رواية ناديه الفصل الرابع عشر 14 بقلم انين الليل

سراج 

قررت بعد الي سمعته وشفته ان اروح واقابل مياده اريد اعرف كل شي واريد افهم سبب اصرارها بان الجريمه 

هي الي قامت بيها وهي ابحدها الي قتلت عباس ردت اعرف ليش تريد تبري سلدار

رحت وهالمره بصفه رسميه لان كان ابالي شي ولازم اتاكد منه 

رحت على المكان الي محجوزه بي وشفت المدير المسؤول وعرفته بنفسي 

رحب بيه ولان هو عنده امر ان اواجه مياده بعد ان راد الضابط يضيفني لان شافني ادخن انا فهمته  

انا ادخن لان ما صايم بسبب السفر. وعدم الاقامه وبنفس الوقت ما قبلت اتضيف رن الجرس اجا ولد شاب گله

- - - جيب المتهمه مياده

ما اخفيكم بقى گلبي يدك لان راح اشوف الانسانه الي كانت السبب بقتل اعز انسان النفسي 

عباس 

هسه تگولون انا جاي ابالغ بحبي العباس هو كله ابن عمتي لكن انا حاسبه اخوي الچبير 

واكيد تتساءلون ليش سويت كل هذا

كل بشر مخلوق بمرور الوقت تنزرع بي اشياء تقومه اما يطلع صالح او طالح هاي الاشياء يتعلمها وياخذها 

احيانا بالوراثه واحيانا بالتربيه واحيانا يكون هناك سبب يخليك متمسك بهذا الشخص 

لمن ما واحد ينقذ واحد من الموت وينطي دمه ويبقى ليل ونهار مرابط ويا بالمستشفى ما يشوف النوم ولا الراحه هذا 

مو بس اطلع الي قتله لا افدي بروحي لان هو سبب وجودي بعد الله سبحانه

عباس اول ما صرت كنت بالشهر الثامن يعني ما كملت ابطن امي ونزلت كنت ضعيف ونبضي ما مستقر 

خلوني بالخدج بذاك الوكت يسولفلي ابوي انو عباس بقى ليل ونهار بالمستشفى ويبچي اكثر من امك لان الطبيب 

يگول احتمال ما يعيش وصار بيه ابو صفار وگطعت الرضاعه والطبيب ما انطى اي امل 

وهو راح يسأل بالناس الكبار لمن ما گاله واحد

- - لازم تشرح اذاناته بس هو ما يحمل يموت لان بالشهر الثامن ودلو على عارفه بالاطفال وراحلها وهو يگلها

   - - خاله فدوه راح اجيب اخوي وشرحي اذانه

واجه للمستشفى والطبيب گال ما يطلع الطفل صحيح ميئوس من حالته لكن نحاول ويا 

عباس طلعني بعد ان قنع ابوي يوقع على مسؤوليته وشالني بحضنه وغطاني حتى ما اشوف ضوه 

واخذني للعارفه الي شرحت اذاني وكحلتني بالدم 

وگالت خلي امه تستحمي تلث تيام تاكل بس تمر ودبس حتى الخبز تگطعه 

وگالت العباس علگوا بالكاروك مالته سبع ثومات من تشوفهن يذبلن معناتها طاب

واجه عباس جايبني للبيت وامي تهدده وتگله //شوف ولك عباس اذا سراج يموت اموتك 

ابوي بيومها گلها //اشبيج امنه مو الطبيب گال ما منه امل 

امي تلوي باذاناته //اي وين اخذه وشنو هذا الدم الي بعيونه 

ابوي //اخذه العارفه مالت عرب شرحت ذاناته وكحلته بالدم

بيومها امي تحچي على عباس وهو ملتهي يسويلي الثوم ويگل الامي 

الله يخليج عمه استحمي تلث تيام بلكي سراج يطيب

امي تگلي بهاي التلث تيام عباس مگابلك وگاعد ويوميه يرجعك ع العارفه تشوفك ولا چن عمره ثمن سنوات 

ومن شلنه وانا بصف الثاني متوسط واندعمت چنت اعبر من الشارع حال من المدرسه ودعمتني سياره 

وابوي خابر عمتي وعباس اجو البغداد وصلوا بالعشره بالليل وبوجههم للمستشفى وشلون عمتي مخرمشه 

وجهه عليه 

چنت بيها بالعمليات واحتاجولي دم لان نزفت وعباس انطاني دم وبقى ما قبل يروح للبيت ويرتاح بقى يومين يمي ما 

يخلي احد يدخل عليه ومن شويه انتبهت چان الي يجي يشوفني يخلي خمس دقايق ويگله يطلع  

اشوفه شلون داراني وشلون يغسلي ويبدلي لان الحادث كان قوي ضربه ابطني والحوض بقيت خمس تشهر وانا 

اتعالج منها اتذكر بذاك الوكت امتحنوني دور ثاني وعباس بقى يمي واعرف بي حتى شغله بطلو من عنده وعيشتهم گوه 

لكن هو ما تركني وعمتي توصي بي

= عباس يمه ابقى يم سراج خالك ما يكدر ابحده سراج اخوك باچر يكبر ويفيدك

اما شگد سدالي سوالف مراهقين منشلنه البغداد وكبرت شويه چنت حلو اتعرفت على ولد بالاعداديه هو اكبر مني 

