رواية ناديه الفصل الثالث عشر بقلم انين الليل
احزان والالام
دموع ممزوجه بخوف وترقب من الاتي
ابي ابي اين انت الا تعلم انني بقيت وحيده في عالم غريب مع اخت ماسكه بيدي
تخاف ان اتركها كما تركونا
من انجبونا تركونا للمجهول ليس معنا الا الخوف والانتظار
اتكلم وكأنني كبيره الا اني يابابا لازلت طفله لاتفقه شيئا
سوى ان ابيها قد ذهب الى الجنه
وهي من اوصلت امها الى الهاويه
//||///////|/||/////|||/////||||//// //
الصبح الناس تجي البيتنا خصوصا النساء يجن حتى يستفسرن ويعرفن شلون امي كتلت ابوي وكل اثنين تلاثه
يگعدن يبسبسن وياشرن عليه هسه تگولون رمضان ليش يجن بالنهار لان شهر رمضان صار بالشتا والليل طويل
وماكو وسائل تواصل مثل هسه فالناس تنام وتگعد الفجر تصلي وترجع تنام والصبح الناس تروح الاشغالها
نسوان المنطقه اجن واجت خاله حصه وگالت انو موضي تتمنى تجي بس ما تگدر وهي بس تبچي على بابا
واليوم راح تحاول تخابر بيبي
گعدت حنين وبيدها اللعابه الي اشتراها الها عمو سراج حنين بس تباوع ما مفتهمه شي ولان انا وبيبي يمها
وعمه زهراء وتشوف الناس والجهال حتى ما سالت على امي بس بالليل تبچي وتگل البيبي
اريد ماما ماده (اريد ماما مياده )
بيبي تبوسها وتگلها هسه تجي وتظل تمسح على راسها واشوف بيبي شلون تمسح دموعها
بيومها حنين بيدها اللعابه وجاي تلعب بيها بالطارمه واجت هديل بت عمو هادي خمشتها منها
حنين ما انطتها الها هديل لزمت حنين وعضتها
سمعنه صرخة حنين الي لگيناها تملش بشعر هديل اجت افراح بدل ما تفكهن صارت تضرب بحنين وهي تگول
افراح //منين تطلبيها من امج الكتلت الرجال على مود صاحبها
ابتهاج اختها تگلها// يجوز هاي هم شايفه شي وضامته
افراح وهي تحرك اديها //بنات مياده ما استبعد شي عنهن
رحت ابچي البيبي الي چانت گاعده يم النسوان بالغرفه من شافتني سألتني= ليش تبچين منو وياج
جاوبتها بصوتي المبحوح ... ...عمه افراح ضربت حنين
راحت بيبي وگالت الها =افراح ليش ضربتي البنيه
افراح //عمه مو مشعت راس هديل
حنين راوت ايدها وتبچي وتگول عتتني (عضتني )
بيبي گالت الافراح //بتج عاضتها ليش تضربينها
افراح بنتر //وشدعوه شسوينالها
بيبي =خطيه افراح خطيه ذني يتايم
افراح وهيه ماده ايدها // واذا يتيمات يطيرن وانتي ياهو كالتلج هاي العوبه نديوه الفتانه بعد هي رب الفتنة
على امها شنترجى منها هسه تلبسنه زلم وتخلي رياجيلنه يذبحونه
ابتهاج //مني هاي عمت عينها وعين امها الساقطه
بيبي =خاله ابتهاج انتي ما الج دخل انا احچي ويه چنتي
افراح //على كيفج ليش هيج تحچين ويه اختي لان حچت الصدك
بيبي =عيب عليج منا الناس جاي اگلج خطيه يتيمات
افراح تخوصرت وگالت بصوت عالي //وانا شگايله يتيمات يحترمن نفسهن مو بگد اصبعي ويسوون دهاير
بيبي =ولج افراح احچي عدل عيب عليج
افراح //والله عمه ما حچيت اله الصحيح شنو انا الگلت الامهن تكتل ابوهن هي وصاحبها لو انا الگلت الابنج
يرخي الحبل وتلعب براسه
بيبي جميله //انچبي ولج
افراح //ليش انچب چي احچي الصدك
