رواية ناديه الفصل الخامس عشر 15 بقلم انين الليل

سراج 

من خابرت عمتي وسمعت منها انو اخوان مياده او اولاد عمها جايين ومهددين عرفت لازم احچي 

كل شي 

وصلت للبصره قبل المغرب ورحت بوجهي طلبت اشوف سلدار جابو وشفته چان متعب وخايف 

رغم بعدهم ما محاكمينهم 

تركني المدير يمه وطلع بقيت گاعد وهو واگف ومدنك والكلبچات بايده كتله

::ها سلدار شفت الخيانه وين توصل صاحبها 

هو باوعلي وسكت 

رجعت گتله ::تحبها المياده 

هو جاوبني وكأنما يتحداني / اي احبها ومستعد اموت على مودها 

رفعت حواجبي مستغرب ::شلون مستعد ؟

سلدار //استاذ الله يخليك انا الي كتلت عباس وانا الي خليته بجنطة السياره ودچچته بالسچين وخنگته 

بالچفيه

سالته باستهزاء :: ومياده؟ 

- - ما دخلها مياده ما الها دخل 

گتله ::بس سلدار ناديه شافتكم 

- - استاذ الله يخليك ناديه طفله ما تفتهم اتهيأ الها لان ليل وسنطه ومياده حاولت توگفني تمنعني بس 

انا ما قبلت 

::ها يعني مياده ما مشتركه وياك بقتل زوجها 

هو هز راسه - - لا استاذ انا الي قتلته وابحدي 

:: جاي تحچي هيج بس حتى تحمي مياده هلگد تحبها

اتحسر سلدار //استاذ مياده حلم عمري ولا بليله نسيتها حتى من اتزوجت وصار عدي الولد ما 

اهتميت ومن شفتها وره اربع سنوات رجعتلي روحي 

::يعني تريد تفهمني حتى من تركتها وحتى من شهدت عليك بالمحكمه وگالت قنعني انهزم ويا بقيت تحبها 

هو هز راسه //اي استاذ احبها هي شهدت بالمحكمه حتى تحميني لان ابوها هددها يكتلني ويذبحها 

::زين سلدار ابووك مو اتوفى لان انقهر من الي سوته هي وابوها 

استاذ هي ما الها ذنب كل ذنبها حبتني

::يعني تريد اتفهمني انت كنت تقبل تتزوجها اذا تتطلك من عباس 

اي اتزوجها لان احبها 

::بس هي خانت زوجها والي يخون مره يخون الف مره 

اله مياده خانت عباس وياي لان تحبني 

جريت نفس ::وهي هم تحبك رغم شناعة الجريمه الي سويتوها لكن ما انكر انتو الوحيدين من المجرمين

 الي الواحد يحاول يحمي الثاني ويريد يلبس التهمه ابحده يعني اگدر اگول حبكم فريد من نوعه وصلكم الحبل  

المشنقه وكل واحد يريد يبرئ الثاني حتى لو على حساب نفسه

جاوبني //استاذ مياده ما تدري باي شي اتفاجات بيه وانا اتعارك ويه زوجها 

رفعت تك حاجب باستهزاء ::هاا اتفاجات بيك 

- - اي وحاولت تدافع عن زوجها وتمنعني لكن انا قتلته 

هزيت ايدي ::اي وضيعت نفسك وزوجتك وابنك 

سلدار //استاذ انا بالاساس ما ردت اتزوج لكن الخاطر اهلي وگالوا بلكي اگدر انساها انا بالاساس 

ضد فكرة الزواج 

::بس هاي انانيه تترك زوجه وياها ولد وتركض وره نزوه حرام

سلدار //استاذ شعليها زوجتي وابني اصلا احسن الها من طلگتها والولد راح يبقى عدها وتربي احسن مني 

شفته ولا مهتم حاولت اعرف رد فعله ::زين سلدار وابنك الي شايلته مياده 

هو دنك لان عرف بيه انا ادري بموضوع الطفل وبچى بسكته اتقربت علي وگتله 

::سلدار ليش تبچي ندم لو على مياده لو على ابنك

هو سكت ما جاوب انا گتله 

::سلدار التهمه لابستكم وكل الادله ضدكم يعني اعدام لا محاله بس شغله وحده بري ذمتك وبلغ اهلك على 

الطفل الي شايلته مياده يكون ابنك اذا تسكت مو عبالك ناخذه ونربي ونسجله باسم عباس لا لان انا كل شي 

