رواية كريات الدم السوداء الجزء الثاني الفصل الثانى عشر بقلم زحل شريف
_______قدر ______
_بعد السالفة السولفتها سونه للباشا والي مانعرف
شنو الغايه منها ؛بس الظاهر هو فهم قصدها رغم
ماجادلها ولا قاطعها وجان مكتفي بالاستماع كام وهو
يحاول يخفي ملامح القهر الي ظهرت واضحة بتعابير
وجهه.
_مَيل جسمه بمستوها ، همس و عيونه هايمة بوجها:
الباشا:كل الي ذكرتيهم گبل جانو شايفين أَختلافج نَقيصة بس . انه أَعتبرج شي مميز و ثَمين بالنسبة اليه ،انه عاشكج بكل أَختلافج بكل تفاصيلج بسمارج هذا الدوهني و بروحج الي سكنت گلبي و عقلي وهسة انـه اكول ياريت لو الله يطنيي بنية سمرة
تحمل كل صفاتج ؛واهم شيء سمارج.
قدر :استـمر ويـاها بالكلام وحسيته نسى
نفسه ونسى انه موجودة ؛تحركت متقصدة اطلع صوت بلكي يـحس وابتعدت عن المكان وهو مستمر يحجي ضليت واكفه .عين على باب غرفة سونه وعين على باب البيت خايفة لا ثابت يجي وهو محذرني ما أبقيهم وحدهم ..وعلى هذا الحجي وانا ارقب لمحته قرب الكرسي عليها مد ايده و أَحتضن جف ايديها سحبت ايدها بقوة ؛ ارتد لورا مصدوم من قسوة نفورها .
الباشا :تمام ،براحتج افهم انتِ تعبانة بس انه كل غايتي ونيتي يا سونه اكون يمج قريب واعوضج خليني احتويج .
_غمضت عيونها بيأس ودارت وجها عنه وكف وهو يتحسر بصوت مسموع راص چفوف ايديه بقهر ،
الباشا::خلينه نبدي من جديد واعتبري
نفسج ماشايفتني قبل وبهاي الفترة تكونت بينا
صداقه مثل صداقتج لثابت .
_ ماجنها تسمعه اخذ جكايرة
وطلع لحكته للباب التفت عليه
يحجي بقهر .
الباشا:رجعي يـابه انه اسد الباب وراي وحاولي تكونين قريبة عليها طلعيها من الحالة لبيها ولعزله لعايشتها.
جاوبته وانه اغلي قهر
_هيه رافضة قربي وما تريدني؛شكد حاولت وياها
اختي ما متقبلتني متقبلة بس ثابت .
الباشا:ميخالف اعذريها هيه مو بحالة عتب؛نفسيتها تعبانة، نبقى نحاول .شيء اكيد راح يتغير الوضع.
_هزيت راسي أي. وقبل مايطبك الباب كال.
الباشا :: اليوم البنات يجون يسلمون عليها وخلي زيارتهم الها قصيرة ولا تعوفيها وحدها يمهن.
_يمتى يجون؟
الباشا:ما اعرف؛بس اكيد العصر .
_حجاها وراح وهو يتحسر
دخلت تلكتني مديحة .
مديحة :ها راح ؟
_اي والعصر اهله يجون .
مديحة : منو امه وابو ؟
_هو كال البنات ، اعتيادي زوجته وزوجة اياد واخته واكيد امه تجي .
مديحة:وانه شلون اضم روحي ؟
_وعليمن ضامه روحج .
مديحه:بت الصخل، يعني شي اعتيادي
هسه يكعدن يتسألن وانه مالي خلك قال وقلت
كتلجن خلني اروح ما خليتني.
_اهله مو هيج،ما يسألون .
مديحة :معقولة ؟
_اي همه هاي طبيعتهم ما يخلوهن يدخلهن .
مديحة :زين شنو وضع زوجة الباشا ؟
_اريج ما تعرف بعلاقة سونه والباشا؛وهي تعرف سونه متزوجة يعني ماكو شك؛ وهسة عوفي الاسألة كومي وخلينا نكف البيت ونرتبه وبلكي نطلع سونه برا غرفتها تغير جو.
مديحة :هسه انه اكفكف البيت
وهو نظيف بس انتِ شبيج مزعوجة !
_انتِ عاجبج وضعنا؟
اختي الي تحطمت، ولااحنى طايلين
سما ولا كاع .وانه ما معروف شنو وضعي .
مديحة :والله تعجبيني من تحجين هيج.
_باوعتلها بقله صبر .تربعت كبالي
سحبت الشال من راسها طبكته وشدته
مثل ماجانت صوله تشده .وتحجي برود
مديحه:: انتِ مستقرة ،واختج تكدر تضل عندج.
_يا ستقرار تحجين عنه
تسمين وضعي ويا ثابت استقرار؟
مديحة : شلون يصير الاستقرار قابل مثل حالي
ما اعرف وين الله ذابني شو عيال ويحبوج ويردون خاطرج وخاطر اختج وجاين يتحمدون الها بسلامة .
_عفتها تحجي وكمت جبت نقالي
اتصلت على ثابت ابلغه بجية اهله؛دكيت وأنطاني رفض وشكد اكره هاي الحالة بي؛هسة هو زعلان لو
ما يريدني ،بس يلا سهلة خلي تكوم سونه على حيلها ،ردت اكوم و وصلتني رسالة منه
فتحتها وجان محتواها .
ثـابت :هـا يابه محتاجة شيء ؟
_زفرت نفس بعصبية ورديت سلامتك
بس الباشا بلغني اهلك يردون يجون يشوفون سونه.
ثابت :خير ان شاءالله بس الباشا وين بلغج؟
_وجنت متوقعه يتصل من يعرف
بالباشا جان هنا اتصل رديت بنفس نبرته .
ها يابه ؟ رد عليه وهو يستغفر
ثـابت: هلا بيهم سونه شلونها؟
_نفس وضعها.
ثابت::يعني ماحجت ويا الباشا ؟
_وعرفت غاية سؤاله رديت
بعصبيه. اي بس مو مثل حجيها وياك.
ثابت::تمام .يله محتاجه شي بعد؟
_لا بس غير تجي قبل لايجون
خاف يسالن لو شي عاد انته تعرف شنو تكللهم.
ثابت :ماكو داعي تكلليهم شي
وهنه مراح يسالن . لان الحجي منبه عليهم
مايحرجوكم بسؤال ولحد الان مايعرفون اختج
شنو مشكلتها.
_ميخالف هم لازم تجي احسن
حته سالن انته تعرف شتحجي وياهم.
الباشا::ترى جايين يسلمون عليها مو يخطبونها.
_ادري بس خوما تعوفني وحدي .
ثابت :شنو السالفة ينراد الها عونه ؛هي صينة جاي .
_شمرت التلفون وانه افور وكمـت؛ دخلت
بلغت سونه بجيتهم هزّت راسها اي
وصاحت على مديحة .
سونه : تعاي مديحة طلعيلي ملابس .
_كتلها انه اطلعلج
وجاوبتني بكل برود .
سونه:لا روحي كملي شغلج عيالج على جيه .
_شبيكم وياي فهموني ؛لهل درجة كارهتني
وكاره قربي انه شنو سويت وياج ؟
سونه:انه كارهتج هيج تشوفين.
_اي وكلكم كارهيني ترى مو ذنبي ابوج
اعتده على امي وصرت انه :شنو معنى اريد قربج ورافضتني .
سونه:قدر اترجاج البيه مكفيني لا زيديها عليه
عليمن هاي الهوسه انطني ملابسي وانه ابدل وطلعن.
