رواية بنات الحجي السعيد الفصل السادس عشر بقلم شمس العراقية
____
جنات ـ أباوع عليهن متحالفات عليه وهجمت على لقاء أحاول أخذ موبايلي منها ولزمتني من شعري وفرتني حسيت رگبتي تريد أطگ بإيدها عوفيني حقيره عوفي موبايلي بگلشي متدخله بحياتي .
لقاء ـ بعدج ما شفتي حقارتي أصبري ياعيني شگو مستعجله على رزقج وأني ما متدخله وهيج بدعتي أنتِ والماما .
ـ الله يأخذج
ـ فتحيلي موبايلج لا والعباس أبو فاضل أخلي گتلج عمل شعبي وأطلع على باسل وأخليج تبوسين قنادر يعوفج فالأفضل تفتحينه اليه يمكن أني أرحم بحالج
ـ ليال الله يخليج گوليلها خل تعوفني
ليال ـ تعوفج بس بالأول فتحي الرمز يله لاتطولينا علينا
والأ أكولج رايحه أصيح باسل وأجي وبطريقي أصيح لنائل هما يتونسون على هيج سوالف .
جنات ـ لا دخيلج ليال لاتروحين أوكفي ولقاء شدت على شعري أخ شعري
لقاء ـ فتحي عاد
جنات ـ أيديه يرجفون أخذته وفتحته گبل سحبته وشمرتني بحيث وكعت على خاصرتي يمــا .
لقاء ـ وصما تصمج
ليال ـ دخلي على الواتساب
لقاء ـ لا أوگفي الواتساب مال الحجيات وكروبات العائله وناس كلوبهم نظيفه البداعه بالأنستا ، شـنو هاي عزه
جنات ـ تگلب وتقرأ وتباوعلي بحقد وأني عزلت نفسي بصف السرير ، ليال باوعتلي وگبل هجمت عليه رفعتني من الكاع وضربتني راجدي ومن شعري قوي ليال الله يخليج عوفيني ليال .
ليال ـ الله لا يخليني أذا أعوفج ولج دازتله كل صور العائله وفيديوهات أعراسنا صخام برأسج شاهرتنا شهيره يعني ما نستغرب إذا لگينا نفسنا منشورين على المواقع ونصير فضيحه الموسم .
لقاء ـ وأني أكول تصور وتوثق كل للحظات أثاري عماد
منتظر يشوف بداعة جنات عفيه عليج والله ما مقصره فد مره جان دزيتله عقد البيت لج أنتِ شمصخمه بعمرج
دازتله شريط العائله كله شنو هالكواده المسويتها اليوم أشرب من دمج وأفوخ گلبي والله الا أعيد سلالتج السكط يا عارزز .
جنات ـ ليال أرحم منها عليه نامت عليه عضتني قوي شاغت روحي ورفعتني من الكاع وضربتني راجدي ويا ما دفعتني على السرير طگت أيدي وشاغت روحي وصرخت وسدت حلكي وجابتني بضربه على خشمي وطگ دم عبالك تلعب مصارعه ما رحمتني أبداً .
لقاء ـ أحد گالج أحنه عرضنا سكط لج أدبسزز شمسويه بروحج وأني أكول هالبنيه خانسه وعازله نفسها أثاري كل خانس وراه مصيبه لا أنوب متزوج صخام برأسج عفتي الأعزب تحبين المتزوج شحبيتي منه ولج ساقطه تبوكين رجال من مرته وجهاله لا وصلافه تگولين تطلگها لج أنتِ شـــنو
جنات ـ شبه فقدت من كثر ما ضربتني وليال تقرأ بالموبايل أخر شيء تعبت وعافتني وتفلت بوجهي .
لقاء ـ أستلميها أروح اصيح باسل وأخليهن كدامه خلي هو يشوف شغله ويه هالسكط أني هيج ما يبرد گلبي أذا ما هو يجي يكمل عني نار گلبي شيطفيها .
جنات ـ لازمه أيدي والوجع يموت عظم أيدي يطگ كسرت أيدي زحفت وأتوسل بيها دخيلج لقاء لزمتها من أيدها أروح فدوه لاتكولين لباسل والله شتردين مني أسوي بس گلشي ولا تگولين لباسل الله عليجن أني اختجن سترين عليه ليال عليج بغلات ليث ستري عليه ضحكت وكالت
ليال ـ بغلات ليث يله ماطول حلفتيني بي الا أروح أكوله لان يا فهيمه ليث صار رجال متزوج ومستحيل گلبي يرف عليه من يمتى أحنه نحب المتزوجين ونهجم بيوتهم لا وأنوب تگوله وديت جهالك لأمهم هيج ادبسز ما شفت صلافتج بين الرجال ومرته ساقطه ..
لقاء ـ الله لايستر عليه أذا أستر عليج لو حابه حب شريف وداك بابج بيها مجال يمكن شوي ها أستر عليج بس ماطول الماما جواهر القائد مالتج ومتزوج أويلي أتونس على عذابج ، أصبريلي خاف اني كسرت أيدج باسل يسحن عظامج سحن .
جنات ـ لقاء لقاء فدوه لا وطلعت وقفلت الباب ورجعت اتوسل بـ ليال ودفرتني ورجعت وگعت على أيدي وشاغت روحي من الالم وأنفتح الباب ودخل باسل وباوعلي .
باسل ـ وين الموبايل ، لقاء قفلي الباب
جنات ـ سحب الموبايل من ليال وكعد على السرير وهنا واكفات يم رأسه وگمل وشمره على ليال وزحفت باسل عليك الله أرحمني بغلات بناتك عوفني .
باسل ـ تحلفيني بناتي مو ولج بناتي بطن أمهن يدرن بعمتهن أدبسزز ، فاتح ملهى أني أحد كايلج أني كواد مأخذه الدنيا حوض وبكيفج تحبين لا وأنوب حابتلي متزوج هم أدبسزز وهم ساقطه .
جنات ـ ليال ولقاء جانن أرحم عليه من باسل ما أعرف الضرب منين يجيني ومن ضربني خشمي طگ ويمكن أنكسر لان ضليت أنزف شبه فقدت
باسل ـ أحنه ما عدنا هيج ساقطه أنتِ مو بنت أمي مستحيل ولج أمي ما ربت هيج سكط مثلج هاي احنه فوك رأسج وگلشي موفريلج وهيج سويتي لعد شخليتي لبنات الشوراع شخليتي لبنات الملاهي دازتله كل صورج وفيديوهات هيج شرفج وعرضج رخيص عليج هيج ولج ادبسزز أموتج هسه گلبي ما يبرد .
جنات ـ الباب يدك قوي وعافني گمت ما اشوف ودخت وخشمي يصب دم مسح أيده من الدم وفتح الباب
وعصماء شافتني وشهگت بخوف
عصماء ـ باسل هاي شمسوي بيها من كل عقلك .
باسل ـ عصماء أخذي كرشج وخري من وجهي يله ليال لقاء طلعن مــا أريد ولا وحده گدامي وهاي العار تبقى بالغرفه لما أبلغ أبويه وأرجعلها وأطم عارها .
جنات ـ أباوعلهن وأتوسل بيهن بعيوني وطلعن وسحب الموبايل من ليال وقفل عليه الباب وعافوني وأني الوجع يأكل بيه أيدي ما بيه أرفعها من الوجع وخشمي يصب دم والوجع يدك برأسي روحي بدأت تغيب وگلبي يدك سريع من المصير المنتظرني خاصه بعد ما يبلغ أبويه يمكن يذبحوني راح تموتين جنات ضليت كاعده وشفت موبايل ليال وزحفت بالگوه وأيدي وكل جسمي يوجعني أخذته فتحته أعرف رمزها وأتصلت على ماما گبل جاوبتني وبجيت ماما لحگيلي كشفوني وضربوني لحكيلي باسل راح يگول لأبويه ماما ساعديني ماما وخلصيني منهم راح أموت .
جواهر ـ شتحجين أنتِ شلون أنكشفتي ولج
جنات ـ لقاء كشفتني وهي وليال ضربني موتني ورجعن گالن لباسل وخلص عليه وهسه راح على أبويه يگوله لحكيلي قبل لا يجون ويذبحوني ماما لاتعوفيني فدوه ما الي غيرج أنتِ أمي .
جواهر ـ لاتخافين أني أخلصج منهم بس هسه أتحملي وصبري أني اطلعج مناك وأجيبج يمي ويصير خير يله روحي ورجعي موبايل سليمه وأني أعلمهن دواهم عندي .
جنات ـ ماشي ماما فدوه أستعجلي
جواهر ـ روحي ورجعي الموبايل هسه أروح أشوف
جنات ـ تمام وقطعت الخط ورجعت الموبايل وبقيت أنتظر مصيري ومر وقت وأسمع صوت باسل ونائل وأبويه أجو يمه راح أموت .
نائل ـ وينها الأدبسزز وينها والله أشرب من دمج لج عار .
جنات ـ وأنفتح الباب ودخل نائل كبل هجم عليه وضربني وجرني من شعري سحلني لصاله يمااااا واصيح وأرفس بين أيديهم محد رحم حالي وكعني يم رجلين أبويه وشفايفه يرجفن باوعلي وگال وصوته مكسور
سعيد ـ ليش بابا جنات ليش هيج سويتي مو ربيتجن وتعبت عليجن والله ما مقصر وياجن وأمشي وأحاسب نفسي واگول لا سعيد أنت مقصر ويه بناتك وولدك
ليش بابا ليش شرفج رخيص عندج شمسويه بروحج وبينا لو هذا أبتلاء على ظلمي لأمجن لو أني ما عندي حظ بالخلفه يوميه واحد منكم مسويلي سالفه تصخم الوجه .
جنات ـ بجيت وأني أشوف أمي أجتي وباسل راحلها تقربت وباوعتلي وهي مصدومه ونائل ضربني على خاصرتي وشاغت روحي .
هيفاء ـ منو هيج مسوي بيها ، عوفها لاتضربها
جنات ماما شمسوين بيج بنتي منو ضربها .
جنات ـ نائل حجالها گلشي وباسل يگوله أسگت بس نائل ما سگت وأبويه نزلت دمعته وصد وجهه بخيبة وأمي أبتعدت عني جرتني من شعري قوي .
هيفاء ـ أني هيج ربيتج اني هيج وصيتج تحافظين على نفسج ولج صرتلجن صديقه مو بس أم ما قصرت لو بيه قصور تعاي كعدي حاسبيني لو عايفتجن مثل ابوجن حاسبوني بس اني كظيت عمري كله الجن أنتن واخوجن وتاليتها هيج يا جنات تردين تصخمين وجهي ووجه أبوج تردين تنزلين رؤس أخوانج ليش يا مغضوبه
جنات ـ تحجي بقهر وباسل أخذها يهدي بيها وأني ابجي والوجع يأكل بيه وأنفتح الباب دخلت ماما ركضت عليه حضنتني ماما طلعيني منا الله عليج ساعديني .
جواهر ـ حسبي الله عليكم من أهل جعل أيدكم الكسر
أمشي ماما .
هيفاء ـ ماما وأني شـنو من يومج تگولين الها ماما ما منعتج گلت ميخالف ربتها بس هسه من تگولينها ماما أحس تگولينها لأمج الجابتج مو الأم الربتج ولج جعل أيدي الكسر يوم شلتج وأنطيتج الها هاي تاليتها هي أمج وأني شنو جنات .
جنات ـ هي أمي أكثر منج تحبني أكثر منج تخاف عليه أكثر منج قبل لا اكمل كلامي هجم عليه باسل وضربني وماما منعته واجتي الضربه بيها على خاصرتها ونائل هجم عليه
نائل ـ شلون تضرب أمي
باسل ـ هي منعتني ما تسمعها شتحجي .
سعيد ـ أخذوها بالغرفه وتعالوا يله جواهر عوفيها .
جنات ـ سحبني نائل وأخذني الغرفه نائل الله يخليك
نائل ـ الله لا يخليني أذا اخليج ليش من دونهن طلعتي سكط مو وياج من خيالهن يستحن تف على شگلج .
جنات ـ وطلع وقفل الباب ضليت بالغرفه ومر وقت هواي وگلشي ما أعرف وأسمع صوت باسل يصيح وأمي تحجي وأندك الباب صوت ماما .
جواهر ـ وين المفتاح .
جنات ـ أنفتح الباب ودخلت ماما رفعتني من الكاع وحضتني وشگبتها وأبجي وطلعت هما واكفين أمي وأخواتي وباسل .
باسل ـ يعني تصلحون الغلط بكواده والله عال وعفيه البنيه تحب وتمعشك والأهل يزوجونها اذا هيج كل البنات يحبن وينكتلن ويتحملن لان بعدين يعرفن
اهلهن يزوجوهن هو هيج والله عمي هذا انحطاط علني .
سعيد ـ لعد شتريد نسوي نذبحها وعارها وكلام الناس شيخلصك منهم وبكيفك تصدر عقاب الها منو أنت تقرر تنهي حياتها والولد اجه تقدملها يعني رايدها ودامها دازتله صورها نزوجها ونسترها ونطم عارها
باسل ـ منو گالك نذبحها ، نعاقبها أي بس مال نزوجها اله والله عدها علاقه بي ودازتله صورها لا هاي واكفه وشنو نسيت الرجال متزوج يعني أنت اشسويت لو تريدها تصير مثلك من جنت متزوج أمي وتخونها ويه جواهر وتالي تزوجت جواهر وظلمت امي هو هذا عدلك تنتج نسخه منك .
سعيد ـ باسل أحترم نفسك لا أكسرك والله وكلمه ثانيه ما اسمع منك وما تتدخل تسحب نفسك وما عليك ومثل ما اني بزماني غلطت أنت هم غلطت لاتنسى نفسك وواكف تحاسبني وأني ما ظلمت أمك ولا جواهر دخلت حياتها أمكم هي ظلمت نفسها ودخلت جواهر لحياتها وظلمتكم لمن رجعت وكلمن يتحمل نتيجه أغلاطه ويرضى بمصيره سواء أنت أو أختك
وجنات أني أحل مشكلتها ومحد يتدخل يلة أمشوا
جنات ـ باوعتلهم وباسل باوعلي وگال
باسل ـ أذا مشيتي يا جنات باب البيت يعثرج وتنسين عندج أهل وأم وأخ وأخوات وللموت ما الج دخله لهل البيت وجهج ما أشوفه .
جنات ـ ما جاوبت ومشيت وأمي صاحت وراي
هيفاء ـ مشيتي حتى ما باوعتي وراج ولا گلتي أمي وأخواتي وأخويه مشيتي رغم كل أغلاطج .
جنات ـ أي أمشي لان هي أرحم عليه منكم .
هيفاء ـ ماشي يا بنت بطني روحي يا جنات ما راضيه عليج ليوم الدين بگل حركة گلبي أكولها الله يغضب عليج ولا أني أمج ولا أنتِ بنتي متبريه منج وروحي خلي جواهر تصيرلج أم .
جنات ـ بجيت ومشيت وعفتهم وطلعنا للبيت وشفت جدي وجديتي وعمي سليم يسأل وجديتي عصبيه وتحجي ما راضيه .
حليمه ـ ليش جبتوها خليها يم أمها خلي تكسر عظامها
جواهر ـ أمشي لغرفتي ما عليج خل يحجون
جنات ـ أخذتني لغرفتها ونزلت بيداء من فوك وباوعتلي وشهكت .
