رواية سراج السادة الفصل الرابع عشر بقلم عسق ادريس
*قس*
نصدمت اصرخ من ندفعت عاتكه بقوه راجعه للخلف واكعه على ضهرها ضليت مصدومه واني اشوف عاتكه متكومه ب الارض ودمها تارس الارض!!!!!!!!
لحظات صعبه واني اشوف عاتكه غاركه بدمها وعيونها تنفتح وتنسد رجعت تركيزي ويا الخيال ماكو اختفى ماكو اثر للخيال!!!
صرخن البنات منهارات من الموقف وشاهيناز ركضت لعاتكه تصرخ وتبجي واني واكفه بمكاني متشنجه من الخوف والصدمه
_شاهيناز:: عاتكه لالاااا كومييييي عتوكه يمهه لحكوناااااا فقاررررر فقاررر
صرخت شاهيناز ب اسم فقار والبنات يتراجفن كلنا شفنا الخيال وكلنا متأكدين من الي شفناه
طلعو الولد مستغربين ومصدومين من الصريخ وكف فقار لحظات صافن وهوا يشوف اخته طايحه ب الارض ودمها تارس الارض
_فقار:: عاتكههه شبيهاااا
شالها يرجف ويصرخ يريد يفهم شبيها بس بدون جواب محد كدرت تنطق من صدمه الموقف ورعبه ركض جادح على فقار يصيح بي
_جادح:: لككك راح تموتتتت كوممم ناخذها مستشفى
_فقار:: راسهاا جادح كلها دم
_جادح:: شيلهاااا يلااا
شالها فقار وجادح ركض كدامه دار جادح على معراج
_جادح:: معراجج ضل يم البناتتتت
حجاها وطلعو يركضون من البيت تذكرت فاطمه وحدها فوك درت على معراج الي كعد يهدي ب البنات
_قس:: سيد
باوعلي مستغرب حجيت واني أشر على الطابق الثاني
_قس:: فاطمه وحدها فوك!!
عاف البنات وصعد لدرج بسرعه ركضت ورا وشاهيناز ورانا صعدنا الطابق الثاني معراج بيده التلفون يضوي واني وشاهيناز لازمات ايد ب ايد خايفات
اشرتله شاهيناز على الغرفه
_شاهيناز:: هنا هنااا فاطمه
فتح باب الغرفه واحنا نطلطل ورا شفنه فاطمه نايمه على الجربايه ومتغطيه ب الحاف ركضت عليها شاهيناز تبوس بيها خايفه
بعدت الحاف عنها وشالتها طلعنا من الغرفه وفاطمه ضلت على نومتها نزلنه ومعراج يمشي ورانا
كعدنا على القنفات ومعراج يتصل ب الولد يريد يطمن على عاتكه هزيت رجلي بخوف المنضر مايروح من بالي متأكده اكو شخص دفع عاتكه بس ماكو اثر لهذا الشخص حتى من صعدنا ماشفنا احد!!!!
مر الوقت واحنا على كعده وحده رغم اجت الكهرباء بس من خوفنا وهبطتنا ماتحركنا نفتح باب الصاله ودخلن العلويات وخلفهن قدس صاحت العلويه زهراء بينه
_العلويه زهراء:: شبيها عاتكه شنو صار؟؟
_العلويه لباب:: شصاير يمه شبيها البنيه
_معراج:: كعدن علويات مابيها شي ان شاءالله
_العلويه زهراء:: ولك يمه شنو مابيها شي فقار خابر على غضنفر كله ب المستشفى احنا!
كامت شاهيناز من مكانها وجرت العلويه زهراء تهدء بيها كعدتها على القنفه والعلويه زهراء تريد تفهم السالفه اجت قدس وكعدت يمي خايفه على عاتكه دارت
_علويه زهراء:: شاهيناز يمه شبيها عاتكه؟
_شاهيناز:: طاحت من الدرج
_علويه زهراء:: شلون طاحت
_معراج:: الكهرباء جانت مطفيه علويه وهيه صعدت الدرج تجيب اختها
سكتت العلويه زهراء مقهوره على عاتكه واحنا سكتنا استغربت ليش معراج ماحجه على الخيال صح هوا ماجان موجود بس البنات كلهن ذكرن الخيال
مر الوقت والكل بده يرجع للبيت عدا السيد عبد الرؤف والسيد عبد المعز والعلويه جهاد وغضنفر
نفتح الباب ودخل غضنفر والسيد معز وخلفه السيد عبد الرؤف والعلويه جهاد يمشون ويا عاتكه شفت عاتكه التعب واضح بوجهها وايدها مجصصه
كعدو عاتكه واحنا كعدنا حولها مثل الدائره نتحمدلها على السلامه وهيه ترد بهدوء وتهز راسها
مانطت رد فعل للموضوع ورد فعلها جانت عاديه
كل همها اختها فاطمه ماصار بيها شي
طلع الكل من الغرفه نزعت عاتكه ربطتها انصدمنا من شفنا راسها ملفوف باوعتلها شاهيناز بصدمه
_شاهيناز:: شبي راسج عاتكه!!!
_عاتكه:: خمس خياطات
انصدمنا اني والبنات مقهورات على عاتكه والي صار بيها...
"شاهيناز"
بعد الي صار ب عاتكه كلها صارت عدها خوفه من الي صار شنو السبب؟ منو دفع عاتكه؟ منو جان موجود ب البيت!؟ ماكو جواب الكل سكت وغلس على الموضوع حتى حفديات العلويه لباب ماحجن وجوابنا جان زلكت وطاحت! حتى عاتكه من كعدنا وياها وذكرنا الخيال الشفناه استغربت
_عاتكه:: لا ماكو هيج شي دست على ثوبي وماكدرت اسيطر على ركضتي وطحت
_ملاك:: عاتكه بس كلنا شفنا الخيال؟
_عاتكه:: لابنات شبيجن ماشفت شي!