_عفتها وانا مقهورة ؛للعصر اجو البنات ومثل
ما توقعت ام اسعد وياهن دخلتهن يمها . مديحه
ضمت روحها بالغرفه .
ام اسعد::طيبه ان شاء الله.
سونه::الله يسلمج خاله رحم والديج.
_ضلن اريج ونغم يتبسبسن عله
وبنين مكابله سونه وكل شويه تبوسها.
بنين::طيبي بسرعه . عفيه حتى
نتصاحب لان اختج ماعدها وفى للصحبه
نستني بالجذب ماتكول اخابر اسال.
_ردت عليها امها.
ام اسعد::غير ملتهيه بااختها .
بنين::يمه لا ادافعين ترى المكالمه
ماتاخذ من وقتها دقايق.
_وقبل ماارد عليها حجت نغم .
نغم::ماكو صداقه دوم والدليل
انتي ومريم شكد جنتو مقربين .
_حاولت ام اسعد تنهي حديثهن بس الضاهر
ابالهن موال واكدت شكي اريج الي طول الكعده
هي تباوع لسونه .
اريج::اي صدك عله طاري مريم خطيه اليوم الصبح لكيتها بالكراج تتلوى من معدتها . تكسر الخاطر الضاهر حملها مزعج وراح تتعب .
_رفعت راسي اباوع عليها
درات وجها لنغم ضليت ابلعم حاولت اخفي غيرتي
بس الضاهر سونه حست بيه ردت وهيه تسند جسمها
عله الحايط .
سونه::الله يرزقها بطفل يفرحكم
بي ثابت خوش ولد ويستاهل كل خير.
_وهذا الي يفرح ام اسعد التفتت لسونه
تتشكر منها .
ام اسعد::ياخاله عسى ربي يسعدج ويهنيج.
_اقل الساعه وترخصو . احس نار واشتعلت بكلبي
افتر بالصاله واحجي ويا روحي . اشوفه يحجي وياي
من ورا خشمه ومايجي ثاري المدام حامل ,اي طبعا يفرح جا غير بت عمه . وزوجته خو مايفكر بطفل مني,
حسيت رجليه وجعني كعدت كوى مسيطرة عله دموعي اسال واجاوب نفسي . وشبيج غيرانه
ياقدر مثل تحبينه لو شنو . غاركه بغيرتي مامنتبه
رفعت راسي لكيت مديحه واكفه تباوعلي .هزيت راسي بمعنى شكو .
مديحه::سلامتج. بس لو بهاي كعدتج
مشغله عقلج . جان هسه انتي تحسبين لايام ولادتج.
_جا ماتدرين موطلعت مرته حامل.
مديحه::اكيد تحبل يعني المزوجين شسوون
قابل يلعبون دومنه .
_حاولت ابين عدم اهتمامي للموضوع
اجت كعدت يمي . لا المزوجين يخلفون.
مديحه::اكيد تحبل .
خو مامزوجها حته تبنيله البيت .
_ههههه . اي وهذا الي جنت اقصده
من كتلج محتارة بوضعنا ومامستقرين.
مديحه:ولج الي متزوجه هيج واحد
شمنتضرة ماتخلف . بس كليلي .
_اتفاجئت بكلامها ،تحجي وادك عله
رجليها بحركه ذكرتني بسوالف سليمه .
مديحه::هيبه شكل واخلاق وفلوس
جا غير كل شهر اخلف. تدرين لو عندي
شكلج جا شسويت.
_نضرتلها متسأله .
مديحه:جا خلال شهر خليته سجل هل بيت
بااسمي ،واصير الكل بالكل جا خليته ينسه
اهله وعشيرته .
_اولا انتي جميله واجمل مني
ثانيا كملي كلامج سلوم نمبر 2.
مديحه؛؛سلوم ماعرفت تصرف خذاها الغرور
ونغدرت من جم واحد نذل والا هيه ماكو
وحده تلحكها اذا رادت اطيح اكبر رجال .
_حته لو كلامج صح، جا ازوجت
وخلفت .واستقرت مامعقوله ماصادفها واحد.
مديحه::كولي واحدات واحدين
بس الغدرها اختها الي استغلتها تدرين
جانت اذا تحط بالها يم شخص تجيبه زحف
بس تعلقت بجهال اختها حيل وهذا الي خلاهم يستغلونها جانن متفقات يطلعن من الصعده ويعيشن،عيشه نضيفه بس النذل رجل اختها باك الفلوس ،من بعدها كرهت الدنيا وصارت تعيش يومها ويمكن ماطلعت من الصعده لاجل محابس .
_عله اساس تحبه . ولج هيه حطمته
لو من البدايه منطيته لابو جان ماصار بي هيج.
مديحه::شوفي ماادافع الها . بس انه لو مكانها
هم اخاف واتردد لان ماجانت تعرف ابو يتقبله لو لا.
_يجوز تفكيرها صح .
مديحه::عاد كون من يطلع يلمها
ويعوض تعبها عليه.
_الي يسمعج يكول موصلته مرحله
بالتعليم وتعبانه عليه .
مديحه:شوفي حمايتها اله، ياما ولد مثل محابس مالهم اهل انقتلو ومحد داعه بحقهم والي نسجن والي ضاع .
_شتتوقعين اذا طلعت من السجن تبقه بالصعده.
مديحه::اذا محابس توله امرها ماتبقه
بس اذا طلع نذل ونكرها .
_هاي متأكدين منها هو قمه النذاله.
بس ليش ماترجع لاصلها يعني حسب ماعرفت
انتو الغجر الكم مكان معين .
مديحه::اسمعي يابت الصخل. المكان الي تحجين
عنه عبارة عن ارض معزوله لابيها ماي ولا اي شي
يساعد عله العيشه . بين قوسين مزبله منطقه مكطوعه
بانين بيها بيوت سكفها جينكو .
_انتو ليش هيج نابذينكم.
مديحه::لان مو عراقيين.
_مافهمت يعني شنو .
مديحه::حسب ماامي حجتلي
احنه اصلنه من الحسكه من سوريا جابهم صدام
بذاك الزمان وزعهم بالمحافظات الغربيه .
_اباوعلها تحجي وعبالك مؤرخ .
مديحه::وصار تزواج وانشرو بين المحافظات
بس ماتقبلونا كل باقي البشر ضلت كلمة الكاولي
هيه الحد الي مانع اختلاط الناس بينا يعني
ذاك من ذاك الي اخذ اله مرة من عدنا واكيد
يكطع تواصلها باهلها ويبعدها . والاكثر يتزوجها فترة،ويعوفها وهيج لحد هذا يومنا . ضلو يتنقلون مثل الرحاله من مكان لمكان لحد مااستقرو بالديوانيه .
_هم يكدرون يغيرون واقعهم يدرسون يشتغلون.
مديحه::ولان انتي بت راضي فأاكيد عقلج
مال صخول. وانه مضطرة افهمج .
_باوعتلها بعدم رضى.وهيه مستمرة تحجي.
مديحه::ولج لهسه ماسمحولهم بالاختلاط
بمدارس ويه البقيه. قبل فترة سمعت مخليلهم
كرفان عود مدرسه خاصه بيهم ومعينيلهم جم مدرس
لطمو ناشدو داعو محد سمعهم . يعني شيسون
بقو الحلوه تطلع تركص والعوجه تجدي وبليل يدكون ربابه ويتزاوجون بينهم .
_قطع حديثنا دخول ثابت كامت مديحه
سلم ودخل لسونه . لحكته وانه افور.
ثابت::شلونها صاحبتي اليوم .
سونه::زينه . بس ياريت تنقلني لبيتي.