بسنتين الي عرفته هو راسب لان ما يحب المدرسه لكن ابو جبره وعزمني ابيتهم وچان عنده اخت وصار تبادل بالنظرات 

هي اكبر مني باربع سنوات لكن حلوه ومغريه وصارت علاقه 

عندي صديق اسمه يحيى گلي 

سراج تره هذا بهجت مو خوش ولد ما اريدك تمشي ويا

انا بوكتها مراهق ومعجب بنفسي ما سمعت كلامه 

وبقيت مصادقه بس حتى اروح اشوف اخته وبيوم رحت اشوفه حسب الموعد وما لگيته وهي غرتني ادخل للبيت 

وفجأه اجو اهلها ومن ضمنهم بهجت ورادو وصارت مشكله يوصلوها الابوي واعرف بس يسمع يمكن يذبحني 

لان اعرف بابوي ما يقبل على هيج تصرف ما صار گدامي اله عباس الي خابرته وبهجت اخذ التلفون وطلب 

منه مبلغ من المال وگله راح يبقى محجوز ابيتنا الى ان تجي وهددو اي تصرف راح تصير مساله شرف وانجبر 

اخذ اخته البهجت

واجه عباس من الصبح وجاب الفلوس وبوكتها چنت خايف شگل الابوي لو الامي 

عباس حلاها وگال الابوي خالي سويت حادث ودزيت على سراج وگلت بس ابلغكم راح تنخبصون وامي تتخبل

اما امي ما اگللكم شنو سوت بعباس ورغم ابوي بقى شاك بكلام عباس لكن مشاها وابد عباس ما حاچاني على الفلوس 

لو گلي لكن بيومها لزمني وضربني راشدي وما حچى وياي شهر 

وانا عرفت غلطتي وهو چان ينطيني ويصرف عليه ما اعد الكم

اكثر شي حسسني بعباس ما يفرقني عن هادي او لا يمكن انا اقرب اله من هادي لمن صارت عنده اول طفله وبيومها 

انا جاي اشوفهم لان هو من تزوج ما صار يسأل چان فرحان بزواجه من ولدت بنته ورحتله للمستشفى وشلون خلاني 

 اخذها من الممرضه واشيلها واذنت باذنها وگلي سميها ومن گتله وانا اضحك 

::هاي بتك بس تكبر اتزوجها 

وگلي هي الك رغم حتى عمتي ظلت تستهزأ بيه بوكتها عباس گال كلمه لان عمتي حچت وگالت 

=هسه عباس خلاك تسميها وگالك من تكبر تاخذها منو يگول امها تقبل 

عباس يم مياده ورد على عمتي

:شوفي يمه انتي احبج واموت عليج ومياده بعد (يباوع الها بشغف )تعرف بيه شگد احبها لكن سراج يمون عليه 

وعلى حلالي وعلى بتي ومن يجي يخطب ناديه يمكن لو مو مياده ما تقبل لو الدنيا كلها ما تقبل اشيلها وانطيها اله 

امي بضحك =واذا البنيه تگول شايب

عباس //حتى لو ما تقبل انطيها السراج 

بوكتها مياده حچت بدلال وگالت //بديت اغار من سراج

عباس //لا مياده سراج اخوي الي اامنه على بيتي وعليج وعلى جهالي 

بوكتها حضنته وگتله //انا اخوك الي افديك بروحي

من اجيت ع الدنيا فتحت عيني على امي وابوي وعلى عمتي منيره واخوي عباس الي چنت احسبله الف حساب 

رغم هدوئه ومن صار الي صار وعرفت الحقيقه اكثر شي انقهرت على بناته لان الكل اهون من عدهن 

اشوفهن صارن لا اب ولا ام ولا اخ سند الهن من اول ما اتوفى عباس وانا اگضي الليل ابچي عليهن على 

يتمهن وعلى المعاناة الي راح يعيشنها من وره اب عاطفي الى ابعد الحدود وام خاينه ضيعت شرفها وكرامة

 بناتها من اجل نزوه زائله

من جابوها كشف دلاله كنت منتظر اشوفها تبچي او تطلب تحضن بناتها لكن شفتها 

وحده صلفه ما مكسوره عينها تريد تلبس الجريمه ابحدها وتبري عشيقها هذا الموقف الي شفته خلاني اكره واحقد 

على النساء بصوره عامه وهواي انعدمت ثقتي بيهن

گاعد بالمكتب يم المدير واجه شرطي جابلي گهوه رغم ما طلبتها احتراما للصيام گعدت اشرب بالگهوه واندك الباب 

ودخلت مياده الشرطي لازمها من زندها دخلت للغرفه وهي لابسه دشداشه عريضه سوده ولافه شال على شعرها 

شافتني اتفاجات لكن بنفس صلافتها خلت عينها بعيني

المدير گلي //استاذ انا رايح عندي تفتيش واعتبر المكتب مكتبك 

هزيت راسي وهو طلع وسد الباب ورا انا صرت وره المكتب وگعدت وانا اباوع الها وانا ادخن 

::شلونج مياده 

هي جرت حسره ما جاوبتني اشرت الها ع القنفه وگتلها :: اتفضلي اگعدي

گعدت وهي مدنكه ومچتفه اديها وتعض على شفتها عضات متواصله وصارت گدامي وانا اتذكر شگد عباس 

دللها وشگد صرف عليها واتذكر لمن يجي ويكلي //شلون بيه سراج امي ما تحب مياده وما اگدر ازعلها 