كلام عاتكه خفف عنا الرعب شوي معقوله صدك جنا نتخيل؟ بس كلنا شفنا لاوحده ولاثنين! معقوله كلنا نتخيل؟؟؟ الكل غلس عن الموضوع وطمطمنا
بعد يومين من موقف طيحه عاتكه جنت نايمه والبنات كلهن نايمات ب الغرفه وعمتي ويانا فتحت عيوني بوجع
راسي راح ينفجر
كمت من مكاني متوجعه فركت راسي احاول اهدء الوجع ماكو فايده الوجع يزيد
كمت من مكاني اخذت الربطه وطلعت من الغرفه
نزلت الدرج افرك براسي الوجع فضيع ماينحمل اضويه الصاله كلها مطفيه بس ضوه خفيف جاي من المطبخ سمعت صوت تركع مواعين ب المطبخ توقعت وحده من البنات كاعده تمشيت للمطبخ اريد براسيتول ماتحمل الوجع راسي راح ينفجر!!!!
دخلت للمطبخ فارغ محد موجود لعد الصوت السمعته قبل شوي صوتمن؟ التفتت اطلع من المطبخ وسمعت صوت يهمس ب اسمي! كمزت من مكاني مرعوبه محد موجود ب المطبخ بقيت التلفتت بمكاني درت اطلع من المطبخ واجاني صوت ضحك
_:: شبيج شاهيناز تعاي هاي اني
بقيت متصنمه بمكاني واني اسمع ضحك حميده بت عمي جاي من الحديقه الخارجيه المربوطه ب المطبخ شفت الساعه الموجوده ب الصاله لان المطبخ مفتوح على الصاله
الساعه 2 الى ربع؟ حميده شسوي كاعده بهيج وقت؟ رجع اجاني صوت ضحك حميده
_حميده:: شاهيناز تعاي لاتخافين اني حميده تعاي
فركت ايدي خايفه صح الصوت صوت حميده بت عمي بس ماعرف ليش احساسي يمنعني تقدمت للباب اهمس
_شاهيناز:: حميده طلعي من الحديقه شسوين وحدج لايكعد احد
ضحكت بصوت عالي وحجت بس هل مره صوتها خشن بطريقه مرعبه!
_حميده:: محد موجود بس اني وياج تعاي!!!
وكفت بمكاني صافنه على باب الحديقه مفتوح ربع الباب ماكدر اشوفها بس صوتها يجيني واكدر اسمع صوت حركه ب الحديقه
_شاهيناز:: حميده ليش ماتطلعين خل اشوفج!!!
اختفى صوتها ساكته والصوت هدء واني بقيت واكفه بمكاني منتضرتها.. اجاني صوتها تحجي بهدوء
_حميده:: ماكدر اجي
_شاهيناز:: ليش ماتكدرين؟!؟
_حميده:: لازمه بيدي بزونه خاف اعوفها وتروح!
_شاهيناز:: حميده شدراج اني شاهيناز وانتِ ماشفتيني!
سكتت واني كلبي بده يدك بسرعه وعيوني بدن يدمعن الخوف سيطر عليا ب الكامل!! شلون عرفتني وهيه ماشافتني؟؟ ليش ماتقبل تطلع!!
رجعت للخلف منسحبه بخوف عرفت السالفه مو خاليه مستحيل هاي حميده! اني متأكده هاي مو حميده توقفت بمكاني من سمعت صوت بجي
هاي حميده جاي تبجي!!؟ بديت اركز ب الصوت حميده تبجي بوجع
_شاهيناز:: حميده شبيج؟
استمر صوت البكاء بدون رد واني واكفه بمكاني افرك ب ايدي
_شاهيناز:: حميده تعاي طلعي من الحديقه خلينا نحجي اخاف ادخل اني
استمر صون بكاء حميده واني مقهوره خوفي يمنعني اتقدم للباب الحديقه جانت حميده تبجي بحركه واني كل ماسمع صوت بجيها ينكسر خاطري
تقدمت ب اتجاه الباب بخوف
_شاهيناز:: حميده والله اخاف تعاي
مديت ايدي توني افتح الباب وكمزت من مكاني اصرخ بخوف من اجاني صوته
_جادح:: شسوين هنا!!
التفتت على جادح مصدومه وجسمي كله يرجف شفته واكف يم باب المطبخ مكتف ايده لصدره وعاكد حواجبه مستغرب وكفتي
_شاهيناز:: سيد سيد
حجيتها وماتحملت من رجفتي وخوفي جسمي كله يرجف حتى صوت حميده اختفى باوعلي مستغرب التفت يباوع لباب الحديقه نضراته جانت غريبه يباوع للباب بعمق رجع باوعلي
_جادح:: الباب منو فتحه؟
التفتت على الباب بخوف بلعت ريكي اريد اجمع قواي ماكدر من الخوف احجي تقدم للباب واني ابتعدت فتح باب الحديقه وطلع واني بقيت على وكفتي ماطول ثواني ورجع للمطبخ مستغرب
انصدمت من شفته يقفل ب الباب اشرتله على الباب بتردد
_شاهيناز:: حميده ب الحديقه شلون تقفل الباب
التفتت علي مستغرب
_جادح:: محد ب الحديقه؟
صفنت بوجهه مستغربه شنو محد ب الحديقه توني سمعت صوت حميده من الحديقه!!! قفل باب الحديقه ومشه من يمي واني رجلي ماحملني يعني شنو منو جان يحجي وياي معقوله اتخيل؟ لا مستحيل اني متأكده من السمعته!!!
_جادح:: علويه مو كلشي تسمعي يعني حقيقي
التفتت علي مستغربه من كلامه حسيت نفسي فاهمه الي حجاه بس ماريد اصدكه
_شاهيناز:: سمعت صوت حميده جانت تحجي وياي
_جادح:: فخ
حجاها والتفت على الطباخ بقيت وبمكاني صافنه على الباب معقول يعني الي سمعته مو حقيقي فتحت جادح غاز الطباخ وخله قوري الجاي على الطباخ حجه وياي بدون مايباوعلي
_جادح:: ليش كاعده علويه؟
مسحت وجهي بخوف ومشيت اكعد على الكرسي الي ب المطبخ حيلي باد من الخوف
_شاهيناز:: راسي يأذيني توقعت وحده من البنات كاعده ردت ابراسيتول
عاف الطباخ ومشه ب اتجاه الثلاجه
_جادح:: هيج وقت الكل ينام محد يضل كاعد. تفضلي هذا براسيتول
طلع من باب الثلاجه شريط الحبوب حطه على الطاوه واخذ كلاص غسله وترسه ماي من البراد ورجع حطه بصف الحبوب
كمت من مكاني اخذت شربت الحبوب والماي ورجعت كعدت بمكاني اتلفتت على باب الحديقه شنو جان يصير لو طالعه الحديقه نفتح باب المطبخ بقوه بنص صفنتي كمزت من مكاني اصرخ عبالي الجني دخل علينه
التفت جادح مخترع وياي صارت انضارنه على ابن جادح الولد ضل واكف ب المطبخ مخترع من صرختي ومن صدمه ابو خله جادح ايده على عيونه واني نسحبت كاعده ب الكاع من الخوف بعد جادح ايده عن عيونه وباوع الابنه
_جادح:: عماد بابا شلون هيج تفتح الباب!
