رواية ناديه الفصل الحادي عشر 11 بقلم انين الليل

ناديه 

من اجه عمو موفق وهو يبچي وگال اريد شهادة جنسية عباس وبطاقة الكميه 

سمعت صريخ وعياط ملا المكان صعدت ريتا وجابتهن بعد ما امي دلتها عليهن الي شفته انو امي اغمى عليها 

وخاله رغد ترش ماي على وجهها

وبيبي منيره طلعت حافيه تركض وبدون عبايه تريد تروح ويه موفق راحت عمه زهراء واخذت عباتها

وصعدت وياها واشوف شلون الزلم ركبو سيارات وراحو 

واسمع بيبي جميله تگول // ولكم احد يجيبلنه خبر

عماتي سلوى ونوال صارن يصرخن وكل شويه وحده من النسوان تجيب خبر 

وحده تكول مدعوم بسيارته 

وحده تكول لا بايكيله السياره وكاتلينه 

اثنين يسولفن لا مكلوبه السياره بي وطايح من ع الجسر

وادري بس انا وامي نعرف شلون مات كان ابدي اصرخ واحچي واكلهم ابوي عباس مات لان امي وسلدار كتلو

 لكن بقيت ساكته وانا احس ريكي نشف والحراره صارت تطلع من عيوني 

خاله رغد وبيبي ام حليم اتقربن وصارن يبجن ويه امي بيبي تگلها 

—ماما مياده راح دلالج ماما ترملتي وانتي زغيره اويلي عليج 

وصارت بيبي وخالاتي والنسوان يبچن وامي صافنه واسمعهن يگولن 

—خطيه ما مستوعبه الصار الله يساعدها بعدهي شابه وانوب بنات اثنين زغار وحامل صدك حملها ثگيل

تقريبا بالتسعه بالليل اجت بيبي منيره هي وعمه زهراء وهي تصرخ وتكول 

=كاتلينه وخالينه بجنطة السياره 

النسوان التمن وبيبي منيره تلطم ومخليه خدها دم وهي تكول =يمه عباس ليش شنو الذنب الي سويته وهيج كتلووك 

=وج يمه مياده ضاربينه بكلبه بسجينه وج يمه راح وليدي يمه

امي صرخت بصوت عالي //عبااااااس شلوون الك گلب وفاركتني انا والبنات زين وهذا الي ابطني من يكبر 

ويسالني عليك شگله عبااس حبيبي عب عب عباااس

وگعت وانغمى عليها شالوها للغرفه وراحن يمها اخواتها 

بقى البجي والعياط والسوالف والهدوء والحزن مالي البيت ومالي اذاناتي يمكن غفيت وره الفجر وكعدت على 

صراخ وعياط الناس الي تجي الساعه تسعه اجه خالي حليم ويا منذر كالو العمه افراح

- - القاضي يريد امه ومرته ياخذ اقوالهن

وراحت بيبي وياها امي وهي لابسه عباية راس وحجاب اهنا بيبي جميله كالت 

—خلي مرته تخلي بوشي على وجهها لان هسه هي عليها عده 

وخلت امي فوطه سوده على وجهها وراحو ساعتين ورجعو وهنه يصرخن ويبچن وبيبي صارت تگول 

==يمه عباس صارت صدك عبالي مو انت يمه انت السبع شلون انغدرت

الساعه بالوحده الظهر جابو ابوي للبيت وصار اللطم والعياط دخل سراج واجه شافني واكفه وبس دموعي 

اجه لزمني من ايدي وشال حنين وخر الناس الي ملتمه كللهن 

::خلي البنات يجن يم ابوهن 

باوعلي وهو يگلي ::ناديه هذا بابا بابا الي يحبج احچي ويا 

اتقرب من التابوت وگله ::عباس ما اترك ثارك ولا اعوف بناتك هذا وعد

انا دموعي ينزلن نار على خدي وعمو سراج يگلي ::ناديه حبيبتي هذا بابا احجي ويا

اجت خالتي رغد واخذتني منه وهي تكله بعصبيه 

—ما تشوفها مصخنه والحراره ماليه حلگها وتريدها تحچي

هو ما رد عليها قررو ياخذون الجنازه بيبي رادت تروح وياهم لكن ارتفع ضغطها اوووكعت 

الي راحو بس الزلم عمي هادي وكرم وموفق وجيرانه ابو سعد راح ويا جدو منير وصديق بابا الكل اتعجب لان 

