رواية ناديه الفصل السادس عشر 16 بقلم انين الليل

سراج 

كلنه بچينه واحنه نشوف ناديه شلون تقنع بعمتي حتى ما تبچي وبفطرة الاطفال تگلها لاتبچين انا اخلي بابا 

يحيبلج بدله من يجي من الجنه 

بهاي الاثناء اجه هادي وگال 

ابو عيسى خابرني والناس رايدين يجون وره العيد وانا ما قبلت بس ابو عيسى فهمني لازم يجيبون ناس وشيوخ

 واهل سلدار دزو فلوس (فرشه )بيد السيد وابو عيسى انطى الاهل سلدار يومين وره العيد يعني الخميس 

واهل مياده على يوم الاثنين 

هادي گلي // خلي خالي منير وجميل يجون

انا قررت ارجع البغداد لكن من شفت ناديه وحنين وعمتي شلون تبچي ولازمتهن خابرت خالي الي گلي 

بالاساس صدرت امر بنقلك للبصره ولو هذا الشي زعل امك مني لكن انا شفتها احسن الك 

حتى تكون قريب من عمتك لان ابوك فهمني هي محتاجه وجودك 

اتشكرت خالي وگلت العمتي الي شفت الفرحه بعيونها رغم حزنها

عشيرة سلدار ومياده يحاولون يماطلون لان بذاك الوكت الدوله بدت تنطي تنازلات حتى تضمن وقوف 

الناس وياها بسبب التهديدات الامريكيه والحصار

ثالث يووم العيد اجه ابوي وعمي جميل وياهم موفق اخوي ويوسف ابن عمي جميل وصرنا نروح انا وهادي 

الابو عيسى الي دز على العشيره وكلهم الكل يجي وبيوم الفصل هادي بنى چادر لان اصر الفصل يصير

 ابيته وجاب طباخ وذبح ذبايح وسووا غدا واجو اهل سلدار وجايبين وياهم شيوخ وساده وناس وگالوا ابنه 

مذنب وحاضرين الاي فصل تردونه

وصار كلام مستعدين شگد ما يردون فصل ينطون ويتمنون عمتي وهادي يتنازلون عن سلدار 

اقلها مو يطلع بس ياخذ حكم مخفف الي اشوفه لو بايد هادي يمكن كان وافق يتنازل لكن هو خاف من امه 

ومن كرم ومن ابوي الي گللهم 

- - هوالي مربي عباس وهو مسؤول عنه ولا يمكن نتنازل عن سلدار لو مياده واذا المحكمه طلعتهم براءه فدمهم 

مهدور ومن حقنا نكتله وين ما نلگا

صار الفصل بذاك الوكت خمس ملايين واخو سلدار طلب يشوف عمتي 

ومن اجه وشافها اتوسل بيها وگلها//حجيه ابنج راح ولا يمكن يرجع واخوي مذنب اتنازلي عنه وننطيكم اضعاف 

الفصل اربع مرات والله حجيه امي راح تموت 

لكن عمتي ما وافقت وكالتله =اخذ فصلكم والي تردو ورجعولي ابني

اخو بقى يبچي وهو يتحسب على مياده الي كانت السبب بالصار العباس وحتى السلدار كله من جوه راسها  

والانكى من هذا انو عشيرة سلدار لازم تحول عد اهل مياده ويفصلوهم يعني فوك الي مسويته لازم يفصلون عشيرتها 

بااعتبار سلدار اتجاوز على عرضهم وما حمى حق الجوره

بعدها باربع تيام اجو عشيرة مياده وفصلو وهمه ساكتين اخوانها ما اجو بس عمها الي اجه وياهم من جابوهم 

مخفورين اهل مياده ما طلبو ان يتخفف الحكم لكن عمها گال اذا تتنازلون عنها انا اضمن الكم گدام هاي الناس 

اني اكتلها بايدي 

وكان جواب ابوي وعمتي وكرم لا ما نتنازل لكن اذا طلعتها الحكومه فدمها مهدور وفصلكم يرجع لان راح

 ناخذ ثارنا منها

من راحو صار الاتفاق يجيبون الفصل للشيخ وكعدنا ابيت عمتي انا وابوي وهادي وسراج وعمي جميل وابنه يوسف 