عرفت وما راح اسمح بهذا الشي فيكون بعلمك اذا اهلك او اهلها ما اخذوا للطفل راح ياخذونه يخلونه بدور

 الايتام ولاتنسى حتى لو تنكر اكو شي بالطب اسمه بصمه وراثيه يعني راح نعرف اذا كان ابنك او لا

هو جاوب بانكسار// الطفل ابني وانا اعترف بي وين ما تريد اعترف على گولتك ما بقى شي مضموم 

كله انفضح 

ورثت جكاره وصار گلبي يدك اريد اسأله بس متردد جريت نفس وسألته 

 ::سلدار اريد اسألك وهالمره اعتبره سؤال شخصي ما داخل بالقضيه 

- - اي استاذ اسأل 

::البنات ناديه وحنين 

- - شبيهن 

::بناتك

وهو راسا جاوبني - - - لا والله ما التقيت ويه مياده اله وهنه صايرات 

::يعني تعتقد بنات عباس 

- - شنو يعني ما افتهمت 

::يعني مره تخون رجلها وتدخل صاحبها وبكل صلافه تگول الي ابطني مو من رجلي ما تعتقد البنات مو بنات عباس 

جاوبني وهو متوتر - - لا استاذ مياده خانت عباس وياي لان تحبني ولان ابوها ضلمنا لكن مستحيل مياده تخوني 

::ها وليش الي يخون مره يخون الف مره 

هو بحزن - - لا مياده انظلمت ما خانت 

::شلون انظلمت

- - ابوها جبرها على واحد لا تعرفه ولا تحبه احنا زغار وربينا سوى واحد حب الثاني من ابتعدنا ما نسينا حبنا 

ومن التقينا رجع حبنا زاد ما نقص 

هزيت راسي وانا عاض على شفتي ::اي حبكم وصلكم للاعدام خسرتوا الدنيا والاخره 

جر حسره وما جاوب رنيت الجرس واجو اخذو مشى شويه ودار عليه باوع لي وگال 

- - استاذ ساعد مياده الخاطر بناتها 

اتقربت يمه ::هي ما تريدني اساعدها تريد تنعدم حتى تندفنون سووا 

سلدار // الله يخليك سراج ساعدها احنه غلطنه هي من خانت رجلها وانا من گتلته 

جاوبته بحنق :: لا سلدار انتو اثنينكم كتلتو عباس ويتمتو بناته الاعدام قليل بحقكم

رجعوا سلدار للحجز وانا اتصلت بخالي وبعدين طلعت رحت البيت عمتي اقصد بيت 

عباس شفت عمتي باقيه هي وسلوى وزهراء وجميله وبنات عباس 

سلمت عليهم وانا اشوف الخوف والارتباك بعيون عمتي منيره وجميله سالتهن 

گالن بسبب الناس الي هدو

انا گلت السلوى :&استكان چاي راسي راح ينفجر 

هي ما عقبت وراحت سوتلي چاي اتصلت بهادي گتله ::تعال منتظرك 

جابتلي سلوى الچاي واجه هادي سلم وكعد حاجاني // سمعت شنو سوو هذوله الساقطين

جاوبته ::اي عمتي گلتلي 

— - وهسه سراج شتشوف انسوي 

جاوبت بدون اهميه ::ماعليك يعيطون ويسكتون 

- - شلون 

::شنو اشلون عدنا ولد مكتول وكل الادله تكول بتهم وعشيگها الي كاتلي بعد شنو يردون اكثر من هيج 

- - بس يا سراج ..

قطع كلام هادي التلفون الي رد علي هادي وگله 

- - - هلا شيخنا اهلا وسهلا 

ها خيير اي انا ابيت المرحوم 

هله بيك تشرف

هادي سد الخط باوع وگال //ادخلن بالغرفه الشيخ ابو عيسى جاي

منيره //خير يمه 

- — نتاني ونشوف مو انا من هدو امس اتصلت بي (هادي باوع السراج وگله )

- - - وداعتك سراج لو ما عماتك چان كتلناهم خلاص انا وكرم وقيس ابن عمتي بس ذني صارن گدامنا وما

 خلنه نطلع

جاوبته ::والله زين يسوون 

هادي //اه انت هيج تحچي شنوخايفين منهم 

انا بابتسامه باهته گتله ::شتتصور هادي انا اخاف منهم 

هادي //لا والله سراج المشكله والكل انگلب علينه منذر يگلي هادي احسن الكم تتنازلون عن الدعوه وتگولون 

