رواية ناديه الفصل الثاني عشر 12 بقلم انين الليل

بعد ان اتكلم القاضي ويه عمو هادي اشر براسه المدير الشرطه الي اتقرب من بيبي منيره وگلها 

حجيه انتي يمته اخر مره شفتي بيها ابنج 

=ها يمه المغرب اجه عليه 

بنفس اليوم الي انفقد بي 

هزت راسها = لا قبل يوم هو يوميه يتفطر عندي لان مرته حامل ودووم تدوخ هو 

يجي يتفطر ويشرب چاي ويروح البيته او للمحل

زين مرته منو يسويلها فطور 

=مرته ما صايمه يوميه يودي بيد العامل غدا من المطعم وساعات انا 

اخليله من الفطور الي اسوي وهو ما يقبل بس انا اگله للبنات

- - زين من اجه هم مبين علي شي 

=چان راسه يوجعه وانا گتله بداية فلاونزا 

- - زين حجيه انتي تتهمين احد بقتل ابنج 

=لا يمه ما اتهم اي احد ابني طيب ومؤدب وعمره ما اذه احد 

- - استريحي يمه

سراج گلها ::اگعدي اهنا 

الظابط گال السراج// اريد زهراء 

الكل استغرب من طلب الضابط لكن سراج راح صاح الزهراء ورد الباب

على ناديه بعد ان ابتسم بوجهها وسووا حركه بخشمه خله ناديه تبتسم وهو يحرك بايده شويه واجي 

اجت زهراء وهي واثقه وسلمت ردو عليها السلام

سالها الضابط/ انتي شتعودين العباس 

- - ابن خالتي وابن عمي 

- - علاقتكم بي شلون چانت 

--من احسن ما يكون عباس خوش انسان وما مأذي احد 

- - يمته اخر مره شفتي 

--استاذ شفته بيوم الحادث بالليل

هادي راد يحچي لكن سراج منعه 

الضابط //وين شفتي بالضبط 

--استاذ كنت طالعه انا وابن اخوي رايحين على اختي الي بيومها بالمستشفى تولد ولمن گلت الابن اخوي روح 

اجرنه سياره سمعت واحد سلم عليه ما عرفته بالبدايه لان كان متنكب وصوته تعبان وبي بحه من اتقرب

عليه شفته عباس

الضابط //بيش الساعه شفتي 

زهراء تقريبا الساعه امم عشره اله ربع اله عشره هيج شي 

الضابط //اي وشنو صار 

--هو سلم عليه وسالني ليش واگفه من عرف انا رايحه للمستشفى 

الاختي شمس گلي انتظري انا اوصلج بسيارتي

الضابط //ها گلج هيج اوصلج بسيارتي لو تعالي اوصلج بسيارتي 

--لا هو چان يمشي وحتى من گتله مرتضى اجر سياره گلي انتظريني اروح اجيب السياره من البيت انا ما قبلت 

الضابط //ليش ما قبلتي 

زهراء //استاذ مبين علي من صوته التعب 

الضابط //كملي 

زهراء //من شاف مرتضى اجر السياره وانا ما قبلت يروح يجيب السياره من البيت هو سلم عليه

وراح يمشي صوب بيتهم

الضابط //يعني ما راكب بسيارته 

--لا استاذ 

الضابط //انتي متاكده 

زهراء --استاذ بالعقل دنيا ليل وانا وابن اخوي وهو المرحوم ابن 

عمي وابن خالتي اذا بسيارته ليش ما خليته يوصلني 

الضابط //يعني متاكده 

زهراء --اي نعم استاذ

الضابط //اتفضلي وقعي واستريحي واحد منكم يصيح زوجة المرحوم 

حليم //استاذ اختي لازمه عده 

القاضي //وهذا ما يمنع نسالها شكم سؤال وتروح مو حرام هذا تحقيق رووح بابا صيحها انت شتعود الها 

حليم //اخوها استاذ

- - اي رووح صيحها

راح صعد فوك غاب خمس دقايق ورجع گال شويه وتنزل 

عشر دقايق ونزلت لابسه عبايه ومغطيه وجهها بقطعه سوده خفيفه اهنا الظابط سألها عن اسمها وعمرها گلها 

*يمته زوجج اخر مره شفتي 

هي بصوت ناصي ما يخلو من الربكه گالت -/قبل خمس تيام الصبح 

*وين راح 

-للدوام وگال عنده خفاره 

*بيومها شلون كان اقصد طبيعي لو بي شي 

-لا استاذ هو صبح كلش فللونزا حتى انا گتله لاتروح او روح اطلب اجازه وارجع هو ما قبل گال الاجازه اخليها للعيد 