سراج ما راح مع العلم سراج هو الي غسل بابا ويا عمو كرم الي عرفته انو سراج بقى على مود الفاتحه

من اخذو بابا بقت النسوان تبچي وكل ساع جوقه جايه وجوقه رايحه والكل متاسف بابا انا رحت للغرفه الي گاعده 

بيها امي وهي ساكته يمها خالاتي طلعت شويه ورجعت وهي دايخه خالتي گالتلها 

—يجوز ضغطج ارتفع لازم تنامين وترتاحين امشي فووك من هوسة النسوان

واخذن امي وصعدن وانا بقيت بالغرفه متمدده وابچي اريد احچي ما اگدر گمت طفيت الضوه واتمددت حسيت 

بالضوه انفتح وعمه زهراء دخلت واجه عمو سراج وراها وهي تگله 

—ها سراج شرايد دزيت عليه عمار 

::زهراء التلفون قطع كلامج سولفيلي شنو الي تعرفي 

زهراء //بالبدايه انت گلي شنو ردت اتگلي 

سراج ::انا شاك شاك انو عباس ما قتله واحد راد يبوك السياره او عداوه عباس انقتل من واحد يعرفه

زهراء //منو سراج بيمن شاك 

سراج جر نفس واتقرب من زهراء وهو يشاورها لكن انا سمعته ::مياده زهراء مياده مو مال وحده رجلها ضايع 

وهسه مو مال وحده متفاجئه بموته وكأنها تعرف هو ميت من لحظة الطلع من المركز 

ما شفتي من گلت لگو عباس عدل هي ولا كانه زوجها اصلا ما فرحت ولا فكت حلگها لان تعرف هو ميت 

ولا يمكن يكون رجع للحياة

زهراء اتحسرت //هو هذا الي اريد اگوله 

سراج ::شنو زهراء 

زهراء //شوف سراج بيوم الي عباس خفر يعني بيوم الحادث وراجع للبيت انا شفته لاگاني بس سراج الي مخليني 

اشك نفس شكك انو هو لاگاني يمشي مو بسيارته 

سراج باستغراب ::زهراء انتي متاكده من كلامج ؟

هزت راسها // اي متاكده شوف انا خابرني قيس رجل شمس گلي اختج بالمستشفى عدها ولاده واحتمال يسوولها 

عمليه انا اخذت ابن كرم وطلعت جاي امشي كلت لابن كرم روح اجر ذيج التكسي راح وانا واگفه واجه عباس يمشي 

شافني گلي

-ها زهراء شكو 

-هلا عباس لا ماكو شي بس شموسه بالمستشفى وراح اروح الها ومرتضى راح اياجرلي سياره 

هو گلي لا انتظريني انا اروح اجيب سيارتي من البيت واجي 

-گتله لا مبين عليك تعبان روح ارتاح هسه ناخذ تكسي ونروح

ما قبل گلي لا شنو بهالليل ترحين ابحدج 

ياليل عباس تگول نهار الناس كلها طالعه 

مي خالف انتظريني 

لا مشكور انت رووح ارتاح 

  هوه باوعلي وگال ( وسكتت )

سراج ::زهراء شگلج 

اتحسرت //گلي زهراء اريد احچي وياچ بموضوع 

-اي مي خالف من اجي من شمس عود نتخابر 

ليش هيج تحجين وياي مو انتي ..

