رواية جذبني فمك البني الفصل الثامن عشر 18 بقلم عبير إدريس

الملح فوگ الجرح بلضيم .. خله

واصبر لاتبين اعليك .. خله

لتحشمه الضميره يموت .. خله

ندهته وندهت الميت سويه

___________

دزيتله

عمو شنو الصار ليش مترد تره ضل بالي واريد احجي ويه مريم مشتاقتلها..

ورة ساعه دزلي..

من تشوفين ما ارد ليش تلحين..

الوصل الجان بينه انقطع انسي مريم

وانسينه والتهي بحياتج ..

ضليت صافنه ليش هيج دزلي كتبت.

اوك براحتك بس ممكن اعرف السبب؟

قراها ومدزلي بعد..

ضليت حايره وصرت دم من القهر اجتي ايفين شافتني كالت..

ايفين : شبيج شكو..

شوفتلها الرساله قرتها وسكتت معلقت.

مشت الايام واني القهر كتلني ماعندي احد غيرهم وحبيتهم ليش هيج بعدنه عنهم غفل ، هسه لو بس اعرف اخبار مريم هاهيه ماريد شي ..

كعدت الصبح اريد اروح للصالون مالي خلك بس كمت لان مجبورة هذا شغل مو لعبه ، بدلت باوعت لايفين نايمه انقهرت عليها اكعدها عفتها وطلعت من وصلت اخذتلها اجازة بسبب مرضها لهذا تعاطف وياها ابو الشغل ..

مشت الايام وذبيت حيلي بالشغل كمت اخذ شفتين بدل الشفت الواحد هم علمود اجمع فلوس حتى اخذ اختي ونطلع نعتمد على نفسنه وهم اخلص من النك مال امي ،

بس شنو الصار بلشت تحاربني على شغلج زاد المفروض يزيدج اكثر ، واني اسكت واغلس عليها..

وبيوم دا اشتغل واجتي للصالون ، مجنت ادري لان ملتهيه اصبغ بشعر زبونه بس سمعت صوتها تصيح ويه الرجال وتردله الكلمه بعشره ، تالي دز عليه لكيته صاير كتله مال غضب ..

باوعتلها وخزرتها حجيت من بين اسناني..

سيلين : شجابج

تمارة: جيت اشوف ماكلين حقج لو تجذبين على امج ..

سيلين : شعليج بيه شعليج عسما اشتغل بلاش انتي شكو..

قاطع كلامنه ابو الصالون ..

_ اعتقد اكو سوء تفاهم بينكم وياريت تحلو بعيد عن مكان العمل لان مكانه اله سمعته وميصير جدالاتكم العائليه تتحول هنا..

سيلين : صح اسفه ان شاءالله متتكرر.

تمارة : هو شنو الاسفه راتبج وينه شنو ابطنه لاغفه..

_ عزيزتي انتي منو كلج ماناطيها راتب كامل اذا بنتج تكذب عليج فهاي مشكلتكم مو مشكلتي هاي القوائم مال رواتب وهذا راتبها هيه واختها جامعهن يمي وشوكت متريد تسحبهن انطياها احنه مو سراق انتقي كلامج ..

من قرت المبلغ تفح وجها واعتذرت منه وكالت..

تماره : اي هيه تريد تسحبه بس تخجل منك ..

_ وليش تخجل هذا حقها وتعبها تعاي سيلين انتي مو هذا طلبج..

سيلين : صحيح وماريد اسحبهن خليهن يمك.

تمارة : لا عيني نسحبهن لان بنتي الثانيه مريضه وتحتاج علاج تعرف عايشه بتك كلى ويرادلها مصاريف هواي وهنه يتيمات واحنه على كد حالنه.

_ شتكولين سيلين اسحبلج فلوسج كامله..

ضليت عين على ابو الصالون وعين على امي والبنات الداير مدايري كلهن تعاطفن ويه امي ويصيحن خطيه والمفروض متضمين عليها واختج تحتاج علاج مكدرت اكول لا كتله ..

