رواية ناديه الفصل السابع عشر بقلم انين الليل
سراج
من سمع المحامي. ادهم الي موكلينه بكلام محامي الدفاع سأله وهو يگول
- - - اطلب من عدالة المحكمه ان يبين زميلي محامي الدفاع كيف بنى نظريته على اتهام احد الشهود
باستغلال منصبه
مع العلم ان المتهمه اعترفت بلسانها واثناء كشف الدلاله بانها هي من قامت بالجريمه واعرف ماذا سيكون
رد زميلي انها وشريكها اعترفت بعد تعرضهم للتعذيب والتهديد
محامي الدفاع
- - - نعم سيدي القاضي والا نستند على كلام طفله لم تبلغ الخامسه من العمر كان قد اخافها بكلماته
بان الشرطه سوف يذبحون اختها اذا لم تتهم امها وانه سوف ياخذها الى مدينة الالعاب اذا قالت ان
امي هي من قتلت ابيها
قام بشراء ملابس جديده ولعبه لها ولاختها وهي بعقل الطفله قامت تزيد وتقلل على الحادثه
فعقل الاطفال يكون واسع المخيله هذه الطفله سيدي القاضي احيانا تقول امي احضرت السكين وتاره تقول بان
سلدار طلب من الام ان تعطيه علبة الحلوى
السؤال ماذا يفعل قاتل قتل رجل خنقا وضربه بالسكين ووضعه في حقيبة السياره ووضع فوقه كيسين
من الطحين كما يزعم محامي عائلة القتيل باالله عليكم ماذا يفعل بعلبة الحلوى
القاضي //افهم من كلامك بانك تفند رواية الطفله
الدفاع //نعم سيدي القاضي افندها فالطفله قد تلقنت لكنها تنسى ما تقوله لذلك ارجو من عدالة المحكمه
ان لاتاخذ بنظر الاعتبار كلام الطفله
ادهم المحامي اقترب من المنصه وطلب من القاضي ان يستدعي هذا الاسم الموجود وان يعيد استجواب ناديه
القاضي امر الشرطي ان يستدعي هذا الاسم وفعلا دخل ولد عمره 25سنه او اكثر لابس ملابس شرطه
سأله القاضي //اسمك وعمرك وعملك
الولد جاوب // باقر احمد مارد عمري 25سنه وعملي انا عسكري
القاضي وكف واقسم والولد ردد ورا القسم
اجه المحامي ادهم وسأل الولد وگاله
في يوم ..الموافق 18رمضان وين كنت ما بين الساعه العاشره الى الساعه الحاديه عشر ليلا
جاوب الولد //كنت لازم واجب
شنو نوع واجبك او وين
استاذ انا منتسب اداوم بسيطرة ال...
المحامي باوع السلدار الي شافه ارتبك وگال للشرطي
ممكن تكلنه بهاي الليله شنو الي شفته
الولد // عادي استاذ نفتش ونمشي السيارات
افهم من كلامك ما مر عليك فد حادثه فد شي خلاك ما تنسى هذا اليوم
استاذ احنه يوميه تمر علينه اشكال
صحيح بس ليل ورمضان وانت لازم واجب بهاي الليله ما تتذكر شي
الولد هز راسه وگال //نعم استاذ كنت واكف اباوع للسيارات والي اشك عنده شي اوكفه اجه ولد منكب
ويسوق سياره وكفته كتله // انزع الجفيه وانطيني هويتك
هو سلم وگلي وهو فرحان //اي خويه تدلل انا زميل وياك وهسه خابروني المره جايبه ولد ومن فرحتي ما
عرفت شسوي
فهو انطاني الهويه باوعت الها وبهاي اللحظه گلي
اتفضل خويه هاي الك والصحبانك حلي حلكك يمعود بالشافعات ياالله صار الولد
انا من شفت فرحته وبس يريد يستعجل ويروح ما دحچت بالوجه هلگد انطيته الهويه وباركتله واخذت
باكيت الحلويات منه
ادهم //تتذكر شنو نوع الحلويات
الشرطي //اي استاذ بقلاوه وزعتها على صحباني
ادهم //ها يعني هسه اذا نستدعي اصدقائك راح يشهدون انهم اكلوا وياك
الشرطي //اي استاذ بليلتها ظلوا يصنفون عليه ويگلون هذا وزع بقلاوه انت من تتزوج شتوزع
ادهم //زين اذا تشوف الولد تعرفه اقصد اذا تشوفه مو بالهويه بالحقيقه تعرفه