هاي طفله چانت حلمانه مصخنه وهيج اتهيأ الها لا تصير مو زينه

منيره =شوف الچلاب فوك شينه گواة عينه 

جميله //شنو منيره ما سمعتي عمهم يگول شوف ابنج وين چان عد يا گح...وتردون تطلعونه شريف 

ذبيتوها براس بتنا 

عمتي منيره بچت وگالت =عمت عيني يمه عباس يسبونك وانت دمك بعده ما ناشف 

اتقربت منها وبست راسها وگتلها ::وداعتج عمه اله اخليهم يندمون على كل كلمه كالوها

اجه الشيخ ابو عيسى واجه كرم سلم وگعد وگال 

- - عمي هادي وانت عمي كرم هذوله الناس طالبينكم للحك انتم وابن خالكم يگولون تاهمين بتهم 

هادي //وانت شيخنا شتگول 

الشيخ //انا اگول نگعد للحك 

كرم //هذا شلون حچي ابو عيسى ابنه مكتول وتريدنه نگعد للحك 

الشيخ //اي عمي لان مندعين انتم اقصد امه واخو يكرهونها ولفقو التهمه بعد ما لقنتو الطفله شتريد تگول 

هادي //ابو عيسى انت مو موجود من ندور على عباس شلون لقناها ويمته 

- - همه يكولون بيبيتها وابن خالكم

سراج ::وسالتهم شنو الدافع الي يخلينه نلقن الطفله 

يگولون ام عباس تكرهها وانت شكم مره ...

وسكت الشيخ گتله ::كمل خلي نسمع 

الشيخ //يگولون شكم مره بمره انت متحرش ابتهم وشاكيه لاخوانها ورايدين يكتلونك لكن هي 

ما قابله الخاطر رجلها 

سراج ::انعم الله عليها طلعت مياده مسويه فضل عليه وانا ما ادري 

الشيخ //هذا الكلام لذلك انا اشوف نگعد وياهم للحك 

رن التلفون هادي راد يجاوب انا اخذته منه ورديت 

::الو 

الو منو 

::انت رايد من

اجاني صوت رجال //اريد هادي سراج اي احد 

::انا سراج اتفضل 

حاچاني بنتر //اسمع ولك مو عبالك منصب يخوفنا واخونه ينعدم ونسكت صدكني حقك طلقه 

انا عرفته اخو سلدار ::ههههه وانا متانيها الهاي الطلقه تندلني لو ادليك 

- - زين نتواجه 

::وداعتك ادفعك ثمن كلامك هذا وادفعكم ايا غالي ومو بمنصبي لا بالحق اله اندمك

سراج سد التلفون ابو عيسى وهادي وكرم سالو// شكو منو حاچاك 

سراج حك شعره وباوع الابو عيسى وكله 

::ابو عيسى عندك رقم تلفون شيخ اهل مياده وشيخ عشيرة سلدار 

ابو عيسى بتعجب// اي عندي ليش 

::گاومهم گلهم الكم خمس تيام تجون تحولون علينه 

ابو عيسى //شنو عمي سراج مو گلنه نگعد للحك شنو بعد انودي گوامه

::ابو عيسى الحك عندي انت بس دز الهم خبر والباقي يمي 

الشيخ //اي غير تفهمنا الناس يگولون ما نمشي على كلام طفله جاهله واصلا يتهمونك انت ورا كلامها 

باوعتله ::مي خالف بس الي اريده منك لا باچر ولاعگبه (اشرت عليهم ) انتم الگاعدين ما ترحون الاي مكان 

هادي //اي غير نفتهم يا سراج 

::كل شي راح تفتهمون وابو عيسى مثل ما گتلك انت گاومهم

راح ابو عيسى والويا وطلعت عمتي وسالتنه شنو صاير 

هادي سولف الها عمتي سالتني= منو خابرك 

::اخو للسكط 

كرم //اي سراج من طريقة كلامك مبين علي يهدد

جاوبته باستهزاء ::عادي ما هزو شعره براسي 

عمتي= يمه سراج خايفه عليك 

::لاتخافين عمه وداعتج يومين واخليهم يجون يكولون دخيلكم 

كرم// شنو تسجنهم

باوعتله وگلت ::اكدر كل شي اسوي بس مو اخلاقي 

عمتي بقلة صبر =هسه حاجوني بالبنات وهذا البيت 

::عمه هسه اي شي ما نسوي ولا انبت بشي هنه يومين وكل شي يبين 

هادي //كون اعرف بهاي اليومين شنو راح يصير 

جميله //ها هادي هم گول سراج ما سووا شي 

لا خاله شنو انا گايل

عمه منيره ==والله الصدك الفضل ال الله وابو الفضل عليه السلام والسراج ابن اخوي ما قصرت يمه ولو 

