رواية نهوة عمامي الفصل الثالث عشر بقلم مرج البحر
سارة شنو شبيه
شلون تعوفين نجلاء تشتغل وحدها وانتي رايحه مكضيتها سوالف ما تكولين خطيه صايمه
سارة بقيت صافنه هيه اصلا ما صايمه كتله شنو وحدها غير اني كملت كلشي بقه بس التمر وامك صاحتني
لا هيه نجلاء مسويه كلشي اني ضليت صافنه بعد شكله ما يصدك لن هيه كايلتله سارة من زمان راحت واني بقيت وحدي وسكتت والله وما حاجيتها لا كتلها ليش هيج سويتي بقيت ساكته وثاني يوم هيه اجت تعتذر مني كتلها لا ما صار شي عادي
وخلص رمضان وبعد العيد بكم يوم نجلاء تزوجت
وهيه تزوجت بكربلاء ومن اجو عليها عيالها حتى يرحون لكربلاء طلعت وحدها اني ما طلعت وياها وهيه جانت زعلانه على اهلها وهيه ما عدها أطفال من زوجها الاول
وفاتت اشهر فاطمه صار عمرها سنه وسويتلها عيد ميلاد بس ما صار عيد ميلاد علينا صار يوم اسود امي انضربة جلطه بالدماغ صارت عدنه حالة وفاة بمحافظة العماره وامي متفقه هيه وخالتي يلتقن بكراج الكوت خالتي من بغداد وامي من نازله من السياره متخربطه وهيه وحدها سوده عليه جانت خالتي بعدها ما واصله يمها والشرطه محتارين بيها وما خذينها للمستشفى ومتصلين على ابوي من تليفون امي وبقت امي بالمستشفى ثلاث ايام و وصارت زينه والحمد لله بس بقت فتره قليل تحجي
وفاتت ايام وصارت بداية الموسم الدراسي يوسف صار صف رابع ابتدائي ومؤمل صف اول ابتدائي بس مؤمل ما يحب الدراسة مثل يوسف لا جان يشلع كلبي على مود القرايه يعني اجيبه سحل والله وبلكوه يالله يحفظ واول سنه هو نجح بس مستواه ضعيف واني رحت على مدير المدرسة وخليته يعيد السنه بس يوسف كل سنه يطلع اول والحمدلله وبلسنه الثانيه
العاد بيها مؤمل يوم من الأيام وقت الظهر جنت نايمه وبحضني فاطمه واجه يوسف يركض ويصيح ماما ماما كومي مؤمل طاح من السياج وما يتحرك اني ركضت اشوف ابني ممدد بالطرمه وفاقد احاجيه اهز بي ما يتحرك بس كام يون ولبست عبايتي وركضت على بيت عمي حميد وصحت حنان مرت ياسين وخليت فاطمه ويوسف يم عمتي اقبال وركضت بمؤمل للدكتور وخذنه رقم وبقينه ننتظر على ما صاحو برقمنه ودخلت للدكتور وكال شنو شبي كتله جان صاعد على السياج ووكع ومن وكع فقد وكمت اهز بي وذبيت مي على وجه ضل بس يون كال الدكتور هم تقيء تكله لا وكتب علاج وكال اذا تقيء بسرعه تنقلونه للمستشفى كتله تمام وطلعنه من العياده
ومن طلعنه اجرنه تكسي وبعدنه باب العياده مؤمل صار يتقيء من حلكه وخشمه واني صاعده بالتكسي ومؤمل بحضني نزلت مرت ياسين ورجعت للدكتور واجه الدكتور شافه واحنه بالسياره وكال هسه بسرعه تاخذو للمستشفى وهاي ورقه تنطوها للدكتور الخفر على ما اني اجي كتله تمام واتشكرت من الدكتور ومرت ياسين كالت للسايق ودينه للمستشفى كتلها لا نرجع للبيت شلون اروح هيج ما تشوفين حالتي وملابسنه اني ومؤمل ورجعت للبيت ولكيت سيف موجود بالبيت منتظرنه ومن سولفتله وكتله هسه ناخذه للمستشفى بس اغير ملابسي وغيرة ملابس مؤمل واني ورحنه للمستشفى اني وسيف وعمتي اقبال وياسين ورحنه ودخلونه بغرفت المراقبه بس اني ومؤمل والدكتور