سيلين : اسحبهن وانطيهن لامي .

عفتهم ورجعت اشتغل والنار شبت بكلبي اريد املخها حتى حيل مضل بيه بعد كمت اروح واجي بالصالون واسمع حجي اقل النص ساعه ، اخذت جنطتي ورجعت للبيت لكيتها كبالي كاعده تحسب بالفلوس ، عطت بيها..

سيلين : انتي شلون تجين للشغل وتحرجيني متخجلين من نفسج من هيج فشلتيني.

بللت اصبعها بحلكها وكعدت تحسب بالفلوس ومجاوبتني..

سيلين : مو وووووووياج اني ليش تتعمدين تسوين بيه هيج..

تمارة : حتى مره ثانيه متضمين على تماره وتعرفين بيها شتسوي..

سيلين : اصلا ما كمت اتفاجئ بأي تصرف يبدر منج انتي مو ام انتي شيطان..

تمارة : يلا عيني عفنه الرحمه الج ولابوج ال*** لتخليني اسبه ...

سيلين : حسبي الله ونعم الوكيل بيج كلشي ماكول..

دخلت لغرفتي شمرت الجنطه بالكاع خليت ايدي على راسي وكمت ابجي طبت ايفين ...

ايفين : ليش عفتي الصالون شنو الصار دزوني عليج عدنه شغل هواي اليوم..

سيلين : ماريد اشتغل بعد راح ابطل..

ايفين : ليش شنو الصار..

سيلين : مسمعتي امج شسوت من اجتي للصالون..

ايفين : اني جنت فوك اساعد الماكيرا بالعرايس وعالكين اغاني لهذا ماسمعت اي شي بس من نزلت ابو الصالون سألني عليج كتله مشفتها البنات كالو طلعت ودزوني عليج لان نتصل عليج متردين.

سيلين : فضحتني وتحججت بمرضج وسحبت فلوس تعبنه كلهن..

ايفين : كذب..

سيلين : كاذبه عليج قبل .

ايفين : اموتها والله شلون هيج تسوي..

مجاوبتها ركعت باب الغرفه وطلعت سمعت عياطهن تعاركن لهناك وماما عاطت..

تمارة : يمه ايفين لج سيلين الحكي ..

طلعت والكى اختي واكعه بالكاع لا ايد ولا رجل كمت اضرب على وجهي عطت بماما بصوت عالي.

سيلين : شسويتيلها احجي .

تماره : ماسويت ماسويت هيه انفعلت وصارت عصبيه وتالي وكعت..

سيلين : انتي ام انتي صارلها كومه ويايه مافديوم اذيتها علمود لتوصل لهذا الحال ، كومي جيبي تكسي ناخذها للمستشفى كووووومي ..

طلعت تركض وكفت تكسي وطبت كالت...

تمارة : نشيلها..

سيلين : عينيني خلي نسندها..

سندناها منا اني ومن الجهة الثانيه هيه وطلعناها وصلنه للمستشفى اجوي اخذوها من

عدنه وكبل للطوارئ ، اخذولها الضغط طلع هابط وطلبو تحاليل وسونار ، طلع عدها رمل بالكلى والتهاب بالمثانه وفقر دم ..

سيلين : طلعي من الفلوس العندج بسرعه .

تماره : ها اي اي.

سيلين : حتى تجوزين تتفاولين على البنيه وتخليها حجه علمود تبوكين فلوس بناتج..

تماره : سدي حلكج لا اهفج واكسر سنونج.

سيلين : دسويها وشوفي شسوي ..

تماره : اني اعلمج بس نرجع انطيني صبر..

باوعتلها ودرت وجهي انفخ بضجر..

مشيت بممرات المستشفى ضايعه ماعرف شسوي والمن التجىء منو يسمعني منو ينصحني منو يوجهني ويخليني على الطريق الصحيح ..طلعت موبايلي ودزيت مسج لادهم كتبت..

