رواية كريات الدم السوداء الجزء الثاني الفصل الحادي عشر بقلم زحل شريف
هي لاتبحث عن القبول فقط ،
بل عن الإعتراف بأنسانيتها
إن جرحت هل يسيل السواد ام تمتلك الاحمر..
______قدر_______
_عيوني للباشا الي تقرب ينضرلها بحذر
يتمم بصوت ناصي بس بسبب قربي كدرت
افهم منه كم كلمه.
الباشا::سمرة لا تكسرين روحي
اترجاج تفتحين عيونج . ام اعطوب
مايلولكلج هل هدوء .
_ماكدرت اكتم شهكتي التفت يباوعلي.
تقربت مديحه للسرير دنكت باستها ودموعها تصب
كل هذا وهيه ماحاسه بوجودنا وحده من رجليها
ملفوفه سالته . هي ليش هيج مضمدين رجلها
وجه بي اثر كدمات ومتزلغ وعبالك متعرضه
للضرب وقبل مايرد عليه دخلت ممرضه
ومن صوتها عرفت نفسها الي اتصلت بيه .
الممرضه::حمد الله على سلامتها
_سالها الباشا بقلق .
الباشا::شبيها ومن شوكت هيه هنا
ومنو جابها .
_بتسمت الممرض بلطف وهيه تتوجه لسونه
غيرت السيروم وكتب ملاحاظه بطلبه العلاج
واحنه ننضرلها بقله صبر التفتت علينا طالبه منا
انو نطلع برا حته تفهمنا.
الممرضه::تفضلو وياي لغرفه الدكتور الي
مسؤل عن حالتها هو بعد شويه يوصل .
_لح عليها الباشا انو تحجيله
شلون وصلت سونه.
الممرضه::لوحدها اجت استلموها الكادر
من الباب جانت حالتها جدا حرجه وحسب
ماكالت انو تعرضه لحادث سيارة بعد
بعد الفحص والاشعه عرفنا عدها كسر قوي
بالساق ويحتاج بلاتين فضطرينا لاجراء عمليه
شكد حاول وياها الدكتور انو تبلغ اهلها فكالت
ماعندي احد و جايه زيارة للعراق
الباشا::حته لو شلون تسوون عمليه
مثل هاي لشخص بدون ما.
_قاطعته الممرضه رغم عصبيته
بس هيه جانت متفهمه وهادئه .
الممرضه:: اتاكدنا من جوزاها .
_منو دفع افلوس العمليه ؟
الممرضه::سالفه طويله .
الباشا::اختصريها .
الممرضه::كلفتني اروح للفندق الي ساكنته
ف اخذت زوجي ورحت بس صاحب الفندق رفض
ينطينا مفتاح غرفتها .اخذتها بسيارة ومن وصلنا
مانزلتها اجه مدير الربسشن شافها وتاكد وسلمنا
المفتاح . هسه اجيبلك باقي اغراضها خليتهن بالامانات.
_ مو هاي مصيبه المستشفيات الاهليه.
اهم شي عدكم انو دفعت فلوس .
_غلست عن كلامه الي شبه اهانه
واتهام وكملت .
الممرضه::وقبل مانجري العمليه
انطتني نقالها وصتني اذا صارلها شي
ابلغ زوج اختها وانتو تعرفون الباقي يعني
اتصلت بي وماجاوب فضطريت اتصل بااختها
الباشا::شوكت سوت العمليه؟
الممرضه::صار يومين.
الباشا::شنووو يومين ولحد الان هيه
ماصحت . انتي شجاي تحجييين.
_انقلب الباشا الى شخص اخر
ضلت الممرضه تتلفت بسبب صوته العالي
حاولت تحجي تفهمه بس هو ماانطاها مجال
الباشا::وين الغبي الي اجره العمليه.
_ارتبكت وضلت تتوسل حته ينصي
صوته .
الممرضه::اخي ممكن تهدء
صدكني مابيها شي بس الضاهر هيه تعبانه
وجانت تعاني من مشاكل صدكني ماجنه
متوقعين تدخل غيبوبه .
_شهكت بصوت . وهو انجن
الباشا::لااااا زودتيها لج احجي.
الممرضه::اكتشفنا انو كانت تتناول
نوع من انواع الحبوب ترامادول ..
الي توصف للحالات الحرجه والي يستمر
عليها يوصل للادمان وهل شي اثر عليها بالبنج .
_طفرت مديحه معترضه .
مديحه::مستحيل . اصلا هيه تكرهه
العلاج وحته من جانت تتمرض تفضل الابر
عله اي علاج ثاني .
_ضلو يتناقشون اجه الدكتور
وبدون مقدمات توجه عليه الباشا وهو يسال.
الباشا::شوكت تفيق من غيبوبتها؟
الدكتور::ان شاء الله مطول
لا تقلق صدكني هاي حاله جدا طبيعيه الحاله النفسيه قد تؤثر على استجابة المريض للغيبوبة بعد التخدير العام، وهي حالة نادرة حيث لا يستعيد المريض وعيه بشكل كامل أو طبيعي بعد التخدير.
الباشا::وليش ماتكول خطئ طبي ممكن
بسبب البنج .
لدكتور ؛؛البنج يسبب الغيبوبة المؤقتة عن طريق
تعطيل نشاط الدماغ،
الباشا::وكثير حالات بسبب البنج يعني
الحاله النفسيه شعليها؟
الدكتور ::الغيبوبه المؤقتة للمريض قد تحدث نتيجة
عدة عوامل طبية، ومنها الحالة النفسيه .التوتر والقلق يساعد على استجابة المريض للغيبوبة أو استعادةوعيه،
_همه يحجون وانه ومديحه دموعنا تصب
شنو الي واجهته وعانته حته وصلت لهذا الحال
سونه قويه مستحيل تضعف بهل سهوله
وان شاء الله تفيق وتتعافى .
_هز راسه الباشا واشرلنا طلعنا من الدكتور
دخلنه لغرفتها . اباوع الها ماحسه بوجودنا
بس النفس يصعد وينزل مر وقت واحنه مكابليها .