*اي وبعدين

-بعدين راح وگلي لاتخابرين عليه بالمركز انا اخابرج 

*وخابرج 

-اي استاذ اول ماوصل خابرني حتى گلي صديقي گلي انت روح ارتاح بالغرفه وانا الزم عنك الواجب 

*زين وبعدين 

-وره الظهر دز غدا بيد ثامر 

*منو ثامر ؟

-العامل الي يشتغل عنده جابلي الغدا وراح والعصر اتصل عليه

الضابط باوع الواحد من الشرطه وگال //دزولي علي هذا ثامر خلي يجي 

كرم گال/ هو موجود ابيت هادي هسه اخابره 

الضابط باوع الامي //اي من خابرج العصر شنو گلج وضعه شلونه 

-گلي صرت زين وبس اتفطر اخذ علاج واصدقائي يمي ما راح الزم خفر بس خاف يجي المدير وزحمه ما 

يشوفني ويعاقبني

اجه شرطي وگال// سيدي ثامر اجه 

*خلي يدخل 

ثامر //السلام عليكم 

الكل عليكم السلام (الضابط )تعال ياابني 

*شسمك 

-ثامر سيدي 

*شگد عمرك 

-عمري سطعش 

*ثامر من يمته تشتغل ويه المرحوم

-سيدي من عمري اثنعش سنه ابوي اتوفه وعمي عصام شرطي ويه المرحوم وگله شغله وياك بالمحل 

*يمته اخر مره شفته 

-هو لان رمضان حتى بالليل نبسط ولو مو هلگد الشغل ثاني يوم خابرني من المركز گلي دز غدا للبيت 

*واخذتلهم غدا 

-اي استاذ اخذت دجاجه شوي وكباب لان هو موصيني اذا عنده خفاره انا اخذلهم صمون او خبز ودجاجه وكباب حتى

يكفيهم غدا وعشا

*منو استلمه منك 

-شنو سيدي 

*الغدا منو اخذه منك 

-ها زوجة المرحوم اخذته مني وانا رحت 

*من وصلت الغدا ورجعت عباس هم خابرك 

-لا استاذ ما خابرني 

*وثاني يوم 

-هم ما خابرني بس زوجته خابرتني وره الظهر وسالت عنه انا گتلها هو لا خابرني ولا گلي اخذ الهم غدا

حتى سالتها اجيبلكم غدا هي گالت لا راح ناكل البقى من امس

*زين انت ما حاولت تخابره 

-استاذ عمي عباس الله يرحمه ما يقبل اخابره للمركز 

*اي بس زوجته گالتلك هو ما خابر من امس ليش ما اتصلت علي تطمن 

-استاذ انا ما اتصل مثل ما گتلك هو ما يقبل بعدين ادري اذا ما حصلت خبر اكيد تتصل ابيت اخو 

*زين ياابني رووح ومن نحتاجك ندز عليك 

-صار استاذ

رجع الظابط وسال مياده //وره الفطور خابرج 

-اي خابرني گلي اتفطرت ويه جماعتي وهسه راح اخذ علاج وانام 

گتله تعال اهنا بالبيت ارتاح 

گال لا انتي سدي الباب ولا يبقى بالج 

الضابط //وسديتي الباب ونمتو ثاني يوم ما اجه شنو سويتي 

-رجعت اتصلت بثامر وگلي ما اجه وسالني اجيبلج غدا گتله لا عندي من امس باقي واتغدينا انا والبنات 

*ما اتصلتي بالمركز تسألين علي

هزت راسها // لا استاذ عباس ما يقبل وشكم مره هو يتاخر اذا كان عدهم تفتيش او طوارئ 

الضابط //هاا هم صحيح 

زين شسويتي من ما اجه ؟

-ااقريب المغرب انشغل بالي لان ما اتصل عاد انا خابرت بيت اخو

*منو بيت اخو ؟

-بيت هادي (واشرت )