_عماد:؛ بابا خفت
تقدم جادح على عماد ابنه شاله وكعده على الطاوله يبوس بي
_جادح:: من شنو خفت
_عماد:: بابا اكو واحد جاي يركض بصف باب الغرفه ويضحك
لاعاد اني هنا صفنت صفنه محد صافنها قبل يعني السالفه للكل مو الي بس الحمدلله عبالي الجني مترصدني بس اني طلع الكل الف الحمدلله
مسح جادح على وجهه وابتسم
_جادح:: مو مهم لاتفكر هواي هاي كلها تخيلات. جوعان تريد تاكل؟
_عماد:: اي
هز جادح راسه ب اي والتفت دار عماد راسه يباوعلي ابتسمت واشرتله ب ايدي هلو رجعلي الابتسامه واشرلي ب ايده طلع جادح من الثلاجه طماطه خله الطاوه على الطباخ فرغ الزيت على الطاوه وبده يحمس ب الطماطه واني وابنه صافنين علي كل شوي اباوع لرجليهم خاف يطلعون طناطل وجاي يضحكون عليه وهسه هذول هما الجن؟
كمل جادح طبخ وخله الطاوه ب صينيه وخلاها على الطاوله اشرلي اكل هزيت راسي ب لا ماريد خله الخبز كدام ابنه ورجع التفتت على قوري الجاي صب جاي بكلاص وقدمه ب اتجاهي اخذت الكلاص منه اشرب الوجع بعده
كعد جادح بصف ابنه ياكل ويا واني كاعده اشرب جاي كملت نص الكلاص وخليته بصفي خلص ابن جادح الاكل وكام يغسل وجادح شال المواعين يغسلهن
اخذ الكلاص البصفي وكعد يغسله
خلص جادح المواعين دار عليه
_جادح:: تردين شي؟
_شاهيناز:: لا ماريد شي
هز راسه واشرلي اكوم كمت من مكاني
طلع جادح من المطبخ واني طلعت ورا ايدي ب ايد عماد ثنينه خايفين ونتراجف دار علينه جادح هز راسه ماعاجبه وكف على الدرج واشرلي
_جادح:: يلا علويه صعدي
_شاهيناز:: خلي عماد يوصلني لباب الغرفه
_عماد:: لاماروح اخاف
_شاهيناز:: ولك انت زلمه الزلمه مايخاف
جريته من ايده وهوا يحسب بروحه وجادح مكتف ايده منتضرنا نخلص درت على جادح
_شاهيناز:: ابو عماد انت اصعد كدامنا واحنا وراك
_عماد:: واذا سحبنا الجني من ورا
بباوعلته صافنه اي والله صدك واذا اجانه من ورا منو يحمينه
_عماد:: بابا احنا نصعد وانت اصعد ورانا
_شاهيناز:: واذا طلع كدامنا الجني
_عماد:: خل نكعد عمو غل واحنا نمشي بنصهم؟
_شاهيناز:: اي صح عفيه
شفنا جادح صافن علينه ماعاجبه عفت ايد عماد وباوعت الهم ومشيت اباوع لدرج خاف خاف يطلعلي شي وانشمر من الدرج هم!
شفت الغرفه كدامي باوعت جادح ماكو طكيتها ركضه للغرفه بسرعه
دخلت للغرفه شفت ضوه الغرفه مشتعل وعمتي لابسه ربطتها وواكفهم بنص الغرفه صافنه من دخلت باوعتلي ب استغراب
_جهاد:: وين جنتي؟
ركضت عليها بخوف اباوع لحميده شلون نايمه بنص البنات واني قبل شوي سامعه صوتها ب الحديقه سولفت العمتي الي صار جوا بهمس جانت عمتي تسمعلي بتركيز وتهز براسها بعدني جاي اسولف وكمزت من صوت دكه باب الغرفه
_شاهيناز:: منو-وو؟
_جهاد:: محد
_شاهيناز:: ها
طفت عمتي ضوه الغرفه ومشت ترجع لمكانها لزكت بعمتي امشي وياها بخوف
_شاهيناز:: عمه شنو محد لعد ياهو دك الباب
_جهاد:: الباب من مساع يندك من اطلع مالكه احد من سولفتي توج عرفت السالفه
_شاهيناز:: يمهههه عمه شنو السالفه
_جهاد:: ماكو سالفه يريد يخوفنه بس
_شاهيناز:: منو!