الباشا::راح اطلع ادخن جكارتي مو تعوفوها.
_بس راح اجت الممرضه جايبه ماي
وسلمتنا الجنطه مال سونه .
الممرضه::نقالها وجوازها وبقيه افلوسها.
_تشكرت منها ضلت كاعده يمنا شويه
وانوب كالت .
الممرضه::ادارة المستشفى
ماتسمح غير بس مرافق واحد للمريض.
_ترخصت وطلعت . شويه واجه الباشا
بلغته بكلامها .
الباشا::هسه اشوف بلكي ينطونا
غرفه ثانيه . واذا ماحصلنا احجزلجن بفندق
مديحه::روحو انتو وانه ابقه يمها.
_انتفضت معترضه . لا انه ماعوفها
انتو روحو وانه ابقه .
مديحه::وين اروح شبيج
_ترى المريضه اختي .يعني انه ابقه.
مديحه::شوفي بت الصخل كوى متحملتج
لا تخليني اسحلج ترى وروح .
_قاطعتها وروح ابوج الماتعرفينه
ماتحرك . صاح بينا مسكتنا.
الباشا::وانه راح اسلك ابوج وابوها
كومن ثنينجن .ماتبقن
_ضليت اتلفت نزلن دموعي
هز ايده وطلع.
مديحه::بت الجحش تردين تودين
ويا الرجال للفندق ثول حته ثول .
_يعني شسوي اعوف اختي.
مديحه::دسدي حلكج لايرجع
علينا بلكي يدبرلنا غرفه واذا ماكو
اضل بالحديقه مال المستشفى .
_ضلينه نسولف وكل شويه نتوقع
حاله شكل .الباشا يجي يمنا شويه ويطلع يدخن وتلفونه ماسكت انتهى دوام الشفت الصباحي
واجت الممرضه .
الممرضه::اني خلص دوامي
وهم صار كم يوم ماروح لبيتي عله مود
سلاسل بس بعد انتو اجيتو وان شاء الله
مابيها غير العافيه البديله تعرف حالتها
واني وصيتها بيكم يله مع السلامه.
_اتشكرنا منها .
الباشا::الله يوفقج واعتذر اذا عصبت
عليج اتمنى تتفهمين الوضع .
_راحت الممرضه . وهو بسبب الجكارة
كل شويه يطلع . لليل ودخل دكتور جيك
حالتها . سالته ها شوكت تصحى .
الدكتور::لا تخافين تصحى بأي لحظه.
_اباوع لحالتنا شنو الذنب الي ارتكبنا
وليش احنه من دون البشر هيج ضايعين
مديحه بين عليها النعاس تمددت بالكاع
وخلت ايدها جوى راسها .
مديحه:اتكسرت وروح امي.
_ نزلن دموعي بقهر.
مديحه::خاب لاتفاولين عليها
هسه تصحى انه اعرفها ام اعطوب ماتموت.
_وين راح يكون مصيرنا
شنو ضامتلنا الدنيا بعد ؟
مديحه::اووو توج يله
انتبهتي . وبعدين انتي اهون مني
ومن سونه عندج رجال .
_مااضن بعد الصار نرجع لبعض .
مديحه:: ترى عادي.
زعل حبيب مايطول .
_حجتها وغمزت .
مالحكت ارد عليها وعبالك بزون
مجرد ما جبت طاري بين دخل
هو والباشا التفتت متفاجئه شجابه .
ثابت::السلام عليكم.
_ردت مديحه وهيه تعدل نفسها
وانه ضليت بصدمتي .التفت موجهه
كلامه لمديحه .وهو يباوع بالغرفه
وكأنو يدور عله شيء.
ثابت::كومي يابه شوفي هل لوكر
اكيد حجاب سلاسل بي .
_يحجي ومتجاهل وجودي
كامت مديحه وصدك لكت صايه وشال
اخذه منها وتقرب لسونه خلاه عله راسها
وهو يحاول يعطي شعرها . هز ايده الباشا
التفت عليه خزرة . ضل يستفسر عن حالتها
سولفله الباشا .
ثابت::ان شاء الله خير . حجيت ويا الادارة
كلهم احنه من غير محافظه.
الباشا::اي كتلهم .
ثابت::تمام خل ينطون البنات بطانيات
_حجها وطلع .حسيت بفشله
مو طبيعيه يومين عله اعصابي
كوى يجبرنا الباشا نطلع ناكل بالحديقه
ونرجع وثابت حاجز فندق يروح ويجي علينا
اتصالات اهلهم عليهم ماانقطعت وهذا الي زيد
قهري همه ولد وهيج قلقانين عليهم واحنه بنات
ضالين نتطلم مالنه احد . شبعت بجي غفيت ودموعي تصب فزيت عله صوت مديحه وهيه تكعدني رفعت راسي اباوعلها عبالي حلمانه .
مديحه::ولجج كومي صحت سونه صحت.
_من فرحتي ضليت محتارة
مااعرف شسوي.
مديحه::خل اصيح الدكتور خابري الباشا
وانتي ورجلج .
_حجتها وطلعت تركض .
اريد رجليه يحملني حته اوصل يمها
خفت احظنها وتتأذى دنكت ابوس بأاديها
وابجي تباوعلي وكأنو تريد تستوعب وجودي
دخل الدكتور والباشا .
الدكتور::حمد الله على السلامه
يابطله .
_ضل يحجي وياها وهيه عينها
النا جيكها .ساله الباشا
الباشا::ها دكتور بشر؟يعني نكدر نطلعها
الدكتور:: نتاكد من العمليه
بس كون ماتتحرك فاهمني اكيد .
الباشا::اي اي .
_راح الدكتور والباشا اتصل بثابت بلغه
اجه وبعد ماكملو اجراءات الخروج طلعونا
ومن كلامهم عرفت ثابت ماجايب سيارته.
الباشا::عادي البنات يصيرون بنص وهيه
نمددها هنا .