بيداء ـ خاله جنات شبيها منو ضاربها عزه هاي شصاير بيج يمه
جواهر ـ مو وگتج هسه .
جنات ـ أخذتني سبحتني وخلت قطن بخشمي بس وجع يأكل بيه بخشمي وأيدي جاي اموت ماما وجع موتني
جواهر ـ هسه بس خل يهدأ الجو أخذ نائل وأخذج المستشفى الظاهر كاسرين أيدج وخشمج جعل أيدهم الكسر ، باسل كون تسحكك سياره .
جنات ـ لا ماما لاتدعين عليه .
جواهر ـ ما تشوفين شسوا وشمسوي بيح هالحقير ضربني على صفحتي لحد الان توجعني مرد كلياتي
يله نامي وأرتاحي خل أطلع وأفهم منهم لاتطلعين
جنات ـ هزيت رأسي وطلعت وضليت بالغرفه أبجي وأتذكر كلام أمي كلكم وگفتوا ضدي كلكم عبالك بس أني غلطانه غضبتي عليه وتبريتي مني لان غلطت وباسل من غلط ويه عُلا ما غضبتي ولا طردتي ولا عاقبتي بس عقابج وغضبج بس على جنات بعمرج ما كنتي أم عادله وظلمتيني بعقابج على غلطي أبداً ما راح أسامحكم على ظلمكم اليه .
وبقيت بغرفتي ماما وأسمع صوت عمي سليم يحجي وخفت منه لا يرجع يخلص عليه .
سليم ـ صدك تحجي أنت، هيج بنات أجفص على رأسها علمود تعرف نفسها شمسويه مو تجي أنت ابوها تشجعها وتزوجها والله أسترها انعل ابو هيج ستر بزواج الكواد مالتها .
نائل ـ بس هذا مو حل المشكلة واذا على الضرب اخذت جزاتها من باسل ما قصر بيها مصكطها الا شويه .
جواهر ـ تنكسر أيده ان شاء الله مشوه وجهه وكاسر أيدها وخشمها يصب دم ، هو ما يكول على نفسه
ابو النسوان ما جان مرافك عُلا .
سليم ـ ليش تنكسر أيده لعد شتردين منه يسويلها يصفكلها والبنيه اذا ما تنضرب ما اتوب وتشوف غلطتها ما بيها شيء وعساها بالكسرين عاشت أيده وزواج ما تزوجونها تكعد وتنجب ويه عماتها لعد تخبلونهن فوك سوالفهن نوب زواج والله عشنا وشفنا اخر زمن سامعه يمه سامعه .
سعيد ـ بنتي وأني حر بيها لحد يصير طرزان برأسي من تزوج وتصيراك خلفه هذاك الوگت ربي بناتك عدل وتحكم بيهن بس بناتي محد اله سلطه عليهن غيري أني وهذا الموضوع أني اقفله واذا طلع حرف عتبه الباب وانطعن بيها أحرك البيت عليكم .
حليمه ـ هذا هو يمه سوي اللي تشوفه مناسب وأول تالي تتزوج حل تزوج اللي شافها وعرفها أحسن ما تأخذ غيره ويعييرها والولد تقدملها يعني رايدها أنطوها اله وسدوا سالفتها الله يكصف عمرها من يومها اخف من ريشه وكلما تجي گلبي ما مرتاح الها .
سليم ـ بس الرجال متزوج .
نائل ـ منو گالك.
سليم ـ ليش ما تدرون هسه باسل گالي وعايف مرته زعلانه يم أهلها يريد يطلگها ويأخذ جنات هذا الفهمته من باسل وأنتوا سألتوا عليه لو گبل وافقتوا .
نائل ـ أني ما سألت ما أدري ابويه يابه سألت عليهم
سعيد ـ خلص گافي عاد متزوج مطلگ طبها مرض تزوجه وتنجب وتسگت وأذا بقيتها هيج تشيل خطية أخواتها .
سليم ـ الباقيات هم زوجهن شمنتظر ليال ليث مو جان يريدها وتزوج أنطيها لفواز وأذا فواز ما يريدها خل ليث ياخذها مره ثانيه شگو بيها بنت عمه ولقاء خل سجاد يأخذها ولد عمهن احسن من الغريب .
نائل ـ لا على بختك عمي هذنيج لو أشوفهن بعيني ما أصدك متربيات عَشر مرات .
سليم ـ ميخالف وعار أختهن يأثر عليهن ويجرهن غصب عنهن والبنيه تتزوج وتنستر ،حاجي رشيد على لقاء ياخذها لـ سجاد وحاجي ليث عـلى ليال خل يمر كم
شهر على زواجه ويأخذها ونخلص من هالهم
جنات ـ رجعت ركض لمكاني من سمعت صوت وأنفتح الباب ودخلت ماما
جواهر ـ گومي أخذج المستشفى أجبر أيدج وأشوف خشمج وما عليج من الحجي أبوج موافق وينطيج اله
هاج لبسي عباية بيداء يله كومي .
جنات ـ گمت لبستها وعدلت شالي وطلعت وبيداء اجتي ويانا وعمي سليم صاح على نائل .
سليم ـ وين مأخذ حرمتك وياك شگو نزهه امك گافي
نائل ـ رجعي .
بيداء ـ أنت تمشي بأمرك عمك شيگول تنفذه ترى ما يصير هيج متدخل بگلشي .
نائل ـ گلت رجعيييي لاتناقشيني يله .
جنات ـ رجعت تدردم وطلعنا المستشفى وفحصوها متت من الوجع واصرخ ونائل كل شوي يخزرني ويحجي عليه
نائل ـ وسم وزقنبوت صوتج يالعرمه والله أجيبج براجدي أدخلج بسبات .
جنات ـ گملنا وطلعت أيدي مكسوره وكسر قوي الله ياخذج لقاء هي كسرتها وخشمي هم شافوه طلع مكسور وشفت عذاب يا ابو عذاب ورجعنا البيت ولكينا بيداء متعاركه ويه عمي سليم عزه انلاصت
نائل ـ شكو شبيج خبصتيني خليني اشوف دربي
بيداء ـ أي أخبصك لعد اخبص منو وأنت تمشي وتعوفني وعمك يشمر كلام هو منو يتحكم بيه ويمنعني أطلع وياك
نائل ـ أشهد وأن لا اله الا الله مو كتلج لسانج ضبي أنتِ ما تعرفين تسكتين اله تستاهلين ويله صعدي واذا نزلتي رجليج اكسرهن يله كدامي .
بيداء ـ ماشي يا نائل .
جواهر ـ على كيفك وياها تريد اطلع حسنا وتفضحنا وعمك هو مو أدمي هو اخواته شالع كلبهن مو عاد مرتك وهو شعليه يمنعها تروح وياك .
نائل ـ هو هيج طبعه شسويله وهي ما تعرف تحترمه وتسگت مو صارلنا عمر عايشين وياه لو الا مشاكل ما تكعدن راحه غضب عليجن يالنسوان .
جنات ـ صعد عصبي واني بقيت بغرفة ماما وعمي سليم كلما يمر من الغرفه يباوعلي ويتفل عليه .
سليم ـ سليمه تلفج والله لو الي سلطه عليج فلا أخليج اهنا الا اخذج البصره واكعدج بخرابه الحواوين لان هذا مكانج علمود تعرفين قيمة نفسج وسمعتج وتحمدين ربج على عيشتج غيرج ما لاكيات مكان يلمهن وأنتِ كل هذا الدلال وانفلتي الله يكصف عمرج يالسكط لو باسل مكسر أيديج اثنينهن شحلاتها والله طلع سبع .
جنات ـ ركع الباب وصعد عوذه جنا خلصانين منك تولي اشهر دياحه يم خوالك ما ترجع شكو رجعت معقد وبيك خير جان تزوجت بس عقلك وسخ ومريض .
مر أسبوع وبيداء تجيني تكعد يمي ونحجي وتنطيني من ملابسها وأصعد اسبح بحمامهم فوك ودخلت غرفتها انطتني مرطبات ومشطت شعري وضليت كاعده يمها وگمت باوعت من الشباك البلكونه متوجهه على بيت أهلي وشفت لقاء كاعده بالمرجوحه هي وعصماء بالحديقه وليال تغسل الحوش وصفنت عليهن عادي عدهن ولا سألن عليه ولا كألن أختنا ماتت عدلت .
وثاني يوم ماما صعدتني بغرفة بيداء مشتريتلي فستان وبيداء خلتلي مكياج ورتبت شكلي وخفت الاثار
ونزلت أجو عمامي كلهم وليث وزوجته هم أجتي وعمتي سلوى واجو عماد وأهله امه وأخواته اثنين متزوجات دخلت سلمت عليهن وماما تهلي وترحب بيهن وگالن الها
ـ أنتِ أمها
جواهر ـ أي أمها .
أيناس ـ ليش أنتِ مو أخت ليال بنت خالة هيفاء
جنات ـ أي وهي ماما مرت ابويه تحبني أكثر من أمي
أيناس ـ أهـا هيج .
سلوى ـ انهجم بيت جذبج يا عمه أكو وحده تحبج بكد أمج بس تربيه جواهر شتطلعين .
جنات ـ حجت بصوت ناصي وأجتي بيداء قدمت الضيافه وأبتسمت وعيوني على الباب كل عقلي أمي وأخواتي يجن ويحضرن وصار الوقت نعقد واجه نائل أخذني وضغط على أيدي قوي وتوجعت نائل ايدي
نائل ـ لا عبالج راضي على هالزواج والخلقج لو واكعه بيدي اني أضرب من باسل بس رحمات وكعتي بإيده
وهذا الزواج راح يتم علمود نخلص من عارج وهم أختيارج واياج ثم اياج بيوم تجييني تتبجيني اركعج بالاربع واربعين على حكلج اكوم سنونج واسويج مداس
جنات ـ دفعني ونزلت دمعتي وبجيت مهضومه وصار الكلام واني ابجي وطلبوا موافقتي ووافقت وتم العقد وخلصت رغم المعانات والضرب والأذيه الشفتها من أهلي بس ميخالف گلشي يهون .
رجعت كعدت وباركن اليه بس حسيت أمه وأخواته كوه جايات وما مرتضيات ويبتسمن مجامله ومر الوقت ودزوا عليهن وراحن بدون ما يودعني حزت بگلبي وسگتت .
ومرت الأيام وأجه علمود عقد محكمه ونائل وماما جواهر راحوا وياي وعقدنا وراد نتغدى بس نائل ما قبل ورجعنا البيت وطول الطلعه نائل عينه عليه سواها سم ولا كدرت أباوعله وهو يستحي من نائل ونائل بس يخزر وعصبي ويعارك بالاوادم وماما جواهر تسكت وتهدي
وتمر الأيام وأهلي طلبوا منه يستعجل بالعرس ما رادوا فترة خطوبه بس عمي أبوه طلع مريض نايم بي مستشفى وتعذر وأهلي تفهموا الوضع ونفس الوقت ممنوع أتواصل وياه وحتى موبايل ما عندي وموبايلي ضل يم باسل شگول عليج لقاء خربتي حياتي وكسرتي فرحتي عساج بخراب حياتج .
الدوام قرب واني كاعده بغرفة عماتي واليوم راحوا يخطبون لعمي سليم بعد معانات بكد جدي منو تقبل بي زين يله تفكنا من شر لسانه ومن رجعوا فهمت عمي سليم منطي وحده من عماتي يعني زواج مره بمره ودخلت عمتي بلقيس تبجي ما تريد تتزوج .
نجاح ـ شگو بيها قسمه واجتج وتزوجي وأخلصي من جواهر ومن الخدامه .
بليقس ـ ما اريد أفهموني زواج ما أريد اتزوج فدوه أروحلج حاجي امي وفهميها هي تحبج وراضيه عليج بلكي تحجي ويه أخواني وتقنع سليم وانوب بالبصره اوف يحظي موت الاخذني وخلصني
نجاح ـ أنتِ يمتى تنسينه وتعيشين حياتج مثل البنات
منو دايم الج تالينا نضل على ايد جواهر ومرت سليم
بليقس ـ مستحيل أنساه لما أموت واهلج هما شالوا خطيتي وكسروا رگبتي وطلگوني من شامل ومستعده اضل طول عمري خدامه لجواهر وغير جواهر وما اتزوج .
جنات ـ كعدت تبجي وطلعت عمتي نجاح وشويه وكبت العيطه وصوت عمي سليم يصيح ويحجي وشويه ودخل باسل وخزرني وخفت منه وتقرب على عمتي وكبل حضنته وتبجي
بلقيس ـ فدوه لطولك خلصني من هالزواج ما اريد اتزوج خل ينطون نجاح ليش مكعدينها خدامه لجواهر
باسل ـ هذا هو ما تتزوجين واني سمعت بيج رافضه وشفت عمتي نجاح اجتي تتوسل بجديتي واجيتج
بلقيس ـ فدوه لطولك حنين من أمك .
باسل ـ لا حنين مثل خالي
جنات ـ دنكت رأسها وتبجي
باسل ـ يصير خير كولي يالله وأنتِ مظلومه ادعي لعصماء الله يسهل إلها ويگومها بالسلامه هالأسبوع عمليتها .
بلقيس ـ ياعيني شلون ما ادعيلها الله يگومها بالسلامه هي وبناتك .
باسل ـ اللهم أمين يارب، يله رايح أحاجي عمي .
بلقيس ـ ماشي يعيون عمتك .
جنات ـ باوعلي ومشه حتى ما كال شلونج ولا سلم عليه لهل الدرجه حقدك بگلبك عليه ، وبقيت كاعده يم عمتي وأجتي عمتي نجاح مبتسمه
نجاح ـ أفرحي ما ينطوج بطلوا قنعهم باسل ورادوا ينطوني بس اني هم رحت ذبيتلي دمعتين يم باسل
فدوه لطوله يدافع لعمامته الله يكوم مرته بالسلامه
بلقيس ـ امين يارب گال هالأسبوع عمليتها.
نجاح ـ والله ما اظن تتحمل لان تعبانه وبناتها نازلات وعدها وجع خطيه سلوى تسولف عليها وجهه صاير وجه العصفور
بلقيس ـ خطيه ما تستاهل الله يسهل إلها .
جنات ـ وضليت كاعده وتعشينا ولليل ورى العشه كالوا عصماء متخربطه واجتي عمتي نجاح تحجي
نجاح ـ هسه خابروا على باسل مأخذينها المستشفى .
بلقيس ـ الله يسهل عليها خطيه شلون بنيه ولا عبالك بيداء أختها سبحان الله أبداً ما يتشابهن .
نجاح ـ اي خوش بنيه ، الطيبيون لطيبات وباسل گلبه طيب والله نطاه على كد نيته .
جنات ـ يحجن ورن موبايل عمتي بلقيس وجاوبت
بلقيس ـ هلا باسل
باسل ـ عمه ادعي لعصماء وعد بركبتي وعهد عليه ارجعج لخالي شامل بس ادعيلها تطلع بالسلامه كلشي ما أريد .
بلقيس ـ تدلل يعيون عمتك هسه اتوضى وافرش سجادتي بس طمني خوما بيها شيء أسم الله .
باسل ـ والله عمه أني وحظي تعبت ويردونها تستقر حالتها يدخلونها العمليه الخلفه هم ما أريدها بس هي تكوم بالسلامه .
