رواية بنات سهر الفصل السادس عشر بقلم فراقد حسن علي
لا تقف كثيرا على الاطلال
خاصه اذا كانت الخفافيش قد سكنتها ،،
والاشباح قد عرفت الطريق اليها....
بل أبحث عن صوت عصفور يتسلل وراء الافق مع ضوء صباح جديد 🌹🌹🌹🌹
=======================
مسرة / وصدكت ساهرة بكلامها وتنفذ قرار العمام
وبلشوا باأجراءات العرس.....
وطارق نقش أيده بالحنه وكعد
وطلعهن من الرازونه على كولت ماما
من جانت وحده بينا متقبل تشتغل
منتصر وهمام واولاد عمهم
بلشوا بسوالف ألحفله والعرس
من تحضير وتجهيز
وسوالف توزيع بطاقة عزيمة العرس على معارفهم
وعزيمة فلان البعيد خارج بغداد بالتلفون
ولا تنسون علان خاف يزعل
وانت روح احجز كراسي وميوزة وباقي شغلات الحفله
وانت روح أحجز افلان طباخ
وخابر فلان كصاب
وامشي بلغ فلان ابو علوة علمود المسواك
وروح اتفق ويه فلان رادود علمود يسوي الحفله
وكلهم يركضون ما يلحكون يخلصون شغلهم
وطارق ينام النهار كله
يكعد العصر يسبح وياكل ويطلع
شوكت يرجع مااعرف
منشوفه لثاني يوم العصر من يريد يطلع
خالتي وأجتي سهى ونهى ولمى وياهن ساهره ،
هن تكفلن بينا من تحضير وتجهيز
من ذهب وملابس وغراض واحتياجات العرس
وحفله النيشان والحنه ،
أني وسوار صح نروح وياهن للسوك
بس هن يشترن كلشي على ذوقهن
ومرات من يعجبنه شي يشترنه مايخلن بخاطرنا
بس هن هوايه يحبن الكشخه والبهرج
هوايه يبالغن بالمشتره من هدوم وشغلات
وحتى الذهب هن أختارنه كله خشن وشغلات كبار
مااختارن شغلات نازكة وناعمه يكولون / عيب
شنكول للناس مشترين شغلات مال فكور!!
أني وخواتي نشوف كلشي بسيط ونازك حلو بس هن لا نظرتهن تختلف
المشكله بيوم راحت ويانه خالتي ولمى وسهى
علمود فساتين حفله النشيان والحنه
قرروا بيوم الأربعاء العصر حفلة النيشان
وبليل حفلة الحنه ، والخميس العرس
4 ت
لمى وسهى أختارن بدلات
واني وسوار نريد فساتين وياهن بدي وحجاب
وهن ما يقبلن على أختيارنه يكولون / شنو هي حفله حنه لو حفله خطوبه
اني كتلهن / ماالبس مشلح أستحي
وسوار نفس الحاله
والبدلات صح تصاميمهم والوانهن حلوه
بس مشلحات من فوك ومابيهن اردان
أني وسوار قفلنا على قرارنا ما نريد لبس مشلح
وهن يردن فخفخه وكشخه وبهرج
عاد خالتي كالت / اخذن البدلات
وابو المحل يرهم النا وياهن شالات
وام الصالون ترتبه الجن على البدله وتسترجن
5 ت
أني وسوار أبد ما قتنعنا بهذا الشي
بس أنجبرنا على هذا القرار ونفرض علينا
وقبلنا بي غصبن علينا ،
وكل وحده من عدنا صارتلها بدلتين
وحدة للنيشان وحدة للحنه
وهن رهمن وياهن بعد الشالات
وباقي شغلات الزينه
5 ت
رجعنا للبيت وأنوب أخذتنا سهى للصالون
وصلنا همام بطريقه هو رايح على منتصر
يردون يجبون غرف ألاخشاب
2 ت
وهي سهى أتفقت ويه المراه