انا قاطعته // عباس شنو هالحجي الصار صار انت تزوجت والله يهنيك 

—وانتي

ابتسمت // شبيه انا ياالله رايحه بعدين نحجي مع السلامه 

- - اي بس ضروري نتخابر لان محتاج احجي وياج 

سراج ::زهراء متاكده من كلامج 

- - اقسم بالله ما چذبت عليك 

::يعني انتي شفتي بعينج بدون سياره وگلج اروح اجيب السياره من البيت 

-اي سراج ليش اتبلى واچذب

::انا حاس بهذا الشي معناتها عباس اجه للبيت وانقتل بنفس البيت خصوصا الي شفته بقايا طحين على ملابسه 

زهراء //يعني شنو سراج 

::يعني القاتل ماخذ راحته من قتل عباس 

-شتقصد 

::اقصد عباس انقتل اهنا ويجوز لا شنو يجوز انا متاكد من شي 

—شنو سراج 

::الي اريد اكوله (اهنا صوت عمه سلوى وهي تگل البيبي منيره )يمه وين تردين ترحين 

بيبي ==البيتي عنندي شغله صيحي رجلج يوصلني

طلع سراج ::عمه وين تردين ترحين

بيبي وهي تبچي =اريد اروح البيتي 

::ليش شكو (هز راسه باستفسار العمه سلوى )

سلوى //امي گاعده وكل شويه وحده جايبه خبر 

*انكتل لان عنده اعداء بالمركز 

*لا چان رايح على وحده ولگفه رجلها وكتله 

*مطلوب للناس

اتقرب سراج وحضنها ::عمه وداعتج خلال تلث تيام راح كل شي يبين والزم القاتل بايدي وداعتج وداعة عباس 

بيبي تبچي ومبين عليها الكسره ==مي خالف عدي شغله وهسه اجي 

::زين امشي اوصلج 

بهاي الاثناء اجه ياسر وگله// عمو اجوضباط وناس بسيارت عسكريه وسألو عليك وابوي يگول خلي يجي يستقبلهم 

:: اي صار

وراح سراج واجه رجل سلوى اخذ بيبي الي راحت وما اتاخرت يمكن اقل من نص ساعه من رجعت انا گعدت 

على صفحه اسمع للملايه الي اجت للفاتحه اتعازي بس لاموجوده لا امه البابا ولا مرته واجت بيبي الي لاگنها اهل 

مرت عمي كرم 

وظلن يلطمن والملايه همه ب وبعدين صارت تنعى ويبچن ويه بيبي مره سالتها

- - وين رحتي ام عباس 

شكد نسوان گاعدات بالطارمه وبالصاله والبنات الشابات ع بايات الدرج بيبي گالت =رحت البيتي جبت هذا 

وطلعت بيبي من جنطه زغيره قطعة قماش خضره مسفطه ومبينه قديمه 

الكل يباوع بعيونه بتساؤل هي گالت

=هذا علك انطتني ايا كبل واحد وتلاثين سنه عمة بسيمه ام رجلها الله يرحمها چنت ما احبل وعيالي رادو

 يزوجون خليل وانا رحت اضربها ابر وشافتني وكسرت خاطرها وانطته الي گالت ولو ما تعتقدين هاج 

امسحي بي بطنج واطلبي من العباس بجاهه عد ربه يصير عدج ظنه 

= وصدك من رجعت مسحت بطني ودعيت ربي يرزقني بجاه العباس وطول فترة حملي شاده العلك ابطني 

وصار الولد 

= وسميته عباس وهسه گدامكم اگول ياابو فاضل بجاهك عد ربك اريد تطلع لي كتال ابني الناس تتقول

 وتحچي على ابني عده عدوان ورايح الوحده مو زينه ولازمينه اهلها وكاتلينه

ورفعت بيبي ايدها وگالت= ربي بجاه العباس كفيل زينب طلع كتال ابني وافضحه گدام الناس واحرك گلبه مثل 

ما حرك كلبي 

بعدين دارت صوب كربلا وكالت 

=ابو الفضل العلك راح ارجعه للجنطه وانت بكيفك وهاي ليلة استشهاد ابووك لو بعد اخلي بالجنطه واگول 

ما يفيدني لو اعلكه او وياها اعلك رايه بيضا

وشفت بيبي شلون گعدت وهي منهاره من البچي والنسوان ايصبرن بيها ويگللها 

-دكيتي باب الاجواد ما راح يتخلون عنج 

بالليل امي دزت عليه خالتي وصعدوني بالغرفه انا وحنين انام يمها امي ما گدرت تحچي وياي بس اتقربت يمي