بلقيس ـ لا ان شاء الله ما بيها شيء خلي أيمانك قوي وكلنا نندعي الها هسه اني وعمتك نجاح نتوضى ونكعد ندعي الها .
باسل ـ عمه لازم أروح صاحوا عليه .
جنات ـ قطع الخط وبجبت ضل بالي وطلعت ماكو أحد لا نائل ولا بيداء حتى جديتي رايحه بس ماما جواهر باقيه رجعت على عمتي عمه انطيني موبايلج اخابر ليال اسأل عليهم .
بلقيس ـ هاج خابريها لما أكوم أتوضى الله يردها الك والله ما تستاهل سوده عليه .
جنات ـ خابرتها وگبل جاوبتني الو ليال
ليال ـ جنات خير
جنات ـ الله عليج عصماء خوما بيها شيء طمنيني عليها .
ـ هسه راح يدخلونها الصالة العمليات يله بعدين
ـ سدت الخط وضليت كاعده وبيدي موبايل عمتي اتصلت على لقاء بس سمعت صوتي سدته بوجهي
وليال ما تجاوبني محد يريدني كلهم يكرهوني
جواهر ـ شبيج كاعده تبجين تعاي يمي .
جنات ـ رحت يمها وبجيت بحضنها أتصلت على أخواتي ما يجاوبني عبالي اسأل على عصماء أطمئن عليها
جواهر ـ وليش تسألين شنو أنتِ محد سأل عليج ولا احد وصلج لاتصيرين قشمر الما يريدج لاتريدينه حتى لو أهلج .
ـ بس ماما يضلون أهلي بجيت وأختنكت بعبرتي .
ـ كافي تبجين شو محد باجي عليج وعلى حالج كسروا إيدج وخشمج وبعدج تحنين الهم وأمج لو هي صدك أم وتريدج وتحبج جان گالت أروح أشوف بنتي واسأل عليها جان على أقل دزت وحده من أخواتج تسأل عليج أخوج باسل من الناس من اجه گالج شلونج خيتي شنو محتاجه ، گالج لو لا
جنات ـ لا ما گالي ولا سألني أصلاً عبالك وحده غريبه
ـ شفتي ماطول هيج لاتسألين وتحنين هما أصلاً من الاساس ما يحبونج والله لأن أني ربيتج أبسط شيء لقاء بس تكفخ بيج ومسيطره عليج ومحد يحاجيها مسوينها رجال البيت وأنتِ صايره مداس ومكفخه كافي أصحي على زمانج أنتِ تزوجتي وأخذتي اللي تجبينه وغصبًا على خشومهم وطز بالكل حبوج والما حبوج لاتهتمين دام أخذتي التحبينه .
ـ هو هم هيج بعد ما اسأل عليهم وهما بعمرهم ما حبوني مثل باقي أخواتي .
ـ أي هيج أريدج يله گومي غسلي وأرتاحي لاتضلين تبجين علمود بالليل أنطيج موبايلي خابري عماد يسألني عليج .
ـ حضنتها أني من دونج ما عندي أهل اضيع
ـ أنتِ بنتي حبيبتي وأني ما أعوفج
ـ طلعت من يمها وغسلت وجهي وصفنت على نفسي خلص يا جنات إكتفي باللي عندج وعوفي گلشي وراج ومثل ما كالت ماما الما يريدج لاتريدينه .
________
ليال ـ من بعد اللي صَار وصدمتنا صدمه كبيره بجنات هي صح طبعها وعنادها ورأسها يابس بس ما تمنيت توصل لهل المرحله وتخرب حياتها بإيدها وتمشي وره كلام جواهر وحققت كل غايتها وكدرت تسيطر على عقلها وتسحبها الها وتمشيها مثل الريبورد بس خوفي النهايه ما تعجبها ولا راح تعجبنا وهذا الخايفه منه ..
أخذوها وأمي كعدت تعبانه وباسل يهدي بيها بس هي صافنه وعيونها مليانات دموع وخبية أمل كبيره بنتها
هيفاء ـ وجعتلي گلبي أختك يا باسل أحس جفصت على گلبي ومردته هيج أنسحنت سحن وروحي تطحن قهر
باسل ـ لاتزعلين يمه فدوه لوجهج كلشي ولا أشوفج مقهوره وزعلانه وهسه اروح أجيبها من شعرها تبوس أيدج ورجلج وتطلب رضاج .
هيفاء ـ لا يمه ما يحتاج عوفها خليها يجي يوم تصحى على وگتها وزمانها وهذاك الوكت ما تلكاني
ليال ـ كلنا شهكنا بخوف وكعدنا يم رجليها وباسل يبوس بأيدها قوي يمه لاهيج تكولين أسم على عمرج
لقاء ـ يمه جعل عمرج طويل لو ادري هيج يصير بيج بسببها ما حجيت انكص لساني وانشليت ساعه بلغت باسل بس والله ردت أدبها لان اذا سكتنا على غلطها
راح تتمادى أكثر .
باسل ـ يمه من عمري لعمرج جعل يومي گبل يومج لاهيج تحجين هسه أروح اجيبها الج واجي
ليال ـ راد يمشي لزمت أيده ومنعته .
هيفاء ـ لا أبني عوفها لاتجيبها عصماء بنتي تعاي أخذيني لغرفتي أرتاح وقيسيلي ضغطي .
عصماء ـ أي خاله من عيوني .
ليال ـ أخذتها عصماء لغرفتها وكوه تمشي حيلي بهتت وگلبي وجعني على أمي وباسل كعد لزم رأسه ودايخ
باسل ـ أخر وگت التغلط يزوجونها عمي هاي گواده
لقاء عيني أذا عندج كولي علمود أزوجج أحس ما أنصدم بيج بعدين
لقاء ـ لا ما عندي من يصير عندي أنتَ أول واحد أكولك
باسل ـ أدري وگلني ثقه وأنتِ عوزج قميص وبنطلون وأكعدج بالمحل وياي ، وحرامات أزوجج والمسعد
يشيخ عليج وأنتِ شايخه على الكل .
لقاء ـ أحنه أخواتك نعجبك
باسل ـ معدلات يبعد أخوجن ، خوما مثل هذج العوجه راحت وما باوعت وراها ولا التفت على أمي .
ليال ـ راح على أمي وضل يمها وأحنه وحده تباوع الثانيه ورحنا أطمئنينا عليها ونمنا وتمر الأيام وعائلتنا عايشه بنقص خاصه بعد ما عرفنا عقدوا شيخ وحتى محكمه بس بعدها لان أبو خطيبها مريض ومأجل العرس .
هي صح راحت ومشت ورى جواهر وعافت أمي وعافتنا بس نسأل عليها وباسل يروحلهم ومن يرجع أمي تضل تسأل وأبويه من يوم أخذ جنات ما أجه علينا حتى أمي لاحظت وعينها على الباب كأنما محملها السبب على كل اللي صار ونظراتها جانت كلها حزن وخيبة أمل .
وعصماء وضعها تعبان راحت الدكتوره هي وأمي وباسل ورجعوا ها بشروا شكالت الدكتوره .
هيفاء ـ حددت الها موعد العمليه يوم الخميس بعدلها اربع ايام والله كريم وأنتِ يمه عصماء بهل أربع ايام لاتصعدين لغرفتج ابقي اهنا يم البنات أنتِ تعبانه وجهج صاير وجه العصفور وأكلي وراج عمليه .
عصماء ـ أن شاء الله عمه لا تخافين عليه سهله
باسل ـ الله يسهل عليج عفيه بمريتي السباعيه .
ليال ـ ونزلت جوه وكاعدين بالليل وباسل اجه وكال
باسل ـ يمه شتكولين باجر أعزم ليث وزوجته وعمي وعمتي على العشه لان على الغده أني بالمحل على العشه أحسن .
هيفاء ـ أي يمه شگو بيها أعزمهم .
ليال ـ لقاء باوعتلي وشلت مواعين الفواكهه ورحت أغسلهن عالسنك والشباك المطبخ مفتوح صارت گبالي غرفته والبرده مفتوحه والاضويه مشتغله وعبالك يعلم گبل طلع عالبلكونه وأشتغلت جمرة الجگاره سديت الشباك والبرده ورحت الغرفتي شلون ما أباوعلك وأنت گبالي لازم اتعايش ويه واقعي الحقير ..
ثاني يوم من العصر أني ولقاء نسوي العشه سويت ببتجانيه ولقاء ثرمت سلطه ونظفت الخضروات وباسل جاب كباب ومشاوي وأمي جهزته وشوه عالمنقله بالحديقه وأني مخليه صينيه دجاج بالفرن وكملنا كلشي
وعطرنا الأستقبال والبيت نظيف واجتنا أمي .
هيفاء ـ عصماء ليال لقاء أذا گملتن دخلن سبحن وكشخن مره غريبه أول مره تجينا .
لقاء ـ نعجبج يمه .
ليال ـ سبحنا ولبست كلابيه خليجيه مرتبه ورفعت شعري وذبيت الشال ولقاء وعصماء كذلك ورحت المطبخ شفت الدجاج وسمعنا صوتهم بالحوش وباسل وامي يرحبون ويهلون بيهم ،غمضت عيوني وأخذت نفس واجهي ليال طبي بعينه كوني قويه ليال أبداً لاتبنين ضعفج اله يارب يارب اخذت نفس وصاحتني لقاء .
لقاء ـ راح يدخلون تعاي أمي كالت سلمن وباركن فرصتج ولح أجتي والله جابها شلون اريدج قويه يله
ليال ـ عدلت شال وغطيت صدري زين واخذت نفس وطلعت بصف لقاء وعصماء وأنفتح الباب ودخلوا وهو گبل رفع عينه اجتي بعيني وثول ضل صافن وعمتي سلوى دفعته وهو سلم بس ارتبك
ليث ـ السلام عليكم .
ليال ـ وعليكم السلام هلا بيكم تقدمت باوست عمتي سلوى ولزمتني تبوس بيه من كل گلبها وتقدمت على ايناس بصفه باوستها بحيث وجهي وعيوني صارت بوجهه وأبوس بيها واحجي الف هلا بيج گلبي أستاذتي جيتج عزيزه وغاليه والف والف مبروك بالرفاه والبنين يارب .
أيناس ـ حبيبتي ليال الله يبارك بعمرج تسلميلي شنو هاي ليال عائلتج كيك تخبلون .
ليال ـ عمري كلج ذوق وأبتسمت وگفت على صفحه وعدلت شالي وباوعتله مبروك أبن عمي .
ليث ـ الله يبارك بيج بنت العم .
ليال ـ توترت وأمسح بوجهي وعصماء ولقاء باركوا وسلموا عليها ولقاء گالتله
لقاء ـ الف مبروك ليث أختيارك ولا غلطه هم جمال وهم ثقافه واخلاق تخبل ما شاء الله عليها ، الله يسعدكم .
ليث ـ تسلمين .
باسل ـ يله اتفضلوا اتفضلوا يا هلا بيكم .
ليال ـ دخلوا الأستقبال ورحنا المطبخ ولقاء سوتلي لايك سگتي وخليها
لقاء ـ عجبتيني لا وتحجين سريع لباقه بالكلام اطك بالكاع وأبتسامتج بويا تفلش هيج وجه دخن ، دخن شنو جمر بس يستاهل والصراحه زوجته تبين كلش حبابه ولطيفه .
ليال ـ أي والله الله يهني سعيد بسعيده .
لقاء ـ بس لو أعرف منين جايبتها
ليال ـ أثنينا ضحكنا من جديتي دائماً أسمعها يله خل نكوم نحضر العشه لو نقدم ضيافه بالأول .
ـ لا نقدم ضيافه بالأول وأنتِ قدمي
ـ لا مستحيل أنتِ قدمي .
ـ لا أنتِ علمود يعرف أنتِ تخطيتي مو هامج زواجه ومن تقدمين أبتسمتي هيج حرگي گلبه شعوطي
ـ منين طلعتي بيها ، حضرت الضيافه وأنطتني الصينيه واخذت نفس خرب ما أكدر هاج أنتِ ودفعتني
ـ دخلي وبلا فهاوه يله فضيني اني لو بمكانج اخلي يكره نفسه حتى عشه ما يتعشى شبيج يحظي .
ـ دخلت وهي كاعده بصف عمتي وهو لوحده كاعد مقابلهم تقدمت ضيفت عمتي وأيناس أخذوا وصلت لعنده عبالك ملك الموت يقبض روحي قدمت الصينيه وحجيت بصوت يرجف أتفضل ابتسمت وبداخلي غصه أخذ ورفع عيونه وباوعلي گبل مشيت وبأيدي الصينيه كعدت من يم الباب واجتي أمي وعصماء كعدوا توني اريد انطي الصينيه لعصماء تشيلهن طلعت وعافتني خرب بحظي وخرب بافكارج لقاء هجمتي گلبي ناقصه صخام تالي كمت جمعت الكلاصات وصلت العنده ما رفعت راسي أبداً وطلعت وحلفت بعد ما ادخل خرب شهل العذاب .
لقاء ـ شبيج
ليال ـ لاتجبريني فدوه عوفيني بصخامي مو سهل عليه والله مو بأيدي جان حبيبي وبيوم وليله اضيفه
هو زوجته شيصير بيه تردوني أموت .
لقاء ـ خرب بعقلي اسفه والله شمدريني شفتج بالبدايه طبيعية گلت سباعيه ما تهمين بس ادري بيج وبگلبج يله أبقي بعد اني أكمل عنج .
ليال ـ تمام، وگملوا شوي وصبينا العشه وأني ولقاء وعصماء بقينا بالمطبخ وأجه عمي كريم هم ما طلعت وتعشينا وصبيت جاي واجه باسل أخذه وعصماء بس تعصر بروحها شبيج
عصماء ـ ما اعرف متضايقه حيييل
لقاء ـ حتى ما تعشيتي خاف تعبتي وضليتي واكفه ويه باسل من يشوي لو بناتج شمن ريحة مشاوي ويردن يطلعن .
عصماء ـ أووف
ليال ـ عصماء شبيج كامت تلوب أمشي غسلي اخذتها غسلت بس بعدها متضايقه اكول لباسل نوديج
عصماء ـ خل يرحون عيب
ليال ـ شعليج بيهم أنتِ أهم أمشي أرتاحي كعدت عالكرسي ورجعت كامت ها
عصماء ـ ما بيه بعد راح أموت .
ليال ـ اسم الله لقاء ركضي عليهن بسرعه لقاء ركضت عليهم وزاد الوجع يارب بسرعه باسل
عصماء ـ أريد أمي روحي راح تطلع يمااااا
ليال ـ باســــل واجه ركض هو وامي وعمتي سلوى
باسل ـ ليش ما حجيتن السويج وينه اصبري بس اصعد اجيب السويج واجيج اصبري عيني .
ليال ـ وركض جاب السويج وعبايتها خطيه خايف أكثر منها وشكد حلو لبسها بأيده واخذها السياره .
ليث ـ أني اسوق
باسل ـ لا اني اسوق يمه يله عاد هي عبايه لبسيها وتعاي عصماء اخذي نفس يارب الطف يا رب يا مسهل
ليال ـ صعدوا ولقاء جرت عبايتها خرب اني شبيه واكفه
لقاء ـ بسرعه لبسي نروح وياهم ركض .