على مكياج مرتب يرهم ويه البدلات
وشعرنا أحنا ما قبلنا لا نصبغه ولا نكصه
بس هي ام صالون كالت/ عود بس اكص اطرافه
واعدله
هنا أجى دور الحفافه أني حافه قبل
بس شو أم صالون ملخت وجهي
كلساع وكالت / لج عيني همزين شعرها أشكر ومايبين شكد بيها شعر حسبالك أنظف باجة
12 ت
أنوب اسلوبها مو حلوة بالكلام
كالتلي / انتي بنيه شابه شنو هذا وجهج ما مار عليه الخيط ، ترى الحفافة من النظافه
شبيج هيج مخليته صاير زوليه
مربيته خو ما مربيته
19 ت
هنا طكت حوصلتي منها كتلها / خاله
ماما متقبل أنحف ،
واعرف الحفافة من النظافة
بس أحنا نحف بس شواربنه ،
وبعدين ليش نحف شو لا مخطوبات ولا متزوجات
علويش بعد نحف وأحنا بنات
16 ت
وثاني شي أحنا حزانه
ماما ماصارلها شهرين من توفت
وقبلها توفى زوجي ، وقبلها بابا وأخوية
فالحزن ما نطانه مجال نفرح ونشوف الدنيا
ماادري ماحبيت اسلوبها لا بالكلام ولا بالتعامل
ولا جنها عايشه بالعراق ولا جنها مضيومة
وكلشي عدها عادي ، والحزن لازم نطرده ولازم نتفتح ونعيش الدنيا
بقيت ساكته لحد ما خلصتني
وسوتلي حواجبي خيوط خربتهن
والله هذا الموديل وهاي حفافه العرايس والله خربت وجهي
سوار أول مره تحف ويمر الخيط على وجهه
من حفتلها كامت تكمز
وسهى كامت تحجي عليها
وهي من صدك توجعت كامت تبجي
وكلساع وكالت للمراه / بطلت مااحف وجهي خربتي
وام صالون تكلها / شنو خربته
غير وحدتجن وجهه صاير زوليه مال شعر
ما خلصتها الا بعد ساعه مااعرف اكثرشبعت بجي خطيه
18 ت
سهى حاسبت المراة
وتفقت وياها نجيها بيوم الحفله علمود تكمل باقي الترتيب ،،وأنوب حرجتنا وأصرت
هي أم ألصالون تكمل تنظيف جسمنا
بس أحنا ما قبلنا
لان ماما علمتنا على ألنوره فد مفيدة وزينه
هي ماما تسميها دوه حمام ،،ومرات نوره
نستخدمها فقط بتنظيف هذيج ألمناطق
باقي جسمنا مثلا ايدينا ورجلينا ابد ما نسوي
لان ماما تكول الشعر يكثر ويطلع خشن
والشعر عدنا مو خشن ويادوب يبين
فاابد ما نخرب باقي جسمنا
والحمد لله هذا الشي هم نعمة
36 ت
سهى خابرت على البيت
يجي واحد من الولد ياخذنا
دك تلفونها وهي كامت تحضر بروحها
كالت / يلا كومن السياره بالباب
من طلعنا تفاجئنا طارق هو جاي علينا
صعدت سهى يمه بالصدر
واني وسوار صعدنا ليوره
وهي كامت ترجف من الخوف
كمت اكرص بيها وادفع بيها تخاف من عنده صعدتها بالكوه
هو باوع عليها بالمرايه
وكاللها / هاي شمسويه بخلقتج ؟؟
ليش مصخمة وجهج وشايله حواجبج
هي بس كامت تبجي وختلت بحظني
هو صاح على سهى / هاي ليش هيج مخربات وجهه؟
مو كلت لأمج ممنوع تخربنها ؟
سهى ضلت ساكته وما حجت شي
3 ت
هو شخط السياره
وبقى يحجي على خالتي وعلى سهى
ومشغل أغنيه صح سريعه
بس كلماتها تملخ القلب
حفظت منها ،،
اشلون داده ويلي داده ..