وسالتني //شنو تسأل بيج بيبيتج لو عماتج 

امها تگللها //هي بيبيتها بيا حال الله يساعدها وشيسالنها الهلمسكينه وعليمن

امي ما تگدر اتجاوب بقت بس تخزر بيه انا وحنين نمنا على چربايتي حضنتها هي نامت بس انا بقيت اسوي 

روحي نايمه واشوف امي تتگلب وما تنام لو شويه تغفى وتگعد تفتح عيونها وتظل صافنه ثالث يووم الختمه 

نزلت الصبح واسمع خالتي تگل الامي// ناخذج للطبيب 

بيبي امها تكلها// لا شلون لازمه عده 

—مي خالف ماما ماتشوفينها ظغطها مرتفع لو شوف شنو بيها تتبوش وناخذها 

بيبي امها //لا خليها اليوم بس تكمل الختمه وباجر اخذيها

انا ما اطيق اباوع بوجهه ولا ادخل للغرفه رغم ما كنت مستوعبه شنو الي جان يصير 

نزلت الصبح ورحت گعدت يم بيبي الي شافتني وظلت تبچي وهي تگول 

=بين عليج اليتم بيبي ناديه اليوم صدك بين عليج اليتم

ما اعرف بوكتها وانا اسمع كلام بيبي ليش ابچي 

اجت ام افراح وگالت الابتهاج 

—روحي صيحي مرت المرحوم خلي تنزل يم النسوان من امس كل ما تجي وحده تكول وين هي مرته 

ام حليم //غير مريضه ولا تاكل ولاتشرب 

ام افراح //مي خالف تدوس على روحها شويه 

بيبي جميله// الله يساعدها صدمتها چبيره

اخذتني بت بسيمه وانطتني حليب دافي وكلتلي اشربي بلكي شويه تخف الحراره ويطلع صوتج لان انا ما حچيت ابد 

احس شي خانكني وانا اباوع للنسوان الي گاعدات بالصاله وهنه كل اثنين تلاثه يسولفن ابحدهن 

ويأولن بحادث ابووي شربت شويه واكلت شويه بسكت 

نزلت ابتهاج وشاورت امها الي صارت تهز بايدها وجرت حسره 

واجت الملايه وقرت وانا كاعده يم بيبي الي چانت صافنه وبس دموعها تنزل

وصبو الغدا الظهر وجابو للنسوان ولزمتني زهراء وشربتني شويه سوب وخلتلي خبزه بالمرگه او وكلتني 

وامي ما نزلت وره الظهر بيبي منيره صاحت الخاله رغد وكلتلها 

==خاله خلي مياده تنزل حتى لو ما بيها حييل 

رغد //خاله كلش تعبانه ومصدومه 

==ادري الله يساعدها بس حتى تحضر الختمه 

رغد //اي خاله هسه

وراحت خالتي وام افراح اتقربت على بيبي وهي تهز بيدها وتگلها 

—هه هي هه هي والله انتي على لاهيتج منيره هي المصدومه وحزينه تنام الها على چربايه وتدك سوالف 

ويه حبايبها ورجلها نايم ع التراب 

بيبي منيره ==نصره انا بيا حال ابني راح من فگري وفگر بناته المسكينات 

ام افراح //ادري خيه بنار گلبج بس النسوان يسالن اعليها ومن وديت ابتهاج لگتها متمدده ع الچربايه 

وحبايبها يسولفن 

بيبي //خليهن شرايح الهن انا الي راحلي ابني طالع من گلبي

وصارت تبچي ونصره تنعى والتمن عليها النسوان 

ونزلت امي وياها خالاتي ومرت خالي وگعدت على صفحه والنسوان راحن يمها وهي ساكته وهنه يعازنها وبيهن 

يبوسنها واجت الملايه وصارت تقرا بيبي منيره گاعده يم الملايه منتچيه ع الحايط وعماتي مقابيلها وامي گاعده بالاخير 

الملايه سالت عمتي نوال 

—وين مرته 

عمتي باوعت وهي تبچي واشرت على امي والملايه صارت تنعى ومعنى كلامها تعاتب بابوي وتگله 