اعرف متريد تحجي ويايه ويمكن واصلك فكره غلط عني بس اللي اريد اكوله الك اني ممسويه شي غلط وروح بابا ، عمو اني ضعت محتاجه احد ينصحني ماعندي غيرك من بعد عمه انت الغريب القريب بالنسبه الي...

دزيتها طلع تم التسليم وهم مجاوبني...رجعت الموبايل بالجنطه ورحت كعدت يم راس ايفين قريت ايات عليها وانفج على وجها وادعي ربي كون مابيها شي...

مرت ساعتين كمل المغذي الجانو شاديه لايفين وكالو تكدرون تطلعوها وكتبولها علاج مع توصيه على حالتها ويرادلها اهتمام بالاكل وراحه ووووو الخ ،

اخذناها وطلعنه اخذنه تكسي رجعنه للبيت دخلناها بغرفتنه وطلعت اجيبلها الدوة ،

مشيت الجو حلو واخذتني رجلي وصفنتي ماعرف شكد مشيت بس حسيت على نفسي ابتعدت هواي عن البيت من دك موبايلي طلعته ايمن مدري اضحك مدري ابجي عبالك حس بيه اريد احجي ويه واحد ويسمعني ...

كعدت على مصطبه جانت بالطريق وجاوبته..

سيلين : هيج تقاطع خواتك ما مرجيه منك .

ايمن : حقج بس جنت مسافر ..

سيلين : مسافر ؟ لعد شلون اخابرك ويدك ومتجاوب..

ايمن : خطي ضل مفتوح لان بيه ارقام مال شغل الوالد وضل يم فهد وانه سافرت ورجعت قبل كم يوم شنو وين انتو هسه.

سيلين : وين بنص الخير.

ايمن : لا صدك وين احجي.

جريت نفس طويل وكتله..

سيلين : رجعت يم امي..

ايمن : ها مو كالو يم عمامج..

سيلين : منو كال ؟

ايمن : ادهم.

سيلين : هممم لا يم ماما..

ايمن : ليش احسج شايله بخاطرج

سيلين : لا بس تعبانه..

ايمن : تواصلتي ويه ادهم ..

سيلين : حاولت ومنطاني مجال..

ايمن : عذريه تره تعبان وبغير دنيا..

سيلين : مصار زين .

ايمن : وداعتج للأسوء من تلزمه النوبه مال شقيقه متفك منه وبس يصيح راسي..

سيلين : خطيه وين هسه هو مريم وين منو يداريكم..

ايمن : احنه بغداد بعدنه وصارت هواي امور وهواي تغييرات يراد كعده طويله ونسولف مبين انتي مو بلبيت صح..

سيلين : اي صح

ايمن : كاعد اسمع صوت سيارات..

سيلين : رايحه اجيب دوة لايفين ..

ايمن : خير سلامتها ..

سيلين : تخربطت واخذناها للمستشفى وطلع عدها فقر دم وشغلات ثانيه كتبولها علاج وطلعت اجيبه.

ايمن : ها زين مابيها غير العافيه سلميلنه واي شي تحتاجين انه اخوج .

سيلين : متقصر تسلم ..

ايمن : مع السلامه.

سيلين : الله وياك..

سده وراح حسيت واحد كاعد يمه لان اسمع همس يردله الكلام وهيج شي وسالفه السفر مدخلت بعقلي جوز ما راد يحرجني انو سامع بسالفه زاكروز وهيج مشاها اني هم سويت نفسي مصدكه..

كمت رحت للصيدليه اشتريت العلاج ورجعت للبيت ، امي نايمه وايفين هم نايمه ورجل امي طالع مدري شعجب اليوم صاير رجال ويطلع ، دخلت للمطبخ سويت اكل الي ولايفين ،

اني واختي نطبخ وحد وامي ورجلها يسوون وحد ومن جنت بالصالون ناكل من بره نشتري لفات لو مرات ابو الصالون يدزلنه اكل نتغده واضل على الغده ما اكل شي بس ايفين تتعشه لان عدها علاج ...