شنسوي ما اوفيك 

::لا تحچين هيج عمه عباس اخوي وحقه عليه 

عمتي غورگن عيونها لكن زهراء گالتلها //گومي خاله اتوضي وصلي ركعتين من الهبطه الهسه بعدج بدون فطور

گومي خلي نصب كلنه بعدنا ما متفطرين

وراحت عمتي اتوضت وخلو الفطور وكعدنا كلنه اكلنه ومن كملنه هادي گال 

حضرو چاي ونومي خاف يجون علينه جماعه

زهراء //صار بس انتم روحو. اكعدو بالغرفه خلي ارتب الصاله 

واجت افراح هي وجهالها واجه زوج سلوى ما اتاخر اخذها وراح اجو علينه الجوارين وجماعه من اقارب ابو عباس 

والكل يگول عباس ما يستاهل واحنا حاضرين الكل شي 

بتنا كلنه بالبيت حتى هادي وكرم وكعدو للسحور انا بقيت نايم لان تعبان من السفر والفره

ثاني يوم بقيت بالبيت ما طلعت خلصتها نوم ما گعدت اله الظهر لگيت كرم رايح وهادي وافراح هم رايحين 

انا اخذت ناديه هي وحنين واشتريت الهن من المحل الي يم بيتهم ورجعتهن 

وشكد حاولت عمتي منيره وجميله يعرفون لكن انا ما جاوبتهن باي شي 

واتفطرو وانا وياهم وبالليل اجه هادي وهم اجو الجوارين علينه وبقينا انا وهادي وكرم سهرانيين وكل شويه نروح 

يم عمتي منيره لان ما بطلت بچي حسب كلام زهراء

ثاني يوم سوتلي زهراء ريوك وصبحت عمتي تبچي انا گلت الزهراء جيبي البنات اذا گاعدات خلي يتريگن لكن

 هي گلتلي نايمات جاي اكل بيض مقلي وخبز اكلت لگمتين ورن التلفون شلته ورديت

::الو 

اهلا صباح الخير 

اي اني 

ياالله هسه جايين

سديت التلفون خابرت هادي كتله خابر ابو عيسى وانا راح اخابر كرم خابرت كرم ورحت للمغسله غسلت حلگي

ورحت العمتي ::صباح الخير 

چانت متمدده گعدت وگالت =صباح النور 

شفتها تبچي گتلها 

::عمه (واخذت شهيق وزفير )راح اخذج المكان تسمعين وتشوفين بس مثل ما ضميتي قهرتج ودستي على نفسج 

وسكتي بيوم الي اجت مياده كشف دلاله وسمعتي اعترافها بكتل ابنج اريدج تلزمين نفسج بالشي الي راح تسمعينه 

واي تصرف منج يخرب علينه وعليج وعلى ذني اليتيمات بالذات ذني اليتيمات راح يضيعن اذا ما تلزمين اعصابج

هي باستغراب =غير تفهمني شكو 

::هسه كومي البسي عباتج وكل شي راح تفتهمين انا طالع قبلج بالسياره ومثل ما گتلج الي اسوي كله الخاطرج 

والخاطر بنات عباس 

عمتي //اذا بي مصلحه البنات عباس اسكت ولا افك حلگي

عمتي خمس دقايق واجت ركبت بالسياره وره لان فهمتها راح امر على هادي 

مريت على هادي وانتظرنه كرم الي اجه ويا ابو عيسى ورجال ثاني سالني ابو عيسى 

- - - عمي وين رايحين 

:: حجي هسه نوصل وكل شي راح تفتهمون

وصلنه الدائرة ال ...بذاك الوكت مو اي احد يدخلها گعدنا وانا رحت اشويه واجيت وجهت كلامي للكل 

::احنه هسه راح ندخل الهاي القاعه (واشرت بايدي )اي شي تشوفونه او تسمعونه ما تعقبون ولا بكلمه