*خابرتي گتيله اخوك ما اجه ؟

-اي استاذ 

*منو رد عليج 

-بالبدايه زوجته ام ياسر وصاحتله واني گتله

*شنووگتيله ؟

-گتله ابو ياسر عباس من امس بالمركز وما اجه الحد هسه 

*وهادي شنو رد عليج 

-گال راح اتصل لا يظل بالج 

*بس هيج ؟

هي بلعت ريگها -لا اني گتله عباس فلاونزا وراح ما قبل يغيب والهسه ما رجع 

*بس انتي الهسه ما ذكرتي من راح الصبح اخذ سيارته

-هاا اي نسيت هو اخذها لان چان كولش تعبان 

*هو دائما ياخذها؟

-ساعات مو دووم 

*وبيوم الحادث اخذها ؟

-اي استاذ چان ما بي يمشي واخذها 

*زين مياده انتي تشكين باحد يكون قاتل زوجج 

-هاا ما ادري

الضابط بنتر //لا مو ما تدرين سالتج تشكين باحد من اقاربه من اصدقائه 

جاوبت //لا استاذ ما اشك 

*زوجج عنده اعداء مسولفلج على ناس مهددينه يكرهونه 

-اي من ناحية عنده اعداء هواي لان بحكم شغله اكيد هواي ناس تكرهه 

*ها يعني هسه انا بنظرج اهواي ناس تكرهني 

-لا مو هذا قصدي 

*شنو قصدج 

-هو دووم يسولفلي يگلي هوايه يجون بالتوقيف شقاوه ودووم يتحلفون بيه

*يعني من چان يسولفلج خايف تشوفينه 

-ما اعرف 

*زين انطاج اسم گلج هذا مهدده لو شنو 

-لا بس يسولفلي 

*زين انتي من سمعتي شنو گتيله 

-انا گتله دير بالك هذوله اكيد ناس ما يخافون من الله وكلشي يسوون 

*مو المفروض تگليله روح بلغ اخوك ابن عمك ابن خالك خاف كل شي يصير 

-اي اني هم گتله 

*تماام اتفضلي استريحي

اخوها گال// تروح استاذ فوك للغرفه لان هي مثل ما تعرف لازمه عده 

گله //اي خلي تروح بس يجوز نحتاجها 

دارت وجهها تريد تروح للطارمه ومناك تصعد الدرج القاضي گلها 

:مياده شلون قتلتلي عباس 

هي جمدت بمكانها وكل الموجودين وگفو على حيلهم اخوها صار يحچي 

-شنو شتگولون

اتقرب منه سراج وگله 

::اشش لا تحچي سويته التحقيق اهنا حتى ما تگولون شي صار وشي ما صار 

الظابط گال //اي كلام زايد الكل بالتوقيف واحقق من جده وجديد بالمركز وبطريقتي الخاصه 

هي بقت واگفه اتقرب عليها القاضي وگلها //جاي اسئلج ليش قتلتي زوجج 

هي ردت ابرود تريد تبين هي ما خايفه// لا انا ما قتلتله الي اتهموني يكرهوني لان يدرون بعباس شگد يحبني

#يعني مو انتي الي قتلتلي وجاي تتهمين ناس بقتله 

-استاذ انا اتهم كل واحد اتهمني هو الي قتله 

#تتهمين منو مثلا بقتله 

—الي وجهلي التهمه هو نفسه الي قتله 

القاضي //بالحقيقه محد اتهمج لكن اكو شاهد شهد على جريمة القتل الي نفذتيها انتي وصاحبج

حليم //هذا شلون حچي دسترتوها ابيناتكم وتتهمون اختي

الشرطي اجه يم حليم لكن القاضي وقفه وگال //مثل ما گتلكم شاهد شاف بعينه وسمع باذنه 

اهنا ارتبكت وصارت تبچي وتگول //چذب ما كو اي شاهد انتو تردون تورطوني لان تكرهوني 

اشر القاضي السراج الي شال ناديه واجه نزلها بالگاع القاضي نزل المستواي وگلي// شنو اسمج ياحلوه

...ناديه 

#حلو اسمج ناديه 

#تحبين بابا عباس 

هزيت راسي اب (اي)

#ناديه لاتخافين احنه كلنه نحبج بس بابا عباس يحبج اكثر من عدنا

صرت ابچي واشهك القاضي گال //لا تبچيين محد راح اياذيج والي اياذيج عمو الشرطي يكتله 

انا صرت احچي كلام متقطع واشر باصبعي ...لا ما اريد الشرطي يكتله اريد عمو سراج هو يكتله 

سراج اتقرب ::اي بابا اي احد يخوفج واياذيج اكتله وهسه جاوبي عمو 

القاضي //ناديه بابا بالليل من اجه شنو شاف

بقيت اباوع العمو هادي وخالي حليم الي صار يرجف وبعيونه رجاء وبيبي الي تبچي جاوبت ......شاف شاف 

القاضي //باعيلي بابا لا تباعيين الاي احد شنو شاف گليلي شوفي(واشر باصبعه على شكل نص دائره )