دخلت للمطبخ شافتني واكفه يم الطباخ واسوي بالاكل صاحت..

تمارة : شوكت ترحين للصالون.

نترت بيها.

سيلين : ماروح بعد..

تماره : مو بكيفج ...

التفتت الها خزرتها ..

سيلين : بكيف منو لعد ؟

تمارة : اذا متطلعين للشغل متاكلين هنا وشوفيلج مكان تنامين بيه الرجال غريب يكعد يصرف عليجن..

سيلين : وين رواتبي الاخذتيهن جيبيهن وانطيج مصرف منهن ومعليج مني اذا اشتغلت او لا فلوسي تعيشج سنه ليكدام..

تماره : لا حبيبتي ذني الفلوس مال الاشهر الفاتت اكلج ومنامج جان بلاش.

سيلين : ليش مو جنت انطيج فلوس .

تمارة : قصدج تفاليس ..

سيلين : هسه شتريدين مني فهميني ..

تمارة : متاكلين اذا متشتغلين..

سيلين : زين هذا الاكل تعاي كمليه وغدي بنتج وانطيها علاجها واني موليه..

تماره : اي هيج من الاول يلا روحي اشتغلي وجيبي يوميتج مو تجين ايد ورة وايد كدام..

عفتها وطلعت احس بغضب بداخلي اذا طلعته بصرخه يمكن تطلع روحي وياه...

جنت بعدني بملابسي اخذت جنطتي وطلعت افتر وين اروح وين اولي رحت للصالون اول ما دخلت ترزلت من ابو العمل..

_ شو بكيفج طلعتي مكلتي عندي شغل وهاي زبونه براسها الصبغ يصير هيج تسوين على هذا اهمالج تشتغلين اسبوع بلاش..

سكتت ودخلت لبست الصدريه ، جانن ثنين عاملات كاعدات هنه يضوجن مني كامن يتبسبسن هنا اعصابي بدت ترجف بعد ما اتحمل اذا بقيت اعرف بنفسي انهار واضل ابجي واضحكهم ع

ليه اخذت جنطتي وطلعت تذكرت عمه وعيوني تزخ دموع مشيت ماعرف شكد وصلت مكان قليل بيه ناس خليت جنطتي على مكان بيه حشيش وكعدت تجيت ظهري على الحايط وعيني على اليروح واليجي ..

هسه لو اهلي غير اهل لو بابا موجود لو عمه بعدها وين اروح وشلون اخلص من تمارة اللي من جيت لسه ماكدر اكلها ماما متطلع من كلبي اكرها اول مره اشوف بنيه تكره امها ماعتقد اكو وحده مثلي تكره امها...

طلعت الموبايل وكمت اكلب بيه دخلت على الرسائل ماعرف ليش احتاجيت احجي وياه اعرف بيه تعبان اعرف متأذي ومريض بس ماعندي احد الجئله غيره ..

دزيت

شلونك عمو ؟

وره شويه قراها ودز

من كل عقلج تسأليني هذا السؤال ..

جاوبته

هذا الطبيعي بدايه كل حديث لازم اسأل عن صحتك اخبارك ماعرف اذا غلطت بشي؟؟

دز

يعني انسان ميت يسألوه شلونه اكيد الجواب يمج..

دزيت

اسفه بس يمكن الوقت الدزيت بيه الرساله جان غلط.

جاوب

سؤالج غلط.

دزيت

لان كلت شلونك تره مكلت شي غريب ..

دز

مرات السؤال يقتل اكثر من الحال العايشه...

الله يساعدك بعدك متأذي؟

ما احب احجي للناس جروحي وعجزي وحزني خليني ساكت افضل .

اسفه لان فتحت جروحك بسؤالي..

ماكو داعي تتأسفين انه بالغت برده فعلي يمكن من الضغط الانه بيه ردت افرغه بواحد ومن مساوء الصدف طلعتي انتي..

هههه لو تدري شصاير بيه مجان هيج جاوبتني لو تدري اني وين كاعده هسه ومن شنو مهزومه..