 هذا الي سويته ما تعرفون شگد تعبت بي واي تصرف ارعن لو حركه يضيع كل شي ومو بصالحنا 

وراح نطلع احنه ملقنيين ناديه ومياده وصاحبها ابرياء احنه جايين لهنا نسمع وبس

هادي //غير اتفهمنا سراج 

جاوبته بلهجه حاده ::هادي انت وعمتي بالذات تسمعون وتسكتون نرجع للبيت ونتفاهم

ودخلنه لگينه اخوان مياده حليم وعدي وياهم رجال معگل او واحد ثاني بعدين عرفته ابن عمها الي اجه وهد 

ويه اخوانها من شافونه صارو يخزرون بينه بنظرات كلها توعد 

وشفنا اخوان سلدار وياهم اثنين رياجيل اكبار والكل من عدنا واحد يباوع للثاني نظرة حقد او كراهيه 

واثنين گاعدين واحد مدني والثاني عسكري وراهم حرس اثنين ويمهم واحد گاعد وره ميز ويمه سجل يكتب بي

گعدنا واحنه ساكتين بعدين المدني رن جرس يمه وانفتح الباب جابوا سلدار ومياده 

دخلوا وياهم شرطه وبذيج اللحظه صراحه انقهرت على اخوان مياده الي مبين عليهم التعب والحزن وحتى الخجل 

الرجل المدني باوع المياده وفتح سجل وگلها 

انتي مياده ....

هي هزت راسها وجاوبت //نعم 

وباوع السلدار وگله 

انت سلدار .....

- - نعم 

مياده انتي متهمه بقتل زوجج وانتي اعترفتي صراحه 

...اي نعم 

سلدار انت متهم بقتل المدعو عباس بمشاركة المتهمه مياده مو صحيح 

...نعم استاذ بس مياده ما الها دخل انا الي قتلته 

- - هذا الشي مو بصلاحيتي بالمحكمه گوله 

(اتحمحم وگال ) // احنا اليوم جبناكم مو انحاكمكم لكن استجد امر واهل المجني علي يردون يتاكدون منه

 (باوع المياده وگلها )

- - انتي حامل 

هي اتحسرت //نعم 

- - حامل باي شهر 

السابع 

- - مياده الي ابطنج منو ابو انتبهي انتي اعترفتي وسجلنه اعترافج واحنه ما النه اي شي وياج لكن انتي اعترفتي 

فاي شي تگولينه يمكن يفيد ناس همه ما الهم ذنب بلي سويتي هسه راح اسالج وبدون ضغط ولا تخافين من اي احد 

الي ابطنج منو ابو الحقيقي 

هي مدنكه وجاوبت بصوت ناصي //استاذ ابو سلدار

- - - لا لا علي صوتج اريد الكل يسمعج الي ابطنج منو ابو 

هي حچت رغم مبين عليها مختنگه //سلدار 

- - هاا سلدار ابو 

اي استاذ انا ويا علاقه ودائما يجي للبيت او صار وحملت منه 

- - شلون عرفتي هو ابن سلدار مو انتي متزوجه يعني اكيد نفس العلاقه الي بينج وبين زوجج هم بينچ وبين سلدار 

فشلون تحچيين وانتي متاگده الطفل ابن سلدار وضحيها الي

جرت نفس // استاذ انا احب سلدار وقررت اسوي طفل منه وفهمت زوجي الطبيبه انطتني علاج ومنعتني يتقرب مني فتره

من حللت وعرفت بنفسي حامل خليت زوجي يتقرب مني 

- - يعني من عرفتي بنفسج حامل ياالله خليتي يتقرب 

هزت راسها // اي 

...زين يعني انتي تعترفين هو مو ابن عباس 

لا استاذ مووابنه 

- - - وسلدار عنده علم

مياده //اي استاذ يعرف وحتى قررت من يصير الطفل اطلب الطلاك واخذه وبعدين اعترف الزوجي بان 

هذا الولد مو ابنه لكن الي صار عباس اكتشف خيانتي 

- - وانتي قتلتي 

هزت راسها 

- - - والله انتي الشيطان ما يفكر تفكيرج 

باوع السلدار وحجى بنتر //وانت تايد كلامها 

سلدار ساكت 

- - جاوب ليش ساكت للعلم بس يصير الطفل راح نسويله تحليل اثبات نسب

سلدار جاوب //استاذ الطفل اعترف هو ابني 

- - - يعني تعترف انك مارست الرذيله ويه المتهمه ونتج عن رذيلتكم طفل لازال ما جاي للحياة زين هذا المظلوم 