اكيد اعرفه
ليش گلت اكيد
لان احنه بالسيطره حالنه حال اي عمل تصير بي مفاجآت فهذا الولد يعني فرحان وزوجته جايبه نتذكره
مو من السهوله ننسا وبعدين الولد شكله حلو ومرتب وشاب ولهجته مو بصراوي
ادهم //شلون مو بصراوي
استاذ لهجته بغدادي
زين انت شفته اقصد موجود بالمحكمه باوع موجود اهنا ويه الگاعدين او بغير مكان ولا تنسى انت قسمت
الشرطي ظل يباوع واشر على سلدار //هذا هو نفسه الي انطاني باكيت البقلاوه وگلي زوجتي بالمستشفى
ادهم //انت ما فتشت السياره
استاذ من نشوف انسان مستعجل وعنده مريض او فاتحه احنه ما نفتش واحيانا نهائيا ما نفتش بالعكس نمشي راسا
خصوصا اذا الامور عدله وما اجانه امر بالتفتيش يعني واحد يگلك زوجتي جابت ولد وبالمستشفى وانا زميلك
ومنتسب وياك وتفتشه
ادهم بابتسامه //ولاتنسى انطاك باكيت بقلاوه
المحامي باوع وگال //شكرا سيدي القاضي اترك الزملائي السؤال
وسأله محامي سلدار گله //يجوز متوهم او انه يشبهه
الشرطي// لا استاذ مثل ما كلت اكو ناس تبقى بالذاكره بسبب تصرفها او شكلها
- - شنو قصدك
اقصد الولد شكله حلو والولد بوكتها فرحان ومتوتر وعنده حادث سعيد هذا يبقى بالذاكره
بعدها صار كلام امام القاضي وطلب محامي الدفاع ان يسال حنين لكن ادهم
گال هي مو طرف بالموضوع محامي مياده گاله
ليش يازميلي مو المحكمه الموقره تاخذ بكلام طفله اكبر منها بعام
القاضي امر يجيبون حنين يمه وراحت عمتي منيره گلها
شنو اسمج
هي ما جاوبت گلها وين بابا
بقت ساكته ناديه اجت يمها وگلتلها
... حنين لا تخافين هذا عمو يكتل الشرطي ما يخلي يذبحج
حنين اجت يم ناديه وهي ساكته ناديه گلتلها
...عمو يسالج شنو اسمج
هي باوعت الناديه //هنين
ناديه ...يسالج وين بابا
حنين رفعت امتونها يعني ما ادري
القاضي گل للمحامي //هاي اسمها گوه تلفظه رجعيها
واخذتها ناديه ورجعت وراحت عمه منيره
وراها طلب المحامي ان يسال المتهمه سؤال واحد القاضي وافق گلها
- - مياده هذا الي ابطنج ابن منوو؟
محامي الدفاع رفض سؤال المحامي وگال //هذا تشهير باعراض ناس امام الملأ
ادهم جاوبه //يازميل هي اعترفت بان هناك علاقه غير شرعيه تربطها بالمتهم واكيد اذا نكرت راح اطالب
بتحليل اثبات النسب
واذا اعترفت اكيد انت راح تطالب او زميلك راح ايضا تطالبون باثبات النسب
القاضي باوع الها وگال //احچي مياده
هي باوعت السلدار وگالت //الي ابطني ابن سلدار
المحامي وجه كلامه السلدار //وانت شتگول على اعتراف المتهمه
سلدار گال// اي الطفل ابني
محامي سلدار گله// على اي اساس تنسب الطفل الك هي متزوجه ويجوز من زوجها
سلدار //لا استاذ الطفل ابني لان هي امتنعت عن زوجها شهرين ما خلته ينام وياها وهذا الشي انا طلبته منها
كتبت ورقه زغيره وانطيتها للمحامي اللي سال مياده
- - مياده بما انه گلتي الطفل الي ابطنج نسبه السلدار طيب بناتج ناديه وحنين بنات منو او بالاحرى منو ابوهن
مياده جاوبت والعبره خانگتها //والله استاذ ابوهن عباس وتگدرون تسوون تحليل انا شفت سلدار ورجعت
علاقتنا وره زواجي باربع سنوات
المحامي ادهم //بعدج مصره انتي الي قتلتي عباس ابحدج
مياده //اي انا قتلته وبحدي
المحامي ادهم //لا يخفى على حضراتكم انو المتهمه تقول هي وحدها من قامت بقتل المجني عليه