نامت عمتي بفراشها واني بصفها حاضنتها دكت على ضهري بخفه
_جهاد:: لاتخلين بالج ويا سوي نفسج ماتسمعي
سكتت عمتي واني سكتت وياها بهذا اليوم ماكدرت انام بكل مره اغمض عيني اسمع صوت دكه باب وركض سريع اقل الربع ساعه ويرجع يتكرر الموقف مانمت الى بعد ماكعدن البنات كلهن على صلاه اليل صلينه الليل والفجر يلا كدرت انام
ثاني يوم كعدت عيوني كوا افتحهه من التعب والنعس الغرفه جانت فارغه والفراش ماكو بس فراشي لبست ربطتي وطلعت من الغرفه نزلت الدرج شفت العلويات كلهن ب الصاله يتريكن صبحت عليهن ودخلت للمطبخ اغسل وجهي درت على باب الحديقه شفته مفتوح تذكرت الصار البارحه نشفت وجهي وطلعت من المطبخ دحست روحي بين البنات
من بين كل السوالف الي نحجن جذب انتباهي اسراء من باوعت العمتي
_اسراء:: البارحه باب الغرفه ماسكت من الدك كل شوي يندك اكوم افتح الباب مالكه احد
ضحكت عمتي وباوعتلي ساكته واني الخوف يقره الف عندي..... مر الوقت وصاحو راح نطلع للامام الكل بده يتجهز لطلعه
كملت لبس ونزلت شفت الكل كاعد ب الصاله منتضر جادح يجيب الكوستر خطيه ابتلو بينه ب الكوستر لان اعدادنا جبيره واذا اجينه نطلع بسيارتنا راح هوسه نختصر السالفه ب الكوستر احسن
"عاتكه"
طلعنا من البيت رغم وجعي واذيتي ماحبيت ارد البنات وقس لان قدس ماجانت تجي ويانا تزور وعلى طول هاي الايام الي اجينه بيها قدس ماتجي ويانا
كعدت ب الكرسي بصف قس منتضرين جادح يطلع اجه طفل صغير ابن عمران شالته عمتي مبتسمه باسته بخده وانطته ل اسراء رجعت عمتي تباوعله مبتسمه بحزن
من شفت عمتي صافنه على ابن عمران الصغير رجع بيه
"الماضي"
انتبهت طول المحفل السيد صافن ومختنك يحاول يبين نفسه بخير بس الكل لاحظ توتر وخوف السيد
وكفت العلويه قريبه على السيد مستغربه
_العلويه زهراء:: شبيك سيد ليش هيج مختنك؟
_عبد الرؤف:: ماعرف بالي يم عون اتصلت على جهاد ماترد راح ارجع
_العلويه زهراء:: ترجع والمحفل
_عبد الرؤف:: خليكم هنا انا ارجع وحدي
مشه السيد لوالدي وعمامي واني والباقين واكفين على صفحه استغربت رد فعل السيد بس اتأكدت فعلا صاير شي لان السيد احساسه مايغيب بس شنو معقوله صار؟
اتوادع السيد ويا الساده والشيوخ الموجودين ب الحفل واعتذر منهم لان راح يترك الحفل اتفهم الكل وعذرو السيد حتى طلاب السيد ماحجو شي
مشه السيد وفقار يرجعون للبيت ركضت وراهم ارجع
صار بالي كله يم عون عمتي خفت على خوف السيد
اجت ويانا العلويه زهراء والباقين ضلو
ركبنا بسياره فقار ومشينه راجعين للبيت رجعنا السيد طول الطريق يهز براسه وينافخ متوتر خله ايده على عيونه وكل شوي يلوف على فقار يطلب منه يسرع يريد يوصل للبيت بسرعه دخلنه لمنطقتنا والسيد يباوع للبيت من بعيد
وكفت السياره كدام البيت والسيد نزل قبلنه مسرع بخطواته للباب وكف يدك ب الباب بس استغرب من نفتح الباب بيده يعني الباب ماجان مقفول دفع السيد الباب ودخل للبيت بسرعه واحنا دخلنا مستغربين من خوف السيد رغم مو اول مره عمتي وعون يبقون وحدهم ب البيت بس هل مره السيد احساسه مختلف
شفنا باب الصاله مفتوح دفع السيد الباب ودخل يصيح ب اسم عمتي وعون واني والعلويه ورا دخلنا لصاله مشيت للغرفه مامنتبهه ولامركزه بسرعه دخلت للغرفه شفت كلاص حليب موجود على الميز درت مستغربه عمتي ماموجوده طلعت من الغرفه
_عاتكه:: سيد عمتي ما.....
ماكدرت اكمل كلامي ووكفت بباب الغرفه مصدومه واني اشوف عمتي كاعده بزاويه الصاله وعون بحضنها مغطيته بشالها والدم تارس الصاله رفعت عمتي راسها وباوعت لسيد الي جان واكف بدون رد فعل بس عيونه يحجن صدمته
باوعت عمتي لسيد ومسحت وجهه بايدها المتروسه دم قوست حلكها تريد تبجي
_جهاد:: سيد عون مادري شبي صالي ساعه اريد اكعده مايكعد
خلصت عمتي كلامها ودنكت تباوع لعون من فوك الشال
دخلو فقار لصاله مامنتبهه على عمتي
باوع النا ودار يباوع لعمتي مصدوم بمنضر عمتي والدم
تقدم السيد وايده ترجف لعمتي حجه والكلمات تتقطع بصوته
_عبد الرؤف:: شبي عون جهاد بابا هذا دم منو ليش عون ساكت
باوعت عمتي لسيد وابتسمت بحزن باوعت لعون من فوك الشال تمسح على جسمهه
_جهاد:: مايحجي وياي خاف زعلان مني؟
تقدم فقار يحجي ويا عمتي
_فقار:: عمه خل اخذ عون منج
_جهاد:: لا ماتاخذذ ابني!!!!
_فقار:: لا ماخذه بس احجي ويا جبتله حلويات من المحفل شوفي
حجاها وطلع من جيبه جكليت ومصاص باوعتله عمتي وقوست حلكها بزعل
_جهاد:: فقار
_فقار:: ها عمه
_جهاد:: فقار عون راح مايجي بعد
بلع فقار ريكه بخوف انتبهت الكل مصدوم ماعدهم رد فعل حتى العلويه زهراء بس صافنه على عمتي وعلى الدم
_فقار:: ليش وين راح مو بحضنج عون؟
_جهاد:؛ لا راح بعد عون الامام الحسين اخذه يمه
حجتها وبعدت الشال عن جسم عون هنا ماكو كلام يوصف رد فعلنا واحنا نشوف عون جسد بدون راس عون الطفل الصغير والجميل ضحكته وهدوئه كلامه وصريخه عصبيته وحبه النا اختفى بهذا اليوم
كلشي توقف واني اشوف عون منحور كدامنا
منظر عون جان صعب الي مااتحملت اشوف رعب الموقف واذيته لقلبي دخت وعيوني غوشن ماتذكر شي غير صريخ العلويه زهراء وبجي عمتي
طحت غايبه عن الوعي وفاصله عن العالم كله حسيت هاي الطيحه انقذتني من المنظر الشفته كدامي
كلبي ماتحمل يشوف عون ميت بهاي الطريقه المخيفه!!