ثابت::اي ان شاء الله هل يومين.
_جر الكرسي وكعد كبالها وبدون مايلتفت عليه
طلب مني، اجيبله جاي ،طلعت لكيت مديحه
بالمطبخ همزين القوري باقي بي حميته بسرعه وصبينله بكوب ، وهيه تباوعلي وكوى كاتمه ضحكتها.
مالي خلك احجي عفتها وطلعت خليته كباله.
ثابت::رحم الله والديج.
_حجاها ودنك يخوط بالجاي بحركه مستفزة
رفع الكوب شرب منه ونزله .
ثابت::شسالفه يابه ماعدكم جاي .
_باوعتله . ورديت بنفرزة
وهذا الي يمك شنو ميرندا .
ثابت::جاي محمي اكثر من مرة
يابه ليش عصبيه ترى سالتج عبالي ماعندج
لهيج حميتي الباقي وجبتي الي .
_ترى عادي يعني .
ثابت::لا مو عادي الشي اذا برد ورجعتي
عدتي عليه عملية التسخين يفقد طعمه .
_يحجي ويباوع لسونه الي كاتمه ضحكتها
اشرتلي بعنى روحي سوي غيرة درت وجهي
وضليت كاعده بعناد . مااهتم كمل حديثه وياها.
ثابت::اي يابه. انه حجيت ويا ابو ابو بشاير
وهو هواي تعذر فكال هل الايام يجي .
سونه::ماله داعي جيتهم .
ثابت::رد اعتبار الج والي . وبعدين اكو امر
مهم انتي جاهلته.
سونه::شنو؟
ثابت::اول شي هو طلاقج غير
صحيح . ثانيا غايبج وهذا الشي
الي لازم انتي اطالبين بي.
سونه::يمعود ماريد منهم شي ترى موذنبهم
انه حظي زفت . وتريد الصدك اصلا ماجنت هاويه
هل الزواج بس الضروف جبرتني ويمكن رب العالمين
حطهم بطريقي حته اكدر بفلوس المهر اشتري بيت يلمني .
ثابت::الحمد لله على كل حال.
_حجاها وكام لحكته . وانه احجي
اي صدك مبروك ،التفت باوعلي .رديت قصدي
عله حمل مريم ،صفن ثواني ونوب رد .
ثابت::الله يبارك بيج يوم الالج.
_رديت بغباء . شنو مباركتلك عله خطوبه
حته تكلي يوم الالج ترى مريم حامل .
ثابت::اي يابه اعرف .
_مو عله اساس ماتخلف .
ثابت:حكمة ربج خو ماتعترضين عله حكمته
يرزق من يشاء بغير حساب واعتقد هيج اطمنتي
اذا صار عندج طفل ماراح اخذه وانطي لمريم .
وهم ارجع اكلج يوم الالج .
_ عود من ازوج الله كريم
احجي واعصر بااديه وهو نضراته مسلطه
عليه هز راسه اي ومشه عبالي يروح لاهله
ردت اطبك الباب صاح بيه.
ثابت::عوفي الباب .
_اباوعله فتح السيارة نزل منها غراض
ودخل طبك الباب برجله . وانه امشي ورا مثل
الجاهل الي طالبه شغله من امه وهيه رافضه وهو
يفتر وراها بملحه نزل العلاليك وصاح عله مديحه اجت وهيه تلف حجابها .
ثابت::تعاي يابه اخذي هل غراض ان شاء
تكون قياسج .
_ردت وهيه مدنكه.
مديحه::مشكور ليش كلفت نفسك
ترى انه عندي هناك ملابس .
ثابت::ماكو تكلفه . ولا تتقيدين مني
اذا احتاجيتي شي كولي ترى انتي
حالج حال سونه وقدر .
_فكيت حلكي بصدمه، لا ناوي يجلطني
هو يتعمد لو يحجي صدك ومثل ماكال
بس ترجع سونه يطلكني ،نبهني من تفكيري كلامها.
مديحه::رحم الله والديك بس لو تخلوني
ارجع للصعده . يعني لشوكت ابقى هنا.
ثابت::شعدج راجعه. وبعدين سونه
راح تروح لبيتها اكيد ترحين وياها وهيج
ماتتقيدين وانتن بحسبة الخوات وحده تعرف
الثانيه اكعدن وربج يحل امورجن.
مديحه::بس ردت اسالك عن محابس
شوكت يطلع ؟
ثابت::عن قريب ان شاء الله.
_هزت راسها تمام دنكت اخذت الغراض ودخلت يم سونه وسدت باب الغرفه ،ضليت انه واكفه عافني اصفن وتوجه للغرفه تبعته ، يتحرك بهدوء شمرة سويج السيارة والجكاير نزع ساعته خلاها عله الميز فتح الكنتور اخذله ملابس دخل للحمام كعدت عله طرف الجربايه افكر شلون اخلق بينا حديث طلع ينشف بشعره اباوعله بتركيز دار وجه عليه ضليت مركزه ،نضراتي عليه نكت الخاولي وخلاه عله اجتافه وهو يحجي .
ثابت::هسه المفروض اخجل اغطي جسمي.
_يحجي ويرتب بالخاولي عله جسمه مافهمت
قصده اخذني عيوني بفضول ابحث عن شيء
جان ابالي من زمان اساله بس ماصحت فرصه ،فزيت من صفنتي بسبب قربه عليه بعدت بااحراج. وهو مبتسم.
ثابت::معقوله انه بهذا الجمال الي خلاج
تصفنين بيه ؟
_خرب عقلي احس صخنت
رديت عليه . اكيد لا .
ثابت::جا هاي صفتج عليمن.
شجنتي ادورين؟بعضلاتي؟
_عبالي الكه وشم .
ثابت::شنوووو ؟
_لا بس يعني ليش يسموك ابو حيه؟
رد ونضراته تتجول بوجهي بمكر.
ثابت::الحيه بنتي من زوجتي الجبيرة.
_هزيت ايدي ماراضيه بكلامه.
ثابت:بدال هل صفنه والتفكير
بالحيه جان صفنتي بوضعج.
_حسيت يرزل بيه ، رديت
وضعي معروف والحمد الله اختي رجعت
بلكي نكدر نرتب وضعنا .بس هم ماكتلي ليش يسموك ابو حيه.ضحك ودار سحب المخده خلاها ورا ضهره وهو يحجي .
ثابت::سالفه طويله تردين؟ اسولفها الج.
_ختم جملته بغمزة . كمت بسرعه
وانه احجي لا ماكو داعي هو انته سالفه
بيت المسيحي لحد هسه ماكملتها الي .
ثابت::ههههههههههه. هههههههه.
_التفتت عليه يضحك من كل كلبه.
ثابت::اذا تردين نكملها وفد مرة اسولفلج
عله الحيه ها شتكولين ؟
_فتحت الباب وطلعت وانه امسح بوجهي
احس عركت . ركضت شارده من فشلتي
دخلت يم البنات. لكيت مديحه تحجي وتناشغ
باوعت لسونه تعابير وجها ادل عله انزعاج
سالتها خير ياهو مات بعد. ماردت عليه صحت ماتحجن شكو ؟
مديحه::ماكو شي بس جنا نسولف.
_والي يسولف يبجي ؟
مديحه::اي اذكرت امي .
_مااقتنعت بالاجابه .وهنه وحده
تلوم الثانيه بالنضرات . كمت حضرت اكل
دخلت عله ثابت لكيته غافي تقربت اريد اكعده
حجيت بصوت ناصي تريد عشه مارد عليه مديت
اريد قاصده اكعده ماحسيت اله جارني.
