رواية سراج السادة الفصل الحادي عشر بقلم عسق ادريس
"شاهيناز"
دخل ركض لصاله عفت كلاص الماي ورحت اركض ورا شفت عمتي تباوعله مستغربه
_جهاد:: شكو شبيك؟
_غضنفر:: قدس
_جهاد:: شكو شبيهااا
_غضنفر:: قدس انتحرت!!!!!
خليت ايدي على حلكي مصدومه كامت عمتي من مكانها تباوع لغضنفر مصدومه وغل وجادح مصدومين
_جهاد:: منو كلك؟؟؟
_غضنفر:: اتصلت على قدس ردت علي اختها تصرخ تكول قدس انتحرت
_جهاد:: ياعلي
دخلت عمتي للغرفه وغضنفر ضل واكف ب الصاله ايده على راسه صافن كام جادح من مكانه خله ايده على كتفه
_جادح:: كول يالله
_غضنفر:: يالله
هز راسه وكالها بحسره طلعت عمتي من الغرفه لابسه عباتها والنقاب والتلفون بيدها اشرت لغضنفر
_جهاد:: يلااا
_جادح:: وين
_جهاد:: لديوانيه
_جادح::وين جهاد خلي السيد يجي ونشوف نروح سوا
_جهاد:: سيد جادح؟؟؟ البنيه منتحره يعني بين الحياه والموت مانتظر على ماتموت يلا غضنفر لاحكتك لسياره
حجتها وطلعت بيدها التلفون صفنو واحد بوجه الثاني
ضحك غل
_غل:: روح لاتاخذ السياره وتطلع لديوانيه وحدها
طلع غضنفر يركض ورا عمتي لبست النقاب وطلعت من المطبخ طالعه خارج البيت صاح جادح من مكانه
_جادح:: وين
_شاهيناز:: وياا عمتييي
حجيتها وطلعت اركض سمعت صوت جادح يطلع من الصاله يصيح بغل
_جادح:: غل خلي عينك ميرزا
طلع جادح يركض وراي طلعنه من البيت صارت عمتي كدامنا تريد تركب ب الصدر من شافت جادح وشافتني فتحت الباب الخلفي وركبت ركب جادح كدام واني وعمتي ورا ساق غضنفر السياره بسرعه طالع لديوانيه
"قس"
_قس:: صلوات صلوات على الامام المنتظر
سلامات سلامات يرجع بعد طول السفر
حجيتها وطكيتها هوسه بنص المطبخ احاول اجيب صوت العلويه جهاد من قرتها بخطبه قدس وخلت النسوان صافنات على صوتها
دخلت نضال واني اهز بركبتي واحجي
_قس:: يلاهي جفي مرفوع دعا الضايع دعيته اموت ودمعتي وياي على النار انتظرت والشوك انتفض
تقربت يمها وهزيت ايدي بوجهه وهيه تبعد ايدي وارجع امدها مره ثانيه دنكت تاخذ النعال من رجلها واني طفرت بيدي الجدر اصد الضربات
_نضال:: نزلي الجدر نزلي
_قس:: بعلي فلا انزله
_نضال:: نزلي ماسويلج شي
_قس:: حلفي
_نضال:: وداعت عمج عزيز كلبي
نزلت الجدر اهز ايدي
_قس:: هوا غير من نريد نجذب نحلف بي ياعزيز
_نضال:: يابت الخرا
شمرت النعال بوجهي دنكت جاي ب الحايط ضحكت توني اباوعلها وماحس غير اجه الثاني شال كصتي شيل
طاح الجدر من ايدي لازمه كصتي
_نضال:: شلون ايد فدوه اروحلها
_قس:: طركاعه على هيج ايد
_نضال:: ولج مو بوسي ايديج عندي بس ثنين رجلين بيهن نعوله لو عندي بعد لصمت حلكج بي
بقيت لازمه راسي اسب بروحي شلون نسيت نضال تشتغل ب الصلي يعني ضرباتها سريعه شالت الجدر من الكاع خلته على الميز تقره
_نضال:: صلوات صلوات على الامام المنتظر
تقره وتهز بروحها على الخفيف كمت من مكاني امسح على كصتي واهز ب ايدي
_قس:: لو العلويه تسمعج جان تندمت قرتها وخلتها بحكلج
_نضال:: وشنووو صوت العلويه احلى من صوتي
دخلت ابتهال للمطبخ تفتح بشعرها
_ابتهال:: والله يمه غير الصدك محد يجيب صوتها
_قس:: فدوه اروحلها هم صوتها حلو هم شكلها حلو هم اخلاقها حلوه هم علويه وجدها رسول الله
بقت نضال ساكته واني ماخليت كلمه غزل ماخليتها ب العلويه دخلت مجتبى ابن عمي للمطبخ يصيح ب اسم نضال
_نضال:: ها
_ مجتبى:: جهزي رواحتكم نروح
_نضال:: ها وين
_مجتبى:: عمي سامر اتصل علينه كال تعالو كلكم مسوي عشة ثواب لابن علي
_نضال:: هسه؟
_مجتبى:: اي يمه هسه يلا جهزو رواحتكم
طلعت نضال من المطبخ ادردم على عمي شلون يسوي عشه ويعزم لازم ينطيها علم قبل شهر بهذه اليوم راح يسوي ثواب حتى تجهز الكوستم مالتها
_نضال:: قسسسس
_قس:: خرا بقس
طلعت من المطبخ اشوف المراكض باوعتلي نضال تاشر على الجهال
_نضال:: لبسي الجهال ساعدي بيهم ابتهال وين الكريم الاساس
ماخليت حجايه بكلبي ماحجيتها يعني انتم رايحين لثواب انسان ميت ترحن تلبخن برواحتجن شكو
_نضال:: قسسسسسس
_قس:: جايههههههههه
لزمت الزعاطيط تسحول للغرفه وهما يتلاوون وياي واني ويا كل شبخه منهم طكه اكعدهم خمس ثواني مو خمس دقايق ويرجعون مره ثانيه وارجع اصكعهم مره ثانيه خلصتهم تدفع وطلعت من الغرفه الكل جهز نفسه كعدت على القنفه اباوعلهم مرت من يمي نضال وجها متروس مورد خدود
_نضال:: ولجج ابتهال تعاي شوفي وجهي
_ابتهال:: ييمه شسويتي بوجهج
_نضال:: عود حطيت شويه
_ابتهال:: روحي غسلي يمه
ركضت للمطبخ تغسل وجهه يعني هسه انت الله خلقج زركه توردين بروحج شكو نزلت قادسيه تلف بشالها وقسار تتعارك على الحذاء رجعت نضال تركض باوعتلي
_نضال:: ماتكومينننن
_قس:: ماروح
_نضال:: ضلي
رجعت تكمل لبخ واني كاعده اقيم باطلاتهم الكل جهز واستعدو باوعلي باسم مستغرب
_باسم:: ها كاعده؟
_قس:: لانايمه
_باسم:: شنو؟
_قس:: اكلك ماروح راسي ياذيني وراح اضل يم قدس
_باسم:؛ خوش ضلي ودربالج على البيت لاواحد يدخل
_قس:: يعني شنو اذا دخل حرامي مثلا تريدني اتلاوه ويا
_محمد:: عمي انت ليش اخلاقج هيج
_قس:: سوء تربيه عمو
سكتو بس الخزرات بعيونهم طلعو من البيت بعد الف توصيه على الكنوز الي ب البيت يحسسوني الحراميه واكفه بباب البيت منتضريهم يطلعون حتى يدخلون يبوكون يمكن اغلى شي بهذه البيت اني وصح حقهم اذا خافو انباك
صعدت للغرفه شفت قدس نايمه طفيت ضوه الغرفه وطلعت من الغرفه نزلت الدرج البيت هدوء احلى شي بدون صريخ وبدون غلط وزعاطيط وعرايك
دخلت للمطبخ اكمل طبخ نضال زغنبتني تزغنب