ثابت::تمام يله نتوكل .اول مرة نروح للفندق
انجيب اغراضها .
_دنك ثابت رفعها من العربانه
صعدها . بحذر وانه ومديحه صعدنا ورا اخذنا اغراضها من الفندق وطلعنا .طول الطريق هيه
مانطقت حرف قريب مانوصل طلبت من ثابت
ينزلها ويه مديحه.
سونه::وديني لبيتنا . وانتو روحو
ماعليه شي مديحه وياي .
ثابت::لا يابه شلون حجي هذا.
سونه::اترجاك مابيه حيل ولا الي خلك
احجي كتلك وديني لبيتنا.
_حز بخاطري لان ماكالت اخذ اختي
وياي كتمت عبرتي بصدري . الباشا مااعترض
بس عينه بالمرايه يباوعلها .
ثابت::جا شلون صحبان انه وياج
وبعدين ليش ترحين للصعده خو اوديج لبيتج
لو ماتردين تجاوريني .
_سكتت .وهو ضل يحجي وياها.
ثابت::تمشين وياي لبيتي بين مايرحن
البنات ينضفن بيتج واثثه.
_هزت راسها اي وصلنه
نزلها اشرلي ادخل كدامه.
ثابت::بسرعه رتبيلها فراش
عله الجربايه .
_ركضت ومديحه بقت يمه
رتبت مكان دخلوها .وتفاجئت بالباشا
ترخص وراح .
ثابت::ارتاحو
ام اسعد مسويتلكم غده راح ادزه بيد مولي.
_راد يطلع صاحت ورا مديحه.
مديحه::خو ماتردون مني شي بعد
يعني اكدر اروح .لبيتي.
_التفت باوعلها بااسف .
ثابت:: ليش مستعجله شعدج؟
راجعه لذيج الحفرة.
مديحه::شسوي ماعندي غير حل.
ثابت::ميخالف دبقي يم صديقتج
اليوم اكيد هيه تحتاجج .
_هزت راسها موافقه
وصل للباب والتفت علينا.
ثابت::لا تلحن عليها بالاسئلة
ترى نفسيتها تعبانه يعني اكيد
ترتاح وتحجيلكم .
_دخلنه لكينها نايمه او تضاهرت بالنوم
عرفت ماتريد تحجي .كلت لمديحه
روحي اخذيلج ملابس مني وسبحي
مديحه::اي ولج متت .
_اندك الباب طلعت لكيت مولي جايب
الغدة .واكيد ماينطينيا اله يحجي.
مولي::احنه جيرانكم
امي تسلم عليكم ودزت هذا الغده وتكول شنو تحتاجون احنه بخدمتكم والحمد لله عله سلامة
اختج .
_رديت عليه بنفس طريقته
شكرا وسلملي عله امك .اخذت منه الاكل
ردت ادخل صاح وراي التفتت متساله
تقرب وهو يحجي ويكلب بنقاله .
مولي::ودي الصينيه وتعاي انطيج رقمي
خاف تحتاجون ممرض .يعني اذا اختج
عدها ابر لو تحتاج اشدلها كاينولا
_غصب عني ضحكت.
مولي::اي شبيج . احجي صدك ترى
ليش تضحكين ؟
_خو مو انته تضربها الابرة.
مولي::لا حياء بالطب
واكيد انه اقرب ليش تفيدون غيري.
_رجعت وانه اقدمله الصينيه
يابه اخذ غداكم وفكنا .
مولي::شكد خبيثه ولا تحبين
الخير لناسج .
_طبك الباب وراح . دخلت اتلكتني مديحه اخذت الصينيه . وهيه تضحك.
مديحه::ترى الولد راد يساعد.
_دسكتي خل اشوف سونه بلكي
تاكل . ها شتكولين نروح يمها؟
مديحه::خليها براحتها اول وتالي تجوع
وتطلب اكل .ترى الي ياخذ هل حبوب
لو مدمن عله اي نوع ثاني يفقد الشهيه.
_خبرة حصرتج. اله صدك شعجب
خلوج صرتي مدمننه؟
مديحه؛؛جانو يردون صاحين حته نراقب
اكلي لااغط راسج بهذا ماي الحم .
_مر اليوم بين صفنات سونه
ودموعي . لحالتها تعبت لليل اجو بيت ابو اسعد
تحمدولها السلامه . وراحو ثاني يوم كوى قنعها ثابت
تاكل لاجل علاجها .
ثابت::صاحبتي قويه مايهزها
بلاتين برجلها . مووو ؟
_وهيج كم يوم هيه ملتزمه الصمت
طلبت نغير ملابسها . بس الي قاهرني
من ندخل يمها تطلب منا نطلع ونطفي الضوى
تعبت وانه اتوسل بيها تحجيلي . ماجنها تسمع
اجه ثابت ومديحه كالتله.
مديحه::قابل كل الي يندعمون هيج
يصير بيهم ترى حالتها مو طبيعيه.
ثابت::عوفونا لوحدنا .
_ قلق فضول خوف رغم كال شويه يلتفت
علينا بس بقينه واكفين بالباب مال الغرفه
جر الكرسي وكعد كبالها يحجي بهدوء .
ثابت::تدرين الحجي يضوج اذا مرت
فترة ماتعرض لبلاء . وانه اضحك والومه
بس من حجالي اتفاجئت . كال رب العالمين
مايبتلي عبد من عباده اله محبه ليسمع مناجاته
ودعائه .
_نزلن دموعي لكلامه وكأنو ذكرني
بغفلتي عن صلاتي الي هملتها كمل كلامه.
ثابت::ولو حسبنا البلاء عقوبه
هنيئا لمن تعاقب بالدنيا حته يضمن
عفو رب العالمين بالاخرة .يعني
يشير الحديث إلى أن الجزاء في الآخرة يكون أكبر لمن كان عليه بلاء في الدنيا، وأن الله لا يضيع أجر من صبر على البلاء.
_جذبني كلامه سندت ضهري
عله الحايط وبقيت استمع الهم.