اهنا بيبي منيره ما اتحملت كلام افراح گامت شگت ثوبها وهي تضرب على وجهها
=يمه عباس هاي الگرايب هيچ تعير شنگول على الغربه يمه عباس اخذني واخذ بناتك المن مخلينه للعار
وصارت تصرخ التمت النسوان على بيبي ورادن يهدنها وهي تدك على وجهه وعيونها والنسوان يلزمنها
وهي تگول = عوفني خلني بلكي اموت ولا اشبع قهر من التسوه والما تسوه
ما انحس اله الباب اندفر ودخل عمي هادي وعينكم ما تشوف لزمها الافراح وگدام النسوان گطعها هي وهديل
يمكن ما بقى عظم صاحي بيهن وگوه عمه زهراء وبيبي جميله ونوال فكنها من عنده حچه وياها وهو يرجف
هادي //اسمعي ولج ما تبقين اهنا ولو ما الناس تتقول چان هسه طلگتج حقيره منو انتي وتعيرين
جميله گالتله //اتهده بالرحمن خاله
هادي وهو يتهدد على افراح // گلت ما تبقى والله اذا بقت هسه اموتها طلعوها
طلعت افراح وهي تدعي علينه انا وحنين وتگول //كون فضيحه اكبر من فضيحة امهن
وتباوع البيبي وتگلها// ان شالله تدفنين ابنج وبناتج ويحترك گلبج اكثر من هاي الحرگه
عمي هادي اتهدد عليها بس زهراء واخواته ردنه عرفنا بعدين ياسر رايح مسولفله گعد هادي يم بيبي منيره
وهي تلم بثوبها المشگوك باسها براسها وگلها// يمه خليها اتولي چان طلگتها بس الناس ..
بيبي بكسرة خاطر = لا يمه اسم الله لا تطلگها جهالك وبيتك
هادي //يمه الله يخليج لا تزعلين وتتضايگين تروحلج فدوه هي وجهالي
بيبي اختنگت بالعبره وصارت تنحب وتبچي وهو گعد يمها وصار يبچي والتمن عماتي وبيبي جميله وبيبي ام سراج
بعدين اجه ياسر گله // بابا اجو عليك زلم بره
بوكتها جيرانه بيت ام سعد فتحوا الديوان حتى عمي هادي وكرم وسراج يستقبلون الناس الي تجي
هو راح وعمه سلوى جابت دشداشه البيبيتي لبستها
ام سراج اجه عليها موفق واخذها الاقاربها تسلم عليهم لان قرروا وره الظهر يرحون
زهراء طبخت غدا
الظهر اجه جدو منير وگعد يم بيبي وبعدين اجه سراج وصبوا الغدا عرفنا اقارب ام سراج مسويلها غدا هي وموفق
ومعطليها گعد سراج وابو يردون يتغدون لمن ما گال جدو الزهراء // جيبي بنات عباس ياكلن ويانه
صاحتني انا وحنين وگعدنا وصار سراج يوكل بيه وبحنين
جدو منير گله //اي بابا وكلهن ودير بالك عليهن خاف اموت لان جدهن صاحب فضل عليه وابوهن صاحب
فضل عليك
سراج ::بدون ما توصيني يابه ذني بنات عباس امانه عدي
سراج انملت عيونه دموع بس هو كابر ساله منير //انت يمته تجي
سراج ::بابا باچر اسافر خالي گلي تعال للدائره وانطيك اسبوعين اجازه
منير //ترجع اهنا
هز راسه ::اي بابا ارجع على ما تتسكر القضيه
جميله گالت// والله خويه لو ما سراج دم عباس ضاع من وره هالبر،،،
زهراء //شنو هالحچي يمه
جميله //ها مچذبه حرگت گلوبنا ويتمت ذني المسكينات
بيبي منيره بچت اتقرب عليها سراج گلها //عمه كافي لا تبچين
جدو منير //كافي منيره
بيبي =والله ابچي على ذني الي اتيتمن من الاب واتيتمن من الام اگول شلون بيهن ياهو الهن
جدو منير //اذكري الله منيره الهن الله