وهذه خطه معروفه حتى تبرئ عشيقها وبما انه هي حامل فكل ظنها ان المحكمه سوف تتساهل معها
صارت مداوله بين القضاة وكف المدعي العام الي بين تهمة مياده وسلدار وتجريمهم بقتل عباس بعد ان همه
اعترفو وجميع الدلائل تثبت هذا الشي وانها اقترفت جريمة القتل وجريمة الزنا وبذلك يطلب انزال اقصى
العقوبه بيهم ومحامي مياده اتكلم وطلب ان المحكمه ترأف بحالها من اجل الطفل وهي حامل
اما محامي سلدار فقال ان موكله ليس له يد بالقضيه حيث انه استدرج من قبل المتهمه بعد ان اغوته بعلاقه محرمه
وهو هنا حاله حال عباس هو ضحية المتهمه وطلب العفو عنه
ادهم قام وقال // حضرات القضاة
- - لايخفى عن جنابكم ان العداله لها عدة وجوه وما جلستم في مقاعدكم ولا رضيتم بهذا العمل الا من اجل العداله
وتحقيقها لايكون الا من خلالكم
- - هؤلاء اثنان قد احبا بعضهم البعض وحالت الظروف دون الاقتران وهذا حال اكثر من تسعين بالمائه من الناس
هل معنى هذا ان كل من لم تتزوج بحبيبها وتتزوج بغيره تعمل علاقه محرمه تزني تحمل سوفاح
ومن ثم تقتل وتمثل بالجثه وتيتم اطفال بعد ان زهقت روح ابيهم وهي وعشيقها واحد يدافع عن الثاني
لكم الحكم ولله الامر من قبل ومن بعد
شكرا سيدي القاضي
واهنا القاضي باوع المياده وگلها
- - - الله كرمنا وخلقنا انسان يعني ما نخلى من الانسانيه كان ممكن من رجعتي علاقتج بي ان تزعلين عد
اهلج وتطلبين الطلاق وتتزوجين بدل ان گلبج انملى حقد وكراهيه ونفسج الخبيثه انملت خيانه وهوان
انتي يتمتي بنات وما تعرفين شنو تركتي عدهن من نفسيه حطمتي اسره ودفتني فرحه واحلام طفوله
ما راح تتحقق لبستيهن عار لا يمكن ينمحي بمرور الزمن لان مجتمعنا ما يرحم
انتي ويا ماتستحقون ان تعيشون
وتلى نص العقوبه بحق مياده وسلدار بعد ان جرمهم بالقتل العمد مع سبق الاصرار
فكانت عقوبتهم الاعدام سمعت صرخة ام. مياده وام سلدار وبنفس الوقت عمتي منيره وهي تبچي وتگول
الحمد لله وهلهولة عمتي جميله القاضي دك على الميز وگال
ولو بيدي الامر كان عدمتكم بنفس المكان الي غدرتو بي الانسان البريء
اخذوا مياده وسلدار وطلعوا القضاة محامي الدفاع اجه على المحامي ادهم وگله
- - لاتفرح يازميلي بعد ورانا التمييز
ادهم // اتمنى تقدم التمييز واتمنى يخففون الحكم حتى اخلع قميص المحامي وبالتالي اخلع قميص العداله
اهنا احنا طلعنا واحنا نسمع تهديد اخوان مياده واهل سلدار وغلطهم علينه راد كرم يرجع يتعارك وياهم
انا ما خليته وطلعنا وعمتي ما بطلت بچي. ركبتها وياي هي وناديه وحنين وسالتها
::عمه ليش تبچيين مو انحكمو وطلع حق ابنج
عمتي =يمه وداعتك ابچي على مصيبة ابني الي چان فرحان راح يصير عده ولد يشيل اسمه وطلع الولد مو ابنه
::عمه احمدي الله واشكري واخيرا مياده ضميرها صحى وگالت الحقيقه احسن ولا يتربى واحد مو من صلب
ابنج وابن حرام وياخذ تعب ابنج وحلاله وياخذ حق البنات
من وصلنه عمتي ظلت تبچي حييل وانا والبنات وزهراء نصبر بيها حتى هادي وكرم صارو يبجون
عرفنا عمتي تبچي على البنات والي راح يصير بيهن خصوصا واحنه مجتمعنا مثل ما گال القاضي
ما يرحم
راحت زهراء وجابت ماي وغسلت وجه عمتي وشربتها شويه وناديه كل شويه وتگلها
...بيبي لا تبچين عفيه لا تبچيين