ثابت::يابه ليش تتحارشين .
_اريد افلت روحي منه ماكو
شنو اتحارش ترى اجيت اكلك العشى جاهز.
ثابت::خو جان حجيتي ليش تلزميني
معقوله ادورين عله الوشم.
_يحجي بخدر . دفعته وكمت
لا ماادور شي. اله صدك شعجب نمت هنا
مو المفروض يم زوجتك محتفل بحملها.
ثابت::نوب حته للحمل سويتن احتفال.
المهم مو مشكله عود نحتفل باجر.بس انتي ليش معصبه وضايجه.قابل توج عرفتي انه مزوج لوضامها لو جذبت عليج ترى ماجبرتج .
_الضروف جبرتني الضروف خلتني اقبل .
لان ماجان عندي غير حل ،والا لو ماجنت بحاجتك بوقتها تلحم اوافق بهيج زواج،احجي بصوت عالي. سكتني كلامه الي خلاني انتبه لجفصاتي .
ثابت::وهسه ضروفج اختلفت
اولها اختج رجعت وعدها بيت الي يلمجن .
_جر البدي لبسه .
ثابت::وثانيها ورثج ايام وتستلمينه.
وهيج انتي مو مجبورة عليه.
_ردت اغير السالفه ردت اغطي عله
طياح حظي نوب جفصت بسوال العن
سالته صدك شنو اخبار القضيه.
ثابت::عله اساس هل اسبوع نكعد ونقسم
تالي اجلوها .
_ليش ؟
ثابت::كالو طارق مابقيله شي ويطلع
وهيج احسن كل الاطراف حاضرة.
_صدك شوكت يعني يايوم.
رد وهو ينضرلي باانزعاج.
ثابت::يجوز باجر او البعده.
_حجاها وطلع متوجه لغرفة سونه
صحت عليه اصبلك هنا لان البنات ينحرجن منك
مارد ولا عبالك يسمعني تبعته .دخل موجه كلامه لسونه
ثابت::ان شاء الله باجر اخذج نفتح الجبس
يبقى الابلاتين حسب ماكال دكتورج يحتاج فترة.
سونه::الله يوفقك مشكور تعبتك وياي.
ثابت::ولو كم صاحبه عندي يله اترخص.
_طلع ردت اطلع ورا صاح بيه .
ثابت::رجعي انه اقفل الباب.
_اطلقت سراح ادموعي . بجيت لحد ماتعبت
بوجهي للفراش حته مادخلت يمهن مدري شلون
غفيت كعدت عله صوت مديحه.
مديحه::كومي وجه الفكر .
_اباوعلها لابسه صايتها
اريد اركز سالتها وين رايحه؟
مديحه::جان حماج هنا
وفتح رجل سونه .
_وليش ماكعدتيني؟
مديحه::شفتج غاطه بالنوم كلت خليها ترتاح.
دكومي يله نريد نروح .
_شمرت الغطه وكمت وانه احجي وين؟ موليه..
مديحه::لبيت سونه.
_طلعت وراها لكيت سونه بالصاله ماده رجلها
وبصفها عكازه اباوع لامات غراضهن . التفت لثابت
دخل وهو يحجي .
ثابت::ها جاهزين.؟
سونه::اي ماعدنا شي بعد.
_رديت عليها شنو الماعدنا شي
خل عاد خل اغسل وجهي والبس صايتي.
ردت عليه. وعينها لثابت.
سونه::عود بعدين خلي رجلج يجيبج.
_فركت وجهي ، اريد افهم شيصير
كامت وهيه تستند عله عكازتها ، هامله وجودي
ولاجني كبالها . صحت بصوت عالي.ادريييي
ماتحبيني ولا معتبرتني اختج قاطعتني .
سونه::اترجاج مو حمل اي كلام .
_بس مجبورة تتحملين
نتجية غلطت ابوج الي اعتده عله امي وخلفوني
لان مالي مكان اروحله حاليا .
سونه::اتحملت نتجة غلط امي الي اتزوجت ابوي
وغلط ابوي وزواجه بسليمه وغلط جويسم الي اشتغلة،ويه الموس وغلط الدنيا هيه ضلت عله هاي .
_بعد مشكلتج.
سونه::لان انتي اختي واحبج ،انه تحملت البعد ، ولان اعرف ثابت شنو ماكدرت اكلج امشي وياي انتي حاليا عله ذمته.
_مشكورة ،وبالنسبه اله يخلصني من ذمته
تحمليني هاي الايام بس خل يطلع طارق وبعد ماروايج وجهي ،هسه عرفت ليش امي جانت رافضه جيتي الكم ثاري تعرف انتو ماعدكم ضمير.سكتني ثابت بصوته العالي.
ثابت::روحي لبسي صايتج بين مااصعد سونه
للسيارة تعاي مديحه شيلي الغراض يابه.
_طلعو ركضت للغرفه لميت ملابسي
ولبست صايت وشمرت الشال عله راسي وطلعت وراهم اشرلي اصعدي صعدت المسافه مو بعيده نزلنه اباوع بيت زغير مبين بنائه جديد دخلنه وسلم عله سونه وراح صاحت عليه سونه باوعتلها .
سونه::شوفي اذا مخليه ابالج تطلكين
ومنتضرة ابن فاروق ..
_شمرت الصايه والشال وكعدت كبالها.
مامنتضرة احد غير بس حقي اخذه وماروايكم وجهي.
سونه::وييييين وين تولين؟.
_لجهنم .مااعتقد راح تنقهرين.
حجيتها وكمت اباوع للبيت غرفتين زغار
الصاله وصحيات جوى الدرج ، مطبخ مرتب اشرتلي مديحه تبعتها عزلنه ملابس سونه خلص النهار وانه دموعي تصب لاهيه حاجتني بعد ولا انه واجهتها
وهيج صار وضعنا نتواجه بس وقت الاكل وبقية الوقت نخلصه كل وحده كاعده بمكان. بس الي مافهمته وضع مديحه الي تغير من بعد ذاك اليوم الشفتها تبجي بي . اباوعلها تتهرب من نضرات سونه الي رجعت نفس حالتها ملتزمه الصمت سالتها شبيج.
مديحه::مابيه بس احس روحي مختنكه.
ضايعه .مااعرف شسوي
_شتسوين يعني هاي حياتنا ولازم نتعود .
مديحه::انتي ويه اختج .وحده تسند الثانيه
اله انه ضاله مثل بزون الشارع مالي مئوا.
_هههه شحال لو ماسمعتي اختي الي تبرت مني.
مديحه::تدرين انتي شنو يرادلج؟
_سالتها وانه منتضرة اجابه .
شنو ؟
مديحه::كتله معدله يابت الصخل
ماتسدين حلكج اجفصين وتصيحين مايردوني.
_سكتنا من طلعت سونه من غرفتها
تتكئ عله عكازه لحكتها كعدت بالطارمه تباوع بضياع تحسرت بصوت مسموع تقربت عليها باوعتلي ودنكت ودومعها تنزل . وعبالك جنت منتضرتها حته ابجي
وياها. التفت عليه .
سونه::من مات جويسم . حاولت
الم امي وجعفر ردت احس الي اهل
بس الموت استكثر عليه هل احساس .
_تحجي وتمسح بدموعها .
سونه::من اجيتي انتي فرحت صح جنت خايفه واعتبرت وجودج نقطه ضعف يلزموني منها بس كلت الله عوضني عن اهلي بيها .
_جا ليش هيج تردين تبعديني
عنج ليش؟ زغرتيني كدام ثابت .