ومياده النفس الي اتنفسه 

جاوبته :: شبيك عباس انت تحب مرتك امنت باالله بس لا تترك عمتي 

عباس // والله ما عايفها الامي بس من اروح اشوف بعيونها عتاب ومن نجي انا ومياده وحده تنتر ع الثانيه 

:: عباس من تجي انت ومرتك فهمها تره عمتي تعبت عليكم وربتكم وكل شي اتحملت فوصي مرتك تتحملها 

هالساعه الي تمرون بيها

واتذكر من اجي العمتي اشوف بعيونها عتب على اولادها وخاصة على عباس الي هو بالنسبه الها اعز من روحها 

دووم تكلي =. عمه سراج عباس مو الاولاني عباس اتبدل ما صار يمر عليه اله وين او وين 

نفخت وانا كل هاي الامور عبالك دفتر وجاي اقرا بي نفخت الدخان وسالت مياده 

::مياده ليش سويتي الي سويتي شنو عباس ابيش مقصر وياج ؟

بقت ساكته وما جاوبتني 

::ليش ساكته ؟

باوعتلي وگالت //شتريدني اجاوب 

::ها هسه صرتي ما تعرفين تجاوبين جاي اگلج ليش سويتي الي سويتي شنو دافعج الي خلاج تيتمين بناتج 

وتذلين نفسج مياده تذكرين عباس شگد يحبج شنو سووا حتى يسعدج وانتي بشنو جازيتي بالخيانه

بقت مدنگه وخلت ايدها على خدها وجرت حسره رجعت اتكلمت وياها بنتر 

::ولج انتي تعرفين شنو المصيبه الي سويتيها كتلتي رجلج يتمتي بناتج ولبستي العار انتي واهلج وياريت بس 

هذا الشي بناتج الي العار راح يلبسهن ما فكرتي بيهن من يمشن والناس تاشر عليهن هذني الي امهن كتلت 

ابوهن على مود صاحبها اني اريد اعرف ليش ليش تحاولين تبرينه منو جاي يضغط عليج

هي جرت حسره وباوعتلي وهزت راسها وگالت //محد ضاغط علي 

::لعد لويش فهميني 

باوعتلي بتحدي // لان احبه 

فتحت عيوني ::تحبينه كتلتي رجلج لان تحبينه ؟!

هزت راسها //اي لان احبه مو من هسه لا من انا زغيره وانا احبه 

::هاا وحتى بعد ما تزوجتي 

وللموت للموت ابقى احبه 

::ليش ما تطلكتي وتزوجتي

جرت حسره //هو چان هذا الي راد يصير لكن عباس اجه وكشفنا 

شعلت جكاره لاخ ::يعني انتي ما مبيته النيه على كتله 

باوعتلي //لا كان كل همي اتطلك واتزوج سلدار 

::وليش ماتزوجتي من البدايه مو:چان جيرانكم حسب كلامچ 

- -اي جيرانه بس اهلي ما قبلو يزوجونه 

جريت نفس وگتلها ::سولفيلي مياده بعد كل شي انكشف

هي نفخت وگالت //احنه چنا جيران ابغداد ابوي وابو اصدقاء ابوي موظف وابو سايق چنا بيت واحد نلعب 

سوا ونروح للمدرسه انا واخته سووا نتزاور هو چان اكبر مني بتلث سنين حبينا بعض واحنا زغار وكبر حبنا 

چنا نتقابل فوك السطح بالليل من ينامون اهلي 

من نجحت للثاني المتوسط شبيت وصرت ابين اكبر من عمري اجو اقاربنا خطبوني من سمع سلدار راح اتوسل 

بابو حتى يخطبني واجه الرجال وخطبني لكن ابوي ما وافق

انا گتلها ::ليش مو تگولين صديقه 

هزت راسها //اي صديقه بس انت ما انتبهت للاسم 

::شبي الاسم قصدج سلدار اي شبي 

- - سلدار تركماني اصله تركماني وابوي ما وافق ينطيني يگول ما انطي بناتي اله الواحد عربي لان ابوي اكثر 

گرايبه بالعشايرالرجال حاول مره واثنين ودز ناس وساده لكن ابوي بقى معند وصار برود بعلاقة اهلي واهل

 سلدار وابوي شك اكو علاقه بيناتنا من صارو يوميه يدزون ناس الى ان لزمني اقابله فوك السطح وبيومها كفر 

بيه وكطعني اتكطع خلاني اسبوع نايمه بالفراش

وقرر يوافق على كرايبنا الي خطبوني ولزم التلفون وخابرهم وبلغهم موافقتي وموافقته على الخطبه وانا اسمعه 

گال الامي واخواني راح اطلب منهم خطبه وعقد بنفس اليوم والعرس بعد اسبوعين لو اعرف انا اعد فلوس من جيبي 

اخوي عدي گال الابوي //بابا سلدار خوش ولد وهو حلفلي گلي رايد اختك لان ما شفت باخلاقها 

ابوي //انجب لا افوت عليها واطگها طلقه

من سمعت براي ابوي اتخبلت بقيت گاعده للفجر ابوي يطلع من غبشه يلحك على سيارة الشركه بس طلع 

انا طلعت بدون محد يحس عليه ورحت البيت سلدار دكيت الباب وطلعت امه ودخلت وبقيت ابچي بيومها ابو 