الي هو نتيجة شهوتكم وحقارتكم شنو ذنبه 

سلدار بحزن // استاذ گدامكم انا معترف هذا الطفل هو ابني بالحلال بالحرام هو ابني والزم اهلي بان ياخذونه ويربونه

انا اشرت للقاضي دز الحرس الي ورا انطيته ورقه للشرطي القاضي قرا الورقه وسأل مياده 

- - - مياده انتي بكل الاحوال متهمه وما نعرف شنو راح يكون حكمج لان انا ما معني بالحكم عليج 

لكن مثل ما اقريتي بان هذا الطفل مو ابن عباس اريد اسألج وتجاوبيني ومثل ما گتلج اكو بصمه وراثيه

 تثبت هذا الشي لكن للتاكيد اريد اسالج وياريت تجاوبين الصدگ ناديه وحنين منو ابوهن

هي جرت نفس وگالت //ابوهن عباس استاذ عباس ومستعده احلف انا چنت احب سلدار من انا زغيره واخوتي 

وامي يعرفون بهل الشي وهم اهله يعرفون هوجيرانه وخطبني وابوي ما وافق ينطيني وشلنه الغير محافظه 

واتزوجت عباس وصارت عندي ناديه وحنين والتقيت سلدار بعد ان صار عمر حنين سنتين والله سيدي البنات 

بنات عباس 

القاضي باوعلها من وره نظارته وسالها //بعد عدج شي تردين تگولينه 

هزت راسها //لا استاذ 

- - وانت 

سلدار عض على شفته //ما عندي شي

رن الجرس واجو.اخذو مياده وسلدار 

انا ما ردت يصير كلام راسا لزمت عمتي الي چانت تبچي وباوعت الهادي وطلعنا ورانا طلع كرم والشيخ واخو 

ركبنا سياراتنا ورجعنا طول الطريق واحنا ساكتين وصلنا البيت عباس ودخلنه لگينا زهراء ومرت كرم ومرت 

هادي وعمتي جميله دخلنه للصاله وعمتي ما صبرت صارت تصرخ وتگول

=يمه عباس ليش هذا كله يصير بيك يمه ليش شمسوي بعمرك وهيج صار بيك 

انا حضنتها وگتلها ::عمه استهدي باالله 

هي باوعتلي وگالت =انت تدري مو 

الشيخ گال //من گلت لاترحون الاي مكان هاليومين شنو قصدك

جريت نفس وگتلهم على مقابلتي المياده وسلدار ومن سمعت باهلها جايين وهادين انا كلمت مديري بالدائره وخالي 

اتوسطلي وجابوهم حتى ما يصير قال وقلت وحتى باچر ما يضيعن البنات الي ردت اعرفه انو البنات بنات عباس

هادي //منو يگول هي ساقطه كل شي تسوي منو يكول بنات عباس 

::لا بناته تره الي يعرف بنفسه هو ميت سواء بالاعدام اوحتى لو طلعت اخوانها ما يخلونها اعترفت بالحقيقه 

ليش گالت على الولد مو ابن عباس چان سكتت ومن يصير ينكتب باسم عباس ومحد يدري 

عمتي منيره= البنات بنات عباس من صلبه هنه يشبهن امي وعيونهن عيوني بنات عباس

هادي // يمه فكينه مياده كل شي تسوي 

انا حچيت ::هادي لا تحچي هالشكل مياده لو تريد چان اعترفت وگالت مو بنات عباس تره وكلامك 

بي انتقاص من رجولة اخوك 

هادي //انا مو قصدي سراج بس الصار يشيب الطفل 

ابوعيسى //والله ياابني يا سراج لو ما الله وانت چان كل شي ما صار ولا انعرف الكتال 

عمتي منيره =وچان مياده بقت تمثل علينه الحزن ولازمه عده ومنتظره تخلص حتى تروح الاهلها ومناك 

تتزوج سلدار (لزمتني من چتفي )انت ياعمه بين بيك الربه صدك من چان يگول عنك انت حزام ظهري