سونه::مالي نفس اشرح بس خل ابالج
ياقدر اذا عفتي تخسرين .
_ولج شخسر شخسر من البداية زواجنا
اتفاق وبعدها كال لان مرتي ماتخلف
وهسه سمعتي هيه حامل .
سونه::خلينه واقعيين ،لنفرض انتي بعدج
عند امج ومكمله دراسه ، شمتوقعه الي يتقدملج
ويعرف نسبج وماضي امج راح يتقبلج ؟
_اكيد لا.
سونه::يعني ثابت فرصه ماتتعوض
الف وحده تتمنى .
_وانه مااتمنى شي غير اختفي من الوجود .ولو هذا تفكيرج جان قبلتي بالباشا.
سونه::ولج شقبل شقبل .يحطني بشقه
ويجي يسهر يمي ،وفترة ويعوفني . تقيسين
زواجج بثابت الي فرضج عله الكل بطلب الباشا الي.
_لو عندي شهاده وفلوس ماافكر بالزواج.
سونه::خلص اذا مارايدته ، يطلكج وبالنسبه
للفلوس هو كال هل ايام ينتهي الموضوع.
_افضل حل ، نعيش انه وياج
نبعد منا نروح بمكان محد يعرفنا بي. سكتت
ورا شويه طلعت مديحه تعدل بشالها باوعتلها
بمعنى وين رايحه .
مديحه::كلت اروح اشوف البيت هسه
تلكين الجريذيه معرسات بي .
سونه::لازم تزور الصعده .
مديحه::شبيج يمعوده ترى ماكلت ابقى هناك.
سونه::وشعدج باقيه ، ترى اول وتالي
يندل ويعرف بيج يمنا .
مديحه::راح تبقين تعيريني كل شويه.
سونه::كومي قدر جيبي جنطتي
اطيها كروة . خل تنكسح .
_كمت وهنه مستمرات ، اطتها فلوس
وقبل ماتطلع صاحت عليها.سونه
سونه::اوكفي اخذي رقمي خاف يصير شي
عود خابريني .
_كتلها حته رقمي هم اخذي.
مديحه::وين اسجله عله كصتي
حته ماادري نقالي بقه بالبيت لو رجلج اخذه.
_صدك بيش،اسجله الج
وحته قلم ماعدنا .
سونه::دطلعي بلكي اكو اسواق،جيبيلنا
قلم ودفتر.
_طلعت مديحه ورا شويه اجت
جايبه علاكه حلويات. ضحكت عليها يعني
وديناح تجيبين قلم .
مديحه::ديله سجلي الارقام.
_لازمه الجبس تاكل وتحجي
سجلت ارقامنا وراحت ، دخلنا انه وسونه
لليل ومديحه مامنها خبر قلقنا عليها .
سونه:خل اخابر ثابت ابلغه شتكولين؟
_كيفج بس معقوله صار عليها شي.
اتصلت بي بلغته . ورا شويه اجه.
ثابت::ليش خليتيها تروح.
سونه::هيه لحت وماردت اضغط عليها
ثابت::والله مااعرف شكلج بس كاسرة خاطري
شنو مصيرها مااعرف.
سونه::املها بمحابس .
ثابت::ان شاالله مايخيب املها .
سونه::يعني شنو قصدك.؟
_وقبل مايجاوب دك نقال سونه ومن ردها
عرفت مديحه الي اتصلت.
سونه::خرب ابوج يعني ماتكولين وراي بشر
يقلق مو وصيتج.
_رزلتها سونه وذيج مدري شنو ترد
بس الفهمته تبات هناك . سدت التلفون سونه
والتفتت لثابت .
سونه::اعذرني قلقتك .
ثابت::يله همزين اطمنا عليها.
_راح ثابت وثاني يوم كاعدين انه وسونه
اتصلت مديحه فتحت وخليت النقال بينا .
مديحه::ها شلونجن
سونه::زينين ليش ماجيتي؟
مديحه::غير طاح حضي
بالتنضيف ولج ملعوب بالبيت لعب.
انوب الثلاجه شبيها هيج ريحتها تخنك .
_ضلت تحجي وسونه ترد.
سونه::من الاخير تجين لو لا؟
مديحه::اجي بس مو اليوم .
_مانطتها مجال تكمل . سحبت النقال
ونهت المكالمه . سالتها ليش تتهرب منج.
سونه::لان غبيه.
_بقينا فترة ومديحه يوميه تطلع بعذر
ثابت جياته قلت . الباشا يحاول بكل وسيله
يقنع سونه بصفحه ٠جديده بس هيه رافضه.
وهو ماايس منها . كاعده اغسل بالطارمه وصحت عليه طفيت الماطور ودخلت لكيتها لازمه نقالي .
سونه::ماعرف منو يتصل بيج
_اخذته منها باوعت بس رقم
ترددت اجاوب وبس خلصت المكالمه
وصلتني رساله فتحتها وانصدم بمحتواها.
انه طارق جاوبي.
_فكيت حلكي بصدمه
مدري فرح مدري استغراب رفعت راسي لسونه
الي منتضرة مني تفسير. كتلها طارق.
سونه::شنوو .
_هذا طارق . بعدنا نحجي ودك
ماخلتني اجاوب . سحبته مني .
سونه::منو يكول صدك يجوز واحد من اهله.
_شسالفه ترى اعرف صوته.
سونه::حته لو هم لازم نتاكد .
_فتحت خط وردت عليه .
سونه::الووو منو .
طارق::مرحبا اذا ممكن اكلم قدر.
_هزيت راسي أي بعمنى هو .شمرت النقال عليه
رديت عليه وانه اناشغ ها ها طارق شلونك.
طارق::جدر لج وين انتي يمعوده صار شكد
ادور عليج .
_ترددت بالاجابه رد كال.
طارق::تسمعيني ،انتي وين امي ومحمود يكولون
تزوجت صدك هل حجي.
_مسحت دموعي ، اي صح ازوجت لان امك ومحمود سوو بيه الماصاير.
طارق::المهم شلون اكدر اشوفج؟
_التفت عله سونه ، الي سحبت النقال مني
وسدته بوجهه . سالتها ليش هيج سويتي.
سونه::ولج شيشوف منج انتي شبيج صايرة
حمارة ،مافكرتي اذا رجلج يعرف شسوي بينا.
_الي يسمعج يكول واعدته براس الشارع
ترى اكيد ماراح اطلعله بموعد بس شتكولين ؟
اذا ثابت عرف يخليني التقي بي .
سونه:يجوز بس مااعتقد هسه.
_مافهمت؟
سونه::هو قبل كم يوم كالي
دزيت عله محمود حته يخصم الموضوع
يعني حته لو اله نيه يخليج تشوفين طارق
هم مو هسه.
_ليش .
سونه:: مانعرف الاخ طارق مكالمته
شنو الغايه منها .
_هيه تحجي ونقالي يدك
غلقته وشمرته عله صفحه وجرت نقالها
اتصلت بثابت. طلبت منه يجي .
سونه::انبلغه احسن حته لايكول ماكتلي.
_سكتت لليل اجه ،بعد ماشرب جاي
وسال عن صحة سونه كال.
ثابت::اي يابه اسمعج شنو ردتي مني؟
_سولفتله عن مكالمة طارق.
سونه::لان انته صاحبي واخوي
ماردت تسمع من غيري .
ثابت::والنعم منج .وانه ماراح اجاملج
لان اي شخص عنده غيرة مايتقبل طلب طارق
واعتقد حقي لان هو لا ابن عمها ولا اله صله رحم بيها.
_رديت عليه. بس احنه ربينا سوى
رفع راسه باوعلي وطول بنضرته .