ما چان موجود وسلدار ويا والمره احتارت راحت خبرت بيت عمه واجو الناس والضحى امي ياالله حست 

عليه وگالت الاخوتي الي خبرو ابوي 

عم سلدار اجه وگله //البنيه ابيت سلدار

ابوي واخواني هدو والناس گرايبنا سمعووانسحبو وانا خفت ما رجعت الاهلي واجه ابو سلدار وابنه ويا ما يدري 

ورغم هم ما عدهم علم لكن گعدهم ابوي للحق وصارت فضيحه انو انا انهزمت من بيت ابوي 

سالتها ::شعجب ابوج ما ذبحج 

مياده حرت حسره // لان سلدار بوكتها اشتكى على ابوي وجاب شهود انو هو ما چان موجود ولا عنده علم بجيتي  

والشرطه اخذت على ابوي تعهد بان ما ايئذيني لكن ابوي اتهم سلدار انو مقنعني حتى انهزم ويا وخيرني يااما 

اوگف گدام القاضي واگول لو بس ارجع يذبحني ويذبني بالبالوعه

انا خفت ورحت ايدت كلام ابوي واعتبروني قاصر وعلى اثرها انسجن سلدار وصارت طلايب ومهادد

وعمام سلدار ما سكتو هددو ابوي اذا ما يسقط حقه يخطفون واحد من اخوتي ويقتلو 

وراح ابوي اسقط حقه لان خاف على اخوتي واتوسطت ناس بس حتى يقبل ابوي يزوجني السلدار 

لكن هو بقى على رايه 

وبعد ان انعرفت الشغله واقاربنا تجنبونا قرر ابوي يشيل من بغداد واجه سكن بناحية بالنجف

چنت يوميه اشبع من ابوي ضرب واهانه بعد ما چنت انا المدللى وعميت على اخواتي رغد بالسادس وبطلها وداليا 

چانت زغيره

وبمرور الايام اتناسو اهلي الصار ما عدا ابوي چنت اشوف بعيونه الكره والحقد عليه 

حرم عليه افتح الباب لو اگعد وياهم على اكل لو من اشوفه كاعد لازم اروح الغير مكان 

::ما نسيتي سلدار 

هزت راسها //ابد ولا لحظه نسيته سلدار چان كل عمري

شفتها رجفن شفايفها احتقرتها تبچي على صاحبها وما سالت على بناتها گتلها ::كملي

- - وره فتره اختي رغد انخطبت المنذر وابوي وافق حتى بدون ما ياخذ رايها 

::منذر كان يعرف بقصتج ويه سلدار 

هزت راسها //لا من اجو اهلي للناحيه گالو انو همه عدهم شكم فلس ويريدون يشترون بيت وابغداد البيوت غاليه 

عاد اشترو اهنا منذر ابو كان يشتغل بنفس الدائره الي يشتغل بيها ابوي 

::وبعدين شنو الي صار

- - بقيت هذا حالي بالبيت گاعده وابوي ابد لايريد يشوفني گاعده وياهم على سفره ولامن يگعد ع التلفزيون يقبل يشوفني

 يعني من يجي ابوي لازم اضم روحي وما اطلع يشوفني عاد انا اصير اطلع شغل من جوه الگاع 

فديوم چانت رغد تتوحم ومريضه وصادف اجه هادي ويه منذر وعزمه ومنذر مر على ابوي وگله 

اريد مياده تجي تساعد رغد بالطبخ لان مريضه 

ابوي گله //خلي مرت حليم تروح 

منذر گله //لا عمي مرت حليم استحي اامر عليها

ورحت على مضض ويه منذر وهناك شافني هادي وره تقريبا اسبوعين منذر گال الرغد الي رحبت بالفكره 

لان تعرف بمعاناتي وحچت ويه امي وابوي الي گال 

علوا الله يفكني منها باهون سبب عاد تاخذ رجال بدل ما يوميه اتمنى افوت اذبحها وبعدين استغفر ربي

سراج ::الي فهمته ابوج ما يحبج من وره الي سويتي 

مياده //ابوي مو بس ما يحبني ابوي يكرهني وما يطيقني لذلك مجرد ما گلتلي رغد وافقت ومن سمع ابوي يمكن لو 

ما العيب بنفس اليوم خطبه وزواج وحتى بدون ما يطلب شي 

سراج ::لكن بالخطبه شفنا ابوچ شلون يحچي بتي وبتي وربيتها وزغيره وحلوه وشگد ناس خطبت وبعدين 

المهر الي طلبو كل هذا حيله بس حتى يغبون على عملتج

مياده //اي صحيح لان رغد گالت الناس رايديها خلي شويه نتعزز عليهم 

حاجيتها باستهزاء ::مو مهم،شلون رجعتي السلدار 

مياده اتحسرت //خمس سنوات وانا ما اعرف عن سلدار اي شي لكن شي واحد الي بقى وهو بهاي الخمس سنوات 

ما نسيته ولا لحظه 

::حتى من تزوجتي 

حتى من تزوجت ومن صارن عندي البنات ما نسيته

جريت نفس قوي ::ياريتج حابه عباس ربع الحب الي حبتي السلدار يمكن دخلتي الجنه 

مياده //انا عباس ولا بيوم حسسته ما احبه بالعكس چنت ابينله حبي وعشقي 

::الچذابي مو 

اي انا ما حبيت ولا احب اله سلدار 

::شلون شفتي

قبل وفاة ابوي ما احب اروح الاهلي لان ابوي ما يقبل اجي لكن وره وفاة ابوي صرت اروح الاهلي دائما لان عباس 