=والنعم باالله بس خويه منير بعده ابوهن اله سبع تيام وامهن ما ثبتت عليها التهمه وصارن مدگه وعار
سراج انتفض ::عمه شتحچين شصاير
جميله //هاي العوبه مرت هادي ضربت حنين ومن عاتبتها منيره صارت تعير وتغلط
سراج ::لا ما مسموح الاي احد يحچي ويغلط انتي عمه (اشر باصبعه على بيبي )انتي مسؤوله عن بنات عباس
لا تخليهن محتاجات الكل احد
منير// اي ام عباس البنات ما محتاجات الاي احد راتب ابوهن والمحل شغال وهذا البيت هم اجري
منيره =ان شالله
اهنا سراج باوع البيبي وگلها كانما اتذكر شي ::عمه لاتنسين المحل الي اشترا عباس وبقى على فلوسه 750
منير //يامحل هذا
سراج //يابه عباس قبل ما هاي استغفر الله قبل ما هاي الحقيره تكتله بيومين دفع فلوس محل وگال راح يسجله باسمها
لان تلح علي تريد يسجل البيت باسمها
جميله //بت الكلب مبيته النيه
سراج ::اي والي باع المحل گال ما اتنازل عنه اله تكملي باقي الفلوس وچنت انا وصاحبه عصام الشرطي عمه الثامر
شهود يكمله وبعدين ابو ناصف يدور المحل
منير //الحمد لله ما دارا باسمها اقلها يفيد البنات بس منين باقي الفلوس
جميله// من الذهب الي نطته الصاحبها
سراج ::الذهب تگول ذهبي وانا انطيته اله
جميله// اويلي شلون عين صلفه
منير// هسه ابو المحل يصطبر بعدين نشوف شلون ننطي الفلوس
ابتهاج اخت افراح چانت موجوده هي وامها وسمعت الكلام الي انحچى
واجت ام سراج وسلمو على بيبي وام سراج تگلها
— -منيره ديري بالج انتي هسه مو ابحدج برگبتج اثنين يتيمات واقرب الناس ما رحمهن بعد هنه صارن بذمتج
ديري بالچ على نفسج وعليهن
بيبي بس تبچي ام سراج حچت وياها //منيره وداعتج انا لو اگدر چان بقيت بس والله تعبانه ومناك نور ابحدها خليتها
يم بيت اخويه
بيبي منيره =والله ما قصرتي امنه ان شاء الله اجازيج من تجين من الحج وبزواج سراج
ام سراج هزت ايدها //هذا غاسله ايدي منه ما ورا زواج
سراج وگف وگال ::اهوو بدت سمفونية امي ياالله حجيه هم ياالله طريقكم طويل
ام سراج //اي غير الموضوع والى متى (باوعت البيبي وگلتلها )منيره بالاربعين نلتقي بالنجف ان شالله
بيبي بحسره =ان شاء الله
ام سراج //ما اوصيج منيره ديري بالج على نفسج لان البنات من بعد رب العالمين انتي الهن
بچت بيبي وگالت ==الله يعيني امنه وانتي هم اندعيلي
تباوسن وجدو منير باسني وهو يبچي ويگول //اسمعوني كلامي للكل ديرو بالكم على بنات عباس لان هو ما قصر
ويه كل واحد بيكم من الچبير للزغير
جميله // اي والله خويه ابو سراج بس مع الاسف غدرته الما تخاف من الله
آمنه // الله يستر على اعراض الناس واعراضنا يارب
الكل رددو آميين
وراحو بيت جدي منير وسراج طلع وياهم وما رجع اله وره الفطور
ابتهاج راحت البيت هادي گالت //اروح اشوف افراح عدله ميته من عكب كتلة هادي
جميله //لا تخافين تلگينها هسه فاكه زيجها وتدعي روحي شوفيها خاف تريد تروح البيت اهلها
ابتهاج تخوصرت // شنو تعوف بيتها وتروح (هزت ايدها باستهزاء )
بيبي من شافت سراج اجه گالت العمه سلوى //گومي خلي الاخوج عشا
سراج متوتر وگال:: لا عمه شبعان بس اريد چاي هادي وين ابيته