ثابت::شرعا ماكو خوة بمعاشرة بين الرجل والمرأة
عرفا غيرتي ماتسمح اخلي زوجتي تلتقي بشخص
غريب والاهم بينا وبينه،،،، قضيه ورث لحد الان مانحلت،اكول لو تخليني اكمل شغلي وياهم وبعدها افكر بالموضوع .
_ردت عليه سونه.
سونه::هاي هيه الي تشوفه.
_كام وهو يحجي.
ثابت::مايهون عليه تبقين لوحدج
بس مضطر اخذ قدر لان جاي تعرض للاحراج
من سؤال اهلي عنها. شتكولين لو تمشين ويانا.
سونه::لا خليني هنا انه ارتاح لوحدي.
_اباوعله يحجي ولاغي وجودي
صحت ومنو كالكم انه اريد اروح. التفت عليه
ثابت::مافهمت . يعني شنو.
_ابقه يم اختي.
ثابت::دوم يوم ؟
_دوم ،هز راسه تمام ودار موجه كلامه لسونه.
ثابت::شتكولين ياصاحبتي.
سونه::لا موكيفها تروح وغصبن عليها.
ثابت::وانه مااغصب بشر ان مارايده
تبقى وياي كلمن يروح لحاله .
_حجيت بعبرة ،اي هيج احسن.
ثابت::بس مو هسه،يعني موحلوة بحقي
تدرين انه عارضت رفض اهلي وجبرتهم
يتقبلونج وكدام الناس سوينا عرس وهم مابهون عليه يحجون عليجن لو يذموجن.
_وشنو يحجون شمسوين ويحجون علينا؟
ثابت::اول كلمه تنكال عنج انو ها موكنالك
ترى هذن مو مال ستر . وثاني كلمه شوف خلصن
مصلحتهن براسك وعاركت عليهن ومن طلع طارق
كالتلك طلكني .
_مانطاني مجال احجي.
ثابت::ف خلي تمر كم شهر وبعدها
نكول ماترهمنا ،،عادي ياما ناس عدهم جهال وطلكو،،عود نسويلنا مشكله اكتلج كتله قويه تستحق اطلبين الطلاك مني اما هسه ترحين وياي وتصرفين طبيعي.
سونه::هاي هيه . كلامك صح .
_اشرتلي بمعنى كومي ، دخلت للغرفه ولبست
صايتي وطلعت لكيته واكف بالباب.يحجي ويه سونه
ثابت::ترى المنطقه امان كلها اهلنه وجيران
من جنه جهال . يعني لاتخافين قفلي بابج
واي شي يصير بس خابري ٣ دقايق اكون يمج.
_هزت راسها ،اي دار عليه اشرلي يله
بوست سونه وصعدت السيارة طول الطريق
هو ساكت . وصلنه البيت كعد بالصاله وانه فتت
للغرفه ضليت محتارة شلون اتصرف ليش هيج حياتي ليش اريده وماريده . نززني صوته رفعت راسي اباوع اله يحجي بدون مايباوعلي.
ثابت::يله انه رايح عود اذا احتاجيتي شي
خابريني.
_فكيت حلكي يعني شنو .
ثابت::شنو الشنو .
_وليش جبتني .
ثابت::اعتقد سمعتي كلامي ويا اختج.
_وعود هسه تريد تقنعني لهذا السبب
جبتني . هههه .
ثابت::لنفس السبب الي خلاج تجين .
_______سلاسل______
_ماكدرت انام حسيت البيت وحشه
كل يوم قدر يمي . ضليت اتكلب مرة اصفن بمديحه الي متعلكه بذيال محابس . ومرة اصفن بقدر الي حالها تغير وقبل كم يوم انه احجي ويه ثابت واتعذر عن تصرفاتها الي صارت ماتنفهم .
ثابت::ترى اي شخص بمكانها يتصرف نفس التصرف
حقها ضايعه وتريدج لان انتي الشي الوحيد الي يثبت
هويتها انو عدها اهل لاتلومينها .
_ونوب فاجئتني بطلبها للطلاك . حايرة
قبل جان همي البيت وكل ضني اذا صار عندي مكان ارتاح ومااحتاج احد بس شو زادت حاجتي مدري شلون غفيت واول ماكعدت خابرتها ردت بعصبيه.
قدر::شمرني وراح لاهله .كتلج ماريد اجي.
_تحملي فترة ويطلكج
ترى حقه هم الناس تشمت بي.سدته ماراضيه بكلامي،رديت خابرت مديحه ماردت وادري تتهرب خاف ارزلها لان انطت رقم قدر لطارق . وهيج ايام تمر والباشا الي مكالماته ماتخلص واذا ماجاوبه يدز رساله يهدد بيها.
الباشا::اذا ماتجاوبين اجي للباب.
_رديت بملل . شتريد باشا.
الباشا::اريدج سمرة.
_وانه مارايده حته روحي اترجاك
تخليني بحالي . حجيتها وسديت النقال
وبعد ايام خابرني ثابت كال.
ثابت::ها يابه شلونج.
_حمد الله . طمني شنو وضع قدر.
ثابت::خلينا بوضعج هسه،ابو بشاير وفيصل جايين يعني فد ساعه يدخلون البصرة. شتكولين نخلي كعدتهم يم الحجي ابو اسعد ها اجي عليج .
_لا استحي من البنات وهم ماريد
احرجك جيبهم هنا احسن .
ثابت::تمام راح انتضرهم
يوصلون اجيبهم واجيب الحجي واجي.
_ضليت انتضرهم لحد مااجو
وبعد السلام . تفاجئت بكلام فيصل.
فيصل::انا حاب انكمل وان تدرين بشاير
بعد ماترد عله ذمتي شنو رايك اخليلك هني
بيت وابكى اروح واجي عليك .
_ماانطيته مجال يكمل
رديت . مالنه قسمه .
ثابت::هاي هيه . اعتقد هيج انفصالكم افضل.
_ضلو يحجون وابو اسعد يعتب عليهم
وهمه يتعذرون الى ان ايسو من رجعتي
ثابت::تمام مادام احنه موجودين
حته نكون شهود للطلاك .
_خابر شيخ واتفق ويا . وقبل مايوصل
كمت انه ورا شويه دخل الشيخ . وتم طلاكي
بطريقه رسميه بشهادة ثابت وابو اسعد .
ثابت::بقى غايبها وهذا حق ياريت
يوصلها .
ابو بشاير::من عيني .
_طلعو وابو اسعد وثابت وياهم ،كعدت اباوع لروحي بالمريا وهاي عده ثالثه بعد شتشوفين ياسونه . وهيج ايامي ضلت مديحه تجي وتروح عليه قدر مسويتلها زعله والباشا ماايس ومستمر بمحاولاته ، استحي من ثابت واسكت عنه رغم ملحته فزيت عله صوت مديحه باوعتلها
لابسه صايتها واكفه عله راسي . عدلت روحي
وسألتها وين العزم بس لاطالعه اتجدين.
مديحه::لا رايحه للصعده.
_صحت ولججججج انتي شعدج هناك
فهميني صخام وبالسجن . بعد شكو موليه
ليش احس عدج مصيبه. ردت وهيه تضحك.
مديحه::طلع صار جم يوم .
_كمت اغسل اريد اصحصح
وهيه تفتر وراي وتحجي.
مديحه::ها اروح ترى ماتاخر .
_نشفت وجهي وشمرت الخاولي عليها
وانه اصرخ . منو كالج طلع .
مديحه::خابرتني فلوجه كالت شفته اجه
للشارع .
