لازم اتصرف
بيبي...شسوي اخاف عليك
معين...كلشي بلقانون هسه شويه وارجع
طلعت المركز الشرطه وقدمت بي بلاغ يتعاطى هو وياا جماعه غاسلين مخه حتى ياخذ فلوس من اهله
وطلبت منهم اسمي ماينذكر
لان اكو خطوره عليه إذا اسمي انذكر
كالو راح نبدي نراقبه
رجعت للبيت
بيبي...هاا شسويت
معين...كلشي ماسويت ميخالف بيبي اني انطيج راتبي
بيبي...يايمه الفلوس تجي بس هذا الولد بعد ضاع من كام يمد ايده وياخذ فلوس بكيفه
ولا يستحي ولا يخاف
لليل مكافحة المخدرات داهمت بيت خالي
كالولهم واحد من جماعته كمشنا وبلغ علي
يعني ماذكروني ابد
فتشو البيت ولكو مخدرات كم جيس ضامهن بلبيت
واخذو خالي راح ويااا
واجا خالي الثاني واني هم رحت وكانما مااعرف شي
كتلو كتله زينه واعترف على جماعته كلهم
خالي جابله محامي بعد اسبوع بمركز الشرطه
حولو للمحكمه
حكمو سنتين سجن
الكل ضايج بس اني فرحان همزين خلصنا منه ومن شره
بيومها ماكدرت اروح المروه العصر
ثاني يوم رحت للدوام ماعندي مراجعين هواي كم واحد خلصت وطلعت للبيت
العصر رحت من وكت المروه
بس دخلت ام ساره انطتني ضرف كالت عافته الك ست الهام
فتحته بي فلوس مبلغ محترم مااكول شكد خاف تحسدوني
سبحان الله لبشر يكطع ورب العالمين يوصل
منا راتب بيبي راح ومنا اجتني فلوس العلاج
صعدت دكيت الباب مروه مروه
مروه تعال ادخل
اول مره اسمعه لطيفه وترد عليه هيج
دخلت لابسه تراك احمر واسود ورافعه شعرها ليوره بطريقه حلوه والغرفه عطرها طيب
معين...هلووو
مروه...هلووو البارحه مااجيت
استغربت اول مره تفتقدني
معين.. كان عندي مشكله وحليته
مروه...يمكن انت ماتصعب عليك مشكله
معين...لا مو الهلدرجه
مروه....تبين هيج احس عندك حل اللكل المشاكل
معين....اليوم اني استلمت فلوس شنو رائيج نطلع نفتر ونتعشى برا ونرجع للبيت
مروه...موافقه
معين...يله غيري ملابسج واني انتضرج
طلعت من الغرفه وصحت ام ساره تجي تساعدها
نص ساعه واني انتضر برا بعدين انفتحت الباب
طلعت صدكوني ماعرفته
طبعا جسمه شويه صار احلى من كامت تاكل
لابسه بدي اسود يخبل عليه وبنطرون جينز ثلجي
شعرها مشسورته ولا بسه تراجي كبار حلق
خاله حمره حمره وعيونه مكحله وخدودها ورديات
اول مره اشوفه مكيجه
معين....انتي منو مااعرفج اريد مروه المخربطه شعرها كفشه
مروه...ترا ارجع ولله
معين...عليمن ترجعين يله امشينا مو بس انتي محتاجه
تغيرين جووو اني هم تعبان ومحتاج اغير جو
بس طالعه حلوه
ابتسمت
شلته نزلته وام ساره طبكت الكرسي ونزلته
طلعنا الدنيا العصر والجو يخبل
دفعته ومشيت
معين...شنو رائيج نمشي شويه بهذا الجو الحلو
الشارع كله خضار وأشجار كبار يخبل
مروه... موافقه
مشينا شويه
مروه اريد اسئل سوال
معين...اي اسئلي قابل شعدنا
مروه...واحد مثلك ناجح وعنده وضيفه ليش مامرتبط
معين...راح احجي الصراحه
اني عايش ويا بيبي بعد مانفصلو امي وابوي وكل واحد راح ارتبط وعاش حياته
البيت بلاصل البيت جدي وقسمنا الجزء الزغير عايشين بي اني وبيبي
والجزء الجبيرعايش بي خالي هو وعائلته