اشلون داده
لو گرب يوم الولادة اشلون داده
23 ت
وسوار تسمع كلمات الاغنيه وكانما تخصها
وشبعت بجي عليها وبقت الطريق كله
تشهك وتبجي وضمت وجهه بيدها
وكامت تشهك بصوت عالي
2 ت
هو باوع عليها بالمرايه ،، وبقى يكول /
اااخ بوية كاظم ،، اااخ ياروحي
13 ت
وجان أتفاجئ بشوفه تبارك تدخل علينا
من باب الصاله الداخليه وكالت / لا هلا ولا مرحبا بالدايحات !!
22 ت
جاوبتها نهى / لازم جلدج كام يحكج
وخياطات كصتج طابن
وروح أبويه بس يجي ابوج الا اكله
طبت سهى أدردم ونزعت شالها واسلاميتها
وشمرتهن على القنفه بالمطبخ
وكالت/ يوم انا بعد مالي دخل بالبنات
طه زفني ولعب بيه طوبه لان حواجب مرته خفيفه
ويهدد بيه يسويله مشكله اذا شافها مفرعه لو طالع شي من جسمها بالحفله
24 ت
هو هنا طارق دخل وراها وديدندن بنفس الاغنيه
الجان مشغلها بسياره
ويفر بيده بسويج السياره
وكال / يوم سمعتي كلام سهى
وارجع أكيد عليج،، ممنوع تشلحن البنيه بالحفله
ولو تلبسنها عبايه وحجاب صلاه بعد احسن
وممنوع بعد تخربن وجهه لو شعرها
واذا سويتن غير هذا الشي وعود تفاجئني بيوم الحنة
ارش البيت بانزين واحركم انتم والمعازيم
عافنا وراح صعد فوك
نهى كالت /كون سامعج يا تبارك قبل شويه من تجاوزتي ،،وحك ولايه أمير ألمؤمنين
يشمرج من السطح
عوفج من البنات ولا تندكين بيهن
ترى ابوج امي بوست ايده يلا قبل نرجعج للبيت
هي تبارك واكفه تسويلها لفه مال قيمر ومربى
كالت / بعد مالي شغله بيهن
من عساهن بنار جهنم
خالتي جاوبتها/ ولج يمه أحفظي السانج
ولا تخلين ابوج وعمامج كلساع واحد منهم يهينج
انتي بت حديثه عيب تسوين روحج زعطوطة
وتجيبين الاهانه الروحج
4 ت
هي كالت / اووو محد بيكم يفهمني
اروح الغرفتي احسن من ما أسمع نصائحكم التغمت الروح
6 ت
لمى ضحكت وكالتلها / حتى عبارات امج حافظتهن
ما منج فايده ،اكعدي بالصالة لا تكعدين وحدج فوك
ابوج مايقبل
يالله صفنت عليها ، عود هاي ليش هيج وكحه؟
وليش متخاف ؟
وشلون تعرف هيج تسولف وترادد؟
شو لا اني ولا خواتي نعرف هيج نسولف
لو نرادد مثلها
بقينا كاعدين بالمطبخ
الصراحة مااعرف شبيه خجلانه على مرتبكه
على متوحشه من فكره الحفله والعرس
يعني مرتبكه وقلقة مااعرف شلون اتصرف
2 ت
اتفاجأت أجتي أساور سابحة ومبدله
ولابسة ربطه لون جوزي مشجره
صح لابسه اسلاميتها بس جواها دشداشة ملونه
يعني نازعه الاسود
وعيونها بيهن كحله ،
بس شنو عيونها حزينه ومليانه دموع
خالتي والبنات / كامن يدعلها
كون بعد ما تشوف حزن
وهنا تطفر نهى وجابت علاكتين
وانطت وحده اليه وحده لأسوار
وكالت /يلا قبل الغروب كومن اسبحن ونزعن الاسود