ليال ـ اي دورت على عبايتي وصاح عليه
باسل ـ ليال ركض صعدي جنطة الملابس فوك بسرعه
ليال ـ خرب نسينا صعدت ركض ادور عليها ماكو وهو يدك هورن خبصني ولكيتها ونزلت ركض وما لكيتهم وليث دكلي هورن
ليث ـ تعاي ويانا راحوا كدامنا ، يله صعدي لما اقفل البوب .
ليال ـ وباسل
ليث ـ صعدي هسه مو أكولج راحوا عصماء تعبت مو مال يضلون واكفين .
ليال ـ صعدت بصف أيناس وهو نزل قفل البوب وأجه وشغل وطلعنا وبالطريق خابرني باسل ها باسل
باسل ـ جبتيها مو هي وملابس البنات
ليال ـ هي جنطتين جبتهن .
باسل ـ أي هذا هو يله أستعجلوا خاف تدخل وملابسها شلون
ليال ـ هسه نجيكم
ليث ـ لا يخبص نفسه دقايق نلحك بيهم وهم لما فحوصات ويجهزونها خوما كبل يدخلونها
أيناس ـ بس لا هي خطيه مبين عليها ولاده يمه خاله اني صار عندي وجع وگمت أخاف .
ليال ـ قطع الاتصال وعمتي جاوبتها .
سلوى ـ بعدج وينج توه نكط بطنج
ليال ـ بداخلي حامل! گبل باوعلي بالمرايا كأنما يشوف ردة فعلي وتجاهلته وباوعت عالشارع وأحسه يباوعلي وراسلت لقاء خرب بحظ الكواد شلون تجمعنا الصدف .
لقاء ـ شگو شبيج
ـ ليش رحتوا وعفتوني
ـ ها أجيتي وياهم
ـ أي
ـ يله شتسوين عادي تعايشي ويه الوضع لازم تتقبلين واقعج ليال لان هو قريب عليج وشيء أكيد هواي تتصادفون خليج طبيعية لاتوترين .
ـ هسه عوفينا عصماء شلونها
ـ شلونها كاتمه وجعها وتعصر بروحها ما الها صوت وباسل يصيح عليها يگولها عندج وجع عيطي تكوله عيب خطيه تستحي من صوتها لو تشوفينها شلون صارت والله خايفه عليها .
ـ الله يكون بعونها
ـ يله ادعبلي على ليث وجعصي وصلنا باي
ـ ليا أدبسزز ، رفعت رأسي لكيته يباوعلي من باوعتله غير نظراته وأيناس لازمت رأسها مثل دايخه
أيناس ـ ليث نفسي كامت تلعب .
ليث ـ ها خاف من السرعه أخفف
سلوى ـ يا عمه گتلج أبقي لاتجين ليش أجيتي .
أيناس ـ لا خاله ما بيه شيء بس لعبان نفس شويه
ليث ـ هسه نوصل وأسويلج فحوصات هاج بطل مي
ليال ـ انطاها بطل المي شربت ولاحظت أهتمامه بيها والصراحه تستاهل الله يسعدها وياه وأني مثل البومه شمكعدني بينكم لو هذا هم حظي شگول عليك باسل عفتني ورحت .
وصلنا ونزلت وأخذت الجنط وعمتي سلوى اجتي وياي وهو أخذها وراح يسويلها فحوصات وصلت لقاء وعصماء وأمي ماكو ها دخلت
لقاء ـ لا والله
ليال ـ أسم شگو شبيها عصماء .
لقاء ـ حيل تعبت بالسياره من جنت احجي وياج هي سگتت من التعب .
سلوى ـ يمه الزهره وهسه وينها
لقاء ـ بالغرفه الدكتادره يمها طلعوني ضلوا بس باسل وأمي ، ليال خايفه لو تشوفين حالة باسل شلون صار .
سلوى ـ هي من شفتوها تعبانه سوا الها عمليه
لقاء ـ غير دكتورتها گالت بعد وحددت موعد شمدرينا
ليال ـ لقاء تبجي وعمتي سلوى دخلت وكعدنا ننتظر واجه ليث لقاء حجتله وطلع باسل كوه يمشي وامي تهدي بي
هيفاء ـ ولك يمه گول يالله وعصماء سباعيه هسه شدولها مغذيات وهما أعرف وتصير زينه وتدخل العمليه وتطلع بالسلامه هي وبناتك .
باسل ـ بمه خايف ينكسر گلبي ما اتحمل والله أذا صارلها شيء والبنات ما اريدهن أريد أمهن .
ليث ـ باسل شو هيج يمعود أتوكل شكو قابل وتصير هيج حالات ما أعرفك هيج جبان ، شدعوه عمي عصماء محتله الگلب كله تعال لك شنو السر علمنا
باسل ـ ما تجوز مني لخاطر ربك .
ليال ـ حتى ما بي حيل يحجي اخذه ليث على صفحه يحجي وياه ودخلنا عليها الحمدلله صاحيه ها عصماء أنتِ سباعيه لاتخوفينا عليج .
عصماء ـ أريد أمي خابرتوا عليها .
هيفاء ـ مو كدامج خابرنا والدنيا ليل يا بنتي اهنا اهنا وين تجيج خطيه الصبح هي يمج وهسه أختج بالطريق جايتج .
عصماء ـ وينها ليش تأخرت
باسل ـ نائل وأبويه وجديتي هسه يجون وتجي أختج اصبري گلبي هانت ما ضل شيء .
ليال ـ تقرب كعد يمها ولازم ايده وأني ولقاء نباوعلهم
وهمست بصوت ناصي
عصماء ـ باسل
ـ عيونه گولي
ـ أني أحبك
ـ وأني هم مو بس أحبج أعشقج
ليال ـ لزمها من أيديها ويبوس بيها ودخلوا أهلي جديتي وابويه باسها من رأسها وبيداء تبجي وتقربت عليها تبوس بيها وتبجي
بيداء ـ عصماء خيتي لاتخافين ماكو شيء تمام
ليال ـ حاضنه أيد أختها وكلنا خايفين عليها وأتصلت جنات حجيت وياها وغلقته بعد وگت على أتصالج واجو جهزوها وطلعت وباسل وياها ما عافها ولا ثانيه ودخلت الصاله وضلينا كاعدين ننتظرها وبيداء بس تبجي ونائل يسكت بيها
هيفاء ـ ليث لعد مرتك وين .
ليث ـ خابرت فارس أجه أخذها شوية تعبت .
لقاء ـ بهمس ليش شبيها .
ليال ـ داخت ونفسها لعبت
ـ ليش
ـ حامل
ـ لا بربج لاتكولينها شبسرعه حبلها
ـ لقاء لاتلعبين نفسي بسوالفج شمدريني اروح أسأله
ـ لا عزه شسألين منه صخام بس أقصد شبسرعه هذاك اليوم تزوجوا
ـ هو اليتزوج شينتظر طبعًا يخلف .
ـ أحم أخاف قبل الخطوبه أخذها وهي جانت يوميه يمهم تذكرين .
ـ لا تظنين السوء ليث ما يسويها وصارلهم خمسين يوم من تزوجوا ومثل عصماء گبل حبلت .
ـ أويلي حاسبة الأيام بالملم لعد هاي هي أني عبالي مو هواي طلع الحساب المضبوط عندج .
ـ سگتي عمتي سلوى أجتي وسگتنا
ـ تدرين من شفت حب باسل لعصماء أتمنى الله يزرقني برجال نفس خوفه وحنيته شكد حلو أحس حبهم نظيف ونقي وعالفطره لا يعرفها لا شايفها كلمن واقعه شكل نفس حب قبل هذا الحب الجديتي تسولفنا عنا وسبحان من زرع هالحب والموده بينهم لدرجه حيل يخاف يفقدها الله يحفظهم .
ـ أي حبهم حلو الله يدومهم ويرزقج الأحسن يارب ويحبج وتحبينه وتخبصينه بي
ـ يمعوده وين أكو حب كلاوات
ـ لا ليش
ـ وينه شو ما شفت حب صادق وأستمر للأخير مو هايته واكف كدامنا تزوج وعافج لو باسل وعُلا .
ـ لا موجود لاتأيسسين من رحمة ربج وأظن أكو معجب سري
ـ منو هالمعجب شو ما أدري بي گوليلي عليه لان ولا واحد أنعجب بيه وبحمالي الخارق عبابتلهم أي والله عاد اني مكطعه روحي عليهم .
ـ أستاذ أمجد
ـ لا هذا مثقف ما يحب
ـ خرب بيومج ليش المثقف ما يحب
ـ ما ادري شو أحس الحب بس لكلاوجيه والسرسريه وصعب ونادر تلگين الوفي بينهم والمثقف تلكينه ملتهي بمستقبله هذا أضمن عليه دوده مال كتب
ـ راقي وعقله ناضج هذا بالأخص حبي لان يشبعج حب
ـ ما تسكتين أنتِ والحب مالتج ما أحب أضل هيج أحسن شبينا العوانس نخبل احسن ما نصير عواريس ويعرسون علينا بخبالتهم والله الزلم ما يعرفون يحبون عقلهم طگه ونص
ـ ليش الحب حلو
ـ شنو حلاته من قهرتج لحد بگلبي باعي عليه كل شويه يبوك نظرات خطف ناحيتج ما ادري ليش يحبون وبعدين يدگون الناقصه والله كواويد مو بأيدهم مثل المطلگها ويباوع على سيگانها .
ـ سدي موضوعه ترى فد حقدت عليه ما أدري أنتَ تزوجت ليش بعدك تباوعلي ومن أباوعله يسوي روحه ثكيل وما مهتم .
ـ حقاره بدمه تجاهلي ولبسي وأحتقري مثل ما أحتقرج
ـ هو هم هيج ، نحجي بس أحنه كاعدين عالكراسي بعد مسافه عنهم وهو مقابلنا تجاهلته وبعد أحاول ما أتواجد بالأمكان المتواجد بيها بس هسه صارت غصب عالجايات يصير خير .
وضلينا كاعدين وصاحوا باسل راحلهم وأمي وراه وكف وشويه وصاحلنا رحنا وأمي شايله وحده وهو وحده فدوه
باسل ـ تعالن شوفن بناتي ، فدوه للخقلجن هلا بيجن بابا حبيبي هذن عماتجن هاي لقاء وهاي ليال .
ليال ـ دمعت عيوني وهو مخلي وحده بحضنه وعيونه تدمع وصافن عليها وفرحان أخذتها منا ولقاء أخذت وحده بس شويه وأخذوهن من عدنا للخدج وبقينا ننتظر عصماء ما گالوا شوكت تطلع .
باسل ـ كالوا هسه بس يگملونها ، الف الحمدلله ربي محمود مشكور على عطاياك
ليال ـ الف الحمدلله وبقينا ننتظر وطلعوا عصماء وصاحيه وأخذوها الغرفه والكل دخل يمها باركلها وأختها ضلت كاعده يمها وأبويه وجديتي دخلوا تحمد الها على السلامه وراحوا للبيت .
ليث ـ وأخيراً صرت أب الف الحمدلله على سلامتهم ويتربون بعزكم ودلالكم .
باسل ـ الله يبارك بيك ويوم الك حبيبي ليث ما قصرت
ليث ـ ما مسوي شيء هذا واجبي .
ليال ـ واكفه بصف أمي وأتصل موبايله وطلع برى وشويه ورجع على عمتي كال الها
ليث ـ يمه أني رايح البيت تجين وياي لو تبقين
سلوى ـ لا يمه أجي
ليث ـ يله يابه أحنه نترخص والف الحمدلله على السلامه مره ثانيه وباسل حبيبي أي شيء تحتاجه خابرني .
باسل ـ أن شاء الله ضلعي
نائل ـ أحنه هم لازم نمشي وأعتقد ما يخلون احد يبقى
بيداء ـ أني أبقى يم أختي .
هيفاء ـ يمه ليال لقاء گومن روحن .
لقاء ـ خلي البنات يطلعن ونشوفهن .
هيفاء ـ تلحكين تشبعين منهن وهنا بالخدج روحن يمه تعبتن واني وبيداء باقين وباسل ويانا .
سلوى ـ كومن روحن ويانا نوصلجن .
لقاء ـ نائل ما تروح
نائل ـ لا باقي هسه روحن أنتن مو تباتن بالبيت وحدجن ليث نزلهن بيتنا .
سلوى ـ لا شلون يباتن بالبيت لوحدهن يمه هذن بنياتي يله يمه گومن يله ليال حبيبتي .
ليال ـ يمه خلي أبقى يمكم .
هيفاء ـ وين تبقين يا أمي روحي ويه أختج والصبح نجي .
ليال ـ تمام ، وطلعنا وياهم وهو يمشي كدامنا هم نرجع وياه ، وشغل السياره وطلعنا البيت ورن موبايله
ليث ـ ها عيني اي بالطريق شوية أنوب أوصل أي أجتي ويانا ، هاج أحجي وياها
سلوى ـ منو ايناس
ليث ـ أي
سلوى ـ هلا يمه أي الحمدلله جابت بنات اي والله خطيه تعبت الحمدلله الله سهل الها لا اختها وعمتها ضلن يمها واحنه والبنات رجعنا اي هسه طلعنا ماشي يمه الله وياج ، تردين ليث ، هاك تحجي وياك
ليث ـ ها ، ماشي من أرجع عود .
ليال ـ وصلنا ونزلنا يم الباب وهما دخلوا سيارتهم وشفتها واكفه يم البلكونه تنتظره وسمعته صاح بيها
ليث ـ شمطلعج بهل اليل رجعي الغرفه .
لقاء ـ واضح هواي متعلقه بي ، حقاره علق ناس وعاف ناس متعلقه بي حسبي الله عليكم من زلم حب ما تعرفون تحبون .
ليال ـ ما حجيت وأبويه فتحلنا الباب دخلنا والبيت اظلم الكل نايمين ودخلنا يم عمامتي نايمات بس جنات كاعده وبأيدها موبايل!
تجاهلتها وذبيت عبايتي وغسلت وگبل تمددت من التعب البيه أريد أنام ما أكعد وغصب جاي أنجمع بيك كأنما القدر مو راضي على فراقنا وجمعنا مره ثانيه لكن بإقدار مختلفه
وأتمنى من گلبي ما تجمعني ثانيه وحده وياك على الأذيه الشفتها منك والجرح ما تركته يطيب ويوميه طالع بوجهي وكلما أتذكر نظراته اليه الله يلعنها اتحسر واتألم ماشفت منها بس الوجع لگلبي ، نعلة الله على حب الأقارب اللي يخلينا نتعذب .
نمت والصبح كعدت على صوت عمي سليم يصيح خير أن شاء الله شگو ودخلت لقاء شبي عمي .
لقاء ـ سكتي وخليها برد گلبي
ليال ـ شگو شبي
ـ لكف جنات أفندي تخابر بالحمام وغسلها غسل بالغلط فد موقف يسوه عمرها .
ـ يبــًوه .
ً ـ تستاهل هو صح صار خطيبها بس ماكو هيج صلافه وافقوا أحترميهم وصبري لما تزوجين شگو تخابرين بالحمامات تجيبين الشبه على نفسج وكل هذا علمود رجال وحب لعبت نفسي قرف والله .