رحت انا وياسر ابن هادي للمطعم وجبت غدا وفواكه بعد ان وصيت زهراء الكل خلي يبقى ابيت عمتي للغدا
ورجعت صبن زهراء وافراح وكعدنا كلنه سووا عمتي اتكترت لكن عمه جميله گالت
منيره اذا انتي ما تاكلين كلنه ما راح ناكل اليوم انتي لازم تهلهلين وحتى الاسود تنزعينه لان طلع حق ابنج
ورحت يمها گتلها ::عمه اهم شي بنات عباس يعيشن بكرامه وهاي الكرامه انتي تحفظيها الهن ولازم تدارين
نفسج الخاطيرهن
وكعدت عمتي منيره يمها حنين وناديه كل وحده بصفحه انا كعدت يم ناديه وعمتي جميله يم حنين واتغدينا رغم كلنه
موجودين لكن الكل ساكت حتى الاطفال عبالك يدرون بالموقف الي صار
من كملنه سلوى جابت الچاي وصارت تصب شربنا اهنا كرم گال
- - ما طوول الكل موجود عندي حچايه
باوعناله هو استردف وگال
- - بنات عباس ما طولهن زغار يروحن البيت هادي يعيشن ويه بناته واولاده يتعودون عليهن ووهنه هم يتعودن
منيره گالت ==شنو هالحچي كرم
كرم هز راسه // خاله هو هذا الحچي انتي مره چبيره وتعبانه وهنه اول وتالي مردهن العمهن
هادي سكت واشوفه يباوع الافراح
جميله گالت //والله كلام كرم بمكانه عمهن وهنه عدهن خير من الله محل ابوهن والبيت يتاجر والراتب
افراح گالت //والله خبصتونه بالبيت منو ياجره وهو انكتل بي واحد انا اشوف تبيعونه احسن
جميله //حتى لو ينباع لازم تشترون بي بيت الهن ويتاجر ويه فلوس المحل كافي عليهن قابل هادي راح تدني
نفسه على الاجار الله لا يعوزه عنده خير عمهن راح يضمه الهن ومن يكبرن ينطيهن حقهن
منيره گالت =عباس عده محلين واحد باقي على فلوسه 750الف ننطيهن من فلوس الفصل
كرم //اي وبالباقي اترسو المحل بضاعه
بقيت اباوع وانا اشوف هادي ساكت وافراح تباوعله بنظرات گتله
::ها ابو ياسر شو ساكت ما تشاركنا
هو كال وهو ينفخ
- - اي اكيد بنات اخوي اول وتالي عندي بس خلي تفض القضيه ونشوف التمييز وانطي للمحامي اتعابه تدري
هو شكد طلب مني كلي فلوس فصل لو اهل سلدار لو اهل مياده ياالله اجيبلكم اعدام بيهم
كرم //ااه تحجي صدك
هادي //اي وداعتك وانا گتله شتريد استاذ بالخدمه بس حق اخوي ما يضيع ولا تنسى شگد ذبيت فلوس منا ومنا
افراح //ناسي هادي چا والعزايم والغديات وروح جيب شيخ فلان وجيب علتان يمممه حتى رجليه راحن من
الوكفه وظهري انكسر من سوو چاي وخلو ماي
تبادلنا نظره انا وعمتي منيره عرفنا من سكوت هادي وكلام افراح انهم رافضيين او بالاحرى افراح
رافضه وجود البنات يمها
عمتي گالت //افكر ابيع البيت وبيت عباس والمحل واشيل من البصره كلها اروح يم منير وحتى انت يمه هادي
امشي هناك بيع بيتك ومزارعك يبقن وراتبك ماشي واشتري بيت ابمكان بيتك
كرم //ليش خاله ليش تشيلين ؟
عمتي =خاله احسن اقلها محد يذكرنا بسالفة مياده والبنات يتربن وينسن ما طولهن جهال
افراح //يا عمه واحنا على مود مياده خاتون نشيل ناسيه خاله اهنا بيتنا وعزوتنا اذا خايفه على بنات مياده
وديهن الخوالهن اما احنا بالعكس بناتي اول وتالي يمشن لان الناس تعرف منو امهن وشلون اربيهن
عمتي گالت = شنو ولچ اشو بنات مياده اوديهن الخوالهن ياخوال ذوله ما استحيتي من هيچ تحچيين
محد جاوب عمتي جميله كالت // على كيفچ منيره افراح ما تقصد
= لا تقصد وتقصد كلكم گاعدين وتسمعوني بنات عباس يبقن عدي على ما الله ياخذ امانته وانتي افراح بناتج