سمعت صوت بجي وصريخ تكلبت بمكاني مزعوجه من الصوت فتحت عيوني من تذكرت الصار كمزت من مكاني مرعوبه اتلفتت ب الغرفه هاي غرفه عمتي شفت كلاص الحليب بعده موجود توقعت نفسي جنت اتخيل جنت احلم اي صح هذا جان حلم اتنفست براحه
معقوله صدك حلم؟
سمعت صريخ العلويه زهراء غمضت عيوني بوجع اريد اجذب نفسي الي صار مو حقيقي الي صار خيال وحلم بس عاتكه رجع تكرر صوت الصريخ دمعت عيوني وطحت ب الكاع ابجي ماكدر اطلع ماريد منضرهم يثبت الي صار حقيقي مو خيال ماريد اصدك الصار كله جذب عاتكه انت تتحلمين بس
بقيت كاعده بمكاني بكل مره اسمع صريخهم اتذكر عون وابجي نفتح باب الغرفه باوعت لمهجان عيونها حمر والدموع تارسه عيونها من شافتني بجت واني بجيت
كعدت بباب الغرفه تشهك
_مهجان: راح عون كتلو عون عاتكه
_عاتكه:: لاعون مامات اني وعدته بس ارجع اجيبله كيكه وياي
حجيتها وكمت من مكاني ابجي فتحت باب الغرفه شفت النساء متجمهره ب الصاله والعلويه زهراء كاعده بنص الصاله تبجي بعتب وقهر
شمرت حيلي على الحايط ابجي لبجيهم
ماريد اصدك عون مات!!
ماكدر اتحمل فكره موت عون واصدكها باوعت للنساء عمتي ماموجوده صفنت بخوف كلبي ياذيني
اختنكت من الجو وبجي النسوان كمت امشي بتعب دخلت للمطبخ شفت البنات كاعدات يبجن من شفتهن بجيت وياهن كعدت كدامهن
_شاهيناز:: عاتكه عون
ماكدرت تكمل كلامها وبجت هزيت راسي
_عاتكه:: شفته كدامي مذبوح
الكل جان يبجي مامصدك فكره موت عون!! اني شفته بعيوني منحور وماكدر اتقبل هل فكره باوعت للبنات
_عاتكه؛؛ عمتي وين!
_مهجان:: عمتي والسيد ثنينهم ب المستشفى
_حوراء:: عمتي مرتين كعدت ورجع انغمى عليها
صفنت شنو رد فعل عمتي من ترجع ومايتلكاها عون مثل كل مره شنو رد فعلها من تشوف البيت خالي من عون!!
كمنا اني والبنات لبسنه الاسود ومحد انطت رد فعل غير البجي دموعنا جانت تحجي كلشي
بدينا نستقبل النساء والمعزيات وبكل مره تدخل مره توكف بباب الصاله وتصرخ وتبجي وبكل مره نرجع نبجي وراها متوجعين ومدركين الي فقدناه
جنت اني والبنات كاعدات نحضر ب الماي دخلت حوراء للمطبخ
_حوراء:: عمتي اجت!!!
من سمعت بعمتي اجت عفت البيدي وطلعت اركض اني والبنات وكفنا بباب الصاله
دخل فقار للبيت وخلفه عمتي امي ومرت عمي سانداتها وهيه تمشي بتعب عافت امي وعمتي ومشت وحدها داخله للصاله وكفت بباب الصاله تباوع لنسوان
كامن النسوان تلكنها يبجن ويلطمن وعمتي تبجي وياهن شافت عمتي صوره عون ونهارت شكت طرف دشداشتها
من الامام ولطمت على صدرها تصرخ
باوعت للعلويه زهراء
_جهاد:: يمههه عون راح ابني راح روحي من الدنيا عافني ابني
مشت عمتي ب الصاله تبجي
_جهاد:: كللييي اكو ام تتحمل تشوف ابنها ينكتل كدامها ياناسسس ابني بنحرو كداميييي راح عزيز امه راح عون امه
طاحت عمتي ب الكاع ادك على رجليها
_جهاد:: يمه عون شلون اتحمل فركتك يروحي شلون اتحمل ما اسمع صوتك شلون اتحمل مابوسك انت تتحمل تشوف امك تبجي عليك؟ تتحمل تشوفها مقهوره هيج عليك لا ادري بيك ماتتحمل
لطمت عمتي على وجهه واحنا نبجي لبجيها
_جهاد:: يارب الوجع بروحي يلوببب اريد ابني بس اشوفه بس خل اشبع منه ابوسه بعيونه الاحبهن ابوسه من صدره ابوسه من ركبته النحرت خليني اشبع منه واخذه انت نطيته وانت تاخذه واني راضيه بس خليني اشبع منه هل مره روحي محروكه حرك علي
بجيت اصرخ ويا عمتي والبنات يصرخن وياها وكفت وحده من النساء تحجي بصوت عالي بطريقه عتاب وعمتي تلطمم وادكك على وجهه شمرت حيلي اباوع للصورته مالحكنا نشبع منك عون؟ ماتوقعت بهل سرعه راح تتركنا وتروح توقعت اشوفك واكف بسد الولد واكف بسد السيد شلون السيد استقبل صدمه موت عون!
السيد يعتبر عون قطعه من روحه شلون راح نتحمل فكره انت رحت ونقتلت!!