شوفي هاي الناس كلها تخاف مني بس انا صديقج ما اخلي احد اياذيج 

جاوبته ......وعمو سراج هم صديقي

القاضي //اي وعمو سراج هم هسه گليلي بابا بابا عباس من اجه شنو شاف 

...شاف ماما 

القاضي//وبعد شافمن 

...مو صعد الدرج

القاضي هز راسه //اي 

... ودار وشاف عمو وره الباب 

القاضي //عمو منو عمو 

...سلدار

صار لغط وكلام وبيبي صرخة القاضي اشر باصبعه على حلگه وسالني //وين چان سلدار قبل لا يجي بابا 

اشرت ...فوك بالغرفه 

القاضي //شلون بابا شافه 

صعد ورجع ايريد يفتح الضوه وشافه واتعارك ويا 

#امج وين بقت ع الدرج واگفه 

هزيت راسي ب اي 

القاضي //وضربه بالسچين 

...اي ضربه لا لا عمو بعدين امي جابت السچين عمو بالچفيه من وره

رادت بيبي منيره تحچي عمو سراج سكتها ظلت تبچي وتلطم على وجهه 

القاضي //تگدرين تدلينه اشلون بابا شاف سلدار 

امي كالت //چذابه مدرسي ..ما خلاها تكمل الضابط القاضي ما چنه يسمعها وگلي 

ها يا بطله وين بابا شاف سلدار 

انا طلعت وصرت اوصف للقاضي سالني //وين الچفيه والخاولي والسچين

رديت ......امي انطته علاگه وخلاهن بيها وگلها اذبهن بالطريق 

اهنا مدير الشرطه صاح على الشرطي الي راح جاب العلاكه وبيها الخاولي والچفيه والسچين وگله 

الضابط شالهن وانطاهن للقاضي //هذني سيدي استاذ سراج جابهن وسلمهن النه 

القاضي //دزوهن التحليل البصمات وهسه ست مياده شتگولين

امي اتاشر بايدها //لا اتچذب شوف من. ملقنها متاكده منه هو هو سراج 

القاضي //هاا وليش ايلقنها 

امي //لان هو اكثر من مره حاول يتحرش بيه وانا ما انطيته مجال 

سراج ابتسم باستهزاء بيبي گالت 

=تاكلين تبن يا چلبه اصلا سراج عمره كله ما جاي البيت عباس ولا واصل ابحده چان من يجي من بغداد 

يخابرني ومن يريد يروح البيت عباس يخابره وعباس يمرله ويروح ويا

امي //لا لا انتي ما تدرين هو دووم يجي ويتحرش بس اني اسكت ما اريد عباس يتعارك ويا 

القاضي //يعني انتي تتهمين سراج مو 

امي //اي اتهمه 

انا جاوبت ......لا (اشرت بايدي )عمو سراج مو هو ضرب بابا 

القاضي //مو سراج ضرب بابا 

...سلدار اخذ مسدس بابا وسواله هيج (ااشر بالگاع ) بس امي گلتله الجوارين يسمعون 

القاضي //تندلين وين مسدس بابا

هزيت راسي ...اي اخذه عمو سلدار وخلا بالجنطه الي بيها الذهب 

القاضي //ها ياذهب ؟

...عمو امي صعدت للغرفه ونزلت الجنطه وگالت العمو اخذهن وهو خله المسدس بالجنطه 

القاضي //زين بابا انتي وين چنتي واگفه وشفتي كل هذا الشي 

رحت وره باب الصاله ...اهنا واگفه 

امي //اذا اهنا شلون ما شفتها هو هو ملقنها

مدير الشرطه //اشلون ما شفتيها يعني كلامها صحيح 

امي //لا مو صحيح لان لو انا الي كاتله من شفتها اكيد اكتلها وهي گالت جبت سچين اكيد من المطبخ شلون ما شفتها

القاضي //ناديه ماما من اجت اخذت السچين انتي شلون شفتيها وهي ما شافتج 

...مو ظلمه ومن تجي واركض اسوي روحي نايمه 

القاضي //هاا ست مياده شتگولين 

امي //چذابه ملقنينها كلهم لان يكرهوني

القاضي //منو يكرهج مو قبل شويه اتهمتي سراج ؟

امي //اي كلهم وعدهم اسبابهم همه همه كتلوالعباس وخلوها براسي لان يكرهوني 

القاضي //منو الي يكرهج وشنو اسبابهم 

امي //كلهم هادي لان عباس ما اخذ اخت مرته وامه لان عزل وتركها لان يدري بيها ما تحبني حقدت عليه 

وزهراء لان ما اتزوجها وره ما اتطلگت. وسراج اكثر من مره اتحرش بيه وانا انا ما انطيته مجال 

الضابط //لو سراج متحرش بيج يعني ايريدج بس سراج هو الي كشف جريمتج انتي وصاحبج وهسه لازم ترحين 

للمركز ناخذ اقوالج وبصماتج

حليم اتقرب من الضابط وگله //استاذ اش..

