رواية اوجاع يتيمة الفصل الثاني عشر بقلم جمانه السعيدي
حسب ماسمعت جاي يعبر الشارع وهو سكران وضاربته سياره وماردته مرد
راسا صاير عندا نزيف بدماغه على اثر النزيف مات
راحو ويا للنجف حسام وعمامي اثنينهم وكم واحد من اقاربنا
عمتي تلطم وتصرخ واختها ام نجلاء وحتى عمتي نجاة وخواته اثنيينهن
الا اني كل احاسيسي وكفت ولادمعه نزلت من عيني مع اني كنت احس اني حزينه بس على شنو حزينه ما ادري
على الخمس سنوات الضاعن ويا عامر
لو على مصيري الي ما ادري شنو راح يصير بيه
ما ادري هاي بدايه لو نهايه
بداية حياة جديده ونهاية الم
لو راح اشوف اشياء اسوء بعد
ما ادري شنو ضاملي الزمن
خلصت الفاتحه واني ماطاحت مني ولا دمعه
يمكن دموعي خلصن ويه عامر وضلمه
ما عافلي دمعه وحده ابجيها علي واذكره بيها
خلصت السبعه واني رحت ويه عمتي البيتها لان لازم اكعد عده ومايصير ابيت عمي لان حسام موجود بي
رحت ويه عمتي البيتها
بيت عمتي انسب مكان اخلص العدا بي
لان مابي رجال
ورا يومين اجه حسام جاب فلوس انطاهن العمتي تشتريلي ملابس اسود
واي شي احتاجه انطاها الفلوس من الباب وراح
سمعت حالة ام حسام الصحيه بلنازل
مسكينه فقدت ابنها
جانت حيل متعلقه بي
وتدري بتصرفاته كلها غلط ومع ذالك اداري علي وتنطي فلوس
يمكن لو شويه حازمه ويا
جان صار رجال وبطل كل هاي السوالف التعبانه
جان كدرت اتحافظ علي
يلله ما اجوز على روحه غير الرحمه
قررت بفترة العدا اجيب كتب وادرس سادس ماطول كاعده بلبيت وساكته
خليت عمتي تخابر حسام يجبلي كتب اقرا بيهن واقدم خارجي
عمتي خابرت حسام حيل رحب بلفكره وخلال يومين جابلي الكتب
وبديت اقرا النهار كله وكل اسبوع حسام يجي يجيبلي مصرف ويتسوك العمتي
ويروح من الباب ما اشوفه ابد
وعمي جان يخابرني ويسئل عليه دائما
يمكن جان يحس بتأنيب الضمير على الي سوا بيه
بس اني ابد ماحقدت علي بلعكس جنت استخطي
راح منه ابنه شاب شكد حاول يصلحه وما كدر
خلصت العدة
وخابرت حسام يجيني انروح انقدم خارجي
وفعلا اجاني
اشلونج ايناس
الحمد لله تمام
...احسن شي سويتي قررتي تمتحنيين سادس واي شي تحتاجينا اني حاضر
...شكرا ابد ماقصرت وياي الله يحفضك
...تدللين يله انروح
ورحنا قدمنا زين الاجراءات بسرعه خلصت
وكعدنا بكافي نشرب عصير
سئلني حسام
...شنو حلمج
...اني حلمي اااا اريد ادرس وانجح وادخل كليه مو مهم اي كليه
اريد ابني ذاتي
اريد يصير عندي كيان وما احتاج احد ابد
هدفي حاليا اسعد نفسي قدر الامكان
واعوضها عن الحزن الي فات كله
...خوش حلم الضاهر الحياة علمتج ادروس هواي
...كلش تعلمت دروس هواي من الحياة ولو تمتحني اطلع الاولى
...لا لا صايره فيلسوفه وما اكدرلج بعد ابد
...لعد شعبالك
...لايمعوده منكم نتعلم
...يله نرجع للبيت