غسلت الجدر وخليته على الميز ادور على الجداحه فتحت المجرات والبيبان مالكيتها بقيت صافنه اتذكر وين خليتها درت على الطباخ لمحت الجداحه ب القنينه
اخذتها فتحت الغاز توني اشعل الطباخ وطفت الكهرباء
بعدت ايدي عن الطباخ اتلمس مفتاح الطباخ
سديت الغاز وابتعدت من الطباخ اتلمس
الجداحه على الجدحه حتى ماتفيد اضوي بيها لزمت ميز الكاونتر افتح المجر نفتحت ايدي وطاحت الجداحه
فتحت المجر اطلع الايت اتذكر قبل شوي من فتحته ادور على الجداحه لمحت الايت تلمسته بيدي
طلعته من المجر ادعي بلكت مامخلصين الشحن
ضربت الدكمه البي اجاني ضوه خفيف
خليته على الميز ودنكت اخذ الجداحه شلتها من الارض توني اكوم واسمع تكسير جاي من الصاله
خليت الجداحه على الميز مستغربه الصوت
اخذت الضوه وطلعت متوجهه لصاله
وصلت لباب المطبخ بينه وبين الصاله الضوه ينور ب الصاله
شفت قدس واكفه على الدرج مدنكه و شعرها مفتوح نازل على وجهه رفعت الضوه ب اتجاها احجي اريد اطلع المطبخ
_قس:: قدس هاي انتِ كسرتي؟
توني اطلع المطبخ وهيه رفعت راسها مبتسمه وعيونها حمر مخنزرات تباوعلي و تضحك
وكفت بمكاني خايفه من منضرها توني احجي وسبقتني من رفعت ايدها تضحك المكص بيدها
ماجنت مستوعبه شي ولا متوقعه حركتها الي راح تطلع منها
_قس::قدوسه شبيج نزلي المكص لاتاذين نفسج
ضحكت تحرك براسها بعشوائيه جنت صافنه على حركاتها والشي الجاي تسوي ما كسر صفنتي غير من وكفت مثبته راسها ب اتجاهي رفعت المكص وتحركت تركض ب اتجاهي المكص ب ايدها
صرخت مفزوعه شامره الضوه من ايدي
رجعت للمطبخ اصرخ من قوه ركضتها باتجاهي
بسرعه دخلت المطبخ توني اقفل الباب وندفع منها بقوه
وحده من منافع الخوف تجيك القوه لااردي بحيث هيه دفعت الباب واني دفعته اقوه قفلت الباب ايدي وجسمي كله يرجف صرخت قدس تضرب الباب بقوه واني صافنه بمكاني جسمي يرجف ودموعي بدن ينزلن
هدء صوت قدس وضرباتها على الباب صار الصوت الوحيد المسموع صوت انفاسي السريعه علكت راسي ب الباب اريد اعرف وين اختفت المطبخ اظلم ماينشاف منه شي توقعتها راحت او ممكن كدرت تسيطر على نفسها سرعان ماغيرت قراري من سمعت صوت باب المشاي الي مفتوح على المطبخ ينفتح
يبست بمكاني ويا فتحه الباب اسمع بس صوت خطواتها تدخل للمطبخ ماشوف شي من الظلمه ومن الخوف ماكدرت اتحرك من مكاني
نزلت على الارض بخوف خليت ايدي على حلكي
كاتمه صوت شهكتي الدموع بعيوني
هدء صوت خطواتها بقيت اوزع انظاري على الظلام
بعدت ايدي عن حلكي مستغربه اختفاءها والهدوء
صرخت بقوه من نمدت ايد على رجلي وسحبتني الها
من حلاوه روحي ضليت اهمش برجلي وادفر ابعدها عني رغم ماشوفها
نشخطت ايدي بقوه صرخت متوجعه لزمتني من ركبتي رفعت ايدي حسيت ب المكص صايره بوجهي لزمت مقدمه المكص ابعده عني
بنفس الحظه اشتعلت الكهرباء
شفت قدس نايمه فوكي عيونها مفتحات وحمر شعرها نازل على وجهه منضرها مرعب ويخوف بعدت عني رافعه المكص بوجهي تريد تنبته بوجهي خليت بنفس الحظه مديت رجلي ونطيتها طكه بوجهه مرجعتها للخلف ابتعدت المكص طايح من ايدها جوا الميز دنكت بسرعه تاخذ المكص
كمت من مكاني وركضت افتح الباب صرخت ماخذه المكص وتباوعلي فتحت باب المطبخ وطلعت اركض للدرج وقدس تركض وراي دخلت للغرفه ورديت الباب بوجهه ابجي دكت على الباب تصرخ
_قدس:: فتحيييي البابب قسسس فتحيييي الباب
_قس:: امشي ولي ابن الخرا تريدني افتح الباب حتى تكتلني
_قدس:: قس اني اختج قدس فتحيلي الباب فدوه جاي اخاف قس اخاف وحدي
رجعت امسح بدموعي هدء صوت قدس تضرب على الباب تترجاني افتحه كعدت ب الارض جسمي يرجف من الي صار ماجنت متوقعه ممكن تحاول تقتلني جنت راح جوا ايدها؟؟؟؟
_قدس:: قس فتحي الباب فدوه قسسس اجانيييييييي لاااااا راح يوصلييييي قسسسسس الله يخليج والله هاي مو انييي قس
صرخت تبجي بقوه بعدت عن الباب تصرخ صوتها مختفي شوي شوي واختفى صوتها
ضليت معلكه راسي على الباب متوقعه هاي كذبه منها حتى افتح الباب وتدخل
بقيت واكفه بمكاني كلبي ياذيني
رجعت لمكاني اكل ب اظفري متررده اطلع وبنفس الوقت خايفه على قدس وين اختفت تلفوني ماموجود حتى اكدر اتصل على واحد يجيني
كمزت من سمعت صريخ قدس متوجعه كمت من مكاني ارجف شجعت نفسي بقوه حتى افتح الباب رجعت متردده مره ثانيه
قويت نفسي وفتحت الباب ماده راسي اباوع هدوء
تقربت للدرج اباوع من بعيد
رجعت رديت ب اتجاه الغرفه خايفه تقرب مره ثانيه لدرج جسمي يرجف
نزلت الدرج ماخذه حذري اخاف تطلع كدامي
مديت راسي من الدرج وصفنت مصدومه وفاصله
واني اشوف قدس طايحه بنص الصاله سابحه بدمها
نزلت اركض من الدرج واصرخ بيها
كعدت يم راسها احاول وياها تكعد بس ماكو نتيجه
شفت المكص طايح قريب عليها وايدها تصب دم
صرخت اضرب على وجهي انتحرت اختي انتحرت!!!!
طلعت من الصاله لخارج البيت اصرخ بس اقرب بيت النا بعيد على مسافه الشارع لان بيتنا داخل البستان ومستحيل احد يسمع صوتي ويجي
رجعت للبيت ابجي وادور على تلفوني كلبت البيت وتلفوني ماكو رجعت
اخذت حضينه واحد من اطفال مجتبى ابن عمي لفيته على ايد قدس وضبيته لازمه ايدها بقيت كاعده وبس دموعي تطيح اجاني صوت رنه تلفون جايه من فوك عفت ايد قدس وركضت للغرفه على مصدر الصوت
شفت تلفون قدس يرن رفعت التلفون مكتوب غضنفر رفعت الخط اصرخ وابجي اجاني صوت غضنفر خايف ومصدوم
_غضنفر:: شكووو شصايررر شبيج خويه
_قس:: قدس انتحرتتت اختي ماتتتتت
_غضنفر:: شنو يمتى هاي وينكم هسه بيا مستشفى؟!