ـ وين راحت
ـ على الماما ذبتلها دمعتين
ـ ولا سألت مو هم سألتج على عصماء
ـ أبداً وأني هم لبستها برجلي ختولي يله أمشي نروح لبيتنا أختنكت من اجي أهنا حتى نوم ما أعرف أنام
ـ يله أمشي ولبسنا وطلعنا وعماتي يغسلن وسألنا على عصماء وعمتي بلقيس مبتسمه .
لقاء ـ شبيج عمه توزعين أبتسامات خير
بلقيس ـ يعني الواحد ما يبتسم، ضلن تريكن لما يجون وروحن .
لقاء ـ لا عمه البيت البارحه عزمنا ليث وزوجته وعفنا طاگه بي عبوه هسه الريحة كابه لباب الحوش .
ليال ـ يله مع السلامه وطلعنا لبيتنا وبلشنا تنظيف لما كملنا صرنا جنايز ، لقاء خابري باسل شو تأخروا .
لقاء ـ خابرته بعدهم ، راح اطلع لحم وأنتِ طبخي .
ليال ـ ماشي طلعي لما أغسل الحوش وغسلت وطلعت غسلت كدام باب البيت وأنفتح باب بيت عمي وطلعوا هو وياها أجوا علينا عدلت شالي وصلوا يمي وحجه .
ليث ـ عود گوليلي اجي أخذج مو تجين لوحدج
أيناس ـ ماشي ، صباح الخير ليال .
ليال ـ هلا عيني صباح النور أتفضلي أتفضلي .
أيناس ـ أني جايه عليج ممكن نحجي .
ـ أي هلا بيج ، بس خير صاير شيء
ً ـ الأفضل ندخل جوه ونحجي .
ـ أي تفضلي دخلت البيت وطلعت لقاء سلمت عليها وباوعتلي وهزت رأسها ما أدري والله
أيناس ـ أهلج رجعوا لو بعدهم لأن أريد أكعد وياج لوحدنا
ليال ـ لا والله بعدهم اي عادي أتفضلي بالأستقبال
أيناس ـ لا خلينا اهنا بالحديقه أفضل
ليال ـ براحتج
لقاء ـ أني أخليكم وأسويلكم جاي
ليال ـ كعدت عالكرسي وكعدت باوعتلي وعيونها دمعت ليش تبجين صاير شيء
أيناس ـ ليال ليش ضميتوا عليه ليش ما حجيتوا وأستغفلتوني وخليتوني أحس روحي طرف ثالث ويمكن أني السبب بهدهم علاقتكم ليش ما حجيتوا وبقيتوا ساكتين .
ـ عن شنو تحجين
ـ يعني ما عرفتي عن شــنو أحجي ، أحجي عن علاقتكم وحبكم أنتِ وليث ،ليش ما حجيتلي قبل الخطوبه جان ممكن أنهي كلشي وانسحب ولا أكون انانيه وأخذ شخص من حبيبته .
ـ أنتِ منو كالج
ـ ياقوت حجتلي گلشي أني البارحه من اجيت اتعشى يمكم ما جنت أدري ولا لاحظت لان ما مخليه بالي والله شاهد حبيتح أنتِ وعائلتج من عرس ياقوت شفتكم وبس أسولف بيكم وبحمالكم كدام ليث ما لاحظت عليه هو جان يحبج وأنتِ تحبينه وأني والله على نياتي ما عندي هاي السوالف وتزوجت وحبيته عالفطره ما عبالي عايف وحده وراه تحبه
ـ بس أيناس
ـ خليني أكمل رجاءً ، وحتى البارحه من رحتي ويانا وصلناج وتعبت وفارس اجه أخذني ومن رجعت لكيت ياقوت ورجلها جايين يتعللون يمنا وسألتني ليث وين كتلها ضل يم باسل وخطيه عصماء تعبانه وأني كتله ابقى وبهيج يوم مهم ويه أبن عمك ، حجتلي وگالت أنتِ عفتي رجلج يمها وهي تحبه وما ناسيته ويمكن لحد الأن تحجي وياه وخابرته وكتله تعال بس ما بينت بس ردته يجي لان من حجتلي أني الف فكره برأسي وحجينا بتفاهم وردت بس يحجيلي ما حجه والليل كله ما نمت لما صبحت الدنيا .
ـ وليش هو ما حجالج
ـ هو أجاني كالي اذا تردين تعرفين كلشي روحي احجي وياها ردت أراسلج كالي روحيلها للبيت أفضل وأعرفي وجهه النظر منها مو مني هو أكتفى بالسكوت واجيتج أفهم وأعرف منج صُدك بعدج تحبينه .
ـ شوفي هو صح كانت بينا علاقة حب بس مو مثل أبالج أصلاً مكالمتنا ينعدن ورسائلنا كذلك وهو أبن عمي وتقدملي واني رفضت لأسباب ثانيه وأنتهى كلشي من ساعتها وثقي وصدكي ماكو شيء بينا
ولو أريده جان حجيتلج جان أصلاً ما خليته يتزوج ولا حضرنا الحنه حتى من عزمناكم لو باقي شيء بگلبي اله جان ما طلعت وواجهته وسلمت عليه وباركتلكم
وأكو هواي طرق تخليني أمنعه يتزوج مو صح
ـ اي صح
ـ بس أني عفته ونهيت گلشي وهو اتخطاني واني تخطيته وكلمن رجع لمكانته الطبيعه أولاد عم وبس
فه لاتخلين أبالج غير أفكار عنه أو عني بس بالنسبه اليه نسيته وشلته من گلبي من زمان والله لا يوفقني اذا اباوعله بغير نظره وهو متزوج والما أرضاه على نفسي ما أرضاه على غيري وأستاذتي اكو مواقف حلوه جمعتنا
ـ والله أعرفج ومن عرفتج عن قرب الله شاهد حبيتج وأهلج مثلج قلوبكم نظيفه وتنحبون ومن گالتلي ضليت مصدومه حتى ما سويت مشكله لان گلت الا اتأكد بالأول وسألته ما جاوبني وبحيثت على حساباتج بموبايله حتى رقمج أخذته من ياقوت ما طلعلي كلشي
ـ أي لان أني حاظرته من زمان ولا راح بيوم أفتحه وما عندي شيء وياه وأتمنالكم السعاده من كل گلبي والله يكومج بالسلامه أنتِ وطفلج ، وأطمئني وأرتاحي ليث الج وأني ناسيته من زمان وشمدريج يجوز عن قريب اتزوج وأول المعزومين أنتِ ضحكت
ـ الله يسعدج ويرزقج انسان يحبج على طيبة گلبج ولسانج الحلو والله يطمن گلبج مثل ما طمنتي گلبي
ـ تسلمين عمري وأي شيء تحتاجينه حساباتي يمج وأعتبريني صديقه الج .
ـ فدوه الكلبج حبيبتي ، يله أني اروح تأخرت خاف اهلج يجون عيب ، عود أجيكم غير يوم ابارلكم على البنات
ـ الف هلا بيج يمتى ما تجين كل خطوة بهلا البيت بيتج .
ـ تسلمين حبيبتي مع السلامه
ـ الله وياج عيني طلعت وياها وهو جان واكف يم باب بيتهم ينتظرها وشافها وتقدم عليها وسديت الباب ورجعت مقهوره حسبي الله عليج ياقوت على هالكلام يا حقيره .
دخلت البيت وحيل مقهوره واجتي لقاء
رواية #بنات_الحجي_سعيد
بقلم الكاتبه شمس العراقيه
#الحلقه_السادسه_عشر_١٦ ♡ #القسم٢
____
لقاء ـ شتريد منج بس لا عرفت ردت أتسمع بس ليث شفته گبالي خفت يشوفني اتنصت عليكم فشله منه.
ليال ـ أي عرفت حجيت الها گلشي
ياقوت ـ يا حقيره يا ياقوت سمانيه ليش هيج تحقر مو خطيه والله قهرتيني أحسها ما تستاهل
ـ أي والله أني شبعت قهر هسه تعرفين بأخوج حبني وحبيته وصارت مشاكل وما النا قسمه وأنفصلنا ليش تفتحين دفاتر قديمه وتحجين لمرته گلشي لا وكايله الها بعدها تحبه ويمكن لحد الان تحجي وياه هاي شتحطيلها وتطيب .
ـ سمانيه حيه صفره تلدغ وتضم رأسها وهسه أيناس تفهمت گلشي خطيه
ـ اي فهمتها وأن شاء الله ما ترجع ياقوت تخربها مره ثانيه واصير سبب بمشاكل بحياتها وهي بعدها عروس وحامل شــنو ذنبها واللة أني طبني مرض وخرب بهل الحب لا من جنت وياه مرتاحه ولا من عفته أرتاحيت لعنه والله لعنه ساعة السوده فتحت گلبي وحبيت .
عفتها ودخلت سبحت وصفنت ويه روحي زوجته ما تستاهل وما الها ذنب وأذا هو ما محترم مشاعرها ويشمر بنظراته اهنا واهنا أني لازم أكون احسن منه ونهائي ما أشوفه ولا اباوعله وهو من يومه أناني حتى ما كلف على نفسه يحجيلها دازها عليه يله بعد احسن علمود توصله كلامي ويعرف اني تخطيته من زمان والعذاب اللي جاي اعاني فهو على أنقهر روحي فقط لان ظلمت نفسي ويه شخص أناني تخلى عني وعن حبي وفائي وسنيني الحبيته بيهن وراح علمود أسباب تافهه
وبالأخير ما كلف على نفسه يحجي لزوجته شگد مكروه
طلعت ولكيت عصماء جايه وأمها وياها سلمت عليها
ودخلوا بغرفة أمي والبنات وينهن شو مو وياكم .
عصماء ـ باسل ضل يمهن لما تجي الدكتوره تكمل فحوصات واذا يحتاج يبقون او يطلعون هسه كالوا تجي
ليال ـ الله كريم شلونج أنتِ
عصماء ـ لا الحمدلله أكو وجع بس مو مهم المهم سلامة بناتي وبخير وما بيهم شيء .
ليال ـ الحمدلله ، يله اخليج ترتاحين طلعت وأمها دخلت يمها هي وبيداء ورحت عليهن لمطبخ وعمتي سلوى موجوده سلمت عليها .
لقاء ـ باسل خابر گال طبخن غده ابويه ونائل ومرته وامها وامي هسه راح تروح هي وعمتي تتسوك
ليال ـ اي عادي نطبخ لاتشيلين هم وجهج صوفر
لقاء ـ خرب ما احب العزايم ادوخ انطوني المقبلات اي والله ابدع بيهن يله أنتِ ما تقصرين .
ليال ـ وبلشنا وامي تسوكت وطبخنا الغده واجه باسل هو ونائل كل واحد بيهم شايل وحده ونائل يبوس بيها فدوه للبنات ما سميتوهن لو بعدكم .
نائل ـ أي سماهن أبوهن هاي أسمها غنى واللي بيد باسل أسمها جنى بس بنتي أحلى من هذيج عبالك وكحه وعرمه هاي فد عاقله وبس نايمه .
ليال ـ أباوع لبيداء صافنه ونائل فرحان بيها خطيه لحد الان ما حملت جاوبته الله يرزقكم ان شاء الله ويترس حضنكم منو سماهن .
نائل ـ باسل سماها غنى وخالتي هيفاء سمتها جنى
ليال ـ ودخلوا الغرفه واجتي امي وباوعتلي عرفت تريد تسألني عليها
هيفاء ـ هم شفتي أختج
ليال ـ أي شفتها
ـ شلونها زينه
ـ أي لايضل بالج
ـ ما عرفتي شوكت يأخذونها
ـ لا ما سألت والله ، اسألها
ـ لا عوفيها ، يله أروح اسبح حفيداتي وكملن الطبخ .
ـ راحت ورجعت كملت الطبخ وتغدينا كلنا وباسل يم عصماء وبناته فرحان بيهم حتى ما أكل وكلما وحده من بناته تكعد يسكت بيها وينطي علاج لعصماء وحاضنها ويمشيها ومن تتوجع يحضنها ويحاول يخفف عنها وهذا أكثر شيء تحتاجه المرأه باسل زوج وأب حنون
الله يدوم حبكم لبعض فعلاً عصماء العوض لباسل .
بدأ الدوام ورجعت جنات أدوام بس ولا يوم مرت على أمي ولا سألت وأمي عينها على الباب الله يهديج يا جنات .
______
بيداء ـ من أجمل أيام حياتي يوم نائل دخل حياتي كل حياتي تلونت بالألوان حلوه حب وحنيه وسند وعوض عن كل گلشي وأخيراً تحقق حُبنا وأنجمعنا بكل حُب .
كاعده ودخلت خالتي عليه
جواهر ـ ها بيداء شلونج هم خايفه
بيداء ـ هلا خاله ، أي .
ـ لاتخافين أبني ما يخوف وديري بالج عليه هذا أمانتي أخليها يمج والصبح أجيكم يله كومي غيري بدلتج .
ـ لا خاله أني أغيرها تسلمين ما يحتاج .
ـ لا كومي
ـ أخذتني الحمام وساعدتني وجابتلي ملابسي
ـ يله سبحي هذن ملابسج والمعطرات خلي منهن رتبي نفسج وطلعي ، شو جيبي بدلتج .
ـ طلعت وسبحت وگملت وطلعت لكيت بس نائل موجود وباوعلي وأبتسم
ـ كملتي طقوس أمي
ـ أي
ـ خايفه حبيبتي .
ـ نزلت رأسي ما جاوبته وتقرب عليه ورفع حنجي وأخذني اله وخلصت هالليله على خير والصبح طلعنا گبل للبيت وأستقبلتنا خالتي تبوس بابنها وتقرأ ايات والمعوذات وكعدنا واحس نفسي مثل الغريبه وهو يضحك ويسولف وياهم وخالتي حاضنته وكل شوي تبوسه حتى گمت اغار عليه باوعلي وحس بيه غمزلي
وگمت الحمامات غسلت واجتي خالتي
جواهر ـ وين نيشانج
بيداء ـ شتسوين بي خاله
ـ شــنو شسوي بي نيشانج أشوفه
ـ ما يحتاج تشوفينه خاله
ـ لا أشو الا أشوفه وينه
ـ خاله ترة مو غصب وهذا شيء خاص بينا اني وزوجي
ـ وزوجج أبني ، يله خل اشوفه
ـ أنزعجت وأجه نائل وحجيتله
نائل ـ يمه ما يصير شيء خاص بينا
جواهر ـ وخاص على أمك أريد أشوفه
نائل ـ يمه والله ما يحتاج بس ميخالف شوفي
بيداء ـ نائل
نائل ـ ميخالف وينه
بيداء ـ انزعجت وفتحت الجنطه وطلعته وشافته وباوعتلي
جواهر ـ بقي يمي
بيداء ـ أستغفر الله شتسوين بي خاله ما يصير
نائل ـ يمه كافي
جواهر ـ ماشي هاج ضمي وصعدي غيري ملابسج وطلعت الج كلايبه مالت عروس لبسيها ونزلي علمود اصبلكم الغده يله أمي صعدوا الغرفتكم .
بيداء ـ صعدت وأجه حضني ودخلنا غرفتنا مو عبالك خاله لحت زايد
ـ ميخالف حبيبتي تحمليها هي حريصه وأدقق بگلشي يخصني لان تحبني وأكيد أنتِ تحبين كل شخص يحبني وأمي أكثر الأشخاص تحبني
ـ حقها وحيدها وأبنها حنون وماكو منه
ـ يا روحي ، تدرين شگد أعشقج أني
ـ أي أدري أفعالك هي ثبتتلي حبك وما تخليت عني الا صرت مرتك ، أنت شجاع قلبي .