"شاهيناز"
صعدنا لسياره وطلعنا ماشيين للامام الحسين عليه السلام سفط جادح السياره ونزلنا منها مشينا داخلين للامام شفنا الساده من بعيد انتبهت اكو مجموعه بنات كاعدات يصورن بالساده
تمشينه للساده من انتبهو النا ابتسمو البنات من شافنا نزلن اجهزتهن وابتعدن
_عبد الرؤف:: ها ورداتنا كاملات؟
حجينه كلنا اي جاهزات اشر النا السيد حتى ندخل نزور مشه السيد كدامنا ووكف يباوع لجهه الثانيه
التفتنا اني والبنات شفت الساده كلهم جايين يمشون باتجاهنا جذب انتباهي دلهب وشخص ثاني ما اعرفه ملامحه جانت حاده وضخم بطريقه غريبه كان بارز بينهم تمشو باتجاهنا ابتسم السيد يباوع للشخص الغريب
تقدم الشخص للسيد يتسالمون ودلهب خلفه ضحك جادح يباوعله
_جادح:: سيد جبته يزور
ابتسم السيد يباوع اله باوع لجادح صفح ماعاجبه
_:: اجيت ب اردتي محد جابني
ضحكو الولد وهذا طنكر ماعاجبه انتبهت بكل مره يمرن مجموعه بنات يصفنن على دلهب ب اعجاب فعلا دلهب
ملامحه تجذب المقابل رغم اني اشوف ملامحه مخيفه لان مابيهم رحمه ممكن بسبب شغله؟
جان دلهب لابس شفقه سوده فجاءة قرر دلهب ينزع الشفقه من راسه ويصدم المشاهدين ب لمعه الكرعه دنك راسه يمسح على الصلعه وكفت قس تهمس بينه
_قس:: دربالجن لاتعثرن بشعره
_عطاء:: هسه هوا عليمن نزع الشفقه عود يصدمنا شنو
_خدلجه:: هزه الراس يحسسني شعره يتناثر من الجهتين
_مهجان:: لو اخلص عمري كله عنايه ببشتري مستحيل تصير لامعه بهاي الطريقه
_ملاك:: هذا لو صار بي كمل بسرعه تنلكف الكمله
ضحكت على كلامهن فعلا صدم البنات بلمعه الكرعه حتى الي جانن يباوعون انصدمن من المنضر اعتقد سوه هيج حتى لايباوعله بعد؟
دارت علينه عمتي خازرتنا حتى نسكت
واحنا سكتنا اشرو النا نمشي حتى نزور والساده الكبار مشو وحد والشباب وحد
" معراج "
‼️كلام منقول واني سردته على لسان معراج ‼️
دخلنا لصحن الامام وجادح محاوط جزام مايريده يبتعد
نزلنا المدرج بجهه الرجال فقار ودلهب يمشون كدام وجزام وجادح وغضنفر والباقين ورانا
دخلنه لمرقد الامام ابتسمت براحه واني اشوف الضريح كدامي شعور الراحه بهذا المكان ماينوصف
مشينه لضريح مجتمعين بجهه وحده
لزم دلهب الضريح وغمض عيونه يدعي واحنا خلفه.. جان اكو رجال بيده طفل يجي عمره اربع سنوات بيده تربه واكفين بصف دلهب الزلمه يدعي وابنه صافن على دلهب
رفع الطفل ايده الي لازم بيها التربه وجابها براس دلهب بقوه فتح دلهب عيونه مصدوم من الضربه دنكت راسي ماريد اضحك وجزام يصيح
_جزام::انطاك مرادك انطاك مرادك
مسح دلهب على راسه بوجع خازر الطفل
_فقار:: شبيك دلهب الولد صغير لاتخرعه
_دلهب:: راسي راح انت شتحجي
_جزام:: دربالك على المخ والمخيخ لايتضررون
سكتت دلهب خازر ب الطفل والطفل يتلفتت مره يباوع لدلهب ومرا يباوع الابو خايف من دلهب
اخذنا تربنا ومشينه نصلي الكل جان مسبل ايده بس جزام جان مكتف ايده
محد علق على الموضوع لان هذا المكان للجميع مو بس لشيعه اهل البيت لكل الناس
خلصنه صلاه وكعدنا نقره زياره عاشوراء انتبهت على جزام صافن على المرقد بتعجب وجمال المكان فعلا المكان يستحق التعمن والاعجاب
بعد ماكملنا زياره كامو الولد واحنا وياهم طلعنه من الامام ماشين ب اتجاه المطاعم
دخلنه للمطعم كعدنا حول ميز الطعام نسولف
باوع دلهب ل غضنفر الي جان صافن بغير عالم
_دلهب:: ابو الشباب
باوع غضنفر لدلهب مستغرب غمز دلهب لغضنفر
_دلهب:: شبيك؟
_غضنفر:: مابيه شي
_دلهب:: شلون مابيك صالك ساعه صافن احجي حبيبي احجي
جر غضنفر حسره
_غضنفر:: اكو شي شاغل بالي هل فتره
_دلهب:: سولفه خل يشغل بالنا هم
الكل جان مركز ويا غضنفر وهوا محتار يحجي لو لا ب الاخير استسلم للامر الواقع وبده يحجي
_غضنفر:: صالي فتره احلم ب احلام غريبه من عقدت لهذا اليوم مره احلم اطفال يبجون مرات تجيني مرأه وحتى رجال ناس ماعرفهم بكل مره يجون ب الحلم يحذروني ابتعد عن خطيبتي
_غل: يحذروك شنو ليش ماتحجينه؟
_غضنفر:: ب البدايه عبالي اعلام عابره بس اكو حلم تحقق
ركزنا كلنا ويا كلامه
_غضنفر:: قبل جم يوم حلمت بشخص على مرتين يجيني يحذرني من خطيبتي بس المره الثالثه اجاني بعصبيه جان شكله مرعب بس هل مره ماحذرني
_فقار:: لعد!
_غضنفر:: هددني يأذي اختك عاتكه!!
صفنا كلنا ويا كلامه الولد صارو واحد يباوع بوجه الثاني
_ايليا:: اختي عاتكه؟
_غضنفر:: اي هددني يأذيها ماعرف ولد محتار انا بس موقف عاتكه البارحه ومعراج سولفلي موقف البنات هنا السالفه لعبت عدي؟
استغربنا كلنا كلامه انا عن نفسي ماشفت بس ويا كلام البنات باوع دلهب لغضنفر
_دلهب:: تريد اخصملك السالفه؟
_غضنفر:: اي؟
_دلهب:: مرتك متلبسهه جني الجني ساحر الساحر بايع نفسه للجن الساحر انتحر الجن ماقتلوه لان الساحر
معارض الحبايب الافندي الساحر متحالف ويا اكثر من جن مرتك وقت طاحت ب الكبر ولافت البزونه على الكبر ثلاث مرات الحبيب الساحر روحه دخلت بداخل المره والشباب الحلوين هسه يركضون ورا خطيبتك لان الساحر متلبسها هما متقصدين الي داخلها مو هيه لان هما معتبري موجود بداخل زوجتك ف الجن ملاحكيها فهمتني
_ايليا:: هسه انت صالك ساعه ادلع بيهم عبالي اصدقائك على هاي الميانه
رجع دلهب ضهره
_دلهب:: لا تعودت عليهم ب المكبره كل ماواحد يمد راسه من الكبر انكده ب الكرك وانا ضال شايل كركي واركض وراهم
الكل جان يحجي ويا غضنفر وينطي اقتراح مختلف بس جزام جان صافن على غضنفر عدل كعدته وحجه موجه كلامه لغضنفر
_جزام:: تعرف السيد صدام؟
_غضنفر:: سيد صدام ابن السيد صروط؟
_غل:: ب البصره اعتقد مكانهم بس السيد صدام ميت؟