_قس:: محددد موجود محدد ب البيتتت احناااا
_غضنفر:: شنووووو؟!! خويه الاهل وين خوتج وين
_قس:: محد موجود ماكووو
_غضنفر:: اهدي خويه ماعندج تلفون تتصلين عليهم
_قس:: ماكو تلفوني ماكو
_غضنفر:: راح اتصل عليهم دربالج على قدس ضغطي على الجرح زينن
حجاها وسد الاتصال نزلت يم قدس لازمه الجرح بيدي واحس ب الدمع يتسرب من القطعه لساني ماوكف من الدعاء لااني الاكدر اعوفها واطلع ولا اني الكعدتي بيها فايده
مر الوقت واني على كعدتي نفسها بس قدس لونها بده يتغير والشحوب يملي وجهه
بجيت اتوسل بيها وهيه فاقده الوع
_قس:: قدس فدوه لاتموتين والله اموت وراج
سمعت صوت دفعه الباب الخارجي وصوت خواتي يصرخن بينه اني وقدس نفتح الباب دخلو الولد مصدومين يباوعون لقدس الي سابحه بدمها ركضو عليها يشيلوها من الارض واني لازمه ايدها المشكوكه دفعوني عنها وركضو للخارج ركضت وراهم لزمني البنات يمنعني واني اصرخ بقوه دفعتهم وركضت شمرت قادسيه الشال علي واني طلعت من البيت توهم يطلعون ب السياره ركضت ادك على باب السياره فتح باسم الباب وصاح اصعد بسرعه
صعدت لازمه قدس واصرخ يحاولون ياخذون مني كلمه وشنو الي صار
حجيت الهم ونص الكلام اكلته من هبطتي وخوفي صفو السياره كدام المستشفى ونزلو يركضون ب قدس واني اركض وراهم
خلوها على السديه وركضو بيها الدكاتره للغرفه
كعدت مهدود حيلي وخواني واكفين يم الباب يحجون ويا الدكاتره
وكفت اريد امشي ب اتجاهم اسمع شنو جاي يحجون ويا وكفتي حسيت الدنيا دارت بيه رجعت كعدت بمكاني مبنجه من الدوخه حتى ماكدر اكوم وفاصله عن الكل اشوف بس خواني وعمامي يرحون ويردون
وكف قاسم يمي يرد على نضال
اجه باسم يمه ساكت باوعله قاسم واشرله
_قاسم:: شكال الدكتور
_
باسم:: الدكتور يكول خاسره هواي دم لو متاخرين شوي بعد جان ماتت
بجيت بقهر على وضع اختي وشلون وصلت مرحله حتى حياتها حاولت تنهيها مر الوقت واحنا كاعدين طلع الدكتور يسمح النا ندخل نشوف قدس دخلو الولد ودخلت وراهم ابجي بكتمه
شفت قدس نايمه على السديه مغمضه عيونها وايدها ملفلفه بجيت امشي ب اتجاها وكفت يمها امسح على راسها
_قس:: قدوسه اسفه والله عفتج وحدج مو توسلتي بيه افتحلج الباب واني ثوله خفت على روحي ونسيتج
التمو الولد على قدس يشوفون حالتها بقينه فتره من الزمن وطلعونا الدكاتره والممرضين ماقبلو يطلعون قدس لان بعدها غايبه عن الوعي كعدت على الكراسي
ساكته واحجي ويا نفسي شنو جان ممكن يصير لو ماطلعت؟ جان قدس ماتت اكيد مرت ساعات والكل منتظر كعده قدس خاله راسي بحضني من الدوخه الي بيه
_باسم:: اجو السادة
رفعت راسي اباوع لغضنفر وجادح جايين ب اتجاهنا تقدم باسم ب اتجاهم يسلم على الساده كمت من مكاني من شفت العلويه جهاد وشاهيناز وراها يمشن ورا الساده ركضت للعلويه ابجي من شافتني سرعت خطواتها تحضني بخوف
_جهاد:: سوده عليه يمه شبيج
_قس:: علويه قدس رادت تموت
_جهاد:: اسم الله تعاي كعدي ارتاحي جسمح يرجف
مشتني تكعدني على الكراسي تمسح على ضهري واني ابجي واسولف الها كل الي صار هزت راسها تطمني
_جهاد:: مابيها شي ان شاءالله
بقت حاضنتني تمسح على ضهري واني ابجي بحضنها وكفو الساده يم الولد يسمعون منهم
وهذول مايعرفون شيحطون حتى يبعدون الشبهه عن اختهم سكت الكل منتضر الدكتور يطلع
وشاهيناز لازمه ايدي تمسح عليها باوعتلها العلويه مستغربه
_جهاد:: انت شجابج هنا؟
_شاهيناز:: شنو عمه مو اجيت وياكم
_جهاد:: يمتى جيتي ولج شو مادري
_شاهيناز:: اي مو جان بالج مشغول
سكتت العلويه مستغربه وشاهيناز ساكته تضم بروحها طلع الدكتور من الغرفه
مشه غضنفر ب اتجاه الدكتور يسأل عن قدس والدكتور يجاوبه طفرت من حضن العلويه فتحت باب الغرفه ودخلت بعدها على نومتها
بجيت احاسب نفسي شلون كدرت اعوف اختي وين جان عقلي من جنت اسمع توسلاتها واني ضامه نفسي حتى احميها وعايفه اختي دخلت العلويه الغرفه تباوع لقدس بحزن باوعتلي ماشيه ب اتجاهنا
_جهاد:: لاتحملين نفسج الذنب
_قس:: لاكله من وراي اني عفت اختي وحدها
_جهاد:: من خوفج ماجنتي تدرين هيج راح يصير
بقيت اباوع لقدس صافنه دموعي على خدودي مرت ساعتين وبدت قدس تفتح عيونها الكل التمو عليها
يتحمدون على السلامه وهيه ساكته حتى ماباوعتلي ولاخلت عينها بعيني باوع غضنفر لخوتي
_غضنفر:: بلا زحمه رايد ابقى وياها على انفراد
اخواني صار واحد يباوع لثاني حجه عمي يسحب ب الولد
_محمد:: اي بابا براحتك حلالك يلا امشو نطلع
طلعنا كلنا ضل غضنفر وقدس وحدهم ب الغرفه بقينا واكفين ب الخارج مرت ساعه ضبط وقدس وغضنفر وحدهم ب الغرفه
نفتح باب الغرفه وطلع غضنفر من الغرفه باوع لاخوي باسم
_غضنفر:: ابو علي سوي خروج من المستشفى
دخلنا اني والعلويه وشاهيناز وراهم شفت قدس مدنكه تمسح بدموعها تقدمت عليها العلويه حضنت العلويه تبجي والعلويه تهدء بيها باوعتلي وقوست حلكها
_قدس:: اسفه
بجيت اخذتها بحضني
_قس:: اني اسفه اني شلون عفتج وحدج
_قدس:: ردت اقتلج قس ردت اقتلج
_قس:: فداج روحي والله فداج عمري بهاي الدنيا
دخل غضنفر للغرفه مدنك باوعتله قدس تقدم ب اتجاها
_غضنفر:: مسحي دموعج
_قدس:: مو بيدي يطيحن بدون ماحس
جرتني العلويه تغمزلي تقدم غضنفر على قدس يمسح بدموعها وهيه مقوسه حلكها وتبجي باسها بكصتها باوعلها يحجي بهدوء
_غضنفر:: ماكو يطيحن بدون ماحس دموعج ماشوفهن بعيونج هذن الدموع غاليات
رجع باسها مره ثانيه واني وشاهيناز فاتحات حلكنه همست بيني وبين شاهيناز ماريد العلويه تسمعني خاف تنومني بصف قدس
_قس:: شو خجلت اني واحس اريد ابجي
_شاهيناز:: حتى اني تاثرت وراح ابجي
درنا وحده تباوع بوجه الثانيه باوعت شاهيناز على جهه العلويه دارت وجهه تبلعم درت ببطء على جهه العلويه شفتها رافعه حاجبها تباوعنه دنكت ابعد عيوني عنها
تقدمت العلويه على غضنفر
_جهاد:: ماتطلع من المستشفى
_غضنفر:: لا انطونا خروج
_جهاد:: يلا لعد عليمن ضالين المستشفى تخنك
هز غضنفر راسه ب اي باوع لقدس يلف شالها ويرتبه الها وقدس مستسلمه حتى ماتتحرك خلص لفه شالها ورجع باسها مره ثانيه بكصتها
طلع من الغرفه ورجع بيده عربانه خلها كدام قدس
تقدم لقدس رتب عباتها الي جابوها الولد من رجعو للبيت شال قدس وخلاها على الكرسي اشر النا نطلع دارت علينه العلويه
_جهاد:: يلا امشن
مشه غضنفر ب الكرسي وطلع من الغرفه واحنا ورا كملو الاجرأت كلها وطلعنا من المستشفى مشه اخوي قاسم لسيارته يفتح الباب حتى يصعدون قدس اشرله غضنفر على سيارته
_غضنفر:: بسيارتي