مرتك زغيره ليش عفتها شوفها شلون مكسورة الخاطر عليك وبناتك زغار منو الهن 

بيبي جميله ترد على الملايه تگلها// الهن الله 

اما بيبي منيره فصافنه بس دموع بدون ما تحچي اتقربت يمها بيبي جميله وهي تگلها //منيره على كيفج ويه روحج 

بيبي بدون وعي تگلها =مع الاسف اتخلى عني ما وگفلي

النسوان عبالهن على بابا صارن يبچن وكملت الملا الختمه والتهو بالعشا بالليل كفو الناس وامي صعدت فوك ودخلو

خوالي حليم وعدي 

وياهم عمي هادي وكرم وجدي منير وجميل بيبي منيره وجميله ونصره 

بقن كاعدات بالصاله وعماتي دخلن للغرفه اما باقي اقاربنا فرشوا بالطارمه حليم وجه الكلام العمي هادي 

—ابو ياسر احنا باچر نتوكل وراح ناخذ ويانه مياده والبنات 

هادي// هاا ليش يا ستار

عدي // لاتنسى ابو عمار اختنا زغيره وحامل وعليها عده منو

الها امنا مريضه وما عدنا احد اليبقى يمها 

جدو منير گال //ما عدها شي تبقى ابيتها هي وبناتها ومنيره يمهن

 وابو ياسر يشوف احتياجاتهن وما راح يقصر على ما تكمل العده

ونشوف شنو يصير 

حليم //لا ابو سراج ما ترهم نخاف على اختنا احنا مو يمها قبل چانت

 يم زوجها هسه بعد ما ترهم (وگف وگال )احنه مو جاي نشوركم لا جاي ننطيكم خبر

هادي بعصبيه //شنو هاي منك تنطينه خبر هذا بيتها وبيت بناتها

 والي ابطنها ابن اخوي يعني ابني وما راح تحتاج شي المحل خير

من الله والراتب هم راح يصرفونه 

حليم //راتبيش تسمي الافلاس الي يقبضهن راتب 

كرم //تره عباس ما مخليها محتاجه شي ليش فد يوم اجتكم اختكم عوزها شي

حليم //الشهاده لله لا لكن ظلتها اهنا ما الها مبرر 

هادي //وانا ما اقبل بنات اخوي والي ابطنها يتربون بعيد عني اختكم 

ما محتاجه شي بيت واثاث واذا تتضايق من گعدة امي وياها 

خلي امك تكعد وانشيلها على راسنا 

حليم //لالا ابو عمار ما ترهم 

هادي //وليش ماترهم

حليم //ما ترهم وخلص

هادي //واختكم قابله 

عدي //اي قابله وهسه جاي البنات يجمعون ملابسها وملابس بناتها 

والبيت تقفله وبعدين نشوف 

هادي //اشو بكيفكم تحچون شنو بعدين تشوفون تره العلمكم البنات

من بعد ابوهن امي وانا المسؤولين عنهن 

حليم //لا ابو عمار امهن موجوده وهي مسؤوله عنهن 

كرم //واحنه بناتنا نريدهن يعيشن يمنا

وصار حچي وعياط لمن ما اجه سراج وگال:: شكو ليش اصواتكم طالعه 

جدو منير// لا يابه ماكو شي بس اخوان ارملة المرحوم يردون ياخذوها وياهم هي والبنات 

هادي//اخوانها ما يقبلون تبقى اهنا وامي تبقى يمها او حتى امها 

يگولون ناخذها هي والبنات وانا الي يفوت على بنات عباس اگلب الدنيا

 لان انا عمهن ومسؤول عليهن

عدي //واحنا شنو گدامك احنا هم خوالهن وامهن اختنا وما نقبل تبقى اهنا بعد ما زوجها مات 

سراج دار على هادي واشر باصبعه على حلگه يعني اسكت ودار على خوالي وحاچاهم بكل هدوء 

::حقكم بس بالوقت الحاضر ما تگدرون تاخذون اختكم 

حليم باستغراب //وليش باالله ؟

سراج ::لان عباس اتوفى مقتول واكو تحقيق واكيد باچر او عگبه يستدعوها واكيد من يلزمون القاتل هم راح 

يستدعوها فشلون تبقون تاخذوها وترجعوها تره للعلم كلام هادي بمكانه هسه عمتي منيره وحتى جميله يبقن يمها 

ونشوف التحقيق الوين يوصل وبعدين هم نشوف بناتنا شنو مصيرهن

عدي //ليش استاذ شنو مصيرهن !