ابو عيسى گال الكرم //جيبلي التلفون 

واتصل وخابر شيوخهم وانطاهم عطوه خمس تيام يحولون ويفصلون 

وبعدها راح الشيخ وكرم گال المرته واخته ياالله نروح اهنا عمتي منيره گالت 

= ما طول سراج موجود شلون راح تتصرفون 

هادي //خير يمه مو سمعتي ابو عيسى گال خمس تيام ويگعدون للفصل 

=لا يمه مو هذا قصدي 

- - چا شنو

=يمه البنات وين يرحن 

هادي// بكيفج شتشوفين انتي فصلي واحنه نلبس 

افراح //هي محلوله عمتي والبنات يبقن اهنا ابيت ابوهن وعمتي تاجر بيتها 

عمتي باوعت الها وجاوبتها /لا ليش يبقن ابيت ابوهن 

افراح اتاشر بايدها //يا عمه منو ياجر بيت صايره بي جريمة قتل اصلا يخوف 

=وترديني ابقى وياهن بالبيت وهو يخوف 

افراح //يا عمه چا انتي تخافين هذا بيت ابنج

عمتي بقلة صبر =افراح اسكتي مو انا الاخاف بس حنين طفله ما تدري شنو صاير وهاي كل شويه وسالت 

زهراء وين ماما 

زهراء بحسره //اي والله 

=لو ناديه الشافت الجريمه ويتراوالها 

هادي// يمه بكيفج انتي شتگولين 

=انا قررت وخلص البنات يجن يمي ابيتي وهنه شايلات حمولهن راتب ابوهن والمحل واجر هذا البيت وفلوس 

الفصل اضمهن الهن بالمصرف من يكبرن

جميله// والله ام عباس خوش راي ما طولج عدله ديري بالج ع البنات وبجال ابوهن ما خلاهن محتاجات 

احد بحياته او وره ما مات

منيره جرت حسره شكبرها = الله كريم الله كريم يمه زهراء بلا زحمه عليج لمي ملابس البنات باجر اخذهن

واروح للبيت 

افراح //شنو عمه تاخذين بس الملابس 

منيره =اي ما اخذ اي شي على ما تخلص القضيه بذاك الوكت كل شي بالبيت للبنات

خلو الفطور وكلنه گعدنا واتفطرنا واجت نوال هي وسلوى وارجالهن ومن سمعن بلي صار بقن يبچن ونوال تگول 

حسبي الله على كل وحده ظلمت اخوي وما خلته يتهنى من هو زغير الى ان كبر 

افراح //شقصدج نوال 

نوال وهي تاشر بايدها //شقصدي قصدي هاي خالتي الي هسه تبچي لو زهراء الي 

(وسكتت نوال )گالت ما اگدر احچي

زهراء ردت عليها //لا احچي نوال وانتي ما قصرتي تره عباس ابن عمي وابن خالتي (وبچت زهراء) 

نوال گالت //صار عزيز وهسه تبچين ليش ما اخذتي وخليتي مكسور خاطره انتي وامج 

جميله گالت //شتحچين صدك خاله انا ما خليت بتي تاخذه چنت رعنه بس الما تدرين بي عباس لا زعل 

وولا ضاج مني ومن اتطلگت زهراء واجه طليگها وما قبل يدفع المؤخر وصار يتهدد بالكلام بالمحكمه 

الماتدرن بي لزمله باب المحكمه وسحا وگله تدفع المؤخر وانت انعم من الدخن 

وچان يسأل عليه ما عافني ولا عاف ابني

جميله دمعت عيونها //عباس الشغله البي بسرعه تطلع حوبته حچيت على اختي من هي حامل بي وطلگني ابراهيم 

وما نطيته زهراء وسنه واتطلگت ومن مات صارت الناس تتقول تلث تيام طلع كتاله

وصارت جميله تبچي منيره گالت 

=نوال انچبي واسكتي لو ما زهراء حچت شلون ملاگيها عباس چان الهسه محد يدري ياهو الكتله

نوال تهز بايدها //والله ما ندري يمه ياهو صاحب الفضل بكشف الجريمه مره تكولين سراج مره ناديه هسه زهراء 

منيره =اي تلاثتهم لو ما همه چان مياده تصول وتجول (رفعت ايدها عمتي) وانتي شبعدلج كافي الزمي السانج 

واتعلمي شلون تحچين من تجين جايه جايبه حقدج ما ادري شتردين

اندك الباب وراح كرم يفتحه وكله //اتفضل 

ابو ناصف صديق عباس دخل وسلم ودزينه ماي وچاي وگال الهادي 

ابو ياسر المرحوم اشترى مني المحل وبقيت اطلبه 750 بحضور استاذ سراج وعصام وثامر 

ما الكم نفس بي افلوسه حاضرات واذا تردونه كملولي الفلوس 

هادي // حجي انطينا مهله شكم يووم وان شاء الله نكملك الفلوس وتدلل 

 هز راسه الرجال // هذا هو مثل ما تريدون انتم هم الله يساعدكم بس انا گلت ابلغكم الحق حق والمحل چبير وما يتفوت 