قاطعه الضابط وگله //اختك متهمه بقتل زوجها ياريت تعترف اقلها تتجاوز اهواي اموور 

حليم صار يرجف //اختي بريئه 

الضابط //نتمنى راح نلقي القبض على سلدار واگللكم شي من اول يوم سراج كشفها لكن سكت على ما جمع 

خيوط القضيه ابنكم ما راح دمه والفضل ال الله وسراج الي بقى يدور وجمع كل المعلومات

حليم گال //شوفو گدامكم اذا اختي هي القاتله زوجها نتبرى منها ونكتلها بادينه بس اذا تطلع براءتها احسبو

ناديه وسراج اول المكتولين مو عبالكم فاتت علينه هاي التمثيليه 

هادي //والك عين وتحچي المثلك ايطم روحه 

حليم //ان شالله انت الي تطم روحك

اخذوها للمركز بسيارة الشرطه وهي تبچي واخوها ومرته وجهاله راحو وراها واكيد راحو الاهلهم

بيبي منيره من اخذوها گعدت صافنه ما تحچي وطلعن النسوان من الغرفه وهنه ما مفتهمات شي وعمه نوال تهز 

بامها وهي تبچي وتگلها //يمه لا تگولين مياده هي الي كاتله عباس ما اصدك

بيبي جميله گامت تصيح //اگعد يابخت حجي هادي احنه ابختك 

بيبي انتبهت وگالت العمه سلوى وهي العبره متكسره بكلبها 

=گومي خابري الملايه باچر اقرايه اهنا وره الفطور

بيبي الليل كله لازمه سجادتها وسبحتها وتصلي وانا كل شويه وحده لازمتني 

ليش ما حچيتي شلون شفتيها تكتله سولفينه 

عمتي نوال ضربتني راشدي وهي تگول //حقيره شفتي ابوج ينكتل وسكتي 

صرت ابچي اجت بيبي منيره ولزمت نوال من ايدها وگالت الها 

=اذا بعد حچيتي على ناديه راسج اكسره الج يا چلبه فوگها ماخلت دم ابوها يضيع

نوال //يمه ما مصدگه مياده تحب عباس وهاي (اتاشرعليه )ليش ما حچت اله هسه شوفي منو ملا راسها وخوفها 

=اكلي تبن حقيره منو ملا راسها ما تشوفين من الخوفه الحراره الي طلعت بحلگها وما خلتها تگدر تحچي لو صوتها

المبحوح وانتي تتهددين عليها 

افراح //عمه نوال من حرگتها واله ابنيه بگد اصبعي تشوف هذا الشافته وتسكت 

زهراء// والله لو اي واحد من عدنا شاف الشافته ناديه چان اتخبل مو بعد طفله وابوها گدامها ينكتل وشلون گتله شنيعه

اهنا بيبي منيره هي وزهراء وجميله صارن يبچن وبيبي نصره تنعى وتأشر عليه تگول 

الله يساعدج ويعين گلبج 

الشفتي يحبوبه موشويه

وره الفجر نمنا وانا بحضن بيبي انا وحنين الي بس تباوع بعيونها وساكته بيبي خلتنا 

وحده على يمينها والثانيه على يسارها وانا حاضنتها وفاتحه عيوني وهي تگلي= نامي بيبي 

وانا ما نمت كل شويه اتفززواطفر من الفراش وهذا الشي صار وياي من يوم الحادثه صرت ما انام اله بعد 

ان تطلع الشمس وساعات ابقى ما انام 

اله الظهر لان بالليل مجرد ما اخلي راسي ع المخده اتذكر ابوي وسلدار يخنك بي من وره وهو يحرك راسه ويحاول باديناته 

يوخر الشماغ لكن ما گدر وظل كل جسمه يرجف وامي واگفه وتباوع لو لمن ضربه بالسچين مره ومرتين وتلاثه

هاي الحادثه من يومها اللحد الان وهي ما تروح من مخيلتي 

ثاني يوم الظهر گعدن النسوان على صوت التلفون والي جاوبت عمتي سلوى ولونها انخطف وسدته 

زهراء سالتها هي ما جاوبت اتصلت وهي تگول

- - الو هادي توهم خابرو اهل مياده وهمه ايهددون ويگولون غصبن ما عليكم تتنازلون وتخلون ناديه تغير اقوالها لو 

ماكو انتو وبيوتكم او ولدكم نحرككم حرك

وسدته وهي خايفه خمس دقايق واجه هادي وكرم وسراج هادي رفع التلفون وخابر بيت اهل امي 