سراج ::خلي نحچي الصراحه عباس اتوفى الله يرحمه وهذا بيته

ومحله وراتبه وهذني والي ابطنها جهاله واختكم زغيره اول 

وتالي ما راح تخلوها ولا حتى هي راح تبقى هذا الشي منتهين منه

 فانا اشوف احسن تخلوها هالفتره على ما ينتهي التحقيق

الكل اقتنع بكلام بكلام سراج وقررو اهلها يرحون وبمجرد ما ينتهي التحقيق تخابر اهلها ويجون ياخذوها امها 

واختها رغد راحن ثاني يووم من الصبح لان امها مريضه اما اخوها حليم وزوجته واخته الزغيره قررو يبقون 

للسابعه حتى يشوفون شنو الي يصير 

امي بقت فوك يمها خالتي داليا ومرت خالي حليم وانا نزلت الصبح

 شفت بيبي گاعده هي وبيبي جميله وام افراح الي شافتني وگالت 

—الحمد لله اليوم خافه منها الحراره

عمه زهراء جابتلي ريوك وگلتلي اكلي وصارت النسوان يجن على 

بيبي هاي التبچي وهاي الي تترحمله واسمع بيبي تگول 

==اتبرى مني مع الاسف 

وزهراء وافراح طبخن الغدا ودزنه الجدو منير والويا وصبن غدا لام سراج الي صاحتلي وغدتني وياها وصعدن 

غدا الامي وخالتي داليا ومرت خالي 

وره الظهر اجه عمي هادي هو وسراج الي گعد وباس راس بيبي وگلها

::عمه المحقق جاي يسالج شكم سؤال 

بيبي بدون ما تجاوب طاحن دموعها سراج گلها وهو ياشر على صدره 

::عمه دم عباس يمي الج الصافي 

بيبي باوعتله هو هز راسه وسلهم عيونه يعني اي اطمني

راح فتح الباب ودخل رجال ويا شرطه اجه سلم على بيبي انا من شفته ويا الشرطه ظليت ارجف ولذت بكتر بيبيتي 

هو الرجال سالها شكم سؤال يمته مر عليها ابوي وشلون چانت علاقته بيها وباخو 

وشگد عنده جهال بيبي گالت اثنين بنات هاي وحده منهن واشرت عليه وانا ضامه راسي بحضنها المحقق اتقرب يمي 

وهو يگلي //شسمج بابا لا ليش تخافين 

سراج گله ::عوفها هسه

گام الرجال صار يفتر ويباوع وسراج شالني وگل الكرم يبقى يم الشرطه وطلعني بره وهو يشاور بيه 