_جزام:: اي الله يرحمه بس اولاده موجودين اعرف اصدقائي واحد هم تلبس زوجته يهودي والساده هذول تكفلو ب الموضوع ادري بيكم انتم ساده ومو قليلن خاصتن جدك والد السيد معروف
بس افضل لو تبدون تعالجون الموضوع قبل لا يبدي ياذيكم واحد واحد
صفن غضنفر يهز برجله اجه الاكل وبدينه ناكل باوع دلهب للاكل وضحك يباوع لطماطه
_دلهب:: شموكله الولد خبزه وطماطيه وديته لطبيب وزوع اعليه شموكله الولد خبزه وطماطيه
صاحو الولد ب دلهب وهوا يضحك درت على غضنفر شفته بعده صافن محتار باله بعيد
"شاهيناز"
صعدنا ب الكوستر راجعين للبيت وعمتي واسراء كاعدات كدام يسولفن وجادح يسوق ب السياره درت اريد افتح الجامه جريت القفل مالتها جان مشكل
جريته بكل قوتي ماحس غير القفل اجه ب ايدي
صفنت على القفل وقس صافنه وياي انكسر القفل بيدي
درت اباوع يمنى يسرى خاف واحد شافني باوعت لجادح توقعت مامنتبهه
شفت جادح يباوعلي من الجامه مصغر عيونه ورافعه واحد من حواجبه نضراته جانت تضحك كتمت ضحكتي
ونزلت راسي ورجعت كعدت بمكاني
نغزتي قس بخاصرتي
_قس:: شمريها من الجامه ولج
_شاهيناز:: ولج ششمرها جادح يباوعلي
رفعت قس راسها تباوع لجادح ورجعت دنكت
_قس:: انوب ماعاجبه عبالك مادري شكاسره
_شاهيناز:: ولج هاي شلون نلزكها انوب
_قس:: دجيبي جيبي
اخذتها مني ووكفت عود ترجع تشكلها واني اباوع لجادح كمل يباوع كدام ومارجع انضاره علينه كعدت قس باوعت لجامه ملزكتها تلزك
_شاهيناز:: شنو هاي ولج
_قس:: يمعوده شبيج دسكتي هسه
غلسنه ثنينه على الجامه وجادح مغلس ويانا كملنا طريق راجعين للبيت والكل ساكت.... صاحت رشا جنه السيد معز تحجي ويا جادح
_رشا:: ابو عماد بلا زحمه عليك خويه ماتنزلنا قريب البيت نمشي
_جادح:: ليش ماوصلجن للباب!
_جهاد:: اي جادح نزلنه على مسافه رشا تحتاج مشي تسهل ولادتها
_جادح:: بس رشا وانتِ؟
_اسراء:: لاكلنا بعد نزلنا فد مره
اعترض جادح ينزلنا لان كلنا بنات واعدادنا هواي بس عمتي خصمتها وخلته ينزلنا على مسافه فرع عن البيت لان رشا حامل بنهايه الشهر التاسع ولحد هسه ماعدها ولاده.. نزلنا كلنا من الكوستر اني وقس وعاتكه وملاك وخدلجه وعطاء ومنه الله واسراء وعمتي جهاد ورشا
نزلنا وجادح كل شوي يوصي عمتي
_جادح:: جهاد خليج وياهن
_جهاد:: اي جادح والله فهمت غير اني جبيرتهن طبعاً اضل وياهن روح انت الله وياك
ودعنا جادح وطلع ب السياره واحنا رجعنا نمشي عمتي واسراء يمشن كدامنا ورشا وعاتكه يمشن ب النص سوا واحنا نمشي وراهن
_ملاك:: تخيلن تطبك على سياره هسه ويخطفونا؟
_خدلجه:: يعني ماعدهم شغل وعمل يجون يخطفون الظهاري ولاوحده ولاثنين
_قس:: اصلا من يشوفون عطاء ويانا من بعيد يطلعون كدام حتلو نيتهم يخطفونا
كمزت عطاء على قس وقس طفرت تمشي بسرعه
_عطاء:: ها طفرتي
_قس:: اكلج عطاء شبيج وياي خيه ترا اني فقيره!
_عطاء:: فقيره مو تذكرين من صعدتي فوك ضهري تسلقين جنج قرد!
باوعتلها قس مصدومه وخلت ايدها على صدرها
_قس:: لاتظلميني ترا صعدتي على ضهرج حتى اشوف العركه من منظور واضح ماشاءالله يعني اصنف طولج بسلسله جبال حصاروست
ماكدرت عطاء تلكف قس والبنات يضحكن وقس تغيض ب عطاء وعطاء مالازمها غير الشارع جان ركضت ورا قس ومردغتها تمردغ
مر من يمنه شخص ضخم واضح مو بعقله لازم بيده تاوه وجاكوج ملابس متقطعه وسرواله طويل يسح ورا وشعره طويل مخربط مشه يباوعلنا وكمل طريقه رجع وكف بنص الطريق ودار علينه خله التاوه والجاكوج ب الكاع وتقدم ب اتجاهنا فاتح ايده بغضب
_:: ربع ربع
صرنا اني والبنات وحده تباوع بوجهه الثانيه فتحت عطاء جنطتها وشالتله خمسه ونطته اشو هذا من شاف الخمسه تخبل يصرخ ويغلط باوعت عمتي واسراء واكفات يباوعلنه مستغربات دك على راسه بقوه وسحب الجنطه من عطاء
عطاء تخبلت من جر الجنطه سحبتها منه بقوه تمنعه ياخذها باوعلها مصدوم لطم على وجهه ودار يركض لجاكوج والتاوه احنا من شفنا اخذ التاوه والجاكوج يركض علينه صار صريخنا وركضنا بفلس
بحيث رشا الحامل شالت بطنها وركضت كدامنا وعاتكه الي ايدها مكسوره وراسها مخيط وتعبانه ركضت اسرع من عدنا حتى عمتي واسراء!! اول الناس ركضن
عطاء شايله الجنطه مالتها وتركض وقس خاله ايدها على رأسها خاف العبايه تطيح من راسها
ركضت وراهن اصرخ وابجي وملاك شايله تك شحاطه بيدها والتك الثاني ب ايدها مادري يمتى لحكت تشيلهن اصلا؟؟؟؟
جان بيت السيد معز كدامنا لان الشارع مفتوح وفارغ محد موجود بس احنا نتراكض وحدتنا عبايتها مفتوحه وراها وهيه دايسه الها ب الركض
شفت التاوه مالته اجت بضهر منه الله اني من شفت التاوه كلت هذا راح يشمر الجاكوج براس وحده
دست الها ب الركض بحيث طلعت البنات كلهن
وصلنه لباب البيت دكت عمتي الباب بقوه والبنات يبجن وهوا بعد ماواصل النه يمكن الشي الوحيد الي نقذنا وزنه وسمنه لان ركضته بطيئه اجانا صوت مهجان تصيح
_مهجان:: منوووو
_جهاد:: ولججج فتحيييي الباب
_مهجان:: منو انتِ
_جهاد:: مهجانننننن فتحي انييي عمتج
_مهجان:: ياهوووو
صرنا نتلاطم ومهجان تجر ب الحجايه جر دفرت عمتي الباب بقوه واني كلبي مادري وين اختفى لان ماله نبض من شفته وصل النا على مسافه فتحت مهجان الباب وعمتي دفعته بقوه دخلنا كلنا وعمتي سدت الباب بسرعه ويا سدتها وبده التدفر على الباب
واحنا نجطلنا كلنا ب الكاع وحده نايمه على الثانيه
كمزنا نصرخ من شفنا الطابوك يمطر علينه من فوك الباب جرتنا عمتي جر للداخل والعلويات مخبوصات مايعرفن شصاير واحنا بس الدموع تصب
طلعن العلويات الكبار متفاجئات بمنضرنا صاحت بينه العلويه لباب مصدومه
_لباب:: ولجن شبيجن!!!!