حتى الحجيه ادز بيد واحد من الولد
صينيه الحلويات للحسينية ثواب على روح الموته
ودفعه بلاء عن لبسجن للأسود
2 ت
أني ما قبلت وخنكتني ألعبرة
وبجيت مقهوره
شو هم خططوا لكلشي واحنا نفذنا
بدون حتى ما نقاش شي ،
وهيج بسرعه يردونا ننسى ماما
وننزع ثوب الحزن عليها
خالتي والبنات بقن يحجن عليه
ويصبرن بروحي وبخاطري بكلمات طيبه
وعود الحزن يبقى بالقلب مو بالثوب
ولبس الاسود على الميت يجر أسم الله
ويسحب من عدنا بعد عزاز
واني عروس وميصير أبقى بلبس السواد
وحزني على ماما أعوضه عليها
بالصلاة وقران القران على روحها
وذكرها دوم بصلاتي وبالثوابات
واعرف هذا الكلام كله ما منه فايده،،
بس يجبر الروح ويقلل عنها لوعة الفراك
كامت سوار قبلي للحمام سبحت وبدلت وطلعت
خطيه صارلي شكد ما شايفتها بثوب الالوان
صدك حسيتها طلعت غير شكل
كعدت بغرفة خالتي امشطلها
اني اعرف اسوي ظفيرة فرنسيه هن خواتي يحبنها
أني امشط لسوار دخلت أساور
كامت تبجي مهظومه كالت / اني مااريد انزع
ثوب الحزن على ماما بس خاله والبنات
جبروني والله هوايه تعذرت من ماما
وكتلها تسامحني لان عقلي هذاك اليوم ظلمها
وهديتلها سورة الفاتحة يلا نزعت الثوب
7 ت
ولمى كحلت عيوني تكول / انتي هسه مخطوبه
وصرتي جبيره تعلمي ترتبين نفسج
أني هنا بجيت وكتلهن / هاي حياة جديدة
لازم نتقبلها ولازم نعيشها
ومنا وهيج لازم نعتمد على نفسنا
وماما ربتنا أحسن تربيه
وباجر نصير متزوجات ومسؤولات عن رجال وعايله ولازم نبين ونعكس تربيتها الصحيحه لنفسنا وللعالم
حتى الله يرضى علينا ويوفقنا
وهم نكسب محبة العالم
بجيت بقهر لان هذا كلام ماما اليه بيوم زواجي من المرحوم،
وحسيت بهذا الوقت خواتي محتاجات يسمعنه
حتى يبلشن بخطوة صح بحياتهن جديدة، وعدت نفسي ابد مااعوفهن
وابقى ساندتهن لحد مااموت
هذني وصية ماما ولازم ألتزم بيها
اني اكلب بعلاكة الهدوم النطتنياها نهى
أساور كالت / دريتن تبارك أبوها كاتلها
وداك راسها بمحجر الدرج ومشكوكة كصتها
بيوم صارت سالفه ،، لاكيها تخابر على امها
وتكول حجي مو زين علينا
وكايله / هي سوار مواعده طارق وهي صاعدتله
ومألفه سالفة جذب من يمها
وهو سامعها خابزها خبز
9 ت
وهي زعلانه وبقت هاي المده كلها يم امها
والعصر راحت جابتها نهى ولمى
خالتي شكد توسلت بمنتصر يلا قبل ترجع للبيت
خالتي تكول / مراهقة و طايشه تبقى كدام عيونه
احسن ما تفلت وتسويلها مكسوره
4 ت
ولا أهتميت للسمعته والله قلبي خلصان
البيه مكفيني شعليه باقي الناس
هي من تسوي غلط ابوها وعمامها يحاسبوها
اخذت هدومي ورحت سبحت