كان مشغول بالواجب والمحل وانا ابقى ابحدي فصرت اروح الاهلي كل اسبوعين 

:: اي اتذكر اسبوعين يم عباس واسبوعين عد اهلج لان انتي ما تطيقين عمتي منيره 

هي //اي وفد يوم رجعت ويه منذر لان كان عنده سفره للبصره ومن وصلنه للگراج شفت سلدار بوكتها نسيت 

نفسي وبناتي ردت اروح احضنه گدام الناس هو شافني واجه وتم التعارف بينه وبين منذر وبعدين اتعرف على 

عباس وانطا رقم التلفون وگله باي يوم بس يخابره يجي ياخذنا

::زين مياده واهلج مو يعرفون فضيحتج ما حاولو يمنعونج 

 - - انا ما بينت الاهلي انو انا مهتمه السلدار وفهمتهم انو هو.وعباس صارو اصدقاء وفهمتهم انو انا احب زوجي بعدين 

من عرفو انو يجينا للبيت وهو وعباس يطلعون ويجون ما صارو يهتمون 

جاوبتها بتوعد ::لان عبالهم بتهم شريفه خلص نست الماضي وانتبهت البيتها وبناتها 

ردت عليه //امي دووم جانت تحذرني لكن انا هالمره قررت اخذ سلدار ما اهتميت الاي شي لا النصيحه ولا 

التخويف بالعكس خصوصا وصرت اجي واروح ويا وعباس مو ويانه

ضحكت بمراره ::اي غير عباله بالمنشأه يقبطها وانتو ترحون 

اي صحيح 

::وانتي تنطينه فلوس التقبيطه 

اي 

::هو اتزوج 

هومن شفته كان متزوج وعنده ولد عمره شهرين 

::بگد حنين 

جاوبت ولا عبالك بتها //اي 

::وينه هسه 

هو بس شافني ورجعت علاقتنا طلگها وترك الها الولد 

::اف كله على مودج 

اي 

::وين چنتي تشوفينه 

من اجي الاهلي ونروح نزور اهناك اشوفه

::مو تگولين اهلي ما يدرون 

اي ما يدرون اروح بحجة اشتري شغلات ابحدي وهو يجي ونروح 

::وين ترحون 

ابيت صديقه 

::بناتج وياج 

لا شنو وياي 

::مو تكولين تجون بالمنشأه فارغه يعني كل شي تسوون 

اي بس هنه ما يفتهمن زغار ومتعودات يشوفنه 

::يعني عادي يشوفنج وما يحچن 

هي بس ناديه مره رادت تستغلني وانا جويتها

::الحرك الي بايدها 

اي 

::انتي حرگتيها على مود صاحبج 

اي 

::لو فاضحتج ابوكتها شنو سويتيلها 

جاوبتني بكل صلافه //چان موتتها خلاص 

::تحرگيها 

اي احرگها 

::ليش نسبتي الجريمه الج تحسين بالندم 

هزت راسها واتحسرت //لا لان احب سلدار احبه واحب التراب الي يمشي علي وحبه مو خلاني بس مجرمه لا 

خلاني اكره الناس واحقد عليهم اكره ابوي واكره امي واكره زوجي وبناتي

::لكن انتي المفروض ما تكرهين زوجج لان اقل شي نقذج من تعذيب ابوج ودللج وخلالج بيت او وين ما تردين يگلج صار 

هزت راسها //اي بس ما حبيته 

::انتي من نسبتي الجريمه الج تعرفين بنفسج تنعدمين 

اي 

::وبناتج والي ابطنج 

بناتي عد اهلهم والي ابطني عد ابو

انا استغربت ويه نفسي گلت هاي شبيها حاچيتها ::ابو شبيج مياده ابو عباس الي قتلتي 

هي عضت حيل على شفتها الجوه وغمضت عيونها وگالت //لا الي ابطني ابن سلدار

من سمعت مو بس اتفاجأت لا وانذهلت واستغربت من هيج انسانه عمرها بالعشرينات لكن تفكيرها وصلافتها

اكبر عاهره ما توصله

طلعت من وره الميز وكفت على راسها كتلها بعصبيه :: شنو ولج الي ابطنج مو ابن عباس 

هي جرت نفس // لا مو ابنه بعد صارت وصارت وهي فضيحه وعار ليش اضم الي ابطني مو ابن عباس ابن سلدار

خليت ايدي على گصتي الي احس بيها صارت نار ::وشلون تعرفين انتي متزوجه يعني بنفس الوكت الي ينام وياج 

عباس يجي سلدار وينام وياج 

هي گالت // صحيح بس بهذا لا (واشرت على بطنها )

::شلون يعني ؟ 

- - يعني انا ردت طفل منه وقررت احمل ورحت للطبيبه على اساس مريضه وفهمت عباس ان. الطبيبه سوتلي 