ثابت::ياسلاسل انه اريدج تحجيلي
حته اخذ حقج من الي سبب اذيتج
ترى ابو بشاير يوميه يتصل الامانه الرجل حيل قلق
عليج وراد يجي بس انه رفضت ف حجيلي حته اعرف
اتصرف .
سونه::ماله ايد بأذيتي حته ام بشاير.
_تقربت بفضول اريد بس اعرف
شنو الصار . سندت نفسها عله تاج الجربايه
وبدت تحجي وهو يستمع .
سونه::اول فترة من وصولنا
جانو ملتهين بشاير ف مااهتميت واعتبرت
تصرفاتها القاسيه بسبب مرضها وجانت امها
تتعذر وتبرر تالي كالو اعتبري نفسج بتنا مو زوجه فيصل . وانه اساسا ماجان الي نفس ولا خلك تجاهلت
وجودهم فترة وبدت تزيد بعصبيتها وتصب غضبها
بيه تغلط وتسب .
ثابت::وهو شنو كان دورة.
سونه::كتلك انه ماجنت مهتمه
الصراحه هل شي جان مخليني مرتاحه
فماصار بينه اي شي بس هو كم مرة تعذر بسبب
مرض بشاير يعني متأمل تموت ويعيش،حياته وياي
ثابت::تمام كملي بعدها شصار.
سونه::حاولو يرضوني
كامت امها تطلعني ماقصرت وياي لبس
ومراكز تجميل وفرة . وابوها يعاملني وكأنو انه بنته
بس هيه زادت وكامت تجاسر حته عله فيصل ودوم
تعاركه . وبسبب وجودها الدائم بيت اهلها انه انحبس بغرفتي ومن الفراغ الي احس بي صرت ابحث
باليوتيوب عن مرضها.
ثابت::امر طبيعي.
سونه::بعد بحث ايام مالاحظت اي اعراض
عله بشاير كمريضه بهيج مرض يعني لاانتكست
ولا شعرها طاح والزيد شكي انو هيه كل مرة تكول
جاي اتعالج وعله اساس تاخذ كيمياوي بجرعات
خفيفه . وترفض انو اهلها يرحون وياها للدكتور . ومغيرة الدكتور المسؤل عن حالتها .المهم الي ثار انتباهي فيصل تعب كلش ودوم مريض وتغير حيل وحسب كلامهم بسبب حالة بشاير ولان يحبها .
ثابت::ممكن لان هيه زوجته وبنت عمه.
_بعدها بفترة كالو انو فيصل
مريض مكتشفين عنده فايروس بالكبد
العجيب انو بشاير مامهمته رغم هنه حذرات
بس كل مرة الحظ يسلطني اسمع امها تحجي عليها .
ام بشاير::اتكي الله يبنت انتي وش بلاك
بشاير::اووو يعني اهو بيدي
واله انه الي مرضته اسمعيني يما لازم هل بومه
تحبل مشان نضمن ام فيصل ماتكوش عله كل شيء.
ام بشاير::انعل ابو بليسك انتي كل همك
المال ادعي لزوجك يتعافى .
سونه::بيوم نزلت من غرفتي مالكيت احد بالصاله
توجهت للمطبخ لكيت ميري سالتها كالت
ميري::ماما عندهةضيوف صديقتها.
سونه::مااهتميت بس من كالت .
ميري::هي في دارها.
سونه::وجانت تقصد بالدار الغرفه الامر ثار فضولي
لان همه ما يستقبلون الخطار بالغرف عفتها وطلعت ردت اعرف شعجب مدخله صديقتها يمها وصلت باب الغرفه وكفت بسبب صوتها العالي وجان كلامها واضح .
بشاير::خلصنا انتي ماعليك انا
اكنع فيصل .بعدين هو مايرفضلي طلب.
_ردت عليها صديقتها.
!!واهلك ان كشفو الامر اكيد يزعلون
منك انا اكول لو تصارحين امك .
بشاير::لا مو الحين .اول لازم اكنعه
يخلي هل الصخله تخلف لنا عيل وبعدها
اتصرف .المهم انتي شوفيلنا رفجيتك خلها ادبر
تقرير بان حالتي تستجيب للعلاج .
!!ياخوفي رب العالمين يغضب عليك
ويبليك بهل مرض.
بشاير::الملافض سعد شفيك ماتعرفين
تحجين شي في خير .
سونه::عفتهن وركضت لغرفتي
وانه اتحلف بس يرجع فيصل اقنعه يرجعني للعراق ومن اوصل احجيله كلشي وبعدها اطلب الطلاك .
ثابت::ليش مابلغتيني بكل هذا.
سونه::ماردت اشغلك كلت اول وتالي
من ارجع احجيلك .بوقتها اتصلت بيك كتلك
احتمال ارجع وطلبت تشتري البيت.
ثابت::هو العذر مامقبول بس كملي .
سونه::ضليت انتضر رجعت فيصل
وابو بشاير .ومابينت معرفتي بعد كم يوم
اجت بشاير وتفاجئت من طلبت مني نطلع
نتعشه برا . وهم تاخذني تشوفني بيتها
ام بشاير::الله يهديكم لبعض
روحي يسونه استناسي .
سونه::بدلت وطلعت وياها بسيارتها
عشتني بمطعم فاخر ومرتني لمول اشترتلي
اغراض وطول الطريق هيه تمثل انو تريدني ارضى
عنها خاف تموت وانه حاقده عليها وصلنه البيتها
وانشغلت بالنضر بفخامه البناء والاثاث .
بشاير::ان شاء الله بس تحملين اجيبك
تسكنين معنا.
سونه::طلب من العامله تضيفنا كتلها
لا خلينا نروح امج وحدها .
بشاير؛؛الحين اخبرها انك بتبيتين عندي.
سونه::اتصلت عله امها وكالتلها انو احنه نتاخر
مااعرف ليش خفت من طريقة كلامها والاكد شكي
من امرت العامله انها تروح تنام .
بشاير::ماابي اشوف حد فيكم
لو احتجتك اناديك .