ليش شصاير وياج وانتي وين؟؟؟

اني بالشارع

ليش مترجعين لبيتكم ..

لان الشارع أأمن عليه من امي..

سيلين ظل بالي شنو الصاير..

ماكو شي ليضل بالك بس حبيت اسلم واسأل عنكم

اذا تحتاجين شي اتصلي او دزي مسج وماقصر.

اعرف شكرا جزيلا تعبتك..

من كاعي تعبان يعني مو انتي تعبتيني..

شلونها مريم..

زينه احسن من قبل..

مشتاقتلها..

دوم تسألني عنج وعن ايفين

وشنو جنت تكللها

مالي خلكها

دير بالك عليها امانه

ليظل بالج عينج على اختج.

ماشي مع السلامه..

لحظه

نعم

رجعي للبيت لتظلين بالشارع من توصلين بلغيني..

راح ارجع مع السلامه.

هسه سيلين هسه رجعي..

راح ارجع ليضل بالك ابو مريم..

.........

دزلي نقاط شنو قصده ماعرف ولا اني السألت..

كمت تمشيت ورجعت للبيت اول مافتت اخذت من ايدي الجنطه كلبتها كلاب.

تماره : وين يوميتج..

صفنت بوجها..

سيلين : بطلوني..

تمارة : جذابه ..

سيلين : لتصدكين كيفج..

ردت افوت جرتني حيل من ترواكتي صرت كبالها ضربتني راشدي..

صيحت بعلو صوتي..

سيلين : ليش ليشششش تمدين ايدج عليه ..

تماره : حتى تتأدبين ..

حجايه مني حجايه منها طلع رجلها من الغرفه جان نايم باوعتله بطرك الفانيله والشورت وبيده حزام اول ما ضرب امي وعاط بيها .

_ متكولين اكو حيوان جوه نايم بس المشاكل انتي وبناتج اطردج انتي وياهن واخلص..

تماره : اخ لتضرب والله سكتت شوف ما احجي بعد ...

خلت ايدها على حلكها وهو يضرب بيها و تعيط .

عفتهم وطبيت لغرفتي توني اكعد وانضرب على ظهري حيل بالحزام انداريت ولكيته ورايه واكف دفعته لو تخبل ..

سيلين : انت شنو حيوان شلون تمدك ايدك عليه غبي..

_ اكسرج هم وانعل ابوج لابو عشيرتج..

هو يضرب واني اكمز من الوجع كمت ابجي بحركه هاي تاليها انضرب من واحد حيوان ..كمت اصيح ..

سيلين : ارتاحيتي من اخذتيلج حيوان ودخلتيه لبيتنه ونطيتيه حالج ومالج حسبي الله عليج يجي يوم واذكرج بهذا اليوم قابل متشمرج الدنيا عليه متوكعين متنذلين..

اني اصيح وهو يضرب بيه مثل الحيوان..

وهيج مرت الايام اداري اختي واطلع ادور شغل واذا رجعت ما لاكيه تتعارك ويسمع زوجها يطب يضربها ويضربني ..

ايفين : امشي ننهزم نروح بيت عمامي احسن.

سيلين : اي احسن ناس انكس من ناس متسكتين انتي..

ايفين : نضل هيج لعد.

سيلين : شسوي شبيدي انطيني حل واسويه ..

ايفين : كتلج نروح لبيت عمي.

سيلين : انتي روحي بعد الصار ويه زاكروز واتهام امه الي وسكوت عمي مستحيل بيوم افوت بيتهم.

سكتت واني سكتت..

مرت ليال عجاف وايام سوده واني اعاني من القهر والألم الليل كله ابجي وماكدر انام يصير عندي ارق وبالنهار مشاكل وعراك ..

وبيوم طلعت الصبح ادور على شغل ..قريت لافته معلكه على حايط تابع لسوبر ماركت رايدين عاملات دخلت سلمت نزعت النظاره الشمسيه وسألته..