هادي // رحم الله والديك حجي

بقيت بتت ابيت عمتي والفجر بالسحور غبشت البغداد لان كملت اجازتي عمتي الي گعدت الفجر تبچي وتعاتب 

بعباس شافتني گلتلي =سراج لا تتعطل عليه تره من اشوفك اشوف عباس 

::لا عمه ما اتعطل احاول احصل اجازه 

=اهم شي تجي كبل الفصل 

::ان شالله عمه تدرين بالدائره من الصعوبه احصل اجازه لو ما خالي واخو زوجته الرجال ساعدني الله ينطي

 حتى هو الي دز مفرزه على اهل سلدار وجابهم

=عرفت كل الصار انت سويته وعرفت ليش عباس يگلك انت اخوي وحزام ظهري وليش يگلك بناتي امانه عندك 

ثاري يدري بروحه 

سالتها:: عمه اليوم ترحين البيتج 

هي بعبره =اي عمه بعد شنو ظلتي اهنا اخذ البنات واروح وهذا البيت اقفله وبس تنسد القضيه ااجره 

::اي عمه اخذتي ملابس البنات

=اي اخذتهن زهراء لمتهن ومن صعدت للغرفه صعدت وياها ناديه زهراء تگلي غافلتني عبالها ما اشوفها كل 

شي ما طلعت بس البوم الصور الي بيهن صور ابوها وامها

::خليها عمه طفله فقدت الاب والام بيوم واحد بعد انا ما اوصيج على بنات عباس 

=توصيني على روحي (وصارت تبچي )

::منيره الخاطري كافي لا تبچيين اطلبيله الرحمه 

=الله يرحمه ويرضى علي 

صليت الفجر وركبت السياره ورحت البغداد وصلت الظهر البيتنا وشفت ابويه وامي الي گلتلي 

- - ابوك كلش مقهور على عباس وبس يبچي على منيره حتى ما يطلع للمحل

وكعدت يم ابوي وسولفتله على مياده والطفل الي ابطنها والي سويته حتى اثبت نسب ناديه وحنين ابوي صار 

يبجي ويگلي //عفيه بيك ابني انت بطيبتك مثل منيره 

::حجي انا ابنك تربايتك 

الله يرضى عليك

ثاني يوم داومت بالدائره وبقيت على اتصال ويه هادي وابو عيسى وعرفت اهل سلدار طالبين تمديد العطوه البعد 

العيد لكن الشيخ گايللهم احنا ما نعيد لان حزينيين 

چانت الگعده مالت الفصل قبل يوم العيد رجعت للبصره بعد ان حصلت اجازه يومين وصلت البيت عمتي بالليل 

ولگيتها هي والبنات وعمتي جميله وزهراء

من وصلت سالت على ناديه وحنين واجن انا طلعت الهن حلويات جايبهن وياي وبعدين كعدتهن يمي بعد ان زهراء

 صبتلي عشا واكلت ومن غسلت جابتلي چاي انا رحت للسياره ونزلت علاليك وطلعت ملابس عيد الناديه وحنين 

اشتريت الكل وحده بدله وياها كولونها وحذائها وبنطلون كابوي وبلوز وشكالات الشعرهن شفت الفرحه بعيونهن 

رغم هنه ملابسهن كلهن موديلات ومرتبات وذوق 

من شفت فرحة ناديه وحنين دمعت عيوني واتذكرت عباس وشگد چان يحبهن

عمتي جميله گالت والعبره خانگتها// الله يكثر خيرك الفرح صبي زار النبي وانت فرحت يتيمات اثنين منيره ما قبلت

زهراء تشتريلهن ملابس 

منيره صارت تبچي وتگول 

ما اريد العيد يمه يجيني 

وانت بعيد عني يانظر عيني 

وصارت تنعى هي وجميله وتبچي بعبره راحت الها ناديه وهي تگلها 

...بيبي لاتبچيين عفيه انا اخابر بابا ويجي ويجيبلج بدله حلوه

///////||||////////

الفصل السادس عشر من هنا 

شكرا لزيارتكم عالم روايات سكيرهوم