واجت عمتي يمنا ابوي سأل عمتي //منيره شراح تسوين بالفصل 

عمتي بچت وگالت ==ابو سراج ويني او وين الفصل انا ابني راح كل فلوس الدنيا مو بعيني 

ابوي //حقج خويه بس لا تنسيين عباس مو ابحده عافله بنات اثنيين 

هادي // شنو هاي خالي البنات انا مسؤول عنهن شنو قابل اتاني الفصل 

جميل // كلامك صحيح خالي بس ما طول امك موجوده هي المسؤوله عنهن

عمتي جاوبت ==الله يخلي ابو ياسر شعندي غيره 

هادي صار يبچي 

عمتي گالت //بفلوس الفصل نكمل بيت عباس وناجره 

هادي فز//لا يمه شنو نكمل بيته ورانا مصاريف محامي ودعاوي او واسطات 

جاوبته ::واسطات شنو هادي نسيت اني كل شي سويت يعني ما يحتاج لا محامي ولا واسطه 

هادي //صحيح سراج بس انت تعرف منا الي اهنا اذا ما تنطي فلوس ما يمشولك شي

:: اي هادي هذا الكلام اذا چانو اهل الكاتل مسيطرين بالدوله بس انا كل شي سويت يعني الي اقصده بكلامي 

مو محامي يجي ويگلك محامي سلدار لگى ثغره لو اهل مياده عدهم واسطه بالدوله تره كله چذب 

منيره. = اي والله عمه انت ما قصرت اصلا لو ما انت چان الهسه مانعرف كتال ابني وبت ابليس تصول وتجول 

سراج :: اگلك هادي لاتنسى محل عباس كمل الفلوس البقن حتى الرجال يتنازل تره حرامات المحل چبير 

ويشتغل وراح يعيش البنات احسن عيشه 

==اي يمه مثل ما گال سراج والبقى بكيفك خليهن بالبنك باسمهن

هادي //ان شالله بس والله لو مخلينه متنازلين عن سلدار وفاصلينه چان اخذنه منهم فلوس بيتين 

منيره بعصبيه ==صدك هادي تبيع دم اخوك بفلوس 

جاوبته ::انت شتحچي مو عيب ما فكرت بكلامك 

كرم بنتر // تحچي صدك هادي غير بس اشوف سلدار اكتله موت 

هادي فلت وجهه //يابه اتشاقى گبيتوعليه ردت اشوفكم شتكولون

الكل سكت لان عرفنا بهادي ما يتشاقى لكن خاف يحچي 

من راح هادي وكرم وبقينا انا وابوي وعمي جميل وموفق ويوسف عمتي گالت 

= عمه سراج اشلون استعجل بالمحاكمه 

منير //اجراءات منيره شبيج 

عمتي =والله كلام هادي ما طمني هادي تبدل من وره راس افراح من گد ما تحچي وطمعها مثل ابوها

وامها واكثر 

جاوبتها ::عمه ما عليج انا مضبط كل شي

جميل // بس انتي منيره لازم تنتبهين الخاطر البنات 

= شلون يعني ؟

= يعني انتي تگولين هادي مفرور راسه وخايفه ع البنات فاانتي لازم تديرين بالچ على صحتج 

عمتي =. الله الي يعين ابو يوسف 

رن التلفون وراح موفق رد ورجع گلها //عمه مره تريدج 

ردت عمتي

=الو 

هلا منو 

=شرايده مو كافي السويتو بعد شنو عندج شتردين 

= انا مو اختج لو اختج چان كفيتي بتج من صاحبها مو تدرين بيها ياخذها ويجيبها وهي مسويه مصيبه ويا 

ما ادري تدرين لا هسه شتردين 

= شوفي ام حليم انا ام وشفت مصيبة البزر من يروح بتج كتلت ابني وخانته وطلع الامر من ايدي يعني حتى 

لو اتنازلت راح تخلونها

= ها يكتلونها اخوانها خوش انا ما اتنازل وبدل ما يكتلونها اخوانها تكتلها الحكومه

سدت عمتي التلفون وصارت تلهث وتگول 

=ام حليم تتوسل بس اتنازلي عنها وشتردون ننطيكم 

انا رديت ::اي مبينه نتنازل وتطلع واهل سلدار يگاومونه ولازم نتنازل 

عمتي ==والله اذا طلعوا بايدي اكتلهم 

وبقت تبچي اجيت يمها وبست راسها وگتلها 

::عمه وداعتج وداعتج ما يطلعون اخذيها مني وبعد اي احد يخابرج منهم لاتردين راسا سدي التلفون

