رواية الضابط واليتيمة الفصل الثالث عشر بقلم مجهول
كعذت الساعة ٦الصبح اخذت غراضي وطلعت اركض للحمام سبحت وبدلت ورفعت شعري كبة صغيرة طلعت من الحمام بوجهي وليد
- صباح الخير
- صباح النور شو اتركضين
- مو اعرف انت اتريد تسبح فعمود اخلص من وكت
- اها عمودي؟
- ها اي
ورحت اركض للمطبخ وسويت الريوك رحت اكعد ريهام شفت وليد طلع من الحمام ملابسة لابسها على جسمة بدون ما ينشف منظرة يجنن ختلت وضليت اباوع علي بدون ميدري واباوع على كل تفاصيلة رجلة ايدة وجهة جسمة كل حركة وكل تفصيلة بي انتبهت لنفسي شدا اسوي ميصير الي دا اسوي
- مينا لتحلمين زايد
رحت صعدت دكيت الباب على ايمن
- الساعة ب٧ متلح
فتح الباب علية
- كاعد
شفتة امبدل ومخلص طبعا ايمن كلش هادئ وحباب شكلة لحية وشعر وهيبة يشبه وليد بس مو كلش وليد رجولي اكثر نزل عفتة ورحت على زين ضليت ادك الباب الة سمعتة رد يلى رحت على رهومة طبيت كعدتها وطلعت نزلت ليجوة مشفت ايمن
-وليد شنو ايمن رجع صعد وينة
-طلع
- والريوك
- هو كليومية يطلع من ال٦:٣٠ بس اليوم متاخر
شفتة يتريك ضليت اباوع علي
- تعاي اتريكي (بحدة )
- اي
كعدت اريد اكل اول محطيت لكمة بحلكي
- هاي التراكات كلها هيج
كحيت - شبيها
- متعرفين ؟
- زين وين اوديهن
- من كتلج طبي قيسي ليش عاندتي وما قستي
- ها جاوبيني دا اسالج
عبالك انبلع لساني ما اكدر احجي شي ولا اكدر اباوع علي ابد نزلت اللكمة من ايدي وحطيتها بالماعون
- ارفعي وجهج وباوعيلي
رفعت وجهي باوعتلة حتى ايدي كامت ترجف
- جاوبي
- وا ا لله قست بس واحد مثل مكلت وهو على كدي بس ذني ضيكات والله شسوي قابل
- انطيهن لريهام
- ها
- اني اليوم اجيبلج (صوتة انخفض شوية وصار اخف) كملي اكلج
هو بلعمني ويكلي كملي يا اكل حسيت ببلعومي غصة مال بجي وهو ولا عبالك سوة شي يشرب جاي بكل هدوء ويكلب بالفون ما ردت ابجي كبالة كمت ستوني دا اوخر الكرسي
- اكعدي( بامر )
- اريد اروح اكعد ريهام ( صوتي طلع كلش ضعيف )
- اكعدي هسة اتكمل وتجي كملي اكلج
اخذ تلفونة وكام رحت غسلت وجهي اكو غصة بداخلي كلش انقهرت من حجية واسلوبة وياية صح اني كومة ناس يتعاملون وياية بطريقة اسوء بس ما ادري شنو ليش هيج حسيت