_قاسم::ها ليش مو بسيارتي
_غضنفر:: لا خليها بسيارتي افضل
مشه لسيارته وفتح الباب شال قدس من الكرسي وصعدها ب السياره اجيت اروح وياهم وصاح بيه قاسم يأشرلي على سيارته صعدت ويا اخواني ب السياره وطلعو بينه للبيت واني صافنه على حنان غضنفر وشلون بهل سرعه تأقلم ويا قدس وهيه تعودت علي
وصلنه للبيت نزلو ولدنا يفتحون الباب لغضنفر نزلت العلويه والساده من السياره فتح غضنفر باب سيارته مدت قدس ايدها لف ايدها على ركبته وشالها على ايدها واني وشاهيناز ويا كل لقطه ننصدم ب الزياد
دخلو للبيت واختي متونسه على شيله غضنفر
دخلنه للبيت دخلو قدس لغرفه ابتهال طلع غضنفر من الغرفه لان بناتنا التمن على قدس يبجن ويبوسن بيها وهيه تكتفي ب هزت راس فقط
بقينه اني والبنات كاعدات يم قدس والعلويه ساكته هيه وشاهيناز
دخلت نضال للغرفه تاشرلنا نكوم لان غضنفر يريد يدخل يكعد يم قدس
_قس:: شنو سالفه السيد كل شوي خاتل ب اختي
_شاهيناز:: ياربييي شلون والله يجيني فضول على سوالفهم وشنو يحجون
_قس:: اني هم شكد توسلت بيها شنو كلها فلا تقبل تكلي انوب من اكلها تخجل تخليني ابجي ب الزايد
_جهاد:: تدرن شنو كلها؟
درنا على العلويه مجلبات بيها
_قس:: اي علويه فدوه لكلبج شكلها
_شاهيناز:: اي عمه شكلها
_جهاد:: كلها اذا ماطلعن كدامي من الغرفه هسه كل وحده يجيها مني راشدي على خدها يسكتها هيه وفضولها
بعدنا عن العلويه صافنات مشكله العلويه جهاد ماعدها شقه حياتها كله جد بجد طلعنا اني وشاهيناز من الغرفه مخنوسات
دخل غضنفر للغرفه واحنا ب الصاله كعدت نضال ويا عمتي تبجبج على قدس وسوده عليه من مشاعرها القويه مر وقت والنسوان يسولفن ويا العلويه
العلويه جهاد كاعده على القنفه ونسوانا كدامها ندك باب الغرفه كامت نضال وفتحته صار غضنفر كدامنا مدنك ترخص من عدنا وطلع من الغرفه للخارج
ربع ساعه ورن جهاز العلويه رفعته
_جهاد:: ها جادح... تمام يلا ماعدنا شي احنا.. الله وياك
سدت العلويه الاتصال وباوعتنا منطتنا علم على رجعتم نضال جلبت ب العلويه حتى تباب والعلويه تتشكرها مانعه بقائهم ومصره على الرجعه باست العلويه قدس وهيه نايمه وودعتني اني والبنات تنطينه التعليمات والنصايح واحنا نسمع منها
"عاتكه"
_عاتكه:: حملت فاطمه الزهراء بطفلها الثاني الامام الحسين (ع) ومضت سته اشهر على الحمل واذا بها تشعر بعلائم الولاده وكان الرسول قد بشر بولاده الحسين كما قال الامام الصادق (ع) قال اقبل جيران ام ايمن الى رسول الله فقالو يارسول الله ان ام ايمن لم تنم البارحه من البكاء فبعث الرسول الى ام ايمن فجاءته فقال الرسول يا ام ايمن لا ابكى الله عينك!
ان جيرانك اتوني واخبروني انك كنت تبكين اليل اجمع؟ فلا ابكى الله عينك مالذي ابكاك؟ قالت يارسول الله رأيت رؤيا عظيمه شديدة فجعلتني ابكي اليل اجمع فقال لها الرسول (ص) فقصيها على
فقالت تعظم علي ان اتكلم بها
فقال لها ان الرؤيا ليست على ماترى فقصيها علي
فقالت رأيت ليلتي هذه كان بعض اعضائك ملقى في بيتي؟ فقال رسول الله نامت عينك ورايت خيرا
يا ام ايمن تلد فاطمه الحسين فتربينه وتلبينه فيكون بعض اعضائي في بيتك
فلما ولدت فاطمه الحسين (ع) اقبلت به ام ايمن الى رسول الله فقال مرحبا ب الحامل والمحمول يا ام ايمن هذه تاويل رؤياك
عدلت ربطه ام الحسنين ورجعت اكمل
_عاتكه:: ورأت ام الفضل زوجه العباس عم النبي رؤيا شبيه لرؤيا ام ايمن وحضرت النسوة وقت الولادة منهن صفيه بنت عبد المطلب عمه النبي واسماء بنت عميس وام سلمه فلما ولد الحسين (ع) قال النبي ياعمه هلمي الي ابني فقالت يارسول الله لم ننظفه بعد فقال ياعمه انت تنظفيه؟ ان الله تبارك وتعالى قد نظفه وطهره
كملت لف ربطه ام الحسنين اخذت عبايتها البسها
_عاتكه:: وهبط جبرائيل على رسول الله (ص) وامره ان يسمه الحسين باسم ابن هارون وكان اسمه بالعبريه شبير ومعناها ب العربيه الحسين
_ام الحسن:: يعني اسم ابن هارون الاول شبر والثاني شبير واسماء الحسن والحسين على شبر وشبير بس ب العربيه؟
_عاتكه:: صح اكمل
وهبط على النبي افواج من الملائكه لتهنئه بولادة الحسين وتعزيه بشهادته واخذ الرسول الامام الحسين فجعل لسانه في فمه فجعل الحسين يمص وكان الرسول ياتيه كل يوم فيلقمه لسانه فيصمه الحسين حتى نبت لحمه واشتد عظمه من ريق الرسول ولم يرتضع الحسين من امه ولا من مراة اخرى
وب اليوم السابع من ولادته امر رسول الله (ص) فحلق راس الحسين وتصدق بزون فضة وعق عنه
نفتح باب غرفه العلويه شافتني اجهز المحسنات للحوزه
_العلويه زهراء:: ها يمه خلصتي خواتج
_عاتكه:: اي علويه خلصن
نزل غضيمر من الدرج يلبس بعبايته والعمامه على راسه شاف العلويه واكفه باسها من راسها
_العلويه زهراء:: يحرسك محمد واله
_غضيمر:: ان شاءالله يلا المحسنات كملن
صاحن المحسنات اي وكامن من مكانهن
_غضيمر:: يلا امشن مع السلامه علويه
_العلويه زهراء:: الله وياك يمه
اشرلي ب ايده يودعني طلعو المحسنات وغضيمر للحوزه باوعتلي العلويه ماده المفاتح ب اتجاهي
_العلويه زهراء:: عاتكه هاج هذه المفاتح
_عاتكه:: شنو هاي علويه
_العلويه زهراء:: هذه مفاتح صندوق المصلا تذكرين العلك الملفوف ب حرز سيد محمد روحي طلعي من الصندوق وجيبي الي بسرعه بس لاطولين عمتج جايه
اخذت المفاتح من ايدها ودخلت للمصلا لزاويه الرفوف اكو صندوق جبير جريته افتح ب القفل نفتح الصندوق بيدي جان متروس صناديق خشبيه صغيره ومتوسطه اخذت صندوق سيد محمد ابو سيد عبد الرؤف عنده حرز السيد محتفظ بي ويا علك اسود
بكل مره شخص يجي للسيد تعبان مريض او متاذي السيد ينطي وصله من هذه العلك الي ملفوف ب الحرز
اخذت وصله من العلك
وكمت اسد الصندوق صار كدامي صندوق خشبي متوسط بلعت ريكي متذكره الصندوق لمنو
طلعت الصندوق وخليته ب الارض غمضت عيوني وفتحت الصندوق فتحت عيوني مبتسمه بحزن واني اشوف اغراضه تارسه الصندوق صارت كدامي سبحه الطين فوك دشداشه سوده اخذتها اضحك متذكره الماضي صرت اطلع ب اغراض الصندوق واضحك راجعه للماضي
"الماضي"
_عبد الرؤف:: زواج الرسول وخديجه الكبرى كان صدمه وقتها للجميع استولت الدهشه وفوجئ اعمام الرسول وعماته بهذا النبأ سيدة تملك الالاف من الاموال ويعيش العشرات والمئات من العملاء والاجراء من بركات اموالها وتجارتها القائمه صيفا وشتاء بين اليمن ومكه وبين مكه والشام سيدة خطبها الامراء والاشراف فرفضتهم سيدة عظيمه مثل خديجه الكبرى تقدم نفسها لشاب فقير يعيش تحت كفاله عمه الفقير ابو طالب!