سيلين : السلام عليكم عمو ..

_ وعليكم السلام اهلا..

سيلين : قريت لافته مطلوب عاملات بس ردت اسأل شنو نوع الشغل؟

_ انتي شنو تعرفين تسوين..

سيلين : شنو قصدك .

_ يعني معجنات كبب شنو ايدج ماخذه عليه وكون سريعه..

سيلين : اعرف اسوي كبب .

عمه علمتني جنت اكعد الف وياها من تسوي اعرف بس مو سريعه كلش..

_ اذا تعرفين هاج هاي الورقه ادخلي جوة اكو بنيه بالباب تاخذها منج وتسألج كم سؤال اذا تمام تشتغلين من اليوم..

اخذت من ايده الورقه تشكرت منه ورحت مثل ما كلي وصلت للبنيه اخذت مني الورق

ه وهم سألتني كتلها اعرف كالت غسلي ايدج ولبسي جفوف وبلشي ويانه ،،

دخلت مكان جبير وبيه مجموعه بنات بيهم عشره كل ثنين كاعدات يسون شغله معينه ، رحت غسلت ايدي ولبست جفوف وبلشت اشتغل وياهم ، تباوع على ايدي وتضحك..

_ تتعلمين تتعلمين كلنا من بلشنه هيج بطيئات بعدين نصير اسرع نشتغل علمود نكمل من وقت ونرجع لبيوتنه.

ابتسمت ودنكت اشتغل ، اول يوم كملت لف ٥٠ كبايه وهو لازم ١٠٠ وفوك ...ظهري انكسر اريد اوكف ما اكدر من التعب طفرت الدمعه بعيني ..كملت ردت اطلع سألني ابو الشغل ..

_ تحبين احسبلج يوميه لو شهريه..

صفنت يوميه تاخذها مني ويروح تعبي هيج شهريه تاكل راسي بالمشاكل وحرت شسوي .

_ ها بابا شقررتي.

سيلين : شهريه.

_ يلا شهريه شهريه على الخير شغلج الجديد..

سيلين : شكرا..

طلعت كوه امشي رجعت للبيت مشي اول مادخلت سمعتها تتعارك ويه ايفين ..

دخلت عليهم ونترت.

سيلين : شبيج وياها تره مريضه مو صاحيه وتتعاركين..

تخصرت وباوعتلي.

تماره : وين جنتي عيني.

سيلين : وين جنت ادور شغل..

حجيتها وشمرت الجنطه ومفتاح البيت على الميز..

تمارة : نظفي البيت واريده يلمع لمع..

سيلين : خير لازم خطارج ثكيل اليوم..

تمارة : انجبي ادبسز اصدقاء عمج راح يجون..

سيلين : ياهو عمي خاف الحيوان مالتج حاسبته عمي ولو همه نفس الشي ماكو فرق بينه وبينهم..

تماره : بله لغوه وكومي على البيت ..

سكتت وهيه طلعت..

ايفين ضلت تدردم براسي عطت بيها..

سيلين : تره اعصابي كاعد ترجف يعني حجايه لخ منج اروح ادجها بسجينه بكلبها لو اموت نفسي تره مليت تعبت تعبت حسو بيه عاد..

كمت اضرب على راسي كعدت بالكاع ابجي شنو من ام بلوه عندي..

صاحت وينج كلت بكلبي الله ياخذني ويخلصني منج ...

كمت طلعت صرخت بعلو صوتي..

سيلين : شكو شتريدين مني شتريدين تره تعبانه اني تعبانه حسي بيه خبلتيني ..

تماره : كتلج نظفي البيت وانجبي..

سيلين : استغفر الله ربي .

اتجفيت الشر وكمت انظف رشيت الكاع بالمي كلت اجره بالماسحه مابيه حيل اكنس وارجع امسح ، مسحته توني اريد انشف الكاع بالوصله اجتي وضربتني على ظهري حيل بالجفجير ..

تماره : هو هذا هم شغل من وره خشمج ياعار..