زهراء //لا ابيت ابو سعد توه دز على چاي يمه جماعه ها هذا ياسر جاب الاستكانات
سراج لزم ياسر وگله :: من يرحون الزلم گل الابوك عمو سراج رايدك انت وكرم مو يتاخر
ياسر //صار عمو هسه اشاوره
سراج ::عفيه بالسبع
جابت عمه سلوى كوب جاي ربع ساعه واجه عمو هادي هو وكرم سراج باوع البيبي وعمو وگللهم
::عمه انتي وهادي وحتى انت كرم اسمعوني (باوع الساعته )فد ساعه راح يجيبون مياده وصاحبها الي اريده منكم
خصوصا انت هادي شنو يگولون وشلون يمثلون گدامك الجريمه انتم تسكتون لا تحچون اي شي
:: اعرف بيكم گلبكم محترك بس اي كلمه تنحسب علينه ويمكن ناديه ما تعرف تحچي اريدج عمه قويه وانت
هادي تلزم اعصابك هاي الناس ممكن تفر القضيه لازم نصير اذكى منهم انا سويت اتصالاتي وبعد شويه
راح يجون كشف دلاله تصيرون على صفحه تباوعون وتسكتون اله يتوجه الكم سؤال مفهوم
ما اريد كلام وعياط ولا عنتريات
هزو راسهم انا چنت گاعده يم بيبي عكس حنين الي تلعب ويه الجهال وما مهتمه بالي يصير
اتقرب مني عمو سراج وگال ::ندوش هسه يجي جدو القاضي اريدج تحچين كل شي شفتي كل شي بدون چذب
لان الله يحطنا بالنار
انا من سمعت باسم الحرك خفت وطلعت ايدي ....عمو يعني يحرگنا مثل هاي
لزمها سراج وباسها وگال ::اي وبعد اقوى كل جسمنا او وجهنا بس يمته اذا نچذب
هزيت راسي وايدي ...لا انا ما اچذب اخاف من النار (وصرت ابچي )
سراج ::لاتبچيين حبيبتي من تحچين الصدك ما يخليج بالنار
باوعتله وسالته ...وين يخليني عمو ؟
سراج ابتسم ::بالجنه
......ويه بابا
::اي ويه بابا بس من تكبرين ترحين يمه
...وما يكتلون حنين ويذبحوها بالسچين ؟
::لا بالعكس راح الله يحبج (ونفخ سراج وهز راسه )ويساعدج
باوعتله ...وبالعيد تاخذني المدينة الالعاب ؟
ابتسم وهز راسه ::اي اخذج
...زين عمو ما اچذب الله ما يحطني بالنار مو
شفت بيبي هي وعمو هادي يبجون اجيت يمهم ومسحت دمعة بيبي ودمعة عمو هادي وانا اگلهم
...ليش تبچون الله ما راح يحرگني وراح من اكبر اروح يم بابا بالجنه مو. ياالله عمو بيبي لا تبچون اخذكم وياي
شالتني زهراء وهي تگلي //عفيه بالبطله ناديه البطله تعالي حبيبتي خلي اغسلج وابدلج
بيبي گلتلها =اغسلي بس جسمها لا تغسلين شعرها اخاف تتمرض
اخذتني زهراء وگالت //وين ملابسج فووك ؟
انا گتلها ......لا اهنا
واشرت على بوفيه بالغرفه فتحتها وطلعتلي ملابس الي والحنين
سبحتني بدون ما تغسل شعري بس بللته ولبستني تراك وفوگه قمصله ومشطته الشعري وضفرتني گصيبه ولبست
حنين تراك وقمصله وهم مشطتلها اندك الباب وراحت عمتي سلوى فتحته اجت افراح واختها ابتهاج وبناتها سلمت
وطاحت على راس بيبي وهي تگلها //عمه سامحيني والله انا چنت عصبيه ومن حچيت ما انتبهت الكلامي انا مو بقصدي
وشافتني وباستني وباست حنين وهي تگول //امدااني شلون مديت ايدي على بت عباس شنو هو غريب عني
هذا اخوي وحماي وابن خالي
وصارت تبچي بيبي ساكته ما جاوبتها الي حچت بيبي جميله //افراح انتي غلطتي ومو بس كسرتي خاطر البنات