ـ أنتِ روحي وحياتي كلها .
ـ غمرني بحبه وحنانه ونمننا وأندك الباب حبيبي الباب
ـ هاي أمي ، يمه نايمين بعدين
جواهر ـ الغده جاهز يمه خاف جوعانين
نائل ـ بعدين يمه
جواهر ـ براحتك وليدي نام وأرتاح نوم العوافي يا نور عيوني .
بيداء ـ أختفى صوتها حضنته ولعبت برموشه حبيبي
نائل ـ ها روح حبيبج .
ـ أمك هواي تحبك وأني أغار شلون بيه
ـ غاري منو مانعج بس ثقي وأعتقدي نائل أنخلق بس يحبح والج ولحضنج، ومن يوم شفتج گلبي خيل عليج گلت هاي الأنسانه تستاهل أنطيها گلبي .
ً ـ يحجي وأني صافنه عليه ودموعي تنزل بكثره كبل مسحهن وباسهن وحضني قوي وبادلته وتمسكت بي كلش أحبك أنت حتى أعز من أهلي .
ـ حبيبة روحي ليش البجي
ـ ما أعرف هيج بس أحبك وخلص
ـ حبيني بس مو تبجين ، يله نامي
ـ حضنته وتمسكت بي ونمت وكعدت العصر وخطار وهوسه وجوارين تجي تباركلنا وخالتي تكشخ بيه وتلبسني بالذهب وحيل مدللتني وتحبني وأني هم حبيتها يكفي خلفت نائل ومرت الأيام حياتي طبيعيه وتذكرت عصماء من زمان ما حاجيه وياها وأشتاقيتلها واتصلت عليها شلونج
عصماء ـ هلا بيداء زينه الحمدلله
ـ عادي أحجي وياج
ـ أي گولي
ـ هم مريتي بشعور وحبيتي أكثر من نفسج حتى
ـ ليش شبيج
ـ عصماء حيل أحبه وهو كذلك عبالك بنته حنين عليه ويخاف عليه هواي تصرفات ومواقف حتى لو بسيطه تعنينلي هواي
ـ الله يدومكم لبعض ، ديري بالج عليه وعلى حياتكم
ـ أن شاء الله أخلي بعيوني هذا حبيبي .
ـ الله يحفظكم .
ـ أكولج سؤال من تزوجتي عمتج هم طلبت منج بياضج تشوفه
ـ لا أبداً
ـ أني طلبت ولحت عليه هواي وأني الصراحه أحس مو من حقها .
ـ أي ميخالف شوفي الها لاتعاندينها أكو امهات ما يرتاحن الأ يشوفن وأنتِ تعاملي وياها بالطيب ولسان حلو خل تشوفه وأخذي
ـ لا رادت تضمه يمها
ـ لا بقي يمج ويوم من تجين عليه جيبي وياج أحركه من خالتي تحرك ملابس البنات
ـ ليش تحرك ملابسهن
ـ الي ما يردنه تحركه ورة البيت ما تذبه بالوسخ وأني هم تعلمت منها تكول هيج أحسن .
ـ خاف تخاف من السحر
ـ ما أدري اي شلونج
ـ زينه ما تجين أشوفج
ـ أشوف الله كريم .
ـ براحتج وراحت وراسلته رايح بيت عمه شوكت تجي
نائل ـ أجيت
ـ وينك
ـ وصلتج
ـ وفتح الباب ركضت حضنته وغمر رأسه بشعري ويبوس قوي وحاضني بكل حب .
ـ فدوه لريحتج .
ـ ليش طولت عليه
ـ أول واحد غادرهم أني حتى باسل هم مو مثلي عفته كاعد متعارك هو وليث يلعبون دومنه وطفرت وأجيتج
ـ أخذني بين أحضانه وعشنا تفاصيل حُبنا والصبح سبحت وطلعت من الحمام وشويه وسمعت عيطه لبست شالي وطلعت ها عمي .
سليم ـ وعمه العماج ليش ما تغسلين الحمام وراج
بيداء ـ والله عمي غسلته
ـ شوفي أني نفسي تلعب نظفي الحمام زين والصاله كلها تراب مو ساكنه بيها ما تنظفينها شنو شغلج
ـ أي أن شاء الله عبرني وراح الغرفته وصعد نائل من الدرج
ـ شبي
ـ خبل
ـ بيداء صوتج يله تعالي أحجيلي
ـ دخلنا الغرفه وحجيتله ترة ما يصير تعاي مرتين جفلي الحمام لان حضرته يتنكس وتلعب نفسه لو ملابس نفس ساعه غسلي لازم ما يشوف ولا ملبس بالحمام
ـ وأنتِ أحفظي طبعه لاتبقين ملابس بالحمام
ـ اني مخليتهن بسله يم الباب وين اوديهن گلت بس لما اكمل تنظيف الغرفه أغسلهن
ـ بيداء تعلمي وحفظي طبعه ياعيني
ـ يشلع الگلب وشعنده من الفجريات يسبح أحنه متزوجين مو مثله
ـ شعليج بي هو نظيف،يله كافي نصي صوتج
ـ گعدت مشطت شعري وهو غير ملابسه تروح
ـ أي وأنتِ گملي شغلج ونزلي يم أمي وتريگي لا تبقين بدون ريوك للغده .
ـ ماشي وعمك هم يروح
ـ لا عمي رشيد عازمينه عالغده
ـ وأنت هم تروح
ـ لا اجي أتغدى وياج ، كنسلت الطلعات والعزايم من دخلتي حياتي .
ـ تقرب باسني وشال الموبايل والسويج وطلع ونظفت غرفتي وغسلت الفوك گله وملابسي ونشرتهن وهو بغرفته كملت وهو طلع وعاط بيه
ـ شالج ضبي شكو لابسته ويسحل وراج هو هذا هم حجاب وستر تضحكين على نفسج شهل النسوان هاي
ـ نزل عالدرج يتدردم الله يصبرني على هالخبل شايب العگره عوذه ودخلت الغرفتي ولكيته مراسلني .
نائل ـ أشتغل وخطرتي على بالي وأبتسمت
بيداء ـ أنتَ ليش هيج حلو
ـ أني منيلي أنتِ الحلوه والمحليه حياتي كلها
ـ لا والله أنتَ تخبل فدوه لوجهك دزلي صوره أشتاقيتلك
ـ هاج
ـ تخبل
ـ تريكتي لو بعدج فوك
ـ ما أحب الريوك من تجي اتغدى وياك
ـ أني شنو وصيتج يله نزلي أكلي شيء
ـ تمام حبيبي .
ـ بيداء
ـ ها حبيبي
ـ أحبج
ـ وأني هم وصفنت عليه ودمعت عيني ومرت الأيام والاشهر وما صارلي حمل وطلعت من الحمام وبايدي الأختبار
جواهر ـ ها بشري
بيداء ـ ماكو
ـ ليش هيج جاي تأخذين الأعشاب والمقويات الجبتهن الج كلهن .
ـ أي سويت مثل ما گلتيلي
ـ والعلاقه هم سويتي نفس ما گتلج
ـ أي
ـ ليش ما صار حمل هذا هم حظي لو حظج لو حظ وليدي حيدي أريد أشوف خلفته .
ـ باوعتلها كعدت وأخذت الأختبار وحزنت
ـ العصر أوديج أسويلج تحليل
ـ كيفج وفعلاً أخذتني العصر وسويت ماكو حمل وبالطريق عمته نجلاء أتصلت عليها .
جواهر ـ ها نجلاء
نجلاء ـ ها بشري ما حملت
ـ لا والله سوده عليه ماكو كلشي
ـ خطيه شعجب
ـ رزق غير شنو شعجب قابل گوه
ـ هم صدك يله تحبل لاتشيلين هم
ـ أي ان شاء الله تحبل وتترسلي البيت جهال
ـ اي يله أخذ راحتج
بيداء ـ خالتي ضاجت ولزمتني من ايدي وأبتسمت
جواهر ـ لاتنقهرين بعد وگت تلحكون أن شاء الله شهر الجاي تحبلين .
بيداء ـ أن شاء الله وصلنا البيت لكيته مراسلني وأتصل عليه وجاوبته
نائل ـ ها حبيبي بشري
بيداء ـ أسفه حبيبي ماكو حمل
ـ يله لاتزعلين يصير ان شاء الله
ـ خوما زعلت
ـ لا ليش ازعل الله كريم المهم أنتِ ما تزعلين يروحي
ـ أختنكت وبجيت
ـ تالي مو أعوف المحل الشغل كله وأجي والله
ـ وأذا ما صارلي
ـ لا يصير وحتى لو ما صار ميخالف وشنو يعني أنتِ طفلتي وبنيتي .
ـ أحبك
ـ گليبي لاتضوجين رحمه للاسلام
ـ لا خلص ما اضوج
ـ أعزل من وكت واجيج ادري بيج كلبتيها مناحه
ـ لا حبيبي ، أخذ راحتك روح على شغلك
ـ تمام حبيبتي
ـ وراح الله وياه عسى ما انحرم من حبك وحنيتك
وثاني صادف عيد ميلادي وگالي اسويلج عيد ميلاد وحيل فرحت وأتصلت على عصماء بلكي تجي وجاوبتني هلاو عصماء شلونج
عصماء ـ هلا بيج الحمدلله بخير وانتِ
ـ زينه أكولج تعاي اليوم عيد ميلادي ونائل كال أسويلج
ـ أي شگو بيها بالبيت تسوين
ـ بالغرفه لان الحجيه ما تحب هاي السوالف وبعدها نطلع مطعم ونفتر
ـ أي بالعافيه
ـ عود تعالي أنتِ وحمواتج تمام
ـ أن شاء الله أكول الهن
ـ ولليل رجع من المحل جايبلي الكيكه والتجهيزات وكعدنا أني وياه نرتب وشفت الكيكه كاتب عليها عيد ميلاد حبيبتي بيداء وأبتسمت بفرح لان أول مره أسوي عيد ميلاد وعشت الفرحه بوجوده وأجواء كلها حب بس أني وياه وأحتفلنا كل عام وأنت حبيبي وحبنا يزيد
نائل ـ كل عام وأنتِ تجرين بدمي ربي ما يحرمني من حبج أعشق حتى خيالج أعشقه وكل ساعه أكظيها وأني بعيد عنج الدنيا تطلع من عيني صرت أحسج مسويتلي سحر محبه .
ـ نيالي
ً ـ واحلى سحر يكفيني بحياتي حبج وحب أمي أنتوا الأثنين حبكم ماله وصف .
ـ يروحي الله يحفظك اليه باسني وقدملي هديه شنو حبيبي كلفت على نفسك فتحه تخم ذهب حبيبي والله هواي أصلاً أنتَ هديتي وأجمل الهدايا
ـ شيء بسيط وتسستاهلينها .
ـ حضنته وأبوس بي أعشقك أحب گلشي بيك
ـ شلون بيج يروحي أنتِ .
ـ گملنا حفلتنا وتفاصيل حُبنا الحُلوه وبعدها نزلت الهم كيك وباوعت على الباب وعصماء ما أجتي تمنيتها تجي وتشاركني فرحتي بس ما أجت وثاني يوم عود أجتي وجنت حيل ضايجه منها لان ما اجتي البارحه
وما نزلت وشويه هي صعدتلي بعد وگت مو گتلج تعاي على عيد ميلادي .
عصماء ـ ولج غير ما بيه بس تعشيت طفيت وأريد أتمدد وأرتاح وخالتي تعبانه ما بيها عاد اليوم گتلهم وأجينا ، يله لاتزعلين قابل حفله عرس لو حنه هو عيد ميلاد والأفضل بينكم وأحنه علينا الهدايا وصيت باسل وجابلج هديه هاج .
ـ شنو هاي كلفتي على نفسج شكراً فتحتها اسوار فضه هاي عود انتوا أهل الذهب جان أستحى شهل الطمع لما أني زوجة أخوه
ـ أي شگو بيها ، منو يهدي ذهب موزين جابلج ترة لخاطري أشترى والله
ـ ليش يابه شصار عليه وشمسويتله ذابحه أهله شو ما تعرفين تحجين لا وأدافعين اله المفروض أنتِ تكولين اله أريد هديه زينه لأختي ، أنتِ هدية زواج ما جبتوا النا
ً ـ شبيج تعاركين ليش أذا عنده محل ذهب يضل يوزع خيرات وهدايا ترى هذا رزقه وكلها عايشه عليه واذا على هدايا العرس ترى اخذنا جرجف من الزينات وتيبلم ونواعم الغرفه هو مجهزهم ويه أخوه وهما أخوان يعني ماله داعي كلامج أدورين هدايا عيب بيداء .
ـ ما تسكتين لا والله رجلج نحس وگلبه أسود ما ينسى ومن يجي أسلم عليه كوه يرد السلام عبالك ذابحه أهله شگد مكروه وما ينطاق ، هسه عوفينا أكوم اضيفج من الكيكه .
ـ شتضفين كلامج كافي .
ـ عود زعلتي ترى صدك رجلج نحس
ـ بيداء گافي عاد طوختيها أني جايه أشوفج ما نفتح مواضيع وتحجين عليه كدامي وترديني أسكت ما أسمحلج والله
ً ـ خلص سگتنا عمي ، گمت ضيفتها أوكفي أشوفج هدية نائل حبيبي ، جبت الهديه باعي شجابلي تخم ذهب شوفي شگد حلو .
ـ أي حلو بالعافيه ، بيداء خوما أنتِ طلبتي منه هديه ذهب
ـ لا هو من كيفه جابلي وأذا أطلب شگو بيها زوجي وهما تجار وعدهم محلات ذهب وخيرهم كثير من حقي أطلب أني زوجته .
ـ لا بيداء عيب هالمره ميخالف شگو بيها هو جابلج بس مره الثانيه لا تتطلبين هدايا ذهب وشيء غالي أكبر من طاقته وگلشي بالمعقول وحتى لو عدهم محلات ذهب ما يصير تضلين تطلبين منه بعدين يأخذ عليج نظره أنتِ طماعه ومتزوجته على طمع .
ـ أنتِ ليش غيرانه مني لان جابلي تخم ذهب بعيد ميلادي لو المال مال رجلج ما تقبلين حضرتج .
ـ على كيفج ورجلي شعليه دخلتي بالنص عيب كلمه والثانيه رجلج محسستني كواد مو رجلي .
ـ لان هو يكعد بالمحل عبالج المحل بس الج
ـ أستغفر الله شهل الحجي هذا وأني حجيت لمصلحتج وبعدكم بداية زواجكم مثل النصحتج شكو تهجمتي عليه بس أنتِ مو مال نصيحه وصوجي أجييت عبالي أدمي بس تضلين أرعنه
ـ ولاتجين مسويه فضل حضرتج ومن يوم أخذتي باسل تغيرتي على الكل وعلى أهلج وشفتي نفسج علينا عبالك ما مأخذه صايغ مأخذه الشيخ العشيره .
ـ منو متغير أني لو أنتِ ومن حجيت نصحتج
ـ لا والله هاي مو نصيحه هاي غيره شفتي جابلي تخم ذهب ويحوز رجلج ما يرضى لان واضح من هديته اسوار فضه أمداكم طماعيين وفكريات الله لايشبعكم .