قامت صفيه بنت عبد المطلب
_مهجان:: منو هاي سيد
_عبد الرؤف:: عمه النبي قامت وتوجهت الى دار خديجه للتحقيق عن الخبر واذا بها تجد الترحيب والاستعداد بجميع معنى الكلمه رجعت صفيه الى اخوتها اعمام النبي واخبرتهم بصدق الخبر استولت الفرحه على اعمام النبي فرحه مزدوجه بالتعجب والدهشه والذهول لان خديجه الكبرى خطبها الامراء والاشراف فرفضت ولم توافق فما الذي دعاها الى انتخاب الزوج الفقير؟
_شاهيناز:: سيد هم حاربو الرسول على زواجه من خديجه؟
_عبد الرؤف:: حاربوه وهاج الحسد بابي جهل فقال (ياقوم رأينا الرجال يمهرون النساء ومارأينا النساء يمهرون الرجال) فيجبه ابو طالب مغضبا (مالك يا لكع مثل محمد يحمل اليه ويعطى ومثلك يهدي ولايقبل منه) وتم الزواج خديجة والرسول وانجبو اولاد ماتو في ايام الصغر وانجبت اربع بنات زينب وام كلثوم ورقيه وفاطمه الزهراء وكانت فاطمه الزهراء اصغرهن سناً واجلهن شأنا واعظمهن قدر
_حميده:: زين سيد ليش فاطمه الزهراء اعظمهن وشلون الله عظمها؟
اجه السيد يجاوب على سؤال حميده بس سكت من سمع صوت دفعه باب المصلا التفتنا على الباب ينفتح ببطىء ويرجع يندفع ابتسم السيد يضحك من شاف عون يدفع باب المصلا والباب يرجع علي وهوا يرجع يدفعه مره ثانيه كمت من مكاني اضحك من شفته بده يعصب ويضرب ب الباب دفع الباب بقوه رجع الباب وهوا ماد ايده يوكف سدته طاح ب الكاع معصب يريد يبجي فتحتله باب المصلا واشرتله يدخل
_عاتكه:: شنو من زلمه يبجي باب
مسح دموعه وجهه محمر والخدود تارسه وجهه شمر حيله على ايده ووكف فتح السيد حضنه يأشرله ب ايده دخل عون يدهرب للمصلا يركض للسيد سحبه السيد الحضنه يبوسه
سديت الباب ورجعت لمكاني تربع عون بحضن السيد يمسح على حضن السيد والسيد يبوس براسه
باوعلنه السيد وابتسم
_عبد الرؤف:: نكمل بروايه هبط جبرائيل على رسول الله (ص) فناداه يامحمد! العلي الاعلى يقرأ عليك السلام ويأمرك ان تعتزل خديجه اربعين صباحا فشق ذالك على النبي (ص) وكان بها محباً فاقام النبي اربعين يوما يصوم النهار ويقوم اليل حتى اذا كان في اخر ايامه بعث الى خديجه بعمار بن ياسر وقال قل لها ياخديجه لاتظني ان انقطاعي عنك هجره ولا قلى ولكن ربب امرني بذالك لينفد امره فلا تظني ياخديجه الا خيرا فان الله عز وجل ليباهي بك اكرام الملائكه كل يوم مرارا
فاذا فاذا جأك اليل فردي الباب وخذي مضجعك من فراشك فاني في منزل فاطمه بنت اسد
فجعلت خديجه تحزن كل يوظ مرارا لفقد الرسول (ص) فلما كان في كمال الاربعين هبط جبرائيل فقال يامحمد! العلي الاعلى يقرؤك السلام وهو يأمرك ان تتاهب لتحيته وتحفته
فقال النبي (ص) يا جبرائيل وما تحفه رب العالمين؟ وماتحيته؟ فقال جبرائيل لاعلم لي
فهبط ميكائيل ومعه طبق مغطى بمنديل سندس او استبرق
فوضعه بين يدي النبي (ص) واقبل جبرائيل عليه وقال يامحمد يأمرك ربك ان تجعل الليله افطارك على هذه الطعام
قال علي ابن ابي طالب (ع)
جان السيد يحجي من وصل لاسم الامام علي رفع عون راسه يضحك ويسأل السيد
_عون:: علي؟
ضحك السيد وباسه بخده
_عبد الرؤف:: اي علي
ضحك عون يصفك بفرح ويصيح
_عون:: يا علي يا علي
رغم ثكل لسانه بس كلنا جنا فاهمينه وهوا يصيح ويلهج ب اسم الامام علي (ع) رفعه السيد باسه من خده ومن حلكه ضحك عون ضام راسه بحضن السيد باوعلنه السيد يمسح على راس عون
_عبد الرؤف:: نكمل الامام علي (ع) قال كان النبي اذا اراد ان يفطر امرني ان افتح الباب لمن يرد من الاقطار فلما كان في تلك الليله اقعدني النبي (ص) على باب المنزل وقال ياعلي انه طعام محرم الا علي
قال علي فجلست على الباب وخلى النبي بالطعام وكشف الطبق فاذا عذق من رطب وعنقود من عنب فاكل النبي منه شبعاً وشرب من الماء رياً ومد يده للغسل فافاض الماء عليه جبرائيل وغسل يده ميكائيل وتمندله اسرافيل وارتفع باقي الطعام مع الاناء الى السماء ثم قام النبي ليصلي فاقبل جبرائيل وقال الصلاه محرمه عليك في وقتك حتى تاتي الى منزل خديجه فتواقعها
فان الله عز وجل حلف على نفسه ان يخلق من صلبك في هذه الليله ذريه طيبه
فوثب النبي الى منزل خديجه
قالت خديجه وقد كنت الف الوحده فكان اذا جنني الليل غطيت راسي وسفجت ستري وغلقت بابي وصليت وردي واطفات مصباحي واويت الى فراشي
فلما كانت تلك الليله لم اكن نائمه ولا باالمنتبهه اذ جاء النبي فقرع الباب فناديت من هذا الذي يقرع حلقه لايقرعها الى محمد!