بعدهن زغار وما تدرين شضام الوكت
افراح بابتسامه // شنو عمه قابل اكتل هادي
كرم // ام ياسر شكو داعي الهلحچي عيب
افراح //ابو مرتضى انا ما گلت شي عمتي تريدنا نشيل شنو ذنبنا مو كافي انشلع كلبنا من وره مياده
كرم //خاله حتى انتي ترحين البيت هادي شنو كلافتج وبيتج اجري
عمتي جاوبت لان صار السكوت سيد الموقف = لا خاله انا وبنات عباس اهنا نبقى ابيتنا وانت
گلتها شنو كلافتنا انا هسه اكثر شي افكر بي اعدام هاي الچلبه الله لا يرحمها
جميله //والله عليها عين صلفه ولا مكسوره ولا مستحيه
باوعت عمتي وگالت =مع الاسف راح بعد ما يفيد لو مو يعدمونها هم غصه بحلگي تمنيت كون عباس من لاگيها
ويه ذاك الچلب كاتلها بايده چان ما استهضمت
جميله اتقربت وگالت // منيره خيه گولي الحمد لله الله ما قصر فضحها مثل ما دولبتج وشلعت گلبج
مانسمع اله دك قوي على الباب واصوات يگولون //اطلعوا جبانيه شعبالكم نسكت الكم
والباب مره يندك الجرس مره طابوك
ركض كرم هو وهادي وانا وياهم وعمتي صارت كدامنا وهي ساده الباب باثنين اديها وتگول
=لا تطلعون خلوهم يولون
كرم كلها //شنو خاله نسوان نبقى ما نطلع
هادي// يمه صيري على صفحه
عمتي ==والله ولا اوخر من الباب انتم شتحچون انوب تتعاركون ولانهم كاتلينكم لا يمه ابد خلوهم يصيحون
ويرحون من حرگة گلبهم الله يساعدهم حقهم محد يلومهم
ما سمعو ا كلامها فتح كرم الباب وانا طلعت وشفت كرم متزانك ويه واحد والثاني بيده قامه وهواي جايين
طلعت المسدس ورميت طلقه بالهوى الكل سكت ورحت على حليم وگتله
:: اخذ چلابك هالمره ماخذ بنظر الاعتبار حرگتكم وقهرتكم بسبب الحكم لكن دقيقه وحده بعد اله اخلي
امك ومرتك يجن يبوسن القنادر حتى يعرفولكم طريق
حليم //ها ما ردتوها ولبستوها التهمه وانت خابص نفسك وتهدد
باوعتله وانا اتوعده ::لا متوهم ما خابص نفسي ولا اهدد انتو الي اجيتوا هاديين وكلمه ثانيه صدك اخليهم
يجيبوها ويعدموها هي وصاحبها بنفس بيت عباس وقبلها الم هاي الناس الواكفه واخليها تعترف بالنغل مو ابنها
ولك جايبلك چلاب وعدك السان المثلك اگعد اباب المحكمه وبس يطلعونها اكتلها واغسل عاري
حليم //واحنه هذا الي نريده نكتلها بايدنا
حاچيته بنتر ::ومنو لازمك رووح الها للسجن واكتلها منو گلك هي عدنا
حليم //زين سراج نتواجه اذا ما تطلع وتتنازلون اله كلكم نكتلكم ونسويكم كيلوات لحم
جاوبه كرم//بهاي ما چذبت مو جديده عليكم وهسه ياالله گتلك عاذركم الله يساعدكم المصيبه
والفضيحه مو شويه
هادي //ولك گرن جاي تتهدد وانت تدري بيها تجي ويه عشيگها وتروح
باوعتله وگتله //حليم بسرعه روحو منا تره دقيقه والكل يرحون يم مياده وعود ذاك الوكت صيرو زلم وكتلو اختكم
دفعت هادي وكرم ودخلتهم وانا اريد ادخل وراهم عدي اتقرب مني وگلي
::شوف سراج انت اول واحد اذا عدمو اختي اول واحد نكتلك وراها
جاوبته باستهزاء ::وانا منتظركم وراح هالمره اسكت لان وضعكم ما يتحمل شكوى وتهديد بس مره ثانيه
لا تحلمون تطلعون منها
ابو فاضل زوج نسيمه گاللهم //عمي كافونه الشر روحو شوفولكم چاره
هادي يصيح //ولك احليم انت وعديو ادفنوا نفسكم
ودفعت هادي ولگيت عمتي منيره واگعه وزهراء وسلوى يغسلن بوجهها اتقربت منها وگتلها
::ما صار شي عمه اگعدي
فكت عيونها وجابولها ماي وهي تباوع وتگول