ثاني يوم راح ابوي وموفق وعمي جميل وابنه يوسف 

بقيت يم عمتي اروح للدوام وارجع بالليل وساعات ابقى ابات بالدائره عشر تيام من اجيت ولگيت زهراء 

وعمتي جميله 

گالت زهراء اليوم جابولي استدعاء للمحكمه 

عمتي گالت ==حتى انا 

هزيت راسي لان عندي علم واجه هادي ساألني // سراج شنو مستدعيين امي وزهراء شكو 

جاوبته :: باجر المحاكمه واحنا شهود بالقضيه 

عمتي گالت =يمه سراج ليش ضايج

ما جاوبتها رحت الناديه الي چانت بالغرفه تباوع ع التلفزيون هي وحنين گعدت يمها هي شافتني ابتسمت گتلها 

::ندووش تدرين باچر وين راح نروح 

باوعتلي ...وين 

::راح نروح كلنه انا وياج وبيبي وحنين وعمه زهراء وعمو هادي 

سالتني ...وين عمو ؟

:: تدرين من نروح المكان بي ناس هواااي وكلها تگول (واشر عليها )عليج هاي البطله هاي البنيه الحلوه شگد 

بطله وشجاعه تردين هيج يكولون 

...يعني عمو شجاعه مثلك ما اخاف

هزيت راسي ::اي مثلي هسه اريدج تنامين وعمه زهوره تحضر ملابسج انتي وحنين 

...عمو مالات العيد الي جبتهن الي 

::اي مالات العيد 

...ولعابتي اخذها 

::لا انا من نرجع العصر اخذج للسوك وشنوتردين اشتريلج 

ضحكت وهي تاشر بايدها ...شنو اريد شنو اريد 

::اي والله شنو تردين 

هزت راسها ورحت گتلها ::ياالله حبيبتي نامي وارتاحي يا بطله 

وغطيتها هي گعدت واشرت لا باصبعها وگالت ...انا ما انام 

استغربت من كلامها :: ليش بابا ما تنامين 

...انا عمو ما انام اخاف سلدار لو امي يحركوني 

::لا تخافين هسه اصيح بيبي منيره 

طلعت زهراء واگفه وتسمع كلامي ويه ناديه سالتني 

سراج ليش ما فهمتها نروح للمحكمه 

::لا باچر الصبح افهمها هسه يجوز تخاف تتوتر 

باوعت العمتي ::عمه صدك ما تنام بالليل 

عمتي جرت حسره وگالت ==اي يمه من يوم الحادث ابقى يمها واقرا ايات للفجر وساعات للصبح ياالله تنام

::من هيج من اجي وره الظهر الگاها نايمه 

عمتي ==اي الي شافته مو قليل 

ثاني يوم الصبح گعدت لگيت عمتي گاعده وزهراء گعدت سبحت ناديه وحنين واتريگنا بعدها بدلت الهن 

ومشطتهن سوت گصيبه الناديه الي شعرها چان يشبه شعر امها وكصيبتين الحنين الي چان شعرها اسود 

وعيونها ملونات اتقربت من ناديه وانا ابتسم بوجهه واگول ::الله شنو طالعه اميره تخبلين 

هي ابتسمت گتلها ::ندوش انتي تحبيني

هي هزت راسها يعني (اي )

سالتها ::شكد تحبيني 

جاوبتني بعفويه وهي تسوي باديها وتكول ......هوااي 

::وتحبين بيبي منيره 

...اي عمو 

::شگد 

...هم اهواي

اتقربت منها وشاورتها وانا ابتسم ::ادري تحبين عمو هادي شويه مو ادري بس ما اگول 

هي سكتت رجعت گتلها ::ندوش حبيبتي تحبين بابا لو ماما 

هي باوعتلي وحتى الضحكه تلاشت من وجهه وظلت ترمش 

گتلها ::ندووش حبيبتي اعرف تحبين بابا وهم تحبين ماما لكن بابا انتي شفتي شنو سوت بي امج هي وسلدار مو 

هزت راسها 

::شوفي ناديه راح نروح هسه گدام جدوا الي اجه وانتي صرتي تحچيله يريدج تحچين الي شفتي