::ناديه ليش خايفه حبيبتي شبيج 

:... خفتي من الشرطه ليش 

رفعني وخله وجهي مقابيل وجهه وهو يگلي 

::ناديه انتي تحبين بابا عباس 

انا شهگت من البچي هو حضني وگلي 

::ندوش انتي شفتي منو الي كتل بابا بالسچين 

صار گلبي يدك هو حس عليه رد گلي :: شفتي مو تعرفينه مو گليلي منو 

امج ندوش امج هي كتلت ابوج ليش 

احجي حبيبتي احجي

انا رديت بدون وعي --اخاف الشرطي يذبح حنين بالسجين 

هو گلي ::لا حبيبتي الشرطي ما يذبحها 

—وما يحرگني 

::اموته اليدنالج انتي سولفيلي منو كتل بابا عباس تدرين بي هسه جاي يبجي يكول 

::ناديه تعرف الي كتلني بالسجين وما تكول 

انا خاله اصبعي بحلكي واشهك بالبجي --لا عمو هو اول كتله بالجفيه

وبابا طاح وبعدين ضربه بالسجين 

::منو هذا حبيبتي الي ضرب بابا 

—عمو چان وره الباب نزل من الغرفه هو وامي

تستمر القصة أدناه

::اهاا منو هذا 

سلدار 

—چان بالغرفه يم امج ؟

—اي هو كل ما بابا يروح هو يجي 

ركبني بالسياره وگلي ::هسه نروح يم رجال جدو نسولفله وشنو تردين اشتريلج 

باوعتله وگلت —اريد لعابه ودهينه 

::صار هسه 

—وجيب الحنين حلقوم وجبس 

::صار

ساق السياره وهو ساكت نزلني من السياره وشالني وصلنه يم ابو الدهينه واشترالي خمس قطع واشترى حلقوم وجبس 

واخذلي جبس بعدين اشترالي لعابه چبيره ولعابه ازغر الحنين وركبنا بالسياره وهو يجر نفس ويگلي 

::هسه نروح وتسولفين كل شي مو تردين بابا يفرح 

انا ااشر بايدي —لا اريده يرجع

هو رجفن شفايفه وطاحن ادموعه وهز راسه وگلي ::اكلي الدهينه ياالله 

باوعتله وبرطمت —عمو ليش تبجي 

::لان جوعان 

انطيته قطعه من الدهينه وگتله —هاك عمو اكل لا تبچي عفيه 

وخليتها بحلگه —هاك عمو عفيه لاتبچي 

هو اكلها ويگلي ::خلص ما ابچي انتي اكلي

وصلنه البيت وتلگا نه شرطي وسراج راوا الهويه الشرطي راح شويه ورجع وگل السراج 

*اتفضل استاذ 

ودخل عمو وهو شايلني وتلگانه رجال چبير سلم علي سراج وگلنه اتفضلو گعدنا على قنفه وسراج گعدني يمه

والرجال گله //خالك خابرني اتفضل اسمعك 

سولفله سراج والرجال سالني نفس اسئلة عمو بعدين گله

— - الشرطي الي بره انطي العنوان انا ساعه ونص وجاي انت باشر التحقيق وياها وانا الحكك وهاي الخاطرك المفروض 

ناخذها للمركز لكن انا راح اقبل انت اتحقق وياها 

سراج ::صار استاذ 

الرجال //زين هاي زهراء مستعده تشهد 

::اي استاذ مستعده 

-طيب رووح شوف شغلك واكسب وكت 

::ان شالله واشكرك جزيل الشكر 

-العفو هذا واجبنا

طلعنا انا وسراج الي انطا العنوان للشرطي وگلي ::راح نرجع للبيت مو تگولين اجينه البيت جدو الحجي كولي 

رحنا للسوك عمو سراج اشترالي تمام 

هزيت راسي وصلنه للبيت وانا شايله لعابتي وسراج شايل لعابة حنين الي صاحها وانطاها الحلقوم والجبس وانطاهه 

اللعابه وصاح البيبي منيره الي اجته گلها ::عمه اريد اگلج شي وما اريد احد يدري 

==ها عمه خير 

سراج اتقرب ::شوفي اذا بين عليج اي شي اخابر هادي واخلي يجي ياخذج

==شبيك سراج شكو مو كافي املتني بعباس گتلي لگو كل شي ما بي تالي جبته الي جنازه 

::عمه كل كلامج صحيح بس انا من اول يوم عرفت كتال ابنج 

بيبي باستغراب ==وساكت تعرفه وساكت 

خله ايده على حلگه وگلها ::اي ساكت من وره تصرفج هذا لا تعيطين خلي كل شي يمشي مثل ما انا مخطط اله 

بيبي =شلون فهمني سراج راح اموت على ابني 

جر نفس ::عمه القاضي هسه على جيه وانا راح ابلش تحقيق اذا يبدر منج اي شي هاي الناس والجوارين كلها تلتم

 وانا اريد اعرف كل شي بهدوء

بيبي منيره اتقربت اكثر وگلتله =عرفتو الكتل ابني وما تريدني اگول 

::اي عمه هسه اريدج تسكتين الجريمه بيها خيط مفقود واذا فقدتي اعصابج وعيطتي تصير ضجه ويروح حق 