تحاليل وگالت لازم رجلج ما يتقرب الج شهر من وره الشهر ترجعين واعيدلج التحاليل

وره الشهر هم گتله رحت للطبيبه

::ها يعني ما ترحين للطبيبه 

- - لا اروح ويه سلدار

::ابيت السكن مو 

- - اي 

::شنو فهمتي العباس 

- - فهمته انو الطبيبه گالت اسبوعين لا تتقربلي رحت وراها حللت طلعت حامل 

::وبعدين من اتقربلج فهمتي انتي حامل 

هزت راسها //اي

::ليش كل هذا 

حچت بنتر // گتلك احب سلدار وافدي بروحي 

::تفدينه بروحج يعني عباس والعشره وحبه الج ما گدر ينسيج

- - ما نسيت سلدار حتى بيوم العرس ابچي وعباس عباله ابچي علي ومن ينام وياي اتخايل سلدار واتجاوب ويا 

::تدرين انتي شگد نذله 

باوعتلي بدون خوف //انا مو نذله انا ابنيه حبت وانحرمت ورجع حبيبها الها ليش ابعد عنه وانا يوميه اتخايله

باكلي بشربي بكعدتي بنومتي 

جاوبتها وانا متشفي بيها ::بس شنو الفائده حتى لو حبيتي وهو هم حبج اتنينكم مصيركم للاعدام 

هي جاوبت بخوف //لا سلدار ما علي انا انا الي خططت وقتلت هو ما علي وبعدين انا ما يعدموني حامل

عرفت خطتها ضحكت وجاوبتها باستهزاء:: هاي لو كل حامل وتقتل زوجها وما تنعدم چان اكثر النساء حملن وقتلن

 ازواجهن حسبتيها غلط هالمره ست مياده كان ابالج تبرين عشيقج وانتي فتره وتطلعين لكن لا غلطتي وبدل ما يكون

 عندج اثتين يتيمات صاروا تلاثه والثالث ابن حرام منو يستقبله يعني لو ساكته وما حاچيه يمكن كان عاش ويه البنات 

على انه ابن عباس لكن لان عباس انقتل مظلوم الله سبحانه وتعالى فضحج 

وبعدين منو گال سلدار يحبج

جاوبتني بثقه //لا يحبني ويموت عليه 

::لو يحبج چان برأج مثل ما برأتي 

- - هو براني لكن انا ما قبلت وانت گلتها اثنينه ننعدم يعني انا وسلدار لو نعيش سووا لو نموت سوا

::تتصورين يعترف بالي بطنج ابنه

هي ما جاوبت اول مره اشوف الخوف وعدم الثقه اتقربت منها وگتلها 

::هلگد تحبينه الهذا الي ابطنج وهو بعده ما صاير لعد ناديه وحنين ليش ضيعتيهن 

جاوبتني بيأس //اقلها عدهن اهل يربوهن

شفت دمعه نزلت على خدها وعيون كلها ندم گتلها 

::شوفي مياده شگد اكو نساء عشگن وحبن بكل جوارحهن لكن ما خانن 

وشگد اكو مو زينات وبيت دعاره لكن حبن واخلصن وصارن شريفات 

لكن انتي ما حبيتي سلدار او يجوز حبيتي بالبدايه لا انتي ردتي تنتقمين من ابوج لان حرمج منه 

اتصور من چنتي تنامين ويا چنتي تتشمتين بابوج مو

هي ردت //كلامك كله صح بس شيي واحد لازم تعرفونه كلكم انا الاخر لحظه بحياتي احب سلدار 

يمكن خفت من الاعدام بس احبه واموت علي

رنيت الجرس واجه الشرطي اخذها

طلعت من يمها وانا مو بس احتقر مياده لا وفقدت الثقه بكل مره واسأل بنفسي 

::معقوله وحده تحب وتعشق وتوصل نفسها للموت وتلبس العار الاهلها وبناتها بس حتى تنقذ عشيقها 

معقوله توصل بيها الانانيه تضحي ابناتها على مود عشيقها على مود شي زائل

ركبت سيارتي وانا ما اعرف وين اروح ما اعرف ليش صرت ابچي على ناديه وحنين وشنو 

راح يكون مصيرهن 

بعد ما عرفت انو الي ابطن مياده مو ابن عباس اكيد هسه يطعنون بنسب ناديه وحنين 

اذا سكتت راح من تولد يسجلونه باسم عباس ويصير اخو البنات من امهن وابوهن ومو بس هيج 

راح يورث وياهن 

ويورث النص وراح يشيل اسم عباس ويصير هو الكل بالكل 

واذا اتكلمت بلي سمعته يجوز تصير مشاكل الها اول ما الها تالي

ظليت امشي بالسياره وانا ما منتبه حتى وين رايح وانا اعض باصبعي وساعات اضرب بالستيرن واحچي 

::معقوله يابت الكلب على مود نزوه هيج تهجمين بيت وتيتمين بنات شنو من حقيره انتي 

وهذني شنو راح يصير مصيرهن ومنو يرحمهن من يكبرن كله هذا الي سويتي على مود شنو 

شهوه نزوه فساد 

::كان ممكن تسوين كل شي ويه اكثر من واحد من تطلعين ومحد يدري بيج لكن انتي ما سويتي اي شي 

ويه اي احد بس ويه سلدار يعني صحيح تحبه ،،

وقررت اروح اقابل سلدار انتبهت شفت نفسي ع الطريق السريع الي يربط البصره اباقي المحافظات وظليت ماشي

 بي ما رجعت ظليت اسوق وبمفترق الطريق قررت اروح للنجف 

من طبعي ما اتوقف اذا عندي مهمه وانا هالمره عندي مهمه ومحتار بها

وصلت العصر للنجف زرت وصليت ركعتين وانا اشوف الاموات يدخلوهم ويزوروهم وبنفس الوقت اشوف زوجاتهم