_وليش مااجه عليج ؟
مديحه::يجوز يدور عليه يجوز ابو واهل ثابت
ماكالوله انه يمج .
_باوعتلها . شريد احجي ادري ماتقنع.
كتلها روحي تقربت باستني وطلعت
سديت الباب وراها وحته مافكيت ريجي
خابرت ثابت سالته . سكت شويه ورد
ثابت::اي صح طلع .بس انه ما كتلج
حته لا مديحه تنقهر .
_مافهمت.
ثابت::والله ماعرف شكول. بس ترى الخال
مستحيل يخلي يرتبط بيها. هاي اولا وثانيه
هو محابس ماسال عنها. الافضل انو تجيبيها
يمج وبلكي يصحلها ابن حلال وتنستر.
_ضليت اصفن . انحرجت من ثابت ترخصت
منه ونهيت المكالمه. بقيت انتضر خبر من مديحه
يومين وهيه ماكو خابرتها ردت .
مديحه::ها ام اعطوب . شلونج
_لا الله عليج . توج اتذكرتي. ولج احجي
شنو صار اجاج السافل لو لا.
مديحه::اي اجه وسالني عنج ويسلم عليج.
_خوش وبعدين . شناوي يسوي.
مديحه::بعده يكول لحد الان ماعندي ميانه
ويه ابوي خل اشوف وضعي ان تقبلوني مرته وبناته
حته اكله اريد اتزوج .
_خوش . جا بعد شعدج باقيه هناك
مديحه::مو هو يوميه يجي لولد الصعده
_سديته احس تعبت. منا هيه منا قدر
الي مااعرف شتريد . تصيح طلكني وتغار من مرته
لليل وانه افتر بالبيت،،،،، احس اختنكت طلعت للطارمه جريت الكرسي وكعدت ابحوش بالنقال اريد اطلعلي اغنيه واندك الباب باوعت للساعه الوقت متاخر منو يجيني لو ثابت جان خابر . صحت بصوت ناصي منو.
الباشا::انه سمرة .
_غمضت بقهر رديت شتريد باشا
الباشا::احجي وياج اسمعيني.
_شسمع باشا هيه اغنيه ويوميه نسمعها
الباشا::نحجي لو اقنعج لو تقنعيني
_لا اقنعك ولا تقنعني روح عليك الله.
الباشا::تحجي من ورا الباب شبيج
ليش محسستني انه متهجم عليج
وخايفه مني لو ماتعرفيني كبل انتي ليش هيج تسوين
_عفته يحجي وخابرت لثابت.كتله .
ثابت::خرب ضميرة شبي تخبل
_تعاله فدوى اروحلك ترى مبين شارب.
ثابت::شجي يابه انه بطريق خارجي اقل شي
٤ ساعات يله اوصل .
_جا شسوي .
ثابت::دروحي خل اشوف بلكي اياد موجود
_لالا لاتكول لاهله خاف تصير مشكله
وهم استحي من الحجي خاف يسمع .
ثابت::دسدي خل اخابرة .
_سديت وتقربت للباب والباشا مستمر
يحجي .
الباشا::ولج فتحي الباب ام اعطوب
ليش تخليني اطفر السياج .
_سكته صوت نقاله عرفت ثابت خابرة.
اسمعه يداهر ويا . خفت من الجيران تشوفه
كلت اليوم لازم اخلي حد وانهي الموضوع فتحت
الباب تفاجئ من شافني اشرتله فوت دخل وهو يحجي.
الباشا::بس فهميني انتي خايفه مني
مثل انه مخبل .ولج ضاله تتحامين بثابت مني
ليششش فهميني .
_دخلنه للصاله كعد عفته ورديت عله
ثابت الي حرك النقال .
ثابت::وينج يمعوده ؟وين وله هذا.
_هذا دخلته.
ثابت::تحجين صدك ليش فتحتي الباب.
_شسوي وانته كتلي الجوارين تعرفكم
خفت احد يشوفه وتصير حجايه لو يوصل خبر
لابو ترى الناس تريدلها سالفه.
ثابت::الله يستر عليج يابه وينه
افتحي السماعه خل احجي ويا.
_فتحت الصوت وكفت كبال الباشا الي
يباوعلي ويهز بيده حجه ثابت.
ثابت::اسمع ولك لهنا وكافي تكوم
تروح لبيتك وخل اوصل وانه اعرف شسوي.
الباشا::ليش محسسني مسوي جريمه
كتلك اريد احجي وياها لاتدخل .
ثابت::شتحجي فهمنا شتريد الف مرة كنالك
عوف البت بحالها يااخي ماتريد تزوج تجبرها .
الباشا::لا مااجبرها نحجي واذا مااتفقنا
بعد مااراويها وجهي .
ثابت::احجي نسمعك ؟
_كام بحركه سريعه جر النقال مني سده ورجع كعد بمكانه واشرلي اكعدي هزيت راسي اي وكعدت كباله .
الباشا::شنو الي يرضيج شنو الي يخليج
تثقين بيه من جديد؟
_صدكني مارايده شي . بس مالي خلك ولا مفكرة ولا ناويه ادخل احد لحياتي انه كبل طلبت منك تحميني لان ماعندي مكان هسه الحمد الله بيتي وكاعده .
الباشا::وانه سمرة .
_انته شبيك عايش بين اهلك .
الباشا::ماعايش سمرة. خلينه نعيش
ليش رافضتني . ليش ؟
_شنعيش فهمني اله انته تعوف اهلك
وتتنازل عن رتبتك ،لو انه اقبل اعيش بالضلمه .
الباشا::بغض النضر عن كلام ثابت الي
تارس راسج بي ومحفظج الكليشه عدل .
_ ياثابت انته ليش مصر تخليني بت ليل ترى من احقي اعيش مثل البشر .اريد احس انه الي حق ارفض توني يله تمتعت بشعور الخصوصيه باب مسدود ،،مامجبورة ادخل ياهو الجان لان بحاجته
و لازم اتحمل مثل ماجنت بالصعده .
الباشا::اعيشج احسن عيشه اطيني فرصه.
_لو شما تسوي ماتكدر تواجه ناسك بيه وحته لو عاندتهم انه شنو ذنبي ابقه زوجه بس بالاسم ، هم اريد اخلف اسوي عائله.
الباشا::ومنو كالج انه ماريدج تخلفين.
_صحت بقهر. انته كل عقلك تحجي
ولك لو انزع جلدي واصبغ شعري اصفر
والبس عدسات .هم مااجيب ولد مثل الجابته اريج . افهم جينات وراثيه لازم يطلع علينا وحضي واعرفه تالي يطلع يشبه ابوي.
الباشا::شوكت ماذبيته عود احجي
ولج هو صار وانه كتلج اسود ماريده.
_اهلك ينبذونه يبقه ابن العبده ،
ويبقه ابن اريج من اصلكم .
الباشا::الله يحركك يا ثابت ياسافل
هذا كلامه وسوالفه.
_هو يصيح والنقال يدك كمت اخذته من يمه
ورديت عله ثابت الي صوته اعله من صوت الباشا.
ثابت::وين وله الحقير.
_هذا كبالي .
ثابت::يابه والله محتار وخجلان منج
بس هينه اوصل ويصير خير .
_رديت وعيني للباشا الي فاير ،ترى جاي يحجي
مابدر منه شي موزين.
ثابت::اعرف بس هم مايصير وجوده يمج
من باب الشرع حرام ومن باب العرف عيب
وموحلوة بحقج .
_ والضاهر الباشا سمع كلامه
لان صوته عالي صاح مسمعه.
الباشا::ماتعرف الحلال والحرام
ولك لييش ، هيج متقصد تبعدها عني.