وأني بالحمام سمعت البنات كامن يهلهلن
عاد كملت سبح وبدلت
ولبست دشداشة قديفه ناعمة
لونها سمائي فاتح و بصدرها بصمه بيجه
على شكل قلب ، اذا تذكرون الدشداشات السوريه
من طشت بالأسواق العراقيه وره السقوط
وياها ربطة بيجيه
ومن طلعت مشطت وخطيت عيوني كحلة
من صدك شكلي أختلف
11 ت
رحت للصاله ونهى وسهى شنو هلاهن رجت البيت
نزل همام من فوك كام يحجي يكلهن / يمعودات
صوتجن العمال فوك يشدون بالأخشاب
1 ت
وخالتي كالتله / امشي شوفني عرض جتافك
يمه غير معرسين وفرحانين
1 ت
وهي والبنات هم دعلي بالفرح وكون مااشوف حزن
ولا لبس السواد
ساهرة جانت تصلي من خلصت صلاتها
أجتي بوستني ودعتلي دعاء صفنت عليه
هلكد كلماته حلوه كالت / اللهم بحق فاطمة وابيها وبعلها وبنيها والسر المستودع فيها
أللهم يفرج عنكم كل كرب وهم وغم
22 ت
أنوب رفعت أيدها وراسها للسماء وكالت /
اللهم أني استودعتك بنات سمراء بحولك و قوتك،،
اللهم أنهم قلوب أحبتني فاحفظهم لي و ارزقني و اياهم السعادة في الدنيا و الاخرة...وعوضني وأياهم خيرا مما خسرنا واكتب لنا السعاده حتى ترضى عنا ،،اللهم أسألك أن تشرح صدورنا وتغفر ذنوبنا أنك على كل شيءٍ قدير
كعدت يم خالتي والبنات وبقيت افكر
واكول بداخلي / معقوله هيج ساهره فرحانه المنتصر
ولا ضايجة لان هو رجلها وراح يتزوج عليها ؟؟
يعني شنو صدك متغار عليه ؟؟
لان شكلها كلش فرحانه بسوالف تحضيرات العرس
8 ت
نزل طارق لابس بس بجامه التراك
وفانيله داخليه سودة ليش ما يبرد مااعرف
دوم هيج يلبس أبد مااشوفه يلبس هدوم ثخينه
جان يريد يطلع للطرمة
من فات من الصاله راح ورجع بقى واكف وكال /
هنيالج فطومة تصبحين بهيج وجوه تفتح النفس
مو وجه لمى الازرك يسوي عندي جالي من أشوفه
13 ت
خالتي كالتله / أمشي على شغلك أبو نسوان
2 ت
هو ضحك وكال للعجوز / عمه ترضيها يشوهن سمعتي
عمي شنهي شايفاتني مطوطح وياهن
لو نايم بحظن وحدة منهن
9 ت
العجوز ضحكت وكالتله / لا يا بوي
هذا أتهام باطل أنا ماارضى بي ،
بس أكول هذولك العرب
تشوفهم من النسوان اليدخلن بمزاجك على كولتك
هو يباوع على سوار ويحجي
وهي مدنكه راسها بالكاع راح أطك ركبتها
كال / هن وينهن النسوان شو مااشوفهن ؟!
كلجن الكاعدات مقيديجن بقائمة الجنود المستجدين
بس أبو حواجب الهلال بي شوفه
والله حرامات سهى هيج خربتي وجه المسكين
جان حلو ومرتب هسه خرب شكله
25 ت
خالتي شمرت عليه الكوشه وتضحك كالتله/
امشي على شغلك ومالك دخل بالجنود
خليهم عليه انت الك الصافي
وراها بقن البنات يتفقن على هوسه الحفله والعزيمة
وهاي تكول هيج نسوي
وهذيج نكول لا هيج نسوي