ـ أنزل اشرفلي
ـ نزلي من عاتب عليج وتصعديلي لو حقاره وسم تخربين فرحتي بدال ما تفرحيلي أختج مرتاحه بحياتها ما جاوبتني نزلت وكعدت أبجي منها حيل غثتني الحقيره ودخلت خالتي
جواهر ـ شبيج شبيها وياج شحجت
بيداء ـ حجيت الها وبجيت
جواهر ـ شفتي شگد حقراء ولج مو گتلج هيفاء وخلفتها يكرهوني أني وأبني يموتون من عدنا وبالاخص هذا باسل فد نحس وحقير ويكره أخوه ويكرهج حتى أختج غيرها عليج ويقرأ برأسها هو وأمه وأخواته ما تشوفين من تزوجتي لحد الأن ما اجتج وهديه ما جابتلج معتبره نفسها حال حالها رجلها .
ـ أي لاحظت
ـ مو بس هيج لو تشوفين من عرفوا بعلاقتكم شسوه وشحجى عليج كدام الكل فضحج فضيحه وهي خفيفه وما توالمك واخذلك وحده من مستواك وجان معارض هالزواج وحلف كدام الكل گال هالزواج ما أخلي يتم وبيداء ما تدخل هالبيت وتنكسه ومرته هم نفس الشي متشوفين وصل الخبر لأهلج وعرف أبوج وجان أهلج ذبحوج ونائل تخبل سوده عليه لان يحبج وأني أمك يا أبني رحتلهن للبيت ما قصرت بيهن وهديت على أختج وگتلها الا اسويها شيخه وفعلاّ أنتِ شيخة وزوجة أبني وحيدي وأم هذا القصر وگلشي الج وتحت أمرج .
ـ ليا حقير يا باسل
ـ أي ولج ما يحبوننا وأذا ما تخلين الهم حد ينجلبون
ـ أي هي گامت تحجي وقهرتني
ـ خلص لاتبجين ختولي غيرانه منج
ـ حضنتني ودخل نائل وشافني أبجي
نائل ـ شگو شبيكم بيداء ليش تبجين منو وياج
بيداء ـ ماكو شيء وخالتي كعدت حجتله وعصب
نائل ـ هي هيج حجتلج
جواهر ـ أي وضاجت والله شلون يجيبلج تخم ذهب والمحل محل رجلها عبالها المحل والماليه بس الهم وكامت تحجي ورزلتها وخلتها دمعتها على خدها هو هذا أخوك حتى غير أختها عليها حسبي الله عليهم مو اكولك أخوك شايف المال بس اله وهو صاحب المحل ما تصدكني لعد مرته منين جابت هالحجي لما هو حاجي االها وكايل الها المحل محلي وكعدت تمنع بيداء وضاجت لان انت مشتري لمرتك ذهب تخبلت وكامت تحجي عليها
نائل ـ يصير خير .
بيداء ـ طلع سريع خاله وين راح
جواهر ـ خل ننزل تعاي .
بيداء ـ نزلت وراه عالسريع وهما بعدهم كاعدين وتقدم عليهم نائل وصاح بيهم .
نائل ـ ليكون الماليه ومحلات الذهب بس الك
باسل ـ شبيك شــنو هذا الحجي
ـ والله اسأل نفسك هالكلام لو عبالك المحل بس الك لان أبويه مسلملك الشغل لا حبيبي أنتَ عامل بالمحل لاتشوف نفسك زايد .
ـ منو گايلك أني صاحب المحل
ـ لاتسوي روحك ما تدري وهالسوالف لا حبيبي ترى أعرف گلشي ومن يوم يومك شايف روحك صاحب المحل .
ـ تعال عن شنو تحجي أنت منو مصخم وگايلك
ـ من سوالف مرتك الخاتون ما مصدكه نفسها اخذتلها أبن الصايغ بكيفها گامت تمنع والله شلون نائل يشتري تخم ذهب لبيداء بعيد ميلاد وبعد لاتخلين نائل يجيبلج هدايا ذهب ليش المحل بس الكم مل تخلوني اخذ هديه المرتي
ـ على كيفك وأحترم نفسك ولاتجيب طاري مرتي لان ما متدخله ومو يم هاي السوالف وما يهمها الذهب والهدايا لاتتبلى عليها وحدك لهنا .
ـ دروح دروح أنت ومرتك شفتوا نفسكم أنتوا اهل المال خليها أبالك ترى مثلك مثلي وأنت عامل والمحل محل أبويه أفوت وأخذ ماطول أبويه عايش ومحد يتدخل لا أنت ولا مرتك ولا أكبر واحد يمنعني فاهم
ـ شوف لك أني ساكت لان ماأريد المشكله تكبر وأحنه أخوان بس الظاهر أنت مقري برأسك ومحل المحل مو بسطية خضروات بكيفك تفوت وتأخذ وشدعوه مأخلها تخم ذهب على رأسها ريشه .
ـ منو يقرأ برأسي عبالك بيداء مو لو حقاره منك أنت ومرتك من يومكم ما تحبونها وعارضتوا هالزواج لان ما تردون اتزوج وأسس عائله تريد كلشي الك والمال والورث بختك انت ومرتك وخلفتك بس أسمع زين غصباً عليك ترضى ما ترضى المحل محل أبويه .
ـ شوف لك عصماء اذا حجت حجت وياها من باب النصيحه مرتي وأعرفها ما تغار ولا يمها هاي السوالف بس گول مرتك أي عادي .
ـ شتقصد أنتَ
بيداء ـ هجم عليه وضربه بوكس ودخلن أخواته يفازعن وأمه سحبته والحجيه ضربتهم بالعوجيه وكامت تحجي
الحجيه ـ يا وسفه من ورا نسوان تتضاربون أنت وأخوك بس يحي ابوكم وأني أعلمكم على هالعمل هذا تعال يا عبد الغني شوف أحفادك
بيداء ـ وطلع الحجي شايل سجاده وحجه
عبدالغني ـ والله عفيه وأخر وگت أخوان متعاركين علمود ماليه وهذا الي وهذا الك ولكم عمامكم وأبوكم اربعه ولا يوم أخ وكف بوجه اخوه وطالب وحجه وشحدهم
وهما متزوجين ومخلفين وانتوا هذاك اليوم تزوجتوا وواحد يعارك الثاني عشنا وشفنا ولدك يا سعيد .
نائل ـ جدي فهم هالحجي اله ولمرته من يومهم يكرهون مرتي يموتون منها وجانوا معارضين هالزواج وتزوجتها وما خلصت وهسه يتدخلون والله شلون تجيب بيداء تخم ذهب مو أني أبن الشارع مو أبن سعيد
بيداء ـ يحجي عصبي عصماء تقربت عليه وگامت تحجي وباسل صاح الها
باسل ـ عصماء رجعيييي
عصماء ـ ورثتي الحرب بين الأخوان الله يأخذج شعلتي الفتنه شـنو أنتِ متگوليلي .
جواهر ـ وخري ايدج اكسرها تعال يا نائل تريد تضرب اختها يبوه .
بيداء ـ أنسحبت ليوره وأجه نائل عاط بيها
نائل ـ وين تردين تضربينها مثل ايام قبل عبالج بكيفج ايدج اكسرها اذا مديتي على مرتي وأمشي ولي يم رجلج
جواهر ـ هسه عرفنا ليش جنتي معارضه الزواج تردين الج وبس وتكوشين عالماليه والورث بختج وبخت ورجلج انوب حملت بتؤام شيخلصنا عاد نسل أبن هيفاء المشرف .
عصماء ـ بس أني ما ردت أضربها بس حجيت وياها
باسل ـ گافي أستجلبت أنت ومرتك وأنوب عليه أمك
لو شفتونا ساكتين الكم وبدال ما واكف تحاسبنا اخذ مرتك الي سوت المشكله وأكعد حاسبها وفهمت
أختها غلط من ورى حقدها ادري بيها جلبه ما تنسى
بيداء ـ ليا حقير حجيت بگلبي وردت احجي نائل منعني ودخل عمي وعاط بيهم وأنداروا عليه وعصماء نزلت رأسها فشلانه والحجيه حجتله گلشي وباوع على باسل لازم خشمه لان نائل ضربه .
سعيد ـ متعاركين من ورى نسوان تتضاربون ولك ضارب أخوك
نائل ـ يابه
سعيد ـ ولك الله يأخذك ولا حرف من ورى كلام نسوان تضرب أخوك طايح الحظ ألأخ ما ينضرب الأخ حزام ظهرك سندك من كثر أخوانك تضربه وتحجي عليه هو هالأخ الك ولك أنت بطرك روحك منو الك غير أخوك وأخواتك هما سندك وعزوتك وبحجايه وحده أندفعت مثل العربانه علمود تخم ذهب ووسخ دنيا والله عشت وشفت ولد الحجي سعيد متعاركين علمود ذهب وكل واحد يصيح المال مالي عال ولله عفيه بولدي ولكم المال مالكم انتوا وأخواتكم منو يشاركم بي الكووايد لو الغربه
نائل ـ بس يابه المشكله بدأت منهم وعصماء هي الحجت على أختها والله شلون أني جايب تخم ذهب لبيداء ما قبلت وكامت تحجي وصعدت لكيتها تبجي هاي بدال ما تفرحلها لاتخرب فرحتها .
عصماء ـ عمي والله مو هيج الموضوع أني ما حجيت هيج .
باسل ـ روحوا كدامي
هيفاء ـ أمشن يمه عصماء أمشي بنيتي .
عصماء ـ بس خاله
سعيد ـ روحوا بابا ما عليج عمي روحي ويه خالتج .
بيداء ـ راحن وعمي كعد وهما كعدوا يحجون ونائل أشرلي أصعد وصعدت الغرفه وشوية وأتصلت عصماء خير شگو متصله
عصماء ـ الله يأخذج حجايه بيني وبينج ليش وصلتيها لرجلج وسويتي مشكله بين الأخوان وخليتي يضرب أخوه على مالمن علمودج تردينه يعادي أخوه منو أنتِ تخربين خوتهم وهما هالأثنين بس من يومج عار وعبالي تزوجتي تصيرين ادمي بس عقلج تنك ما خلصتي من المشاكل ما ضلت عندج خربتي عصماء بأهلها رجعتي على الأخوان تعاديهم من ورى حضرت جنابج والله شلون عصماء تحجي ولج طايحة الحظ حجيت وياج من باب النصيحه
بيداء ـ گافي عاد هواي تماديتي أنتِ ورجلج وعبالج انساه اله حقارته شلون يعيرني بسوالفي وهسه هم ذبله كلمه الجلبه ما تنسى أي ما انسى حقارتك مسويلي روحه شريف وعلى أساس هو نبي وسوالفه يم عُلا كل العشيره تعرف بتاريخه المصخم الله ياخذه شگد نذل .
ـ لا والله الله ياخذج تروحيله فدوه لاظفر رجله وديري بالج أسمع حاجيه عليه حجايه أجي أشرب من دمج والله باسل خط أحمر وأحترمي نفسج وسكتي ترى بدفره يرجعنا أثنينا لاهلنا ونأكل وحل وخل هذاك الوگت لسانج يفيدج من يطلع تأريخج وننفضح وگتها عود أنسي گبل للنجف .
ـ تهدديني
ـ ما أهدد بس اليحترم نفسه أحسن النا واله
ـ ماشي يا عصماء
ـ ديلة ولي .
ـ قطعت الخط حقيره ودخل نائل وحجيتله أتصلت وتحجي عليه گول لرجلها خل يضب مرته شنو اني مداس الها اجتي لغرفتي تحجي وتهين بيه وأنوب هسه تتصل تغلط وتهددني برجلها .
نائل ـ گافي عاد سدي الموضوع وتفاهمي أنتِ وأختج وحلي المشكله البينكم وأنتوا أخوات .
بيداء ـ ها هيج الحجي لازم تراضيت أنت وأخوك
ـ أي تراضينا وخلص الموضوع ينسد وأنتِ باجر الصبح روحي عليها وأعتذري منها وتضل اختج وحلوا المشاكل البينكم وتفاهموا .
ـ بعد كل اللي صار
ـ أي گافي لاتسوين مشاكل وأنتِ صوجج ما فهمتيها وتفاهمتي وياها ويجوز لان متزاعله من أمج گبت بيج وأنتِ بسرعه تورثين وتشتعلين وشعلتيني وياج جان سويتلي سالفه ويه أخويه ربج ستر
ـ يعني رجعت عليه وتحاسبني
ـ ما أرجع عليج ولا أحاسبج يا حبيبتي أنتِ بس جاي أكولج انهي الموضوع وتصالحي أنتِ وأختج وعادي تصير وتضل أختج الجبيره ميخالف أبويه .
ـ ماشي راح أروح لخاطرك والله
ـ يسلم خاطرج أبويه
ـ فدوه لعمرك شحبك
ـ موو بگدي والله أشتعلت بنار من شفتج تبجين ما عندي نقطة ضعف متكوليلي منين طلعتيلي مأخذه عقلي
ـ حضني الله لايحرمني منك ومن حبك يروحي كل يوم يثبتلي حبه اليه هو روحي من الدنيا سعادتي وراحتي
وفعلاً ثاني يوم هو لبس وطلع وأسمع صوته يحجي ويه عمه سليم
نائل ـ عمي أني رايح كدامك تجي اليوم لو لا
سليم ـ أي فتح هسه أتريك وأجي وراك .
نائل ـ ماشي
بيداء ـ وسبحت ونظفت الغرفه طلعت عبالي طلع
وصار گبالي شافني جنت ما لابسه حجاب وعاط بيه الا صرعني ودخلت الغرفه سريع وسديت الباب
سليم ـ شعندج مدلعه أنتِ ليش ما حاشمه نفسج
بيداء ـ شمدريني بيك عبالي طلعت
ـ وحتى لو ما طالع تنزلين للبيت مدلعه لبسي شال لمي عطوبج لو ما تعرفين الأوصول أعلمها الج أني
ـ على كيفك لاتأكلني حاصل فاصل شبيك تعيط عليه
ـ وگت أنتِ من نسوان نائل وصوتج عالي شهل النسوان هاي منين جايه أنتِ لخاطر الله .
ـ نزل عالدرج ويدردم شگد حقير عوذه أنفلت عليه وشمدريني بيك بعدك مكبور بغرفتك أصبرلي اذا ما خليت نائل يوكفك عند حدك الشايب .
لبست شال ونزلت ماكو بس نجاح وبلقيس عمي
سليم راح
بلقيس ـ أي راح ، ومنا وهيج لبسي شالج بالبيت وعود بغرفتج نزعي شويه سليم طبعه صعب ويضل بس يحجي تجفي الشر فدوه .
بيداء ـ بس أني ما أدري بي ما متقصده عبالي طالع وهو ما أنطاني مجال كام يحجي عليه يعني شصار لو تفهم الوضع وسگت ليش يحجي .
بلقيس ـ ميخالف تحملي هو هيج والله هو أحنه أخواته يحجي علينا
بيداء ـ والله أنتن أخواته بس أني ما اله حكم عليه ويصيح .
نجاح ـ بيداء ماما تجفي الشر ما نريد مشاكل
بيداء ـ ماشي عفتهن وصعدت لغرفتي منين طلعلي هالشيبه لا أنوب أخواته هدن عليه عوذه ، ولكيت نائل يتصل ها حبيبي .