التفتت عليها وعطت بوجها ابجي...

سيلين : اكرهج وحتى اذا متي ما انقهر عليج وما انزل دمعه من عيني..

تماره : امشي عار لو بيج خير جان تزوجتي لا فلحتي بزواج لا بدراسه البكدج عدهن اربع جهال..

سيلين : اي بزودج ماكملت دراسه بزودج اني هنا يمج بعدني منو ياخذني بعد وانتي سمعتج على كل لسان كل ما اطلع يكولون هاي امها كح****..

تمارة : انجبي ادبسز ...

حجتها وضربتني راشدي..

كمت ابجي واصيح اتهسترت و اعصابي ترجف..

سيلين : لتضربين لتضربين والله اضربج والله لتخليني اتجاوز عليج..

تمارة : المن تضربين المن شو مدي ايدج اريد اشوف شلون اليوم لو اني لو انتي.

ضلت تضرب بيه كعدت بالكاع انهارت كل قوايه بعد مابيه حيل ..

تعبت منها ومن نفسي ومن الدنيا كلها، كلشي طلع من عيني شابه بهيئه عجوز صرت..

كمت دخلت لغرفتي حضنت نفسي ونمت ، كعدتني العصر تهمس يم راسي.

تمارة : كومي لبسي شي على راسج وتعاي ورايه واذا فكيتي حلكج والقران اكسرج تكسر.

سيلين : وين اولي وياج..

تماره : كومي غسلي وجهج وجه القرده حرام وخلي بوجهج شي وطلعي اذا ما جيتي حزام غزوان يلعب عليج وتعرفيه من يتخبل..

سيلين : قصدج من يتحيون.

باوعتلي وطلعت كمت غسلت وجهي ولبست الحجاب وطلعت للهول لكيت نسوان ثنين مثل اشكال امي بالضبط مو راحه ابد ورجال يطلع اربعيني نهايه الاربعين كرشه متر وكصير وغزوان رجل امي هم كاعد وهيه حارت شلون تقدمني الهم وتمدح بيه...

تمارة : تخبل ونادره وكلشي تعرف طبخ وكص شعر ومكياج وتنظيفها توب.

همست المره : اي زين تفيدنه ..

الثانيه جاوبت امي.

_ منو معلمها وهيه بعدها صغيره..

تماره : اني علمتهن على كلشي من هنه وصغار..

الشايب الكاعد كام يلف بطرف شاربه ويمسح بحلكه ويباوعلي، شكد انقرف من هاي الحركه رجلها دوم يسويها من يباوعلنه ...

طلعت متحملت فتت للغرفه كعدت على الجربايه ..

ايفين : منو ذوله الجايين.

جنت مدنكه وخاله ايدي على راسي همست ..

سيلين : من جماعه امج ...

ايفين : شنو رادو منج؟

سيلين : ماعرف هسه تجي تغرد ونفتهم..

وره شويه طبت و اجتي كعدت بصفي ..

تماره : شوفي ماما هذا الرجال شاريج ابن ناس وخير وجيبه مليان ويغركج فلوس صفقه متتعوض..

رفعت راسي والتفتت عليها.

سيلين : يعني اني صفقة بنضرج؟

تماره : هيه البنيه شنو لعد ؟

سيلين : احجي عن نفسج اني واختي معليج من عدنه..

تماره : اذا انتي مقبلتي انطيهم ايفين.

سيلين : بكيفج انتي جربي سويها وشوفي والله اكتلكم وافوت سجن وما انطي اختي..

تماره : لعد تزوجيه انتي وفضيها ...

سكتت ماعرف ليش هيج شخصيتي ضعيفه ليش ما اكدر اجاوبها ليش ما اتخذ موقف منهم ..

تماره : يعني هاهيه نردلهم جواب موافقه.

سكتت هيه ضحكت وطلعت اجتي ايفين كعدت يمي.

ايفين : انتي كل عقلج ت

قبلين شبيج تخبلتي ، وينها سيلين المغروره بجمالها وذكائها وين راحت.