فنادى النبي بعذوبه كلامه وحلاوه منطقه افتحي ياخديجه فاني محمد قالت خديجه فقمت مستبشره بالنبي
خليت ايدي على حلكي خجلانه ماعرف ليش تخيلت شوق النبي ولهفته لخديجه كمل السيد كلامه
_عبد الرؤف :: فتحت الباب ودخل النبي المنزل وكان النبي اذا دخل المنزل دعا بالاناء فتطهر لصلاه ثم يقوم فيصلي ركعتين يوجز فيهما ثم ياوي الى فراشه
فلما كانت تلك الليله لم يدع بالاناء ولم يتأهب لصلاه بل كان بيني وبينه مابين المراءة وبعلها فلا والذي سمك السماء ونبع الماء ماتباعد عني النبي حتى احسست بثقل فاطمه في بطني
_حوراء:: سيد هم اختلفت الروايات؟
_عبد الرؤف:: اختلفت اي بكتاب الامالي للصدوق
قال الامام الرضا (ع) قال النبي محمد (ص) لما عرج بي الى السماء اخذ بيدي جبرائيل فادخلني الجنه فناولني من رطبها فاكلته فتحول ذالك نطفه في صلبي فلما هبطت واقعت خديجه فحملت بفاطمه ففاطمه حوراء انسيه فكلما اشتقت الى رائحه الجنه شممت رائحه ابنتي فاطمه
_مهجان:: سيد صدك اكو روايه انو فاطمه الزهراء كانت تكلم امها وهي في بطنها
_عبد الرؤف:: صح فاطمه الزهراء كانت تكلم امها خديجه وهي في بطنها انه لما حملت خديجه بفاطمه كانت تكلمها في بطنها وكانت تكتمها عن النبي فدخل عليها يوما وجدها تكلم نفسها فسالها من كانت تكلم فقالت مافي بطني فانه يتكلم معي فقال النبي ابشري ياخديجه هذه بنت جعلها الله ام احد عشر من خلفائي يخرجون بعدي وبعد ابيهم
باوع السيد لعون الي بده يغفى على صدر السيد رجع ضمه لحضنه وخفف صوته
_عبد الرؤف:: بمعجزه انشاق القمر لما طلبو الكفار من الرسول ان يريهم انشقاق القمر وقد بان لخديجه حملها بفاطمه وظهر قالت خديجه وا خيبه من كذب محمد وهو خير رسول ربي
فنادت فاطمه من بطنها يا اماه لاتحزني ولاترهبي فان الله مع ابي فلما تم حملها وانقضى وضعت فاطمه فاشرق بنور وجهها الفضاء
رفع السيد عون من حضنه ونومه على رجلي خال ايده على اذنه
_عبد الرؤف:: فلما قربت ولاده خديجه لفاطمه الزهراء ارسلت خديجه لقوابل من قريش ليأتينها فلم يفعلن وقلن لاناتيك قد صرت زوجه محمد
ف بينما هي اذ دخل عليها اربع نسوة عليهن من الجمال والنور مالا يوصف فقالت احداهن انا امك حواء وقالت الاخرى انا مريم بنت عمران ام عيسى فقالت الاخرى انا اسيا بنت مزاحم فقالت الاخرى انا كلثم اخت موسى جئنا لنلي مايلي النساء
فولدت فاطمه الزهراء بنت محمد
فوقعت على الارض ساجده رافعه اصبعها
_ عبد الرؤف:: عندما نزلت ايه (لاتجعلو دعاء الرسول بينكم كدعاء بعضكم بعضا) هبت على فاطمه الزهراء على الرسول فما كانت تقول يا ابه بل يارسول الله فاعرض عنها الرسول مره واثنين وثلاثه ثم اقبل اليها وقال يافاطمه انها لن تنزل فيك ولا في اهلك ولا في نسلك انت مني وانا منك انما نزلت في اهل الجفاء والغلظه من قريش اصحاب البذخ الكبر وقولي يا ابه فانها احيى للقلب وارضى للرب
وايضا عائشه قالت ما رأيت احد اشبه كلاما وحديثا برسول الله من فاطمه كانت اذا دخلت عليه بحب بها وقبل يديها واجلسها في مجلسه فاذا دخل عليها قامت اليه فرحبت به وقبلت يده
وسأل بزل الهروي للحسين بن روح قال كم بنات الرسول قال اربعه قال ايهن افضل قال فاطمه قال ولم صارت افضل وكانت اصغرهن سنا واقلهن صبحه لرسول الله
قال لخصلتين
الاولى انها ورثت رسول الله
والثانيه نسل رسول الله منها ولم يخصها الله بذالك الا خالص عرفها بنيتها
حتى ان الرسول كان يقبلها في رأسها ويقول لها فداك ابوك كما كنتي فكوني او فداك ابي وامي
نفتح باب المصلا مدت عمتي راسها مستغربه شافت عون بحضن السيد ابتسمت مرتاحه
_جهاد:: خفت دورت مالكيته
_عبد الرؤف:: اجه يشرف على درس العلويات تالي نام وعاف الدرس والاشراف والعلويات
_جهاد:: اي سيد بعد عون مشرف عن العلويات واذا نام عذرو ترا المشرف هم يتعب
ضحكنا نباوع لعون فاتح ايده وحلكه ونايمه بحضن السيد على رجليه دخلت عمتي للمصلا شالته من حضن السيد تبوس بي فتح عيون من شاف عمتي باسها وحضنها مكمل نومته ضحكت عمتي وطلعت من المصلا
مرت الايام وعون بدى يستوطن حياتنا ب الكامل بكل مره نجهز نفسنه حتى نطلع للحوزه يبجي حتى يلبس دشداشه وينسق ويا الساده من نطلع ماشين للحوزه يركض كدامنا بخطواته الصعبه يمشي خطوتين
يوكف داير على السيد مقوس حلكه وعيونه مدمعه ياشرله ب ايده
_عون:: نيني (شيلني)
وبكل مره السيد يضحك ويشيله يمشي بي مسافه من يشوف نفسه ارتاح يضل يبجي حتى يمشي وكذالك السيد يخلي يمشي وحده ويرجع عون يمشي خطوتين ويوكف تعبان والساده متناوبين علي ب الشيله
عمتي عدها سبحه من طين ثقيله وحبه السبحه جبيره تلفها عمتي على ايدها ب ايام الحوزه وتنزل الضل من السبحه لعون
يلزم عون السبحه لان ايده ماتلوح ايد عمتي يضل عون يفتر ورا عمتي لازم السبحه
_عبد الرؤف:: قال رسول الله (ص) من رمى محصنا او محصنه احبط الله عمله وجلده يوم القيامة سبعون الف ملك من بين يديه ومن خلفه وتنهش لحمه حيات وعقارب ثم يؤمر الى النار
اعزاز قلبي انتبهو بيوم تسبون او تقذفون بشخص حتى وان كان سيء وحتى وان كان مو زين لان الله سبحانه وتعالى يحاسب الله ماينسى صغيره وكبيره
_:: سيد زين واذا الانسان تاب يعني هم ممكن نتحاسب؟
_عبد الرؤف:: قال الامام الصادق (ع) التوبه حبل الله ومدد عنايته ولابد للعبد من مداومه التوبه ف التوبه تبداء ب الندم على ما مضى والخوف على مابقى من عمره ولايستصغر ذنوبه فيحمله ذالك الكسل ويديم البكاء والاسف على مافاته من طاعه الله ويحبس نفسه عن الشهوات ويستغث الى الله تعالى ليحفظه على وفاه توبته ويعصمه
عن العود الى ما اسلف ويروض نفسه في ميدان الجهد والعباده ويقضي عن الفوائت من الفرائض ويرد المظالم ويعتزل قرناء السوء ويسهر ليله ويظما نهاره ويتفكر دائما في عاقبته ويستهن بالله سائلا من الاستقامه في سرائه وضرائه ويثبت عند المحن والبلاء كيلا يسقط عن درجه التوابين فان ذاك طهاره عن ذنوبه وزياده في عمله
جانت عمتي كاعده تستمع لسيد وهو يلقي الدرس على النساء وعون بحضنها صافن على عمتي دنكت عمتي تباوع لعون ابتسمت وباسته بخده ضحك عون واشر على خده الثانيه رجعت عمتي باسته بخده الثاني ضحك يأشر على كصته باسته عمتي من كصته وكف عون وعمتي انطته خدها باسها من خدها بوسات متكرره وعمتي مبتسمه
دارت عمتي على السيد الي سكت يباوع لعمتي وعون مبتسم بفرح والنساء كلها تباوع لعمتي وعون يضحكن ضحك عون خجلان يضم راسه بحضن عمتي وعمتي تضحك اطبطب على ضهره
خلصنه الدرس وتوجهنا راجعين للبيت عون لازم سبحه عمتي ويمشي وياها خطواته ببطىء جانت عيوني متمركزه على عون اضحك حسيت بخطوات الكل تتوقف رفعت راسي اشوف مزن وهمام كدامنا
هما جايين واحنا راجعين نضرات همام على عون مبتسم
ونضرات مزن على عمتي
تقدم همام ب اتجاهه السيد ماد ايده للسلام رغم كل الي سواه السيد مارد ايده ومد ايده للسلام
سلم على الساده والعلويات الكبار مدنك
دنك راسه
_همام:: شلونج ام عون شلونك عون بابا
ابتسم همام يباوع لعون الي جان يباوعله مستغرب همام شاف عون من نولد لهذه عمره ثلاث مرات بس!!!