سونه::اشرتلي اتبعها دخلنه غرفتها
وهيه تحاول تحجي وياي بموضوع الجهال
التفتت بخوف من انفتح الباب ودخل شخص
ومبين من شكله مو منهم .اشرله يدخل وهو مثل الالي
نفذ طبك الباب وكف يباوعلنا .التفتت عليه وهيه تحجي.
بشاير::انا مااحب الف وادور .
سونه::مافهمت؟
بشاير::وانا ابيك ماتفهمين وياريت تفقدين
ذاكرتك وتنسين الكلام الدار بيني وبين رفجيتي
سونه::ردت اجاريها كتلها ترى انه مالي
شغل واول وتالي راجعه للعراق ماانطتني مجال
احجي اشرت للي واكف بسرعه تقدم عليه جرني
جتف اديه ودنك راسي لمستوى رجليها .
_شهكت بصوت عالي. ومديحه
انهارت التفت علينا ثابت ردنا ندخل خزرنا .
ثابت::روحن برا ابجن شكو واكفه هنا.
_ابتعدت عن الباب وهيه كملت كلامها
سونه::جانت اطكني بكل قوتها
وكل مااصرخ اتزيد . لحد ما انتهيت
بيدهم دفعني طحت بالكاع مابيه احرك روحي.
بشاير::جوازك وين ؟
_ماجادلتها كتلها عند امج .
ثابت::وهو ليش عند امها .
سونه::لان كم مرة الكه بشاير بغرفتي
ادور ومن كلت لامها كالت جيبي جوازك اضمه
المهم خلص ليلي وهيه كاعده كبالي تخطط شلون
تتخلص مني توسلت حلفت مافاد ماطولها عليك
ثاني يوم جبرتني احجي ويا امها واكلها انو انه حابه
ابقه يم بشاير وباجر نروح للشاليه .
ام بشاير::تمام خليك عندها.
سونه::يومين هيه كل شويه مدخله هل
هندي عليه يكسرني تكسر لحد ما انتهيت
وجانت تطلب منه يطكني عله صفحتي وهل شي
خلاني اطلب الرحمه منها . الم ماينحمل ضليت
ارفس ماسكتت اصرخ واستنجد بلكي احد يسمعني
تالي اجت جايبتلي مسكن .
بشاير::ولو انك ماتستاهلين بس لاجل تكلمين
امي وتطلبين منها تبعث الجواز حته نسافر لل نستانس.
سونه؛؛ماعرف شنو جان ابالها
وشتخطط . رفضت طلبها .
بشاير::الضاهر عاجبك الطك.
سونه::ساعتها اجرمت بيه فقدت
بيدهم . صحيت بسبب الماي البارد الي
انشمر عليه . الم صفحتي موتني اتوسلت
تنطيني مسكن وماجنت اعرف هاي غايتها
ثاري جانت متعمده انوجع حته اطلب المسكن.
ثابت::ترامادول .
سونه::اي هنا يكبسلون بي الشباب
المدمنين بس هيه منين عرفته وشلون تجيبه
مااعرف . الى ان صرت اتمنى تكتلني حته اخذ الحبايه.
تطينياها اضل اغلط واهدد بيها ولا يهمني كتلها الي.
ثابت::شكد بقيتي.وكم حبايه تاخذين باليوم
سونه::١٥ يوم وبسبب شعور
الراحه وعم الاحساس بالالم جنت اتعمد
اثيرها تكتلني وتنطيني .
ثابت::امها شعجب مااجت لبيتها ماسالت
عنج مامعقوله ماانطت خبر لزوجها وفيصل.
سونه::مااعرف .المهم بعدها طلبت من العامله
العدها تغيرلي ملابسي وطلعتني صدوني السيارة
وكل ضني راح ترجعني لبيتم تفاجئت من اخذتني
لغير مكان .
ثابت::اكيد مكان محد بي .
سونه::مثل المزرعه . ايست انو اكدر
اشرد لو اخلص روحي . وتاه عليه احساب الايام
فترة طويله انه محبوسه بهذا المكان تجي كل كم يوم
تجيبلي اكل وتنطيني شريط حبوب وتروح .
ثابت::والكلب ماخابرني ولا كال سهله اعلمهم.
كملي بعدين شصار .
سونه:غابت ايام وخلص شريط الحبوب
العندي وفقدت اعصابي ضليت اصرخ ادك
بالباب محد يسمعني اتعب واغفه بس حاجتي
للحبايه دمرتني. فزيت عله صوت ابوها اباوع
مامصدكه عبالي حلم .
ابو بشاير::وين اروح من عكاب ربي
الله ينتقم منك يابشاير .
سونه:: طلعني
وهو يتحلف ويتحلف بيها لحد ماوصلنه
البيت دخلت اجر بروحي والضاهر ماجانو
متوقعين تسوي بيه هيج انصدم فيصل
من شافني كام وهو يسال ابو بشاير
فيصل::شمساويه فيها ؟
ابو بشاير::كول وش الي مومساويته.
سونه::تلكتني ام بشاير كعدتني
وابوها دخل غرفتها طلعها يسحل بيها.
ابو بشاير::ريتني ماخلفتك يالملعونه
يبنت ابليس اليوم ابي اربيك من اول وجديد.
سونه::كتلها كتله موت ماكدرت امها تخلصها.
ابو بشاير::ريت ربي راحمني وباليك
بمرض خبيث ومخلصني منك .
سونه::المهم هوسه وصياح وغلط
نهاها فيصل الي صدم الكل كام
وهو يرمي عليها يمين الطلاك .
فيصل::طالك بالثلاث .
سونه::انجنت رسمي بحيث
دفعت ابوها وهجمت عليه بعدها فيصل
وجرني يريد يطلعني قاصد ياخذني ويا.
فيصل::والله لكسر ايدك ان مستها.
بشاير::انت موطلكتني
خلص روح لاهلك .
فيصل::اكيد اروح واخذ حرمتي
معي .