حولنه على غرفه المفراس واخذته وسويتله فحص مفراس وبعدين على غرفه الايكو وهو مؤمل بس يتقيء ورجعنه على غرفه المراقبه وحتى فاطمه نسيتها يم حنان وهيه ترضع لحد ما خابرتني حنان مرت ياسين وكالت فاطمه راح تموت من البجي سوده عليه من العصر لحد ثلاثه بليل هيه ما راضعه صح تاكل بس قليل ورحت ارضك صحت سيف كتله راح ارجع للبيت على فاطمه كال شلون ومؤمل غير يضل يبجي عليج كتله انته ابقه يمه اكلك الطفله راح تموت من البجي كال روحي وشوفيها وتعاي كتله تمام ورجعنه اني وعمتي اقبال للبيت وسيف وياسين بقو بالمستشفى ومن رجعت لكيتها روحها رايحه من البجي وهيه بيها طبع بس تبجي واني مو يمها تزعل وما تحاجيني والله وهيه من شافتني راحت نامت بحضن مرت ياسين وتناشغ واصيح بيها واريد اخذها ما تقبل وكتلها ابقي اني راح ارجع اروح يم مؤمل وهيه تناشغ كالت لا ماما اني احبج كتلها واني اموت عليج وقنعت ورضعتها ونامت وصارت الساعه بالخمسه الفجر وخابرت على سيف كتله خل يجي ياسين ياخذني لن عمتي اقبال نامت وخطيه اكعدها كال
لا لا تجين هوالدكتور الساعه بثمانيه يجي يشوفه وإذا كال يبقه بالمستشفى اخابرج وتعاي كتله تمام وسألته هو هم بعده يتقيء كال
اي وهسه الدكتور الخفر جان يمه كتله اي وشنو وضعه كال ما كال شي لحد ما يجي الدكتور ويشوفه كتله راح انام شويه واي شي يصير خابرني كال تمام واني نمت وفزيت الساعه بثمانيه ونص سمعت عمتي اقبال تخابر بسيف وتسأله على مؤمل وسيف كاللها هسه الدكتور اجه وراح يعيد المفراس من نكمل اخابركم
وبعد ساعتين تقريباً
خابر سيف وكال الدكتور يكول صاير عنده ارتجاج بالدماغ كلش قوي وحولنه على الدكتور تاني خاص بالدماغ بس بالكوت وراح نرجع للبيت ورجع سيف للبيت والدكتور كاتب ورقه تحويل وسيف كال اني كلش تعبت انتي اخذي وروحي للكوت كتله اروح وحدي صار شي شلون كال مشكلتج اني تعبت والله بعد ما بيه اتحرك وخابرت على اخي سالم وكتله تروح وياي كال اي انجي اني وامي وابوي وكلنه نروح وياج شلون نعوفج طبعا اهلى الليل كله هم ويانه بالمستشفى اخواني ثنينهم وامي وابوي وعمي عزام ومرته كلهم صدك لو كالو الاهل عزوه والله عمري ما اجازي اهلي
وكلت ل سالم تعال ورى صلاة الضهر حتى نروح من وكت على مود الحجز ورحنه وانتضرنه الدكتور على ما اجه الساعة بتلاثه العصر ومن شاف وضع مؤمل بحضني وبس يتقيء وشاف التقارير بادي اول ما دخل للعياده صاح على السكرتير وكله خل يدخل الطفل وصاحنه السكرتير ودخلنه وسلمنه على الدكتور وكال شنو شخيره كتله دكتور البارحه الضهر صاعد على السياج ووكع وأول ما وكع فقد الوعي وبعدين ضل بس يون واخذته لدكتور ومن شافه يتقيء حولنه على المستشفى وهاي المفراس والايكو والتحاليل وفحصه الدكتور وكال عنده ارتجاج بالدماغ كلش قوي هذا العلاج تستمرون عليه مدة شهر واهم شي الراحه وكال لا تخافين ان شاء الله ما بي شي كم يوم ويصير زين كتله زين دكتور والتقيء كال هذا الشي طبيعي لن الدماغ ما مستقر ان شاء الله يصير زين ورجعنه للبيت واستمريت على العلاج ومؤمل صار زين وبعد عشرة أيام اخذت مؤمل ورحت للمدرسه وطلبت من المدير والمعلمين ان يديرون بالهم عليه لن الدكتور كال اهم شي ما ينضرب على الرأس