...اي عمو احچي بس ما ناخذ حنين 

::ليش 

...لان الشرطي يذبحها بالسچين حنين ما تروح 

وصارت تبچي 

::منو يذبحها انا اذبحه هذول كلهم يخافون مني انا كلهم اكتلهم 

...يعني ما يحركوني ولا يذبحون حنين 

:شحدهم لعد وهذا

هي رجفت وكالت ...عمو هذا تريد تكتلني بي 

حضنتها وگلت ::لا بابا اكتل اي احد يتقربلج لو يتقرب الحنين ها اتفقنا 

...اي 

::ناديه تدرين منو راح تشوفين هناك 

...منو ؟

::ماما وسلدار 

هي فتحت عيونها الي انملن دموع وگالت ...لا عمو ما ارووح تكتلني وتحرگني وسلدار يموتني بالچفيه 

حضنتها ::لا حبيبتي ما يسوولج شي تدرين ليش

هي تشهك ...ليش عمو ؟

اتحسرت وجاوبتها :: لان خاليهم بقفص 

...قفص مثل اللبلبل ؟

::اي بس اكبر 

...ليش عمو ؟

::حتى ما يضربوح ولا يقتلوج مثل ما سوو اب بابا 

لزمتها من چتفها وباوعت الوجهها وگتلها ::ناديه انتي مو تردين بابا يفرح 

...اي عمو بس هديل تگلي ابوج طمو بالتراب وياكله الدود 

عمتي بچت وهادي دار وجهه انا كتلها

خزرت هادي ::لا بابا چذب بابا بالجنه بس ضايج لان امج تگول مو انا ولا سلدار الي خنگنا بالچفيه 

ناديه بعفويه —چذابه هي وعمو سلدار 

راد هادي يگلها لاتسمينه عمو بس انا خزرته واشرتله براسي اسكت لا تگول 

::يعني هي مو هي وعمو سلدار 

...اي عمو والله هي 

::زين انتي بطله وشجاعه لان تحبين ابوج وراح تگولين كل شي شفتي مو

...اي عمو بس ما يذبحون حنين 

::لا عمو ما يذبحوها 

زهراء //سراج خلي نودي حنين يم جهال كرم 

هزيت راسي وگتلها ::زين نروح انا وياج وما ناخذ حنين نضمها عد بيت كرم ومن نرجع اخذج اشتريلج 

...وتاخذني المدينة الالعاب 

::اي اخذج 

اخذت زهراء حنين وراحت هي وكرم اهنا ناديه صارت تبچي وگالت 

...عمو وين ماخذين حنين

طلعت فلوس وانطيت الزهراء گتلها ::عمو راح نشتريلها 

...وانا 

::انتي هسه اشتريلج شنو تردين ياالله حبيبتي خلي نروح 

هزت راسها وگالت ...حنين تجي وانت تذبح الشرطي مو 

نفخت ::اي عمو ياالله 

وطلعنا وزهراء جابت لعابة حنين وبعدين وكفت اشترت الها جبس وكيك وعصير

وصلنه للمحكمه انا لازم ناديه بايدي كعدنا على كراسي وانا رحت استفسر وين القاعه الي بيها المحاكمه 

اندليتها اجيت اوگف واحد منعني گال استاذ ممنوع هسه توگف 

رجعت لان عرفت لازم ما نجي اباب القاعه اله بوجود شرطه واكيد بعدهم ما جايبيهم رجعت اخذت هادي 

وعمتي وزهراء وكرم گعدتهم بمكان بحيث ما يشوفون اهل مياده وسلدار من يجون لان اعرف بكرم وعمتي

 ما راح يسكتون

كعدتهم وخليت ناديه يم عمتي وانا رحت شفت اخوانها وعمها وابن عمها الي اجونه بالفصل 

واهل سلدار اخوانه وعمامه ومره يمكن امه نص ساعه عرفت بدت المحاكمه رحت صحتهم وگفنا بالباب 

اول اسم صاحو بي انا دخلت القاعة المحكمه

وانا اشوف القضاة والمدعيين العاميين امشي واباوع على جهتي اليمنى شفت مياده بالقفص وياها سلدار هي لابسه