سونه::ضلو واحد يجرني منا والثاني
يدفعني جسمي مابي قوى عفتهم يتعاركون
وكعدت عله صفحه .
ابو بشاير::روح يبني وانا اجيبها
لدارك معززة مكرمه خلني اكلمها
واطيب خاطرها .
سونه::طلع فيصل وهمه جرو بشاير
لغرفتها وقفلوها عليها .
ابو بشاير::وش الي يطيب خاطرك
يسونه ربي شهد مالي علم وكل هل مده
واهمتنا انك شردتي .
سونه::الي عرفته
انو هيه مفهمتهم عله اساسا ماخذتني
لمكان همه يعرفونه الناس تسافرله تتونس
ومناك انه شارده . ضلو يتعذرون
ابو بشاير::فيصل بعد مايردها
لذمته وش رايك تكملين حياتك معا.
سونه::ماريد غير يعتقني .
ابو بشاير::خلص الك اليرضيك
سونه::وقتها ماجان ابالي شي غير
بس الحبايه ومن عرف السالفه نوب
انجن وهم رجع عليها كتلها . ايام وهو يحاول
يعالجني من ادماني استبدل الحبوب بمسكن
بس ماجنت ارتاح اضطر يجيبلي وينطيني وحده باليوم اجه فيصل وطلب اروح ويا رفضت . عزولني
بغرفتي وخلو ميري يمي ايام وليالي اعاني اضغط عله نفسي في سبيل استغى عن الحبايه بس ماكدرت
ابو بشاير::يبنتي انا اترجاك
تحملي ايام وان شاء الله تخلصين منها
سونه::مرة ينطوني وحده ومرة نص
اخر شي كتله اريد ارجع للعراق
ثابت::زين ليش من اتصلت بيج
قبل لاتجين ماحجيتيلي وسالتج بوقتها
عن فترة غيابج ونقالج المغلق كلتي
جنت مسافرة ويه فيصل .
سونه::اي هو طلب مني اكلك هيج
جان خجلان منك .
ثابت::مااضن يخجل بس كولي خايف.
سونه::حاول فيصل يقنعني ابقه
كزوجه اله رفضت . وكتلهم خلوني ارجع
ابو بشاير::خلص الي تبينه يصير.
سونه::هيئوني للسفر وانطوني مبلغ
كتعويض . طلبت منه يطلكني .
ثابت::وطلكج ؟
سونه::اي
ثابت::وليش من رجعتي مابلغتيني؟
سونه::ردت ارتاح ردت اعالج نفسي
حبيت اعيش لوحدي كرهت الناس والدنيا
همه رادو يخابرونك قبل ماارجع بس انه كتلهم
خلوني اتعالج واروحله .
ثابت::وين خلصتي هاي الايام؟.
سونه::بالفندق اشتريت رقم جديد
وغلقت القديم وخلصت وكت اتصارع ويه نفسي
احتاج الحبايه وحاولت احصلها ماكدرت اضطريت
اشتري انواع المسكنات بحيث اخلط اكثر من نوع
حته اكدر انام .
ثابت::وشلون اندعمتي ؟
_جنت رايحه للنجف ردت اعاتب اهلي
رغم مااندل بس رحت وصلت المقبرة وكعدت
كبالها وعتبت كلتهم اكيد تسمعوني.
_تحجي وهو يحاول يهديها ،والضاهر ماكدر يصبر عله الجكارة طلع دخن بالحديقه ورجع .يمها سولفتله عله الحادث.
سونه::صار المغرب وبسبب كمت وانه
ادعي اموت واندفن يمهم عاد ننجمع فد مكان
عبرت الشارع وبالي مشغول شلون راح اكدر انام
ماحسيت اله انشمرت عله الرصيف نزل السايق
يركض شالني وهو يتعذر بخوف كتله وصلني للمستشفى وروح . وهاي سالفتي واكيد الممرضه حجتلكم الباقي.
ثابت::رغم زعلي عليج وغلطج بحقي
وحق نفسج بس ماراح افوتها لابو بشاير .
سونه::اذا تريد تساعدني انقلني لبيتي.
ثابت::كومي عله حيلج وسهله.
سونه::اترجاك صدكني تعبانه اريد
ابقه لوحدي ماريد اشوف الناس .
ثابت::اي هنا محد يجيكم وحته انه هم
ماراح اوصل . اعتبري نفسج بالمستشفى
لحد ماتتعافين ووديج لبيتج .
_رغم قهري عليها
بس من عرفت انتهت علاقتها بفيصل
ارتاحيت كلت هاي هيه اجت عدله انه همةاطلك
ونروح نعيش وحدنا . طلع ثابت واشرلي اتبعه .
ثابت::راح يجيج مولي ترحين ويا
تسوكين احتياجاتكم .
_يحجي بدون مايباوعلي
هزيت راسي اي. طلع ودز مولي الي فرني الاسواق
كلها يابه ترى تعبت رجعني كافي بعد مانريد شي.
مولي::اكلج صدك كال اخذ علاج لاختج
بس شعجب ماكو ابر بعلاجها.
_عدها ابر .
مولي::خرب جا ليش ماضربتهن
ترى ضروري تضربهن حته تتعافى بسرعه.
_جاي نضربها يوميه وحد.
مولي ::شنوو .منو يضربها.
_وكف السيارة والتفت عليه
يربي شحجي ويا . كتله هاي البنيه العدنا
صديقتنا مديحه هيه تعرف تضرب .
مولي::شوف حضي لحكتني عله رزقي
ادري شنو هل فكر هذا .
_لحد مارجعنا هو يحجي متت ضحك
نزلني وراح دخلت لكيت مديحه محضرة نفسها
سالتها وانه ادخل المسواك . ها وين رايحه؟
مديحه::للصعده انه كاعده بيت راضي
من ماتت امي سونه كالت ابقي بي.
_كلتي لسونه.
مديحه:لا بس انه غسلت راسها وغريت ملابسها
عود انطيها اكل وعلاجها مو تنسين .بس اطيني
كروة ماعندي .