=الله لا ينطيج يامياده على الي سويتي
جميله //وهي شمنطيها الله فضحها
جاوبتهم ::يابه حقهم الله يساعدهم مو شويه لاتباعون الها هي مجرمه باوعو للتبعات الي راح تصير
افراح //چا ما ربوها عدل تصاحب زلم براس رجلها
جميله //ولج افراح شلج بهالحچي
افراح //والله عمه اخاف على جهالي ورجلي فوك شينهم گواة عينهم
جميله //تكافي افراح كلنه عدنا بنات وبنادم ما معصوم الله يستر على بنياتنا
هادي خابر ابو عيسى وگله وربع ساعه واجه الرجال هو وجماعه ويا واخذ التلفون وخابر شيخهم الي رد علي
فورة دم وهم الله يساعدهم مو شويه الي صار بيهم
هادي گله //يجوون ويحولون ويعتذرون على الي سووا ويجيبون فلوس الفصل لا اروح اشتكي بالامن واذبهم
نسوان وزلم
الشيخ //مو هيچ الحچي هاي الناس انحكم على بتهم وجريمة قتل وجريمه مخله بالشرف الي فهمته همه
يردون يكتلون بتهم
هادي بنتر //لا هيج ونص وفلوس الفصل يجن خلال هاليومين
واخذ التلفون وخابر شيخهم وگله
اسمع حجي تجون وتحولون وتعتذرون لا صدگني اشتكي بالامن العامه الي ابغداد وعندي بدل الشاهد ميه
ويذبوهم نسوان وزلم وفلوس الفصل خلال يومين تجيني
بيني وبين نفسي عرفت هادي الي يهمه فلوس الفصل
وراح ابو عيسى واجينه بالهول وحچى كرم شنو گال ابو عيسى الشيخهم والشيخ شنو رد علي
عمتي منيره گالت
=اي والله صحيح الضنى عزيز لو شيصير والله اهم بام حليم خوش انسانه وطيبه
افراح متخوصره //اذا خوش انسانه ما ربت بتها عدل ليش ذبوها ع الناس وهي مسويه الفاينه
منيره =الله يستر علينه الشيطان يا بنتي
افراح //عمه يا شيطان مياده هي الشيطان الي سوته مو شويه (وصارت تضحك وتستهزا)
ولو الحب والعشك كل شي يسوي هسه انا فنها التوصل الهادي اكتلها بايدي ومن احد يسالني اگول
كتلتها دفاعا عن الحب
سلوى گالتلها// شنو افراح احنه بياحال وانتي تستهزأين
افراح //وانا شگلت وانتي عصبتي
سلوى //طبعا اعصب انتي تضحكين وتسولفين واحنا ماكلين تبن
افراح تحچي بتكني //والله حبيبتي الي وكلتكم تبن الي چنتن كلچن تحبنها وفضلتنها عليه شبعتني ضيم وقهر
وانتن تجيبنها منا وتخلنها منا
منيره= ليش هي شگد بقت ويانه ونجيبها منا ونخليها منا كلها اربع تشهر بعد شنو هالحچي
افراح //وبهاي الاربع تشهر راويتني الويل وسواد الليل لو نسيتي
منيره عضت شفتها قهر =حقج ياعمه شتحچين حقچ ما طول ابني (واشرت على هادي )يسمع وساكت يعني
مايدچ بعد ليش اجاوبچ روحي عمه البيتج دگي وارگصي وتكني بكيفج احنه اهنا ما النه خلك نضحك
افراح اتقربت من هادي //شوفها هادي سمعت امك طردتني مو صوجج لا والله صوجي واله انا اجي
شسوي ادري بيج تكرهيني وما ترديني
وكامت افراح واخذت جهالها وهي تحچي وتسمع بعمتي
امشو يمه امشو احنه من يومنا مكروهين لو من هاي التدخل زلم چان صرنا بس احنه وبس
جميله //ولج افريحه عيب هالحچي ما تستحين احنه بيا حال ولج وتعيرين
افراح وگفت صارت تصيح وتاشر بايدها //اي اعير واعير هاي حوبتي لمن خلتها هي وبناتها على گلبها
وخوش سوت ان شالله بعد وبعد
منيره =افراح انتي الوحيده الي لازم تحبين مياده لان هي خلتج تغارين وتعتنيين بنفسج ولوماهي طالبه بيت
وعزال چان انتي الهسه گاعده وياي لان هذا الساكت ابو فليس ما يهون علي يوكلكم خبز وماي خلف الله عليها.