وبعد مرور اشهر
وبعد العلاج والمتابعه
الحمد لله مؤمل صار زين ورجع وضعه طبيعي
يوسف صار صف خامس ابتدائي وجان يم بيت جده حميد ونجلاء صارت عدها بنيه من زوجها الثاني ويوسف يلاعب بت نجلاء وشايلها وهيه الطفله بلا حفاضه وتكرمون مدرره على يوسف وهوه راسن اجه وطب للحمام والوقت كان مغرب الاذان ياذن اني جنت اتوضه وما اسمع بس يوسف يصيح ماما الحكيني وحش كتلني ماما والله كتلني اني ركضت الباب مال الحمام ما ينفتح واني كمت اصرخ على سيف هسه طب من الشغل واني وسيف ما نكدر نفتح الباب ويوسف يصرخ ويكول ماما ضربي الله شاهد على كل كلمه تقرببن عشر دقائق اواكثر بس احنه كنما سنه وسلام كسر الباب وطلعنه يوسف ضهره يصب دم وبس يصرخ منضر ضهر يوسف
متروس خراميش كنما خراميش اسد والله واديه هم ويصبن دم وخليته بحضني وسكت شويه وكتله شنو صار ماما سولفلي
يوسف ماما اول ما فتحت الماي الحار شي وكع على ضهري وكاع يضرب بيه ووكعني للكاع ونام على ضهري واحس اضافر يجرح بضهري
انت شفته
لا ماما شفت بس رجليه رجلين وحش متروسات شعر واضافره اطوال ولونهن اسود
وهو بس يناشغ وسيف كال خل اخذه لسيد طالب يمنه سيد معروف واخذه ورح ورى شويه خابرني وكال تعاي جيبي الاطفال وياج لن السيد يريدكم واخذت مؤمل وفاطمة ورحت ودخلت على السيد وسلمت وسأل السيد وكال سولفيلي شنو صار لن يوسف بس يبجي
والسيد كال اني صحتج اريد يوسف ما يخاف ويسولف شنو شاف اني كعدت يوسف بصفي وكتله سولف ماما لا تخاف اني يمك وابوك يالله حبيبي سولف لعمو شنو صار بالحمام وبدء يوسف يسولف للسيد وسألني السيد انتم هم مفلشين شي بالبيت كتله لا بس جيرانه الي بضهر البيت فلشو بيتهم للكاع ويردون يبنون من جديد والسيد كال هذا هوه السبب الشي الضارب ابنكم هو جن وهذا الجن غير صالح والجن الغير صالح يهيج من التفليش وهو الجن جان موجود بيت جيرانكم ومن تفلش عبر عليكم واني اكلكم راح تتاذون منه هواي اذا ما تسوون حل كتله سيد انت شنو تشوف زين النه سويه ونطاني بطل مي مقري عليه وكال هذا ترشون البيت كله بي بس اهم شي اركان البيت الاربعه وانطاني اوراق ابخر بيهن البيت وحرمل وبخور وسوه حرز للاطفال ورجعنه للبيت وبقينه على هاي الحاله ثلاث اشهر الله شاهد جنه من نام فاطمة بحضني افز الكاها تصرخ جوه الدرج وتاذينه كلش هواي من الجن والله من ادخل اسبح اشوف الويل يجرون شعري لو يضربوني اني والاطفال حيل تاذينه وجبنه شكم سيد للبيت وكلهم نفس الكلام على الجن وجبنه سيد من العماره وكال هذا مو جن واحد لا هذول عشيره كامله والله اني كمت اشوف اشكالهم ومن كلت للسيد كال هاي لن انتي حاربتيهم كتله شلون كال ما خفتي منهم ولن تصلين وتقرين قران بس همه هسه يحاربونج بالأطفال وبس اني اريدج تبقين لا تخافين منهم
وكمل كلامه السيد وكال بس اريدج تدرين بالج لن ما دام انتي تحاربينهم بصلاتج وقراته القران راح ياذونج بس انتي صيري اقوه منهم
وفاتت ايام واني بقيت مستمره على قراة القران واشغل سوره البقره بالتليفون على طول اليوم ابد ما يطفه ولحد ما يوم احنه نايمين....
شكرا لزيارتكم عالم روايات سكيرهوم