_دتعاي انشوف سونه شتكول.
وهم لازم اخابر ثابت اكله خاف مايقبل ترحين.
مديحه::شعده وياي بعد ام اعطوب ولكيتوها.
_دخلنا لسونه كنالها. ردت برود
سونه::شعدج موليه .ترى بعده ماخلص
محكوميته واذا طلع اول وتالي نعرف .
_التفتت عله مديحه الي فكت حلكها.
مديحه::يابه شنو كعدتي هنا يعني اله يطردني.
سونه::ترحين وياي لبيتي وعود من يطلع
يدلونه عليج .يله طلعن وسدن الباب .
_جريتها مطلعتها وانه كوى كاتمه ضحكتي .
مديحه::وعليمن مختنكه . اضحكي .
_ههههههههه بس هيه دواج.
مديحه::وانتي ياهو دواجج؟
_انه اداوي روحي .دتعاي نعزل المسواك .
مديحه::وشكو جايبه السوك كله
شنو راح تصير حرب ؟
_لا بس حسبت احساب
من ننتقل لبيت سونه اكيد نحتاجه.
مديحه::وانتي شعدج رايحه ويانه.
منو يكول زوجج يقبل؟
_لان هو مراح يبقه زوجي
انه اريد اطلك ونكعد ٣ ونخلص من الناس.
مديحه::ونكتب عله الباب بيت الملطقات
دكومي من يمي لا اسحلج . شوفي ولج
بوسي ايدج وجه وكفه وحمدي ربج
ماخذتلج واحد بي حظ واكفلج .
_مادام سونه رجعت بعد مااحتاج
وكفته ورثي ومابقه شي واخذه .
مديحه::عله طاري ورثج نسيت اكلج
قبل فترة اجه شخص يسال عن سونه وابوج
بس شكيت بي من طرف بيت فاروق لان يشبهه
السافل محمود .
_شمرت العلاكه والتفتت عليها . انتي وين
شايفه محمود وين تعرفينه.
مديحه::وفري ذكائج . غير قبل مايوصل ابوج
وقبل مايجيبونج هو اجه للصعده كم مرة وسال
عن بيتكم وعرفته من خلال كلامج عنه وهم اجه
مرة لسليمه.
_المهم هذا الي اجه هسه شراد
مديحه::يسالني شوكت اعرس بت الصخل . شمدريني بس مبين مايدري بالصار بالصعده وجاي يريد يتواصل بأي شخص من طرفج .
_واكيد انتي ماقصرتي حجيتيله كل شي؟
مديحه::ويجيك واحد يكلك ليش تغلط
عله راضي مو مات خطيه. مايدرون الي مخلف
ثولان يشبع مسبه. بت الصخل هو انه شعرف حته احجيله نغلات وبنات راضي وتربية سلوم شكضيت منجن ام عطوب الي متزوجه بالخليج واسالها تكلي اجدي بكربلاء لو انتي الي عله اساس خوالج ماخذينج.
_جا شنسوي اذا نحجي ننعلس.
لان انتي مو محل ثقه.
مديحه::الله يلعنك ياراضي اقصد يالشيطان.
_والشيطان وراضي شعليهم
قابل مشغلينج مراقب للصعده.
مديحه::هو صوجي ماعلستج
_قطع حديثنا صوت الباب . التفتت عليها
وانه اسال منو اجانه ؟
مديحه::تعذريني ماعندي محار طشه
جان اخذتلج خير .
_دكومي شوفي منو .
مديحه::ترى ميري بقت بالخليج
وسونه رجعت وحدها بت الصخل اشتغل
عندج وبعدين شلون افتح الباب بله واحد من اهل رجلج شراح يكول مستحله البيت .
_لبكتني تلبك غميتها وطلعت
فتح الباب واتفاجئ بالباشا .
الباشا::ها يابه شلونكم .
_رديت عليه وانه اتلفت بحيرة
لا اكدر ادخله لان اعرف بثابت مايقبل
وخجلت مااكله تفضل بعدت مسويتله طريق
فات وهو يسال.
الباشا::طمنيني شلون صارت؟
_عله وضعها . دخل وبس شافته
دارت وجه ضل واكف ثواني يباوعلها
وتطلع ضلت سونه معتكفه وكارها الضوى
والوحيد ثابت الي تتجاوب ويا.
سونه::خليني اروح لبيتي.
ثابت::اول وتالي ترحين بس كومي
عله حيلج انه خابرت ابو بشاير ولعبت بي لعب.
سونه::عوفهم شتريد تسوي قابل يمنا
وتشتكي عليهم وهو مااذاني .
ثابت::اذا مااجه وكعد واعتذر احرم عليه
دخول العراق وعيونج .
_طلع من يمها . لحكته وانهةاحجي
عود شنو السبب الي مخليها بس وياك تحجي.؟
باوعلي بعدم رضا .وكال
ثابت::بس لا تغارين؟
_اكيد ما اغار عليك بس اغار
عليها ماريد احد يشاركني بااختي.
ثابت::نفسيتها تعبانه
ومحتاجه من يسمعها ويسولف وياها.
_وانته شوكت صرت دكتور نفسي
الي اعرفه عندك شركه مال حديد مدري خشب
مدري غراض سيارات.
ثابت::قطع غيار . مو غراض سيارات
وبعدين شكو ضايجه . هيه عاجبتها سوالفي.
_من يدخل الباشا دور وجها وانته
تسولف وياك .
ثابت::لان تحبني ومعتبرتني اخوها .
_خو انه اختها واقرب منك.
ثابت::لان تعرفج انانيه ومتحبين بس نفسج.
_فكيت حلكي بصدمه . عافني وطلع
وتكررت جيات الباشا وحاول انو يطلعها من عزلتها
يكعد يسولف وياها ساعات وهيه بس تستمع
وبكل مرة ثابت يتحاجه ويا.
ثابت::جيتك غلط ترى ابوك
جاي يعاتبني .
الباشا::بس اكيد مايتبرة منك
ولا يزعل عليك .