- - الو ولك ناقص فوك فضيحتكم اتهددون صاير رجال براسنا تدافع عنها ولك خلي نتاكد والنه حساب وياكم 

سراج باوع او وجه كلامه للكل ::اي احد يتصل شنو يحچي او يهدد لا تجاوبن افتهمتن

هادي خابر شيخ العشيره الي اجه وسووله فطور وحچه ويا والشيخ خابر واحد يعرفه قريب من بيت اهل امي 

وگله //تروح الشيخهم وتگله همه مگاومين من قبلنه اذا ثبتت الجريمه على بتهم عدنا تصرف وياهم اما اذا بتهم 

بريئه فاحنه فصاله

واجت الملايه بالليل كانت وره ليله من استشهاد الامام علي عليه السلام وقرت والنسوان صارت تبچي من كملت 

الملايه النسوان بعيونهن تساؤل بيبي منيره حچت وهي بيدها القطعه الخضره وگالت

=گدامچن من طلبت من الله بجاه ابو الفضل يطلع حق ابني وفعلا ما قصر وهاي الرايه هاج سلوى انطيها الواحد

من الولد يعلگها (كانت القطعه الخصره وياها رايه بيضه )

=والله يا حبايب مو ابني صارله اربع تيام من دفنته لو ما استشهاد امير المؤمنين علي عليه السلام كان هلهلهت لان 

الله ما قصر طلع الكاتل اي ليش وحده تباوع بوجه الثانيه وتريدن تسالن منو الي كتل ابني انا اگلجن 

=ابني لا اتسلب ولا ماخذ فلوس بالفايز ولا رايحله الوحده ورجلها واهلها لزموا 

=الكتل ابني هي مرته وصاحبها همه كتلو عباس لان كشفهم والشافتهم هاي ابنيتها شافت الجريمه كلها وهي

دلت ع الي كتله 

= احمد الله واشكره واشكر ابو الفضل لان ما ضيع دم عباس ولان اخذو غدر بعدلي رايه يووم ما ينعدمون 

وينشفي غليلي

صارن النسوان يصلن على محمد ويگولن البيبي //احنا ابختكم دم ابنج ما ضاع 

وصارن يباركو البيبي مزيج من ذهول وفرح وحزن وارتياب هذا الي هسه انا اتذكرته بعيون النسوان وهنه اكثرهن

جوارين امي وصديقات بيبي 

افراح مرت عمي هادي گالت 

- -اي عمه بعد الله اعلم شنو شايفه ومغطيه على امها واله ليش سكتت الهسه

جده مريم رغم مسيحيه لكن چانت تجي البيبي جاوبتها

—شبيج ام ياسر طفله شگد عمرها وشتفتهم الله يساعدها بالي راح يصير الها من تكبر خطيه اتركوها ما تشوفين

شلون لازگه المنيره 

افراح //انا ما گلت شي بس اگول ليش هسه يا الله حچت ليش مو من اول 

منيره باوعت الافراح وخزرتها =شتردين تگولين هاا احچي تردين تگولين تغطي على سواية امها مو

زهراء //افراح هي شتفتهم وتغطي هي طفله شافت مصيبه بعينها الله يساعدها 

افراح //هو انا شگلت سبيت العنب 

جميله //كافي عمه كافي عيب هالحچي

ثاني يووم تم القبض على سلدار ابيته وما لگو الجنطه لكن سراج عرف يجيبها لگا ضامها باخير كرسي من جوه

 بحيث فاتح الكشن من جوه ومخلي الجنطه بالبدايه سلدار نكر لكن من اتواجه بالبصمات ومن طلع سراج الجنطه

 وشهادة ابو الكراج بيوم الحادثه (والسكن )مساعد السايق الي راد يغطي علي لكن من شاف الجريمه ثابته 

شهد ضده 

////////||//////////////////////////////////////|||////////////

سراج

كنت بالمكتب لمن ما عمتي منيره اتصلت عليه وگلتلي 

=سراج الحگني عباس من البارحه لا هو ولا سيارته 

بوقتها انتابني شعور انو عباس ميت طلعت بعد ان خبرت زميلي بالشغل انو اخوي مفقود وخابرت موفق فهمته 

ع القضيه وطلعت بوجهي للبصره وانا اسوق ما اشوف الگدامي چانن دموعي ينزلن وانا اتذكر شلون من چنا 

زغار نلعب سويه 

رغم هو اكبر مني وشلون چنا انام بحضن عمتي وهادي ما يقبل بس عباس يقنعه يگله 

هادي سراج اخونه الزغير

اتذكر حنيته وتعبه ومن اجي شلون ينطيني المصرف وانا اگله عندي يگلي لا انا اخوك الچبير مسؤول عنك 