هذني ازغار هسه ينسن لا كسرتي خاطر منيره
نصره گالت //شنو ام كرم بدل ما تبردين الشغله جاي تعيدين بيها بس ترديلج حچايه
جميله صمت حلگها وعوجته //انوبه انا بس اريدلي حچايه لو بتچ
هادي گال //انتن ليش ما تسكتن احنا بيا حال
هنه سكتن او وحده تدردم ع الثانيه
الساعه تسعه بالليل سمعت سيارات الشرطه ملت المنطقه انا صرت ارجف راح سراج فتح الباب وهو يگول
:: ما اسمع صوت احد منكم
دخلوا اربع شرطه للبيت وبعدين دخل القاضي ومدير الشرطه ورا بخطوات شفت سلدار مجلبكين ادي من گدام
ومبين علي الخوف كان لابس بنطلون وقميص شفت ورا مياده وهي تمشي بتثاقل لابسه عبايه ولافه الشال
عدل على شعرها
تمشي بتعب كان جوه عيونها هالات سود وشفايفها بيض وما چانت تباوع الاي احد بس السلدار وكانما تريد تلبس
الجريمه الها وتطلعه برئ هسه تگولون شلون عرفتي هذا الشي
لان انا شايفه حب وهيام مياده السلدار
القاضي سال سلدار //من اجه عباس انت وين چنت
سلدار جاوب //سيدي بالغرفه
ياغرفه ؟
اشر باصبعه //الغرفه الفوك سيدي
القاضي //ويامن ؟
سيدي ويا مياده
- -سمعتو جرس الباب يندك
اي سيدي سمعنا وكالت انزل صير وره الباب خلي اشوف منو
- - ليش ما بقيت بالغرفه
ردت ابقى بس هي گالت يجوز رجلي اجه لان مريض او بيت حماي وذوله جهالهم يصعدون للغرفه
وخاف كل شي يصير انت انزل وصير وره الباب اذا هو بمجرد ما يصعد ااشرلك انت اطلع
- - ونزلت
نعم سيدي بعد ان اتلثمت
— تلثمت بشنو
شماغ سيدي
- - شنو صار
سلدار //انا صرت وره الباب وهي راحت فتحت بعد ان عرفت هذا زوجها
- - وره ما دخل شافك
لا سيدي ما شافني لان ظلمه لكن من نزل راد يفتح الضوه مال الصاله لمحني
—— لمحك شلون
شافني داير وجهي واريد افتح الباب
- - واتعاركتوا
اي سيدي حاول يوخر اللثام عن وجهي ما گدر بقى لازم بيه وانا ويا متكامشين هو دار على مياده
- - - ليش دار
طلع المسدس بيده الثانيه حتى يكتل مياده انا خنگته بالچفيه مالته
- - - چنت تگدر تشرد بذيج اللحظه
سلدار //اي بس خفت عليها يكتلها
- - - شنو صار بعدين
من خنكته حيل من وره حاول يوخر الچفيه ما گدر ظل يتحرك وحرك براسه بعدين وكع
— - وشنو صار
اخذت المسدس وردت اضربه طلقه بس هي ما قبلت گالت الجوارين تگعد
- - -من وكع المجني علي منو اخذ المسدس
سلدار //مياده سيدي من خنگته كان المسدس بايده رافعه هو حاول بس يفك نفسه ما كدر رفع ايده ومياده
خذت المسدس
- - - وانت بقيت ضاغط ع الشماغ الى ان عرفت بي خلص انتهى
نعم سيدي
- - - هو مات ليش ردت تضربه بالمسدس
سلدار //من مات عرفت بعد هذا انتهى ردت يبين هو مكتول مو مخنوك
- - اي هو بكل الاحوال قتل
سلدار //سيدي حتى اذا لگو يبين مكتول بره بمسدس يعني كانما واحد راد يبوگه عنده عداوه ويا احد رادو يسلبون
سيارته هيج
- - - قصدك قتل سريع
اي سيدي
- - - شنو صار من منعتك من قتله بالمسدس
سلدار //هي اخذت مني المسدس كتلها جيبيلي سچين وراحت جابتلي سچين وانا صرت اضرب بي
— - شلون راوينه
سلدار //ها سيدي
القاضي //راوينه شلون كتلته