_مل منه تالي عافه والباشا لكاها فرصه
وبيوم جان يسولف وياها وانه ومديحه
كاعدين بطلب من ثابت طبعا شرط انو
مانتركهم وحدهم . بس ولا تقيد بينا
ودوم يناديها بالسمره
الباشا::اعتبريني صديق مثل ثابت
وردي عليه سولفي وياي سمرة
_اشرتلي اعدل كعدتها . كمت خليت المخاد
ورا ضهرها وسندت رجلها بحذر والتفتت علي.
سونه :: هالمرة انه اريد اسولفلك
سالفه و أَريد تسمعني و ما تقاطعني ..
_هز راسـه و عيونه موجهها
عليها بنظرة أهتمام و فضول
سونه ::عمر وانه كارهه لوني وشكلي
بسبب التنمر صيحون عليه ام اعطوب رغم
شعري مو عكش . يكلولي العبده ولوني مو اسود.
_ماتقيد وطلع جكارته شغلها
وسحب منها نفس بحركه .وهي تحجي.
سونه::ولهذا السبب دوم اتعارك بالمدرسه
وياخذونه للمديرة . من شكيتلها كلامهن
رزلتهن .
المديرة::حرام وعيب تنادوها بهاي الصفه
شنو عبده كلنا عبيد الله هذول اصحاب
البشرة السمراء الجمال كله بيهم .
سونه::ومنا ارتسخ بدماغي اختلافنا
ونسبت نفسي لاصحاب البشرة السمراء
طبعا الطالبات مابطلن من مغثتي وجان نشيدهم المفضل بيوم الخميس . اليله جمعه اليله عيد طنكرو كل العبيد ومن اتعارك وياهن يكولن ترى مانقصدج
جاي نغني .
_هيه تحجي وهو يستمعلها بتركيز
وعبالك جاي تحجيله قصه .
سونه::وبيوم من الايام و انه كاعده برحلتي واباوع
لمجموعة من البنات الي يتنمرهن ويقلدن على لون بشرتي.
_دنكت مديحه تمسح بدموعها
وسونه تسكت ثواني وترجع تكمل .
سونه::درت وجهي مركزة ويه للمعلمة تشرح الدرس الي جان موضوعه كريات الدم الحمراء و كريات الدم البيضاء ..
سرحت بتفكيري و رحت اربط الي كالته ويه لون بشرتي لا ارادياً نزلت عيوني على ايديه و تساءلت
ويه نفسي هل لون دمي يختلف عن دماء البقية ؟
نززني صوت المعلمة و هي تصيح :
-وين صافنة ام عطوب ؟
عاينت الها بأهتمام و رفعت ايدي حتى اسأل السؤال الي داهم تفكيري فجأة
كلتها ست يعني هسه الابيض يمتلك كريات دم بيضاء
و الاحمر يمتلك كريات دم حمراء و احنه السمر كريات دمنه سمراء ؟
فتحت عيونها متفاجئة و علت اصوات الضحك بالصف چني سولفت نكته ، التفتت اباوعلهم بأستغراب و سكتهم صوت المعلمة و هي تصيح بيهم يسكتون
المعلمه::اكطعو اصواتكم .
_رجعت التفتت الها و عقلي متعطش لسماع
اي معلومة منها ، ابتسمتلي بعطف و كالت .
المعلمه:ولج ام عطوب منين جبتي هالحجي ، شني كريات دم سمراء ؟ كل البشر عدهم كريات دم حمراء
و كريات دم بيضاء يلا اكعدي وانتبهي للدرس .
بيومها بالي ضل مشغول و أَحس المعلمة چذبت عليه جيف تستخطيني من تشوفهم يتنمرون عليه ، رجعت للبيت و انه عازمة. أَكتشف الحقيقة و من كثر تفكيري بالموضوع صرت احسب الدقايق شوكت يصير ..
الليل حتى امي وجويسم ينامون
أَسوي البراسي و أَحط حد للأسئلة الشاغلة بالي
تظاهرت بالنوم و من شفتهم غفو ،
گمت أَمشي على اطراف اصابيعي جان البيت اظلم
و بس صوت قطرات الماي المتقطع و هو يضرب بالحوض مال السنك الي يشبه صوت ضربات گلبي مشيت للمطبخ الي مشتغل بي ضوة خافت ، فريت عيوني داير مداير المكان ادور على شيء اكدر انفذ
بي تجربتي اخذت سجين زغيرة وطلعت للطارمه
وانه اتلفت اجت عيني عله المراية المكسورة الي معلكها ابوي بسمار بالحايط ودوم يحلق عليها ، اخذتها وانه اباوع بالحافة الحادة رغم خُفت
وتخيلت الالم والخوف الاخر من كتلت امي
لو درت بيه
بس ماتراجعت عن فكرتي
غمضت عيوني بقوة وشخط اصبعي مدري من الم مدري خوف شمرت المرايه الي بالكاع تكسرت ماحسيت الا بلسعة خفيفه ، فتحت عيني بخوف شفت الي ردت اشوفه ..قطرات الدَم و هي تنزل بغزارة .
_رفع راسه باوعلها .وجر حسرة مسموعه.
سونه ::ضغطت على الجرح بقوة
و ادور داير مدايري على شيء ابيض ،
امسح بي اريد اتاكد هويتي
و مالكيت غير قميص جويسم مال المدرسه على الحبل و الي ما يملك غيره و بلا شعور مني ركضت مسحت ايدي بي ودخلت للمطبخ لان بس هو ضوى
مشتغل امشي واتلفت خاف امي،تفز وتكتلني،
_غصت بعبرتها و سكتت شويه بعدين كملت
متجاهلة دموعها الي نزل بهدوء باوعتله بنظرة
الها الف تفسير وكالت
سونه::اباوع للقميص واحجي
ويه روحي هذا احمر .. والله احمر
يعني عندي كريات حمراء.. مو سمراء.
شلونكم شخباركم ان شاء الله تكونون بخير
ومنا اكلكم رفقا بااصحاب البشرة
السمراء .