ترمت على عباس وانا الغمه بعت البيت وانطيته حصته واسالي طوول هاي السنين شكد اطلبه كافي انتي شتردين
افراح باوعت الهادي وتگله //شوف امك الظالمه شگد تكرهني وتكره بزري خاله هذني النغلات بحضنها
وتداري عليهن
منيره ==انچبي ولج لا تحچين هيج يا ما تخافيين من الله
انا ما اتحملت وانا اشوف هادي حتى ما گال الها اسكتي گتلها ::كافي عيب هذا الكلام ام ياسر عيب تكولين
على بنات عباس نغلات
هي ردت //لا عمت عيني قديسات دشوفو منين ملگطتهن
انا جاوبت بنتر ::اسكتي ولا كلمه من باچر اخذهن واسويلهن تحليل وراثه وصحة نسب
افراح //وانت شكو خال ولد عم ولد وتسوي صحة نسب عمي المثلكم لو يكتلوهن لو يودوهن الدور الايتام
جاوبتها ::اي انا خال وعم وعيب هذا الكلام الوين تردين توصلين
منيره //انا اگلكم تريد بلكت تودونهم الدور الايتام حتى هي ورجلها هذا الساكت ياخذ حلال عباس بس بعيده
على سنونج واسمعوني زين هاي گدامكم انا وبنات عباس باقيات اهنا
ومن باچر امشي بمعاملة الراتب مالته وما اجيتج ياافراح ولا وصلت بيتك ياهادي ولا خليت
البنات يوصلن اله (واشرت على خشمها )ينگطع الهوى والله ياخذ امانته ومن
يرحن البيت عمهن هادي عمهن كرم عمهن سراج يرحن ما محتاجات الاي احد
اهنا هادي گام وگال الافراح// ياالله امشي
عمتي منيره سكتت ودنكت والدمعه بعينها رفعت راسها وگالت //افراح بردي گلبج ما نجي نگعد عندج
راح هادي وافراح اما جميله صاحت على زهراء //تعاي ولج اتصلي بشمس
زهراء //يمه شتردين من شمس
جميله //وانتي شلج شغل اتصلي وانچبي
واتصلت زهراء وردت شمس جميله حاچتها //شميسه اطيني رجلج
هو رد عليها لان اسمع عمتي تگله
- - اگلك عمه اسألي امك من ربت افراح من اطتها خبز ما نطتها تربيه
وصارت عمتي جميله تحچي على افراح والكلام الي حچته على منيره وبناتها بعدين گالت
- - شنو افراح تريد تاخذ ورث عباس وتحلف علي مثل ما ابوك اخذ بستان خليل وسكتنا الخاطر
نصره وخاطركم
وتالي ابوك رجع الفلوس ومنيره رفضتهن وگالتله انت وخليل تنجازون يوم القيامه
وابوك گبل لا يموت راد يرجع الحلال وامك ما قبلت واجه برجله المنيره وشهدني وكال
تره مطلوب فلوس البستان وسكتنا الخاطر هادي والخاطر شمس وگلنه اول وتالي الكم بس فريحه تحچي
وتطول السانها ما مقبوله شنو ما تخاف من الله خاله دوبها ودوب اليتيمات شتريد تاخذ حلالهن شتريد
تغلط وتعير موعدها بنات خلي تخلي رجليها بالگاع لا الله يهطرها
وسدت جميله التلفون واحنه كلنه راضيين بالسوته وگعدت مقابيل منيره وصارت تنعى وتبچي والكل
صار يبچي
ثاني يوم اجت شمس جابها قيس زوجها بعدها عرفنا انو قيس رايح وكاتل افراح مگطعها وگايللها اذا
اسمع بيج متدخله ابنات عباس لو بحلاله اخذج عدي واسجنج بغرفه وماتشوفين جهالج للموت
وبقينا يومين اجو جماعه على ابو عيسى واجو البيت عمتي وانا وكرم وهادي واعتذرو عن الي صار
وبس لا نشتكي بالامن وانطو فلوس الفصل واخذهن هادي وما گال شنو سووا بيهن
ورحنا للاربعينيه وانا اخذت عمتي منيره هي وبنات عباس وبسيمه بسيارتي
وكرم ويا زهراء وامه بسيارته