 حجاب وعبايه ومبين عليها التعب يمكن بسبب الحمل ما اعتقد خوف 

اما سلدار كان لابس قميص وبنطلون وصلت للمنصه القاضي گلي 

اسمك وعمرك او وضيفتك

انا جاوبته بعدين وگف الكل وگف گلي ردد وياي القسم 

رددت القسم وسألني عدة اسئله ومن ضمنها شلون عرفت باختفاء عباس 

وين لگيته وشنو الي شفته على زوجته 

القاضي سألني انت تعرف سلدار 

جاوبته ::نعم شفته مره او اثنين ابيت عباس 

القاضي //شيسوي

جاوبته ::انا سالت عباس گلي هو جيران اهل زوجتي من كانو ابغدادومتربين سووا وعنده سياره فبحكم علاقة

الجوره ياخذهم ويوديهم 

القاضي //يعني ما شفت او حسيت بشي مريب 

::لا سيدي لكن شي واحد لفت نظري 

- - - الي هو 

::نعم من اتواجد ابيت عمتي او اروح على عباس احيانا ابقى يومين او تلاثه سلدار يختفي 

حتى مره مريت على عباس وكان هو موجود لمجرد ما شافني استاذن وعباس بيومها كله 

مو على اساس تبات عدنا 

هو كله لا راح اروح البيت اقاربنه 

بعدين گلي القاضي// استريح

وصاحو الهادي وسأله القاضي وكرم هم سأله ودخلت زهراء وادت القسم سألها القاضي 

هي گالت انها شافت عباس بليلة الحادثه وكان مريض ومن عرف اريد اروح الاختي للمستشفى قرر يروح

ويجيب السياره من البيت لكن انا ما قبلت لان شفته تعبان 

واستمرو الشهود بالدخول الشرطه الي بيوم الحادث خفر اكدو عباس طلع الساعه قريب الثمانيه ونص 

وكان راجل مو بسيارته وضابط الشرطه الي اكد انه هو الي گل العباس يروح للبيت حتى يرتاح وثاني يوم يراجع

 المستشفى حتى ياخذ علاج وينطو اجازه

وصل الدور الى عمتي الي دخلت وانا استاذنت من القاضي عن طريق المحامي ان اروح واوگف بالباب يم ناديه 

لكن محامي الدفاع الي مخلينه اهل مياده گال 

- - سيدي القاضي بماانه شاهد فارجو من عدالتكم ان لا يخرج اي احد من اقارب المجني علي 

وفعلا رفض القاضي ان اروح او اي احد منه يروح يمها

المحامي الي وكلنا اسمه ادهم گال 

وانا اطلب من عدالتكم ان لا يروح او يبقى يم الطفله اي احد من اقارب امها حتى لا يهددونها مثل 

ما حصل واتهددت بعد اسبوع من وفاة ابوها

القاضي كال// بهاي الحاله تدخل ويه بيبيتها 

لكن محامي الدفاع رفض وگال / اكيد راح تتاثر بالي تسمعه 

القاضي گال// اكو احد غريب اهنا 

كامت نسيمه وكالت //انا جارتهم وهي تعرفني

القاضي اشر للشرطي وگله اخذها واكد على الشرطه الموجودين بره لا تخليها تحجي وياها 

راحت نسيمه ويه الشرطي والقاضي اخذ اقوال بعد ان ساألها 

انتي شكيتي بمياده قاتله ابنچ 

عمتي هزت راسها وگالت = انا الحد ما سمعت ناديه وانا معتقده انو مياده بريئه 

القاضي // ليش متاكده

عمتي = لان اعزف بابني شگد يحبها ومدللها واكثر من مره گتله مرتك هواي تروح الاهلها كان رده 

عليه تروح لان ابحدها وتضوج 

= 

فكتله ياابني اول ما تزوجتو كنه نتوسل بيها تروح الاهلها وانت تعرف حضرة القاضي البنيه اول 

ما تتزوج تحب تروح الاهلها لان تفتقدهم هي ما چانت تقبل ومن تروح يومين وتخابر تعالوا اخذوني 

القاضي // ليش بعدين صارت تروح كل فتره 

=. كل اسبوعين ومرات كل عشر تيام 

شنو السبب ؟

= من اتوفى ابوها صارت تروح تبقى اسبوعين وترجع البيتها اسبوعين بعدين عرفت 

القاضي //شعرفتي حجيه 

=عرفت ابوها ما كان يطيقها ولا يريدها لان جابتله العار ويه سلدار وفضحته بالمنطقه 

- - شلون عرفتي 

= اخوي ابغداد وره الحادث راح يم بيتهم بالمنطقه الشالو منها وسائل والجوارين كالو هو خطبها 