...ليش مستعجله صارلج شكد محبوسه
...ميخالف هاي الحبسه قريت بيها وتعلمت وبعد ما اريد اضيع وقت اكثر
...ما ناويه ترجعين البيتنا
...لا لا مستحيل هذاك البيت بعد ما ارجع ابد شمالني مخبله
بعد اني طير وطار ومستحيل يرجع للقفص ثاني مره
حسام ..بس اني وسكت
...بس انت شنو شنو حسام احجي
...بس اني اشتاقيتلج
...سكتت واني مامستوعبه الي سمعته
ياربي اني بحلم لو علم
....شو سكتي
..ماسمعتك
...لا سمعتيني زين والدليل خدودج صارن حمر
...يبووووي انفضحت
...هسه مو وكته هذا الكلام
خلي بعدين اني مره توا مات رجلها صار خمس اشهر مو حلوه بحقي هذا التصرف
خل ننطي نفسنا وكت اكثر للتفكير
...تمام اني قابل بس اي شي تحتاجيه تتصلين عليه
شكد جنت فرحانه بي بس بنفس الوقت خايفه
خايفه من عمتي خايفه من ردة فعل نجلاء
حتى عمي حاسبتله حساب
وصلنا للبيت وهو راح وكلبي وفكري راح ويا
خابرني بليل
شلونج شكاعد اتسوين
الحمد لله كاعد اقرا
...ممكن نحجي شويه
...اكيد ممكن تفضل
...اني احبج سمعتيني لو اصيح بصوت عالي
...يمعود لاتسمعك نجلاء
...ولله احبج ومو عبالج اليوم احبج وردتج قبل خمس سنوات تكونيين زوجتي بس القدر لعب لعبته وياي
بليلة عرسج تخبلت فكري كله يمج وشراح يصير بيج
كلما اشوفج خايفه لو تبجين ينمرد كلبي
ودي اخذج وانهزم بيج
صحيح هو اخوي بس جنت اتخبل اذا مد ايده عليج ودي اذبحه
. ايناس ...حسام ينراد وقت احنا مو وحدنا بهذا العالم ولاتنسى انت متزوج وزوجتك بت عمي
لازم نفكر زين قبل اي خطوه نخطيها وعلى الاقل لازم ادور السنه
...ميخالف اني مامستعجل اخذي وقتج
بقينا كل يوم نحجي بلتليفون حسيت بحبه وحنانه
حسيته امان اليه
بس خايفه منهم كلهم ومن ردة فعلهم
يجوز افتح على نفسي باب جهنم
ايجوز تبدي حرب جديده اني مو كدها
لازم افكر زين
بدت امتحاناتي وكلما يخابر اكله راح ارسب بسببك
...بس مشتاقلج ماتردين مدرس
ايناس...هااا خوش حجه
حسام ..انتي مو تكولين افتهم عليك
ماتخليني ادرسج يا ربي ما شايف مدرس يتوسل بلطالبه حتى يدرسها
. ايناس ..بله خلي افكر اي اني محتاجه مدرس
حسام ...زين خل نتفق على الاتعاب ليكدام
...تفضل شنو اتعابك
...على كل درس بوسه
...هاااا يمه شني من مدرس هذا مو عيب ما عدنا بنات تنباس الا بعد الزواج
...اوكي اني حاضر هسه اجيب الشيخ ونتزوج وابوس بكيفي
...ماكو زواج قبل النجاح
زين بعد اسبوعين وتخلص الامتحانات انتضر امري لله
كملت امتحانات وبعد النتيجه كلش خايفه منها
واجت دورت السنه ورحنا للنجف
وهم ماكدرت ابجي مدري ليش
وحسيت ام حسام حيل ذليله صايره مو مثل قبل
برأيكم ليش ما اكدر ابجي اني صايره قاسيه
مدري الزمن قساني
مدري روحي جاي تحتفل خلصت من كل الظلم
على العموم لازم اصير قويه
واتحدى الزمن
شكرا لزيارتكم عالم روايات سكيرهوم