وهاي ماترضى على المقترح الأنعرض
وذيج تكلها مو بكيفج عيب من الناس
وهذيج تكلها لاتنسن صلوات عرسين مو عرس واحد
لا تصوبنه عيون العالم
وهذيج تكلها الله الحافظ
3 ت
لحد ما صار أذان العشاء وأحنا على كعدتنا
استغفر الله حتى صلاة المغرب راحت علينا
اخذتنا السوالف وراح الوكت علينا
عاد كمت اني خواتي للصلاة
نصلي بغرفة خالتي
لكينا مهند موجود فد رجال حباب وخلوق
سلم علينا وصاح على أساور أنطاها علاكه
كاللها / مازن وصاني من أول بارحة
اجيبلج تلفون وخط ،،نسيت والله
العصر فكدتج وأشترتلجياه
أني وخواتي كعدنا يمهم وأساور اخذت العلاكه
من ايد مهند وفتحتها ،
بس طلعت باكيت التلفون
وجان همام يصيح / الله ربج هذا البخت
ولج انا تلفوني آن ٩٥
وأنتي آن ٩٧ ولج شو خل أشوفه
وطفر همام يمنا واخذ الجهاز من أساور
وكعد بالكاع وبقى يشتغل بي
وأني وخواتي هم كعدنا بالكاع والتمينا عليه نباوع
هو وكال / مهند بروح العزاز
منين أشتريته هذا هسه طك عدنا
يمكن بعده بالكمارك
مهند يحرك بقلبه يكله / شحنته من دبي
طارق أجى وكعد يمنا وبقى هم يكلب بالجهاز
ويه همام ، كاله/ هذا هم يشيل ١٦ كيكيا
بس يمكن كاميرته مو هلكد زينه
باوع على الخط وكال / عمي شتردين بعد
خط عراقنا ورقم مميز
هو وهمام كملوا الجهاز وخلوا الخط
ومهند حتى كارت رصيد جايب وياه
كملوا الجهاز وكعدوا يعلمون أساور عليه
والله دخنا ، هم يعرفون للجهاز
وأحنا بعدنا كلشي مانعرف
واحدهم صار معلم براسنا
طارق أتصل على مازن وبقى يشاقه وياه
ويكله / أنا اخوك وجهازي قديم
ابدل جهازي ويه مريتك تراها كلشي ماكو
صفر وباليد طكطاكة ، الصرصور كافي عليها
واعتبره هديه زواجي
ومازن مايرضى
وطارق يضحك ويهدده يكله / بسيطه
اذا ما خربتها عليك واخرب واهسها بيك يالمفحم
فلا أنا أبن أبوي
هنا ودخل منتصر جان الظاهر بالحمام
منتصر اغلب الوكت يلبس دشداشة قليل يلبس تراك
بس من يطلع بشغله مهمه لو مناسبه
يلبس رسمي
2 ت
شاف لمتنا وكال / ما شاء الله
اشوف الكلوب أتألفت
لو ادري من زمان شاحن التلفون
باوع عليه وصفن نسى الحجي
وبقى يسحب بشعره بالفرجه بعده رطب
طارق بعدة يحجي ويه مازن من تلفون أساور
حرج منتصر وصاح / ماااازن منتصر باع القدس
بس شاف حلويات نينوى واليوم عاجينها بالدهن الحر
ولك مازن بالخميس مهند يكابله ويكعد
يخاف عليه يتهور ويوكف قلبه
عود انت هم تحضر حتى نشيله على سديه
29 ت
منتصر هو واكف دفر طارق بس دفره خفيفه
وهو يضحك يكله / نذذذل ما منك فايده
مهند كال / يبقى تفكيرك نكس
انطي التلفون للبنيه وكوم جيبلنا الورق