نائل ـ حبيبتي ليش ما لابسه شالج بالبيت
بيداء ـ وصلك الحجي مو
ـ ما گال شيء بس گال خل مرتك تلبس شالها وصح كلامه حبيبتي وأنتِ ما ساكنه وحدج بالبيت ومنا هيج أنتبهي لـ ملابسج وشالج على رأسج فدوه لعينج
ـ بس حبيبي
ـ أنتِ مو تحبيني
ـ أي بس
ـ لخاطري وكل متزوجه بالعيال تلبس شالها سمعي الكلمه يا روحي وما أريد أحد يجيب طاريج والله ما أتحمل أني أعصابي على شعره وأذا أنتِ محد يلزمني وهو رجال مو صغير وهذا طبعه شنسويله .
ـ ماشي حبيبي مثل ما تريد لخاطرك والله
ـ يسلم خاطرج أبويه ، رحتي على أختج لو بعدج
ـ هسه أروح
ـ خلي أمي توصلج
ـ لا هياته البيت
ـ ماشي حبيبي سوي مثل ما گتلج عليه وأذا تردين تغدي يمهم عادي
ـ ليش وأنت
ـ ما راح أرجع عدنا مسواك يجينا اليوم للمغرب يله
ـ تمام راح أشتاقلك
ـ وأني هم حبيبتي .
ـ نهيت الأتصال ولبست عبايتي وطلعت والحجيه صاحت وراي .
الحجيه ـ وين رايحه
بيداء ـ على أختي
الحجيه ـ أنتظري خل عمتج تجي من السوك وتوصلج
بيداء ـ لا گلت لـ نائل گالي روحي
الحجيه ـ أذا هيج روحي
بيداء ـ طلعت وصلت بابهم وطلعتلي لقاء صباح الخير
لقاء ـ صباح النور .
ـ عصماء كاعده لو نايمه
ـ لا كاعده من زمان هسه صعدت غرفتها ليش
ـ أجيت عليها ، شنو ما تردون خطار
ًـ أتفضلي
ـ دخلت والبيت نظيف حيل أكيد عصماء من الصبح منظفه سلمت عليهم ردوا السلام عادي توقعت ما يحجون وياي .
لقاء ـ أذا تردين صعديلها لان هي ما تنزل هسه جاي تغسل ملابس تكملهن يله
بيداء ـ تمام صعدتلها ولكيتها بالحمام شافتني
عصماء ـ شجابج
ـ أجيت عليج أشوفج
ـ ما أريد جيتج رجعي أمشي طلعي برى ما وراج بس المشاكل لا بيت أهلي أرتاحيت ولا بزياره أرتاحيت وأنوب لحكتيني لبيتي شلون وياج
ـ دخلت الغرفه ولحگتها سمعيني وبعدها طرديني أنتِ ليش ما تتفاهمين
ـ ليش أنتِ شگولج شگول تفاهم بسببج خليتي أخ يضرب أخوه حتى لو تراضوا بس أنتِ السبب خليتيهم يتعاركون گلبتي حجايتي وطلعت أني حاجيه عود المحل محل رجلي يمتى حجيت هالكلام ليش صغرتيني كدام رجلي وعيالي ليش متعتمده تفشليني .
ـ مو أني والله هو أجه وخالتي جانت كاعده وحجت وهو ما فهم السالفه وگبل نزل عليكم لاتحكمين عليه وهو دزني عليج وأجيتج أعتذر منج ونضل أخوات ومتزوجين أخوان ، لاتضلين حقده يولي أني أختج .
ـ بيداء طلعي برى .
ـ ودخل باسل
باسل ـ شگو شبيجن
عصماء ـ هيج ماكو شيء
بيداء ـ أني أسفه ما عبالي المشكله تكبر ونائل تسرع وأجيت أعتذر عن كل اللي صار بس عصماء ما تريدني
باسل ـ عصماء كافي سدي الموضوع خلاص وأنتوا أخوات تفاهموا وحلو المشكله والزعل وأختج جايتج
عصماء ـ ماشي .
بيداء ـ طلع وعافنا طلع رجلج أحسن منج
ـ مو على أساس نذل
ـ هو ذبله كلمه وأنقهرت منه شتردين مني أحجي
ـ وليش تحسستي يجوز ما عنده بيها قصد بس أنتِ عقلج مبنج بالماضي شيحجي باسل تأخذين على نفسج وهاي مشكلتج .
ـ هسه عوفي الصخام خلينا اي شلونج حملج شلونه
ـ زينه الحمدلله
ـ أمي هم حجيتي وياها تراضيتي أنتِ وياها
ـ أي هي خابرتني وحجينا
ـ الحمدلله
ـ اي الحمدلله
ـ جهزتي لو بعدج .
ـ لا والله بعدني
ـ نروح العصر أني وياج ونجهز
ـ والله ما ادري
ـ الله عليج خليني أجهز وياج وأصلاً نائل ما يجي اليوم گالي اذا تردين أبقي يم أختج شتكولين
ـ ماشي أكول لـ باسل ونروح ميخالف
ـ ان شاء الله
ـ أكولج هو عادي اتأخر بالحمل
ـ نزلت عليج هالشهر
ـ بعدها بس صار كم شهر ماكو
ـ الله كريم بعدج تحملين ان شاء الله
ـ أنتِ حملتي من أول شهر مو
ـ أي ما أجتني من قبل العرس وبعدها صار الحمل
ـ يوم اليه
ـ الله كريم
ـ بس أطلع الملابس من المجفف وأجيج
ـ تمام ، طلعت وياها وهي گملت غسل وصعدت لقاء أخذتهن منها
لقاء ـ بس هذن لو عندج بعد
عصماء ـ لا عيني بس هذن
لقاء ـ تمام
بيداء ـ نزلت وباوعتلها ليش تنطين ملابسج لحماتج
عصماء ـ تنشرهن عالحبل بالحديقه
ـ ليش ما تنشرين عالسطح
ـ ما طالعه والله وهما حبلهم بالحديقه وهي تصعد تأخذهن لان ما يخلوني أصعد وأنزل علمود حملي
ـ نيالج مبين حمواتج زينات
ـ أي الحمدلله حبابات
ـ أني صح ما أشتغل بس انظف الفوك وغرفتي أصلاً خالتي ما تقبل انظف واطبخ تكولي بس أخدمي ابني وديري بالج عليه بس العقده العندي الشايب سليم الصبح هلكد حجه كرهني بحياتي وما مأخذه راحتي حسره ما اطلع باب غرفته مفتوح واذا الصاله شاف بيها وسخ لو الحمام بي ملابسنا ما مغسوله يضل بس يتذمر عبالك بس هو نظيف هيج ضايج من الوضعيه تزوج وخل مرتك تخدمك .
ـ شتردين منه عوفي وهو قليل يتواجد بالبيت لو شغل لو يروح البصره يم خواله ويريد يتزوج جان تزوج بس يعرف ماكو وحده تحمل اطباعه ، تحملي وعوفي
ـ وشمسويتله واليوم هم بس شافني بدون شال گلب الدنيا
ـ أنتبهي وأحترمي مهما يكون عم رجلج لاتسوين مشاكل ولاتردين عليه وترى هو هيج طبعه صعب
ـ لا والله مريض ومعقد
ـ عوفي واشتري راحة بالج داري نعمتج بيداء لا من اولها مشاكل ويه عمهم عيب شيكولون علينا
ـ أي شسويله أتحمله
ـ أي يله ننزل صار وقت الغده
ـ أستحي خلي أهنا
ـ ها يله خل اشوفهم وأجيج
ـ شويه واجتي ها
ـ گالت هسه تصعد الغده هنا نتغده
ـ ورجلج
ـ يتغده جوه
ـ ها زين وجابت الغده لقاء ورتبت السفره والأكل يشهي وكعدنا تغدينا وضلينا كاعدين احجيلها وتحجيلي ولا عبالك البارحه متعاركين وزلمنا من الروس والعصر بلغت باسل ولبست من ملابسها وأخذنا أني وياها وخالتها ورحنا السوك وأشترت ملابس الها ولبنات وأني هم أخذت كم قطعه وشغلات اليه ، واجه باسل ورجعنا البيت بالليل اجه نائل اخذني
باسل ـ أبقوا على العشه وين رايحين يمعود .
نائل ـ لا فدوه تعبان وهسه راجع من السوك واليوم جان عدنا مسواك صاير جنازه خليني أروح .
باسل ـ يا هلا بيكم
نائل ـ تسلم يله أمشي
بيداء ـ عصماء وباسل وصلونا الباب وحضني من ايدي ومبتسم
نائل ـ ولج اشتاگيتلج ميت عليج اليوم نهار كامل مفارگج والله طگ گلبي حتى عشه ما اتعشى أخليج بحضني وأنام .
بيداء ـ وأني هم والله بس لان اكو سوك ودياحه نشغلت عنك
ـ مهم تونستي
ـ اي كلش وصلنا وسلمنا وصعدنا غرفتنا بس وصلنا قفل الغرفه وباسني من شفتي وكمت حضرت ملابسه وسبح واجه نعيماً حبيبي
ـ الله ينعم عليج ،شأخذتي لعد
ـ نقوصات وشغلات اليه
ـ ليش ما گلتي اليه محتاجه أني اجيبهن كلبي
ـ ما محتاجه گلشي بس من رحت السوك صاروا گبالي
ـ ميخالف أي شيء تحتاجينه تبلغيني تمام
ـ تمام حبيبي ،واخذنا ملابس للبنات وشغلات البنات تخبل نائل كزكز گلبي عليهن تقرب حضني من وجهي وباسني من خشمي
ـ وأحنه شوگت
ـ صفنت ما أدري والله .
ـ صارلنا هواي من تزوجنا مو يله
ـ قابل بأيدي
ـ أعرف مو بإيدج طاك گلبي على طفل منج أريد أترس البيت جهال أني روحي من الدنيا الأطفال
ـ خالتي كالت هالشهر اذا ما طلع حمل تأخذني الدكتوره
ـ وشتسويلج
ـ فحوصات غير
ـ شلون يعني
ـ شغل نسوان حبيبي
ـ ها وأكو نتيجه
ـ الله كريم ، أنزل اجهز العشه ويه خالتي
ـ ماشي حبيبتي هسه أنزل وراج
ـ نزلت جوه ولكيت عمتهم نجلاء جايه هي وبناتها سلمت عليها وأبتسمت بوجهي شلونج عمه
نجلاء ـ هلا بيج الحمدلله وأنتِ شلونج شخبارج
بيداء ـ الحمدلله بخير تماضر شلونج
تماضر ـ الحمدلله .
نجلاء ـ ما حملتي .
بيداء ـ لا بعد
نجلاء ـ صارلكم شكم شهر من تزوجتوا شعجب ما صارلج ما شاء الله أختج گبل حملت وبالتؤام وقبل لاتكمل سنه عالزواجها راح تخلي بحضنها بنات أثنين
ـ كلمن ورزقه والله كريم بعد وگت هسه ونائل ما يريد اطفال هسه وخالتي گالت
جواهر ـ منو ما يريد جهال نائل يمه أني طاگ كلبي علما اشوف جهاله مو اني اشتغل بكيفه هالشهر أخذج لدكتوره ونشوفها شتگول.
بيداء ـ الله كريم خاله صبيت العشه وهنا كاعدات ويه الحجيه وصحت من يم الدرج نائل حبيبي أنزل تعشى
وباوعتلهن وشفت تماضر تباوع عالدرج ولكيتها صافنه على طوله وهو ينزل من الدرج وصار أكثر من مره ملاحظه بس تجاهلتها وهو نزل هي صدت وجهه!!
نائل ـ عمتي شوگت اجتي
بيداء ـ ما ادري من نزلت لگيتها جايه تتعشى
نائل ـ أي متعشين لو لا
ـ بس اني وياك الباقين ما متعشين متشوف عمتك جايه تتعلل .
ـ يله جيبي وتعالي .
ـ تمام عبرني وتقدم سلم على عمته وتبوس بي مصت دمه هاي شبيها بوسه وحده كافي
نجلاء ـ هلا بيك يبعد عمتك شلونك
نائل ـ بخير الله يسلمج عمه وأنتوا شلونكم
نجلاء ـ زينين بشوفتك .
بيداء ـ كعد وباوعلي واشرلي يعني شبيج واكفه مشيت جبت العشه وخليته كدامه وكعدت اتعشى وياه وهي كاعده تباوعلنا من اباوعلها تصد وجهه حسيت نظراتها بس عليه گلبي نغزني وهو يسويلي لفات وينطيني ، أني اكل عيني
نائل ـ أكلي
بيداء ـ كملنا وشال الصينيه وأني وراه وعمته تهز بأيدها
نجلاء ـ شفتي يمه خلته هو يشيل الصينيه من يمتى الرجال هو يشيل المواعين
الحجيه حليمه ـ ليش ما يشيل المواعين على رأسه ريشه نجلاء جايه تتعللين لاتحشرين خشمج الولد يحب مريته ومرتاح وياها جوزي من سوالفج .
بيداء ـ واكف يغسل هاي عمتك أستغفر الله
نائل ـ شبيها
ـ تحجي والله شلون تشيل الصينيه تخبلت
ـ عوفيها هاي هي هيج طبگات من الكل تغار كبري عقلج وياها وتحمليها هالساعتين وتروح .
ـ تمام حبيبي اخذ الخاولي وكعد يم الحجيه وتماضر تفرك بإيدها وصبيتلهم الجاي وكعدت وهو كام
ـ يله أني طالع يم بيت عمي تجين وياي
نجلاء ـ وين تجي وياك أنت رايح تعلل مو أحنه كاعدين .
بيداء ـ لا حبيبي روح أنت
نائل ـ ماشي بس جيبلي موبايلي نسيته فوك .
بيداء ـ صعدت وعفته يمهن بس ما مرتاحه ونزلت ولكيت عمته واكفه تحجي وياه هما شافوني سكتوا
!! هذا موبايلك
نائل ـ يسلموا .
بيداء ـ وراح وكعدت وأجتي خالتي وتسولف ويه تماضر
جواهر ـ شلونج عيني تماضر هلوگت ما نشوفج شدعوه عمه
تماضر ـ موجوده والله .
بيداء ـ ضلن كاعدات تالي صعدت وعفتهن راسلته شوگت تجي حبيبي
نائل ـ كاعد والله شوية انوب
ـ تعال هسه أشتاقيتلك
ـ جايج
ـ هسه تجي
ـ أي أني هم أشتاگيتلج
ـ تمام حبيبي أحضر فواكهه بينما تجي
ـ حضري حبشكلات السهره اليوم ما انام نسهر أني وياج لان باجر ما اطلع المحل أبقى يمج مجاز عمي سليم يكعد بمكاني .
ـ تمام حبي وگمت حضرت گلشي ورتبت نفسي وتأخرت ونزلت أشوفه بس عمته نجلاء وخالتي جواهر كاعدات وتماضر ماكو !! هاي وين راحت .
خاله نائل اجه
جواهر ـ لا بعده هسه يجي
بيداء ـ گالي راح يجي
نجلاء ـ هسه يجي وين يروح جاهل صغير ملاحكته
بيداء ـ ردت أردها بس نائل وصاني عفتهن طلعت بالحوش وشفت تماضر واكفه وياه وباوعت عليها
ولازمه أيده . !!
شكرا لزيارتكم عالم روايات سكيرهوم