_فتحت الصوت وشمرت النقال يمه
ضلو واحد يرد عله الثاني
ثابت::هيه كبالك انه شعليه،تكلك ماريدك تغصبها .
الباشا:: اطلع منها انته انه احجي وياها.
ثابت::احجي انسمعك فضها خو ماتريد تبقى
للصبح تحجي .
الباشا::وانته شغاثك ابقه شهر شعليك.
ثابت::هينه ماضل شي واوصل .
الباشا::هيه هاي اليله لو اقنعها لو تقنعني
اترجاك تعوفنا .بالخوى البينه . لخاطري .
_صاح ثابت .
ثابت::وينج يابه اخذي النقال وسدي الصوت
اريدج بموضوع .
_دنكت اخذته وسويت مثل ماراد
كتله اسمعك .
ثابت::شوفي انه لو ما اعرف بوجوده عادي ماجان حجيت بس انتي بلغتيني وهيج اتحمل ذنب
بعتبار القيتي عليه الحجه .
_لا وانته شعليك.
ثابت::والله مااعرف شلون احجي بس
ياسونه هذا رجال وعاشك وكل ثنين الشيطان
ثالثهم .والمصيبه هو شارب يعني غير مدرك لتصرفاته
_حجيت مسكته لا لا وبعدين حتى لو هو
مثل ماتكول انه مستحيل اسكت عنه.
ثابت:: ولو ميصير احجي وياج هيج بس مجبور يعني اقل شي ممكن يصدر منه ،حظن بوسه وهيج راح تحملين نفسج ذنب ،لو عايفته بالباب ايمل ويروح
_يعني شسوي اعوفه يفضحني
كدام الجيران .
ثابت::اسمعي يابه عندي حل مؤقت
شتكولين لو اعقدلكم مؤقت يعني لحد مااوصل.
_مافهمت شنو يعني.
ثابت::عقد متعه بس عله مود نضمن شرعيه
وجوده يمج وهم تحسبا .
_ماخليته يكمل . رديت لا مستحيل شنو
نوب يلكاها حجه ويضل يوميه جاي .
ثابت::يابه اعتبري نفسج صاعده بطيارة وطاحت بيكم بصحراء . وبارده وماكو غير،الباشا وعنده بطانيه وطلبتي تتغطين ويا ،وكالج حرام اله بحاله وحده نعقد مؤقت .
_هاي اذا طايحه الطيارة بصحراء.
ثابت::وهل غضب العن من الطيارة اخذي كلامي. وثقي بيه انتي مو تكولين حته اذا هو هيج انه مااقبل بعد منين خايفه . خو هو مايغصبج عله شي . بس اذا رفضتي انه مضطر ابلغ ابو يجي ياخذه ها شتكولين.
_حرجني صفنت ثواني نوب كلت ،هسه انه عليمن اداهرة خل يسوي الي يكول عليه رديت خوش يله بس شلون.
ثابت::دفتحي الصوت خل احجي ويا.
_ثابت يحجي وهو يضحك هزيت ايدي .
الباشا::يابه غير الي سماك ابو حيه شريف.
ثابت::دخل اوصل وانه اروايك الحيه وابوها.
شوف ولك عقد مؤقت .
الباشا::نعم قبلت .
_رغم الموقف المخزي ابتسمت
صاح ثابت.
ثابت::قبلوك بجهنم ولك هو لعب غير تفهم الصيغه
الباشا::فهمني بروح ابوك.
_عبالك اجته رحمه صاح ثابت .
ثابت::وينج يابه . شكد نحدد المده
_وقبل ماارد صاح الباشا .
الباشا::ابداعت الحيه سنه سنه .
ثابت::ساعات ساعات واوصل .
_اخر شي حددوها ٣ ايام ولقنه الصيغه ثابت
الباشا::هسه احنه مزوجين يعني اذا هيج توكل .
ثابت::هينه .
_سده النقال وهو يسب بالباشا . الي كام متوجه عليه . باوعتله وانه احجي ها خير شو جنك
مصدك عقدت عليه .
الباشا::ولج شفتيني سرسحت البنطرون
بت الكلب مو شعلت اهلي شبيج وياي شبيج.
_حجاها وجرني لحظنه ارد افلت روحي ماكدرت بجيت بصوت عالي. صحت شوف مو كتلك تريدني بت ليل جا اعرف بيك المن اجيت .
الباشا:"بنات اليل تارسات الشارع
ولج والله احبج ليش ماجاي تصدكين.
_يحجي ويجر بيه للغرفه. تقدم للجربايه
باوعتله ودموعي تنزل . اسمعني ياباشا اذا صار شي
تحلم تشوفني اخذ اختي وامشي .دفعني وصاح
الباشا::ولج هسه انه نازع هدومي
سمرا تعبتيني . اترجاج خلينه نحجي.
_تمدد وجرني يمه . كتله احجي اسمعك
الباشا::اريد اغفه اعوض ليالي السهر وانه ادورج
انام لان طيرتي النوم من عيني .ارد اسمعج مشتاق
لصوتج سمرا .
_جر ايدي خلاها جوى راسه وغمض
صفنت شسوي وين اروح بعد مالي ضله بينهم
بس يجي ثابت اشوف مصير قدر اذا اطلكت اخذها واروح واذا بقت بعد احسن حته مااحتار بيها ابعد ومادلي بشر مكاني نبهني من صفنتي طلبه.
الباشا::غنيلي سمرا ترى حلال تغنين لزوجج
_وبدون جدل غنيت . ومدري شجاب
هل موال عله بالي . اوصيك بيه لو متت بين الضلوع
ادفني انه ماريد غيرك بالغسل بدموعك تغسلني
بيدك تحل ليه الجفن وتحبني وتنيمني بيدك
تحللللل ليه الجفن .
الباشا::وتحبني وتنيمني .
_سند نفسه عله الجربايه ومد ايده لجيب
بنطرونه طلع جكايرة شعل وحده يدخن وعينه الي
وعبالك يسمعني بعيونه . اندك الباب عرفته ثابت
وقبل ماكوم طلع الباشا فتحله الباب اسمعهم يتصايحون.
ثابت::انه الي راح ابيع بيتي واخذهن واطلع
من المحافظه كلها لان ماخليتلي احترام.
الباشا::شزراع براسها ليش هيج.
ثابت::لان هذا الصح.
_طلعت التفتو عليه .
ثابت::مسحيها بوجهي .
_سكتت .
ثابت:"روحي يابه جيبي ملابسج
تمشين وياي لحد ماابيع بيتي وبيتج ونشوفلنه مكان.
_عفتهم ودخلت للغرفه. وانه اعتب عله
حظي شوكت ناوي تنعدل . ومادريت ضاملي اتعس
من هذا كله ولا حسبت بعد وراي ضيم عبالي ارتاح
طلعت لكيت الباشا يريد يروح . التفت موجه كلامه الي.
الباشا:؛وانه مو ناقص وراح احترم رفضها
بس قسما باالله وداعت الحجي وشرفي،اذا سمعت
بيوم احد تقدملج وقبلتي ساعتها انزع اخلاقي، وراويج الوجه الحقيقي للباشا ، وهذا الكلام الكم ثنينكم
32
شلونكم شخباركم
يله علقو بكد ماتتذمرون عن تأخير البارت
شتكولون . قدر تتطلك من ثابت
وشراح يصير وياهن بعد وين راح يرحن
مديحه ومحابس . شراح يكون مصيرهم
منو الطرف الثالث بكل ثنائي
بس عفيه لا تالفون افلام وترسمون بكيفكم.
خليكم واقعيين.