سيلين : هو غروري بنفسي طيح حضي شكد تقدمولي ناس من جنه بيت عمي ليش مقبلت لان جنت اريد الاحسن من اشوف شكلي بالمرايا انغر بروحي واكول لا اني استاهل واحد احسن من التقدملي..

ايفين : وفعلا تستاهلين الاحسن ليش هو منو اجاج بيه حظ شو كلهم مدري شلونهم..

سيلين : على الاقل احسن من عيشتي هاي جان ارتاحيت هسه الله يعلم شراح يسوون بيه ذوله الناس ومنو يكول هذا صدك راح يتزوجني علمود يسترني مو ماخذني لأجل شغلات ثانيه.

ايفين : لتوافقين ديري بالج.

باوعتلها بتعب وهمست بضعف..

سيلين : عندج حل ثاني ؟

دنكت راسها وكالت.

ايفين : ننهزم.

سيلين : وين نروح وهم تاليتنه نروح لهيج ناس بس الفرق نروح برجلينه.

سكتت واني سكتت مددت ونطيتها ظهري ...

لليل كمت اريد اروح للحمام طلعت من غرفتي البيت جان اظلم بس ضوه الممر معلوك، دخلت للحمام و طلعت ..

انحطت ايدي على حلكي والايد الثانيه حاوطت خصري انرفعت من الكاع ونسحبت للمطبخ..

كمت ادفر بيه برجليه وعضيته من اصيده الخالها على حلكي التفتت بصقت بوجها..

سيلين : نذل كلب متستحي لك انت شنو..

باوعلي من فوك ليجوه همس بصوت اشبه بفحيح الافعى...

غزوان : خلينه نتونس قبل لا تروحين..

سيلين : شتتونس وخر ايدك هدني ...

كمت ادفع بيه وهو يشدد لزمته اقوه .

غزوان : امج نامت من وكت وعافتني حاير والبيك صعد براسي دتعاي شبيج منطول .....

عطت بيه ..

سيلين : لك انت شدتحجي شكد قذر وخر من وجهي فوكاها سكران حيوان حيوووان..

كمت ابجي منقرفه منه ونفسيتي صارت صفر ..

ضربته هدني ركضت طلعت ايفين من الغرفه صاحت شكو ..

شافتني اركض تخبلت طبيت للغرفه ردت اسد الباب ملحكت دفعها وفات قفلها ونزع تشيرته شمره بالكاع وركض عليه ،

كام يضرب من اقاومه ويرجع يبوس بوجهي وركبتي لعبت نفسي منه كمت اصرخ بعلو صوتي والباب تندك سمعت صوت ايفين تبجي وصوت مرته اللي ميشرفني اكول عنها امي لان متطلع من حلكي..

سيلين : وخر عني قذر وخر ..

غزوان : اي ليش ياعيني مو راح ترحين لبيت مشعان حلال عليه وحرام عليه ..

ادفع بيه وهو يقربني من جسمه اكثر ..

سيلين : لعبت نفسي منك وخر مني لك وخرررر دمرت نفسيتي الله ليوفقك...

ابجي واشهك وهو يضحك عليه ..

اسنانه صفر مال شرب وسن واكع باوعت عليه انقرفت باسني وتقيأت عليه

كام يسب ويغلط ، ضربني راشي فتح الباب وطلع..

طبت ايفين ركضت كعدت يمي وتمسح بوجهي وتبجي نيمتني بحضنها وتشهنك..

ايفين : الله ليوفقه الله يموته ونخلص.

تماره : شجابج عليه نذله..

عاطت بيها ايفين ..

ايفين : طلعي برررررره منريد نسمع حسج ولا نشوف وجهج طلعي..

طلعت وسدت الباب واني نايمه على رجلها ارجف واشهك..

ايفين : لتخافين مجرد ساعات ونطلع منا صبري للصبح ..

شكرا لزيارتكم عالم روايات سكيرهوم