ابنج وانتي بكيفج 

==لا يمه ما طوول هيج خلص ما افك حلگي 

سراج ::توعديني شنو تسمعين وتشوفين ما تحچين 

بيبي ==والله ما احچي 

::زين اريدج تفرغيلي غرفه وانتن كلچن ترحن بغرفه ما اريد احد يطلع بس زهراء تگليلها تبقى 

بالمطبخ وانا راح اخابر على كرم يجي

==صار يمه

وراحت بيبي للنسوان اقاربنا وگالتلهن ==اجوي خطار ولازم نفضي الصاله امشن بالغرفه وانتي زهراء ابقي بالمطبخ 

خاف يحتاجون شي هسه راح يخابر كرم ويجي وياج 

::اي خاله صار 

ودخلن النسوان بالغرفه وسراج خابر هادي گله ::تجي انت وكرم وحليم اخو مياده 

وسد التلفون وگل العمه زهراء ::تخلين ناديه يمج روحي بهاي الغرفه الفارغه

واجه القاضي ويا سيارات شرطه واستقبله سراج ودخل للبيت ويا اثنين لابسين مدني وشرطه لازمين سلاح 

ورا بشويه اجه عمي هادي وكرم وحليم وسلموعلى القاضي الي گال 

—المفروض نستدعي الي نريده للمركز ونحقق ويا لكن سراج وخاله عزيزين عليه واخذ بنظر الاعتبار انو المجني 

علي هو اخو السراج وكان من خيرة المنتسبين حسب شهادة مديره (واشر على رجال ضخم لابس رتبه )

عمي هادي گله //سيدي الله يخليك نريد بس نعرف منو الي كتل اخوي منو الي سووا هاي الجريمه الشنعه

القاضي باوع السراج وگله //صيحلي امه 

راح سراج وصاح بيبي منيره اجت سلمت وهي مدنگه القاضي گلها //البقيه بحياتج 

مدير الشرطه گلها //البقيه بحياتج ام عباس مو بس انتي الي خسرتي عباس كان من احسن المنتسبين 

بيبي بچت وگالتله //تدري بابني محد يكرهه لان هو ما يكره احد 

اتقرب منها وحب راسها وگلها //والله صحيح الله يصبرج

بيبي منيره بچت و گالت //والله لو مصبح ميت بفراشه لو عابر الشارع ومدعوم لو رايح على ناس مجرمين 

ورامينه اگول الحمد لله الله سبحانه اختاره الجواره لكن ينكتل وينذب بسيارته هاي صعبه واريدها من الله ومنكم 

القاضي //حجيه كل شي انعرف واتوضح والفضل كل الفضل ال الله سبحانه وسراج هو الي كشف الجريمه

الكل باوع على سراج متفاجأ 

هادي گله //سراج تعرف منووكتل عباس وساكت ما تدليني علي واشرب من دمه 

القاضي //لا انتم تسكتون واحنا نگوم بواجبنا 

حليم //انريد نعرف منو الي قتل عباس ويتم بناته ورمل زوجته 

مدير الشرطه /:اي هسه راح نبدي التحقيق لكن اسمحولنه (واتكلم بنتر )اي احد يتجاوز لو بكلمه نخلي داخل سيارة

 الشرطه ونعيد ونكرر الخاطر استاذ سراج وعباس الله يرحمه راح نبلش التحقيق اهنا

هادي //شنو يعني القاتل موجود ابيناتنا

سراج ::اي موجود بيناتكم 

هادي ظل يعيط //سراج تعرفه وساكت ظام علينه ليش 

سراج بنتر ::اسكت هادي ولا كلمه الشغله چبيره والمفروض التحقيق يصير بالمركز لكن خالي طلب من سيادة القاضي التحقيق اهنا الرجال راح يسوي تحقيق وكشف دلاله لكن برعانيتك راح تخرب كل شي لذلك اسكت افتهمت لو ماكو 

راح نضطر نسوي التحقيق بالمركز وهناك كل شي ممكن يصير

القاضي تقرب على هادي وگله بهدوء //اسمع كلام سراج تمام 

هادي سكت والقاضي اشر المدير الشرطه الي باوع على بيبي منيره وگلها

/////////////🌷🌷🌷🌷///////////////////////