وابوها ما قبل بعدين هي راحت البيت اهل سلدار وبعد ان سمع ابوها وهددهم رجعت وصبحو شايلين

القاضي // المفروض اخوچ يسأل قبل ما تخطبوها 

= صحيح بس المشكله اب ابني حباها وگال انا اقتنعت بيها وزوج اختها صديقي ماكو داعي الاي سؤال 

القاضي //حجيه انت تتهمينها بقتل ابنج بالتعاون ويه المتهم سلدار 

=اي سيدي القاضي واريد منكم حق ابني

محامي الدفاع وكف وگال 

- - ارجو من عدالتكم ان لا تستمعو لما تقوله الطفله ابنة موكلتي لانها قاصر وفاقده الاهليه بسبب صغر عمرها

ادهم - - سيدي القاضي للعداله اكثر من وجه وبما انه الطفله شهدت الواقعه وهي تتمتع بصحه جيده وعقل سليم 

ارجو من عدالتكم الاستماع اليها لان اهم شئ بالموضوع الحقيقه 

محامي الدفاع// قد نسي زميلي بان الشاهد يجب ان يكون مؤهل لا طفل ما يعرف اي شئ وممكن ان يغير اقواله 

من اجل قطعة حلوى 

ادهم قال //صحيح ما يقوله زميلي لكن اريد ان اسأل زميلي بما انه مجيئنا الى هذا المكان من اجل الحقيقه 

واقرار العداله

- - لو ان اخاك ذهب مع عائلته بالسياره في سفره وباحد الطرق تعرضوا الى حادث ادى الى موتهم ولم يسلم من 

الحادث الا طفل صغير لا يتجاوز الثلاث سنين بعدها يمسكو بسائق الشاحنه ويعرضوه امام الطفل مع اكثر من 

واحد ويقولون للطفل من الذي دهسكم هو يؤشر على السائق الي ينكر معرفته بالحادث لكن حينما ناخذ الطفل 

ونقول له ما هي السياره التي دهستكم ويشير الى سيارة السائق هل ناخذ بها ام لا 

القاضي //. شتريد تكول وضح

- - نعم سيدي القاضي بالظبط الطفله رات واعطت الكثير من الادله فلا يوجد مانع من ان نستجوبها ونعرف 

التغيير في كلامها 

(باوع ادهم الى محامي الدفاع وگله )خلي نسمعها يازميلي فاي اختلاف بالكلام في صالحك وتصح 

نظريتك بانها تلقنت من اهل ابوها

القاضي ظل يتشاور ويه باقي القضاة وعمتي باوعت عليه وگلتلي 

=المحامي الي خالينه اهلها داهيه وخاف يضيع حق ابني 

هادي كال //وانوب تطلع بريئه ويكاومونه ونفصل مربع 

عمتي =انت هذا التفكر بي الفلوس خايف ولك تره اخوك المات مو عدوك 

طمنتها وگلت ::عمه لاتخافين كل شي محسوب احسابه

وامر القاضي ان تدخل ناديه دخلت وهي تمشي چانت لابسه البدله الي اشتريتها الها والجواريب والحذاء

 وگصيبتها وگذلتها على وجهها كل شويه توخرها بايدها مرتبكه وخايفه صعدها الشرطي على المنصه القاضي

 نزع نظارته وابتسم بوجهه وگلها //الله هاي الحلوه شنو اسمها 

هي ما جاوبت ظلت تباوع القاضي گل للشرطي قربها مني 

شسمج باباتي 

هي بخوف ...ناديه 

- - حلو اسمج ناديه هاي البدله الحلوه منو جابها الج بابا

  هزت راسها ... لا عمو سراج 

- - زين حبيبتي تدرين انتي شكد حلوه 

هي بخوف ...عمو اريد حنين 

- - منو هاي حنين 

وكفت رفعت ايدي كتله ::اختها الزغيره 

هي من شافتني اجت عليه وتسالني ...عمو سراج ذبحها الشرطي ؟

شلتها ورحت وانا اطمن بيها ::لا حبيبتي ذيج هي گاعده يم عمو كرم وزهراء

نزلتها ورجعت كلها:: تردين حنين 

...اي اريدها 

القاضي ...روحو جيبو حنين 

اتقرب كرم وزهراء بايدهم حنين //منو ذوله تعرفيهم 

...عمو كرم وعمه زهراء

- - وهاي الي وياهم حنين 

هزت راسها ب ( اي )