 شلون يبچن عليهم لان بذاك الوقت كانت الزياره سووا رجال ونساء

طلعت رحت للمقبره وهناك رحت على الدفان وصلت يم قبر عباس لكيتهم راشينه ماي وبعدهم ما بانينه اجه يمي 

ولد زغير يبيع ماي ورد وشمع وبخور اخذت منه وبعدين اجه قارئ وصار يقرأ وانا صافن ما اعرف شسوي من 

راحو بعد ان انطيتهم القاسمه الله رجعت گعدت بصف القبر وحچيت ويا

::عباس ياخوي الي احبك واحترمك واني تدريوهاي تاليها مياده خلتك تصاحب عشيقها وتجيبه للبيت عشيقها الي كان صديقك وتامن مرتك توديها ويا الاهلها 

تعرف منو عشيقها عباس

::سلدار هو الي خانك وكتلك ويتم بناتك بناتك الي ما ادري هنه بناتك او لا 

بعد ما مياده فجرت المفاحاه بوجهي وهي تگلي الي ابطنها مو ابنك ابن سلداروانا هسه محتار ياعباس 

::احچي اخاف ع البنات والقال والقلت 

::اسكت اجيبلي نغل وابن حرام ياخذ تعبك وحق بناتك محتار ياخوي والله محتار 

::انت رحت وخليت بناتك ما اعرف شنو راح يشوفن ولا شنو راح ايواجهن وعمتي بهذا الاسبوع 

صار عمرها مية سنه وصارت بغير عالم من هول المصيبه والمفاجاه

::ياعباس حيرتني شنو الي اسوي وعدتك وراح اوعدك اطمن بناتك امانه برگبتي نام وارتاح انت رحت مظلوم 

مسكين واكيد رب العالمين يجزيك على صبرك ومحنتك بس والله ياعباس انا حاير حاير ابناتك شلون بيهن

اذا كبرن 

ما اتحملت صرت ابچي بصوت عالي وانا اگله ::عباس الحمل ثگيل وعمتي ما تگدر تشيله

بقيت يم الگبر صرت انحب وابچي اجت يمي مره چبيره وياها ولد شاب يمكن جايه الابنها من شافتني ابچي 

اتقربت وصارت تنعى اتعجبت من كلامها باوعت الها وانا ابچي گتلها ::خاله عيدي الكلام الي گلتي 

هي مبين عليها الحزن گالت 

عمت عيني خاله هم اخوك مكتول لو ابوك

انا جاوبتها بحزن وقهر :: اخوي اخوي انكتل 

هي صارت تنعى وتگول 

- - حطوا على المكتول وزره 

- - بلكي النفس يصعد الصدره 

- - لمن يجي ابن امه ويحضره

بعدين گالت واهنا تذكرت عمتي 

- - تكثر هموم الگلب بالليل 

- - تراوالي يايمه وين ما ميل 

- - تره الكسره چبيره وترهن الحيل 

- - احاچيك يمه يالولد ياابني 

- - احاچيك ماتردلي جواب 

- - ولكثر يايمه وياك العتاب 

- - تره حيلي انرهن وبالگلب الصواب 

احووي يمه الولد ياابني

(انا بطبيعتي احفظ بسرعه )سراج

گومني الولد وگلي

- - گوم خويه لان اذا تبقى تبچي امي للصبح ما تسكت 

شفت لهجته من اهل الجنوب عرفت بيهم يرجعون للامام 

وباچر يغبشون طلبت اوصلهم بسيارتي للامام واتعرفت بالولد چان اسمه رضا 

وعرفت هاي المره ابنها كاتله ابن عمه على مود قطعة ارض زراعيه وعاف مره واثنين جهال 

المشكله انو زوجته للمكتول تصير اخت الكاتل والكاتل يسرح ويمرح لان هو رفيق بالحزب 

ورضا هذا الي ويه امه يريد ياخذ بثاره لكن امه تگله اخوك الزغير او ولد اخوك اليتامى كلنه برگبتك 

من تكتله وتنعدم لو تنسجن شيصير بينه

ورحنا زرنا وندليت بيتهم بمنطقه يسموهاعلي الغربي بين الكوت والعماره 

بقينا گاعدين وگتلهم لاترحون انا اوصلكم بطريقي چان دنيا ليل زرت وصليت داخل الحضره من كملت انتبهت 

شفت رجل خمسيني ماسك قران ويقرامبين علي متفقه بالدين لان اشوف يجوله بعض الناس يسالونه لكن بحذر 

وبذاك الوقت صار اكو مرونه بكل شي بس الناس تبقى متخوفه وصلت يمه

رضا ابتعد لان شافني اريد احجي ويا ابحدي وگعدت وكتله بعد ما سلمت ::عندي قضيه واريد النصح بيها 

هو باوعلي وگلي - - النصح تاخذه من الله وهذا 

اشر على القران الكريم 

گتله ::والنعم بالله لكن احيانا نلكى صعوبه بالقرار الي نريد ناخذه

وصرت اسولفله على الجريمه الى ان وصلت للطفل الي شايلته مياده وانا محتار اسكت لو اگول بالشي الي عرفته 