نام واحد من الشرطه وهو صار يمثل شلون ضرب ابوي
القاضي كله //هي شنو ردة فعلها
سردار //سيدي گاعده وبس فاتحه عيونها
القاضي اشر براسه اجت تمشي بتثاقل يمشون يمها اثنين شرطه واحد على يمينها والثاني على يسارها
القاضي //من دك الباب رجلج وين چنتي
هي گوه تحچي //فوك چنت فوگ
- -ويامن
ويه سلدار
- - وسمعتي ونزلتي شنو سويتي
رحت فتحت باب الصاله وبعدين فتحت الباب من عرفت هو عباس
- - - سلدار وين
اشرتله يصير وره الباب حتى مجرد ما يصعد عباس هو يطلع
- - شنو الي صارر
صعدنا اربع بايات بعدين گال ليش الطرمه طافيه نزل يفتح الگلوب واتفاجأ بسلدار يريد يفتح الباب تكامشوا
وطلع المسدس راد يرميني بالمسدس ركضت للمطبخ وركض وراي جبت سچينه وضربته بيها هو وگع
وبعدين صرت اضرب بي الى ان موته
القاضي //اهاا يعني سلدار مو هو القاتل
مياده //لا انا الي قتلت عباس سلدار برئ كل ما بالامر انو اخذ الجثه بالسياره بعد ان هددته
- - - هددتي بشنو
1
گتله اعيط واگول اجيت تبوك وقتلت عباس
- - - بس هاي ما چانت اعترافاتج
صحيح اعترفت تحت التهديد
- - اكو شاهد عليكم
سيدي ليش اكذب انا الي قتلت عباس لان ما احبه وكنت اريد اتزوج سلدار لان احبه من چان جيرانه
- - - والمسدس والذهب والفلوس
المسدس جبرته ياخذه وما اعرف شي عن الذهب والفلوس
- - - يعني مو ذهبج
لا سيدي ذهبي اخذه عباس يبيعه حتى يشتري محل ثاني
القاضي اشر السراج الي اجاني وابتسم بوجهي وسوه حركه بخشمه وگلي
ها يابطله نروح يم جدو
هزيت راسي ......تشتريلي زلابيه
سراج بضحكه :: ايا ام بطن كل شي تردين اشتريلج
شالني وصلني يم القاضي سالني //انتي شنو اسمج
...ناديه
- - - بابا ناديه انتي وين چنتي من بابا دك الباب
...بهاي الغرفه (واشرت بايدي )
القاضي //وماما وين چانت ؟
اشرت باصبعي ::فوك
ويامن
...ويه عمو سلدار
انتي تعرفي السلدار
هزيت راسي ... اي اعرفه دووم يجي
- - - سولفيلي يا بطله شنو شفتي
... اندك الباب وامي فتحت باب الصاله وكالت منو بابا كلها انا افتحي الباب امي سوت هيج بشعرها (حركت ايدي )
بعدين راحت فتحت الباب ودخل بابا وصعد الدرج
القاضي //بس اجه صعد الدرج
...اي لا ن چان مريض
- - - بعدين
......صعدوا كلها ليش الطارمه ظلمه نزل يفتح الگلوب وشاف عمو سلدار وهو يفتح بالباب
- - - شنو سووا ؟
منو ؟
القاضي //بابا من شاف سلدار
...كله اوگف ولزمه وضربه وسلدار هم ضربه
وامج وين
...امي بقت واگفه ما حچت
شنو سووا بابا
...باوع الامي وطلع المسدس
اي ورما هه
هزيت راسي ...لا لان عمو سلدار لزمه من وره
لزمه شلون
...عموبجفية بابا
وامج شنو سوت
...بابا صار يتحرك هيج (وصرت احرك بجسمي )وماما اخذت المسدس من ابوي بعدين ابوي طاح بالگاع
القاضي //وين طاح بابا ؟
...اهنا (وصرت ااشر ) اهنا طاح وسلدار خله وجهه علي
القاضي //شلون ؟
...عمو هيج (وبينت الهم شلون خله اذانه على گلب بابا )وباوع الماما وگلها خلاص انتهى وراح شبك ماما
القاضي //وين امج چانت
كاعده اهنا (واشرت على ثاني بايه )
- - ها هي كاعده شلون (