بلنسبه للجزء الي عايشين بي احنا غرفه وهول زغير
ومطبخ وصحيات
اذا اريد ارتبط لازم يكون عندي بيت لان هذا البيت مايكفي
زغير واني ماعندي امكانيه اشتري بيت
مروه...زين اجر بيت
معين...الايجار غالي اذا ادفع ايجار يبقى مبلغ قليل مايكفي معيشه
مروه...وراح تبقى هيج
معين...بلكت الدوله تنطيني قطع اراضي بلكت الراتب يصعد ساعته افكر بلزواج
مروه...زين انت تحب
معين...لا ماأحب ولا ناوي احب الحب التزام ومسوليه
خوما اضحك على بنات الناس
لمن اكون اكدر اشيل المسوليه ساعته احب
احب وازوج
مروه...تفكير سليم
مشينا تقريبا نص ساعه وبعدين صعدنا تكسي ورحنا للمطعم اتعشينا
مروه... هذا اليوم حلوو ولو انت دفعت الحساب
معين...وشنو يعني الحساب يمته ماتحبين نكرره
مروه...يعني يمته مااطلب نجي هنا
معين...اكيد يمته ماتحبين اني موجود
مروه...شكرا واسفه
معين...على شنو اسفه
مروه...لان اول ماشفتك كمت اغلط عليك
معين...ميخالف زعطوطه ولازم اتحملج
مروه...ياا شنو زعطوطه
معين....زعطوطه وام الزعاطيط كل تصرفاتج تكول انتي زعطوطه
مروه...زعلت
معين....مو كتلج زعطوطه بس الزعطوطه تزعل
مروه..بعد مااحجي وياك
معين...انتي متأكده
كتفت اديه وبرطمت
معين...يله لا ازعلين راح اجيبلج ايس كريم
مروه...ماا بعدني زعلانه
معين...زين اني راح اسويلج مفاجئه واصالحج بس بعد كم يوم مفاجئه لا على البال ولا على الخاطر
مروه...يله وافقت اذا بيه مفاجئه وين الايس كريم
معين...نطلع برا اعرف مكان يبيع ايس كريم يخبل
طلعنا ووكفنا على الكورنيش واكلنا ايس كريم
معين...تعرفين من تهدين وتصيرين طبيعيه شكلج كله يتغير
تصيرين غير انسانه
مروه...ولله اني ماكو أطيب من كلبي بس الضروف الي مريت بيه صعبه
معين...مو أصعب من ضروفي
اهلي نفصلو وكل واحد عاش بعالم ثاني ومحد ذكرني
ولا سئل عني
مره ضربت ابن خالي وخالي قرر يشمرني بلشارع
يعني تخيلي طفل عمرا ١٢ سنه يشمرونه بلشارع
بس رب العالمين مانساني
وبيبي تمسكت بيه حتى فضلتني على ولده
الدرجه ولدها وجهالهم كلهم يكرهوني بدون سبب
وامي الي عمرها ماحست بيه عايشه حياته بلطول والعرض
مروه...انت منيين اجيب هاي القوه
معين...من رب العالمين
مروه...شكد قوي انت
معين...لا ولله ضعيف بس امثل قوي لان مااريد احد يتشمت بيه يكولون عافو اهله وطلع انسان فاشل
مروه...الله يساعدك
معين...لازم انتي تساعديني حتى اطلعج من هاي المحنه
مروه...احاول
معين...يله نرجع للبيت لان اليوم اتاخرت على بيبي
مروه...لازم تعرفني عليه بيوم من الايام
معين... اكيد
رجعته للبيت وصعدته الغرفته من اجيت اطلع
مروه...شكرا
معين....تدللين
نزلت ورحت الام ساره
معين...اريد اسئلج سوال
ام ساره تفضل....اريد عنوان ابو مروه
ام ساره...ليش
معين...عندي شغله وياااا
ام.ساره...ترا ام مروه ماتقبل مروه تشوفه
معين...مو مروه اني اريد اشوفه
ام ساره....خاف الهام تعرف وانطرد
معين...صدكي محد راح يعرف
ام ساره...هسه انطيك اسمه الثلاثي وعنوانه بس لا اجيب
طاريي
معين...تمام
اخذت منه العنوان ورجعت للبيت لكيت بيبي نايمه