ناخذلنا فره حتى امشي اكابل الكناري
شتكولين عمه أجيبها الج الصبح
تعاونج
14 ت
خالتي ضحكت وكالتله/ مكفى عمه ،،خليها عندك
بالخميس الصبح جيبها مالي حيل للمشاكل
هنا واجى عمنا حاتم
يالله شوكت مااشوفه يلمع من النظافة
من شافنا بلبس الألوان وشكلنا متغير على الحفافة
كال بالشقه / بطلت ماعندي نسوان للزواج
حرامات هذني الحلوات يصيرن الكم
15 ت
منتصر كاله / أنا مشتري بروحي
مهند كاله / أنا بظهر مازن وأفدي بالنفس
عمنا باوع على طارق وكاله / وأنت يالعار شدكول
جاوبه طارق / هااا أنا حجيت شي ليش الغلط
أنا اليه الله
شو جماعتكم حتى ما يباوعون بجهرتي
عمنا كاله / مو نذل واغم
والله حرامات هل الفيفي ينحبس عندك
12 ت
هو طارق ضاج وكال / اووووو شلون يخلون الواحد
يضوج ويكوم يدك راسه يم سراب عواد وحبايبها
اكوم اجيب الورق وناخذلنه فره أحسن من الرزايل
ترى أنا ساكت الخاطر عمتي
عمنا حاتم صاح بي / خااااايب كم
ساكت الخاطر عمته العار
هسه أكوم افصم ظهرك وشحدة منتصر يحجي
منتصر ضحك وكال / بايعه الك بالجمله
فصخة على راحتك
هو كام يدردم وراح فوك جاب الورق وأجى
كعد منتصر ومنهد وعمنا حاتم وطارق
وهمام وحسين هم كعد وياهم
من كعدوا يلعبون طارق كعد حسين بصفة
ومو يلعبون يشاوره شنو طلعله بالورق
وهو حسين هم يشاور طارق ويلعبون سويه
الحلو بيت خالتي
ابد ما يعاملون حسين على ان هو أعمى،،
وهو هواية يحب أعمامه وبالاخص طارق
حتى مرات هو يدخل يسبحة ويمشطله
ويبدل ملابسه على ذوقه ويطلعه وياه العصر
شوية ويرجعه للبيت
وبعدين هو طارق يرجع يطلع
البنات كملن عشاهن وشكد صاحن على الولد
الاكل موجود على الميز كوموا تعشوا
وهم اعتزوا بالكعدة واللعب
ومحد بيهم رضى يكوم ياكل
عاد العجوز كالتلهن / خايبات لا تلحن
خلنهم مستانسين جيبن النعمه العدهم
لمى ما قبلت كالت / الصاله تصير كلها ريحة اكل
1 ت
عاد خالتي كالتلها / كومن جيبن اكلجن هنا
وعود بخرن الصاله من يخلصون
1 ت
بس العجوز خطية بليل ما تتعشى
عود شوكت ما جاعت ساهرة تسويلها صينيه
شوية اللبن وصمونه وستكان الجاي غيرهن متاكل
الولد تعشوا بسرعه وخلصوا قبلنا
واحنا بعدنا ناكل هم صاحوا جاي
ورجعوا يلعبون،،
وحسين بقى هو وطارق اخير شي
وهمام اخذ دور طارق بالعب
بين ما كمل اكل ويه حسين
سوار بقت بس كاعده ما تقبل تاكل
تكول / هسه بس اكل تقلاه وهذا الكباب
معدتي تأذيني متخليني أنام ،
سهى حجت عليها كالتلها / مو زين عليج وعلى طفل
تبقين بدون اكل أثنينكم تتمرضون
هي جاوبتها كالتلها / هسه اسوي كاستر وبسكت
أحبه وخفيف عليه ، وكامت راحت للمطبخ
تسويلها كاستر ........