رحت گعدت ابمكان امي واجه سراج حضني القاضي //هيج
انا هزيت راسي
- - وبعدين شنو صار
... عمو سلدار لزم المسدس وراد يرمي ابوي بس امي ما قبلت گلتله يسمعون الجوارين
گلها لازم يبين مكتول بره زمخ عليها روحي روحي جيبيلي سچينه
القاضي //انتي وين چنتي وشفتي كل هذا الشي
انا چنت اهنا واگفه واباوع (واشرت بايدي )
القاضي //ومن اجت امج شافتج
......لا انا من تجي اروح للغرفه اخاف منها
القاضي //ليش خفتي منها؟
...تحركني
- - - خفتي منها لان تحرگج
...اي
- - - هي حاركتج
هزيت راسي ...اي
- - - يمته
صرت ابچي واباوع الها والقاضي يسالني// وين حاركتج
...ايهنا (ورايته ايدي )
القاضي //انتي شفتي مياده وهي تضرب ابوج عباس بالسچين
...لا هذا ضربه (اشرت على سلدار )
- - - وامج
...جابت السجينه
القاضي //جابت السجينه وضربت بيها ابوج
...لا عمو جابت السجينه ونطتها الهذا وهي وكفت تباوع
- - - وهذا (اشر القاضي الى سلدار )اخذ السجينه وضرب بابا
شلون راوينا (القاضي صاح الواحد من الشرطه )اجه گله
نام خلي تمثل الحادثه
من شاف سراج الشرطي اجه گل للقاضي ::تخاف من الشرطي انا اخذ مكانه
واتمدد سراج
القاضي گال جيبولها شي تلزمه بايدها جابولي خاشوگه كلي //ناديه شلون سلدار ضرب بابا
...بس هذا عمو سراج
القاضي //اي اعرف راوينه شلون سلدار ضرب بابا
خاف يطلع منه دم
سراج :: لا ندووش تعالي اضربيني
اتقربت هو نايم عدل بس انا گلت للقاضي
...بابا من طاح نام اي هيج واتمددت على صفحتي
سراج هم اتمدد على صفحته
القاضي //شلون ضربه
اتقربت ومديت ايدي على چتف سراج وخليته يتمدد على ظهره وجبت الخاشوگه وسويتها كانما اطعنه
بكلبه وبطنه وچتفه ويم رگبته
القاضي //وبابا ما اتحرك
گتله ...لا من ضربه اهنا (اشرت على گلبه )بابا سوو خخخخخخ
القاضي سالني //ناديه دليني وين گاعده مياده وتباوع
ايهنا (واشرت على ثاني بايه )
بعدين گلت للقاضي على المخزن الي طلع منه الطحين وشلون شال بابا وخلا بالجنطه وطلب منها الخاولي والسچين
ومن اخذ باكيت البقلاوه ومن نزلت الفلوس والذهب وحتى على دشداشتها الي خلتها بعلاگه وذبيتها واجت الفقيره اخذتها
القاضي گال العمو سراج //شيلها للبنيه دخلها جوه تعبت الله يساعدها طفله وشافت حادثه مهوله
القاضي باوع المياده وگلها //عبالج تحمينه الصاحبج وتنجينه من العقاب شهدت عليج طفله ما تتجاوز الاربع سنين
اخذوهم وسراج شالني وطلع وانا اشوف الناس شگد يتدافعون بس حتى يشوفون امي الي قتلت ابوي هي وعشيقها
وياشرون عليه ويگولون// بتها شهدت عليها هي البنيه شايفه الحادثه
راحو الشرطه وانا ارجف لان شفت امي اخذوها ركبوها بالسياره واسمع هواي ناس يسبوها رغم ما اعرف شنو
معنى كلامهم،ومن باوعت الها عرفت بعد ما راح اشوفها
رجعني سراج للبيت لگيت بيبي وهواي نسوان دخلن يواسوها وهي تبچي من شافتني حضنتني وهي تگول
=يابيبي رجعتي كرامة ابوج بس ضيعتي امچ الله يساعدچ انتي واختچ على الراح تشوفنه وتسمعنه
وصارت تبچي وبيبي نسيمه تنعى هي وبيبي نصره وانا بس اشهـك من البچي