 القاضي //انتي تحبين حنين

ناديه ...اي بس لاتخلي الشرطي يذبحها 

القاضي //لا ما اخلي زين ناديه انتي تحبين بابا 

...اي عمو احبه بس هو بالجنه يتاخر ياالله يجي على ما اصير كبيره 

- - شنو اسمه بابا 

...عباس 

- - ناديه باعي (واشر القاضي للقفص )تعرفيهم ذوله

فتحت عيونها بذهول وهزت راسهاوصارت اتاشر وهي ترجف .... اي هاي ماما وهذا عمو سلدار 

- - عمو سلدار تعرفي 

هزت راسها... اي اعرفه 

- - شنو يشتغل 

...عنده سياره كبيره (واشرت باديها )

- - تركبين بيها 

...اي اني وماما وحنين نروح البيت بيبي ام حليم 

- - وبابا يروح وياكم 

...اي بس مو دووم

- - يعني ترحون ويه سلدار ابحدكم لو ويه الناس 

... اذا بابا ما ويانه نروح بس انا وماما وحنين 

القاضي // ترحون ويجون وياكم ناس هواي 

هزت راسها ... لا نروح ابحدنا بس احنه بالسياره 

- - واذا وياكم بابا يروح ؟

...اذا بابا ويانه يجوون ويانه ناس شكثر هواي 

- - زين ناديه بابا يعرف تجون ابحدكم

...لا عمو لان ماما تكلي اجويج اذا تكولين اجينا بس احنا 

- - انتي تحبينه العمو سلدار 

...اي احبه لان يشتريلي لعابه وعصير بس هسه اكرهه 

- - ليش تكرهينه 

...هو الي قتل بابا وخلا يرجف ويكول خششش

- - اي شلون قتله 

...بالجفيه 

- - وماما وين 

...كاعده ع الدرج تباوع 

- - رما بالمسدس

...لا راد عمو سلدار يرمي بالمسدس بس ماما گالتله الجوارين يسمعون كلها جيبي سجين 

- - اي وشنو صار 

...جابت سچين وسلدار لزمه وضرب بابا اهنا (واشرت على بطنها )ضربه وبابا گال صاح خششش

- - وبعدين شنوصار 

... وضربه اهنا (واشرت على چتفه ...واهنا ...اشرت على صدرها )

القاضي //وماما تشوفه من يضرب بي

هزت راسها ...اي 

ومن ضربه شنوو سووا 

...اجه سلدار وشبك ماما هيج (ولمت اديها)

وشال بابا بالسياره وراح للمخزن (باوعت للقاضي )عمو 

القاضي //ها عمو

...الشرطي يذبح حنين ؟

- - لا بابا منو گلج 

اشرت على القفص بدون ما تباوع ...ماما تگلي اذا ما تسمعين كلامي الشرطي يذبح حنين ويحركج 

- - لا بابا انا احرگه

هي صارت تبچي وتستعطف القاضي ...لا عمو الله يخليك اذبحه لا تحرگه يوجع الحرك الله يخليك خطيه 

هو ما يذبح حنين لويش تحركه عمو يوجع الحرك 

القاضي //شلون عرفتي يوجع 

...ماما حركتني 

- - ليش 

...ما قبلت تاخذني للعرس حرگتني وبيبي تگلها وج خطيه 

منو بيبي 

بيبي ام حليم 

- - انتي شنو گتيلها اخذيني للعرس وهي چوتج

...اي انا گتلها اريد اروح للعرس ما قبلت گتلها اگل البابا عليج اجونه الشرطه 

- - اتگلين البابا اجوكم الشرطه وين 

...الشرطه اجت وهي وسلدار بالسياره وانا وحنين نلعب بره

- - وين چنتو رايحين 

...البيت بيبي ام حليم 

- - وهي وسلدار بالسياره وانتي وحنين تلعبين 

...اي عمو 

- - وحركتج 

...اي عمو

- - ومن رجعتي شنو گالت البابا ع الحرك 

...بالطباخ 

- - هاا زين ناديه انتي وين چنتي واگفه من سلدار ضرب بابا بالمسدس 

لا عمو بالسچين 

العفو بالسچين وين چنتي واگفه 

...اباوع من باب الصاله 

- - وما شافوج 

- - لا ما شافوني بس من ماما اجت اخذت السچينه رجعت للغرفه وسويت نايمه وحتى من اخذت البقلاوه