تريد وحده تحجي ماكو كلنا فحطانات وطايحات ب الكاع حتى عمتي واسرء...
بعد فتره من الهبطه ارتاحينا وشربنا ماي وكدرنا نسحب نفس سولفت عمتي واسراء الموقف
العلويات صارن وحده تباوع بوجه الثانيه حاصرتهن الضحكه
_العلويه لباب:: يا يمه خطيه شصار بيجن وجوهتجن صفر من الهبطه
_العلويه زهراء:: اي والله شلون حض عدجن ماطلع الى ويا جيتجن
باوعت عمتي للعلويات عاكده حواجبها يردن كوا لازمات الضحكه بحيث العلويه لباب من تريد تضحك تلوف للخلف تضحك وترجع تباوعلنا
_اسراء:: يعني اني هسه كلبي مادري وين نسيته وانتو تضحكون
_العلويه لباب:: يايايايايا يمه لا مانضحك شلون نضحك
بعدها ماكملت كلامها وفطست ضحك تريد تلزم روحها ماتكدر والعلويه زهراء خاله الشال وجهه وتضحك واحنا صافنات عليهن ماعدنا رد فعل لان بعدنا مهبوطات كامت عمتي من مكانها ضايجه والعلويات وحده نايمه على الثانيه من الضحك
_العلويه زهراء:: خايبه لاتضحكين خطيه شبيج ياااا لباب
_العلويه لباب:: ماجاي اضحك جاي اكح شبيج
دارن على العلويه شريفه ونهارن من الضحك كلهن دخلت عمتي للغرفه واسراء لحكتها فعلا الموقف ممكن يضحك للبعض بس احنا ابد ماضحكنه على الرعب الي عشناه
باوعت لملاك وصفنت لحد هسه مستغربه من ركضت شايله تك وبرجلها تك
مر الوقت والعلويات كل مايتذكرن يرجعن يضحكن واحنا مره نضحك وياهن ومره نسكت اجو الساده والعلويه لباب استقبلتهم ب الموقف كل ماتريد تسولف تفطس ضحك والساده يضحكون مافاهمين
التمينه كلنا ب الصاله وجادح كعد يرجع ب الكامرات يردون يشوفون الموقف خلت عمتي ايدها على وجهه من بده تصوير الكامره واسراء تصفن ماتريد تباوع لتصوير
جانت الكامره مصوره الشارع كله واحنا كلنا مبينات شافو شلون ركض ورانا واحنا ركضنا
الكامره الثانيه مصوره عمتي واسراء شلون يركضن كدامنا العلويات هنا نهارن من الضحك يردن يسكتن مايكدرن والساده كلهم يضحكون واحنا من شفنا الموقف ب التصوير ضحكنا وياهم
دار جادح على عمتي يضحك
_جادح:: جبيرتهم اول وحده ركضت
باوعتله عمتي صفح ماعاجبها والولد متبنجين من الضحك رجعو التصوير جانت اكو كامره مصوره عمتي وهيه تركض وعباتها وراها ضحك غل بدون صوت غاص بضحكته وعمتي تغزر بيهم طاح ايليا على غل ايدك على فخده
_غل:: عمتي اول وحده فحطت ب الركض
مر الوقت واحنا صرنا من نتذكر الموقف نفطس ضحك رغم الخوف العشناه وشهد شايله بطنها تضحك بوجع باوعتلها العلويه شريفه وضحكت
_العلويه شريفه:: ولج يمه رشا على ركضج اليوم تجيبين كون
ضحكت رشا ولزمت بطنها بوجع
_رشا:: والله جنه هيج علويه
وفعلا اليوم الثاني جابت رشا مولد الخوف والركض مدري احجي وانقهر من الموقف لو افرح لان شهد جابت بسرعه
جنا ملتمات حول العلويه لباب وهيه تسولف النا عن الامام علي وقصص ومواقف احنا سامعيها بس قس ماسامعتهن
نزلت قدس من الدرج عيونها حمر واضح جانت تبجي وكفت كدامنا وصاحت
_قدس:: السيد وين؟
_قس:: شبيج قدس ليش عيونج حمر
_قدس:: كلت السيد وين!!!!!!!
صرخت تصيح تريد السيد واحنا مصدومات ومستغربات من رد فعلها دخلت عمتي واسراء للصاله مستغربات من صياح قدس
_جهاد:: شبيج قدس ماما؟
وكفت قدس كدام عمتي ومسحت دموعها بكل مره تمسح دموعها ترجع تبجي
باوعتلها عمتي مافاهمه بكائها
_قدس:: علويه اني ماريد غضنفر
_جهاد:: شنو ماتردين غضنفر يعني؟
باوعتلنا قدس وباوعت لعمتي مسحت دموعها
سمعنا كلامها واحنا مصدومين من قرارها السريع والصادم للجميع!!
_قدس:: اريد اطلك ماريده اني ماريد غضنفر بعد اريد اطلك منه!!!!!!
شكرا لزيارتكم عالم روايات سكيرهوم