اول مره من جابت عمتي عون والمره الثانيه بعد شهرين من ولاده عون والثالثه صادفت السيد اخذ عون للحوزه وهمام شاف عون عند السيد
رغم عمتي ولا السيد رافضين لقاء عون ب ابوه لان يضل ابوه ومن صلبه وحق علي بس همام هوا الي جان رافض لقاء عون؟
اشر همام لعون حتى يجيه عاف عون سبحه عمتي وتمشه ب اتجاه همام الي من شاف حركه عون ابتسم بفرح
دارت عمتي مستغربه على عون وشلون عافها ومشه الابوه
تمشه عون ب اتجاه ابوه واحنا صافنين علي مستغربين
بس عون جان اله رأي ثاني
تمشه ب اتجاه همام الي جان واكف قريب عن السيد
دار عون على السيد رافعه ايده
_عون:: نيني
ضحكت من جوا النقاب على رد فعل همام وضربه عون اله رغم عون مايفهم ولا متقصد بس حركته كلبت ملامح همام كلها ابتسم السيد واخذ عون لحضنه لف عون ايديه على ركبت السيد وخله راسه على كتف السيد
ابتسم همام بخجل ووكف يباوع لسيد وعون
تقدمت مزن ب اتجاهنا
_مزن:: السلام عليكم شلونك سيد
هز السيد راسه بدون مايباوع بوجهه
_عبد الرؤف:: الحمدلله
_مزن:: ان شاءالله دومك بخير يلا همام تاخرنا امشي
سحبت همام من ايده الى عيونه مانشلعت من عون دنك همام راسه يودع ب السيد
مشو مبتعدين عنا حجت العلويه تأشر على عون
_العلويه زهراء:: ثلثين الولد على ام
ضحكت عمتي وراحت لعون تضحك كرصته من خده
مشينه مكملين طريقنه للبيت وعمتي صافنه على عون
مبتسمه ماجانت تعرف هاي الابتسامه ماراح ادوم وكل هاي المواقف راح تتسجل عدها ذكرى للاحزان فقط...
"عاتكه"
رجعت للواقع كاسره صفنتي خليت ايدي على عيوني امسح دمعتي الي طاحت واني صافنه على ملابس عون سمعت صوت عمتي تحجي ويا العلويه خارج المصلا
كمزت الم الملابس وارجعهن للصندوق
ايدي يرجفن توني اشيل دشداشه عون والسبحه من الارض وانفتح الباب
درت على دخله عمتي للمصلا دايره تحجي ويا العلويه الى اجت تركض تمنع عمتي من دخله المصلا دارت عمتي ب اتجاهي توها تحجي وسكتت من شافت الصندوق مفتوح والسبحه والدشداشه بيدي
وكفت العلويه زهراء صافنه تباوع لعمتي وتباوع لملابس عون
دخلت عمتي للمصلا ايدها ترجف وعيونها على الصندوق ضحكت بحزن تباوع لسبحه البيدي كعدت كدام الصندوق خزرتني العلويه لان ماشلت الصندوق
تقدمت العلويه ب اتجاهنا
_العلويه زهراء:: ولج عاتكه مو كتلج لاطولين يلا شيلي الصندوق
هزيت راسي اي اشيل الصندوق اشرتلي عمتي تمنعي اشيل الصندوق تمشت عمتي ب اتجاهي كعدت كدامي و اخذت السبحه من ايدي مبتسمه بحزن تباوعلي تضحك
_جهاد:: عاتكه تذكرين عون جانت هاي السبحه دوم بيده تذكري مو!
هزيت راسي اي امنع دموعي تطيح اخذت عمتي دشداشته تشم بيها بقوه ودموعها تارسه خدودها
_جهاد:: شلون انساك عون يمه ماكدرر ماكدرر
بجت عاصره الدشداشة بحضنها
_جهاد:: شلون انساك يرويحتي ياعيون امك انت
قربت الصندوق منها ترجف بعدت ايدها عن الصندوق تباوع للعلويه تشهك
_جهاد:: يمههه ماتحمل اشوف اغراضه يمه احسه يعاتبني
بجت العلويه تبعد عيونها عن عمتي
_جهاد:: ماكدر عون يمه والله ماكدر فركتك لوعتني تلوع يبعد امك يهون عليك تعوف امك؟ ماما عون مو ماتنام الى بحضن امك؟ شلون تكدر تنام هسه بالتراب ارتاحيت بنومه التراب مووو
شهكت تبجي فتحت الصندوق صار علك اسود ابتسمت بحزن
_جهاد:: عون هذا العلك انت تحبه ماما تذكر من السيد شده بيدك
رجعت تدور ب الصندوق رفعت راسها تبجي اخذت مضغه لونها ازرق من الصندوق
_جهاد:: لا عون ماما لا والله كلبي ياذيني
بجيت اشهك كعدت العلويه منتجيه على الباب تبجي ايدها على وجهه تبجي
_جهاد:: ليش هيج يمهه عون حتى بحلم ماتجيني حتى بحلم ماتزور امككك هيج نسيت امك مو ماتنام اذا مالوليك بحضني مو ماتنام اذا ماحطكك بحضنيي
بحضنيييي احط بحضنييي حتى ترتاح بنومتك وهسه تشوف امك معلعله بنومتها ماتجيها؟
درت على باب المصلا شفت السيد والساده كلهم واكفين عيونهم مدمعه يباوعون لعمتي اخذت عمتي دشداشه عون تبوس بي
_جهاد:: صدك يبعد الروح مانمت ليلي ولو يمر بيك الريح يحزن دليلي
كملت تمسح بدموعها
_جهاد:: كلبي الذي رباك شينيمه اليل يوليدي خلي وياك يتهادى ويميل
اخذت مشط خشبي صغير لعون ضحكت تبجي
_جهاد:: ردتك ليوم الشيب عون يمه سميتك عون حتى تعينيي بكبرتي مو تكسرني بشبابي
ضربت على وجهه بقوه
_جهاد:: ماكدر لفركتك صعبه صعبه محد يعرف النار البكلبي شنوووو محد يعرف ناري عليك شنوووو ردتكك لكبرتي يبعد امك ردتك تدفني بيدكككك
تاليتها اني ادفنك؟
اشرت على ايديها
_جهاد:: بهاي ايدي عون يمه بهاي ايدي شلتك بصغرك اخاف عليك من الهوه لو مر منك تاليتي اشيلك بيدي ميت سوده بوجه امك سوده بوجهاااا بيوم العافتك ذاك اليوم
صرخت بقوه تبجي السيد مانع احد يدخل يسكتها يريدها تبجي وتطلع الجواها جان اكو البوم صغير السيد لام بي صور عون الصغير كلها فتحت عمتي البوم صارت صوره كدامها
السيد وعمتي والعلويه واكفين وعون بيد السيد يباوع لعمتي بجت عمتي تبوس بالصوره
_جهاد:: اخخخ يمه فدوه رحتلك شسويت بيه
الكل جان يبجي على بجي عمتي صارت عين عمتي على السيد الي دموعه ترست عيونه تحولت نضرات عمتي من الحزن للغضب وكفت تباوع للسيد خلت صوره عون بوجهه السيد
_جهاد:: سيد انت السبب بموته ابني ابني ماتتت بسببك انتتتت
"مهره"
تمشيت راجعه للبيت طلعت دفتر سجلت بي درس اليوم وشنو كدرت اخذ من الدرس حتى استفاد منه بعدين اول صفحه تذكرت وحده من النساء سألت السيد عن الفزع بليل جابوها ب