وهادي اخذ مرته وجهاله
وقيس اخذ شمس وامه وابتهاج ومناك اجه موفق جايب امي
وابوي وعمي جميل ومرته اما البنات سلوى ونوال فاجن بسيارة رجل نوال رغم عمتي كالت ناجر منشاه
وكل الجوارين يرحون لكن هادي گلها
مو سوينه عزيمه وختمه للزلم وانتن سويتن قرايه للنسوان بعد عليمن هالمنشاه
وهناك صار الموقف حزين واحنا نشوف عمتي شلون صارت تصرخ وتگله
= يمه عباس حملي ثگيل والولد مو ابنك عود ردته سند للبنات
ومحد سكتها الى ان اجت ناديه وصارت تحچي ويه الگبر
... ... بابا انا زعلانه عليك يگلولي مرتاح بالجنه وبيبي تبچي وتصرخ اذا انت مرتاح اخذني انا وبيبي وحنين وياك
بعدين تقربت على عمتي وتگلها ...اسكتي بيبي اسكتي (وشاورتها )
بابا شاورني يگول بس تسكت بيبي اجي اخذكم واونسكم يمي
صرنا نبچي اكثر على هاي البراءه ورجعنا محملين حزن وبقيت اداوم بالبصره وكل ما صارلي مجال انزل
يم عمتي واتسوك واخذ البنات اطلعهن واونسهن
واخذتهن مرتين البيت ام رضا رحنا انا وعمتي والبنات وگامولنا بالواجب
وثاني مره عمتي اشترت هدايا وراحت وياي هي وعمتي جميله وزهراء
وهناك اشوف ناديه وحنين فرحانات وهنه ابين الزرع والحيوانات الي بلهجة رضا يسمي الحلال
من نوصل تبدي ام رضا تنعى وتبچي وبعدين تاخذ عمتي ويرحن للزرع
وانا ورضا نروح نصيد وناديه تروح وياي بعكس حنين الي دائما لو يم عمتي لو يم زهراء
نروح نبقى يومين ونرجع
وره شهر من رجعتنا من العماره المغرب رن تلفون المكتب رديت
:: الو
- الو اشلونك استاذ سراج انا رضا
:: هلا بيك شنو هاي استاذ شلونك
- - سراج انا باالله وبيك طايح بمصيبه
انا انتفضت ::خير رضا شصاير
:: سراج كتلت ابن عمي الكتل اخوي وتدري هو رفيق چبير وانا هسه جبت امي وفروخ المرحوم
وعلي وطلعنه بالعزيزه
::على كيفك رضا انت هسه وين
- - انا وصلت للبصره
:: تمام بس اسألي اي احد بيا مكان
- - انا هسه اخابرك من تكان (دكان )
:: زين انطيني ابو المحل
وحچيت ويا وعرفت عنوانهم وركبت سيارتي ورحت اخذتهم واجيت البيت عمتي وعرفت انو ابن عمهم
الي كتل اخو رضا ولانه رفيق حزبي استولى على الگاع وطالب بجهال اخته وصار يهدد ورضا ساكت
لان يخاف على اخو علي وعلى اولاد اخو ما اتحمل راح كاتله بالگاع
وبذاك الوكت اذا رفيق انكتل تنگلب الدنيا فالتجالي واخذتهم البيت عمتي وبعدين قررنا ان يگعدون ابيت
عباس لان بعد محد ماجره اما رضا وره فتره اخذته البغداد وخليته يكعد ابيت اهلي القديم بعد ان دبرتها ويه خالي
وما عرفنا شي عن مياده وسلدار رغم اشوف بعيون عمتي اسئله اعرفها تريد تعرف بمياده جابت لو لا
فد يوم انا بالدائره ورن التلفون
::الو
=الو ها عمه سراج شلونك
::هله عمه خير شصاير
=لا عمه بس توه شرطي اجه گلي ناديه مطلوبه للمركز
:: وينه الشرطي يمج
=عمه انطاني التبليغ وراح وگلي مطلوبه للمركز وانا راسا اتصلت بيك حتى ما خابرت لا هادي ولا كرم
::زين عمه العصر انا يمج ولا تحچين الاي احد والورقه ضميها لاتراويها اجي واشوفها زين
=اي عمه ان شالله
///////
شكرا لزيارتكم عالم روايات سكيرهوم