ومن اخذت الشهاده شفت الفرحه بعيونه گلي //هسه انت مسؤول عني لان اكيد انت افهم مني

شفت بعيونه الخذلان لمن رفضته زهراء والفرحه لمن اتزوج مياده 

حسيت بي خجل لمن طالب بحقه من البيت لكن انطيته العذر انو لازم يستقل بحياته 

عباس ما اتبدل رغم محاولات زوجته ان تبدله ضدنا لكن هو بقى ذاك هو

ولمن صارت ناديه وخلاها بحضني وگلي سميها وسميتها وبستها بيومها گلي //شد حيلك اريد ازوجك وانا 

اتكفل بزواجك ما اخليك تخسر فلس وانا بضحك گتله ::اوافق اتزوج هايه واشرت على ناديه

عمتي بوكتها گالت =شلها بيك على ما تكبر انت شايب

عباس گلها //لا يمه على ما تكبر ناديه هو صاير شي مهم وبالعكس سراج حلو ما يبين علي الكبر 

سالته بضحك// يعني انت موافق 

حاوبني //خلص ناديه الك وانا بدل ما اصير اخوك اصير اخوك وعمك

من اتذكر كلامه وضحكته وشقا وسوالفه ومن يكون ضايج يخابرني ويسولفلي كل شي 

يوميه نتخابر ويسولفلي عن شغله بالمحل ودوامه بالمركز من اگله بطل يگلي لا تقاعد للبنات يجي يوم يستفادن منه 

وقبل شهر سولفلي على مياده وشلون جاي تضغط علي حتى يسجل البيت باسمها وهو ما موافق

انا گتله ::مو تگول تحبك وما كو فرق ابيناتكم سجله باسمها 

هو گلي كلمه // لا ما اسجله تگلي الي وللي ابطني عبالك ذني مو بناتها

فهمته اكيد الحمل ماثر عليها سايسها وبعدين قرر يشتري المحل الي بصف محله ويسجله باسمها والبارحه 

خابرني وگلي فلاونزا قويه وهو بالواجب لكن راح ينام لان صاحبه گايله انا ابقى بمكانك ومن يجي المدير 

اگله توه راح يرتاح وما رجعت خابرته رغم قلقت علي لان گلت تعبان وثاني يوم چان عندي شغل الى ان

خابرتني عمتي بالليل امشي بالطريق للبصره حتى ما وگفت يم دار استراحه او مطعم لان كل همي اوصل 

واشوف اخوي شبي وليش هو ما موجود او وين راح خصوصا واعرف عباس ما اله اعداء ومحبوب من الناس كلها 

وصلت الساعه بالاربعه اله ثلث الصبح وانا احس بجسمي مكسر واستفسرت منهم لكن احساس خفي خلاني 

اشك بان مرته تعرف مكانه

بنيت هذا التصور من طريقة ردها وكانما محضره الاجابه عن سؤال معروف والي زيد شكي اكثر من رحت للمركز 

واكدلي صديق عباس انو ما جاب سيارته ويا لان كان من يجي بسيارته يخليها اباب المركز

وحتى من طلع گله خلي ااجرلك تكسي بس عباس گله راح اتمشى

والتاكيد الثاني اجاني من زهراء بت عمتي جميله الي اكدتلي شافت عباس يمشي ورايح البيتهم وهو يگلها 

انتظريني اجيب سيارتي واوصلج

صارت عندي قناعه انو عباس ما اخذ سيارته للدوام وصار امامي تصورات عده 

اهمها انو عباس اجه للبيت واخذ سيارته وطلع لكن زوجته تگول هو من راح للدوام راح بسيارته 

يعني (زوجته تچذب او تعرف شي وضامته علينه )

التصور الثاني انو عباس انكتل ابيته وانوخذ هو وسيارته واتخلى بالشارع

تستمر القصة أدناه

خابرت خالي عبد الحميد الي كان عنده رتبه كبيره وبجهاز مهم بالدوله بذاك الوكت وسووا اتصالاته ويه المسؤولين 

بالبصره ظليت اشتغل بسكته انا ومدير عباس بالدائره وكم عنصر 

من اجيت بالليل وثاني يووم شفت ناديه وشلون الحراره ماليه حلگها وما تگدر تحچي ولا تاكل ومن اخذتها للطبيب گلي 

البنيه خايفه من شي بيني وبين نفسي گلت

::يمكن لان شافت عمتي وامها وعماتها يبچن لكن شفتها من نجيب طاري الشرطه شلون البنيه تخاف ومره تلزم