القاضي //بقلاوه المن ؟

... عمو سلدار گلها جيبي باكيت البقلاوه للشرطه من يلزموني 

- 

- - شال بابا وين خلا 

...بالجنطه وعمو جاب فوكه طحين وخلاهن فوگه (عمو انت ما تخلي الشرطي يذبح حنين )وصارت تبچي 

- - لابابا ما ذبحها (القاضي اشر اخذها )شلتها وهي تگلي ...تاخذني المدينة العاب 

::اي حبيبتي اسكتي ما يصير تحچين

وگف محامي الدفاع وگال 

رغم ما سمعنا الا انه تلقين ممتاز ماخوذ من فيلم هندي وبرغم انو موكلتي اعترفت لكن الان اقول لعدالتكم انو 

موكلتي اعترفت نتيجة التعذيب الي تعرضتله من قبل مدير المجني علي وبعض اصدقائه المقربين وكله بسبب 

تهديد احد اقارب المجني علي 

لانه يعمل باحد اجهزة الدوله لذلك صار تاثير بالتحقيق وهذا التاثير من قبل اقارب المجني علي حتى يلفق 

لموكلتي التهمه 

لذلك اطلب من هيئة المحكمه اعادة التحقيق ومن قبل لجنه نزيهه تخولها المحكمه

نفس كلام محامي مياده گاله محامي سلدار وكانما متفقين ع السيناريو 

المحامي ادهم //من بعد اذن عدالتكم اتمنى ان اناقش زملائي لان اهم شي هنا هو اظهار العداله 

القاضي گله //اتفضل 

ادهم //ارجو من زميلي الاثنين ان يبينو كيف قام مدير المغدور واصحابه بتعذيب المتهمه 

محامي مياده //نعم حاولو ان يهددوها بالاجهاض لذلك هي خافت واعترفت بشي لم تقوم به 

ادهم //لكن في كشف الدلاله هي لم تنكر بل اصرت على انها هي التي قامت بقتل زوجها 

وطلبت من المتهم سلدار ان ينقل الجثه الى مكان مجهول والا فانها سوف تصرخ وتتهمه بان هو من اقدم على 

قتل المجني عليه

محامي مياده //مثلما قلت لك يازميلي تحت تاثير التعذيب والتهديد هي قالت هذا الشئ

المحامي ادهم //طيب يازميلي نريد ان تعرفو هيئة المحكمه على هوية اقارب المغدور الي يحاول ايأثر 

على سير العداله 

الدفاع //نعم معروف وهو من لقن الطفله وذهب الى موكلتي وهددها وقال لها ان تقول بان هذا الطفل 

التي حملت به هو ليس من زوجها المغدور ولذلك انا اطعن بكلام هذه الطفله

ادهم //طيب يازميلي نرجو ان تفصح عن اسم هذا الشخص ولاتنسى ان العداله والقانون فوق الجميع 

القاضي //حضرة المحامي نريد نعرف اسم هذا الشخص ومركزه 

الدفاع //نعم حضرة القاضي والمستشاريين هذا الشخص موجود بالمحكمه وعن يقين اقول انه هو نفسه 

الي لقن الطفله وهو نفس الشخص الي حمل الطفله وهي بما انه شهدت ضد امها الا انها بنفس شهادتها

 اثبتت براءة امها

القاضي //ممكن تبين كيف 

 المحامي // نعم سيدي الشخص الذي حمل الطفله وهي تقول له متى ستاخذني الى مدينة الالعاب هو نفسه 

الشخص الي ذهب الى موكلتي وهددها وطلب بحكم مركزه ومركز خاله المهم طلب من المحقق ان يقوم 

بتعذيب موكلتي حتى تعترف بجرم لم تقوم به وهذا الشخص هو سراج

////. //////./////

الفصل السابع عشر من هنا