_عبد الرؤف:: عشر مرات (اعوذ بكلمات الله من غضبه ومن عقابه ومن شر عباده ومن همزات الشياطين وان يحضرون) النبي محمد كان يأمر به والمعوذين وايه الكرسي و ايه (واذا يغيشكم النعاس امنة منه) من سوره الانفال ايه 11 وسوره النبا ايه 9 (وجعلنا نومكم سباتا)
_:: سيد والعسر
_عبد الرؤف:: اكو صلاة للعسر ركعتين الاولى الفاتحه و قل هو الله أحد و(انا فتحنا لك فتحا مبينا الى وينصرك الله نصرا عزيزا) والركعه الثانيه الفاتحه وق هوا الله احد والم نشرك لك صدرك
_عبد الرؤف:: وصلاه لمن اصابته مصيبه اربع ركعات فاتحه الكتاب مره واخلاص سبع مرات وايه الكرسي مره فاذا سلم يقول (صلى الله على النبي الامي واهله) وبعدين التسبيح فيعطيه الله ما وعد
_عبد الرؤف:: صلاه الرزق عن النبي (ص) عن جبرائيل (ع) يصلي ركعتين الاولى الحمد مره والكوثر ثلاث مرات والثانيه الحمد مره والمعوذتين كل وحده ثلاث مرات
_:: سيد والخوف؟
_عبد الرؤف:: الامام الصادق (ع) قال اذا خفت جنيا او ادميا فضيع يمينك على ام راسك واقرا برفيع الصوت (افغير دين الله يبغون وله اسلم من في السموات والارض طوعا وكرها واليه ترجعون) من سوره ال عمران ايه 77
_:: سيد اكو دعاء اذا دعيناه الله مايردنا؟
_عبد الرؤف:: علي ابن الحسين (ع) قال كنت ادعو الله سبحانه سنه عقيب كل صلاه ان يعلمني الاسم الاعظم فبينما انا ذات يوم قد صليت الفجر اذا غلبتني عيناي وانا قاعد واذا انا برجل قائم بين يدي يقول لي سأان الله تعالى ان يعلمك الاسم الاعظم؟ قلت نعم قال فقل (اللهم اني اسألك باسم الله الله الله الله الله الذي لا اله هو رب العرش العظيم) قال فوالله مادعوت لها لشيء الت رأيت نجاحه
سديت الدفتر ورجعت شلته مكمله طريقي هواي جاي استفاد من الحوزه جاي احصل معلومات محد حاجيهن
كملت طريقي راجعه للبيت دخلت ب الفرع
شفت جهال من بعيد واكفين كدام بيت وثنين شايلين ولد على ايديهم يردون يصعدو للحايط
باوعتلهم مستغربه حركاتهم والشي الجاي يسوو
شافوني جايه ب اتجاهمم ركض على واحد منهم يطفر
_:: شلونج خاله
_مهره:: هلا حبيبي
_:: خاله الله يخليج جيبي الطوبه
_مهره:: ياطوبه؟
_:: هذيج طوبتا طاحت فوك الشجره
وكفت اباوع للمكان الي ياشر علي جانت اكو شجره جبيره داخل قطعه فارغه بس حايط محاوط القطعه والطوبه فوك الشجره
_مهره:: هاي شوداها فوك؟
_:: خاله هذا عباس الاثول شمرها فوك الشجره
ركض ولد مدبدب خدوده يركضن ورا على الولد اليحجي يريد يكتله بعد الولد طافر منه
_عباس:: منو اثول ولك
_:: مو عليك جاي احجي
_عباس:: عبالي
_:: اي عبالك شعبالك هسه ليش شمرتها فوك
_عباس:: وين ادري انا طكاتي عاليه
_:: اي كرستيانو انت وطكاتك عاليه جاي تلعب لكأس العالم
ضحكت على دهرتهم وشلون معصبين ويتعاركون باوعت للسياج ناصي مو ذاك العلو اكدر اصعده وبس احرك الشجره توكع الطوبه
_مهره:: محد ب القطعه مو
_:: اي خاله محد فارغه
_عباس:: خاله انتِ طويله حبابه جيبيها
_:: اي خاله عليج الله
بدو يصيحون ويشجعوني حتى اصعد اجبب الطوبه باوعت للفرع فارغ محد موجود
_مهره:: هاك اخذ هذن الزمهن
_:: انطيني
نطيته الكتب ومشيت على جهه الحايط زين شلون اصعد الحايط باوعتلهم صار واحد بوجه الثاني كلها باوعت لعباس المدبدب
_عباس:: ها خاله
_مهره:: تعال دنك خل اصعد على ضهرك
_عباس:: شنو خاله تردين تموتيني
_مهره:: ولك والله بس عظام ضاله هاي العبايه مسمنتي هيج ضعيفه اني
_عباس:: لا خاله لا ينكسر ضهري
_مهره:: خوش ماجيبها لعد
كلها تصيح حتى عباس يصعد واني امشي ببطء للولد الشايل كتبي باوعلي عباس ضايج وتحرك للحايط يهز ب ايده
_عباس:: يلا تعاي بس لاتكسرين ضهري
_مهره:: لاا ماكسره
مشه يم الحايط مدنك تمشيت يمه واكفه استحيت اصعد على ضهره بحذائي
_عباس:: ها خاله
_مهره:: اوكف انزع الحذاء
شمرت الحذاء من رجلي خليت رجلي على ضهره صحت ياعلي وصعدت بسرعه لازمه الحايط صعدت على الحايط واكفه علي بعد عباس ياشرلي على الطوبه
_عباس:: هاي الطوبه خاله
باوعت للطوبه مو بعيده مجلبه بين الاغصان اخذت اهز ب اغصان الشجره حتى توكع بس ماكو الطوبه مجلبه
درت عليهم صافنين على الطوبه
_مهره:: مايصير ماتطيح هاي
_عباس:: لا خاله عليج الله حاولي
رجعت احاول مره ثانيه ابعدها بس الطوبه عالكه ماتتحرك اصلا نمدت بوجهي بوريه حديد طويل درت اشوفهم شايلين البوريه ماديها ب وجهي
_:: خاله هاج هاي حركي بيها
اخذتها منهم اضرب على اوراق الشجره ضليت مركزه ويا الطوبه والولد يشجعوني صاح واحد من الولد
_:: شلونك سيد
_:: السلام عليكم سيد
_:: هااا سيدد
وكفت اسمع ب الصوت الي اجاني مصدومه اني سامعه هذه الصوت ومتاكده هذه صوت؟؟
_مفرقد:: عليكم السلام شلونكم
نزلت البوريه من ايدي مصدومه درت عليهم اشوف السيد مفرقد واكف يم الاولاد بيده الكتب يباوعلي مستغرب واني العبايه طايحه من راسي وبدون حذاء والبوريه بيدي وفوك هذا صاعده على الحايط عبالك عتوي
_:: سيد طوبتنا طاحت فوك الشجره وهاي الخاله صعدت تجيبها
باوعلي السيد مستغرب صعدتي دنكت ابعد وجهي عنه
_مفرقد:: خويه شلون صاعده فوك ماتخافين على نفسج؟
درت اباوعله مستحيه هسه الشارع صاله ساعه فارغ من دخلت اني دخلت وراي ياسيد دخيل جدك حجيت ويا امتمت ب الحجي
_مهره:: ها لا هسه راح انزل
حجيتها وشمرت البوريه ب اتجاهم من غبائي ناسيه الجهال ملتمين جواي ماشوف غير اجت البوريه على راس ولد صغير خله ايده على راسه يصرخ متوجع باوعتله خايفه وبدون ماحس على نفسي شمرت روحي من السياج صاح السيد محذرني انزل لاكن بعد ماشمرت نفسي
بمجرد وصولي للارض صرخت متوجعه اشوف بطل كزاز مكسور نابت برجلي....
شكرا لزيارتكم عالم روايات سكيرهوم