///////////////////////////////////////......////////////////////////
سراج
من اخذت ناديه للقاضي ورجعنا وبعدين واجهنا مياده انا يمكن دقيقه ما گعدت كل همي اطلع براءة عباس
من الشي الي انسبله
من الناس الي يگول هو اخذ من ناس رشوه وما خلص شغلتهم ونكر الفلوس
والي يگول رايح على وحده البيتها وهناك اهلها لزمو وقتلو ومثلو بي
والي يگول اله اعداء وهواي كلام
ولان اعرف بعباس وشلون عمتي ربته قررت اطلع براءته امام كل الناس والي ساعدتني زهراء من
اكدتلي شافته بدون سيارته وانو گاللها راح يجيب السياره من البيت
وناديه الي حسيت بيها شايفه كل شي بس خايفه
من سمعت كلام ناديه بقيت ادور من بيت عباس المكان الحادث وبعدين رحت للگراج نزلت عن التبليط وبقيت
ادور الى ان عثرت على السچينه والخاولي الي شامرهن بمكان مو بعيد وهو يمشي بالسياره ولان السچينه شويه
ثگيله فالعلاگه باقيه ابمكانها لازمها بعض العيدان اليابسه
ومن لگيت الجثه وشفتها لفت نظري وجود ماده بيضه مثل الطحين على ملابسه وعلى وجهه وطلبت ياخذون عينه
ويشوفوها وفعلا بعد الفحص طلع طحين
عرفت كل كلام ناديه صحيح انقهرت عليها لان طفله وشافت هاي الماساة وبنفس الوقت خفت منها لاتتراجع
عن كلامها
رحت البيت السكن الي يشتغل عد سردار لان بيته بالبصره ومن سالته گلي بطلت منه وما انطاني
اي معلومه عنه
خابرت واجو القو القبض علي وفهمت اهله اي كلمه تگولولوها لو توصلوها السلدار ابنكم راح يبقى
العمر كله بالسجن واعتبره شريك وانتم ظللتو العداله اتوسلو اخلي سبيله وهو يكلي على كل شي يعرفه
وفعلا افتهمت منه انو سلدار قرر يبيع السياره او راح يغير خطه ويصير يشتغل على المناطق الغربيه
وردت من عنده العنوان هو حاول يتملص لكن من سمع تهديدي واني ممكن اتهمه بان هو شريك بالجريمه
انطاني العنوان وعرفت منه انو اله معرفه بعلاقته ويه مياده واكثر من مره جان يجي البيت عباس والسكن
يبقى بالسياره ومرات من تسافر ويا السكن يرجع البيتهم
بيوم الحادث السكن اكد لي انو سلدار اجه نص الليل وبيده جنطه وحتى ما انتظر السره انطا للسكن يوميته
وگال رايح لان امه متخربطه
ومن خابره السكن يطمن سلدار گله امي مريضه واخاف يصير بيها شي راح اشتغل على ديالى والمناطق الغربيه
اقربلي
انطيت اوصاف المنشأه وبخلال ساعات القو القبض علي وجابو هو والمنشأه الي بقيت افتش بيها على ما لگيت
المسدس باخر كرسي من جوه
الشي الي عجبني وعجب حتى مدير الشرطه والضباط انو دائما المجرمين من ينلزمون واحد يذب التهمه على الثاني
اله بجريمة عباس
مياده تريد تبرئ سلدار وتشيل التهمه عنه
وهو يريد يبرئ مياده ويشيل التهمه عنها
سألت نفسي شنو هذا حب لو خلص كل واحد عرف انو هو منتهي فخلي يبري الثاني
بنفس الوقت حقدت على النساء يمكن كنت غلطان لكن الصوره البشعه الي شفت بيها الجريمه خلتني ما
اوثق باي امرأه وطبعا هذا الشي غلط
وقررت اروح واشوف مياده واسألها ليش سووت هذا الشي بنفسها وبزوجها واطفالها
///////////////