اختها ومره تباوع الايدها 

قررت اعرف الحقيقه قبل ان نلگى عباس اتصلت بالضابط وگتله فد ربع ساعه اتصل بيه انت لا تحچي بس من احد 

يرفع التلفون ويجاوبك گلهم اريد استاذ سراج

وسديت التلفون ورحت العمتي وگتلها ::عمه الضابط يگول ان شالله خيير بس خلي ينتظرون 

ومياده گاعده ولازمه بناتها يمها امها واختها ومرت اخوها رن التلفون رد ياسر الي گال 

اي عمو موجود 

اجه عليه لان انا طلعت بالباب اسولف ويه كرم وهادي وزوج نوال اجيت جاوبت

الو 

اهلا استاذ 

صدك هسه وين ياالله جاي ان شاء الله اي اي جاي 

اشكرك 

عمتي اتقربت مني وهي تگلي =ها عمه بشر

انا بفرح واهز بچتف عمتي واختلس النظر المياده وناديه گلت 

::لگو عباس زين ما بي شي وهسه راح اجيبه واجي مسلبينه جماعه 

شفت الفرح غطى كل الوجوه بس مياده عاكفه حاجبها متفاجئه وناديه فاتحه عيونها مستغربه عرفت بيني وبين 

نفسي مياده مسويه شي وناديه تعرف

عمتي گالت =يمه سراج اروح وياك 

::وين ترحين انا اروح انا وموفق نجيبه ونجي ياالله 

درت عليهن گتلها ::تعالي ندووش امشي وياي عمو نروح نجيب بابا ونجي 

جميله گالت الها //روحي بيبي روحي ويه عمج الابوج خلي يشوفج ويفرح 

مياده صافنه بس ما گدرت تمانع واخذتها شافني هادي وكرم سالوني //وين رايح ومنو خابرك

اخذتهم على صفحه وگتلهم 

::توه خابرني ولد دفعتي گلي يمكن عباس متوقف بدائره ال ،،وتعال بس انت شوفه واستفسر منه 

هادي //خلي نروح وياك 

::وين رايحين ومنو يخليكم تدخلون ماخذ موفق يبقى بالسياره لان راح اذبها بعيد ومن يجي علي اي احد ينطيهم 

هويته ويگلهم اخوي

كرم //ناديه المن ماخذها

رديت ::انا اتعمدت اخذها وياي اگللهم بنته مريضه وتبچي علي بلكي يخلوني احچي ويا وافتهم منه لان الولد گلي 

تجي بس تتعرف علي. تشوفه من الشباك 

هادي //شنو تهمته 

صكيت اسنوني ::نصي صوتك ما ادري اروح وافتهم منه گتلهم لاگينه وراح اجيبه مو تحچون شي خلي اروح 

وارجع ويصير خير

ورحت انا وموفق الي نزلته بالسوك گتله ::ابقى ساعتين وارجع يم الزلم اذا ما تلگاني گلهم اخذ ناديه للمستشفى لان 

صخنت ولا تگول وين رحنا او وين اجينا 

ناديه گاعده بالصدر گتلها ::ليش ما فرحانه انتي مو تحبين بابا احنه رايحين نشوفه 

اباوع الها ما جاوبت وكانما تگلي ......بابا مات وهذا الي رايحين نشوفه مو ابوي 

اخذتها للمركز الي يداوم بي عباس من ردنا ننزل هي ما قبلت تنزل بقت لازگه بالكرسي گتلها

::ندوش امشي ننزل 

هي گلتلي بصوت مبحوح ...لا عمو ما انزل 

::حبيبتي لا تخافين 

—لا عمو يكتلون حنين بالسچين ويگطعون ايدي ويحرگوني 

::لا حبيبتي لا تخافين انا وياج 

صارت تصرخ ولازمه بالكرسي ......ما اريد عمو لا ما اريد 

شلتها بالگوه وانا شايلها تريد تشمر نفسها تلگاني المدير الي يگلها //اشبيج بابا ليش خايفه

انا ما اتاخرت يمهم مجرد ما وصلت للمركز طلعت ونزلت جبت عصير وانطيته الها هي شربت انا باوعتلها وخزرتها 

وسالتها ::ناديه وين بابا 

هي سكتت رجعت سالتها ::ان شاء الله نلگا ويجي يجيبلج لعابه وياخذج بالسياره 

هي بعيونها كلام تريد تگوله لكن احد مخوفها عرفت بذيج اللحظه انو عباس لا يمكن يكون حي يرزق لاعباس مات 

ومات گدام هاي الطفله واكو سر لازم اعرفه باسرع وقت واكو خيط للشك وراح امشي بي

///////////🌹🌷🌹//////////////