هو باوعلي وگلي //ليش ما تريد تحچي 

::اخاف يشكون حتى بنسب البنات الابوهن وذني يتشردن 

حك لحيته وكال - - لكن انت اذا بقيت ساكت ما تحل مشكله لان الام الحامل هي الي فضحت نفسها وانت راح تكون 

مسؤول امام الله لان كتمت شهاده اما بخصوص البنات ممكن ترجعون السؤال الام عن نسب البنات واكيد 

هي ما راح تكذب واذا الشك يزداد فترجعون للعلم والطب واذا طلعن البنات ما ينتسبن للاب ما الهن حق باي 

شي تركه المتوفي

تشكرت منه ورحنا انا ورضا وامه دخلنه مطعم وانا دفعت رغم رضا ما قبل بس انا ما اعرف ليش ارتاحيت الهم 

بوكتها كانو يسدون الامام الساعه 12بالليل رحنا اخذت غرفه بالفندق الي وغرفه الرضا وامه هي ما قبلت وگالت 

ليش خاله هالتكلفه انت مثل رضا وانا ان شالله مثل امك چا كلنه بغرفه وحده نتعلل ونصلي ونروح الاهلنه

ضحكت گتلها :: خلي انام والصبح نتوكل

والصبح اتصلت من الفندق على عمتي الي جاوبتني وهي تبچي 

=هلا يمه وين انت 

::موجود عندي شغل سلامات 

=ماكو شي شغلت بالنه 

::شكو عمه شصاير 

=امس اجو اخوان مياده او اولاد عمها هدوا علينه وگالوا لبست التهمه الاختنا وهددو هادي يكتلونه ويكتلونك 

ويكتلون ناديه اذا ما سحبنه الشكوى وخلينه ناديه تغير اقوالها

::تغير اقوالها ليش هي شكد عمرها 

=عمه شنسوي وهذا هادي بقى يتهدد عليهم وگوه لزمنا 

::وهسه هادي وين 

=راح الشيخ العشيره يبلغه ويشوفه شيگول 

::عمه اطمني وهاي هدتهم ما راح تعبر سلامات وما تغير شي لامن اقوالنه ولا من شكوتنا

حسيت بيها تبچي =يمه اخاف عليكم 

::لا تخافين الله الحامي 

رضا ساكت هو وامه وانا صعدت بالسياره ورحنه اتريگنا ورضا هو الدفع 

طلعت بالسياره وبالطريق رضا گلي 

- - استاد صدك انا مو مثلك دارس تعرف گاع وحلال بس من تحتاجني عد عيناك ياهمه الهدو گلي عليهم 

وحگ علي اله اخليهم يلبسون شيلة نسوانهم 

عجبني كلامه ورجولته الي خلتني اضطر اسولف الجريمه ورضا كل ساع وگال //انا اخو صبحه هيج مع الاسف 

اما ام رضا رغم حزني وقهري بس من اسمعها اتدعي تحصرني الضحكه وهي اتكول 

امال البلابوش الفيسده ام دوده 

عساها بالگفت الشرفنص (وهاي لحد الان ما اعرف شنو تفسيرها )😜😜

وصلتهم العلي الغربي خجلت اگللهم انزلو ع الشارع وهمه بقو ما نزلو وصلنه الگاع چبيره وبيت ريفي بسيط 

گتلهم:: هذا بيتكم 

رضا گلي //اي استاد هذا بيتنا 

ام رضا گالت //اگلك خاله شو بعدك بسيارتك انزل يمه انت وليدي حالك من حال رضا 

انا اعتذرت هي گالت //خاب تنزل شني من كل وعقلك اخليك تروح ما شفتنا گاعدين بالسياره حتى ما گلنالك 

نزلنه اهنا انزل انزل اله اسويلك سياح واشويلك سمج

گتلها ::مو سمعتي الصار 

گالت //وداعتك عدي رضا وعلي اخو وانا وياهم نخلي طشارهم ماله والي 

بقيت واجه علي چان بصف السادس الاعدادي وسلم عليه وگال يريد يتطوع وانا گتله بس تنجح اعتبر نفسك مقبول 

وسووت ام رضا السياح وشوت السمج والچاي تخدر ع الحطب

واسمعها تنعى وهي تشتغل وشفت جهال ابنها المرحوم اجو يمي بوستهم وشلت فلوس رغم رضا ما قبل بس امه گالت 

اخذوا جده من عمكم 

وره الغدا سلمت عليهم واتشكرت منهم وعدتهم امر بيهم 

ورضا حلفني وگلي // شنو تحتاج مثل ما انت اخو عباس انا اخوك

اتشكرتهم وانطيتهم تلفون وعنوان بيت عمتي وتلفون بيت اهلي بغداد رغم انا مقهور من الي سمعته من مياده 

لكن طيبة رضا وامه خلتني شويه ارتاح 

رجعت للبصره ورضا وعلي ركبو وياي وصلوني للشارع العام والطريق كله افكر شلون راح اكلهم لكن 

هدت اخوانها سهلت عليه هواي اشياء

////////////🌺🌹🌺🌹🌺🌹///////// بيه حتى اخاف منك اذا زمخت لو عصبت عليه عشنا وربينا ولعبنا 

وتونسنا حاولت مياده تبعدنا وانت فعلا ابتعدت لكن انا ما گدرت اتركك رغم البرود الي صار بيناتنا 

والله من يوم الشفتها ما ارتاحيت الها ومن اجتنا البغداد اشمازيت منها رغم الكل مبهور بجمالها اله انا