بدلت ونمت ثاني يوم طلعت من الدوام على
مكان عمل ابو مروه
عندا ورشة تصليح سيارات
معين...السلام عليكم ابو مروه
الرجال استغرب لان الكل يصيحله ابو محمد
محمد ابنه من زواجته الثانيه
ابو مروه....اي نعم منو حضرتك
معين...اني المعالج الي يعالج مروه
ابو مروه...اهلا وسهلا تفصل مروه بيه شي
معين...ليش ماتسئل عنه
ابو مروه...ولو مو من حقك تسئل بس هاي قصه طويله
خل اجيبلك جاي واحجيلك
اني من يوم ازوجت الهام اكو مشاكل بينا
عنيده متسلطه متكبره سكتت هواي وتحملت هواي
الحد ماصارت مروه تعلقت بيه هواي شكد ماتتخيل
هنا الهام كامت تكبر بشغله
وشغله ياخذ كل وقته واني الي كنت اهتم بمروه
اغسل وابدل وامشط واقري واكتب
مروه حيل تعلقت بيه
الحد ماصار عمرها ١٢ سنه صارت مشكله بيني وبين الهام
توقعت مثل كل مره تعدي سلامات
بس هي رفعت عليه قضية طلاك
هي عدها فلوس ونفوذ كسبت القضيه وضمت حضانت
مروه اله
منعتني من بنتي وكدرت تدفع فلوس وتخليهم
يمنعوني اشوفه
كنت اروحله للمدرسه حتى اشوفه
من عرفت اني اروح للمدرسه حتى اشوفه اشتكت
عليه ونسجنت شهرين بااي تهمه مااعرف
لان اشوف بنتي يخلوني بلسجن
من طلعت تركته وزوجت وصار عندي اطفال
معين...بعدك تحبه
ابو مروه...اموت عليه واتمنى اشوفه ولو دقيقه اعرف هي سوت حادث وماتطلع
رحت مرتين اشوفه والحرس منعوني ادخل عدهم اوامر من الهام
معين...واذا خليتك تشوفه
ابو مروه....اتمنى ولله اشوفه واطمن على وضعه
معين...وجودك بحياته هواي راح يفرق بعلاجه
ابو مروه...اتمنى ولله
معين...اريد رقم تليفونك
ابو مروه....اي هسه انطيك الرقم
ثاني يوم رحت بعد الدوام
بس شافتني ابتسمت
معين حسيت بلتغير الي صار وياها
مروه ...هلو خفت ماتجي
معين...هو اني اكدر لازم اجي حتى نداهر اني وياج شويه
مروه...اني هم تعودت عليك
معين...يله نبدي التمارين
مروه...اني مستعده
بدينا بلتمارين حسيته مرتاحه وياي ونفسيته احسن من قبل
زين عدها تجاوب على التمارين
معين...اكو كم جهاز تحتاجيهن بلتمارين لازم تجين يوم للمستشفى
مروه...عادي اي يوم بكيفك
معين..امر عليج باجر ترحين وياي
مروه...اي تمام ماكو مشكله
معين...موعدنا باجر
معين ...ثاني يوم الصبح مريت عليه لكيته كاعده ومحضر نفسه ومنتضرتني
لابسه بنطرون تلبيسه ابو التعلاكه صحرواي وقميص
ابيض وحذاء فلات ابيض
فاركه شعرها وساحبته ليوره ورابطته
مكياج هادء يخبل
بقيت واكف واباوع عليه
مروه...هاي شبيك ليش تباوع هيج
معين...اكول الله يستر شنو هذا الجمال
صايرات عدها خدود وجسمها مليان وكله انوثه
مروه...لا تحرجني
معين....يله امشي عيني امشي
السايق أخذنا للمستشفى وصلنا نزلت الكرسي وبعدين نزلته السايق بقه ينتضرها
دخلنا وبديت وياها بلعلاج وحده وحده اي جهاز اخلي عليه
تبقى لازمه ايدي وتكول لاتعوفني اخاف
اني ابقه يمه اسولف عليه حتى تنسى الالم واحاول اضحكه
من خلصنا كل الجلسات اخذته للحديقه وجبتله نسكافي
تصلت على ابوها يجي يشوفه بدون ماتعرف
شكرا لزيارتكم عالم روايات سكيرهوم