2
سوار / أني بهذاك عمري جنت مااعرف افكر
ومااعرف شسوي ،
وشنو تكلي عليه خالتي ومسره اسوي ،
اكول هن اكبر مني ويعرفن مصلحتي
خالتي شكد تحجي ويايه
وتكلي / انتي بنيتي وأنا امج
واعتبري امج ما ماتت الا اعوضج عن حظنها
والله انا حبيتج انتي وخواتج
والصار صح أذاج بس اعتبري بي خير الج والخواتج
وهذا العرس بس كدام الناس نجذب عليهم
أحسن ما تبقن بدون والي
ومالج دخل بطارق
اذا وصل يمج منتصر وعمج يكتلونة
اريدج تبقين بيتي انتي وخواتج
لمى باجر تزوج ومحد اليه بس أنتن
وكل هذا البيت والذهب والاملاك تصير الجن
انتي هم جبيرة وتفتهمين
ليش تسوين نفسج صغيرة
واختج مسرة خطية وكعت وتمرضت علمودج
صيري سباعيه وشيلي روحج
وشيلي هم اختج وياها
ترى مو سهله عليها تصير أمجن وهي بعدها صغيره
شكد تحجي ويايه هووووايه تعلمني وتفهمني
حتى منتصر هم فرح وكيف
وبقى الطريق كله يشاقه ويايه
ويكلي/ اذا تجيبين بنيه ازوجها الحسين من يكبرون بس اريدها تطلع حلوة مثلج وكون عيونها
تطلع نفس عيونج حلوات
ومن رجعنا للبيت صاحتني خالتي بغرفتها
وانطتني كلاده فد حلوة ،
كالت / هاي الج هديه مال بشارة الحمل
بس ضميها حتى بناتي ما ياخذنها منج ،
لان نهى تريدها وانا استعزيت بيها
وصارت من نصيبج
1
ومن أتفقوا على موعد الحفله والعرس
هي وساهرة والعجوز كعدن يحجن ويايه
وكالن / راح نسوي حفلة وعرس جذب
بس كدام ناس نقشمر عليهم
انتي نريدج تفرحين وتبدلين وتلبسين بدلات حلوة
ومن صدك تصيرين عروسه
وابد لا تخافين من طارق
حجه وياه منتصر وهو هم ماله دخل بيج
انريد نشتريلج هدوم حلوة ،
وشغلات مال بنات عرايس
وناخذج للصالون نسويلج مكياج وتسريحة يعني عرس حلو ونفرح بيج
أني الصراحة كيفت على حجيهن
من صدك قنعني كلام خالتي وساهرة
وفرحت بالهدوم الحلوة ،
والشغلات مال عرايس
وبالبدلات ، كلشي عندي حلو جديد
فرحة طفله بهدوم العيد
طارق أشوفه هنا اطفر منه اهناك
من كل مشاعري وروحي أخاف من عنده
اذيته للقبر ماانساها
بس بوجود منتصر وخالتي والبنات أأمن
وشويه مااخاف من عنده
رحت للمطبخ أسويلي كاستر
وجهال سهى يركضون بالبيت جنهم خيول دوخوني
كنبصت يم الكاونتر أدور دبة الكاستر
ومندمجة ادور بين الغراض
سمعت طارق تنحنح بصفي لو أني زعت العافيه
أني شنو أنصكيت ولا جاوبته ولا تحركت
هو عافني وطلع من المطبخ
شو رجع بسرعه وكف بصفي
واني بعده جسمي يرجف من الخوف
كالي / شنو أسم العطر مالتج الهذاك اليوم جنتي
مخليه من عنده !!!
ما جاوبته أنصكيت بلكوة شالتني رجليه
كمت اريد اطلع من المطبخ
هو ضحك وكال / بويه طركاعه مو بنيه
ولجن منين جبتن هذا الخجل والمستحه
وأمجن جانت هي أم ألزلم !!
باوعت عليه وخزرته لان حجه على ماما
هو لزم قلبه وكال / خرب شيب ابوج على هاي العيون
ولج خاف محد كايلج ترى عيونج تجيب راس أكبر ثور
هنا وسمعت صوت خالتي كالت / وانت اول ثور
امشي اطلع بره صكيت البت من الخوف
خلها تسويلها شي تاكله لا انت وابنك تتحزمون عليها
هو ضحك بصوت عالي من خاطره وكال / مقبولة منج فطومه ،،هسه انا شمسويلها
بس سألتها شنو اسم العطر مالتها
شو هي طلعت خرسه
خالتي دفعته وطلعته بره المطبخ
وكالتله / تخلي نفط تحركك بي
بس اطلع خلها تاكل لكمه لا تسد روحها
هو طلع من المطبخ وبقى يتلفت عليه
يغني بس صوته مو هلكد حلو
خالتي كالت / عوفج منه وتعاي سويلج شي تاكلينه
رجعت على شغلي وبلشت اسوي بالكاستر
وبالي بقه يودي ويجيب بسوالف طارق ......
شكرا لزيارتكم عالم روايات سكيرهوم
